ལེའུ་དྲུག་པ། སྔོན་འགྲོ་ཁྲིད་ཆེན་བཅུ།

སྔོན་འགྲོ་སྤྱིར་བཤད་པ།

ས་དགེ་ཀར་རྙིང་ཀུན་གྱི་ཆོས་པ་ཚོས་སྔོན་འགྲོ་གཏོང་བ་ཞེས་པ་ནི། དོན་སྙིང་གནད་དུ་འབབ་ས་གང་ཡིན་ཞེ་ན། ལུང་རྟོགས་ཀྱི་ལྷ་ཆོས་རྣལ་མ་ཞིག་རང་རྒྱུད་ལ་འབྱོར་བ་ལ། སྔོན་དུ་མཐུན་རྐྱེན་ཚོགས་བསགས་པ་དང་། འགལ་རྐྱེན་སྒྲིབ་པ་སྦྱངས་ཏེ། རྟོགས་པ་ཡ་ཚད་པ་ཞིག་སེམས་རྒྱུད་དུ་སྐྱེས་རུང་རུང་བྱ་བ་ཡིན། དཔེར་ན། ཞིང་ས་ལྟ་བུར་མཚོན་ན་ལོ་ཏོག་སྐྱེ་བ་ལ། མཐུན་རྐྱེན་ཆུ་ལུད་དྲོད་གཤེར་དང་། འགལ་རྐྱེན་ལྡུམ་ཡུག་རྡོ་གསེག་སོགས་བསལ་ཏེ། ས་བོན་ཅི་བཏབ་སྐྱེ་རུང་བའི་ཞིང་ས་གཤིན་པོར་བཟོས་པ་དང་གཅིག་མཚུངས་ཡིན། ཡང་དཔེ་གཞན་ཞིག་གི་སྟེང་ནས་བཤད་ན། མཁར་རྫོང་བརྟན་པོ་ཞིག་བཟོ་བ་ལ། རྨང་བརྟན་པོ་འདིང་བ་དང་འདྲ། རྨང་གཞི་བརྟན་པོ་ཞིག་མེད་ན་འཁྱག་ཐོག་ཏུ་མཁར་བརྩིགས་པ་ལྟར། དཔྱིད་ཀར་དྲོད་བབས་ཚེ་ཆུ་ནང་དུ་ནུབ་སྟེ་འགྲོ་བ་བཞིན། རྟོགས་པ་ཞིག་སྐྱེས་ལོ་བྱས་ཀྱང་རྐྱེན་དང་འཕྲད་ཚེ་གར་སོང་ཆ་མེད་དུ་འགྲོ་བ་ཡིན། དེ་བས་སྔོན་བྱོན་དམ་པ་རྣམས་ཀྱིས་ཆོས་ཀྱི་གནད་འདི་མཁྱེན་ནས། ཉིན་ལས་ཉིན་ཐུང་བ་དང་མཚན་ལས་མཚན་ཐུང་བའི་སྔོན་འགྲོ་ལ་འབད་པའི་རྣམ་ཐར་འདི་བྱུང་བ་ཡིན། དེས་ན་སྔོན་འགྲོ་གཏོང་ཚུལ་ལ་གྲུབ་མཐའ་ཁག་གིས་གྲངས་དང་གཏོང་ཚུལ་གྱི་ཕྱག་ལེན་མང་ནའང་། འདིར་དགེ་ལུགས་པའི་སྔོན་འགྲོ་ཁྲིད་ཆེན་བཞི་ཞེས་གྲགས་པ་ནི། གུང་ཐང་བསྟན་པའི་སྒྲོན་མེས། བླ་མ་གོང་མ་རྣམས་གདམས་པ་ཟབ་མོ་ཕལ་ཆེར་ཉམས་སུ་ལེན་པའི་སྔོན་འགྲོ་ལ། ༡ བསྟན་པ་སྤྱིའི་འཇུག་སྒོ་སྐྱབས་འགྲོ་དང་། ཐེག་ཆེན་ལམ་གྱི་འཇུག་སྒོ་སེམས་བསྐྱེད་ཕྱོགས་གཅིག་ཏུ་བསྡོམས་པ་སྐྱབས་འགྲོ་སེམས་བསྐྱེད་ཀྱི་ཁྲིད། ༢ སྡིག་པ་སྦྱོང་བ་རྡོར་སེམས་སྒོམ་བཟླས་ཀྱི་ཁྲིད། ༣ ཚོགས་གསོག་པ་མཎྜལ་གྱི་ཁྲིད། ༤ བྱིན་རླབས་འཇུག་པ་བླ་མའི་རྣལ་འབྱོར་གྱི་ཁྲིད་བཞི་ལ་སྔོན་འགྲོ་ཁྲིད་ཆེན་བཞི་འམ། སྔོན་འགྲོ་འབྲེལ་བ་ཅན་བཞིར་གྲགས་ཞེས་གསུངས་པའི་སྟེང་། ༥ དམ་ཚིག་རྡོ་རྗེ་བཟླས་པ། ༦ ཟ་བྱེད་མཁའ་འགྲོའི་སྦྱིན་སྲེག ༧ མཆོད་པ་ཕུལ་བ། ༨ བསྐོར་བ་བྱེད་པ། ༩ ཕྱག་འཚལ་བ། ༡༠ སཙྪ་འདེབས་པ་སོགས་བསྣན་ན་སྔོན་འགྲོ་ཁྲིད་ཆེན་བཅུ་ཞེས་གྲངས་བཅད་ཡོད་དོ། །རང་རང་གི་འཇོན་ནུས་དང་བསྟུན་ཏེ་སྔོན་འགྲོ་ཁྲིད་ཆེན་བཞི་འམ་བཅུ་བསྒྲུབས་ན། དལ་འབྱོར་དོན་ལྡན་དུ་འགྱུར་ལ། ཁྱད་པར་དུ་འཇིགས་བྱེད་བསྙེན་ཆེན་སོགས་བཞུགས་པའི་སྔོན་འགྲོ་སོགས་ལ། ཁྲིད་ཆེན་བཅུ་བོ་ངེས་པར་དུ་བསྒྲུབ་དགོས་སོ། །

སྐྱབས་སེམས་དཀྱུས་གཅིག་ཏུ་བཤད་པ།

བསྟན་པའི་འཇུག་སྒོ་སྐྱབས་འགྲོ།

༡ སྐྱབས་འགྲོའི་རྒྱུ། ༡ དེ་ཡང་བསྟན་པའི་འཇུག་སྒོ་སྐྱབས་འགྲོ་ཡིན་ལ། ཐོག་མར་སྐྱབས་འགྲོའི་རྒྱུ་ནི་འཇིགས་དད་གཉིས་ཡིན་པས། འཇིགས་པ་མ་ཡོང་ན་སྒྲོལ་མ་མི་དྲན་ཟེར་བ་ལྟར། རང་ཉིད་བྱེས་སུ་འགྲོ་བའི་ལམ་འགག་ཅིག་ལ་བགྲོད་པའི་ཚེ། ལམ་བར་ཞིག་ན་མི་ཤ་ཡོད་པའི་ལག་དམར་ཞིག་གིས་སྒུག་འདུག་པ་གོ་ན། ཤེས་པ་འཚུབ་ལང་ངེ་། ཡིད་སེམས་འཇིགས་ཡེར་རེ་སོང་ནས། སྐྱེལ་མ་དཔའ་བོ་ཞིག་ལ་བློ་སྙིང་ལིངས་ཀྱིས་གཏད་དེ། ངའི་ལེགས་ཉེས་སྐྱིད་སྡུག་ཁྱེད་མཁྱེན་ཟེར་ནས་བགྲོད་པ་བཞིན། རང་ཉིད་ཤི་ན་གསོན་ན། སྐྱིད་ན་སྡུག་ན། ལེགས་ན་ཉེས་ན། མཐོ་ན་དམའ་ན། འཁོར་བ་དང་ངན་སོང་གི་འཇིགས་པ་ཐམས་ཅད་ལས་སྒྲོལ་བ་ལ་བླ་མ་དཀོན་མཆོག་ཁྱེད་མཁྱེན་སྙམ་ནས་བློ་སྙིང་ཆུས་བཤལ་འདྲ་ཞིག་བྱས་ཏེ། བྱིས་པ་བསམ་མ་ཤེས་པ་ཞིག་གིས་རང་གི་མ་ལ་བློ་རྩེ་གཏོད་པ་ལས་བརྒྱ་འགྱུར་གྱིས་བློ་སྙིང་བྲང་གསུམ་གཏོད་པ་ཞིག་དགོས་སོ། །

དད་པ་ཡང་། མདོར་ན་སྙིང་ཁོང་རུས་པའི་གཏིང་ནས་གནས་སྐབས་དང་མཐར་ཐུག་གི་སྐྱིད་སྡུག་ལེགས་ཉེས་ཐམས་ཅད། སྐྱིད་ན་སྡུག་ན། ཤི་ན་གསོན་ན་བསླུ་མེད་དཀོན་མཆོག་ཁྱེད་རྣམ་པ་མཁྱེན་སྙམ་སྟེ་བློ་སྙིང་བྲང་གསུམ་གཏོད་ཐུབ་པ་ལ་ཟེར།

༢ སྐྱབས་ཡུལ་ངོས་བཟུང་བ། འོ་ན། སྐྱབས་ཡུལ་གང་ཡིན་ཞེ་ན། སྐྱབས་འགྲོ་བདུན་ཅུ་བ་ལས། སངས་རྒྱས་ཆོས་དང་དགེ་འདུན་ནི། །ཐར་བ་འདོད་པ་རྣམས་ཀྱི་སྐྱབས། །ཞེས་པ་ལྟར། རང་ཅག་གིས་སྐྱབས་ཡུལ་དཀོན་མཆོག་རིན་པོ་ཆེ་རྣམ་གསུམ་ལ་བློ་གཏོད་པ་ལས། ཚངས་པ་དང་བརྒྱ་བྱིན། ཡུལ་ལྷ་གཞི་བདག་སོགས་སྐྱབས་སུ་བསྟེན་ན། འདམ་ནང་དུ་ལྷུང་བའི་མིས་འདམ་ནང་གི་མི་ལ་སྐྱོབ་པར་རེ་བ་བཅའ་བ་དང་མཚུངས།

འོ་ན་དཀོན་མཆོག་གསུམ་གྱིས་ང་ཚོ་ཇི་ལྟར་སྐྱོབ་པ་ཡིན་ཞེ་ན། སྟོན་པ་སངས་རྒྱས་ཀྱིས་ཆོས་སྒྲུབ་པའི་ཐབས་ལམ་སྟོན་པ་དང་། རང་ཅག་གིས་ཐབས་ལམ་དེ་ཉམས་སུ་བླངས་པས་སྐྱོབ་པ་ཡིན། དེ་ཉམས་སུ་ལེན་པ་ལ་དགེ་འདུན་གྱིས་གྲོགས་བྱེད་པ་ཡིན་པས། སངས་རྒྱས་སྐྱབས་སྟོན་པ་པོ། ཆོས་སྐྱབས་དངོས། དགེ་འདུན་སྐྱབས་སྒྲུབ་པའི་ཟླ་གྲོགས་ཟེར་རོ། །ཡང་དཔེར་ན། སངས་རྒྱས་སྨན་པ་དང་། ཆོས་སྨན། དགེ་འདུན་ནད་གཡོག་ལྟ་བུ་སྟེ། ནད་པས་དེ་གསུམ་ལ་རེ་བ་བཅོལ་ལུགས་མི་འདྲ་བ་གསུམ་འབྱུང་བ་ལྟར་རོ། །

༣ སྐྱབས་འགྲོ་སྒོམ་པའི་དམིགས་རིམ། སྐྱབས་འགྲོ་ཇི་ལྟར་ལག་ཏུ་བསྟར་ཚུལ་ནི། གནས་ཁང་བྱི་དོར་གཙང་སང་ངེ་བ་ཞིག་བྱས་ཏེ། ཆག་ཆག་ལེགས་པར་བཏབ། བདུག་སྤོས་བསུང་ཆིལ་ལེ་ཞིག་སྒྲོན་ཏེ། སྟེགས་བཟང་བོ་ལ་སྐུའི་རྟེན་སྐྱབས་འགྲོའི་ཚོགས་ཞིང་ཞིག་ཡོད་ན་རབ། མེད་ཀྱང་སངས་རྒྱས་བྱང་སེམས་ཀྱི་སྐུ་བརྙན་བྲིས་འབུར་ཅི་རིགས་དང་། གསུང་གི་རྟེན་ལ་ལམ་སྔགས། ཐུགས་ཀྱི་རྟེན་ལ་བྱང་ཆུབ་མཆོད་རྟེན་སོགས་གང་འཛོམས་བཞུགས་སུ་གསོལ། ཅི་འབྱོར་བའི་མཆོད་པ་གཡོ་མེད་ཅིང་བཀོད་པ་མཛེས་པར་བཤམས། བདེ་བའི་སྟན་ལ་སྤྱོད་ལམ་ཚུལ་མཐུན་གྱིས་འཁོད་དེ། རང་རྒྱུད་ལ་བརྟག་ནས། ག་རེ་བདག་ངན་སོང་ལས་འཁྱམས་འཁྱམས་ནས། ད་རེབ་ཙམ་ལ་རྙེད་དཀའ་ཞིང་དོན་ཆེ་བའི་མི་ལུས་རིན་པོ་ཆེ་ཞིག་འཐོབ་ཀྱང་། དོན་ལྡན་གྱི་སྙིང་བོ་ཅི་བླངས། ནམ་ཞིག་འཆི་བ་མི་རྟག་པ་བསམ་དབང་དྲན་དབང་མེད་པར་གནམ་ལྕགས་ཀྱི་ཐོག་བཞིན་ལྟར་རང་སྟེང་དུ་བབས་ན། དགེ་བ་བསགས་པ་མང་ངམ། སྡིག་པ་བསགས་པ་མང་། ཞེས་རང་གིས་རང་ལ་ཕྲ་མ་རྒྱོབ། རང་ལྟ་བུ་ལ་བསམ་ན་དགེ་བ་ནི་ཡུངས་དཀར་ལས་ཀྱང་ཉམ་ཆུང་། མི་དགེ་བ་ནི་རི་རབ་ལས་ཀྱང་དཔངས་མཐོ། དེས་ན་དབུགས་རྟ་རྔ་འདྲ་བོ་འདི་ཆད་དེ་ངན་སོང་ལས་སྐྱེས་ཚེ། དམྱལ་བར་ཚ་གྲང་། ཡི་དྭགས་བཀྲེས་སྐོམ། དུད་འགྲོར་བླུན་ཞིང་བཀོལ་སྤྱོད་སོགས་སྡུག་བསྔལ་བཟོད་གླགས་མེད་པ་མྱོང་དགོས་པར་མ་ཟད། ད་དུང་ལས་ངན་མ་ཟད་བར་དུ་ཐར་བའི་རེ་བ་མེད་པས། ཧོན་འཐོར་བ་ལྟ་བུ་འཇིགས་སྐྲག་ཅི་སྐྱེས་བྱ། དེས་ན་དེ་ལས་སྐྱབས་དང་སྐྱོབ་པ་དཔུང་གཉེན་མཐར་ཐུག་པ་ནི། དཀོན་མཆོག་རིན་པོ་ཆེ་རྣམ་པ་གསུམ་ཁོ་ན་ཡིན་པས། ད་ལྟ་ཉིད་ནས་བློ་སྙིང་བྲང་གསུམ་དཀོན་མཆོག་ལ་གཏད་དེ་སྐྱབས་འགྲོ་རྣལ་མ་ཞིག་བྱ་སྙམ་ནས།

རང་གི་གཡས་སུ་ཕ། གཡོན་དུ་མ། མདུན་དུ་དགྲ་དང་བགེགས། རྒྱབ་ཏུ་གཉེན། མཐའ་འཁོར་དུ་རིགས་དྲུག་གི་འགྲོ་བ་རྣམས་ཀྱིས་བསྐོར་བ། དེ་དག་ཐམས་ཅད་ཀྱང་ཚེ་རབས་སྔོན་མ་རྣམས་སུ་རང་གི་མར་གྱུར་ཚེ། ད་ལྟའི་མ་བཞིན་དྲིན་མོ་ཆེ་ཤ་སྟག་ཡིན་ཚུལ་བསམ་ནས་སྙིང་རྗེ་དུངས་དུངས་པ་ཞིག་སྐྱེས་ཏེ། འདི་དག་ཐམས་ཅད་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་འཐོབ་འདོད་ཀྱི་དགེ་སེམས་ཁྱད་པར་ཅན་གྱིས་ཀུན་ནས་བསླངས་ཏེ། སྐྱབས་འགྲོའི་ཚོགས་ཞིང་གསལ་གདབ་པ་ནི།

རང་གི་སྨིན་མཚམས་ཀྱི་དྲང་ཐད་དུ་སེང་ཆེན་བརྒྱད་ཀྱིས་བཏེགས་པའི་ཁྲི་སྟེང་དུ་པད་ཟླ་ཉི་མའི་དཀྱིལ་འཁོར་གྱི་གདན་ལ་ངོ་བོ་རང་གི་རྩ་བའི་བླ་མ་ཡིན་པ་ལ། རྣམ་པ་རྒྱལ་བ་ཤཱཀྱ་ཐུབ་པ་ཡིན་པར་གསལ་བཏབ། དེའི་ཐུགས་ཀར་རྒྱལ་བ་རྡོ་རྗེ་འཆང་། དེའི་ཐུགས་ཀར་ཧཱུཾ་ཡིག་སྔོན་པོ་འོད་ཟེར་འཕྲོ་བ། སྟོན་པའི་རྒྱབ་ངོས་ཀྱི་སྟེང་དུ་སེང་ཁྲི་པད་ཟླ་ཉི་མའི་གདན་ལ་རྒྱལ་བ་རྡོ་རྗེ་འཆང་ལ་ཉམས་ལེན་བྱིན་རླབས་བརྒྱུད་པའི་བླ་མ་རྣམས་ཀྱིས་བསྐོར་བ། གཡས་སུ་རྗེ་བཙུན་བྱམས་པ་མགོན་པོ་ལ་རྒྱ་ཆེན་སྤྱོད་བརྒྱུད་ཀྱི་བླ་མ་རྣམས་ཀྱིས་བསྐོར་བ། གཡོན་དུ་རྗེ་བཙུན་འཇམ་དབྱངས་ལ་ཟབ་མོ་ལྟ་བརྒྱུད་ཀྱི་བླ་མ་རྣམས་ཀྱིས་བསྐོར་བ། མདུན་དུ་ཆོས་འབྲེལ་ཅན་གྱི་བླ་མ་རྣམས་ཀྱིས་བསྐོར་བ། དེ་དག་གི་མཐའ་འཁོར་དུ་ཡི་དམ་སངས་རྒྱས་བྱང་སེམས་དཔའ་བོ་མཁའ་འགྲོ་དཔའ་མོ་ཉན་རང་ཆོས་སྐྱོང་སོགས་ཀྱིས་བསྐོར་བ། དེ་སོ་སོའི་མདུན་ན་སྟེགས་མཐོན་པོ་ལ་རང་རང་གིས་གསུངས་པའི་འོད་ཀྱི་རང་བཞིན་ཅན་གྱི་པོ་ཏིའི་རང་སྒྲ་ལྷང་ལྷང་སྒྲོགས་པ། དེ་དག་གི་ཕྱི་ལོགས་སུ་ཁོར་ཡུག་མཛེས་ཤིང་སྡུག་པ་མཁོ་རྒུ་མ་ཚང་བ་མེད་པ། ཐམས་ཅད་ཀྱང་རང་ལ་དགྱེས་པའི་ཉམས་ཅན་དུ་བསམ་མོ། །

དེ་ནས་རང་དབུ་མཛད་ཀྱི་ཚུལ་དུ་སེམས་ཅན་ཐམས་ཅད་ཀྱི་མགྲིན་གཅིག་དབྱངས་གཅིག་གིས་སྐྱབས་འགྲོ་བཞི་སྐོར་འདོན་པར་བྱ་སྟེ། ཡབ་རྗེ་བླ་མའི་སྐྱབས་ཁྲིད་ལས། བདག་གི་དྲིན་ཅན་ཕ་མའི་ཐོག་དྲངས་ནས་ནམ་མཁའ་དང་མཉམ་པའི་སེམས་ཅན་ཐམས་ཅད་དུས་ད་ནས་བཟུང་སྟེ་བྱང་ཆུབ་སྙིང་བོ་ལ་མཆིས་ཀྱི་བར་དུ་བླ་མ་ལ་སྐྱབས་སུ་མཆིའོ། །སངས་རྒྱས་ལ་སྐྱབས་སུ་མཆིའོ། །ཆོས་ལ་སྐྱབས་སུ་མཆིའོ། །དགེ་འདུན་ལ་སྐྱབས་སུ་མཆིའོ། །ཞེས་བརྒྱ་སྟོང་ཁྲི་འབུམ་བརྗོད། དམིགས་པ་ནི། སྐྱབས་ཡུལ་རྣམས་ལས་བདུད་རྩི་འོད་ཟེར་དང་བཅས་པ་བྱུང་ནས། རང་དང་སེམས་ཅན་ལ་ཐིམ། ཚེ་དང་བསོད་ནམས་ལུང་རྟོགས་ཀྱི་ཡོན་ཏན་སོགས་འཕེལ་ཞིང་རྒྱས། བླ་མ་མཆོག་གསུམ་གྱི་བྱིན་རླབས་ཞུགས། བདག་དང་མ་སེམས་ཅན་ཐམས་ཅད་འཁོར་བ་དང་ངན་སོང་གསུམ་གྱི་སྡུག་བསྔལ་ཐམས་ཅད་ལས་བསྐྱབས་བྱུང་སྙམ་པའི་མོས་པར་བྱའོ། །གསུངས་པ་ལྟར་རོ། །

ཐུན་བསྡུ་བའི་ཚེ། བླ་མ་ཐུབ་དབང་གི་ཐུགས་ཀ་ནས་འོད་ཟེར་འཕྲོས་པ་ཚོགས་ཞིང་རྣམས་ལ་ཕོག་པས། ཐམས་ཅད་འོད་དུ་ཞུ་ནས་ཐུབ་དབང་ལ་ཐིམ། ཐུབ་དབང་རང་གི་སྨིན་མཚམས་སུ་ཐིམ་པས་རང་རྒྱུད་བྱིན་གྱིས་བརླབས་པའི་མོས་པ་བྱའོ། །མཇུག་ཏུ་དགེ་བ་རྣམས་འདུན་པ་དྲག་པོས་བསྔོ་བར་བྱའོ། །

༤ བསླབ་པར་བྱ་བའི་རིམ་པ། བདག་ཉིད་དེ་རིང་ནས་དཀོན་མཆོག་གསུམ་གྱི་སྐྱབས་འོག་ཏུ་འཛུལ་ཟེར་བ་ཙམ་གྱིས་མི་ཆོག་པར། སྐྱབས་འགྲོའི་བསླབ་བྱ་བསྲུང་དགོས། མ་བསྲུང་ན། ཁ་སྟོང་ནང་གི་ཚིག་སྟོང་དང་། ཕྱག་སྟོང་ནང་གི་ཕྱག་རྒྱ་ལས་མ་འདས་པས། ཕན་ཡོན་ཕར་ཞོག ནང་བ་སངས་རྒྱས་པའི་གྲས་སུའང་མི་ཆུད་པས། སྐྱབས་འགྲོའི་བསླབ་བྱ་བརྗོད་པ་ལ། འདིར་ནང་ཚན་དགར་རྒྱུ་མང་ཡང་། ལས་དང་བོ་བར་རྟོགས་སླ་བའི་ཆེད་དུ་སྐྱབས་འགྲོའི་བསླབ་བྱ་ཉི་ཤུ་དཀྱུས་གཅིག་ཏུ་བཀོད་ན།

༡ དགེ་བའི་བཤེས་གཉེན་ལ་བརྟེན་པ། ༢ དམ་པའི་ཆོས་ལ་ཉན་པ། ༣ ཚུལ་བཞིན་ཡིད་ལ་བྱེད་པ། ༤ ཆོས་མཐུན་སྒྲུབ་པ་སྟེ་དགེ་འདུན་ལ་ཆོས་སྒྲུབ་པའི་ཟླ་གྲོགས་སུ་འཛིན་པ། ༥ མིག་རྣ་སོགས་དབང་བོ་ལྔ་བོ་ཉོན་མོངས་ལ་མི་ཕྱོགས་པར་ཞི་ཞིང་དུལ་བ། ༦ རང་གི་རྒྱུད་ཚོད་དང་བསྟུན་ཏེ་བསླབ་སྡོམ་ལེན་པ། ༧ སེམས་ཅན་གྲོག་སྦུར་ཚུན་ཆད་མི་བསོད་པར་སེམས་ཅན་ལ་སྙིང་བརྩེ་བ། ༨ རང་མཁོས་དང་བསྟུན་ནས་དཀོན་མཆོག་མཆོད་པ་ལ་བརྩོན་པ། ༩ སངས་རྒྱས་ལ་སྐྱབས་སུ་སོང་ནས་འཇིག་རྟེན་ཀྱི་ལྷ་འདྲེ་སོགས་ལ་སྐྱབས་མི་བཅོལ་བ། ༡༠ ཆོས་ལ་སྐྱབས་སུ་སོང་ནས་སེམས་ཅན་གཞན་ལ་གནོད་འཚེ་མི་བྱེདཔ། ༡༡ དགེ་འདུན་ལ་སྐྱབས་སུ་སོང་ནས་ཆོས་ལུགས་དང་ལྟ་བ་མི་མཐུན་པ་ལ་བློ་གཏད་མི་བྱ་བ། ༡༢ སངས་རྒྱས་ལ་སྐྱབས་སུ་སོང་ནས་སངས་རྒྱས་ཀྱི་སྐུ་གཟུགས་རྒྱུ་ཆ་ངན་པ་ས་འདམ་ལས་བྱས་པ་དང་། བཟོ་དབྱིབས་ངན་པ། ཞིག་རལ་ཏུ་གྱུར་བའི་སྐུ་གཟུགས་ཚུན་ཆད་ལ་སངས་རྒྱས་ཀྱི་འདུ་ཤེས་འཛིན་པ། ༡༣ ཆོས་ལ་སྐྱབས་སུ་སོང་བས་ཆོས་ཀྱི་ནང་དོན་ལྡན་པའི་ཡིག་འབྲུ་གཅིག་ཚུན་ཆད་ལའང་ཆོས་དཀོན་མཆོག་གི་འདུ་ཤེས་འཇོག་པ། ༡༤ དགེ་འདུན་ལ་སྐྱབས་སུ་སོང་བས་དགེ་འདུན་གྱི་རྟགས་ཙམ་འཛིན་པ་ཚུན་ཆད་ལ་མ་གུས་པ་སྤང་བ། ༡༥ མཆོག་གསུམ་གྱི་ཁྱད་པར་དང་ཡོན་ཏན་དྲན་ནས་ཡང་དང་ཡང་དུ་སྐྱབས་སུ་འགྲོ་བ། ༡༦ མཆོག་གསུམ་གྱི་བཀའ་དྲིན་དྲན་པས་རྟག་ཏུ་བཟའ་བཅའི་ཕུད་དབུལ་ཏེ་མཆོད་པ་ལ་བརྩོན་པ། ༡༧ ཐུགས་བརྩེ་བའི་སྒོ་ནས་འགྲོ་བ་གཞན་ཡང་སྐྱབས་འགྲོ་ལ་འགོད་པ། ༡༨ བྱ་ལས་གང་དང་དགོས་པ་ཅི་ཡོད་ཀྱང་དཀོན་མཆོག་ལ་མཆོད་ནས་གསོལ་བ་འདེབས་ཤིང་འཇིག་རྟེན་གྱི་ཐབས་གཞན་སྤོང་བ། ༡༩ སྔར་བཤད་པའི་སྐྱབས་འགྲོའི་ཕན་ཡོན་རྣམས་བསམས་ཏེ་ཉིན་མཚན་དུས་དྲུག་ཏུ་སྐྱབས་སུ་འགྲོ་བ། ༢༠ བཞད་གད་ཀྱི་ཕྱིར་རམ་སྲོག་གི་ཕྱིར་ཡང་དཀོན་མཆོག་གསུམ་མི་གཏང་བའོ། །རང་ཉིད་ནང་བར་ཚུད་མི་ཚུད་ནི། མཐར་གཏུགས་ན་བསླབ་བྱ་ཉི་ཤུ་བོ་འདི་རང་རྒྱུད་ན་ཡོད་མེད་ལ་ཐུག་འདུག་སྟེ། དེ་མིན། གླ་བྲག་ནང་དུ་བཞག་ནས། གླ་རྩི་རྒྱ་ནང་དུ་གཏམས་པ་དང་འདྲའོ། །

༥ སྐྱབས་སུ་སོང་བའི་ཕན་ཡོན། སྐྱབས་འགྲོའི་ཕན་ཡོན་ལ། ལམ་རིམ་ཆེན་མོར། བསྡུ་བ་ལས་བྱུང་བ་བརྒྱད་དང་། མན་ངག་ལས་འབྱུང་བ་བརྒྱད་གསུངས་ཀྱང་། འདིར་མན་ངག་ལས་འབྱུང་བ་བརྒྱད་བཤད་ན།

༡ ནང་བ་སངས་རྒྱས་པར་ཆུད་པ་ནི། སྙིང་ཁོང་རུས་པའི་གཏིང་ནས་མཆོག་གསུམ་ལ་བློ་སྙིང་གཏོད་པ་ཞིག་མ་བྱུང་ན། ཡབ་རྗེ་བླ་མས། ཁེ་རྒྱལ་ཁ་ཙམ་གྱི་དོན་ཆེད་དུ། །ཕ་བླ་མ་དཀོན་མཆོག་ཀུན་འདོར་ཡང་། །མིག་ཟིམ་ཟིམ་སྐྱབས་འགྲོ་གསོལ་འདེབས་པ། །བློས་དཔྱད་ཚེ་གད་མོ་འཆོར་བའི་རྒྱུ། །གསུངས་པ་ལྟར། རྒྱུད་ན་སྐྱབས་འགྲོ་མེད་ན། བཀའ་རབ་འབྱམས་པར་ཐོས་བསམ་གྱིས་སྒྲོ་འདོགས་བཅད་ཀྱང་རུང་། བསྐྱེད་རྫོགས་སྒོམ་ཁུལ་བྱས་ཏེ་ས་ལ་འཛུལ་ཞིང་གནམ་དུ་འཕུར་ཀྱང་རུང། ནང་བ་སངས་རྒྱས་ཀྱི་གྲས་སུ་མི་ཚུད་པས། བཀའ་གདམས་གོང་མས། གནས་བརྟན་ཞལ་མར་གཟིགས་ཅིག་འདུག་པ་ལ། ད་དུང་ནང་བ་སངས་རྒྱས་ཀྱི་གྲས་སུ་ཚུད་མེད་པའང་མང་། གསུངས་པས། དམ་ཆོས་རྣལ་མ་ཞིག་བསྒྲུབ་རྒྱུ་ཡིན་ཕྱིན། ཐོག་མར་བསྟན་པའི་འཇུག་སྒོ་སྐྱབས་འགྲོ་གནད་དུ་ཁེལ་བ་ཞིག་རང་རྒྱུད་ལས་སྐྱེས་པ་གལ་ཆེའོ། །

༢ སྡོམ་པ་ཐམས་ཅད་ཀྱི་རྟེན་དུ་གྱུར་བ་ནི། སྐྱབས་འགྲོ་བདུན་ཅུ་བ་ལས། སྡོམ་པ་ཀུན་ལ་ཡོད་མོད་ཀྱང་། །སྐྱབས་སུ་མ་སོང་བ་ལ་མེད། །ཅེས་པ་ལྟར། སོ་ཐར་དང་བྱང་སེམས། གསང་བ་སྔགས་ཀྱི་སྡོམ་པ་གང་ཡིན་ཀྱང་སྐྱབས་འགྲོའི་རྟེན་གཞི་མེད་ན། རྒྱ་མཚོ་ལ་ཁ་བ་བབས་པ་བཞིན་རྟེན་མེད་དུ་གྱུར་ནས། ཐ་ན་ཉིན་གཅིག་ལ་གསོ་སྦྱོང་ཞིག་ལེན་པའམ། ཁ་ཏོན་ཅིག་འདོན་པ། ཆོ་ག་ཞིག་གྱེར་བ་ཚུན་ཆད་ལའང་སྐྱབས་འགྲོའི་རྨང་གཞི་དགོས་སོ། །

༣ སྔར་བསགས་པའི་ལས་སྒྲིབ་བསྲབས་ཤིང་འཛད་པ་ནི། རྒྱལ་བོ་མ་སྐྱེས་དགྲས་ལྷས་བྱིན་གྱི་ཁ་ལ་ཉན་ཏེ་རང་གི་ཕ་གཟུགས་ཅན་སྙིང་བོ་བསད་པ་དང་། སྟོན་པ་དང་དགེ་འདུན་ལ་མི་འོས་པའི་ལས་ངན་ཚབས་པོ་མང་དུ་བྱས་པས། ཚེ་སྨད་ལ་འབྲུམ་བུ་མེ་དབལ་ནག་པོའི་ནད་བྱུང་ནས། ཁོ་འུ་ཐུག་ཐབས་ཟད་དེ་འཕགས་པ་འཆར་ཀ་སྤྱན་དྲངས་པས། འཆར་ཀས་རྒྱལ་བོ་ཆེན་པོ་རང་གིས་ནུས་ན་སངས་རྒྱས་ལ་ཕྱག་གསུམ་འཚལ་ཏེ་སྐྱབས་སུ་སོང་ཞིག ཅེས་གདམས་པས། མ་སྐྱེས་དགྲས་ཁོ་བྲན་གཡོག་རྣམས་ལ་སློང་བཅུག་པས། ལག་པ་སོགས་གང་ལས་འཐེན་པ་དེ་ནས་ཤ་ཐམས་ཅད་བུལ་འགྲོ་བའི་སྡུག་བསྔལ་བྱུང་ཡང་། བསྲན་ཚུགས་ཏེ་ཕྱག་གསུམ་འཚལ་ནས་སངས་རྒྱས་ཁོ་ནར་སྐྱབས་སུ་སོང་བས། སྔོན་བསགས་ཀྱི་ལས་ངན་ཐམས་ཅད་ཟད་ནས་དགྲ་བཅོམ་འཐོབ་པ་ཡིན། རྒྱལ་བོ་འདི་སྐུ་ཚེ་གཅིག་ལ་མིང་གསུམ་ཐོགས་པ་ཡིན་ཏེ། དང་བོ་རྒྱལ་བོ་མ་སྐྱེས་དགྲ། བར་དུ་སྡིག་ཅན་མ་སྐྱེས་དགྲ། ཐ་མར་དགྲ་བཅོམ་མ་སྐྱེས་དགྲ་ཟེར་རོ། །

