རྒྱ་གླིང་།
བོད་ཀྱི་ཆོས་སྤྱོད་རྒྱ་གླིང་འདི། ལ་དྭགས་རྒྱལ་རབས་ལས། བཙན་པོ་འདུས་སྲོང་མང་བོ་རྗེའི་སྐུ་དུས་སུ། ཇ་དང་རྒྱ་གླིང་བྱུང་བར་འཁོད་ཡོད། དབྱིབས་ནི་ཁ་ཆེ་ཞིང་གཡེལ་ལ། མདའ་ཁྲི། རྐེད། ཕུ་སྟེགས། པི་ཟངས། འདམ་བུ་བཅས་ཆ་ཤས་དྲུག་ལས་གྲུབ་པའོ། །མདུན་དུ་འཐེབ་མིག་བདུན་དང་། ལྟག་པར་མཐེབ་མིག་གཅིག་གོ། རྒྱ་གླིང་འདི་དགོན་སྡེའི་རོལ་མོའི་ཁྲོད་དྲག་ཤོས་ཡིན་ཞིང་། བེད་སྤྱོད་ཀྱི་བྱེད་སྒོ་ཡང་། སེར་སྦྲེང། གར་འཆམ། བླ་མ་ཕེབས་བསུ། སྙན་གསན་འབེབས་པ་སོགས་ནང་བསྟན་གྱི་གྲུབ་མཐའ་རིས་མེད་ཀྱིས་འབུད་སྲོལ་ཡོད། རྒྱ་གླིང་གཏོང་བ་ཡང་། གྲུབ་མཐའ་སོ་སོ་དང་། དགོན་སྡེ་སོ་སོ་ལ་ཕྱག་བཞེས་སྣ་ཚོགས་ཡོད་ཀྱང་། དགེ་ལུགས་པའི་ཆོས་སྡེ་ཞིག་ལ་ཆ་བཞག་ནས་བཤད་ན། ལྷ་མོ་རྒྱས་བསྡུས། རྩ་འཆམ་སིལ་ཆ། ཧོར་གླུ། རྣམ་སྲས། མཛུབ་མོ་བཞི་བ། མགོན་པོ། ཆོས་རྒྱལ། སྒྲ་དབྱངས་མཚོ་འཁོར། ཀ་ལ་པིང་ཀ ཚེ་སྨོན་གླིང་། བཀྲ་ཤིས་ལྷ་མོ། བསྟན་སྐྱོང་མ། ཚལ་བ། མེ་ཏོག་ཆར་འབེབས། གྲུ་འཛིན་ཕོ་བྲང་། བཙུན་མོའི་དབྱངས། བདེ་ཆེན་གླིང་བུ་འམ་ཤན་པའི་ངར་གླུ། སྤྱན་འདྲེན་ལྔ་བཀག ཆོས་འཁོར་རྫ་རི་སོགས་སོ་གཉིས་ཡོད་པ་དང་། རྙིང་མར་མཚོན་ན། རྒྱལ་སྲས་བསྟན་པའི་ཉི་མ་ལ་ཌཱ་ཀིས་བསྩལ་བའི་ལྷ་མོ་ཆེ་ཆུང་། ཁྲ་ཆེན་ཁྲ་ཆུང་། རྒྱ་འབུད། བོད་འབུད། བླ་མ་རྒྱང་འབོད་སོགས་དང་། བསམ་ཡས་དགོན་པར་མཚོན་ན། རྒྱལ་བོ་སྤྱན་འདྲེན། གཡུ་སྒྲོན་སྤྱན་འདྲེན། བཀྲ་ཤིས་མཚོ་མོ། ཨོ་རྒྱན་མཚོ་མོ། ཕེབས་གླུ། ཁམས་གླུ། མེ་ཏོག་ཆར་འབེབས། གར་བ། སྨོན་ལམ་གྱི་གླུ་སོགས་དང་། འབྲུག་པ་བཀའ་བརྒྱུད་པའི་གདན་ས་སྡིངས་བོ་ཆེ་མཚོན་ན། ས་ཟླ་སྤྱན་འདྲེན། གྲུ་འཛིན་ཕོ་བྲང་། འབྲུག་གླུ་ཀུན་བཟང་ཆོས་སྒྲོལ། བྱང་གླུ། བསྟན་འཕེལ་དྲུག་བཀག སྟོད་གྲོང་། སྦྲང་ཚང་འཁོར། ཀརྨ་པ། བསམ་ཡས་ལྕོག་གསོལ། ངང་འཁྱིལ་མ། མགོན་སྐྱབས་མེ་ཏོག་མཆོད་པ། སུར་ཎ། བདུན་བདུན། ཚོང་འདུས་གྲྭ་ཚང་། བཀྲ་ཤིས་ཐུགས་སྨོན། མཐོང་སྨོན་གྲྭ་ཚང་། གཉན་སྦྱོར། མེ་ཏོག་ཆུ་ལེན་སོགས་བརྒྱད་ཅུ་ཡོད་དོ། །