བཱ་ལྷ་སྒང་གི་གནས་ལ་བསྟོད་པ་དུང་དཀར་སྐྱེ་བ་ལྔ་པའི་རང་སྒྲ།
དཔལ་དང་ཡོན་ཏན་གྱིས་མངོན་པར་མཐོ་བ་བཱ་ལྷ་སྒང་གི་གནས་ལ་བསྟོད་པ་དུང་དཀར་སྐྱེ་བ་ལྔ་པའི་རང་སྒྲ་དད་པའི་འཁྲི་ཤིང་འོད་ཀྱི་ཟླ་ཞུན་ཞེས་བྱ་བ་བཞུགས་སོ༔
ཨེ་མ་ཧོ༔ རང་བྱུང་ཀ་དག་སྤྲོས་བྲལ་ཆོས་ཀྱི་སྐུ༔ རང་གདངས་ལྷུན་གྲུབ་གསལ་དག་ལོངས་སྤྱོད་རྫོགས༔ རང་རྩལ་འགག་མེད་རོལ་པ་སྤྲུལ་པའི་གར༔ རང་རིག་དོན་སྟོན་བླ་མ་ཉིད་ལ་འདུད༔ མི་མཇེད་ཞིང་གི་སྟོན་པ་ཤཱཀྱའི་ཏོག༔ མཚན་དཔེའི་ལང་ཚོ་རབ་ངོམ་ཚངས་དབྱངས་གསུང༔ གང་ཐུགས་ཡེ་ཤེས་རྒྱ་མཚོའི་བདག་ཉིད་རྗེ༔ སྲིད་གསུམ་ལྷ་མིའི་མཆོད་སྡོང་དེ་ལ་འདུད༔ དྲི་བྲལ་ཡན་ལག་བརྒྱད་ལྡན་རྒྱ་མཚོའི་དབུས༔ པདྨ་གེ་སར་སྡོང་པོའི་རྩེར་ལྷག་པའི༔ བཀྲ་ཤིས་ཡོན་ཏན་དུ་མས་བརྒྱན་པའི་སྐུ༔ ཨོ་རྒྱན་རྡོ་རྗེ་འཆང་ལ་གུས་པས་འདུད༔ བཅུ་དྲུག་དགའ་བའི་ཡེ་ཤེས་མཛའ་ན་མོ༔ བོད་ཡུལ་གཏེར་གྱི་གཉེར་འཛིན་མཁར་ཆེན་བཟའི༔ གསང་གསུམ་སྒྱུ་འཕྲུལ་འགྲོ་བའི་དེད་དཔོན་མཆོག༔ དགོངས་པའི་གཏེར་མངའ་ལུང་རིག་གླིང་ལ་འདུད༔ མཆོད་པར་བརྗོད་པ་འགའ་ཡིས་མདུན་བསུས་ནས༔ གནས་བསྟོད་གཡས་འཁྱིལ་སྐྱེ་ལྔའི་རང་སྒྲ་ངོམ༔ དབྱིངས་ཡུམ་ཌཱཀྐིའི་བརྡ་གླུ་འདི་ན་འཁྲོལ༔ ཤེས་ལྡན་ཀུན་གྱི་སྒྲ་འཛིན་དབང་པོར་བསྟིམ༔ སྔོན་ཚེ་མི་མཇེད་ཞིང་གི་དུས་སྟོན་པ༔ མཉམ་མེད་བདེ་གཤེགས་དོན་ཀུན་གྲུབ་པའི་དཔལ༔ གང་དེས་ལྔ་བདོའི་འགྲོ་བའི་མུན་སེལ་ཕྱིར༔ བཀའ་ཡི་འཁོར་ལོ་རང་སྐལ་འཚམས་པར་བསྐོར༔ སྐུ་གསུང་ཐུགས་ཀྱི་ཆོ་འཕྲུལ་ཆེན་པོ་མཛད༔ རིགས་དྲུག་འདྲེན་པའི་བཅོམ་ལྡན་ཐུབ་དྲུག་སྤྲུལ༔ ཐེག་གསུམ་འདྲེན་པའི་སེང་གེའི་ང་རོ་ཡིས༔ ཕས་རྒོལ་མུ་སྟེགས་ཝ་སྐྱེས་མཐར་བསྐྲད་ཚེ༔ སྐྱེ་རྒུའི་བདག་མོ་རབ་ཏུ་བྱུང་བའི་རྐྱེན༔ བསྟན་པ་ལྔ་བརྒྱ་འགྲིབ་པ་གསོ་བའི་ཆེད༔ བསྟན་པའི་མངའ་བདག་གང་དེའི་ཕྲིན་ལས་ཀྱི༔ ཟློས་གར་བཟོ་བོ་ཀརྨ་བི་ཤྭ་ཡིས༔ ཙན་དན་སྦྲུལ་སྙིང་ཀོར་ཤིའི་ཤིང་ལ་སོགས༔ མ་དྲོས་པ་སོགས་རྒྱ་མཚོའི་བྱེ་མ་སྟོང༔ རྡོ་རྗེ་གདན་དང་བྱང་ཕྱོགས་ཤམ་བྷ་ལ༔ རི་བོ་ཏ་ལ་ཐུབ་པའི་བཞུགས་གནས་བརྒྱད༔ ཀུན་གྱི་ས་སྣ་ཆུ་སྣ་ཁྱད་པར་དུ༔ ལྷ་ཀླུ་མི་དང་མི་མིན་སྐྱེ་འགྲོ་ཡི༔ བསོད་ནམས་མཐུ་ལས་གྲུབ་པའི་ཡིད་བཞིན་ནོར༔ རིན་ཆེན་སྣ་ཚོགས་དབྱིག་ཀུན་རྫུ་འཕྲུལ་གྱིས༔ ཕྱོགས་གཅིག་བསྡུས་ཏེ་སྐུ་ཚབ་འཛམ་གླིང་རྒྱན༔ ལྷ་སའི་ཇོ་བོ་ཡིད་བཞིན་ནོར་བུ་དང༔ མི་འགྲོ་གསུང་འབྱོན་མཐོང་བ་དོན་ལྡན་སོགས༔ ལེགས་པར་བཟོས་ཤིང་སངས་རྒྱས་བྱིན་རླབས་མཛད༔ མ་འོངས་བསྟན་པའི་གཉེན་དུ་མངའ་ཡང་གསོལ༔ འོག་ཕྱོགས་ཀླུ་ལ་མཆོད་པའི་རྟེན་དུ་བསྩལ༔ དེ་ནས་གངས་ཅན་བསྟན་པ་གསོ་ལ་ཉེ༔ དེ་དུས་འཇམ་དབྱངས་མི་ཡི་ཟོལ་བསྟན་པ༔ མི་དབང་ས་བདག་རཱ་ཛ་ཙི་ན་ཡི༔ ཚོགས་བསགས་ཞིང་དུ་བསོད་ནམས་སྟོབས་ཀྱིས་བྱོན༔ ཀུན་བཟང་སྤྲུལ་པ་གཉའ་ཁྲི་ནས་བཟུང་སྟེ༔ ལྷ་རི་སྙན་ཤལ་བར་དུ་ཆོས་མ་དར༔ དེ་དུས་དམ་པའི་ཆོས་ཀྱི་དབུ་བརྙེས་ནས༔ རྒྱལ་རབས་ལྔ་མཐར་འཕགས་པ་སྤྱན་གཟིགས་ཀྱིས༔ འགྲོ་ལ་རྗེས་ཆགས་སྙིང་རྗེའི་བདག་ཉིད་གང༔ ཆོས་ཀྱི་རྒྱལ་པོ་སྲོང་བཙན་སྒམ་པོ་བྱོན༔ ཆོས་ཀྱི་སྲོལ་བཏོད་ལྷ་ས་འཕྲུལ་སྣང་སོགས༔ གཙུག་ལག་ཁང་བརྒྱ་མཐའ་འདུལ་ཡང་འདུལ་བཞེངས༔ རྗེ་བཙུན་ཡིད་བཞིན་འཁོར་ལོའི་ཟློས་པའི་གར༔ བལ་བཟའ་ཁྲི་བཙུན་རིག་མར་མངའ་གསོལ་ཚེ༔ བལ་བོའི་སྐུ་རྟེན་རྣམ་གསུམ་ལྷ་སར་གདན༔ རྗེ་བཙུན་སེང་ལྡིང་ནགས་ཀྱི་ཏཱ་རེ་མའི༔ གསང་གསུམ་སྒྱུ་འཕྲུལ་ས་སྐྱོང་དབང་མོའི་ཚུལ༔ རྒྱ་བཟའ་ཀོང་ཇོ་རྒྱལ་པོའི་བཙུན་མོ་རུ༔ མངའ་གསོལ་ཕུལ་ཚེ་སྔོན་གྱི་སྨོན་ལམ་སྟོབས༔ བོད་དུ་བྱོན་ཚེ་སྐུ་རྟེན་རྣམ་པ་གསུམ༔ བོད་དུ་ཆས་པའི་ཕེབས་རྫོངས་གནང་བ་ལགས༔ དེ་ནས་ཡར་བྱོན་མདོ་ཁམས་སྒང་དྲུག་གི༔ ཤར་ཕྱོགས་མི་ཉག་བཱ་ཡི་ལྷ་སྒང་དུ༔ རྒྱ་བཟའ་ཕྱག་ཕེབས་བློན་པོ་རྒྱ་ཡུལ་ལུས༔ དེ་ལ་རྗེས་ཆགས་སྔོན་སྦྱངས་ལས་འཕྲོ་དང༔ སྨོན་ལམ་དུས་བབས་རྒྱལ་བས་ལུང་བསྟན་བཞིན༔ མདོ་སྨད་ཕྱོགས་ཀྱི་ཚོགས་བསགས་ཞིང་གྱུར་པ༔ ལྷ་དགའ་རིགས་གསུམ་མགོན་པོའི་གནས་རིའི་ཞོལ༔ ཐུགས་བསྐྱེད་ལས་བྱུང་ལས་བཞིའི་མཆོད་རྟེན་དང༔ བརྒྱ་རྩ་བརྒྱད་ཀྱི་ཐུགས་བསྐྱེད་རྫུ་འཕྲུལ་གྱི༔ སྟོབས་བསྐྲུན་ཇོ་བོ་མཐོང་བ་དོན་ལྡན་ཉིད༔ གནས་འདིར་བརྟན་བཞུགས་བཀྲ་ཤིས་སྨོན་ལམ་མཛད༔ ས་ཡི་བཅུད་དང་ཡུལ་གྱི་ཞིང་མཆོག་ཏུ༔ རྟེན་དང་བརྟེན་པའི་ལྷ་ཚོགས་ལྷུན་གྱིས་གྲུབ༔ བྱིན་དབབ་ཕྱག་གིས་མེ་ཏོག་འཐོར་ནས་བཞག༔ ར་མོ་ཆེ་འམ་མི་འགྲོ་གསུང་འབྱོན་དང༔ ཤཱཀྱ་མུ་ནེ་དམར་པོའི་རི་ལ་དྲངས༔ དེ་རྗེས་རྒྱལ་རབས་ལྔ་ཡི་མཐའ་མ་དེར༔ དཔལ་གྱི་བསམ་ཡས་ཧས་པོ་རི་ཡི་འདབས༔ མཁན་སློབ་ཆོས་གསུམ་སྨོན་ལམ་དུས་སུ་འཛོམས༔ གཙུག་ལག་ཁང་བཞེངས་རྒྱ་བོད་པཎ་ཆེན་གདན༔ རྣམ་སྣང་ལོ་ཙཱ་སྐ་ཅོག་ཞང་གསུམ་སོགས༔ ལོ་ཙཱ་བརྒྱ་རྩས་རྒྱ་ཆོས་བོད་དུ་བསྒྱུར༔ མདོ་སྔགས་བསྟན་པ་ཉི་ཟླའི་འོད་ཟེར་འབར༔ གངས་རིའི་ལྗོངས་འདིར་བསྟན་པ་མཐའ་རྒྱས་མཛད༔ བཻ་རོས་གདུལ་བྱ་རྒྱལ་མོ་རོང་དུ་གཟིགས༔ འགྲོ་དོན་དུས་བབས་ཚེ་སྤོང་མ་ཡིས་སྤྱུགས༔ རོང་ཆེན་བཞི་དང་མདོ་ཁམས་སྒང་དྲུག་གི༔ མི་སྲུན་ལྷ་འདྲེ་དུ་མས་ཐོ་འཚམས་ནས༔ ཆོ་འཕྲུལ་མི་བཟད་འབར་བའི་དཔུང་ངོམ་ཚེ༔ ཐུགས་དམ་ལ་བཞུགས་ཨོ་རྒྱན་ཆེན་པོ་ལ༔ གསོལ་བཏབ་ཐུགས་རྒྱུད་བསྐུལ་ཚེ་དབྱིངས་རུམ་ནས༔ སྟག་ཞོན་རྡོ་རྗེ་ཁྲོ་བོའི་རྣམ་པར་བྱོན༔ རྗེ་འབངས་ཉེར་ལྔ་རྒྱ་བོད་པཎ་གྲུབ་ཚོགས༔ བརྟུལ་ཞུགས་མཛད་དེ་ཞི་ཆགས་ཁྲོས་པའི་གར༔ སྒྱུ་འཕྲུལ་རྡོ་རྗེའི་སྤྲིན་གྱི་རོལ་མོ་ཡིས༔ མི་སྲུན་ལྷ་འདྲེ་ཆེ་རྒུས་སྲོག་སྙིང་ཕུལ༔ མི་འདའ་རྡོ་རྗེའི་ཐ་ཚིག་སེམས་ལ་ཕོག༔ སངས་རྒྱས་བསྟན་སྲུང་བསྟན་འཛིན་སྐུ་ཚེ་བསྲིངས༔ བསྟན་པའི་སྦྱིན་བདག་མི་མཐུན་རྒུད་པ་བསལ༔ དཀར་ཕྱོགས་སྐྱོང་ཞིང་ནག་ཕྱོགས་བཏུལ་ལོ་ཞེས༔ ཁས་བླངས་བཞིན་དུ་དཀར་ཕྱོགས་ལས་ལ་བཀོལ༔ ནག་ཕྱོགས་མི་མིན་སྡེ་ཚོགས་ཆམ་ལ་དབབ༔ ས་གནས་བྱིན་རླབས་རི་བྲག་གཏེར་གྱིས་གཏམས༔ སྐུ་ཚབ་ལུང་བསྟན་གསུང་ཚབ་བརྡ་རུ་བཀོད༔ ཐུགས་ཀྱི་དགོངས་པ་སྐལ་ལྡན་ཡོངས་ལ་གཏད༔ གངས་ཆེན་བཞི་ཡི་ཅིག་ཤོས་འབོ་དཀར་ཕྱོགས༔ སྐུ་གསུང་ཐུགས་ཀྱི་གནས་གསུམ་བྱིན་གྱིས་རླབས༔ སྐུ་ཡི་གནས་རི་བཞག་བྲ་ལྷ་རི་རྩེ༔ གསུང་གི་གནས་རི་རིགས་གསུམ་ཉེ་སྲས་བརྒྱད༔ ཐུགས་ཀྱི་གནས་རི་ཕོ་བྲང་འཁོར་ལོ་ལྔ༔ ཡོན་ཏན་ཕྲིན་ལས་ལ་སོགས་གནས་རྣམས་ལ༔ ཨོ་རྒྱན་ཆེན་པོ་སྤྲུལ་པ་འཁོར་བཅས་ཀྱིས༔ ཕྱག་གིས་མེ་ཏོག་འཐོར་ཞིང་ཞབས་ཀྱིས་བཅགས༔ ཞལ་གྱིས་བཀྲ་ཤིས་ཚིགས་སུ་བཅད་པ་བླངས༔ ཐུགས་ཀྱི་དགོངས་པས་བྱིན་རླབས་རྫུ་འཕྲུལ་བསྟན༔ ས་རྡོ་རི་བྲག་རྩི་ཤིང་ནགས་ཚལ་ཀུན༔ སྐུ་ཡིག་ཕྱག་མཚན་བཀྲ་བའི་རྟེན་དུ་བསྒྱུར༔ དེ་རྗེས་རྒྱ་གར་གྲུབ་པའི་སྤྲུལ་བསྒྱུར་ལས༔ གྲུབ་ཐོབ་བྲམ་ཟེ་མགོན་དང་ས་ར་ཧ༔ མི་ཕམ་ཉི་མ་རྒྱལ་མཚན་ལ་སོགས་པས༔ ཤར་ཕྱོགས་ཀེ་ལ་ཤ་ཡི་ཐུགས་ཀྱི་རྟེན༔ མར་མེའི་གཟུངས་ལྡན་རྒྱ་མཚོའི་སྟེང་འགེབ་པ༔ ཙན་དན་སྦྲུལ་སྙིང་སྲོག་ཤིང་མཆོད་རྟེན་སོགས༔ སྐུ་གསུང་ཐུགས་རྟེན་འགྲོ་ལ་སྨན་སླད་གྲུབ༔ རྟེན་རྙིང་ཐམས་ཅད་ཞིག་གསོ་རབ་གནས་མཛད༔ གྲུབ་རྟགས་ཡ་མ་ཟུང་གི་ཆོ་རོལ་འགྱེད༔ ཕ་ཅིག་གྲུབ་དབང་ཞིག་པོ་བླ་མ་དང༔ ཆོས་རྒྱལ་འཕགས་པ་མི་ཉག་མཁས་པ་བཞི༔ ས་དགེ་རྙིང་གསུམ་མཁས་ཤིང་གྲུབ་པ་བརྙེས༔ དུ་མ་རིམ་བྱོན་ས་འདིར་དགེ་ལེགས་མཛད༔ བསྐལ་པ་འདི་ལ་ཡ་ཐོག་རིང་མོ་དང༔ མ་ཐོག་ཐུང་ངུ་ཁུག་པ་བཅོ་བརྒྱད་འབྱུང༔ དེང་སང་བར་ཁུག་སྙིགས་མ་ལྔ་བདོའི་དུས༔ སངས་རྒྱས་བསྟན་པ་ལུང་གི་ལྷག་མ་ལ༔ སུམ་ཅུ་ཁ་རལ་ཏུ་རུ་ཁ་བརྒྱད་དར༔ སྟེང་གི་ལྷ་དང་བར་གྱི་གཉན་ཁམས་འཁྲུགས༔ འོག་གི་ཀླུ་དང་ས་བདག་སྡེ་བརྒྱད་འཁྲུགས༔ ནད་མུག་མཚོན་གྱིས་རྒྱ་བོད་ཧོར་གསུམ་ཁྱབ༔ ཡུལ་ཕྱོགས་རེ་བཞིན་ས་རྟགས་དུས་རྟགས་མངོན༔ ཁྱད་པར་མི་ཉག་ལྷ་སྒང་ཟླ་ཚེས་ཐང༔ སྐུ་གསུང་ཐུགས་རྟེན་འགའ་ལ་ཞིག་རལ་འབྱུང༔ ཇོ་བོའི་སྟེང་དུ་མ་ཀིའི་ཆབ་ཀྱིས་བྲན༔ ཇ་ཧོང་ཆས་ལྡན་འཇོལ་མོའི་སྐད་ཀྱིས་བསླུ༔ འཇམ་དཔལ་རལ་གྲིའི་ལྗོན་པ་ནགས་ཀྱིས་བསྐོར༔ སྤྱན་གཟིགས་རི་ཡི་རྒྱབ་ཏུ་ས་རལ་འབྱུང༔ ཕྱག་རྡོར་སྟག་ཤམ་མཐའ་བཞི་ཆབ་ཀྱིས་རྡོལ༔ སྒྲོལ་མ་རྒྱ་བཟའི་བླ་རིར་རྟགས་མཚན་འབྱུང༔ དེ་དུས་ཡུལ་འདིར་མི་འདོད་འགའ་ཞིག་འབྱུང༔ རྒྱ་བོད་འཁྲུགས་རྩོད་དམ་སྲིའི་ཕྲུ་མ་འགྱེད༔ རྗེ་འཕྲུལ་རཱ་ཛ་བྱད་ཀྱི་དྲྭ་བར་ཚུད༔ ཕ་སྤུན་ནང་འཁོན་འགའ་ཞིག་དམངས་སུ་འབེབས༔ ཡུལ་མི་ཐམས་ཅད་ཤིང་བལ་རླུང་ཁྱེར་བཞིན༔ རང་སེམས་ལུས་པོའི་སྦུབས་སུ་ཚུགས་ཐབས་མེད༔ དམག་སོགས་མི་སྙན་སྒྲ་ཡིས་རྣ་བ་མྱོས༔ མི་སྐྱས་ཆོས་བཤད་འདྲེ་མོས་མངོན་ཤེས་སྟོན༔ ཟོག་པོས་དམ་པའི་ཚུལ་བཟུང་སྐྱེ་འགྲོ་བསླུ༔ དམ་པ་དུ་མ་ཚེ་ཡི་འཕྲང་དུ་ཚུད༔ དེ་འདྲའི་དུས་ངན་སྐྱོབ་པའི་ལྷ་གཅིག་པུ༔ ཨོ་རྒྱན་ཆེན་པོ་འཇིགས་སྐྱོབ་རྒྱལ་བའི་ཡུམ༔ ཏཱ་རེ་ལྷ་མོ་རིགས་གསུམ་སེམས་དཔའ་ཆེ༔ མི་སྐྱ་ཕོ་མོས་བསྙུང་གནས་སྡོམ་པ་སྲུངས༔ མ་ཎི་སིདྡྷིའི་འཛབ་དབྱངས་སྙན་པར་སྒྲོགས༔ སྐུ་གསུང་ཐུགས་རྟེན་གསོ་དང་རབ་གནས་སྐྱོར༔ བླ་སེར་རྣམས་ཀྱིས་གསོ་སྦྱོང་དམ་སྐོང་དང༔ ཚེས་བཅུ་ཉེར་ལྔའི་དུས་མཆོད་ཆགས་མེད་རེམ༔ འབྱོར་ལྡན་རྣམས་ཀྱིས་གནས་སྟོང་ཁྲུས་བརྒྱ་དང༔ བཀྲེན་པ་ཅན་ཚོས་བྱིན་ལྡན་གནས་རི་དང༔ སྐུ་གསུང་ཐུགས་ཀྱི་རྟེན་ལ་ཕྱག་སྐོར་འབུངས༔ མི་མཐུན་དུས་ཀྱི་རྒུད་པ་རེ་ཞིག་སེལ༔ ཁྱད་པར་གོས་དཀར་ལྷ་མོའི་རང་བཞིན་ཁམས༔ མཁའ་ལྡིང་རྒྱལ་པོས་གནམ་གནོན་ཟླ་བ་དགུའི༔ བཤོལ་དང་བཅས་པའི་ཉེར་ལྔ་ནས་བཟུང་སྟེ༔ ས་ཁམས་ཀུ་ཀུའི་ས་ག་ཟླ་བ་ཞེས༔ དུས་ཆེན་སུམ་འཛོམས་མ་རྫོགས་དེ་བར་དུ༔ ལྷ་ས་དང་མཚུངས་རྒྱ་གར་རྡོ་རྗེ་གདན༔ གཉིས་པ་མི་ཉག་རིགས་གསུམ་གནས་རི་ལ༔ འཕགས་ཡུལ་ཐུབ་དབང་དགྲ་བཅོམ་བཞུགས་གནས་བརྒྱ༔ མངོན་སངས་རྒྱ་བའི་བྱང་ཆུབ་ཤིང་གི་ལྷ༔ མངའ་རིས་སྐོར་གསུམ་བསྟན་མ་བཅུ་གཉིས་གནས༔ དབུས་གཙང་རུ་བཞི་གནས་གསུམ་རྟེན་གསུམ་སོགས༔ པདྨའི་སྒྲུབ་གནས་མཐའ་འདུལ་ཡང་འདུལ་གྱི༔ གནས་བདག་ཡེ་ཤེས་སྤྱན་ལྡན་འདི་རུ་འདུས༔ རོང་ཆེན་བཞི་དང་མདོ་ཁམས་སྒང་དྲུག་དང༔ རི་བོ་ཏེ་ཤན་ཡན་ཆད་གནས་ཆེན་དང༔ གནས་ཕྲན་སྟོང་རྩའི་བྱིན་རླབས་འདི་རུ་འཕོས༔ རིགས་ལྔའི་ཞིང་ཁམས་རབ་འབྱམས་ཕྱོགས་དུས་ཀྱི༔ རྒྱལ་དང་རྒྱལ་སྲས་སློབ་མར་བཅས་ཀུན་གྱིས༔ ཡེ་ཤེས་ཡོན་ཏན་དགོངས་པ་གནས་འདིར་འཕོས༔ བྱིན་རླབས་ཡེ་ཤེས་དྲི་བསུང་ཐུལ་ལེ་བ༔ མ་ཚོགས་མཁའ་འགྲོའི་ཁ་རླངས་ངད་དེ་བ༔ མཆོག་ཐུན་དངོས་གྲུབ་ཆར་རྒྱུན་སིལ་ལེ་བ༔ རྩ་གསུམ་རྒྱ་མཚོའི་མཐུ་བྱིན་ཤིག་གེ་བ༔ ཆོས་སྐྱོང་སྡེ་བརྒྱད་ལས་བྱེད་ཁྱུག་གེ་བ༔ དཀར་ཕྱོགས་ལྷ་ཀླུ་གཞི་བདག་ཉི་ལེ་བ༔ མི་དང་མི་མིན་འདུ་ཚོགས་དཔུང་ངེ་བ༔ མཆོད་འོས་དཀོན་མཆོག་གཟུགས་བརྙན་བཀྲ་ལེ་བ༔ ཞིང་ཁམས་འདི་ནི་སྐལ་བཟང་སངས་རྒྱས་ཀྱི༔ བཞུགས་པའི་གནས་མཆོག་རྡོ་རྗེ་གདན་དང་མཚུངས༔ འཇམ་དབྱངས་གནས་འདི་རི་བོ་རྩེ་ལྔར་འགྲན༔ ནང་ན་འཇམ་དབྱངས་རིགས་ལྔའི་ལྷ་ཚོགས་བཞུགས༔ ར་སའི་ཕུག་ཏུ་ཕྱག་མཚན་རལ་གྲི་ནི༔ རྣམ་སྣང་ལོ་ཙཱས་གཏེར་དུ་སྦས་པ་ཡོད༔ རྒྱབ་ངོས་གཤིན་རྗེའི་གདོང་ལ་ཡ་ཡིག་བཀྲ༔ ནང་དུ་ཀི་ཀང་དམར་ནག་རྒྱུད་སྡེ་ཡོད༔ རི་བོའི་རྩེ་རུ་ཇོ་དར་དམར་སེར་ཚུགས༔ ཨ་ར་པ་ཙ་ཝཀྐི་ཤྭ་རི་དང༔ འཇམ་དབྱངས་འབྲུ་དྲུག་སྔགས་ཀྱི་འཛབ་དབྱངས་སྒྲོགས༔ གཏི་མུག་སྡིག་པའི་ལས་བྱང་མཁྱེན་གཉིས་ཐོབ༔ ཆོས་དབྱིངས་ཡེ་ཤེས་མངོན་གྱུར་ཨ་ལ་ལ༔ འཕགས་པའི་གནས་འདི་རི་བོ་ཏ་ལར་མཚུངས༔ ནང་ན་རྒྱལ་བ་རྒྱ་མཚོའི་ལྷ་ཚོགས་བཞུགས༔ རི་ཡི་ངོས་ལ་ཞལ་ཕྱག་མཚན་མ་མངོན༔ བྲག་དམར་གདོང་ལ་བཅུ་གཅིག་ཞལ་གྱི་སྐུ༔ མཐོ་གང་དཔལ་གྱི་རྡོ་རྗེས་སྦས་པ་ཡོད༔ སྒྲུབ་ཕུག་ངོས་ལ་སྐུ་ཡིག་ཕྱག་མཚན་བཀྲ༔ སྐལ་བ་ལྡན་པས་སྔགས་སྒྲ་རོལ་མོ་ཐོས༔ ལོ་གསུམ་མཚམས་སྒྲུབ་ཕྱིར་མི་ལྡོག་པ་ཐོབ༔ རི་བོའི་རྩེ་རུ་ཇོ་དར་དཀར་པོ་ཚུགས༔ ཡི་གེ་དྲུག་པའི་སྒྲ་དབྱངས་དར་དིར་སྒྲོགས༔ མི་ཕྱུགས་ནད་ཞི་འདོད་ཆགས་ལས་སྒྲིབ་བྱང༔ བྱམས་དང་སྙིང་རྗེས་རང་རྒྱུད་འགེང་བ་དང༔ སོར་རྟོག་ཡེ་ཤེས་མངོན་གྱུར་ཨ་ལ་ལ༔ གསང་བདག་གནས་འདི་ལྕང་ལོ་ཅན་གྱི་ཟླ༔ ནང་ན་འབྱུང་པོ་འདུལ་བའི་ལྷ་ཚོགས་བཞུགས༔ མདུན་ངོས་གསང་བའི་བྱང་སེམས་གཉན་ནད་སེལ༔ ཆུ་མིག་ཕུག་ཏུ་རྡོ་བ་སྲོག་ཆགས་གཟུགས༔ དེ་ཡི་ཁོང་ན་ཀླུ་ཡི་ནོར་བུ་དང༔ བཻཌཱུར་མཐིང་གའི་སྒྲོམ་བུ་བདུན་ལྡན་ཡོད༔ རི་ཡི་རྩེ་ལ་དར་མཐིང་ཇོ་གུར་ཕུབ༔ བཛྲ་པ་ཎི་འབྱུང་པོ་འདུལ་བའི་སྔགས༔ འཛབ་ཀྱི་སྒྲ་སྒྲོགས་མི་མཐུན་འཁྲུགས་རྩོད་ཞི༔ མི་བདེའི་སྣ་འདྲེན་དམ་འགོང་རིང་མཐར་བསྐྲད༔ ཞེ་སྡང་ལས་གྱུར་སྡིག་སྒྲིབ་བག་ཆགས་བྱང༔ བརྟུལ་ཞུགས་ལམ་ལྷོངས་དུས་མིན་ཚེ་འཕྲང་གྲོལ༔ མེ་ལོང་ཡེ་ཤེས་མངོན་གྱུར་ཨ་ལ་ལ༔ རང་རང་མཐའ་ལ་ཉེ་སྲས་སེམས་དཔས་བསྐོར༔ མཁའ་ལྡིང་རི་ལ་ཁྱུང་སྒོང་འཕུར་ཤེས་གདའ༔ ས་བདག་ཀླུ་གཉན་གདོན་གྱི་ཁ་གནོན་ཡིན༔ བཞག་བྲའི་དགེ་བསྙེན་སྒྲུབ་པའི་གསས་མཁར་སྟེང༔ གཞི་བདག་འདུ་རྫོངས་ཆོ་ལོའི་རྟགས་སྒྲིལ་ངོམ༔ དེ་རུ་ལྷ་གསོལ་ལབ་རྩེ་སྐུ་མཁར་དང༔ ཤིང་རིས་རླུང་རྟ་སྣ་ཚོགས་དར་འཕྲུ་ཕྱོར༔ འཁོར་འདས་མཆོད་པ་ཞི་བརྔན་བསང་གསུམ་རེམ༔ རླུང་རྟའི་རྐྱེན་སེལ་དགྲ་བླའི་ངོ་སོ་འདོན༔ དཀར་ཕྱོགས་མཐོ་ལ་ནག་ཕྱོགས་ཕམ་པར་འགྱུར༔ རྒྱ་བཟའི་བླ་རི་སྒྲོལ་མའི་གནས་མཆོག་འདི༔ སེང་ལྡིང་ནགས་རི་གཡུ་ལོ་བཀོད་དང་མཉམ༔ ནང་ན་ཏཱ་རེ་ཉེར་གཅིག་འཁོར་བཅས་བཞུགས༔ རྡོ་དང་བྲག་ལ་ཏཱ་རེའི་སྐུ་ཡིག་ཐུགས༔ གླང་པོ་རིན་ཆེན་གྲུབ་ཐོབ་བཞུགས་ཁྲིའི་ཕུག༔ རང་བྱུང་རང་ཤར་ཡ་མཚན་རྨད་དུ་བྱུང༔ རི་ཡི་ཐོག་ཏུ་དར་ལྗང་ཡི་གེ་ཚུགས༔ བསྟོད་པ་ཉེར་གཅིག་ཏཱ་རེའི་སྔགས་སྒྲ་འུར༔ འཇིགས་པ་བརྒྱད་དང་བཅུ་དྲུག་གདོན་ལས་གྲོལ༔ འདོད་པའི་དོན་ཀུན་མྱུར་མ་དཔའ་མོས་སྟེར༔ གཡུ་ཡི་མཎྜལ་གནམ་གྱི་ཀ་བ་དང༔ ཆོས་སྐྱོང་མགོན་པོའི་བླ་རྡོ་བྱིན་འོད་ཅན༔ ཨར་མོ་ལི་ཀའི་རྡོ་ལེབ་ཡན་ཆད་དུ༔ ཕྱི་སྐོར་བསྡུས་པའི་གནས་ཡིག་མདོ་ཙམ་མོ༔ སྐོར་བ་གཅིག་བྱས་མ་ཎི་དུང་ཕྱུར་བརྒྱ༔ ངེས་པར་འཐོབ་པ་འཕགས་པའི་ཐ་ཚིག་ཡིན༔ ཀུན་གྱིས་ཐེ་ཚོམ་རྟོག་པ་སྤང་འཚལ་ལགས༔ ཕྱི་སྐོར་རྒྱས་པའི་དཀར་ཆགས་འགའ་གསལ་ཡང༔ རྟ་ཕོའི་ཉིན་ལམ་བདུན་གྱིས་བསྒྲོད་དཀའ་ཙམ༔ དེ་རྣམས་ཡི་གེ་འཇིགས་པས་མ་བྲིས་སོ༔ ནང་སྐོར་ཟླ་གམ་དབང་གི་ཐང་དཀྱིལ་དུ༔ སྒྲོལ་མ་དངོས་བྱོན་ཀོང་ཇོས་ཕྱག་བཏབ་རྟེན༔ རྒྱ་བོད་པཎ་གྲུབ་ཡོངས་གྱིས་སྦས་པའི་གཏེར༔ ནད་མུག་མཚོན་གྱི་ཁ་གནོན་ཐུགས་ཀྱི་རྟེན༔ འགྲོ་བའི་ཞིང་མཆོག་ཇོ་བོ་མཐོང་ལྡན་དང༔ མེ་ཐར་མ་སོགས་རྒྱལ་བཀའ་ཡོངས་སུ་རྫོགས༔ གཙུག་ལག་བསྟན་བཅོས་ཁང་པ་བྱིན་ལྡན་གནས༔ དེ་ལ་ཕྱག་མཆོད་སྐོར་བ་གཅིག་གྲུབ་ན༔ མ་ཎི་དུང་ཕྱུར་བཅུ་ཕྲག་ལྔ་ཡི་གྲངས༔ ངེས་པར་འཐོབ་པ་ལྷ་དང་བླ་མའི་ལུང༔ རྒྱས་པའི་མཆོད་རྟེན་བསྐོར་དང་ཕྱག་བྱས་པས༔ ཚེ་བསོད་དཔལ་འབྱོར་ལུང་རྟོགས་ཡོན་ཏན་འཕེལ༔ དབང་གི་མཆོད་རྟེན་ཕྱག་སྐོར་མཆོད་བྱས་པས༔ མོས་ཚོགས་རྣམ་བཞི་དབང་འདུས་འདོད་པ་འགྲུབ༔ དྲག་པོའི་རྟེན་ལ་མཆོད་ཕྱག་སྐོར་བྱས་ན༔ དམག་འཁྲུགས་མཚོན་གྱི་བསྐལ་པ་དབྱིངས་སུ་ཞི༔ ཞི་བའི་མཆོད་རྟེན་སྐོར་ཕྱག་བཀུར་བྱས་ན༔ ནད་གདོན་སྡིག་སྒྲིབ་ལྷ་འདྲེའི་གདུག་སེམས་ཞི༔ དབུས་ཀྱི་མཆོད་རྟེན་ཡིད་བཞིན་ནོར་བུའི་ཁང༔ གྲུབ་པའི་དབང་པོས་སྦས་པའི་སྐུ་གསུང་ཐུགས༔ གཏེར་རྫས་བྱང་སེམས་རྣམས་ཀྱི་ཐུགས་བསྐྱེད་ལས༔ བྱུང་བའི་རྟེན་གྱིས་ཕྱུར་བུར་གཏམས་པ་ལ༔ ཕྱག་མཆོད་སྐོར་བ་སྨོན་ལམ་ལེགས་བཏབ་མཐུས༔ སྐྱེ་རྒུའི་མི་མཐུན་རྒུད་པ་ཡོངས་སུ་བསལ༔ འདོད་དོན་ལྷུན་གྲུབ་དཔག་བསམ་ཤིང་དང་འགྲན༔ དེ་མིན་མཆོད་རྟེན་བརྒྱ་རྩ་བརྒྱད་པོ་རྣམས༔ རྒྱ་བཟས་ཕྱག་བཏབ་རྒྱ་བོད་པཎ་གྲུབ་ཚོས༔ ཞིག་གསོ་ཕྱག་གི་མེ་ཏོག་རབ་གནས་བྱས༔ བྱང་སེམས་ས་ཐོབ་རྣམས་ཀྱིས་བྱིན་དབབ་ཅིང༔ རེ་རེ་ལ་འང་བུམ་གཏེར་རྫས་གཏེར་དང༔ དུས་ཀྱི་རྒུད་པ་སེལ་བའི་གཟུངས་འཇུག་ཡོད༔ རང་རང་སོ་སོའི་ཕན་ཡོན་བརྗོད་མི་ལངས༔ དེ་ཕྱིར་དད་འདུན་མོས་པས་གསོལ་བ་ཐོབ༔ ཡུལ་ཁམས་ཕུང་བའི་རྒྱ་འདྲེ་འབྱུང་པོ་དང༔ ལེགས་པའི་དཔལ་ལ་སྡང་བའི་དམ་སྲིའི་སྡེ༔ ཕུང་སྲིའི་གཉེན་པོ་མཆོད་རྟེན་འོག་ཏུ་ནི༔ དམ་ལྡན་སྔགས་པས་ཕུར་སྒྲུབ་ཀྱིས་ལ་ནོན༔ མཐའ་བཞིའི་དམག་གི་མཚོན་ཁ་སྡང་ཡང་ཐུལ༔ གསང་བའི་སྐོར་ལམ་ཇོ་བོ་རིན་པོ་ཆེ༔ མཐོང་བ་དོན་ལྡན་རྟེན་དང་བརྟེན་པ་ཀུན༔ དད་པའི་སེམས་ཀྱིས་ཕྱག་དང་བསྐོར་བྱས་ན༔ མ་ཎི་དུང་ཕྱུར་བཅུ་ཡི་ཕན་ཡོན་ཐོབ༔ གནས་འདུས་བཞུགས་སྐབས་ལན་གཅིག་མཇལ་ན་འང༔ མ་ཎི་དུང་ཕྱུར་གཅིག་གི་ཕན་ཡོན་གདའ༔ ཇོ་བོ་འདི་ལ་སྐོར་ཕྱག་སུས་བྱས་པ༔ སྐྱེ་བ་ལྔ་བརྒྱར་འཁོར་ལོས་བསྒྱུར་རྒྱལ་འཐོབ༔ ཇོ་བོ་འདི་ལ་ཡོན་ཆབ་སུས་ཕུལ་བ༔ ཤེས་རྒྱུད་རྙོག་མའི་སྐྱོན་སེལ་གསལ་སྟོང་ཐོབ༔ ཇོ་བོ་འདི་ལ་མེ་ཏོག་སུས་ཕུལ་བ༔ སྐྱེ་དབང་དོན་ལྡན་ལྷ་ལུས་ཡིད་འོང་འཐོབ༔ ཇོ་བོ་འདི་ལ་བདུག་སྤོས་སུས་ཕུལ་བ༔ དྲི་མེད་གཙང་མའི་ཚུལ་ཁྲིམས་བརྒྱ་ལྡན་འཐོབ༔ ཇོ་བོ་འདི་ལ་མར་མེ་སུས་ཕུལ་བ༔ དབང་པོའི་སྐྱོན་སེལ་མར་མེ་ལྟ་བུར་འགྱུར༔ ཇོ་བོ་འདི་ལ་དྲི་ཆབ་སུས་ཕུལ་བ༔ ཉོན་མོངས་གློ་བུར་སྐྱོན་སེལ་ཤེས་རབ་འབར༔ ཇོ་བོ་འདི་ལ་ཞལ་ཟས་སུས་ཕུལ་བ༔ སེར་སྣའི་སྒྲིབ་དག་རོ་བརྒྱའི་བཟའ་བ་འཐོབ༔ ཇོ་བོ་འདི་ལ་རོལ་མོ་སུས་ཕུལ་བ༔ མི་སྙན་མེད་ཅིང་ལྷ་མིའི་བསྟོད་བསྔགས་འོས༔ ཇོ་བོ་འདི་ལ་ན་བཟའ་སུས་ཕུལ་བ༔ བཀྲེན་པའི་སྐྱོན་སེལ་བཟོད་པའི་གོ་ཆ་འཐོབ༔ ཇོ་བོ་འདི་ལ་མཎྜལ་སུས་ཕུལ་བ༔ མི་ཟད་རིན་ཆེན་གཏེར་དང་འཕྲད་པར་འགྱུར༔ ཇོ་བོ་འདི་ལ་ཐོད་པ་སུས་གཏུགས་པ༔ མི་མཐུན་གཡུལ་རྒྱལ་རྒྱལ་བའི་གཙུག་ཏོར་འཐོབ༔ ཇོ་བོ་འདི་ལ་རབ་གནས་བཀྲ་ཤིས་སྒྲོག༔ ཐོག་མཐའ་བར་དུ་བཀྲ་ཤིས་དགེ་ལེགས་འཕེལ༔ མདོར་ན་གནས་འདིར་ཕྱག་སྐོར་མཆོད་འབུལ་དང༔ ཆོ་ག་ཆོས་སྤྱོད་སྒྲིབ་སྦྱང་སྦྱིན་པ་བཞི༔ དགེ་བའི་དངོས་པོ་གང་དང་གང་བསྒྲུབ་ཀྱང༔ སྟོང་ཕྲག་འབུམ་དང་དུང་ཕྱུར་ཐེར་འབུམ་སོགས༔ འགྱུར་ཁྱད་ཆེ་བས་སྔོན་ལས་འཕྲལ་རྐྱེན་བྱང༔ མི་དགེ་བཅུ་དང་མཚམས་མེད་ཉེ་བ་ལྔ༔ ལྕི་བཞི་ལོག་བརྒྱད་སོ་བྱང་སྔགས་གསུམ་གྱི༔ བཅས་པའི་ལྟུང་བ་ཁ་ན་མ་ཐོ་བའི༔ ལས་སྒྲིབ་བག་ཆགས་མ་ལུས་བྱང་ཞིང་འདག༔ ཕྱི་མར་མངོན་དགའ་བདེ་ཆེན་ཞིང་ཁམས་བསྒྲོད༔ དྲང་དོན་ཡིན་ཕྱིར་སེམས་བསྐྱེད་འཕགས་པ་ཚོས༔ དགེ་བའི་ཕན་ཡོན་ཁྲིགས་སུ་བཅད་པ་མེད༔ ལྷ་དང་བླ་མས་ཞལ་གཟིགས་ལུང་ཡང་བསྟན༔ རང་བྱུང་དབྱིངས་ཀྱི་མཁའ་འགྲོས་བརྡ་རིས་སྤྲད༔ ལས་འཕྲོ་ལྡན་པའི་སྐུ་གཉེར་གྱིས་བསྐུལ་ངོར༔ སྐུ་གསུམ་དགོངས་པའི་ཀློང་གི་རྒྱ་བཀྲོལ་ནས༔ ཡི་གེའི་འདུ་བྱེད་རི་མོའི་ལམ་དུ་དྲངས༔ གནས་བདག་སྒོ་སྲུང་རྫས་རྟགས་མཎྜལ་དང༔ སྒྲུབ་ཆུ་ལ་སོགས་རྣམ་ཐར་མང་བཀྲ་ཡང༔ མདོར་བསྡུས་ཙམ་དུ་མ་སྤྲོས་ཤེས་ལྡན་ལགས༔ གནས་འདི་སྲུང་བའི་མ་གཟའ་དམ་གསུམ་དང༔ ཕྱི་ནང་སྒོ་སྲུང་བཞག་བྲ་ལྷ་རྩེ་སོགས༔ བཀའ་འདི་འཚོས་ཤིག་སྤེལ་ཞིག་ས་མ་ཡཱ༔ འདིར་སྨྲས་པ༔ ང་འདྲའི་ཟོག་པོས་ས་སྟེང་གང་མོད་ཀྱང༔ གཏེར་མིན་གཏེར་འདྲའི་པོད་ཁ་དུ་ཡོད་ཀྱང༔ ལས་ཀ་དུ་མས་འགྲོ་བ་བསླུ་མོད་ཀྱང༔ ཤེས་མིན་ཤེས་པའི་ལུང་བསྟན་སྟོན་མོད་ཀྱང༔ ད་ལྟའི་གནས་བསྟོད་དུང་དཀར་སྒྲ་དབྱངས་འདི༔ འགྲོ་བ་བསླུ་བའི་ལོག་པའི་ཆོས་མིན་ཏེ༔ ཐར་བའི་ལམ་སྟོན་དགེ་བའི་བཤེས་གཉེན་ཡིན༔ ལོ་རྒྱུས་དོན་གྱིས་ཕན་ཡོན་མ་བཤད་ན༔ མི་ཤེས་རྨོངས་པའི་སྐྱེ་བོ་ཕལ་མོ་ཆེ༔ གསང་ཆེན་ངེས་པའི་བཀའ་ལའང་སྐྱོན་དུ་རྟོག༔ དེ་ཕྱིར་འདི་ནི་དད་པའི་འཇུག་ངོགས་ཡིན༔ འཇིག་རྟེན་ཆོས་བརྒྱད་སྣང་བས་བསླུས་པ་མིན༔ རྣམ་དག་ལྷག་བསམ་སྟོབས་ཀྱིས་བསྒྲུབ་པ་ལགས༔ དགེ་འདིས་ནམ་མཁའ་མཉམ་པའི་ལུས་ཅན་ཀུན༔ སྡུག་བསྔལ་འཁོར་བའི་གྲོང་ཁྱེར་ཞིག་ནས་ཀྱང༔ ཕྱི་མ་ཨོ་རྒྱན་མཁའ་སྤྱོད་བདེ་ཆེན་ཞིང༔ ཚོམ་བུ་གཅིག་པར་བདག་གིས་གྲུབ་བརྙེས་ཤོག༔ དེ་མ་ཐོབ་པའི་ཚེ་རབས་ཐམས་ཅད་དུ༔ ཡུལ་ཁམས་བདེ་ཞིང་ནད་མུག་མཚོན་གསུམ་ཞི༔ ལོ་ལེགས་དཔལ་འཕེལ་འབྲུ་དང་ཆོས་རྣམས་འཕེལ༔ རྫོགས་ལྡན་བསྐལ་པ་གསར་དུ་ཚེས་པར་སྨོན༔ རྣམ་དཀར་མཐུ་ཡིས་མདོ་སྔགས་བསྟན་པ་དར༔ བསྟན་འཛིན་རྣམས་ཀྱིས་བཞེད་པའི་དོན་ཀུན་འགྲུབ༔ ཕན་བདེ་ཀུན་ཏུ་དགའ་བའི་དགའ་ཚལ་གྱིས༔ སྐལ་བཟང་བསྟན་པའི་ཁྱོན་ཀུན་འགེངས་བར་ཤོག༔ དང་པོ་བཀྲ་ཤིས་མཆོག་གསུམ་བསྟན་པ་དར༔ བར་དུ་བཀྲ་ཤིས་སྐྱེ་རྒུའི་ཕུན་ཚོགས་འགྲུབ༔ ཐ་མ་བཀྲ་ཤིས་སྟོན་འཁོར་དགོངས་པ་མཉམ༔ ཐོག་མཐའ་བར་གསུམ་དགེ་བའི་བཀྲ་ཤིས་ཤོག༔ ཅེས་མི་ཉག་བཱ་ལྷ་སྒང་གི་གནས་བསྟོད་དུང་དཀར་སྐྱེ་བ་ལྔ་བའི་རང་སྒྲ་དད་པའི་འཁྲི་ཤིང་འོད་ཀྱི་ཟླ་ཞུན་འདི་རྩ་གསུམ་ལྷ་དང་གནས་སྲུང་བཞག་བྲ་ལྷ་རྩེ་སོགས་ཀྱིས་ལུང་བསྟན་པ་བཞིན་དབྱིངས་ཡུམ་ཌཱཀྐི་མས་བརྡ་རིས་སྤྲད་ནས་སེམས་ལ་གབ་རྒྱ་བྱས་ཀྱང་སྔོན་སྦྱངས་ལས་འཕྲོ་བཟང་པོའི་བག་ཆགས་ཆོས་ལ་སད་པའི་བཅོམ་ལྡན་ཤཱཀྱའི་སྲས་པོ་དགེ་སློང་དགེ་བའི་བཤེས་གཉེན་མཁན་མཁྱེན་རབ་འོད་ཟེར་དང༔ སྔོན་སྦྱངས་དགེ་བའི་མྱུ་གུ་དུས་སུ་འཁྲུངས་པའི་ཐེག་ཆེན་ལམ་གྱི་གང་ཟག་ས་སྐྱ་པ་སྐུ་གཉེར་ནམ་མཁའ་བསྟན་འཛིན༔ ཆོས་ཁྲིམས་རིན་ཆེན་མཚན་ཅན་དང་གཉེར་བ་སོགས་ཀྱིས་འདི་འདྲ་ཞིག་འབྲི་དགོས་ཞེས་ནན་ཏན་ཆེན་པོས་གསོལ་རས་འགའ་གནང་ནས་བསྐུལ་བ་ལ་བརྟེན་ནས་བཀའ་གསུང་མི་ལྡོག་ཙམ་དུ་མདོར་བསྡུས་ཏེ་མཆོང་མཛོད་སྨུག་པོའི་སྒྲོམ་ནས་བཏོན་ཏེ་མཁའ་འགྲོ་ཡེ་ཤེས་མཚོ་རྒྱལ་གྱི་ཕྲིན་ལས་ཀྱི་ཟློས་གར༔ ཨ་ཙར་ས་ལེ་འོད་ཀྱི་ཐུགས་སྤྲུལཿ འགྲོ་མགོན་ཆོས་ཀྱི་རྒྱལ་པོ་རིག་འཛིན་ལུང་རིག་གླིང་པའི་ཆོས་བདག་སྤྲུལ་པའི་སྐུའི་མཚན་གྱིས་བསྔགས་པའི་ཐུབ་བསྟན་གཞན་ཕན་ཉི་མ་དཔལ་བཟང་པོས་མེ་བྱའི་སྟོན་ཟླ་འབྲིང་པོའི་ཉེར་ལྔའི་ཐུན་ལ་ལེགས་པར་ཕབ་པ་དུས་གསུམ་ཏུ་དགེ་ཞིང་བཀྲ་ཤིས་པར་གྱུར་ཅིག་གུ༔ སརྦ་མངྒ་ལམ༔ དགེའོ༔ དགེའོ༔ དགེའོ༔