ཞལ་གསུང་གསོལ་འདེབས་སྐོར་ཕྱོགས་གཅིག་ཏུ་བསྒྲིགས་པ།
སྐྱེ་ཕྲེང་གསོལ་འདེབས་མུ་ཏིག་ཕྲེང་མཛེས།
༄༅། རིག་འཛིན་གཞན་ཕན་བཟང་པོ་ཉིད་ཀྱི་གསོལ་འདེབས་ཐོར་བུ་ཕྱོགས་གཅིག་ཏུ་བཀོད་པ་དད་ལྡན་སྙིང་གི་དགའ་སྟོན་བཞུགས།
སྐྱེ་ཕྲེང་གསོལ་འདེབས་མུ་ཏིག་ཕྲེང་མཛེས་བི་ཛ་ཧ་རམ༔ ཨོཾ་ཨཱཿཧཱུྃ༔ སྲིད་ཞིའི་ཁྱབ་བདག་མགོན་པོ་གདོད་མའི་དཔལ༔ གཞི་རྒྱུད་བདེ་བར་གཤེགས་པའི་རང་བཞིན་ཅན༔ འགྲོ་ལ་འདོད་རྒུའི་བྱེད་པོ་སྐུ་གསུམ་འཕྲུལ༔ སྒྱུ་མའི་རོལ་གར་སྟོན་ལ་གསོལ་བ་འདེབས༔ སྔོན་ཚེ་སྟོན་པའི་སྤྱན་སྔར་ཙུན་དྷའི་མཚན༔ ཨོ་རྒྱན་པདྨའི་གདུང་འཚོབ་ཨ་ཙར་དབྱངས༔ མཁའ་འགྲོའི་བྱིན་རླབས་སྙིང་སིམ་ལོ་ཙཱ་བ༔ བསྟན་པའི་རྩ་ལག་འཛིན་ལ་གསོལ་བ་འདེབས༔ མངའ་བདག་ཉང་གི་ཐུགས་སྲས་བསྟན་པ་འཛིན༔ གཏེར་ཆེན་ཆོས་དབང་ཕྱག་རྒྱ་ཛྙཱ་ནའི་མཚན༔ རཏྣའི་རྟེན་འབྲེལ་བརྡ་སྒོ་འབྱེད་པའི་ཡུམ༔ པདྨའི་ལུང་གིས་བསྔགས་ལ་གསོལ་བ་འདེབས༔ འཇའ་ཚོན་སྙིང་པོའི་ཆོས་བདག་པདྨ་བསྟན༔ ཆགས་མེད་ཐུགས་བརྩེ་དགེ་སློང་བརྩོན་འགྲུས་གྲགས༔ གྲུབ་པའི་དབང་ཕྱུག་ཆུ་ཕོ་རྟོགས་པ་ལྡན༔ ཕན་བདེའི་བྱེད་པོར་གྱུར་ལ་གསོལ་བ་འདེབས༔ རྫོགས་ཆེན་བརྒྱུད་འཛིན་གྲུབ་དབང་དཀོན་མཆོག་དང༔ སྦས་པའི་རྣལ་འབྱོར་མཁས་མཆོག་ཀློང་ཡངས་པ༔ གཏེར་སྟོན་སྐྱེས་བུ་བདུན་གྱི་ཆོས་ལ་དབང༔ གཞན་ཕན་ནིརྨ་ཀ་ལ་གསོལ་བ་འདེབས༔ དེ་ལྟར་གསོལ་བ་བཏབ་པའི་མཐུ་བྱིན་གྱིས༔ མི་རྟོག་ཡེ་ཤེས་རང་ངོ་འཕྲོད་པ་དང༔ བྱར་མེད་བློ་འདས་རྒྱུད་ལ་སྐྱེས་ནས་ཀྱང༔ འཁོར་བར་ཞེན་པ་ལོག་པའི་ངེས་འབྱུང་གིས༔ རང་རིག་བླ་མར་རྟོགས་པར་ཐུགས་རྗེས་ཟུང༔ གདོད་མའི་བཙན་ས་ཟིན་པར་མཛད་དུ་གསོལ༔ དེ་འདྲའི་སྐྱེ་ཕྲེང་གསོལ་འདེབས་འདི༔ ཁྱི་ལ་གདོང་ལྔ་ཞེས་མཚུངས་པའི༔ ཟོག་པོ་རང་གིས་ཟོལ་བསྟོད་འདི༔ གསེར་བ་ཆོས་ལ་དབང་བ་ཡི༔ ལུང་ཟིན་གུ་རུའི་མཚན་འཆང་བའི༔ བསྟན་འཛིན་དམ་པའི་བཞེད་སྐོང་དུ༔ ཆོས་མེད་ཆོས་པའི་གཟུགས་འཆང་བ༔ ས་ར་ཧི་ཏས་སྨྲས་པ་དགེ༔
གསོལ་འདེབས་བྱིན་རླབས་བདུད་རྩིའི་སྤྲིན་ཕུང༔
