རྫོགས་པ་ཆེན་པོ་འོད་གསལ་གསང་བའི་མན་ངག་ཉི་མ་སྤྲིན་བྲལ།
ཡང་གསང་ཌཱཀྐིའི་ཐུགས་ཐིག་ལས༔ རྫོགས་པ་ཆེན་པོ་འོད་གསལ་གསང་བའི་མན་ངག་ཉི་མ་སྤྲིན་བྲལ་ཞེས་བྱ་བ་བཞུགས༔
སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན༔ སྐྱེ་འགག་གནས་གསུམ་བྲལ་བའི་རང་བཞིན་ལ༔ སོ་སོའི་རིག་པ་ཡེ་ཤེས་ཆེན་པོའི་གཤིས༔ དག་པ་དོན་གྱི་རང་ཞལ་མཇལ་ཕྱག་འཚལ༔ བདག་འདྲ་ཆོས་མེད་སྤྲང་པོ་ང༔ གཉིད་དང་འོད་གསལ་འདྲེས་པའི་ཚེ༔ རང་བཞིན་ཌཱཀྐིས་འདི་བཞིན་བརྗོད༔ ཨ་ལ་ལ་ཧོ༔ སྟོང་ཆེན་སྤྲོས་པ་མཐའ་བརྒྱད་བྲལ་བའི་ཀློང༔ གསལ་སྣང་འགགས་མེད་ཆོས་ཀུན་རོ་མཉམ་པའི༔ འཛིན་མེད་རང་གྲོལ་རང་བཞིན་གཉུག་མའི་གཤིས༔ ཤར་གྲོལ་ཀློང་ཐིམ་རྩལ་སྣང་བདེ་བ་ཆེ༔ ས་མ་ཡཱ༔ དེ་ལ་འདིར་ལས་དང་སྐལ་བར་ལྡན་པའི་གང་ཟག་རྣམས་ཚེ་འདི་ལ་ཆོས་སྐུ་གདོད་མའི་མགོན་པོའི་བཙན་ས་འཛིན་སྙམ་པའི་རིགས་ལྡན་བློ་གྲོས་ཅན་རྣམས་ཀྱིས༔ འཕྲལ་རྐྱེན་གདུག་པའི་འཚེ་བ་འཇོམས་ཤིང་མཐུན་རྐྱེན་ལེགས་པའི་མྱུ་གུ་སྨིན་པའི་དབེན་གནས༔ འདབ་ཆགས་རི་དྭགས་གྲོགས་དང་ལྷན་ཅིག་རྩེ་བའི་སར༔ འགོ་ཞིང་སྡོང་གྲོགས་བྱེད་པའི་ལྷ་སྲུང་རྣམས་དང་དཀར་ཕྱོགས་སྐྱོང་བའི་དྲེགས་ཚོགས་ལ་སྤྱན་གཟིགས་གསེར་སྐྱེམས་སོགས་ཀྱིས་བརྔན་ཏེ༔ བདག་གིས་གསང་ཆེན་ཐེག་པའི་མཐར་ཐུག་སྐྱོར་སྦྱོང་བྱེད་པ་ལ་བར་ཆད་མ་གཏོང་ཞིག༔ ཀོ་ལོང་གདུག་རྩུབ་སྤོངས་ཤིག་དང་༔ རང་བཞིན་གཞི་རྫོགས་སུ་གྲོལ་བ་ཞིག་འདིར་བྱའོ་ཞེས་ཕྲིན་ལས་བཅོལ༔ ང་བདག་གཟུང་འཛིན་ལས་བྱུང་བའི་གནོད་བྱེད་དམ་སྲི་ལོག་སྨོན་བདུད་རིགས་རྣམས་རང་རིག་ཁྲོ་བོ་གང་རུང་གི་ང་རྒྱལ་གྱི་ཧཱུྃ་ཕཊ་དྲག་པོས་ཕྱིར་བསྐྲད༔ མི་ཤིགས་ཆོས་བདུན་རྡོ་རྗེའི་གུར་ཕུབ༔ བཛྲ་རཀྵ་བརྗོད༔ སྔོན་འགྲོ་དངོས་གཞི་རྗེས་གསུམ་ལས༔ དང་པོ་ལ་གཉིས༔ ཡན་ལག་དང་སྔོན་འགྲོ་དངོས༔ སྐྱབས་འགྲོ་སེམས་བསྐྱེད་བྱིན་དབབ་ནི༔ རང་བྱུང་རིག་པ་སྟོང་པའི་གཤིས༔ སྤང་བླང་མེད་པར་སྐྱབས་སུ་མཆི༔ འཁོར་འདས་ཁྱབ་བརྡལ་འུབ་ཆུབ་ཀློང༔ ཕྱོགས་འཛིན་ཞིག་པར་སེམས་བསྐྱེད་དོ༔ རང་སྣང་དོན་གྱི་འོག་མིན་དུ༔ ཀ་དག་ཆོས་སྐུའི་བྱིན་ཆེན་ཕོབ༔ སྒོ་གསུམ་ཞེན་པ་དབྱིངས་སུ་སྤོར༔ ཉམས་རྟོགས་རྩལ་རྒྱས་དངོས་གྲུབ་སྩོལ༔ ཨ་ལ་ལ་ཕཻཾ་ཕཻཾ་ཛ་ཛ༔ དེ་ནས་གཉིས་པ་བློ་ཆོས་སུ་འགྲོ་བར་བྱ་བ་བློ་ལྡོག་རྣམ་པ་བཞིས་རྩལ་སྦྱང༔ ཆོས་ལམ་དུ་འགྲོ་བར་ཡན་ལག་བདུན་པ་དང་རྡོར་སེམས་སྒོམ་བཟླས་ལ་བརྟེན་ནས་སྟོབས་བཞིའི་ཚོགས་བསགས་སྒྲིབ་སྦྱང་དང་བླ་མའི་རྣལ་འབྱོར་ལ་བརྩོན་པའོ༔ དེ་ཡིས་སྔོན་འགྲོའི་རིམ་པ་རྫོགས༔ དངོས་གཞི་རྣམ་གྲངས་འདི་ལྟ་སྟེ༔ སྣང་མེད་ཁྲེགས་ཆོད་ལྟ་བ་དང༔ སྣང་བཅས་ཐོད་རྒལ་བསྒོམ་པའོ༔ དང་པོ་ཁྲེགས་ཆོད་ཡན་ལག་ཏུ༔ རུ་ཤན་བསྲེག་སྦྱང་ཧཱུྃ་གླུ་ལེན༔ མི་འགུལ་གསུམ་གྱིས་གཞི་བཟུང་བ༔ དེ་ལ་དང་པོ་འདི་ལྟར་སྦྱོངས༔ སེམས་བསྐྱེད་དྲག་པོའི་མོས་འདུན་གྱིས༔ ལུས་ནི་གཅེར་ཕྱུང་འགྲོ་དྲུག་གི༔ སྡུག་བསྔལ་རིམ་བཞིན་ལུས་ཀྱིས་སྦྱངས༔ ངག་གིས་འགྲོ་བའི་རང་སྐད་གདོན༔ དྲན་བསམ་ཐམས་ཅད་ཁ་རུ་བརྗོད༔ སེམས་ནི་གཏད་མེད་བྱུང་རྒྱལ་བཏང༔ ལུས་སེམས་ངལ་ཞིང་དུབ་པ་ན༔ རྗེས་ཤེས་དེ་ཡི་ངོ་བོར་བལྟ༔ ས་མ་ཡཱ༔ དེ་ནས་རིགས་དྲུག་བག་ཆགས་སྦྱང༔ སྤྱི་བོ་མགྲིན་པ་སྙིང་ཁ་དང༔ ལྟེ་བ་གསང་གནས་རྐང་མཐིལ་དུ༔ ཨ་སུ་ནྲྀ་ཏྲི་པྲེ་དུཿགསལ༔ རིགས་དྲུག་བག་ཆགས་དེར་འདུས་ལ༔ སྦྱོང་བྱེད་སངས་རྒྱས་ཐམས་ཅད་དང༔ གཉིས་མེད་རིག་པའི་ཡེ་ཤེས་ནི༔ རྡོ་རྗེ་གསུམ་གྱི་ངོ་བོ་ཤར༔ སྤྱི་མགྲིན་སྙིང་ལ་འབྲུ་གསུམ་གསལ༔ དེ་ལས་དཀར་དམར་མཐིང་གསུམ་གྱི༔ བདུད་རྩི་བབས་པས་རིགས་དྲུག་གི༔ ས་བོན་བག་ཆགས་དག་པར་བསམ༔ ངག་ཏུ་ཨོཾ་ཨཱཿཧཱུྃ་བརྗོད་དོ༔ རྗེས་ལ་མི་དམིགས་གཤིས་ལ་ཀློད༔ ས་མ་ཡཱ༔ དེ་ནས་ཧཱུྃ་སྦྱང་ལ་ཡང་མི་འདྲ་གསུམ༔ ལུས་ནི་རྡོ་རྗེའི་འདུག་སྟངས་ཀྱིས༔ རྡོ་རྗེ་སྔོན་པོ་མེ་འབར་བསམ༔ དག་འབྲས་རིམ་པ་འདི་རྟོགས་གཅེས༔ ཡར་རྩེ་གསུམ་ནི་ངོ་བོ་དང༔ རང་བཞིན་ཐུགས་རྗེའི་བརྡ་མཚོན་ནོ༔ མར་རྩེ་གསུམ་ནི་སྐུ་གསུམ་དང༔ སྐེད་པ་གཅིག་དྲིལ་ཀ་དག་དང༔ ལྷུན་གྲུབ་ངོ་བོ་ལམ་བྱེད་མཚོན༔ དགོས་པའི་ཁྱད་པར་འདི་བཞིན་ནོ༔ དེ་བསྒོམ་ངལ་དུབ་ལུས་སྒྲིབ་འདག༔ གནོད་གདུག་རྣམས་ཀྱིས་མེ་དཔུང་མཐོང༔ མཐར་ཐུག་རྡོ་རྗེའི་སྐུ་རུ་འགྲུབ༔ དལ་འབྱོར་རྙེད་པ་དོན་ལྡན་འགྱུར༔ ས་མ་ཡཱ༔ དེ་ནས་ཧཱུྃ་ལ་སྦྱང་བ་དངོས༔ དབེན་པར་སྐྱིལ་མོ་ཀྲུང་བཅས་ཏེ༔ ངག་ཏུ་ཧཱུྃ་ཧཱུྃ་ཧཱུྃ་ཧཱུྃ་ཞེས༔ དབྱངས་སྙན་རིང་པོས་སྦྲེལ་མར་བཟླ༔ ཧཱུྃ་ལ་སྦྱང་ལུགས་མང་མཆིས་ཀྱང༔ ཕྱི་ནང་སྣོད་བཅུད་ཧཱུྃ་དུ་བསྒོམ༔ ཤིག་ཤིག་ཡོམ་ཡོམ་ཟང་མ་ཐལ༔ དངོས་འཛིན་སྣང་བ་ཧཱུྃ་ལ་བསྡུ༔ ཧཱུྃ་ཡང་ནམ་མཁའི་རང་བཞིན་ཆེ༔ དེས་ནི་ངག་གི་སྒྲིབ་པ་འདག༔ གྲགས་སྟོང་རྡོ་རྗེའི་གདེངས་སུ་འཕོ༔ ཐ་མལ་ལས་རླུང་དོན་ཡོད་འགྱུར༔ ས་མ་ཡཱ༔ དེ་འཕྲོས་སེམས་ལ་སྦྱང་བ་ནི༔ འབྱུང་གནས་འགྲོ་གསུམ་བརྟག་པའོ༔ དང་པོ་སེམས་ཞེས་བྱ་བ་འདི༔ ཕྱི་ནང་སྣོད་བཅུད་གང་ནས་བྱུང༔ ཡོད་ན་གཟུགས་དབྱིབས་ཁ་དོག་འཚོལ༔ མེད་ན་མེད་མཁན་ཤེས་པ་འཚོལ༔ གཟུང་འཛིན་ཡུལ་མེད་གཏན་བྲལ་ན༔ སྨྲ་བསམ་བརྗོད་མེད་ཁས་ལེན་དང༔ བྲལ་བའི་སྟོང་སང་ཧད་དེ་བ༔ གཞི་མེད་རྩ་བྲལ་ཆོས་སྐུ་ཞེས༔ སྐྱེ་མེད་དོན་ཁོང་ཆུད་པ་ཡིན༔ ང་ལ་ཁས་ལེན་མེད་པ་ནི༔ ང་ཞེས་སྐྱོན་མེད་གོས་མ་མྱོང༔ ཡེ་ནས་གནས་པའི་ཆོས་ཉིད་དོ༔ ས་མ་ཡཱ༔ བར་དུ་སེམས་ཞེས་བྱ་བ་འདི༔ གནས་པའི་ས་ནས་གང་དུ་གདའ༔ ལུས་ཀྱི་སྤྱི་གཙུག་རྐང་མཐིལ་བར༔ སྲིད་རྩེ་མནར་མེད་དག་ཏུ་བརྟག༔ གནས་ན་འདི་རུ་གནས་སོ་ཞེས༔ ངོ་བོ་ངོས་གཟུང་གྱིས་ལ་ཤོག༔ མི་གནས་འཚོལ་མཁན་སུ་ཡིན་ལྟོས༔ ཀུན་ལ་རྒྱུ་མཚན་མི་འདུག་པས༔ བཙལ་བྱ་འཚོལ་བྱེད་མཉམ་པ་ཉིད༔ ཆུ་ལ་ཡི་གེ་བྲིས་པ་བཞིན༔ བཟུང་བྲལ་གཏན་འབེབས་ལོངས་སྐུ་ཞེས༔ འགགས་མེད་དོན་ཁོང་ཆུད་པ་ཡིན༔ གནས་དང་མི་གནས་མཉམ་པ་ཉིད༔ རང་བྱུང་ཡེ་རྫོགས་ཡེ་ཤེས་སྐུ༔ ས་མ་ཡཱ༔ ཐ་མ་སེམས་ཞེས་བྱ་བ་འདི༔ འགྲོ་བའི་ཡུལ་ནི་གང་དུ་ཐལ༔ སྣོད་བཅུད་སྟོང་དང་སྣང་བ་སོགས༔ གང་གི་ཕྱོགས་སུ་འགྲོ་བརྟགས་པས༔ གལ་ཏེ་རྙེད་ན་འགྲོ་མཁན་གྱི༔ བྱད་བཞིན་མཚན་ཉིད་ཤེས་དགོས་སོ༔ དེ་ལྟར་འགྲོ་མཁན་མི་གདའ་ན༔ འཚོལ་མཁན་ཤེས་པ་གང་ཅི་ཡིན༔ བྱ་བྱེད་གཉིས་མེད་དོན་གཅིག་ན༔ ཡུལ་སྣང་སེམས་ཀྱིས་བཟོས་ཐག་ཆོད༔ འབྲས་བུའི་རེ་དོགས་འཛིན་པ་ཁྲོལ༔ ཡུལ་ཅན་རང་བཞིན་མེད་གདེངས་རྙེད༔ རིག་སྟོང་འགྲོ་འོང་བྲལ་སྤྲུལ་སྐུ༔ གནས་མེད་དོན་ཁོང་ཆུད་པ་ཡིན༔ འདི་ལྟར་བྱུང་གནས་འགྲོ་གསུམ་པོ༔ ཐུན་མིན་གནད་ཀྱི་མན་ངག་ཡིན༔ སེམས་ཀྱི་ཁང་བུ་རྡིབ་པའི་གནད༔ ཁྱད་པར་འཕགས་པའི་མྱུར་ལམ་ཡིན༔ ས་མ་ཡཱ༔ མི་འགུལ་བ་ནི་འདི་ལྟ་སྟེ༔ ལུས་གནད་བཟང་ངན་བླང་དོར་ལས༔ འདས་པ་དུར་ཁྲོད་མི་རོ་བཞིན༔ ཅི་བདེར་གན་རྐྱལ་དག་ཏུ་བཞག༔ ངག་ནི་སྨྲ་བརྗོད་དང་བྲལ་ཏེ༔ པི་ཝཾ་རྒྱུན་ཐག་འགགས་པ་བཞིན༔ དབུགས་ཀྱི་འགྲོ་འོང་དལ་བར་བསླབ༔ ཡིད་ནི་རྣམ་རྟོག་དང་བྲལ་ནས༔ སྤྲིན་མེད་དྭངས་པའི་མཁའ་ལྟར་ཞོག༔ བྱ་བྱེད་བྲལ་བའི་རྣལ་འབྱོར་ལ༔ ཅི་ནུས་བརྩོན་པ་མན་ངག་གནད༔ འདི་ལྟར་མཉམ་པར་སུས་བཞག་ཀྱང༔ འབྱུང་འཁྲུགས་ནད་གདོན་ཞི་བ་དང༔ འཛིན་པ་རང་གྲོལ་ཉིད་དུ་གྱུར༔ ས་མ་ཡཱ༔ དེ་འཕྲོས་ལྟ་སྟངས་རྣམ་པ་གསུམ༔ ཉན་ཐོས་བྱང་སེམས་ཁྲོ་བོ་ཡི༔ ལྟ་སྟངས་རིམ་པ་འདི་བཞིན་ནོ༔ ཉན་ཐོས་ལྟ་སྟངས་ཆོས་བདུན་གྱིས༔ རྟོག་པ་བཟོ་བཅོས་མེད་པར་བཞག༔ བྱང་སེམས་ལྟ་སྟངས་མིག་གིས་ནི༔ འདོམ་གང་བར་ལྟ་གཡོ་མེད་གནས༔ ཁྲོ་བོའི་ལྟ་སྟངས་ཕྱག་རྡོར་བསྐྱེད༔ དོར་སྟབས་སྡང་མིག་ནམ་མཁར་བལྟ༔ ཧ་ཧ་ཁྲོ་བའི་གད་མོ་དང༔ ཧི་ཧི་ཁྲོ་བོའི་རྒྱང་གླུ་བརྗོད༔ སྣང་བའི་རྫུན་ཕུག་རྡིབ་པའི་ཕྱིར༔ བརྟུལ་ཞུགས་རྣམ་གསུམ་རྩལ་ལ་སྦྱང༔ དང་པོ་ལུས་ངག་རྣལ་དུ་ཕོབ༔ གཉིས་པས་བདེ་བའི་ཡེ་ཤེས་རྒྱས༔ གསུམ་པ་ཡོན་ཏན་དག་ལ་དབང༔ ས་མ་ཡཱ༔ དངོས་གཞི་རིག་པ་ངོ་སྤྲོད་ནི༔ ཀྱཻ་ཧོ་སྐལ་ལྡན་རིགས་ཀྱི་བུ༔ ད་ལྟའི་རིག་པ་བཅས་བཅོས་དང༔ སྤྲོ་བསྡུ་མ་བྱེད་ཐད་ཀར་ཞོག༔ དེ་ལ་ཡོད་མེད་ཕྱོགས་མ་གྲུབ༔ སྣང་སྟོང་སྤུ་རིས་མི་ཕྱེད་པར༔ རྟག་ཆད་མཚན་མ་ཡེ་མ་གྲུབ༔ མ་གྲུབ་གཟོ་མེད་རིག་པ་ལ༔ ལྟ་སྒོམ་རྩོལ་བས་མི་དགོས་མོད༔ བསྡམ་གྲོལ་གཉིས་མེད་ཡེ་གྲོལ་ཆེ༔ ལམ་གྱི་ལམ་མཆོག་ཡང་དག་ལམ༔ ཇི་སྙེད་གཟིགས་པའི་ཡེ་ཤེས་ཀྱིས༔ ཇི་ལྟ་བ་བཞིན་མཐོང་ནས་ཀྱང༔ གདོད་མའི་དབྱིངས་སུ་བསྐྱལ་བའོ༔ ཀྱཻ་ཧོ་སྐལ་ལྡན་རིགས་ཀྱི་བུ༔ སྣང་བ་ཐམས་ཅད་སེམས་ཀྱི་འཕྲུལ༔ དེ་ལ་ཞེན་པ་མ་བྱེད་ཅིག༔ སྟོང་པ་བློ་ཡིས་བཅོས་པ་མིན༔ འཛིན་པས་བསླད་པར་མི་བྱེད་པར༔ རང་གྲོལ་དུས་མཉམ་ངོ་བོ་ལ༔ གང་ཤར་རང་སར་ཞོག་ཅིག་ཀྱེ༔ སེམས་ཀྱི་རང་བཞིན་ནམ་མཁའ་ཆེ༔ དོན་དམ་བློ་ཡི་ཡུལ་ལས་འདས༔ ཀུན་རྫོབ་མཚན་མ་བློ་ལས་གྲུབ༔ ཞེན་པའི་ཕྲེང་ཐག་ཆོད་པ་ན༔ གདོད་མའི་བཙན་ས་ཟིན་ལ་ཉེ༔ ཁ་དོག་སྣང་བའི་ཆོ་འཕྲུལ་ཀུན༔ རང་རྩལ་སེམས་ཀྱི་རང་བཞིན་ཡིན༔ ཐ་དད་དཔྱད་པ་འཁྲུལ་བའི་རྒྱུ༔ རྣམ་པར་རྟོག་གསུམ་བྲལ་བ་ལ༔ ཆོས་སྐུ་གཞིར་གནས་རིག་པ་ཟེར༔ ས་མ་ཡཱ༔ གཞི་དོན་རིག་པ་ངོ་སྤྲད་ན༔ གཞི་རྒྱུད་བདེ་བར་གཤེགས་པ་ནི༔ སེམས་ཅན་ཁམས་ལ་ཡེ་གནས་ཀྱང༔ གློ་བུར་དྲི་མས་སྒྲིབ་སྐྱོན་གྱིས༔ གནས་ལུགས་རང་བཞིན་ངོ་མ་མཐོང༔ ད་ནི་མངོན་སུམ་བཅར་ཕོག་ན༔ བདེ་གཤེགས་སྙིང་པོ་ཞེས་བྱ་བ༔ ཁྱབ་བརྡལ་ནམ་མཁའི་ཁོར་ཡུག་ཡིན༔ ཡུལ་མེད་ཟང་ཐལ་ཆེན་པོ་འོ༔ སངས་རྒྱས་བཟང་པོས་བཟང་མ་བཅོས༔ སེམས་ཅན་ངན་པས་ངན་མ་བསྒྱུར༔ སྤྲོས་མཐའ་བརྒྱད་བྲལ་རྣམ་ཐར་གྱི༔ སྒོ་གསུམ་ ལྡན་ལ་རིག་པ་ཞེས༔ སྐུ་ལྔ་ཡེ་ཤེས་བདག་ཉིད་ཅན༔ ཞལ་ཕྱག་མཚན་མའི་ཡུལ་ལས་འདས༔ སྟོང་གསལ་འགགས་མེད་ཡེ་ཤེས་སྐུ༔ གསང་བ་གསང་ཆེན་རྡོ་རྗེ་ཆེ༔ ས་མ་ཡཱ༔ མིང་གི་འཇུག་ཚུལ་དོན་བཀྲལ་ན༔ གསང་བ་ཞེས་བྱ་སྣོད་མེད་ལ༔ རླུང་ཕྱོགས་བསྒྲགས་མི་ཉན་པས་གས༵ང༔ གསང་ཆེན་གབ་སྦས་གཉིས་ལྡན་ཆེ༵ན༔ རྡོ༵་རྗེ༵་ཞེས་བྱ་འདི་ལྟ་སྟེ༔ ཉོན་མོངས་རྟོག་པས་མི༵་ཆོ༵ད་པ༵༔ ཡུལ་དང་རྐྱེན་གྱིས་མི༵་ཤི༵གས་པ༵༔ རང་ངོ་ཀ་ནས་དག་བདེ༵ན་པ༵༔ བཟང་ངན་སྐྱོན་འཇུག་མེད་སྲ༵་བ༵༔ དུས་གསུམ་འཕོ་འགྱུར་མེད་བརྟ༵ན་པ༵༔ གང་ཡང་འབིགས་ནུས་ཐོ༵གས་མེ༵ད་པ༵༔ ཐམས་ཅད་ཀུན་ལས་མ༵་ཕ༵མ་པ༵༔ བདེ་གཤེགས་རྡོ་རྗེ་བདུན་དང་ལྡན༔ རྫོགས་ཆེན་གཞོན་ནུ་བུམ་སྐུ་ཞེས༔ དེ་དོན་སེམས་ལས་གཞན་མ་ཡིན༔ ཐེག་དགུའི་དགོངས་དོན་རྫོག༵ས་པ་དང༔ བསྟན་པའི་སྤྱི་གཞི་གྱུར་ཆེ༵ན་པོ༔ སྐྱེ་འཆི་བགྲེས་རྒུད་བྲལ་གཞོ༵ན་ནུ༵༔ ལྷུན་གྲུབ་ཕྱི་རྒྱ་མ་རལ་བུ༵མ༔ ཡེ་ཤེས་ཡོན་ཏན་ཡེ་རྫོགས་སྐུ༵༔ ཐིག་ལེ་ཉག་གཅིག་ཞེས་བྱ་བ༔ རྟོག་པའི་གྲ་ཟུར་ལས་འདས་ཐི༵ག༔ ཁ་དོག་མཚན་མ་དང་བྲལ་ལེ༵༔ འཁོར་འདས་ཀུན་ཟླུམ་ཉ༵ག་གཅི༵ག་ཀློང༔ དོན་གཅིག་མིང་གི་རྣམ་གྲངས་ཀུན༔ དོན་ལ་བདེ་གཤེགས་སྙིང་པོ་ཞེས༔ སེམས་ཅན་ཁམས་ལ་ཡོངས་ཁྱབ་པ༔ རིག་དང་མ་རིག་ཁྱད་པར་གྱིས༔ སངས་རྒྱས་སེམས་ཅན་གཉིས་སུ་ཕྱེ༔ དེ་ཉིད་རིག་པ་ངོ་མཚར་ཆེ༔ ས་མ་ཡཱ༔ སེམས་དང་རིག་པའི་ཡེ་ཤེས་ཀྱི༔ ལ་ཤན་འབྱེད་པ་ཨ་ལ་ལ༔ སེམས་ནི་བག་ཆགས་ཀུན་གྱི་རྟེན༔ ལུས་ཅན་རྣམས་ཀྱི་དྲི་མ་ཡིན༔ གཟུང་བ་ཡུལ་ཡིན་འཛིན་པ་སེམས༔ འཁོར་བ་འཁོར་བའི་ཆོས་ཉིད་དོ༔ སེམས་དང་བྲལ་བ་སངས་རྒྱས་འགྱུར༔ ལུས་ཅན་ཀུན་གྱི་དྲི་མ་འདག༔ སེམས་དང་རིག་པ་མ་ཕྱེ་ན༔ སྒྲིབ་བྱེད་སྤྲིན་གྱི་ཉི་མ་བཞིན༔ ངེས་དོན་སྣང་བའི་དོན་མི་འབྱེད༔ རིག་པའི་ཡེ་ཤེས་ཞེས་བྱ་བ༔ ཡེ་ནས་འཁྲུལ་བྲལ་ཀ་ནས་དག༔ བལྟ་བྱ་ལྟ་བྱེད་ཡུལ་ལས་འདས༔ བསྒོམ་བྱ་སྒོམ་བྱེད་མཐའ་ནས་བྲལ༔ སྤྱོད་པའི་སྒྲོག་མདུད་ཡེ་ནས་དབེན༔ འབྲས་བུ་རེ་དོགས་ཐོབ་ཤོར་བྲལ༔ དགེ་སྡིག་འཛིན་པ་དབྱིངས་སུ་ཡལ༔ རིག་པ་རང་བྱུང་ཨེ་མ་ཧོ༔ སེམས་དང་རྣམ་རྟོག་དོན་གཅིག་སྟེ༔ རིག་པའི་རྩལ་བྱུང་ཀུན་རྫོབ་ཆོས༔ དཔེར་ན་དབྱིངས་ལ་རླུང་རྒྱུ་བཞིན༔ རིག་པའི་རང་ཞལ་མཐོང་ཙ་ན༔ སེམས་ལ་ལོགས་སུ་རྒྱུ་དབང་མེད༔ རྒྱལ་པོས་བཙན་ས་ཟིན་པའི་ཚེ༔ འབངས་འཁོར་དབང་དུ་བསྡུ་བ་བཞིན༔ རྟོག་པ་ཙམ་དུ་གོ་བར་ལུས༔ རྒྱུན་དུ་ཡེངས་མེད་རྐྱེན་ཐུབ་གནད༔ གོམས་ལ་ཤིན་ཏུ་སྦྱང་དགོས་པས༔ གང་ཤར་རང་གྲོལ་ངང་ལ་ཞོག༔ ས་མ་ཡཱ༔ རྗེས་ལ་གོལ་འཕྱུག་མེད་འཛོལ་བཀག༔ གནད་དོན་ཤེས་དགོས་རིམ་པ་ནི༔ ཁྱབ་བྱེད་ཤེས་རབ་ཆེན་པོ་སྟེ༔ རང་གྲོལ་སྨྲ་བསམ་བརྗོད་ལས་འདས༔ ཡེ་གྲོལ་ངང་བཞག་ཆེན་པོ་ལ༔ རང་གྲོལ་ས་ལ་རང་བསྐྱལ་གནད༔ བདེ་གསལ་མི་རྟོག་ཁམས་གསུམ་གྱི༔ ས་ལ་འཕེན་བྱེད་གོལ་ས་ཡིན༔ སྲེད་ལེན་བྲལ་བའི་དབྱིངས་ལ་ཀློད༔ སྒོ་གསུམ་བདེ་སྡུག་བཟང་ངན་ཀུན༔ གང་ཤར་རང་ངོར་ཤེས་ན་གྲོལ༔ ཐམས་ཅད་སྣང་བ་སྣང་ཆར་བཅས༔ རྨི་ལམ་དབྱིངས་སུ་སད་པ་འམ༔ སྒྱུ་མའི་འཕྲུལ་འཁོར་ཞིག་པ་བཞིན༔ སྔོན་བསུ་རྗེས་དཔྱོད་དང་བྲལ་ཞོག༔ འཁོར་འདས་རང་སྣང་ལས་མི་གཞན༔ དེ་དོན་ཤེས་ལ་ལྟ་བ་ཟེར༔ རིག་པ་རང་དབང་བསྒྱུར་བ་ལས༔ ནམ་དུ་མི་འདའ་སྒོམ་ཞེས་བྱ༔ སྤྱོད་པ་ཆོས་དང་མཐུན་པ་གནད༔ ལྟ་བའི་ཕྱོགས་སུ་སྤྱོད་པ་མི་འཆོར་གནད༔ ཞི་དུལ་བག་ཡོད་དཔེར་ན་ཁྲིམས་བདག་གི༔ རྒྱལ་པོའི་མདུན་དུ་ཉམ་ཆུང་སླེབས་པ་བཞིན༔ སྡོམ་གསུམ་བཅས་པའི་ཁྲིམས་དང་མི་འཛོལ་གནད༔ སྤྱོད་པའི་ཕྱོགས་ལ་ལྟ་བ་མི་འཆོར་གནད༔ དཔེར་ན་སྡེར་ཆགས་རྒྱལ་པོ་སེང་གེ་ཡིས༔ གངས་རྩེར་འགྱིངས་ནས་གཞན་དག་ཟིལ་གནོན་བཞིན༔ འཇིགས་མེད་སྤོབས་པ་ཐོབ་པའི་བཙན་ས་ཟུངས༔ དེ་སོགས་གོལ་ས་བཀག་པའི་མན་ངག་ཡིན༔ མདོར་ན་སངས་རྒྱས་ཞེས་བྱ་བ༔ འདི་དོན་རྟོགས་ལས་གཞན་མ་ཡིན༔ དེ་ཉིད་རྟོགས་དང་མ་རྟོགས་ཀྱི༔ ཁྱད་པར་གཉིས་སུ་ཕྱེ་བ་ལས༔ སངས་རྒྱས་སེམས་ཅན་གཉིས་སུ་གྲུབ༔ དོན་ལ་སོ་སོར་ཐ་མི་དད༔ ཀ་དག་ཁྲེགས་ཆོད་རིམ་པ་རྫོགས༔ ས་མ་ཡཱ༔ གཉིས་པ་ལྷུན་གྲུབ་རང་བཞིན་ལ༔ ལྷུན་གྲུབ་ཐོད་རྒལ་རིམ་པ་ནི༔ ཁྲེགས་ཆོད་གཏན་ཕེབས་གང་ཟག་ལ༔ རང་བཞིན་འོད་གསལ་ངོ་སྤྲོད་གདབ༔ ཤར་ནུབ་ཉི་ཟླའི་བསྒྲོད་ལམ་ཡངས༔ དབེན་ཞིང་ཉམས་དགའ་རིག་པ་དྭངས༔ དཀར་ཕྱོགས་སྐྱོང་བའི་རི་བོའི་སྤོ༔ མཁོ་བའི་ཡོ་བྱད་མཐུན་པའི་རྐྱེན༔ མ་ཚང་མེད་པར་ཚགས་སུ་བཙུད༔ ལྷ་ཀླུ་གཞི་བདག་གཏོར་མས་བརྔན༔ བར་ཆད་མི་བྱེད་བཀའ་ཡང་བསྒོ༔ སྣ་སེལ་ཚོགས་བསགས་རིམ་གྲོར་འབུངས༔ བདག་རྒྱུད་དབང་དང་ཁྲེགས་ཆོད་ཀྱིས༔ ཡོངས་སུ་སྨིན་ཅིང་གྲོལ་བ་དང༔ དད་གསུམ་ལྡན་པའི་སློབ་བུ་ལ༔ ངོ་སྤྲོད་གདབ་ཅིང་དམ་ཚིག་བསྒྲགས༔ རྣལ་འབྱོར་ལས་གཞན་བྱ་བ་སྤངས༔ སྐུ་གསུམ་བཞུགས་སྟངས་འདི་ལྟར་བསླབ༔ ཆོས་སྐུ་སེང་ཧ་འབྲུག་རྔམ་ལྟར༔ ལོངས་སྐུ་གཉིས་འཐུང་བདེ་ལུགས་ཉལ༔ སྤྲུལ་སྐུ་དྲང་སྲོང་ཡུལ་དཔྱོད་བཞིན༔ ལུས་གནད་གསུམ་གྱི་འཕྲུལ་འཁོར་གཅུན༔ གཟིགས་སྟངས་གྱེན་འགྲེང་རྩིབ་ཤར་དང༔ ཐུར་དུ་བལྟ་དང་ཅི་འཚམས་རུང༔ ངག་གནད་མཆུ་སོ་མ་རེག་པར༔ རླུང་གི་འགྲོ་འོང་དལ་བ་དང༔ སྨྲ་བརྗོད་བཟླས་པ་ཅོག་གེ་བཞག༔ སེམས་གནད་ལྷོད་དེ་ཤིག་གེ་བ༔ དམིགས་མེད་ནམ་མཁའ་སྟོང་པར་གཏད༔ སྒོ་གནད་བཟློག་ཕབ་ཟུར་གྱིས་བལྟ༔ ཡུལ་གནད་རྐྱེན་བྲལ་དབྱིངས་ལ་ཞོག༔ ཆིངས་གསུམ་དག་གིས་རྣལ་ཕབ་ན༔ ཙིཏྟ་རིན་ཆེན་ཁང་པ་ནས༔ སེམས་ཀྱི་ངོ་བོ་དེ་བཞིན་གཤེགས༔ སྐུ་གསུམ་ཞིང་ཁམས་འདུ་འབྲལ་མེད༔ གཞོན་ནུ་བུམ་སྐུ་ཞལ་ཕྱག་རྫོགས༔ དཀར་འཇམ་རྩ་ཡི་སྒྲོན་མ་ནས༔ རྒྱང་ཞགས་ཆུ་ཡི་སྒྲོན་མའི་སྒོར༔ རྣམ་དག་དབྱིངས་ཀྱི་ད་ལ་ནས༔ ཐིག་ལེ་སྟོང་སྒྲོན་ལུག་རྒྱུད་མཐིང་ནག་དྲི་བྲལ་དབུས་སུ་ནི༔ རིག་པ་རྡོ་རྗེ་ལུ་གུ་རྒྱུད༔ རྟ་ཡི་རྔོག་མ་གཤིབ་པའམ༔ མདུད་པ་བྱས་དང་བསྒྲིམ་པ་ལྟར༔ ཕྲ་ལ་མཉེན་པ་ལིང་ལིང་འདར༔ རྣམ་པ་འཆར་བ་དེ་ཡིན་ནོ༔ ཕུར་པ་གསང་བ་སྤུ་གྲིའི་རྒྱུད་ལས་སོ༔ སོགས༔ གོ་མོག་ཆུ་ལ་རྡོ་བརྒྱབ་དང༔ མཆོད་རྟེན་མིག་མང་དྲྭ་ཕྱེད་སོགས༔ སྣང་བའི་འོད་གསལ་སྣ་ཚོགས་མཐོང༔ དེ་ཚེ་ཆོས་ཉིད་མངོན་དུ་གྱུར༔ ངན་སོང་གསུམ་ལས་རྒྱངས་ཀྱིས་འཕགས༔ ཐིག་ལེ་སྟོང་སྒྲོན་འབྲལ་མེད་ཅིང༔ ཟ་འོག་རིས་དང་གྱེན་འགྲེང་དང༔ རྩིག་པ་ཟླུམ་འཁྲིགས་པདྨ་དང༔ མདའ་མདུང་འོད་ལྔའི་མུ་ཁྱུད་འབྱུང༔ ལྔ་ལྡན་ཕུབ་རིས་འོད་གསལ་མང༔ དེ་ཚེ་ཉམས་སྣང་གོང་དུ་འཕེལ༔ དེ་ནས་འོད་གསལ་སྣང་བ་དེ༔ ཐིག་ལེ་ཐིག་ཕྲན་དག་ཏུ་འཚེར༔ མུ་ཁྱུད་ར་བ་ལྔ་ལྡན་ཅན༔ དེ་ནང་གཙུག་ཏོར་ཕྱག་མཚན་དང༔ སྐུ་ཕྱེད་སྐྱིལ་ཀྲུང་ཞལ་ཕྱག་རིས༔ ཡོངས་རྫོགས་གཅེར་བུ་ཡབ་དང་ཡུམ༔ འཁྲིལ་སྦྱོར་ཚོམ་བུ་ལྔ་ལྔ་སོགས༔ མཐོང་བའི་སྤྱན་དང་རྫུ་འཕྲུལ་སྟོན༔ འབྱུང་བའི་ཁམས་ལ་ཟང་མ་ཐལ༔ འགྲོ་དང་ཡང་དག་གོམས་བྱས་པས༔ འོད་ཐིག་ལས་རུང་ལས་རླུང་གི༔ འགྱུ་བ་རང་ཟད་འབྱུང་བ་བཞི༔ འོད་གསལ་དུ་གྲོལ་རིག་པ་དེ༔ གར་གཏད་འཕར་དང་འགུལ་བ་དང༔ སྐད་འབྱིན་གཟུང་འཛིན་ཞེན་པ་གྲོལ༔ ཕྱི་ནང་རིག་པ་ཚད་ལ་ཕེབས༔ ངན་རྟོག་ཕྲི་ཞིང་ལྟོ་གོས་ཀྱི༔ སྲེད་པ་བྲལ་ཞིང་ཡོན་ཏན་ཐོབ༔ ལོངས་སྤྱོད་རྫོགས་སྐུ་མངོན་དུ་གྱུར༔ ལུས་ཀྱི་བ་སྤུའི་གྲངས་མཉམ་པའི༔ སངས་རྒྱས་ཞིང་ཁམས་བསམ་ཡས་འཆར༔ ཚད་ཕེབས་སྣང་བ་མཐའ་རུ་ཕྱིན༔ གདོས་བཅས་ལུས་ཀྱི་ཤ་ཁྲག་དང༔ ཉོན་མོངས་འབྱུང་བ་ཉམས་དང་རྟོགས༔ ལས་རླུང་འགྱུ་བ་བག་ཆགས་ཟད༔ རེ་དོགས་སྣང་བའི་རྫུན་ཕུག་རྡིབ༔ ཕྱི་ནང་མེད་པར་འོད་ཀྱི་ཀློང༔ འོད་གསལ་རིག་པ་ཡུན་རིང་གནས༔ འཇའ་ལུས་འཕོ་བ་འགྲུབ་པར་འགྱུར༔ འཁོར་བའི་འགྲོ་བ་ཡོངས་སུ་སྒྲོལ༔ འོད་ཟེར་ཆེན་པོའི་དབང་བསྐུར་རྫོགས༔ རིག་པ་གཞོན་ནུ་བུམ་སྐུར་གྲོལ༔ སྐྱེ་འཆི་རང་དབང་ཨེ་མ་ཧོ༔ འཕོ་བའི་སྐུ་ལ་མི་ཞེན་ན༔ འོད་གསལ་སྤངས་ནས་ལྷུན་གྲུབ་རྐྱང༔ ཕྱི་གསལ་སྣང་བ་ནང་དབྱིངས་ཐིམ༔ ཀ་དག་ཆོས་སྐུ་སྤྲུལ་པ་འབུམ༔ འབྲས་བུ་ཆོས་ཉིད་ཟད་པའི་སར༔ གྲོལ་བ་མཐར་ཕྱིན་ཨ་ལ་ལ༔ དེ་ལྟར་ཟབ་གསང་བླ་མེད་གནད༔ སྐུ་གསུམ་ལམ་དུ་བྱས་པ་ཡིས༔ འབྲས་བུ་སྐུ་གསུམ་གཅིག་ཏུ་རྫོགས༔ འོད་གསལ་སྐུ་གསུམ་རང་ཆས་དེ༔ ཡེ་གྲུབ་རང་གནས་མངོན་དུ་གྱུར༔ ཟབ་གསང་ལམ་ལ་འདྲིས་སྦྱངས་མཐུས༔ ཕྱི་ནང་ཆོས་རྣམས་རང་སར་ཟད༔ ཆོས་དབྱིངས་འོག་མིན་ཕོ་བྲང་དུ༔ ཀུན་བཟང་སངས་རྒྱས་ས་ལ་འཁོད༔ ས་མ་ཡཱ༔ ཟབ་ ཨ་ཧོ༔ ཉམས་ལེན་གནད་ཀྱི་མན་ངག་ནི༔ ལུས་ནི་རབ་ཏུ་མི་འགུལ་ཞིང༔ དུར་ཁྲོད་མི་རོ་བཞིན་དུ་སྡོད༔ དེ་ཡི་རྐྱེན་གྱིས་མིག་མི་གཡོ༔ དམིགས་རྟེན་དབྱིངས་ལ་འགུལ་སྤྱོད་བྲལ༔ དབྱིངས་རྟེན་རིག་པ་མི་འཕྲོ་ཞིང༔ ཡེ་ཤེས་སྣང་བ་མངོན་དུ་བྱེད༔ སྔ་དྲོ་སཱུརྱའི་འོག་ཏུ་གཟེར༔ དགོང་མོ་གཡོན་དང་ཡར་ངོ་ལ༔ ཙནྟྲའི་ འབེན ་ལ་གཅུན་པ་དང༔ མུན་དགུང་ཨ་ལོ་ཀེ་ལ་ནི༔ སོར་བརྒྱད་མ་རེག་མཚམས་ནས་བལྟ༔ ཉིན་གུང་ཕྱི་དབྱིངས་མཚན་མོའི་དུས༔ ཙིཏྟའི་དབྱིངས་གསལ་མ་ཡེངས་ཉལ༔ མན་ངག་མཐའ་རྟེན་རིམ་པ་རྫོགས༔ གནད་ལས་གནད་གྱུར་འདི་ཤེས་དགོས༔ ཤ་ཡི་སྒྲོན་མའི་རང་མདངས་ལས༔ དཀར་འཇམ་རྩ་སྒྲོན་ལམ་བརྒྱུད་དེ༔ རྒྱང་ཞགས་ཆུ་སྒྲོན་ཉིད་ལ་བསླབས༔ མི་གཡོའི་གནད་གསུམ་ཉམས་བསྟར་བས༔ དབྱིངས་ནས་རྣམ་དག་སྒྲོན་མ་དེ༔ ཡི་གེ་ན་རོ་ལྟ་བུ་དང༔ ཟ་འོག་བཀྲམ་པའི་རི་མོར་འཆར༔ ཤེས་རབ་རང་བྱུང་སྒྲོན་མའི་མདངས༔ དབྱིངས་ནས་ལུག་རྒྱུད་ལྕགས་སྒྲོག་འཆར༔ ཐིག་ལེ་སྟོང་སྒྲོན་འོད་ལྔའི་མདངས༔ རྨ་བྱའི་སྒྲོ་ལྟར་གཅིག་གཉིས་འབྲེལ༔ གསུམ་འབྲེལ་བཞི་སྒྲོན་དག་ཏུ་འཚེར༔ བརྩོན་འགྲུས་ལྷོད་པ་མེད་པ་དང༔ དད་གསུམ་ལྡན་པས་ཉམས་བླངས་ན༔ སྣང་བཞི་མཐའ་རུ་ཕྱིན་པ་དང༔ གང་ཟག་རབ་འབྲིང་ཐ་མའི་ཁམས༔ བར་མ་ཆད་པར་ཉམས་བླང་ན༔ རིམ་བཞིན་བཅོ་ལྔ་ཉེར་ལྔ་དང༔ སོ་ལྔའི་ལོ་གྲངས་འདས་པའི་བར༔ འཇའ་ལུས་ཆེན་པོར་མ་འགྲུབ་ན༔ རྡོ་རྗེ་འཆང་གིས་བསླུས་པ་ཡིན༔ དེ་ཕྱིར་གཅེས་པས་ཉམས་སུ་ལོངས༔ ཐེ་ཚོམ་མེད་དོ་སྐལ་ལྡན་བུ༔ བསླུ་བར་མི་འགྱུར་ས་མ་ཡཱ༔ ཕུན་སུམ་ཚོགས་པ་ལྔ་ཡི་རྒྱ༔ ཨི་ཏན་ཏེ་ན་ར་ཀན་རྒྱ༔ ཨེ་མ༔ རང་བྱུང་རང་ཤར་དགོངས་ཀློང་ཡངས་པ་ནས༔ བཟང་པོའི་ལས་འཕྲོ་པད་དཀར་བཞད་པ་ལས༔ རྡོ་རྗེའི་བརྡ་ཚིག་དབྱིངས་ནས་འཇའ་ལྟར་ཤར༔ རྒྱུད་ལུང་མན་ངག་ཡང་བཅུད་སྙིང་གི་ཁྲག༔ ལས་འཕྲོ་ཅན་གྱི་དཔལ་དུ་འགྱུར་བར་ངེས༔ ས་མ་ཡཱ༔ ཨེ་མ་བདག་འདྲ་མཚོ་སྐྱེས་རྡོ་རྗེ་ངས༔ དུར་ཁྲོད་ཆེན་པོ་བསིལ་ཚལ་འཇིགས་པའི་གནས༔ སྟོན་མཆོག་རྡོར་སེམས་དགའ་རབ་ཤྲཱི་སེང་གིས༔ དགོངས་པས་བྱིན་དབབ་ལུང་བསྟན་མཛད་པ་བཞིན༔ སྡེ་གསུམ་ཀློང་དགུའི་ཡང་བཅུད་རྫོགས་པ་ཆེ༔ མན་ངག་ཨ་ཏིའི་སྙིང་ཐིག་འདི་ལྟར་རྙེད༔ རྒྱ་གར་ཡུལ་གྱི་མཁས་པ་དག་ལ་ཕུལ༔ སྨོན་ལམ་དབང་གིས་བོད་ཀྱི་ཡུལ་དུ་ཐོན༔ མངའ་བདག་ལ་སོགས་རྗེ་འབངས་ཉེར་ལྔ་ལ༔ བསམ་ཡས་མི་འགྱུར་ལྷུན་གྲུབ་རབ་གནས་འཐོར༔ དེ་དུས་དགའ་སྟོན་ཚུལ་དུ་གདམས་པའི་གནད༔ འདི་ཉིད་ཉམས་ལེན་སྐལ་བ་ལྡན་ལ་བྱིན༔ བཀའ་རྒྱས་བཏབ་སྟེ་གྲོགས་མཆོག་མཚོ་རྒྱལ་དང༔ ཁྱད་པར་ཨ་ཙར་ཡེ་ཤེས་དབྱངས་ལ་གཏད༔ ད་ལྟ་མ་སྤེལ་སྙིང་གི་དཀྱིལ་དུ་སྦོས༔ མ་འོངས་ལྔ་བདོ་སུམ་ཅུ་ཁ་རལ་ལ༔ ཉེ་བའི་དུས་སུ་མཁའ་འགྲོའི་ཡང་སྤྲུལ་དང༔ ཁྱོད་ཀྱི་ཐུགས་སྤྲུལ་རྒྱལ་མོ་རོང་གི་ཆར༔ བྱང་སེམས་རིག་འཛིན་འགྲོ་ལ་ཕན་པ་འབྱུང༔ པདྨ་ཡབ་ཡུམ་དངོས་ཉམས་མཐོང་བའི་བུ༔ དགུ་བདུན་གསུམ་ལྔའི་འཕྲང་ལ་བརྒལ་ནུས་ན༔ ཟབ་མོའི་གཏེར་འདིས་ཕན་པ་རྒྱ་ཆེན་འབྱུང༔ ཆོས་ཀྱི་བདག་པོ་བསྟན་འཛིན་སྐྱེས་བུ་ནི༔ རྩ་བ་བརྒྱད་དང་ཡན་ལག་བཅུ་དྲུག་དང༔ ལུང་ཟིན་སྐལ་ལྡན་ཉི་ཤུ་རྩ་ལྔ་འབྱུང༔ ལྷ་བདུད་མ་ནོར་ཉམས་དང་རྨི་ལམ་ལ༔ མཁའ་འགྲོའི་ལུང་གིས་བསྔགས་པ་མ་གཏོགས་པར༔ ཁ་དཀར་ཁོང་གནག་མཁས་རློམ་དམ་སྲིའི་རིགས༔ དེ་ལ་རླུང་ཕྱོགས་ཙམ་ཡང་བསྒྲགས་མི་རུང༔ གཅིག་བརྒྱུད་མ་གཏོགས་ཁྲོམ་ཆོས་བཤད་མི་ཉན༔ བཀའ་ལས་འདས་ན་མཁའ་འགྲོའི་བཀའ་ཆད་འབྱུང༔ དེ་ཕྱིར་དམ་པའི་ལུང་ཟིན་དངོས་ལ་གཏོད༔ ཐབས་མཁས་འཚོ་ཤེས་གྱིས་ཤིག་ཛྙཱ་དྭཱི་པ༔ བཀའ་ཡི་སྲུང་མ་མ་གཟའ་དམ་གསུམ་སྲུངས༔ བཀའ་རྐུན་ལོག་རྟོག་འཆང་བའི་དབང་པོ་སྣུབས༔ དམ་ལྡན་སློབ་བུ་ཆོས་བརྒྱུད་འཛིན་པ་སྲུངས༔ གཏེར་འདི་འཚོས་ཤིག་སྤེལ་ཅིག་ས་མ་ཡཱ༔ ཞེས་པ་འདི་ཡང་རིང་མོ་ནས་དགོངས་པའི་ཀློང་དུ་བབས་པ་ཡོད་ཀྱང༔ ཅི་མི་སྙམ་པའི་ངང་དུ་ཕྱི་བཤོལ་དུ་ལུས་པ་ལ༔ ཉིན་གཅིག་ཚེས་བཅུའི་དུས་སུ་ཨ་ཙར་རྒན་པོ་ཞིག་ཐོན་ནས་ངས་ཁྱོད་ལ་བཱི་མའི་སྙིང་ཐིག་གི་བགོ་སྐལ་གཏད་པ་བདུད་ཀྱི་དབང་དུ་འཇོག་པ་ཅིའི་ཕྱིར༔ མཁའ་འགྲོ་ཆོས་སྐྱོང་གི་བཀའ་ཆད་འོང་ངེས་གཟོབས་ཟེར་བའི་ཉམས་ཤར་བྱུང༔ ཁྱེད་སུ་ལགས་ཞུས་པས་ང་རྩ་བའི་བླ་མ་ཡིན་པས་ཁྱོད་ཅི་ཟེར༔ ངའི་སྙིང་ཐིག་ཟབ་མོ་འདི་སྐལ་བར་ལྡན་པའི་ཆོས་ཀྱི་བདག་པོ་ཡོངས་ལ་གཏོད༔ ཚེ་འདིར་གྲོལ་བའི་མན་ངག་ཁྱད་པར་ཅན་འདི་ལྔ་བདུན་ལ་རྟེན་འབྲེལ་མ་འཆུགས་པར་འཕྲོད་ན་འཇའ་ལུས་འགྲུབ་ངེས༔ དེ་ནས་མི་རབས་བདུན་ཚུན་ཆད་ལ་དོན་རྒྱ་ཆེན་འབྱུང་གསུངས་ནས་བྱ་ལམ་རྗེས་མེད་ལྟར་ཡལ་སོང༔ བདག་གིས་ང་ཡི་བླ་མས་ཡེ་ཤེས་སྒྱུ་མའི་སྐུ་ཡིས་རྗེས་སུ་བཟུང་བ་ཡིན་ནམ་སྙམ་ནས་གདུང་ཤུགས་དྲག་པོའི་སྒོ་ནས་མིག་མཆི་མ་འཁྲུགས༔ ལུས་བ་སྤུ་གཡོས༔ བློ་རྩེ་གཅིག་ནས་ཐུགས་ཡིད་བསྲེས་པ་ན་བརྗོད་མེད་ཀྱི་ཉམས་ཤར༔ ལྷ་དང་བླ་མས་ལུང་བསྟན༔ མཁའ་འགྲོ་ཆོས་སྐྱོང་དངོས་སུ་བྱོན་ནས་སྣང་བ་འདི་དག་པ་རབ་འབྱམས་སུ་ཐུན་གཅིག་ལ་གནས་འགྱུར༔ རིག་པའི་རྩལ་དབང་ཐོབ༔ དེ་ལས་ལྡང་བཞིན་ཚོགས་འཁོར་བསྐོར༔ ཉམས་དགའ་ཞིང་འཁོར་བ་ལ་སྐྱོ་བ་ཆེར་བྱུང༔ ཕྱི་ཉིན་སློབ་བུ་ལུང་རྟོགས་བསྟན་འཛིན་དང་ཁུ་བོ་སྤྲུལ་པའི་སྐུ་རིན་ཆེན་ཟུང་གིས་རྟེན་འབྲེལ་གྱི་རྫས་དུ་མ་བྱིན་ནས་བསྐུལ་བ་ལ་བརྟེན་ནས་ཁྲེགས་ཆོད་ཀྱི་ཉམས་ལེན་དགོངས་པའི་ཀློང་དུ་བབས་པ་དཔེ་ཐོག་ལ་ཕབ་ནས་གསང་རྒྱས་བཏབ༔ དེའི་རྗེས་སུ་སྐྱབས་རྗེ་དམ་པ་མདོ་མང་སྤྲུལ་པའི་སྐུ་རིན་པོ་ཆེ་དང་ངེས་ལེགས་སྤྲུལ་སྐུ༔ གསེར་བ་བླ་མ་རྟོགས་ལྡན་གུ་རུ་དར་རྒྱས་སོགས་ལུང་ཟིན་བཅུ་ཕྲག་གཅིག་གིས་རྟེན་འབྲེལ་གྱི་རྫས་ཅུང་ཟད་རེ་ཕུལ་ནས་ཐོད་རྒལ་གྱི་རིམ་པ་དང་བཅས་པ་དབྱི་མཁར་ཐེག་ཆེན་ཆོས་གྲྭ་ནས་རྩ་རླུང་གཏུམ་མོའི་འཕྲུལ་འཁོར་སྦྱངས་པའི་སྐབས་སུ་ཉམས་སྣང་ངོ་མཚར་བ་ཞིག་བྱུང་བ་ལ་བརྟེན་ནས་དགོང་ཐུན་གཉིས་ལ་ཐོལ་བྱུང་ཐོགས་མེད་དུ་བྲིས་པ་དུས་གསུམ་དུ་དགེ་ཞིང་ཡོངས་ལ་བཀྲ་ཤིས་པར་གྱུར་ཅིག་གུ༔