བསམ་གཏན་ཡེ་ཤེས་གླིང་པའི་རང་རྣམ།

༄༅། གཏེར་ཆེན་ལུང་རིག་གླིང་པའི་ཆོས་བདག་རིག་འཛིན་གཞན་ཕན་བཟང་པོའི་གསང་བའི་རྣམ་ཐར་ཡེ་ཤེས་མཁའ་འགྲོའི་གསང་ཚིག་སྐལ་ལྡན་སློབ་མའི་རྒྱུད་གྲོལ་བི་ཧ་ར་ཏིཥྨ།

༄༅། སྐུ་གསུམ་རང་རིག་ངོ་བོ་དྲིན་ཆེན་གྱི། །བླ་མ་ཨོ་རྒྱན་རྗེ་དང་སྒྲོལ་མ་ལ། །སྒོ་གསུམ་གུས་པས་གསོལ་འདེབས་སྨིན་གྲོལ་སྩོལ། །རང་གི་སྔོན་སྦྱངས་ལས་འཕྲོའི་རྣམ་ཐར་འབྲི། །ཆོས་དབྱིངས་བདེ་ཆེན་ཨ་དརྴ། །སྟོང་པ་རྣམ་ཀུན་ལུས་ཕྲ་མས། །འཇའ་ཚོན་སྣང་བའི་རི་མོ་འདི། །བདེ་སྟོང་གླུ་ཡི་ཚུལ་དུ་བླངས། །ཀྱེ་ཀྱེ་རིག་པའི་ཁྱེའུ་ཆུང་ལགས། །ཡེ་ཤེས་མཁའ་འགྲོའི་ཟློས་པའི་གར། །ཨ་ཙར་ས་ལེའི་དངོས་སྤྲུལ་པ། །བྱང་སེམས་གཞན་ལ་ཕན་དེ་ཡི། །རྣམ་པར་ཐར་བའི་ཚུལ་འདི་ངོམས། །ཨ་ལ་ལ་ཧོ། དང་པོ་ཆོས་སྐུའི་ཞིང་དུ་སྟོན་པ་རང་ཤེས་རིག་པའི་རྒྱལ་པོ་དང་སྟོན་འཁོར་དགོངས་པ་གཅིག་པའི་དབང་ཐོབ། གཉིས་པ་ལོངས་སྐུའི་ཞིང་དུ་ངེས་པ་ལྔ་དང་ལྡན་པའི་ཐབས་ཤེས་ཟུང་འཇུག་སྣང་བའི་དཔལ་གྱིས་འགྲོ་ལ་དགོངས་པར་མཛད་ཅིང་། གསུམ་པ་སྤྲུལ་སྐུའི་ཞིང་ཁམས་སུ་འགགས་མེད་བསྟན་འགྲོའི་རྩ་ལག་ཨོ་རྒྱན་མཚོ་སྐྱེས་རྡོ་རྗེས་འགྲོ་ལ་སྨན་པའི་མགོན་དུ་མངགས་པའི་ཕོ་ཉ་མཛད་ནས་ཟློས་གར་སྲིད་པའི་ལམ་དུ་ཐུགས་རྗེའི་འཇུག་པ་མངོན་ཚེ། དྲིན་ཆེན་མ་ཡི་ལྷུམས་སུ་སྒྱུ་མའི་འཇའ་སྐུར་ཞུགས་པའི་ཉམས་ལ་ལྷ་སའི་ཇོ་བོ་མཐོང་ཞིང་སྐྱེ་བའི་ལམ་རྒྱུད་གྲོལ་ཞིང་། ཕུར་སྲུང་དམ་ཅན་རྒྱ་མཚོས་ཉིན་མཚན་ཀུན་ཏུ་མེལ་ཚེ་མཛད་དོ། །དེ་ནས་སྐུ་བལྟམས་པའི་དུས་ལ་བབས་པའི་ཚེ་ན་གནམ་སྟོང་སངས་རྒྱས་དུས་ཆེན་སྤྲེའུ་ཟླ་བའི་མཇུག་ཏུ་དགེ་བའི་བག་ཆགས་སད་པའི་སྐྱེ་བའི་མྱུ་གུ་འཁྲུངས་ཚེ། མཁའ་སྤྲིན་དང་འཇའ་དཀྱུས་སོགས་ལེགས་པའི་མཚན་མ་བཟང་པོ་ངོ་མཚར་བའི་ལྟས་དུ་མ་དང་བཅས་ཏེ་གཟུགས་སྐུར་བཞེངས་ཏེ་ལོ་བདུན་གྱི་བར་དུ་རྒྱུད་ལ་སྙིང་རྗེ་རང་འཁྲུངས་སོགས་ཡ་མཚན་རྨད་དུ་བྱུང་བའི་ལྟས་མང་དུ་མངོན་ཡང་རགས་རིམ་ཙམ་གླེང་ན། ཡར་ངོའི་ཚེས་བརྒྱད་སྒྲོལ་དཀར་ཡིད་བཞིན་འཁོར་ལོའི་དུས་ཆེན་ལ། སྣང་མིན་ཉིང་འཁྲུལ་དུ་མཁའ་འགྲོ་ཡེ་ཤེས་མཚོ་རྒྱལ་མི་མོའི་ཚུལ་དུ་བྱོན་ནས་དར་ལྗང་གུའི་བསྲུང་མདུད་དང་། བྱིན་རླབས་རྟེན་འདུས་རིལ་བུ་བདུན་གནང་བ་ཕྱི་ཉིན་སྔས་ཐོག་ཏུ་མངོན་པ་དང་། ཡང་ཡར་ངོའི་ཚེས་བཅུའི་ཉིན་ཞིག་ལ་བྱིས་པའི་ཉམས་འུར་ནས་སོག་པའི་ཌཱ་མ་རུ་དཀྲོལ་ཏེ་ཁྱིམ་ཕྱི་ནང་ཐམས་ཅད་དུ་གར་འཆམས་གླུ་བླངས། ཅི་བྱས་གཏད་སོས་དབེན་པ་ལ། མ་རྒན་གྱིས་ཁྲོ་འཁྲུགས་དྲག་པོའི་སྟོབས་ཀྱིས་བརྡེག་པར་བརྩམས་ཏེ་བདས་པ་ན། སྒོ་གདན་རྡོ་རིང་གི་རྩེ་ལ་རྡོ་རྗེ་སྐྱིལ་མོ་ཀྲུང་བཅས་ཏེ་བཞུགས་སོ། །དེ་ལ་ཐམས་ཅད་ཀུན་གྱིས་ཡ་མཚན་རྨད་དུ་བྱུང་ཞིང་གསང་རྒྱ་བྱས། ཡང་ཉིན་གཅིག་རུ་བཀལ་ཏེ་མེས་པོ་རྒན་འཁོག་དེས་ཤ་ལ་བཅར་ཞིང་གཡག་གཅིག་ཞོན་ནས་ཆུ་བྲག་འཐབ་པའི་གནས་སུ་ཕྱིན་པ་ལས། བྱིས་པ་དེས་ལག་ཡ་གནམ་ལ་བསྒྲེངས་ནས་སེ་གོལ་རེ་གཏོགས་བཞིན་ལྟ་སྟངས་མཛད་ནས་ཉེས་སྐྱོན་མེད་ཅེས་བསྒྲགས་ཏེ་བདེ་བར་སླེབས་པ་དང་། དེ་ནས་རང་ལོ་བཅུ་གསུམ་ཆུ་ཕོ་སྤྲེའུའི་ལོ་ལ་སླེབ་པའི་དུས་སུ། སློབ་དཔོན་བཻ་རོ་ཙ་ནའི་ཟློས་གར་མཆོག་སྤྲུལ་བྱང་ཆུབ་རྡོ་རྗེས་དབུགས་དབྱུང་གཟེངས་བསྟོད་དེ་སྤྲུལ་པའི་སྐུ་ཡིན་པར་དམ་པའི་གསུང་གིས་བསྔགས་པའི་མེ་ཏོག་འཐོར། དེ་ནས་རིགས་བཟང་པོ་ཞིག་ཡིན་ནོ་ཞེས་པའི་སྒྲ་མི་དང་མི་མིན་ཀུན་གྱིས་ཕྱོགས་མཚམས་ཐམས་ཅད་དུ་བསྒྲགས། སྤྲུལ་པའི་སྐུ་དེ་ཉིད་ཀྱིས་ཡི་གེ་འབྲི་བ་སོགས་འདྲེན་པའི་སློབ་དཔོན་མཛད། ཐུགས་བརྩེ་བ་ཆེན་པོས་རྗེས་སུ་བཟུང་བ་ཡིན་ནོ། །ཡང་རྡོ་རྗེའི་མཆེད་པོ་གསང་སྔགས་གླིང་པ་དང་རྩེད་མོ་འགའ་བྱས་སྐབས། ཡུལ་གྱི་ཟོ་དོར་དང་སྔར་མེད་པའི་སྡེ་བརྒྱད་དུ་མ་མཐོང་ཞིང་གཏམ་གླེང་མང་པོ་བྱས་པའང་སྣང་། བགྲང་བྱ་ལྔ་གསུམ་རྫོགས་པ་ནོར་སྐྱོང་གི་ལོ་ལ། སྔོན་སྦྱངས་སྨོན་ལམ་དབང་གིས་མཁའ་འགྲོ་ཡེ་ཤེས་མཚོ་རྒྱལ་གྱིས་རྗེས་སུ་བཟུང་ནས་ལས་འཕྲོ་སད་པའི་དུས། མཁའ་འགྲོའི་བརྡ་དང་། ཉམས་སྣང་ངོ་མཚར་བ་འགའ་དང་། དག་པའི་སྣང་བ་དཔག་ཏུ་མེད་པ་མཐོང་ན་ཡང་བར་ཆད་བདུད་སྲིན་དམ་འགོང་གིས་བར་ཆད་བསླངས་པས་རེ་ཞིག་བསྒྲིབ་པ་ལ། རང་ལོ་བཅུ་དགུ་སྡེར་ཆགས་གཅན་གཟན་རྒྱལ་པོས་ངར་སྒྲ་སྒྲོག་པའི་ཚེ་མཁའ་འགྲོ་ཡེ་ཤེས་མཚོ་རྒྱལ་ཉིད་འཇིག་རྟེན་མིའི་ཟོལ་དུ་བསྟན་པ་སྤྲུལ་པའི་སྐུ་མཆོག་དམ་པ་གཏེར་ཆེན་རིག་འཛིན་ལུང་རིག་གླིང་པ་ཞེས་མཚན་སྙན་དབྱར་རྔ་ཕྱོགས་བརྒྱར་ལྡིར་བའི་སྐྱེས་བུ་དེ་ཉིད་ཀྱིས་སྐལ་ལྡན་ཆོས་ཀྱི་བདག་པོའི་མིང་གི་ཅོད་པཎ་བཏགས་ཏེ་རྒྱལ་ཚབ་འཁྲུལ་བ་མེད་པར་མངའ་གསོལ་ལོ། །རྡོ་རྗེའི་ཚིག་གིས་དབུགས་དབྱུང་ལུང་བསྟན། ཡིད་ཆེས་པའི་གྲུབ་རྟགས་ཡ་མཚན་རྨད་དུ་བྱུང་བ་མང་པོ་བསྟན། རང་ལ་ཡང་ཕྱིར་མི་ལྡོག་པའི་དད་པ་བླ་ལྷག་ཏུ་བྱུང་ཞིང་། དུས་རྒྱུན་ཏུ་སངས་རྒྱས་དངོས་སུ་མཐོང་ཞིང་དམ་པ་གང་གི་གསུང་ཆོས་གཏེར་གསར་ཁོ་ན་ཉམས་སུ་བླངས་པ་ལ་མ་ཅིག་དུད་སོལ་ལྷ་མོས་ཞལ་གཟིགས་ཤིང་འབྱུང་འགྱུར་གྱི་ལུང་བསྟན། དེ་ནས་ལེགས་པའི་མཚན་མ་འགའ་ཞིག་གིས་བརྒྱན། མི་རྟག་པ་དང་། ངེས་འབྱུང་ཟབ་མོས་རྒྱུད་བརླན་ཅིང་། དྲིན་ཆེན་བླ་མའི་ཞལ་རྒྱུན་མང་པོས་སེམས་ལ་གསོས་བཏབ་པས་ཉམས་རྟོགས་ལ་བོགས་མང་དུ་ཐོན། ཡང་ཡོངས་འཛིན་དམ་པ་མཁན་རིན་པོ་ཆེ་དཀོན་མཆོག་ཚུལ་ཁྲིམས་ཀྱིས་བདག་ལ་སྒྲ་སྐྱོར་སྦྱོང་བྱེད་དུ་བཅུག་པའི་སྐབས། ནམ་མཁའ་ལ་ཞག་བདུན་གྱི་བར་དུ་ཉི་ཟླ་སྐར་གསུམ་དུས་གཅིག་ལ་ཤར་བ་དང་། ནུབ་གཅིག་རྨི་ལམ་དུ་ཤེས་རབ་ཀྱི་ལྷ་མཐོང་བའི་ལྟས་ཤར་ཞིང་ཀྲིཏ་ཀུན་བཤད་ལ་ཐུག་སྐབས་ཉིན་རེར་སྤར་ལྡེབ་བརྒྱད་རེ་མ་བསླབ་བཞིན་སེམས་ལ་ཆུབ། ཡོངས་འཛིན་རིན་པོ་ཆེ་ངོ་མཚར་ཏེ་ཁྱོད་ལ་སྔོན་སྦྱངས་ཀྱི་ལས་འཕྲོ་འདུག འོན་ཀྱང་ང་རྒྱལ་མ་སྐྱེད་ཅིག་གསུངས། དེ་ནས་སྔོན་སྦྱངས་ལས་ཀྱི་འཕྲོ་མཐུད་པའི་རྨད་བྱུང་རྡོ་རྗེ་གྲོ་ལོད་ཀྱི་སྒྱུ་འཕྲུལ་གཏེར་ཆེན་བདུད་འཇོམས་གླིང་པས་བརྒྱུད་འཛིན་ཆོས་ཀྱི་བདག་པོ་ཡིན་པར་ལུང་བསྟན། ཟབ་གསང་རྫོགས་པ་ཆེན་པོ་ངོ་སྤྲད། ཟླ་བ་བརྒྱད་དུ་བསྒོམ་པའི་ཚེ་ཉིན་རེ་བཞིན་ཡར་དག་པ་སངས་རྒྱས་ཀྱི་ཞིང་ཁམས་དང་། མར་ངན་སོང་གསུམ་གྱི་སྣང་བ་སོགས་བཟང་ངན་གྱི་རྟོག་ཚོགས་དཔག་ཏུ་མེད་པ་མཐོང་ཡང་ཐམས་ཅད་བདེན་མེད་སྒྱུ་མའི་ཆོ་འཕྲུལ་དུ་ཤེས་ཤིང་འཁོར་འདས་མཉམ་པར་བརྡལ་བའི་ཡེ་གནས་རྫོགས་པ་ཆེན་པོ་འོད་གསལ་འདུས་མ་བྱས་པའི་ཉམས་སྣང་དུ་མ་ཤར། ཉམས་གོང་འཕེལ་གྱི་ས་ལ་སླེབ་ལ་ཁད་དུ་སོང་། མཚན་མོ་ཡེ་ཤེས་རང་སྣང་གི་མཁའ་འགྲོ་རྣམས་ཀྱིས་བརྡ་གླུ་དང་མགུར་བྱང་མང་པོ་བཀྲོལ། ཉིན་མོ་གཏེར་ཆེན་བླ་མ་དམ་པས་ཐུགས་བརྩེ་བ་ཆེན་པོས་རྗེས་སུ་བཟུང་། དེ་ལ་སོགས་པའི་༼རིག་འཛིན་གསང་སྔགས་གླིང་པ་དང་། ཨོ་རྒྱན་མཁའ་སྤྱོད་གླིང་པ། པདྨ་དྲག་རྩལ་གླིང་པ། རིག་འཛིན་ལྷུན་གྲུབ་གླིང་པ། དབང་ཆེན་སྔགས་བདག་གླིང་པ།༽དུས་བབ་རྩོད་བྲལ་གྱི་གཏེར་སྟོན་སྐྱེས་བུ་བདུན་གྱི་རྡོ་རྗེའི་ལུང་གིས་ཆོས་ཀྱི་བདག་པོར་བསྔགས་པ་སོགས་དུ་མ་ཡོད་ཀྱང་ཡི་གེའི་འཇིགས་ནས་མ་བྲིས་སོ། །དེ་ནས་རང་ལོ་ཉེར་ལྔ་ལ་སླེབ་པའི་དུས། དམར་རྒྱན་གྱི་སྤྲུལ་པ་དང་འཕྲད་པའི་ཚེ་རཱ་ག་སྲིད་པའི་ཉེར་ལེན་མང་པོས་བསླུ་བྲིད་བྱུང་བའི་ཚེ། དཔལ་ཆེན་རྡོ་རྗེ་གཞོན་ནུའི་བསྙེན་སྒྲུབ་དང་། བསམ་ལྷུན་འབུམ་གྱི་རིམ་གྲོ་ལ་བརྩོན་ཞིང་། ཉིང་འཁྲུལ་དུ་པཎ་ཆེན་བཻ་རོ་ཙ་ནས་ཞལ་གཟིགས་ནས་འདི་ལྟར་གསུང་བྱུང་། ང་ཡི་ཕྲིན་ལས་སྤྲུལ་པ་དང༔ སྣ་ནམ་བདུད་འཇོམས་ཡོན་ཏན་སྤྲུལ༔ རྒོད་ཀྱི་ལྡེམ་འཕྲུ་བྱ་བ་ནི༔ དགེ་བཤེས་ཚུལ་ཁྲིམས་རྣམ་པར་རྒྱལ༔ ཡང་སྲིད་ཁྱོད་ཀྱི་གདུང་རྒྱུད་ནི༔ ཀུ་ཀུའི་གདོང་ལ་འཁོར་ཡང་སྲིད༔ རྟེན་འབྲེལ་ཟབ་མོས་མཚམས་སྦྱར་ན༔ བསྟན་འགྲོའི་གཉེན་དུ་ལན་གཅིག་འགྱུར༔ མ་འདའ་རིགས་ལྡན་ཐོད་པ་རྩལ༔ ཞེས་གསུངས་རང་བྱུང་མཁའ་ལ་ཐིམ། སད་ནས་ཅི་ཡིན་གྱི་བརྟགས་དཔྱད་བྱས་ཀྱང་ཆེར་མ་མངོན་ཡང་བདེན་རྫུན་གྱི་འཇའ་སྤྲིན་མཁའ་ལ་ཤར་བ་ཀུན་གྱི་སྤྱོད་ཡུལ་དུ་གྱུར། ཡང་གནས་མཆོག་ཏཱ་རེའི་ཞོལ་དུ་གུ་རུ་ཚེ་མཐའ་ཡས་པའི་ཚོགས་མཆོད་ཅིག་ཕུལ་བའི་དུས་བདག་གི་བསམ་པ་ལ། རིག་འཛིན་གསང་སྔགས་གླིང་པའི་གཏེར་ཆོས་ཀྱི་དབང་ལུང་དམ་པོ་ཞིག་མ་ཐོབ་པས། ད་ནི་གསོལ་བ་བཏབ་ནས་སྒོམ་པ་མ་གཏོགས་བློ་ཐབས་བྲལ་བསམ་ནས། ཆོ་ག་རྗེས་ཆོག་བཅས་ལེགས་པར་གྲུབ་ནས། སྲོད་འཁོར་དགོང་མོ་རྨི་ལམ་ལ་བཞུགས་སྐབས། གཏེར་སྟོན་ཉིད་ཀྱིས་ཅང་ཤེས་རག་དཀར་རིན་པོ་ཆེའི་ཆས་ལྡན་ཞིག་བཅིབས་ནས་ལྷོ་ནུབ་ཟངས་མདོག་དཔལ་རི་ནས་རྒྱ་བོད་པཎ་གྲུབ་འགའ་དང་། བཙུན་པ་པཎ་ཞུ་ཅན་མང་པོའི་འཁོར་དང་བཅས་ཏེ། མཁའ་འགྲོ་ལྔས་མཆོད་རྫས་རྣམས་ཐོགས་ནས་འཇའ་འོད་ཀྱི་ཀློང་ནས་ཕ་གིའི་མདུན་མཁར་བྱོན་ཏེ། ངའི་ཟབ་གཏེར་དགོངས་མཛོད་གསང་བ་ཡང་ཏིག་གི་དབང་ལུང་དང་བཀའ་གཏད་ཁྱོད་ལ་གནང་། ང་ཡི་བརྒྱུད་པ་ཟུངས་དང་། ལུང་རིག་གླིང་པ་དང་ངེད་ཅག་སྤྲུལ་གཞི་གཅིག་ལ་ཆ་ལུགས་ཅུང་ཟད་སྣང་ཚུལ་ལགས་གསུངས་ནས། གཏེར་གྱི་སྒྲོམ་བུ་དང་པོ་ཏི་དམར་པོ་ཞིག་མགོ་ལ་བཞག་ནས་བླ་མ་བརྒྱུད་པའི་བདེན་བརྗོད་ཀྱི་བཀའ་ལུང་དང་དབང་གཏད་བྱས་ནས་བདག་ལ་གནང་། ཁོང་རྣམས་བྱ་ལམ་རྗེས་མེད་དུ་རང་ལ་ཐིམ་མམ་གཞན་དུ་གཤེགས་པའི་མཚན་མ་ཅང་མ་ཤེས་སོ། །རྨི་ལམ་ལས་ལྡང་བ་ན་དག་སྣང་ཝ་ལེ་བ་ཤར་འདུག