ཏཱ་རེའི་གནས་ཡིག་གཟུ་བོའི་ལམ་སྟོན་རྣམ་གྲོལ་ལེགས་པའི་ཡོན་ཏན།
ཡང་གསང་མཁའ་འགྲོའི་བརྡ་རིས་ལས༔ ཏཱ་རེའི་གནས་ཡིག་གཟུ་བོའི་ལམ་སྟོན་རྣམ་གྲོལ་ལེགས་པའི་ཡོན་ཏན་ཞེས་བྱ་བ་བི་ཛ་ཧ་རཾ༔ རྒྱལ་དང་རྒྱལ་བའི་སྤྱི་གཟུགས་བླ་ན་མཐོ༔ གངས་ཅན་ཐུབ་པའི་ཞལ་སྐྱིན་བླ་ན་མེད༔ སྣང་མཐའི་ཐུགས་སྤྲུལ་བླ་མ་མཚོ་སྐྱེས་རྗེ༔ དྲིན་ཆེན་བླ་མའི་ངོ་བོར་སྤྱི་བོས་བསྙེན༔ འགྲོ་ལ་འདོད་དགུའི་རེ་བ་ཡིད་བཞིན་སྐོང༔ ཕན་དང་བདེ་བའི་དབང་ཕྱུག་དམ་པའི་མགོན༔ ཐུགས་རྗེའི་རེ་ལྟོས་རིག་འཛིན་ཡོངས་འདུས་དཔལ༔ བདུད་འཇོམས་རྡོ་རྗེ་ལུང་རིག་གླིང་པ་རྒྱལ༔ སྔོན་སྨོན་ལས་འཕྲོའི་འདབ་བརྒྱ་བཞད་པ་ལས༔ བག་ཆགས་བཟང་པོའི་མྱུ་གུ་འཁྲུངས་པའི་ཚེ༔ མཐོང་སྣང་ཀུན་རྫོབ་བདེན་པ་གྲུབ་པའི་ཆོས༔ ས་སྤྱོད་བདེ་ལྡན་ཞིང་དུ་སྣང་བ་ལས༔ ལྷ་དང་བླ་མའི་ལུང་གིས་དཔང་པོ་མཛད༔ འགྲོ་དོན་བསྟན་པ་ཡར་ཟླ་ལེགས་འཕེལ་བའི༔ གནས་ཀྱི་བར་སྐོར་དང་འབྲེལ་འདི་བཞིན་བརྗོད༔ བཀའ་བརྒྱད་རི་ལ་རང་རྟགས་ཕྱག་མཚན་དང༔ སྐུ་ཡིག་སྒྲུབ་ཕུག་ལ་སོགས་ལྟས་བཟང་མཐོང༔ དུང་གི་རི་ལ་བཻ་རོའི་ཞབས་རྗེས་དང༔ འབྲུ་གསུམ་རང་བྱོན་སྡེ་དཔོན་ཕུག་པ་རུ༔ མ་གཟའ་དམ་གསུམ་སྲོག་ཡིག་འབུར་དུ་དོད༔ སྐུ་ཡིག་ཕྱག་མཚན་མ་ངེས་དུ་མ་གསལ༔ འཕགས་པའི་རི་ལ་གནས་བསྟན་བཅུ་དྲུག་དང༔ རྣམ་བཅུ་དབང་ལྡན་མཆོད་རྟེན་སྒྲུབ་པའི་ཕུག༔ བྱིན་རླབས་དྲི་བསུང་འཐུལ་བའི་ཡ་མཚན་ཅན༔ ལེགས་བཞུགས་ཐུབ་དྲུག་རི་ལ་སྤྲུལ་སྐུ་དྲུག༔ ཕྱག་ཞབས་རྗེས་དང་མཁར་སིལ་ལྷུང་བཟེད་དང༔ པུསྟི་མཚོན་ཆ་ཕུབ་དང་པི་ཝཾ་དང༔ སྒྲོམ་བུ་ལ་སོགས་རྣམ་གྲངས་དཔག་མེད་མངོན༔ སྒོ་སྲུང་རི་ལ་ལས་བཞིའི་ལྷ་མོ་རྣམས༔ གནས་པའི་རྟགས་ལ་ལས་བཞིའི་ཕྱག་མཚན་བཀྲ༔ གནས་སྲུང་ཀླུ་རྒྱལ་མི་མགོན་དཀར་པོ་ནི༔ ཆུ་མིག་རྩེ་གསུམ་དག་ལ་བརྟེན་ནས་གདའ༔ འབྲུག་དང་ཆུ་གནས་འགུལ་བ་ལྟར་དུ་ཡོད༔ གནས་སྲུང་སྒོ་བ་སྟག་གཡག་ཁ་སྤྲོད་དང༔ རྒྱལ་རིགས་ཀླུ་མཆོག་བསོད་ནམས་སྐྱེད་ལ་དབང༔ དུང་དཀར་ལ་སོགས་རྫས་བརྒྱད་རྟགས་བརྒྱད་དང༔ རྒྱལ་སྲིད་སྣ་བདུན་ཕྱོགས་མཚམས་དག་ན་ཡོད༔ ལས་སྐལ་ལྡན་པ་རྣམས་ཀྱིས་སྤྱོད་པར་འགྱུར༔ དྲག་པོའི་རི་ལ་རྩ་གསུམ་འབུར་དུ་དོད༔ རྗེ་འབངས་འགའ་ཡི་ཕྱག་ཞབས་རྗེས་དང་ནི༔ གྲུབ་པའི་རྟགས་མཚན་སྒྲུབ་ཆུ་ལ་སོགས་མངོན༔ རྣམ་སྣང་ལོ་ཙཱས་བསྟན་པའི་དམ་སྲི་མོ༔ བཏུལ་བའི་མགོ་སྙིང་ནང་རོལ་བམ་གྱི་ཁོག༔ རྒྱལ་པོའི་རི་ལ་རྒྱལ་འགོང་དྲེགས་པ་གནས༔ སྐྱེ་གནས་བར་དོ་མ་ཡིག་རིས་སུ་བཀྲ༔ བསམ་གཏན་ལྷ་ཡུལ་བགྲོད་པ་ལྷ་ཡི་ལམ༔ ལྷ་ལུང་དཔལ་གྱི་རྡོ་རྗེའི་གྲུབ་པའི་རྟགས༔ འཆོལ་བའི་མཚན་མ་འབུར་དུ་དོད་པ་ཡོད༔ རྗེ་བཙུན་སྐུ་དང་ཉམས་མགུར་གསུངས་པའི་ཕུག༔ གྲུབ་ཆེན་ཐང་རྒྱལ་སྒྲུབ་ཕུག་ཕྱག་ཞབས་རྗེས༔ བཱི་མའི་ཕུག་པར་པོ་ཏི་རང་བྱོན་བཞུགས༔ ཚེ་ཆུ་བྱིན་ཅན་ཚེ་མཐར་ཕྱིན་ཐབས་ཡོད༔ ཆོས་ཉིད་བར་དོར་བགྲོད་པ་དོན་ལྡན་གྱི༔ ལོགས་ལ་ཉི་མ་སྦས་པས་ཉི་ཟེར་ཆིབས༔ པད་འབྱུང་བཞུགས་ཁྲི་རེག་པ་རང་གྲོལ་དང༔ ཟབ་གཏེར་སྒྲོམ་བུ་བདུན་གྱི་ཟབ་དོན་བཞུགས༔ གསེར་ཉའི་རི་ལ་ཧཱུྃ་ཆེན་ཞབས་རྗེས་དང༔ ཟབ་མོའི་སྒྲོམ་བུ་ཐིག་ལེའི་དབྱིབས་ཅན་ཞིག༔ ཡེ་ཤེས་ཌཱཀྐིའི་བརྡ་ཡིས་བཏབ་པ་ནི༔ དྲེལ་ཞོན་ལྷ་མོས་བསྲུང་བ་རྨད་དུ་བྱུང༔ ཟབ་གཏེར་གནས་དང་རང་བྱོན་འགའ་སྣང་ཡང༔ རྟེན་འབྲེལ་འཕྲོ་ཅན་ཕྱིར་ན་དེ་ཙམ་མོ༔ ས་མ་ཡཱ༔ འདིར་སྨྲས་གནས་བསྟོད་ལྷག་བསམ་དག་པས་བསྐྲུན༔ འདིར་འདུས་མི་དང་མི་མིན་ཡིད་ཅན་ཀུན༔ འདི་འབྲས་སྔོན་སྨོན་བདེན་པའི་མཐུ་བྱིན་གྱིས༔ འདི་འོག་གཡུ་ལོ་བཀོད་དུ་གྲོལ་བར་ཤོག༔ རྣམ་དག་ལྷ་ལམ་ཡངས་པའི་ཐ་གྲུ་ཡི༔ ཁྱོན་ལ་གནས་པའི་མཆོག་གསུམ་སངས་རྒྱས་བསྟན༔ དར་ཞིང་རྒྱས་ལ་བསྟན་པའི་སྦྱིན་བདག་ནི༔ ནད་མེད་ཚེ་འཕེལ་བདེ་སྐྱིད་དཔལ་གྱིས་མཐོ༔ ཐོག་མཐའ་བར་གསུམ་དགེ་བའི་བཀྲ་ཤིས་ཤོག༔ ཅེས་བར་སྐོར་དང་འབྲེལ་བའི་གནས་ཀྱི་དཀར་ཆག་འདི༔ གསང་ཆེན་བསྟན་པའི་མངའ་བདག་དབང་ཆེན་སྔགས་བདག་གླིང་པ་དང༔ སྔོན་སྨོན་ལས་འབྲེལ་བཟང་པོས་མཚམས་སྦྱར་བའི་བཙུན་པ་ལུང་རྟོགས་བསྟན་འཛིན་དང༔ དམ་པའི་རིགས་ཀྱི་ལང་ཚོའི་དཔལ་ཡོན་རྒྱས་པའི་སྐྱེས་ཐོབ་རིག་འཛིན་ཨརྠ་སིདྡྷི་སོགས་ཀྱིས་ལྷ་རྫས་དྲི་མེད་དཀར་པོའི་སྐྱེས་དང་བཅས་ཏེ་བསྐུལ་བ་ལ་བརྟེན་ནས་སྔོན་སྦྱང་ལས་འཕྲོ་བཟང་པོའི་བག་ཆགས་སད་པའི་ཧོར་བན་ས་ར་ཧི་ཏས་ཡང་གསང་མཁའ་འགྲོའི་བརྡ་ཐོགས་མེད་དུ་ཕབ་པ་དུས་གསུམ་ཀུན་ཏུ་དགེ་བར་གྱུར་ཅིག༔