ཨེ་མ་ཧོ༔ ཀ་དག་སངས་རྒྱས་གདོད་མའི་མགོན་པོ་རྗེ༔ ལྷུན་གྲུབ་རང་གདངས་རིགས་ལྔ་ལོངས་སྤྱོད་རྫོགས༔ ཐུགས་རྗེ་ཀུན་ཁྱབ་རིགས་འདུས་པདྨ་འབྱུང༔ སྒྱུ་འཕྲུལ་མངོན་རྫོགས་གུ་རུ་མཚན་མཆོག་བརྒྱད༔ ཀུན་འདུས་ངོ་བོ་རྩ་བའི་བླ་མ་རྗེ༔ ཁྱབ་བདག་འཁོར་ལོའི་མགོན་པོ་ལུང་རིག་གླིང༔ འདས་རྗེས་ཐོབ་པའི་རིག་འཛིན་གཞན་ལ་ཕན༔ འགྲོ་འདུལ་སྤྲུལ་པའི་སྐུ་ལ་གསོལ་བ་འདེབས༔ མི་མཐུན་གཡུལ་རྒྱལ་བསམ་དོན་མྱུར་འགྲུབ་ཤོག༔ མཐར་ཐུག་དཔལ་རི་པདྨ་བཀོད་པའི་ཞིང༔ ཚོམ་བུ་གཅིག་ཏུ་སྟོན་འཁོར་མཉམ་པར་ཤོག༔ ཅེས་སྔོན་སྦྱངས་ལས་ཀྱིས་འབྲེལ་བའི་བཙུན་པ་པདྨའི་མཚན་ཅན་གྱིས་བསྐུལ་ངོར༔ གཏེར་སྟོན་མིང་འཛིན་གཞན་ཕན་བཟང་པོས་བྲིས་པ་དགེ་ལེགས་འཕེལ༔
བླ་མའི་གསོལ་འདེབས་དད་པའི་འཇུག་ངོགས་ཨུ་པ་དེ་ཤ་
ཨེ་མ་ཧོ༔ པདྨའི་གདུང་འཚོབ་ལུང་རིག་གླིང་པ་ཡིས༔ རྗེས་བཟུང་དབུགས་དབྱུང་ཐོབ་པའི་ནིརྨ་ཀ༔ བསྟན་འགྲོའི་དོན་ལ་སེམས་བསྐྱེད་ཞུམ་མེད་བདག༔ རྣལ་འབྱོར་ས་ར་ཧི་ཏར་གསོལ་བ་འདེབས༔ མོས་གུས་གདུང་བས་རྩེ་གཅིག་གསོལ་འདེབས་ན༔ འཁོར་བའི་ཞེན་ཐག་ཆོད་ཅིག་བླ་མ་མཁྱེན༔ འཕྱུག་མེད་ཆོས་ཚུགས་ཟིན་པར་བླ་མ་མཁྱེན༔ དགེ་སེམས་རྒྱུད་ལ་སྐྱེ་བར་བླ་མ་མཁྱེན༔ འཇིགས་མེད་གདེངས་ཆེན་ཐོབ་པར་བླ་མ་མཁྱེན༔ ཉག་གཅིག་རྩད་ནས་ཆོད་པར་བླ་མ་མཁྱེན༔ བདག་མེད་གནས་ལུགས་རང་གཞིའི་ཞལ་མཐོང་ནས༔ གདོད་མའི་ས་ལ་གཏན་སྲིད་ཟིན་པར་ཤོག༔ ཅེས་པ་འདི་ཡང་སྔོན་སྦྱངས་ལས་ཀྱིས་འབྲེལ་བའི་སློབ་བརྩོན་གྱི་སྤོབས་པ་གངས་རིའི་སྤོ་ལ་འགྱིང་བའི་དམ་པ་མཐར་ཕྱིན་ནས་དད་པའི་སྟོབས་ཀྱིས་བསྐུལ་བ་ཆོས་མེད་དྲེད་པོ་གཞན་ཕན་བཟང་པོས་ཐོལ་བྱུང་དུ་བྲིས་པ་ཆོས་བརྒྱུད་འཛིན་པའི་བུ་ལ་བྱིན་རླབས་མྱུར་དུ་འཇུག་པར་གྱུར་ཅིག༔
གསོལ་འདེབས་དད་པའི་འཁྲི་ཤིང༔
ཨེ་མ་ཧོ༔ སྟོང་གསུམ་མི་མཇེད་ཞིང་གི་སྟོན་པ་མཆོག༔ བཅོམ་ལྡན་ཐུབ་དབང་འདྲེན་པ་ཤཱཀྱ་ཐུབ༔ དེ་ཉིད་སྔགས་ཀྱི་འགྲོ་དོན་གདུལ་བྱར་གཟིགས༔ སྣང་མཐའི་ཐུགས་ཀའི་ཧྲཱིཿའཕྲོས་མཚོ་སྐྱེས་རྗེ༔ ཡང་སྤྲུལ་འཕགས་པ་མཁྱེན་རབ་འཇམ་པའི་དབྱངས༔ སྙིང་རྗེའི་མངའ་བདག་ཁ་སར་པ་ཎི་དང༔ བརྟུལ་ཞུགས་རྨད་བྱུང་གསང་བདག་རྡོ་རྗེ་འཛིན༔ དེ་རྣམས་དོན་ལ་རྩ་བའི་བླ་མར་འདུས༔ སྒོ་གསུམ་གུས་པས་སྙིང་ནས་གསོལ་བ་འདེབས༔ བདག་གི་རྒྱུད་ལ་སྐུ་བཞིའི་ས་བོན་སྩོལ༔ རིག་འཛིན་རྣམ་བཞིའི་གྲལ་དུ་སྨིན་ནས་ཀྱང༔ རྡོ་རྗེ་འཆང་དབང་ཚེ་འདིར་མངོན་གྱུར་ཤོག༔ ཅེས་པའི་གསོལ་འདེབས་འདི་རང་བབས་ཀྱིས་བྲིས་ཤིང་རིགས་ཀྱི་མིང་ཅན་བཙུན་པ་རལ་བའི་ཅོད་པཎ་ཅན་ལ་བསྩལ་བ་གནས་སྐབས་དང་མཐར་ཐུག་ཏུ་གནས་ཤིང་བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག༔
