གཏེར་གྱི་ཁ་བྱང་གསལ་བའི་ལྡེ་མིག
ཡང་གསང་མཁའ་འགྲོའི་ཞལ་ལུང་ལས༔ གཏེར་གྱི་ཁ་བྱང་གསལ་བའི་ལྡེ་མིག་ནི༔ བཛྲ་པདྨ་ཀཱ་ར་ཡ༔ འདི་ནི་མ་འོངས་སྙིགས་དུས་ཀྱི༔ འགྲོ་བ་སྐྱོབ་པའི་དོན་གྱི་ཕྱིར༔ ཟབ་མོའི་གཏེར་གྱི་ཁ་བྱང་ནི༔ ཨ་ཙར་ས་ལེ་ཁྱོད་ལ་གདམས༔ མ་བརྗེད་སྙིང་གི་སྒྲོམ་དུ་སྦོས༔ བསྐལ་པ་སུམ་ཅུ་ཁ་རལ་དུས༔ མི་རྣམས་ཆས་བསྒྱུར་ཡ་མ་ཟུང༔ དབྱིངས་ལ་ཁྲག་གི་ཁ་དོག་སྟོན༔ ས་ཁམས་གཡོ་བའི་འཇིགས་པ་འབྱུང༔ མི་མིན་བགེགས་ཀྱིས་ཚ་རེག་གཏོང༔ གཏེར་སྟོན་འདྲ་མིན་མང་ཞིག་གིས༔ བཟང་ངན་བསྟན་པ་ཁྲ་བོར་འགྱུར༔ བསེ་རག་འགོང་པོས་ལུང་པ་འགེང༔ སེམས་ཅན་ལོག་ལྟས་བསླད་ནས་ནི༔ ངན་སོང་འགྲོ་བ་དུ་མ་འབྱུང༔ དེ་སོགས་སྐྱོབ་པའི་ཟབ་གཏེར་གྱི༔ གནས་དང་གཏེར་སྟོན་དུས་བབ་གྲངས༔ རྗེ་འབངས་ཡོངས་ལ་པད་འབྱུང་གིས༔ གདམས་པའི་རིམ་པ་འདི་ལྟར་རོ༔ ཏཱ་རེ་ལྷ་མོའི་གནས་མཆོག་གི༔ ལོགས་ལ་ཆོས་འབྱུང་བཀྲ་བའི་ནང༔ སྒྲོལ་མའི་སྐུ་དང་རྡོ་སྒྲོམ་ལས༔ བརྡ་ཡིག་ཤོག་སེར་སོར་བཞིའི་ངོས༔ སྒྲོལ་མའི་སྒྲུབས་ཐབས་འཇིགས་བརྒྱད་ལས༔ སྐྱོབ་མཛད་འཁོར་བ་ལས་སྒྲོལ་བཞུགས༔ དཔལ་རིའི་རི་ལ་ཤེལ་དཀར་གྱི༔ ཀ་བའི་ཁོང་དུ་སྤྱན་གཟིགས་ཀྱི༔ སྒྲུབ་སྐོར་ཐུགས་ཀྱི་ཏི་ཀ་ཡོད༔ ཡང་དག་ཐུགས་ཀྱི་རི་བོ་ན༔ བདུད་རྩི་སྨན་གྱི་བུམ་པ་ཡོད༔ བདུད་རྒྱལ་ཐོད་པའི་ཕུག་པ་ན༔ ཟུར་གསུམ་མཚོན་ཆ་བཀྲ་བའི་ནང༔ དྲག་སྔགས་ལས་ཚོགས་ལ་སྒྲོམ་གསུམ༔ བདུད་ཀྱི་རྒྱལ་པོས་གཉེར་ཁ་བླངས༔ དྲག་པོའི་རི་ཡི་གཡོན་ལོགས་ན༔ དྲག་སྒྲུབ་སྨན་གྱི་རིལ་བུ་ནི༔ བུདྡྷ་ཛྙཱ་ནའི་ཞབས་རྗེས་ཀྱི༔ རྟགས་མཚན་བཟང་པོས་སྤྲས་པ་བཞུགས༔ ཉེ་སྲས་རི་ཡི་ཕུ་མདའ་ནས༔ བྲག་དམར་རྫོངས་ལ་ཙནྡྷས་སྤྲས༔ ཤར་ལྷོར་བལྟ་བའི་ལོགས་ལ་ནི༔ གཡུང་དྲུང་བཀྲ་བའི་གཏེར་སྒོའི་ནང༔ ངན་སྔགས་དུག་མཚོ་ཁོལ་མ་ཡི༔ བསྙེན་སྒྲུབ་ལས་སྦྱོར་སྒྲོམ་བུ་བདུན༔ གསེར་ཕྱེ་ལ་ཅ་རྡོ་དང་ནི༔ ཨ་གྲོང་ཕྱེ་མ་སོགས་ཀྱི་སྒྲོམ༔ བདུད་བཙན་ཀླུ་ཡིས་བྱ་ར་བྱེད༔ དེ་སོགས་ཟབ་གཏེར་འདོན་པ་པོ༔ གཏེར་སྟོན་རྗེ་འབངས་གྲོགས་གསུམ་གྱིས༔ བྱིན་རླབས་སྐྱེས་བུ་གསང་སྨེ་ཅན༔ རྟེན་འབྲེལ་བཟང་པོས་མཚམས་སྦྱར་ནས༔ བཏོན་པའི་སྐལ་བ་མ་འཕྱུགས་ན༔ བསྟན་འགྲོའི་རྒུད་པ་རེ་ཞིག་སེལ༔ དམ་ཉམས་ལག་ཏུ་མ་ཤོར་བར༔ དམ་ལྡན་ཙིཏྟའི་སྦུབས་སུ་བསྟིམ༔ ས་མ་ཡཱ༔ རྒྱ་རྒྱ་རྒྱ༔