ཡང་བདུད་ལྷས་བྱིན་གྱིས་མི་ཚེ་གང་བོ་སངས་རྒྱས་ལ་འགྲན་ཟླ་དང་། མཚམས་མེད་ཀྱི་ལས་སོགས་ལོག་ལྟ་དང་མི་དགེ་བ་བགྲང་ལས་འདས་པ་བསགས་ཏེ། ས་གས་ནས་དམྱལ་བའི་མེ་འཕྱུར་ཏེ་གསོན་སྲེག་མཛད་སྐབས། སངས་རྒྱས་ཀྱི་གསུང་ལ་ཡིད་ཆེས་ནས། ད་ནི་རུས་པའི་གཏིང་ནས་སངས་རྒྱས་ལ་སྐྱབས་སུ་མཆིའོ། །ཞེས་བརྗོད་པས་མ་འོངས་པ་ན་སངས་རྒྱས་རུས་པ་ཅན་བྱ་བར་འགྱུར་བར་ལུང་བསྟན་པ་དང་།

ཡང་ཞབས་དཀར་བས། སྔོན་དབུས་ཕྱོགས་ཀྱི་བླ་མ་ཞིག་རྒྱལ་གདོན་གྱིས་ན་བའི་རྐྱེན་བྱས། ཐུགས་དམ་གྱི་གཙོ་བོ་དམིགས་བརྩེ་མ་ལ་བྱས་པས་རྒྱལ་ནད་དྲག མཚན་མོ་རྨི་ལམ་ཞིག་ཏུ། རྗེ་རིན་པོ་ཆེར་མཇལ། ཁྱོད་ལོ་འདི་ལྟ་བུ་ཞིག་ལ་དགའ་ལྡན་དུ་འོང་དགོས་གསུངས་པ་རྨིས་པ་སློབ་མ་འགའ་རེར་བཤད། ཕྱིས་ལོ་དེའི་ནང་ལ་སྐུ་གཤེགས། གདུང་བཞུ་བའི་དུས། སྟེང་ཕྱོགས་ནས་སྤྲིན་དཀར་བོ་ཞིག་གདུང་སྟེང་དུ་འཐེན། གདུང་བཞུས་པས་རྒལ་ཚིགས་ཀྱི་རུས་པ་སོགས་ཀྱི་སྟེང་དུ། དམིགས་བརྩེ་མའི་ཡི་གེ་རང་བྱོན་དུ་བྱུང་སྐད་གསུངས་པ་ལྟ་བུའོ། །

༤ བསོད་ནམས་རྒྱ་ཆེན་པོ་འཐོབ་པ་ནི། དྲི་མ་མེད་པའི་མདོ་ལས། སྐྱབས་སུ་སོང་བའི་བསོད་ནམས་གང་། །གལ་ཏེ་དེ་ལ་གཟུགས་མཆིས་ན། །ནམ་མཁའི་ཁམས་ནི་ཀུན་བཀང་ནས། །དེ་ནི་དེ་བས་ལྷག་པར་འགྱུར། །ཞེས་གསུངས་པ་ལྟར། སྔོན་རྫ་མཁན་ཁྱེའུ་སྣང་བྱེད་བྱ་བ་བསོད་ནམས་དམན་པའི་དབང་གིས། རྫ་གང་བཟོས་པ་མྱུར་དུ་ཆག་པའམ། ཉོ་མཁན་མ་རྙེད་པས། ཐབས་རྡུགས་ཏེ་སངས་རྒྱས་ལ་ཞུས་པས། རེ་ཞིག་ཁྱེད་ཀྱིས་རྫ་བཟོ་རྒྱུ་བསྐྱུར་ལ། རྒྱལ་བྱེད་ཚལ་དུ་ཕྱགས་དར་དང་། མཆོག་གསུམ་ལ་སྐྱབས་འགྲོ་གྱིས་ཤིག་ཅེས་གདམས་པས། རྗེས་སུ་ཁོ་རང་ཕྱུག་པོར་ཆགས་ཏེ། སྟོན་པ་ཐུགས་རྗེ་ཅན་གྱི་བཀའ་དྲིན་དྲན་ནས། སངས་རྒྱས་ལ་གདུགས་ཚོད་མ་ཆག་པར་དྲངས་ཤིང་། དུས་གསུམ་གསུམ་དུ་དགེ་འདུན་ལ་ན་བཟའ་ཕུལ་བའི་སྦྱིན་བདག་ཆེན་པོ་ཞིག་ཏུ་གྱུར་བ་དང་། ཡང་དགེ་བཤེས་སྤྱན་སྔ་བ་མི་སྐྱའི་དུས་གསེར་ཁར་ལན་གཉིས་ཕྱིན་ཀྱང་རེས་གཅིག་ཡེ་མི་རྙེད། ཐང་གཅིག་བཞི་ཙམ་རྙེད། ཕྱིས་གློ་སྙིང་བྲང་གསུམ་དཀོན་མཆོག་ལ་གཏད་ཅིང་ལམ་རིམ་བསྒོམས་པས་མཐོང་ཆོས་སུ་བསོད་ནམས་མངོན་དུ་གྱུར་ཏེ། གསེར་ཡང་སྲང་བདུན་སྟོང་སྦྱིན་པ་བཏང་བ་ལྟ་བུའོ། །ཚུལ་འདི་ལ་དགོངས་ནས་པོ་ཏོ་བའི་ཞལ་ལས། ཡུང་བའི་དགེ་བཤེས་ཤཱཀྱ་ཡོན་ཏན་གྱིས་དཀོན་མཆོག་གསུམ་ལ་བློ་བཀལ་ནས་ཆོས་ཉམས་སུ་བཞེས་པས། ད་ལྟ་ཡུང་བ་ཙམ་ན་ཁོང་ལ་བདེ་སྐྱིད་ཆེ། གསུངས་པ་ལྟར་རོ། །

༥ ངན་འགྲོར་མི་ལྟུང་བ་ནི། སྔོན་ལྷ་ཞིག་འཆི་ལྟས་ཀྱིས་ཐེབས་ཏེ་ཞག་བདུན་ནས་ཕག་ཏུ་སྐྱེས་པར་མཐོང་བས་སྨེ་སྔགས་བཏོན་པ་ན། བརྒྱ་བྱིན་གྱིས་བྱིན་གྱིས་བརླབས་ཏེ་སངས་རྒྱས་ལ་སྐྱབས་སུ་འགྲོར་བཅུག་པས། དགའ་ལྡན་གྱི་ལྷའི་རིས་སུ་སྐྱེས་པ་དང་། ཡང་རྒྱ་གར་དུ་གནས་བརྟན་ཞིག་ལ་ཕམ་པ་བྱུང་བས། ཁོ་འགྱོད་དེ་སྐྱབས་འགྲོ་ཁོ་ན་བྱེད་བཞིན་པའི་འཕྲོར་ཚེ་འཕོས། ཤི་མ་ཐག་དམྱལ་བར་སྐྱེས་ཏེ་གཤིན་རྗེ་ལས་མཁན་རྣམས་ཀྱིས་སོད་སོད་རྒྱོབ་རྒྱོབ་ཀྱིས་འཇིགས་སྣང་བསྐུལ་བས། ཁོ་ཤིན་ཏུ་སྐྲག་ཏེ་མཆོག་གསུམ་ལ་སྐྱབས་སུ་འགྲོ་བའི་ཚེ། ལས་མཁན་དག་གིས་མཚོན་རུབ་བྱས་ནས་བསད་པས། དམྱལ་བའི་སྡུག་བསྔལ་ཡུད་ཙམ་པ་དེ་ལས་མ་མྱང་བར་སུམ་ཅུ་རྩ་གསུམ་གྱི་ལྷར་སྐྱེས་པ་ལྟ་བུའོ། །

༦ མི་དང་མི་མིན་གྱི་བར་ཆད་ཀྱིས་མི་ཚུགས་པ་ནི། རྒྱ་གར་དུ་མི་ཞིག་ལ་རྒྱལ་བོའི་ཁྲིམས་ཆད་ཕོག་པས་དུར་ཁྲོད་དུ་བོར། དེར་བསྐྱལ་ཚད་ཀྱི་ཤ་ཟས་སུ་ཟ་བ་ལ། ཁོས་དགེ་འདུན་གྱི་ཚུལ་བུ་ཞིག་སྤྱི་བོར་བཞག་ནས་སྐྱབས་འགྲོ་བྱས་པས། གནོད་པས་མ་ཚུགས་པ་དང་། ཡང་སྔོན་མི་ཞིག་དྲེད་ཀྱིས་བཟུང་ནས་ཤི་ལ་ཁད་དུ་གཏུགས། ཕྱིས་བླ་མ་ཞིག་གིས་ཁོ་ལ་སྐྱབས་འགྲོའི་མན་ངག་བསྟན་པས། ཡང་བསྐྱར་དྲེད་དང་ཐུག་སྐབས། ཁོས་སྐྱབས་འགྲོ་བྱས་པས། དྲེད་ཀྱིས་སྣས་སྣོམ་ཙམ་བྱ་བ་ལ་མིའི་དྲི་ཙམ་མ་ཚོར་བར་སོང་བ་དང་། ཡང་དགེ་སློང་ཞིག་གི་གྲྭ་ཤག་ཏུ་རྐུན་མ་འཛུལ་བ་བཟུང་སྟེ། དཀོན་མཆོག་གསུམ་གྱི་མཚན་ནས་སྒྲོགས་ཏེ་དབྱུག་པས་ལན་གསུམ་བཞུས་པས། དེ་བྲོས་ཏེ་མི་མ་ཡིན་རྒྱུ་བའི་ཟམ་འོག་ཅིག་ནས་དེ་བསྐྱར་གྱིན། དེ་གསུམ་ལས་མེད་པ་ལེགས། དེ་ལས་མང་ན་ཁོ་བོ་གསོད་འདུག་ཅེས་ཆིག་ལབ་བརྒྱབ་པས། དེའི་ནུབ་མོར་ཟམ་སྟེང་དུ་མི་མ་ཡིན་འགྲོ་མ་ཐུབ་པར་བཤད་དོ། །

༧ ཅི་བསམ་པ་ཐམས་ཅད་འགྲུབ་པ་ནི། བོད་དུ་ནང་ཆོས་མ་དར་བའི་སྔོན་དུ། རང་སངས་རྒྱས་གསུམ་བྱོན་ནས་སྐྱབས་འགྲོ་ཁོ་ན་མཛད་དེ། མཐའ་འཁོབ་འདིར་རྒྱལ་བསྟན་དར་བའི་རྟེན་འབྲེལ་བསྒྲིགས། དེ་དུས་སོ་སོའི་རྫུ་འཕྲུལ་སྟོན་པར་དགོངས་ནས། མཛུབ་མོ་རི་འབིག་གིས། རི་བོ་མཛུབ་མོས་ཕིག་པས། ཀུན་ཡ་མཚར་ནས་རྒྱུ་མཚན་དྲིས་པས། སངས་རྒྱས་ལ་སྐྱབས་སུ་སོང་བའི་ནུས་མཐུ་ཡིན་གསུངས། རྦབ་སོ་འཛིན་གྱིས། རྦབ་ཆེན་པོ་འགྲིལ་བ་སོས་བཟུང་བས། ཅི་ཡིན་ཞུས་པས། ཆོས་ལ་སྐྱབས་སུ་སོང་བའི་ནུས་མཐུ་ཡིན་གསུངས། དཔུང་བ་རི་འགུལ་གྱིས། དཔུང་ཤེད་ཀྱིས་རི་ཆེན་པོ་སྒུལ་བས། ཅི་ཡིན་ཞུས་པས། དགེ་འདུན་ལ་སྐྱབས་སུ་སོང་བའི་ནུས་མཐུ་ཡིན་གསུངས་པ་ལྟར་དང་། ཡང་བཞི་བརྒྱ་བ་ལས། བསམ་པ་བཟང་བོས་མཆིལ་ལྷམ་ཞིག། ཐུབ་པའི་དབུ་ལ་བཞག་པ་དང་། །གཞན་གྱིས་དེ་ཉིད་བསལ་བྱས་པ། །གཉིས་ཀས་རྒྱལ་སྲིད་འཐོབ་པར་འགྱུར། །ཞེས་པ་ལྟར། སྔོན་ལམ་ཁ་ཞིག་ན་སཙྪ་ཞིག་ཡོད་པ་མི་ཞིག་གིས་མཐོང་བས། འདི་ནི་ཆར་བའི་མྱུར་དུ་འཇིག་ཉེན་ཆེ་བསམ་ནས། ལོགས་སུ་ལྷམ་ཀྲད་ཞིག་ཡོད་པ་སྟེང་དུ་བཀབ་པ་དང་། གཞན་ཞིག་གིས། ཨ་ཙ་མ། སཙྪའི་སྟེང་དུ་མི་གཙང་བའི་ལྷམ་ཀྲད་བཀབ་པ་མ་ལེགས་སོ་ཟེར་ནས། དེ་མ་ཐག་དོར་བས། ལྷམ་འགེབས་པ་པོ་དང་འདོར་བ་བོ་གཉིས་ཀའི་བསམ་པ་བཟང་བས། གནས་སྐབས་རྒྱལ་སྲིད་སོགས་མངོན་མཐོ་འཐོབ་ཅིང་། མཐར་ཐུག་ཐར་བའི་ས་བོན་ཐེབས་པ་ཡིན་ནོ། །

༨ མྱུར་དུ་འཚང་རྒྱ་བའི་ཕན་ཡོན་ནི། དམ་ཆོས་པད་དཀར་ལས། བདེར་གཤེགས་སྐུ་གཟུགས་རྩིག་ངོར་བྲིས་པ་ལ། །འཁྲུགས་བཞིན་པ་ཡི་སེམས་ཀྱིས་བལྟས་ན་ཡང་། །དེ་དག་རིམ་གྱིས་སངས་རྒྱས་བྱེ་བ་མཐོང་། །གཡེང་བའི་སེམས་ཀྱིས་སངས་རྒྱས་ཕྱག་འཚལ་ཞེས། །ཚིགས་གཅིག་ལན་འགའ་བརྗོད་པར་བྱས་ནའང་། །དེ་དག་ཀུན་གྱིས་བྱང་ཆུབ་མཆོག་འདི་འཐོབ། །གསུངས་པ་ལྟར་རོ། །

ཐེག་ཆེན་གྱི་འཇུག་སྒོ་སེམས་བསྐྱེད།

༡ བྱང་ཆུབ་ཀྱི་སེམས་བསྐྱེད་དགོས་པ། ཇོ་བོ་ཆེན་པོ་རྡོ་རྗེ་གདན་ལ་བསྐོར་བ་མཛད་ནས། ཇི་ལྟར་བྱས་ན་མྱུར་དུ་རྫོགས་པའི་བྱང་ཆུབ་འཐོབ་སྙམ་དུ་དགོངས་པ་ན། སྐུ་གཟུགས་ཆུང་བ་རྣམས་བཞེངས་ནས་ཆེ་བ་རྣམས་ལ། མྱུར་དུ་འཚང་རྒྱ་བར་འདོད་པས་གང་ལ་བསླབ་པར་བྱ་ཞེས་དྲིས་པ་ན། བྱང་ཆུབ་ཀྱི་སེམས་ལ་བསླབ་པར་བྱའོ། །ཞེས་གསུངས་པ་ལྟར། བྱང་ཆུབ་ཀྱི་སེམས་ནི་སངས་རྒྱས་ཀྱི་ཆོས་མཛོད་ལས་གཅེས་ནོར་དཀར་བོ་ཆིག་ཐུབ་ལྟ་བུ་ཡིན། བྱང་ཆུབ་སེམས་ཀྱིས་རྩིས་མ་ཟིན་ན། རྩ་རླུང་སྒོམ་པ་དང་སྦུད་པ་རླུང་གིས་འགེངས་པ་ལ་ཁྱད་མེད། བསྐྱེད་རྫོགས་ཀྱི་བཟོ་འདྲ་བོ་བསྒོམས་ཀྱང་། དེ་མུ་སྟེགས་པ་ལའང་ཡོད། དེ་བས་དགེ་བཤེས་སྟོན་པ་ལ་རྣལ་འབྱོར་བ་ཆེན་པོས། ཁོ་བོ་ལ་རླུང་མཉམ་འཇུག་ལ་སོགས་པའི་ཏིང་ངེ་འཛིན་འདི་དང་འདི་ཡོད་བྱས་པས། ཁྱོད་ལ་རྣ་རྩར་རྔ་བོ་ཆེ་བརྡུངས་ཀྱང་མི་ཤིགས་པའི་སྒོམ་ཡོད་ཀྱང་། བྱམས་པ་དང་སྙིང་རྗེ་བྱང་ཆུབ་ཀྱི་སེམས་མེད་ན། ཉིན་མཚན་དུ་བཤགས་པ་བྱ་དགོས་པའི་སར་སྐྱེས་པ་ཡིན་ནོ་གསུངས། ཚུལ་འདི་ལ་དགོངས་ནས། སྤྱོད་འཇུག་ལས། བསྐལ་བ་དུ་མར་རབ་དགོངས་མཛད་པ་ཡི། །ཐུབ་དབང་རྣམས་ཀྱིས་འདི་ཉིད་ཕན་པར་གཟིགས། །གསུངས་སོ། །

༢ སེམས་དེ་སྦྱངས་པའི་རིམ་པ། བྱང་ཆུབ་ཀྱི་སེམས་སྦྱངས་ལུགས་ལ་གཉིས་ཏེ། ཇོ་བོ་རྗེ་ནས་བརྒྱུད་པའི་རྒྱུ་འབྲས་མན་ངག་བདུན་མ་དང་། ཞི་བ་ལྷའི་གཞུང་ལས་འབྱུང་བའི་བདག་གཞན་མཉམ་བརྗེས་སོ། །ལས་དང་བོ་བར་རྒྱུ་འབྲས་མན་ངག་བདུན་གྱི་སྒོ་ནས་བློ་སྦྱངས་ན་སྐྱེས་ཚབས་ཆེ་བས་འདི་ལྟར། ཐོག་མར་དགྲ་གཉེན་བར་མའི་སེམས་ཅན་ཐམས་ཅད་ལ་བཏང་སྙོམས་སྒོམ། དེ་ནས་མར་ཤེས། དྲིན་དྲན། དྲིན་གཟོ། ཡིད་འོང་གི་བྱམས་པ། སྙིང་རྗེ་ཆེན་པོ། ལྷག་བསམ་རྣམ་དག་བཅས་བསྒོམས་དགོས་ལ། དང་བོ་བཏང་སྙོམས་ནས་ཡིད་འོང་གི་བྱམས་པའི་བར་ལྔ་བོ་ནི་རྒྱུ་དང་། རྒྱུ་དེ་ལ་བརྟེན་ནས་འབྲས་བུ་སྙིང་རྗེ་ཆེན་པོ་དང་ལྷག་བསམ་རྣམ་དག་གཉིས་འབྱུང་ཞིང་། དེ་ལ་བརྟེན་ནས་བྱང་ཆུབ་ཀྱི་སེམས་འབྱུང་བའི་རྒྱུ་མཚན་གྱིས་རྒྱུ་འབྲས་མན་ངག་བདུན་གྱི་སྒོ་ནས་བྱང་ཆུབ་མཆོག་ཏུ་སེམས་བསྐྱེད་ཚུལ་ཞེས་བརྗོད་དོ། །

༣ སེམས་བསྐྱེད་ཀྱི་དབྱེ་བ། བློ་སྟོབས་ཀྱི་སྒོ་ནས་དབྱེ་ན་གསུམ་ཡོད། དེ་ཡང་རྒྱལ་བོ་རྣམས་ཕས་རྒོལ་ཟིལ་མནོན་དང་རང་སྡེ་དཔུང་བསྟོད་ཀྱིས། ཐོག་མར་རང་ཉིད་རྒྱལ་བོར་བཞུགས་ཏེ་མངའ་རིས་སྐྱོང་བ་བཞིན་དུ། ཐོག་མར་རང་ཉིད་སངས་རྒྱས་ཀྱི་གོ་འཕང་བརྙེས་ཏེ། ཕྱིས་སུ་སེམས་ཅན་ཐམས་ཅད་སངས་རྒྱས་ཀྱི་ས་ལ་འགོད་པ་ནི་རྒྱལ་བོ་ལྟ་བུའི་སེམས་བསྐྱེད་དེ་བློ་སྟོབས་ཞན་པ་ཡིན། དཔེར་ན། སངས་རྒྱས་ཤཱཀྱ་ཐུབ་པ་ལྟ་བུ་ཡིན།

མཉན་པ་རྣམས་རང་ཉིད་གྲུ་བོ་ཆེར་ཁ་ལོར་བསྒྱུར་ཏེ་མགྲོན་པོ་རྣམས་དང་མཉམ་དུ་ཆུའི་ཕ་རོལ་ཏུ་སྒྲོལ་བ་ལྟར། རང་གཞན་ཐམས་ཅད་ལྷན་ཅིག་ཏུ་སངས་རྒྱས་ཀྱི་གོ་འཕང་ལ་འགོད་པ་ནི། མཉན་པ་འམ་གྲུ་བ་ལྟ་བུའི་སེམས་བསྐྱེད་པ་དེ། བློ་སྟོབས་འབྲིང་ཡིན་ལ། དཔེར་ན། རྗེ་བཙུན་བྱམས་པ་ལྟ་བུའི་སེམས་བསྐྱེད་ཡིན།

ཕྱུགས་རྫི་རྣམས་རྩྭ་ཆུ་གང་བཟང་དུ་ནོར་ལུག་རྣམས་སྔོན་དུ་དེད་ནས་རང་ཉིད་ཕྱི་བཞིན་དུ་འབྲངས་པ་ལྟར། སྔོན་དུ་སེམས་ཅན་ཐམས་ཅད་སངས་རྒྱས་ཀྱི་ས་ལ་བཀོད་དེ་ཕྱི་ནས་རང་ཉིད་འཚང་རྒྱ་བར་འདོད་པ་ནི་ཕྱུགས་རྫི་ལྟ་བུའི་སེམས་བསྐྱེད་དེ་བློ་སྟོབས་ཆེན་པོ་ཡིན་ལ། དཔེར་ན། རྗེ་བཙུན་འཇམ་དབྱངས་ཀྱི་སེམས་བསྐྱེད་ལྟ་བུ་ཡིན་ནོ། །

༤ སྨོན་འཇུག་གི་བསླབ་བྱ་གཟུང་ཚུལ། སྨོན་པའི་བསླབ་བྱ་ནི། བདག་གཞན་མཉམ་པ། བརྗེ་བ། བདག་པས་གཞན་གཅེས་སྒོམ་པ་དང་གསུམ་དང་། འཇུག་པའི་བསླབ་བྱ་ནི། སྦྱིན་པ། ཚུལ་ཁྲིམས། བཟོད་པ། བརྩོན་འགྲུས། བསམ་གཏན། ཤེས་རབ་བོ། །

༥ བྱང་ཆུབ་སེམས་ཀྱི་ཕན་ཡོན། འཁོར་བའི་བཙོན་ར་ལྟ་བུར་ལྷུང་བའི་ཉམ་ཐག་གི་འགྲོ་བ་སུ་ཞིག་ཡིན་རུང་བྱང་ཆུབ་ཀྱི་སེམས་འདི་སྐྱེས་མ་ཐག་རྒྱལ་བའི་སྲས་བོ་ཞེས་བཀུར་འོས་པའི་ཞིང་དམ་པ་སྟེ། སྤྱོད་འཇུག་ལས། བྱང་ཆུབ་སེམས་སྐྱེས་གྱུར་ན་སྐད་ཅིག་གིས། །འཁོར་བའི་བཙོན་རར་བསྡམས་པའི་ཉམ་ཐག་རྣམས། །བདེ་གཤེགས་རྣམས་ཀྱི་སྲས་ཞེས་བརྗོད་བྱ་ཞིང་། །འཇིག་རྟེན་ལྷ་མིར་བཅས་པས་ཕྱག་བྱར་འགྱུར། །ཞེས་པ་ལྟར། ཤར་རི་སྡེ་བའི་ལུང་ལས་ཀྱང་། སྤྱིར་མི་ལུས་འདི་མི་གཙང་བའི་རྫས་སོ་དྲུག་སོགས་ཀྱི་རྐྱལ་བ་ཞིག་ཡིན་ཡང་བྱང་ཆུབ་ཀྱི་སེམས་དེ་ཡོད་ན་རིན་ཐང་གཞལ་དུ་མེད་པའི་རྒྱལ་བའི་སྐུར་བསྒྱུར་ནུས་པ་དང་། དགེ་བ་གཞན་ཀུན་ཆུ་ཤིང་བཞིན་དུ་འབྲས་བུ་བསྐྱེད་ནས་ཟད་ཅིང་། བྱང་ཆུབ་སེམས་ཀྱི་ལྗོན་པའི་འབྲས་བུ་ལ་ཟད་པ་མེད་པར་འཕེལ་བར་འགྱུར་རོ། །བྱང་ཆུབ་ཀྱི་སེམས་རྒྱུད་ལྡན་གྱི་གང་ཟག་དེ་མིའམ་དུད་འགྲོ་གང་ཡིན་རུང་དགེ་བ་གཞན་མ་བྱས་བར། གཉིད་ལོག་པའམ་བག་མེད་ར་རོའི་ངང་ནས་བཞུགས་ཀྱང་། ནམ་མཁའ་དང་མཉམ་པའི་དགེ་རྩ་རྟག་ཏུ་འབྱུང་བར་མ་ཟད། འཁོར་ལོ་སྒྱུར་རྒྱལ་སྲུང་བའི་སྲུང་མ་ཉིས་འགྱུར་གྱིས་སྲུང་བའོ། །ཞེས་གསུངས་སོ། །

བྱང་ཆུབ་ཀྱི་སེམས་འདི་སྡིག་པ་འཇོམས་པའི་ཡང་མཆོག་ཏུ་བསྔགས་ཏེ། སྡོང་བོ་བཀོད་པའི་མདོ་ལས། ཉེས་བྱས་ཐམས་ཅད་སྲེག་པའི་བསྐལ་བའི་མེ་ལྟ་བུའོ། །གསུངས་པ་ལྟར། སྤྱོད་འཇུག་ལས། སྡིག་པ་ཤིན་ཏུ་མི་བཟད་བྱས་ནའང་། །དཔའ་ལ་བརྟེན་ནས་འཇིགས་པ་ཆེན་པོ་ལྟར། །གང་ལ་བརྟེན་ནས་ཡུད་ཀྱིས་སྒྲོལ་འགྱུར་བ། །དེ་ལ་བག་ཅན་རྣམས་ཀྱིས་ཅིས་མི་བརྟེན། །དེ་ནི་དུས་མཐའི་མེ་བཞིན་སྡིག་ཆེན་རྣམས། །སྐད་ཅིག་གཅིག་གིས་ངེས་པར་སྲེག་པར་བྱེད། །ཅེས་སོ། །

གཞན་ཡང་། བྱང་ཆུབ་ཀྱི་སེམས་མངའ་བའི་རྒྱལ་སྲས་རྣམས་ལ་བཟང་འབྲེལ་ལྟ་ཅི། ངན་འབྲེལ་བྱས་པས་ཀྱང་སེམས་དཔའ་དེས་སྨོན་ལམ་གྱི་སྟོབས་ཀྱིས་བདེ་བ་འདྲེན་པར་བྱེད་དེ། སྟོན་པ་སློབ་པ་ལམ་གྱི་གནས་སྐབས་སུ་རྒྱལ་བོ་བྱམས་པའི་སྟོབས་སུ་གྱུར་བའི་ཚེ་གནོད་སྦྱིན་ལྔ་ལ་ཤ་ཁྲག་དྲོན་མོ་སྦྱིན་ཏེ། བདག་སངས་རྒྱས་པའི་ཚེ་ན་ཆོས་ཀྱི་བདུད་རྩིའི་ཐོག་མ་ཁྱེད་ཅག་རྣམས་ལ་སྦྱིན་པར་ཤོག་ཅེས་སྨོན་ལམ་བཏབ་པས། གནོད་སྦྱིན་ལྔ་བོ་འཁོར་ལྔ་སྡེར་གྱུར་བ་དང་། ཡང་ཐུབ་པ་འདི་ཉིད་རྒྱལ་བོ་པདྨའི་སྐྱེ་བ་བཞེས་དུས་ཁོང་གི་མངའ་རིས་ལ་ནད་ཡམས་ཆེན་པོ་ཞིག་བྱུང་བས་མི་མང་བོ་ཤི་བས། སྨན་པས་ཉ་རོ་ཧི་ཏའི་ཤས་ཕན་གྱི། གཞན་གང་གིས་ཀྱང་མི་ཕན་པར་ཞུས་པས། རྒྱལ་བོས་དུས་བཟང་ཞིག་ལ་དེར་སྐྱེས་པའི་གསོལ་བ་དྲག་ཏུ་བཏབ་ནས། ཁང་བཟང་ཁྲུ་སྟོང་ཡོད་པའི་ཁར་མཆོངས་སོ། །དེ་མ་ཐག་ཉ་རོ་ཧི་ཏར་སྐྱེས་ནས། མིའི་སྐད་དུ་ངའི་ཤ་ལས་ཟོ་ཤིག གཞོགས་གཅིག་ལས་ཟད་ཙ་ན་གཅིག་སོབ་སྟེ་ཀུན་ལ་ཕན་ནོ། །ང་ཁྱེད་ཅག་གི་རྒྱལ་བོ་པདྨ་ཡིན་ཏེ། ཁྱེད་རྣམས་ནད་ལས་སྐྱོབ་ཆེད་སྐུ་ཚེ་འདུ་བྱེད་བཏང་བ་ཡིན། ཁ་ལ་ཉན་ན་དྲིན་དུ་སྡིག་སྤོང་དགེ་སྒྲུབ་བྱོས་ཤིག་གསུངས་པས། དེ་དག་གིས་ཀྱང་བཀའ་བཞིན་བསྒྲུབས་པས། དེ་ནས་བཟུང་དེར་ཐམས་ཅད་དུ་ངན་སོང་དུ་མ་ལྟུང་བ་ལྟ་བུ་དང་།

ཡང་། བྱང་ཆུབ་ཀྱི་སེམས་རྒྱུད་ལྡན་གྱི་གང་ཟག་གིས་སྨོན་ལམ་དང་བདེན་ཚིག་ཅི་བཏབ་འགྲུབ་སྟེ། དྲང་སྲོང་བཟོད་པ་སྨྲ་བའི་སྤྱན་སྔར་རྒྱལ་བོ་རྩོད་བྱུང་གི་བཙུན་མོས་ཆོས་ཉན་པར་ཕྲག་དོག་དང་སྡང་སེམས་སྐྱེས་ནས། རྒྱལ་བོ་དེས་དྲང་སྲོང་གི་ཡན་ལག་དང་ཉིང་ལག་བཅད་དེ། ཁྱོད་སུ་ཡིན་ཅེས་དྲིས་ཀྱང་། ད་དུང་བདག་དྲང་སྲོང་བཟོད་པ་སྨྲ་བའོ་ཞེས་རང་ཚུགས་མ་ཤོར་ལ། རྒྱལ་བོ་དེས་འོ་ན་ཁྱོད་བཟོད་པ་ཅན་དུ་ཅིའི་ཕྱིར་ཡིད་ཆེས་པར་འགྱུར་སྨྲས་པས། བདག་བཟོད་པ་ཅན་དུ་བདེན་ན་ཁྲག་འོ་མར་འགྱུར་ཞིང་། ཡན་ལག་བཅད་པ་ཡང་སྔར་ལྟར་སོས་པར་གྱུར་ཅིག་ཅེས་བདེན་ཚིག་བརྗོད་མ་ཐག་སྔར་བཞིན་གྱུར་བ་ལྟ་བུའོ། །

དེ་ལས་གཞན། བྱང་ཆུབ་ཀྱི་སེམས་མངའ་བའི་སེམས་དཔའ་དེའི་དྲུང་དུ་བྱ་དང་གཅན་གཟན་རི་དྭགས་ཚུན་ཆད་འཁོར་ཞིང་གཅིག་གིས་གཅིག་ལ་གནོད་འཚེ་མི་བྱེད་དེ། དཔེར་ན། རྒྱལ་སྲས་ཐོགས་མེད་ཀྱི་དྲུང་དུ་སྤྱང་ཀི་ཞིག་ཡོད་པས་གཞན་ལ་མི་གནོད་པ་དང་། གྲྭ་ནང་གི་འབུ་སྦྲང་ཚུན་ཆད་གཅིག་གིས་གཅིག་ལ་མི་འཚེ་བར་གསུངས་པ་དང་། བླ་མ་ཡོངས་འཛིན་ཡེ་ཤེས་རྒྱལ་མཚན་འཇིག་རྟེན་ན་བཞུགས་དུས་སུ། ཁོང་ལ་བྱང་ཆུབ་ཀྱི་སེམས་མངའ་བས། ས་དེར་སྤྱང་ཀིས་ལུག་མི་གསོད་པ་དང་། ལུག་ཡང་སྤྱང་ཀིར་སྐྲག་སྣང་མེད་པ་ལྟ་བུ་བྱུང་། མཚམས་ཞིག་ས་དེར་སྤྱང་ཀིས་ལུག་གསོད་པ་བྱུང་བས། ཐམས་ཅད་ཀྱིས་ཁོང་མྱ་ངན་ལས་འདས་པར་ཤེས་པ་ལྟ་བུ་དང་། སྔོན་རྒྱ་གར་ན་བླ་མ་བྱམས་པའི་རྣལ་འབྱོར་བ་བྱང་ཆུབ་ཀྱི་སེམས་བསྒོམས་ནས་ནགས་གསེང་ན་བཞུགས་དུས། གཅན་གཟན་ཚུན་ཆད་ཀྱི་གཞན་ལ་མི་འཚེ་བར་བསྐོར་བ་བྱེད་པ་དང་། ནམ་མཁའི་བྱ་ཚུན་ཆད་འཕུར་མཚམས་བཞག་ནས་ཆོས་ལ་ཉན་པ་སོགས་བྱུང་བ་དང་། སྐྱེས་རབས་ལས་ཀྱང་། དེ་ཡི་རང་བཞིན་སྙིང་རྗེ་བདག་ཉིད་ཀྱིས། །རྣམ་པར་བརླན་པ་བཞིན་དུ་བརླན་གྱུར་ན། །ཕན་ཚུན་གནོད་པ་མེད་པའི་ཡིད་གྱུར་ཏེ། །དཀའ་ཐུབ་ཅན་བཞིན་གཅན་གཟན་ཁྲོ་བོའང་སྤྱོད། །ཅེས་པ་ལྟར། དེད་དཔོན་སེང་གེ་སོགས་སེམས་བསྲུངས་པས་སྲིན་མོ་ཐུལ་བ་དང་། གྲུབ་པ་འཐོབ་པའི་སྐྱེས་བུ་རྣམས་སྟག་དང་སེང་གེ་སོགས་བཞོན་པ་དང་དུག་སྦྲུལ་སོགས་ཕྱག་ཏུ་ཐོགས་པ་ལྟ་བུའོ། །

