རིག་གྲོལ་ལ་གདམས་པའི་ཀ་རྩོམ།
༄༅། རིག་གྲོལ་ལ་གདམས་པའི་ཀ་རྩོམ། ཀ་ནས་བརྩེ་བའི་ལྷ་གྲོགས་རིག་གྲོལ། །ཁ་ལྟ་སྟོང་སྐད་མ་ཆེ་ཞིབ་མཛོད། །ག་ལ་དགོས་པའི་ཉམས་རྟོགས་སྐྱེད་ཚུལ། །ང་འདྲའི་ཟོབ་ཀྱིས་མི་མགོ་མ་སྐོར། །ཅ་རེ་མིག་གིས་དཔེ་སོགས་ལྟོས་ལ། །ཆ་གང་ཟླ་བཞིན་ཡོན་ཏན་སྐྱེད་ཅིག །ཇ་སོགས་བཟའ་བཏུང་འདུ་བ་སྙོམ་ལ། །ཉ་བཞིན་རྒྱུག་འདུར་མ་ཆེ་སྲན་ཚུགས། །ཏ་ཐཱ་ག་ཏའི་བཀའ་བཞིན་སོམས་ལ། །ཐ་མལ་པ་བཞིན་རྟག་འཛིན་མ་ཆེ། །ད་ན་ལ་སོགས་ཕར་ཕྱིན་དྲུག་སློབ། །ན་རྒ་འཆི་ཚེ་དགྲ་གཉེན་མ་རྩོད། །པཱ་ཎི་པདྨ་པད་འབྱུང་སྒོམས་ལ། །ཕ་ཁྱིམ་གྲུབ་བརྒྱའི་མལ་ས་སྙོགས་ཤིག །བ་དག་སྲོག་དང་བསྡོས་ནས་བྱང་སེམས། །མ་རྒན་འགྲོ་བའི་དོན་ལ་སྦྱོངས་མཛོད། །ཙ་རི་ལ་སོགས་གནས་སྐོར་མེད་ཀྱང་། །ཚ་གྲང་དམྱལ་བའི་སྡུག་བསྔལ་མི་མྱོང་། །ཛ་ཡ་རྒྱལ་བའི་དགོངས་དོན་ཚོལ་ལ། །ཝ་བཞིན་གཅིག་པུར་རི་ལ་སྡོད་ཅིག །ཞྭ་བཞིན་དཀོན་མཆོག་སྤྱི་བོར་ཁུར་ལ། །ཟ་ཟོག་གཡོ་སྒྱུའི་གྲོགས་དང་མ་འགྲོག །འ་འོལ་འདིར་སྣང་བདེན་མེད་སོམས་ལ། །ཡ་མཚན་དབང་བཞི་དངོས་གཞི་སྒོམས་ཤིག །རྭ་ལྟར་གྱོང་བའི་རང་རྒྱུད་ཐུལ་ལ། །ལ་ལ་བརྒལ་བའི་ལྷུན་གྲུབ་གནད་སྨིན། །ཤ་གཟུགས་འདོར་དུས་འཇའ་ལུས་འགྲུབ་དགོས། །ས་ལམ་དམན་པའི་འགྲོ་འདི་མཐོང་ཚེ། །ཧ་ཅང་རྒྱུད་ལ་སྙིང་རྗེ་མི་སྐྱེས། །ཨ་ཧོ་རིག་འཛིན་གོ་འཕང་བསྒྲོད་ཅིག །ཧ་ཧཱུྃ་མ་བྱེད་སྙིང་རྗེས་སྐྱོངས་མཛོད། །ཨ་ཧོ་གོང་མའི་རྣམ་ཐར་སྐྱོངས་ལ། །རང་དོན་ཞེན་པའི་ཕྲེང་ཐག་ཆོད་ཅིག །འགྲོ་བའི་དོན་བརྩོན་སེམས་ལ་ཞོག་ཨང་། །ང་ཅག་བླ་མ་འདྲ་ལ་མཐོང་བའི། །སློབ་མའི་ཚུལ་ལ་སྤྲིང་པ་དགེའོ།། ས་ར་ཧི་ཏས་བྲིས་པ་ཛ་ཡནྟུ།