སྒེག་གི་ཡིག་དྲུག་དོན་བསྟོད་སྡུག་བསྔལ་རང་གྲོལ།

ཡང་གསང་མཁའ་འགྲོའི་བརྡ་རིས་ལས༔ ཡིག་དྲུག་དོན་བསྟོད་སྡུག་བསྔལ་རང་གྲོལ་བཞུགས༔

རང་བྱུང་རིག་པ་ཆོས་ཀྱི་སྐུ༔ ཡང་དག་ཆོས་ཀྱི་སྙིང་པོ་མཆོག༔ འཕགས་པ་ཁ་སར་པ་ཎི་དང༔ དབྱེར་མེད་ལུང་རིག་གླིང་པ་རྒྱལ༔ སྔོན་དུས་ཆོས་རྒྱལ་སྲོང་བཙན་སྒམ་པོ་ཡི༔ ཐུགས་བསྐྱེད་དཀར་ནས་བོད་ལ་ཆོས་སྟོན་དུས༔ འཕགས་པའི་ཐུགས་སྤྲུལ་དགེ་སློང་ཨ་ཀརྨས༔ མ་འོངས་འགྲོ་བར་དངོས་སམ་བརྒྱུད་ནས་ནི༔ བདག་གི་ཐབས་མཁས་ཐུགས་རྗེས་འདྲེན་པར་སྨོན༔ དེ་འོག་འཇམ་དབྱངས་སྤྲུལ་པས་རྒྱ་བོད་ཀྱི༔ བར་དུ་དཀར་པོའི་ཆོས་ཀྱི་ཟམ་བཙུགས་ཚེ༔ སྔོན་སྨོན་དགེ་སློང་སྤྲུལ་པ་རྣམ་སྣང་གིས༔ བླ་མེད་ཆོས་ཀྱིས་ཆོས་རྒྱལ་སྨིན་བྱས་ཚེ༔ སྨོན་ལོག་བདུད་སྤྲུལ་བཙུན་མོ་ཚེ་སྤོང་བཟས༔ ཡང་དག་ཆོས་ལ་བར་དུ་གཅོད་བྱས་ཏེ༔ ལོ་ཙཱ་ཆེན་པོ་མཐའ་ལ་སྤྱུགས་པའི་དུས༔ ལས་ཀྱི་ལྷག་མ་རྒྱལ་མོ་རོང་དུ་གཟིགས༔ མཐའ་འཁོབ་ཆོས་ལ་བཙུད་ཅིང་ནག་ཕྱོགས་ཀྱི༔ མི་མིན་དྲེགས་པའི་སྲོག་ཕྲོགས་དཀར་ཕྱོགས་ཀྱི༔ བཀའ་རྟགས་ཕྱག་རྒྱ་འཆང་དགོས་དམ་མནོས་ནས༔ འབྱུང་བཞིར་རང་དབང་བསྒྱུར་བའི་གྲུབ་རྟགས་མཛད༔ ཁྱད་པར་མདོ་སྨད་ས་རྡོ་རི་བྲག་ཀུན༔ ལྷ་ཡི་ཞིང་དུ་བྱིན་རླབས་ཕྱག་ནས་འཐོར༔ སྐུ་ཡིག་ཕྱག་མཚན་སྐྱེ་འགྲོའི་རྟེན་དུ་ནི༔ དུས་ཀྱི་སྐབས་བསྟུན་གཏེར་དུ་སྦས་ནས་བཞག༔ དུས་རྟགས་ལུང་བསྟན་གང་ཟག་རིག་པ་འཛིན༔ འགའ་ལ་ཞལ་གཟིགས་བཀའ་གཏད་སྨོན་ལམ་བཏབ༔ ད་ལྟ་ལྔ་བདོའི་དུས་ཀྱི་ཐ་མ་ལ༔ ནད་མཚོན་དམག་འཁྲུགས་མུ་གེ་རིམས་ཡམས་དང༔ འབྱུང་འཁྲུགས་མི་འདོད་གདོན་གྱིས་འཚེ་བ་སོགས༔ མི་ཕྱུགས་ནད་གདོན་རྐྱེན་ལས་གྲོལ་བའི་ཆེད༔ རིགས་གསུམ་མགོན་པོའི་བྱིན་རླབས་ཆགས་པའི་གནས༔ སྒེག་ཅེས་བྱ་བའི་མདའ་ལ་ཕ་བོང་གི༔ ལོགས་ལ་བཻ་རོའི་ཕྱག་བྲིས་འབྲུ་དྲུག་བཞུགས༔ ད་སྔོན་རེ་འགའ་ལས་ལྡན་རེ་རེ་ཙམ༔ མ་གཏོགས་ཀུན་གྱིས་མཐོང་བ་ཨུ་དུམ་ཝར༔ ད་ནི་ལས་འཕྲོ་སད་པའི་རྨི་ལམ་དུ༔ འཕགས་པས་ཞལ་གཟིགས་འགྲོ་དོན་འབྱུང་ལུང་བསྟན༔ དུས་གསུམ་སངས་རྒྱས་ཡང་སྙིང་ཡི་གེ་དྲུག༔ འདི་ཉིད་ལན་གཅིག་མཐོང་བས་སྔོན་ལས་དང༔ འཕྲལ་རྐྱེན་བདུད་ཀྱི་དབང་དུ་མི་འགྱུར་ཞིང༔ འདི་ལ་ཕྱག་སྐོར་ལན་གཅིག་བྱས་པས་ཀྱང༔ སྡིག་པའི་ཕུང་པོ་རི་རབ་ཙམ་ཡང་བྱང༔ སངས་རྒྱས་མང་པོས་ཐུགས་ཀྱི་སྲས་སུ་དགོངས༔ འཕོས་ཚེ་སྤྱན་གཟིགས་ཞབས་དྲུང་སྐྱེ་བ་ལེན༔ དེ་ནས་ཕྱིར་མི་ལྡོག་པའི་ས་ལ་རེག༔ དད་པས་ངེས་ཤེས་སྐྱེད་ལ་སྐོར་ཕྱག་རེམ༔ སྡོམ་བརྩོན་ཚུལ་ཁྲིམས་འདོད་པས་ཡིག་དྲུག་འདི༔ དད་པས་ཡིད་ལ་བསྒོམས་ཤིང་གསོལ་བཏབ་ན༔ བསླབ་གསུམ་དྲི་ཡིས་རང་རྒྱུད་ཕྱུག་པར་འགྱུར༔ ཚོང་མགྲོན་འདོད་དོན་གཉེར་བས་ཡིག་དྲུག་འདི༔ དད་པས་ཡིད་བསྒོམ་ཕྱག་སྐོར་བྱས་པ་ན༔ ཅི་བསམ་ཡིད་བཞིན་འགྲུབ་ལ་སོམ་ཉི་མེད༔ མི་འདོད་རྐྱེན་གྱིས་ལུས་སེམས་གཙེས་པ་ན༔ དད་པས་ཡིག་དྲུག་མཇལ་དང་ཕྱག་བསྐོར་རེམ༔ ནད་གདོན་བར་ཆད་རྐྱེན་ངན་དབྱིངས་སུ་སེལ༔ ཆོམ་རྐུན་གཅན་གཟན་འཇིགས་པས་ནོན་པ་རྣམས༔ ཡིག་དྲུག་འདི་ལ་རྟེན་བཅས་སྐྱབས་གསོལ་ན༔ གནོད་བྱེད་དགྲ་བགེགས་ཆོས་ཉིད་ངང་དུ་ཞི༔ མདོར་ན་འདོད་པའི་རེ་འབྲས་གང་ཡོད་པ༔ ཡིད་ལ་དམིགས་ཤིང་སྤྱི་བོས་ཡིག་དྲུག་ལེན༔ སྨོན་ལམ་བཏབ་ཅིང་ཐེ་ཚོམ་མེད་ན་ཡང༔ བསམ་དོན་མྱུར་དུ་འགྲུབ་འགྱུར་གདོན་མི་ཟ༔ ཡིག་དྲུག་འདི་ལ་མེ་ཏོག་སུས་འབུལ་བ༔ གཟུགས་བྱད་མཛེས་ཤིང་པད་སྡོང་ལས་འཁྲུངས་འགྱུར༔ ཡིག་དྲུག་འདི་ལ་བདུག་སྤོས་སུས་འབུལ་བ༔ ཚུལ་ཁྲིམས་དྲི་ལྡན་རོ་བྲོའི་རྟོག་པ་འགགས༔ ཡིག་དྲུག་འདི་ལ་མར་མེ་སུས་འབུལ་བ༔ ཡེ་ཤེས་སྤྱན་ལྡན་མར་མེ་ལྟ་བུར་འགྱུར༔ ཡིག་དྲུག་འདི་ལ་དྲི་ཆབ་སུས་བྱུགས་པ༔ རིགས་བཟང་བློ་གསལ་གཞན་གྱི་ཡིད་ལ་མཛའ༔ ཡིག་དྲུག་འདི་ལ་ཞལ་ཟས་སུས་ཕུལ་བ༔ ཡི་དྭགས་སྒོ་གཅོད་མུ་གེའི་འཇིགས་པ་ཞི༔ ཡིག་དྲུག་འདི་ལ་རོལ་མོ་སུས་མཆོད་པ༔ མི་ཁ་པྲ་མཆུ་ཞི་ཞིང་གྲགས་སྙན་འཐོབ༔ ཡིག་དྲུག་འདི་ལ་གདུགས་སོགས་མཆོད་བྱས་ན༔ ཚེ་རབས་ཀུན་ཏུ་གཞན་གྱིས་བཀུར་བར་འོས༔ གསེར་གྱི་འཁོར་ལོས་བསྒྱུར་སོགས་ཐོབ་པར་འགྱུར༔ ཡིག་དྲུག་མདུན་དུ་ཚོགས་བསགས་སྒྲིབ་སྦྱངས་ན༔ དམ་པ་སྐུ་གཉིས་མངོན་དུ་འགྱུར་བར་ངེས༔ ཡིག་དྲུག་འདི་ལ་ཕྱག་སྐོར་མཎྜལ་སོགས༔ ཡིད་ཆེས་དད་པས་ལེགས་པར་འབུལ་བྱས་ན༔ གང་ཟག་དབང་པོའི་ཁམས་བཞིན་གནས་སྐབས་དང༔ མཐར་ཐུག་བདེ་ལ་འགོད་པར་ཐེ་མི་ཚོམ༔ འདི་འདྲའི་ཡིག་དྲུག་ཕན་ཡོན་མདོར་བསྡུས་པ༔ རང་དང་རང་འདྲའི་གྲོགས་ལ་ཕན་ཕྱིར་བྲིས༔ དེ་མིན་ཕན་ཡོན་བརྗོད་པ་སངས་རྒྱས་ཀྱི༔ ལྗགས་ཀྱི་དབང་པོས་བསྒྲགས་ཀྱང་ཐུག་པ་མེད༔ ཕན་ཡོན་གཟུགས་མཆིས་སྤྱན་མའི་ཀློང་ལ་ཡང༔ མི་ཆུད་མཁའ་དང་མཉམ་པ་རྨད་དུ་བྱུང༔ ས་མ་ཡཱ༔ ཞེས་འདི་རང་བྱུང་པདྨ་ཀ་ར་དང༔ འཕགས་པ་རིགས་གསུམ་མགོན་པོས་བྱིན་བརླབས་ནས༔ ལེགས་ཕབ་འགྲོ་བློའི་རེ་བ་ཡིད་བཞིན་དུ༔ སྐོང་བ་དབང་སྔོན་རྒྱལ་པོའི་དཔལ་ལས་ལྷག༔ སྐལ་མེད་སྡིག་སྤྱོད་སྐྱེ་བོས་སྨོད་མི་རུང༔ ཚེ་འདིར་མི་དགེ་ཕྱི་མར་ཐར་བ་དཀོན༔ ཡིག་དྲུག་སྲུང་མ་ཁྱབ་འཇུག་རཱ་ཧུ་ལས༔ སྙིང་ཁྲག་ཁར་འབྱིན་ཧུར་ཐུམས་ལྐུགས་རིང་གཏོང༔ དད་ལྡན་ཡ་རབས་སྤྱོད་རྣམས་ཕྱི་མ་དང༔ ཚེ་འདིར་བདེ་ལྡན་ས་ལམ་བར་ཆད་ཞི༔ ཡིག་དྲུག་སྲུང་མས་འདོད་དོན་གང་ཡིན་པ༔ འབད་མེད་རེ་འབྲས་མི་མངོན་དབྱིངས་ནས་བསྒྲུབ༔ དེ་ཕྱིར་དགའ་སྤྲོ་བསྐྱེད་ལ་བསོད་ནམས་གསོགས༔ བསླུ་བ་མེད་དོ་པདྨའི་ཐ་ཚིག་ཡིན༔ བྱིན་རླབས་འགྲན་བྲལ་འཕགས་པའི་ཡང་སྙིང་སྟེ༔ སྙིགས་དུས་རྒུད་སྐྱོབ་བཻ་རོའི་ཐུགས་བསྐྱེད་ཡོད༔ འགྲོ་ཕན་རྟེན་འབྲེལ་རང་སེམས་དག་པས་བྲིས༔ ལེགས་ཉེས་དཔང་པོ་དཀོན་མཆོག་རིན་ཆེན་དང༔ རྒྱལ་བའི་བཀའ་ཉན་དྲང་སྲོང་ཆེན་པོ་བཞུགས༔ འདིར་སྨྲས་པ། ཟག་མེད་ཡོན་ཏན་རྒྱ་མཚོར་འཇུག་འདོད་ཅིང༔ ཐར་པའི་ལམ་དུ་ཆས་པའི་མགྲོན་དག་གིས༔ དུས་གསུམ་སངས་རྒྱས་ཡང་སྙིང་ཡིག་དྲུག་འདི༔ མཐོང་ཚེ་སྤྲོ་དགའི་བརྟུལ་ཞུགས་ཅིའི་མི་ངོམ༔ སྔོན་བསགས་ལས་འཕྲོའི་ཤིང་རྟས་ཉེར་དྲངས་པའི༔ དྲི་མེད་ཡིག་དྲུག་དབང་གི་རྒྱལ་པོ་ཉིད༔ ཐོས་བསམ་དད་པའི་རྒྱལ་མཚན་རྩེར་བཀོད་དེ༔ འགྲོ་རྣམས་ཕན་བདེའི་གཞིར་འགྱུར་སྐལ་བཟང་སྙམ༔ འོན་ཀྱང་བདག་བློ་དམན་པའི་རང་ཉམས་ལས༔ ཉེས་པའི་དྲི་མས་གོས་པར་གྱུར་པ་དག༔ ས་ཐོབ་སེམས་དཔའ་གཞན་སེམས་མཁྱེན་ལྡན་རྣམས༔ ཡིན་མིན་དག་མཉམ་བྱི་དོར་ལེགས་པར་མཛོད༔ དགེ་འདིས་མར་གྱུར་འགྲོ་བ་སེམས་ཅན་ཀུན༔ ཡང་དག་རྫོགས་སངས་རྒྱས་ཀྱི་སར་འགོད་ནས༔ སྐུ་བཞི་ཡེ་ཤེས་ལྔ་ལྡན་རབ་ཐོབ་སྟེ༔ ཁམས་གསུམ་སྐྱེ་དགུའི་གཉེན་དུ་འགྱུར་བར་ཤོག༔ ཨོཾ་སྭ་སྟི༔ སྙིང་རྗེའི་མངའ་བདག་འཕགས་པ་སྤྱན་རས་གཟིགས༔ ཡི་གེ་དྲུག་མ་ཐུགས་རྗེ་སྤྲུལ་པའི་ཆོས༔ སྐུ་གསུམ་ལམ་འདྲེན་བྱང་ཆུབ་སར་འགོད་མཛད༔ འཕགས་པའི་སྐུ་གསུང་ཐུགས་ཀྱི་བཀྲ་ཤིས་ཤོག༔ སངས་རྒྱས་བསྟན་དར་སེམས་ཅན་བདེ་ཞིང་སྐྱིད༔ བླ་མའི་ཞབས་བརྟན་འགྲོ་དོན་ཕ་མཐའ་ཡས༔ ལུས་ཅན་ངན་སོང་འཁོར་མཚོ་ལས་གྲོལ་ནས༔ ཕན་བདེའི་དགེ་མཚན་འབྱུང་བའི་ཤིས་པ་སྩོལ༔ ཅེས་ཡིག་དྲུག་དོན་བསྟོད་སྡུག་བསྔལ་རང་གྲོལ་འདི་ཡེ་ཤེས་མཁའ་འགྲོའི་བརྡ་ལས་བྱུང་བ་སྙིང་དུ་ཡོད་པ་ལས་ལྡན་གྱི་གང་ཟག་དང་རྒྱུ་རྐྱེན་རྟེན་འབྲེལ་འཛོམས་པ་ན་ལུང་བྱང་ཐོབ་པ་ཁ་རུ་འབྱིན་ཤོར་བ་ལ་རྐྱེན་བྱས་ཏེ་དམ་པའི་རིགས་ཀྱི་ཡོན་ཏན་ཚང་བའི་དགེ་སྦྱོང་འཇིགས་མེད་མཚན་འཆང་དང༔ འགྲོ་མགོན་ཆུ་ཕོ་རྟོགས་ལྡན་གྱི་རྟེན་འབྲེལ་རིགས་ཀྱི་ཕྱག་རྒྱ་མོའི་སྐྱེས་ཐོབ་བིདྱ་དྷ་ར་ཨརྠ་ཟུང་གིས་བསྐུལ་བ་ལ་བརྟེན་ནས༔ ཆོས་མེད་ཆོས་པའི་གཟུགས་སྟོན་བླ་གཟུགས་དུག་ལྔའི་རྣལ་འབྱོར་ཕན་པའི་མིང་གིས་ཟླ་བ་དྲུག་པའི་ཉེར་ལྔའི་སྲོད་ལ་ལེགས་པར་ཕབ་པ་ཕྱོགས་དུས་གནས་སྐབས་ཀྱི་འགྲོ་བ་ཐམས་ཅད་འཕགས་མཆོག་ཕྱག་ན་པདྨོའི་གོ་འཕང་ཐོབ་པའི་རྒྱུར་གྱུར་ཅིག༔