སྦ་རོང་བྲག་དཀར་གནས་བསྟོད་ཐར་པའི་ལམ་སྟོན།
བྲག་དཀར་གནས་བསྟོད་ཐར་པའི་ལམ་སྟོན་ཞེས་བྱ་བ་བཞུགས༔ ཨོཾ་སྭ་སྟི༔ ཕུན་ཚོགས་བདེ་ལེགས་བྱེ་བའི་ཆུ་གཏེར་ལས༔ རབ་དཀར་མཚན་དཔེའི་ལང་ཚོའི་ཟླ་གཞོན་སྐུ༔ མི་ཤིགས་རྡོ་རྗེའི་རང་བཞིན་ཚེ་མཐའ་ཡས༔ སྐུ་གསུམ་རིགས་འདུས་པདྨ་ཀཱ་ར་རྒྱལ༔ དཀྱིལ་འཁོར་གཙོ་བོ་རིགས་ཀུན་ཁྱབ་བདག་རྗེ༔ ཧེ་རུ་ཀ་དཔལ་རྡོ་རྗེ་འཆང་དབང་དངོས༔ འགྲོ་འདུལ་རིག་འཛིན་ལུང་རིག་གླིང་པ་རྩལ༔ བདེ་ཆེན་འཁོར་ལོའི་རྒྱན་བཞུགས་ཤིས་པ་སྩོལ༔ ཀྱཻ་ཀྱཻ༔ གླིང་གི་གླིང་མཆོག་ལྷོ་རྒྱལ་འཛམ་བུ་གླིང༔ འཛམ་གླིང་ལྟེ་བ་རྒྱ་གར་རྡོ་རྗེ་གདན༔ དེ་ཡི་བྱང་ཕྱོགས་ཁ་བ་ཅན་གྱི་རིའི༔ ཤར་ཕྱོགས་རོང་ཆེན་བཞི་ཞེས་གྲགས་པའི་ཆར༔ དགེ་བསྙེན་ཉེར་གཅིག་སྦས་ཡུལ་རེ་རེའི་བདག༔ ཁྱད་པར་སྦས་ཡུལ་དགའ་བ་ལྗོངས་ཀྱི་ཡ༔ སྦས་ཡུལ་བྲག་དཀར་རིགས་འདུས་ཐུགས་ཀྱི་གནས༔ དབུས་ཕྱོགས་རི་བོ་གཤིན་རྗེ་འཇིགས་བྱེད་དང༔ དམ་ཅན་ཆོས་རྒྱལ་སྤོ་བོ་གླིང་གི་མགོ༔ མདུན་རི་གཡས་པ་བདེ་མཆོག་འཁོར་ལོ་དང༔ རྡོ་རྗེ་མཁའ་འགྲོའི་གཙུག་ཏོར་དབྱིངས་ལ་སྙེག༔ མདུན་རི་གཡོན་པ་གསང་བ་འདུས་པའི་སྡེ༔ གནོད་སྦྱིན་དཀོར་བདག་བང་མཛོད་བསྲུང་བའི་ཚུལ༔ རིག་འཛིན་གྲུབ་པའི་ཁྱུ་ཚོགས་བཞུགས་པའི་གནས༔ ཕུག་པ་བྱིན་ལྡན་ངོས་སུ་སྐུ་ཡིག་དང༔ ཕྱག་མཚན་གྲུབ་རྟགས་མང་པོ་དུ་མ་ཡོད༔ གཞན་ཡང་མདུན་གདོང་དཔལ་རིའི་གསང་ཕུག་གནས༔ རྫ་རིའི་རྩེ་རུ་གཤེན་ལྷ་འོད་དཀར་ལ༔ ཚེ་དབང་རིག་འཛིན་པདྨ་འབྱུང་གནས་དང༔ ཡེ་གཤེན་ལྷ་དྲུག་བོན་སྐྱོང་ལྷ་གསས་བསྐོར༔ དྲན་པ་ཡབ་སྲས་ཚེ་ཆུ་འཕེལ་འགྲིབ་མེད༔ ཨོ་རྒྱན་སྨན་བླའི་བདུད་རྩིའི་ཆུ་མིག་དྲོ༔ རླངས་པའི་ངད་ཕོག་ནད་གདོན་རྐྱེན་ལས་གྲོལ༔ དེ་མིན་ཕྱོགས་མཚམས་བརྒྱད་དུ་གྲུབ་ཆུ་བརྒྱད༔ རིག་འཛིན་ཞིག་པོ་བླ་མའི་སྒྲུབ་ཕུག་གསུམ༔ རིགས་གསུམ་མགོན་པོ་གནས་བསྟན་བཅུ་དྲུག་དང༔ མཁའ་འགྲོ་སིང་ཧ་མ་གདོང་འབར་མ་སྲིང༔ རྗེ་བཙུན་སྒྲོལ་མ་དཀར་ལྗང་བྲག་རི་ལ༔ རང་སྲོག་ཏཾ་གྱི་འོག་ཏུ་རང་གཏེར་སྦས༔ ཁྱད་པར་བྲག་རི་ཁྱུང་ཆེན་ལྡིང་བ་ན༔ པད་འབྱུང་སྐུ་འདྲ་རང་བསྲེལ་སྨན་སྒྲུབ་ཡོད༔ རྟེན་འབྲེལ་གནད་ལྡན་མ་ངེས་འགྲོ་བ་འདུལ༔ བསམ་གཏན་ཡེ་ཤེས་མཛོད་འཛིན་ཞིག་གིས་འདོན༔ ཆུ་བོ་རྒྱུན་ལྡན་འགྲམ་དུ་རང་བྱུང་བཀྲ༔ སྐུ་ཡིག་ཕྱག་མཚན་རྫས་རྟགས་རིན་ཆེན་བདུན༔ ཕྱག་ཞབས་གྲུབ་པའི་རྟགས་མང་ཡ་མཚན་ཅན༔ རྩེ་སྐོར་བར་སྐོར་མཐའ་སྐོར་ཡང་མཐའ་སྐོར༔ སྐོར་ལམ་བཞི་ལ་ཕན་ཡོན་རིམ་པ་བཞིན༔ ལན་ཅིག་བསྐོར་ལ་ཟག་བཅས་ལམ་གྱིས་ནི༔ ས་ཡ་དུང་བདུན་དུང་ཕྱུར་བཅུ་གསུམ་དང༔ དུང་ཕྱུར་བཅུ་ཕྲག་ལྔ་སོགས་ཕན་ཡོན་འབྱུང༔ འཕྱེ་བོས་རྣམ་གནོན་ཟླ་དྲུག་ཚེས་བཞིའི་དུས༔ ཆོས་གསུང་རྫོགས་པའི་དུས་མཚམས་དེ་ཡི་བར༔ སྐུ་གསུམ་སྐུ་ལྔའི་ཞིང་གི་རྒྱལ་སྲས་བཅས༔ དཔའ་བོ་མཁའ་འགྲོའི་ཚོགས་དཔུང་འདི་རུ་འདུས༔ མཁའ་སྤྱོད་ས་སྤྱོད་རྒྱ་བོད་གནས་རྣམས་ཀུན༔ བྲག་དཀར་འདི་ལ་འུབ་ཀྱིས་འདུས་པ་ཡིན༔ འཇིག་རྟེན་དབང་ཕྱུག་ཡུལ་ལྷའི་ཚུལ་སྤྲུལ་པ༔ རྡོ་རྗེ་དབྱི་ཁྲོམ་གནས་བདག་རྒྱལ་པོ་མཛད༔ མི་མིན་ནག་ཕྱོགས་བསྐྲད་ཅིང་དཀར་ཕྱོགས་འདུས༔ རྩ་གསུམ་སྲུང་མའི་བྱིན་རླབས་དྲི་བསུང་འཐུལ༔ རྣལ་འབྱོར་བསྒོམ་པའི་རིག་པ་མྱུར་བོགས་ཐོན༔ མཆོད་སྦྱིན་དགེ་སྦྱོར་གང་བྱས་ཚོགས་གཉིས་གསོག༔ གནས་འབྲེལ་སྐོར་ཕྱག་ཐང་ཚད་བདེ་ལ་སྦྱོར༔ ནད་མཚོན་མུ་གེའི་འཇིགས་པ་ཕྱིར་ལ་བཟློག༔ བདེ་སྐྱིད་དཔལ་གྱིས་འཚོ་བའི་རྟེན་འབྲེལ་ཤར༔ ལྷ་དང་སྲུང་མས་ཉམས་སྣང་བརྡ་གླུ་བཀྲོལ༔ རིགས་ཀུན་ཁྱབ་བདག་བླ་མས་བྱིན་རླབས་གནང༔ དཀར་ཕྱོགས་ཡུལ་ལྷས་བདེན་པའི་ཤིས་པ་བརྗོད༔ འགྲོ་དྲུག་བློ་སྣ་ཆོས་ལ་འགྱུར་བར་ཤོག༔ ས་མ་ཡཱ༔ གུ་ཧྱ་བདྷ་ཐིམ༔ ཨེ་མ་ཧོ༔ སྐུ་གསུམ་བླ་མ་ཡི་དམ་མཁའ་འགྲོ་དང༔ ཆོས་སྐྱོང་སྲུང་མ་དཀར་ཕྱོགས་སྐྱོང་རྣམས་ཀྱིས༔ ལེགས་པའི་ལྟས་བཟང་ཆོས་ཀྱི་སྣང་བ་བཅས༔ འདིར་ཚོགས་སློབ་བུ་རྣམས་ཀྱིས་བསྐུལ་བའི་ངོར༔ རང་བྱུང་ཡེ་ཤེས་མཁའ་འགྲོའི་བརྡ་གླུ་ལས༔ གནས་བསྟོད་ཚིག་རིས་ཡི་གེའི་འདུ་བྱེད་དགེས༔ མཁའ་མཉམ་ཡིད་ཅན་འགྲོ་བ་མ་ལུས་ཀུན༔ འཁོར་མཚོ་ལས་སྒྲོལ་རྣམ་མཁྱེན་ཐོབ་ཕྱིར་བསྔོ༔ དེ་མཐུས་རྒྱལ་བསྟན་ཡར་ཟླའི་མཆེད་པོ་བཞིན༔ དགེ་འདུན་སྡེ་གཉིས་པད་མཚོའི་ངང་ཁྱུ་ལྟར༔ རིས་མེད་འཕེལ་ཞིང་རྒྱས་པའི་རྟེན་འབྲེལ་སྨོན༔ ཡུལ་ཕྱོགས་ཐ་གྲུའི་ཁྱོན་འདིར་དགེ་གྱུར་ཅིག༔ བསླུ་བ་མེད་པའི་དཀོན་མཆོག་རིན་པོ་ཆེ༔ བདེན་ཚིག་གྲུབ་པའི་དྲང་སྲོང་རིག་འཛིན་ཚོགས༔ རྩ་གསུམ་སྲུང་མ་ཡུལ་ལྷ་གཞི་བདག་གིས༔ ཐོག་མཐའ་བར་གསུམ་བཀྲ་ཤིས་བདེ་ལེགས་ཤོག༔ ཅེས་པའི་གནས་ཡིག་མདོར་བསྡུས་ཐར་བའི་ལམ་སྟོན་ཞེས་བྱ་བ་འདི་སྔོན་སྦྱངས་ལས་ཀྱིས་འབྲེལ་བའི་བྱ་བཏང་རིན་པོ་ཆེ་མངྒའི་མཚན་ཅན་དང༔ ལྷ་གྲོགས་སྙིང་ནས་བརྩེ་བ་ཤེས་རབ་སྒེག་པའི་ལང་ཚོའི་རྣམ་པར་འཕྲུལ་བ་ཚེ་བརྟན་ཕུན་ཚོགས་དང༔ དད་གསུམ་བརྟན་པོའི་མཛོད་འཛིན་རང་སློབ་འགས་བསྐུལ་ངོར་མི་ལྡོག་ཙམ་དུ་ལྷ་དང་སྲུང་མས་གནང་བ་ཐོབ་ཅིང་གནས་འདིར་བྱིན་དབབ་པའི་རྟགས་མཚན་འཇའ་སྤྲིན་འཁྲིགས་པ་ལྔ་ལྡན་ཚོན་གྱི་དབང་གཞུ་ཟླུམ་འཁྱིལ་མིག་མང་རིས་སུ་བཀྲ་བ། གནས་མདུན་བྲག་ལ་སྙེ་མ་འབྲུ་ལྡན་ལྔ་འཁྲུངས་པ་འགྲོ་ཀུན་མིག་གི་དབང་པོར་མངོན་སུམ་དུ་གྱུར་ཅིང༔ ཉམས་སྣང་ངོ་མཚར་ཅན་མང་པོ་བྱུང་བའི་རྟེན་འབྲེལ་གྱི་རྐྱེན་ལས་བརྡ་ཐོགས་མེད་དུ་ཐུན་མཚམས་མར་མེའི་འོད་ལ་སྤྲུལ་སྐུ་གཞན་ཕན་བཟང་པོས་ས་ག་ཟླ་བའི་ཚེས་ལ་བྲིས་དགེ་ཞིང་བཀྲ་ཤིས་པར་གྱུར་ཅིག༔ མངྒ་ལཾ༔