སྒེག་གི་ཡིག་དྲུག་གནས་སྲུང་གཟའ་ཀླུའི་བསང་མཆོད་རྒྱས་པ།

རང་བྱུང་དབྱིངས་ཀྱི་ལྷ་ལ་འདུད༔ རིགས་གསུམ་འཕགས་པས་བྱིན་བརླབས་ཤིང༔ གསུང་མཆོག་ཡིག་དྲུག་གནས་ཀྱི་བདག༔ སྲུང་མཛད་གཟའ་ཀླུའི་བསང་མཆོད་འདི༔ བསྟན་དང་བསྟན་འཛིན་བསྲུང་བ་དང༔ མི་མཐུན་ནད་གདོན་བཟློག་པ་དང༔ མཐུན་པའི་སྡོང་གྲོགས་འགྲུབ་པའི་ཕྱིར༔ དབྱིངས་ཀྱི་བརྡ་ལས་དབྱིངས་ཀྱི་ཆོས༔ ཕལ་པའི་སྤྱོད་ཡུལ་ལས་འདས་པའི༔ བསང་གསུར་བདེ་ལེགས་ཀུན་འབྱུང་སྤེལ༔ ས་མ་ཡཱ༔ སྟེགས་མཐོན་ཁ་རུ་ཤིང་རྩི་དང༔ ཕྱེ་མར་འབྲུ་སྣ་ཚོགས་ཚད་བསྲེས༔ རྣལ་འབྱོར་ཡི་དམ་ལྷར་གསལ་ངང༔ དད་དང་དམ་ཚིག་ལྡན་པ་ཡིས༔ མཆོད་མགྲོན་མདུན་མཁར་སྤྱན་དྲངས་བསྟིམ༔ འབྲུ་གསུམ་སྔགས་ཀྱིས་མཆོད་རྫས་བྱིན་གྱིས་བརླབས༔ ཧྲཱིཿ རང་ཉིད་འཕགས་མཆོག་སྤྱན་གཟིགས་གསལ༔ ཐུགས་སྲོག་ཧྲཱིཿལས་འོད་འཕྲོས་པས༔ སྐུ་གསུམ་ཞིང་དང་ས་སྤྱོད་ཡུལ༔ མཁའ་སྤྱོད་གནས་ཡུལ་འོག་མིན་ཞིང༔ གནས་ཡུལ་གར་བཞུགས་ཞིང་ཁམས་ནས༔ ཁྱབ་འཇུག་ཟླ་བ་ཐོད་དཀར་དང༔ ཀླུ་རྒྱལ་འཁོར་བཅས་སྤྱན་དྲངས་གྱུར༔ དམ་ཚིག་རྟེན་ལ་བག་ཕེབས་བཞུགས༔ ཁྱེད་རྣམས་དགྱེས་པ་བསྐྱེད་པའི་མཆོད་ཚོགས་ནི༔ སངས་རྒྱས་སྤྱན་མའི་ཁམས་སྣོད་ཡངས་པའི་ནང༔ གོས་དཀར་ལྷ་མོས་བསྐྱེད་པའི་མེ་ལྕེ་ཡིས༔ ཤིང་རྩི་སྣ་ཚོགས་བསྲེག་པའི་དུད་སྤྲིན་འཁྲིགས༔ བདག་ཉིད་མ་ཡིས་འབག་བཙོག་བཀྲུས་ཤིང་བཤལ༔ དམ་ཚིག་སྒྲོལ་མས་ཕྱོགས་བརྒྱར་བསྐྱོད་མཛད་པས༔ གཟུགས་སྒྲ་དྲི་རོ་རེག་བྱ་སྨན་གཏོར་རཀ༔ རྫས་རྟགས་འདོད་རྒུའི་ལོངས་སྤྱོད་མཁའ་དབྱིངས་ཁྱབ༔ མ་ཚང་མེད་པའི་མཆོད་ཚོགས་དམ་པ་འདིས༔ དཀོན་མཆོག་ཀུན་འདུས་དྲིན་ཆེན་བླ་མ་བསང༔ ཡི་དམ་ཞི་ཁྲོ་མ་སྲིང་ཌཱཀྐི་བསང༔ བཀའ་གཏེར་སྲུང་མ་དམ་ཅན་རྒྱ་མཚོ་བསང༔ ཡིག་དྲུག་གནས་སྲུང་ཁྱབ་འཇུག་དྲག་པོ་བསང༔ ས་ལ་དབང་བྱེད་ཀླུ་རྒྱལ་ཟླ་སྐྱོང་བསང༔ ཉིན་སྲིབ་རི་བྲག་ཆུ་ཤིང་ལ་གནས་པའི༔ ས་ཡུལ་འདི་ཡི་གཞི་བདག་འཁོར་བཅས་བསང༔ འགོ་བའི་ལྷ་ལྔ་སྐྱོབ་པའི་ལྷ་དགུ་བསང༔ བཀའ་དམ་ལ་གནས་བན་བོན་ལྷ་སྲུང་བསང༔ ལས་བཞིའི་གྲོགས་མཛོད་མཆོག་ཐུན་བདེ་ལེགས་སྩོལ༔ ཁྱད་པར་རིགས་གསུམ་སེམས་དཔས་བྱིན་རླབས་ཤིང༔ འཕགས་པའི་གསུང་མཆོག་ཡིག་དྲུག་གནས་སྲུང་བ༔ ཁྱབ་འཇུག་ཆེན་པོ་རྒྱལ་བ་ཐོད་དཀར་ཞེས༔ སྐུ་མདོག་དམར་ནག་ཞལ་གཅིག་སྤྱན་སྟོང་མངའ༔ སྐུ་སྨད་ལྟོ་འཕྱེ་གདུག་པ་སྦྲུལ་ལ་བྱས༔ ཕྱག་བཞི་མདའ་གཞུ་བམ་དང་རྒྱུ་ཞགས་བསྣམས༔ མི་ལྤགས་གཡང་གཞིའི་ན་བཟའ་ལྷབ་མ་ལྷུབ༔ བྱ་རོག་གཙུག་ཏོར་བསྟན་པའི་བྱ་ར་བྱེད༔ མི་བསྲུན་ཀླད་འགེམ་བསྟན་གཉིས་སྐྱོང་བར་མཛད༔ ས་ལ་དབང་བྱེད་གཏེར་སྲུང་ཀླུ་ཡི་རྒྱལ༔ དྲག་པོ་ཟླ་སྐྱོང་སྔོ་བསང་སྦྲུལ་མཇུག་ཅན༔ ཞལ་གཅིག་འཛུམ་མདངས་ཕྱག་གཉིས་དབང་སྔོན་ངོམ༔ དར་ལྗང་སྟོད་གཡོགས་སྦྲུལ་མགོའི་གདེངས་ཀ་ཅན༔ ལས་སུ་བསྟན་སྲུང་འབྱུང་བའི་དུག་ལ་དབང༔ མཐོང་རེག་དུག་གི་རླངས་པས་དགྲ་བོ་ཕུང༔ འཕགས་པའི་བཀའ་ཉན་དཀར་པོའི་ལས་ལ་དགྱེས༔ འཁོར་དུ་ལྷ་ཀླུ་བདུད་བཙན་སྲིན་པོས་བསྐོར༔ གདུག་ཅན་བསྟན་དགྲའི་གཤེད་དུ་རྔམ་ཞིང་རྒྱུག༔ ཁྱེད་རྣམས་སྔོན་ཚེ་པདྨའི་གཡར་དམ་ཅན༔ བར་དུ་བཻ་རོ་ལྷ་ལུང་གཡུ་སྒྲའི་བཀའ༔ ཐ་མ་ཌཱཀྐིའི་རྣམ་རོལ་སྔགས་འཆང་གིས༔ བཀའ་དང་ཐ་ཚིག་སྙིང་གི་དབུས་སུ་བསྟིམ༔ ཡལ་ཡོལ་བཏང་སྙོམས་ལེ་ལོ་རབ་སྐྱུངས་ལ༔ སངས་རྒྱས་བསྟན་སྐྱོང་འགྲོ་བའི་བདེ་སྐྱིད་སྤེལ༔ རྣལ་འབྱོར་ཚེ་བསྲིང་མི་ཕྱུགས་ལོ་ཉེས་དང༔ སད་སེར་ཐན་པ་ནད་རིམས་ཡམས་ཁ་བསྒྱུར༔ བསམ་ངན་སྦྱོར་རྩུབ་དགྲ་རྐུན་དམག་ཇག་བཟློག༔ ལེགས་ཉེས་སྟངས་འཛིན་བསྟན་པའི་བྱ་ར་མཛོད༔ ཚེ་བསྲིང་དཔལ་རྒྱས་སྣང་བ་དབང་དུ་སྡུས༔ མི་མཐུན་ཕྱོགས་ལས་རྣམ་པར་རྒྱལ་བར་མཛོད༔ ས་མ་ཡཱ༔ ཞེས་འདི་དབྱིངས་རིག་ཌཱཀྐིའི་བརྡ༔ དུས་བབས་ཆོས་ཡིན་བྱིན་རླབས་མྱུར༔ བསླུ་མེད་རང་སེམས་དཔང་པོར་གནས༔ མ་དང་མཁའ་འགྲོའི་གནང་བ་ཐོབ༔ འགྲོ་ལ་ཕན་པའི་རྟེན་འབྲེལ་ཡོད༔ ལོག་སྲེད་དམ་ཚིག་ཉམས་ལ་སྦོས༔ དད་ཅན་ཆོས་ཀྱི་སྟོན་མོར་སྤྱོད༔ མནྟྲ་གུ་ཧྱ༔ ཞེས་དད་ལྡན་སྔགས་སྤྱོད་སྐྱེས་ཐོབ་ས་ག་ར་ཛཱ་དང༔ སློབ་བུ་ལུང་རྟོགས་བསྟན་འཛིན་གྱིས་བསྐུལ་ངོར་མི་ལྡོག་ཙམ་དུ་བཙུན་གཟུགས་དྲེད་པོ་ས་ར་ཧི་ཏས་སུག་བྲིས་བགྱིས་པ་ཡོངས་ལ་དགེའོ༔