རོང་མེས་ཕྱོགས་ཀྱི་སྐུ་ལྷ་ཡོ་ཎ་དཔའ་བོ་མེས་པོ་ཞལ་དཀར་རྩལ་གྱི་བསང་མཆོད་ལྷའི་དཔག་བསམ་སྙེ་མ།
སྐུ་ལྷ་ཡོ་ཎ་དཔའ་བོ་མེས་པོ་ཞལ་དཀར་རྩལ་གྱི་བསང་མཆོད་ལྷའི་དཔག་བསམ་སྙེ་མ་བཞུགས༔ ཨོ་རྒྱན་ཐོད་ཕྲེང་རྩལ་ལ་འདུད༔ ཡུལ་ལྷ་ཟོ་དོར་ཆེ་བའི་མཆོག༔ ཡོ་ཎ་དཔའ་བོ་ཞལ་དཀར་རྩལ༔ འགོ་བའི་ལྷ་རུ་བསྟེན་འདོད་པས༔ སྟེགས་མཐོན་ཁ་རུ་ཤིང་སྣ་བརྩིགས༔ ཕྱེ་མར་སྐྱེམས་དང་གཏོར་མ་སོགས༔ མེ་ལ་བཞུས་པའི་དུད་སྤྲིན་གཏོང༔ སྔགས་དང་ཕྱག་རྒྱས་བྱིན་གྱིས་བརླབས༔ རང་ཉིད་ཨོ་རྒྱན་ཆེན་པོ་ཡི༔ སྙེམས་པས་ཡུལ་ལྷ་སྤྱན་དྲངས་བཀུག༔ རང་མདུན་བྱོན་ནས་བཞུགས་པར་བསམ༔ ཀྱེ༔ གླིང་གི་གླིང་མཆོག་ལྷོ་རྒྱལ་འཛམ་བུ་གླིང༔ འཛམ་གླིང་ས་ཡི་ལྟེ་བ་རྡོ་རྗེ་གདན༔ རྡོ་རྗེ་གདན་གྱི་བྱང་ཕྱོགས་གངས་ཅན་ལྗོངས༔ གངས་ཅན་ལྗོངས་ཀྱི་ཤར་ཕྱོགས་རྒྱལ་མོ་རོང༔ རྒྱལ་མོ་རོང་གི་ལྷ་གཉན་དམུ་རྡོ་ཡི༔ ཉེ་ཆར་བཞག་བྲ་གནོད་སྦྱིན་བདུད་འཇོམས་རྩལ༔ དེ་ཡི་ཕྱི་ནང་གསང་བའི་བློན་པོ་ལས༔ གསང་བློན་ཤན་པ་སྡེ་དགུའི་ཆེ་བའི་མཆོག༔ ཡོ་ཎ་དཔའ་བོ་མེས་པོ་ཞལ་དཀར་རྩལ༔ སྐུ་མདོག་དཀར་གསལ་ཞལ་གྱིས་ཨམ་གཙིགས་བསྡམས༔ ཕྱག་གཡས་གསེར་མདུང་མཚམས་རིང་ཀླད་ལ་བསྐོར༔ ཕྱག་གཡོན་འབྲུ་ནོར་གཏེར་གྱི་སྒྲོམ་བུ་བསྣམས༔ ཙི་ནའི་ཆས་ལྡན་ཟ་འོག་སློག་པ་གསོལ༔ དབུ་ལ་རྒྱ་ཞྭ་དུང་མདོག་ཇ་ལས་སྤུད༔ ཞབས་ལ་སག་ལྷྭམ་འཇའ་ལྡན་ཕྱེད་དཀྱིལ་གྱིས༔ འབྲོང་གཡག་ཞོལ་ཆེན་རཏྣའི་རྒྱན་སྤྲས་བཅིབས༔ གོང་ཐག་གློ་རྨེད་སྦལ་སྦྲུལ་སྡོམ་སྡིག་འཕྱོ༔ སྣ་ལ་དུང་གི་ཝ་མིག་དར་སྣས་འཕྱངས༔ སྟག་རལ་གཟིག་ཤུབས་སྐེད་གྲི་ཀྱི་ལི་ལི༔ གཡས་ཕྱོགས་བཙུན་མོ་རྡོ་རྗེ་གཡུ་སྒྲོན་མ༔ མཚོ་སྨན་ཀླུ་མོ་སྨན་ཕྲན་འབུམ་གྱིས་བསྐོར༔ གཡོན་དུ་སྲས་མཆོག་ཅི་ཟི་གཡུ་རྒྱལ་གྲགས༔ སྲས་མོ་འོད་ལྡན་དྲི་ཟ་གྲུལ་བུམ་སྟེ༔ མདུན་དུ་བཀའ་ཡི་བློན་པོ་རྫོང་ཞབས་ནག༔ མི་མིན་ལྷ་འདྲེའི་དཔུང་ཚོགས་ཆེམས་སེ་ཆེམ༔ རྒྱབ་ཏུ་ཤན་པ་གཞུ་བདུང་མདའ་འཕེན་ཚོགས༔ སྤྲུལ་པ་ཡང་སྤྲུལ་སྡེ་བརྒྱད་ཤ་ར་ར༔ བང་མཛོད་རིན་ཆེན་གཏེར་གྱི་མངའ་བདག་རྗེ༔ སེང་གེ་གཡུ་རལ་དཀར་གསུམ་རྐྱལ་པ་ཐོག༔ ནོར་བདག་གནོད་སྦྱིན་དཔུང་ཚོགས་ཆེམས་སེ་ཆེམ༔ འཁོར་དང་བཅས་པ་སྐད་ཅིག་ཡུད་ཙམ་གྱིས༔ རྣལ་འབྱོར་བསང་གི་མགྲོན་ལ་གཤེགས་སུ་གསོལ༔ ས་མཆོག་པདྨའི་གདན་ལ་དགྱེས་པར་བཞུགས༔ རྣལ་འབྱོར་འདོད་དོན་སྒྲུབ་པར་མངའ་གསོལ་ལོ༔ ཡུམ་ཆེན་ལྔ་ཡི་ཐུགས་རྗེའི་འོད་ཟེར་ལས༔ བྱུང་བའི་འབྱུང་བ་ལྔ་ཡི་འདུ་བྱེད་རྫས༔ ཤིང་རྩི་སྣ་དགུ་ཕྱེ་མར་དམ་རྫས་དང༔ རྒྱ་ཇ་གོ་མཚོན་མྱོས་བྱེད་གསེར་གཡུ་སྐྱེམས༔ མ་ཚང་མེད་པའི་འདོད་རྫས་བྷ་ལིང་ཏ༔ ཕུན་ཚོགས་བསང་མཆོད་འདོད་དགུའི་སྤྲིན་ཕུང་འདིས༔ སྐྱབས་གནས་དཀོན་མཆོག་རྩ་གསུམ་རྒྱ་མཚོ་བསང༔ ཕུན་ཚོགས་བསང་མཆོད་འདོད་དགུའི་སྤྲིན་ཕུང་འདིས༔ མཐུ་དཔུང་སྡོང་གྲོགས་དམ་ཅན་སྲུང་མ་བསང༔ ཕུན་ཚོགས་བསང་མཆོད་འདོད་དགུའི་སྤྲིན་ཕུང་འདིས༔ རྒྱབ་བརྟེན་ལྷ་གཉན་དམུ་རྡོའི་གནས་བདག་བསང༔ ཕུན་ཚོགས་བསང་མཆོད་འདོད་དགུའི་སྤྲིན་ཕུང་འདིས༔ ཡུལ་རི་གཞི་བདག་བཞག་བྲ་ལྷ་རྩེ་བསང༔ ཕུན་ཚོགས་བསང་མཆོད་འདོད་དགུའི་སྤྲིན་ཕུང་འདིས༔ དབེན་རི་འགོ་ལྷ་ཡོ་ཎ་ཞལ་དཀར་བསང༔ ཕུན་ཚོགས་བསང་མཆོད་འདོད་དགུའི་སྤྲིན་ཕུང་འདིས༔ ཡུམ་མཆོག་མཚོ་སྨན་རྡོ་རྗེ་གཡུ་སྒྲོན་བསང༔ ཕུན་ཚོགས་བསང་མཆོད་འདོད་དགུའི་སྤྲིན་ཕུང་འདིས༔ སྲས་མཆོག་ཅི་ཟི་གཡུ་རྒྱལ་དཔའ་བོ་བསང༔ ཕུན་ཚོགས་བསང་མཆོད་འདོད་དགུའི་སྤྲིན་ཕུང་འདིས༔ སྲས་མོ་སྨན་བཙུན་འོད་ལྡན་འབར་མ་བསང༔ ཕུན་ཚོགས་བསང་མཆོད་འདོད་དགུའི་སྤྲིན་ཕུང་འདིས༔ བཀའ་ཉན་བློན་པོ་རྫོང་ཞབས་ནག་པོ་བསང༔ ཕུན་ཚོགས་བསང་མཆོད་འདོད་དགུའི་སྤྲིན་ཕུང་འདིས༔ བང་མཛོད་གཏེར་འཆང་སེང་གེ་གཡུ་རལ་བསང༔ ཕུན་ཚོགས་བསང་མཆོད་འདོད་དགུའི་སྤྲིན་ཕུང་འདིས༔ མངགས་པའི་ཕོ་ཉ་ཤན་པ་མདའ་འཕེན་བསང༔ ཕུན་ཚོགས་བསང་མཆོད་འདོད་དགུའི་སྤྲིན་ཕུང་འདིས༔ སྤྲུལ་དང་ཡང་སྤྲུལ་ལྷ་སྲིན་སྡེ་བརྒྱད་བསང༔ ཕུན་ཚོགས་བསང་མཆོད་འདོད་དགུའི་སྤྲིན་ཕུང་འདིས༔ བསང་ངོ་ཡོ་ཎ་དཔའ་བོ་ཞལ་དཀར་བསང༔ མཆོད་དོ་ཡོ་ཎ་དཔའ་བོ་ཞལ་དཀར་མཆོད༔ གསོལ་ལོ་ཡོ་ཎ་དཔའ་བོ་ཞལ་དཀར་གསོལ༔ བསྟོད་དོ་ཡོ་ཎ་དཔའ་བོ་ཞལ་དཀར་བསྟོད༔ ཡོ་ཎ་དཔའ་བོ་ཞལ་དཀར་འཁོར་དང་བཅས༔ ཁྱེད་རྣམས་མཆོད་བསྟོད་ཕྲིན་ལས་བཅོལ་བ་ནི༔ སྔོན་ཚེ་པད་འབྱུང་བཻ་རོ་གཡུ་སྒྲ་དང༔ དཔལ་གྱི་རྡོ་རྗེའི་བཀའ་དང་ཐ་ཚིག་མནོས༔ བར་དུ་རིག་འཛིན་ཧཱུྃ་རལ་བསམ་སྙིང་དང༔ ཁྲག་འཐུང་དཔའ་བོའི་བཀའ་དང་ཐ་ཚིག་མནོས༔ ཐ་མ་བརྒྱུད་གསུམ་རིག་འཛིན་ཡབ་སྲས་དང༔ རྣལ་འབྱོར་བདག་གི་བཀའ་དམ་སྙན་གསོན་ཅིག༔ མ་གཡེལ་མ་འདའ་ཡུལ་ལྷ་ཆེན་པོ་ཁྱོད༔ མདོ་སྔགས་བསྟན་པ་དབྱར་མཚོ་ལྟར་འཕེལ་ཞིང༔ དགེ་འདུན་སྡེ་ཚོགས་སྙན་པའི་དབྱར་རྔ་སྒྲོགས༔ བསྟན་པའི་སྦྱིན་བདག་རྫོགས་ལྡན་དཔལ་ལ་སྦྱོར༔ ཡུལ་ལྗོངས་འདི་ལ་བཀྲ་ཤིས་ཡོན་ཏན་གྱིས༔ མངོན་པར་འཚོ་བའི་གཉེར་ཁ་ཁྱོད་ཀྱིས་ལོངས༔ མི་མཐུན་རྒུད་པའི་ནད་མུག་མཚོན་གསུམ་དང༔ བཙའ་སད་སེར་གསུམ་མི་ནད་ཕྱུགས་ཡམས་སོགས༔ མ་ལུས་ཞི་ཞིང་མཐོ་གནོན་བརྙས་བཅོས་མཁན༔ ཁ་དཀར་སྙིང་ནག་གཡོ་སྒྱུའི་དཔུང་ངོམ་པའི༔ བསྟན་དགྲ་དམ་ཉམས་རྒྱལ་འགོང་ཤི་འདྲེ་ཆོམ༔ གཞི་བྱེས་ཀུན་ཏུ་སྡོང་གྲོགས་རྒྱབ་བརྟེན་མཛོད༔ ཁ་ཡིས་ཟས་འདོད་ལག་པས་ནོར་སྒྲུབ་པ༔ ཁབ་ལེན་ལྕགས་བཞིན་མཐུན་སྦྱོར་ཁྱོད་ཀྱིས་མཛོད༔ དཔའ་བའི་དཔུང་དང་དྲེགས་པའི་བ་དན་ཕྱོར༔ ཕུན་ཚོགས་ཕྱོགས་ལས་རྒྱལ་བའི་བཀྲ་ཤིས་ཀྱིས༔ དུས་གསུམ་ཀུན་ཏུ་འཚོ་བའི་དགེ་ལེགས་སྩོལ༔ ཅེས་རོང་མེའི་གཞི་བདག་སྐུ་ལྷ་ཡོ་ཎ་དཔའ་བོ་མེས་པོ་ཞལ་དཀར་རྩལ་གྱི་བསང་མཆོད་ལྷའི་དཔག་བསམ་སྙེ་མ་འདི་ཧོར་ཟླ་དགུ་པའི་ཚེས་བཅུའི་དུས་རིག་འཛིན་བླ་མ་གཞན་ཕན་ཉམས་འུར་བའི་ཚེ་རྟེན་འབྲེལ་ཙམ་དུ་ཡུལ་ལྷ་ལ་བསང་མཆོད་འདི་ཐོལ་བྱུང་ཐོགས་མེད་དུ་སྤེལ་བ་རང་གཞན་ཡོངས་ལ་དགེ་བར་གྱུར་ཅིག་གུ༔