གཞན་ཡང་། རྗེ་མི་ལ་རས་པ་དེ་ཉིད་བལ་བོད་གཉིས་ཀྱི་སོ་མཚམས་དབེན་གནས་གཉི་ཤང་འགུར་རྟ་བྱ་བར་བཞུགས་དུས། ནམ་ཞིག་གི་ཚེ་གནས་དེའི་ཕུར་ཁྱི་སྐད་ལྷང་ལྷང་བ་དང་། དེ་རྗེས་ཐུག་སྒྲ་ཆེན་པོ་ཞིག་བྱུང་བས། ད་ལམ་བར་ཆད་ཅིག་མིན་ལས་ཆེ་བསམས་ནས། ལུང་མདོའི་ཕ་བོང་ཞིག་གི་ཁར་དམིགས་པ་མེད་པའི་སྙིང་རྗེ་ཆེན་པོའི་ངང་ལ་བཞུགས་ཚེ། ཁྱི་ར་བ་མགོན་པོ་རྡོ་རྗེས་ཤྭ་བ་བདའ་བྱུང་བ་ལ། རྗེ་བཙུན་གྱིས་མགུར་བཞེངས་ནས་ཤྭ་བའི་འཇིགས་སྐྲག་ཞི་ནས་མཆི་མ་ཕྲུལ་ཞིང་ན་བཟའ་ལ་ལྡག་སྟེ་རྗེ་བཙུན་གྱི་གཡོན་ཕྱོགས་སུ་བག་ཕེབས་ནས་ཉལ་བསྡད་པ་དང་། དེའི་རྗེས་ཁྱི་མོ་གློག་སྤྱང་དམར་མོ་བྱ་བ་ལྕེ་དར་ཡུག་ཙམ་རྐྱོང་བ། སྡེ་བཞི་ཐམས་ཅད་བྲག་གིས་གཤགས་པ། འདི་ཕྱི་སྣང་བའི་དངོས་བོ་ཐམས་ཅད་དགྲར་མཐོང་བ། གནོད་སེམས་དང་ཞེ་སྡང་གི་ཁྱི་སྐད་འདོན་པ་དེ་ཡང་ཆོས་གསུངས་ནས། ཞེ་སྡང་ཞི་ནས་སྐད་སྣ་ནས་འདོན་ཞིང་། རྗེ་བཙུན་ལ་མཇུག་མ་བསྒྲིལ་ཏེ་ན་བཟའ་ལྡག་ནས་གུས་གུས་བྱེད་ཅིང་། རྗེ་བཙུན་གྱི་གཡས་ཕྱོགས་སུ་མིག་མཆི་མ་ཉིལ་ལེ་ལག་པ་གཉིས་ཀྱི་བར་དུ་མཚུལ་བ་བཅུག་ནས། ཤྭ་བ་དང་དང་མ་བུའི་ཚུལ་དུ་ཉལ་བ་དང་། དེའི་རྗེས་མི་ངམ་གནག་མིག་རྩ་འཁྲུག་པ། སྐྲ་ཐམས་ཅད་སྤྱི་བོར་བཅིངས་པ། ཐུ་བ་གཡས་གཟེད་གཡོན་གཟེད་བྱས་པ། དགོ་སློག་ཞགས་པ་ལ་བརྒྱུས་ནས་ག་ཤ་ལ་དྲངས་པ། ལག་ན་མདའ་གཞུ་ཐོགས་ཤིང་དབུགས་ཁར་འཚངས་པ། རྔུལ་ནག་ཁྲག་ཏུ་ཤམ་མེ་བ་ཞིག་སླེབས་པའི་ཁྱི་ར་བ་མགོན་པོ་རྡོ་རྗེ་དེ་ཡང་ཆོས་གསུངས་ནས། ལྷ་ཆོས་རྣལ་མ་བསྒྲུབས་པས་ཉམས་རྟོགས་མཐར་ཕྱིན་པའི་ཐུགས་སྲས་ཁྱི་ར་རས་པ་ཞེས་པར་གྱུར་བ་དང་། ཁྱི་དང་ཤྭ་བ་ཡང་དེ་ནས་བཟུང་སྟེ་ངན་སོང་གི་སྡུག་བསྔལ་ལས་གྲོལ་བ་དང་།

ཨ་ཏི་ཤ་ཕྱག་སྙུང་བ་ལ་འབྲོམ་གྱི་པང་དུ་བཞག་ནས་འདི་ལ་ཁྱོད་ཀྱིས་བྱིན་རླབས་གྱིས་དང་། ཁྱོད་ལ་བསམ་པ་བཟང་བོ་ཡོད་པ་ཡིན་གསུངས་པ་དང་། དེ་བས། ཇོ་བོ་བླ་མ་མང་ཡང་བླ་མ་གསེར་གླིང་བ་སེམས་ཙམ་རྣམ་བདེན་གྱི་ལྟ་བ་དང་། ཁོང་དབུ་མའི་ལྟ་བ་འཛིན་པ་ཡིན་ཀྱང་། བྱང་ཆུབ་ཀྱི་སེམས་གསེར་གླིང་བར་བརྟེན་ནས་འཁྲུངས་པས། སྐུ་དྲིན་ཆེ་ཤོས་དང་འགྲན་གྱི་དོ་མེད་ཀྱི་རྩ་བའི་བླ་མ་ཉག་གཅིག་ཏུ་འཛིན་པ་ཡིན་ནོ། །

བསམ་པ་བཟང་ངན་གྱི་དབང་གིས་ལས་དཀར་ནག་དང་སྟོབས་ཆེ་ཆུང་འགྱུར་བ་ཡིན་ཏེ། རྗེ་ཐམས་ཅད་མཁྱེན་པས། བསམ་པ་བཟང་ན་ས་དང་ལམ་ཡང་བཟང་། །བསམ་པ་ངན་ན་ས་དང་ལམ་ཡང་ངན། །ཐམས་ཅད་བསམ་པ་དག་ལ་རག་ལས་པས། །ཞེས་པ་ལྟར། དམ་ཆོས་ཐེག་པ་ཆེན་པོའི་མདོ་ལས། 　སེམས་གཅིག་སྨེ་ན་ནི་ཆོས་སོ་ཅོག་སྨེའོ། །སྨེ་བའི་དྲི་མ་ནི་སྡིག་པ་ཡིན་ནོ། །ཞེསདང་། རིན་པོ་ཆེའི་ཕུང་བོའི་མདོ་ལས་ཀྱང་། སྟོང་གསུམ་གྱི་སེམས་ཅན་ཐམས་ཅད་སོ་སོ་ནས་སངས་རྒྱས་ཀྱི་མཆོད་རྟེན་རི་རབ་ཙམ་བྱེད་ལ། དེ་དག་ལའང་བསྐལ་བ་བྱེ་བ་སྙེད་དུ་བསྟི་སྟང་དུ་བྱ་བ་ཐམས་ཅད་ཀྱིས་བསྟི་སྟང་བྱེད་པ་ལས། བྱང་སེམས་ཀྱིས་ཐམས་ཅད་མཁྱེན་པའི་སེམས་དང་མ་བྲལ་བས་མེ་ཏོག་གཅིག་ཙམ་དོར་བ་བསོད་ནམས་མང་བར་གསུངས་སོ། །གཞན་ཡང་། སྔོན་རྒན་མོ་མ་བུ་གཉིས་ལག་སྦྲེལ་བྱས་ནས་ཆུས་འཁྱེར་བ་ལ། མས་བསམ་པར་བུ་མོ་འདི་ཆུས་མ་འཁྱེར་བ་ཞིག་བྱུང་ན་ང་རང་འཁྱེར་ཡང་ཅི་སྐྱོན་སྙམ་པ་དང་། བུ་མོས་ཨ་མ་ཆུས་འཁྱེར་བ་ལས་རང་འཁྱེར་ན་སྙམ་པས། གཉིས་ཀ་ཤི་ནས་ཚངས་པའི་འཇིག་རྟེན་དུ་སྐྱེས་པ་ཡིན། མདོར་ན། དཔས་བྱིན་གྱིས་ཞུས་པ་ལས། རིན་ཆེན་སེམས་ཀྱི་བསོད་ནམས་གང་། །གལ་ཏེ་དེ་ལ་གཟུགས་མཆིས་ན། །ནམ་མཁའི་ཁམས་ནི་ཀུན་བཀང་སྟེ། །དེ་ནི་དེ་བས་ལྷག་པར་འགྱུར། །ཞེས་སོ། །

དེ་ལྟ་བས་ན། མན་ངག་ཐམས་ཅད་ཀྱི་སྙིང་བོ། དངོས་གྲུབ་ཀུན་གྱི་གཏེར། ཐེག་དམན་ལས་འབྱེད་པའི་ཆོས་གཅིག་པུ། རྒྱལ་སྲས་བྱང་ཆུབ་སེམས་དཔའི་ཁྱད་ནོར། མྱུར་དུ་འཚང་རྒྱ་བའི་གདམས་པ་ཟབ་མོ། རྒྱལ་སྲས་ཀྱི་སྤྱོད་པ་རླབས་པོ་ཆེ་ལ་སྐུལ་བའི་རྟེན་དམ་པ་ནི་བྱང་ཆུབ་ཀྱི་སེམས་སུ་ཤེས་པར་བྱོས་ནས། རུས་ཤིང་དང་བཅས་ཏེ་སྐོམ་པས་ཆུ་འདོད་པ་ལྟར་བཙལ་ཞིང་སྒོམ་པར་བྱའོ། །

རྡོར་སེམས་སྒོམ་བཟླས།

༡ རྡོར་སེམས་སྒོམ་བཟླས་གལ་ཆེ་ཚུལ། རང་ཅག་སྐྱེ་བ་ཐོག་མ་མེད་པ་ནས་ད་ལྟའི་བར་དུ་སྡིག་ལྟུང་ཆར་བ་བབས་པ་བཞིན་བྱུང་བས། ད་ལྟ་ཤེས་རྒྱུད་ནག་ཐོམ་མེར་གྱུར་ཏེ། ས་ལམ་གྱི་མངོན་རྟོགས་འཁྲུངས་པ་ལྟ་ཅི། བསམ་བློ་ཡག་པོ་ཞིག་ཀྱང་མི་འབྱུང་བ་སྡིག་སྒྲིབ་ཀྱིས་ལན་པ་ཡིན། རྗེ་བཙུན་བློ་བཟང་ཆོས་ཀྱི་རྒྱལ་མཚན་གྱིས། སེམས་ཀྱི་ཆོས་ཉིད་མཐོང་བ་ཡང་། །ཚོགས་བསགས་སྒྲིབ་སྦྱོང་ལ་ལྟོས་པས། །ཡིག་བརྒྱ་འབུམ་ཙམ་ལྟུང་བཤགས་ནི། །བརྒྱ་ཕྲག་གང་མང་སྔོན་བཏང་ནས། །གསུངས་ལ། དཔེར་ན་སེམས་ནི་མེ་ལོང་ལྟ་བུ་དང་། མངོན་རྟོགས་ཀྱི་རིམ་པ་ནི་གཟུགས་བརྙན་འཆར་བ་ལྟ་བུ་ལགས་པས། མེ་ལོང་ལ་ས་རྡུལ་དང་འབག་བཙོག་གིས་བསྒོས་ན་མངོན་རྟོགས་ཀྱི་གཟུགས་བརྙན་མི་འཆར་བས། སྡིག་སྦྱངས་བྱེད་པ་གལ་ཆེ། སྤྱིར་སྡིག་སྒྲིབ་སྦྱོང་བའི་ཐབས་མང་དུ་ཡོད་ཀྱང་། རྗེ་སྒྲུབ་ཁང་བས། ཁྱེད་ཚོ་ལམ་གྱི་རྟོགས་པ་ཞིག་རྒྱུད་ལ་སྐྱེས་འདོད་པ་ཡིན་ན་ཡིག་བརྒྱ་འབུམ་ཐེར་རེའི་བསྙེན་པ་གྱིས། གསུངས་པ་ལྟར། སྡིག་ལྟུང་སྦྱངས་ཚུལ་གཞན་ལས་ཀྱང་མཆོག་ཏུ་གྱུར་བ་ནི། རྡོར་སེམས་སྒོམ་བཟླས་ལ་བརྟེན་ནས་སྡིག་ལྟུང་སྦྱངས་པ་འདི་བསྔགས་པ་ཡིན། རང་ཅག་སྐྱེ་བ་ཐོག་མེད་ནས་བག་མེད་དང་ལེ་ལོའི་ངང་ལུས་ངག་ཡིད་གསུམ་གྱི་སྡིག་ལྟུང་ཆར་བ་འབབ་པ་ལྟར་བསགས་ཡོད་པ་ཕར་ཞོག ཉེས་པ་ཕྲ་མོ་རེས་ཀྱང་། དུག་སྦྲུལ་གྱིས་སོ་བཏབ་པ་བཞིན་དུག་འཕེལ་བར་འགྱུར་བར་མ་ཟད། དགེ་རྩ་ཐམས་ཅད་ཆད་ནས་འགྱོད་བཞིན་དུ་ངན་འགྲོ་སྐྱེ་དགོས་པ་ཡིན་པས། ཡབ་རྗེ་སྐལ་ལྡན་རྒྱ་མཚོས། ཉིན་བཞིན་དུ་ལུས་ངག་ཡིད་གསུམ་པོ། །སྡིག་མི་དགེའི་སྐྱོན་གྱིས་ཆེར་སྦགས་པས། །རྒྱུད་ལས་སུ་རུང་བའི་འགལ་རྐྱེན་བྱེད། །གསུངས་ལ། དེ་བས་ན་བཤགས་སྡོམ་བྱེད་པ་གནད་དུ་ཆེ་ལ། འཆི་ཁ་ཚུན་ཆད་དུ་བཤགས་སྡོམ་མ་བྱས་ན། ངན་འགྲོར་སྡུག་བསྔལ་བཟོད་གླགས་མེད་པ་མྱོང་ངེས་པས། དེ་མི་འདོད་ན་སྡིག་ལྟུང་བཤགས་སྡོམ་བྱེད་པ་ལས་ཐབས་གཞན་མེད་པས། དགེ་སྦྱོར་གཞན་རྣམས་བཞག་སྟེ་བཤགས་སྡོམ་ལ་འབད་དགོས། དེ་ཡང་ད་ལྟ་ངན་འགྲོའི་རྒྱུ་སྡིག་ལྟུང་བཤགས་སྦྱངས་བྱེད་པ་དང་། སྡིག་ལྟུང་གི་འབྲས་བུ་ངན་འགྲོའི་སྡུག་བསྔལ་བཟོད་དཀའ་བ་མྱོང་བ་གཉིས་ཀྱི་གདམ་ཀ་རང་ལ་ཡོད་པས། གནད་ཀ་མ་འཕྱུགས་པར་བྱ་དགོས། ཁྱད་པར་དུ་རང་ཅག་བོད་མི་རྣམས། སྙིང་རུས་ཆུང་ལ་དཔའ་རྔམ་ཆེ་བས། དབང་རེ་མ་ཉན་པ་མེད་པའི་ཚོད་དུ་འདུག གསང་སྔགས་ཀྱི་སྒོ་ཞུགས་ནས་དམ་ཚིག་མ་བསྲུང་ན་དམྱལ་བ་དང་། བསྲུངས་ན་སངས་རྒྱས་ཀྱི་གོ་འཕང་འཐོབ་པ་ལས་འགྲོ་ས་གཞན་མེད་ཚོད་ཡིན། ཆོས་ལ་མ་ཉན་པ་གཅིག་ཀྱང་མེད་ལ། སྲུང་བ་སྣ་གཅིག་ཀྱང་མེད་པས། ད་ལྟ་དམ་ཉམས་ས་སྟེང་བཀང་བའི་ཚོད་དུ་འདུག ཚོགས་གྲལ་དུ་དམ་ཉམས་གཅིག་ཕྱིན་ན་ཉམས་གྲིབ་ཀྱིས་དམ་ལྡན་ཁྲི་འབུམ་གྱི་སྒྲུབ་པ་ལ་འབྲས་བུ་མི་འབྱིན་པ། དཔེར་ན། འོ་མ་གཙང་མ་ཟངས་མོ་ཆེ་གང་ལ་འོ་རུལ་ཐིགས་པ་གཅིག་ལྷུང་སྟེ་རུལ་བར་བྱེད་པ་དང་འདྲ། དམ་ཉམས་དེའི་ཉེས་པ་ཡང་། རྒྱུད་ལས། རྡོ་རྗེ་སྲིན་པོས་སྙིང་ཁྲག་འཐུང་བ་དང་། །ཚེ་ཐུང་ནད་མང་ནོར་ཡལ་དགྲས་འཇིགས་དང་། །མནར་མེད་དམྱལ་བ་ཤིན་ཏུ་སྐྱི་གཡའ་བ། །སྡུག་བསྔལ་མི་བཟད་ཡུན་རིང་གནས་པར་འགྱུར། །ཞེས་གསུངས་པ་ལྟར་ཡིན་པས། དང་བོ་ནས་ཆོས་གཞན་གང་ལས་ཀྱང་ཐོག་མར་སྡིག་ལྟུང་སྦྱངས་པ་གལ་ཆེ།

༢ མི་མཐུན་ཕྱོགས་སྤང་སྟེ་མཐུན་ཕྱོགས་སྒྲུབ་དགོས་པ། དེ་ཡང་དམིགས་རྣམ་གྱི་གསལ་འདེབས་ཅི་ཡང་མེད་པར། ངག་བཀྱལ་གྱི་གཏེར་ཁ་བརྡོལ། ཕུ་མདའ་བར་གསུམ་གྱི་བླ་བཙག་ཕྱི་བརྡུང་གི་འཆལ་གཏམ་གྱི་སྒོ་མོ་ཕྱེས་ཏེ། བགྲང་ཕྲེང་རྒྱུ་ནག་འདེད་འདེད་བྱས་པས་གར་ཡང་མི་ཕྱིན་ཏེ། སྤྱོད་འཇུག་ལས། བཟླས་བརྗོད་དང་ནི་དཀའ་ཐུབ་ཀུན། །ཡུན་རིང་དུས་སུ་སྤྱད་བྱས་ཀྱང་། །སེམས་གཞན་གཡེང་བས་བྱས་པ་ནི། །དེ་ཉིད་རིག་པས་དོན་མེད་གསུངས། །ཞེས་བཟླས་བརྗོད་བྱེད་ཚེ་ཡང་། སེམས་རྣལ་དུ་མི་གནས་པར་གཡེང་ནས་བཏོན་ན་དགོས་པ་ཆུང་བར་གསུངས་པ་དང་། དེར་མ་ཟད། ཀློག་ཚུལ་དག་པའང་གལ་ཆེ་སྟེ། བྱིས་འཇུག་ལས། གང་གིས་བཀླག་ཐབས་མི་ཤེས་པ། །རིག་སྔགས་ལོག་པར་བཟླས་གྱུར་ན། །དད་མེད་རྣམས་ལ་དོན་མེད་འགྱུར། །དད་པ་ཡོད་ཀྱང་དངོས་གྲུབ་རིང་། །ཞེས་སོ། །

འོ་ན་ཇི་ལྟར་བྱ་ཟེར་ན། དཔུང་བཟང་གིས་ཞུས་པ་ལས། བཟླས་བརྗོད་བྱེད་ཚེ་མི་མྱུར་མི་དལ་ཞིང་། །སྒྲ་ཆེར་མི་བྱ་ཧ་ཅང་ཆུང་བ་མིན། །སྨྲ་ཞིང་མ་ཡིན་གཞན་དུ་གཡེང་བཞིན་མིན། །གུག་བསྐྱེད་ཀླད་ཀོར་ཚེག་རྣམས་ཉམས་པ་མིན། །ཅེས་པ་ལྟར་དམིགས་པ་གཞན་དུ་མ་གཡེང་བར་མི་མྱུར་མི་དལ། མི་ཆེ་མི་ཆུང་བར་བཟླས་ཏེ་སྨྲ་བ་གཞན་བཅད་ནས་དག་འདོན་བྱས་ན། དུས་གཅིག་ལ་ཡིག་བརྒྱ་ལན་བརྒྱ་རྩ་བརྒྱད་བཟླས་ནའང་སྡིག་སྒྲིབ་དང་དམ་ཚིག་ཉམས་ཆག་དག་པ་བླ་མ་རྡོ་རྗེ་སེམས་དཔའི་ཞལ་གྱིས་བཞེས་པ་ཡིན་ནོ། །

ཨོཾ་བཛྲ་ས་ཏྭ་ས་མ་ཡ་སོགས་ཀྱི་སྔགས་དོན་རགས་བསྡུས་ནི། རྡོ་རྗེ་སེམས་དཔའ་ཞེས་མཚན་ནས་བོས་ཏེ། སྔོན་ཚེ་ཐུགས་བསྐྱེད་པའི་དུས། སེམས་ཅན་སངས་རྒྱས་ཀྱི་གོ་འཕང་ལ་འགོད་པར་དམ་བཅས་པ་དེ་དྲན་པར་མཛོད་ལ། དམ་ཚིག་རྗེས་སུ་སྐྱོང་བའི་ཆེད་དུ། རྡོ་རྗེ་སེམས་དཔའ་ཉིད་ཉེ་བར་གནས་པའོ། །བདག་ལ་བསྟན་པར་མཛད་དུ་གསོལ། བདག་ལ་ལེགས་པར་དགྱེས་པར་མཛོད། བདག་ལ་ཤིན་ཏུ་རྒྱས་པར་མཛོད། བདག་ལ་རྗེས་སུ་ཆགས་པར་མཛོད། བདག་གི་དགེ་བའི་རྩ་བ་རྣམས་བརྟན་པར་མཛོད། བདག་ཉོན་མོངས་པའི་དབང་དུ་སོང་བ་ལ་མི་དགྱེས་པ་མེད་པར་རྗེས་སུ་ཟུངས། བདག་གི་ལུང་རྟོགས་ཀྱི་ཡོན་ཏན་རྒྱས་པར་མཛོད། བྱང་ཆུབ་མ་འཐོབ་བར་དུ་བརྩེ་བའི་མ་འདོར་ཞིག དངོས་གྲུབ་ཐམས་ཅད་བདག་ལ་སྩོལ། བདག་གི་ལས་ཐམས་ཅད་ལའང་སེམས་ལ་ཕན་པའི་དཔལ་དུ་མཛོད། དངོས་གྲུབ་ཀྱི་དཔལ་གང་ཞེ་ན། ཡེ་ཤེས་ལྔ་དང་། དེ་ཀུན་གཅིག་ཏུ་འདུས་པ་རྡོ་རྗེ་བདེ་སྟོང་དབྱེར་མེད་ཀྱི་ས་བོན་ནོ། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་ཅན་གྱི་རང་བཞིན་གྱི་སེམས་དཔའ་ཆེན་པོས་བདག་ལ་དམ་ཚིག་བཞིན་དུ་མ་བཏང་བར་གྲོལ་བར་མཛོད་ཅེས་པའོ། །ཨཱཿགསུང་རྡོ་རྗེ་དང་སྟོང་ཉིད་རྟོགས་པའི་ཡེ་ཤེས། ཧཱུཾ་བདེ་ཆེན་གྱི་ཡེ་ཤེས། ཕཊ་ཀྱིས་དེ་གཉིས་དབྱེར་མེད་མཚོན་པར་གསུངས་སོ། །

རྡོར་སེམས་སྒོམ་བཟླས་སྐབས་ཅི་ནས་ཀྱང་ཚང་དགོས་པ་ནི། སྟོབས་བཞི་སྟེ། རྟེན་གྱི་སྟོབས་ནི། རྡོ་རྗེ་སེམས་དཔའ་ལ་སྐྱབས་སུ་བཟུང་ནས་སྨོན་འཇུག་གི་བྱང་སེམས་དང་ལྡན་པ་དང་། རྣམ་པར་སུན་འབྱིན་པའི་སྟོབས་ནི། སྔར་བྱས་ཀྱི་སྡིག་པ་མི་དགེ་བ་ཁོག་ཏུ་དུག་སོང་བ་ལྟར་འགྱོད་པ་དང་འཇིགས་སྐྲག་སྐྱེས་པ་དང་། ཉེས་པ་ལས་སླར་ལྡོག་པའི་སྟོབས་ནི། སྔར་བྱས་ཀྱི་སྡིག་ལས་དྲན་ཏེ་ཕྱིན་ཆད་སྲོག་ལ་བབ་ཀྱང་མི་བྱེད་པའི་དམ་བཅའ་བརྟན་པ། གཉེན་པོ་ཀུན་ཏུ་སྤྱོད་པའི་སྟོབས་ནི། སྡིག་པ་འདག་པའི་ཆེད་དུ་དགེ་བ་བྱས་ཚད་ཐམས་ཅད་ལ་ཟེར་རོ། །

སྤྱིར་སྡིག་པ་ལ་ཡོན་ཏན་ཞིག་ག་ན་མཆིས་ཀྱང་། བཤགས་པས་འདག་པ་འདི་སྡིག་པའི་ཡོན་ཏན་དུ་བརྩི། རྡོར་སེམས་སྒོམ་བཟླས་གནད་དུ་སོང་ན་སྡིག་པ་ཚབས་པོ་ཆེ་རི་རབ་ཙམ་ཞིག་བསགས་ཀྱང་། དུང་དཀར་གྱི་སྟེང་གི་རྡུལ་ཕྱིས་པ་ལྟར་དག་འགྲོ་བ་ཡིན། དཔེར་ན། རྗེ་མི་ལས་སྐུ་ཚེ་དེར་མི་རྟ་སོ་ལྔ་བསད་ཀྱང་སྡིག་སྒྲིབ་དག་ཏེ་ཟུང་འཇུག་གི་གོ་འཕང་འཐོབ་པ་ལྟ་བུ་ཡིན་ནོ། །

༣ དམིགས་རྣམ་གསལ་འདེབས་ཚུལ། དེ་ཡང་ལག་ཏུ་ལེན་ཚུལ་མདོར་བསྡུས་ཤིག་བརྗོད་ན། རང་གི་སྤྱི་བོར་མདའ་གང་ཙམ་གྱི་སྟེང་དུ་རྡོ་རྗེ་སེམས་དཔའ་དཀར་བོ་ཞལ་གཅིག་ཕྱག་གཉིས་ཀྱིས་རྡོ་རྗེ་དང་དྲིལ་བུ་འཛིན་པ། ཡུམ་རྡོ་རྗེ་སྙེམས་མ་དཀར་མོ་ཞལ་གཅིག་ཕྱག་གཉིས་གྲི་གུག་དང་ཐོད་པ་འཛིན་པས་འཁྱུད་པ། གཉིས་ཀའང་ན་བཟའ་དང་རིན་པོ་ཆེས་བརྒྱན་པ། ཡབ་རྡོ་རྗེ་དཀྱིལ་ཀྲུང་གིས་བཞུགས་པ། དེའི་ཐུགས་ཀར་ཟླ་བའི་སྟེང་དུ་ཧཱུཾ་ཡིག་དཀར་བོ། མཐར་ཡི་གེ་བརྒྱ་བའི་སྔགས་ཕྲེང་དཀར་བོ་མགོ་ཕྱིར་བསྟན་ནས་བསྐོར་བ། དེ་ལས་འོད་ཟེར་འཕྲོས་ཏེ་རང་འདྲའི་ཡེ་ཤེས་པ་སྤྱན་དྲངས། གཉིས་སུ་མེད་པར་གྱུར། སླར་ཡང་ཐུགས་ཀའི་ཧཱུཾ་ལས་འོད་ཟེར་འཕྲོས། དབང་ལྷས་དབང་བསྐུར་བ་ལྟར་བརྗོད་དེ། ཡབ་ཡུམ་གྱི་སྤྱི་བོ་ནས་བྱང་སེམས་ཀྱི་བདུད་རྩིའི་དབང་བསྐུར་བས། སྐུ་གང་། དྲི་མ་དག བདུད་རྩིའི་ཆུའི་ལྷག་མ་སྤྱི་བོར་ལུད་པ་ལས་མི་བསྐྱོད་པའི་དབུ་བརྒྱན་པར་གྱུར་བར་བསམ། རང་གི་སྙིང་ཀའི་ཟླ་བའི་སྟེང་དུ་རང་ཐ་མལ་བའི་རྣམ་པ་ཅན། དེའི་མདུན་དུ་ཕ་མ། གཡས་སུ་སྤུན་ཟླ། གཡོན་དུ་གྲོགས་མཆེད། རྒྱབ་ཏུ་གཉེན། མཐའ་བསྐོར་དུ་སེམས་ཅན་ཐམས་ཅད་འཁོད་པར་མོས་ཏེ། བཅོམ་ལྡན་འདས་རྡོ་རྗེ་སེམས་དཔའ་བདག་དང་སེམས་ཅན་ཐམས་ཅད་ཀྱི་སྡིག་སྒྲིབ་དང་། དམ་ཚིག་ཉམས་ཆག་བྱང་ཞིང་དག་པར་མཛད་དུ་གསོལ། ཞེས་གསོལ་བ་བཏབ་པས། ཐུགས་ཀའི་ཧཱུཾ་ལས་འོད་ཟེར་འཕྲོས། སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས། སངས་རྒྱས་སྲས་བཅས་ལ་མཉེས་པའི་མཆོད་པ་འབུལ། དེ་རྣམས་ཀྱི་མཁྱེན་བརྩེ་ནུས་གསུམ་གྱི་ཡོན་ཏན་ཐམས་ཅད་འོད་ཀྱི་རྣམ་པར་བསྡུས་ནས་ཐུགས་ཀའི་ཧཱུཾ་ལ་ཐིམ་པའི་གཟི་བརྗིད་དང་མཐུ་སྟོབས་ནུས་པ་ཕུན་སུམ་ཚོགས་པར་བསམ་པ་འདི་དམིགས་པ་མདོར་བསྟན་དང་།

དེ་ནས་རྡོ་རྗེ་སེམས་དཔའི་སྤྱན་སྔར། རང་གི་ཚེ་རབས་ཐོག་མེད་ནས་ད་ལྟའི་བར་དུ་ལུས་ངག་ཡིད་གསུམ་གྱི་སྡིག་པ་མི་དགེ་བ་བཅུ། མཚམས་མེད་ལྔ། སོ་སོ་ཐར་བའི་སྡོམ་པ་དང་འགལ་བ། བྱང་ཆུབ་སེམས་དཔའི་བསླབ་པ་དང་འགལ་བ། གསང་སྔགས་ཀྱི་དམ་ཚིག་དང་འགལ་བ། རྫུན་དང་ཕྲ་མ་བརྒྱབ་པ། ཁྲེལ་དང་ངོ་ཚ་བོར་བ་ལ་སོགས་པའི་མི་དགེ་བ་བསགས་ཚད་སེམས་ཐོག་ལ་དྲན་པར་བྱས་ཏེ། ཤ་ཟིང་སྤུ་ཟིང་གི་དངངས་སྐྲག་དང་བཅས་མཐོལ་ཞིང་བཤགས་སོ། །མི་འཆབ་བོ། མི་སྦེད་དོ། །སླད་ཆད་ཀྱང་གཅོད་ཀྱང་སྡོམ་པར་འགྱུར་ལགས་སོ། །ཞེས་ཡིག་བརྒྱ་བཟླས་པས། ཡིག་འབྲུ་རྣམས་ལས་བདུད་རྩིའི་རྒྱུན་བབས་ཏེ་ཡབ་ཡུམ་གྱི་སྦྱོར་མཚམས་ནས་ཐོན། རང་གི་སྤྱི་གཙུག་ནས་ཞུགས་པས། ཐོག་མེད་ནས་བསགས་པའི་སྡིག་སྒྲིབ་བག་ཆགས་དང་བཅས་པ་དུད་ཁུ་དང་སོལ་ཁུ། དེས་བསྐྱེད་པའི་ནད་རིམས་ཐམས་ཅད་རྣག་ཁྲག གདོན་བགེགས་ཐམས་ཅད་སྡོམ་སྡིག་སྦལ་ལྕོང་ལ་སོགས་ཀྱི་རྣམ་པར་བདུད་རྩིའི་རྒྱུན་གྱིས་དེད་དེ། རྐང་མཐིལ་འོག་སྒོ་བ་སྤུའི་བུ་ག་རྣམས་ནས་ནག་ཉིལ་ཉིལ་གྱིས་ཕྱིར་ཐོན། རང་གི་འོག་ཏུ་ས་གས་པའི་མར་ཞབས་ན། ལས་ཀྱི་གཤིན་རྗེ་ལ་ལན་ཆགས་བུ་ལོན་ཤ་འཁོན་གཉེར་བ་མང་བོས་བསྐོར་ཏེ། ཁ་ལག་སྤར་གསུམ་བཟེད་ནས་ཡོད་པའི་ནང་དུ་སོང་ཏེ་དེ་དག་ངོམས་ཤིང་ཚིམ། ལན་ཆགས་དག བུ་ལོན་འཇལ། ཤ་འཁོན་བྱང་། སྡིག་སྒྲིབ་ཟད་དེ་གནོད་འཚེ་བསམ་སྦྱོར་ངན་པ་ཞི་ནས་བྱམས་སྙིང་རྗེ་བྱང་ཆུབ་ཀྱི་སེམས་དང་ལྡན་པར་གྱུར་ཏེ། དེ་རྣམས་ཀྱི་ཁ་ལག་སྤར་གསུམ་ཟུམ། ས་གས་པ་ཡང་སུབ། རང་ལུས་ཤེལ་བུམ་དུ་མར་མེ་སྦར་བ་ལྟར་ཕྱི་གསལ་ནང་གསལ་འོད་ཀྱི་རང་བཞིན་དུ་གྱུར་བའི་མོས་པ་བྱེད་པ་གོང་ནས་མར་དེད་པས་ཡས་དེད་དང་། ཡང་སྔར་ལྟར་བདུད་རྩི་རྐང་མཐིལ་ནས་སྤྱི་གཙུག་བར་དུ་སྣོད་ཆུས་བཀང་སྟེ་ཕྱིར་འཕོ་བ་ལྟར་མིག་གཉིས་དང་། ཁ་སྣའི་བུ་ག་དང་བ་སྤུ་སོགས་ཀྱི་སྒོ་ནས་ནག་ནར་ནར་ཐོན་ཏེ་ལྷག་མེད་དུ་དག་པར་བསམ་པ། མས་ནས་ཡར་དེད་པས་མས་དེད་ཟེར་བ་དང་། ཡང་སྡིག་སྒྲིབ་དམ་ཚིག་ཉམས་ཆག་ཐམས་ཅད་ཐལ་བའི་ཕུང་བོ་ལྟར་སྙིང་ཀར་ནག་སྤུངས་སེ་ཡོད་པ་ལ། སྔར་ལྟར་བདུད་རྩིའི་རྒྱུན་བབས་པས། ལུས་ཀྱི་སྟེང་འོག་བར་གསུམ་དང་བ་སྤུའི་བུ་ག་ཐམས་ཅད་ནས་ཐོན་ཏེ། སྡིག་སྒྲིབ་བག་ཆགས་དང་བཅས་པ་འབབ་ཆུའི་གད་པ་ཆད་པ་ལྟར་ཐོན་ནས། ལུས་ཤེལ་གོང་གཡའ་དག་པ་ལྟར་བསམ་པ་ལ་ཕུང་དེད་ཀྱི་དམིགས་པ་ཞེས་བྱའོ། །དེ་བཞིན་མཐའ་བསྐོར་གྱི་སེམས་ཅན་རྣམས་ཀྱི་སྤྱི་བོར་ཡང་འོད་ཟེར་གྱི་སྣེ་ལ་རྡོར་སེམས་ཡབ་ཡུམ་ཟུང་རེ་སྤྲོས་པའི་སྦྱོར་མཚམས་ནས་བདུད་རྩིའི་རྒྱུན་བབས་པས་སྡིག་སྒྲིབ་སྦྱངས་ཚུལ་སྔར་ལྟར་རོ། །དེ་ནས། བདག་ནི་མི་ཤེས་རྨོངས་པ་ཡིས། །ཞེས་པ་ནས། འགྲོ་བའི་གཙོ་ལ་བདག་སྐྱབས་མཆི། །ཞེས་པའི་བར་དལ་བུས་བཏོན་ཏེ་གསོལ་བ་རྩེ་གཅིག་ཏུ་བཏབ་པས། བླ་མ་དང་དབྱེར་མེད་པའི་རྡོར་སེམས་ཡབ་ཡུམ་ཐུགས་ཤིན་ཏུ་དགྱེས་ཏེ། རིགས་ཀྱི་བུ་ཁྱོད་ཀྱི་སྡིག་སྒྲིབ་དང་དམ་ཚིག་ཉམས་ཆག་ཐམས་ཅད་བྱང་ཞིང་དག་གོ ། ཞེས་གསུངས་ནས་འོད་དུ་ཞུ་སྟེ་རང་ལ་ཐིམ་པས། རང་གི་སྒོ་གསུམ་དང་རྡོ་རྗེའི་སེམས་དཔའི་སྐུ་གསུང་ཐུགས་དབྱེར་མི་ཕྱེད་པར་གྱུར་པར་བསམ་དགོས་སོ། །མཐར་བསྔོ་སྨོན་གྱིས་རྒྱས་འདེབས་པར་བྱའོ། །

