སྔོན་འགྲོ་བསྡུས་པ་ཐར་ལམ་སྣང་བྱེད།
སྔོན་འགྲོ་བསྡུས་པ་ཐར་ལམ་སྣང་བྱེད་ནི༔ བླ་མ་མཁྱེན་ནོ༔ བླ་མ་མཁྱེན་ནོ༔ བླ་མ་མཁྱེན་ནོ༔ སྐྱབས་གནས་ཀུན་འདུས་རྩ་བའི་བླ་མ་ལ༔ བྱང་ཆུབ་སྙིང་པོའི་བར་དུ་སྐྱབས་སུ་མཆི༔ འགྲོ་ཀུན་ཡང་དག་ས་ལ་འགོད་པའི་ཕྱིར༔ སྨོན་འཇུག་སེམས་མཆོག་བསྐྱེད་དོ་བླ་མ་མཁྱེན༔ མི་རྟག་འཆི་བ་ནམ་འོང་ཆ་མ་མཆིས༔ འཇིགས་ཆེན་གཤིན་རྗེའི་ཡུལ་དུ་དབང་མེད་པར༔ ལས་དབང་ཆུ་ཀླུང་འཕྲད་པའི་ཤུགས་ཀྱིས་བསྐྱོད༔ བླ་མ་མཁྱེན་ནོ་བདག་རྒྱུད་བྱིན་གྱིས་རློབས༔ འཇིགས་རུང་བར་དོའི་སྣང་བ་ཤར་བའི་ཚེ༔ སྔངས་སྐྲག་འཇིགས་སྣང་སྡུག་བསྔལ་གྱིས་གདུང་བས༔ སྒྱུ་ལུས་གྲོང་ཁྱེར་མི་རྟག་འཇིག་པའི་དུས༔ རྣམ་ཤེས་བར་དོར་མི་འཁྲུལ་བླ་མ་མཁྱེན༔ མ་རིག་གཏི་མུག་གཉིད་ཀྱིས་ནོན་པའི་ཚེ༔ འོད་གསལ་མ་པང་བུ་འཇུག་མྱུར་དུ་གྲོལ༔ དལ་འབྱོར་རྙེད་དཀའ་འཆི་བ་མི་རྟག་པ༔ རྒྱུ་འབྲས་ཉེས་དམིགས་ཤེས་པ་བླ་མ་མཁྱེན༔ སངས་རྒྱས་ཀུན་དངོས་དཔལ་ལྡན་བླ་མ་ཡིས༔ ཚེ་རབས་ཀུན་ཏུ་རྗེས་སུ་འཛིན་པར་ཤོག༔ སྡུག་བསྔལ་འཁོར་བའི་འདམ་དུ་བྱིང་གྱུར་ན༔ དུག་ལྔ་རང་རྒྱུད་སྤྱོད་ཚེ་ལས་ངན་གྱི༔ དབང་དུ་མ་གཏོང་རྩ་བའི་བླ་མ་མཁྱེན༔ རྣམ་སྨིན་ལས་ཀྱིས་སྐྱེ་བོ་མནར་བའི་ཚེ༔ སྡིག་སྒྲིབ་ཀུན་འཇོམས་རྡོར་སེམས་བླ་མ་མཁྱེན༔ ལུས་དང་ལོངས་སྤྱོད་དགེ་བའི་རྩ་བ་བཅས༔ འབུལ་ལོ་བཞེས་པར་མཛོད་ཅིག་བླ་མ་མཁྱེན༔ སྒོ་གསུམ་གུས་པས་བླ་མ་ཁྱེད་བསྟེན་ན༔ དབང་བཞིས་བདག་རྒྱུད་སྨིན་མཛོད་བླ་མ་མཁྱེན༔ འཆི་ཚེ་རྣམ་ཤེས་འོད་ཀྱི་ཐིག་ལེ་དེ༔ དབྱིངས་རིག་དབྱེར་མེད་འགྱུར་བར་བླ་མ་མཁྱེན༔ སྐྱེ་བ་ཀུན་ཏུ་ཡང་དག་བླ་མ་དང༔ འབྲལ་མེད་ཆོས་ཀྱི་དཔལ་ལ་ལོངས་སྤྱོད་ནས༔ ས་དང་ལམ་གྱི་ཡོན་ཏན་རབ་རྫོགས་ནས༔ རྡོ་རྗེ་འཆང་གི་གོ་འཕང་མྱུར་ཐོབ་ཤོག༔ བླ་མའི་རྣལ་འབྱོར་བསྡུས་པ་འདི༔ རང་བྱུང་ཀློང་གི་བརྡ་ལས་མངོན༔ རིག་འཛིན་བླ་མས་བྱིན་གྱིས་རླབས༔ རང་གྲོལ་ཡེ་ཤེས་དོན་རྟོགས་ཤོག༔ ས་མ་ཡཱ༔ བརྡ་ཐིམ༔ ཞེས་སྔོན་འགྲོ་བསྡུས་པ་ཐར་ལམ་སྣང་བྱེད་འདི་ནི༔ ཆོས་ལ་དབང་བའི་སྐྱེས་མཆོག་ངེས་ལེགས་སྤྲུལ་པའི་སྐུ་རིན་པོ་ཆེ་དང་༔ པདྨ་བློ་གྲོས་སོགས་ཆོས་ལ་དབང་བ་འགའི་བཞེད་སྐོང་དུ་རྣལ་འབྱོར་པ་ས་ར་ཧི་ཏས་ཐོལ་བྱུང་ཐོགས་མེད་དུ་བྲིས་པ་དགེ་ལེགས་འཕེལ༔