དེ་ནས་བགྲང་བྱ་ཉེར་བདུན་མེ་ཕོ་ཁྱིའི་ལོ་ལ། ལི་རྩང་ཕྱོགས་ཀྱི་ཡུལ་ལྷ་འགའ་ཞིག་གིས་མཚམས་ཞུ་དང་ཞབས་ཏོག་ཕུལ་བའི་ཉམས་མང་པོ་ཤར་ནས་ཡུལ་དེའི་ཕྱོགས་ཀྱི་སྐྱེ་འགྲོ་མ་ལུས་པ་དབང་དུ་བསྡུས་ནས། དམ་པའི་གདུང་རྒྱུད་མ་ཆད་པའི་ཆོས་གྲྭ་ཆེན་པོ་གདོང་ལྔའི་མིང་གིས་སྤྲས་པའི་དགོན་ཏུ་སྙིང་ཐིག་གི་བསྟན་པའི་སྲོལ་བཏོད། དེ་ནས་རིམ་བཞིན་དུ་བསྟན་དང་འགྲོ་ལ་ཕན་པའི་ཡོན་ཏན་མངོན། རྗེ་བཙུན་མས་རྗེས་སུ་བརྩེ་བའི་ལི་སྨད་ཚང་ལ་འོད་ཟེར་ཅན་མའི་སྒོ་ནས་དམག་བཟློག་བྱས་ཚེ་དམག་མི་བརྒྱ་ལྷག་ཙམ་བསྐོར་དུ་བྱུང་ཡང་ཁ་མ་འཆམ་པས་རང་ཡུལ་དུ་ལོག སྔགས་སྲུང་ཁྲོས་མས་བསྲུང་བའི་སྣང་བ་ཤར་བ་དང་། ཡེ་ཤེས་མཁའ་འགྲོའི་ཞལ་ལུང་བཞིན། རྫ་རི་སྟག་བཀྲ་ལ་ཕེབས་ཚེ་རིག་པ་འཛིན་པ་གྲྭ་མདའ་བླ་མ་སོགས་བླ་སེར་བདུན་ཅུ་ཙམ་གྱིས་དད་འདུན་ཆེས་ཆེར་བསྐྱེད་ཅིང་། རིག་འཛིན་ལུང་རིག་གླིང་པའི་ཕུར་པ་དམ་སྲི་ཚར་གཅོད། ནོར་རྒྱུན་ལྷ་མོ་སོགས་གཏེར་གསར་དུ་མའི་དབང་ལུང་འབོགས། གཏེར་སྟོན་དེ་ཉིད་ཀྱིས་ཀྱང་ཆོས་ཀྱི་བདག་པོར་མངའ་གསོལ་ཞིང་གཏེར་ཆོས་རྣམས་སྤྲད། རི་བོའི་སྤོ་བྲག་གི་ལམ་ཞིག་ཏུ་ཕྱིན་པས་དྲེའུའི་ཁལ་ཐག་ཆད་ནས་གཡང་ལ་ལྷུང་དུ་ཉེ་ཚེ། སྔགས་སྲུང་མས་ཉེན་ཁ་བསལ་ནས་བདེ་བའི་ས་ལ་ཕྱིན་ནས་རང་གི་བསོད་ནམས་དང་མོས་པའི་ལོངས་སྤྱོད་ཀྱིས་མཐུན་རྐྱེན་བསྒྲུབས་ཏེ་རང་ཡུལ་ཏུ་སླེབས་པ་དང་། སྔར་ཡོངས་འཛིན་གྱི་བླ་མ་དམ་པ་རིག་འཛིན་ལུང་རིག་གླིང་པའི་ལུང་བསྟན་ལས། འཁོར་ལོ་སྣ་ཅན་འགའ་ཡིས་གུས་ཚུལ་སྟོན༔ ཞེས་གསུངས་པ་ལྟར། རང་ལོ་ཉེར་བརྒྱད་ཕག་གི་ལོ་ལ་དབྱི་མཁར་ཐེག་ཆེན་ཆོས་འཁོར་གླིང་དུ་དབྱར་གནས་པའི་ཚེ་མཆོད་གཡོག་ཏུ་བསྐོས་ཀྱང་རྨི་ལམ་དུ་འཕགས་མ་རིག་བྱེད་ལྷ་མོས་འཇིག་རྟེན་པའི་མི་མོའི་ཚུལ་གྱིས་ཞལ་གཟིགས་ནས། ངའི་རྣ་ཆ་འདི་ཁྱོད་ལ་གཏད། དབྱིའི་ཆོས་གྲྭའི་ཁྲི་ལ་མངའ་གསོལ་བ་ཡིན་པས་དེ་ལྟར་གྱིས་ཤིག་ཟེར་ནས་མི་སྣང་བར་གྱུར། དེའི་ཕྱི་ཉིན་སྤྲུལ་པའི་སྐུ་པདྨའི་མཚན་འཆང་གང་དེས་ཁོང་དབུས་ལ་ཕེབས་རན་པས་ཁྱོད་མཁན་པོ་ལ་བཞུགས་དགོས་ཞེས་བཀའ་གསུང་ནན་དུ་ཕེབས་པ་ལ་སེམས་ཤིན་ཏུ་མ་དགའ་སྟེ། སྤྲུལ་པའི་གཏེར་ཆེན་བླ་མ་རིན་པོ་ཆེའི་སྤྱན་སྔར་ཞུས་པས་བླ་མའི་ཞལ་ནས། རིག་བྱེད་མའི་དངོས་གྲུབ་ཡིན། མོས་པ་རྣམ་བཞིའི་གཅིག་རེད་འདུག་པས་དེ་ལྟར་མཛོད་གསུངས་ནས། མཁན་ཞུ་སྡེ་སྣོད་གསུམ་པ་ཞིག་གནང་ཞིང་ཕྱག་གཉིས་མགོ་ལ་བཞག་སྟེ་བསམ་པ་མྱུར་འགྲུབ་མ་ཚར་གསུམ་གསུངས་ནས་བདག་ལ་བྱིན་རླབས་མཛད། དེ་ནས་སྡོམ་གསུམ་སོགས་དཔེ་ཆ་འགའ་མ་བསླབས་ཀྱང་ཚིག་དོན་ཕལ་ཆེར་ལ་ཐོགས་ཆགས་མེད་པའི་ཤེས་རབ་བརྙེས་ཤིང་དགེ་ལེགས་ཀྱི་ལྟས་བཟང་པོ་དང་བཅས་དབྱར་གནས་མཐར་ཕྱིན། བགྲང་བྱ་སོ་གཅིག་གཉིས་ནག་སྟག་གི་ལོར། སྔར་གཏེར་ཆེན་བླ་མའི་ལུང་བསྟན་ལས། རིས་བཀྲ་སྟག་ལ་ཞོན་པའི་ཁྲོ་རྒྱལ་གྱིས༔ དབང་སྡུད་དབང་གི་ཕྱག་ཆ་ལག་ཏུ་སྟེར༔ ཞེས་གསུངས་པ་བཞིན། སྔོན་གྱི་ལས་འཕྲོ་ཡོད་པའི་མ་ཅིག་ལབ་ཀྱི་སྒྲོན་མའི་ཟློས་གར་མཁའ་འགྲོ་ཆོས་སྒྲོན་བཟང་མོས་རྩང་ཡུལ་གྱི་གྲྭ་པ་ཐེག་མཆོག་ཟེར་བ་གདོན་ནད་ཀྱིས་བཏབ་ནས་མཁའ་འགྲོ་ལ་སྐྱབས་འཇུག་ཞུས་པས། ཌཱཀྐི་དེས་ཡེ་ཤེས་སྤྱན་གྱིས་ལེགས་ཉེས་བརྟགས་པས། དབྱི་ཁྲོམ་རྒྱུད་ཀྱི་གཡས་ཕྱོགས། ཏཱ་རེ་ཞེས་རི་བོ་གདུགས་དང་རྒྱལ་མཚན་གྱི་ཚུལ་ཏུ་ཡོད་པའི་འདབས་ན། ངའི་སྔོན་གྱི་ཐབས་མཆོག་ཕ་ཐོད་པ་བྷ་དྲའི་སྐྱེས་མཐའ་རིག་འཛིན་གཞན་ལ་ཕན་པའི་གང་ཟག གསང་སྔགས་ཐབས་ལ་མཁས་པ་སྦས་པའི་རྣལ་འབྱོར་པ་ཞིག་བཞུགས་པས་དེ་དང་འཕྲད་ན་ཁྱོད་ཀྱི་ནད་སོས། བློ་སེམས་ཆོས་ལ་འགྱུར། ང་རང་ལ་ཡང་རྟེན་འབྲེལ་ཡོད་པས། ཤེལ་རྡོ་དང་བྱི་རུ། གཡུ་ཆ་ཞིག་སྤྲོད་དང་། རྟེན་འབྲེལ་གནད་ལྡན་ཡོད་གསུངས་ནས་ཐོན་པའི་ཚེ། ཟླ་བ་འགའི་ནུབ་གཅིག་ལ། རྗེ་བཙུན་འཕགས་མ་སྒྲོལ་མས་ལུང་བསྟན་ནས། ཐེག་མཆོག་དེ་ཁྱོད་དང་སྔོན་ནས་འབྲེལ་བའི་སློབ་མ་ཞིག་ཡིན། དེ་དང་ལྷན་དུ་འབའ་ལྷ་སྒང་གི་ཕྱོགས་སུ་སོང་དང་སློབ་བུ་འདི་ནད་ལས་གྲོལ་བ་དང་། ཁྱོད་ལ་རྡོ་རྗེ་གྲོ་ལོད་ཀྱི་དབང་སྡུད་ཀྱི་ཕྱག་ཆ་མཁའ་འགྲོའི་སྤྲུལ་པའི་དམ་པ་གང་གིས་གཏད་དོ་ཞེས་ཟེར་བའི་ཉམས་ཤར། དེ་ནས་ཞག་འགའ་ནས་སྨྱོན་པ་འུར་ལང་བ་ལྟར། ཤར་མི་ཉག་ཕྱོགས་སུ་ཕྱིན་པའི་ལམ་དུ་དམག་འཁྲུགས་ཀྱི་འཇིགས་པ་ཆེ་བས་གར་འགྲོ་གཏད་སོ་དབེན་པས་དགོང་མོའི་དུས་བུད་མེད་སྔོན་མོ་ཞིག་གིས་འདིར་ཤོག་དང་དགོན་པ་ཞིག་ཡོད་ཟེར་བའི་ཉམས་ཤར་བས། དེའི་རྗེས་སུ་འབྲངས་ནས་སོང་བའི་ཚེ་ལུང་པ་ཞིག་གི་སྟོད་ན་ཁང་ཆེན་དང་། མེ་ཤིང་ཆུ་གསུམ་ཕུན་སུམ་ཚོགས་པ་ཞིག་ཡོད་པས་དེ་རུ་བསྡད། བུད་མེད་གར་སོང་ཆ་མེད་དུ་བོར། ཕྱི་ཉིན་འགྲོ་བའི་དུས་ལ་བབས་པ་ན་ཆར་པ་དྲག་ཏུ་བབས་ནས་ཁང་པའི་ཁྱམས་ཤིག་ཏུ་ཅུང་ཟད་བསྡད་པའི་ཚེ། མི་སྐྱ་བོ་མིང་ལ་བཀྲ་ཤིས་ཟེར་བ་ཞིག་དེར་སླེབས་ནས། ཁྱོད་ཚོ་སུ་ཡིན་ཟེར་བས། ལོ་རྒྱུས་ཞིབ་ཏུ་སྨྲས་པས། ཨ་བ་རིས། མདང་མར་ཁོག་ལ་སོང་ན་དགྲས་བཅོམ་ཚར་ཡོད། དེར་མ་སོང་བ་ཤིན་ཏུ་ངོ་མཚར། དེ་རིང་ངའི་རྩར་ཤོག་དང་། མགོ་ཐོན་ཨེ་འོང་བལྟ་ཟེར་བས། དེ་ལ་འགྲོགས་ནས་སོང་བས། དུད་ཚང་མང་པོ་ཞིག་གི་ནང་དུ་སླེབས་པ་དང་། དེར་གནས་སྤོ་བྱས་ནས་ཡོད་སྐབས། འདྲ་བ་སོགས་ཀྱི་དམག་མི་འགའ་ཞིག་གིས་ཁྱེད་རྣམས་ཉུལ་མ་ཡིན་པས་བཀྱིག་གམ་བརྡུང་དགོས་ཟེར་བའི་ཚིག་བསྒྲགས་ཚེ། རྩ་གསུམ་ཆོས་སྐྱོང་སྲུང་མ་ལ་མངོན་པར་མཁྱེན་པར་གསོལ་བས་རྗེ་བཙུན་མ་དང་དཔལ་ལྡན་དུད་སོལ་ལྷ་མོ་ཟུང་གིས་ཞལ་གཟིགས་ཤིང་བསྲུང་བ་མཛད། དེ་ནས་སེམས་པ་ཤིན་ཏུ་སྐྱིད་ཅིང་། དམག་མི་རྣམས་ཀྱིས་ཚིག་ངན་སྨྲས་པ་བྲག་ཆ་བཞིན་བདེན་མེད་དུ་མཐོང་། ཉེས་སྐྱོན་ཅི་ཡང་མ་བྱུང་། དེ་ནས་མྱུ་གུ་དགོན་༼ལྕམ་པ་སྟོད་མའི་ཉི་འོད་དགོན།༽གྱི་ཆོས་གྲྭ་རུ་སླེབ་ཚེ་བླ་གྲྭ་ཐམས་ཅད་ཡོན་ཁ་ཞིག་ལ་འཚོགས་ནས་འཚོགས་གྲོལ་འོང་བའི་སྐབས་དེར་ཐོན་པས། ཀུན་གྱིས་བླ་མ་ལགས་ཁམས་བཟང་འདིར་འབྱོན་པ་དགེ་ཞེས་གསུངས། དེར་ཆོས་ཁྲིམས་ཀྱིས་མཾ་ས་ཁོལ་གཅིག་གནང་བས། རྟེན་འབྲེལ་བཟང་བསམས་ནས་སྣང་བ་དགའ་ཡ་ལེ་གྱུར་ཏོ། །དེའི་ནུབ་མོ་འཛམ་གླིང་དཔའ་བོ་རྡོ་རྗེ་ལེགས་པས་དངོས་སུ་ཞལ་གཟིགས་ནས། བཟའ་བཏུང་གོས་རྒྱན་སོགས་ལོངས་སྤྱོད་ཀྱི་དངོས་པོ་ཇི་སྙེད་འབྱུང་བའི་རྟེན་འབྲེལ་མང་པོ་བསྒྲིགས། ཕྱི་ཉིན་སྔ་དྲོ་ཉི་ཤར་ལ། ཧཱུྃ་རལ་གྱི་སྤྲུལ་པའི་ནིརྨ་ཀ་དང་འཕྲད་ནས་ལེགས་པའི་ལྟས་བཟང་པོ་འགའ་ཞིག་གིས་མཚམས་སྦྱར་ཏེ་རང་མི་ཕྱི་ལ་སོང་བ་རང་ཁྱིམ་དུ་སླེབ་པ་ལྟ་བུའི་བསམ་པ་སྐྱེས། དེ་དང་དེའི་རྗེས་འབྲེལ་དུ་ཡུལ་གྱི་བསྟན་པའི་གཙོ་བོ་རུ་མངའ་གསོལ། སྤྲུལ་པའི་སྐུ་ཡིན་པའི་མིང་ཁྱབ། ལི་སོགས་དབྱི་རྩང་ཁག་ལྔ་དང་ནགས་ཕྲན་སོགས་ཡུལ་ཁམས་ཕལ་ཆེར་གྱིས་བླ་མ་རུ་མཐོང་བའི་གྲགས་པ་ཐོབ། པདྨ་དྲག་རྩལ་གླིང་པའི་མདུན་དེར་ཁོང་གི་གཏེར་གསར་དང་འཇའ་ཚོན་སྐོར་ཞུ་བའི་ཉིན་གཅིག་རྗེ་བཙུན་མི་ལ་རས་པའི་སྒྲུབ་ཐབས་ཀྱི་རྗེས་གནང་ཞུ་བའི་བྱིན་འབེབས་དུས་ལུས་རྔུལ། སྐྲ་གཟེངས། སེམས་ལ་དད་པ་བཟོད་མེད་མཆི་མ་འཁྲིགས་པ་ཙམ་བྱུང་ཚེ། རྗེ་བཙུན་རིན་པོ་ཆེའི་ཞལ་མཐོང་། ཡང་ཕྱིའི་དུས་སུ་བླ་མ་གཏེར་སྟོན་ཉིད་ཀྱི་སྐུ་ཚེའི་བར་ཆད་བསལ་བའི་ཆེད་དུ་བདག་གིས་གྲུབ་པའི་དབང་ཕྱུག་ཐང་སྟོང་རྒྱལ་པོའི་ཚེ་དབང་བླ་མ་ལ་ཕུལ་བའི་བྱིན་འབེབས་དུས་གྲུབ་ཆེན་དངོས་བར་སྣང་འཇའ་གུར་དུ་བཞུགས་ཤིང་། ལྟ་སྟངས་མཛད་པ་རང་གིས་མཐོང་ཞིང་། དབང་གྲལ་དུ་གནས་པ་ཀུན་ལ་སྣང་བར་གྱུར། ཕལ་ཆེར་ལ་དགའ་བའི་བསམ་པ་སྐྱེས། ཕལ་ཆེར་ལུས་འདར། ལ་ལ་ལུས་ཀྱི་བ་སྤུ་གཟེངས། སྐྱེས་བུ་དམ་པ་ཕལ་ཆེར་ལ་བརྗོད་མེད་ཀྱི་ཉམས་ཤར། བླ་མ་རིན་པོ་ཆེ་གཏེར་སྟོན་གྱིས་ངའི་སྐུ་ཚེའི་བར་ཆད་ད་སེལ་སོང་ཞེས་གསུངས་ནས། གྲུབ་ཆེན་ཐང་སྟོང་རྒྱལ་པོའི་སྐུ་བརྒྱ་རྩ་ཙམ་བཞེངས་པའི་ངོ་མཚར་བའི་ལྟས་མཐོང་བ་ལགས་སོ། །དེ་ནས་རང་ལོ་སོ་གསུམ་དབྱར་རྔའི་ལོ་ལ་དབྱིའི་ཆོས་གྲྭ་དེ་ཉིད་དུ་སློབ་བུ་མཚོ་རྒྱལ་སོགས་ཀྱིས་གཏེར་གསར་གྱི་དབང་ལུང་ཞིག་གསུང་དགོས་ཟེར་བའི་ནན་ཞུ་ཕུལ་བ་ལྟར། དེ་བཞིན་དུ་དབང་ལུང་འབོག་ལ་ཉེ་བའི་ནུབ་གཅིག་ཉིང་འཁྲུལ་རྨི་ལམ་གྱི་ཉམས་སྣང་ལ། ཟངས་མདོག་དཔལ་གྱི་རི་བོའི་རྟེན་བརྟེན་པ་དང་བཅས་དངོས་སུ་མཇལ་ཞིང་། དེར་དྲིན་ཆེན་རྩ་བའི་བླ་མ་ལུང་རིག་གླིང་པ་དེ་ཉིད་ཀྱིས་གཏེར་ཆོས་བཀའ་རྒྱ་ཁྲོལ་མ་ཁྲོལ་ཐམས་ཅད་སྒྲོམ་བུ་དང་ཤོག་སེར་གྱི་ཚུལ་དུ་གཏད་ནས་སྨོན་ལམ་གཏད་རྒྱ་བྱས། དེ་བཞིན་མཁའ་འགྲོ་ཡེ་ཤེས་མཚོ་རྒྱལ་གྱིས་བྱིན་རླབས་ཀྱིས་བརླབས་ཤིང་། ཨོ་རྒྱན་སློབ་དཔོན་ཆེན་པོས་ཀྱང་བྱིན་དབབ་མཛད་ནས། རིགས་ཀྱི་བུ་ཁྱོད་ཀྱིས་རང་དོན་ཕུགས་སུ་མ་བཅུག་པར་གཞན་དོན་དང་དུ་ལོངས་དང་བསྟན་འགྲོ་ལ་སྨན་པའི་གསོས་ཐེབས། མཐར་གནས་འདིར་ངའི་ཚོགས་གཡོག་ཅིག་ཏུ་འགྱུར་རོ་ཞེས་ལུང་བསྟན། དེ་ནས་དྲིན་ཆེན་སྤྲུལ་པའི་སྐུ་རིན་པོ་ཆེས་རིགས་བདག་ཨོ་རྒྱན་ཆེན་པོ་ལགས། ངའི་ཕྲིན་ལས་ཀྱི་སྤྲུལ་པ་འདི་ལ་ཉིད་ཀྱིས་བསྩལ་བའི་མིང་ཞིག་ཞུ་ཞེས་ཞུས་པས་ཨ་ཙ་ར་རྒན་པོ་དེ་ཉིད་ཞལ་འཛུམ་པ་མཛད་ནས་བཞད་ཅིང་། བསམ་གཏན་ཡེ་ཤེས་གླིང་པ་ཞེས་གསུངས་ནས་ཞལ་མཆིལ་ཞིག་གནང་བ་བདག་གིས་དད་པའི་བསམ་པ་ལྷག་པར་སྐྱེས་ཏེ་བཏུང་བ་ལས། ཕྱི་ཉིན་གང་འདོན་གང་བྲིས་གང་འགྲེལ་ཐམས་ཅད་རང་ས་ནས་ཆགས་ཐོགས་མེད་པ་ཞིག་བྱུང་ཡང་། རང་ཐེ་ཚོམ་སྐྱེས་ནས་རྒྱལ་འགོང་འདྲ་སེམས་ལ་ཞུགས་པ་མིན་ནམ་སྙམ་ནས་ཡི་དམ་ལྷའི་བསྐྱེད་རིམ་དང་། ལེའུ་བདུན་མ་དང་། བསམ་ལྷུན་སོགས་ལ་ནན་ཏན་བྱས་ཤིང་། བདུག་པ་ལུས་ལ་བྱུགས་པས། ལོག་ལྟ་དང་དད་གཤིན་དཀོར་ལ་འབགས་པའི་སྐྱོན་གྱིས་སྔར་བཞིན་རགས་རིམ་མ་གཏོགས་འགྲིབ་སོང་། མཐར་ངེས་ལེགས་སྤྲུལ་སྐུས་བསྟན་པ་རྒྱས་བྱེད་ཀྱི་སྨོན་ལམ་ཞིག་ཁྱོད་ཀྱིས་ཕབ་དགོས་ཞེས་གསུངས་ནས་བྲིས་པ་དེ་ནས་བཟུང་སྟེ་གཏེར་ཆོས་ཆལ་ཆིལ་ཕབ་ཁུལ་བྱས། དེ་ནས་བགྲང་བྱ་སོ་བཞི་ཆུ་མོ་སྦྲུལ་གྱི་ལོ་ལ། ཏཱ་རེའི་གནས་ནང་དུ་ཚིག་བདུན་གསོལ་འདེབས་འབུམ་གསོག་པའི་སྐབས་སློབ་དཔོན་སངས་རྒྱས་གཉིས་པ་དངོས་སུ་བྱོན་པའི་དུས་ཆེན་ཡར་ངོ་ཚེས་བཅུའི་ཐོ་རངས་ཁར་རྨི་ལམ་འོད་གསལ་དང་འདྲེས་པའི་ཚེ་ལུང་པ་ཞིག་གི་མདའ་ནས་ཡར་ལ་འགྲོ་བའི་སྣང་བ་ཤར་ཙ་ན་ཆུ་ཆེན་པོ་ཞིག་འདུག་པས། དེར་བརྒལ་དཀའ་བར་སྣང་སྟེ་ཕྱིར་ལ་འགྲོ་མ་གཏོགས་མི་ཐར་བསམས་ནས་འདུག་སྐབས། བུད་མེད་གོས་སྔོན་གྱོན་པ་ཞིག་གིས་ཁྱོད་ལ་སྤྲུལ་པའི་སྐུ་མཆོག་ལུང་རིག་གླིང་པས་འདིར་ཤོག་གསུང་གིས་ཁྱོད་ལ་རོགས་ལྡན་ངས་བྱེད་ཟེར་བའི་སྣང་བ་ཤར་བའི་ཚེ་ཆུའི་ཕར་འགྲམ་ལ་ཐོན། དེ་ནས་བུད་མེད་དེས་བརྒལ་དཀའ་བའི་གནས་ཀུན་ནས་བསྐྱབས་ཏེ། དུར་ཁྲོད་ཆེན་པོ་འཇིགས་སུ་རུང་བ་ཞིག་ཏུ་ཕྱིན་པ་ན་སྲིན་པོའི་གླིང་སོགས་ཡ་ང་ཞིང་སྐྱི་གཡའ་བའི་ཡུལ་ཆེན་པོ་དེའི་དབུས་སུ་ཐོད་པའི་མཁར་མི་མངོན་ནམ་མཁའི་དབྱིངས་ལ་སྙེགས་པ་ཞིག་འདུག་པའི་ཕྱི་ཐམས་ཅད་ནི་རཱུ་ཏྲ་ལོངས་སྤྱོད་དང་བཅས་པས་བརྒྱན་ཞིང་། ནང་ནི་རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་ཆེན་པོ་དེ་ཉིད་ཀྱི་སྟེང་ཁང་ཆོས་སྐུའི་ཕོ་བྲང་། བར་ན་ལོངས་སྐུའི་ཞིང་ཁམས། འོག་ཏུ་སྤྲུལ་སྐུའི་གཞལ་ཡས་ཁང་། ཕྱི་གསལ་ནང་གསལ་ཡེ་ཤེས་རང་སྣང་ལས་གྲུབ་པ་འཇའ་འོད་ཀྱི་གུར་ཁང་རྒྱ་ཁྱོན་བསམ་ལས་འདས་པའི་དབུས་སུ་རིན་པོ་ཆེའི་ཁྲི་སྣ་ཚོགས་པདྨ་ཉི་ཟླའི་སྟེང་ན། ཨོ་རྒྱན་ཐོད་ཕྲེང་རྩལ་ཞི་ཆགས་ཁྲོས་པའི་ཉམས་ཅན། དེའི་གཡས་སུ་རྒྱ་གར་གྱི་གྲུབ་ཐོབ་བགྲང་ཡས་རྣམས་དང་། ཡི་དམ་དཀྱིལ་འཁོར་གྱི་ལྷ་ཚོགས། གཡོན་ན་བོད་ཀྱི་རྗེ་འབངས་དང་དཔའ་མོ་མ་ཚོགས་ཐམས་ཅད། རྒྱབ་ན་གསང་སྔགས་རྒྱུད་སྡེའི་གླེགས་བམ་དང་། གར་གིང་ཆོས་སྐྱོང་ཕོ་རྒྱུད། མདུན་ན་གཏེར་སྟོན་བརྒྱ་དང་བརྒྱད་ཅུ། བརྒྱུད་གསུམ་གྱི་བླ་མ་དང་སྲུང་མ་སོགས་ཁྲོམ་འཚོགས་པ་ལྟར་བཞུགས་པའི་མདུན་དེར་སླེབས་སོང་བའི་ཚེ། བདག་ལ་བརྗོད་མེད་ཀྱི་ཉམས་ཤར་ནས་རྣམ་རྟོག་གི་འཕྲོ་འདུ་རེ་ཞིག་གི་བར་དུ་འགག་སོང་བས་དེ་ལས་ལྡང་བ་ན། སུ་ཡང་མཐོང་རྒྱུ་མི་འདུག་ཅིང་། ལྷ་ཁང་ཞིག་གི་དབུས་ན་རྩ་བའི་བླ་མ་ཉིད་བཞུགས་པའི་མདུན་དེར་མཆིས་པས་གསོལ་བ་རྩེ་གཅིག་ཏུ་བཏབ་ནས་ཁྱེད་ཀྱིས་ང་ལ་ཅི་གསུང་རྒྱུ་ཡོད། ས་ཆ་འདི་གང་རེད་ཞུས་པས། གནས་འདི་ཟངས་མདོག་དཔལ་གྱི་རི་བོ་ཡིན། ང་ནི་ཨོ་རྒྱན་ཆེན་པོ་དང་དབྱེར་མེད་པ་ཡིན། ཁྱོད་ནི་ང་རང་གིས་བྱིན་གྱིས་བརླབས་པའི་ཕྲིན་ལས་ཀྱི་སྤྲུལ་པ་ཡིན། འདི་ན་གནས་པ་ཐམས་ཅད་མཁའ་འགྲོ་དང་མཁའ་འགྲོ་མའི་རང་བཞིན་ཤ་སྟག་ལས་གཞན་མེད། ཕ་གིའི་རི་དེ། ཏཱ་རེ་མི་འགྱུར་ལྷུན་གྱིས་གྲུབ་པའི་གནས་མཆོག་དགའ་བའི་ཚལ་ཞེས་བྱ་བ་ཡིན། རང་བྱོན་དང་སྐུ་གསུང་ཐུགས་རྟེན་སོགས་འདི་དང་འདི་ལྟར་ཡོད་གསུངས་ནས་གནས་ཡིག་རྒྱས་བསྡུས་རྣམས་ལས་ཇི་ལྟར་གསུངས་པའི་དོན་རྣམས་ངོ་སྤྲད་ཅིང་། སེམས་ལ་མི་བརྗེད་པའི་རྒྱས་བཏབ་ནས་གཏེར་གསར་ཡོངས་རྫོགས་ཀྱི་གླེགས་བམ་རྣམས་མགོ་ཐོག་ཏུ་བཞག་ནས་སྨོན་ལམ་དང་གཏད་རྒྱ་མཛད། ད་ཁྱོད་སོང་དང་། བདག་གི་ཕྲིན་ལས་ཀྱི་སྤྲུལ་པས་འགྲོ་དོན་གྱི་ལྷག་མ་སྐྱོང་བའི་ཕྱིར་བསྟན་དང་འགྲོ་ལ་རྗེས་སུ་ཆགས་པར་མཛད་དོ་གསུངས་པ་ན། སེམས་ལ་བཟོད་མེད་ཀྱི་དད་པ་བྱུང་ཞིང་ཐལ་མོ་སྦྱར་ནས་བསྡད་ཙ་ན། རྨི་ལམ་འོད་གསལ་གྱི་ཉམས་སྣང་ལས་ལྡང་སྟེ་སྐྱ་རངས་འཆར་བའི་དུས་ལ་ཉེ་བྱུང་ཡང་ཐམས་ཅད་མ་བརྗེད་པར་ཡོད་པས། དེ་ནས་སློབ་བུ་ལུང་རྟོགས་སོགས་ལས་ལྡན་གྱི་གང་ཟག་འགའ་ཞིག་གིས་འདི་ལ་གནས་ཡིག་ཅིག་བྲིས་ཞེས་བསྐུལ་བའི་རྐྱེན་གྱིས་གནས་བསྟོད་འབྲི་བཞིན་འདུག་པའི་དུས་ཕ་རྒན་སླེབས་ནས། ཁ་ངན་མང་པོ་བསྒྲགས་པས་རྟེན་འབྲེལ་གྱི་བརྡའ་སྒོ་འགའ་འགགས་སོང་ནས་བསྡུས་པ་ཞིག་ཕབ་སྟེ་རེ་ཞིག་གཞན་བཏང་སྙོམས་སུ་བཞག་ནས་ཡོད་པའི་ནུབ་གཅིག་དྲིན་ཆེན་བླ་མ་བྱོན་ནས། ཁྱོད་བྲག་དམར་རྒོད་པོ་རྫོངས་ལ་སོང་དང་། རྟེན་འབྲེལ་མཁའ་འགྲོའི་སྣང་བརྙན་ཁྱད་པར་ཅན་ཡོད། རྡོ་རྗེ་ཕག་མོས་བྱིན་གྱིས་རླབས་པའི་བྱ་བཏང་རྫོགས་ཆེན་གྱི་རྣལ་འབྱོར་པ་དེ་དང་མཇལ་འཕྲད་འོང་ན་ཤིན་ཏུ་བཟང་། བར་ཆད་འགགས་འཕྲང་ལས་གྲོལ་གསུངས་པས་ལུང་བསྟན་དེ་ལ་རེ་བ་བཞག་ནས། གནས་སར་ལ་སོང་ནས་མཚམས་པ་དང་མཇལ་འཕྲད་མཛད། བདག་གིས་ཕྲིན་ལས་འགའ་བསྒྲུབ་ཅིང་ཁྱད་པར་དུ་འཕགས་པ་ནམ་མཁའི་རྒྱལ་པོས་དངོས་སུ་ཞལ་གཟིགས་ནས་ཞག་བདུན་གྱི་བར་དུ་སྙིང་རྗེ་རྒྱུན་མ་ཆད་ཅིང་། ཉམས་དང་རྨི་ལམ་གྱི་གསལ་སྣང་དུ་མ་ཤར་ཡང་ཅི་མི་སྙམ་པའི་ངང་དུ་བཞག བློ་སེམས་གཅིག་དྲིལ་དུ་འཕགས་མཆོག་ནམ་མཁའི་རྒྱལ་པོ་དང་། བླ་མ་དཀོན་མཆོག་གསུམ་ལ་གཏད། དེའི་ཚེས་བཅུའི་ཉིན་ཚོགས་མཆོད་ཞིག་ཕུལ་བས་ཉམས་དགའ་ཞིང་བག་དྲོ་བ་བྱུང་། སྲོད་འཁོར་གྱི་དུས་ཉམས་སྣང་ལ་མཁའ་འགྲོ་དམར་མོ་རུས་པའི་རྒྱན་དྲུག་རྫོགས་པ་གཅིག་ཕེབས་ནས་རྣལ་འབྱོར་བ་ཉམས་བདེ་འམ། ཅི་མཛད་ཀྱིན་ཡོད་ཟེར་བ་ལ། རང་བཞིན་དུ་གནས་ཤིང་མ་ཎི་འདོན་གྱིན་ཡོད་བརྗོད་པས། ད་ཁྱོད་ཀ་ཀོང་ལ་ཕེབས་དང་རྟེན་འབྲེལ་བཟང་པོ་ཞིག་ཡོད། པད་འབྱུང་མདུན་དུ་འགྲོ་བ་ཡོངས་ལ་ཕན་པའི་སྨོན་ལམ་ལེགས་པོ་ཐོབ་གསུངས་ནས་མི་སྣང་བར་གྱུར་ཏོ། །ད་དེར་འགྲོ་དགོས་བསམ་ནས་སོང་བས་ཉམས་མ་ངེས་པ་མང་པོ་བྱུང་ཞིང་། གནས་དེར་སླེབ་ལ་ཉེ་བ་ན། ལམ་ནོར་ནས་གར་འགྲོའི་གཏད་སོ་དབེན་པ་ལ་པད་འབྱུང་དྲུང་ནས་དུང་འབུད་པའི་སྒྲ་ཐོས་པས་དེར་སོང་། ཇོ་ཁང་གི་སྒོ་རྩར་སླེབས་ཏེ་ཕྱག་འཚལ་ཞིང་གསོལ་བ་བཏབ། ཚོགས་མཆོད་མཎྜལ་ཕུལ། དེའི་ནུབ་མོ་རྨི་ལམ་དུ་ཨ་ཙ་ར་གཅིག་འོང་ནས། ང་རང་གི་རྐང་དུང་འདི་ཁྱོད་ཀྱིས་བུས་ཤིག་དང་། ངས་ཉན་གསུངས་པས་བདག་གིས་བུས་པ་ལ་སྐད་འབྲིང་པོ་ཞིག་གྲགས། ཨ་ཙ་ར་དེས། ད་ཁྱོད་ལ་སྙན་གྲགས་དང་གདུལ་བྱ་འབྲིང་པོ་ཞིག་འབྱུང་། རྟེན་འབྲེལ་ཡང་ད་ལྟའི་ལུས་འདིར་འབྲིང་པོ་ཞིག་འགྲིགས། ཕྱི་མའི་སྐྱེ་སྲིད་དགའ་ལྡན་དུ་འཁྲུངས་ནས་འགྲོ་དོན་རབ་ཏུ་རྫོགས། ད་ཁྱོད་ཀྱིས་ཏཱ་རེ་མི་འགྱུར་ལྷུན་གྱིས་གྲུབ་པའི་གནས་ལ་དབུགས་དབྱུང་གཟེངས་བསྟོད་ཀྱིས་དང་། པདྨ་འབྱུང་གནས་དང་རྩ་བའི་བླ་མ་དབྱེར་མེད་པས་བྱིན་གྱིས་བརླབས་ཤིང་། སེམས་ཅན་འབུམ་ཕྲག་གཅིག་གནས་སྐབས་དང་མཐར་ཐུག་གི་བདེ་བ་ལ་འགོད་པའི་རྟེན་འབྲེལ་སྨོན་ལམ་ཡོད། བར་ཆད་ངན་པའི་དབང་དུ་མ་གཏོང་གསུངས་ནས་ཡར་ཞུ་དང་མར་གནང་རགས་རིམ་ཙམ་གླེང་ནས་རྨི་ལམ་ལས་སད་པས་དེ་ཐམས་ཅད་དྲན་པ་ཙམ་དུ་ལུས། རྐྱེན་དེས་བསྐུལ་ནས་ཏཱ་རེ་ལ་སླེབ་པ་ན་གནས་བདག་དྲག་པོ་རབ་འབར་རྩལ་གྱིས་གཟུགས་བསྟན་ཏེ་འབྱུང་འགྱུར་ལེགས་ཉེས་ཀྱི་ལུང་བསྟན་མང་དུ་གནང་། རི་རྒྱལ་འཕན་ཕྱུག་གི་སྡོང་གྲོགས་དང་ཡུལ་ཕྱོགས་ཀྱི་གསང་ཕུག་འགའ་ལ་ཁྲིད་ནས་བདག་ཅག་གི་ལོངས་སྤྱོད་དང་འབྱོར་བ་འཕེལ་ཞིང་། དེ་ནས་ཆུ་ཤེལ་འོད་དཀར་རྒྱལ་པོ་ས་གས་འཁྱུད་པའི་དཀར་ཕྱོགས་ཀྱི་ཚེས། རྗེ་བཙུན་ཨརྱ་ཏཱ་རེས་བྱིན་གྱིས་བརླབས་པའི་དུས་ཆེན། འོད་སྟོང་ནམ་མཁའི་ནོར་བུ་ཤར་རིའི་ཕྲག་ནས་ངོམས་པའི་ཚེ། ལས་དང་སྐལ་བ་ལྡན་པའི་སློབ་བུ་ལུང་རྟོགས་བསྟན་འཛིན་དང་། རིག་འཛིན་དངོས་གྲུབ་སོགས་རིག་པ་འཛིན་པའི་གང་ཟག་བཅུ་གསུམ་གྱིས་རྟེན་འབྲེལ་གྱི་རྫས་དུ་མ་ཕུལ་ཅིང་གནས་སྒོ་འབྱེད་པར་བསྐུལ་བའི་ཚེ། བདག་གིས་ཀྱང་ལྷ་དང་བླ་མ་སོགས་ལ་གསོལ་བ་བཏབ་པའི་རྐྱེན་གྱིས་རང་ཁྲོ་བོ་ཁམས་གསུམ་རྣམ་རྒྱལ་གྱི་སྐུར་བཞེངས་པའི་སྣང་བ་ཤར་ནས་ཧཱུྃ་མཛད་ཀྱི་ཕྱག་རྒྱ་དང་བཅས་ཏེ། ཧཱུྃ་ཧཱུྃ་ཞེས་ལན་གསུམ་དུ་བསྒྲགས་པ་ན། མི་དང་མི་མ་ཡིན་འབུམ་ཕྲག་བགྲང་ལས་འདས་པ་དབང་དུ་འདུས་ཤིང་ཡུལ་དེའི་ཞིང་ཁམས་ཐམས་ཅད་སྣང་གྲགས་རིག་པའི་རྟོག་ཚོགས་ལྷ་སྔགས་ཆོས་ཉིད་ཀྱི་རོལ་པ་དག་མཉམ་ཡེ་རྫོགས་ཆེན་པོར་འབྱམས་ཀླས་པས་འཇིག་རྟེན་འདིར་སྣང་གི་རོལ་བ་ཐམས་ཅད་ཞག་བདུན་བར་དུ་རང་འགགས་སུ་སོང་ནས་སྐུ་གསུམ་དག་པའི་ཞིང་ཁམས་མང་པོ་དང་། དགེ་ཞིང་ལེགས་པའི་མཚན་མ་བསམ་ལས་འདས་པ་མངོན་ཀྱང་དེ་ཚོ་ཧ་ཅང་ཁ་ཐང་ཆེ་བར་དོགས་ནས་མ་སྤྲོས། ཕལ་ཆེར་སྒྲུབ་ཐབས་སོགས་ཀྱི་རང་རང་གི་གཞུང་དང་མཇུག་ནའང་གསལ། ཕྱི་ལྟར་ན་ཏཱ་རེ་མི་འགྱུར་ལྷུན་གྱིས་གྲུབ་པའི་གནས་མཆོག ནང་ལྟར་ན་རང་སྣང་གཡུ་ལོ་བཀོད་པའི་ཞིང་ཁམས། གསང་བ་ལྟར་ན་འོག་མིན་དག་པ་དབྱིངས་ཀྱི་གཞལ་ཡས་སྐུ་གསུམ་རྒྱལ་བའི་ཞིང་ཁམས་རིག་འཛིན་གྲུབ་བརྒྱའི་བཞུགས་གནས། མ་དང་མཁའ་འགྲོའི་འདུ་ཁང་། བྱིན་རླབས་དང་དངོས་གྲུབ་སྤྲིན་ལྟར་འཁྲིགས་པའི་གནས་མཆོག་དམ་པ་དེ་ཉིད་ཁམས་གསུམ་འགྲོ་བའི་བསོད་ནམས་ཀྱི་ཞིང་དུ་མངའ་གསོལ་བས། དེར་མཆོག་དམན་བར་གསུམ་གྱི་སྐྱེ་འགྲོ་འབུམ་ཕྲག་གཅིག་དང་ཁྲི་ཚོ་ཙམ་གྱིས་ཕྱག་སྐོར་བྱས། དེ་བཞིན་གཟུགས་མེད་ཀྱི་ལྷ་སྲིན་གྲངས་མེད་པས་ཀྱང་གྲོལ་བ་ཐོབ་ཅིང་ལས་ལྡན་གྱི་གང་ཟག་རང་རང་གི་རྒྱུད་ཚོད་དང་འཚམས་པའི་རང་བྱུང་དུ་མ་མངོན་ཞིང་། མཐོང་ཐོས་དྲན་རེག་གི་སེམས་ཅན་ཐམས་ཅད་གནས་སྐབས་དང་མཐར་ཐུག་གི་བདེ་བ་ལ་བཀོད་པ་ཡིན་ནོ། །དེ་ནས་ཅང་ཤེས་རྟའི་ལོ་མཇུག་ཏུ། གནས་བདག་གིས་ལུང་བསྟན་ཏེ། ད་ལོར་ཁྱོད་འདིར་བཞུགས་ནས་ཡུལ་ཁམས་ཐམས་ཅད་ཀྱང་གནས་འདིར་བརྟན་ཆགས་ཤིག་བྱུང་ན་ཡུལ་འདིའི་དམ་སྲི་མཆེད་བཞི། ཤི་འདྲེ་གྲོང་རྒྱུག་ཚོ་ཐུལ་ཞིང་། གནས་འདིར་རིག་པ་འཛིན་པའི་སྐྱེས་བུ་བཅུ་གསུམ་དང་ཁྱོད་ཀྱི་ཆོས་ལ་དབང་བའི་གང་ཟག་བརྒྱ་ལྷག་ཙམ་འབྱུང་ཞིང་། རང་གཞན་དོན་གཉིས་ཀྱི་དཔལ་ལ་སྤྱོད་པ་འབྱུང་སྟེ། བར་ཆད་ཆེ་གསུངས་ནས་ཞལ་ཕྱིར་གྱུ་བ་ན། བདག་གིས་བར་ཆད་སེལ་བའི་ཐབས་ཅི་ལགས་ཞུས་པས། ཕུར་སྒྲུབ་སྲི་གནོན་ཕྱོགས་བཞི་དབུས་ལྔ། བསམ་ལྷུན་སྒྲོལ་མ་འུར་འདོན། བསང་རླུང་རྟ་ཁྲི་ཕྲག་སོགས་བསྒྲུབས་ན་སེལ་ཙམ་གསུངས་ནས་ཡལ་སོང་། བདག་གིས་ཐམས་ཅད་རྨི་ལམ་དང་རྒྱུ་མ་ཡིན་སྙམ་ལ་བདེན་འཛིན་མེད་བསམ་ནས་དག་ཐེར་མ་བྱས་ཤིང་། མཐར་ཡུལ་ཁམས་ལ་བདེ་མི་བདེའི་ཟུག་རྔུ་ལང་ལོང་དུ་གཡོ་བའི་ཚེ་སྔར་གྱི་ཉམས་སྣང་དྲན་པས་བདེན་ནམ་སྙམ་པས། སྔོན་ནས་འབྲེལ་བའི་དགེ་སྦྱོང་དམ་པ་ཨ་བྷྱ་ཤཱི་ལ་དྲངས་ནས་ཕུར་སྒྲུབ་ཚད་ལྡན་གཅིག་བྱས། བདག་གིས་ཐུགས་གཏད་དམ་པོ་བྱས་པས་དམ་སྲི་ཟུང་གི་ནུས་པ་ཆོམ་ཡང་ཕལ་ཆེར་དམ་ལ་མ་གནས་པས་རྟེན་འབྲེལ་ཅུང་ཟད་ཙམ་དུ་གྱུར། དེ་ལྟ་བུ་གོང་བཞིན་མ་གཡེལ་ན་ཡུལ་མི་རང་གཞན་ཀུན་ལ་བདེ་བ་ཡིན་མོད་ཀྱང་གནད་དང་མ་ལྡན། ཤིང་མོ་ལུག་གི་ལོར་གནས་ལུང་དཔལ་གྱི་རི་བོར་བྱོན་པའི་དུས་སུ་གནས་མདུན་དུ་ངལ་གསོ་བའི་ཚེ་ གསང་བའི་བདག་པོ་གོས་སྔོན་འཆང་བ་ལག་ན་རྡོ་རྗེས་ཞལ་གཟིགས་ནས་ཕྱག་རྡོར ་ཧཱུྃ་སྒྲུབ་ཀྱི་ལུས་དཀྱིལ་གནང་། མཚོ་སྨན་རྒྱལ་མོའི་རི་བོའི་ཞོལ་ལྕོག་སྒར་དུ། བསྟན་པའི་སྦྱིན་བདག་དཔལ་ཆེན་གྱི་ཆུང་མ་ཚེ་གེགས་བར་ཆད་ཀྱི་སྤར་ཁ་ལ་བབས་ནས་བདག་ལ་སྐྱབས་འཇུག་ཞུས། དཀོན་མཆོག་སྤྱི་འདུས་ཀྱི་ཚེ་སྒྲུབ་ཚེ་དབང་བརྒྱ་ཞིག་མཛད་པའི་བྱིན་འབེབས་དུས་ཁྱིམ་ལ་བདུད་རྩིའི་ཆར་བབ་ནས་གཏེར་བདག་འགས་ལ་སྒྲོམ་གསེར་ཆུས་འཁྱུད་པ་འོད་ཀྱི་རང་བཞིན་ཅན་དངོས་སུ་གཏད། ཡང་རང་ལོ་སོ་དྲུག་སྟོན་ཟླ་ར་བའི་ཚེས་བཅུའི་དུས་རྩང་དུ་སྒར་བཀྱག ཐང་འབེ་རུ་བྱོན་ཏེ་དེར་བཞུགས་ཤིང་། དཔོན་སློབ་འཁོར་བཅས་སྡེ་བརྒྱད་མཆོད་པ་དང་གསེར་སྐྱེམས་བཏང་། དེ་ནས་བདག་ཡི་དམ་གྱི་བསྐྱེད་རིམ་ལ་གནས་ནས་བསྙེན་པ་བཟླས་ཤིང་། དམིགས་པས་གཟིར་ཙམ་ན་ཐང་འབེས་ཀྱི་གནས་སྲུང་། ཀླུ་སོག་མ་མེ་ལེན་དང་། རྡོ་རིང་དམར་པོའི་གྲི་བཙན་གཉིས་ཀྱིས་སྔོན་གྱི་ཐ་ཚིག་རྗེས་སུ་དྲན་པས་སྨན་སྒྲུབ་ཀྱི་ཆར་ཕབ། སྐུ་རྟེན་དང་ཨ་དཪྴ་གཡུའི་རང་བཞིན་ཅན་དང་། ཤོག་དྲིལ་མཐིང་ག་ཞིག་གནང་ཞིང་། ཁ་ཆར་རླུང་དང་འབྲུག་སྒྲ་འུར་བཞིན་འཇའ་སུམ་རིམ་གྱི་གུར་ཁྱིམ། ཤེལ་གུར་གྱི་སྟེང་དུ་འཁྱུད་པ་ལ་ཀུན་ཡ་མཚན་དུ་གྱུར། དེར་གནས་པའི་བླ་གྲྭ་ཐམས་ཅད་ཀྱི་བར་ཆད་ལོ་ཟུང་ལ་བསྲིང། གཏེར་རྫས་མཐོང་བའི་ཡོན་ཏན་ལྔ་ཐོབ། རྩང་ཡུལ་དུ་སླེབ་པས་ཡོན་བདག་བློ་ཡི་མིང་ཅན་གྱི་རིམ་གྲོར་སྒྲོལ་མ་བཏོན་པའི་དུས་འབྱུང་ལུས་ལ་མི་བདེ་བའི་ལྟས་མང་པོ་ཞིག་བྱུང་བའི་ཚེ་རྩ་བའི་བླ་མ་རྣམས་ལ་གསོལ་བ་བཏབ་པའི་ཚེ། ཨོ་རྒྱན་མཁའ་སྤྱོད་གླིང་པས་ཞལ་གཟིགས་ལུང་བསྟན། གསོལ་འདེབས་ཚིག་བཞི་ཙམ་གྱིས་གསོལ་བ་རྩེ་གཅིག་ཏུ་བཏབ་པས་མི་བདེ་བའི་ཟུག་རྔུ་བོར། ཡང་སྐབས་ཤིག་ཏུ་ལི་སྨད་དཔོན་ཚང་གིས་གདན་དྲངས་མཛད་ནས། ལི་ཁོག་ཏུ་ཕེབས་པའི་ལམ་ཁ་ཞིག་ཏུ་ངེས་འབྱུང་དང་མི་རྟག་པའི་རྣམ་ཐར་དུ་མ་ཞིག་དྲན་ནས་ལྷ་གཅིག་ཨོ་རྒྱན་ཆེན་པོ་ལ་བློ་སེམས་རྩེ་གཅིག་ཏུ་གསོལ་བ་བཏབ་པའི་ཚེ། སྣང་བ་འདི་ཐམས་ཅད་ཀུན་ཟངས་མདོག་དཔལ་གྱི་རི་བོའི་རྟེན་བརྟེན་པ་དང་བཅས་པ་མངོན་སུམ་དུ་མཐོང་བའི་ཉམས་ཤར་ཚེ། ཉེ་གནས་སློབ་དཔོན་རིག་ལོ་སོགས་ལས་ལྡན་གྱི་སྐྱེས་བུ་འགས་བདག་འཇའ་གུར་སུམ་རིམ་གྱི་དབུས་ན་བཞུགས་པ་སྐབས་གཅིག་བར་དུ་སྣང་ཡང་། མཉམ་འགྲོགས་ཀྱི་བདུད་ཆེ་བས་ཅི་ཡིན་བསམ་པ་ཙམ་མ་གཏོགས་ངོ་མཚར་འགའ་མ་བྱུང་། དེའི་ཕྱིར་ལྷ་དང་བླ་མ་ཡོངས་ལ་དག་སྣང་བྱེད་ན་དངོས་གྲུབ་འབྱུང་ཞིང་གསང་སྔགས་ཀྱི་ཉེ་ལམ་ཡིན་པས་ཀུན་གྱི་ཡིད་ལ་ཞོག ཤིང་མོ་ལུག་གི་ལོའི་སྨིན་དྲུག་ཟླ་ཚེས་གསར་དུ་མངོན་པའི་ཚེ་ན། རྗེ་བཙུན་ཨཱརྱ་ཏཱ་རེ་དང་གནས་སྲུང་དྲག་པོ་རབ་འབར་རྩལ་སོགས་ཀྱིས། ཉམས་དང་རྨི་ལམ་གྱི་སྣང་ངོར་ཞལ་གཟིགས་ལུང་བསྟན་ནས་ཏཱ་རེའི་གནས་ཀྱི་ཨོ་རྒྱན་མཚོ་སྐྱེས་རྡོ་རྗེའི་བཞུགས་ཁྲིའི་དྲུང་ན་ཕག་མོའི་ཟབ་ཏིག་བཀའ་འདུས་ཆེན་མོའི་སྒྲུབ་ཐབས་ཡོད་པས་ལོངས་ཤིག་དང་། རྟེན་འབྲེལ་རབ་འགྲིགས་ན་ས་གཏེར་གསུམ་དང་། པུསྟི་བརྒྱད། འབྲིང་འགྲིགས་ན་སྒྲུབ་ཐབས་བརྒྱད། ཐ་མས་ཀྱང་ལུས་དཀྱིལ་བརྒྱད་འབྱུང་བས་དུས་ལ་བབས་པར་འདུག་གསུངས་ནས་གནས་བདག་དེ་ཉིད་ཁྲོ་འཁྲུགས་རྔམ་པའི་སྟབས་ཀྱིས་ཁ་ཆར་དང་དབྱར་རྔའི་སྒྲ་ལ་འགྲོགས་ནས་ནམ་མཁའི་དབྱིངས་ལ་བཞུད་སོང་། དེ་ནས་ཚེས་བཅུ་ཨོ་རྒྱན་སངས་རྒྱས་གཉིས་པ་སྐུ་བལྟམས་པའི་དུས་ཆེན་ལ་ཚོགས་བརྒྱ་བསྐང་བརྒྱ་གཏོང་བའི་ཚེ་ཐམས་ཅད་བདེན་མེད་སྒྱུ་མའི་ཆོ་རོལ་དུ་སྣང་ནས་ཐོགས་བཅས་ཐོགས་མེད་དང་ཐོགས་མེད་ཐོགས་བཅས་སུ་བསྒྱུར་ནུས་པའི་སྣང་བས་ཚིག་བདུན་གསོལ་འདེབས་ཚར་གཅིག་གི་ཚེ་ལ་སྤོས་རིང་གསུམ་ལ་མདུད་པ་བོར། དེ་ནས་མ་ཚོགས་མཁའ་འགྲོ་འདུ་བའི་དུས་ཆེན་ཉེར་ལྔ་ལ་བབས་པ་ན། ཏཱ་རེ་མི་འགྱུར་དགའ་བའི་གནས་དེ་ཉིད་དུ་ཕེབས་ནས་རང་སློབ་དད་པའི་ལང་ཚོའི་རྣམ་འགྱུར་ངོམས་པའི་བཤད་སྒྲུབ་དང་། ཆོས་དཔལ་ཟུང་གིས་རྟེན་འབྲེལ་བཟང་པོའི་ཁ་སྨོན་བཏབ་ཅིང་ལྷ་དང་སྲུང་མས་བྱིན་གྱིས་བརླབས་པའི་ལྟས་ནམ་མཁའ་འཇའ་ཚོན་སུམ་རིམ་བཀྲ་ཞིང་ཤིང་ཉག་ཕྱོགས་ཀྱི་ས་སྐྱོང་མི་དབང་དམ་པས་ཕྱག་དབང་ཞུས། ཁ་སྨོན་བཟང་པོ་གླེང་། རིག་མ་བདེ་བའི་ཡེ་ཤེས་ཀྱིས་བཀྲ་ཤིས་པའི་རྫས་ཕུལ། དེ་བཞིན་དུ་འགྲོ་ལམ་དེ་ཉིད་དུ་ཡུལ་མི་རོང་འབྲོག་ཀུན་གྱིས་ཕྱག་འཚལ་ཞིང་སྒོ་གསུམ་དབང་དུ་འདུས་ནས་ལྷ་རྫས་རེག་བྱ་དཀར་པོ་དང་། རཏྣའི་རིགས་མང་དུ་ཕུལ། གཏེར་སྒོ་འབྱེད་པའི་དུས་ལ་བབ་ཚེ་ལུགས་གཉིས་དཔལ་གྱིས་མཐོ་བའི་ས་སྐྱོང་མི་དབང་དམ་པ་དགེ་བཤེས་རྒྱལ་པོ་དཔོན་གཡོག་དུ་མ་ཞིག་གནས་མཇལ་དུ་བྱོན་པས། བདག་ཅག་ལ་དད་འདུན་དང་མོས་གུས་ལྷག་པར་བསྐྱེད་དེ། གསུང་བཟང་ཚིག་གི་གཏང་རག་མང་པོ་གནང་ཞིང་། རྟེན་འབྲེལ་གྱི་རྫས་ཅུང་ཟད་རེ་ཕུལ། བདག་གིས་ཀྱང་གཏེར་རྫས་རྣམས་ཀྱི་མཇལ་ཁ་གཏད་པས། རྒྱལ་པོའི་སྐུ་ཚེའི་བར་ཆད་བསལ། དེ་ནས་གཏེར་རྫས་ཐམས་ཅད་ཁྱེའུ་ཆུང་ལོ་ཙཱའི་ཟློས་གར་ཆོས་ལ་དབང་བའི་སྐྱེས་མཆོག་དེའི་ཕྱག་ཏུ་གཏད་པས། ཡ་མཚན་རྨད་དུ་བྱུང་བའི་ངོ་མཚར་སྐྱེས་ཀྱང་སྐྱེས་བུ་དེའི་རྟེན་འབྲེལ་རབ་འགྲིགས་ནས་སྐུ་ཚེ་ལོ་གསུམ་ལ་བསྲིང་བའི་ནུས་པ་ཡོད་ཀྱང་ཉམས་སུ་མ་བླངས་བས་དེ་ཙམ་མ་ནུས་སོ། །གཏེར་སྒྲོམ་རིན་ཆེན་རྡོའི་སྙིང་པོ་ལས་གྲུབ་པའི་སྒྲོམ་བུ་ཁྱིམ་བྱའི་སྒོ་ང་ཙམ་པ་གཅིག་དང་། ཤོག་སེར་སོར་བརྒྱད་པ། སྨན་སྒྲུབ་ཏུ་བཞེད་པའི་དམ་རྫས་མྱོང་གྲོལ་དུ་བྱས་ནས་འགྲོ་བ་ཀུན་ལ་སྟེར། ཅིག་ཤོས་ལས་ལྡན་འགའ་མ་གཏོགས་གསང་རྒྱ་མཛད་ནས་བཀའ་སྲུང་དྲང་སྲོང་ཆེན་པོའི་སྒྲུབ་ཐབས་རྟེན་འབྲེལ་བརྡ་དང་བསྟུན་ནས་ཆོས་དབང་གི་གང་ཟག་ཀརྨ་ཆོས་སྐྱོང་གིས་ཕབ་ཅིང་། སློབ་བུ་རིག་གྲོལ་སོགས་ལ་གཏད། བཀའ་འདུས་ཀྱི་ལུས་དཀྱིལ་འགའ་ཁུ་བོ་དམ་ལུང་སྤྲུལ་པའི་སྐུ་རིན་པོ་ཆེ་དང་སོག་པོ་དཔལ་ཀྱི་ཡེ་ཤེས་ཀྱི་ཟློས་གར་མདོ་མང་སྤྲུལ་སྐུ་པདྨ་གར་གྱི་དབང་ཕྱུག་སོགས་ཆོས་ཀྱི་བདག་པོ་འགའ་ལ་སྤྲད། ཉམས་སྣང་ངོ་མཚར་བ་དང་སྟོང་ཉིད་སྙིང་རྗེ་རྒྱུད་ལ་རང་འཁྲུངས་སུ་བྱུང་། དེའི་དབྱར་གནས་པའི་དུས་སུ་སྐུ་བླ་ར་ཁང་སོགས་སྡེ་བརྒྱད་འགའ་གདན་འདྲེན་ལ་ཐོན་པས་ཡུལ་དེར་འབྱོན་པར་ཁས་བླངས། ཁོང་ཚོས་ཉེས་སྐྱོན་ཐམས་ཅད་བསལ་ནས་མཐུན་རྐྱེན་ཀུན་བསྒྲུབ་བོ་ཞེས་དམ་བཅས་ནས། དབྱར་གནས་གྲོལ་བ་དང་མཉམ་དུ་འོ་བཟི་ཕྱོགས་ལ་ཕེབས་ནས་མི་དང་མི་མིན་ཀུན་ལ་ཆོས་གསུངས་ནས་རང་རང་ལས་སྐལ་དང་མཐུན་པར་འཕྲལ་ཕུགས་ཀྱི་བདེ་བ་ལ་བཀོད། དེ་ནས་རང་ལོ་སོ་བདུན་སྲེག་བྱེད་གར་གྱི་མཁན་པོས་སྒྱུ་འཕྲུལ་ངོམས་པའི་ཚེ། ཡེ་ཤེས་ཀྱི་མཁའ་འགྲོ་དང་གནས་བདག་ཆེན་པོ་གནོད་སྦྱིན་བྲག་བཙན་དམར་པོས་ཤོག་སེར་ཞིག་ཐོ་རངས་སྟག་གི་དུས་ཚོད་ལ་སྤྲད་དེ་ཁྱོད་ཀྱིས་འདི་ལ་ལེགས་པར་ལྟོས་དང་དགོས་པ་འདུག་གསུངས་པས། དེར་བལྟས་ཙ་ན་གནས་ལུང་དཔལ་གྱི་རི་བོའི་གནས་ཡིག་དང་། མ་འོངས་འབྱུང་འགྱུར་གྱི་ལུང་བསྟན་བསྡུས་པ། གཏེར་འདོན་པའི་དུས་རྟགས། ཁ་བྱང་ཡང་བྱང་སྐོར་གྱི་ཤོག་དྲིལ་ཡིན་པར་འདུག་པས་དེ་རྣམས་དཔེ་ཐོག་ལ་ཕབ་ནས་ལས་ལྡན་གྱི་སྐྱེས་བུ་འགའ་ཞིག་ལ་གཟིགས་སུ་བཅུག་ནས་བསྩལ། གར་མཁན་ཟླ་བའི་དམར་ཕྱོགས་ཀྱི་ཚེས་བཅུའི་ཉིན་འཕགས་མཆོག་ཐུགས་རྗེ་ཆེན་པོ་དམར་པོས་ཞལ་གཟིགས་ནས་གསོལ་བ་བཏབ་པས་བྱང་ཆུབ་ཀྱི་སེམས་ཁྱད་པར་བ་རྒྱུད་ལ་སྐྱེ་ཞིང་འདོད་དོན་འགའ་ཡང་འགྲུབ། ཉམས་རྟོགས་ས་ལམ་གྱི་ཡོན་ཏན་བཟང་པོ་ཡང་སྐྱེས། དབྱི་མཁར་ཐེག་ཆེན་ཆོས་འཁོར་གླིང་དུ། ཡང་གསང་མཁའ་འགྲོའི་སྙིང་ཁྲག་རྩ་ཐིག་རླུང་གསུམ་གྱི་ཆོས་འཁོར་བསྐོར་ནས་སྦྱོང་བའི་སྐབས། སྙིང་ཐིག་གི་སྲུང་མ་འགས་དཔོན་སློབ་ཐམས་ཅད་བསྲུང་ཞིང་མཐུན་རྐྱེན་རྣམས་ལེགས་པར་བསྒྲུབ། རྒྱལ་དབང་པདྨའི་ཡང་སྤྲུལ་རིག་འཛིན་འཇའ་ཚོན་སྙིང་པོའི་ཟབ་ཆོས་ཀྱི་དབང་ལུང་འབོགས་པའི་སྐབས་གཏེར་སྟོན་རིན་པོ་ཆེས་ཞལ་མང་དུ་གཟིགས་ཤིང་། ནགས་རི་བཀྲ་ཤིས་འོད་འབར་སོགས། ལྷོ་ཀོང་དང་བྱང་ཀོང་གི་གཏེར་གནས་དང་ས་ཆ་ཐམས་ཅད་དུ་སྔར་འཇའ་ཚོན་པའི་སློབ་མ་པདྨ་བསྟན་འཛིན་ཡིན་པའི་དུས་ཀྱི་སྔོན་སྦྱངས་ལས་ཀྱི་བག་ཆགས་མང་པོ་སད་ཅིང་ཡུལ་སྣང་ཐམས་ཅད་ཁར་ཉིན་མཐོང་བ་ལྟར་སྔོན་གནས་རྗེས་དྲན་འགའ་ཞིག་མངོན་པ་དང་། མེ་སྤྲེལ་ལོའི་དབྱར་ལི་རྩང་ཕྱོགས་སུ་འབུལ་སྡུད་ལ་སོང་བས། མདོ་མང་བླ་བྲང་གི་བུམ་སྒྲུབ་ལ་བཞུགས་ནས་ལས་སྦྱོར་དམ་སྲི་མནན་པའི་དུས་ཡུལ་གྱི་རྒྱལ་འགོང་། འཁྲུགས་པའི་སྣ་འདྲེན་རལ་པ་ཅན་གཅིག་འདུག་པ་དམིགས་པས་གཟིར་བའི་ཚེ་དེ་མ་ཐག་པར་འཚུབ་མ་དང་བཅས་ཀུན་གྱིས་མཐོང་བཞིན་ཧོམ་ནང་དུ་སྒྲ་དང་བཅས་ཏེ་ལྷུང་བ་དང་། རི་ཤུལ་སྤྱི་གཏོ་ལ་སོང་བའི་དུས། ཤ་ནང་ནོར་བུ་ཟེར་བའི་ཡུལ་ལྷ་ཕོ་མོ་གཉིས་བསུ་མ་ལ་འོང་། འགྲོ་བ་ཡུལ་གྱི་སྐྱེ་འགྲོ་ཀུན་དབང་དུ་འདུས་ནས་དད་པའི་མྱུ་གུ་འཁྲུངས། མ་ཎི་ཀ་ཆེན་ལ་ཕྱག་ནས་འཐོར་བས་ནས་འགའ་ཞིག་རྡོ་ལ་མདུང་ཚུགས་སུ་ཟུག་ནས་ཀུན་གྱིས་ངོ་མཚར་སྐྱེས། ཡུལ་གྱི་ལྷ་འདྲེ་ཀུན་ལ་ཕན་ཐོགས། ལྷ་དང་སྲུང་མ་ཕལ་ཆེར་གྱིས་ལུང་བསྟན། བདག་གི་མི་མཐུན་པའི་ཕྱོགས་ཅུང་ཟད་རེ་ཡོད་པ། གཏེར་ཆེན་ཆོས