༤ རྡོར་སེམས་སྒོམ་བཟླས་ཀྱི་ཕན་ཡོན། ཇོ་བོ་ཆེན་པོས། སྔགས་ལ་ལྟུང་བ་འབྱུང་བའི་སྒོ་བསམ་གྱིས་མི་ཁྱབ་སྟེ། བུམ་པ་ལྟ་བུ་ཞིག་ལའང་དངོས་བོར་ཐ་མལ་བར་བལྟས་ན་ལྟུང་བར་འགྱུར་བ་ས་ཕྱོགས་རྡུལ་ཆེ་བ་ཞིག་ཏུ་མཎྚལ་ཞིག་ཕྱིས་ཏེ་བཞག་ན། དེ་མ་ཐག་རྡུལ་ཆགས་ནས་འོང་བ་དང་འདྲ་གསུངས། འོ་ན་དེ་ལ་བརྟེན་ནས་སངས་རྒྱས་མྱུར་དུ་འགྲུབ་དཀའ་འམ་ཞུས་པས། ལྟུང་བ་སྦྱངས་པའི་ཐབས་བྱ་བརྒྱ་འུར་རྡོ་གཅིག་གིས་འདེད་པ་ལྟ་བུའི་གདམས་པ་ཟབ་མོ་རྡོ་རྗེ་སེམས་དཔའི་སྒོམ་བཟླས་བྱ་བ་སྔགས་ལ་ཡོད། གསུངས་པ་ལྟར་དང་། དཔེར་ན། རིན་པོ་ཆེའི་ཉེར་སྤྱད་ཆག་ཀྱང་མགར་བ་མཁས་པ་ལ་བརྟེན་ནས་བཅོས་སུ་ཡོད་པ་ལྟ་བུ་ཡིན། དེ་བས་ཉིན་རེ་བཞིན་རྡོ་རྗེ་སེམས་དཔའ་བསྒོམས་ཏེ་ཡི་གེ་བརྒྱ་བ་ཉེར་གཅིག་བཟླས་ན། ལྟུང་བ་བྱིན་གྱིས་བརླབས་པ་ཞེས་བྱ་སྟེ། ལྟུང་བའི་འཕེལ་ཁ་ཆོད་པ་དང་། འབུམ་ཕྲག་གཅིག་བཟླས་ན་མཚམས་མེད་ཀྱི་ལས་ཀྱང་འདག་པར་གསུངས་པས་ན། རྡོར་སེམས་སྒོམ་བཟླས་ལ་བརྩོན་དགོས། གཞན་ཡང་། གསང་སྔགས་ཀྱི་ལྷ་སོགས་སྒྲུབ་པ་ལའང་འདི་ལས་ལྷག་པ་མེད་དེ། ཀུན་མཁྱེན་འཇམ་དབྱངས་བཞད་པས། དངོས་གྲུབ་བརྟན་པ་དང་ལྷའི་དངོས་གྲུབ་ཉེ་བ་དང་། ལྷ་རང་ལ་ཉེ་བར་འདོད་པས་ཡི་གེ་བརྒྱ་བ་མན་ངག་ལྟར་འབད་པར་བྱ་བ་གནད་དུ་ཆེའོ་གསུངས་པ་དང་།

སྔོན་བློ་གསལ་གླིང་གི་དགེ་བཤེས་དོམ་འབྲུག་ཅེས་གྲགས་སྐད་ཅན་གཉིས་ཡོད་པའི་ནང་ཚན། འབྲུག་སྟག་ངག་དབང་དཔལ་བཟང་གིས་སྔགས་ཀྱི་རྩ་ལྟུང་བྱུང་ན་མནར་མེད་དུ་འཕེན་པས། དེའི་ཚེ་ཚད་རྫོགས་པའི་བར་དུ་ཕར་ཕྱིན་ཐེག་པའི་དབང་རྣོན་འཚང་རྒྱ་གསུངས་པ་ལ། ཀུན་མཁྱེན་འཇམ་དབྱངས་བཞད་པས། དེ་གཡག་ཞར་གྱིས་རྩྭ་ཟོས་པ་དང་འདྲ། རྡོར་སེམས་ཡུམ་བཅས་ཀྱི་སྒོས་ཡིག་བརྒྱ་འབུམ་གྱིས་རྩ་ལྟུང་འདག་པ་ལྟ་བུའི་ཐབས་མཁས་ཀྱི་ཆེ་བ་མ་ཤེས་པས་ལན། གསུངས་པ་ལྟ་བུ་དང་། ཚུལ་འདི་ལ་དགོངས་ནས། མཁས་པའི་སྡིག་པ་ལྕི་ཡང་ཡང་། །བླུན་པོའི་སྡིག་པ་ཡང་ཡང་ལྕི། །ཞེས་པའང་བཤགས་པ་བྱ་ཚུལ་ལ་མཁས་མི་མཁས་ལས་བྱུང་བ་ཡིན། བཤགས་སྡོམ་ལ་བརྟེན་ནས་སྡིག་པ་དག་ཟིན་པ་ཡང་། བཤེས་སྤྲིངས་ལས། གང་ཞིག་སྔོན་ཆད་བག་མེད་གྱུར་བ་ལ། །ཕྱིས་ནས་བག་དང་ལྡན་པར་གྱུར་དེ་ཡང་། །ཟླ་བ་སྤྲིན་བྲལ་ལྟ་བུར་རྣམ་མཛེས་ཏེ། །དགའ་བོ་སོར་ཕྲེང་མཐོང་ལྡན་བདེ་བྱེད་བཞིན། །ཞེས་གསུངས་པ་ལྟར། སྟོན་པའི་གཅུང་དགའ་བོ་བྱ་བ་འདོད་ཆགས་ཆེ་བས་རང་གི་ཆུང་མ་དང་སྐད་ཅིག་ཙམ་ཡང་འབྲལ་མི་ཕོད་པ་དང་། སོར་མོའི་ཕྲེང་བ་བྱ་བ་སློབ་དཔོན་ངན་པས་བསླུས་ནས། ཞག་བདུན་གྱི་ནང་མི་དགུ་བརྒྱ་གོ་དགུ་བསད་པ་དང་། མཐོང་ལྡན་ཏེ་རྒྱལ་བོ་མ་སྐྱེས་དགྲས་རང་གི་ཕ་གཟུགས་ཅན་སྙིང་བོ་བཙོན་ཏུ་བཅུག་སྟེ་ལྟོ་བཀག་ནས་གྲོངས་པ་དང་། ཁྱེའུ་བདེ་བྱེད་ནམ་རྒྱུན་གཞན་གྱི་བུད་མེད་ལ་ལོག་གཡེམ་བྱེད་དུ་འགྲོ་བ་ཨ་མས་ཤེས་ཏེ་བཀག་པས། ཨ་མ་ལ་གྲིས་བསྣུན་ཏེ་བསད་པ་སོགས་སྡིག་པ་ཚབས་པོ་ཆེ་དེ་འདྲ་བསགས་ནའང་། ཕྱིས་སུ་སངས་རྒྱས་དང་མཇལ་ནས་སྡིག་སྦྱངས་བྱས་པས། སྔ་མ་གཉིས་དམྱལ་བར་མ་སྐྱེས་པ་དང་། ཕྱི་མ་གཉིས་ཡུད་ཙམ་སྐྱེས་ཀྱང་མྱུར་དུ་ཐར་བ་བཞིན་ནོ། །

གཞན་ཡང་། བཤགས་བྱ་ལ་ལྟུང་བ་དང་སྡིག་པ་གཉིས་ལས། ལྟུང་བས་ལས་ལ་བསྒྲིབས། སྡིག་པས་རྣམ་སྨིན་མྱོང་བས། ལྟུང་བ་ཕྱིར་བཅོས་དང་། སྡིག་པ་སྟོབས་བཞིས་སྦྱངས་དགོས། ལྟུང་བ་ཕྱིར་བཅོས་ཚུལ་ཡང་། བྱང་ཆུབ་ལམ་རིམ་གྱི་སྐབས་འདིར་སྟོབས་བཞི་ཚང་བའི་སྒོ་ནས་ཉན་རང་རྣམས་ལ་གཙོ་བོར་དམིགས་ནས་སོ་ཐར་གྱི་བཤགས་པ་དང་། སངས་རྒྱས་བྱང་སེམས་ལ་གཙོ་བོར་དམིགས་ནས་བྱང་སེམས་ཀྱི་བཤགས་པ་དང་། ཆོས་སྲུང་སོགས་ལ་དམིགས་ནས་སྔགས་ཀྱི་བཤགས་པ་བྱོས་ལ། མཐོང་སྡོམ་དྲིས་ལན་དངོས་སུ་རང་གིས་བརྗོད་ཅིང་། ཡིད་ཀྱིས་མདོ་ཕྱོགས་ཀྱི་དྲི་བ་ཐུབ་དབང་དང་། སྔགས་ཕྱོགས་ཀྱི་དྲི་བ་རྡོ་རྗེ་འཆང་དང་བླ་མ་དབྱེར་མེད་པས་མཛད་པར་བསམས་ལ། མཐོང་ལགས། ཞེས་སོགས་ཀྱི་ལན་བྱའོ། །

གཞན་ཡང་རྡོ་རྗེ་སེམས་དཔའི་སྒོ་ནས་ནད་སྦྱོང་བ་དང་། ཤེས་རབ་སྤེལ་བ། ཚེ་སྒྲུབ་སོགས་སྙན་བརྒྱུད་ཀྱི་མན་ངག་ཇི་སྙེད་ཅིག་ཀྱང་ཡོད་དོ། །

༥ ཕུང་བོ་གསུམ་པའི་སྡིག་བཤགས་བྱེ་བྲག་ཏུ་བཤད་པ། རྗེ་བདག་ཉིད་ཆེན་པོས་ཕུང་བོ་གསུམ་པའི་མདོ་ཕྱག་དང་སྦྲགས་ཏེ་བཤགས་སྡོམ་མཛད་པའི་རྣམ་ཐར་དྲི་མ་མེད་པ་མཆིས་པ་བཞིན། རང་ཅག་གིས་ཀྱང་དེ་ལྟར་མཛད་ན་རྟེན་འབྲེལ་གྱི་གནད་ཆེ་བ་ཡིན། ཕུང་བོ་གསུམ་པའི་མདོ་ལ་སྟོབས་བཞིས་བཤགས་སྡོམ་གྱི་གནད་དྲིལ་བ་ཡིན། རྣམ་པར་སུན་འབྱིན་པའི་སྟོབས་ཀྱིས་སྡིག་པའི་འཕེལ་འཕྲོ་གཅོད། གཉེན་པོ་ཀུན་ཏུ་སྤྱོད་པའི་སྟོབས་ཀྱིས་སྡིག་པ་ཉམས་དམའ་བར་བྱེད། ཉེས་པ་ལས་སླར་ལྡོག་པའི་སྟོབས་ཀྱིས་སྡིག་པ་རྩ་བ་ནས་འདོན་པར་བྱེད། རྟེན་གྱི་སྟོབས་ཀྱིས་སྡིག་འབྲས་སྡུག་བསྔལ་ལས་སྐྱོབ་པར་བྱེད་དོ། །འོ་ན། ཕུང་བོ་གསུམ་པའི་མདོའི་ནང་སྟོབས་བཞི་ཅི་ལྟར་ཚང་ཞེ་ན། བླ་མ་ལ་སྐྱབས་སུ་མཆིའོ་ནས་དགེ་འདུན་ལ་སྐྱབས་སུ་མཆི་ཞེས་པའི་བར་རྟེན་གྱི་སྟོབས། བཅོམ་ལྡན་འདས་དཔལ་རྒྱལ་བ་ཤཱཀྱ་ཐུབ་པ་ལ་ཕྱག་འཚལ་ལོ་ནས་རིན་པོ་ཆེ་དང་རི་དབང་གི་རྒྱལ་བོ་ལ་ཕྱག་འཚལ་ལོ་ཞེས་པའི་བར་གཉེན་པོ་ཀུན་ཏུ་སྤྱོད་པའི་སྟོབས། དེ་དག་ལ་སོགས་པ་ཕྱོགས་བཅུའི་འཇིག་རྟེན་གྱི་ཁམས་ནས་མི་འཆབ་བོ། །མི་སྦེད་དོ། །ཞེས་པའི་བར་རྣམ་པར་སུན་འབྱིན་པའི་སྟོབས། སླད་ཆད་ཀྱང་སྡོམ་པར་མི་འགྱུར་བ་ལགས་སོ། །ཞེས་པའི་བར་ཉེས་པ་ལས་སླར་ལྡོག་པའི་སྟོབས་ཚང་ངོ་། །

ཕན་ཡོན་ནི། བྱང་ཆུབ་སེམས་དཔའི་ལྟུང་བ་བཤགས་པའི་ཕན་ཡོན་ལས། སངས་རྒྱས་གཅིག་གི་མཚན་བརྗོད་ན་ཡོན་ཏན་དཔག་ཏུ་མེད་པར་འགྱུར་རོ། །སངས་རྒྱས་སོ་ལྔའི་མཚན་ནས་ལན་གཅིག་བརྗོད་ན། སེམས་ཅན་གང་ཞིག་གི་རྣ་ལམ་དུ་གྲག་པ་དེ་ངན་སོང་དུ་མི་སྐྱེ་ཞིང་དེའི་ཡོན་ཏན་ནི་རྒྱལ་བ་རྣམས་ཀྱིས་བགྲང་བར་མི་ནུས་སོ། །ཞེས་དང་། འདུལ་བ་ལུང་ལས་ཀྱང་། བཀའ་ཡི་ཚེ་དང་ལྡན་པ་རྣམས་ཉོན་ཅིག མ་འོངས་པའི་དུས་ལྔ་བརྒྱའི་ཐ་མ་ལ། སེམས་ཅན་ཉོན་མོངས་པའི་སྒྲིབ་པ་ཅན་རྣམས་ལ་ཕན་བཏགས་པའི་ཕྱིར། འཕགས་པ་ཕུང་བོ་གསུམ་པའི་མདོ་འདིས་དཀོར་གྱི་ཕུང་བོ་རི་རབ་ཙམ་ཡང་བྱང་སྟེ་སེམས་ཅན་འཆི་ཁ་རྣ་ལམ་དུ་བསྒྲགས་པར་འགྱུར་ན། ངན་སོང་དུ་མའི་སྐྱེ་སྒོ་གཅོད་པར་འགྱུར་རོ། །གསུངས་པ་ལྟར། དཔེར་ན། བྱ་བརྒྱ་འུར་རྡོ་གཅིག་གིས་འདེད་པ་ལྟ་བུའོ། །ཚུལ་འདི་ལ་དགོངས་ནས་ཡབ་རྗེ་སྐལ་ལྡན་རྒྱ་མཚོས། སྟོབས་རྣམ་བཞིས་སྡིག་ལྟུང་སྦྱོང་བྱེད་པའི། །མི་དེ་ལ་མཐོ་རིས་ཅི་བདེར་ཡོད། །ཅེས་དང་། ལས་དགེ་སྡིག་མི་བསླུ་ཕྱི་བཞིན་འབྲང་། །སྡིག་ཉེས་ལྟུང་སྟོབས་བཞིས་སྦྱངས་ན་ལེགས། །གསུངས་སོ། །

དེ་ལྟར་ཉམས་ལེན་གནད་དུ་སོང་ན་སྡིག་ལྟུང་དག་པ་ལ་རྨི་ལྟས་ཇི་ལྟར་བྱུང་ཅེ་ན། རྨི་ལམ་དུ་ཟས་ངན་སྐྱུགས་པ་དང་། ཞོ་དང་འོ་མ་ལ་སོགས་འཐུང་བ་དང་། ཉི་མ་དང་ཟླ་བ་མཐོང་བ་དང་། ནམ་མཁའ་ལ་འགྲོ་བ་དང་། མེ་འབར་བ་དང་། མ་ཧེ་དང་མི་ནག་པོ་ཐུབ་པ་དང་། དགེ་སློང་དང་དགེ་སློང་མའི་དགེ་འདུན་མཐོང་བ་དང་། འོ་མ་འབྱུང་བའི་ཤིང་དང་། གླང་བོ་ཆེ་དང་། ཁྱུ་མཆོག་དང་། རི་དང་། སེང་གེའི་ཁྲི་དང་། ཁང་བ་བཟང་བོའི་སྟེང་དུ་འཛེགས་པ་དང་། ཆོས་ཉན་པ་སོགས་རྨིས་ན་སྡིག་པ་དག་པའི་རྟགས་སུ་བསྐུལ་བྱེད་ཀྱི་གཟུངས་ལས་གསུངས་པ་དང་། ར་ག་ཨ་སེའི་གྲུབ་རྟགས་ཚོད་འཛིན་ལས། ཁྲུས་བྱེད་གོས་དཀར་གྱོན་དང་གངས་རིར་འཛེགས། །ནམ་ལངས་ཤེལ་རྙིང་མཆོད་རྟེན་བསྐོར་བ་བྱེད། །དེ་དག་སྒྲིབ་པ་དག་པའི་རྟགས་སུ་གསུངས། །ཞེས་ཀྱང་གསུངས་སོ། །

མཎྜལ།

༡ མཎྜལ་གྱི་ཁུངས་དང་དགོས་པ། མཎྜལ་ཞེས་པ་སྙིང་བོ་ལེན་པའི་དོན་དུ་འཇུག་པས་ན། དེ་ཡང་བསོད་ནམས་དང་ཉམས་རྟོགས་ཀྱི་སྙིང་བོ་རང་ཅག་གིས་ལེན་དགོས་པ་ཡིན། མཎྜལ་འབུལ་ཚུལ་ནི། དཀོན་མཆོག་སྤྲིན་སོགས་ལས་མེ་ཏོག་དང་འབྲས་བུ། དཔག་བསམ་གྱི་ཤིང་སོགས་བདག་གིར་འཛིན་པ་མེད་པར་ཉིན་ལན་གསུམ་མཚན་ལན་གསུམ་དུ་སངས་རྒྱས་བྱང་ཆུབ་སེམས་དཔའ་རྣམས་ལ་འབུལ་བ་དེ་ཡིན། དེ་ཡང་ཆོས་པ་རྣམས་ཀྱིས་དཀོན་མཆོག་མཆོད་པ་དང་། ཚོགས་བསགས་སྒྲིབ་སྦྱོང་། ཆོས་འཆད་ཉན་གྱི་སྐབས་སུ་བེད་སྤྱོད་གཏོང་བ་ཡིན་ལ། འདུས་པའི་རྩ་རྒྱུད་ལས། ཞིང་འདིར་རིན་ཆེན་སྣ་བདུན་གྱིས། །མཁས་པ་དག་གིས་ཡོངས་བཀང་ནས། །དངོས་གྲུབ་འདོད་པ་སྦྱིན་པའི་ཕྱིར། །ཉིན་རེར་ཤེས་རབ་ཅན་གྱིས་དབུལ། །ཞེས་གསུངས་པ་ལྟར། རང་ཅག་གིས་ཀྱང་སྔོན་བྱོན་དམ་པའི་རྣམ་ཐར། རྗེས་འཇུག་གདུལ་བྱའི་ཉམས་ལེན་དུ་འཁྱེར་ནས། དཀར་བོ་དགེ་ཕྱོགས་ལ། ཡོད་གི་ཁ་གསོག་འདོད་བྱེད་པ་ལས། མེད་གི་ཕོར་བ་གཡུགས་འདོད་མི་སྐྱེས་པ་གལ་ཆེའོ། །འདིར་སྐབས་སུ་བབ་པ་ནི། ཚོགས་བསགས་པ་མཎྜལ་གྱི་ཁྲིད་ཡིན།

༢ མཎྜལ་གྱི་དབྱེ་བ། ཕྱི། ནང་། གསང་བ། དེ་ཁོ་ན་ཉིད་བཅས་ཀྱི་མཎྜལ་ཡོད་ལ།

༡ ཕྱིའི་མཎྜལ་ལ། མཎྜལ་གྱི་ས་གཞི་རབ་ཡིན་ན། གསེར་དངུལ་སོགས་རིན་པོ་ཆེའི་རིགས་དང་། འབྲིང་ལི་ཟངས་དང་། ཐ་མ་ཤིང་རྡོ་སོགས་ཀྱང་ཆོག རྗེ་བདག་ཉིད་ཆེན་པོས་ཀྱང་རྡོའི་མཎྜལ་ལ་བརྟེན་ནས་ཕྱག་ངར་བརྡོལ་བ་སོགས་རྣམ་ཐར་ན་གསལ་བ་དང་། ད་ལྟ་ཡང་འོལ་ཁ་ཆོས་གླིང་ན་མཎྜལ་འབུལ་བྱེད་ཀྱི་རྡོ་ལ་མཇལ་རྒྱུ་ཡོད། མཎྜལ་གྱི་དབྱིབས་ཟླུམ་པོ། ཁ་དོག་མ་ངེས་པ། ཆེ་ཚད་ལ་ཚད་མེད་ཅིང་། ཆུང་མཐའ་ལ་ཕོར་བ་ལས་མ་ཆུང་བ། བང་རིམ་ལ་གསུམ་དང་བཞི་གང་རུང་ཆོག་ལ། ཚོམ་བུ་ཡང་རབ་རིན་པོ་ཆེའི་རིགས། འབྲིང་དུང་དང་མགྲོན་བུ་སོགས། ཐ་མ་འབྲུའི་རིགས་དང་། མ་འབྱོར་ན་བྱེ་མ་དང་ས་རྡོ་སོགས་ཀྱང་རུང་ལ། འབྱོར་བ་ཡོད་བཞིན་དུ་རྒྱུ་གང་ངན་ལ་མཆོད་པ་བྱ་བ་ནི། རང་གི་བསོད་ནམས་ཉམས་པའི་རྒྱུ་ཡིན་པས། དམུས་ལོང་གིས་མིག་ལྡན་ལ་མགོ་བསྐོར་གཏོང་བ་དང་འདྲ་བར་པོ་ཏོ་བས་གསུངས་སོ། །མཎྜལ་འབུལ་བ་ནི། དཔེར་ན། རྒྱལ་བོ་ཆེན་པོ་ཞིག་ལ་བྱ་བ་གལ་ཆེན་ཞིག་ཞུ་ན། འབུལ་བ་གཏོས་ཆེ་བ་ཞིག་སྔོན་དུ་ཕུལ་ནས་ཞུ་དགོས་པ་ལྟར། རང་རེ་ཀུན་ཚོགས་ཞིང་ལ་དོན་གལ་ཆེན་ཞིག་ཞུ་ན། དེའི་དོན་དུ་མཎྜལ་འབུལ་བ་ཡིན།

མཎྜལ་འབུལ་ཚུལ་ནི། མཆོད་འབུལ་གྱི་སྐབས། ཤར་ཚོགས་ཞིང་ལ་འཁོར་བ་དང་། གསོལ་འདེབས་ཀྱི་སྐབས་ཤར་རང་ལ་འཁོར་བའི་ཁྱད་པར་ཤེས་དགོས། མཎྜལ་གྱི་ས་གཞི་ལག་གཡོན་གྱིས་ཚོམ་བུ་ཕྲན་ཙམ་དང་བཅས་འཛིན་ཅིང་། ཕྱག་གཡས་ཀྱི་ལག་ངར་ལ་མངོན་ཤེས་འཆར་བའི་རྩ་ཡོད་པས། དེས་ཕྱིས་ན་མངོན་ཤེས་འཐོབ་པ་དང་། ཕྱིར་ལན་གསུམ་ཕྱིས་ཏེ་ཐོག་མེད་ནས་རང་གཞན་གྱིས་བསགས་པའི་སྡིག་སྒྲིབ་དག་པའི་མོས་པ་བྱེད། ནང་དུ་ལན་གསུམ་ཕྱིས་ཏེ་ཚོགས་ཞིང་གི་སྐུ་གསུང་ཐུགས་ཀྱི་ཡོན་ཏན་འཐོབ་པར་བསམ་དགོས།

མཎྜལ་གྱི་ཚོམ་བུ་འགོད་ཚུལ་ལ་རྣམ་གྲངས་མང་ཡང་། འགྲོ་མགོན་ཆོས་རྒྱལ་འཕགས་པས་སྲོལ་ཕྱེས་པའི་ཚོམ་བུ་སོ་བདུན་མ་ནི་ཁྱབ་ཆེ་བས། སོ་བདུན་མ་ལྟར་ན། དབང་ཆེན་གསེར་གྱི་ས་གཞི་ནས་ཕྱོགས་ལས་རྣམ་པར་རྒྱལ་བའི་རྒྱལ་མཚན་བར་ཚོམ་བུ་བཀོད་དེ་མཐར་ཏོག་གཟུགས་དགོས། སྣོད་བཅུད་འཇིག་རྟེན་ཁམས་འདི་རང་གི་ལག་པས་བཀྱགས་ཏེ། ཞིང་དམ་པ་རྣམས་ལ་དབུལ་བར་བགྱིའོ། །རིམ་གྱིས་དམིགས་པ་ཇེ་རྒྱས་སུ་བཏང་ནས། དེ་འདྲ་བ་གཅིག་ཙམ་མ་ཡིན་པར་སྟོང་གསུམ་གྱི་སྟོང་ཆེན་པོ་འཇིག་རྟེན་གྱི་ཁམས་གསལ་བཏབ་ནས་དབུལ་དགོས་སོ། །

འོ་ན། མཎྜལ་གྱི་ས་གཞི་ཆུང་ངུའི་སྟེང་དུ་སྣོད་བཅུད་དེ་དག་ཤོང་ངམ་ཞེ་ན། གཡག་རྭའི་ནང་དུ་མི་ལའི་སྐུ་ཆུང་ངུར་མ་སོང་བར་བཞུགས་པ་དང་། ཇོ་བོས་སྐུ་ལུས་ཡོངས་རྫོགས་ས་ཙྪའི་རྐོས་ཕོར་ཆུང་ངུ་ཞིག་གི་ནང་དུ་བཅུག་པ་སོགས་རྫུ་འཕྲུལ་སྣ་ཚོགས་ཞིག་བསྟན་པའི་མཐར། དེ་རིང་འོ་ཅག་གིས་གང་བྱས་པ་འདི་ཀུན། རིགས་པ་སྨྲ་བའི་རྟོག་གེ་བ་རྣམས་ཀྱིས་འགལ་བར་བརྩི། འོ་ན་བརྩི་ནའང་བརྩིར་ཆུག ཆོས་ཀྱི་གནས་ལུགས་འདི་འདྲ་ཞིག་མིན་རེ་ཞེས་རྒྱ་བོད་གཉིས་ཀ་འགྲིམས་ནས་མནའ་བསྐྱལ་ཡང་ཆོག་གསུངས་པ་ལྟར་ལགས་སོ། །

དེ་ནས་གསོལ་བ་འདེབས་པ་ལ། དོན་ཆེན་པོ་གསུམ་དང་། ལམ་མཆོག་སྒོ་འབྱེད། བྱིན་རླབས་སྤུངས་ཞུས། ཕུར་ཚུགས་སུ་གསོལ་བ་འདེབས་པ་སོགས་གང་རུང་གིས་འདོད་དོན་ལ་གསོལ་བ་གདབ་བོ། །

གྲངས་ཇི་ལྟར་གསོག་ཚུལ་ནི། ས་གཞི་སྤོས་ཀྱིས་བྱུགས་ཤིང་མེ་ཏོག་བཀྲམས། །རི་རབ་གླིང་བཞི་ཉི་ཟླས་བརྒྱན་པ་འདི། །སངས་རྒྱས་ཞིང་དུ་དམིགས་ཏེ་ཕུལ་བ་ཡིས། །འགྲོ་ཀུན་རྣམ་དག་ཞིང་ལ་སྤྱོད་པར་ཤོག། ཨི་དམ་གུ་རུ་རཏ་ན་མཎྜ་ལ་ཁམ་ནི་ཪྻཱ་ད་ཡ་མི། ཞེས་འབུམ་ཕྲག་བཟླ། མཇུག་བསྔོ་སྨོན་གྱིས་རྒྱས་གདབ་པར་བྱའོ། །

༢ ནང་གི་མཎྜལ་འབུལ་སྟངས་ནི། རང་གི་ལུས་ཀྱི་ཡན་ལག་རྣམས་མཎྜལ་དུ་བསྒྱུར་ནས་འབུལ་བ་ཡིན། ལུས་ཀྱི་པགས་པ་གསེར་གྱི་ས་གཞི་དང་། ཁྲག་གིས་ཆག་ཆག་དང་། ཡན་ལག་གླིང་བཞི་དང་། ཉིང་ལག་གླིང་ཕྲན་བརྒྱད། ཁོག་པ་རི་རབ། མགོ་བོ་རྣམ་པར་རྒྱལ་བའི་ཁང་བཟང་། མིག་གཉིས་ཉི་ཟླ། སྙིང་ནོར་བུ། དབང་བོ་ནང་ཁྲོལ་རྣམས་ལྷ་མིའི་དཔལ་འབྱོར་དུ་བསྒྱུར་ནས་འབུལ་བ་ཡིན། རྗེ་བཙུན་བློ་བཟང་ཆོས་རྒྱན་གྱི་གཅོད་གཞུང་དུ། དག་པ་རབ་མཛེས་སོགས་ལྟར་དང་། ཕྱག་ལེན་འདི་བྱ་བྲལ་གྱི་རྣལ་འབྱོར་བ་ལ་ཧ་ཅང་མཁོ་བ་ཡིན།

༣ གསང་བའི་མཎྜལ་ནི། རྒྱལ་མཆོག་བདུན་པས། ཐབས་མཆོག་བདེ་ཆེན་རོལ་རྩེད་ཀྱིས། །ཞེས་སོགས་ཀྱིས་བདེ་སྟོང་གི་ཡེ་ཤེས་ཧཱུཾ་ཡིག་ཏུ་སྤྲོས་པ་ཡོངས་སུ་གྱུར་བ་ལས་རི་གླིང་སོགས་སུ་ཤར་བ་དག་པའི་སྣོད་བཅུད་དུ་དམིགས་ཏེ་ཚོམ་བུ་སོ་སོར་བཀོད་ནས་དབུལ་བའོ། །

༤ དེ་ཁོ་ན་ཉིད་ཀྱི་མཎྜལ་ནི། རྒྱལ་མཆོག་བདུན་པས། བདེ་ཆེན་ཀུན་ཏུ་བཟང་བོའི་རྣམ་རོལ་གྱིས། །ཞེས་སོགས་སྐུ་དག་པ་སྒྱུ་མའི་སྐུ་དང་། ཐུགས་དག་པ་དོན་གྱི་འོད་གསལ་ཟུང་དུ་འཇུག་པ་སོགས་ཧཱུཾ་ཡིག་གི་རྣམ་པར་སྤྲོས་པ་རི་གླིང་སོགས་སུ་ཤར་བ་དག་པའི་སྣོད་བཅུད་དུ་དམིགས་ཏེ་ཚོམ་བུ་སོ་སོར་བཀོད་ནས་དབུལ་ལོ། །

