རིག་འཛིན་གཞན་བཟང་པོའི་སྐྱེ་ཕྲེང་ཞལ་ཐང་འབྲི་དཔེ།
རིག་འཛིན་ལུང་རིག་གླིང་པ་ཡི༔ ལུང་ཟིན་ཆོས་བདག་གཞན་ལ་ཕན༔ གང་གི་སྐྱེ་ཕྲེང་གཟུགས་རིས་ཀྱི༔ དཔེ་ཐོ་ཞལ་བཀོད་འདི་ན་དགེ༔ ཀྱཻ་ཧོ་སྐལ་ལྡན་སློབ་མའི་ཚོགས༔ ང་ནི་སོ་སྐྱེས་བྱིས་པ་ལགས༔ སྐྱེ་བའི་ཕྲེང་བར་འཁོར་བ་རུ༔ ལུས་བླངས་དུཿཁ་དག་ལ་སྤྱོད༔ ཡིན་ཀྱང་ཁྱེད་ཚོས་འཕགས་པར་མཐོང༔ བཟང་པོའི་སྐྱེ་ཕྲེང་ཡོད་པར་རློམས༔ གང་ཞིག་ཡིད་ཀྱིས་བྱེད་པ་པོ༔ དེ་ཡི་མདུན་ན་ཐུབ་པ་བཞུགས༔ བྱིན་རླབས་དབང་བསྐུར་སྩོལ་བར་འགྱུར༔ གསུངས་བཞིན་ཁྱེད་རྣམས་དགའ་བའི་ཕྱིར༔ རིགས་ཀྱི་བདག་པོས་ལུང་བསྟན་བཞིན༔ སྔོན་ཚེ་སྟོན་པ་མྱ་ངན་འདའ་བཞེད་ཚེ༔ བཞུགས་པར་གསོལ་འདེབས་དགེ་བསྙེན་ཙུནྡྷ་ཡིན༔ དེ་ཡི་གཟུགས་བརྙན་ཉན་ཐོས་ཆས་སུ་ཞུགས༔ ཕྱག་གཡས་ཐལ་སྦྱར་གཡོན་པས་མཎྚལ་འབུལ༔ ཨོ་རྒྱན་ཆེན་པོས་བསམ་ཡས་བཞེངས་པའི་ཚེ༔ ཨོ་རྒྱན་ཐུགས་ཟིན་ཨ་ཙར་ས་ལེ་འོད༔ དཀར་གསལ་ཁྲོ་འཛུམ་རྡོ་རྗེ་ཕུར་པ་གདེངས༔ གོས་དཀར་ལྕང་ལོ་འཆོལ་བའི་ཆ་བྱད་རྫོགས༔ མ་ཅིག་ཇོ་མོས་ཟབ་གཅོད་སྤེལ་བའི་ཚེ༔ ཐབས་ཀྱི་ཆ་འཛིན་ཐོད་པ་བྷ་དྲ་ཞེས༔ སྐུ་མདོག་གནག་སྣུམ་དར་གྱི་ཨང་རག་དང༔ ཕྱག་གཉིས་གྲི་རྐང་ཕྱེད་སྐྱིལ་སྒོམ་ཐག་མཛེས༔ གཏེར་ཆེན་མཆོག་གྱུར་གུ་རུ་ཆོས་དབང་གི༔ ཕྱག་རྒྱའི་རིག་མ་ན་རི་ཛྙཱ་ན་ཞེས༔ ལྷ་རྫས་ན་བཟའ་ཕྱག་གཉིས་གར་བསྒྱུར་མ༔ མཆོད་ལྷའི་རྣམ་འགྱུར་བཅུ་དྲུག་ལང་ཚོ་ངོམ༔ དེ་སྲས་རིག་འཛིན་ནམ་མཁའ་དཔལ་བའི་དྲུང༔ སློབ་མ་ཐུགས་ཟིན་ཨོ་རྒྱན་བསྟན་སྐྱོང་ཞེས༔ སྔགས་སྤྱོད་དམ་པ་ཕྱག་གཡས་ཕུར་པ་གདེངས༔ དབུ་སྐྲ་ཐོར་ཅོག་གཡོན་པས་ཟ་མ་ཏོག༔ བདེ་བའི་རིག་མ་གོ་ཆ་གཡོན་ཕྱོགས་བཞུགས༔ ཨོ་རྒྱན་ཐུགས་སྤྲུལ་ཧཱུྃ་ནག་མེ་འབར་དྲུང༔ ཞབས་ཏོག་གིས་མཉེས་པདྨ་བསྟན་འཛིན་ཞེས༔ རབ་བྱུང་ཆ་བྱད་ཕྱག་གཡས་རྒྱལ་མཚན་བསྒྲེངས༔ གཡོན་པས་ལྡེའུ་མིག་ཟ་འོག་གདན་ལ་བཞུགས༔ སྤྲུལ་སྐུ་ངེས་དོན་བསྟན་འཛིན་བཟང་པོའི་དྲུང༔ མཁས་དབང་སློབ་བུ་གྲུབ་དབང་དཀོན་མཆོག་ཞེས༔ དབུ་ལ་གཅོད་ཞྭ་ཕྱིང་བའི་ཐུལ་བ་མནབས༔ ཕྱག་གཡས་ཌཱ་རུ་གཡོན་པས་མི་རྐང་འབུད༔ མི་ལྤགས་གཡང་གཞིའི་གདན་ལ་ཕྱེད་སྐྱིལ་བཞུགས༔ རྫོགས་ཆེན་དངོས་སློབ་ལྕམ་བླ་ཀློང་ཡངས་པ༔ མཁས་པའི་དབང་པོ་ཕྱག་གཉིས་གླེགས་བམ་ཀློག༔ རབ་བྱུང་ཆས་ཅན་ཁྲི་འུར་འབོལ་གྱི་སྟེང༔ སྐྱིལ་ཀྲུང་གིས་བཞུགས་དགོངས་པའི་རྩལ་ཡང་སྦྱང༔ ད་ལྟ་རིག་འཛིན་ལུང་རིག་གླིང་པ་ཡི༔ ཆོས་དབང་སྐྱེས་ཐོབ་རིག་འཛིན་གཞན་ལ་ཕན༔ བླ་སྒྲུབ་ལས་བྱུང་རང་གི་མོས་ངོར་འདྲི༔ འདི་འོག་དཔལ་གྱི་རི་བོར་ཨོ་རྒྱན་གྱི༔ ཞབས་དྲུང་འཁོད་ནས་སླར་ཡང་ལྷ་ལྡན་གནས༔ བློ་བཟང་དཔལ་གྱི་ཁྲི་དྲུང་མཁན་པོར་འགྱུར༔ དེ་འཕོས་ཟངས་མདོག་དཔལ་རིར་པད་འབྱུང་གིས༔ དབུགས་དབྱུང་ཐོབ་ནས་སླར་ཡང་བསྟན་འགྲོའི་དོན༔ ཟབ་མོའི་གཏེར་འབྱིན་རིག་འཛིན་འགྲོ་འདུལ་གླིང༔ འགྲོ་དོན་རྒྱ་ཆེན་འབྲེལ་ཐོག་བདེ་ལ་འགོད༔ དེ་འདྲའི་སྐྱེ་ཕྲེང་ཟབ་གཏེར་ལུང་ལས་མངོན༔ སྐལ་ལྡན་སློབ་བུ་བྷྲ་མ་རའི་ཚོགས་རྣམས༔ འཇུག་ངོགས་བདེ་བའི་པདྨའི་ཟེའུ་འབྲུའི་ཚིག༔ དུས་ཚེས་ལེགས་པའི་ཚོགས་ཀྱི་དགའ་སྟོན་ལ༔ ལག་པའི་སོར་རྩེས་བསྒྲོན་པའི་མཛའ་ན་མོས༔ མིག་སྨན་རི་མོའི་ལམ་དུ་བགྱིས་པ་དགེ༔ སློབ་བུ་ཨ་དུང་བླ་མ་སྙིང་སྟོབས་ལྡན༔ པདྨ་དོན་གསལ་སོགས་ལ་སྤེལ་བ་ནི༔ དུས་མཐའི་གཏེར་མིང་ས་ར་ཧི་ཏས་བྲིས༔ འབྲེལ་ཚད་འགྲོ་ལ་ཕན་པའི་རྟེན་འབྲེལ་ཡོད༔ མནྟྲ་གུ་ཧྱ༔ མངྒ་ལཾ༔