དམ་པ་གསུམ་གྱི་ཟིན་བྲིས།
དམ་པ་གསུམ་གྱི་ཟིན་བྲིས་ནི། སྐུ་གསུམ་བླ་མ་རྣམས་ལ་གསོལ་བ་འདེབས། བླ་མ་རྣམས་ཀྱིས་བྱིན་གྱིས་རློབས། རིགས་ལྡན་དམ་པའི་སྐྱེས་བུ་ཆེན་པོ་ལགས། ཆོས་གང་ཞིག་འཆད་ཉན་སྒོམ་སྒྲུབ་གང་གི་སྐབས་སུ་ཡང་དམ་པ་གསུམ་གྱིས་ཟིན་པ་ཤིན་ཏུ་ལེགས་པས། སྦྱོར་བ་སེམས་བསྐྱེད་དམ་པ་ཟེར་བ་ནི། སྨོན་འཇུག་གཉིས་པོ་དེ་ལ་ཟེར། ཇི་སྐད་དུ། འགྲོ་བར་འདོད་དང་འགྲོ་བ་ཡི། །བྱེ་བྲག་རིམ་བཞིན་ཤེས་པར་བྱ། །བྱང་ཆུབ་སྨོན་པའི་སེམས་དང་ནི། །བྱང་ཆུབ་འཇུག་པ་ཉིད་ཡིན་ནོ། །ཞེས་གསུངས་པ་བཞིན། ཐོག་མར་རང་འདི་ལྟར་ནམ་མཁའ་སྟོང་པ་འདིས་ཁྱབ་པའི་སེམས་ཅན་ཐམས་ཅད་གཅིག་ཀྱང་མ་ལུས་པ་རྫོགས་པའི་སངས་རྒྱས་དག་པ་གཉིས་ལྡན་གྱི་གོ་འཕང་ལ་བདག་གཅིག་པུས་དགོད་པར་བྱ། དེའི་ཆེད་དུ་དགེ་བའི་དངོས་པོ་གང་དང་གང་ཡིན་ཡང་བསྒྲུབ་པར་བྱ་བསམ་པ་སྦྱོར་བ་སེམས་བསྐྱེད་དམ་པ། དགེ་བའི་དངོས་པོ་གང་དང་གང་སྒྲུབ་ཀྱང་དེ་ལས་སེམས་གཞན་དུ་མི་གཡེང་བར་སེམས་རྩེ་གཅིག་པའི་ཏིང་ངེ་འཛིན་དེའི་ངང་ནས་བཟླ་བ་དངོས་གཞི་དམིགས་མེད་དམ་པ། དུས་རྒྱུན་དུ་སྔོན་འགྲོ་བླ་མའི་རྣལ་འབྱོར་གྱི་རྗེས་དབང་བཞི་ཐོད་རྒལ་དུ་བླང་བ་གནད་སྨིན་གྱི་རྗེས་སུ། ལུས་རྣམ་སྣང་ཆོས་བདུན་གྱི་ངང་ནས་གཡས་རོ་མ་ནས་ཉོན་མོངས་པ་ཞེ་སྡང་ལས་བསྐྱེད་པའི་ལས་དང་བག་ཆགས་ཐམས་ཅད་རླུང་དཀར་ལ་མོག་པའི་རྣམ་པ་ཅན་དུ་ལྷག་མ་མེད་པར་ཕྱིར་བུད་པར་བསམ། གཡོན་རྐྱང་མ་ནས་ཉོན་མོངས་པ་འདོད་ཆགས་ལས་བྱུང་བའི་དམ་ཚིག་ཉམས་ཆག་ཉེས་ལྟུང་ཐམས་ཅད་རླུང་དམར་ལ་མོག་པའི་རྣམ་པ་ཅན་དུ་ཕྱིར་བུད་པར་བསམ། དབུས་ནས་གཉིས་མཉམ་དུ་ཉོན་མོངས་པ་གཏི་མུག་གི་སྒོ་ནས་བསགས་པའི་དམ་ཚིག་ཉམས་ཆག་ཉེས་ལྟུང་ཐམས་ཅད་རླུང་ཁ་དོག་དུད་ཁའམ་མོག་པའི་རྣམ་པ་ཅན་དུ་ཕྱིར་བུད་པ་དང་མཉམ་དུ་ནད་ཐམས་ཅད་རྣག་དང་ཁྲག