༣ མཎྜལ་ཕུལ་བའི་ཕན་ཡོན། ཟ་མ་ཏོག་ལྟ་བུའི་གཏམ་ལས། བདེ་བར་གཤེགས་པ་མཆོག་རྣམས་ཀྱི། །ཕོ་བྲང་མཆོག་ནི་བརྒྱན་བྱེད་པ། །གསེར་གྱི་མདོག་ལྟར་ལྡན་འགྱུར་ཞིང་། །ནད་རྣམས་ཀུན་ནས་གྲོལ་བར་འགྱུར། །ལྷ་དང་མི་ལས་ཁྱད་འཕགས་ཤིང་། །ཉི་མའི་འཁོར་ལོ་ལྟ་བུར་མཛེས། །ནོར་དང་གསེར་ནི་མང་བ་དང་། །རྒྱལ་བོའི་རིགས་ཀྱིས་རྒྱལ་བར་འགྱུར། །འཇིག་རྟེན་གསུམ་གྱིས་མཆོད་པ་ཡི། །སངས་རྒྱས་ལ་ནི་གང་ཞིག་འདིར། །མཎྜལ་མེ་ཏོག་བཅས་བྱེད་པ། །འགྲོ་བའི་བདག་པོ་ཚེ་རིང་ཞིང་། །སྣ་ཚོགས་ནད་ཀྱི་འཇིགས་ལས་གྲོལ། །གང་ཡིན་དེ་ཡིས་སྐད་ཅིག་ཐོབ། །བདེ་གཤེགས་མཎྜལ་བྱེད་དེ་དག། ཕ་རོལ་ཕྱིན་དྲུག་ཐོབ་འགྱུར་ཏེ། །ཆུ་དང་ས་བསྲེས་བཏང་སྦྱིན་པ། །གྲོག་མོ་སོགས་སེལ་ཚུལ་ཁྲིམས་ཏེ། །བསྲེས་ནས་ཉེད་པ་བཟོད་པ་ཡིན། །འབད་པ་བྱེད་པ་བརྩོན་འགྲུས་ཡིན། །སྐད་ཅིག་དེ་ལ་རྩེ་གཅིག་ཏུ། །སེམས་འཛིན་བྱེད་པ་བསམ་གཏན་ཡིན། །ལེགས་པར་གཟོབ་པ་ཤེས་རབ་བོ། །སྣ་ཚོགས་བསོད་ནམས་ཀྱིས་བརྒྱན་པ། །ས་གཞི་བྲིས་པ་འབུལ་བྱེད་པ། །ལྷ་ཡི་བདེ་བ་ཐམས་ཅད་དང་། །ལོངས་སྤྱོད་མཆོག་དང་ལྡན་འགྱུར་ཞིང་། །མིར་སྐྱེས་གསེར་ལས་ལྷག་པ་ཡི། །ཁ་དོག་དང་ལྡན་མཛེས་པ་དང་། །པདྨའི་མདོག་ལྟར་ཡན་ལག་ཚང་། །མིག་ནི་དཀྱུས་རིང་མཛེས་པར་འགྱུར། །ཞེས་སོ། །གཞན་ཡང་མཎྜལ་གྱི་མདོ་ལས། ཐུབ་པས་མཎྜལ་བྱས་པ་ཡིས། །ཕ་རོལ་ཕྱིན་པ་འདི་དྲུག་ཐོབ། །ཞེས་གསུངས་པ་ལྟར་མཎྜལ་ཕུལ་བ་འདི་ལ་ཕར་ཕྱིན་དྲུག་ཚང་སྟེ། དེ་ཉིད་ལས། ཆུ་བཅས་ལྕི་བ་སྦྱིན་པ་སྟེ། །ལེགས་པར་ཉུག་པར་བྱེད་པ་ཚུལ་ཁྲིམས་སོ། །སྲིན་དང་གྲོག་སྦུར་བསལ་བ་བཟོད་པ་ཡིན། །བྱ་བ་ལ་ནི་ཉེར་ཞུགས་བརྩོན་འགྲུས་ཏེ། །དེ་ལ་སྐད་ཅིག་སེམས་ནི་གཅིག་བྱེད་པ། །བསམ་གཏན་ཤེས་རབ་རི་མོ་གསལ་བའོ། །ཞེས་པ་ལྟར་བ་བྱུང་ལྔ་སྟེ་གཅི་ཞོ་འོ་མ་མར་བཅས་ལྔས་བྱུགས་པ་སྦྱིན་པ་དང་། མཎྜལ་ཁོད་སྙོམས་སུ་ཉུག་པ་ཚུལ་ཁྲིམས། མཎྜལ་ལ་གནས་པའི་སྲིན་བུ་གྲོག་སྦུར་སོགས་བསལ་བ་བཟོད་པ། མཎྜལ་གྱི་བྱ་བ་ལ་ཉེ་བར་ཞུགས་པ་བརྩོན་འགྲུས། མཎྜལ་གྱི་དམིགས་པ་རྩེ་གཅིག་གཏོད་པ་བསམ་གཏན། མཎྜལ་ཚོམ་བུ་བཀྲ་བར་བཀོད་པ་ཤེས་རབ་བོ། །དེ་ལྟར་མཎྜལ་ཕུལ་བ་ལ་བརྟེན་ནས། དགེ་སློང་མ་དཔལ་མོས་ཐུགས་རྗེ་ཆེན་པོ་ཞལ་གཟིགས་པ་དང་། རྣལ་འབྱོར་དབང་ཕྱུག་དཔལ་ལྡན་དགོན་པ་བས། དུས་རྒྱུན་མཎྜལ་འབུལ་གིན་ཡོད་ཀྱང་། ཚེ་ཞིག་ཏིང་འཛིན་ལ་ཞག་བདུན་མཉམ་པར་བཞག་པ་འབྲོམ་གྱིས་མཁྱེན་ནས། ཁྱེད་ལས་ལྷག་པ་ཇོ་བོ་ཙམ་ཡིན་ཏེ། མཎྜལ་དུས་དྲུག་རེ་མ་ཆག་པར་འབུལ་བ་ཡིན་ཞེས་བཀའ་བཀྱོན་གནང་བ་ཡིན། དེ་ནས་མཎྜལ་ལ་འབུངས་པས་སངས་རྒྱས་ཀྱི་ཞིང་རྡུལ་ཕྲ་རབ་ཀྱི་གྲངས་དང་མཉམ་པ་ཁྲ་ལམ་མེར་གཟིགས་པ་ཡིན། གཞན་ཡང་། ཇོ་བོས་མུ་སྟེགས་པ་དང་རྩོད་པ་མཛད་པའི་ཚེ་མུ་སྟེགས་པས་སྒྲའི་དཀའ་གནས་ཤིན་ཏུ་ཕྲ་བ་ཞིག་དྲིས་པས། ཇོ་བོས་མ་དགོངས་པ་ན། ཆབ་གསང་ལ་འབྱོན་ཁུལ་མཛད་ནས་ནང་དུ་བྱོན། ཇོ་བོས་རང་གི་ཐུགས་དམ་གྱི་རྟེན་དུ་གྱུར་བ་ཇོ་མོ་སྒྲོལ་མར་མཎྜལ་ཕུལ་ནས་གསོལ་བ་དྲག་ཏུ་བཏབ་པས། སྒྲའི་དཀའ་གནད་དེ་ཐུགས་ལ་ཝལ་གྱིས་ཤར་ནས་མུ་སྟེགས་པ་ལ་ལན་མཛད་པ་ན། ཇོ་བོ་རྒྱལ་ཏེ་སངས་རྒྱས་ཀྱི་བསྟན་པ་རྒྱས་པར་གྱུར་བ་ལྟ་བུ་ཡིན་ནོ། །དེ་བཞིན་རྗེ་བདག་ཉིད་ཆེན་པོས་ཀྱང་འོལ་ཁར་ཕེབས་ཏེ་མཎྜལ་རྒྱུན་མ་ཆད་པར་ཕུལ་བས། སངས་རྒྱས་སོ་ལྔའི་ཞལ་གཟིགས་པ་ཡིན་ནོ། །

བླ་མའི་རྣལ་འབྱོར།

༡ བླ་མ་ཉིད་བྱིན་རླབས་ཀྱི་འཇུག་སྒོར་བསྟན་པ། རང་རྒྱུད་ལ་བྱིན་རླབས་འཇུག་པ་ལ། བླ་མའི་རྣལ་འབྱོར་ལ་བསྟེན་དགོས། དམིགས་བརྩེ་མ་དང་འབྲེལ་བའི་བླ་མའི་རྣལ་འབྱོར་ལ་གཉིས་ཡོད་ལ། སྲད་རྒྱུད་ལུགས་ཀྱི་བླ་མའི་རྣལ་འབྱོར་དགའ་ལྡན་ལྷ་བརྒྱ་མ་དང་། དབེན་ས་ལུགས་ཀྱི་བླ་མའི་རྣལ་འབྱོར་བླ་མཆོད་ཡིན། ཐེག་པ་ཆེ་ཆུང་གི་ཡོན་ཏན་ཆེ་སྐྱེས་ཆུང་སྐྱེས་ཐམས་ཅད་བླ་མ་ལ་རག་པ་ཡིན། བླ་མ་ནི་མཆོག་གསུམ་གྱི་སྤྱི་གཟུགས་ཡིན་པས། རྒྱུད་ལས། བླ་མ་སངས་རྒྱས་བླ་མ་ཆོས། །དེ་བཞིན་བླ་མ་དགེ་འདུན་ཏེ། །ཀུན་གྱི་བྱེད་པོ་བླ་མ་ཡིན། །ཞེས་གསུངས་པ་ལྟར་སྐྱབས་གསུམ་ཀུན་འདུས་ཀྱི་ངོ་བོར་མོས་ནས་བླ་མའི་རྣལ་འབྱོར་བསྒོམས་ན། བསྐྱེད་རྫོགས་སྒོམ་པ་དང་བཟླས་བརྗོད་བྱས་པ་སོགས་ལས་ཁྱད་པར་དུ་འཕགས་པ་ཡིན་ཏེ། སམྦུ་ཊའི་རྒྱུད་ལས། བསྐྱེད་རིམ་བསྒོམ་པ་མང་ལགས་ཏེ། །བླ་མ་བསྒོམ་པའི་གོང་ན་མེད། །བཟླས་བརྗོད་བྱེད་པ་མང་ལགས་ཏེ། །གསོལ་བ་འདེབས་པའི་གོང་ན་མེད། །རྒྱུན་ཏུ་གསོལ་བ་བཏབ་པ་ན། །འབྲལ་མེད་ཉམས་མྱོང་འོང་བར་ངེས། །ཞེས་སོ། །

ལྷག་པར་དུ་ཉི་མའི་འོད་ཟེར་མེ་ཤེལ་ལ་དྲངས་ཏེ་བུད་ཤིང་སྟེང་དུ་བབས་ན་མེ་འབར་བ་ལྟར། བླ་མ་དང་སངས་རྒྱས་དབྱེར་མེད་དུ་སྒོམ་ན། བྱིན་རླབས་ཀྱི་ཚན་ཁ་གཞན་ལས་ཆེ་བ་ཡིན། ས་སྐྱ་པཎ་ཆེན་གྱིས། ཉི་མའི་འོད་ཟེར་རབ་ཚ་ཡང་། །མེ་ཤེལ་མེད་པར་མེ་མི་འབྱུང་། །དེ་བཞིན་སངས་རྒྱས་བྱིན་རླབས་ཀྱང་། །བླ་མ་མེད་པར་འཇུག་མི་ནུས། །ཞེས་དང་། རྒྱུད་ལས། དྲིན་དང་ལྡན་པའི་བླ་མ་དེ། །ལག་པའི་མཐིལ་ལམ་སྙིང་གི་དཀྱིལ། །ལུས་ཀྱི་ཆ་ཤས་གར་བསྒོམས་ཀྱང་། །སངས་རྒྱས་སྟོང་གི་བྱིན་རླབས་ཀྱང་། །གང་ཟག་དེ་ཡིས་སྡུད་པར་བྱེད། །ཅེས་པ་ལྟར་བླ་མའི་རྣལ་འབྱོར་བསྒོམས་པས་སངས་རྒྱས་སྟོང་གིས་བྱིན་རླབས་འཇུག་ནུས་པར་མདོ་རྒྱུད་དུ་མར་གསུངས་ཡོད་པས། སྔོན་བྱོན་དམ་པ་རྣམས་ཀྱིས་ཉམས་ལེན་གྱི་མཐིལ་དུ་འཛིན་པ་ཡིན་ཏེ། རྨོག་ལྕོག་པས། ཀྱེ་རྡོ་རྗེ་རང་དམར་ན་དམར། ཐུགས་རྗེ་ཆེན་པོ་རང་དཀར་ན་དཀར། རྗེ་བཙུན་སྒྲོལ་མ་རང་སྔོ་ན་སྔོ། ང་ནི་གང་དུ་བསྡད་ཀྱང་བླ་མའི་སྣང་བ་དང་འབྲལ་མ་མྱོང་། ཚེ་གཅིག་གིས་སངས་རྒྱས་སམ་དེ་ཡོང་ཡོང་འདྲ་གསུངས་པ་དང་། དེ་བས་ན། བླ་མ་མཚན་ཉིད་དང་ལྡན་པ་ཞིག་དང་། སློབ་མ་བསོད་ནམས་ཀྱི་བསགས་རྒྱབ་ཅན་གཉིས་འཛོམས་ནས། བླ་མའི་རྣལ་འབྱོར་གནད་དུ་སོང་ན། སངས་རྒྱས་ལག་པས་བཟོས་པ་འདྲ་བ་ཞིག་བྱེད་རྒྱུ་ཡོད་པར་བཀའ་གདམས་པ་གཙང་བ་ནམ་མཁའ་རིན་ཆེན་གྱིས་གསུངས་ལ། ཕ་དམ་པས་ཀྱང་། བླ་མས་བསྐྱལ་ན་གང་འདོད་གནས་སུ་སླེབས། །རྐང་གླར་མོས་གུས་ཕུལ་ཅིག་དིང་རི་བ། །ཞེས་གསུངས་སོ། །

དེ་བས་འདིར་ངོ་བོ་རང་གི་དྲིན་ཅན་རྩ་བའི་བླ་མ་ཡིན་པ་ལ་རྣམ་པ་ཁམས་གསུམ་ཆོས་ཀྱི་རྒྱལ་བོ་ཙོང་ཁ་པར་དམིགས་ནས། དམིགས་བརྩེ་མ་བཟླས་བརྗོད་བྱེད་པ་ཡིན། དམིགས་བརྩེ་མ་ནི། རྗེ་གསུང་ཐོར་བུ་ལས། དྲི་མེད་མཁྱེན་པའི་དབང་བོ་འཇམ་པའི་དབྱངས། །ཚད་མེད་བརྩེ་བའི་གཏེར་ཆེན་སྤྱན་རས་གཟིགས། །གངས་ཅན་མཁས་པའི་གཙུག་རྒྱན་རེད་མདའ་བ། །གཞོན་ནུ་བློ་གྲོས་ཞབས་ཀྱི་པད་མོར་འདུད། །ཐར་འདོད་བུང་བ་བདག་ཀྱང་བསྐྱང་དུ་གསོལ། །ཞེས་རྗེ་བདག་ཉིད་ཆེན་པོས་རེད་མདའ་བའི་ཞབས་ལ་ཕུལ་ཀྱང་། རེད་མདའ་བས། གསོལ་འདེབས་འདི་བདག་ལ་མི་འོས། ཁྱེད་རང་ལ་འོས་ཞེས་ད་ལྟའི་ཚིག་འདི་ལྟར་ཁ་བསྒྱུར་ནས་རྗེའི་ཞབས་ལ་ཕུལ་ཏེ་རྗེར་གསོལ་འདེབས་གནང་བ་དང་། ངེས་དོན་རྗེ་བཙུན་འཇམ་དབྱངས་ཀྱི་གསུང་གི་ཆ་ཤས་སུ་ཤར་བ་སྟེ། བཀའ་གདམས་ལྒིགས་བམ་ལས། བདག་གི་སྤྲུལ་བ་དམ་པ་ཞིག །རེ་འགའ་དགེ་སློང་ཉིད་དུ་སྤྲུལ། །ཞེས་པས་རྗེ་ཐམས་ཅད་མཁྱེན་པ་བསྟན་པ་དང་། རེས་འགའ་གསོལ་འདེབས་དབྱངས་ཀྱི་གཟུགས། །ཞེས་པས་དམིགས་བརྩེ་མ་བསྟན་ཅེས་དམ་པའི་གསུང་རྒྱུན་ཡང་ཡོད་དོ། །

༢ དམིགས་བརྩེ་མའི་དམིགས་རིམ། བླ་མའི་རྣལ་འབྱོར་ལག་ཏུ་བསྟར་ཚུལ་ནི། རྗེ་བླ་མའི་སྐུ་བརྙན་བྲིས་འབུར་གཙོ་བོར་བྱས་ཏེ་རྟེན་གསུམ་ལེགས་པར་བཀྲམ། མདུན་དུ་མཆོད་པ་གཡོ་མེད་ཅིང་བཀོད་པ་མཛེས་པར་བཤམས། སྟན་བདེ་བ་ལ་སྤྱོད་ལམ་ཚུལ་མཐུན་གྱིས་འཁོད་དེ། སྐྱབས་སེམས་དང་ཚད་མེད་བཞི་སྔོན་དུ་བཏང་ནས། ཆོས་ཐམས་ཅད་རང་བཞིན་མེད་རྟོགས་ཀྱི་བློ་ཤུགས་དྲག་པོ་བསྐྱེད་དེ། སྭ་བྷ་ཝ་ངག་ཏུ་བརྗོད་ཅིང་སྔགས་དོན་ལ་མཉམ་པར་བཞག འཁོར་འདས་ཀྱི་ཆོས་ཐམས་ཅད་སྟོང་བ་ཉིད་དུ་གྱུར། སྟོང་བའི་ངང་ལས་རང་གི་སྤྱི་བོ་རིན་པོ་ཆེའི་ཁྲི་ལ་པད་ཉི་ཟླ་བའི་གདན་བརྩེགས་ཀྱི་སྟེང་དུ། ངོ་བོ་རང་གི་རྩ་བའི་བླ་མ་ཡིན་པ་ལ་རྣམ་པ་ཁམས་གསུམ་ཆོས་ཀྱི་རྒྱལ་བོ་ཙོང་ཁ་པ་དགེ་སློང་གི་ཆ་བྱད་ཅན། དེའི་སྤྱི་བོར་རྗེ་བཙུན་འཇམ་པའི་དབྱངས་དམར་སེར་ལྒིགས་བམ་དང་རལ་གྲི་འཛིན་པ། མགྲིན་པར་སྤྱན་རས་གཟིགས་ཕྱག་བཞི་བ། ཕྱག་དང་བོ་གཉིས་ཐལ་མོ་སྦྱོར་ཞིང་། གཡས་འོག་མས་ཤེལ་ཕྲེང་དང་། གཡོན་འོག་མས་པད་དཀར་འཛིན་པ། ཐུགས་ཀར་ཕྱག་ན་རྡོ་རྗེ། གཡས་རྡོ་རྗེ་དང་། གཡོན་ཐུགས་ཀར་སྡིགས་མཛུབ་མཛད་པ། ཞབས་གཡས་བསྐུམས་གཡོན་བརྐྱང་གིས་བཞུགས་པ། འཇམ་དབྱངས་ཀྱི་ཐུགས་ཀར་ཨོཾ་དཀར་བོ། སྤྱན་རས་གཟིགས་ཀྱི་ཐུགས་ཀར་ཨཱཿདམར་བོ། ཕྱག་རྡོར་གྱི་ཐུགས་ཀར་ཧཱུཾ་སྔོན་པོ། དེ་གསུམ་ལས་འོད་ཟེར་འཕྲོས་པས། རྩ་བརྒྱུད་ཀྱི་བླ་མ་ཡི་དམ་སངས་རྒྱས་བྱང་སེམས་སོགས་སྐྱབས་གནས་ཐམས་ཅད་སྤྱན་དྲངས་ཏེ། རྡོ་མཚན་ལ་ཁ་བ་བབས་པ་བཞིན་ཐིམ་པས་སྐྱབས་གནས་ཀུན་འདུས་ཀྱི་བདག་ཉིད་དུ་གྱུར། དེ་ནས་ཇི་སྙེད་སུ་དག་ཞེས་སོགས་ཡན་ལག་བདུན་པ་འབུལ་དང་མཎྜལ་ཕུལ། དེ་ནས་རྗེ་བླ་མ་དེ་ཉིད་སངས་རྒྱས་ཀུན་འདུས། ཆོས་ཀུན་འདུས། དགེ་འདུན་ཀུན་འདུས། བླ་མ་ཀུན་འདུས། ཡི་དམ་ཀུན་འདུས། ཆོས་སྐྱོང་ཀུན་འདུས་ཀྱི་ངེས་ཤེས་ཤུགས་དྲགས་པོས་དྲངས་ཏེ། དུས་འདི་ནས་བཟུང་སྟེ་བྱང་ཆུབ་མ་འཐོབ་བར་དུ། སྐྱིད་ན་སྡུག་ན། ཤི་ན་གསོན་ན། ལེགས་ན་ཉེས་ན། རེ་ས་ཁྱེད་ལས་མེད་དོ་སྙམ་ནས་བློ་སྙིང་བྲང་གསུམ་ལིངས་ཀྱིས་བཀལ་ནས། མོས་གུས་དྲག་པོས་སེམས་རྩེ་གཅིག་གིས། དམིགས་བརྩེ་མ་ཅི་འགྲུབ་བཟླ། དེ་ལྟར་རྗེ་བཙུན་ཙོང་ཁ་པ་ཆེན་པོ་ལ་གསོལ་བ་དྲག་ཏུ་བཏབ་པས། སྐུ་ལས་འོད་ཟེར་དཀར་དམར་མཐིང་ཀ་གསུམ་བབས་ནས། སྒྲིབ་གཉིས་བག་ཆགས་དང་བཅས་པ་སྦྱངས་ཏེ་ས་ལམ་གྱི་རྟོགས་པ་ཁྱད་པར་རྒྱུད་ལ་འཁྲུངས། སྐྱེ་བ་ནས་ཚེ་རབས་ཐམས་ཅད་དུ་རྗེ་བླ་མས་དགྱེས་བཞིན་དུ་རྗེས་སུ་བཟུང་ནས། གསུང་གི་བདུད་རྩི་ངོམ་པ་མེད་པར་འཐུང་ནས་རྒྱལ་སྲས་ཀྱི་སྤྱོད་པ་ལ་ལེགས་པར་བསླབ་སྟེ། སྐུ་བཞིའི་བདག་ཉིད་འཐོབ་པར་བྱིན་གྱིས་བརླབས་སོང་སྙམ་པའི་མོས་པ་བྱ། ཐུན་བསྡུ་བའི་ཚེ། སྤྱི་བོའི་བླ་མ་དེ་ཉིད་འཐེབ་སོར་གྱི་ཚད་ཙམ་དུ་གྱུར་ནས་སྤྱི་བོའི་རྩ་དབུ་མར་བརྒྱུད་དེ་རང་གི་སྙིང་ཀ་པདྨ་འདབ་བརྒྱད་དུ་བྱོན་ནས་བྱང་ཆུབ་མ་འཐོབ་བར་འབྲལ་བ་མེད་པར་བཞུགས་པར་བསམ་མོ། །མཇུག་ཏུ། ཚེ་རབས་ཀུན་ཏུ་རྒྱལ་བ་ཙོང་ཁ་པས། །སོགས་དང་། འཇམ་དཔལ་དཔའ་བོས་ཇི་ལྟར་མཁྱེན་པ་དང་། །ཞེས་སོགས་བསྔོ་སྨོན་གྱིས་རྒྱས་འདེབས་པར་བྱའོ། །

༣ དམིགས་བརྩེ་མ་སྐོར་བདུན་གྱིས་གསོལ་བ་འདེབས་ཚུལ། དམ་ཚིག་གསུམ་བཀོད་ཀྱི་རྒྱུད་ལས། མཚན་དང་དཔེ་བྱད་འབར་བའི་ལྷ། །བསྐལ་བ་འབུམ་དུ་བསྒོམ་པ་ལས། །བླ་མ་དྲན་པའི་འབུམ་ཆར་མིན། །བསྙེན་སྒྲུབ་བཟླས་བརྗོད་ས་ཡ་བས། །བླ་མའི་གསོལ་ཚིག་ལན་གཅིག་མཆོག །ཅེས་གསུངས་པ་ལྟར་དམིགས་བརྩེ་མའི་གསོལ་འདེབས་འདི་ལ་སྐོར་བདུན་ཡོད་པ་ལས།

དམིགས་བརྩེ་མ་སུམ་སྐོར་ནི། རྗེ་བདག་ཉིད་ཆེན་པོ་བརྩེ་བ་འཕགས་མཆོག་སྤྱན་རས་གཟིགས་དང་། མཁྱེན་པ་རྗེ་བཙུན་འཇམ་པའི་དབྱངས་དང་མཉམ་པར་མ་ཟད། རྗེ་བླ་མ་དང་དེ་གཉིས་ཀྱི་སྤང་རྟོགས་ཀྱི་ཡོན་ཏན་སོགས་ཆ་ཐམས་ཅད་ནས་འདྲ་བ་དང་། ཡང་ན། རྗེ་བླ་མའི་སྤྱི་བོར་འཇམ་དབྱངས། མགྲིན་པར་སྤྱན་རས་གཟིགས་ཕྱག་བཞི་བ་སྒོམ་ནས། ཁོང་རྣམ་པ་གསུམ་དབྱེར་མེད་དུ་དམིགས་ནས་གསོལ་བ་འདེབས་པ་སྟེ། དམིགས་མེད××། །དྲི་མེད××། །གངས་ཅན××། །བློ་བཟང××གསོལ་བ་འདེབས། །ཞེས་ཚིག་རྐང་བཞི་བོ་འདི་དང་།

བཞི་སྐོར་ནི། རྒྱལ་བ་ཀུན་གྱི་མཁྱེན་བརྩེ་ནུས་གསུམ་ལྷ་སྐུ་བཞིན་ལག་གི་ངོ་བོར་ཤར་བ་རིགས་གསུམ་མགོན་པོ་དང་། དེ་གསུམ་བླ་མ་དགེ་བའི་བཤེས་གཉེན་གྱི་རྣམ་པར་ཤར་བ་རྗེ་བདག་ཉིད་ཆེན་པོ་ལགས་པར་མོས་ནས། རྗེ་བླ་མའི་སྤྱི་བོར་འཇམ་དབྱངས། མགྲིན་པར་སྤྱན་རས་གཟིགས། ཐུགས་ཀར་ཕྱག་ན་རྡོ་རྗེ་སྒོམ་ནས། དེ་བཞི་དབྱེར་མེད་དུ་གསོལ་བ་འདེབས་པ་སྟེ། དམིགས་མེད××། །དྲི་མེད××། །བདུད་དཔུང××། །གངས་ཅན××། །བློ་བཟང××། །ཞེས་ཚིག་རྐང་ལྔ་དང་། ཡང་རྗེ་བླ་མའི་གནས་གསུམ་དུ་རིགས་གསུམ་བཀོད་ནས་གསོལ་བ་འདེབས་ཞིང་དངོས་གྲུབ་ཞུ་བ་དང་།

ལྔ་སྐོར་ནི། རྗེ་བླ་མའི་གནས་གསུམ་དུ་རིགས་གསུམ་མགོན་པོ། ལྟེ་བར་རྒྱལ་བ་ཤཱཀྱ་ཐུབ་པ་སྒོམ་ནས། དེ་རྣམས་དབྱེར་མེད་དུ་གསོལ་བ་འདེབས་པ་སྟེ། བསྟན་པའི་བདག་པོ་སྟོན་པ་བཅོམ་ལྡན་འདས། །དམིགས་མེད××། །དྲི་མེད××། །བདུད་དཔུང××། །གངས་ཅན××། །བློ་བཟང××། །ཞེས་ཚིག་རྐང་དྲུག་དང་།

དྲུག་སྐོར་ནི། རྗེའི་གནས་གསུམ་དུ་རིགས་གསུམ་མགོན་པོ། ཕྱག་རྡོར་གྱི་ཐུགས་ཀར་རྒྱལ་བ་རྡོ་རྗེ་འཆང་། ལྟེ་བར་ཐུབ་དབང་བཀོད་ནས། དེ་རྣམས་ངོ་བོ་དབྱེར་མེད་དུ་བྱས་ནས་གསོལ་བ་འདེབས་པ་སྟེ། རིགས་ཀུན་ངོ་བོ་ཁྱབ་བདག་རྡོ་རྗེ་འཆང་། །བསྟན་པའི་བདག་པོ××། །དམིགས་མེད××། །དྲི་མེད××། །བདུད་དཔུང××། །གངས་ཅན××། །བློ་བཟང××། །ཞེས་ཚིག་རྐང་བདུན་པོ་འདི་སྲད་རྒྱུད་ལུགས་ཀྱི་དམིགས་བརྩེ་མ་དྲུག་སྐོར་དང་། དབེན་ས་བ་ལྟར་ན། དངོས་གྲུབ་ཀུན་འབྱུང་ཐུབ་དབང་རྡོ་རྗེ་འཆང་། དམིགས་མེད××། །དྲི་མེད××། །བདུད་དཔུང××། །གངས་ཅན་མཁས་པའི་གཙུག་རྒྱན་བློ་བཟང་གྲགས། །སྐྱབས་གསུམ་ཀུན་འདུས་བླ་མ་སངས་རྒྱས་ལ། །སྒོ་གསུམ་གུས་པའི་སྒོ་ནས་གསོལ་བ་འདེབས། །རང་གཞན་སྨིན་ཅིང་གྲོལ་བར་བྱིན་གྱིས་རློབས། །མཆོག་དང་ཐུན་མོང་དངོས་གྲུབ་བསྩལ་དུ་གསོལ། །ཞེས་ཚིག་རྐང་དགུ་འདོན་ཞིང་ལྷ་འགོད་ཚུལ་ལ་ཁྱད་པར་མེད་ལ། ཡང་རྗེའི་ཐུགས་ཀར་འཇིགས་བྱེད་བཀོད་ནས། འཇམ་དཔལ་ཁྲོས་པའི་ཟློས་གར་གཤིན་རྗེ་གཤེད། །ཅེས་ཀྱང་སྦྱར་ཆོག་གོ།

བདུན་སྐོར་ནི། རྗེ་བླ་མའི་གནས་གསུམ་དུ་རིགས་གསུམ་མགོན་པོ། ཕྱག་རྡོར་གྱི་ཐུགས་ཀར་རྒྱལ་བ་རྡོ་རྗེ་འཆང་། ལྟེ་བར་ཐུབ་དབང་། གསང་གནས་སུ་རྗེ་བཙུན་སྒྲོལ་མ་བཀོད་ནས། དེ་རྣམས་ངོ་བོ་དབྱེར་མེད་དུ་གསོལ་བ་འདེབས་པ་སྟེ། འཕྲིན་ལས་ཀུན་འགྲུབ་རྗེ་བཙུན་སྒྲོལ་མ་ཡིན། །དངོས་གྲུབ་ཀུན་འབྱུང་ཐུབ་དབང་རྡོ་རྗེ་འཆང་། དམིགས་མེད××། །དྲི་མེད××། །བདུད་དཔུང××། །གངས་ཅན××། །བློ་བཟང××། །ཞེས་ཚིག་རྐང་བདུན་དང་།

དམིགས་བརྩེ་མ་བརྒྱད་སྐོར་ནི། རྗེ་བླ་མའི་གནས་གསུམ་དུ་རིགས་གསུམ་མགོན་པོ། སྤྱི་བོའི་འཇིགས་བྱེད་ཀྱི་ཐུགས་ཀར་འཇམ་དབྱངས། ཕྱག་རྡོར་གྱི་ཐུགས་ཀར་རྡོ་རྗེ་འཆང་། ལྟེ་བར་ཐུབ་དབང། གསང་གནས་སུ་སྒྲོལ་མ་བཀོད་ནས། དེ་རྣམས་ངོ་བོ་དབྱེར་མེད་དུ་གསོལ་བ་འདེབས་པ་སྟེ། འཇམ་དཔལ་ཁྲོས་པའི་ཟློས་གར་གཤིན་རྗེ་གཤེད། །འཕྲིན་ལས་ཀུན་འགྲུབ་རྗེ་བཙུན་སྒྲོལ་མ་ཡིན། །དངོས་གྲུབ་ཀུན་འབྱུང་ཐུབ་དབང་རྡོ་རྗེ་འཆང་། དམིགས་མེད××། །དྲི་མེད××། །བདུད་དཔུང××། །གངས་ཅན××། །བློ་བཟང××། །ཞེས་ཚིག་རྐང་བརྒྱད་དང།

དམིགས་བརྩེ་མ་དགུ་སྐོར་ནི། རྗེ་བླ་མའི་སྤྱི་བོར་འཕགས་པ་སྤྱན་རས་གཟིགས་ཕྱི་ནང་གསང་གསུམ་སྒོམ་པ་སྟེ། རྗེ་བླ་མའི་སྤྱི་བོར་སྤྱན་རས་གཟིགས་ཕྱག་བཞི་བ། དེའི་ཐུགས་ཀར་སྤྱན་རས་གཟིགས་རྡོ་རྗེ་ཆོས། དེའི་ཐུགས་ཀར་སྤྱན་རས་གཟིགས་རྒྱལ་བ་རྒྱ་མཚོ་སྒོམ་པ་དང་། ཡང་རྗེ་བླ་མའི་མགྲིན་པར་རྗེ་བཙུན་འཇམ་པའི་དབྱངས་ཕྱི་ནང་གསང་གསུམ་སྒོམ་པ་སྟེ། ཕྱི་སྒྲུབ་འཇམ་དབྱངས་དཔའ་བོ་གཅིག་གྲུབ། ནང་སྒྲུབ་དབྱངས་ཅན་མ་དམར་མོར་འཁྱུད་པ། གསང་སྒྲུབ་འཇམ་དབྱངས་ཡབ་ཡུམ་འཁྱུད་པ་སྒོམ་པའོ། །

ཡང་རྗེ་བླ་མའི་ཐུགས་ཀར་གསང་བདག་ཕྱག་ན་རྡོ་རྗེ་ཕྱི་ནང་གསང་གསུམ་སྒོམ་པ་སྟེ། ཕྱི་སྒྲུབ་གསང་བདག་གོས་སྔོན་ཅན། ནང་སྒྲུབ་གསང་བདག་འབྱུང་འདུལ། གསང་སྒྲུབ་གསང་བདག་འཁོར་ཆེན་ཏེ། རྗེ་བླ་མ་དང་རིགས་གསུམ་མགོན་པོ་ཕྱི་ནང་གསང་གསུམ་དགུ་བོ་ངོ་བོ་དབྱེར་དུ་གསོལ་བ་འདེབས་པ་ལ་དམིགས་བརྩེ་མ་དགུ་སྐོར་ཟེར་ལ།

ཡང་དམིགས་བརྩེ་མ་དགུ་སྐོར་ལ། རྗེ་བླ་མའི་སྤྱི་བོར་སྤྱན་རས་གཟིགས་ཕྱག་བཞི་བ། དེའི་ཐུགས་ཀར་པདྨ་དང་ཧྲཱྀ་ཡིག མགྲིན་པར་འཇམ་དབྱངས། དེའི་ཐུགས་ཀར་རལ་གྲི་དང་དྷཱིས་མཚན་པ། ཐུགས་ཀར་ཕྱག་ན་རྡོ་རྗེ་གོས་སྔོན་ཅན། དེའི་ཐུགས་ཀར་རྡོ་རྗེ་དང་ཧཱུཾ་གིས་མཚན་པ་སྟེ་གསུམ་ཀའང་སེམས་དཔའ་སུམ་བརྩེགས་སུ་བསྒོམས་ནས་རྗེ་བླ་མའི་སྐུ་གསུང་ཐུགས་དང་རྣམ་གསུམ་ངོ་བོར་དབྱེར་མེད་དུ་གསོལ་བ་འདེབས་པའོ། །འདོན་པ་དམིགས་བརྩེ་མ་བཞི་སྐོར་ལས་ཡན་གར་བ་མེད་དེ། དམིགས་མེད་བརྩེ་བའི××། །དྲི་མེད××། །བདུད་དཔུང××། །གངས་ཅན××། །བློ་བཟང××། །ཞེས་ཚིག་རྐང་ལྔའོ། །

