འབོ་གངས་དཀར་གནས་བསྟོད་རྡོ་རྗེ་གླུ་མའི་རྒྱུད་མང་།
ཡང་གསང་མཁའ་འགྲོའི་སྙིང་ཐིག་ལས༔ གངས་དཀར་གནས་བསྟོད་རྡོ་རྗེ་གླུ་མའི་རྒྱུད་མངས་ཞེས་བྱ་བ་བཞུགས༔ ཨོཾ་སྭ་སྟི༔ གང་གི་རང་བཞིན་ཟབ་ཅིང་སྤྲོས་བྲལ་འདུས་མ་བྱས་པ་ཆོས་ཀྱི་སྐུ༔ རྒྱུ་རྐྱེན་མཚན་མའི་རང་མཚང་ལས་འདས་ངེས་པ་ལྔ་ལྡན་ལོངས་སྤྱོད་རྫོགས༔ ཐུགས་རྗེའི་འཇུག་པ་འགྲོ་བའི་ཁམས་མཐུན་བཟོ་སྐྱེ་མཆོག་གི་སྤྲུལ་བའི་སྐུ༔ སྐུ་གསུམ་དབྱེར་མེད་པདྨ་རྒྱལ་པོས་ཚེ་རབས་ཀུན་ཏུ་ཤིས་པ་སྩོལ༔ འགྲོ་བའི་མགོན་པོ་ཨོ་རྒྱན་ཆེན་པོ་དེའི༔ ཐུགས་བསྐྱེད་སྨོན་ལམ་འཛད་མེད་ཟླ་བའི་ཟེར༔ སྙིགས་དུས་ལྔ་བདོའི་མུན་སེལ་གྲུབ་བརྒྱའི་གཙོ༔ བྱང་ཆུབ་རྡོ་རྗེའི་ཞབས་པད་སྤྱི་བོས་ལེན༔ གང་གི་བཀའ་དྲིན་བདུད་རྩི་བཏུང་བ་ཡིས༔ མཁྱེན་པའི་ལང་ཚོ་བརྩེ་བའི་གཟི་བྱིན་འབར༔ ནུས་མཐུ་རྩེ་བརྒྱས་ལོག་རྟོག་ལྷ་མིན་དཔུང༔ འཇོམས་མཛད་གཏེར་ཆེན་ལུང་རིག་གླིང་པ་རྒྱལ༔ གང་དེར་རྔ་ཡབ་སྤྲུལ་པའི་ཕོ་བྲང་ནས༔ རཀྴ་སྲིན་པོའི་ཁ་གནོན་ཐོད་ཕྲེང་རྩལ༔ རྣམ་འགྱུར་སྤྲུལ་པ་འཕུར་འགྲོའི་ལུང་བྱང་གིས༔ གནས་འདིར་བྱིན་འབེབས་ལོ་རྒྱུས་ངོ་མཚར་བྱུང༔ སྔོན་དུས་ཆོས་རྒྱལ་ཚངས་པའི་མེ་ཏོག་གིས༔ ཐུགས་བསྐྱེད་ཁྱུང་སྐྱེས་ཤིང་རྟས་ཉེར་བསྐུལ་ཚེ༔ མཁའ་འགྲོའི་དབང་ཕྱུག་མཚོ་སྐྱེས་འོད་སྟོང་དལ༔ གངས་ཅན་མཁའ་རུ་མཛེས་པའི་དགའ་སྟོན་ཐོབ༔ བོད་ཡུལ་མཁས་གྲུབ་པདྨའི་སྐྱེད་ཚལ་དང༔ བློ་གསལ་མགྲིན་རྔ་འཁྲོལ་བའི་ངང་པའི་ཁྱུ༔ རྫོགས་ལྡན་མགྲོན་དུ་བོས་པའི་སྐལ་བཟང་གིས༔ གླིང་བཞིའི་དཔལ་ཀུན་ཕྱོགས་འདིར་འོང་བ་བཞིན༔ མདོ་སྨད་རོང་ཆེན་བཞི་ཞེས་ཡོངས་སུ་གྲགས༔ ས་ཡི་ལྟེ་བ་གངས་དཀར་འཆི་མེད་ཚལ༔ ཆོས་རྗེ་བཻ་རོ་བཀའ་བརྒྱུད་སྒྲུབ་པའི་ལྗོངས༔ སྲིད་ཞིའི་ལེགས་ཚོགས་འདོད་པ་འཇོ་བའི་གནས༔ ཤར་རིའི་ཕྲག་ཏུ་ཟླ་གཞོན་མཛེས་པ་བཞིན༔ དུང་མདོག་སྤྲིན་གོས་ཞི་བའི་ལས་འགྲུབ་ཕྱིར༔ ནད་གདོན་ཉེར་འཚེའི་བར་ཆད་ཆུང་བའི་གནས༔ རྡོ་རྗེ་སེམས་དཔས་བྱིན་གྱིས་བརླབ་པའི་རི༔ རྡོ་རྗེ་བློ་གྲོས་དབང་བསྒྱུར་གཉེར་ཁ་བགྱིས༔ གངས་དཀར་ཌཱཀྐི་རྡོ་རྗེ་གཡུ་སྒྲོན་མས༔ ལེགས་ཉེས་སྟངས་འཛིན་བཀའ་ཡི་བྱ་ར་བྱེད༔ གནས་མཆོག་ཡ་མཚན་བཀོད་པའི་ཕོ་བྲང་གི༔ རྩེ་མོར་ཆོས་སྐུ་ལོངས་སྐུ་སྤྲུལ་པའི་སྐུ༔ སྐུ་གསུམ་རྩ་རྒྱུད་བླ་མ་སྤྲིན་ལྟར་འཁྲིགས༔ བར་ན་འཇིགས་བྱེད་རྟ་མགྲིན་གསང་བའི་བདག༔ སྒྲུབ་སྡེ་བརྒྱད་ཀྱི་ལྷ་ཚོགས་བཀྲ་དཔུང་ངེ༔ འོག་ཏུ་ཕག་མོ་ཏཱ་རེ་མ་རེ་ཙྱཻ༔ མ་ཚོགས་མཁའ་འགྲོ་འབུམ་སྡེ་འོད་ཐིབས་སེ༔ མཐའ་སྐོར་འཇིག་རྟེན་འདས་དང་མ་འདས་པའི༔ ཆོས་སྐྱོང་སྡེ་བརྒྱད་ལས་བྱེད་ཤ་ར་ར༔ ས་འོག་ཀླུ་ཆེན་སངས་རྒྱས་བཀའ་ཉན་བརྒྱད༔ གཞན་ཡང་ས་བདག་ཀླུ་གཉན་སྐར་ལྟར་བཀྲ༔ རྒྱལ་ཆེན་སྡེ་བཞིས་ཕྱོགས་ཀྱི་སྒོ་སྲུང་མཛད༔ འཕགས་པའི་གནས་བསྟན་ཆེན་པོ་ཡན་ལག་འབྱུང༔ གནས་དེར་བཞུགས་པའི་སྦས་ཡུལ་ཁྱད་དུ་འཕགས༔ གཡུ་ཡི་མཚོ་ལ་འོད་ལྔའི་ཇོ་དར་བཀྲ༔ ཝ་ར་ཧི་ཡི་ངོས་ལ་སྐལ་བཟང་གི༔ སངས་རྒྱས་སྟོང་རྩ་གཉིས་ཀྱི་སྣང་བརྙན་ཡོད༔ ཕག་མོའི་སྐུ་ཡིག་ཕྱག་མཚན་འབུར་དུ་དོད༔ བདེ་གཤེགས་བརྒྱད་དང་སེམས་དཔའ་བཅུ་དྲུག་ཡོད༔ གྲུབ་དབང་རྣམས་ཀྱི་གྲུབ་རྟགས་མཚན་མ་བཀྲ༔ དད་མེད་ལོག་རྟོག་ཅན་ཚོའི་སྤྱོད་ཡུལ་མིན༔ ཕྱོགས་མཚམས་བརྒྱད་དུ་བྱ་རིགས་གཅན་གཟན་དང༔ མི་མིན་འབྱུང་པོ་འདུ་བའི་དུར་ཁྲོད་ཡོད༔ རི་བོ་བརྒྱད་ལ་དགྲ་བཅོམ་རེ་རེ་བཞུགས༔ དེ་ལ་ཉེ་གནས་ཉན་ཐོས་གྲངས་མེད་བཞུགས༔ མཚོ་གནས་རེ་ལ་སེམས་དཔའ་རེ་རེ་བཞུགས༔ སེམས་དཔའ་སུམ་ཁྲི་དྲུག་སྟོང་དུ་མས་བསྐོར༔ མདུན་གཡས་གནས་མཆོག་གཡུ་ལོ་བཀོད་པའི་ཞིང༔ དབུས་ཀྱི་རི་བོར་འཕགས་མའི་སྣང་བརྙན་དངོས༔ ལོངས་སྤྱོད་རྫོགས་སྐུའི་རྒྱན་ཆ་ཡོངས་སུ་ཚང༔ རི་བོ་ཏ་ལ་གཡུ་ལོ་བཀོད་པ་དང༔ སེང་ལྡིང་ནགས་ཀྱི་ཕྱི་ནང་ཡོན་ཏན་རྫོགས༔ མཁའ་སྤྱོད་ས་སྤྱོད་པདྨོ་བཀོད་དང་མཚུངས༔ སྒྲོལ་མ་ཉེར་གཅིག་བྲག་ལ་རང་བྱོན་ཡོད༔ མ་ཅིག་མཁའ་འགྲོ་གཅོད་ཡུལ་བརྒྱུད་པ་ཡོད༔ མ་སར་བྱ་ཡི་སྒོ་ང་རང་བྱུང་ཡོད༔ ཀ་མད་སུམ་ཅུ་རེ་འུ་ཆད་པ་དང༔ དབྱངས་ཡིག་བཅུ་དྲུག་གསལ་བྱེད་ཡིག་འབྲུ་རྣམས༔ ས་རྡོ་རི་བྲག་ཀུན་ལ་འབུར་དུ་དོད༔ གྲུབ་ཐོབ་བརྒྱད་ཅུ་རྗེ་འབངས་ཉི་ཤུ་ལྔ༔ བཻ་རོ་གཡུ་སྒྲ་ལྷ་ལུང་དཔལ་རྡོ་རྗེ༔ ཀརྨ་པ་སོགས་སྐྱེས་མཆོག་མང་ཞིག་གི༔ རྫུ་འཕྲུལ་གྲུབ་རྟགས་ཕྱག་ཞབས་སྐུ་རྗེས་དང༔ སྒྲུབ་པའི་ཕུག་པ་བྱིན་རླབས་བདུད་རྩིའི་ཆུ༔ གནས་དེར་ཡ་མཚན་རྨད་བྱུང་དྲི་བསུང་འཐུལ༔ དུས་རྒྱུན་འཇའ་ཟེར་ཐིག་ལེ་འོད་ཁྱིམ་འཁྲིགས༔ གིང་ཕོ་གིང་མོ་ལས་བྱེད་ཁྱུགས་སེ་ཁྱུགས༔ ལྕགས་གླང་གདོང་ནས་སྟག་གི་འཛུམ་དྲུག་བར༔ གནས་འདིར་མཁའ་སྤྱོད་འོད་ལྔའི་ཕོ་བྲང་ནས༔ རིགས་ལྔའི་སངས་རྒྱས་རྒྱལ་བ་རྒྱ་མཚོའི་ཚོགས༔ མ་ལུས་པ་རྣམས་གནས་འདིར་བྱིན་ཕབ་ནས༔ རིགས་ལྔའི་ཞིང་དང་དབྱེར་མེད་ཨ་ལ་ལ༔ སྐུ་གསུམ་རིགས་འདུས་མ་ཧཱ་གུ་རུ་དང༔ རྒྱ་བོད་མཁས་གྲུབ་རྒྱ་མཚོ་འདི་རུ་འདུས༔ བྱིན་རླབས་ཡེ་ཤེས་དྲི་བསུང་ཐུ་ལེ་བ༔ ས་སྤྱོད་གནས་ཡུལ་དཔའ་བོ་མཁའ་འགྲོ་དང༔ དམ་ཅན་ཆོས་སྐྱོང་གནས་མཆོག་འདི་ལ་བྱོན༔ བྱིན་ཆེན་དབབ་པའི་རྟགས་ཀྱིས་ཡ་མཚན་ངོམ༔ གནས་ཆེན་སྟོང་རྩ་གནས་ཕྲན་དུ་མ་ཡིས༔ སྐུ་གསུང་ཐུགས་ཀྱི་བྱིན་རླབས་གནས་འདིར་བབས༔ སྐོར་བ་གཅིག་བྱས་མ་ཎི་དུང་ཕྱུར་བརྒྱ༔ ཕྱག་གཅིག་འཚལ་བས་བསྐལ་མང་སྒྲིབ་པ་འདག༔ མར་མེ་ཕུལ་བས་མ་རིག་མུན་པ་སེལ༔ ཚོགས་གཏོར་བཏང་བས་ཚོགས་གཉིས་བང་མཛོད་ཐོབ༔ མ་ཎི་ཇོ་དར་གང་བྱས་ཁྲི་འབུམ་འགྱུར༔ བསྐྱེད་རིམ་ཏིང་འཛིན་ཟླ་སྐྱེད་ཞག་སྐྱེད་ཐོན༔ གཞན་དུ་ལོ་བདུན་འདི་རུ་ཞག་བདུན་མཉམ༔ གངས་ཆེན་བཞི་ཡི་མཆོག་གྱུར་གནས་འདི་ཡིན༔ མིག་གིས་མཐོང་ཚད་བྱང་ཆུབ་ལམ་ལ་ཚུད༔ བསླུ་མེད་རྡོ་རྗེའི་དམ་རྒྱ་སྙིང་ལ་གནས༔ ཐེ་ཚོམ་ལོག་ལྟ་མ་བྱེད་འདིར་འཚོགས་ཀྱིས༔ མཐའ་སྐོར་གཅིག་བྱས་ཐུབ་དབང་བཞུགས་གནས་བརྒྱད༔ པདྨའི་སྒྲུབ་གནས་བརྒྱ་རྩ་བསྐོར་དང་མཚུངས༔ འཕགས་པའི་གནས་བསྟན་དགྲ་བཅོམ་དུ་མ་ཡིས༔ ལམ་སྟོན་གནས་སྤར་ས་མཁན་མཛད་པར་ངེས༔ ཐེ་ཚོམ་མེད་ན་ཚེ་འདིར་གྲོལ་བར་ཐོབ༔ ལོག་པར་བལྟས་ཚེ་ཐར་པའི་སྲོག་རྩ་འཆད༔ དེ་ཕྱིར་དད་གསུམ་བརྟན་པོས་ཕྱག་སྐོར་རེམ༔ བསླུ་བར་མི་འགྱུར་མཁའ་འགྲོའི་ཞལ་ལུང་ཡིན༔ བྱིན་རླབས་འབྱུང་བའི་དུས་ལ་བབས་པ་ཡིན༔ བར་ཆད་བཟློག་གོ་སྙིགས་མའི་རྐྱེན་སེལ་ཡིན༔ ཡིད་གཉིས་མི་དགོས་པདྨའི་ཐ་ཚིག་ཡིན༔ སྒྲ་འཛིན་དབང་པོ་ཡོད་ཚད་དང་དུ་ལོངས༔ གསེར་རིའི་ངོས་སུ་ཉི་གཞོན་འཁྱུད་པ་བཞིན༔ པདྨ་སེར་པོས་རི་ཐང་བརྒྱན་པའི་གནས༔ ཚེ་བསོད་རྒྱས་ཤིང་རིགས་རྒྱུད་འཕེལ་བའི་ལྗོངས༔ རིན་ཆེན་འབྱུང་གནས་ནོར་ལྷས་བསྲུང་བའི་ཡུལ༔ བྱི་རུའི་ལྗོན་ཤིང་ལོ་འདབ་རྒྱས་པ་བཞིན༔ བྲག་གི་བ་གམ་ཚོམ་བུ་བརྡལ་བའི་ཚལ༔ སྣང་སྲིད་ལྷ་མི་དབང་དུ་འདུ་བའི་ཚལ༔ སྣང་བ་མཐའ་ཡས་ཐུགས་བསྐྱེད་འགྲུབ་པའི་ལྗོངས༔ གཡུ་ཡི་པ་ཏྲ་ཕྱོགས་སུ་བཀྲམ་པ་བཞིན༔ སྔོ་ལྗང་ཆུ་བོས་གླུ་གར་བརྩེ་བའི་གནས༔ མངོན་སྤྱོད་ལས་ཀྱིས་ལོག་འདྲེན་གཞོམ་མོ་ཞེས༔ དོན་གྲུབ་དཔའ་བོས་དབུགས་དབྱུང་མཛད་པའི་ལྗོངས༔ གླིང་བཞིའི་དབུས་སུ་ལྷུན་པོ་མཐོ་བ་བཞིན༔ ཕྱོགས་ཀྱི་རི་བོ་གཞན་ལས་མངོན་པར་འཕགས༔ ལྷུན་པོའི་མཐའ་རུ་རི་ཕྲན་འདུད་པ་བཞིན༔ མཐའ་བསྐོར་རི་གཞན་གུས་པས་འདུད་པའི་ཚུལ༔ ཤར་རིའི་ཕྲག་ནས་ཉི་ཟླའི་སྒྲོན་མེ་ཡི༔ རབ་འབྱམས་རྒྱལ་བའི་སྤྱན་གཟིགས་མཛད་པ་དང༔ དེར་བརྟེན་གྲུབ་པའི་དབང་པོས་འགྲོ་བློའི་མུན༔ ཅིག་ཆར་འཇོམས་པའི་རྟེན་འབྲེལ་འགྲིགས་པའི་གནས༔ དུས་ངན་སྙིགས་མའི་འགྲོ་ལ་སྡུག་བསྔལ་ཆེ༔ སྡུག་བསྔལ་རྒྱུ་ནི་རང་གིས་མི་དགེས་བསྒྲུབ༔ མི་དགེའི་རྩ་བ་བདག་ཏུ་འཛིན་ལས་བྱུང༔ བདག་ཏུ་བཟུང་བས་ཆགས་སྡང་རྨོངས་གསུམ་འཁྲུགས༔ ཆགས་པའི་དབང་གིས་གཞན་ནོར་རྐུ་ཞིང་འཕྲོག༔ བཙུན་པའི་སྡེ་རྣམས་ལོག་གཡེམ་ཚངས་སྤྱོད་ཉམས༔ ཞེ་སྡང་དབང་གིས་འཁྲུག་རྩོད་གཞན་སྲོག་གཅོད༔ མནར་སེམས་ལྡན་པས་སྲུང་མ་དྲག་པོར་བསྐུལ༔ གཏི་མུག་སྟོབས་ཀྱིས་དམ་པ་གཞན་རྣམས་ཀྱི༔ སྐྱོན་ནས་བརྗོད་ཅིང་རང་ཉིད་བཟང་པོར་བརྩི༔ བླང་དོར་གནས་ལ་བལྟ་བའི་འདྲེན་བྱེད་ལོང༔ དེ་ཡི་རྐྱེན་གྱིས་ལྷ་འདྲེ་མི་གསུམ་འཁྲུགས༔ གཞན་ནོར་འཕྲོག་པས་ཡུལ་ཁམས་མུ་གེ་འབྱུང༔ ལོ་ཉེས་སད་སེར་ཕྱུགས་གོད་མི་འདོད་འབྱུང༔ མི་ཡི་མདོག་ཉམས་སྣོད་ཀྱི་ཕྱྭ་གཡང་རྒུད༔ མི་མིན་བསེ་རག་རྒབ་འདྲེས་ལུང་པ་གང༔ དེ་དག་ཕན་ཐབས་རིམ་གྲོ་འདི་དག་དགོས༔ གནས་ཀྱི་མཆོག་གྱུར་བྱིན་ཆེན་གངས་དཀར་མདུན༔ ཁྲིམས་ལྡན་བཙུན་པ་རྣམས་ཀྱི་གསོ་སྦྱོང་དང༔ སྔགས་པའི་སྡེ་རྣམས་དམ་སྐོང་ཚོགས་བསྐང་དང༔ གསང་སྔགས་ཡི་གེ་བརྒྱ་པ་གྲངས་སུ་སྐྱོལ༔ གནས་འདིར་ཆུ་སྦྱིན་ཀླུ་གཏོར་འབུམ་དང་ཁྲི༔ ཞི་ཁྲོ་དང་འབྲེལ་གནས་འདྲེན་ཟས་བསྔོ་སོགས༔ སྡིག་དང་མ་འདྲེས་རྣམ་དཀར་ཡང་དག་སྒྲུབ༔ ཁྱད་པར་སྙིགས་མའི་སྐྱབས་གཅིག་ཨོ་རྒྱན་རྗེའི༔ བསྙེན་སྒྲུབ་གཞུང་བསྲང་སིདྡྷི་བསམ་ལྷུན་དང༔ རྣམ་ཐར་རྒྱས་བསྡུས་ཚིག་བདུན་གསོལ་འདེབས་ནི༔ བྱེ་བ་ལ་སོགས་སྨྲ་བཅད་དག་པར་བཟླ༔ ཐེ་ཚོམ་མེད་ན་རྐྱེན་ངན་བར་ཆད་སེལ༔ ཚེ་ཐར་སྲོག་བསླུ་རི་རྒྱ་རྔོན་རྒྱ་སྡོམས༔ ཅི་ལྟར་ནུས་པ་དེ་བཞིན་ཕན་པར་ངེས༔ ས་མ་ཡཱ༔ ཨོཾ་སྭ་སྟི༔ མཛེས་མཛེས་རི་རབ་ལྷུན་པོའི་ཕྲག་པ་རུ༔ མཛེས་མཛེས་རྒྱུ་སྐར་རྒྱལ་པོ་བཀྲ་བ་ལྟར༔ མཛེས་མཛེས་མདོ་སྨད་ས་ཡི་ཐིག་ལེ་ཆེ༔ མཛེས་མཛེས་གནས་ཀྱི་མཆོག་གྱུར་འདི་ཉིད་མཛེས༔ ཀུན་ནས་མཉམ་བརྡལ་སྟོང་གསུམ་ཁྱོན་ཡངས་པོར༔ ཀུན་ཏུ་རྨད་བྱུང་གནས་ཆེན་སོ་གཉིས་དང༔ ཀུན་བཟང་རོལ་བའི་ཡུལ་མཆོག་ཉེར་བཞི་ལས༔ ཀུན་དགའི་གནས་འདི་ཛ་ལན་ངྷ་རར་ངེས༔ རྔ་ཡབ་གླིང་གི་རཀྴའི་རྗེ་བོ་རུ༔ རྒྱལ་ཀུན་སྤྱི་གཟུགས་པད་འབྱུང་སྒྱུ་འཕྲུལ་ལས༔ རྩུབ་རོང་མི་སྲུན་དྲེགས་པའི་གཙུག་ཏོར་རྩེར༔ ཟབ་གསང་བསྟན་འཛིན་གྲུབ་པའི་གནས་འདི་རྒྱལ༔ ལྔ་ལྡན་འོག་མིན་ས་ལ་འཕོས་འདྲའི་གནས༔ ལྔ་རིག་མཁས་གྲུབ་ཡོངས་ཀྱིས་བསྔགས་པའི་ཡུལ༔ ལྔ་བདོའི་རྒུད་པ་འཇོམས་པའི་ཡིད་བཞིན་གཏེར༔ ལྔ་བརྒྱའི་གཙུག་རྒྱན་དམ་པའི་བསྟི་གནས་མཚར༔ རབ་བརྟན་དུང་མདོག་གངས་རི་ལྷུན་མཐོ་ཞིང༔ རབ་མཛེས་ལྗོན་པའི་ཟློས་གར་བསྒྱུར་བ་ལས༔ རབ་མང་རི་སྐྱེས་བུ་མོས་རྩེན་པའི་གནས༔ རབ་ཏུ་དབེན་པའི་ཡོན་ཏན་ཕ་མཐའ་ཡས༔ ལྷ་དང་དྲང་སྲོང་འཆི་མེད་རིག་འཛིན་ཚོགས༔ བདེན་ཚིག་བསྔགས་པའི་མེ་ཏོག་འཐོར་བ་དང༔ ཆབས་ཅིག་པདྨ་རྒྱལ་ཚབ་རྒྱུན་འབྱོན་པའི༔ གནས་འདི་དཔལ་གྱི་རི་བཞིན་བསྔགས་པར་འོས༔ ལེགས་བཤད་སྨྲ་བའི་མཁས་མང་འདུ་འོ་ཞེས༔ ཆགས་མེད་འདབ་ཆགས་སྙན་པའི་གླུ་ལེན་ཅིང༔ ཉམས་མྱོང་དྲོད་ཐོན་གྲུབ་བརྒྱའི་ཕོ་བྲང་ཞེས༔ བག་ཡངས་རི་དྭགས་དགའ་བས་འདུ་འམ་སྙམ༔ འདིར་གནས་བསྐྱེད་རྫོགས་མཐར་ཕྱིན་རིག་འཛིན་གཙོ༔ གཞན་སྣང་ཟིལ་གྱིས་གནོན་པའི་རྟེན་འབྲེལ་ཀྱིས༔ ཅི་བསྒོས་ལས་བྱེད་མི་དང་མི་མ་ཡིན༔ རྗེས་སུ་ཡི་རང་ཐལ་མོ་སྦྱར་ལ་ཕྱོགས༔ གནས་བསྟོད་བསྐུལ་བའི་སྒྲ་ཚིག་སྐྱེ་ལྔའི་དུང༔ འབུད་པའི་མཁན་པོ་ནོར་དཔོན་ཐབས་ལ་མཁས༔ ཀརྨའི་གསེར་ཕྲེང་འཛིན་པའི་དྷརྨ་ཤྲྀ༔ ཆོས་དབང་མཁྱེན་རབ་རྒྱ་མཚོས་བསྐུལ་འདི་ལགས༔ ཞེས་པའང་སྤྲུལ་སྐུ་གཞན་ཕན་བཟང་པོས་སྦྱར་བ་དུས་གསུམ་དགེ་བར་གྱུར་ཅིག༔