གསོལ་འདེབས་དད་པའི་འཁྲི་ཤིང་ཟླ་ཞུན་རབ་གསལ་བི་ཛ་ཧ་རམ་ཏིསྨ༔
ཨེ་མ་ཧོ༔ སྔོན་ཚེ་སྟོན་པའི་ཉེ་གནས་ཙུནྡྷའི་མཚན༔ བར་དུ་ལོ་ཙཱ་ཨ་ཙར་ས་ལེ་འོད༔ ཐ་མ་འཇའ་ཚོན་ཆོས་བདག་པདྨ་བསྟན༔ ཆུ་ཕོ་རྟོགས་ལྡན་གྲུབ་དབང་དཀོན་མཆོག་སོགས༔ དམ་པ་དུ་མའི་སྒྱུ་འཕྲུལ་གཞན་ལ་ཕན༔ བཟང་པོའི་སྤྱོད་པ་འཆང་ལ་གསོལ་བ་འདེབས༔ བདག་ཀྱང་དེང་བཟུང་སྐྱེ་བའི་ཕྲེང་བ་རུ༔ བྱང་ཆུབ་སྤྱོད་པ་ཕྱིན་དྲུག་མཐར་ཕྱིན་ཏེ༔ མི་སློབ་ཟུང་འཇུག་རྡོ་རྗེ་འཆང་གི་ས༔ རང་རིག་བླ་མའི་གོ་འཕང་ཐོབ་པར་ཤོག༔ ཅེས་གསོལ་འདེབས་སྨོན་ཚིག་དང་བཅས་པ་འདི་ནི་མཆོག་གཟུགས་དབོན་པོ་ཀུན་གྲོལ་མཆོག་གི་ཐུགས་བཞེད་བཞིན་ཆོས་མེད་སྡོམ་བུ་གཞན་ཕན་བཟང་པོས་ཐོལ་བྱུང་ཐོགས་མེད་དུ་བྲིས་པ་དགེ་ལེགས་འཕེལ༔
གསོལ་འདེབས་བྱིན་རླབས་མེ་ལྕེ་བཞུགས༔
ཨེ་མ་ཧོ༔ རང་བྱུང་ལྷུན་གྲུབ་པདྨ་རྒྱལ་པོའི་སྐུ༔ སོར་རྟོག་ཡེ་ཤེས་བདེ་ཆེན་མཚོ་རྒྱལ་མ༔ རྒྱལ་བའི་རྒྱལ་ཚབ་ཨ་ཙར་ས་ལེ་འོད༔ རྣམ་གསུམ་དབྱེར་མེད་བསམ་གཏན་ཡེ་ཤེས་གླིང༔ གསོལ་བ་འདེབས་སོ་སྐུ་བཞི་ཡེ་ཤེས་ཀྱི༔ དབང་བཞི་མཆོག་ཐུན་དངོས་གྲུབ་བདག་ལ་སྩོལ༔ ཨོཾ་ཨཱཿཧཱུྃ་སྭཱ་ཧཱ༔ ཞེས་གསོལ་འདེབས་འདི་འདྲ་ཞིག་དགོས་ཞེས་རིག་དབོན་དམ་པ་སུ་ཏྲའི་མཚན་འཆང་དམ་པས་བསྐུལ་ངོར༔ ཆོས་མེད་ཆོས་པའི་གཟུགས་འཆང་རྣལ་འབྱོར་གཞན་ཕན་བཟང་པོས་གང་ཤར་ཐོལ་བྱུང་དུ་ཉེར་ལྔའི་སྲོད་ཐུན་ལ་བྲིས་པ་དུས་གསུམ་དུ་དགེ་བར་གྱུར་ཅིག༔
མཁན་སློབ་ཆོས་གསུམ་དང་དབྱེར་མེད་པའི་བླ་མར་གསོལ་བ་འདེབས་པ་དད་པའི་འཇུག་ངོགས་ཞེས་བྱ་བཞུགས༔
ཨེ་མ་ཧོ༔ ཨ་མི་ཏ་བྷའི་ཟློས་གར་མཚོ་སྐྱེས་རྗེ༔ རྣམ་འདྲེན་ཤཱཀ་ཐུབ་གདུང་འཚོབ་ཞི་བ་འཚོ༔ གངས་ཅན་བསྟན་པའི་སྒྲོན་མེ་ཁྲི་སྲོང་རྒྱལ༔ རྣམ་གསུམ་དབྱེར་མེད་ཐུབ་དབང་བསྟན་པའི་བདག༔ སྐྱེ་རྒུའི་ཉི་མའི་གཉེན་གྱུར་བླ་མ་ལ༔ མི་ཕྱེད་རྩེ་གཅིག་གུས་པས་གསོལ་བ་འདེབས༔ འདི་ཕྱི་བར་གསུམ་ཐུགས་རྗེས་རྗེས་བཟུང་ནས༔ སྐྱེ་མེད་དོན་རྟོགས་གདོད་མའི་ས་ལ་སྐྱོལ༔ ཞེས་པ་འདི་ཡང་དགེ་མ་སྒྲུབ་ལ་བརྩོན་པ་སྒྲོལ་མ་མཚོའི་བཞེད་སྐོང་དུ་ས་ར་ཧི་ཏས་སྨྲས་པ་དགེ་བར་གྱུར་ཅིག་གུ༔
གསོལ་འདེབས་དད་ལྡན་འཁྲི་ཤིང་བྱིན་རླབས་འགུགས་པའི་ལྕགས་ཀྱུ་བཞུགས༔
