རིག་པ་རྩལ་གྱི་དབང་མཆོག
རིག་པ་རྩལ་གྱི་དབང་མཆོག་ནི༔ རིགས་ཀུན་ཁྱབ་བདག་བླ་མ་ཡིས༔ སྣོད་ལྡན་གང་ཟག་མདུན་དུ་ནི༔ ཆོས་བདུན་ལྡན་ལ་གཡོ་མེད་གནས༔ བླ་སྒྲུབ་ཚིག་བདུན་སྤྱན་འདྲེན་གསུམ༔ དབྱངས་སྙན་དལ་བུས་བརྗོད་པའི་མཐར༔ དབུ་མ་སེང་གེའི་ང་རོའི་སྒྲས༔ ལོག་རྟོག་ཟིལ་གྱིས་གནོན་པའི་བརྡས༔ ཕྱག་གཡས་སེང་ལྡིང་ཌཱ་རུ་འཁྲོལ༔ རིག་རྟོག་དངུལ་ཆུ་ཉོན་རྡུལ་གྱི༔ དྲི་མས་མ་གོས་བརྡ་མཚོན་ཕྱིར༔ ཕྱག་གཡོན་དངུལ་དཀར་དྲིལ་བུ་འཁྲོལ༔ རིག་སྟོང་དབུ་མར་ཚུད་པའི་བརྡ༔ བླ་མའི་ཞལ་ནས་འདི་བཞིན་བརྗོད༔ ན་མོ༔ བདེ་གཤེགས་སྙིང་པོས་འགྲོ་བ་ཡོངས་ལ་ཁྱབ༔ སེམས་ནི་སོགས་ནས། རྒྱལ་བ་འཁོར་བཅས་མ་ལུས་གཤེགས་སུ་གསོལ༔ ཨ་ཨ་ཕཻཾ་ཕཻཾ་ཨ་ཧོ་སུ་ཁ་ཨ་ལ་ལ་ཧོ༔ དེ་ནས་ཕྱག་གཉིས་མཉམ་བཞག་མཛད༔ སྤྱན་ནི་སློབ་བུའི་གདོང་ལ་གཏད༔ ཧྲཱིཿ ངོ་བོ་རིག་སྟོང་ཀ་ནས་དག༔ རང་བཞིན་ལྷུན་གྱིས་གྲུབ་པའི་གཤིས༔ སྟོང་པ་ཆེན་པོ་བབས་ཀྱིས་གྲུབ༔ རིག་པ་རྩལ་གྱི་དབང་ཐོབ་ཤོག༔ ཨ་ཨ་ཨ་བྷི་ཥིཉྩ་ཧོ༔ ཨ་ཧོ༔ ཤར་དང་གྲོལ་ལ་སྔ་ཕྱི་མེད༔ གཉེན་པོས་བཟང་པོར་བཅོས་མ་གྲུབ༔ རྟོག་པས་ངན་པར་བསྒྱུར་མི་བཏུབ༔ གང་ཤར་རང་སར་ཞོག་ཅིག་བུ༔ ཕཊཿ ཕཊཿ ཕཊཿ རྗེས་ལ་བསྔོ་སྨོན་ཤིས་པ་བརྗོད༔ རིག་སྟོང་གཉུག་མའི་རང་ཞལ་བལྟ༔ མ་ཡེངས་དྲན་པས་སྐྱོངས་ཁས་བླངས༔ ས་མ་ཡཱ༔ དེ་ནས་བཀའ་རྫོགས་ལུང་རྫོགས་ཕྱིར༔ གླེགས་བམ་སྤྱི་བོར་བཞག་བྱས་ལ༔ ཧོཿ ཆོས་སྐུ་སྣང་བ་མཐའ་ཡས༔ ལོངས་སྐུ་ཕྱག་ན་པདྨོ༔ སྤྲུལ་སྐུ་མཚོ་སྐྱེས་རྡོ་རྗེ༔ མཁའ་འགྲོ་ཡེ་ཤེས་མཚོ་རྒྱལ༔ ཚངས་པ་ལྷ་ཡི་མེ་ཏོག༔ མཁར་ཆེན་དཔལ་གྱི་དབང་ཕྱུག༔ འཁོན་ཆེན་ཀླུ་ཡི་དབང་པོ༔ ལྷ་སྲས་མུ་རུབ་བཙད་པོ༔ ཀློང་ཆེན་རྡོ་རྗེ་གཟི་བརྗིད༔ ཀུན་མཁྱེན་འཇིགས་མེད་གླིང་པ༔ གྲུབ་ཆེན་ལག་ན་རྡོ་རྗེ༔ རིག་འཛིན་ལུང་རིག་གླིང་པ༔ ལུང་ཟིན་ཆོས་ཀྱི་བདག་པོ་སོགས་རང་བཞིན་རྫོགས་པ་ཆེན་པོའི་རྩ་བ་དང་བརྒྱུད་པར་བཅས་པའི་དཔལ་མགོན་རིག་འཛིན་བླ་མ༔ ཡི་དམ་མཁའ་འགྲོ་རྒྱ་མཚོ༔ ཆོས་སྲུང་དམ་ཅན་རྒྱ་མཚོའི་ཚོགས་དང་བཅས་པ་རྣམས་ཀྱིས་དེང་འདིར་རྡོ་རྗེའི་སློབ་མ་རྣམས་ལ་དབང་བསྐུར་དུ་གསོལ༔ བྱིན་གྱིས་བརླབ་ཏུ་གསོལ༔ རྟོགས་པ་སྤར་དུ་གསོལ༔ བརྟུལ་ཞུགས་བསྐྱེད་དུ་གསོལ༔ དགོངས་གཏེར་ནམ་མཁའ་མཛོད་ཀྱི་ཆོས་སྡེ་འདིར་བཞུགས་ཀྱི་བཀའ་དམ་པ་སྤྱི་བོ་ནས་ཐོབ༔ ལུང་དམ་པ་མགྲིན་པ་ནས་ཐོབ༔ དབང་དམ་པ་སྙིང་ག་ནས་ཐོབ༔ ལུས་ངག་ཡིད་གསུམ་སྨིན་ཅིང་གྲོལ་ནས་བྱ་རྩོལ་བློ་འདས་རྫོགས་པ་ཆེན་པོའི་ཀློང་དུ་དགོངས་པའི་བཙན་ས་ཟིན་ཏེ༔ ཚེ་གཅིག་ལུས་གཅིག་ལ་འཇའ་ལུས་འཕོ་བ་ཆེན་པོའི་སྐུ་མཆོག་བརྙེས་ནས་དཔལ་ཀུན་ཏུ་བཟང་པོའི་གོ་འཕང་ལ་འགོད་པར་མཛད་དུ་གསོལ༔ ཞེས་ལན་གསུམ༔