འཕགས་པའི་གནས་ཀྱི་གསོལ་འདེབས་ཚངས་པའི་མགྲིན་གླུ།
འཕགས་པའི་གནས་ཀྱི་གསོལ་འདེབས་ཚངས་པའི་མགྲིན་གླུ་བི་ཛ་ཧ་རཾ༔ ཨེ་མ་ཧོ༔ སྟོང་གསུམ་མི་མཇེད་སྤྲུལ་སྐུའི་ཞིང་ཁམས་ཀྱི༔ བྱང་ཕྱོགས་ཁ་བ་ཅན་གྱི་གྲུ་འཛིན་ཆར༔ མདོ་སྨད་ས་ཡི་ཐིག་ལེ་རྒྱལ་མོ་རོང༔ དེ་ཡི་ཉེ་ཆར་སྒེག་དཔའ་འཇིགས་པའི་རིར༔ རིགས་གསུམ་སེམས་དཔས་བྱིན་རླབས་བྱིན་དབབ་ཅིང༔ རིག་འཛིན་དུ་མས་ཞབས་བཅགས་རྫུ་འཕྲུལ་མཛད༔ མི་སྣང་རྒྱས་བཏབ་དུས་བབས་མངོན་སྣང་བའི༔ གསུང་མཆོག་ཡི་གེ་དྲུག་ལ་གསོལ་བ་འདེབས༔ འདི་ཕྱིའི་རྐྱེན་སོལ་ཕྱི་ནང་བར་ཆད་བཟློག༔ འཕགས་པས་བྱིན་རླབས་པོ་ཊ་ལ་ཡི་ཞིང༔ མ་ཆགས་པདྨའི་སྦུབས་སུ་སྐྱེ་བར་སྨོན༔ དོན་གཉིས་ལྷུན་གྲུབ་ཆོས་ཀྱི་རྒྱལ་པོར་ཤོག༔ ཨོཾ་མ་ཎི་པདྨེ་ཧཱུྃ༔ ཞེས་འདི་ཡེ་ཤེས་ཌཱཀྐིའི་བརྡ༔ ཕལ་པའི་བློ་ཡིས་དཔག་པར་དཀའ༔ དད་ལྡན་མོས་འདུན་ཅན་ལ་སྟོན༔ དད་མེད་ལོག་རྟོག་མཁན་ལ་རྒྱ༔ ས་མ་ཡཱ༔ རང་སློབ་སྙིང་ནས་བརྩེ་བའི་དགེ་སྦྱོང་བྱ་བ་གྲུབ་པའི་བཞེད་སྐོང་དུ༔ འདུ་ཤེས་གསུམ་པ་ས་ར་ཧི་ཏས་སུག་བྲིས་བགྱིས་པ་དགེ་ལེགས་འཕེལ༔