གདོན་ཐམས་ཅད་སྦལ་སྦྲུལ་སྡོམ་སྡིག་ཉ་ལྕོང་གྲོག་སྦུར་གྱི་རྣམ་པ། སྡིག་སྒྲིབ་ཐམས་ཅད་དུད་ཁུ་སོལ་ཁུའི་རྣམ་པར་ཕྱིར་བུད་ནས་དབང་ཆེན་ས་གཞི་ལ་ཐིམ་སོང་བས་ལས་ཀྱི་གཤིན་རྗེ་གླང་དམར་པོའི་རྣམ་པར་ཡོད་པ་དེ་དང་། ལན་ཆགས་ཀྱི་བདག་པོ་བདག་མོ་རྣམས་ཀྱི་ཁར་སོང་བར་བསམ་ཞིང་། ཤ་འཁོན་བུ་ལོན་དག་པར་བསམ། ཧ་སྤྲུག་གི་དུས་ཉོན་མོངས་པ་ལྔ་དང་འབྱུང་བ་ལྔའི་རླུང་དུག་ཐམས་ཅད་སང་སང་དག་པར་བསམ། དེ་ནས་རླུང་བུམ་པ་ཅན་ནམ། རིལ་བ་ཞབས་ཚགས་ཅན་ནམ། བར་རླུང་ངམ་གསང་རླུང་གི་དོད་པོ་ལ། དང་པོ་སྙིང་གུར་སྨུག་པོ་སོགས་དུས་དམིགས་པ་ནི། ཕྱི་སྣོད་འབྱུང་ལྔའི་དྭངས་མ། ནང་བཅུད་སེམས་ཅན་གྱི་ཚེ་བསོད་སྟོབས་འབྱོར། ཕྱོགས་བཅུའི་རྒྱལ་བའི་མཁྱེན་བརྩེ་ནུས་པའི་ཡོན་ཏན་ཐམས་ཅད་རླུང་སྔོན་པོའི་རྣམ་པར་སྣ་བུག་གཉིས་ནས་བརྔུབས་ཏེ་ཡུར་བར་ཆུ་དྲངས་བ་ལྟར་རོ་རྐྱང་གི་ལམ་ནས་བརྒྱུད། དབུ་མའི་མར་སྣེར་ཞུགས་ནས་ཕྱུ་རུ་རུ་ཡར་བྱུང་། ཐུགས་ཀའི་ཀུན་བཟང་གི་སྙིང་དབུས་ཨ་ལ་འདུས་པར་བསམ་ལ་སྦྱོར་བ་བཞི་ལྡན་གྱི་གནད་ལ་བརྟེན་པ་གལ་ཆེའོ།། རྗེས་ཉོན་མོངས་རླུང་སེམས་སོགས་ཀྱི་བསྔོ་བ་དང་སྨོན་ལམ་གྱིས་མཐའ་བརྟན་པར་བྱའོ།། དུས་ནམ་ཡང་བུམ་པ་ཅན་དང་སེམས་རྩེ་གཅིག་པའི་ཏིང་འཛིན་ལ་གནད་དུ་བསྣུན་པ་གལ་ཆེའོ།། བསྔོ་བ་དེ་ལ་འཁོར་གསུམ་དམིགས་མེད་དང་རྗེས་མཐུན་གྱི་བསྔོ་བ་སོགས་ཀྱིས་རྒྱས་བཏབ་ཅིང་། འཛད་པའི་རྒྱུ་བཞི་གང་གིས་ཀྱང་མ་གོས་པར་བྱ་དགོས་པ་ལེགས། འཛད་པའི་རྒྱུ་བཞི་ནི། མ་བསྔོས་པ་དང་ལོག་པར་བསྔོས། །གཞན་ལ་ངོམ་དང་འགྱོད་པ་སྐྱེས། །དེ་ནི་འཛད་པའི་རྒྱུ་བཞི་ཡིན། །གསུངས་ཕྱིར་དུས་གསུམ་གྱི་སངས་རྒྱས་དང་བྱང་ཆུབ་སེམས་དཔའ་ཀུན་ཏུ་བཟང་པོ་དང་འཇམ་དཔལ་དབྱངས་སོགས་ཀྱིས་ཇི་ལྟར་བསྔོས་པ་བཞིན་བདག་གིས་ཀྱང་དེ་བཞིན་དུ་བསྔོ་བསམ་པ་རྗེས་མཐུན་པ་ལགས། དེ་འདྲའི་དམིགས་གནད་རྩྭ་སོག་གཏིབ་མ་ལྟར། །མདོ་དོན་ཚིག་ལ་ཆ་འཇོག་འགའ་མེད་མོད། །ང་ཅག་ཐོས་བསམ་སྒོམ་པའི་ཡོན་ཏན་ཞན། །དེ་ཕྱིར་གནད་དོན་བྲི་བར་འོས་མིན་ཡང་། །མཆེད་གྲོགས་དམ་པའི་བཀའ་ནན་ལྡོག་མ་ནུས། །ཅི་དྲན་ཡི་གེ་རིས་སུ་སྤེལ་བ་དགེ།།