བླ་མ་རྒྱང་འབོད་བྱིན་རླབས་བདུད་རྩིའི་ཟེགས་མ།
བླ་མ་རྒྱང་འབོད་བྱིན་རླབས་བདུད་རྩིའི་ཟེགས་མ་བཞུགས༔ ཨ་ཧོ༔ ཡེ་གཞི་བདེ་གཤེགས་སྙིང་པོ་རང་བྱུང་གི་ཡེ་ཤེས༔ སྐུ་བཞི་ཡེ་ཤེས་ལྔ་ལྡན་ཆོས་སྐུ་ཡི་སངས་རྒྱས༔ རང་རིག་ངོ་བོ་ཁྱབ་བདག་བླ་མ་དེ་མཁྱེན་ནོ༔ ལོངས་སྤྱོད་རྫོགས་སྐུ་ངེས་པ་ལྔ་ལྡན་གྱི་ཞིང་ནས༔ ཟུང་འཇུག་སྐུ་བཞིའི་བདག་ཉིད་ལོངས་སྐུ་ཡི་སངས་རྒྱས༔ གསལ་སྟོང་འདུ་འབྲལ་མེད་པའི་བླ་མ་དེ་མཁྱེན་ནོ༔ སྟོང་གསུམ་མི་མཇེད་སྤྲུལ་པའི་འཛམ་གླིང་གི་ཐ་གྲུར༔ འགགས་མེད་སྒྱུ་འཕྲུལ་རོལ་པའི་སྤྲུལ་སྐུ་ཡི་སངས་རྒྱས༔ ཕྱོགས་མེད་འགྲོ་བའི་མགོན་པོ་བླ་མ་དེ་མཁྱེན་ནོ༔ མ་ངེས་གདུལ་བྱའི་ཤེས་རྒྱུད་རྣམ་དཀར་ལ་འགོད་པའི༔ ངེས་མེད་སྣ་ཚོགས་སྟོན་པའི་ཐབས་མཁས་ཀྱི་མཛད་བཟང༔ སྟོང་ཉིད་སྙིང་རྗེའི་བྱེད་པོ་བླ་མ་རང་མཁྱེན་ནོ༔ སྤྱི་གཙུག་བདེ་ཆེན་འཁོར་ལོའི་རྩ་འདབ་ཀྱི་དབུས་ན༔ ཡོངས་འཛིན་མཚུངས་མེད་རྡོ་རྗེ་འཆང་དབང་གི་སངས་རྒྱས༔ དྲིན་ཆེན་བསམ་གཏན་ཡེ་ཤེས་གླིང་པ་དེ་མཁྱེན་ནོ༔ ཕྱོགས་མེད་འགྲོ་དོན་ནུས་པར་བླ་མ་རང་མཁྱེན་ནོ༔ བར་ཆད་གཡུལ་ལས་རྒྱལ་བར་བླ་མ་རང་མཁྱེན་ནོ༔ འཁོར་བར་ཞེན་པ་ལྡོག་པར་བླ་མ་རང་མཁྱེན་ནོ༔ ངེས་མེད་གཉན་ཁྲོད་ཐུབ་པར་བླ་མ་རང་མཁྱེན་ནོ༔ སྐྱེ་མེད་ཡེ་ཤེས་རྟོགས་པར་བླ་མ་རང་མཁྱེན་ནོ༔ གདོད་མའི་བཙན་ས་ཟིན་པར་བླ་མ་རང་མཁྱེན་ནོ༔ འཇའ་ལུས་འོད་སྐུར་གཞིག་པར་བླ་མ་རང་མཁྱེན་ནོ༔ སྐུ་བཞིའི་རྒྱལ་སྲིད་འཐོབ་པར་བླ་མ་རང་མཁྱེན་ནོ༔ ཅེས་བླ་མ་རྒྱང་འབོད་བྱིན་རླབས་བདུད་རྩིའི་ཟེགས་མ་འདི༔ རང་སློབ་ཆུ་མར་ཕྱོགས་ཀྱི་དབོན་སངས་རྒྱས་ཆོས་འཕེལ་གྱིས་བསྐུལ་ངོར༔ ཟོག་པོ་ས་ར་ཧི་ཏས་སོ༔