ཆོས་བདག་ལུང་བསྟན་མུན་སེལ་འོད་འབར།
བཀའ་འདུས་ཆོས་ཀྱི་རྒྱ་མཚོ་དང༔ ཡང་གསང་ཌཱཀྐིའི་སྙིང་ཐིག་གི༔ ཐེམ་བྱང་ཁ་བྱང་ཡང་བྱང་དང༔ གནད་བྱང་མ་འོངས་ལུང་བསྟན་དང་༔ ཐོག་བབ་ཆོས་བདག་ལུང་བསྟན་སོགས༔ མུན་སེལ་འོད་སྟོང་འབར་བ་བཞུགས༔ རྩ་གསུམ་སྲུང་མ་གཏེར་བདག་ལ༔ སྒོ་གསུམ་གུས་པས་ཕྱག་འཚལ་ལོ༔ སྔོན་ཚེ་གངས་ཅན་རྒྱལ་ཁམས་སུ༔ བདུད་པོ་ཁ་རག་མགོ་དགུ་ཞེས༔ འདྲེ་སྲིན་འབྱུང་པོས་གང་བ་ལ༔ སྟོན་པ་མཉམ་མེད་ཐུབ་པ་ཡིས༔ འགྲོ་ལ་རྗེས་ཆགས་རིགས་གསུམ་སྤྲུལ༔ ཁྱད་པར་གངས་ཅན་ལྷ་གཅིག་པུ༔ འཕགས་མཆོག་མིག་མི་འཛུམ་པ་ཡིས༔ སྙིང་རྗེས་འགྲོ་འདྲེན་དམ་བཅས་པའི༔ གདུལ་བྱའི་མཆོག་གྱུར་བོད་ཀྱི་ཡུལ༔ སྤྲུལ་པ་མི་ཡིས་མ་བཀང་ན༔ སྲིན་པོའི་ཡུལ་གླིང་ཆེན་པོ་རུ༔ འགྱུར་སྙམ་ཐུགས་ཀྱིས་མ་བཟོད་དེ༔ སྤྲུལ་པའི་སྤྲེ་འུ་བོད་དུ་ནི༔ ཏིང་ངེ་འཛིན་ལ་བཞུགས་པར་མཛད༔ འཕགས་པའི་སྤྱན་ལས་མངོན་བྱུང་བའི༔ རྗེ་བཙུན་སྒྲོལ་མས་འགྲོ་བ་ལ༔ རྗེས་ཆགས་སྙིང་རྗེའི་རང་གདངས་ལས༔ བྲག་གི་སྲིན་མོའི་རྣམ་པར་འཕྲུལ༔ སྤྲེ་འུ་དེ་དང་ཟུང་བསྡེབ་པའི༔ བརྡ་དང་བརྡ་ཡི་སྒོ་ནས་ནི༔ བཟའ་མི་སྙོམ་འཇུག་འགྲོ་དྲུག་གི༔ རྣམ་ཤེས་སྤྲེ་འུ་དྲུག་ཏུ་བསྐྲུན༔ དེ་རྣམས་ཡར་འཕེལ་དུ་མར་གྱུར༔ མེས་པོ་འཕགས་མཆོག་སྟངས་དཔྱལ་གྱིས༔ རྗེས་བཟུང་ཕྱི་སྣོད་ནང་བཅུད་ཀུན༔ ལྷུན་གྲུབ་གཞལ་ཡས་ཁང་དུ་སྤྲུལ༔ ས་རྡོ་རི་བྲག་རིན་པོ་ཆེ༔ རྩི་ཤིང་ནགས་ཚལ་དྲི་བཟང་སྨན༔ ཆུ་ཀླུང་ཐམས་ཅད་ཡན་ལག་བརྒྱད༔ ལྡན་པའི་གངྒ་དུ་མར་གྱུར༔ ནང་བཅུད་སྐྱེ་འགྲོའི་ཤེས་རྒྱུད་ནི༔ འཕགས་པས་བྱིན་དབབ་འཕགས་པའི་ཐུགས༔ ཡིག་དྲུག་ངག་ཏུ་ལས་སུ་རུང༔ དེ་རྗེས་བཟའ་བའི་ཟས་སྐལ་དུ༔ བྱིན་གྱིས་རླབས་པའི་འབྲུ་དྲུག་ནི༔ ཡར་ལུང་ཀླུང་དེར་སྨིན་པར་བཏབ༔ ཀུན་གྱི་ཟས་ཀྱི་སྐལ་བར་གྱུར༔ དེ་ནས་འཕགས་པའི་སྤྲུལ་པ་ཡིས༔ གཟུགས་མཚན་དམ་པ་ཞིག་བྱུང་ནས༔ དགེ་བ་བཅུ་ཡི་ཁྲིམས་དེ་བཅས༔ མི་ཆོས་གཙང་མས་མི་གྲལ་བཙུད༔ ཀུན་བཟང་སྤྲུལ་པ་ལྷ་ཡི་རིགས༔ རིག་པའི་སྐྱེས་བུས་མི་དབང་མཛད༔ དེ་དང་རྗེས་འབྲེལ་རིགས་གསུམ་གྱི༔ སྤྲུལ་པའི་རྒྱལ་པོ་རེ་རེ་ནི༔ ལྷ་རི་སྙན་ཤལ་བར་དུ་བྱུང༔ དེ་དུས་ཕོ་བྲང་བླ་མཁར་དུ༔ དམ་པ་ཆོས་ཀྱི་དབུ་བརྙེས་པའི༔ མདོ་སྡེ་ཟ་མ་ཏོག་དང་ནི༔ སྤང་སྐོང་སཙྪའི་བསྐོས་ཕོར་སོགས༔ དམ་པའི་དབུ་བརྙེས་གསང་གཉེན་བཏགས༔ རྒྱལ་རབས་ལྔ་ནས་འཕགས་པ་ཡི༔ སྤྲུལ་པ་དངོས་བྱོན་སྲོང་བཙན་སྒམ༔ སྒྲོལ་མ་དཀར་སྔོན་གཉིས་དང་བཅས༔ སངས་རྒྱས་བསྟན་པའི་གཞི་མ་བཙུགས༔ བརྒྱ་རྩའི་ལྷ་ཁང་བྱིན་ཅན་བཞེངས༔ དེ་མཐར་འཇམ་དབྱངས་སྤྲུལ་པའི་རྒྱལ༔ ཁྲི་སྲོང་ལྡེའུ་བཙན་ཞེས་བྱ་བས༔ རྒྱལ་བསྟན་མཐའ་ནས་མཐའ་རུ་སྤེལ༔ བསམ་པའི་ཐུགས་བསྐྱེད་མཛད་པའི་ཚེ༔ སྔོན་སྦྱང་སྨོན་ལམ་དག་པའི་མཐུས༔ རྒྱ་གར་པཎ་ཆེན་བརྒྱ་རྩ་དྲངས༔ ཁྱད་པར་སྣང་མཐའི་ཐུགས་ཀྱི་སྤྲུལ༔ རྫུས་སྐྱེས་པདྨ་ལས་འཁྲུངས་པའི༔ རིགས་སྔགས་མཐུ་སྟོབས་ཐོད་ཕྲེང་རྩལ༔ སྔོན་སྨོན་རྗེས་དྲན་བོད་དུ་བྱོན༔ བསམ་ཡས་མི་འགྱུར་གཙུག་ལག་བཞེངས༔ རྒྱལ་པོའི་བསམ་པ་མཐར་ཕྱིན་ཚེ༔ དེ་དུས་རྗེ་འབངས་གྲོགས་དང་མཚོ་རྒྱལ་གྱིས༔ དུས་གསུམ་སངས་རྒྱས་པདྨ་ཐོད་ཕྲེང་ལ༔ ཕྱག་འཚལ་བསྐོར་བ་མཎྜལ་མཆོད་བསྟོད་ཕུལ༔ ཀྱཻ་མ༔ ད་ལྟའི་དུས་བཟང་ཚེ་རིང་ལོངས་སྤྱོད་ལྡན༔ དམ་པའི་ཆོས་དར་བདུད་རིགས་ཟིལ་གནོན་པ༔ བདག་ཅག་རྣམས་ཀྱི་དཔལ་དུ་ཤར་ལགས་ཀྱང༔ མ་འོངས་རྩུབ་འགྱུར་སྙིགས་མའི་སེམས་ཅན་རྣམས༔ སྐྱབས་མགོན་མེད་པའི་མུན་འཁྱམས་འཆོལ་ཉོག་ལ༔ ཕན་པའི་ཐབས་ནི་ཇི་ལྟར་བྱས་ན་དགེ༔ དུས་གསུམ་ས་ལེར་མཁྱེན་པས་གསུང་དུ་གསོལ༔ མ་འོངས་སྐལ་དམན་དོན་ཕྱིར་གསུང་དུ་གསོལ༔ བདག་ཅག་རྣམས་ཀྱི་དོན་དུ་གསུང་དུ་གསོལ༔ གུ་རུ་དུས་གསུམ་མཁྱེན་པའི་ཞལ་ནས་ནི༔ ཀྱཻ་ཧོ༔ ཁྱེད་ཅག་རྗེ་འབངས་གྲོགས་དང་བཅས༔ ཐམས་ཅད་མ་ཡེངས་སྙན་ཚུར་གསོན༔ སྐལ་ངན་སྙིགས་མའི་སེམས་ཅན་རྣམས༔ ཚེ་མཐར་ཕྱིན་པའི་གང་ཟག་དཀོན༔ དམ་ཆོས་ཤ་སྟག་བྱེད་པ་རྣམས༔ ཉིན་མོའི་སྐར་མ་ཙམ་དུ་ཟད༔ དུས་མ་ཡིན་པར་རྐྱེན་ངན་པའི༔ དབང་དུ་འཆི་བ་ཕལ་ཆེར་ཡིན༔ སྡུག་བསྔལ་གྱི་ནི་མཚོ་ཆེན་རྡོལ༔ བདེ་བའི་གོ་སྐབས་དང་བྲལ་བས༔ སངས་རྒྱས་སྒྲུབ་པའི་ཐབས་མི་ཤེས༔ དུ་ཥའི་རྒྱུ་ལ་ཧབ་ཐོབ་བྱེད༔ དཀོན་མཆོག་ཐུགས་རྗེའི་རྣོ་མྱུར་རུབ༔ རང་རང་ལས་གཙོ་རྒྱུ་འབྲས་ནི༔ བསླུ་བ་མེད་པ་མ་རིག་པས༔ ད་དུང་འཁོར་བར་གཏན་འཁྱམས་སུ༔ ཁོར་མོ་ཡུག་ཏུ་འཁོར་བ་འོ༔ ཚེ་གཅིག་སྐད་ཅིག་རང་གྲོལ་དུ༔ འགྲོ་རྒྱུ་ཡིན་པ་ལྟ་བུ་ནི༔ ཤིན་ཏུ་ངན་ཅིང་བླུན་ཚབ་ཆེ༔ དམ་པའི་ཆོས་མ་བྱས་པ་ལ༔ བདེ་བའི་བསྟན་པ་འཛིན་འདོད་པས༔ རྒྱུ་ལས་མ་བྱུང་ཨ་རེ་འཁྲུལ༔ སྡུག་བསྔལ་མི་འདོད་བཞིན་སྡིག་ལས༔ མི་ཚེ་ཟད་པ་ཨ་རེ་འཁྲུལ༔ འཆི་བ་མི་དྲན་བཞིན་དུ་ནི༔ ཡང་ཡང་ལུས་ལེན་ཡང་ཡང་འཆི༔ དེ་འདྲའི་དུས་ངན་དེ་སྐྱོབ་པའི༔ ས་གཏེར་དགོངས་པའི་གཏེར་དུ་ནི༔ བསྒྱུར་བ་མཁའ་འགྲོའི་སྙིང་ཐིག་འདི༔ ད་ལྟ་མ་སྤེལ་མ་འོངས་དུས༔ འགྲོ་དོན་རྒྱ་ཆེན་འབྱུང་བར་འགྱུར༔ གུས་པས་ཕྱག་འཚལ་འདི་སྐད་ཞུས༔ དེས་ན་སློབ་དཔོན་ཆེན་པོ་ལགས༔ གང་གི་ཟབ་གཏེར་ངོ་མཚར་བ༔ འདི་ཉིད་སྤེལ་བའི་མ་འོངས་དུས༔ འགྲོ་དོན་ཅི་འདྲ་འབྱུང་ངམ་ཅི༔ གཏེར་གནས་གང་དང་གང་དུ་སྦ༔ འདོན་པའི་དུས་ནི་གང་ལ་བྱ༔ སྐལ་ལྡན་ཅི་ཙམ་ཞིག་ལ་ཕན༔ ཆོས་ཀྱི་བསྟན་པ་ཅི་ཙམ་གནས༔ དེ་ལ་བར་ཆད་ཅི་ལྟར་འོངས༔ ཞེས་ཞུས་ཨོ་རྒྱན་ཞལ་ནས་ནི༔ ཨེ་མ་ཀ་དག་ཟབ་མོའི་གཏེར༔ བཀའ་འདུས་ཟབ་མོའི་གསང་གཏེར་འདི༔ ཏཱ་རེ་གནས་ཀྱི་བྲག་རི་དང༔ རྒྱལ་མོ་དམུ་རྡོའི་ཞོལ་དུ་ནི༔ རིམ་པ་བདུན་གྱི་རྒྱས་ཐོབ་ལ༔ དྲང་སྲོང་ཆེན་པོས་བྱ་ར་མཛོད༔ མ་འོངས་གཉེར་བྱང་བུ་ལ་གཏོད༔ བཀའ་གཏད་ཟབ་མོ་མ་ཉམས་ཤིག༔ གཅེས་པའི་ཆོས་བདག་སྐྱེས་བུས་སྐྱོངས༔ ཟབ་གཏེར་འདི་ཉིད་འདོན་པའི་དུས༔ ཉི་མ་གཟས་ཟིན་མུན་ནག་རུབ༔ ཤར་ལྷོ་ནུབ་བྱང་སྐར་ཐན་འོང༔ ལྷ་སའི་གླིང་དུ་སྔར་མེད་པའི༔ རྟེན་གྱི་མཆོད་སྡོང་ཆེན་པོ་འཛུགས༔ དམ་སྲི་དམ་འགོང་རྒྱ་འདྲེ་ཡི༔ སྣ་འདྲེན་རྒྱ་བོད་གདོང་གཏུག་བྱེད༔ རྒྱ་ལྕགས་མཚམས་སུ་དམག་སྒར་འཇིགས༔ ཧོར་སྲས་ཁག་ལྔ་སྡུག་ཡུས་ཆེ༔ རྒྱ་ཡི་དམག་ཆེན་བོད་ལ་འཕྱུར༔ རྒྱ་བོད་མགོ་ལ་མུ་མེན་འཛུགས༔ དམ་སྲི་རྒྱ་འདྲེ་སྔར་མེད་པའི༔ རྒྱ་མིའི་མཚོན་ཐོགས་བརྒྱ་ཙམ་སླེབས༔ ཕུ་ཡི་སྣ་འདྲེན་བོད་ལ་སྡིག༔ བཞག་བྲའི་མདུན་དུ་སྔར་མེད་པའི༔ ལྟས་ཤིག་ཀུན་གྱིས་ཐེ་ཚོམ་བྱེད༔ ཕག་རྒོད་ཟེ་བས་མདོ་ཁམས་དཀྲུགས༔ དབྱི་ཁྲོམ་གངས་རི་ཁྲ་བོར་འགྱུར༔ རང་བྱོན་འགའ་ཡིས་གསལ་ཁ་སྟོན༔ ཙཱ་རི་ཆུ་ཐོག་རི་བྲག་འཇིགས༔ ལམ་འགའ་གཅན་གཟན་གདུག་པ་དར༔ ཀ་ཡི་བྲག་ལ་གས་གྲུམ་མང༔ ཐུགས་ཆེན་གནས་ལ་རྟགས་འགའ་མངོན༔ དཔལ་གྱི་རི་ལ་གསང་གཏེར་རྡོལ༔ ཁྲི་སྙན་དུག་གིས་ཚོང་དུས་འཁྲུགས༔ ཐ་མ་ཁ་ལ་ཟས་མཆོག་རློམ༔ རྒོད་པོ་རྫོངས་སུ་ཧཱུྃ་རི་སྙིལ༔ གཏེར་ཆོས་ཡིན་མིན་དུ་མ་འབྱུང༔ གཏེར་སྟོན་མང་པོས་ས་སྟེང་འགེངས༔ ཕལ་ཆེར་སྒྲུབ་ལ་གཞོལ་བ་དང༔ ཕལ་ཆེར་ལྷ་བུས་དབང་དུ་བྱེད༔ བླ་མའི་ཚུལ་བཟུང་དམག་ལས་བྱེད༔ སྡོམ་པ་དམ་ཚིག་རྩྭ་བཞིན་དོར༔ དགོན་པར་བུ་ཆུང་ངུ་སྐད་ལྡང༔ གཙུག་ལག་མང་པོ་ཞིག་རལ་བྱེད༔ སྡུག་འདྲེ་འགོང་པོ་ལྷ་རུ་མཆོད༔ པདྨའི་ཟབ་ཆོས་སྨད་པའི་དུས༔ ཆོས་མིན་བཅོས་པ་དང་དུ་ལེན༔ ནད་མཚོན་མུ་གེ་སྤྲིན་ལྟར་འཐིབ༔ བཀའ་བསྟན་ལུང་ལ་མ་གྲགས་ཤིང༔ སྨན་པས་ངོ་མི་ཤེས་པ་ཡི༔ འགོས་ཡམས་སྣ་ཚོགས་མི་ཐོག་འབུད༔ མཐའ་དམག་རིམ་བཞིན་བོད་དུ་འོང༔ སྐྱིད་མེད་སེམས་ཅན་སྡུག་ལ་འཁོར༔ ཆར་ཆུ་མི་སྙོམ་སྒང་གཤོང་ཆེ༔ དབྱི་རྩང་རྒྱ་སོགས་དམག་སྐད་འུར༔ དེ་ཚེ་འགྲོ་བ་སྐྱོབ་པའི་མགོན༔ ཨ་ཙར་གསལ་སྣང་སྤྲུལ་པ་ཡིས༔ ཏཱ་རེ་མི་འགྱུར་དགའ་ཚལ་གྱི༔ གནས་སྒོ་འབྱེད་དང་ཟབ་གཏེར་འདོན༔ ལྷ་དང་བླ་མས་བྱིན་གྱིས་བརླབས༔ རྟེན་འབྲེལ་བརྡ་སྒོ་འབྱེད་པའི་དཔལ༔ ལུས་རྒྱ་རིག་མ་ལྔ་དང་ནི༔ རྟེན་འབྲེལ་བཟང་པོས་མཚམས་སྦྱར་ན༔ ཆོས་འདིས་སྐལ་ལྡན་མང་པོ་གྲོལ༔ འབྲེལ་ཐོགས་འབུམ་ལྔ་བདེ་ལ་འགོད༔ དེ་ཙམ་འགྲིགས་པའི་ལུང་མེད་ན༔ སྒྲ་དབྱངས་ལྷ་མོས་བྱིན་བརླབས་པའི༔ ལས་རྒྱ་སྐལ་བ་ལྡན་པ་གཅིག༔ ས་ཁམས་སྣ་རྩེ་ངོམ་པའི་ལོ༔ དེ་དང་རྟེན་འབྲེལ་དུས་ལྡན་ན༔ བསམ་གཏན་ཡེ་ཤེས་གླིང་པ་ཞེས༔ དམུ་རྡོའི་ནང་ནས་ཟབ་གཏེར་འདོན༔ འབྲེལ་ཚད་འགྲོ་ལ་ཕན་པ་འབྱུང༔ སྤྱོད་པ་མ་ངེས་སྣ་ཚོགས་ཀྱིས༔ འགྲོ་དོན་མཐའ་ནས་མཐའ་རུ་འཁྱོལ༔ ཡེ་ཤེས་སྐུ་ཅན་བླ་མ་མཆོག༔ འགྲོ་འདུལ་ལུང་རིག་གླིང་པ་ཡི༔ ཟབ་ཆོས་བསྟན་པ་བཙུགས་ནུས་ན༔ མེ་འབར་རླུང་གིས་བདས་པ་བཞིན༔ གཏེར་ཆོས་མ་བུ་ཟུང་འབྲེལ་གྱིས༔ བསྟན་པའི་རྩ་ལག་ལན་གཅིག་འགྱུར༔ ཆོས་ཀྱི་བདག་པོ་རང་ཉིད་ལ༔ ཚེ་གེགས་བར་ཆད་མང་བས་གཟོབ༔ དེ་བཟློག་སྐུ་གསུང་ཐུགས་རྟེན་བཞེངས༔ སེར་སྣའི་འཆིང་བ་བཀྲོལ་དགོས་ཤིང༔ མཆོད་སྦྱིན་གཏེར་གྱི་སྒོ་འཕར་འབྱེད༔ དུས་མིན་འཆི་བ་འཕྲལ་དུ་བཟློག༔ འགྲོ་རྣམས་བདེ་སྐྱིད་དགེ་ལ་འགོད༔ མཐའ་དམག་གདུག་པ་རང་སར་གྲོལ༔ དེ་ཚེ་ཕན་པའི་གྲོགས་ཀྱི་མཆོག༔ སྐལ་ལྡན་ཆོས་ཀྱི་བདག་པོ་ནི༔ རྩ་བ་བཅུ་དང་ཡན་ལག་ནི༔ ལྔ་གསུམ་ལུང་ཟིན་བརྒྱ་རྩ་འབྱུང༔ ཁྱད་པར་སར་གནས་སེམས་དཔའ་ཆེ༔ སོག་པོ་དཔལ་ཡེ་སྤྲུལ་པ་ནི༔ ཏྲེ་ཧོར་ཡུལ་དུ་སྐུ་བལྟམས་པ༔ ཧསྟི་ལོ་པ་བཞིན་རས་རྒྱས༔ ལི་ཡི་ཕྱོགས་སུ་འགྲོ་དོན་འབྱུང༔ རྒྱལ་ཁམས་འགྲོ་ལ་ཆོས་ཆར་འབེབས༔ འབྲེལ་ཚད་མཐོ་རིས་བདེ་ལ་འགོད༔ ལུང་གི་མིང་ཅན་སྤྲུལ་པའི་སྐུ༔ ཡོངས་རྫོགས་ཆོས་ཀྱི་བཀའ་བབ་ཡིན༔ དེ་དང་རྟེན་འབྲེལ་མ་འཕྱུག་ན༔ འདི་ཕྱིའི་རེ་ལྟོས་ཆོས་འདིས་བྱེད༔ ཉང་གི་བནྡྷེའི་སྤྲུལ་པའི་ཆ༔ ཟབ་གཏེར་མཛོད་འཛིན་མ་ཡི་མིང༔ བྱ་གླང་ལོ་པ་སྙིང་སྨེས་སྤྲས༔ དེ་ལ་བཀའ་འདུས་ས་གཏེར་སྤྲོད༔ དང་དུ་བླང་ན་བསྟན་སྲོག་འཛིན༔ སྒྲུབ་པའི་རྒྱལ་མཚན་སྤེལ་ལ་དབང༔ དེ་བཞིན་ཆོས་རྒྱལ་བློན་པོ་ནི༔ ལྷས་གནང་སྤྲུལ་པ་ཆོས་ཀྱི་མཚན༔ དབྱི་མདོའི་ཕྱོགས་སུ་བསྟན་སྲོག་འཛིན༔ ཞེན་པའི་འཕྲེང་ཐག་ཆོད་པ་ན༔ ཚེ་འདིར་གྲོལ་བར་གདོན་མི་ཟ༔ དེ་ལ་ཕྱི་ནང་ཟབ་གཏེར་སྤྲོད༔ རེ་འགའ་འགྲོ་ལ་ཕན་པ་འབྱུང༔ གསེར་ཕྱོགས་ལྷ་ལུང་སྤྲུལ་པའི་ཆ༔ གུ་རུའི་མཚན་འཆང་རྟོགས་པ་ལྡན༔ གཏེར་ཆོས་འདི་དང་དུས་ཐེབ་ན༔ ལོ་གསུམ་ཚེ་ཡི་བཤོལ་ཐེབ་ཅིང༔ གསེར་ཕྱོགས་འགྲོ་ལ་ངེས་ཤེས་བྱེད༔ ཁྱེའུ་ཆུང་རྣམ་རོལ་བློ་ཡི་མིང༔ དགུ་བདུན་ལྔ་བརྒྱད་གེགས་ཆེན་ལྡང༔ ཟབ་ཆོས་འདི་ཉིད་ཐེ་ཚོམ་གྱིས༔ མ་བསླད་ཚེ་འཕྲང་གེགས་ལས་གྲོལ༔ འགྲོ་ཀུན་ཐར་བའི་ལམ་ལ་འགོད༔ ཧོར་ཆུའི་རྒྱུད་དུ་བསྟན་པ་དར༔ ཟལ་མོ་སྒང་གི་རྩང་ཕྱོགས་དེར༔ གཡུ་སྒྲ་སྙིང་པོའི་ཟློས་གར་མཁན༔ འཇིགས་མེད་བསྟན་པའི་གདེངས་དང་ལྡན༔ ཞབས་རྡུམ་ཟླུམ་པ་འབྲུག་སྦྲུལ་ལོ༔ ཆོས་འདིར་དབང་བས་དང་དུ་ལོངས༔ ཐེ་ཚོམ་བདུད་ཀྱིས་མ་བསླུས་ན༔ དགེ་ལེགས་དབྱར་གྱི་པདྨོར་འགྲན༔ འབྲེལ་ཚད་པདྨ་འོད་ལ་ཕྱིན༔ རྒྱལ་རོང་གནམ་ས་ཆོས་འབྱུང་འདྲའི༔ རྒྱུད་དུ་སྐུ་བལྟམས་བློ་ཡི་མིང༔ ཤེལ་དཀར་མཚོ་ཡི་སྤྲུལ་པ་ནི༔ ཟབ་གསང་དོན་ལ་སྤྱོད་པ་འབྱུང༔ དེ་ལ་དྲང་སྲོང་ཆེན་པོ་གཏོད༔ བཀའ་རྐུན་ལོག་པའི་གཉའ་ནོན་འགྱུར༔ ལྷ་སྒང་གཡས་ཕྱོགས་ནགས་ཞེས་པའི༔ ས་རུ་མཁའ་འགྲོའི་སྤྲུལ་པའི་ཆ༔ ཤིང་གླང་ལོ་པ་ཀུན་བཟང་གི༔ མཚན་འཆང་རོ་སྙོམས་སྤྱོད་པ་འཆང༔ པདྨ་གསུང་གི་དངོས་གྲུབ་ཐོབ༔ རྫ་ཡི་བྲག་དམར་རྒྱུད་དུ་ནི༔ ཀུན་དགའ་ཞེས་བྱ་བྱི་ཕག་ལོ༔ ལྷ་ཡི་ལོ་ཙའི་ཟློས་གར་མཁན༔ འདུལ་བའི་བསྟན་པས་འགྲོ་ལ་མཛེས༔ བར་ཆད་དམ་སྲིའི་ལྡང་མིག་ལྟ༔ དེ་བཟློག་ཟབ་ཆོས་འདི་ཡིས་བྱེད༔ ཉམས་སུ་མི་བསྟར་ཕུག་ཏུ་སྦོས༔ རྩང་རོང་སྟག་བཀྲའི་རྒྱུད་དུ་ནི༔ ཟབ་གཏེར་བསྟན་པའི་མངའ་བདག་ཆེ༔ མི་ཕམ་མགོན་སྤྲུལ་ལྕེ་གཉིས་ལོ༔ སྐར་ཚོགས་ལྟ་བུའི་སློབ་ཚོགས་འདུས༔ བྱེ་བ་ས་ཡའི་འགྲོ་བ་འདྲེན༔ རྟེན་འབྲེལ་ཟབ་མོས་མཚམས་སྦྱར་ན༔ སྐུ་ཚེ་མཐར་ཕྱིན་སྙན་གྲགས་འུར༔ དེ་དག་རྩ་བའི་ཆོས་བདག་ཡིན༔ ས་མ་ཡཱ༔ ཡན་ལག་བཅོ་ལྔའི་རྣམ་གྲངས་ནི༔ མཁན་སློབ་ཆོས་གསུམ་ཞབས་དྲུང་དེར༔ དབང་གྲལ་འཁོད་པའི་རྗེ་དང་འབངས༔ ཕལ་མོ་ཆེ་ཡི་སྐལ་ལྡན་རྣམས༔ ད་ལྟ་ཕལ་ཆེར་གཏེར་ལ་དབང༔ དུ་མ་ཆོས་ཀྱི་བདག་པོར་བསྐོས༔ ཁྱད་པར་གནུབ་བན་ཛྙཱ་ནའི་འཕྲུལ༔ ཤིང་ཁམས་སྟག་གི་ལོ་བ་གཅིག༔ རྡོ་རྗེ་དབྱི་ཁྲོམ་རྒྱུད་དུ་ནི༔ པྲཛྙཱ་བྷ་དྲ་ཆོས་ལ་དབང༔ ཟལ་མོའི་རྒྱུད་དུ་སྐུར་སྤྲུལ་པ༔ ལང་ལབ་བྱང་ཆུབ་རྡོ་རྗེ་ཡི༔ སྐྱེ་མཐའ་རིགས་ལྡན་བཙུན་པ་དེ༔ རྟ་སྦྲུལ་ལོ་བ་ཤེས་རྒྱུད་རྩིང༔ སྔོན་སྦྱངས་འབྲེལ་བའི་བླ་མ་ཡི༔ བཀའ་བཞིན་ཉན་ཅིང་ཟབ་ཆོས་སྤེལ༔ བར་ཆད་སད་ཀྱིས་མ་བརྐུས་ན༔ རིག་འཛིན་ཟུང་གི་གཏེར་ཆོས་འདིའི༔ རྒྱལ་མཚན་ལན་གཅིག་མཁའ་ལ་བསྒྲེངས༔ ལྷ་ལྕམ་གསལ་སྤྲུལ་དབྱི་ཡི་རྒྱུད༔ ཆུ་ཁམས་ཕག་གི་ལོ་བ་ནི༔ ལུང་གི་མིང་ཅན་ལོག་ལྟ་དཀོན༔ སྔགས་བཙུན་འཆོལ་བའི་སྤྱོད་པ་ཅན༔ མཚོ་རྒྱལ་སྤྲུལ་པས་རྗེས་སུ་བཟུང༔ སྒྲུབ་པའི་རྒྱལ་མཚན་བཙུགས་ནུས་ན༔ ཚེ་འདིར་གྲོལ་བར་གདོན་མི་ཟ༔ རྣམ་སྣང་ལོ་ཙཱའི་ཕྲིན་ལས་སྤྲུལ༔ རིགས་སྲས་བཛྲ་ཞེས་བྱ་བ༔ མཁས་ཤིང་གྲུབ་པས་བསྟན་འགྲོ་གསོ༔ དམ་སྲིའི་སྡང་མིག་མ་ངོམ་ན༔ ཁམས་དབུས་གཙང་གསུམ་དག་ལ་མངོན༔ ཆུ་ཕོ་རྟོགས་པ་ལྡན་པ་ཡི༔ ལས་རྒྱའི་རྣམ་འཕྲུལ་རིགས་ཀྱི་མིང༔ རྣམ་བྱུང་ལོ་བ་ཤེས་རབ་ཆེ༔ པདྨའི་ཟབ་ཆོས་འདི་ལ་དབང༔ ཆོས་བློན་སྤྲེའུ་ཆུང་ཟློས་གར་བ༔ ར་ཁང་རྒྱུད་དུ་བལྟམས་པའི་བུ༔ ལྕགས་ཁམས་གར་མཁན་ལོ་བ་འབྱུང༔ པདྨའི་མིང་ཅན་སེམས་རྒྱུད་དུལ༔ ཚངས་སྤྱོད་སྡོམ་པ་བསྲུང་ནུས་ན༔ ཡུལ་དེའི་བདེ་སྐྱིད་གཞི་ནས་སློང༔ ལི་ཡི་ཕྱོགས་སུ་ཀརྨའི་མིང༔ རོ་གཅིག་རྟོགས་པས་སྒྲུབ་ལ་བརྩོན༔ མཐོང་ཐོས་འགྲོ་བའི་ཤེས་རྒྱུད་འགུགས༔ ཟབ་མོའི་གཏེར་གྱི་ཆོས་ལ་དབང༔ བྲག་གི་རྒྱུད་དུ་སྐུ་བལྟམས་པ༔ ཀིརྟིའི་མཚན་འཆང་འདུལ་བ་འཛིན༔ ལྷ་རྗེ་དམ་པས་བསྟན་འགྲོ་གསོ༔ ཟབ་མོའི་གཏེར་གྱི་ཆོས་ལ་དབང༔ རྩང་རོང་ལེགས་གྲུབ་སྤྲུལ་པ་ནི༔ མདོ་ཡི་མིང་ཅན་བཀུར་བའི་འོས༔ ཐེ་ཚོམ་བདུད་ཀྱིས་མ་བསླུས་ན༔ པདྨའི་ཟབ་ཆོས་འདི་ལ་དབང༔ ཙ་ཡི་ཕྱོགས་སུ་འཕགས་པའི་འཕྲུལ༔ འགྱུར་མེད་མཚན་འཆང་གླང་སྦྲུལ་ལོ༔ གྲོལ་ནས་གྲོལ་བའི་ལམ་ཡང་སྟོན༔ ཟབ་མོའི་གཏེར་གྱི་ཆོས་ལ་དབང༔ རྩང་དུ་འགྱུར་མེད་མཚན་འཆང་བ༔ གདུག་པ་རུ་ཏྲའི་མངའ་བདག་ལོ༔ གནས་གསུམ་གང་རུང་སྨེ་བས་སྤྲས༔ བདུད་འཇོམས་ཕྲིན་ལས་ཆ་ཤས་སྤྲུལ༔ མི་མཐུན་གྲོགས་སུ་འགྱུར་ལ་གཟོབ༔ རྒྱལ་མོ་དབྱི་ཡི་ཁོག་པ་དེར༔ ལྡན་མ་རྩེ་མང་ཟློས་གར་མཁན༔ ནོར་སྲུང་ལོ་བ་ཐུང་ལ་སྒེག༔ བརྗིད་པའི་ཉམས་ཅན་ཀ་ཡི་མིང༔ ཐེ་ཚོམ་བདུད་ཀྱིས་མ་བསླུས་ན༔ གསུང་རྟེན་སྦྱིན་པས་འགྲོ་སེམས་གསོ༔ ཕྱི་མའི་སྐྱེ་སྲིད་དེ་ཡིས་ནི༔ མདོ་ཡི་ཕྱོགས་སུ་རྒྱལ་བསྟན་སྤེལ༔ གསེར་རམ་ཧོར་གྱི་ས་མཚམས་དུ༔ ནམ་མཁའི་སྙིང་པོའི་སྒྱུ་འཕྲུལ་ནི༔ དོན་གྱི་མཚན་འཆང་ཁྱི་འམ་ཕག༔ སྨེ་བ་ཟླ་གམ་དབང་གི་ལྟས༔ འབྲེལ་ཚད་སྙིང་རྗེས་སྐྱོང་བ་འབྱུང༔ ལི་ཡི་རྒྱུད་དུ་སྐུར་སྤྲུལ་པ༔ ཡར་ཀླུང་སྦ་མི་ཁྲི་གཞེར་ནི༔ གར་མཁན་ལོ་བ་མ་ཅིག་གིས༔ རྗེས་བཟུང་བྱ་བཏང་རྫོགས་ཆེན་པ༔ རྒྱལ་ཁམས་ཕྱོགས་མེད་གདུལ་བྱ་སྐྱོང༔ ཆོས་དབྱིངས་མཚན་འཆང་ཐུགས་སྒམ་པོ༔ ལྷ་དགའི་ཕྱོགས་སུ་གཏེར་གྱི་རྒྱུད༔ དཔལ་བརྩེགས་བློན་གྱི་ཟློས་གར་པ༔ རིགས་སྲས་སྲུང་བཙན་མཚན་འཆང་བ༔ མ་ཏི་མཁའ་ལྡིང་ལོ་བ་འབྱུང༔ རྒྱལ་བའི་བསྟན་པ་རིམ་གྱིས་གསོ༔ དེ་དང་རྟེན་འབྲེལ་འགྲིགས་སྲིད་ན༔ འདི་ཕྱིའི་བདེ་སྐྱིད་དེ་ལ་འབྱུང༔ ས་མ་ཡཱ༔ ལུང་ཟིན་སྤྲུལ་པའི་ཟློས་གར་མཁན༔ བརྒྱ་རྩ་བརྒྱད་ཀྱི་རིམ་པ་ནི༔ ཤར་ལྷོ་ནུབ་བྱང་མཚམས་བཞི་དང༔ མ་ངེས་ཕྱོགས་ནས་རྒྱ་གར་དང༔ བོད་ཀྱི་རྗེ་འབངས་གྲུབ་ཐོབ་ཀྱི༔ སྤྲུལ་པ་ཆོས་ལ་དབང་བ་ནི༔ རྡོ་རྗེ་རིན་ཆེན་པདྨ་དང༔ ཀརྨ་བུདྡྷ་དྷརྨཱ་དང༔ བོ་དྷི་སངྒ་མོ་ཙ་ནི༔ མོ་ཀྵའི་མཚན་འཆང་རེ་རེར་བཅུ༔ ཤེས་རྒྱུད་ཡོན་ཏན་ཆེ་བ་དང༔ པདྨ་བདག་དང་མཚོ་རྒྱལ་ལ༔ མི་ཕྱེད་དད་པ་ཐོབ་པ་འབྱུང༔ ཁྱད་པར་ཨ་ཙརྱ་སྤྲུལ་ཏེ༔ འཕྲད་པ་ཙམ་གྱིས་མོས་འདུན་སློང༔ དེ་སོགས་ཟབ་གཏེར་ཆོས་ལ་དབང༔ སྐལ་ལྡན་གང་ཟག་བརྒྱད་ལྡན་ཞིག༔ འཕེལ་རིག་གྲུབ་ལྡན་རབ་དབང་རྩལ༔ བློ་གྲོས་མཚན་འཆང་ལག་པ་གཡོན༔ སྨེ་བས་སྤྲས་པ་ཨཥྚ་ནི༔ ཕོ་མོ་རྒན་གཞོན་མཐོ་དམན་སོགས༔ མ་ངེས་ཟབ་གཏེར་འདི་ལ་མོས༔ ཤེས་རྒྱུད་རྟོགས་ལ་འཕྱུག་མེད་མཛོད༔ ཟབ་གཏེར་འདི་ལ་སུས་སྤྱོད་པ༔ གནས་སྐབས་མཐར་ཐུག་གང་དུ་འང༔ ཡོན་ཏན་སྣ་རེ་མ་ཐོབ་ན༔ རྒྱ་གར་མཁས་པ་པདྨ་དང༔ མཚོ་རྒྱལ་རྗེ་འབངས་ཐམས་ཅད་ཀྱིས༔ འགྲོ་ལ་ལོག་ལམ་བསྟན་པར་ཟད༔ དེ་ཕྱིར་བདུད་དབང་མ་སོང་བར༔ དགའ་བས་དང་དུ་ལོངས་ཤིག་བུ༔ ཆོས་ལ་དབང་བའི་གང་ཟག་གིས༔ ལོ་སོགས་མཚན་རྟགས་ཡིན་མིན་རྣམས༔ ཕལ་ཆེར་དགོངས་དང་ལྡེམ་དགོངས་དང༔ ཁྱད་པར་གཏེར་གྱི་བདག་པོ་ཉིད༔ མངལ་སྐྱོན་སྒྲིབ་པའི་བག་ཆགས་ལས༔ ལྷ་དང་བླ་མས་འཕྱུག་པ་མེད༔ དེའི་ཕྱིར་བརྟག་ལ་གདེངས་ལྡན་མཛོད༔ ལྷ་དང་བདུད་སྤྲུལ་མིང་རུས་གཅིག༔ ཤིན་ཏུ་མ་བརྟག་འཆོར་མི་རུང༔ གནོད་པའི་བདུད་སོགས་དུ་མ་ནི༔ མ་ངེས་ཕྱོགས་ནས་འབྱུང་བ་ལ༔ རྒྱུན་དུ་དོགས་ཟོན་བྱེད་པ་དང༔ དྲན་པ་མངོན་དུ་བྱེད་པ་དང༔ བསྐྱེད་རྫོགས་གདེངས་དང་ལྡན་པར་མཛོད༔ ཁྱད་པར་རྒྱལ་བསེན་སྤྲུལ་པ་ནི༔ དམ་སྲི་མོ་ཡི་ཚུལ་དུ་རྫུ༔ ལེགས་པའི་དཔལ་ལ་འཇབ་ཀྱང་སྲིད༔ རྗེ་བཙུན་ཏཱ་རེའི་སྐྱབས་འོག་ཏུ༔ མཆི་བའི་ཕྱག་འཚལ་ཉེར་གཅིག་ཟློས༔ ལྟེ་ཕུར་ནག་པོའི་ཆོ་འཕྲུལ་བ༔ བདུད་མོ་སྤྲེ་འུའི་ལོ་པ་ནི༔ སྒྲུབ་པའི་ཆོས་ལ་བར་ཆད་རྩོམ༔ རྡོ་རྗེ་ཕུར་བས་རྡུལ་དུ་རློག༔ ཤན་པ་ཀིས་འདེབས་སྐྱེ་སྲིད་བདག༔ མི་དབང་དཔའ་བོ་འཕྲུལ་གཤོག་ཅན༔ ཁ་འཇམ་བྱམས་པས་བཀུར་ན་ཡང༔ ཉམས་པའི་གྲིབ་ཀྱིས་ཚེ་བསོད་འགྲིབ༔ དོགས་ཟོན་བྱེད་དང་དམ་སྐོང་རེམ༔ གླང་དར་སྤྲུལ་པ་འུག་པའི་མིག༔ མི་སྙན་ཚིག་གིས་སྐུར་བ་འདེབས༔ ནོར་རྫས་དག་ལ་རྐུ་ཤོམ་ལྡང༔ དྲང་སྲོང་ཆེན་པོའི་ཞལ་དུ་སྟོབས༔ ཐང་བོན་སྤྲུལ་པ་བཙུན་པའི་ཚུལ༔ ཆོས་འདི་སྤེལ་བའི་དཔལ་ཁ་འགོག༔ བྱམས་པའི་ཚིག་ཟློས་བཀུར་སྟི་རེམ༔ དེ་རྣམས་བསྟན་གྱི་གཞན་རྣམས་གབ༔ ཟབ་མོའི་གཏེར་འདི་སྤེལ་བའི་སྣོད༔ པདྨའི་ལུང་གིས་བསྔགས་པ་ཡིན༔ སྨོན་ལམ་འཛོམས་དུས་མ་གཏད་ན༔ བཀའ་ཡི་ཆད་པས་གཟིར་བར་འགྱུར༔ ཆོས་འདིར་དབང་བའི་སྐལ་ལྡན་རྣམས༔ རྩེ་གཅིག་སྒྲུབ་དང་འཆད་སྤེལ་སྐྱོངས༔ བཤད་སྒྲུབ་རྒྱལ་མཚན་དེ་ལས་མེད༔ ཡིད་ཆེས་དད་པས་དང་དུ་ལོངས༔ འཕགས་ནོར་བདུན་གྱི་གཙོ་བོ་ཡིན༔ དག་པའི་སྣང་བ་ལམ་དུ་ཁྱེར༔ བྱིན་རླབས་འགུགས་པའི་ལྕགས་ཀྱུ་ཡིན༔ ཕྱོགས་མེད་སྙིང་རྗེས་རང་རྒྱུད་བརླན༔ གཞན་ཕན་སྤྱོད་པ་དོན་ལྡན་ཡིན༔ སྦྱོར་དངོས་རྗེས་གསུམ་ཚང་བ་ཡི༔ དམ་པ་གསུམ་གྱིས་ཉམས་སུ་ལོངས༔ སྒོམ་མེད་ཡེངས་མེད་ལྷུག་པའི་ངང༔ རང་བབ་ཆེན་པོས་སྔགས་རྣམས་བགྲོངས༔ སྡོམ་པ་གསུམ་ལ་གཞི་རྩ་གཏོད༔ ངོ་བོ་གནས་འགྱུར་ཡོན་ཏན་ལྡན༔ བསྡུ་དངོས་བཞི་ཡིས་འགྲོ་བ་སྐྱོངས༔ ཐབས་མཁས་སྤྱོད་པ་རྒྱལ་བའི་སྲས༔ རང་དོན་ཞེན་པའི་འཕྲེང་ཐག་ཆོད༔ གཞན་དོན་སྤྱོད་པ་སེམས་དཔའ་ཡིན༔ མདོར་ན་སྒོ་གསུམ་བྱ་སྤྱོད་ཀུན༔ གཞན་དོན་དང་ནི་བླ་མ་ཡི༔ བཀའ་གསུང་གཙུག་ཏུ་ཁུར་བ་ན༔ འབྲས་བཟང་རྡོར་འཆང་ཚེ་འདིར་མངོན༔ ཁྱད་པར་ཆོས་ལ་དབང་བའི་བདག༔ རྟོག་པས་བསླད་དང་ལེ་ལོ་ཡིས༔ གཡེལ་དང་ཞུད་པས་ལུས་པ་ན༔ མཁའ་འགྲོའི་བཀའ་ཆད་མི་བཟད་པ༔ འབྱུང་བར་ངེས་པས་བག་ཡོད་མཛོད༔ ས་མ་ཡཱ༔ ཟབ་གཏེར་འདི་ལ་དག་སྣང་སྦྱོངས༔ རྒྱལ་བའི་བཀའ་དང་མི་འགལ་ཞིང༔ བརྒྱུད་ལྡན་རིག་འཛིན་བླ་མ་དང༔ རྒྱུད་སྡེའི་ལྷ་ཚོགས་བྱིན་རླབས་རྫོགས༔ དམ་ཅན་སྲུང་མས་བྱ་ར་བྱེད༔ སྐལ་བ་ལྡན་པའི་གང་ཟག་འགས༔ མཐོང་བ་ཙམ་གྱིས་བར་ཆད་སེལ༔ ཐོས་པ་ཙམ་གྱིས་ངེས་ཤེས་འདྲོངས༔ བསྒྲུབ་པས་མཆོག་ཐུན་དངོས་གྲུབ་ཐོབ༔ ཆོས་ཀྱི་བདག་པོ་རང་ཉིད་ཀྱིས༔ དུས་རྒྱུན་པདྨ་ང་ཉིད་དང་༔ མཚོ་རྒྱལ་སྤྲུལ་པའི་བླ་མ་ལ༔ གསོལ་འདེབས་བརྒྱ་ཕྲག་རེ་རེ་ནི༔ མོས་གུས་མཆི་མ་འཁྲིགས་བཞིན་བཟློས༔ ཚེ་རབས་མང་པོའི་ཡོངས་འཛིན་ཡིན༔ དྲིན་དུ་གཟོ་བའི་མོས་འདུན་རེམ༔ ཚེས་བཅུ་ཉེར་ལྔར་ཚོགས་མཆོད་འབུངས༔ བསང་གསུར་གསོལ་མཆོད་རྒྱུན་འདོན་མཛོད༔ མཆོད་སྦྱིན་རིམ་གྲོའི་དཔུང་ཚོགས་བསྐྱེད༔ གཙུག་ལག་གསོ་དང་རྟེན་བཞེངས་སོགས༔ རྣམ་དཀར་དཔུང་ཚོགས་ཤུགས་ཆེ་ན༔ བར་ཆད་བདུད་ཀྱི་འཕྲང་ལས་གྲོལ༔ ཚེ་འདི་ད་ལྟ་ནས་བཟུང་སྟེ༔ བཅུ་ཕྲག་གཉིས་དང་ཕྱེད་དུ་འཁྱོལ༔ དེ་ནས་པདྨ་བཀོད་ཞིང་དུ༔ བདག་དང་སྐལ་ལྡན་བུ་སློབ་སོགས༔ ཚོམ་བུ་གཅིག་ཏུ་སྨིན་པར་འགྱུར༔ སླར་ཡང་འགྲོ་བའི་ཁམས་བཞིན་དུ༔ སྤྲུལ་པས་འགྲོ་ལ་རྗེས་སུ་ཆགས༔ ཕན་བདེའི་རྩ་ལག་དམ་པར་འགྱུར༔ ཁ་བྱང་གནད་ཀྱི་ལྡེ་མིག་འདི༔ ཡེ་ཤེས་དབྱིངས་ཀྱི་མཁའ་འགྲོ་དང༔ དྲང་སྲོང་ཁྱབ་འཇུག་ཆེན་པོས་འཚོས༔ དམ་ཉམས་ལོག་པའི་སྙིང་ཁྲག་གམ༔ བཀའ་ལས་འདའ་བའི་དབང་པོ་སྣུབས༔ མོས་པའི་བུ་ལ་འགོ་བར་མཛོད༔ ཨི་ཏནྟེ་ནི་ན་ར་ཀན༔ ཞེས་པ་འདི་ཡང་སྔོན་སྦྱངས་ལས་ཀྱི་འཕྲོ་ལྡན་རྒྱལ་དབང་པདྨའི་ལུང་གིས་བསྔགས་པའི་ཆོས་ལ་དབང་བའི་སྐྱེ་ཐོབ་ངེས་ལེགས་སྤྲུལ་སྐུ་དང་༔ ལུང་རྟོགས་འོད་ཟེར༔ རིག་གྲོལ་སོགས་ཆོས་འདིར་དབང་བ་བཅུ་ལྡན་ཞིག་གིས་བསྐུལ་ངོར་དུས་བབ་ལས་འཕྲོ་སད་པའི་སྤྲུལ་སྐུ་ཐུབ་བསྟན་གཞན་ཕན་ཉི་མ་དཔལ་བཟང་པོར་འབོད་པས་སྦས་གནས་བཀྲ་ཤིས་ལྷ་རྩེའི་ཞོལ་དུ་ཡེ་ཤེས་མཁའ་འགྲོའི་གཏད་རྒྱ་མི་ཤིགས་སྙིང་མཛོད་སྨུག་པོའི་སྒྲོམ་ནས་བཏོན་ཏེ་བརྡ་ཐོགས་མེད་དུ་ཕབ་པས་བསྟན་དང་འགྲོ་ལ་དགེ་ཞིང་ཁྱད་པར་ཆོས་འདིར་མོས་པའི་རྒྱུད་འཛིན་ཡོངས་ལ་བཀྲ་ཤིས་པར་གྱུར་ཅིག༔ སྭ་སྟི་བི་ཛ་ཡནྟུ༔