གསང་སྔགས་གླིང་པ་ལ་བསྔགས་བརྗོད་ཚིགས་བཅད་སུམ་ཅུའི་ཕྲེང་བ།
༄༅། རིག་འཛིན་གསང་སྔགས་གླིང་པ་ལ་བསྔགས་བརྗོད་ཚིགས་བཅད་སུམ་ཅུའི་ཕྲེང་བ། རབ་འབྱམས་རྒྱལ་ཀུན་མཁྱེན་བརྩེའི་ཡེ་ཤེས་དཔྱིད། །གདུལ་བྱའི་ཁམས་ལ་གཟུགས་སྐུའི་རྣམ་རོལ་དུ། །ཡོངས་བཞེངས་དཀྱིལ་འཁོར་རྒྱ་མཚོའི་བདག་ཉིད་མཆོག །ཁྱབ་བདག་འཁོར་ལོའི་མགོན་དེ་གཙུག་གི་རྒྱན། །རྒྱལ་བ་གཞན་གྱིས་སྐྱོབ་དཀའ་སྙིགས་མའི་འགྲོ། །རྨད་བྱུང་ཐབས་མཁས་སྤྱོད་པས་འདུལ་མཛད་པའི། །སྟོན་མཆོག་ཐུབ་དབང་གཉིས་པ་མཚོ་སྐྱེས་རྗེ། །ལྷར་བཅས་འགྲོ་བའི་བླ་ན་རྒྱལ་གྱུར་ཅིག །རྨད་བྱུང་ཐུགས་བསྐྱེད་རླུང་ཤུགས་འཁོར་ལོ་ཡིས། །རྒྱལ་བསྟན་གཟའ་སྐར་མཁའ་ལ་རབ་བཏེགས་ནས། །མཐའ་འཁོབ་མུན་གླིང་བདེ་འབྱུང་འོད་སྣང་གིས། །ཁྱབ་མཛད་མེས་དབོན་རྣམ་གསུམ་ཕྱག་གིས་བཀུར། །ལུང་དང་རྟོགས་པའི་བསྟན་པ་ཡིད་བཞིན་དབང་། །བཤད་དང་སྒྲུབ་པའི་རྒྱལ་མཚན་རྩེར་བཀོད་དེ། །ས་གསུམ་བསྟན་འགྲོའི་དབུལ་བ་སེལ་མཛད་པའི། །རྒྱ་བོད་མཁས་གྲུབ་ཚོགས་ལ་སྒོ་གསུམ་འདུད། །དེ་སྐད་མཆོད་བརྗོད་ཚིག་གིས་མདུན་བསུས་ཏེ། །དགོས་དོན་དམ་པའི་ཡོན་ཏན་རྗེས་བསྔགས་པའི། །གཡོ་མེད་དྲང་པོའི་གཏམ་གྱི་འོད་དཀར་ཞིག །ཐེ་ཚོམ་བློ་མུན་སེལ་བའི་གཉེན་དུ་སྦྱིན། །གྲུབ་བརྙེས་རིག་འཛིན་མཛད་སྤྱོད་ནམ་མཁའི་མཐའ། །བློ་གྲོས་སྦྲང་བུའི་གཤོག་པས་གཞལ་དཀའ་ཡང་། །རྨོངས་བླུན་འགྲོ་འགས་ཡིན་མིན་སྒྲོ་སྐུར་ཚེ། །གང་ནུས་བསྔགས་པ་བརྗོད་ལ་བདག་ཡིད་ཕྱོགས། །རྒྱལ་ཀུན་ཐུགས་ལས་ཟློས་པའི་ཁྱེའུ་ཆུང་ཞིག །དྲུག་ལྡན་གེ་སར་སྦུབས་ཉལ་འདབ་མའི་རྒྱ། །མཁྱེན་ལྡན་བརྩེ་བའི་འོད་སྟོང་འབར་བའི་གཟིས། །རབ་བཞད་གཟུགས་སྐུའི་བཀོད་པ་བསྟན་འགྲོའི་རྒྱན། །འཕགས་ཚོགས་རྒྱུ་སྐར་དབུས་ན་མངོན་མཐོ་བའི། །མཁས་གྲུབ་མཚུངས་མེད་ཉི་ཟླ་ཟུང་གཅིག་གིས། །གང་གི་གསང་གསུམ་ཡོན་ཏན་རྗེས་གཟིགས་ནས། །བསྔགས་ཚིག་རྡོ་རྗེའི་རོལ་མོ་ཡང་ཡང་དཀྲོལ། །བློ་ལྡན་ཉི་རྡུལ་ལྟ་བུ་ཚོགས་པའི་དབུས། །ངོ་མཚར་གཏེར་དྲངས་མ་རུངས་གཉན་ཁམས་བཏུལ། །མཐོང་ཐོས་འགྲོ་ཀུན་ཡིད་ཆེའི་གནས་ལ་སྦྱར། །མཁས་དབང་དམ་པ་རྣམས་ཀྱིས་གཙུག་ཏུ་བཀུར། །དེ་ཚེ་ལུགས་ཟུང་ཁྲིམས་ལ་དབང་འབྱོར་བའི། །ཤེས་ལྡན་རྣམས་ཀྱིས་གསེར་དངུལ་རྟ་དྲེལ་སོགས། །ཕྲ་རགས་དངོས་པོ་ཀུན་གྱིས་མཆོད་པ་ཡི། །མཛེས་པའི་རྒྱན་གྱིས་སྤུད་འདིར་གཟིགས་དང་ཀྱེ། །འདོད་ལྔའི་ཡུལ་གྱིས་གདུང་བའི་གཡོ་ཅན་འགས། །མཁས་དང་གྲུབ་པའི་ཟོལ་རྫུན་བླུན་རྨོངས་དག །མིག་འཕྲུལ་ལྟ་བུས་མགོ་སྐོར་འོང་སྲིད་ཀྱང་། །དེ་འདྲ་དམ་པ་རྣམས་ཀྱིས་ཅི་སྟེ་བཀུར། །ཝ་སྐྱེས་ལྟ་བུར་ས་མཐར་བསྒྲོད་ན་ཡང་། །མཁྱེན་ལྡན་རྣམས་ཀྱིས་རྗེས་བཟུང་མཆོད་གནས་ལ། །བརྟེན་སོགས་སྙན་གྲགས་གཏམ་གྱིས་ཡུལ་ཁྱབ་སྟེ། །སྟག་ལྟར་ཟིལ་གནོན་འཛུམ་དྲུག་རྒྱས་བཞིན་ཕེབས། །དཀར་ནག་ཡིག་འདོན་ཙམ་ལས་སྐུ་ཐོག་འདིར། །རིག་གནས་ཐོས་བསམ་བསླབ་སྦྱང་མ་མཛད་ཀྱང་། །འཆད་དང་རྩོད་དང་རྩོམ་ལ་འགྲན་བྲལ་བའི། །སྐྱེས་ཐོབ་ཤེས་རབ་ཀློང་རྡོལ་འདི་གོ་རྨད། །རྟོགས་པས་རྒྱུད་གྲོལ་རང་སྣང་དབང་འདུས་ཤིང་། །ཚད་མེད་ཐུགས་རྗེས་གཞན་སྣང་ཟིལ་མནན་ཏེ། །མི་དང་མི་མིན་མཆོག་དམན་འགྲོ་བ་རྣམས། །ཐམས་ཅད་རྗེ་ཡིས་འབངས་བཞིན་བྲན་དུ་བཀོལ། །སྔོན་གནས་རྗེས་དྲན་གཞན་གྱི་ཤེས་རྒྱུད་སོགས། །ཇི་བཞིན་མངོན་སུམ་མཁྱེན་པའི་སྤྱན་ལྡན་ཡང་། །བསྟོད་སྨད་སྒྲོ་སྐུར་ཅི་བྱས་ཐམས་ཅད་ཀུན། །འདྲ་མཉམ་བྱམས་དང་བརྩེ་བས་