ཨེ་མ་ཧོ༔ རང་བྱུང་ལྷུན་གྲུབ་པདྨ་འབྱུང་གནས་ཀྱིས༔ འགྲོ་འདུལ་སྤྲུལ་བསྒྱུར་ངོམས་པའི་སྐྱེས་ཐོབ་བདག༔ རྡོ་རྗེ་འཛིན་པའི་མངའ་བདག་སྦས་པའི་ཚུལ༔ ས་ར་ཧི་ཏ་བྷ་ཏྲར་གསོལ་བ་འདེབས༔ ཉེས་སྤྱོད་སྡོམ་པའི་ཁྲིམས་ལ་རང་དབང་བསྒྱུར༔ སྨོན་འཇུག་བྱང་ཆུབ་སེམས་ཀྱིས་རྒྱུད་བརླན་ཅིང༔ ཡང་དག་དགེ་བ་བཅུ་ལ་བློ་སྦྱངས་ནས༔ བྱར་མེད་རྫོགས་ཆེན་རྟོགས་པར་བྱིན་གྱིས་རློབས༔ ཞེས་པ་འདི་ཡང་སྔོན་སྦྱངས་ལས་འཕྲོ་བཟང་པོས་འབྲེལ་བའི་རིགས་ལྡན་དགེ་བའི་མྱུ་གུ་སྨིན་པའི་སློབ་བུ་པདྨ་ཚེ་དབང་དང་༔ ཚུལ་གནས་ངེས་པའི་དད་ལྡན་བཟང་པོའི་ལང་ཚོ་ངོམ་པའི་བཙུན་པ་དཀོན་མཆོག་ཟུང་གིས་བསྐུལ་ངོར་ཆོས་མེད་མུ་ཏོ་ཕན་པའི་མིང་གིས་སྤེལ་བ་དགེའོ༔
གསོལ་འདེབས་བྱིན་རླབས་དྲི་བསུང་བཞུགས༔
ཨེ་མ་ཧོ༔ མཁྱེན་དང་བརྩེ་བའི་མངའ་བདག་མཉྫུ་ཤྲཱི༔ དམིགས་མེད་སྙིང་རྗེའི་མངའ་བདག་མིག་མི་འཛུམ༔ མཐུ་སྟོབས་ནུས་པའི་མངའ་བདག་རྡོ་རྗེ་འཛིན༔ རྣམ་གསུམ་ཐུགས་རྗེའི་མངའ་བདག་མཚོ་སྐྱེས་རྗེ༔ དབྱེར་མེད་རིག་འཛིན་ལུང་རིག་གླིང་པ་སོགས༔ ཡོངས་འཛིན་དམ་པ་རྣམས་ལ་གསོལ་བ་འདེབས༔ འདི་ཕྱིའི་རྐྱེན་ངན་ཞི་བར་བྱིན་གྱིས་རློབས༔ གདོད་མའི་བཙན་ས་ཟིན་པར་མཛད་དུ་གསོལ༔ ཞེས་པ་འདི་དད་པའི་མྱུ་གུ་འཁྲུངས་པའི་བཙུན་པ་འདུལ་བས་བསྐུལ་ངོར་ཆོས་མེད་ཆོས་པའི་གཟུགས་བརྙན་འཆང་བའི་བླ་གཟུགས་ད་རི་ཏྲ་ཕན་པས་སྨྲས་པ་དུས་གསུམ་དུ་དགེ་བར་གྱུར་ཅིག་གུ༔
གསོལ་འདེབས་བྱིན་རླབས་འོད་འབར་བི་ཛ་ཧ་རམ༔
ཨེ་མ་ཧོ༔ དུས་གསུམ་རྒྱལ་བའི་གདུང་འཚོབ་མཚོ་སྐྱེས་རྗེ༔ གསང་བའི་བདེ་སྟེར་ཛྙཱ་ན་ས་ག་ར༔ དེ་ཉིད་ཐུགས་རྗེའི་ཟློས་གར་ལུང་རིག་གླིང༔ བརྒྱུད་འཛིན་ཆོས་བདག་གཞན་ཕན་བཟང་པོ་ལ༔ གསོལ་བ་འདེབས་སོ་རང་གཞན་དོན་ཀུན་འགྲུབ༔ རང་རིག་བླ་མར་རྟོགས་པར་བྱིན་གྱིས་རློབས༔ ཞེས་པ་འདི་ཡང་སྐལ་བ་བཟང་པོའི་འཕྲོ་ལྡན་གྲགས་རྩལ་དང་དཔལ་ཡོན་གྱི་ལང་ཚོས་རྒྱུད་དེས་པའི་བཙུན་པ་མཐོང་དགའ་ཟུང་གི་བཞེད་སྐོང་དུ་ས་ར་ཧི་ཏས་སྨྲས་པ་ཡོངས་སུ་དགེ༔
གསོལ་འདེབས་ཡང་དག་ལམ་སྟོན་དད་པའི་འཁྲི་ཤིང་བི་ཛ་ཧ་རམ༔
