ཡུལ་ལྷ་བ་སྦལ་ཁྱུང་གསུམ་གྱི་བསང་མཆོད་ལོ་ལེགས་འབྲུ་བཅུད་སྡུད་པའི་སྙིང་པོ།
༄༅། ཡུལ་ལྷ་བ་སྦལ་ཁྱུང་གསུམ་གྱི་བསང་མཆོད་ལོ་ལེགས་འབྲུ་བཅུད་སྡུད་པའི་སྙིང་པོ་བཞུགས། ན་མོ་མ་ཧཱ་གུ་རུ་ཡེ། དེ་ལ་འདིར་ཡུལ་ལྷ་བ་སྦལ་ཁྱུང་གསུམ་ལ་བསང་བྱ་བར་འདོད་པས་སྟེགས་མཐོན་པོའི་ཁར་ཤིང་རྩི་བཅུ་གསུམ་དང་། ཀླུ་སྨན་སྣ་ཚོགས་ཕུལ་ལ་སྦར་ཏེ། རྣལ་འབྱོར་པས་སྤྱན་རས་གཟིགས་ཀྱི་སྐུར་མོས་ཏེ་སྙིང་རྗེ་ཆེན་པོས་མདུན་བསུས་ཏེ། རྔ་དུང་རོལ་མོའི་སྒྲ་བསྒྲགས་ལ་འདི་སྐད་དོ།། ཨེ་མ་ཧོ། སངས་རྒྱས་བསྟན་པ་རྨད་བྱུང་བསམ་མི་ཁྱབ། །ཁྱད་པར་གསང་སྔགས་བསྟན་འདི་ཤིན་ཏུ་རྨད། །དགོས་སུ་གངས་ཅན་རྒྱལ་མོ་ཚ་བའི་རོང་། །བཻ་རོ་དངོས་བྱོན་གཡུ་སྒྲ་སྙིང་པོ་ཟུང་། །དགེ་བསྙེན་ཆེན་པོ་ཉི་ཤུ་རྩ་གཅིག་གི། །མཆེད་པོ་རྡོ་རྗེ་གཡུ་ཁྲོམ་སྤྱན་ལྡན་ལྷ། །གང་གི་བཀའ་འཁོར་སུམ་བརྒྱ་དྲུག་ཅུའི་ནང་། །ཕྱི་བློན་ནང་བློན་གཙོ་བོ་རྗེས་འབྲང་ཚོགས། །དེའི་ནང་དམིགས་བསལ་བ་སྦལ་ཁྱུང་གསུམ་ནི། །སྔོན་བྱོན་མཁྱེན་རབ་དཔའ་བོའི་བྱིན་རླབས་ལས། །སྲིད་པའི་བ་སྦལ་ཁྱུང་གསུམ་བསྐྲུན་པ་ལ། །དེ་དང་དེ་མཆེད་འགྲོ་བས་ཀུན་བཏགས་པ། །མེད་སྣང་ཡོད་འཛིན་ལྷ་དང་འདྲེ་རུ་སྣང་། །ཁྱད་པར་ཡུལ་འདིའི་འགོ་བའི་གཞི་བདག་ནི། །བ་ཡི་རི་བོ་བྲ་བོའི་གཟུགས་སུ་ཀོ། །དེ་ཡི་གཡོན་ཕྱོགས་རྡོ་དཀར་བ་རྗེས་ཅན། །དེ་ལ་གཡང་མོ་བ་ཡི་ཚོགས་ཀྱིས་བསྐོར། །སྦལ་བའི་རི་བོ་གྱེན་གེལ་འཕྱོ་བའི་དབྱིབས། །རྒྱབ་ཀྱི་ལོགས་ལ་མཇུག་མའི་ཆུ་མིག་འབྲུབ། །ཁྱུང་གི་རི་བོ་ནགས་ཚལ་འདབ་གཤོག་བཀྲ། །ཁྱུང་གི་སྐད་གདངས་རྗེའུ་རིགས་ཀླུ་ལ་གཟིགས། །ཁྱེད་རྣམས་སྔོན་ཚེ་རིག་འཛིན་བླ་མ་ཡི། །བཀའ་ཡི་ཐ་ཚིག་འཆང་བའི་དྲེགས་པ་ཅན། །ད་ལྟ་རྣལ་འབྱོར་བདག་གིས་སྤྱན་འདྲེན་ནོ། །དམ་ཚིག་ཕོག་པ་མ་གཡེལ་ཏིཥྛ་ལྷན། །རྒྱལ་བའི་ཕྲིན་ལས་མོས་ངོར་གུས་པས་འདུད། །འགོ་ཞིང་སྐྱོབས་པའི་ལྷ་རུ་མངའ་གསོལ་ལོ། །དངོས་འབྱོར་ཡིད་སྤྲུལ་ཕྱི་ནང་མཆོད་པའི་ཚོགས། །ཕུན་ཚོགས་བདུད་རྩིའི་བསང་མཆོད་འདོད་དགུའི་སྤྲིན། །སྒེག་མོ་བཅུ་དྲུག་བཀྲ་ཤིས་རྫས་རྟགས་བརྒྱད། །ཉེ་བའི་སྣ་བདུན་རིན་ཆེན་བདུན་ལྡན་དང་། །སྨན་གཏོར་ཕྱེ་མར་ཀླུ་ནོར་ཉེར་གཅིག་དང་། །ཀླུ་སྨན་ཆབ་གཏོར་དཀར་གསུམ་མངར་གསུམ་སོགས། །དབང་པོ་དྲུག་ལ་བདེ་སྐྱེད་བསང་གསུར་འདིས། །ཕན་བདེའི་འབྱུང་གནས་དཀོན་མཆོག་རིན་ཆེན་བསང་། །དངོས་གྲུབ་གཏེར་མཛོད་ཡི་དམ་དྲུག་སྡེ་བསང་། །བར་ཆད་ཀུན་སེལ་མ་དང་མཁའ་འགྲོ་བསང་། །ལེགས་ཉེས་སྟང་འཛིན་ཆོས་སྐྱོང་བསྲུང་མ་བསང་། །འགོ་བའི་ལྷ་ལྔ་རྡོ་རྗེ་གཡུ་ཁྲོམ་བསང་། །སྲིད་པའི་བདེ་བསྐྱེད་བ་སྦལ་ཁྱུང་གསུམ་བསང་། །གབ་ཚེ་དགུ་དང་ལོ་སྐོར་ལོ་ལྷ་བསང་། །དུས་བཞིའི་རྒྱལ་མོ་གཏོད་ཀྱི་ས་བདག་བསང་། །ཙང་ཀུན་མཆེད་དགུ་ཀླུ་ཆེན་བརྒྱད་པོ་བསང་། །གཟའ་དང་རྒྱུ་སྐར་འབྱུང་བཞིའི་གཉན་རྣམས་བསང་། །ཁྱད་པར་ཡུལ་ལྷ་བ་དཀར་ཕྱུག་མོ་བསང་། །འབྲུ་དྲུག་བཅུད་སྡུད་རུས་སྦལ་ཟིལ་ཁྲོམ་བསང་། །སད་སེར་ཐན་འཇོམས་ར་མ་བྱ་ཁྱུང་བསང་། །ཁྱེད་རྣམས་སྔོན་ཚེ་དཔལ་གྱི་ཕོ་ཉ་བ། །ད་ལྟ་བདག་གིས་མཆོད་བསྟོད་ངོ་མ་ཆུང་། །སངས་རྒྱས་བསྟན་སྲུང་རྣལ་འབྱོར་བསམ་དོན་སྒྲུབ། །མི་ཕྱུགས་ནད་སོལ་ལོ་ཉེས་སད་སེར་ཁོག །འབྲུ་དྲུག་ལོ་ཏོག་ལྗང་བུའི་དུས་ན་ལེགས། །སྟོན་གྱི་འབྲས་བུ་གཡུར་དུ་ཟ་བ་ཡི། །དཔལ་དང་གཡང་སྐྱོལ་མི་མཐུན་རིང་དུ་སྐྲོད། །དམག་དང་ཚོང་མགྲོན་གཞན་ལ་ཞུ་དང་བསྒོ། །བདག་གི་འདོད་དགུ་འགྲུབ་པའི་གཉེར་ཁ་ལོངས། །ཡུལ་འདིའི་མི་ནོར་ཞིང་ཁང་ཀ་ཆ་དཀོར། །ཁྱེད་རྣམས་ལ་གཏད་སྲུང་སྐྱོབས་མ་ཞན་ཅིག །སྔར་བཅོལ་ལེགས་པའི་གཏང་རག་ཕྱིས་སུ་ནི། །འདོད་དོན་ཞུ་བའི་བསང་གསུར་འདི་འབུལ་ལོ། །རྣམ་བཞིའི་ཕྲིན་ལས་གང་བཅོལ་འགྲུབ་པར་མཛོད། །ཅེས་ཡུལ་གྱི་ཟོ་དོར་བ་སྦལ་ཁྱུང་གསུམ་ལ་བསང་མཆོད་ཞིག་དགོས་ཞེས་འདྲེ་ཤུལ་རིག་འཛིན་ནས་བསྐུལ་ངོར། མཆེད་གྲོགས་ཡིད་སྨད་མི་འོས་ཕྱིར། རྣལ་འབྱོར་ས་ར་ཧི་ཏས་དག་སྣང་བཞིན་དུ་སུག་བྲིས་བགྱིས་པ་དགེའོ།།