གནས་ལུང་དཔལ་གྱི་རི་བོའི་དཀར་ཆག་དབྱིངས་ཀྱི་ཌཱཀྐིའི་ཞལ་ལུང་འཁྲུལ་མེད།
གནས་ལུང་དཔལ་གྱི་རི་བོའི་དཀར་ཆག་དབྱིངས་ཀྱི་ཌཱཀྐིའི་ཞལ་ལུང་འཁྲུལ་མེད་ཅེས་བྱ་བ་བཞུགས་སོ༔ རྒྱལ་ཀུན་སྤྱི་གཟུགས་པད་སྡོང་ལས་འཁྲུངས་ཤིང༔ བཀྲ་ཤིས་ཡོན་ཏན་དུ་མས་རབ་མཛེས་སྐུ༔ རྡོ་རྗེ་ཐོད་ཕྲེང་རྩལ་དང་དབྱེར་མེད་པའི༔ མཚུངས་མེད་བླ་མ་ལུང་རིག་མཚན་ཅན་མཁྱེན༔ རང་བྱུང་རང་རྩལ་སྒྱུ་འཕྲུལ་སྣང་བའི་གར༔ ལྷུན་གྲུབ་རང་བཞིན་མཁའ་སྤྱོད་ས་སྤྱོད་ཀྱི༔ དཔའ་བོ་མཁའ་འགྲོ་སྣང་བའི་བརྡ་རུ་ངོམ༔ ཁྱད་པར་ཧི་མ་ལ་ཡི་གྲོང་ཁྱེར་གྱི༔ ཡོན་ཏན་བསམ་ཡས་མངའ་བདག་ཏཱ་རེའི་གནས༔ གསང་གསུམ་གར་གྱི་རྣམ་རོལ་དཔལ་གྱི་རིའི༔ མདོ་བྱང་ཡང་བྱང་དུས་ཀྱི་མངོན་རྟགས་སོགས༔ དུ་མ་སྣང་ཡང་ལུང་བསྟན་མདོར་བསྡུས་འབྲི༔ བདག་འདྲ་མཁན་ཆེན་པདྨ་རྒྱལ་པོ་ནི༔ སུམ་སྟོང་ཉེར་བརྒྱད་འཕགས་ཡུལ་པཎ་གྲུབ་བསྟེན༔ གྲུབ་པའི་རྟགས་ཀྱིས་གཞན་སྣང་ཟིལ་གྱིས་མནན༔ བརྒྱ་དང་བཅུ་གཅིག་གངས་ཅན་དབུས་སུ་བཞུགས༔ ས་རྡོ་རི་བྲག་གངས་མཚོ་གཏེར་གྱིས་གཏམས༔ ལྷ་སྲིན་དྲེགས་ཚོགས་གཏེར་གནས་སྲུང་མར་བསྐོས༔ རྔ་ཡབ་སྲིན་ཡུལ་སྐྱེ་འགྲོ་བདེ་ལ་བཀོད༔ སྐྱེ་འཆིའི་འཇིགས་བྲལ་ཟག་མེད་རྡོ་རྗེའི་སྐུ༔ སྐུ་ཚབ་ལུང་བསྟན་གསུང་ཚབ་གཏེར་དུ་སྦས༔ ཐུགས་ཀྱི་དགོངས་པ་སྐལ་ལྡན་བུ་ལ་གཏད༔ རྒྱལ་ཁམས་སྤྱི་དང་ཁྱད་པར་གངས་ལྗོངས་འདི༔ རིགས་གསུམ་མགོན་པོ་དང་ནི་པད་འབྱུང་གི༔ གདུལ་ཞིང་ཆེད་དུ་བསྔགས་པ་ཡིན་ནོ་ཞེས༔ མདོ་སྔགས་རྒྱུད་ལུང་གཏན་ཚིགས་འཕྱུགས་མེད་གྲུབ༔ ཁྱད་པར་དུས་སྙིགས་སུམ་ཅུ་ཁ་རལ་དུས༔ མི་རྣམས་ཉོན་མོངས་འཇོལ་ཉོག་སྤྱོད་པའི་ཚེ༔ འདོད་ཆགས་ལས་གྱུར་མུ་གེས་བཀྲེན་པ་དང༔ ཞེ་སྡང་ལས་གྱུར་ཕྱོགས་ཀུན་འཁྲུགས་རྩོད་དར༔ གཏི་མུག་ལས་གྱུར་ནད་རིམས་གདོན་རྒོད་དང༔ དུག་གསུམ་ལས་གྱུར་སྡུག་བསྔལ་སྣ་ཚོགས་འབྱུང༔ དེ་དུས་སེམས་ཅན་བདེ་བའི་གོ་སྐབས་དབེན༔ རྒྱ་བོད་ཆས་བསྒྱུར་འགྲོ་ལ་གཡོ་རྒྱུ་སྤྱོད༔ མཆོད་འོས་བསླུ་ཞིང་ཁྲིམས་བདག་དམངས་སུ་འབེབས༔ གྲུབ་ཐོབ་ཉུང་ཞིང་ཟོག་པོས་མི་མགོ་བསྐོར༔ ཁྲིམས་ལྡན་ཉུང་ཞིང་ཚུལ་འཆལ་བྱ་ཁྱུ་འཚོགས༔ དམ་སྲི་མོར་བརྫུས་སྒྱུ་མའི་རྩེད་འཇོ་ངོམ༔ མི་ཕྱུགས་སྲོག་ལ་འབྱུང་པོས་ཚ་རེག་གཏོང༔ ལྟོ་འཕྱེ་གདུག་པའི་མཇུག་མས་སྤྱན་མ་བསྐུལ༔ མདོ་ཡི་ཆོས་གྲྭ་ཡུལ་ལྗོངས་ཞིག་རལ་འགྱུར༔ ཀླུ་ཡི་ལག་པས་སྡེ་བཞིའི་མལ་ནས་འཛུད༔ ཡུལ་གྱི་དཔོན་ཁ་རེ་ལ་དག་མི་སྟེར༔ མི་རྣམས་རྒྱུད་ལ་ལོག་པའི་ཆུ་བོ་ཁོལ༔ སྡུག་བསྔལ་རྦ་ཀློང་འཁྲུགས་པ་ཡ་རེ་ང༔ དེ་དུས་འཇིགས་སྐྱོབ་པད་འབྱུང་བྱིན་རླབས་ལས༔ གྲུབ་པའི་གཏེར་སྟོན་གྲངས་ལས་འདས་པ་འབྱུང༔ ཡུལ་གྲུ་རེ་བཞིན་གྲུབ་པའི་སྐྱེས་བུ་རེ༔ ལུང་པ་རེ་བཞིན་སྒྲུབ་པའི་གཏེར་གནས་རེ༔ རི་བོ་ཕལ་ཆེར་མཁའ་སྤྱོད་ཕོ་བྲང་དུ༔ བྱིན་དབབ་བྱིན་རླབས་འགྲོ་བའི་ཁམས་བཞིན་འབྱུང༔ སློབ་དཔོན་པད་འབྱུང་ཐུགས་རྗེ་དུས་མི་གཡེལ༔ ཁྱད་པར་ཡོངས་སུ་གྲགས་པའི་གནས་ཆེན་ནི༔ ལུང་ལྔ་ལྗོངས་གསུམ་རྫོང་ཆེན་བཅོ་བརྒྱད་དང༔ རི་ཆེན་བཞི་དང་མཚོ་ཆེན་རྣམ་པ་བཞི༔ གནས་ཆེན་བརྒྱ་རྩ་སྦས་གནས་སྟོང་ཕྲག་ཡོད༔ དེ་ཡི་ནང་ཚན་རོང་ཆེན་བཞི་ཡི་ཆར༔ གཏོགས་པའི་ཡུལ་ལྷ་དགེ་བསྙེན་ཉེར་གཅིག་ལ༔ གཏད་པའི་སྦས་གནས་རོག་མོ་ལྗོངས་ཀྱི་ཤར༔ སྦས་ཡུལ་དགའ་བ་ལྗོངས་ཀྱི་གཡས་ཕྱོགས་སུ༔ པདྨ་བཀོད་ཆེན་གཉིས་པ་ཏཱ་རེ་ཡི༔ གནས་ཆེན་གཡུ་བྲག་རྩེ་ཡི་ཕྱོགས་མཚམས་བརྒྱད༔ གནས་ཆེན་བརྒྱད་ནི་བློན་གྱི་ཚུལ་དུ་བཞུགས༔ ཁྱད་པར་ཀླུ་དབང་ཕྱོགས་ན་དཔལ་གྱི་རི༔ གནས་ལུང་ཞེས་བྱ་ཚན་དྷོ་ཧ་དང་ཉེ༔ མཁས་གྲུབ་མང་པོས་ཞབས་བཅགས་མེ་ཏོག་འཐོར༔ ཆོས་དང་ནོར་སོགས་ཟབ་གཏེར་དུ་མས་གཏམས༔ རང་རང་ཡུལ་དང་འཚམས་པར་བྱིན་རླབས་བྱས༔ མ་འོངས་འདོན་པའི་གང་ཟག་ལུང་དུ་བསྟན༔ ལྷ་སྔགས་སྐུ་དང་ཕྱག་རྒྱ་ཕྱག་ཞབས་རྗེས༔ མི་འགྱུར་རྡོ་ཡི་རི་མོར་བཀོད་ནས་བཞག༔ གྲུབ་པའི་སྐྱེས་བུ་དུས་སུ་བྱོན་པ་ནི༔ འོ་བྲན་སྤྲུལ་པ་མཐུ་སྟོབས་རྡོ་རྗེ་ཡིས༔ མཁའ་འགྲོའི་ལུང་བསྟན་ཇི་བཞིན་གནས་སྒོ་ཕྱེས༔ སེམས་ཅན་རྒུད་པ་སེལ་བའི་རྟེན་ཏུ་བཞག༔ ཕན་ཡོན་རང་བྱུང་ལེགས་ཚོགས་ཡི་གེར་བཀོད༔ གནས་འདུས་ལ་སོགས་དུས་རྟགས་གསལ་གསུངས་བཞིན༔ ཁོ་བོ་ཨ་ཙར་སྤྲུལ་པའི་ཉམས་སྣང་ལ༔ མེ་ཕོ་སྤྲེལ་ལོ་སྤྲེལ་ཟླ་ནས་བཟུང་སྟེ༔ མཁའ་ལྡིང་རྒྱལ་པོས་གཤོག་རྩལ་མ་བརྐྱངས་བར༔ རིགས་ལྔའི་སངས་རྒྱས་བྱང་སེམས་དང༔ ཡུལ་ཆེན་ཉེར་བཞི་གནས་སོ་གཉིས༔ དེ་བཞུགས་དཔའ་བོ་མཁའ་འགྲོ་དང༔ གནས་སྲུང་དམ་ཚིག་ལྡན་པ་ཀུན༔ དཔལ་གྱི་རི་བོ་འདི་རུ་འཚོགས༔ ཧི་མ་ལ་དང་ཁྱད་པར་མེད༔ རི་བྲག་རྩི་ཤིང་ཆུ་ཀླུང་སོགས༔ དཀྱིལ་འཁོར་ཆེན་པོར་འབྱམས་སུ་ཀླས༔ ཕྱག་སྐོར་རྟེན་བཞེངས་འབྲེལ་ཐོགས་ཀུན༔ གནས་སྐབས་བདེ་བའི་ཉམས་འོག་ཚུད༔ ཕྱི་མར་དག་པའི་ཞིང་ཁམས་བགྲོད༔ གཞན་དུ་མ་ཎི་སྐྱབས་འགྲོ་དང༔ སིདྡྷི་ཆོས་སྤྱོད་དགེ་བ་སྟོང༔ རྒྱ་ཆེན་བསགས་ལས་གནས་འདི་རུ༔ ཆུང་ངུའི་དགེ་བསགས་འབུམ་འགྱུར་འཕེལ༔ གནམ་ལོར་གནས་འདིར་ནང་སྐོར་གཅིག༔ བྱས་ན་ཡིག་དྲུག་དུང་བདུན་ཐོབ༔ བསྐལ་པ་མང་པོའི་སྡིག་སྒྲིབ་འདག༔ བསོད་ནམས་ཡོན་ཏན་ཤུགས་ལས་འབྱུང༔ མི་དགེའི་མཚན་མ་ངང་གིས་ཞི༔ ཕྱི་སྐོར་གཅིག་བྱས་ཕན་ཡོན་ནི༔ མ་ཎི་དུང་ཕྱུར་བཅུ་གསུམ་མཉམ༔ ཕྱི་མར་ས་ཡི་དབང་ཕྱུག་འཐོབ༔ གནས་འདིར་རྟ་ཕག་ཟུང་འཇུག་དངོས༔ སྲུང་མ་བྲག་བཙན་འབར་བ་ལགས༔ འདི་རུ་ཚོགས་བསགས་སྒྲིབ་སྦྱོང་འབུངས༔ དམག་འཁྲུགས་མུ་གེ་ཉེར་འཚེ་ཞི༔ ནག་ཕྱོགས་ཕམ་ཞིང་དཀར་ཕྱོགས་རྒྱལ༔ ཚེ་བསོད་ལུང་རྟོགས་དཔལ་འབྱོར་རྒྱས༔ ལོ་ལེགས་འབྲུ་འཕེལ་བདེ་སྐྱིད་འབྱུང༔ མི་མཐུན་རྐྱེན་ངན་བར་ཆད་ཞི༔ མཐུན་རྐྱེན་ལྷ་དང་སྲུང་མས་སྒྲུབ༔ བསམ་རྒུ་འགྲུབ་པའི་རྟེན་འབྲེལ་ཡོད༔ དགེ་འདིས་འགྲོ་དོན་སངས་རྒྱས་ནས༔ སྐུ་བཞི་འགྲུབ་པའི་བཀྲ་ཤིས་ཤོག༔ ས་མ་ཡཱ༔ སྐུ་གསུང་ཐུགས་ཀྱི་རྒྱ༔ ཞེས་གནས་ལུང་དཔལ་གྱི་རི་བོའི་གནས་ཡིག་དཀར་ཆག་འདི་ཉིང་འཁྲུལ་སྣང་བའི་རྩལ་དུ་མཁའ་འགྲོ་བདེ་བའི་དཔལ་སྟེར་ཡིན་ཟེར་བའི་བུད་མེད་དམར་གསལ་སྒེག་ཉམས་ལྡན་པ་ཞིག་གིས་རྒྱལ་ཟླའི་ཚེས་བཅོ་བརྒྱད་ལ་ཤོག་སེར་སོར་གསུམ་པ་ཞིག་གཏད་པ་ཡི་གེར་ཞལ་བཤུས་ཏེ་སྐལ་ལྡན་གྱི་བུ་མཚོ་རྒྱལ་དང༔ ལུང་རྟོགས་བསྟན་འཛིན༔ བཤད་སྒྲུབ༔ རིག་གྲོལ་སོགས་ལ་གྲུབ་རྒྱའི་སྤྱི་མེས་ཁྲག་འཐུང་རྡོ་རྗེ་གྲོ་ལོད་དང༔ འགྲོ་འདུལ་ལུང་རིག་གླིང་པ་རིགས་ཀྱི་བདག་པོར་ཐོབ་པའི་སྤྲུལ་མིང་གཞན་ཕན་བཟང་པོས་བསྩལ་བ་འགྲོ་བ་ཡོངས་ལ་ཕན་ཐོགས་ཤིང་སྒོ་གསུམ་བསྐུལ་ནུས་པའི་རྒྱུར་གྱུར་ཅིག༔ སརྦ་མངྒ་ལཾ༔