སྤྱིར་ན། དམིགས་བརྩེ་མ་ལ་སྐོར་བདུན་ཡོད་ཀྱང་། རྒྱུན་འདོན་དུ་བཞི་སྐོར་འདི་བཏོན་ན་བྱིན་རླབས་ཀྱི་ཚན་ཁ་གཞན་ལས་ཆེ་བར་བཤད་ལ། དམིགས་བརྩེ་མ་བཞི་སྐོར་སྐབས་རྗེ་བླ་མར་གསོལ་བ་འདེབས་ཚེ།

ཕྱི་མཚུངས་པ་གསལ་བྱེད་ཀྱི་སྒོ་ནས་གསོལ་བ་འདེབས་པ་ནི། རྒྱལ་བ་སྲས་བཅས་ཐམས་ཅད་ཀྱི་མཁྱེན་བརྩེ་ནུས་གསུམ་ལྷ་སྐུ་བཞིན་ལག་གི་ངོ་བོར་ཤར་བ་རིགས་གསུམ་མགོན་པོ་ཡིན་ལ། རིགས་གསུམ་མགོན་པའི་མཁྱེན་བརྩེ་ནུས་གསུམ་དེ་མཚུངས་སུ་རྗེ་བླ་མ་ལ་ཡོད་པར་མོས་ཏེ་གསོལ་བ་འདེབས་པ། རྗེ་བླ་མ་ཕྱི་སྒྲུབ་དང་། གསོལ་འདེབས་ནི། དམིགས་མེད××། །དྲི་མེད××། །བདུད་དཔུང××། །གངས་ཅན××། །བློ་བཟང××། །མཁས་པ་ཡོན་ཏན་ཀུན་ལྡན་པ། །བདག་ཀྱང་ཁྱེད་རང་ལྟ་བུར་བྱིན་གྱིས་རློབས། །ཞེས་དང་།

ནང་ཡོན་ཏན་དེ་ལྡན་གྱི་སྒོ་ནས་གསོལ་བ་འདེབས་པ་ནི། སྤྱན་རས་གཟིགས་ལ་སྙིང་རྗེ་ཆེན་པོས་མཚོན་པའི་ཡོན་ཏན་ཇི་སྙེད་ཅིག་དང་། འཇམ་པའི་དབྱངས་ལ་ཤེས་རབ་ཀྱིས་མཚོན་པས་ཡོན་ཏན་ཇི་སྙེད་དང་། ཕྱག་ན་རྡོ་རྗེ་ལ་མཐུ་སྟོབས་ཀྱིས་མཚོན་པའི་ཡོན་ཏན་ཇི་སྙེད་ཅིག་ཡོད་པ་དེ་མཚུངས་སུ། རྗེའི་ཐུགས་རྒྱུད་ན་མངའ་བར་མོས་ཏེ་གསོལ་བ་འདེབས་པ་རྗེ་བླ་མ་ནང་སྒྲུབ་དང་། གསོལ་འདེབས་ནི། དམིགས་མེད××། །དྲི་མེད××། །བདུད་དཔུང××། །གངས་ཅན××། །བློ་བཟང××། །གྲུབ་པ་རྟོགས་པའི་ཡོན་ཏན་ཀུན་ལྡན་པ། །བདག་ཀྱང་ཁྱེད་རང་ལྟ་བུར་བྱིན་གྱིས་རློབས། །ཞེས་དང་།

གསང་བ་ལྷག་པའི་ལྷ་དང་དབྱེར་མེད་ཀྱི་སྒོ་ནས་གསོལ་བ་འདེབས་པ་ནི། རྒྱལ་བ་སྲས་བཅས་ཀྱི་མཁྱེན་བརྩེ་ནུས་གསུམ་ལྷའི་རྣམ་པར་ཤར་བ་རིགས་གསུམ་མགོན་པོ་དང་། དེ་གསུམ་གཅིག་ཏུ་བསྡུས་ནས་མིའི་ཟློས་གར་དུ་རོལ་བ་རྗེ་བླ་མ་ཉིད་དུ་ཤེས་པའི་སྒོ་ནས་གསོལ་བ་འདེབས་པ་རྗེ་བླ་མ་གསང་སྒྲུབ་དང་། གསོལ་འདེབས་ནི། དམིགས་མེད××། །དྲི་མེད××། །བདུད་དཔུང××། །གངས་ཅན××། །བློ་བཟང××། །རིགས་གསུམ་ངོ་བོ་གསང་གསུམ་རྡོ་རྗེ་སྐུ། །བདག་ཀྱང་ཁྱེད་རང་ལྟ་བུར་བྱིན་གྱིས་རློབས། །ཞེས་སོ། །

ཡང་དམིགས་བརྩེ་མའི་སྒོ་ནས་དངོས་གྲུབ་ཞུ་བ་ལ། མ་དག་པ་འཁྲུ་བ། མི་ཤེས་པ་གསལ་བ། ལས་ཚོགས་གཞན་སྒྲུབ་ཚུལ་ཡོད་ལ།

མ་དག་པ་འཁྲུ་བ་ནི། རྗེ་ཡབ་སྲས་གསུམ་གྱི་ཐུགས་ཀ་ནས་འོད་ཀྱི་སྦུ་གུ་ལྟ་བུ་གསུམ་བྱུང་ནས་རྩ་བ་གཅིག་ཏུ་གྲིལ་ཏེ་རང་གི་སྤྱི་བོ་ནས་ཞུགས། ནད་གདོན་སྡིག་སྒྲིབ་དང་མ་དག་པའི་དྲི་མ་ཐམས་ཅད་ནག་འདུར་འདུར་དེད་ནས་བཀྲུས། ལུས་དྭངས་གསལ་ཤེལ་གོང་གི་རང་བཞིན་དུ་གྱུར་བར་བསམ་པ་དང་།

མི་ཤེས་པ་གསལ་བ་ནི། སྐུ་ཡི་ཆེ་དང་གསུང་གི་གསལ། །ས་བོན་མྱུར་བ་ཕྱག་མཚན་ཟབ། །ལྒིགས་བམ་རལ་གྲི་ལྒིགས་རལ་གྱིས། །འཆད་དང་རྩོད་དང་རྩོམ་པའོ། །ཞེས་པ་ལྟར། རྗེ་བླ་མ་ལ་བརྟེན་ནས་ཤེས་རབ་སྒྲུབ་ཚུལ་བདུན་ལས།

གསོལ་བ་འདེབས་པ་སྔོན་དུ་སོང་སྟེ་རྗེ་ཡབ་སྲས་གསུམ་གྱི་ཐུགས་ཀ་ནས་བདུད་རྩི་དམར་སེར་རྒྱ་མཚོ་ལ་ཁ་བ་བབས་པ་བཞིན་སིམ་ནས་ལུས་ཀྱི་ནང་ཐམས་ཅད་གང་། བདུད་རྩིའི་རྡུལ་ཕྲ་རབ་རེ་རེ་འཇམ་དཔལ་དབྱངས་ཀྱི་སྐུའི་རྣམ་པར་སྒོམ་སྟེ་སྐུའི་སྒོ་ནས་ཤེས་རབ་ཆེ་བ་སྒྲུབ་པ་དང་། དེ་བཞིན་དུ་བདུད་རྩིའི་རྡུལ་ཕྲ་རབ་རེ་རེ་དམིགས་བརྩེ་མ་དང་ཨ་ར་པ་ཙའི་ཡིག་འབྲུར་བསྒོམས་སྟེ་གསུང་གི་སྒོ་ནས་ཤེས་རབ་གསལ་བ་སྒྲུབ་པ་དང་། ཡང་རྡུལ་ཕྲ་རབ་རེ་རེ་དྷཱི་ཡིག་གི་རྣམ་པར་བསྒོམས་པས་ས་བོན་གྱི་སྒོ་ནས་ཤེས་རབ་མྱུར་བ་སྒྲུབ་པ་དང་། ཡང་རྡུལ་ཕྲ་རབ་རེ་རེ་ཕྱག་མཚན་གྱི་རྣམ་པར་བསྒོམས་པས་ཟབ་པའི་ཤེས་རབ་སྒྲུབ་པ་དང་། ཡང་རྡུལ་ཕྲ་རབ་རེ་རེ་ལྒིགས་བམ་དང་རལ་གྲི་དང་ལྒིགས་རལ་གསུམ་དུ་བསྒོམས་པས་འཆད་རྩོད་རྩོམ་གསུམ་སྒྲུབ་པའོ། །

ལས་ཚོགས་གཞན་སྒྲུབ་ཚུལ་ནི། རྗེ་ཡབ་སྲས་གསུམ་གྱི་ཐུགས་ཀ་ནས་བདུད་རྩི་དཀར་བོ་བབས་པས་སྡིག་ལྟུང་ཉེས་ཚོགས་ནད་གདོན་སོགས་དག་པར་མོས་པ་ཞི་བའི་དངོས་གྲུབ་སྒྲུབ་ཚུལ་དང་། དེ་བཞིན་འཆི་བ་མེད་པའི་ཚེའི་བདུད་རྩིའི་ངོ་བོར་བབས་པས་ཚེ་བསོད་སོགས་འཕེལ་བར་མོས་པ་རྒྱས་པའི་དངོས་གྲུབ་སྒྲུབ་ཚུལ་དང་། ཡང་བདུད་རྩི་དམར་བོའི་རྒྱུན་བབས་པས་འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་ཐམས་ཅད་དབང་དུ་གྱུར་བར་མོས་པས་དབང་གི་དངོས་གྲུབ་སྒྲུབ་ཚུལ་དང་། ཡང་བདུད་རྩིའི་རྒྱུན་རྡུལ་ཕྲ་རབ་ཀྱི་རྣམ་པར་བབས་པས་གདོན་བགེགས་བར་ཆད་གང་གིས་ཀྱང་མི་ཚུགས་པར་བསྲུང་བ་ཆེན་པོ་གྱུར་བར་མོས་པས་དྲག་པོའི་དངོས་གྲུབ་སྒྲུབ་ཚུལ་ལོ། །

༤ དམིགས་བརྩེ་མ་དང་འབྲེལ་བའི་བླ་མའི་རྣལ་འབྱོར་གྱི་ཕན་ཡོན། སྔོན་སྲད་ཀྱི་གཡག་ཤུལ་ལུང་བའི་མདའ་ན་ཁྱིམ་ཚང་ཕྱུག་པོ་ཞིག་ཡོད་པ་ལ། རྒྱལ་བོ་པེ་ཧར་གྱིས་གནོད་པ་བཏང་སྟེ་མི་མང་བོ་གུམ། ཚེ་ཞིག་ཁྱིམ་དེའི་གཅེས་ཕྲུག་ལ་རྒྱལ་གདོན་ཞུགས་ཤིང་། སྨན་དཔྱད་དང་མདོས་གླུད་སོགས་ཀྱིས་རིམ་གྲོ་ཇི་ལྟར་བསྒྲུབས་ཀྱང་མ་ཕན་པར་འཆི་ལ་ཐུག་ཙ་ན། ཕྱུགས་རྫི་ཞིག་གིས་ཁྱིམ་བདག་ལ། གཡག་ཤུལ་ལུང་བའི་ཕུ་འདིར་གྲུབ་ཆེན་པ་ཞིག་འདུག་ལ། མཚམས་ལན་རེར་ཁྲོ་བོ་འཇིགས་རུང་ཞིག་གི་སྐུར་བཞེངས་པ་དང་། ལན་རེར་གཡག་ཆེན་པོ་ཞིག་གི་རྣམ་པ་དང་། མཚམས་རེར་དགེ་སློང་གི་རྣམ་པར་བཞུགས་པ་ཞིག་ཡོད་པས། ཁོང་ཞུས་ན་ཐབས་རེ་ཨེ་ཡོད་ཅེས་གྲོས་བཏབ་པ་བཞིན། འདུལ་ནག་པ་དཔལ་ལྡན་བཟང་བོ་ཞུས་ཀྱང་། དང་བོ་ཁོང་གིས་བདག་བཙུན་རྒན་ཕལ་བ་ཞིག་ཡིན་པས། རྒྱལ་གདོན་དེ་འདུལ་ག་ན་ཐུབ་ཅེས་ཞལ་གྱིས་མ་བཞེས། ནན་གྱིས་ཞུས་པས་སྲད་རྒྱུད་འདེབས་པའི་དུས་ལ་བབ་པའི་སྔ་ལྟས་སུ་གཟིགས་ཏེ། འོ་ན་ཕན་མི་ཕན་བརྟག་པ་བྱ་དགོས་པས། ཐོག་མར་བྱིས་པའི་ཁོག་ཏུ་རྒྱལ་གདོན་ཞུགས་ཚེ། གདིང་བ་འདིས་སྐར་ཁུང་གཡོགས། ལྷམ་གཉིས་སྒོའི་གཡས་གཡོན་དུ་ཞོག ཕྲེང་བ་རེ་རེ་ཁྱིམ་དེའི་བུ་ག་གང་ཡོད་དུ་ཞོག་དང་། རྒྱལ་གདོན་དེའི་སྐད་ངན་འདོན་པའི་ཚེ་ང་རང་སླེབས་གྱིས། དེར་མ་འཇིགས་ན་ངེད་ཀྱིས་ཕན་མི་ཐོགས་གསུངས་ནས་བཏང་། ཁྱིམ་བདག་གིས་བླ་མས་ཐུགས་བཀོད་ལྟར་བསྒྲུབས་པས། གདོན་དེ་དངངས་སྐྲག་སྐྱེས་ཏེ་འདིར་ཅི་ལ་ཡོང་། སྐར་ཁུང་དུ་བྲོས་པས་ཁྲོ་བོ་གཤིན་རྗེ་གཤེད་འཇིགས་སུ་རུང་བ་ཞིག་གིས་བཀག་འདུག སྒོར་བྲོས་པས་གཤིན་རྗེ་རལ་གྲི་ཐོགས་པ་གཉིས་ཀྱིས་སྲུང་འདུག བུ་ག་ཐམས་ཅད་བཙུན་པའི་དམག་གིས་བསྐོར་འདུག ད་གང་དུ་འགྲོ་ཞེས་སྨེ་སྔགས་བཏོན་པ་ན། འདུལ་ནག་པ་མྱུར་མོར་ཕེབས་ནས་དམ་ལ་བཏགས་ཏེ། ད་ནས་བཟུང་རྒྱལ་གདོན་ཁྱོད་ཀྱིས་སྐྱེ་འགྲོ་ཀུན་ལ་གནོད་པ་མི་བྱེད་པར་དམ་བཅའ་གྱིས། དེ་མིན་བརླག་པར་བྱའོ་གསུངས་པས། གདོན་ན་རེ། ངེད་ཅག་གི་ཁ་ཟས་ནི་ཤ་ཁྲག་གིས་འཚོ་བ་ལ། ཟས་སྐོམ་མི་རྙེད་པས། བླ་མས་སྙིང་རྗེ་རེ་གཟིགས་ཞུས་པས། འོ་ན་དམིགས་བརྩེ་མ་འདོན་མཁན་ལ་མི་གནོད་པར་དམ་བཅའ་གྱིས། དེ་མིན་བརླག་གོ་གསུངས་པས། སྟོད་ཛ་ཏིའི་མེ་ཏོག་སྐྱེ་ས་ནས། ཤར་རྒྱ་མཚོའི་མཐའི་བར་དུ་དམིགས་བརྩེ་མས་མ་ཁྱབ་པ་མེད་པས། ངེད་གང་དུ་འགྲོ། དེ་ཡང་ཐུགས་རྗེ་གཟིགས་པར་ཞུ་ཞུས་པས། འོ་ན། དགའ་ལྡན་ལྷ་བརྒྱ་མའི་སྒོ་ནས་དམིགས་བརྩེ་མ་བགྲང་མཁན་གར་ཡོད་ལ་གནོད་པ་མི་བྱེད་པའི་དམ་བཅའ་གྱིས། དེ་མིན་བརླག་པར་བྱའོ་ཞེས་བཀའ་བསྒོས་པས། རྒྱལ་བོ་བེ་ཧར་གྱིས་ཁས་བླངས་ཤིང་བྲོ་བོར་བ་ལྟ་བུ་དང་།

ཡང་འདུལ་ནག་པས་རླུང་བུམ་པ་ཅན་བཟུང་ནས་མཁའ་ལ་གཤེགས་ཏེ་མདུང་རྩེར་དཀྱིལ་ཀྲུང་གིས་འཁོད་པས་མདུང་རྩེ་རས་པར་གྲགས་ལ། ཁོང་གིས་སྐྱེ་འགྲོ་ཀུན་ལ་དམིགས་བརྩེ་མ་འདོན་པར་སྐུལ་ཏེ། མ་བཏོན་པའི་ཁ་ལ་གཟའ་ནད་བཏང་ཡོང་གསུངས་ཀྱང་། སྡེ་བ་རིན་སྤུངས་པས་མ་བཏོན་པར་ཁ་ཡོ་སོང་བས། བཅོས་ཐབས་གང་གིས་ཀྱང་མ་ཕན་པས། འདུལ་ནག་པ་སྤྱན་དྲངས་ཏེ། ཁོང་གིས་དམིགས་བརྩེ་མ་འདོན་བཅུག་པས་མྱུར་མོར་སོར་ཆུད་པ་དང་།

ཡང་སློབ་དཔོན་བྱམས་པས་ཀྱང་རྒྱུན་འདོན་ལ་དམིགས་བརྩེ་མ་གནང་ཞིང་། སྐུ་འདའ་ཁར་ཡང་ཁྲི་ནམ་བཟང་ལ་ང་ལ་འདས་མཆོད་ཀྱི་ཆོ་ག་གཞན་མི་དགོས། ཞེ་དགུ་ལ་དམིགས་བརྩེ་མ་བགྲོང་ཞེས་ཐུགས་བཀོད་གནང་བ་དང་།

དམིགས་བརྩེ་མའི་སྒོ་ནས་བླ་མའི་རྣལ་འབྱོར་ལས་གཞན། ཆར་འབེབས། སད་སྲུང་། སྲུང་འཁོར། ཚེ་སྒྲུབ། རིལ་སྒྲུབ། མཚོན་སྲུང་། གྲིབ་སེལ། སྲོག་རླུང་བཅོས་ཐབས། ཟ་ཡིག ཇག་འཆིང་། ཞིང་གི་རྩ་འདོན། ཁ་ཟས་ཡོང་ཐབས། ཤྭ་འོད་ཆུ་བསྒྱུར་གྱི་ཆོ་ག བར་ཆད་སེལ་ཐབས། ས་བཅུད་སྒྲུབ་ཐབས། བསྙེན་པ་གཏོང་ཐབས། སྦྱིན་སྲེག རྒྱལ་མཚན་འཛུགས་ཆོག དབང་སྡུད། དགེ་འདུན་འདུ་བའི་འཁོར་ལོ་སྒྲུབ་ཚུལ། སྡིག་སྦྱངས། སེར་འགོག རིམས་ནད་བསྲུང་བ། བགེགས་བསྐྲད། བཀྲུ་བྱབས། རི་ཁྲུས་བྱ་ཚུལ་སོགས། ལས་ཚོགས་བརྒྱ་རྩ་བརྒྱད་ཡོད་པ་དང་། བཅུ་གཅིག་ཙམ་གྱི་རྒྱུན་དེང་སང་ཡང་ཡོད།

གཞན་སངས་རྒྱས་ཐམས་ཅད་ཀྱི་ཡོན་ཏན་བསྡུས་ན་སངས་རྒྱས་རང་རྒྱུད་ཀྱི་མཁྱེན་བརྩེ་ནུས་གསུམ་དུ་འདུ་ལ། དེ་གསུམ་ལྷ་སྐུ་བཞིན་ལག་གི་རྣམ་པར་ཤར་བ་རྗེ་བཙུན་འཇམ་པའི་དབྱངས། འཕགས་པ་སྤྱན་རས་གཟིགས། གསང་བདག་ཕྱག་ན་རྡོ་རྗེ་གསུམ་ལགས་ལ། དེ་གསུམ་གཅིག་བསྡུས་ཀྱི་ངོ་བོ་འཇམ་མགོན་རྒྱལ་བ་བློ་བཟང་གྲགས་པ་ཡིན་པས། རྗེ་བླ་མ་ལ་གསོལ་བ་བཏབ་པ་དང་མཆོད་པ་ཕུལ་ན། ཕྱོགས་བཅུའི་རྒྱལ་བ་སྲས་དང་བཅས་པར་གསོལ་བ་བཏབ་པ་དང་མཆོད་པ་ཕུལ་བར་འགྱུར་ཞིང་། དམིགས་བརྩེ་མ་ནི་དེ་དག་གི་གསོལ་འདེབས་དབྱངས་སུ་ཤར་བ་ཡིན་པས། རྒྱལ་བ་སྲས་བཅས་ཀྱི་སྙིང་བོ་དང་ཉེ་སྙིང་བགྲང་བའི་ཕན་ཡོན་ཡང་འབྱུང་ངོ་། །མདོར་ན། རྗེ་བླ་མར་གསོལ་བ་བཏབ་ཅིང་དམིགས་བརྩེ་མ་བགྲང་ན། འདི་ཕྱིའི་ལེགས་ཚོགས་ཀྱི་རྩ་བ་ཚུགས་ཤིང་། ཐོས་བསམ་སྒོམ་གསུམ་རྣལ་དུ་འགྲོ་ལ། གདོན་བགེགས་བར་ཆད་ཀྱིས་མི་ཚུགས་པར་མ་ཟད། ཟབ་གསལ་མྱུར་གསུམ་གྱི་ཤེས་རབ་སོགས་འགྲུབ་སླ་ཞིང་། ཚེ་རབས་ཀུན་ཏུ་རྗེ་བླ་མའི་བསྟན་པ་དང་འཇལ་ཏེ། དགའ་ལྡན་དུ་སྐྱེས་པ་སོགས་ཕན་ཡོན་མཐའ་ཡས་པ་འབྱུང་ངོ་། །

དམ་ཚིག་རྡོ་རྗེ་བཟླས་པ།

༡ དམ་ཚིག་རྡོ་རྗེ་བཟླས་པ་གལ་ཆེ་ཚུལ། སྔགས་བླ་མེད་ཀྱི་ལམ་ཉམས་སུ་ལེན་པ་ལ། དམ་སྡོམ་སྲུང་བ་གལ་ཆེ། ཅི་སྟེ་དངོས་གྲུབ་མཆོག་འདོད་ན། །སྲོག་ནི་ཡོངས་སུ་གཏོང་ཡང་བླ། །འཆི་བའི་དུས་ལ་བབ་ཀྱང་བླ། །དམ་ཚིག་རྟག་ཏུ་བསྲུང་བར་བྱ། །ཞེས་པ་ལྟར། དམ་ཚིག་སྲུང་ཞིང་ལམ་སྒོམ་པ་གནད་དུ་སོང་ན། རྣམ་གྲོལ་ཟླ་བས། མ་བསྒོམས་གྱུར་ཀྱང་ལྟུང་མེད་ན། །སྐྱེ་བ་བཅུ་དྲུག་དག་ན་འགྲུབ། །ཅེས་ཟུང་འཇུག་གི་གོ་འཕང་མྱུར་བ་མྱུར་བར་འཐོབ་ལ། དམ་ཚིག་མ་བསྲུང་ན་དམྱལ་བ་མ་གཏོགས་ཐོ་མེད་དེ། རྡོ་རྗེ་རྩེ་མོ་ལས། གཞན་དུ་དམ་ཚིག་ལས་ཉམས་ན། །ཉམས་པ་བདུད་ཀྱིས་གཟུང་བར་འགྱུར། །འདི་དང་ཕ་རོལ་ཏུ་ནི་ཕུང་། །བསྟིར་མེད་སྤྱིའུ་ཚུགས་དམྱལ་བར་འགྲོ། །ཞེས་པ་ལས་མ་འདས་ལ། ཁྱད་པར་དུ། དེང་སང་སྔོན་འགྲོ་དང་མདོ་ལ་མ་བརྟེན་པར། གསང་སྔགས་ཟབ་མོའི་མྱུར་ལམ་ཞེས་ཐམས་ཅད་ཀྱི་རྣ་བ་ཀྲོག་ཀྲོག་བྱེད་ཀྱང་། སུ་ཐོད་ཐོད་ལ་མི་ཉེ་བ་ཡིན། སྐྱེ་བ་སྔོན་མ་ནས་སྦྱངས་སྦྱངས་པའི་སྐལ་ལྡན་གྱི་སྐྱེ་བོ་དབང་བོ་ཡང་རབ་ཅིག་ལ་ཉེ་བ་མ་གཏོགས། ཐུན་མོང་ལམ་སྦྱངས་དང་སྔོན་སྦྱངས་ཀྱི་བག་ཆགས་མེད་པར། ཁྱི་དང་གློ་བ་འཕྲད་པ་བཞིན་གསང་སྔགས་ལ་དམར་འཇུ་བྱས་ན། སྔགས་ལ་སྤྱད་སྲུང་གི་དམ་ཚིག་བགྲང་ལས་འདས་པ་ཡོད་པས། དེའི་ཟུར་གཅིག་ཉམས་ནའང་དམྱལ་བ་འགྲོ་བ་ལས་འོས་མེད། དེ་བས། སྔགས་ལ་ཞུགས་པའི་སྐྱེས་བུ་ངན་སོང་དང་། །སངས་རྒྱས་གཉིས་ལས་འགྲོ་ས་གསུམ་པ་མེད། །གསུངས་ལ། ཁྱད་པར་དུ་གསང་སྔགས་ཀྱི་དམ་ཚིག་ནི་ཕྲ་ཞིང་ཞིབ་ལ། གྲངས་མང་ཞིང་སྲུང་དཀའ་བ་ཡིན་ཏེ། དཔེ་ཆོས་ལས། སྔགས་ཀྱི་རྡུལ་ཚོན་དཀྱིལ་འཁོར་བྲི་བའི་དུས་སུ་ཡང་། དང་བོ་ཐིག་བག་ཙམ་ཞིག་འགྲུས་ཀྱང་། ཉན་ཐོས་ཀྱི་ཕས་ཕམ་གྱིས་དོ་མ་ཡིན་གསུངས་ན། དམ་ཚིག་གཞན་ལྟ་ཅི་སྨོས། སྔགས་ཀྱི་སྤྱད་སྲུང་གི་དམ་ཚིག་ས་མ་ཡ་འབུམ་སྡེ་ཡོད་པས། དེ་རྣམས་འོ་སྐོལ་གྱིས་ཉམས་འོག་ཏུ་ཚུད་པར་དཀའ། གསུངས་ལ། ཨ་ཏི་ཤ་ལྟ་བུ་ཡང་སྔགས་ལ་ཞུགས་དུས་ཉེས་པ་ཅར་རྒྱག་ཉར་རྒྱག་བྱུང་གསུངས་ན། རང་ཅག་ཐ་མལ་བ་དྲན་ཤེས་ནི་མཐུ་ཆུང་། གཉེན་པོ་བརྟེན་པ་ནི་དེ་བས་ཀྱང་དཀའ། ཐ་ན་རྩ་ལྟུང་གི་གྲངས་འདྲེན་ཙམ་་ཡང་བློ་ངོ་ན་མེད་པས། ཡ་གིའི་བླ་མའི་དབང་མོ་ཆེ་འདི་དང་འདི་གསུངས་ཟེར་ནས་དེར་རྒྱུགས། མ་གིའི་མཁན་པོའི་ཆོས་ཟབ་མོ་འདི་དང་འདི་གསུངས་ཟེར་ནས་དེར་རྒྱུགས་ཏེ། ཁྱི་རྒན་བཞིན་དུ་གཏུགས་གཏད་མེད་པར་ལྡོམ་ནས། ཆོས་ལ་མ་ཉན་བྱ་བ་གཅིག་ཀྱང་མེད་ཚོད་ཡིན། འོན་ཀྱང་། གསང་སྔགས་ལ་ཞུགས་ན་དམ་ཚིག་དང་སྡོམ་པ་ཁས་ལེན་དགོས་པ་ནི་ཡིད་ཀྱི་དགུ་ལའང་མ་དྲན་པར། རྡོ་རྗེ་མནའ་ཆུ་སྐོམ་པས་ཆུ་འདོད་པ་བཞིན་དུ་འཐུང་། དམ་ཚིག་དང་སྡོམ་པ་ལམ་ཁའི་རྡོ་བཞིན་དུ་བསྐྱུར་ཏེ་འགྲོ་བ་ནི་སྡིག་ལྟུང་ཆར་བ་ལྟར་ཕབ་ནས་རང་ཉིད་དམྱལ་བར་བརྫངས་པའི་སྔ་ལྟས་ཏེ། འདི་ནི་ཁྱེད་ཀྱི་དམྱལ་བའི་ཆུ། །དམ་ཚིག་ཉམས་ན་སྲེག་པར་བྱེད། །དམ་ཚིག་བསྲུངས་ན་དངོས་གྲུབ་སྟེ། །རྡོ་རྗེའི་བདུད་རྩིའི་ཆུ་འཐུང་ཤིག། ཅེས་སོགས་དུས་འཁོར་བདག་འཇུག་སོགས་ལས་གསུངས་པ་དང་། རེ་ཞིག་དམ་ཚིག་ཉམས་པ་ན། །དངོས་གྲུབ་འཐོབ་པ་ལྟ་ཞོག་གི། མི་ཡི་སྐྱེ་བའང་རྙེད་པར་དཀའ། །ཞེས་དང་། གཞན་ཡང་། དེ་རིང་རྡོ་རྗེ་སེམས་དཔའ་རང་། །ཁྱོད་ཀྱི་སྙིང་ལ་ཡང་དག་ཞུགས། །གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ཏེ་གཤེགས། །ཞེས་པ་ལྟར། དམ་ཚིག་ལས་འདས་ན། ཉེས་དམིགས་འདི་དག་གིས་མཚོན་པའི་ཉེས་ལྟུང་མང་དུ་འབྱུང་། གལ་ཏེ་རང་ངོས་ནས་དམ་ཚིག་ཉམས་པའི་དྲི་མས་མ་གོས་ཀྱང་། རྡོ་རྗེ་སྤུན་གྲོགས་སུ་གྱུར་བའི་དམ་ཉམས་ཤིག་ཚོགས་གྲལ་དུ་ཐོན་ན། དེའི་ཉམས་གྲིབ་ཀྱིས་དམ་ལྡན་ཁྲི་འབུམ་མང་བའི་སྒྲུབ་པ་ལ་འབྲས་བུ་མི་འབྱུང་བར་མ་ཟད། དཔེར་ན་སྦལ་བ་ཁྲག་ཅན་གཅིག་གིས་སྦལ་བ་ཐམས་ཅད་རྨ་ཅན་དུ་བསྒྱུར་ཏེ་རུལ་ཏུ་བཅུག་པ་དང་མཚུངས། དེ་ལས་གཞན་དམ་ཉམས་དེ་དང་གཏམ་བསྲེ་བ། སྤྱོད་ལམ་འདྲེས་པ། ཐ་ན་ལུང་བ་གཅིག་གི་མགོ་སྔ་ནས་ཆུ་འཐུང་ནའང་ཟླས་ཉམས་དང་ཞོར་ཉམས་བྱུང་བ་ཡིན། དཔེར་ན། བེའུ་སྦྲེལ་གཡང་དུ་ལྷུང་བ་བཞིན་བླ་མ་དང་མཆེད་གྲོགས་ཚུན་ཆད་རྡོ་རྗེ་དམྱལ་བར་ལྷུང་བ་ཡིན་ཏེ། དེར་ལྷུང་ན་ཚེ་ཚད་ནི། འཇམ་དཔལ་རྩ་རྒྱུད་ལས། ཕྱིའི་རྒྱ་མཚོ་ཆེན་པོ་ལ་སྐྲ་ཉག་མ་གཅིག་གི་རྩེ་མོས་ཆུ་གཏོར་བས་མ་ཟད་ཀྱི་བར་དུ་སྡུག་བསྔལ་ཆེན་པོ་མྱོང་བར་གསུངས་སོ། །འོ་ན། དམ་ཚིག་ཉམས་པ་བྱུང་ན་ཇི་ལྟར་བྱ་ཟེར་ན། སྤྱིར་དང་བོ་སྡིག་ལྟུང་གིས་མ་གོས་པ་ཞིག་དང་། གལ་ཏེ་གོས་ན་བཤགས་སྡོམ་བྱ་བ་འདི་གནད་དུ་ཆེ། དེ་ཡང་གསང་སྔགས་ཀྱི་དམ་ཚིག་ཉམས་པ་འདི་བཤགས་པས་འདག་སླ་བ་ཡིན་ཏེ། ཉན་ཐོས་ལུགས་ཀྱི་རྩ་ལྟུང་སྐོར་ཅིག་རྫ་ཆག་པ་ལྟར་སླར་གསོ་ཐབས་མེད་པ་དང་། བྱང་སེམས་ཀྱི་བསླབ་སྡོམ་ཉེར་སྤྱད་ཆག་པ་དང་འདྲ་བས་མགར་བ་མཁས་པས་སླར་བཅོས་སུ་ཡོད་པ་ལྟར། གཞན་རྐྱེན་དགེ་བའི་བཤེས་གཉེན་ལ་བརྟེན་ནས་གསོར་རུང་བ་དང་། གསང་སྔགས་ཀྱི་དམ་ཚིག་ཉམས་པ་ནི་རིན་པོ་ཆེའི་ཉེར་སྤྱད་ཅུང་ཟད་ཞོམ་པ་དང་མཚུངས་པས། རང་ཉིད་ཀྱིས་ཀྱང་ལྷ་སྔགས་ཏིང་འཛིན་ལ་བརྟེན་ནས་བཤགས་ཀྱང་ལྷག་མེད་དུ་དག་པར་གསུངས་པས་ན། མྱུར་བ་མྱུར་དུ་དམ་ཚིག་ཉམས་པ་གསོ་བ་གལ་བོ་ཆེར་འཛིན་པ་དང་། དེ་ཡང་བཞི་བརྒྱ་ལྔ་བཅུ་བ་ལས། དམ་ཚིག་ཉམས་ལས་བསླང་བ་ནི། །དོན་ཡོད་རྡོ་རྗེ་འཁོར་ལོ་བཟང་། །ཞེས་པ་ལྟར། དམ་ཚིག་ཉམས་ཆག་སྦྱོང་བ་ལ་དོན་ཡོད་རྡོ་རྗེ་ཞབས་ལ་བརྟེན་ན། དེ་བཞིན་གཤེགས་པ་དོན་ཡོན་གྲུབ་པ་ལ་དམ་ཚིག་རྡོ་རྗེ་ལྷ་དང་། དམ་ཚིག་འགུགས་པའི་ལྷ་དང་། དམ་ཚིག་གྲུབ་པ་གདོན་མི་ཟ་བས་ལྷ་གཞན་ལས་ཁྱད་དུ་འཕགས་པ་ཡིན་པས། འདི་ཉིད་ཡི་དམ་དུ་བཟུང་ནས། དམ་ཚིག་རྡོ་རྗེ་བཟླས་པའི་རྣལ་འབྱོར་ཉམས་སུ་ལེན་པ་གལ་ཆེའོ། །ཨོཾ་ཨཱཿཔྲཛྙདྷྲྀཀ་ཧ་ཧཱུཾ། ཞེས་པའི་སྔགས་དོན་ནི། ཉམ་ཆུང་བའི་བུ་ཆུང་གིས་མ་ལ་བློ་རྩེ་གཏད་དེ་ལིང་ལིང་གིས་འབོད་པ་བཞིན། པྲཛྙ་དྷྲྀཀ་ཞེས་ཤེས་རབ་འཆང་བ་ཞེས་བོས་ཏེ། ས་བོན་ཧ་ཡིག་གིས་སྔོན་གྱི་ཐུགས་བསྐྱེད་དྲན་པར་མཛོད་ཅིག་ཅེས་བསྐུལ་ནས། སེམས་ཅན་ཐམས་ཅད་ཀྱིས་ཐོག་མེད་ནས་བསགས་པའི་སྡིག་སྒྲིབ་ཉམས་ཆག་དང་། དེས་བསྐྱེད་པའི་སྲིད་ཞིའི་རྒུད་པ་ཕྲ་རགས་ལས་སྒྲོལ་ལ། ཨོཾ་ཨཱཿཧཱུཾ་གསུམ་གྱིས་མཚོན་པའི་སྐུ་གསུང་ཐུགས་རྡོ་རྗེ་གསུམ་གྱི་དངོས་གྲུབ་ད་ལྟ་ཉིད་དུ་སྩོལ་ཅིག་ཅེས་པའོ། །

