བསྔོ་བ་མི་ཟད་ལམ་མཆོག
བསྔོ་བ་མི་ཟད་ལམ་མཆོག་བཞུགས༔ རྩ་གསུམ་ཆོས་སྲུང་རྣམས་ལ་ཕྱག་འཚལ་ལོ༔ ཕྱོགས་བཅུ་ན་བཞུགས་པའི་རྒྱལ་བ་སྲས་དང་སློབ་མ་རྩ་གསུམ་ཆོས་སྐྱོང་དཀར་ཕྱོགས་ལྷ་ཀླུ་བདེན་ཚིག་གྲུབ་པ་དང་བཅས་པ་བསྔོ་བ་དང་སྨོན་ལམ་འགྲུབ་པའི་དཔང་པོ་ལ་དགོངས་སུ་གསོལ༔ བདག་གིས་དུས་གསུམ་བསགས་ཡོད་ཀྱི་དགེ་བའི་མཐུ་ལ་བརྟེན་ནས་སངས་རྒྱས་ཀྱི་བསྟན་པ་ལུང་དང་རྟོགས་པའི་བདག་ཉིད་བཤད་སྒྲུབ་འཁོར་ལོ་གསུམ་གོང་ནས་གོང་དུ་འཕེལ་ཞིང་རྒྱས་པར་འགྱུར་བའི་ཕྱིར་བསྔོ་བར་བགྱིའོ༔ བསྟན་འཛིན་གྱི་སྐྱེས་བུ་དམ་པ་ཕྱི་སོ་ཐར་ནང་བྱང་སེམས་གསང་བ་རིག་འཛིན་སྔགས་ཀྱི་བསླབ་པ་ལ་གནས་པའི་སྔ་རབས་འདས་པ་རྣམས་ཀྱི་ཐུགས་ཀྱི་དགོངས་པ་ཆོས་ཀྱི་དབྱིངས་སུ་རྫོགས་པའི་ཕྱིར་བསྔོ་བར་བགྱིའོ༔ ད་ལྟར་བཞུགས་པའི་བླ་མ་དགེ་བཤེས་མཁན་སློབ་བཙུན་པ་དམ་སྡོམ་བསླབ་ལ་གནས་པ་རྣམས་ཐུགས་མཐུན་ཁྲིམས་གཙང་བསླབ་པ་གསུམ་གྱི་ཡོན་ཏན་གོང་ནས་གོང་དུ་འཕེལ་ཞིང་སྐུ་ཚེ་བསྐལ་པ་རྒྱ་མཚོའི་བར་དུ་བརྟན་པའི་ཕྱིར་བསྔོ་བར་བགྱིའོ༔ རྣལ་འབྱོར་བདག་དང་མཆེད་ལྕམ་ཡོངས་ཀྱི་ཚེ་ཆོས་སྲིད་ཀྱི་བར་ཆད་དབྱིངས་སུ་ཞི་ཞིང་བསམ་དོན་ཆོས་བཞིན་དུ་འགྲུབ་ཅིང་ལོག་པའི་བསམ་པ་མི་འགྲུབ་ཅིང་ཕུང་བའི་དམ་སྲིའི་གཡུལ་ཞི་བའི་ཕྱིར་བསྔོ་བར་བགྱིའོ༔ བདག་ལ་འབྲེལ་བ་ཐོགས་པའི་འགྲོ་བ་ཕོ་མོ་ཐམས་ཅད་གནས་སྐབས་བར་ཆད་སྡུག་བསྔལ་གྱི་དབང་དུ་མི་འགྱུར་ཞིང་མི་དགེ་བཅུ་རིང་དུ་དོར་དགེ་བ་བཅུ་དང་དུ་བླངས་མི་ཆོས་གཙང་མའི་སྲོལ་མི་ཉམས་ཞིང་བདེ་སྐྱིད་རྫོགས་ལྡན་གྱི་དཔལ་ལ་ལོངས་སྤྱོད་པའི་ཕྱིར་བསྔོ་བར་བགྱིའོ༔ མཐར་ཐུག་རྣམ་མཁྱེན་སངས་རྒྱས་ཀྱི་གོ་འཕང་བདེ་བླག་ཏུ་ཐོབ་པ་དང་ཕྱི་མའི་སྐྱེ་སྲིད་དེ་ཡང་ནུབ་ཕྱོགས་བདེ་ཆེན་དག་པའི་ཞིང་དུ་མེ་ཏོག་པདྨའི་སྦུབས་སུ་སྐྱེ་ཞིང་སྐྱེས་མ་ཐག་ཏུ་མེ་ཏོག་པདྨའི་ཁ་ཕྱེ་ནས་སངས་རྒྱས་འོད་མཚན་སྟོང་འབར་དང་སྤྱན་གཟིགས་མཐུ་ཆེན་ཐོབ་ལ་སོགས་པའི་ཞལ་མངོན་སུམ་དུ་མཐོང་༔ སངས་རྒྱས་ཀྱི་ཕྱག་གཡས་བསོད་ནམས་བརྒྱ་ལས་གྲུབ་པ་མགོ་ལ་བཞག་ནས་བྱང་ཆུབ་དུ་ལུང་བསྟན་པ་ཐོབ་པའི་ཕྱིར་བསྔོ་བར་བགྱིའོ༔ མདོར་ན་མཁའ་ཁྱབ་མ་རྒན་འགྲོ་ཀུན་གནས་སྐབས་སུ་རྒྱུ་མ་རིག་པ་ལས་རྐྱེན་ལས་ཉོན་བག་ཆགས་འབྲས་བུ་སྡུག་བསྔལ་མཐའ་དག་ཞི་ཞིང་༔ འཁོར་བ་ངན་སོང་དྲུག་པོ་སྟོང་ཞིང་འོག་མིན་ཆོས་ཀྱི་དབྱིངས་ཀྱི་རྒྱལ་སྲིད་ལ་དབང་འབྱོར་ཞིང་མངོན་པར་བྱང་ཆུབ་རྡོ་རྗེའི་གོ་འཕང་མཆོག་བརྙེས་པའི་ཕྱིར་ཡོངས་སུ་བསྔོ་བར་བགྱིའོ༔ ཨོཾ་སྭ་སྟི༔ ཀུན་རྫོབ་སྣང་ཆའི་རྟེན་འབྲེལ་བསླུ་མེད་དགེ༔ ཟག་མེད་ཆོས་ཀྱི་དབྱིངས་སུ་བསྔོ་བར་བྱ༔ བསྔོ་བྱ་བསྔོ་བྱེད་བསྔོ་ཡུལ་རྣམ་པར་བྲལ༔ འཁོར་གསུམ་ཡོངས་དག་ཆེན་པོས་རྒྱས་གདབ་བོ༔ ཞེས་བསྔོ་བ་མི་ཟད་ལམ་མཆོག་འདི༔ ཨོ་རྒྱན་པདྨའི་རིག་པ་འཛིན༔ གཏེར་ཆེན་ལྷུན་གྲུབ་གླིང་པ་ཡི༔ སློབ་བུ་གཅོད་ཀྱི་རྣལ་འབྱོར་པ༔ རྣམ་པར་རྒྱལ་བའི་མིང་གིས་བསྐུལ༔ གང་དེའི་གཏེར་ཆེན་རྡོ་རིང་བའི༔ ཆོས་བདག་ཧོར་གྱི་བན་དེ་པ༔ གཞན་ཕན་བཟང་པོ་ཞེས་བྱ་བས༔ སྦྱིན་བདག་ཡ་ཆ་སངས་རྒྱས་སར༔ ཐུན་མཚམས་གཅིག་ལ་བྲིས་པའོ༔ དགེ་འདིས་རྣམ་མཁྱེན་ཡེ་ཤེས་ཀྱིས༔ འགྲོ་བའི་རྣམ་རྟོག་དག་གྱུར་ཅིག༔ མངྒ་ལམ༔