ཕྱག་རྫོགས་དབུ་གསུམ་གྱི་དོན་བསྡུས་ཟིན་ཐོ།
ཕྱག་རྫོགས་དབུ་གསུམ་གྱི་དོན་བསྡུས་ཟིན་ཐོ་བཞུགས༔ རིགས་གསུམ་མགོན་པོའི་དངོས་སྤྲུལ་པ༔ རྩ་བའི་བླ་མའི་ཞབས་ལ་འདུད༔ ཕྱག་རྫོགས་དབུ་མ་གསུམ་གྱི་དོན༔ དང་པོ་ཕྱག་རྒྱ་ཆེན་པོ་ལ༔ བྱུང་གནས་འགྲོ་གསུམ་རྩད་གདར་བཅད༔ མེད་ལ་ཡོད་སྣང་མི་འཛིན་ཅིང༔ མི་བདེན་བདེན་པར་མི་འཛིན་ཅིང༔ མི་གཙང་གཙང་བར་མི་འཛིན་ཅིང༔ ཐམས་ཅད་བདེན་མེད་སྟོང་པ་ཉིད༔ མེད་སྣང་ཕྱ་ལེ་མི་འཛིན་ཅིང༔ ཡོད་པ་མ་ཡིན་རྒྱལ་བས་ཀྱང་མི་གཟིགས༔ མེད་པ་མ་ཡིན་འཁོར་འདས་གྲུབ་གཞི་ལགས༔ འགལ་འདུ་མ་ཡིན་བརྗོད་བྱའི་ཡུལ་ལས་འདས༔ དེ་དོན་རྟོགས་པ་དོན་གྱི་སྤྱི་གཞི་ཡིན༔ དེ་དོན་ཉམས་སུ་ལེན་པའི་གནད་དོན་པོ༔ སྔོན་བསུ་རྗེས་དཔྱོད་བློ་ཡིས་བཅོས་མི་གཞུག༔ འགྱུ་བ་རང་སར་བཞག་ན་ཆོས་སྐུར་གྲོལ༔ རྣམ་རྟོག་དང་པོའི་སྐབས་སུ་གྲོལ་བ་དཀོན༔ བར་མའི་སྟེང་དུ་གྲོལ་བ་ཤིན་ཏུ་ལེགས༔ ཐ་མའི་རྗེས་སླེབ་རྐུན་ནོར་ར་མདའ་ཙམ༔ དྲན་པ་ཙམ་གྱིས་ཟིན་པ་གསར་བུ་པ༔ དམིགས་མེད་མཐའ་བྲལ་ལྟ་བའི་ཚད་ཡིན་ཏེ༔ ཡེངས་མེད་རྐྱེན་ཐུབ་བསྒོམ་པའི་ཉམས་འོག་ཚུད༔ སྐུ་གསུམ་ལྷུན་གྲུབ་འབྲས་བུ་མཐར་ཐུག་ཡིན༔ ལྟ་བའི་ཕྱོགས་སུ་སྤྱོད་པ་མི་ཤོར་ཞིང༔ ཁྲིམས་བདག་མཐུན་པར་འཁོར་གཡོག་སླེབ་པ་བཞིན༔ སྤྱོད་པའི་རྗེས་སུ་ལྟ་བ་མི་འཆོར་གནད༔ སེང་ལྕམ་དཀར་མོས་གངས་རྩེ་ཟིན་འདྲ་དགོས༔ ལྟ་བ་མཐོ་ཡང་སྤྱོད་པ་ཞིབ་མོ་གནད༔ ཁྲེགས་ཆོད་ལྟ་བ་ཕྱག་རྒྱ་བཞི་ཡི་དོན༔ ལམ་གྱི་གྲོགས་ནི་རྩ་རླུང་ཡིན་པར་བཤད༔ ཐོ་རངས་སྔོན་འགྲོ་དབང་བཞི་ལེན་པ་གནད༔ རླུང་རོ་དགུ་ཕྲུགས་དུས་གསུམ་འབུད་པ་གཅེས༔ བར་རླུང་བུམ་ཅན་རྒྱུན་འཛིན་དྲན་པའི་རྟེན༔ བསྐྱེད་རྫོགས་བསྒོམ་བཟླས་སྤྱོད་ལམ་རྣམ་བཞིའི་དུས༔ བུམ་ཅན་བར་རླུང་ལྟེ་བའི་འོག་ཏུ་ནོན༔ ལྟེ་འོག་རླུང་གཉིས་ཙིར་གྱིས་ཁ་སྦྱར་ན༔ སྣང་སྟོང་ཟུང་འཇུག་དགོངས་པ་མངོན་དུ་འཆར༔ ཞུགས་གནས་ཐིམ་གསུམ་ལས་རླུང་དབུ་མར་ཚུད༔ རྣམ་གྲོལ་ཞི་བ་ཡེ་ཤེས་རླུང་དུ་དག༔ ཐུན་མཚམས་དག་ལ་གེགས་སེལ་ཧ་སྤྲུག་རེ༔ གཏད་མེད་ཧ་དེ་བ་རེར་གནས་པ་དེ༔ ཆོས་སྐུ་གཞིར་གནས་རིག་པ་དེ་ཀ་རང༔ དེ་ལས་གུད་ན་སངས་རྒྱས་གཞན་མེད་དོ༔ དག་པའི་རླུང་སྦྱོར་མདོར་བསྡུས་ཨ་ལ་ལ༔ རྫོགས་ཆེན་ལྟ་བ་ཨ་ཏི་ཡང་ཏི་དང༔ སྤྱི་ཏིའི་མན་ངག་ཨ་ཏིའི་རྣམ་གྲངས་ལས༔ མན་ངག་ཁྱད་འཕགས་ཨ་ཏི་སྣང་བ་བཞི༔ འདུག་སྟངས་གསུམ་དང་གཟིགས་སྟངས་རྣམ་གསུམ་གྱིས༔ གཅུན་ཏེ་སྣང་བཞི་མཐར་ཕྱིན་ཨ་ལ་ལ༔ ཞེས་གསུངས་སྐུ་གསུམ་འདུག་སྟངས་གཟིགས་སྟངས་ནི༔ གྱེན་འགྲེང་རྩིབ་ཤར་ཐུར་ལྟ་སྒྲོན་དྲུག་གནད༔ ཆོས་ཉིད་མངོན་སུམ་རིག་པ་ཚད་ལ་ཕེབས༔ ཉམས་སྣང་གོང་འཕེལ་ཆོས་ཉིད་ཟད་པའི་ས༔ འོད་ཟེར་ཆེན་པོའི་དབང་བསྐུར་མཆོག་ཆེན་ཐོབ༔ འཇའ་ལུས་འཕོ་ཆེན་བི་མ་མི་ཏྲ་ལྟར༔ འཁོར་འདས་དག་ཆེན་གཞོན་ནུ་བུམ་སྐུར་གྲོལ༔ གྲོལ་དང་མི་གྲོལ་བཏགས་པ་ཙམ༔ བཏགས་པ་ཙམ་གྱིས་གྲུབ་པ་ཡིན༔ ཞེས་ཕྱག་རྫོགས་དབུ་གསུམ་གྱི་དོན་བསྡུས་ཟིན་ཐོ་འདི་ཉིད་སློབ་དཔོན་སྡོམ་བརྩོན་དམ་པ་ཀྱག་དོ་པདྨ་མ་ཏིའི་བཞེད་སྐོང་དུ༔ རྣལ་འབྱོར་རློམ་སེམས་མཁན་ས་ར་ཧི་ཏས་གང་ཤར་སུག་བྲིས་བགྱིས་པ་དགེ་ལེགས་འཕེལ༔