༢ དམིགས་རྣམ་གསལ་འདེབས་ཚུལ། དམིགས་པ་སྐྱོང་ཚུལ་ནི། བླ་བྲང་ཨ་ཁུ་ཤེས་རབ་རྒྱ་མཚོ་དང་ཁྲི་རྒན་འཇམ་པའི་དབྱངས་སོགས་ཀྱིས། ཡབ་རྗེ་བླ་མ་སྐལ་ལྡན་རྒྱ་མཚོའི་མཛད་པ་འདི་གོ་བདེ་བར་བསྔགས་པས་ན། དེའི་རྨང་གཞིའི་སྟེང་ནས་འཆད་པ་ལ། སྐྱབས་སེམས་སྔོན་དུ་བཏང་སྟེ། རང་གི་ཐུགས་ཀར་པདྨ་འདབ་བརྒྱད་ཅིག་གསལ་བཏབ། དེའི་ལྟེ་བར་རང་གི་སེམས་ཉིད་ཧ་ལྗང་ཁུ་དེ་ཡོངས་སུ་གྱུར་བ་ལས། རལ་གྲི་ཕྲ་མོའི་ལྟེ་བ་ལ་ཧས་མཚན་པ་ཞིག་སྒོམ། དེ་ལས་འོད་འཕྲོས་རྒྱལ་བ་སྲས་བཅས་ལ་མཆོད་པ་ཕུལ། སེམས་ཅན་ཐམས་ཅད་དམ་ཚིག་ཉམས་ཆག་དང་སྡིག་སྒྲིབ་མ་ལུས་པ་སྦྱངས་ཏེ། དམ་ཚིག་རྡོ་རྗེའི་གོ་འཕང་ལ་བཀོད། འོད་ཟེར་སླར་བཀུགས་ཏེ་ཕྱག་མཚན་ས་བོན་དང་བཅས་པ་ལ་ཐིམ། དེ་ཡོངས་སུ་གྱུར་བ་ལས་དོན་ཡོད་རྡོ་རྗེ་ལྗང་ཁུ་ཞལ་གསུམ་ཕྱག་དྲུག་པ། རྩ་ཞལ་ལྗང་། གཡས་ཞལ་སྔོ་ལ་གཡོན་ཞལ་དཀར་བ། ཕྱག་དང་བོ་གཉིས་ཀྱིས་ཡུམ་ལ་འཁྱུད་ཅིང་། གཡས་གཉིས་རྡོ་རྗེ་དང་རལ་གྲི གཡོན་གཉིས་དྲིལ་བུ་དང་པདྨ་འཛིན་པ། ཡབ་ཡུམ་གཉིས་ཀའང་དར་རིན་པོ་ཆེས་བརྒྱན་པ། གཉིས་ཀའི་སྤྱི་བོ་ཨོཾ། མགྲིན་པར་ཨཱཿ ཐུགས་ཀར་ཧཱུཾ་གིས་མཚན་པ། དེ་ལས་འོད་ཟེར་འཕྲོས། རང་བཞིན་གྱི་གནས་ནས་དམ་ཚིག་རྡོ་རྗེ་ཡེ་ཤེས་པ་དཔག་ཏུ་མེད་པ་སྤྱན་དྲངས་ཏེ། དམ་ཚིག་རྡོ་རྗེ་ཡབ་ཡུམ་ལ་ཐིམ་ནས་གཉིས་སུ་མེད་པར་གྱུར། དབང་ལྷས་དབང་བསྐུར། ཡབ་ལ་མི་བསྐྱོད་པ་དང་ཡུམ་ལ་དོན་ཡོད་གྲུབ་པའི་དབུ་བརྒྱན་པར་གྱུར། དེ་ནས་རང་གི་སྙིང་ཀར་ཟླ་གདན་གྱི་སྟེང་དུ་སྣ་ཚོགས་རྡོ་རྗེའི་ལྟེ་བར་ཧ་ལྗང་ཁུ། དེའི་མཐའ་འཁོར་གྱི་སྔགས་ཕྲེང་འོད་ཟེར་དང་བཅས་པ་ལས། བདུད་རྩིའི་རྒྱུན་བྱུང་སྟེ་ལུས་གང་། བདེ་བ་མྱོང་། རྩ་བ་དང་ཡན་ལག་གི་དམ་ཚིག་ཉམས་ཆག་ཐམས་ཅད་ནག་ཉིལ་ཉིལ་དང་། ནད་རིགས་སོགས་རྣག་ཁྲག་ཆུ་སེར་ལྗན་ལྗིན་གྱི་རྣམ་པ་དང་། གདོན་བགེགས་རྣམས་སྡོམ་སྡིག་སྦལ་ལྕོང་སོགས་སྲོག་ཆགས་མི་སྡུག་པའི་རྣམ་པར་དབང་བོའི་སྒོ་དང་བ་སྤུའི་བུ་ག་སོགས་ནས་ཐོན་ཏེ། དབང་ཆེན་གསེར་གྱི་ས་གཞིའི་འོག་ཏུ་ལས་ཀྱི་གཤིན་རྗེ་ཁ་ནང་དུ་སོང་སྟེ་ངོམས་ཤིང་ཚིམས། གནོད་འཚེ་དང་བསམ་སྦྱོར་ངན་རྩུབ་ཐམས་ཅད་ཞི་ཞིང་བྱམས་སྙིང་རྗེ་བྱང་ཆུབ་ཀྱི་སེམས་དང་ལྡན་པར་བྱས། བདུད་རྩིའི་ལྷག་མ་གསེར་གྱི་རྒྱ་གྲམ་དུ་གྱུར་ཏེ་ས་གས་པའི་ཁ་བཅད། རང་གཞན་གྱི་སྡིག་སྒྲིབ་བག་ཆགས་དང་བཅས་པ་མུན་ཁུང་ལ་སྒྲོན་མེ་སྦར་བ་བཞིན་སངས་ཏེ་དག་པར་བསམ། དེ་ནས་རང་གིས་སྔར་བྱས་ཀྱི་དམ་ཚིག་ཉམས་ཆག་ཐམས་ཅད་འགྱོད་གདུང་དྲག་པོས། ཨོཾ་ཨཱཿཔྲཛྙདྷྲྀཀ་ཧ་ཧཱུཾ། ཞེས་མང་དུ་བཟླ་བར་བྱའོ། །དེ་ནས་བདག་ནི་མི་ཤེས་ཞེས་སོགས་ཀྱིས་གསོལ་བ་རྩེ་གཅིག་ཏུ་བཏབ་པས། དོན་ཡོད་རྡོ་རྗེའི་ཞལ་ནས་རིགས་ཀྱི་བུ་ཁྱོད་ཀྱིས་སྡིག་སྒྲིབ་དང་དམ་ཚིག་ཉམས་ཆག་བྱང་ཞིང་དག་གོ ། ཞེས་གསུངས་ནས། དོན་ཡོད་རྡོ་རྗེ་ཡབ་ཡུམ་རང་ལ་ཐིམ་ནས་རང་དང་དོན་ཡོད་རྡོ་རྗེ་དབྱེར་མེད་དུ་གྱུར་བར་བསམ་མོ། །འདི་ལའང་རྡོ་སེམས་སྒོམ་བཟླས་བཞིན། ཡས་དེད་དང་། ཕུང་དེད་སོགས་ཀྱི་དམིགས་པའང་སྦྱར་ཆོག་གོ ། 　

གཞན་དོན་དུ་དམིགས་པའི་སྐབས་ཡིན་ན། ཁྲི་རྒན་འཇམ་པའི་དབྱངས་ཀྱིས། རང་གི་སྙིང་ཀར་དོན་ཡོད་རྡོ་རྗེ་ཡབ་ཡུམ་བཞུགས་པའི་འོག་ཙམ་དུ་ཟླ་བའི་སྟེང་དུ། དབུས་སུ་རང་ཉིད་ཐ་མལ་བའི་རྣམ་པ་ཅན་དང་། དེའི་མདུན་དུ་ཕ་མ། གཡས་སུ་སྤུན་ཟླ། གཡོན་དུ་ཉེ་དུ་དང་གྲོགས་མཆེད། རྒྱབ་ཏུ་གདོན་བགེགས། མཐའ་བསྐོར་དུ་མཁའ་ཁྱབ་ཀྱི་སེམས་ཅན་གསལ་བཏབ་སྟེ་བདུད་རྩི་འབེབས་སྦྱངས་ཀྱི་དམིགས་པ་བྱེད་ཅིང་། སྔགས་བཟླ་བའི་ཚེ་ཐམས་ཅད་ཀྱིས་འུར་ཆེམ་ཆེམ་གདུང་ཤུགས་དྲག་པོས་སྒོ་ནས་བསམ་དགོས་པར་གསུངས་སོ། །

༣ དམ་ཚིག་རྡོ་རྗེ་བཟླས་པའི་ཕན་ཡོན། རྩ་ལྟུང་རྣམ་བཤད་ལས། དོན་ཡོད་གྲུབ་པ་ནི་དམ་ཚིག་རྡོ་རྗེ་ཞེས་ཀྱང་གསུངས་ལ། དེ་ནི་ལྷག་པར་དམ་ཚིག་ཉམས་པ་རྣམ་པར་དག་པར་བྱེད་པའི་ལྷར་གསུངས་པས། ཞེས་པ་ལྟར། ལྷ་མཆོག་འདི་ཉིད་ཀྱིས་སྔོན་སློབ་པ་ལམ་གྱི་གནས་སྐབས་ན། བདག་སངས་རྒྱས་པའི་ཚེ་སྡིག་སྒྲིབ་སྦྱོང་བ་ལ་ཐོགས་པ་མེད་པའི་མཐུ་ཅན་དུ་གྱུར་ཅིག་ཅེས་ཐུགས་བསྐྱེད་དེ་སྨོན་ལམ་གྱི་སྟོབས་གྲུབ་པ་ལགས་པས། རང་ཅག་གིས་བློ་སྙིང་བྲང་གསུམ་གཏད་དེ། ཁ་ཞེ་གཉིས་མེད་ཀྱིས་དམ་ཚིག་ཉམས་ཆག་བྱུང་བ་ལ། ཁོང་དུ་དུག་སོང་བ་ལྟར། སྔར་བྱས་ལ་འགྱོད་སེམས་དང་ཕྱིན་ཆད་མི་བྱེད་པའི་སྡོམ་སེམས་བསྟེན་ཏེ། བཤགས་སྦྱངས་བྱས་ན། དེ་ལས་ལྷག་པའི་ཉམས་ལེན་ཞིག་མེད་ཚོད་དུ་གདའ་བས། སྤྱིར་ན་དམ་སྡོམ་ལ་སེལ་མ་ཞུགས་པ་ཞིག་དང་། གལ་ཏེ་དམ་ཚིག་ཉམས་པ་བྱུང་ན། ལེགས་གྲུབ་ཀྱི་རྒྱུད་ལས། ཉིན་པར་བག་མེད་བྱས་པ་དག །མཚན་མོ་སོ་སོར་བཤགས་པར་བྱ། །ནུབ་མོ་བྱས་པ་ནངས་པར་བཤགས། །ལེགས་པར་བྱས་ལ་མངོན་དགར་བྱ། །ཞེས་པ་ལྟར། ལག་ལེན་དུ་བསྟར་ཏེ་མདོ་ཕྱོགས་ཀྱི་རྨང་བརྟན་པོ་གདིང་སྟེ། གསང་སྔགས་ཟབ་མོའི་མྱུར་ལམ་ལ་ཞུགས་ན། སངས་རྒྱས་ཀྱི་གོ་འཕང་རིན་པོ་ཆེ་ལག་པས་བཟོས་པ་ལྟ་བུ་ཞིག་ཡོང་བ་གདོན་མི་ཟའོ། །

ཟ་བྱེད་མཁའ་འགྲོའི་སྦྱིན་སྲེག

༡ ཟ་བྱེད་མཁའ་འགྲོའི་སྦྱིན་སྲེག་གི་སྔོན་འགྲོ། སྲེག་སྣོད་ཀྱི་ནང་དུ་མེ་ཚགས་སུ་ཆུད་པར་བྱས་ནས། སྣོད་གཙང་དུ་ཐུན་གཅིག་ལ་སྲེག་རྫས་ཅི་ཙམ་འཛད་ཚོད་ཀྱི་ཏིལ་རྫས་བླངས། ཆུ་གཉིས་ཉེར་སྤྱོད་བཤམས། ཀུན་སློང་དག་པ་སྔོན་དུ་བཏང་ནས། སྨིན་མཚམས་ཀྱི་ཐད་དུ་སེང་གེས་བཏེགས་པའི་ཁྲི་འཕང་དུ། རྩ་བའི་བླ་མ་རྡོ་རྗེ་མཁའ་འགྲོ སྐུ་མདོག་མཐིང་ནག་ཞལ་གཅིག་ཕྱག་གཉིས་པ། རྡོ་རྗེ་དང་དྲིལ་བུ་འཛིན་པ། ཧཱུཾ་མཛད་ཀྱི་ཕྱག་རྒྱ་མཛད་ཅིང་ཞལ་གདངས་པ། མཆེ་བ་རྣོན་པོ་བཞི་གཙིགས་པ། ཐོད་སྐམ་ལྔས་དབུ་བརྒྱན་དང་། སྟག་ལྤགས་ཀྱི་ཤམ་ཐབས་ཅན། རློན་པ་ལྔ་བཅུའི་དོ་ཤལ་ཅན། ཁྲོ་བོའི་ཉམས་ཐམས་ཅད་རྫོགས་པ། སྐྱབས་གནས་དཀོན་མཆོག་གསུམ་གྱིས་བསྐོར་བའི་རྣམ་པ་ཅན་གསལ་གདབ་ལ། རང་གི་མཐའ་འཁོར་དུ་སེམས་ཅན་ཐམས་ཅད་བཞུགས་པར་མོས། སེམས་ཅན་དེ་རྣམས་འཁོར་བ་དང་ངན་སོང་གི་སྡུག་བསྔལ་དང་། སྡིག་ལྟུང་སྤྱི་བྱེ་བྲག་ལ་འཇིགས་ཤིང་སྐྲག་པའི་བློ་སྣ་ཤུགས་དྲག་པོ་དང་བཅས། སྡིག་ལྟུང་སྦྱོང་བ་ལ་སྐྱབས་ཡུལ་དེ་རྣམས་ལ་ནུས་པ་ཡོད་པར་ཡིད་ཆེས་ཀྱི་དད་པ་སྒོམ་སྟེ། སྐྱབས་འགྲོ་སེམས་བསྐྱེད་དང་བདུད་རྩི་འབེབས་སྦྱངས་བྱ། དེ་ནས་མ་རྒན་སེམས་ཅན་སངས་རྒྱས་ཀྱི་གོ་འཕང་དུ་འགོད་ལ། རྡོ་རྗེའི་མཁའ་འགྲོའི་སྦྱིན་སྲེག་ལ་འཇུག་པར་བགྱིའོ་སྙམ་པས། སྐྱབས་ཡུལ་རྣམས་འོད་སྔོན་པོའི་རྣམ་པར་རང་གི་སྨིན་མཚམས་སུ་ཐིམ་པས་རྒྱུད་བྱིན་གྱིས་བརླབས་པར་བསམ་མོ། །

༢ སྦྱིན་སྲེག་གི་དངོས་གཞི། ༡ གང་ལ་སྲེག་པའི་མེ་ལྷ་བསྐྱེད་པ་ལ། ༡ མེའི་བགེགས་བསང་བ་ནི། སྔགས་ལ། ཨོཾ་བཛྲ་ཨ་མྲི་ཏ་ཀུཎྚལི་ཧ་ན་ཧ་ན་ཧཱུཾ་ཕཊ་ཞེས་པ་སྟེ། དོན་ནི་རྡོ་རྗེའི་བདུད་རྩི་འཁྱིལ་བ་སྣུན་སྣུན་ཞེས་བརྗོད་པས། རང་གི་ཐུགས་ཀ་ནས་ཁྲོ་བོ་བདུད་རྩི་འཁྱིལ་བ་དཔག་མེད་འཕྲོས་ཏེ། མེ་ལ་གནས་པའི་བགེགས་རྣམས་རྒྱ་མཚོའི་ཕར་འགྲམ་དུ་བསྐྲད་པར་བསམ། ༢ མེས་སྟོང་བར་སྦྱངས་པ་ནི། སྭ་བྷ་ཝས་སྦྱངས་ལ། མེ་སྣོད་དང་བཅས་པ་འོད་དུ་ཞུ་ནས་སྣང་ངོར་མ་དག་པའི་སྣང་བ་དང་། ངེས་ངོར་བདེན་འཛིན་གྱི་ཞེན་པ་གཉིས་ཀྱིས་སྟོང་བ་དྲན་པར་བྱའོ། །༣ མེ་ལྷ་བསྐྱེད་པ་ལ། བསྙེན་པའི་ཡན་ལག་གནས་གསུམ་བྱིན་གྱིས་རླབས་པ་དང་། སྒྲུབ་པའི་ཡན་ལག་ཡེ་ཤེས་པ་གཞུག་པ། སྒྲུབ་ཆེན་གྱི་ཡན་ལག་དབང་བསྐུར་ཞིང་རྒྱས་གདབ་ལ། དེ་ནས་མཆོད་བསྟོད་བྱ་དགོས་སོ། །

༢ གང་བསྲེག་པའི་ཏིལ་ལ་སྡིག་སྒྲིབ་བསྟིམ་པ་ནི། རང་གི་ལུས་སྤྱི་གཙུག་ནས་རྐང་མཐིལ་བར་དྭངས་ཤིང་གསལ་བའི་སྙིང་གར་སྡིག་པའི་ས་བོན་བཾ་ནག་པོ། ལྟེ་བའི་དབུས་སུ་མེའི་ས་བོན་རཾ་དམར་པོ་ལས་མེའི་དཀྱིལ་འཁོར་ཟུར་གསུམ་པ་ཟུར་གཅིག་མདུན་དུ་བསྟན་པ། རང་ལངས་སྟབས་སུ་གནས་པའི་རྐང་མཐིལ་གཉིས་ཀྱི་འོག་ཏུ་རླུང་གི་ས་བོན་ཡཾ་ཡིག་སྔོན་པོ་ལས་ཟླ་གམ་བཅད་ཁ་མདུན་དུ་བསྟན་པ་རྣམས་གསལ་བཏབ། དེ་ནས་སྙིང་གའི་བཾ་འོད་ཟེར་དམར་ནག་ལྕགས་ཀྱུ་ལྟ་བུ་ལུས་ཀྱི་སྟོད་སྨད་ཀུན་ལ་ཁྱབ་པར་འཕྲོས། བ་སྤུའི་བུ་ག་ནས་ཐོན་ཏེ་སེམས་ཅན་ཐམས་ཅད་ཀྱི་སྡིག་སྒྲིབ་བག་ཆགས་དང་བཅས་པ། འོད་ཟེར་ནག་པོའི་རྣམ་པར་བཀུག་སྟེ་སྙིང་གའི་བཾ་ཡིག་ལ་ཐིམ། དེ་ནས་རྐང་འོག་གི་རླུང་དཀྱིལ་གཡོས་ཏེ་ལུས་ཀྱི་ནང་དུ་ཞུགས་ནས། ལྟེ་བའི་མེ་ཆེས་ཆེར་སྦར་ཏེ་མེའི་འོད་ཟེར་ཀྱིས་བཾ་ཡིག་ནག་པོ་དེད་ནས། སྣ་བུག་གཡས་པ་ནས་ཐོན་པས་སྡིག་པ་རྭ་ཅན་གྱི་རྣམ་པར་སྣོད་ནང་གི་ཏིལ་ལ་ཐིམ་ཞིང་། ཏིལ་ཁྲོ་བོའི་ཞལ་དུ་གསོལ་བར་བསམ་དགོས་སོ། །

༣ ཇི་ལྟར་སྲེག་པའི་ཚུལ་ནི། སྔགས་རེ་བཟླས་པ་དང་ཏིལ་རྫས་རེ་ཁྲོ་བོའི་ཞལ་དུ་ཕུལ་བས་ཐུགས་རྒྱུད་ལ་ཟག་མེད་ཀྱི་བདེ་བ་ཁྱད་པར་ཅན་འཁྲུངས་པར་བསམ་ལ། སྦྱིན་སྲེག་འབུལ་བ་བོ་དང་། འབུལ་ཡུལ། སྲེག་རྫས་རྣམས་སྣང་བཞིན་སྟོང་ལ། སྟོང་བཞིན་སྣང་བའི་སྣང་སྟོང་གཉིས་ཚོགས་སྒྱུ་མའི་རང་བཞིན་དུ་ཤར་བས། རང་གཞན་སེམས་ཅན་ཐམས་ཅད་ཀྱི་སྡིག་སྒྲིབ་བག་ཆགས་དང་བཅས་པ་ལྷག་མེད་དུ་དག་པར་བསམ་མོ། །འབུལ་སྔགས་ནི། ཨོཾ་བཛྲ་ཌཱ་ཀ་ཁ་ཁ་ཁཱ་ཧི་ཁཱ་ཧི་སརྦ་པཱ་པཾ་ད་ཧ་ན་བྷསྨི་ཀུ་རུ་སྭཱ་ཧཱ་ཞེས་པ་སྟེ། དོན་ནི། ཨོཾ་ནི་སྐུ་གསུང་ཐུགས་རྡོ་རྗེ་གསུམ་གྱི་ས་བོན། བཛྲ་ཌཱ་ཀ་རྡོ་རྗེ་མཁའ་འགྲོ། ཁ་ཁ་ཟོ་ཟོ། ཁཱ་ཧི་ཁཱ་ཧི་ཟོ་ཤིག་ཟོ་ཤིག སརྦ་པཱ་པཾ་སྡིག་པ་ཐམས་ཅད། ད་ཧ་ན་བསྲེགས། བྷ་སྨི་ཀུ་རུ་ཐལ་བར་མཛོད། སྭཱ་ཧཱ་གཞི་ཚུགས་ཞེས་པའོ། །སྤེལ་ཚིག་ནི། བདག་གིས་ཚེ་འཁོར་བ་ཐོག་མ་མེད་པ་ནས་བསགས་པའི་སྡིག་པ་དང་སྒྲིབ་པ་དང་དམ་ཚིག་ཉམས་ཆགས་ཐམས་ཅད་ཤིནྟཾ་ཀུ་རུ་སྭཱ་ཧཱ་ཞེས་པའོ། །ཤིནྟཾ་ཀུ་རུ་ནེ་ནི་ཞི་བར་མཛོད་ཅིག་ཅེས་པའི་དོན་ནོ། །ཚེ་འདས་དང་ཤི་འདྲེའི་གནོད་པ་སོགས་ཡིན་ན། བསྒྲུབ་བྱ་དེའི་མིང་སྨོས་པའི་སྤེལ་ཚིག་སྦྱོར་དགོས་པར་སྦྱོང་རྒྱུད་ལས་གསུངས་སོ། །

༣ མཇུག་གི་རིམ་པ། གོང་གི་དམིགས་རིམ་དང་མཆོད་བསྟོད། རྡོ་རྗེ་མཁའ་འགྲོའི་སྤྱི་བོའི་རིགས་བདག་མི་བསྐྱོད་པའི་ཐུགས་ཀར་ཟླ་གདན་གྱི་སྟེང་དུ་ས་བོན་གྱི་མཐར་ཡི་གེ་བརྒྱ་བས་བསྐོར་བ་ལས་བདུད་རྩི་འོ་མའི་རྒྱུན་ལྟར་སྐྱ་ཆིལ་ཆིལ་དུ་བབས། ལྷའི་ཚངས་བུག་ནས་ཞུགས། སྐུ་ལུས་ཐམས་ཅད་ཁྱབ་པས་སྲེག་རྫས་མ་དག་པ་དང་། དམིགས་པ་མ་བརྟན་པ། ཆོ་ག་ཆད་ལྷག་སོགས་ལྷག་མེད་དུ་དག་པར་བསམ་སྟེ། གཟོད་གསོལ་ཞུས། དེ་ནས་ཡེ་ཤེས་པ་རང་བཞིན་གྱི་གནས་སུ་གཤེགས་ཤིང་། དམ་ཚིག་པ་མེ་འབར་བའི་རྣམ་པར་བསམ་དགོས་སོ། །

མེ་མ་ཤི་བར་དུ་ཐལ་བ་ལ་རེག་པའམ་འགོམ་ཡུག་མི་ཤོར་བ་བྱ་དགོས་ཤིང་། གལ་ཏེ་གཞིལ་དགོས་བྱུང་ན། འོ་མ་དང་ཆུ་དཀར་གྱིས་གཞིལ་བར་བྱས། བཅིལ་རྗེས་ཐལ་བ་ཆུ་གཙང་དུ་ཕྱགས་པའམ། རི་རྩེ་སོགས་གཙང་སར་སྐྱེལ་ཏེ། སྨོན་ལམ་དང་ཤིས་བརྗོད་ཀྱི་མཐའ་བརྒྱན་པར་བྱའོ། །ཟ་བྱེད་མཁའ་འགྲོའི་སྦྱིན་སྲེག་འདི་ནི་སྡིག་སྒྲིབ་སྦྱོང་བ། ཉམས་ཆགས་སྐོང་བ། བར་ཆད་བཟློག་པ་སོགས་ཀྱི་ཕན་ཡོན་ཡོད་དེ། དངུལ་ཆུ་དྷ་རྨ་བྷ་དྲས་ཀྱང་། འདི་ནི་སྡིག་སྒྲིབ་མུན་སེལ་ཉི་མའི་འོད། །ཉམས་ཆགས་དྲི་མ་ཀུན་འཁྲུད་གང་གཱའི་རྒྱུན། །བར་གཅོད་ནད་གདོན་སྤྲིན་འཇོམས་འཐོར་རླུང་སྟེ། །ཀྭ་ཡེ་དེ་ཕྱིར་འདིར་འབད་སྐལ་བ་བཟང་། །ཞེས་གསུངས་སོ། །

མཆོད་པ།

༡ མཆོད་པའི་ཁུངས། རང་རེའི་གངས་ཅན་གྱི་ལྗོངས་འདིར་ཆུ་མཆོད་འབུལ་སྲོལ་ནི། བོད་ཀྱི་མཁས་པ་རྣམས་ཀྱིས་ཇོ་བོ་རྗེ་བོད་ལ་ཕེབས་ནས། རང་ཅག་གི་དྭངས་བསིལ་ཡན་ལག་བརྒྱད་ལྡན་གྱི་རྫ་ཆུ་བསིལ་མ་འདིས་ཐུགས་འཕྲོག་ནས། གསར་གཏོད་བྱས་པར་གསུངས་ཀྱང་། གཏམ་རྒྱུད་གསེར་ཐང་ལས། བྷར་མའི་ཡུལ་ཆོས་བཤད་སྐབས། གཙུག་ལག་ཁང་རྣམས་སུ་ཉིན་བཞིན་ཏིང་བརྒྱ་ཕྲག་རེ་གཉིས་ཀྱི་ནང་དུ་ཆུའི་མཆོད་པ་བོད་བཞིན་དུ་འབུལ་བའི་སྲོལ་མཆིས། འདི་ནི་སིང་ག་ལ་སོགས་ཉེ་བའི་ཡུལ་གང་ནའང་མེད་པས། སྔོན་ཐེག་ཆེན་པའི་དུས་སུ་དར་བ་ཞིག་ཡིན། རང་རེ་རྣམས་ཀྱིས་ཡོན་ཆབ་ཀྱི་སྲོལ་ཇོ་བོ་བྱོན་ནས་བོད་ཀྱི་ཆུ་གཟིགས་ཏེ། གསར་དུ་མཛད་པ་འདྲ་བ་ཞིག་བཤད་མོད། དོན་ལ་རྒྱ་གར་ལ་སྔ་མོ་ནས་དར་བར་མངོན། བྷར་མ་དང་བོད་གཉིས་ལོ་སྟོང་ཕྲག་དུ་མའི་བར་ལ་ཕན་ཚུན་རྒྱུ་འགྲུལ་སོགས་ཀྱི་འབྲེལ་ཅི་ཡང་མེད་པས། སྲོལ་དེ་ཡང་། རྒྱ་གར་བྷང་ག་ལ་ནས་མཆེད་པར་སེམས། ཞེས་གསུངས་པ་ལས་ཤེས་སོ། །དེ་ལྟར་རིམ་གྱིས། མཆོད་པ་ཆེན་པོ་བཞི་སོགས་དར་ཁྱབ་བྱུང་བ་སྟེ། མུ་ནེ་བཙན་པོའི་སྐབས་ལྷ་སར་འདུལ་བའི་མཆོད་པ། ཁྲ་འབྲུག་ལ་མངོན་པའི་མཆོད་པ། བསམ་ཡས་ལ་མདོ་སྡེའི་མཆོད་པ། བྱང་ཆུབ་མཆོད་པ་ཆེན་པོའོ། །

ཡོན་ཆབ་འབུལ་ཚེ། ཏིང་ཕོར་གྱི་ཚད་ལ་ངེས་བཟུང་མེད་པར་མང་ན་ལེགས་ལ། ཕལ་མོ་ཆེའི་ཏིང་བདུན་རེ་བྱེད་པ་ནི། འདོན་ཆོག་མང་བོར་གསལ་བ་ལྟར། མཆོད་ཡོན། ཞབས་བསིལ། མེ་ཏོག བདུག་སྤོས། སྣང་གསལ། དྲི་ཆབ། ཞལ་ཟས་བཅས་རྣམ་གྲངས་བདུན་འབུལ་སྲོལ་ཡོད་པ་དང་བསྟུན་པ་ཡིན་ནོ། །

༢ མཆོད་པ་འབུལ་ལུགས་ནི། ཏིང་ཕོར་དར་གཙང་མས་འོད་འཕྱར་བ། ཕྱག་མཛུབ་ཀྱི་རྗེས་མ་ཕབ་པར་ཕྱིས། བར་ཐག་རིང་ན་བླ་མ་དང་འབྲལ། ཐོ་གཏུགས་ན་དབང་བོ་རྟུལ། སྒྲ་འབྱིན་ན་སྨྱོ་བ་སོགས་འབྱུང་། ཡ་ཡོ་བྱུང་བས། དགེ་སྦྱོར་འཕྲིགས་སུ་མི་འོང་བ་སོགས་འབྱུང་བས་དེ་ལ་གཟབ་དགོས་ཤིང་། མཆོད་འབུལ་གྱི་སྐབས་འཇིག་རྟེན་པ་དང་སྒོ་བསྟུན་པའི་དབང་གིས་འཕགས་ཡུལ་དུ་རྒྱལ་བོ་དང་། ཡུལ་དམ་པ་མགྲོན་དུ་བོས་ཚེ། ཆུ་གཙང་གིས་ཞབས་བཀྲུ་བ་དང་། དྲི་ཞིམ་གྱི་ཆུ་ཞལ་དུ་འབུལ་བ་དང་། སྐུ་ལ་འཐོར་བ་དང་། མེ་ཏོག་སོགས་ཀྱི་རྒྱན་འདོགས་པ་དང་། སྤོས་མེས་གདུག་པ་དང་བཅས་ཏེ། བཟའ་བ་དང་། བཏུང་བའི་དངོས་བོ་འདྲེན་པ་བཞིན་དུ། མཆོད་པ་ནམ་ཕུལ་གྱི་སྐབས་ཐམས་ཅད་དུ་ཡང་དེ་ལྟར་བྱའོ། །