་ཀྱི་རྒྱལ་པོ་ཀརྨ་རིན་པོ་ཆེ་དང་མཇལ་བས་དེ་ལ་རང་གིས་ཀྱང་རྟེན་འབྲེལ་གྱི་རྫས་རྡོར་དྲིལ་སོགས་ཅུང་ཟད་ཕུལ། དད་པ་བླ་ལྷག་ཏུ་བསྐྱེད་ཅིང་ཁོང་གིས་ཀྱང་ཐུགས་བརྩེ་བ་ཆེན་པོས་གསུང་བཟང་ཞེ་བཟང་མཛད། ཡང་མཚུངས་མེད་དྲིན་ཆེན་རྩ་བའི་བླ་མ་རིན་པོ་ཆེས་ཡེ་ཤེས་སྒྱུ་མའི་སྐུས་རྗེས་སུ་བཟུང་ཞིང་། དབྱི་རོང་ཕྱོགས་ཀྱི་ཐུགས་ཆེན་སྐུ་རྒྱབ་ཏུ་ལས་འཕྲོའི་སྨོན་ལམ་ཡོད་པས་སྐུ་བླའི་རྒྱུད་དུ་ཆོས་བདག་འགའ་འབྱུང་བ་དང་གཙུག་ལག་རྟེན་བཞེངས་རྒྱ་མི་ཆུང་བ་ཞིག་བསྒྲུབས་ཤིང་བར་ཆད་དམ་སྲིའི་སྡང་མིག་མ་ངོམས་ཤིང་། བན་བོན་སྲུང་མའི་འཐབ་འཁོན་མ་ཤོར་ན་བསྟན་འགྲོའི་དཔལ་ཡོན་ལན་གཅིག་འབྱུང་བར་དབུགས་དབྱུང་ལུང་བསྟན། རང་ལོ་སོ་བརྒྱད་ལ་མ་ཐུག་ཡན་གྱི་བར་དེར་ལྷ་དང་བླ་མས་ལུང་བསྟན་པ་རང་གི་རྒྱུད་ལ་དགེ་བའི་བག་ཆགས་སད་པ་སོགས་མང་དུ་ཡོད་ཀྱང་ཕར་ཆེར་ནི་ཕྱི་བཤོལ་དང་བདུད་དབང་དུ་ལུས། ཅུང་ཟད་རེ་དང་དུ་བླངས་ནས་བསྒྲུབ་པ་ཡང་ཡོད་ལགས་སོ།། ཡང་སྐབས་ཤིག་རྦ་ཀར་སྟོད་ཕྱོགས་ཀྱི་སྤྱི་གཏོ་ལ་བོས་ནས་ཕུར་སྒྲུབ་ཞིག་མཛད་སྐབས་དམིགས་པས་གཟིར་བའི་ཚེ་ཡུལ་གྱི་ཟོ་དོར་སྐུ་བླ་ཁྲབ་གྱོན་ལྷ་བ་ལ་བབས་ནས་རང་ལ་དབུགས་དབྱུང་གཟེངས་བསྟོད་བྱས། སྒྲུབ་པ་གྲོལ་ནས་རི་རྩེ་ནས་གཞི་བདག་ལ་ལྷ་བསང་དང་རི་ཁྲུས་ལ་སོགས་ཕུལ་སྐབས་ཤེལ་ལྟ་བུའི་སྒྲོམ་བུའི་ནང་དུ་སྨན་སྒྲུབ་དང་བཟང་དྲུག་རིན་པོ་ཆེའི་ཕྱེ་མ་སོགས་ཀྱིས་བཀང་བ་གཞི་བདག་གིས་གནང་། ནམ་མཁར་ཉི་ཟླ་སྐར་གསུམ་དང་འཇའ་དགའ་འཁྱིལ་ལྟ་བུའི་གུར་ཕུབ། བླ་མཚོའི་ནང་དུ་སྔར་མེད་པའི་ལྟས་བཟང་པོ་བསྟན། ཡུལ་མི་ཀུན་གྱིས་ངོ་མཚར་བའི་གཏམ་བརྗོད་ཅིང་ཡུལ་གྱི་གཞི་བདག་ཉམས་པ་སོར་ཆུད་པ་སོགས་དགེ་ཞིང་ལེགས་པའི་རྟགས་མཚན་བཟང་པོ་བྱུང་ལགས་སོ། །རང་ལོ་སོ་བརྒྱད་མཁའ་ལྡིང་རྒྱལ་པོས་གཤོག་རྩལ་བརྐྱང་བའི་ཚེ་ཉིང་འཁྲུལ་རྨི་ལམ་གྱི་ངོར་མི་ཉག་ཤར་ཕྱོགས་ཀྱི་ཟོ་དོར་ཆེན་པོ་བཞག་བྲ་ལྷ་རྩེས་རང་གཟུགས་ཇི་བཞིན་བསྟན་ཏེ་ཁྱོད་སྨད་མི་ཉག་ཕྱོགས་སུ་ཕེབས་ན་འགྲོ་དོན་དང་མཚན་སྙན་གྱི་རྒྱལ་རྔ་ཕྱོགས་བརྒྱར་ལྡིར་བའི་རྟེན་འབྲེལ་ཡོད་པས་ང་ཡིས་སྲུང་སྐྱོབ་ཀྱང་མཛད། བསུ་བ་ལ་འོང་ཟེར་ནས་ཡལ་སོང་། ཕྱི་ཉིན་རྨི་ལམ་དེ་ལ་རེ་བ་བཅས་ནས་མར་ནགས་ཕྲན་ལ་འགྲོ་གྲབས་བྱས། དབྱར་ཁ་དཀར་སྡོམ་ལ་སོང་ཚེ་རང་གི་སྲུང་མ་དང་ཡུལ་སྐྱོང་ཚོས་མཐུན་རྐྱེན་རོགས་རམ་འགའ་བསྒྲུབས། དེ་ནས་མདོ་ཕྱོགས་ལ་འགྲོ་གྲབས་བྱས་ཚེ་རྡོ་རྗེ་དབྱི་ཁྲོམ་ལ་བསང་མཆོད་བཏང་ནས་སྔར་གྱི་དངོས་རྫས་འགའ་རྐུན་བུས་ཁྱེར་བའི་ར་མདར་སྦྲན་པ་དང་། ཡུལ་ལྷ་འགའ་ལ་ལམ་ལྷའི་ཕྲིན་ལས་བཅོལ། དེ་དག་ཀུན་གྱིས་བཅོལ་བའི་ལས་བསྒྲུབས་པའི་མངོན་སྤྱོད་ཀྱི་རྟགས་མཚན་ཁྱད་པར་བ་མང་པོ་བསྟན། དབྱི་དགོན་དུ་བསང་གཏོང་སྐབས། སྐུ་བླ་ར་ཁང་གིས་བྱ་འོལ་བའི་ཚུལ་གྱིས་བདག་གིས་དར་རྒོད་བཏགས་པ་མཆོད་རྟེན་གྱི་དབུ་རྩེ་ལ་ཕུད་པས་བཟང་པོའི་རྟེན་འབྲེལ་འགྲིགས། དེ་ནས་ཡར་སོང་སྟེ་དབྱི་སྟོད་ལ་ཕྱིན་པའི་ཚེ་རྡོ་རྗེ་དབྱི་ཁྲོམ་འདི་གནས་ཆེན་པོ་ཡིན། བདག་གི་ཡང་འགོ་བའི་ལྷ་ཡིན་བསམ་པའི་མོས་པ་དུང་དུང་བ་བྱུང་བའི་ཚེ་གཞི་བདག་གི་གངས་ནང་ནས་འོད་དཀར་པོའི་ཐིག་ལེ་སྦྲ་གུར་ཙམ་ལམ་ལམ་བྱུང་སྟེ་གངས་རྩེར་ཐིམ་པ་དང་། རྒོད་གཅིག་འཕུར་ནས་བདག་འགྲོ་ཕྱོགས་ལ་སོང་བས་བདག་ལ་ཡུལ་ལྷས་སྡོང་གྲོགས་བྱས་པའི་རྟགས་སུ་གོ། ཀུ་ལུའི་ལུང་པར་ཞག་ཕབ་གནས་སྐབས་སུ་ཉམས་ལ་བཞག་བྲ་ལྷ་རྩེ་དང་སྲུ་བུ་ཟེར་བའི་ཡུལ་ལྷ་བསུ་མར་ཐོན་པའི་སྣང་བ་ལ་གཞི་བདག་གིས་སྣེ་ལེན་དུ་གླ་བ་ཞིག་གིས་ཆིབས་རྟ་དང་དྲེའུ་ལ་སྐོར་བ་ལན་བདུན་བདུན་བྱས་ནས་ཁོ་རང་ཆུ་འགྲམ་དུ་དུས་བྱས་སོང་བ་ལ་བདག་གིས་བཟང་པོའི་འདུ་ཤེས་བཞག་ནས་ཤ་ཁྲག་ལ་ལོངས་སྤྱད། དོམ་ལུང་པའི་བདག་གི་གྲྭ་པ་གཉིས་གསུམ་ཙམ་ཐོན་ཏེ་དར་སྦྲང་སོགས་དངོས་རྫས་ཆ་ཤས་ཕུལ་ཏེ་ཁ་འཇམ་ཚིག་གིས་གཏང་རག་བྱས་ཤིང་ཕྱག་དང་བཀུར་སྟིས་བརྒྱན། བདག་ཀྱང་དགའ་མགུ་ཡི་རང་བར་གྱུར། དེ་མིན་གྱི་ཉམས་སྣང་ཕྲ་མོ་འགའ་བྱུང་ཡང་ཡི་གེ་འཇིགས་པ་དང་མང་པོ་ལབ་པ་ཅིའི་ཕྱིར་འོས། དེ་ནས་བླ་བྲང་གི་རྩར་སླེབས་ཏེ་ཞག་པོ་འགར་བསྡད་པའི་ཚེ་ཡུལ་མི་ཚོ་དང་གྲྭ་ཚང་ཚོ་དགའ་ཡ་ལེ་བ་དང་། ཁྱད་པར་སྐྱབས་རྗེ་རིན་པོ་ཆེ་རི་ཁྲོད་སྤྲུལ་པའི་སྐུས་ཐུགས་དགྱེས་པའི་མཛད་པ་མང་དུ་གནང་། ཕྱོགས་ཀྱི་བསྔོ་རྟེན་མཚོན་ཙམ་ལས་ལོངས་སྤྱོད་ཀྱི་འདུ་བ་ཆེར་མ་བྱུང་། ཁུ་བོ་སྤྲུལ་སྐུ་དང་དགེ་རྒན་འཇིགས་ཚུལ་སོགས་ཀྱིས་དཀར་སྡོམ་དང་གདུལ་བྱ་ལ་ཕེབས་ན་ལེགས་གསུངས་མོད་ཀྱང་། བདག་གི་བསམ་པ་ལ་དྲང་མི་མེད་པ་ལ་འགྲོ་བ་སྤྲང་པོ་ལྟར་རེད་པས་ཐབས་སྡུག་བསམ་པ་ལ་ནུབ་མོ་རྨི་ལམ་དུ་སྲུང་མ་དགྱེས་པའི་སྣང་བ་དུ་མ་བྱུང་། ཁྱད་པར་བུད་མེད་དཀར་ལ་དམར་བའི་མདངས་ཆགས་པ་ཕྱག་ན་མདའ་དར་དང་གཏེར་བུམ་བསྣམས་ནས་གར་སྟབས་མཛད་ཅིང་འཁོར་དུ་ལྷ་ཀླུ་མང་པོས་བསྐོར་བ་ཞིག་འོང་ནས་ཁོང་བཞག་བྲ་ལྷ་རྩེའི་ཡུམ་བཞག་མོ་འབར་བའི་འོད་ལྡན་མ་ཟེར་བ་ཡིན། ང་ཡི་གངས་ལ་ཁྱོད་བྱོན་དང་དངོས་གྲུབ་གྱི་སྐལ་བ་རྟེན་འབྲེལ་དང་བསྟུན་ནས་འབྱུང་གསུངས་ནས་ཡལ། དེ་ནས་ཁོ་བོ་སྨྱོན་པ་འུར་ལངས་པ་ལྟར་ཕྱི་ཉིན་ནས་དཔོན་སློབ་གསུམ་བཞག་མོའི་གངས་ལ་ཕེབས་ནས་བསང་གསུར་ལུས་སྦྱིན་སོགས་ཀྱིས་གཞི་བདག་མཉེས་པར་བྱས་པའི་ཚེ། སྔོན་ལ་སྨན་མོ་དང་བྲག་བཙན་མི་མ་ཡིན་དུ་མའི་འཚུབ་སློང་མང་པོ་བྱུང་། རྗེས་ནས་ཡུལ་ལྷའི་འདུ་བ་དང་དངོས་གྲུབ་ཀྱི་རྟགས་མཚན་དུ་མ་བྱུང་། རྩ་གསུམ་སྲུང་མ་དང་བཞག་བྲ་ལྷ་རྩེ་ལྷ་དགའི་གནས་བདག་ཕལ་ཆེར་ཐོན་ནས་གནས་བསྟོད་དང་ལུང་བསྟན་འགའ་ཞིག་གནང་བའི་ལྟས་བཟང་པོ་ཤར། དེ་དང་མཉམ་དུ་སློབ་བུ་འཇིགས་མེད་ཚུལ་ཁྲིམས་དང་ཚེ་གཡང་གཉིས་མདོ་ལ་མངགས་པའི་ཚོང་ཟོང་གསེར་ཞྭ་དང་རྣ་རྒྱན། སྣག་ཚ་དར་རས་སོགས་འཇམ་དབྱངས་ཉི་མ་ལ་བསྐུར་ནས་བདག་གི་དྲུང་དེར་སླེབ་པའི་ཚེ་རྟེན་འབྲེལ་ལེགས་པའི་སྣང་བ་ཤར། གཏེར་ཡིག་ཆ་ཤས་དང་གཏེར་སྒྲོམ་འགའ་ཡང་ལེགས་པར་ལོན། ནགས་ཀློང་མ་སོགས་ཡུལ་མི་ཐམས་ཅད་ཀྱིས་བདག་ཅག་གནས་པའི་རི་དང་སྒར་སྟེང་ལ་ཞག་གསུམ་བར་དུ་འཇའ་གུར་སུམ་རིམ་འཁྱིལ་བ་མཐོང་ནས་ཤིན་ཏུ་ངོ་མཚར་རྨད་དུ་བྱུང་སྟེ་དོམ་ལུང་སྤྲུལ་སྐུ་གཞན་ཕན་ཟེར་བ་དེས་གཞི་བདག་གི་གངས་ནས་གཏེར་དྲངས་པ་ཡིན་ནོ་ཞེས་བཤད། དེའི་རྗེས་ནས་མ་བརྟག་མི་རེ་བའི་ས་ནས་ནོར་རྫས་དུ་མ་བྱུང་། ཡོན་བདག་མང་པོས་བཀུར། བདག་གིས་ཀྱང་རྩ་བའི་བླ་མ་རིག་འཛིན་ལུང་རིག་གླིང་པའི་བཀའ་དྲིན་ཡིན་བསམ་ནས་རང་སྐལ་དང་འཚམས་པའི་དགེ་བསྐུལ་ཅི་ནུས་ལ་བརྩོན། ཤི་གསོན་མང་པོ་ལ་ཆོས་ཀྱིས་འབྲེལ། ཨོ་རྒྱན་ཆེན་པོ་དང་བླ་མ་དབྱེར་མེད་པས་དག་པའི་སྣང་ངོར་བརྡ་རྟགས་རྟེན་འབྲེལ་རགས་རིམ་རེ་མཛད། ཡུལ་སྐྱོང་ཟོ་དོར་གཉན་པོ་བཞག་བྲ་ལྷ་རྩེ་དང་། ལྷ་དགའི་སྒོ་སྲུང་དུང་གི་ཐུལ་བ་ཅན་དང་། གནས་བདག་ཀླུ་རྒྱལ་ཆེན་པོ་རྣམས་ཀྱིས་ཕེབས་ཞུ་མཛད་ནས། ལྷ་སྒང་ལ་སླེབ་པའི་ཚེ་སྔོན་ལས་ཀྱིས་འབྲེལ་བའི་བླ་རྒན་པདྨ་ཟེར་བ་དེ་ལ་ཐུག་སྟེ་དར་བཏང་། གཉེར་བ་ལས་འཛིན་དགེ་བསྐོས་སོགས་ཀྱིས་དགའ་བའི་འཛུམ་གྱིས་བསུས་ནས་མཇལ་དར་རེ་རེ་གནང་། ཡུལ་མི་ཆེ་ཕྲ་ཀུན་གྱིས་གོ་གོ་རིག་རིག་མཛད། དེར་གནས་ཁང་ལེགས་པོར་བསྡད་ནས། ཆུ་ཤིང་གསོལ་རྫས་ཐམས་ཅད་ཀྱི་ཕོག་གཏད། དེར་ཆོས་ཀྱི་བདག་པོ་བྲག་མཁར་མཁན་པོ་མཁྱེན་རབ་འོད་ཟེར་གྱིས་ཀྱང་བཀུར་སྟི་རིམ་གྲོ་བགྱིས། བདག་ལའང་དག་པའི་སྣང་བ་འབྱམས་སུ་ཀླས། ཇོ་བོ་རིན་པོ་ཆེ་དང་སྐུ་གསུང་ཐུགས་རྟེན་ཐམས་ཅད་མཇལ་ཚེ་གདུང་ཤུགས་དྲག་པོས་དད་པ་བརྟན་པོ་རྒྱུད་ལ་སྐྱེས་ནས་ཐམས་ཅད་ཀྱི་འབྱུང་ཁུངས་ཡོན་ཏན་ཕལ་ཆེར་སེམས་ལ་འཆར་འདུག་པ་བྱུང་། ལྷ་གཉེར་ལ་སྐུ་གསུང་ཐུགས་རྟེན་འདི་ཚོའི་འབྱུང་ཁུངས་ལོ་རྒྱུས་ཤིག་བགྲོངས་དང་བཀའ་དྲིན་ཆེ་ཞུས། སྐུ་གཉེར་དེས་མི་རབས་མང་པོའི་སྔོན་ལ་འདིར་གནས་ཡིག་པོད་ཁ་ལོངས་པ་ཙམ་ཡོད་ཀྱང་རྗེས་ནས་མེ་འཇིགས་ཀྱིས་བཅོམ་སོང་བ་རེད་ལགས། ཁོ་བོས་ནི་ཅི་ཡང་མི་ཤེས། གཞན་མཇལ་མ་ཚོས་ཀྱང་ལོ་རྒྱུས་ཤོད་ཟེར་ཡང་རང་བཟོ་ཅུང་ཟད་མ་གཏོགས་སྨྲ་རྒྱུ་ཅང་མི་འདུག ད་རེས་ལས་འཕྲོ་བཟང་བས་ཁྱེད་དང་མཇལ། ཁྱེད་གཏེར་སྟོན་ཡིན་པ་བདག་གིས་གོ སྐུ་གསུང་ཐུགས་རྟེན་འདི་རྣམས་དང་ལྷ་དགའི་གནས་འདི་ལ་འབྱུང་ཁུངས་ལོ་རྒྱུས་ཀྱི་གནས་ཡིག་ཅིག་མཛད་རོགས་སྐུ་མཁྱེན་གསུང་མཁྱེན་ཐུགས་མཁྱེན་ཟེར་ནས་ཕྱག་འཚལ་ཏེ་དར་ཕུལ། མཁན་ཆེན་མཁས་པའི་དབང་པོ་མཁྱེན་རབ་ཀྱིས་ཀྱང་དེ་དེ་བཞིན་ཉིད་དུ་གསུངས་པའི་ཚེ་བདག་གིས་འདི་ཚོས་ང་ལ་ཅོ་འདྲི་ཡིན་བསམས་ནས། ཁྱེད་རྣམས་ཀྱིས་རྫུན་མ་ལབ། འདིར་སྔོན་བྱོན་གཏེར་སྟོན་གྲུབ་ཐོབ་བརྒྱ་སྟོང་མང་པོ་བྱོན་པ་ལ་ཁྱེད་ཅག་གིས་མ་ཞུས་པ་འདྲ་མོད། ང་རང་ལ་དེ་འདྲའི་ཕོ་ཚོད་མི་གདའ་སྨྲས་ནས་ཕར་སོང་བ་ལ་ཡང་ནས་ཡང་དུ་སྐུ་གཉེར་དེས་རྟེན་འབྲེལ་གྱི་རྫས་སྣ་རེ་ཐོགས་ཏེ་ནན་གྱིས་ཞུ་བ་ཕུལ་བྱུང་། མཁན་པོ་དང་ཆོས་ཁྲིམས་གཉེར་བ་དུ་མས་བསྐུལ་བའི་ཚེ་ལྷ་དང་བླ་མས་ལུང་ཅི་ལྟར་བསྟན་པ་བཞིན་བྲི་དགོས་པའི་དུས་ལ་བབས་པར་ཤེས་ནས་གནས་ཡིག་འབྲིང་པོ་ཐོགས་ཆགས་མེད་པར་ཕབ་པ་ནི་རང་གཞུང་བཞིན་ལ་འགྲོ་དོན་ཡང་རྒྱ་མི་ཆུང་ཙམ་དུ་བྱུང་། དེ་མིན་ཞལ་གཟིགས་ལུང་བསྟན་ཕྲན་བུ་མང་སྟེ་ཧ་ཅང་བཤད་རྒྱ་ཆེ་ན་རྣ་བར་གཟན་པ་དང་། ཡི་གེ་མང་དྲགས་པས་མ་བྲིས་སོ། །བླ་བྲང་ནང་ལ་ཕེབས་ནས་རོང་ཡུལ་དུ་ནས་བསོད་ལ་འགྲོ་གྲབས་བྱས་པའི་ཚེ། རི་ཁྲོད་སྤྲུལ་པའི་སྐུའི་ཞབས་པད་དུ་སེང་གདོང་སྔོན་མོའི་དབང་ཞུ་བའི་བྱིན་འབེབས་དུས་མཁའ་འགྲོ་མ་ཕག་གི་གདོང་པ་གྲི་གུག་ཐོད་ཁྲག་ཅན་མཐོང་བའི་སྣང་བ་སྐྱེས། བརྗོད་མེད་ཀྱི་ཉམས་བྱུང་། སྤྲུལ་པའི་སྐུ་དེ་ཉིད་ལོ་ཙཱ་ལྷ་ཡི་ཟླ་བ་ཡིན་པའི་སྣང་བ་དང་ཉམས་འགའ་ཞིག་ཤར། ཁོང་ལ་ཞབས་བརྟན་གྱི་ཚུལ་དུ་ཐོས་གྲོལ་བཏོན་ཏེ་དབང་རྒྱས་པ་འབུལ་བ་སོགས་ཀྱི་ཚེ་དངོས་ཉམས་ཀྱི་ལྟས་བཟང་པོ་དུ་མ་ཐོབ། དེ་ནས་རོང་ཡུལ་ལ་སོང་བའི་ཚེ། ཕྱུག་མོ་དགོན་དུ་ཕེབས་པའི་དུས། བུད་མེད་གོས་ཆེན་སྔོན་པོའི་ལྭའུ་གྱོན་པ་གསེར་གྱི་རྣ་ཆ་སོགས་རྒྱན་དུ་མས་སྤྲས་པ་ཞིག་གིས་ལྷ་ཁང་ནང་ལ་ངས་ཁྲིད་ཟེར་ནས་མཇལ་རོགས་མཛད། མགོན་ཁང་ནང་སླེབ་ཚེ་ཁྱེད་རྣམས་ཀྱིས་སྲུང་མ་ལ་ཕྲིན་བཅོལ་གྱིས་ཟེར་ནས་རིམ་གྱིས་ནས་ཕུལ་ནས་སོང་། དེ་དག་ཕལ་བའི་མི་མ་ཡིན་ཏེ། དཀར་མོ་ཉི་ཟླ་ཐོད་ཕྲེང་གིས་སྡོང་གྲོགས་བྱས་པའི་རྟགས་ཡིན་པས་ངོ་མཚར་བླ་ལྷག་ཏུ་གྱུར། དེ་ནས་ལམ་ཁ་རུ་གཞི་བདག་བཞག་བྲ་ལྷ་རྩེ་ལ་བསང་བཏང་། ཕྲིན་ལས་བཅོལ། ཟ་ཁ་ཕྱེ་བའི་ལྟས་བཟང་པོ་ཤར། གཞི་བདག་ལ་བསང་ཡིག་ཅིག་མཛད། དེ་ནུབ་རྨི་ལམ་དུ་རོང་ཡུལ་གྱི་ཟོ་དོར་སྐུ་ལྷ་རྡོ་རྗེ་ཞལ་དཀར་༼ཡུལ་མིའི་སྐད་དུ་ཨ་མྱེ་ཡོ་རྣ་ཟེར་༽ཡིན་ཟེར་བ་དེ་བསུ་བ་ལ་འོང་པའི་རྟེན་འབྲེལ་འགའ་རྨིས། དེ་གར་སླེབ་པའི་ཡུལ་མི་ཚོའི་སྣང་བར་བདག་ལེགས་པོར་མཐོང་། འབྲུ་ནོར་རྙེད་པ་རང་ཚོད་ལ་གཞལ་ན་ཕུན་སུམ་ཚོགས་པ་འདུས། ལམ་དགྲ་ཅི་ཡང་མེད་པར་བདེ་བླག་ཏུ་བསླེབས་ནས། ཏ་ཕོ་ལ་ལ་ཕྱིན་ཚེ་བདག་དཔོན་གཡོག་གཉིས་རྗེས་ལ་ལྷག་སོང་བའི་ཚེ་ཁ་ཆར་གྱི་ངར་འཕྲོ་བ་དང་ན་བུན་འཐིབས་པ་སོགས་ཀྱིས་ལམ་མདོ་ཕྱོགས་ལ་འགྲོ་བའི་ལམ་ཆེན་དུ་ནོར་སོང་བས་ཅུང་ཟད་དཀའ་ཞིང་ངལ་གསོ་བའི་ཚེ་གཞི་བདག་གི་གངས་ནང་ནས། བྱ་ནག་པོ་ཞིག་འཕུར་འོང་བའི་སྣང་བ་ཤར་ཚེ། བུད་མེད་ནག་མོ་ཞིག་ཏུ་གྱུར་ནས། ཁྱོད་ཉིད་འདི་ནས་ཟླ་བ་གཅིག་ཙམ་མཇུག༔ ལྕགས་ཀྱི་ར་ཛཱའི་གཙུག་ཕུད་ནོར་བུས་འདུད༔ ཚེ་མཇུག་མ་རྫོགས་བར་དུ་འདིར་ཞབས་མཆི༔ ཞེས་སོགས་ཟེར་ནས་བྱ་ལམ་རྗེས་མེད་དུ་གྱུར་སོང་བ་ལ། བདག་གི་སྣང་བ་དེ་ལ་ནི། ཕ་ཡུལ་བདུད་ཀྱི་བཙོན་ར་རུ། །ཆགས་པའི་མདུད་པ་མ་གྲོལ་ལན། །འདི་རུ་འདུག་པ་མི་སྤྲོ་ཞིང་། །མྱུར་བར་ཡར་ལ་རྒྱུ་སྣང་སྐྱེས། །དེ་ནས་རང་ཁྱིམ་བླ་བྲང་དུ་ཐོན། ཞག་འགར་ངལ་བསོས། ཡར་ཕེབས་པའི་འདུན་མ་བསྒྲིག དབོན་པོ་ཡེ་ཤེས་འོད་ཟེར་དེ་ཡང་ཁང་གདོང་བླ་མ་མགོན་དབང་དང་གྲུབ་ཆེན་རིན་པོ་ཆེ་སོགས་མཇལ་དུ་ཁྲིད་ན་ཆོས་མགོ་ཐོན་ཅིང་བར་ཆད་རགས་རིམ་བཟློག་པའི་སྣང་བ་ཤར། ཆོས་ཀྱི་བདག་པོ་ཚ་ཉག་སྤྲུལ་སྐུ་དང་མཇལ། ཚེས་བཅུའི་ཚོགས་འཁོར་བསྐོར། དེ་ནས་སྒར་ཡར་བཏེགས། རྗེ་འཕྲུལ་ར་ཛ་ལྕགས་ཀྱི་མིང་ཅན་གྱི་བཀའ་བྱུང་ནས་ལྷ་དགའི་གནས་ཡིག་སྐུ་མདུན་ལ་འོང་དགོས་གསུངས་པ་དང་ཆོས་ཁྲིམས་ཀྱིས་གནས་ཡིག་མདུན་དེར་སྤྲད། ཁོང་གིས་ཞག་པོ་འགའ་ལ་གཟིགས་ནས་བདག་རྐྱེན་གནང་སྦྱིན་མཛད་ནས་ཡར་བཏང་། རྗེས་ནས་བདག་ཡུམ་ལྕམ་དྲལ་ཐམས་ཅད་གནས་མཇལ་ལ་བྱོན། ཇོ་བོ་རིན་པོ་ཆེ་ལ་མཆོད་པའི་མཎྜལ་རྒྱ་ཆེན་པོས་བསྙེན་ཅིང་བཀུར། གྲྭ་ཚང་སྤྱི་ལ་མང་ཇ་ཡོན་འབུལ་རྒྱ་མི་ཆུང་བར་མཛད་ནས་ཐུགས་དགྱེས་པ་ཆེན་པོས་བཀའ་གསུང་སྤྱི་བོར་བཀོད་དེ་ངོ་མཚར་རྨད་དུ་བྱུང་། དེ་ནས་བདག་དཔོན་སློབ་ཐམས་ཅད་དབྱི་ཁོག་ལ་བདེ་བར་སླེབས། དེ་ནས་འོ་བཟི་ཝ་གོ་དགོན་ལ་ཕེབས། གྲྭ་ཚང་ཚོ་ལ་གནང་སྦྱིན་མཛད། ཞབས་བརྟན་འཚོགས། བདག་གི་རྨི་ལམ་དུ་བྱད་གཏད་ཆེ་བའི་ངོ་མང་ཞིག་རྨིས། མཁས་དབང་བཙུན་པའི་བླ་མ་དམ་པ་རིན་པོ་ཆེ་ཕུ་ཟླུམ་དཀོན་མཆོག་གིས་ཕུར་སྒྲུབ་ཞིག་མཛད། བདག་གིས་ཀྱང་རྟ་མགྲིན་གཏོར་བཟློག་དམ་པོ་བྱས། དེ་ནས་སྤྲུལ་པའི་སྐུ་རིག་འཛིན་ལུང་རིག་གླིང་པའི་དངོས་སློབ་སྨིན་གྲོལ་དགོན་༼སྨོན་ལམ་དགོན་ཡིན་ནམ་དཔྱད།༽གྱི་བླ་མ་རིན་པོ་ཆེས་ཁོང་གི་མངའ་འོག་འདིར་གཏེར་གསར་གྱི་དབང་ལུང་ཞིག་འབོགས་དགོས་གསུངས་པའི་བཀའ་ལྡོག་མི་ནུས་པའི་ཕྱིར་དེར་ཕྱིན་ནས་དབང་ལུང་མཛད། བདག་གཞན་ཀུན་གྱི་སྣང་བ་འགྱུར་བ་དང་ངོ་མཚར་བའི་རྟགས་འགའ་བྱུང་ཞིང་ཡུལ་དེའི་དམར་ཆོག་བཅད། དགེ་བསྐུལ་རང་དང་འཚམས་པ་བྱུང་། དེ་མིན་ཡི་གེ་འཇིགས་པས་དབེན། རང་ལོ་སོ་དགུ་ལ་རྣམ་འཕྱང་ཞེས་པ་ས་ཕོ་ཁྱིའི་ལོ་ལ་བབས་པའི་ཚེ་མི་དང་མི་མ་ཡིན་དུ་མས་གྲུབ་ཆེན་སྒར་དུ་ཕེབས་ན་ལེགས་པའི་སྣང་བ་བྱུང་ཚེ། དབོན་པོ་ཡེ་ཤེས་འོད་ཟེར་སྲས་གཞན་ཕན་བཅས་སྒར་བ་མི་ཉུང་ཙམ་ཞིག་ཡར་ཕེབས་པའི་ཚེ། ལི་རྩང་ཀུན་གྱིས་ཁ་འཇམ་ཚིག་གིས་གཏང་རག་དང་ཞབས་ཏོག་ཅི་དགོས་བསྒྲུབ། ཨ་དར་ཁོག་དེ་ལ་ཞག་ས་བྱས་པའི་ཚེ་ནམ་གུང་སྙི་རྒྱལ་རེད་བསམ་པའི་སྣང་བ་ལ་རྒྱལ་གདོན་དང་ཡུལ་ལྷ་ནག་ཕྱོགས་པ་དག་གིས་འཚུབ་ལྷོང་གཡོ་བའི་སྣང་བ་བྱུང་། རྩ་བའི་བླ་མ་དང་རྗེ་བཙུན་སྒྲོལ་མ་དབྱེར་མེད་སྤྱི་བོར་བསྒོམས་ནས་གསོལ་བ་ཕུར་ཚུགས་སུ་བཏབ་པས་གནོད་པ་ཆེར་མ་བྱུང་། ཕྱི་ཉིན་བདག་ལ་ཚད་པ་ཅུང་ཟད་ཀྱི་ནད་ཕོག་ཀྱང་མ་གནོད། སྲས་གཞན་ཕན་གྱི་སྙུང་རོ་བསླངས། རྫིག་ཟེར་བའི་ས་རུ་སླེབ་སྐབས་ཐབས་སྡུག་པོ་ཙམ་གྱིས་ཞག་ས་བྱས། དེར་བྲག་བཻ་རོའི་སྒྲུབ་ཕུག་ཡོད་པ་དང་གནས་ཆུ་རྡོལ་བ་གཅིག་གདའ། བྲག་དེ་ན་རྡོ་རྗེ་ཞིག་གཏེར་དུ་ལེན་པའི་སྐལ་བ་དང་། རང་བྱུང་མང་པོ་མངོན་པའི་རྟེན་འབྲེལ་ཡོད་ན་ཡང་དེ་ནུབ་ཆིབས་རྟ་བཟང་པོ་ཞིག་ཡོད་པ་རྐུན་བུས་ཁྱེར་སོང་། སྲས་པོའི་སྙུང་མ་དྭངས་པ་སོགས་ཀྱིས་རྟེན་འབྲེལ་འཕྱུག་པས་ཡི་གེ་ཨ་ཙམ་ལས་རང་བྱུང་གཞན་དོན་གྱིས་མ་བཀྲོལ། གསང་སྔགས་འཁོར་ལོ་གདོང་གི་དགོན་ལ་སླེབ་པའི་ཚེ། རྒྱལ་སྲས་དབོན་སྤྲུལ་ཡོངས་ཀྱིས་དགའ་བའི་འཛུམ་མདངས་ཕྱུང་། ཕོ་བྲང་ཡང་རྩེ་ཐུབ་བསྟན་ཨེ་ཝཾ་པདྨའི་དགའ་ཚལ་ན་བླ་མ་མགོན་དབང་བཅད་རྒྱ་དམ་པོར་བཞུགས་ཀྱང་། བདག་ལ་ནི་དབུགས་དབྱུང་གཟེངས་བསྟོད་ཀྱི་ཞལ་མཇལ་གསུང་སྙན་ལེགས་པོར་གནངས་ཏེ་ཐུགས་བརྩེ་མཛད། དེར་རི་ཁྲོད་དུ་བྱ་བཏང་རྣལ་འབྱོར་དཔལ་སྤྲུལ་སློབ་མ་མཁས་དབང་དམ་པ་ཆོས་གྲགས་མཚན་ཅན་དང་འཕྲད། ཡོན་ཏན་རིན་པོ་ཆེའི་མཛོད་དང་། འཇམ་དཔལ་མཚན་བརྗོད་ཀྱི་ཁྲིད་ཁ་གནང་། ཐུགས་བརྩེ་རྒྱ་ཆེན་མཛད། བདག་གིས་ཀྱང་གཟའི་སྲོག་དབང་ཕུལ། ཆོས་ཀྱི་བདག་པོར་མངའ་གསོལ། སྐྱེ་ཕྲེང་ལུང་བསྟན་བཞིན་བྲིས་པ་ཕྱག་ཁར་ཕུལ། གཏེར་གསར་མང་པོ་ཐུགས་ཉམས་ལ་བཞེས་ནས་ཉིད་ཀྱང་ངོ་མཚར་རྨད་དུ་བྱུང་། དེ་ནས་བདག་གྲྭ་འཁོར་ཐམས་ཅད་གྲུབ་ཆེན་དགོན་ལ་ཕེབས། གྲུབ་ཆེན་རིན་པོ་ཆེའི་༼འཇིགས་མེད་བསྟན་པའི་ཉི་མ།༽ཞལ་མཇལ་གསུང་ཐོས། དམ་ཆོས་བདེ་ཆེན་ལམ་མཆོག་ཁ་ཚང་དོན་དྲིལ་གྱི་དབང་ལུང་བཀའ་གཏད་བཅས་གནང་། གདམས་ངག་སྣ་ཁ་འགའ་ཞིག་ཞུས། དེ་སོགས་ལེགས་པར་གནང་། ཤུགས་ཆུང་དགོན་པ་སོགས་ཀྱིས་གནང་སྦྱིན་དམ་པོར་མཛད། བདེ་བར་ཁང་གདོང་ལ་ཚུར་སླེབ། སྔར་རྟ་དོན་རྩར་བཅད་རྐུན་མ་སུ་ཡིན་གོ་ནའང་སྟེར་རོགས་མ་བྱས། ཆོས་སྐྱོང་ཡོངས་ལ་ཕྲིན་ལས་བཅོལ་བའི་ཚེ་རྟགས་མཚན་བཟང་པོ་བྱུང་། དེ་ནས་རང་ཡུལ་ལ་སླེབ་པའི་ལམ་ཁར་མི་དཔོན་སོགས་རྩང་སྟོད་སྨད་ཡོངས་ཀྱིས་བསྙེན་བཀུར་གྱི་རྙེད་འཚོལ་ཅུང་ཟད་རེ་བྱུང་། དབྱི་མཁར་སྒྲུབ་མཆོད་ལ་བསྡད། དམ་སྲི་དང་རྒྱལ་བསེན་གྱི་འཁྲུགས་སློང་མང་པོས་ཉམས་སྣང་ཤིན་ཏུ་རྩུབ་ཅིང་དེ་ལ་བཟློག་རིམ་གནད་གང་མང་མ་བསྒྲུབ། ཅི་མི་སྙམ་པའི་ལེ་ལོ་ཕྱི་བཤོལ་གྱི་ངང་ནས་ལྷ་ཁང་གི་ཆ་རྐྱེན་ཅུང་ཟད་རེ་ཨེ་འགྲུབ་བསམ་ནས་སྡོམ་བུ་ལ་སོང་། དངོས་རྫས་དུ་མ་འབྱོར། ཝ་གོ་ལ་ཐོན། སྔོན་སྦྱངས་ལས་ཀྱིས་འབྲེལ་བའི་སློབ་བུ་གཅོད་རྒན་ཞིག་བཞུགས་པ་དེ་ལྔ་ལམ་དུ་གྱུར་པ། དམ་སྲི་དང་རྒྱལ་བསེན་བྱད་ཀྱིས་འཚུབ་མ་བདེ་མིན་འགའ་བྱུང་། ལྷ་དང་བླ་མ་དཔལ་རྡོ་རྗེ་གཞོན་ནུ་མཁའ་འགྲོ་ཆོས་སྐྱོང་རྣམས་ལ་གསོལ་བ་རྩེ་གཅིག་ཏུ་བཏབ། རེ་འགའ་བཟང་པོའི་སྣང་བའང་བྱུང་། རེ་འགའ་རྩུབ་ཉམས་ཡང་མང་པོ་བྱུང་། ཕུར་བ་སྲི་མནན་ཞིག་བཏོན་པས་རྐྱེན་ངན་དབྱིངས་སུ་སེལ་བའི་རྟེན་འབྲེལ་ཤར། ནས་བསོད་ལ་འོ་བཟི་འཁོར་སར་ཐུགས་ཆེན་ཡན་ཆད་ལ་སོང་། ལྷ་སྲུང་ཡུལ་སྐྱོང་ཡུལ་མི་ཀུན་གྱི་བསམ་པ་འགྲུབ་རུང་དུ་བྱས། ཐུགས་ཆེན་ཇོ་བོ་ལ་ཕྱག་མཆོད་མཎྜལ་གྱི་རིམ་པ་ཅི་ལྕོགས་བགྱི་སྙམ་པའི་ཉམས་སྣང་བཟང་པོའི་ལྟས་ཤར། ལུང་བསྟན་འདྲ་མོ་འགའ་བཤད་པ་ཚོ་བདེན་ཅིང་གྲུབ་པའི་རྟགས་ཅུང་ཟད་རེ་བསྟན་པའི་ཚེ་གཞན་སྣང་འགའ་བསྒྱུར་ནུས་པ་དང་། ཡུལ་འདྲེ་ཕལ་ཆེར་དམ་ལ་ཐོགས་ཤིང་གཞི་བདག་ཆེ་ཕྲ་དབང་དུ་འདུ་བའི་ལྟས་ལེགས་པོ་རེ་བྱུང་། འབུལ་སྡུད་རྒྱ་ཆེན་བྱུང་། དེ་ནས་ཡར་སིདྡྷི་དགོན་ལ་དཔོན་སློབ་བཞུགས་གདན་འཇགས་པ་དང་མཉམ་དུ། དམ་པ་རིན་པོ་ཆེ་མཚམས་པ་འོད་འཕྲོ་བྱོན་ཞིང་བདག་ལ་དབུགས་དབྱུང་གཟེངས་བསྟོད་གནང་། སྐུ་རིམ་ཚེ་སྒྲུབ་ཚེ་དབང་གསུངས། ཕར་ལའང་དག་སྣང་གི་སྐོར་ཚོ་ཅུང་ཟད་རེ་བྲིས་ཤིང་ཕུལ། གར་གཅོད་ཀྱི་དབང་ཞིག་ཐུགས་བཞེད་བཞིན་ཕུལ། བདག་གི་ཚེ་འཕྲང་ཡང་བསལ་བའི་རྨི་ལམ་བྱུང་། དེ་ནས་བདག་གིས་སྔོན་འགྲོ་རྩ་རླུང་རང་གཏེར་གྱི་བཀླག་ལུང་ཕྱོགས་དུ་མའི་སློབ་མ་རྣམས་ལ་གནང་། དེ་སྐབས་སྙི་སྟོད་བླ་མ་མཁས་དབང་ཆོས་གྲགས་རིན་པོ་ཆེ་བྱོན། ཁོང་གིས་སྤྱོད་འཇུག་བཤད་ལུང་མཛད། རང་གཏེར་གྱི་གཟའ་ཆོག་བཟློག་བསད་ལས་མཐའ་བླ་རྡོ་བཅས་བྲིས་ཏེ་ཕྱག་ཁར་ཕུལ། ཐུགས་དགྱེས་པར་མཛད། བདག་ཅག་འཁོར་བཅས་ལ་བསྲུང་བ་བྱིན་རླབས་གནང་། བགྲང་བྱ་བཞི་བཅུ་སྒྱུར་བྱེད་ཞེས་པ་ས་མོ་ཕག་ལོ་ལ་བབས་པའི་ཚེ་ཡུལ་འདྲེ་དམ་སྲི་རྒྱལ་འགོང་གིས་འཚེ་བ་དུ་མ་བྱུང་ཡང་ཆེར་མ་གནོད། ཨོ་རྒྱན་ཆེན་པོ་དང་། རིག་འཛིན་འཇའ་ཚོན་སྙིང་པོ་དང་། ཡོངས་འཛིན་སྤྲུལ་པའི་སྐུ་རིན་པོ་ཆེ་སོགས་ལ་གསོལ་བ་བཏབ་ནས་སྐྱོབ་པའི་སྣང་བ་ཤར། བཟེ་རོ་དགོན་དང་ཕུ་ཟླུམ་དགོན་རྣམས་སུ་འཇའ་ཚོན་པོ་ཏི་དུ་ཡོད་དབང་ལུང་མཛད་པའི་སྐབས་མི་མ་ཡིན་གྱིས་ཆོ་འཕྲུལ་ཅུང་ཟད་བསྟན་པ་ཡི་དམ་ལྷའི་བསྐྱེད་རིམ་དང་བྱམས་སྙིང་རྗེ་བསྒོམ་པས་རྒྱལ་བསེན་འགའ་དབང་དུ་བསྡུས་ཏེ་དམ་ལ་བཏགས། གཞི་བདག་ཕལ་ཆེར་ལ་དགོངས་པ་གཏད་པས་འདོད་དོན་སྒྲུབ་པར་ཁས་བླངས། མ་ཅིག་དཔལ་ལྡན་ལྷ་མོས་དགྱེས་ཉམས་ངོམ་པའི་སྣང་བ་ཤར། ནད་པ་འགའ་ལ་བསྲུང་བ་བྱས་པས་གནད་ལྡན་དུ་གྱུར། དགོན་སྡེ་ཟུང་གི་མངའ་འོག་ཏུ་དམར་ཆོག་བཅད། རྦ་ཀར་སྟོད་གྱི་གཞི་བདག་ལ་རི་བསང་བཏང་། དགེ་བའི་སྣང་བ་བདེན་པར་གྲུབ། གཞི་བདག་གིས་དངོས་གྲུབ་ཅུང་ཟད་ཙམ་གནང་། ཤོག་བཞིའི་རྒྱལ་གདོན་བསེན་མོ་འགའ་ཞིག་བཀའ་དམ་ལ་བཞག བོན་བླ་གཡུང་དྲུང་རྒྱལ་མཚན་གྱིས་བདག་ལ་ཕན་པའི་ཞབས་ཏོག་མང་པོ་མཛད། ཐུགས་མཐུན་ཁྲིམས་གཙང་བྱས། ད་རུང་རྟེན་འབྲེལ་བཟང་པོ་ཡི་ལོ་རྒྱུས་བྱུང་བའི་རྣམ་ཐར་རྒྱས་ཞིང་རྒྱས་པར་མ་བཀོད། དབྱི་དགོན་དབྱར་གནས་ལ་བཞུགས། སྔོན་སྦྱངས་ལས་འཕྲོ་ལྡན་པའི་ཆོས་ཀྱི་མངའ་བདག་ཤཱཀྱའི་དགེ་སྦྱོང་བློ་བཟང་མཚན་ཅན་དང་། གཏེར་སྟོན་དབང་ཆེན་སྔགས་བདག་གླིང་པ་གྲྭ་འཁོར་སོགས་བྱོན། དམ་ཆོས་བདེ་ཆེན་ལམ་མཆོག་གི་དབང་ལུང་ཚང་མ་ཕུལ། སྔོན་སྦྱངས་ལས་འཕྲོའི་སྐྱེ་བ་དུ་མ་ཉམས་ལ་ཤར། དགེ་བའི་སྣང་བ་ཆེས་ཆེར་མངོན་པ་དེ་སོགས་ལ་ཕྲ་བ་མང་སྟེ་ཡི་གེས་འཇིགས་པས་སོ། །དེ་ནས་སྟོད་སྨད་བར་གསུམ་ཡོངས་ལ་དོན་ཅུང་ཟད་སྐབས་རྒྱུ་དང་། གཏོ་ཆོག་ལ་སོང་། བྲེ་སྟོད་སྔགས་འཆང་གཏེར་སྟོན་སུརྱའི་མཚན་འཆང་གང་གི་བཀའ་བཞིན་རིགས་སྲས་ལ་ཚེ་དབང་བསྐུར། དེ་དུས་ཉམས་དང་སྣང་བ་ཡང་མང་པོ་མཐོང་། ཕལ་ཆེར་ཞལ་གདམས་ཀྱི་ཚུལ་དུ་གྲོང་གཏམ་ཉབ་ཉོབ་ཀྱི་ཚུལ་དུ་ཁོང་ལ་ཞུས། དེ་ནས་ཚུར་ལ་བཞུགས་གནས་སྤོས་ཀྱི་གླང་པོའི་ཡུལ་ལྗོངས་མི་དབང་དཔལ་གྱིས་མངོན་པར་མཐོ་བའི་ཙནྡན་གྱི་རི་ཁྲོད་དུ་སླེབས་ནས་བཅད་རྒྱ་ལ་བཞུགས་སྐབས་གཞན་གྱི་བྱད་ཕུར་དང་། དམ་སྲིའི་ལོག་སྨོན་གྱི་འཚུབ་སློང་མང་པོ་བྱུང་། དེ་ནས་ལྕགས་ཕོ་བྱི་བའི་ལོ་བགྲང་བྱ་བཞི་བཅུ་རྩ་གཅིག་སླེབ་པའི་དུས་སུ་ལོ་གསར་གྱི་ཟླ་བ་ལ་བབས་པ་ན། དབྱངས་ཅན་ལྷ་མོའི་སྤྲུལ་པ་མི་མོའི་དངོས་ཅན་གང་གིས་བཞིན་རས་རྒྱས་པའི་ལང་ཚོ་ངོམ་པའི་སྐབས་འགའ་ལ་སྟོད་སྨད་མང་པོའི་གཞི་བདག་ཆེ་ཕྲ་དུ་མ་བདག་ལ་འཚམ་ཞུ་འདྲ་མོ་དང་གདན་འདྲེན་ལ་འོང་བའི་ཉམས་ཤར། ཁྱད་པར་རྡོ་ཁྱབ་ཕྱོགས་ཀྱི་གཞི་བདག་བསེ་རྫི་དང་རྡོ་རྗེ་ཡེ་ཤེས། སྟག་རྩེ་གསུམ་གྱིས། ཀྱཻ་ཀྱཻ་རིག་འཛིན་པད་འབྱུང་གིས༔ མངགས་པའི་སྐྱེས་སུ་གཞན་ལ་ཕན༔ སྙིགས་མའི་འགྲོ་མགོན་བཀའ་དྲིན་ཅན༔ མི་སྲུན་ལོག་འདྲེན་འདུལ་བའི་གཉེན༔ ངེད་ཅག་ཕྱོགས་ལ་ཕེབས་པར་ཞུ༔ འགྲོ་དོན་མི་དང་མི་མིན་གདུལ༔ སྡོང་གྲོགས་ངེད་ཚོས་མཛད་པར་བྱེད༔ ཞེས་གསུངས། དེ་ནས་རྩང་གི་ཡུལ་ལྷ་ཚོས། ཨེ་མ་སྒྱུ་མའི་སྐྱེས་བུ་མཆོག༔ རིག་འཛིན་བྱང་སེམས་གཞན་ལ་ཕན༔ ངེད་ཅག་ཕྱོགས་སུ་གདན་འདྲེན་ཞུ༔ མི་མིན་རྒྱལ་བསེན་ལུང་པ་གང༔ ནག་ཕྱོགས་གཞི་བདག་གདུག་རྩུབ་འབར༔ ཁྱེད་ཀྱིས་ཐ་ཚིག་མ་བསྒྲགས་ན༔ བདེ་བའི་ཉི་ཞུར་སྤྲིན་གྱིས་བསྒྲིབ༔ ཁ་འཛིན་སྡོང་གྲོགས་བདག་གིས་བགྱི༔ ལོངས་སྤྱོད་སྦྲང་ཆར་ཉི་ལེ་བ༔ མི་མིན་ཀུན་ལ་ཕན་འགའ་འབྱུང༔ ཁྱད་པར་མཆོག་གི་ཟོ་དོར་ཆེན་པོ་རྡོ་རྗེ་དབྱི་ཁྲོམ་གྱིས། ཁྱེད་གཞན་དུ་གཤེགས་ལ་མི་མིན་ཚོས༔ སེམས་ཁོག་པའི་ནང་ནས་འཕར་མ་སླེབ༔ འདིར་བཞུགས་ཀྱང་དམ་སྲི་ལོག་སྨོན་འགས༔ གཤེ་སྐུར་དང་སྲུང་མ་འཁོན་འགྲས་པའི༔ རྐྱེན་དེ་ཡིས་ཐབས་ཤེས་ཡ་བྲལ་འོང༔ རྐྱེན་ངན་པའི་རི་བོས་ནོན་དོགས་ཡོད༔ བདག་བསྟི་གནས་སྦ་རོང་གནས་མཆོག་དེར༔ བཞུགས་གྲུབ་ན་འགྲོ་དོན་གཏེར་གྱི་སྒོ༔ ང་པདྨའི་ཐ་ཚིག་འཆང་ཚོས་བགྱི༔ ཁྱེད་ཐུགས་ལ་བསྟིམ་མཛོད་ཨ་ལ་ལ༔ དེ་རྗེས་སུ་མི་དཀར་དར་གྱི་ལ་ཐོད་ཅན་ཕྱག་གཡས་ན་བ་དན་དང་གཡོན་ན་དུང་དཀར་བསྣམས་པ་འཁོར་ལྷ་ཀླུ་གཉན་དམག་གིས་བསྐོར་བ་གཅིག་གིས། ཕྱོགས་གང་དང་གང་དུ་ཕེབས་ན་འང༔ ལྕགས་འཕྱེ་བོའི་བརྡ་གླུ་ངང་གིས་འཁྲོལ༔ ཤར་མི་ཉག་ཕྱོགས་ལ་འགྲོ་དོན་ཡོད༔ སྐུ་ཚེའི་འཕྲེང་སྒྲོལ་གནས་དང་རྟེན་གསུམ་མཇལ༔ ཕུན་ཚོགས་བྱེ་བའི་དཔལ་གྱིས་མངོན་པར་མཐོ༔ ཀུན་དྷེ་བཞག་མོའི་དབེན་ཕུག་བཀའ་བརྒྱུད་ཀྱི༔ བྱིན་ཆེན་གནས་ལ་བསྒྲུབ་འབྲེལ་འཕྱུག་མེད་ན༔ ཅི་བསམ་ཡིད་བཞིན་འགྲུབ་ལ་སོམ་ཉི་བྲལ༔ ལྷ་དང་སྲུང་མས་ལེགས་པའི་དཔལ་ཁ་སྟོན༔ བསུ་མ་ཆེ་མཆོག་བཞག་བྲ་ང་ཡིས་བྱེད༔ སྐྱེས་མཆོག་པདྨའི་སྒྱུ་འཕྲུལ་ཐུགས་ལ་ཆོངས༔ ཞེས་སོགས་ལུང་མང་དུ་བསྟན་པ་ཡོད་ཀྱང་དེ་ཙམ་མོ། །སྐབས་འགར་རི་བྲོ་སྤོས་ཀྱི་གླང་པོའི་ལུང་པ་དྲི་མེད་ཟླ་ཚེས་གསར་བའི་གནས་དབེན་རི་ཙན་དན་ཕུག་ནས་ཚོགས་འཁོར་སྐབས་བཀའ་དྲིན་མཚུངས་པ་མེད་པ་མཉམ་མེད་རྡོ་རྗེ་འཆང་འགྲོ་འདུལ་ལུང་རིག་གླིང་པས་བཞིན་ཀྱི་དཀྱིལ་འཁོར་དྲག་པོའི་ཉམས་དང་ལྡན་པ་ཤངས་ནས་རྡོ་རྗེའི་རླུང་སྒྲ་འབྱིན་པའི་ལྟ་སྟངས་ཧུ་རེ། རིགས་ཀྱི་བུ་ཁྱོད་འདི་ནས་མ་འདུག་པར་ཕྱོགས་གཞན་དུ་ཕྱིན་ཅིག མི་མཐུན་པའི་རྐྱེན་གྱི་འཚུབ་མ་སྤྲིན་ནག་གི་རྦ་ཀློང་ལྟ་བུ་འཁྲུགས་ཉེན་གདའ། ངེས་མེད་དུ་ཕྱིན་ན་འགྲོ་དོན་ཉི་ལྟར་མངོན་གསུངས། དེའི་ལན་དུ་ཞུས་པ། རང་བྱུང་ལྷུན་གྲུབ་ཡེ་ཤེས་སྐུ་ལྔའི་བདག༔ དབྱིངས་རིག་དབྱེར་མེད་པདྨ་སཾ་བྷ་ཝ༔ འགགས་མེད་གསལ་དག་མཚུངས་མེད་རྡོ་རྗེ་འཆང༔ ཁྱབ་བདག་འཁོར་ལོའི་མགོན་པོ་བླ་མར་འདུད༔ ཆགས་མེད་ཆགས་པའི་སྒྱུ་ཐབས་རྟེན་འབྲེལ་ལས༔ ཤེས་རབ་སྟོང་པའི་རང་གཟུགས་སྨིན་ལེགས་མ༔ བདེ་ནས་བདེ་བའི་ཡེ་ཤེས་སྩོལ་དེ་ཕམ༔ སྒྲ་དབྱངས་དེ་ཝིའི་ཆ་དེ་འདོར་རམ་ཅི༔ ཞེས་ཞུས་པས་ཁྱབ་བདག་དྲིན་ཆེན་གུ་རུའི་གསུང་གདངས་ལས། དགའ་བཞིའི་ཡེ་ཤེས་བྱེད་པའི་མུ་ཏྲ་སྟེ༔ འདུ་འབྲལ་མེད་པའི་ལྷན་སྐྱེས་བདེ་བ་ཆེ༔ རྣམ་ཀུན་མཆོག་ལྡན་ཁྱོད་ཀྱིས་དང་དུ་ལོངས༔ དེ་ཡི་རྐྱེན་གྱིས་ཚེ་ཡི་འཕྲང་གེགས་སེལ༔ ཕུན་ཚོགས་ཕན་བདེ་ལྷ་མིའི་མཆོད་སྡོང་མཇལ༔ རྟེན་འབྲེལ་མཆོག་ལྡན་གཏན་གྱི་སྐྱབས་འོག་ཚུད༔ ལྷ་དང་བླ་མའི་ཞལ་ལུང་སྙིང་ལ་སིམ༔ ཞེས་ལྷ་དང་བླ་མས་ལུང་བསྟན་པ་བཞིན་གཏེར་གྱི་སྲུང་མ་རྡོ་རྗེ་དབྱི་ཁྲོམ་གྱི་བསྟི་གནས་སྦ་རོང་བྲག་དཀར་ལ་སླེབ་པའི་དུས་སུ། སྒྱུ་མའི་ནོར་རྫས་འགའ་སྤོང་དག་བྱས་ནས་མཆོད་སྦྱིན་རྣམ་དག་ཏུ་སོང་བས་སྣང་བ་བདེ། བྱ་ཁྱུང་རི་ཅོའི་ཁ་ལ་ཡུལ་ལྷ་མང་པོ་བསུ་མ་ལ་ཐོན། ལྷག་ལྷ་འགས་ཞལ་གཟིགས། རྩ་བའི་བླ་མ་དང་དཀོན་མཆོག་གསུམ་ལ་མི་ཕྱེད་པའི་དད་པ་ཐོབ། ནམ་མཁའ་ལ་འཇའ་གུར་ཟླུམ་འཁྱིལ་དང་། འཇའ་དམ་དུམ་མང་པོས་བར་སྣང་གང་། བདག་ཅག་འཁོར་བཅས་ལ་ཡ་མཚན་གྱི་སྣང་བ་ཐོབ། ཤིང་ཉག་དཔོན་མན་ཆད་ཡུལ་མི་ཀུན་གྱིས་ལེགས་པའི་རྟེན་འབྲེལ་ཕུལ་བྱུང་མཛད། རབ་བྲོ་སྐུ་ཞོག་དང་ཉི་མཚོ་ཆོས་གྲྭའི་སྤྱི་གཉེར་ཚོས་ཞལ་བཟང་གསུང་སྙན་གནང་། སྦ་རོང་གནས་ནང་ལ་སླེབ་སྐབས། གཞི་བདག་གིས་སྟོན་མོ་མཛད། བསུ་ཆང་གིས་སྣ་དྲངས། སྙན་པའི་འབྲུག་སྒྲས་ནམ་མཁའི་ཁྱོན་བཀང་། རང་གཞན་ཀུན་གྱིས་ལེགས་པའི་རྟེན་འབྲེལ་དུ་བརྩིས། ནམ་མཁའ་ལ་འཇའ་ཚོན་གྱི་རི་མོ་སྲོག་ཆགས་ཀྱི་གཟུགས་སམ། གདུགས་རྒྱལ་མཚན་གྱི་ཚུལ་སོགས་དག་པའི་ཞིང་ལ་འགྲན་འོས་མང་པོ་སྣང་བ་ཀུན་དབང་པོའི་སྤྱོད་ཡུལ་གྱུར། དེ་ནས་རྩ་གསུམ་ལྷ་དང་སྲུང་མ་དཀར་ཕྱོགས་སྐྱོང་བའི་སྡེ་བརྒྱད་རྣམས་ཁྲོམ་འཚོགས་པ་ལྟར་འདུས། གནས་མདུན་གྱི་བྲག་གདོང་ལ་འབྲུ་དྲུག་སྨིན་པ་སོགས་མཛེས་པའི་ལྟད་མོ་ཡ་མཚན་ཆེན་པོ་ཀུན་གྱི་དབང་པོའི་སྤྱོད་ཡུལ་དུ་གྱུར་ཅིང་ཕྱོགས་ཀྱི་ཐ་གྲུ་མཆོག་དམན་ཀུན་གྱིས་བསྟོད་ཅིང་མི་དང་མི་མ་ཡིན་པ་ཐམས་ཅད་འདུས་ཤིང་རྣམ་དཀར་དགེ་བའི་བསམ་པ་ཅུང་ཟད་རེ་རྒྱུད་ལ་མ་སྐྱེས་པ་གཅིག་ཀྱང་མེད་པ་བྱུང་། དེ་ནས་སྨུག་རོང་དུ་ཕེབས་གྲབས་བྱས་པས་ཡུལ་མི་ཀུན་གྱིས་སྐྱེལ་ཐུང་བྱས་ནས་ཆུའི་ཕ་རོལ་དུ་ཕྱིན་པས་སྨུག་རོང་ཡུལ་མི་ཀུན་གྱིས་ལེགས་པའི་དཔལ་ཁ་མང་པོའི་སྒོ་ཕྱེ། ཀ་ཆ་དགོན་གྱི་བླ་སེར་མང་པོས་རྔ་རོལ་དབྱངས་ཀྱིས་བསུས་ཏེ་བསྟོད་བསྔགས་མཛད་ཅིང་ལྷ་ཁང་སོགས་སུ་གདན་དྲངས། ཀུན་གྱིས་ཆོས་འབྲེལ་ཞུས་ཤིང་ཡོངས་ལ་ཆོས་བཤད་གནང་། ཟླ་བ་གཉིས་ལྷག་ཙམ་བསྡད། དེ་ནས་མི་ཉག་ཕྱོགས་ལ་ཕྱིན་པས་ཡུལ་གྱི་ཟོ་དོར་ཆེན་པོས་ཀྱང་མགོན་སྐྱབས་མཛད། བཞག་མོ་ཀུན་དྷེ་ལྷ་མོས་ཀྱང་བདེ་ལེགས་སྣང་བའི་དཔལ་ཁ་ཕྱེས། ལོངས་སྤྱོད་དང་ལྷ་མིའི་འདུ་བ་ཡང་སེམས་མ་ཁེངས་པ་མེད་པ་བྱུང་། གནས་ཆེན་ཐང་སྟོང་རྒྱལ་པོའི་གདན་སར་ཕེབས་ཏེ་རྟེན་གསུམ་མཇལ་སྐབས་རྒྱུད་ལ་ཉམས་རྟོགས་བཟང་པོ་དུ་མ་ཤར། སྡིག་སྒྲིབ་ཉམས་ཆག་དག་པའི་ལྟས་བཟང་པོ་མཐོང་། འབོ་གངས་དཀར་ལ་ཕེབས། རིགས་ལྔའི་ཞིང་ཁམས་མངོན་སུམ་དུ་མཐོང་། དགྲ་བཅོམ་བྱང་སེམས་མང་པོའི་ཞལ་མཇལ། གིང་ཆེན་སྡེ་བཞི་དང་ཡུལ་ལྷ་མང་པོས་རང་གཟུགས་བསྟན། ཨོ་རྒྱན་སྐུ་ཚབ་བྱིན་རླབས་ཆེ་བདོག་གཅིག་ཡ་མཚན་མཛེས་པའི་ལྟད་མོར་དགེ་བའི་སྣང་བ་དང་བཅས་གཏེར་ནས་བཏོན། ཕོ་བྲང་ལྔ་བརྩེགས་ལ་སོགས་གནས་ལེགས་པར་མཇལ། ཉམས་སྣང་དུ་མ་བྱུང་། ཡུལ་མི་འགས་བཀུར། དེ་ནས་ཡར་ཕེབས་སྐབས་དགོན་སྡེ་མང་པོ་མཇལ། གནས་མགོ་ལ་ཕེབས་སྐབས་དགེ་བཤེས་ཚོས་ལྷ་རེག་དང་བཅས་ཕེབས་བསུ་ལ་བྱོན། གནས་ནང་ནས་མི་དཀར་རྟ་དཀར་ཅན་གྱིས་དར་བཏང་། གནས་བསྟོད་དང་ལུང་བསྟན་མང་པོ་གནང་། རང་བྱུང་འགའ་ཡི་གསལ་ཁ་བཏོད། མི་ཉག་ཕྱོགས་ཀྱི་འདུ་བ་རྣམ་གསུམ་རང་འབྱམས་སུ་སོང་། ཡང་པེ་ཕག་སུམ་༼པེ་སུམ་དང་ཕག་སུམ༽ཕྱོགས་ཀྱི་སྔོན་སྦྱངས་ལས་འཕྲོ་བཟང་པོས་མཚམས་སྦྱར་བའི་ཆོས་ཀྱི་བདག་པོ་འགའ་ཡིས་འགྲོ་དོན་གྱི་སྒོ་ཕྱེ། སྔོན་བྱོན་གྱི་གཏེར་གསར་གྱི་བསྟན་པས་ཡུལ་ཀུན་ཁྱབ་པར་བྱས། དེ་ནས་ལྷ་དགའི་གནས་མཆོག་ལ་ཕེབས་ནས་ཕྱོགས་ཀྱི་མི་ཆེ་བཙན་དྲེགས་པ་ཅན་འགའ་སོགས་མང་པོས་བསུ་བ་བཅས་ཇོ་བོ་རིན་པོ་ཆེ་མཇལ། ལྕགས་ཀྱི་ར་ཛ་གང་གི་ཕོ་བྲང་ལ་བཞུགས་ནས་ཁྲོམ་དབང་མཛད། དགེ་བའི་བསྐུལ་མ་མང་པོ་བྱས། དགོན་སྡེ་འགའ་གདན་དྲང་ལ་འོང་ཡང་ཅུང་ཟད་མི་བདེ་བས་གང་ལའང་མ་ཕེབས། རྒྱལ་མོ་དམུ་རྡོ་ལ་སྔོན་གྱི་གཏེར་ལུང་དུ་མ་ནས་ལུང་གིས་གསལ་བཞིན། སྨོན་ལམ་དུས་འཛོམས་ཡོད་པས་གནས་མཇལ་ལ་ཕྱིན། བྲག་རི་ཁྱུང་ཆེན་ལྡིང་བ་འདྲ་བའི་ངོས་སུ་སྐུ་གསུང་ཐུགས་རྟེན་དང་སྨན་སྒྲུབ་བཅས་གཏེར་ནས་སྤྱན་དྲངས། རྟེན་འབྲེལ་འབྲིང་ཙམ་འགྲིགས། དེ་ནས་ཡར་དབྱི་ཁྲོམ་ཕྱོགས་ལ་ཕེབས་ནས་བཞུགས་གཏན་འཇགས། ས་མ་ཡཱ༔ ལྕགས་གླང་ལོ་སྒྲ་རྒྱལ་འབྲུག་ཟླའི་ཚེས་བཅུ་གསུམ་ལ་འབྲུ་སྨད་ནས་བརྒྱུད་དེ་རོང་མིིས་བྲག་མགོར་བོད་ཁམས་ལ་གནོད་པའི་རྒྱ་འདྲེ་གདུག་པ་ཅན་གནས་སྤར། མུ་རྡོ་གསང་ཆེན་རྡོ་རྗེ་བྲག་ནས་ཟབ་གཏེར་ཡ་མཚན་ཅན་གསང་ཐབས་སུ་བཏོན། དགེ་བཤེས་བརྒྱུད་དེ་གནས་ཆེན་བྲག་མདོར་ཞག་ས་ཕོག ཉམས་སྣང་ངོ་མཚར་བའི་ལྟས་མང་དུ་བྱུང་། སླར་གཡུའི་རི་བྲོ་སྤོས་ཀྱི་གླང་པོའི་རི་ཁྲོད་བདེ་ཆེན་དགའ་བའི་རྫོངས་ཀྱི་རི་ལ་ཕེབས་ནས་བཞུགས་གདན་འཇགས། བྱི་བའི་ལོ་ནང་མར་ཝ་ཀོ་སིདྡྷི་དགོན་ལ་ཕེབས་ཏེ་ལྷ་ཁང་མགོན་ཁང་ཆོས་སྐྱོང་སྨན་སྐུ་རྣམས་ལ་ཚོན་རྩི་གསོལ། དབྱར་ཀར་སྟོད་ལ་ཕེབས་ཏེ་འབུལ་སྡུད་མཛད་ཅིང་ཐམས་ཅད་ལ་ཆོས་འབྲེལ་གང་དགོས་མཛད། སྟོན་འབྲུ་དྲུག་སྨིན་སྐབས་དབྱི་སྲས་དཔལ་ཆེན་ཚང་ལ་ཕེབས་ནས་ཞག་གྲངས་ཁ་ཤས་ལ་གཏོ་རིམ་ཅི་དགོས་བསྒྲུབ་མཐར། དགེ་བཤེས་བཟའ་ཚེ་རིང་ལྷ་མོ་བཀྲ་ཤིས་ཝ་མགོ་ནས་གཉེན་དུ་བསུས་ཏེ་དགའ་སྟོན་རྒྱ་ཆེན་སྤེལ། དབྱི་ཁོག་ཏུ་དུད་ཚང་ཁ་ཤས་ལ་གཏོ་རིམ་མཛད། སྔར་གནས་ཀྱི་རི་ཁྲོད་དུ་བཅད་རྒྱ་བསྡམས་ཏེ་བཞུགས་སྐབས་དགེ་བའི་ལྟས་བཟང་མང་པོ་ཤར། ཆུ་སྟག་ལོ་གསར་གྱི་ཟླ་བ་དང་པོའི་ཚེས་བཅུ་གསུམ་ལ་དགེ་བཤེས་རྒྱལ་སར་ཕེབས་ཏེ། ཕུར་སྒྲུབ་བྱེད་སྐབས་དམ་སྲི་གོས་ཧྲུལ་ཅན་དང་། ཡུལ་འདྲེ་འགའ་ཡིས་འཚེ་བ་བྱུང་ཡང་བར་ཆད་བྱེད་མ་ནུས་པར་དམ་ལ་བཞག་ཅིང་། སླར་གླ་ལུང་དབེན་པའི་རི་ལ་ཕེབས་ཏེ་དགུན་དེར་བཞུགས་སྐབས། ཧོར་ཟླ་གཉིས་པའི་ཉེར་ལྔའི་ནམ་ཐོ་རེངས་ཁར་ཌཱཀྐི་དམར་མོ་རུས་པའི་རྒྱན་ཅན་ཞིག་གིས། ཨ་ཧོ་གསོན་དང་སྐལ་ལྡན་ལས་ཅན་གྱིེ་སྐྱེས་བུ༔ ཕ་གཅིག་པདྨ་རྒྱལ་པོའི་བཀའ་ལུང་གིས་བསྔགས་ཏེ༔ ཁྱོད་ལ་གཏད་པའི་ཟབ་གཏེར་རང་སྐལ་འཚམས་པ༔ ཀ་སེང་བྲག་སོགས་གནས་མཆོག་དུ་མ་རུ་ཡོད་རྣམས༔ ད་ལྟ་མྱུར་བར་ལེན་པའི་དུས་ཚོད་ལ་བབས་འདུག༔ ལེ་ལོ་ཕྱིར་བཤོལ་མ་བྱེད་བར་ཆད་ཀྱི་དབང་འགྲོ༔ ཞེས་ཟེར་བའི་སྒྲ་སྐད་ཐོས་པའི་མོད་ལ་ཡལ་སོང་། དེ་ནས་སོས་ཀ་ཟླ་བ་གསུམ་པའི་ཚེས་ལ་ཝ་ཀོ་དགོན་དུ་ཕེབས་ནས་ཞག་འགའ་ལ་བཞུགས་ཏེ། ཀ་ཀོང་སེང་གེ་ཡང་རྫོང་ལ་ཕེབས་ནས། རྒྱལ་པོ་ནང་སོ་སོགས་ཀྱིས་དགའ་སྤྲོ་རྒྱ་ཆེན་མཛད། རྡོ་རྗེ་ཕུར་བའི་ཚོགས་འཁོར་མཛད། །བཀའ་ཐང་དང་ཟབ་གཏེར་གྱི་ཤོག་དྲིལ་བརྒྱད། །ཡིད་བཞིན་ནོར་བུ་སྦྲུལ་གྱི་སྒོ་ང་ཙམ་པ། སྒྲོམ་བུ་སྨུག་པོ། སྨན་སྒྲུབ་བཅས་བླ་གཏོར་གྱི་མདུན་དུ་གཏེར་བདག་གིས་ཐོན་པས་རྒྱལ་པོའི་གཟིམས་ཁང་གི་ནང་ཐམས་ཅད་སྨན་དྲིས་གང་བ་བྱུང་། དེ་ནས་ཚུར་ཨ་ལོར་དགོན་བརྒྱུད་དེ། ཕུ་ཚུན་༼ཕུ་ཏུ་དགོན་༽དགོན་དུ་འོད་ཟེར་ཅན་མའི་དབང་ལུང་མཛད་ཅིང་། སྦྱིན་སྲེག་ཕབ། དུས་མཆོད་བཙུགས། སྤ་གྱོའི་གནས་ལ་ཕེབས། ཕུ་དུམ་བླ་མ་དམ་པ་དཀོན་མཆོག སེ་ལེ་སྤྲུལ་སྐུ་ཐུབ་བསྟན་འོད་ཟེར། མདོ་བའི་གསང་སྔགས་བཅས་ལ་གནས་དེ་འོད་ཟེར་ཅན་མའི་སྒྲུབ་གནས་ཡིན་པར་བསྟན་ཅིང་། སྤ་གྱོའི་མཚོ་ནང་གི་རྡོ་དཀར་ཞིག་གི་སྟེང་དུ། སློབ་དཔོན་གྲུབ་རྟགས་ཞབས་གཡས་དང་། མཚོ་རྒྱལ་གྲུབ་རྟགས་ཞབས་གཡོན་དུ་བཞག་པ་བསྟན་པས་ངོ་མཚར་བ་བྱུང་། དེ་ནས་གནས་ཆེན་བྲག་མདོར་ཕེབས་ནས་ཚོགས་འཁོར་ཕུལ། དབྱི་མཁར་ཚ་ཐོག་ལ་ཕེབས། སྟོན་དེར་ཡར་མར་གྱི་གྲོང་ཆོག་མཛད། དེ་ནས་ཕར་ཏཱ་རེའི་གནས་སུ་ཕེབས་ཏེ་དགོན་པའི་སྟ་གོན་མཛད་ཅིང་། དགུན་རྩང་སྟོད་སྨད་ལ་ཕེབས། དགུན་དེར་ཝ་ཀོ་ལ་ཕེབས། ཕོ་སེས་ལྡན་དབུ་དགོན་དུ་དབང་ལུང་མཛད། རྟ་ཟླའི་ནང་ནས་སིདྡྷི་དགོན་དུ། སོ་མང་སྤྲུལ་སྐུ་ངོས་འཛིན་དང་མངའ་གསོལ་མཛད་ཅིང་། ཕུར་བའི་དགུ་ཆེན་བཙུགས། སྨོན་ལམ་དགོན་དུ་སྒྲུབ་མཆོད་དབུ་བཞུགས་མཛད། སླར་སྤོས་གླང་དབེན་ཁྲོད་དུ་ཕེབས་ཏེ་རྗེ་རང་ཉིད་ཀྱི་གཏེར་ཆོས་སོགས་གཏེར་གསར་མ་བུའི་དབང་ལུང་རྒྱ་ཆེར་གནང་། བར་སྐབས་སུ་སྔོན་ལས་འཕྲལ་རྐྱེན་གྱི་ནད་ཀྱི་ཟུག་རྔུས་ཅུང་ཟད་གདུང་འདུག་པས། ཡར་རྩང་སྟོད་ལ་ཕེབས་ཏེ། དེར་འཁོར་ལོ་གདོང་གི་བླ་མ་མགོན་དབང་ཕེབས་ནས་ས་བདག་གཏད་དཀྲུགས་གསུངས། དེ་ནས་གནས་ནང་བརྒྱུད་དེ་དཀྲུགས་རུ་རི་ཁྲོད་དུ་ཕེབས་ནས་སྨན་པའི་མདུན། ཟླ་གྲངས་བར་བཞུགས་ཤིང་ལུགས་གཉིས་ཀྱི་གཏམ་ལེགས་ཉེས་འགའ་རེ་འདུག་ཀྱང་དགོས་གལ་ཆུང་བས་མ་བྲིས་སོ། །ཆུ་ཡོས་འབྲུག་ཟླའི་ཚེས་བཅུ་གསུམ་པའི་དགུང་ཐུན་སྐབས་སྔགས་སྲུང་གཙོ་མོ་རལ་གཅིག་མ་དང་། དཔལ་ལྡན་དུད་སོལ་ལྷ་མོ་དང་། ལྷན་སྐྱེས་ཀྱི་ཌཱཀྐི་རྣམས་ཀྱིས་མགྲིན་གཅིག་ཏུ། ཨེ་མ་རྒྱལ་དབང་པདྨའི་རྒྱལ་ཚབ༔ ཨ་ཙར་ས་ལེའི་ཟློས་གར་སྐྱེས་མཆོག༔ ཕ་གཅིག་པདྨའི་དངོས་སྤྲུལ་བླ་མས༔ བཀའ་བསྒོས་ཆད་མདོའི་དམ་ལས་འདས་ཏེ༔ འཇིག་རྟེན་ཆོས་བརྒྱད་བྱ་བས་བསླུས་ནས༔ རྣམ་གཡེང་ཆེ་འདོད་སྙན་གྲགས་སྒྲུབ་པས༔ དམ་ཉམས་ཟོག་པོའི་འཁོར་ཚོགས་དུ་མས༔ དམ་ཚིག་ཉམས་པའི་གྲིབ་དང་བྱད་གཏད༔ སྣ་ཚོགས་རྐྱེན་གྱིས་རིང་མིན་མྱུར་བར༔ ཡེ་ཤེས་འཇིག་རྟེན་ཌཱཀྐི་དུ་མས༔ རང་གནས་མཁའ་སྤྱོད་དཔལ་རིར་བསུ་འགྲོ༔ དེས་ན་རྣམ་གཡེང་འདུ་འཛི་སྤོང་ལ༔ དབེན་པའི་གནས་སུ་ཉམས་ལེན་སྐྱོང་རན༔ དེ་མིན་འཇིག་རྟེན་འཁྲུལ་བའི་བྱ་བ༔ སྙིང་པོ་མེད་པའི་ཚུལ་ལ་དགོངས་མཛོད༔ ཞེས་ཟེར་སྟོང་པའི་མཁའ་ལ་ཡལ་སོང་། དེ་ནས་སྒོ་ཆའི་རི་ཁྲོད་ལ་ཕེབས་ཏེ། གྲུབ་པའི་ཁྱུ་མཆོག་འཁོར་གདོང་བླ་མ་མགོན་པོ་དབང་རྒྱལ། དབྱི་དཔོན་ལྷ་སྲས་ནམ་མཁའ་དཔལ་ཆེན། རང་སློབ་དམ་ལྡན་གྱི་བུ་མཆོག་རིག་གྲོལ་སོགས་ལ་ཆོས་འཇིག་རྟེན་ལུགས་ཀྱི་ཞལ་ཆེམས་རྣམས་དང་། ཁྱད་པར་དགོངས་རྫོགས་བྱེད་ཚུལ་སྤྱི་དང་། བྱེ་བྲག་རྒྱལ་བའི་བཀའ་འགྱུར་རིན་པོ་ཆེའི་ཡོན་དུ་བདོག་པའི་དངོས་པོ་ཅི་ཡོད་རྣམས་བསྒྲིགས་ཏེ་རྩིས་སྤྲད་མཛད། སླར་ཡང་རང་སློབ་དད་ཅན་གྱི་སྐྱེས་བུ་བསྟན་འཛིན་རྣམས་ལ་སྐུ་གསུང་ཐུགས་ཀྱི་རྟེན་སྣ་རེ་གནང་སྟེ་སོ་སོར་བསླབ་བྱ་མཛད་དོ། །༼འདི་མན་འགྱུར་མེད་བློ་གྲོས་མཐའ་ཡས་ཀྱིས་ཁ་བསྐང་མཛད་། མཆན། ༽* སླར་ཧོར་ཟླ་བཅུ་པ་སྨིན་དྲུག་ཟླ་བའི་ཚེས་བདུན་གྱི་དགོང་མོ་བླ་མ་མགོན་དབང་ལ་གསང་བའི་ཞལ་ཆེམས་རྣམས་བཞག་ཅིང་། འཕོ་བ་གསུང་དུ་བཅུག ཚེས་བརྒྱད་སངས་རྒྱས་སྨན་པའི་རྒྱལ་པོའི་དུས་ཆེན་གྱི་སྐྱ་རེངས་དང་པོ་ཤར་བའི་ཚེ། སྤྲུལ་སྐུ་དྲང་སྲོང་ཙོག་པུའི་བཞུགས་སྟངས་ཀྱིས་དགོངས་པ་ཆོས་དབྱིངས་སྤྲོས་པ་དང་བྲལ་བའི་ངང་ལ་ཐིམ་པར་གྱུར་ཏོ། །དེ་ནས་ཞག་གསུམ་སོང་ཚེ་གདུང་མཁའ་ལ་གྲུ་གང་ཙམ་འཕགས་པས་གདུང་ཞབས་ཀྱི་འབོལ་སྟན་སོགས་ལ་རེག་ཐོགས་མེད་པ་སོགས་ངོ་མཚར་བའི་ལྟས་མང་པོ་བྱུང་ཞིང་། གདུང་བཞུ་བའི་ཚེ་ནའང་དུད་པ་དཀར་པོ་དུང་དང་བུམ་པ་ལ་སོགས་པའི་དབྱིབས་ལྟ་བུ་ཤར་ཕྱོགས་སུ་དལ་བར་འགྲོ་བ་དང་རྗེས་སུ་འབྲེལ་བར་ཕལ་གྱི་མེ་ལྕེ་ལྟ་བུ་མ་ཡིན་པར་ཁ་དོག་ལྔ་ལྔན་གྱི་འཇའ་ཚོན་ཤ་སྟག་དམ་དུམ་དུ་འཕྲོས་པ་དང་། དབྱིངས་ཀྱི་ཡུམ་ཆེན་རིགས་ལྔའི་སྤྲུལ་པའི་ཟློས་གར་འགྲོ་བ་མི་ཡི་སྣང་ངོར་བྱ་རྒོད་ཐང་དཀར་ལྔའི་གཟུགས་སུ་བསྒྱུར་ནས་ནམ་མཁའི་དབྱིངས་ནས་བསྐོར་བ་མང་དུ་བྱས་པ་སོགས་རྨད་དུ་བྱུང་བའི་རྟགས་མཚན་མང་པོ་བྱུང་། དེ་ནས་བླ་མ་དམ་པའི་གཙོས་བུ་སློབ་རྣམས་ཀྱིས་དགོངས་རྫོགས་ཞེ་དགུ་དང་གདུང་སྒྲུབ་རྒྱ་ཆེར་མཛད་དོ། །ཞལ་ཆེམས་བཞིན་ཆུ་བོ་མྱོང་གྲོལ་དང་། ཀླུ་རྣམས་ལ་ཕན་གདགས་པའི་ཕྱིར་སྐུ་གདུང་ཚ་ཚྭ་རྣམས་ཤེལ་ཆུའི་ཀློང་དུ་གཤེགས་གསོལ་བྱས་པའི་ཚེ། ཆུ་བོའི་དབུས་སུ་འཇའ་གུར་གྱི་ཀློང་དུ་ཚ་ཚྭ་རྣམས་མགོ་མཇུག་མ་ལོག་པར་ཀླུ་ཡུལ་དུ་གདན་དྲངས་པ་མི་ཀུན་གྱིས་མཐོང་བར་གྱུར་པ་དང་། རྐྱེན་དེས་ས་དྲོད་ཕེབས། ཀླུང་རྣམས་ཀྱི་ཆབ་རོམ་ཞུ། དགུན་དེར་གྲང་ངར་མི་ཆེ་བར་བྱས་པ་སོགས་ངོ་མཚར་རྨད་དུ་བྱུང་བ་བརྗོད་ལས་འདས་པ་ཞིག་ཀུན་གྱིས་མཐོང་བའི་ཆོས་སུ་མངོན་དུ་བྱུང་བར་གྱུར་ཏོ།། * སླར་སྨྲས་པ། སྔོན་སྦྱངས་ལས་འཕྲོའི་འདབ་བརྒྱ་བཞད་པའི་གཉེན། །ཨོ་རྒྱན་རྒྱལ་ཚབ་འགྲོ་མགོན་ལུང་རིག་གླིང་། །དེ་ཡི་གདུང་འཚོབ་མིང་གི་ཅོད་པཎ་བཏགས། །བླ་མའི་ཐུགས་རྗེའི་གསང་གསུམ་ལས་བྱུང་ཆར། །བདག་བློའི་དགེ་བའི་མྱུ་གུ་ལས་འཁྲུངས་པའི། །དད་ལྡན་ལས་འཕྲོ་ཡོད་པའི་སྐལ་བཟང་ཚོའི། །རང་སྐལ་ཟབ་གསང་སྙིང་པོའི་འབྲས་བུའི་ཆོས། །འདི་སྦྱིན་དགའ་བས་ལོངས་ལ་སྙིང་དུ་བསྟིམ། །ཕ་ཅིག་ཨོ་རྒྱན་ཐུགས་ལ་བརྣག་པ་ཡིན། །ཤེས་རྒྱུད་འདྲེས་བརླམས་ཟོག་པོའི་འཆོལ་གཏམ་མིན། །བླ་མ་ལྷ་དང་སྲུང་མས་གནང་བ་ཡོད། །ཨོ་རྒྱན་ཟབ་གཏེར་འདོན་པའི་གྲུབ་ཐོབ་འགར། །ཡེ་ཤེས་མཁའ་འགྲོའི་ལུང་གི་དཔང་པོ་ཡོད། །ཆོས་བརྒྱད་བསམ་པས་ཁུང་བུ་བྲུས་པ་མིན། །ངན་པས་ཅི་ཤེས་རྣམ་ཐར་རགས་རིམ་འདི། །ཀུ་ཀུའི་མགོ་ལ་སེང་ལྤགས་ལྷན་པ་འདྲ། །སློབ་བུ་རིག་པའི་ཡེ་ཤེས་དོན་ཀུན་འགྲུབ། །གང་དེའི་བཞེད་པ་སྐོང་ཕྱིར་བྲིས་པ་ཡིན། །མ་འོངས་འགྲོ་ལ་ཕན་པའི་རྟེན་འབྲེལ་ཡོད། །རྣལ་འབྱོར་སྐྱེས་བུ་གཞན་ཕན་བཟང་པོ་ཡིས། །བཞག་བྲ་བཀའ་བརྒྱུད་ཕུག་པའི་གནས་སུ་སྤེལ། །བླ་མ་སངས་རྒྱས་དངོས་སུ་མཐོང་བར་ཤོག །ཅེས་རིག་འཛིན་གཞན་ཕན་བཟང་པོའི་གསང་བའི་རྣམ་ཐར་མཁའ་འགྲོའི་གསང་ཚིག་སློབ་མའི་རྒྱུད་གྲོལ་ཉིད་འདའ་ཁའི་ཞལ་ཆེམས་བར་ཁོང་རང་ཉིད་ཀྱིས་ཤར་བཞག་བྲའི་ཕུག་པར་མཛད་ཅིང་། རྗེས་ཀྱི་འདའ་ཁའི་ཞལ་ཆེམས་སྐོར་རྣམས་རྡོ་རྗེའི་མཆེད་པོ་རྒྱ་ལྷ་མིང་པས་བྲིས་པ་ཐོག་མཐའ་བར་གསུམ་དུ་དགེ་བར་གྱུར་ཅིག་གུ། དགེའོ། །དགེའོ། །དགེའོ། །སརྦ་མངྒ་ལམ། །བྷ་ཝན་ཏུ།