དྲང་སྲོང་བདེན་ཚིག་སྨོན་ལམ།
ཡང་གསང་ཌཱཀྐིའི་ཐུགས་ཐིག་ལས་དྲང་སྲོང་བདེན་ཚིག་སྨོན་ལམ་བི་ཛ་ཧ་རཾ༔
ཕྱོགས་བཅུའི་ཞིང་ཁམས་རབ་འབྱམས་ན༔ བཞུགས་པའི་སངས་རྒྱས་བྱང་ཆུབ་སེམས༔ སྨོན་ལམ་དབང་བ་ཐམས་ཅད་དགོངས༔ ཐུགས་རྗེའི་ཟུངས་ལ་བྱིན་གྱིས་རློབས༔ བདག་གི་སྐྱེ་བ་ཚེ་རབས་ནས༔ བསགས་པའི་སྒྲིབ་གཉིས་བག་ཆགས་ཀུན༔ ད་ལྟ་བྱང་ཞིང་དག་གྱུར་ཅིག༔ ཕྱི་རྒྱུ་རྐྱེན་གྱིས་བསྐྱེད་པ་ཡི༔ མ་རིག་དུག་ལྔ་དུག་གསུམ་གྱི༔ ལས་ངན་རྒྱུ་འབྲས་ས་བོན་དང༔ བག་ལ་ཉལ་བ་ཐམས་ཅད་ཀུན༔ ད་ལྟ་བྱང་ཞིང་དག་གྱུར་ཅིག༔ དེང་ནས་བཟུང་སྟེ་ཕྱིན་ཆད་ཀྱང༔ དམ་པའི་ཆོས་ལས་གཞན་མིན་པའི༔ ལས་ལ་འཇུག་པར་མ་གྱུར་ཅིག༔ བྱ་བ་བྱེད་པ་ཐམས་ཅད་ཀྱང༔ དམ་པའི་ཆོས་སུ་འགྱུར་བར་ཤོག༔ བཀའ་དྲིན་གསུམ་ལྡན་བླ་མ་ལ༔ སངས་རྒྱས་འདུ་ཤེས་སྐྱེ་བར་ཤོག༔ སྣང་གྲགས་རིགས་གསུམ་ལྷ་སྔགས་སུ༔ སྣང་བ་འབྱམས་སུ་ཀླས་པར་ཤོག༔ བྱམས་དང་སྙིང་རྗེའི་སེམས་འབྱོང་ཞིང༔ འགྲོ་ལ་ཕན་པ་འབྱུང་གྱུར་ཅིག༔ བདེ་སྡུག་རྨི་ལམ་འཁྲུལ་འཁོར་བཞིན༔ རྟོགས་ནས་དབྱིངས་སུ་འཇུག་པར་ཤོག༔ ཚེ་འདིར་རྐྱེན་ངན་བར་ཆད་ཀྱི༔ དབང་དུ་མི་འགྱུར་འཚོ་བར་ཤོག༔ འགུལ་བསྐྱོད་ཐམས་ཅད་བདེ་བ་ཆེ༔ གདན་གསུམ་ལྷ་རུ་འགྱུར་བར་ཤོག༔ ཀ་ཆ་དཀོར་དང་ལོངས་སྤྱོད་ནོར༔ དཀོན་མཆོག་ཞིང་ལ་སྦྱོར་བར་ཤོག༔ དུས་མིན་འཆི་བ་བཅོ་བརྒྱད་ཀྱི༔ འཇིགས་པའི་ཚོགས་ལས་རྒྱལ་བར་ཤོག༔ གལ་ཏེ་ཚེ་དུས་བྱས་པའི་སྐབས༔ གནད་གཅོད་མེད་ཅིང་དྲན་གསལ་ཞིང༔ རང་དབང་དགའ་སྤྲོ་ཐོབ་པར་ཤོག༔ དེ་ཚེ་ཡི་དམ་བསུ་མ་དང༔ དག་པའི་སྣང་བ་འཆར་བར་ཤོག༔ བར་དོ་རང་རིག་ངོ་ཤེས་ནས༔ སྒྲ་འོད་ཟེར་ལ་མི་འཇིགས་ཤོག༔ ཕྱི་ནང་མེད་པར་ཟང་མ་ཐལ༔ འོད་སྐུའི་ཀློང་དུ་གྲོལ་བར་ཤོག༔ དེ་དུས་བླ་མའི་གདམས་ངག་དྲན༔ ཡི་དམ་བསྐྱེད་རིམ་བརྟན་ཐོབ་ཤོག༔ ལུས་སེམས་བར་དོ་ཆོས་སྐུའི་ངང༔ ལོངས་སྤྱོད་རྫོགས་སྐུར་འཚང་རྒྱ་ཤོག༔ འཁྲུལ་སྣང་དབང་གིས་ལམ་གཞན་དུ༔ འཁྱོག་ན་མངལ་སྒོ་འགག་པར་ཤོག༔ དེ་ལ་རང་དབང་མ་ཐོབ་ན༔ ཆོས་དང་ལྡན་པའི་རིགས་འཁྲུངས་ཤོག༔ དལ་འབྱོར་བཅོ་བརྒྱད་མ་ཉམས་ཤིང༔ ཚུལ་ཁྲིམས་ཕུན་སུམ་ཚོགས་པར་ཤོག༔ མདོ་སྔགས་རྒྱུད་སྡེ་རྒྱ་མཚོའི་ཚོགས༔ ཅིག་ཆར་ཉིད་དུ་རྟོགས་པར་ཤོག༔ སྲིད་པའི་ཆོས་ལ་ཡིད་དབྱུང་ནས༔ བཤད་སྒྲུབ་རྒྱལ་མཚན་འཛུགས་ནུས་ཤོག༔ སྒྲུབ་ལ་བར་ཆད་མི་འབྱུང་ཞིང༔ མངོན་ཤེས་གྲུབ་རྟགས་ཐོན་པར་ཤོག༔ མཐོང་ཐོས་དོགས་པའི་སྐྱེ་བོ་ཅོག༔ དམ་པའི་ཆོས་ལ་འགོད་པར་ཤོག༔ བཟང་ངན་ལས་ཀྱིས་འབྲེལ་ཚད་ཀུན༔ སྨིན་ཅིང་གྲོལ་བར་མཛད་ནུས་ཤོག༔ བསྟན་པའི་རྩ་ལག་བླ་མ་རྗེའི༔ ཕྲིན་ལས་སྲིད་མཚོར་སྒྲོལ་བར་ཤོག༔ སྙན་དང་གྲགས་པའི་བ་དན་ནི༔ སྲིད་པའི་རྩེ་མོར་བསྒྲེང་བར་ཤོག༔ འདས་ཚེ་སྣང་བཞི་མཐར་ཕྱིན་ནས༔ འཇའ་ལུས་འཕོ་ཆེན་འགྲུབ་པར་ཤོག༔ དེ་ནས་ནམ་མཁའ་གནས་ཀྱི་བར༔ འགྲོ་བ་ཇི་སྲིད་གནས་གྱུར་པ༔ དེ་སྲིད་བདག་གིས་ཀུན་དོན་བསྒྲུབ༔ སྐུ་བཞིའི་རྒྱལ་སྲིད་ཐོབ་པར་ཤོག༔ ས་མ་ཡཱ༔ ཞེས་འདི་རང་བྱུང་དགོངས་པའི་གཏེར༔ བཅུད་ལས་བཅུད་དུ་དྲིལ་བ་ཡི༔ ཡེ་ཤེས་མཁའ་འགྲོའི་བརྡ་ལས་སྣང༔ འདི་ཉིད་ལན་གཅིག་བཏོན་ན་ཡང༔ གཏན་དུ་བདེ་བའི་ས་ལ་རེག༔ སངས་རྒྱས་བྱང་སེམས་དྲང་སྲོང་ཚོགས༔ བདེན་ཚིག་གྲུབ་རྣམས་དཔང་པོར་གནས༔ དེ་ཕྱིར་གཅིག་པུས་ཉམས་སུ་ལོངས༔ དམ་མེད་བདུད་རིགས་ལོག་པ་ཡི༔ བསམ་སྦྱོར་འཆང་ལ་ཨ་ཐཾ་རྒྱ༔ མནྚ་གུ་ཧྱ༔ ཞེས་པ་འདི་ཡང་འོ་བྲན་དཔལ་གྱི་སྤྲུལ་པའི་ཆ་ཤས་སྔགས་སྤྱོད་རིག་པ་འཛིན་པའི་བཀའ་སྤྱི་བོར་ཐོབ་པ་དང༔ བདག་གིས་བསྒྲུབ་བྱར་འོས་པའི་བཙུན་པ་དོན་གྱི་མིང་ཅན་དང༔ རང་སློབ་བཤད་སྒྲུབ་སོགས་ཀྱི་བཞེད་སྐོང་དུ༔ ཟོག་པོ་ས་ར་ཧི་ཏས་བཅོས་མིན་ཤུགས་ཀྱིས་བྲིས་པ་དགེ་ལེགས་འཕེལ༔