དེ་མིན། ཏིང་ཕོར་བཤམས་ཏེ་ཡུན་རིང་འགྱངས་ཆེ་ན། དྲི་ཟ་རྣམས་གཟུགས་ལ་ཆགས་པས། ཏིང་ཕོར་འོད་འཆར་བའི་ནང་དྲི་ཟའི་གྲོང་ཁྱེར་ཆགས་པར་བཤད་པས། ཆུ་རྒྱུན་སྦྲེངས་ཚེ་དྲི་ཟའི་གྲོང་ཁྱེར་འཇིག་པའི་ཉེས་པ་ཡོད་པ་དང་། ཡང་ཡོན་ཆབ་འབུལ་ཚེ། བྲི། གང་། རེག རིང་། གཡོ། ཆུ་འཁྱར་ཞེས་སྐྱོན་དྲུག་དང་བྲལ་ཏེ་ཡོན་ཆབ་ཕུལ་ན་ཡོན་ཏན་དྲུག་འཐོབ་པར་འགྱུར་ལ། སྐྱོན་དྲུག་གིས་གོས་ན་ཉེས་སྐྱོན་དྲུག་འབྱུང་སྟེ། ༡ ཡོན་ཆབ་བྲི་ཆེས་པས། རང་རྒྱུད་ཡོན་ཏན་གྱིས་མི་གང་བ་དང་། ༢ གང་ཆེས་པས། རང་རྒྱུད་ལས་སྒྲིབ་ཀྱིས་ཁ་གང་བ་དང་། ༣ མཆོད་ཏིང་གཅིག་ལ་གཅིག་རེག་པས། སྡིག་གྲོགས་དང་འཕྲད་པར་འགྱུར་བ་དང་། ༤ ཏིང་ཕོར་རིང་ཆེས་པས། བཤེས་གཉེན་དང་མཐུན་གྲོགས་རིང་དུ་བཀྱེད་པ་དང་། ༥ གྲལ་བསྒྲིགས་པ་གཡོ་བས། ཚེ་རབས་ཀུན་ཏུ་ལུས་དང་སེམས་མི་དྲང་བ་དང་། ༦ ཏིང་ཕོར་ལས་ཆུ་འཕོས་ཏེ་ཕྱི་ལོགས་སུ་འཁྱར་བས། ཚེ་རབས་སུ་མིག་མི་གསལ་ཞིང་མིག་ཆུ་ཤོར་བའི་སྐྱོན་འབྱུང་བར་བཤད་པས། དེ་དག་གཟབ་པར་འཚལ་ལོ། །

ཡོན་ཆབ་ལྡུགས་དུས་ཐོག་མཐའ་གཉིས་ཕྲ་ལ་དཀྱིལ་སྦོམ་པོར་སྦྲེངས་ཏེ། ངག་ཏུ། ཨོཾ་ཨཱཿཧཱུཾ། ཞེས་འབྲུ་གསུམ་གྱིས་བྱིན་གྱིས་བརླབས་ཏེ་འབུལ། དེ་ཡང་ཡིག་འབྲུ་གསུམ་པོ་དེས་རྒྱལ་བ་སྲས་བཅས་ཀྱི་བྱིན་རླབས་འབྲུ་གསུམ་ལ་ཞུགས་ཏེ་མཆོད་པར་ཐིམ་ཞིང་། ཧཱུཾ་གྱིས་མི་གཙང་བ་ཐམས་ཅད་དག ཨཱསཿདག་གཙང་བདུད་རྩིའི་རང་བཞིན་ཅན་དུ་གྱུར། ཨོཾ་གྱིས་འབྱམས་ཀླས་པ་སྤེལ་བར་སེམས་དགོས་སོ། །

༣ ཡོན་ཆབ་གྱི་ཚད་ནི། ཆབ་ཕྱིར་འཕོས་ན་ཚུལ་ཁྲིམས་འཆལ་ཞིང་འཁོར་མི་འདུ། དམའ་ཆེས་ན་ལོངས་སྤྱོད་ཀྱིས་དབུལ་བས། ཏིང་ཕོར་གྱི་བར་ཐག་དང་ཁ་ཕུད་ལ་འབྲུའི་ཚོད་ཙམ་བཞག་སྟེ། མི་ཆེན་ལ་གསོལ་ཇ་འདྲེན་པའི་ཚོད་ཀྱིས་འབུལ་དགོས་ལ། མཆོད་པ་རྒྱ་ཆེར་འགྲོ་ཕྱིར་མཆོད་གཟུངས་བཏོན་ཏེ་ཕུལ་ན་ཆོད་ཆེའོ། །

༤ མཆོད་པའི་ཕན་ཡོན་ནི། ཡོན་ཆབ་ནི། ཕྱིའི་དངོས་བོ་ལ་མ་ཐོགས་ནང་དད་པ་ལ་ཐོགས་གསུངས་པ་ལྟར། དེ་བས་མཆོད་པའི་རྫས་ལ་སུ་ཡང་ལག་ཐོགས་པ་མེད། ཇོ་བོས་ཀྱང་། བོད་ཀྱི་ཆུ་འདི་ཐམས་ཅད་ཡན་ལག་བརྒྱད་ལྡན་ཡིན་པས། བོད་ན་མཆོད་པ་ཡོན་ཆབ་གཅིག་པུས་ཆོག་འདུག གསུངས་པ་ལྟར། ཆུ་བསིལ་བ་ཕུལ་བས་དཀོར་གྱི་ཉེས་དམིགས་འདག་ཅིང་ཚུལ་ཁྲིམས་དག་པ་དང་། ཆུ་ཞིམ་པས་ཟས་མཆོག་རྙེད་པ་དང་། ཆུ་ཡང་བས་ལུས་སེམས་ལས་སུ་རུང་བ་དང་། ཆུ་འཇམ་པས་ཤེས་རྒྱུད་འཇམ་པ་དང་། ཆུ་དྭངས་པས་རིག་པ་དྭངས་ཤིང་བྱམས་དང་སྙིང་རྗེ་སྐྱེས། ཆུ་དྲི་མི་ང་བས་སྒྲིབ་པ་སྦྱོང་བ་དང་། ཆུ་ལྟོ་བ་ལ་མི་གནོད་པས་ནད་མི་འབྱུང་བ། ཆུ་མགྲིན་པ་ལ་མི་གནོད་པས་ངག་སྙན་པ་བཅས་ཕན་ཡོན་བརྒྱད་འབྱུང་ངོ་། །

ཟ་མ་ཏོག་ལྟ་བུའི་གཏམ་ལས། གཡོ་ཞིང་ཨུད་དཔལ་གྱིས་བསྒོས་པ། །དྲི་མེད་པདྨ་རཱ་ག་བཞིན། །ཡིད་འོང་གསེར་གྱི་སྣོད་དུ་བླུགས། །དྲི་ཞིམ་ཙན་དན་གྱིས་བསྐོས་མངར། །ཡིད་དུ་འོང་དང་བདའ་ཞིང་འཐུང་། །ཅུང་ཟད་མིག་ནི་ཟངས་མདོག་འདྲ། །གླུ་ལེན་སྒྲ་དང་ངེས་ལྡན་པའི། །མི་མཆོག་དེ་དག་སྐོམ་རྣམས་ནི། །སྦྱིན་པ་སྦྱིན་པའི་འབྲས་བུ་ཡིན། །ཨིནྡྲ་ནི་ལ་བཻཌཱུརྱ། །རིན་ཆེན་མཆོག་རྣམས་ཀྱིས་སྤྲས་པའི། །གསེར་གྱི་སྣོད་ནི་གང་ཡིན་པར། །ལྷ་གང་ལྷ་ཡི་བུ་མོ་ནི། །བྲང་གི་དཀྱིལ་ན་ནུ་མ་ནི། །བུམ་པ་ལྟ་བུའི་འབུར་ལྡན་པའི། །རབ་མཛེས་གཅུགས་དང་ལྷན་ཅིག་ཏུ། །སྦྲང་རྩི་ལྟར་མངར་བཏུང་འཐུང་བ། །ཡོན་ཏན་ལྡན་པའི་ཚོགས་ལ་ནི། །བཏུང་བ་ཡིད་འོང་བྱིན་པ་ཡི། །འབྲས་བུ་ཡིན་པར་མཁས་རྣམས་གསུངས། །གང་ཞིག་ཁ་དོག་དྲི་ཞིམ་སོགས། །ཚོགས་ལྡན་སྐོམ་པའི་གདུང་བ་སེལ། །བད་ཀན་རླུང་དྲག་རབ་ཞི་བྱེད། །ཁ་ར་པི་པི་ལིང་བསྲེས་ཚོར། །ཙན་དན་ལྟ་བུར་ཚ་བ་སེལ། །ཟླ་བའི་འོད་ཟེར་དང་ལྡན་པའི། །སྣོད་དུ་བླུགས་ནས་དེ་དག་གིས། །གུས་པར་དགེ་འདུན་ལ་ཕུལ་བས། །ཕ་རོལ་གྱི་ནི་སྐྱེ་གནས་སུ། །ལྷ་ཡི་བཏུང་བ་འཐོབ་པར་འགྱུར། །མངར་ཞིང་མངར་མཆོག་གུས་པ་ཡི། །བཏུང་བ་སྣ་ཚོགས་མཆོག་ལ་ཕུལ། །ལྷ་དང་མི་ཡི་གནས་རྣམས་སུ། །ལྷ་ཡི་བུ་མོ་མཆོག་རྣམས་དང་། །ཡུན་རིང་བཏུང་བ་ལྷན་ཅིག་འཐུང་། །གང་ཞིག་ས་གནས་མི་རྣམས་ཀྱིས། །དང་བའི་དད་པའི་ཡིད་ཀྱིས་ནི། །དགེ་འདུན་ལ་ནི་བཏུང་བ་མཆོག། དུས་ལས་བབ་པར་དྲངས་པ་ཡིས། །འཁོར་བའི་རི་ཁྲོད་གནས་པ་ན། །རྟག་ཏུ་བཏུང་བའང་ཞིམ་བཟང་འཐོབ། །ཅེས་སོ། །

ཡོན་ཆབ་འདི་མཆོད་རྫས་མ་འཛོམས་ཀྱང་། དབུལ་ཕོངས་རྣམས་ཀྱིས་ཀྱང་འབུལ་ཐུབ་པ་ཡིན་པས། ཕུལ་ན་ཕན་ཡོན་བསམ་གྱིས་མི་ཁྱབ། ཏིང་ཕོར་ཙམ་མ་འབྱོར་ཡང་། མཆོད་པ་འདི་སྔོན་བྱོན་སྐྱེས་བུ་དམ་པའི་ཕྱག་ལེན་དུ་བསྟར་བའི་རྣམ་ཐར་ཡོད་དེ། རྗེ་སྒྲུབ་ཁང་དགེ་ལེགས་རྒྱ་མཚོ་སེ་ར་རྩེ་རི་ཁྲོད་ན་བཞུགས་སྐབས། ཡོ་བྱད་ཧ་ཅང་བཀྲེན་པས། ཡོན་ཆབ་འབུལ་སྐབས་ཁོང་གི་བཞེས་ཕོར་ཡག་པོར་བཀྲུས་ནས་ཡོན་ཆབ་ཕུལ་བ་དང་། གསོལ་རས་བཞེས་སྐབས་དཀོན་མཆོག་རིན་པོ་ཆེར་གཡར་བོར་མཛད་པ་ལྟར་རོ། །དེ་ལས་གཞན། བདག་པོས་མ་བཟུང་བ་ཀུན་ཀྱང་མཆོད་པ་འབུལ་ཆོག་སྟེ། སྤྱོད་འཇུག་ལས། ནམ་མཁའ་རབ་འབྱམས་ཁམས་ཀྱི་མཐས་གཏུགས་པར། །ཡོངས་སུ་བཟུང་བ་མེད་པ་དེ་དག་ཀུན། །བློ་ཡིས་བླངས་ནས་ཐུབ་དབང་སྐྱེས་ཀྱི་མཆོག །སྲས་དང་བཅས་པ་རྣམས་ལ་ལེགས་འབུལ་ན། །གསུངས་སོ། །

ཡང་། མཆོད་པ་ལ། ཕྱིའི་མཆོད་པ། ནང་གི་མཆོད་པ། གསང་བའི་མཆོད་པ། དེ་ཁོ་ན་ཉིད་ཀྱི་མཆོད་པ། སྨན་གཏོར་རཀྟའི་མཆོད་པ་ལྔར་ཡང་ཕྱེས་ཏེ། ༡ ཕྱིའི་མཆོད་པ་ལ། མཆོད་ཡོན་ཞལ། ཞབས་བསིལ་ཕྱག་ཞབས། མེ་ཏོག་དབུ། བདུག་སྤོས་ཤངས། མར་མེ་སྤྱན། དྲི་ཆབ་སྐུ། ཞལ་ཟས་ལྗགས། རོལ་མོ་སྙན་ལ་ཕུལ་བ་སོགས་སྔར་བཤད་ཟིན་པ་དང་། ༢ ནང་གི་མཆོད་པ་ནི། སྔགས་ལུགས་ལ། བམ་གཙང་མ་ལ་རང་བྱུང་དུ་གནས་པའི་ཁྲག་གི་མཆོད་ཡོན་དང་ཞབས་བསིལ། མིག་ལྕེ་རྣ་བ་སྣ་སྙིང་སོགས་འབུལ་བ་ནི། བླ་མེད་ཀྱི་ཁྱད་ཆོས་སུ་གྲུབ་པས། གསང་འདུས་ལས། གཙང་མ་ལྷ་ཡི་རིས་ལ་དྲི་ཆེན་དང་། །དྲི་ཆུ་ཁ་ཆུ་ཁྲག་གི་མཆོད་ཕུལ་བས། །རོ་མྱགས་འདམ་དུ་སྐྱེ་བ་སྙིང་རེ་རྗེ། །ཞེས་དང་། མགོན་པོའི་ཆོ་ག་ལས། གསར་སྙིང་ཁྲག་དང་ག་བུར་སྦྱར་བ་ལ། །བདུད་རྩི་ལྔ་ཡིས་སྦགས་ཤིང་བྱིན་རླབས་པ། །ཞག་ཆེན་སྤྲིས་མ་ཆགས་པའི་དྲི་ཆབ་འདིས། །མྱུར་མཛད་ཡེ་ཤེས་མགོན་པོའི་ཐུགས་དམ་བསྐང་། །ཞེས་སོགས་དང་། ༣ གསང་བའི་མཆོད་པ་ནི། རྒྱུའི་དུས་ན་འདོད་ཆགས་ཞེ་སྡང་གཏི་མུག་ང་རྒྱལ་སོགས་དུག་ལྔ་དང་། དུག་གསུམ་ཐམས་ཅད་ཡེ་ཤེས་ལྔ་དང་། རྡོ་རྗེ་གསུམ་གྱི་རྣམ་རོལ་ཏུ་རང་ཤར་རང་གྲོལ་དུ་སྤྱོད་པ་གསང་བའི་མཆོད་པའོ། །༤ དེ་ཁོ་ན་ཉིད་ཀྱི་མཆོད་པ་ནི། འདི་ནི་དེ་ཁོ་ན་ཉིད་བདེ་སྟོང་གཉིས་སུ་མེད་པའི་མཆོད་པ་སྟེ། ལྷ་ཚོགས་རྣམས་རང་རང་གི་ཡུམ་དང་སྦྱར་བའི་སྲུབ་སྦྱོར་གྱི་རྐྱེན་ལས་དྷུ་ཏིའི་མར་སྣེ་ཁ་ཕྱེ་ནས་དྭངས་མའི་རཀྟ་ཡེ་ཤེས་ཀྱི་མེར་འགྱུར་ཏེ། གཏུམ་མོའི་ཤུགས་ཀྱིས་སྦར་བས་སྤྱི་བོ་བདེ་ཆེན་འཁོར་ལོའི་དབུས་སུ་བྱང་ཆུབ་ཀྱི་སེམས་རིན་པོ་ཆེ་ཞུ་བས་དགའ་བ། དེ་ལས་ལོངས་སྤྱོད་ཀྱི་འཁོར་ལོར་བབས་པས་ཁྱད་པར་གྱི་དགའ་བ། དེ་ལས་བདེ་སྐྱོང་གི་འཁོར་ལོར་བབས་ཏེ་རྗེས་ཆགས་ལྷག་པར་རྒྱས་པས་ལྷན་སྐྱེས་ཀྱི་དགའ་བ། དེའི་ཚེ་བདེ་སྟོང་གཉིས་སུ་མེད་པའི་ཡེ་ཤེས་འོད་གསལ་གྱི་ངོ་བོར་བཞུགས་པས་ཆགས་སྡང་གི་གཉིས་རྟོག་ཐམས་ཅད་དབྱིངས་རིག་དབྱེར་མེད་ཀྱི་ངོ་བོ་ལ་བཟླ་བ་ནི་དེ་ཁོ་ན་ཉིད་ཀྱི་མཆོད་པའོ། །༤ སྨན་གཏོར་རཀྟའི་མཆོད་པ་ནི། སྨན་གྱི་མཆོད་པ། རཀྟའི་མཆོད་པ། གཏོར་མའི་མཆོད་པ་དང་གསུམ་ལས། དང་བོ་སྨན་གྱི་མཆོད་པ་ལ། ཕྱི་ཀུན་རྫོབ་ཀྱི་སྨན། ནང་དོན་དམ་གྱི་སྨན། གསང་བ་འཁོར་འདས་གཉིས་མེད་ཀྱི་སྨན་གསུམ་དང་། རཀྟའི་མཆོད་པ་ལའང་། དངོས་སུ་བཤམས་པའི་རཀྟ་སྔར་བྱིན་གྱིས་རླབས་པ་དང་། འདོད་ཆགས་ཀྱི་རྟོག་པ་ཐམས་ཅད་བདེ་སྟོང་གི་ངང་དུ་འབུར་འཇོམས་སུ་སྒྲོལ་བ་དང་། སྣང་བ་ཡབ་ཀྱི་རྡོ་རྗེ་སྟོང་བ་ཡུམ་གྱི་མཁའ་གསང་དུ་རོལ་བ་ལས་བྱུང་བའི་ཟུང་འཇུག་ཁྲག་ཆེན་གྱི་དྭངས་བཅུད་ཁྱབ་གདལ་དུ་འབར་བ་གསུམ་མོ། །གཏོར་མའི་མཆོད་པ་ལའང་། ཕྱི་ནང་གསང་གསུམ་དེ་ཁོ་ན་ཉིད་བཞི་ལས། ཕྱིའི་གཏོར་མ་ནི། དངོས་བཤམས་ཀྱི་གཏོར་མ་རྫས་དང་བཅས་པ་འདོད་ཡོན་གྱི་ལོངས་སྤྱོད་བསམ་གྱིས་མི་ཁྱབ་པར་སྦར་བ་དང་། ནང་གི་གཏོར་མ་ནི། རང་ལུས་ཕུང་ཁམས་སྐྱེ་མཆེད་ཀྱི་དྭངས་བཅུད་ཐམས་ཅད་འཛད་མེད་ཀྱི་བདུད་རྩིའི་རང་བཞིན་དུ་སྦར་བ་དང་། གསང་བའི་གཏོར་མ་ནི། སངས་རྒྱས་རྣམས་ཀྱི་ཐུགས་དབྱིངས་ཀྱི་རང་བཞིན་ཁྱབ་གདལ་ཆེན་པོ་ལ་མའི་བརྡ་ཆད་བཞག་པ་དང་། མ་དེ་ལས་གཉིས་སྣང་གི་ཞེན་པ་ཕྲ་མོའི་རྐྱེན་གྱིས་སེམས་ཅན་གྱི་རིག་པ་དུམ་བུར་ཆད་པ་ལྟ་བུའི་སྣང་ཚུལ་ཤར་བ་ལས། དབྱིངས་རིག་ཐ་དད་དུ་གྱུར་བས་འཁོར་འདས་སུ་ཕྱེ་བའི་གཉིས་འཛིན་གྱི་བྱུར་འདྲེ་ཐམས་ཅད་འཁོར་གསུམ་མི་དམིགས་པའི་ཀློང་དུ་བསྒྲལ་ནས། ཐ་མལ་སྣང་ཞེན་གྱི་གཏོར་མ་ཟག་མེད་བདུད་རྩིར་སྦར་ཏེ་ཕུལ་བའོ། །དེ་ཁོ་ན་ཉིད་ཀྱི་གཏོར་མ་ནི། མཆོད་རྫས་ཐམས་ཅད་ཀྱང་འཁོར་གསུམ་ཀ་དག་ཐིག་ལེ་ཉག་གཅིག་གི་ངོ་བོར་རྩལ་རྫོགས་པས་མཆོད་བྱ་མཆོད་བྱེད་མཆོད་ཡུལ་ཐམས་ཅད་སྤྲོས་བྲལ་ཆེན་པོའི་རྣམ་རོལ་ཏུ་བལྟས་ནས་མཆོད་པའོ། །འདི་དག་ནི་གསང་སྔགས་བླ་མེད་ལུགས་ཀྱི་སྒོས་ཆོས་སུ་གྲུབ་པས་ཆེར་མི་སྤྲོ་ལ། འདི་སྐབས་སུ་བབ་པ་ནི་མདོ་ལུགས་ཀྱི་མཆོད་པ་ཕུལ་སྲོལ་ཡིན་པས་སོ། །

བསྐོར་བ།

༡ བསྐོར་བའི་ཁུངས་ནི། སྙིང་རྗེ་པདྨ་དཀར་བོའི་སྨོན་ལམ་ལྔ་བརྒྱ་བ་ལས། འཇིག་རྟེན་མགོན་གྱི་མཆོད་རྟེན་ལ། །སུ་ཞིག་བསྐོར་བ་བྱེད་པ་ནི། །ཚེ་རབས་དག་ནི་ཐམས་ཅད་དུ། །བྱང་ཆུབ་སྤྱད་པ་སྤྱོད་པའི་ཚེ། །དྲན་དང་ལྡན་ཞིང་བློ་གྲོས་ལྡན། །བསོད་ནམས་ལྡན་ཞིང་འཇིགས་མེད་འགྱུར། །ཞེས་དང་། ལུང་གཞི་ལས། མཁས་པ་གང་ཞིག་རབ་ཏུ་སེམས་དད་པས། །སངས་རྒྱས་མཆོད་རྟེན་ལ་ནི་གོམ་འདོར་བ། །འཛམ་བུ་ཆུ་བོའི་གསེར་གྱི་ཞེང་ཚད་ནི། །སྟོང་ཕྲག་བརྒྱ་ཡང་དེ་དང་མཉམ་པ་མིན། །ཞེས་སོགས་མཆོད་རྟེན་བསྐོར་བའི་ཚིགས་སུ་བཅད་པའི་མདོ་དང་། གསལ་རྒྱལ་གྱི་ཚིགས་བཅད་སོགས་ལས་ཀྱང་གསུངས་སོ། །

༢ བསྐོར་བ་བྱ་ཚུལ་ནི། སྤྱིར་བསྐོར་བ་གཡས་ཕྱོགས་སུ་འགྲོ་བའི་དོན་ཡང་། སངས་རྒྱས་ཀྱི་མཚན་དཔེ་བཤད་སྐབས་ལམ་གྱི་བསྐོར་ཕྱོགས་དང་མཐུན་པར་གཤེགས་པ། ཞེས་འབྱུང་པ་ལྟར། གཡས་ཕྱོགས་ནི་ལམ་ཡང་དག་པ་ཡིན་པས་སོ། །འཇིག་རྟེན་གྲགས་ཚོད་ལའང་། གཡས་ཕྱོགས་ནི་ལམ་ཡང་དག་པ་དང་། གཡོན་ཕྱོགས་ནི་ལོག་ལམ་ཏུ་ངོས་འཛིན་པས། ལོག་ལམ་དུ་ཕྱིན་པ་ལ་གཡོན་ལྷུང་གི་ལྟ་བ་ཟེར་བ་དང་། ལག་པ་ལྟ་བུར་མཚོན་ནའང་། རྒྱ་གར་གྱི་ཡུལ་ཆོས་སུ་གཡས་ལག་གཙང་མ་དང་། གཡོན་ལག་མི་གཙང་བར་བརྩི་སྲོལ་ཡོད་ལ། ཐ་ན་ལམ་ཞིག་སྟོན་ཚེ་ཡང་། ལག་པ་གཡས་པས་བསྟན་ན་གུས་ཉམས་མཚོན་བྱེད་དུ་འགྲོ་སྟེ། སྤྱོད་འཇུག་ལས། གུས་དང་བཅས་པར་གཡས་པ་ཡིས། །ལག་པ་དག་ནི་ཀུན་གྱིས་ཀྱང་། །ལམ་ཡང་དེ་ལྟར་བསྟན་པར་བྱ། །གསུངས་པས་ཀྱང་། གཡས་ཕྱོགས་ནི་ལམ་ཡང་དག་ཡིན་པར་རིགས་པས་གྲུབ་པར་སྙམ་མོ། །

གཞན་ཡང་། མཁའ་འགྲོ་ཡེ་ཤེས་མཚོ་རྒྱལ་གྱི་རྣམ་ཐར་ལས། བསྐོར་བ་སོགས་ལ་གཡས་སུ་བསྐོར་བ་ཕྱག་རྒྱ་ཆེན་པོ། གཡོན་དུ་བསྐོར་བ་རྫོགས་པ་ཆེན་པོ། ཞེས་ཀྱང་གསུངས་སོ། །ལམ་རིམ་ཆེན་མོ་སོགས་ལས། ཕྱག་དང་སྔགས་བཟླ་ཚེ་ལུས་དང་ལྕེ་གྲངས་མེད་ཀྱིས་བཟླས་ན་འགྱུར་ཁྱད་ཆེ་བར་གསུངས་པ་ལྟར། བསྐོར་བའི་ཚེ་ཡང་། རང་གཞན་ཐམས་ཅད་ཀྱིས་བསྐོར་བ་བྱེད་པར་མོས་ཏེ་། ཁ་བཏོན་ཡང་ཡིག་བརྒྱ་དང་ལྟུང་བཤགས་སོགས་རང་གང་མོས་ཀྱིས་འགྱུར་ཆེ་བར་གསུངས་ན་དགོས་པ་ཆེའོ། །རྒྱལ་བའི་བཀའ་འབུམ་གྱི་སྒྲུབ་ཐབས་ལས། རྟེན་ལས་འོད་བྱུང་ནས་རང་ལ་ཕོག་པས། སྒྲིབ་པ་ཐམས་ཅད་བྱང་བར་བསམ་ལ་བསྐོར་བ་བྱའོ། །ཞེས་ཀྱང་གསུངས་སོ། །

གཡུང་དྲུང་བོན་གྱིས་ཀྱང་། ཚད་ལྡན་གྱི་གཞུང་མང་བོར། གཡས་བསྐོར་ཕྱག་རྒྱ་ཆེན་པོ་དང་། གཡོན་བསྐོར་རྫོགས་པ་ཆེན་པོ་ཞེས་ཟེར་ཡང་། མདོ་དྲི་མེད་ལས། གཡུང་དྲུང་ཞབས་ནི་གཡས་བསྐོར་རོ། །ཞེས་དང་། བྱ་ངང་བའི་འགྲོས་ལྟར་འགྱིང་ཡང་མི་འགྱིང་། བྲེལ་ཡང་མི་བྲེལ་བར། དལ་འགྲོས་དང་ལྡན་པར་བྱས་ལ་གཡས་བསྐོར་དུ་གཤེགས། ཞེས་གསུངས་ཀྱང་། དེང་སང་བོན་པོ་མང་བོ་དེ་ལས་ལྡོག་ཏེ་འགྲོ་བ་དང་། མི་ལ་དང་ན་རོ་བན་ཆུང་གཉིས་ཀྱང་ཏི་སེའི་གངས་བསྐོར་ལ་གཡས་གཡོན་བརྩད་པའི་རྣམ་ཐར་ཡང་ཡོད་དོ། །

༣ བསྐོར་བའི་གྲངས་ཚད་ནི། སྤྱིར་བསྐོར་བའི་གྲངས་ཚད་ལ་འདི་ཙམ་ཞེས་གྲངས་བཟུང་མེད་པར། ཇི་ཙམ་སོང་ན་དེ་ཙམ་བཟང་ལ། འདིར་སྔོན་འགྲོ་ཁྲིད་བཞི་འམ་ཁྲིད་བཅུ་ཞེས་པའི་སྐབས་དང་བསྟུན་ནས་འབུམ་དུ་གྲགས་པ་ལྟར་གཞལ་ན། གུང་ཐང་བསྟན་པའི་སྒྲོན་མེས། རྟེན་གཙོ་གང་ལ་གཞལ་བ་དེར་གྲངས་འབུམ་ཕྲག་གཅིག་འགྲོ་བའི་ཚོད་ལ་བསྐོར་ཚད་དུ་གྲགས་པ་ལྟར་ན། རྟེན་གཙོ་འོད་དཔག་མེད་ཀྱི་པད་གདན་ལ་གཞལ་ཏེ། དེ་ཉེར་ལྔའི་འགྱུར་གྱིས་སེང་ཁྲིའི་འགབ་འཁོར་བས། མཆོད་རྟེན་རང་ལ་བསྐོར་བ་བཞི་སྟོང་བྱས་ཚེ། གཙོ་བོ་ལ་འབུམ་ཕྲག་གཅིག་གི་ཚོད་འཁྲོལ་དང་བཅས་ཏེ་འགྲོའོ། །ཞེས་དང་། ཅོ་ནེ་གྲགས་པ་བཤད་སྒྲུབ་ཀྱིས། དེ་ཡང་དགོན་སྡེ་གང་ཡིན་ཡང་རང་རང་གི་རྟེན་གྱི་གཙོ་བོ་གང་ལ་བྱེད་པ་དེའི་བཞུགས་ཁྲི་འམ། པད་གདན་ནམ། སྐྱིལ་ཀྲུང་ལྟ་བུའི་མཐར་མཐོ་ཚད་ཀྱིས་གཞལ་བར་བྱས་ནས། མཐོ་ཚད་དང་འདོམ་ཚད་གང་ལོངས་ཀྱང་། མཐར་དཀྲིས་གཅིག་འཁོར་བའི་ཚད་དེ། བསྐོར་ལམ་དུ་ཅི་ཙམ་ཞིག་འཁོར་ནས་འབུམ་ལོངས་པ་ན། བསྐོར་ཚད་རེ་རྫོགས་པར་འཇོག དེ་ནི་རྟེན་གྱི་གཙོ་བོ་གང་ཡིན་དེ་ལ་བསྐོར་བ་འབུམ་སོང་བའི་དབང་དུ་བཏང་ཡང་། དེར་མ་ཟད་རྟེན་གྱི་གཙོ་བོ་དེ་དང་ཚད་མཉམ་པ་རྣམས་སོ་སོ་ལའང་འབུམ་རེ་འགྲོ་ཞིང་། གཙོ་བོ་ལས་ཆུང་བ་རྣམས་ལ་ནི་གྲངས་དེ་ལས་མང་བར་འགྲོའོ། །གསུངས་པ་ལྟར་རོ། །དེ་ཡང་རྟེན་གཙོ་ཆེ་ན་བསྐོར་གྲངས་མང་ལ་ཆུང་ན་བསྐོར་གྲངས་ཉུང་བ་ཡིན་ནོ། །བསྐོར་བ་བྱེད་ཚེ་བསྐོར་བའི་འགྱུར་སྔགས་ནི། ན་མོ་བྷ་ག་ཝ་ཏེ། རཱཏྣ་ཀེ་ཏུ་རཱ་ཛཱ་ཡ། ཏ་ཐ་ག་ཏཱ་ཡ། ཨཪྷ་ཏེ་སམྱ་ཀྶཾ་བུད་དྷཱ་ཡ། ཏ་ཏྱ་ཐཱ། ཨོཾ་རཏྣེ་རཏྣེ་མ་ཧཱ་རཏྣེ་རཏྣེ་བི་ཛ་ཡ་སྭཱ་ཧཱ། ཞེས་དང་། ཡང་ན། ན་མཿཔྲ་དཀྵྲ་སུ་པྲ་དཀྵྲ་སརྦ་པཱ་བཾ་བི་ཤོ་དྷ་ནི་སྭཱ་ཧཱ། ཞེས་པ་འདི་འདོན་བཞིན་བགྲོད་ན་ཕན་ཡོན་ཆེ་ལ། རྟེན་གྱི་གྲིབ་མ་ལ་འགོམས་དགོས་བྱུང་ན། ཨོཾ་བཛྲ་བེ་ག་ཨ་ཀྲ་མ་ཧཱུཾ། ཞེས་པ་འདི་བཏོན་ཏེ་གྲིབ་མའི་འོག་ཏུ་འཛུལ་བར་མོས་ན་ཉེས་པ་མེད་དོ། །

༤ བསྐོར་བའི་ཕན་ཡོན་ནི། འཕགས་པ་སྤྱན་རས་གཟིགས་ཀྱི་མདོ་ལས། མཆོད་རྟེན་བསྐོར་བ་བྱས་ན་ནི། །སྐྱེ་བ་ཐམས་ཅད་ཀུན་ཏུ་ཡང་། །དབང་ཆེར་གྲགས་པའི་ཁྱིམ་བདག་དང་། །དཔལ་དང་གཟི་བརྗིད་ལྡན་པར་འགྱུར། །བྲམ་ཟེ་སཱ་ལ་ཆེ་འདྲ་དང་། །ཚུལ་ཁྲིམས་ལྡན་ཞིང་མང་ཐོས་དང་། །རྒྱལ་རིགས་སཱ་ལ་ཆེ་འདྲ་དང་། །ཕྱུག་ཅིང་ནོར་ཆེར་ལྡན་པར་འགྱུར། །ཞེས་སོགས་རྒྱ་ཆེར་གསུངས་ལ། གསལ་རྒྱལ་གྱི་ཚིགས་བཅད་ལས། སུ་ཞིག་དད་པས་ཐུབ་པའི་མཆོད་རྟེན་ནམ། །སྐུ་གཟུགས་དག་ལ་བསྐོར་བ་བྱེད་པ་དེ། །ཕྱི་མའི་ཚེ་ལ་དགྲ་ཆེན་རྣམས་ཀྱིས་བཏུད། །བཟང་བོའི་སྣོད་འགྱུར་ཡོན་ཏན་རྣམས་དང་ལྡན། །མི་རྣམས་སུ་དག་དགའ་བཞིན་གུས་པ་ཡིས། །བླ་མེད་མཆོད་རྟེན་རྣམས་དང་སྐུ་གཟུགས་ལ། །ལུས་ཀྱི་ལས་རྣམས་བྱེད་པ་དེ་དག་ནི། །སྲིད་པ་ཀུན་ཏུ་མཛོད་རྣམས་ཤིན་ཏུ་རྒྱས། །ཞེས་དང་། འདུལ་བ་ལུང་ལས། གང་ཞིག་དད་ཅིང་མོས་པའི་སེམས་ཀྱིས་སུ། །སངས་རྒྱས་མཆོད་རྟེན་ལ་ནི་གོམ་འདོར་ན། །འཛམ་བུ་ཆུ་བོའི་གསེར་གྱི་གྲངས་ཚད་ནི། །སྟོང་ཕྲག་བརྒྱ་ཡང་དེ་དང་མཉམ་པ་མིན། །ཞེས་དང་། མཆོད་རྟེན་བསྐོར་བའི་ཚིགས་སུ་བཅད་པའི་མདོ་ལས། དལ་འབྱོར་འཐོབ་ཅིང་། དྲན་དང་། བློ་གྲོས་དང་ཁ་དོག་ལྡན་ཞིང་མཛངས་པར་འགྱུར་བ། ཚེ་དང་ལོངས་སྤྱོད། སྙན་གