ཡུལ་ལྷ་ཟོ་དོར་དབྲ་ཕོའི་བསང་ཡིག་བདེ་ལེགས་ཉི་འོད།
ཡུལ་ལྷ་ཟོ་དོར་དབྲ་ཕོ་ཞེས་བྱ་བའི་བསང་ཡིག་བདེ་ལེགས་ཉི་འོད་བི་ཛ་ཧ་རཾ༔ ན་མོ་པདྨ་ཀ་ར་ཡེ༔ དེ་ལ་འདིར་ཡུལ་ལྷ་དབྲ་ཕོ་ལེགས་བྱིན་ལ་བསང་བྱ་བར་འདོད་པས་ས་ཐབ་སྟེགས་མཐོན་པོའི་ཁར་ལྷ་ཤིང་སྣ་ཚོགས་དང་ཕྱེ་མར་ཤེལ་ཚིགས་སྐྱེམས་རིགས་མང་པོས་བསང་གསུར་གཙང་མ་གཏོང་ལ༔ རྣལ་འབྱོར་ལྷ་ཡི་ཏིང་འཛིན་དང་ལྡན་པས་འདི་སྐད་དོ༔ རང་ཉིད་ལྷར་གསལ་བའི་ཐུགས་ཀ་ནས་འོད་ཟེར་ལྕགས་ཀྱུ་ལྟར་འཕྲོས་པས་དབྲ་ཕོ་སྤུན་གསུམ་འཁོར་གསང་ཡུམ་བློན་པོ་ཞི་རྒྱས་དབང་དྲག་གི་སྤྲུལ་པ་ཡང་སྤྲུལ་དང་བཅས་པ་གནས་ཡུལ་གང་ན་བཞུགས་ཀྱང་སྐད་ཅིག་གིས་རང་མདུན་དུ་བྱོན་ནས་བཞུགས་པར་གྱུར་བར་བསམ་ལ༔ ཨེ་མ་ཧོ༔ སྣང་སྲིད་ཆོས་ཀུན་གདོད་ནས་རྣམ་པར་སྟོང༔ སྟོང་པའི་རྩལ་ལས་སྒྱུ་མའི་རྣམ་པར་སྣང༔ སྣང་བའི་རང་བཞིན་འགགས་མེད་རྣམ་པར་བཀྲ༔ བཀྲ་བའི་རྟོག་ཚོགས་བདེ་སྡུག་གཉིས་སུ་གྲུབ༔ བདེ་བའི་བྱེད་པོ་རྣམ་དཀར་ལས་འབྲས་ཀྱིས༔ སངས་རྒྱས་ཕྲིན་ལས་ཡུལ་སྐྱོང་འགོ་བའི་ལྷ༔ རྒྱལ་མོ་རོང་གི་ཉེ་ཆར་དབྱི་རོང་གི༔ སྐུ་ལྷ་ར་ཁང་བཀའ་ཉན་དབྲ་ཕོ་ཞེས༔ མཐུ་རྩལ་ལེགས་བྱིན་དཔའ་བོ་སྤུན་གསུམ་ཚུལ༔ ཕྱི་ལྟར་གནོད་སྦྱིན་ནང་ལྟར་རིགས་གསུམ་བདག༔ གསང་བ་སྐུ་གསུམ་བདག་ཉིད་ཐ་དད་བྲལ༔ སྣང་ཚུལ་ཆོ་རིགས་ཕྱག་མཚན་མ་ངེས་ཀྱང༔ རེ་འགའ་དབྲ་ཕོ་ལེགས་བྱིན་དཔའ་བོ་ནི༔ སྐུ་མདོག་དམར་ནག་ཨམ་གཙིགས་སྤྱན་གསུམ་ལྡན༔ རལ་པ་དམར་སེར་གྱེན་བརྫེས་སྦྲུལ་གྱིས་བཅིངས༔ ཕྱག་གཡས་ཡ་ཙ་ནམ་མཁའི་དབྱིངས་ལ་འཕྱར༔ གཡོན་པས་ཆོ་ལོ་ཕྱག་གི་མཐིལ་དུ་བཀྲམ༔ འབྲོང་རྒོད་ཞོལ་ཆེན་སྒ་སྟན་རྒྱན་སྤྲས་བཅིབས༔ ཞབས་ལ་སག་ལྷྭམ་འཇའ་ལྡན་བེར་ནག་བཀླུབས༔ གཡས་ཕྱོགས་དབྲ་ཕོ་གནམ་ལྷ་འོད་ལྡན་དཀར༔ གཡོན་ཕྱོགས་དབྲ་ཕོ་རྨུག་འཛིན་གསེར་མདོག་མཛེས༔ ཡུམ་ཆེན་ཀླུ་མོ་སྨན་མོ་འབུམ་སྡེ་དང༔ ཕྱི་ནང་བཀའ་བློན་རུ་འདྲེན་དུ་མར་བཅས༔ མ་ཐོགས་བསང་གི་མགྲོན་དུ་གཤེགས་སུ་གསོལ༔ རང་མཐུན་ཡིད་འོང་གདན་ལ་དགྱེས་པར་བཞུགས༔ སྔོན་ཚེ་རིག་འཛིན་རྡོ་རྗེ་གྲོ་ལོད་དང༔ བར་དུ་བཻ་རོ་གཡུ་སྒྲ་ཤྲཱི་བཛྲ༔ ཐ་མ་གསུམ་ལྡན་ལུང་རིག་གླིང་པ་སོགས༔ དམ་པ་དུ་མའི་བཀའ་དམ་དྲན་མཛོད་ལ༔ རྣལ་འབྱོར་ལས་སྒྲུབ་མཆོད་པས་མཉེས་པར་མཛོད༔ དངོས་འབྱོར་ཡིད་སྤྲུལ་ཕྱི་ནང་མཆོད་པའི་ཚོགས༔ སྨན་གཏོར་རཀྟ་དཀར་གསུམ་མངར་གསུམ་སྐྱེམས༔ བདུད་རྩི་ཤིང་ལྔའི་དུད་སྤྲིན་མཁའ་དབྱིངས་ཁྱབ༔ བསང་གསུར་འདོད་ཡོན་ལྔ་ལྡན་རོལ་མོའི་སྒྲ༔ ས་གསུམ་དོག་པོར་བྱེད་པའི་མཆོད་ཚོགས་ཀྱིས༔ བཀའ་དྲིན་གསུམ་ལྡན་རྩ་བརྒྱུད་བླ་མ་བསང༔ དངོས་གྲུབ་ཆར་འབེབས་ཡི་དམ་ཞི་ཁྲོ་བསང༔ འདོད་རྒུའི་ལྷུན་གྲུབ་མ་སྲིང་ཌཱཀྐི་བསང༔ འགོ་བའི་ལྷ་ལྔ་དམ་ཅན་སྲུང་མ་བསང༔ རྒྱབ་རྟེན་སྐུ་ལྷ་ར་ཁང་ཡུམ་སྲས་བསང༔ ཁྱད་པར་ཟོ་དོར་དབྲ་ཕོ་ལེགས་བྱིན་བསང༔ སྤུན་ཟླ་དབྲ་ཕོ་གནམ་ལྷ་དཀར་པོ་བསང༔ ཡང་ཟླ་དབྲ་ཕོ་རྨུག་འཛིན་གསེར་མདོག་བསང༔ འཁོར་དང་ཡང་འཁོར་སྤྲུལ་པ་ཡང་སྤྲུལ་བསང༔ ཡུལ་འདིར་གཉུག་གནས་མཁའ་རྒྱུའི་དྲེགས་ཚོགས་བསང༔ ཁྱེད་རྣམས་བསང་ཞིང་མཆོད་པའི་ནུས་མཐུ་ཡིས༔ ཡུལ་ཁམས་སྐྱོང་ལ་ནད་མུག་མཚོན་གསུམ་བཟློག༔ ལོ་ལེགས་དཔལ་འཕེལ་འབྲུ་དང་ཆོས་རྣམས་སྤེལ༔ རྒྱ་འདྲེ་རྒྱལ་འགོང་གྲི་བོའི་རྒྱུ་ལམ་ཆོད༔ མི་འདོད་དགྲ་འདྲེ་དམ་སྲིའི་འདུ་ཕུང་ཤིགས༔ དཀར་ཕྱོགས་གྲོགས་མཛོད་ནག་ཕྱོགས་ཆམ་ལ་ཕོབ༔ བསྟན་འཛིན་ཞབས་བརྟན་བསྟན་པ་དར་བར་མཛོད༔ ཁམས་གསུམ་སྲིད་གསུམ་སྣང་བ་དབང་དུ་བསྡུས༔ རྣལ་འབྱོར་འདོད་པའི་དོན་དང་གཉེར་བའི་ལས༔ ཐོགས་མེད་ཡིད་བཞིན་འགྲུབ་པའི་ཤིས་པ་སྩོལ༔ ཞེས་པ་འདི་ཡང་བསླབ་གསུམ་ནོར་གྱིས་ཕྱུག་པའི་བཙུན་པ་པདྨ་བསྟན་འཛིན་གྱི་བཀས་བསྐུལ་བ་ལ་བརྟེན་ནས་བདག་འདྲ་སྤྲང་བན་ས་ར་ཧི་ཏས་ཡི་དམ་ལྷའི་ཏིང་ངེ་འཛིན་གྱིས་གཟིར་བས་ཡུལ་ལྷ་དབྲ་ཕོ་སྤུན་གསུམ་གྱིས་གཟུགས་བསྟན་ཅིང་བཀའ་དང་ཐ་ཚིག་མནོས་པ་ལ་བརྟེན་ནས་བྲིས་པས་ཡུལ་འདིར་བཀྲ་ཤིས་ཤིང་དགེ་བར་གྱུར་ཅིག་གུ༔