དཔལ་རི་པདྨ་འོད་དུ་གྲོལ་བའི་སྨོན་ལམ་འོད་གསལ་གསང་བའི་ཐོལ་གླུ།
དཔལ་རི་པདྨ་འོད་དུ་གྲོལ་བའི་སྨོན་ལམ་འོད་གསལ་གསང་བའི་ཐོལ་གླུ་བཞུགས༔ ཨེ་མ་ཧོ༔ སྒྱུ་ལུས་དག་པ་ཟངས་མདོག་དཔལ་རིའི་ཞིང༔ སྙིང་དབུས་མི་ཤིགས་ཐིག་ལེའི་འོད་ཀློང་དེར༔ འོད་གསལ་གཉུག་མའི་མཁའ་ཁྱབ་ཕོ་བྲང་ཆེར༔ རང་བཞིན་སྤྲུལ་པའི་ཁྱུ་ཚོགས་བསམ་ཡས་པའི༔ ཆོས་ཉིད་མངོན་སུམ་བདེན་པ་རྟོགས་པའི་རྐྱེན༔ ཉམས་སྣང་གོང་འཕེལ་དཔའ་བོ་མཁའ་འགྲོའི་དྲུང༔ རིག་པ་ཚད་ཕེབས་ལྷུན་གྲུབ་རོལ་བའི་རྒྱན༔ མཐའ་བྲལ་རིག་སྟོང་ཨོ་རྒྱན་རྡོ་རྗེ་འཆང༔ གང་གི་ཞབས་དྲུང་ཚོམ་བུ་ཚོགས་སྒྲུབ་ཀྱི༔ རབ་འབྱམས་དཀྱིལ་འཁོར་སྟོན་འཁོར་མཉམ་གྱུར་ཅིག༔ མ་དག་འོད་ལམ་དྲུག་གི་འགྲོ་བ་ཡང༔ འཕོས་ཚེ་དཔལ་རིར་རང་རིག་སངས་རྒྱས་ཀྱི༔ བདག་ཉིད་ཨོ་རྒྱན་ཐུགས་ཀློང་གྲོལ་བར་ཤོག༔ གྲོལ་བྱ་གྲོལ་བྱེད་སྣང་བ་མཐའ་ལས་འདས༔ སྐྱེ་འགགས་གཉིས་མེད་རང་བྱུང་ཡེ་ཤེས་བརྙེས༔ སྐུ་གསུམ་འབྲས་བུ་ཡེ་རྫོགས་གཉུག་མའི་ངང༔ ཡེ་གཞི་ཧེ་རུ་ཀ་དཔལ་པད་འབྱུང་དང༔ དབྱེར་མེད་ཟུང་འཇུག་རྡོ་རྗེ་འཆང་འགྲུབ་ཤོག༔ ཅེས་པ་འདི་ཡང་རིས་བཀྲ་རྣམ་གནོན་རྒྱལ་པོའི་ཆོ་འཕྲུལ་ཟླ་བའི་ཚེས་བཅུ་ལ་སློབ་བུ་དཀོན་མཆོག་གིས་བསྐུལ་ངོར་གཏེར་སྟོན་བསམ་གཏན་ཡེ་ཤེས་གླིང་པར་འབོད་པས་རྟེན་འབྲེལ་གྱི་ཆོས་སུ་བྲིས་པ་དགེའོ༔