ཨེ་མ་ཧོ༔ སྔོན་ཚེ་བདེར་གཤེགས་བུ་རམ་ཤིང་པའི་དྲུང༔ རྣམ་དག་ཁྲིམས་ལ་གནས་བཅས་ཙུནྡྷའི་མཚན༔ གསང་སྔགས་རིག་འཛིན་མཚོ་སྐྱེས་སྟངས་དཔྱལ་གྱི༔ ཐུགས་ཟིན་ལོ་ཙཱ་ཨ་ཙར་ས་ལེ་འོད༔ ད་ལྟའི་གྲུབ་དབང་ལུང་རིག་གླིང་པ་སོགས༔ གྲུབ་བརྙེས་དུ་མས་བསྔགས་པ་སྤྲུལ་པའི་སྐུ༔ རྣལ་འབྱོར་གཞན་ལ་ཕན་དེར་གསོལ་བ་འདེབས༔ བདག་ཀྱང་དེང་བཟུང་བྱང་ཆུབ་སྙིང་པོའི་བར༔ དཔལ་མགོན་བླ་མ་ཁྱེད་ཀྱིས་རྗེས་བཟུང་ནས༔ རིམ་གཉིས་བྱང་ཆུབ་སེམས་ཀྱི་ཐེམ་སྐས་ལས༔ རྣམ་མཁྱེན་རྒྱལ་བའི་གོ་འཕང་མྱུར་ཐོབ་ཤོག༔ ཅེས་པ་འདི་ཡང་རིག་པའི་རང་རྩལ་གྱི་རྩལ་རྫོགས་པའི་བཙུན་པ་ཉི་མ་རྒྱལ་མཚན་དང་༔ དམ་པའི་ཡོན་ཏན་མངའ་བ་དགེ་བཤེས་དཀོན་མཆོག་མཚན་འཆང་ཟུང་གི་བཀས་བསྐུལ་བ་ལ་བརྟེན་ནས་ཆོས་པའི་གཟུགས་བརྙན་འཆང་བའི་སྤྲུལ་མིང་གཞན་ཕན་མིང་གིས་བྲིས་པ་དུས་གསུམ་དུ་དགེ་བར་གྱུར་ཅིག་གུ༔
གསོལ་འདེབས་དྲང་སྲོང་བདེན་ཚིག་སྐལ་ལྡན་དགའ་སྟོན་ཡོད༔
ཨེ་མ་ཧོ༔ སྐྱེ་སྔོན་ལྷ་དང་བླ་མས་རྗེས་སུ་བཟུང༔ ད་ལྟའི་ལས་འཕྲོ་རྣམ་དཀར་ཆོས་ལ་སད༔ པདྨས་རྗེས་བརྩེ་དགོངས་པའི་གཏེར་ལ་དབང༔ རིག་འཛིན་ཆོས་དབང་ས་ར་ཧི་ཏ་ལ༔ གསོལ་བ་འདེབས་སོ་བྱིན་རླབས་ཡེ་ཤེས་སྩོལ༔ བདག་གི་སྐྱེ་བའི་ཕྲེང་བ་ཐམས་ཅད་དུ༔ མཆོག་གསུམ་བླ་མས་རྗེས་སུ་འཛིན་གྱུར་ཅིག༔ གནས་སྐབས་བར་ཆད་བདུད་ཀྱི་གཡུལ་ལས་རྒྱལ༔ མཐར་ཐུག་དོན་གཉིས་ལྷུན་གྱིས་གྲུབ་པར་ཤོག༔ ཅེས་པའི་གསོལ་འདེབས་སྨོན་ཚིག་འདི༔ བཙུན་པ་རིག་འཛིན་རྡོ་རྗེ་ཡི༔ ཐུགས་ཀྱི་བཞེད་པ་བསྐང་བའི་ཕྱིར༔ བླ་གཟུགས་གཞན་ཕན་བཟང་པོས་སྤེལ༔ སརྦ་མངྒ་ལམ༔
དག་སྣང་ལས༔ གསོལ་འདེབས་བྱིན་རླབས་སྤྲིན་ཕུང་མ༔
ཨེ་མ་ཧོ༔ ལུང་རྟོགས་ཆོས་ཚུལ་རྒྱ་མཚོའི་བདག་ཉིད་རྗེ༔ བསྟན་པའི་ཉིན་བྱེད་དམ་པས་རྗེས་སུ་བཟུང༔ གཞན་དོན་བྱང་སེམས་བསྒོམ་པ་ལྷུར་ལེན་པ༔ ཕན་བདེའི་རྩ་ལག་དེ་ལ་གསོལ་བ་འདེབས༔ བདག་ཀྱང་དེང་ནས་རྣམ་མཁྱེན་སངས་རྒྱས་བར༔ ཡོངས་འཛིན་བཤེས་གཉེན་དུ་མས་རྗེས་དགོངས་ནས༔ ས་བཅུ་ལམ་ལྔའི་དཔལ་ཡོན་མངོན་གྱུར་ཏེ༔ འགྲོ་བ་འདྲེན་པའི་དེད་དཔོན་བྱེད་པར་ཤོག༔ ཡེ་ཤེས་མཁའ་འགྲོའི་བརྡ་ལས་སྣང་བའི་བྱིན་རླབས་སྤྲིན་ཕུང་མ་ལགས་སོ༔ སློབ་བུ་ཁྱེའུ་ཆུང་གཉིས་ལ་གདམས་པའོ༔
གསོལ་འདེབས་དད་ལྡན་དངས་འདྲེན་བཞུགས༔
ཨེ་མ་ཧོ༔ ཡེ་སྟོང་སྤྲོས་བྲལ་ཆོས་སྐུ་དག་པ་ལ༔ ངོ་བོ་རང་བཞིན་ངེས་པ་ལྔ་ལྡན་རྩལ༔ ཐུགས་རྗེ་འགགས་མེད་སྤྲུལ་པའི་རྣམ་རོལ་སྟོན༔ གཞན་ཕན་བྱང་སེམས་འབྱུང་ལ་གསོལ་བ་འདེབས༔ དཔལ་མགོན་བླ་མ་ཁྱེད་ལ་གསོལ་བཏབ་མཐུས༔ གནས་སྐབས་ཉེར་འཚེའི་གཡུལ་ངོ་དབྱིངས་སུ་ཞི༔ མཐར་ཐུག་རང་རིག་དོན་གྱི་བླ་མ་ཉིད༔ རང་ཞལ་མཇལ་ནས་གདོད་མའི་སར་ཕྱིན་ཤོག༔ འདི་འདྲའི་གསོལ་འདེབས་ཤིག་དགོས་ཞེས་བཙུན་པ་ཨ་གཾ་གིས་བསྐུལ་ངོ་མི་ལྡོག་ཕྱིར་དུ་ཐོས་དབེན་མུ་ཏོ་ས་ར་ཧི་ཏས་སྨྲས་པ་ཛ་ཡནྟུ༔
