ཏཱ་རེ་གཉེར་གཏད།
༄༅། རྣམ་འདྲེན་ཕན་བདེའི་མངའ་བདག་ཟས་གཙང་སྲས། །རྣམ་དག་པད་སྡོང་རྩེར་བྱོན་མཚོ་སྐྱེས་རྗེ། །རྣམ་དཀར་བཀའ་ཡི་སྡུད་པོ་མཁར་ཆེན་བཟའ། །རྣམ་གསུམ་དབྱེར་མེད་བླ་མ་སྤྱི་བོས་མཆོད། །ཆོས་སྐུའི་ཞིང་མཆོག་འོག་མིན་སྟུག་པོ་བཀོད། །ལོངས་སྐུའི་ཞིང་ཁམས་ངེས་པ་ལྔ་ལྡན་གནས། །སྤྲུལ་སྐུའི་གདུལ་ཞིང་མི་མཇེད་འཇིག་རྟེན་གླིང་། །སྐུ་གསུམ་རྒྱལ་བའི་བཞུགས་གནས་སྤྱི་བོས་མཆོད། །བསྟན་སྲུང་གཙོ་མཆོག་ཕོ་རྒྱུད་མགོན་པོ་དང་། །གསང་སྔགས་སྲུང་མ་མོ་རྒྱུད་རེ་མ་ཏི། །ཡང་གསང་བཀའ་སྲུང་དམ་ཅན་གཟའ་བཙན་ཀླུ། །པད་འབྱུང་ཐ་ཚིག་སྲུང་མཁས་སྤྱི་བོས་མཆོད། །དེ་ལ་འདིར་བསྐལ་བཟང་སངས་རྒྱས་སྟོང་གི་གདུལ་ཞིང་འཛམ་གླིང་དག་པའི་གནས་ཡུལ་ཤར་རྒྱལ་མོ་རོང་གི་ཉེ་ཆར། ཨོ་རྒྱན་རྡོ་རྗེ་གྲོ་ལོད་ཀྱིས་བྱིན་གྱིས་བརླབས་པའི་ས་ཆུ་བར་ཏཱ་རེ་ཞེས་ཡུལ་གཞི་དང་གནས་ཀྱི་ཅོད་པཎ་དུ་འོས་པའི་གམ། ཨོ་རྒྱན་སངས་རྒྱས་གཉིས་པའི་རྒྱལ་ཚབ། མ་ཚོགས་མཁའ་འགྲོ་རྒྱ་མཚོ་དང་དངོས་སུ་ཞལ་མཇལ་གསུང་གིས་དབུགས་དབྱུང་ཐོབ་པའི་གཏེར་སྟོན་ལུང་རིག་མྱུ་གུ་རྩལ་གྱི་ཕྱག་གིས་མེ་ཏོག་འཐོར། ཞབས་ཀྱི་པདྨོས་བཅགས་པའི་བསམ་གཏན་ཁང་བུ་འདི་ལ་བསམ་ངན་སྦྱོར་རྩུབ་ཀྱིས་ཕྱིའི་རྩིག་པ་འདྲ་བཤིགས། ནང་གི་སྒོ་སྐར་ཁུང་གོ་ལེབ་ལ་གནོད་འཚེ་དང་། ཁྱད་པར་རོང་འབྲོག་སུས་དགོན་འདི་ནས་སྡིག་ཁྱིམ་བྱས་ནས་ཉེས་མེད་ཀྱི་སེམས་ཅན་ཆེ་ཕྲ་གང་ལའང་གནོད་འཚེའི་ཤ་ཁྱི་དང་མེ་མདའ་འགུག་སྙི་བྱེད་པ་སོགས་ཀྱི་གནས་བཅའ་བ་རྣམས་ལ། སྤྱིར་གསང་སྔགས་བསྟན་པའི་གཉེར་འཛིན་ཕོ་རྒྱུད་ཡོངས་ཀྱི་ཆེ་བཙན་དཔལ་མགོན་མ་ནིང་ནག་པོ། མོ་རྒྱུད་ཡོངས་ཀྱི་གཙོ་མོ་སྔགས་སྲུང་ཁྲོས་མའི་རྒྱལ་མོ། གཉིས་མེད་སྤྲུལ་པའི་ཆོས་སྐྱོང་དམ་ཅན་མགར་བ་ནག་པོ། དྲང་སྲོང་ཁྱབ་འཇུག་ཆེན་པོ་སོགས། བྱེ་བྲག་ཏུ་སློབ་དཔོན་ཡབ་སྲས་བརྒྱུད་པའི་སྲུང་མ་རྣམས་དང་། སྒོས་ཡུལ་ཕྱོགས་འདིའི་གཞི་བདག་ཕུད་གཏོར་བསང་གསུར་ལ་གདུང་བ་དྲག་རྩལ་སྟོབས་དང་ལྡན་པ་སོགས་ཀྱིས་ལེགས་ཉེས་ཀྱི་སྟངས་འཛིན། དམ་ཚིག་གི་རྗེས་གཅོད་མཛོད་ལ། དམ་ཉམས་གནོད་སྡིག་བྱེད་པའི་མིང་དང་རུས་མ་ནོར། ལོ་དང་ཟླ་བར་མ་འགྱང་། ཞག་དང་དུས་མ་འདེབས། མྱུར་བ་ཉིད་དུ་ཆམ་ལ་ཕོབ་ཅིག ཀླད་པ་ཞོ་ལྟར་དཀྲུགས་ཤིག མིག་འབྲས་ཐང་ལ་ཕྱུངས་ཤིག དོན་སྙིང་ལ་སྤར་གྱིས་ཐོབ་ཅིག མི་ནོར་ལོངས་སྤྱོད་ཁ་རྗེ་དབང་ཐང་ཡུལ་འཁོར་ཞིང་ཁང་སོགས་བྲག་རི་ཐོག་གིས་བཤིག་པ། རྩི་ཐོག་སེར་བས་བརྡུང་བ། མེ་ཏོག་སད་ཀྱིས་ཁྱེར་བ། རྩ་སྦུར་ཕྱགས་མས་དེད་པ་བཞིན་དུ་ཐོངས་ལ་ཕྲིན་ལས་གཉན་པོ་སྒྲུབས་ཤིག དེ་ལྟར་ཕྲིན་ལས་བཅོལ་ནས་དབེན་གནས་འདི་ལ་གནོད་པ་དང་སྡིག་ཁྱིམ་བྱེད་པ་སོགས་ལ་མི་མངོན་སྟོང་པའི་དབྱིངས་ནས་ཆོས་སྐྱོང་དམ་ཅན་རྣམས་ཀྱིས་བཀའ་ཆད་དང་། དགོས་སུ་མི་དབང་ས་སྐྱོང་རྒྱལ་པོ་རྣམས་ཀྱིས་སྙན་ཚེ་ཁྲིམས་ཆད་པ་དཔེ་ལ་ལོང་བ་སོགས་བྱེད་རྒྱུ་ཡིན་པས་འདི་ནས་སྡིག་ལས་མཁན་དང་བྱི་གསད་སོགས་ཀྱི་གནས་མི་བྱེད་པར་ཡིད་འཛིན་གལ་ཆེ། ཨེ་མ་སྒོམ་སྒྲུབ་བྱེད་པའི་བསམ་གཏན་ཁང་བུ་རྣམས། །མི་ཉམས་དར་ཞིང་རྒྱས་པར་མཛད་དུ་གསོལ། །ལུང་རྟོགས་བསྟན་པའི་གྲུབ་མཐའ་འཛིན་པ་རྣམས། །སྐུ་ཚེ་ཡུན་རིང་འཚོ་གཞེས་བཞུགས་པར་གསོལ། །ཀུན་མཁྱེན་ཡབ་སྲས་གཤེགས་ཤུལ་དབེན་པའི་གནས། །དུས་རྣམས་རྟག་ཏུ་མི་འབྲལ་འགྲོག་པར་སྨོན། །རང་གཞན་དོན་གཉིས་འབད་མེད་ལྷུན་གྲུབ་སྟེ། །མཐར་ཐུག་ཆོས་སྐུའི་རྒྱལ་སྲིད་འབྱོར་བར་ཤོག །ཡུལ་ཁམས་མི་ཕྱུགས་ལོ་འབྲས་དར་རྒྱས་ཤིང་། །འགྲོ་བ་ཕོ་མོའི་བློ་སེམས་དགེ་བ་ལ། །རྒྱུན་དུ་སྦྱོར་ཞིང་བཀྲ་ཤིས་འཕེལ་བ་དང་། །དུས་གསུམ་འགྲོ་རྣམས་དགེ་བའི་རྒྱུར་གྱུར་ཅིག སརྦ་ཛ་ཡནྟུ།