རྗེས་སུ་འཛིན། །དངོས་སམ་བརྒྱུད་ནས་བསྟན་དང་འགྲོ་བ་ལ། །ཕན་པའི་ཐུགས་བསྐྱེད་ནམ་ཡང་མི་འདོར་ཞིང་། །ཐབས་མཁས་བསྡུ་དངོས་རྣམ་བཞིས་དམ་ལྡན་ཚོགས། །སྡུད་མཁས་འདི་ཡང་སྔོན་བྱོན་དམ་པའི་སྲོལ། །ལྟ་སྒོམ་མཁྱེན་པ་མཁའ་ལྟར་རྒྱ་ཆེ་ཡང་། །སྤྱོད་པ་སྤང་བླང་རྒྱུ་འབྲས་གནད་དང་བསྟུན། །མ་ནོར་ལམ་སྟོན་སྐྱེས་མཆོག་སྤྲུལ་པའི་སྐུ། །རྙིང་བསྟན་གསལ་བའི་གཉེན་གཅིག་ཅིས་མི་བསྙེན། །སྔོན་གོམས་ཐུགས་བསྐྱེད་སྨོན་ལམ་རྨད་བྱུང་མཐུས། །རྫས་དང་དགོངས་པའི་གཏེར་ལ་དབང་འབྱོར་ཞིང་། །སྙིགས་དུས་ཨོ་རྒྱན་པདྨའི་རྒྱལ་ཚབ་ཏུ། །ཀུན་གཟིགས་ཀུན་གྱིས་གསུང་གཅིག་མངའ་དབང་གསོལ། །རིང་ལུགས་སྔ་འགྱུར་རྡོ་རྗེ་ཐེག་པ་ཡི། །བསྟན་པའི་སྲོག་ཤིང་རི༵ག་འཛི༵ན་གྲུབ་པའི་མཆོག །འགྲོ་འདུལ་གས༵ང་སྔ༵གས་གླི༵ང་པ༵་ཞེས་གྲགས་པའི། །མཚན་སྙན་དབྱར་གྱི་རྔ་གསང་ཕྱོགས་ཀུན་ལྡིར། །བསྟན་འཛིན་རྒྱུ་སྐར་བྱེ་བའི་དབུས་ཉིད་དུ། །རིག་འཛིན་པདྨའི་རྣམ་འཕྲུལ་འོད་དཀར་ཅན། །ངོ་མཚར་རྨད་བྱུང་མཛད་པའི་ཟེར་ཕྲེང་གིས། །སྔགས་བསྟན་ཀུནྡ་བཞད་པའི་གཉེན་དུ་བཞུགས། །གང་ཞིག་གང་གི་ཡོན་ཏན་དག་བྱའི་གཏེར། །ཟབ་བརླིང་རྒྱ་ཆེ་གཏིང་དཔག་ནུས་དཀའ་ཡང་། །ལེགས་བརྟག་ཧུབ་གཅིག་ཁོ་བོས་བཏུང་བ་ལས། །ཡིད་གཉིས་སྐོམ་པའི་གདུང་བ་རིང་ནས་བསལ། །དུས་ངན་སྙིགས་མའི་སྐྱེ་བོ་འཇག་མའི་ཁྱོན། །གཏད་མེད་གཏམ་གྱི་དྲི་བཞོན་རྗེས་ཕྱོགས་ཀྱང་། །འཕགས་པའི་དགོངས་སྤྱོད་སོ་སྐྱེས་རྟོག་གེའི་བློས། །དཔྱད་པའི་ཡུལ་མིན་རི་བོང་ཅལ་འདྲོག་བཞིན། །ཡིད་སྲུབ་སྙིང་ལ་གཞོལ་བའི་འགྲོ་འགའ་ཞིག །ཀུན་མཁྱེན་ཐུབ་པའི་དབང་པོ་དངོས་བྱོན་ཡང་། །ལོག་རྟོག་བློ་ཡི་མུན་ཁུང་བྱང་བསྟན་ཕུག །རྨད་བྱུང་ཐུགས་ཆེན་འོད་སྣང་ཡེ་མི་འཆར། །ལས་ངན་རྣམ་སྨིན་གྱིས་བསྐྲུན་རིགས་ངན་འགྲོ། །མུན་ནས་མུན་པའི་མཐའ་རུ་འཕྱན་དགོས་པའི། །ལོག་རྟོག་གདོན་གྱིས་ཟིན་པའི་ཝ་སྐྱེས་ལ། །བློ་གསལ་གཡུ་རལ་ཅན་རྣམས་ཅི་སྟེ་འགྲན། །མཁྱེན་ལྡན་རྣམས་ཀྱིས་བཀུར་འོས་སྐྱེས་མཆོག་ལ། །བློ་ཆུང་སུ་གང་ངན་སྨྲས་བསྒྲགས་ན་ཡང་། །སླར་ནི་འགྱོད་པས་བཤགས་སྦྱང་མ་འབད་ན། །ཚེ་བསོད་གཏན་འཇོམས་འགྲོ་བས་གོ་བར་གྱིས། །བསྟན་འཛིན་བསྟན་དོན་བྱོན་པའི་སྐྱེས་བུ་ཡི། །དབུ་འཕང་སྨད་པའི་བདུད་སྐྱེས་སྲིན་བྱ་རྣམས། །དམ་པའི་ཡོན་ཏན་མངོན་པའི་ནམ་ལང་གི། །རང་མཐོང་རྨོངས་པའི་ནགས་གསེབ་ཉོལ་ལ་སྡོད། །གང་ཞིག་མདོ་ལམ་ཞུགས་པའི་སྐྱེས་བུ་རྣམས། །ཞིང་ཀུན་རྒྱལ་བ་སྲས་བཅས་གང་མོས་ན། །རྒྱལ་བའི་རྣམ་འཕྲུལ་དངོས་ལ་མི་གུས་པ། །བདེ་གཤེགས་བཀའ་དང་འགལ་བ་མཁྱེན་པར་མཛོད། །གསང་སྔགས་ལམ་མཆོག་ཞུགས་པའི་སྐལ་ལྡན་རྣམས། །སྣང་གྲགས་རིགས་གསུམ་ལྷ་སྔགས་ཡེ་ཤེས་ཀྱི། །རྣམ་རོལ་ཁོ་ནའི་དག་སྣང་སྦྱང་དགོས་ན། །དམ་པ་མཆོག་ལ་དམོད་པ་རང་གནོང་མཛོད། །གཞན་སྨད་ཚིག་གི་ཡལ་རྩེ་མང་ན་ཡང་། །རང་ཉེས་ཐར་བའི་སྲོག་རྩ་གཅོད་པའི་རྒྱུ། །ཕྲག་དོག་ལྗིད་ཀྱིས་ནོན་པའི་རྭ་ཅོ་དེ། །སྐྱུར་ལ་ཕྱོགས་རིས་བྲལ་བའི་རི་རྩེར་འགྲིམ། །གང་གི་གསང་གསུམ་འཕོ་མེད་རྡོ་རྗེའི་ཁམས། །བླུན་ཚིག་དབྱུག་མདས་ཕོག་པར་མི་ནུས་ཡང་། །ཚར་གཅོད་བསྟན་སྲུང་དྲེགས་པའི་བཀའ་ཆད་ཀྱི། །གནམ་ལྕགས་ཐོག་མདས་ཕོག་ལ་སོམ་ཉི་བྲལ། །སྐྱབས་མཆོག་གང་གི་ཡོན་ཏན་ཆུ་གཏེར་ལས། །རང་ནུས་བསྔགས་བརྗོད་སྐྲ་རྩེའི་ཐིག་པ་ཙམ། །ཚིགས་བཅད་སུམ་ཅུའི་ཕྲེང་བར་འདིར་བྲིས་དགེས། །འཁྲུལ་རྟོག་བློ་ངན་ཞི་བའི་རྒྱུར་གྱུར་ཅིག །