གསོལ་འདེབས་དད་ཅན་དགའ་སྟོན་བི་ཛ་ཧ་རམ༔
ཨེ་མ་ཧོ༔ སྐུ་གསུམ་རྒྱལ་བའི་ངོ་བོ་པད་འབྱུང་གི༔ གསང་གསུམ་སྒྱུ་འཕྲུལ་ཟབ་མོའི་གཏེར་འདོན་པའི༔ བདུད་འཇོམས་རྡོ་རྗེ་ལུང་རིག་གླིང་པ་སོགས༔ དམ་པས་རྗེས་བཟུང་དབུགས་དབྱུང་ཐོབ་པའི་བདག༔ ཨ་ཙར་ས་ལེའི་ཟློས་གར་ནཱིརྨ་ཀ༔ རྣལ་འབྱོར་ས་ར་ཧི་ཏ་བྷ་དྲ་ལ༔ གསོལ་བ་འདེབས་སོ་སྣང་ཞིང་སྲིད་པའི་ཆོས༔ བདེན་མེད་གནས་ལུགས་རྟོགས་པར་བྱིན་གྱིས་རློབས༔ ཞེས་དད་ལྡན་དག་སྣང་ལ་དབང་འབྱོར་བ་དྷརྨ་ཤྲཱི་ས་ག་རས་བསྐུལ་ངོར༔ དད་ཅན་སེམས་སུན་འབྱིན་པའི་རྩ་ལྟུང་མི་འབྱུང་ཕྱིར༔ བསམ་པ་དག་པས་ཕན་མིང་དུག་ལྔའི་རྣལ་འབྱོར་ནས་བྲིས་པ་སརྦ་ཛ་གད་དམ༔
མོ་མ་རིག་བཟང་གི་ངོར་གསུངས་པའི་གསོལ་འདེབས།
ཨེ་མ་ཧོ༔ ཀ་དག་རིག་པ་དོན་གྱི་ཡེ་ཤེས༔ ལྷུན་གྲུབ་སྣང་བ་བདེ་ཆེན་རྡོ་རྗེའི༔ མངའ་བདག་འགྲོ་མགོན་ཐུགས་རྗེའི་སྤྲུལ་བསྒྱུར༔ རང་རིག་དོན་སྟོན་གཞན་ཕན་བཟང་པོ༔ ཁྱེད་ལ་སྐྱབས་གསོལ་རང་གཞན་ཆོས་སྐུ༔ ད་ལྟ་མངོན་འགྱུར་བླ་མ་མཁྱེན་ནོ༔ ཞེས་པ་འདི་ཡང་དད་ལྡན་བཙུན་པ་མཆོག་གཟིགས་མོ་བ་རིག་བཟང་གི་བཞེད་སྐོང་དུ་བླ་གཟུགས་འཆང་བ་གཞན་ཕན་བཟང་པོས་ལེགས་པར་བྲིས་པ་དགེ་ལེགས་འཕེལ༔
ཀར་སྟོད་མཐུ་ཆེན་ངོར་གསུངས་པའི་གསོལ་འདེབས།
ཨེ་མ་ཧོ༔ འཛམ་གླིང་མཛེས་རྒྱན་ནཱ་གརྫུ་ན་དང༔ པཎ་གྲུབ་གཙུག་རྒྱན་ཨོ་རྒྱན་མཚོ་སྐྱེས་རྗེ༔ གྲུབ་བརྙེས་རིག་འཛིན་རྗེ་འབངས་ཉི་ཤུ་ལྔ༔ འཇིགས་བརྒྱད་གཡུལ་འཇོམས་ཏཱ་རེ་དཔལ་ལྷ་མོ༔ བར་ཆད་དབྱིངས་གྲོལ་དམ་ཅན་རྒྱ་མཚོའི་ཚོགས༔ ཀུན་གྱི་བྱེད་པོ་གཞན་ཕན་བྱང་ཆུབ་སེམས༔ རང་རིག་དོན་རྟོགས་རིག་པ་ཡེ་ཤེས་ལ༔ འབད་མེད་ཡོངས་གྲོལ་ཀློང་ནས་གསོལ་བ་འདེབས༔ གཞི་སྣང་ལྷུན་གྲུབ་ངང་ནས་བྱིན་གྱིས་རློབས༔ ཀ་དག་གཉུག་མའི་སངས་རྒྱས་མངོན་གྱུར་ཤོག༔ ཅེས་པ་འདིའང་རིག་པའི་ཡེ་ཤེས་ཀྱི་ལང་ཚོ་ངོམ་པའི་བཙུན་པ་གར་སྟོད་མཐུ་ཆེན་བཞེད་སྐོང་དུ་བླ་མིང་ཕན་པས་ཐོལ་བྱུང་དུ་བྲིས་པ་དགེ་ལེགས་འཕེལ༔
བུདྡྷ་ས་ག་རའི་ངོར་གསུངས་པའི་གསོལ་འདེབས།
