ངེས་ལེགས་ཆུ་མིག་ནཱ་གའི་བསང་མཆོད་དབང་སྔོན་རྒྱལ་པོ།

ནཱ་གའི་བསང་མཆོད་དབང་སྔོན་རྒྱལ་པོ་བི་ཛ་ཧ་རམ༔ ན་མོ་ཤཱཀྱ་མུ་ནེ་ཡེ༔ ཡུལ་སྐྱོང་རྗེ་རིགས་ནཱ་ག་ལ༔ བསང་གི་མཆོད་པ་རྩོམ་འདོད་ན༔ དཀྱིལ་འཁོར་ས་སྟེགས་པད་འདབ་བརྒྱད༔ ཕྱོགས་མདོག་མཚམས་མཐིང་མཛེས་ཚོན་གདབ༔ དེ་སྟེང་ཤུག་པ་ཀླུ་ཤིང་དང༔ ཕ་ཤིང་མ་ཤིང་བུ་ཤིང་སོགས༔ སྣ་ཚོགས་བསྲེགས་པའི་དུད་སྤྲིན་སྤྲོ༔ ཀླུ་སྨན་དཀར་གསུམ་མངར་གསུམ་དང༔ ཆབ་གཏོར་ལ་སོགས་ཡོ་བྱད་བསགས༔ ཤ་ཆང་སྒོག་ཙོང་གཙང་སྦྲ་འཛེམ༔ སེམས་བསྐྱེད་ལྡན་པའི་གང་ཟག་གིས༔ བསྐྱེད་རིམ་གདེངས་ཀྱིས་འདི་སྐད་དོ༔ ཨེ་མ་ཧོ༔ བསྟན་པ་འདི་ལ་ངོ་མཚར་རྨད་དུ་བྱུང༔ ཤཱཀ་ཐུབ་པད་འབྱུང་བསྟན་པའི་མངའ་བདག་རྗེ༔ གཏེར་སྟོན་བརྒྱ་རྩ་གཏེར་ཕྲན་སྟོང་ཕྲག་གིས༔ འགྲོ་ལ་ཕན་བདེའི་རྩ་ལག་བརྐྱང་བའི་ཚེ༔ རང་རང་ཡུལ་གྱི་སྡེ་བརྒྱད་དམ་ལ་བཏགས༔ ཁྱད་པར་རྒྱལ་མོ་རོང་གི་ཡུལ་གྲུ་རུ༔ སྔོན་དུས་ལོ་ཙཱ་བཻ་རོ་གཡུ་སྒྲ་སྙིང༔ བར་དུ་དགའ་ལོ་བསམ་གཏན་སྙིང་པོ་དང༔ ཐ་མ་གཏེར་སྟོན་རིག་འཛིན་བརྒྱུད་བཅས་ཀྱི༔ བཀའ་དང་དམ་ལ་གནས་པའི་ཐ་ཚིག་ཅན༔ ངེས་ལེགས་ཡུལ་གནས་ནཱ་ག་རྗེ་ཡི་རིགས༔ གདེངས་ཀ་བདུན་ལྡན་ཝ་རུ་ཎ་ཞེས་བྱ༔ སྐུ་སྟོད་ཞི་བ་གསེར་མདོག་ལང་ཚོས་མཛེས༔ དར་ལྗང་འཕྱང་འཕྲུལ་ནོར་བུའི་དོ་ཤལ་ངོམ༔ ཕྱག་གཡས་དབང་སྔོན་གཡོན་པས་པད་དཀར་བསྣམས༔ སྐུ་སྨད་ལྟོ་འཕྱེ་རྒྱ་མཚོའི་ཀློང་དུ་འཁྱིལ༔ ཞལ་འཛུམ་སྤྱན་དཀྱུས་རིང་ལ་ཤེལ་གྱི་མདངས༔ མདུན་དུ་ཀླུ་མོ་ཀུན་དྷེ་རྒྱལ་མོ་དང༔ གཡས་སུ་སྲས་པོ་ཀླུ་བདུད་དེ་ཝ་དང༔ གཡོན་དུ་སྲས་མོ་ཀླུ་སྨན་མཛེས་ལྡན་འོད༔ འཁོར་དུ་ཀླུ་ཕྲུག་གྲངས་མེད་དུ་མས་བསྐོར༔ ཀུན་གྱི་ཐུགས་ཀར་ཕུ་པྲ་རང་འོད་འབར༔ དེ་ལྟར་གསལ་བ་བདག་གི་ཐུགས་ལས་ནི༔ འོད་དཀར་ལྕུག་མ་ལྟ་བུས་སྤྱན་དྲངས་ནས༔ བསྒོམ་པའི་ལྷ་དང་དབྱེར་མེད་ས་མ་ཛ༔ ནཱ་ག་ར་ཛ་ས་པ་རི་ཝ་ར་ཛཿཧཱུྃ་བཾ་ཧོ༔ ཏིཥྛནྟུ༔ ཨེ་མ་ཧོ༔ ཁྱེད་ལ་མཐུན་པའི་ཡོ་བྱད་འབུལ་བ་ནི༔ དཀར་གསུམ་མངར་གསུམ་ཞལ་ཟས་རོ་བརྒྱ་དང༔ རྣམ་རྒྱལ་ཁང་བཟང་ནེའུ་སིང་སྐྱེད་མོས་ཚལ༔ ཆུ་བྱ་ཆུ་གནས་ཀླུ་ནོར་ཉི་ཤུ་གཅིག༔ ཉེ་བའི་སྣ་བདུན་ཀླུ་སྨན་སྣ་ཚོགས་ཀྱིས༔ སྦགས་པའི་འོ་ཆབ་ཡིད་འོང་མཆོད་པ་བཞེས༔ ཕྱེ་མར་གསེར་སྐྱེམས་བདུག་སྤོས་བསང་དུད་སོགས༔ དངོས་འབྱོར་ཡིད་ཀྱིས་སྤྲུལ་པས་མཆོད་དོ་བརྔན༔ ཁྱད་པར་འདོད་དོན་ཕྲིན་ལས་བཅོལ་བ་ནི༔ ཕན་བདེའི་འབྱུང་གནས་རྒྱལ་བའི་བསྟན་པ་དར༔ འགྲོ་རྣམས་བདེ་སྐྱིད་ཆོས་ལ་འགོད་པ་དང༔ ཡུལ་འདིར་ནད་མཚོན་མུ་གེ་ཞི་བར་ཤོག༔ ཉེ་བར་མཁོ་བའི་ཡོ་བྱད་ཟས་གོས་ནོར༔ མཐུན་རྐྱེན་མ་ལུས་འབད་མེད་མྱུར་འགྲུབ་མཛོད༔ ཡིད་བཞིན་དབང་གི་རྒྱལ་པོར་གསོལ་བཏབ་བཞིན༔ ཀླུ་གཡང་ལོངས་སྤྱོད་དངོས་གྲུབ་ཆར་ལྟར་ཕོབ༔ ལོ་ལེགས་ཕྱུགས་འཕེལ་མི་ནོར་ཆོས་རྣམས་འདུ༔ ནད་གདོན་བར་ཆད་ཐན་དང་ལྟས་ངན་བཟློག༔ ལོ་རྣམས་ལྗང་བུའི་དུས་ནས་ལེགས་པ་དང༔ བཙའ་སད་སེར་གསུམ་ལོ་ནད་མི་འབྱུང་ཞིང༔ ཆར་ཆུ་དུས་སུ་འབབ་པའི་སྡོང་གྲོགས་མཛོད༔ བདག་ལ་སྡང་བའི་དགྲ་གདོན་བྱད་མ་རྣམས༔ མི་འདོད་ལྷོག་རྒོད་སྤུན་དགུས་དུས་མཐའ་སྟུངས༔ མཛེ་རིགས་བཅོ་བརྒྱད་ནད་ཀྱིས་མི་ཐོག་ཕུད༔ རྣལ་འབྱོར་བདག་དང་ལྟོས་བཅས་རྒྱུ་སྦྱོར་བའི༔ ཚེ་བསོད་འབྱོར་དྲུག་གོང་ནས་གོང་དུ་སྤོར༔ མི་ཡི་སྲིད་འཕེལ་བུ་དཔལ་རིགས་རྒྱུད་སྤེལ༔ མདོར་ན་སྲིད་ཞིའི་དཔལ་འབྱོར་དངོས་གྲུབ་སྩོལ༔ ཨོཾ་ཕུ་པྲ་ནཱ་ག་རཱ་ཛ་ན་ག་ལེ་ལེ༔ བྷུ་མི་པ་ཏི་དེ་ཝ་ལོ་ཀ་བ་སུ་རཏྣ་སརྦ་སིདྡྷི་གང་འདོད་པའི་རྫས་ཐམས་ཅད་བདག་ལ་དུང་དུང་འདུས་འདུས་སྭཱཧཱ༔ ཞེས་པའི་སྔགས་ནི་ཅི་མང་བཟླ༔ དེས་ནི་རྟགས་མཚན་བཟང་པོ་མཐོང༔ དགོས་པའི་དུས་སུ་ལས་ལ་སྦྱོར༔ ཕྲིན་ལས་སྒྲུབ་པའི་དམ་ཚིག་ཅན༔ ཡིན་ཕྱིར་དགའ་ལོའི་ཐ་ཚིག་དང༔ རྗེས་སོར་བསམ་སྙིང་ཐ་ཚིག་ཡོད༔ དེ་རྗེས་རྣལ་འབྱོར་ཡོངས་ལ་འདུད༔ མཆོད་ན་འོས་ཕྱིར་སྙིང་ལ་ཤར༔ ས་མ་ཡཱ༔ ཞེས་ཡུལ་སའི་ཀླུའི་བསང་མཆོད་འདི་རིག་འཛིན་དམ་པའི་བརྒྱུད་འཛིན་སྤྲུལ་པའི་སྐུའི་བཞེད་སྐོང་དུ་ཡ་མཚན་ཆེ་བའི་ལྟས་བཟང་མཐོང་བ་ལ་བརྟེན་ནས་ཟོག་པོ་ས་ར་ཧི་ཏས་ཉུང་ངུར་བསྡུས་ཏེ་སུག་བྲིས་བགྱིས་པ་མངྒ་ལཾ༔