ཡུལ་ལྷ་བྲེང་ངེ་གཡག་ཕྱུག་གམ་གཡུང་དྲུང་ལྷ་རྩེའི་བསང་མཆོད་ཕན་བདེའི་གཏེར་འཆང་།
ཡུལ་ལྷ་ཆེན་པོ་གཡུང་དྲུང་ལྷ་རྩེའི་བསང་མཆོད་ཕན་བདེའི་གཏེར་འཆང་ཞེས་བྱ་བ་བཞུགས་སོ༔ ན་མོ་གུ་རུ་པདྨ་ཀ་ར་ཡེ༔ རྒྱལ་ཀུན་སྤྱི་གཟུགས་གངས་ཅན་བླ་མ་རྗེ༔ དེ་ཉིད་ཐུགས་རྗེའི་སྤྲོ་བསྡུ་བླ་ན་མེད༔ གྲུབ་པའི་དབང་ཕྱུག་ལག་ན་རྡོ་རྗེ་ཡི༔ གསང་གསུམ་སྒྱུ་འཕྲུལ་ལུང་རིག་གླིང་པ་རྒྱལ༔ དེང་འདིར་བདག་གིས་ཡུལ་ལྷའི་བསང་མཆོད་ཅིག༔ རྩོམ་པའི་དངོས་གྲུབ་གནང་བའི་ཤིས་པ་སྩོལ༔ གང་ཞིག་སྐྱེ་བོ་ཡུལ་ལྷ་བྲེང་ངེ་ལ༔ གནས་སྐབས་འགོ་བའི་ལྷ་རུ་རློམ་པ་དག༔ མཆོད་པའི་ཡོ་བྱད་ས་སྟེགས་མེ་ཐབ་དང༔ ཤིང་ལྔའི་བསང་དུད་ཕྱེ་མར་སྐྱེམས་རིགས་སོགས༔ གྱ་ནོམ་ངོམ་པ་ལེགས་བསྒྲིགས་འདི་སྐད་དོ༔ ཨེ་མ་ཧོ༔ ངོ་མཚར་རྨད་བྱུང་རིག་པ་ཀ་དག་ཀློང༔ སོར་རྟོག་ཡེ་ཤེས་ཁྱབ་བྱེད་ཀུན་གཟིགས་རྩལ༔ འགག་མེད་སྒྱུ་མའི་དཔེ་དོན་སེམས་སྣང་བཞིན༔ རྟེན་དང་རྟེན་འབྱུང་རྟེན་འབྲེལ་བསླུ་མེད་ངོམས༔ སྔོན་ཚེ་འཕགས་མཆོག་སྤྱན་གཟིགས་སྒྲོལ་མ་ཡིས༔ བྱིན་རླབས་བདུད་རྩིའི་ཆབ་ཀྱིས་བརླན་པའི་གནས༔ གངས་ཅན་བོད་ཡུལ་པད་འབྱུང་གདུལ་བྱའི་ཡུལ༔ མི་སྲིན་དྲེགས་པའི་སྡེ་ཚོགས་ཆམ་ལ་ཕབ༔ སྒྱུ་འཕྲུལ་རྡོ་རྗེ་ཁྲོ་བོའི་བརྟུལ་ཞུགས་ཀྱིས༔ མི་མིན་འབྱུང་པོ་ཕལ་ཆེར་གནས་སྲུང་དང༔ འགའ་ཞིག་ཡུལ་གྱི་སྐྱེ་འགྲོའི་ལེགས་ཉེས་སྟོན༔ ཁྱད་པར་བཻ་རོ་གཡུ་སྒྲའི་ཞབས་ཀྱིས་བཅགས༔ ཕྱག་གིས་མེ་ཏོག་གཏོར་བའི་རྒྱལ་མོ་རོང༔ སྦས་ཡུལ་དགའ་བ་ལྗོངས་ཀྱི་ཉེ་ཆར་དུ༔ བཀའ་ཡི་བློན་པོ་བྲེང་ངེ་གཡག་ཕྱུག་ཅེས༔ ལྷ་ཀླུ་ཁྱོ་ཤུག་བཤོས་པའི་མཐུ་བོ་ཆེ༔ སྙིང་སྒྲོམ་ལྟ་བུའི་རི་ལ་རྟེན་བཅའ་བའི༔ ཡུལ་གྱི་ཟོ་དོར་ཞལ་གཅིག་ཁྲོ་འཛུམ་འབར༔ སྤྱན་གྱི་སྡང་མིག་མེ་འབར་གློག་འོད་འཕྲོ༔ སྨ་ར་སྨིན་མ་མེ་འོད་ཡ་ལ་ལ༔ ཕྱག་གཡས་མདུང་དར་མི་མངོན་དབྱིངས་ལ་ཕྱར༔ ཕྱག་གཡོན་བསེ་ཡི་གཞོང་པ་རཏྣས་བཀང༔ དབུ་ལ་སག་ཞུ་སྨུག་པོ་དར་སྣ་དང༔ རུ་མཚོན་རླུང་གི་ཤུགས་ལྡན་འུ་རུ་རུ༔ སྐུ་ལ་ཟ་འོག་ན་བཟའ་རིན་ཆེན་སྤུད༔ ཞབས་གཉིས་སག་ལྷམ་སིལ་འཁྲོལ་ཉྭ་ཆབ་སྤྲས༔ ལྷ་གཡག་སྔོན་པོ་ཁ་གདངས་མིག་འབུར་ཞིང༔ ངུར་སྒྲ་འབྲུག་ལྡིར་རླུང་དང་བུ་ཡུག་འཚུབ༔ རྭ་དང་རྔ་རྔོག་མེ་སྟག་ཚ་ཚྭ་འཕྲོ༔ གསེར་གྱི་སྣ་གཅུ་རིན་ཆེན་ཆས་ལྡན་བཅིབས༔ གཡས་གཡོན་དགྱེས་སྡེ་ཀླུ་མོས་བཞད་མདངས་ངོམས༔ འཁོར་དུ་ལྷ་ཀླུ་མི་མིན་རྡུལ་ལྟར་འཁྲིགས༔ བྲེང་ངེ་ཤུགས་བཙན་མཆེད་སྡེ་ཕོ་ཉར་འགྱེད༔ རྣལ་འབྱོར་བདག་གིས་སྙན་གསན་བསྐུལ་བའི་ཚེ༔ དད་དང་དམ་ཚིག་དབང་གིས་འདིར་གཤེགས་ཤིག༔ ཁྱོད་ལ་མཆོད་པའི་ཡོ་བྱད་འབུལ་བ་ནི༔ ས་ཐབ་སྤྱན་མའི་མཁའ་ལས་ལེགས་བསྐྲུན་པའི༔ བདུད་རྩི་ཤིང་ལྔ་ཕྱེ་མར་ཛ་གད་སྐྱེམས༔ དཀར་གསུམ་མངར་གྱི་བ་ལིང་ཟས་སྣའི་ཚོགས༔ མ་ཀི་ཆུ་ཁམས་ཆབ་ཀྱིས་རབ་སྦྱངས་ནས༔ གོས་དཀར་མོ་ཡིས་བཞུས་པའི་དུད་སྤྲིན་ལས༔ ཕུན་ཚོགས་ཀུན་བཟང་སྤྲིན་རོལ་དབྱིངས་ཀུན་ཁྱབ༔ དམ་ཚིག་སྒྲོལ་མས་ཕྱོགས་བརྒྱར་བསྐྱོད་པ་འདིས༔ དབང་ལྔའི་བདེ་བ་བསྐྱེད་པའི་ལོངས་སྤྱོད་འབུལ༔ སྔགས་དང་ཕྱག་རྒྱ་སྤེལ་ཞིང་བསྒྱུར་བ་འདིས༔ སྐྱབས་གནས་བསླུ་མེད་དཀོན་མཆོག་རྣམ་གསུམ་བསང༔ མཆོད་འོས་རྩ་གསུམ་ཞི་ཁྲོ་རབ་འབྱམས་བསང༔ བར་ཆད་ཀུན་སེལ་གནས་གསུམ་ཌཱཀྐི་བསང༔ ལེགས་ཉེས་སྟངས་འཛིན་ཆོས་སྐྱོང་སྲུང་མ་བསང༔ ཡུལ་ལྷ་ཆེན་པོ་རྡོ་རྗེ་དབྱི་ཁྲོམ་བསང༔ དབེན་རི་སྲུང་མ་བྲེང་ངེ་གཡག་ཕྱུག་བསང༔ གསང་བའི་མཚན་ནི་གཡུང་དྲུང་ལྷ་རྩེ་བསང༔ བདག་གིས་མཚན་གསོལ་དབང་སྡུད་དཔའ་བོ་བསང༔ དགྱེས་སྡེ་བཙུན་མོ་ཀླུ་མོ་མཆེད་སྡེ་བསང༔ བཀའ་ཡི་ཕོ་ཉ་ཤུགས་བཙན་འབར་བ་བསང༔ ཡང་འཁོར་མི་མིན་དྲེགས་ཚོགས་དུ་མ་བསང༔ སྔོན་ཚེ་རིག་འཛིན་བཻ་རོ་དགའ་ལོ་དང༔ བར་དུ་མཁས་གྲུབ་འགྱུར་མེད་རྒྱལ་མཚན་དང༔ བསམ་གཏན་སྙིང་པོ་རྒྱལ་བ་ཀརྨ་པ༔ ཐ་མ་སྒྲུབ་བརྩོན་རྣལ་འབྱོར་མཚན་བཟང་སོགས༔ རིག་འཛིན་ཡབ་སྲས་བཀའ་བསྒོས་དམ་བཞག་བཞིན༔ སངས་རྒྱས་བསྟན་སྐྱོང་འགྲོ་བའི་བདེ་སྐྱིད་སྤེལ༔ མི་ནད་ཕྱུགས་ཡམས་དུས་ཀྱི་རྒུད་པ་སོལ༔ དགྲ་དང་འགྱེད་ན་དཔའ་རྟགས་རུ་མཚོན་ཕྱོར༔ མི་མཐུན་ཕྱོགས་ལས་རྒྱལ་བའི་མཐུན་འགྱུར་མཛོད༔ འཇིགས་བརྒྱད་མུན་རུབ་སྨག་ལས་རབ་གྲོལ་ཞིང༔ འབྱོར་དྲུག་དཔལ་གྱིས་མངོན་པར་མཐོ་བར་མཛོད༔ མོས་ཚོགས་རྣམས་བཞིས་སྣང་སྲིད་དབང་དུ་ཁུག༔ མངོན་སྤྱོད་དྲག་པོའི་ལས་ཆེན་བཅུ་གཉིས་ཀྱིས༔ གནམ་ལྕགས་རྒྱོགས་རྡོ་བྲག་ལ་ཕོག་པ་ལྟར༔ བསྟན་དགྲའི་མགོ་བོ་འགེམས་པར་མཛད་དུ་གསོལ༔ མདོར་ན་གང་བཅོལ་ལས་ཀྱི་ཕྲིན་ལས་རྣམས༔ དུས་འདིར་མྱུར་དུ་སྒྲུབས་ཤིག་ས་མ་ཡཱ༔ དགེ་འདིས་བསྟན་དང་འགྲོ་ལ་སྨན་པ་དང༔ ཕན་བདེའི་ལེགས་ཚོགས་སྤེལ་བའི་དཔུང་བསྐྱེད་ནས༔ རྣལ་འབྱོར་བདག་དང་ཡུལ་འདིའི་ལྟོས་བཅས་རྣམས༔ དབུ་འཕང་དགུང་ལ་རེག་པའི་ཤིས་པ་སྩོལ༔ ཞེས་ཡུལ་ལྷ་ཟོ་དོར་བྲེང་ངེ་གཡག་ཕྱུག་ཟེར་བ་ཐོས་བྱུང་བའི་ཚེ་རིག་རྩལ་རྟོག་པའི་འཕྲོ་འདུ་ཆེན་པོས་དཔྱད་པའི་རྐྱེན་ལས་ནུབ་གཅིག་ཉིང་འཁྲུལ་གྱི་ངོར་མི་དྲག་གཡག་རྒོད་མངོན་རྟོགས་དང་མཐུན་པ་ཞིག་འོངས་ནས༔ རྣལ་འབྱོར་པ་སྐུ་ཁམས་བཟང་ངམ༔ ང་རང་གསུང་རྟགས་ཤིག་ཞུ་བ་ལ་འོང་ཟེར༔ ཁྱོད་སུ་ཡིན་སྨྲས་པས༔ ང་བྲེང་ངེ་གཡུང་དྲུང་ལྷ་རྩེ་ཡིན༔ མི་མ་ཡིན་ཐམས་ཅད་ཡུལ་གྱི་མི་ལ་བརྟེན་དགོས་པ་ཡིན་ཡང༔ བདག་མཆོད་བསྟོད་བརྟེན་མཁན་མེད་པས་ཡུལ་ངེས་མེད་དུ་རྒྱུ་བ་མ་གཏོགས་རྟེན་གཅིག་ལ་གནས་པའི་རེ་བ་མི་འོང་བས་ཅི་དགའ་ཞེས་ཐོས་བྱུང༔ བདག་གི་སྙིང་རྗེའི་བསམ་པས་ཁྱོད་བྲེང་ངེ་ལ་རྟེན་ཆོས་ཡུལ་མི་རྣམས་ཀྱི་གྲོགས་དན་མཛོད་དང༔ ཁྱོད་མཆོད་པའི་ཐབས་ངས་བྱེད་ཆོག་ཅེས་བརྡ་སྤྲད་ནས་ཉིང་འཁྲུལ་ལས་སད་པས་ཐམས་ཅད་བདེན་མེད་དུ་ལུས༔ དེ་རྗེས་འོ་བཟི་ལ་ཕེབས་ནས་གནས་དེ་ལ་སླེབས་ཁར་ཉམས་ལ་མི་མ་ཡིན་དེའི་གཟུགས་མངོན་པའི་རྟགས་མཚན་བྱུང་བ་དང༔ དེ་རྗེས་ཡུལ་མི་མི་དབང་དཔའ་བོའི་རིགས་དབོན་སློབ་བུ་ཚུལ་ཁྲིམས་དཔལ་བཟང་གིས་ཡུལ་ལྷ་འདི་ལ་བསང་མཆོད་ཅིག་དགོས་ཞེས་བསྐུལ་ཀྱང་རྣམ་གཡེང་གི་ངང་དུ་ལུས༔ མཐར་ཆོས་དབང་སྐྱེས་ཐོབ་ཀྱི་བཙུན་པ་རིག་འཛིན་དོན་འགྲུབ་ཀྱིས་བསྐུལ་བ་ལ་བརྟེན་ནས་ཧོར་ཟླ་ལྔ་པའི་ཚེས་བཅུའི་ཉིན་བཀའ་དྲིན་མཚུངས་མེད་བླ་མ་རིག་འཛིན་ལུང་རིག་གླིང་པའི་བཞུགས་ཁྱིམ་དེ་རུ་གཏེར་གསར་སྒྲོལ་མའི་ཚོགས་བསྐང་སྐབས་ཐུབ་བསྟན་གཞན་ཕན་བཟང་པོས་སྣང་བ་དྭངས་པའི་རྩལ་དུ་ཤར་བཞིན་བྲིས་པ་གཡུ་ཆུང་དཔོན་སྡེ་ལ་ཕན་པའི་རྐྱེན་དུ་འགྱུར་ཞིང་ཡུལ་ཁམས་དགེ་ལ་འགོད་པར་ཤོག་ཅིག་གུ༔