ཨེ་མ་ཧོ༔ སྔོན་དུས་རིག་འཛིན་མཚོ་སྐྱེས་རྡོ་རྗེ་ཡི༔ གསང་གསུམ་བྱིན་རླབས་མཆོག་ཐོབ་ཨ་ཙརྱ༔ ས་ལེའི་སྒྱུ་འཕྲུལ་ས་ར་ཧི་ཏ་ལ༔ གསོལ་བ་འདེབས་སོ་བྱིན་རླབས་དབང་བསྐུར་སྩོལ༔ སྐྱེ་བ་འདི་ནས་ཚེ་རབས་ཐམས་ཅད་དུ༔ དཔལ་མགོན་བླ་མ་དམ་པས་རྗེས་བཟུང་ནས༔ རིམ་གཉིས་བྱང་ཆུབ་སེམས་ལ་བློ་སྦྱངས་ནས༔ རྣམ་མཁྱེན་རྒྱལ་བའི་གོ་འཕང་མྱུར་བསྒྲོད་ཤོག༔ ཅེས་པའི་གསོལ་འདེབས་འདི་དད་ལྡན་བུདྡྷ་ས་ག་རས་བསྐུལ་ངོར་བླ་གཟུགས་ཕན་པས་བྲིས་པ་ཡོངས་སུ་དགེ་བར་གྱུར་ཅིག༔
བུད་མེད་བསོད་ནམས་མིང་གི་ངོར་གསུངས་པའི་གསོལ་འདེབས།
དང་པོ་ཆོས་ལ་ཞུགས་ནས་བླ་མ་བསྟེན༔ བར་དུ་བྱང་ཆུབ་སེམས་གཉིས་འབྲལ་མེད་བསྒོམ༔ ཐ་མ་ཟབ་གཏེར་མཁའ་འགྲོས་ལུང་བསྟན་ཐོབ༔ ཡོངས་འཛིན་དགེ་བའི་བཤེས་ལ་གསོལ་བ་འདེབས༔ བློ་སེམས་ཆོས་ལ་འགྱུར་བར་བྱིན་གྱིས་རློབས༔ རང་རིག་བླ་མར་རྟོགས་པར་ཐུགས་རྗེས་ཟུངས༔ ཞེས་པའི་གསོལ་འདེབས་འདི་དད་ལྡན་བུད་མེད་བསོད་ནམས་མིང་གིས་བསྐུལ་ངོར་བླ་མ་གཞན་ཕན་བཟང་པོས་སྨྲས་པ་དགེ་ལེགས་འཕེལ།
གསོལ་འདེབས་ཞལ་གསུང་མ།
ཨེ་མ་ཧོ༔ སྔོན་དུས་ལོ་ཙཱ་ཨ་ཙར་ས་ལེ་འོད༔ བར་དུ་པདྨའི་རྒྱལ་ཚབ་དམ་པར་བསྔགས༔ མཐར་ཐུག་ལུང་རིག་གླིང་སོགས་གླིང་པ་འགས༔ རྗེས་བཟུང་དབུགས་དབྱུང་དམ་པ་གཞན་ལ་ཕན༔ བཟང་པོའི་མཚན་འཆང་དེ་ལ་གསོལ་བ་འདེབས༔ ཁྱེད་དང་པད་འབྱུང་དབྱེར་མེད་གསོལ་བཏབ་མཐུས༔ ཀ་དག་རང་གྲོལ་རྟོགས་པར་བྱིན་གྱིས་རློབས༔ དབང་བཞིས་རྒྱུད་སྨིན་དོན་གཉིས་ལྷུན་གྲུབ་ཤོག༔ ཅེས་པ་འདི་ས་ར་ཧི་ཏས་སྨྲས་པ་དགེའོ༔
ཀར་སྟོད་ཡོངས་འཛིན་ལ་གསུངས་པའི་གང་དྲན་གསོལ་འདེབས།
ཨེ་མ་ཧོ༔ སྐུ་གསུམ་བླ་མ་རྣམས་ལ་གསོལ་བ་འདེབས༔ གསང་གསུམ་ཡེ་ཤེས་རྟོགས་པར་བྱིན་གྱིས་རློབས༔ ཨོ་རྒྱན་པདྨ་ཡབ་ཡུམ་ལ་གསོལ་བ་འདེབས༔ ཐབས་ཤེས་ཟུང་འཇུག་རྟོགས་པར་བྱིན་གྱིས་རློབས༔ རྗེ་བཙུན་ཏཱ་རེ་ལྷ་མོ་ལ་གསོལ་བ་འདེབས༔ འཇིགས་བརྒྱད་གཡུལ་ལས་གྲོལ་བར་བྱིན་གྱིས་རློབས༔ རྗེ་བཙུན་འཇམ་པའི་དབྱངས་ལ་གསོལ་བ་འདེབས༔ མཁྱེན་གཉིས་མངོན་དུ་འགྱུར་བར་བྱིན་གྱིས་རློབས༔ འཕགས་པ་སྤྱན་རས་གཟིགས་ལ་གསོལ་བ་འདེབས༔ བྱང་སེམས་ཕྱོགས་མེད་འབྱོང་བར་བྱིན་གྱིས་རློབས༔ གསང་བདག་མཐུ་ཆེན་ཐོབ་ལ་གསོལ་བ་འདེབས༔ བརྟུལ་ཞུགས་རྨད་དུ་བྱུང་བར་བྱིན་གྱིས་རློབས༔ དྲིན་ཆེན་རྩ་བརྒྱུད་བླ་མ་ལ་གསོལ་བ་འདེབས༔ རང་རིག་བླ་མར་རྟོགས་པར་བྱིན་གྱིས་རློབས༔ ཡི་དམ་ཞི་ཁྲོ་རབ་འབྱམས་ལ་གསོལ་བ་འདེབས༔ དག་པ་རབ་འབྱམས་རྟོགས་པར་བྱིན་གྱིས་རློབས༔ གནས་གསུམ་མ་སྲིང་ཌཱཀྐི་ལ་གསོལ་བ་འདེབས༔ རྟེན་འབྱུང་སྟོང་ཉིད་རྟོགས་པར་བྱིན་གྱིས་རློབས༔ སྲུང་མ་དམ་ཅན་རྒྱ་མཚོ་ལ་གསོལ་བ་འདེབས༔ རྟེན་འབྲེལ་བརྡ་སྒོ་འབྱེད་པར་བྱིན་གྱིས་རློབས༔ དཀར་ཕྱོགས་སྐྱོང་བའི་ཚོགས་ལ་གསོལ་བ་འདེབས༔ ང་བདག་གདོན་ལས་གྲོལ་བར་བྱིན་གྱིས་རློབས༔ རང་སེམས་སྐྱེ་བ་མེད་ལ་གསོལ་བ་འདེབས༔ འཁོར་འདས་དག་མཉམ་རྟོགས་པར་བྱིན་གྱིས་རློབས༔ བདག་མེད་གནས་ལུགས་རང་གཞིའི་ཞལ་མཐོང་ནས༔ རྡོ་རྗེ་འཆང་དབང་ཚེ་འདིར་ཐོབ་པར་ཤོག༔ ཅེས་པའི་གང་དྲན་གསོལ་འདེབས་འདི༔ བཙན་པ་ཀར་སྟོད་ཡོངས་འཛིན་གྱིས༔ བསྐུལ་ངོར་གཞན་ཕན་བཟང་པོས་བྲིས༔ བློ་སེམས་དགེ་ལ་འགྱུར་བར་ཤོག༔
ཧོར་བླའི་ཞབས་བརྟན་གསོལ་འདེབས་འཁོར་གདོང་མགོན་དབང་གིས་མཛད་པ།
༄༅། ཨོཾ་སྭ་སྟི། རྒྱལ་བ་ཀུན་འདུས་མ་ཧཱ་གུ་རུ་ཡི། །ཕྲིན་ལས་ཡོངས་ཤར་འགྲོ་ངོར་གཟུགས་སྐུའི་ཚུལ། །གྲུབ་པའི་དབང་ཕྱུག་གཞན་ཕན་བཟང་པོ་ཡི། །བསྟན་སྲུང་དམ་ཅན་ཚོགས་ཀྱིས་ཉེར་དགོངས་ནས། །བར་ཆད་ཀུན་སེལ་སྐུ་ཚེ་བསྐལ་བརྒྱའི་བར། །བརྟན་ནས་བཤད་སྒྲུབ་བསྟན་པ་མཐར་རྒྱས་ཤོག །ཅེས་སློབ་བུ་དད་ལྡན་ལུང་རྟོགས་བསྟན་འཛིན་གྱིས་བསྐུལ་བས་བདག་གསང་འཛིན་དཔའ་བོ་མགོན་པོ་དབང་རྒྱལ་གྱིས་ཐུབ་བསྟན་ཨེ་ཝཾ་གསང་སྔགས་འཁོར་ལོ་གདོང་གི་ཕོ་བྲང་ཡང་དབེན་པདྨའི་དགའ་ཚལ་ནས་ཕུལ་བ་དགེའོ༔
ཧོར་བླའི་ཞབས་བརྟན་གསོལ་འདེབས་དྷརྨ་ཀིརྟིས་མཛད་པ།
༄༅། ཨོཾ་སྭ་སྟི། རྣམ་དག་ཚུལ་ཁྲིམས་ཕུང་པོ་མཛེས་པའི་སྐུ། །ཏིང་འཛིན་ཤེས་རབ་ཡོན་ཏན་དཔལ་གྱིས་བརྗིད། །མཐའ་ཡས་འགྲོ་བའི་ཕན་བདེའི་གཞིར་གྱུར་པ། །ཐུབ་དབང་སྲས་བཅས་གུས་པའི་གཙུག་གིས་མཆོད། །སྐྱབས་གསུམ་བཀའ་སྡོད་སྲུང་མའི་ཚོགས་བཅས་དང་། །རྟེན་འབྱུང་ཟབ་མོ་རྟེན་འབྲེལ་བསླུ་མེད་མཐུས། །བསྟན་འགྲོའི་ཉིན་བྱེད་མཆོག་སྤྲུལ་གཞན་ཕན་གྱི། །ཞབས་པད་བསྐལ་པ་རྒྱ་མཚོར་བརྟན་གྱུར་ཅིག །གང་དེའི་རྗེས་འཇུག་དགེ་འདུན་འདུས་པའི་སྡེ། །གང་ན་མཆིས་ཀུན་བསླབ་པ་རིན་པོ་ཆེ། །རྣམ་པ་གསུམ་གྱི་མཛད་བཟང་གོང་འཕེལ་མཐུས། །སྲིད་ཞིའི་ལེགས་ཚོགས་རྒྱས་པའི་་བཀྲ་ཤིས་ཤོག༔ ཅེས་རྣམ་གསུམ་དད་པའི་ནོར་གྱིས་ཕྱུག་པའི་ཐུབ་བསྟན་ལུང་རྟོགས་རྒྱ་མཚོའི་བཞེད་ངོར་སྤྲུལ་པའི་སྐུ་མཆོག་རིན་པོ་ཆེའི་ཞབས་བརྟན་སྨོན་ཚིག་འདི་རྒྱལ་ཁམས་པ་དྷརྨ་ཀིརྟིས་རྒྱལ་རོང་བས་མཐའི་ནགས་ཁྲོད་ནས་སྨྲས་པ་དགེ་ལེགས་འཕེལ༔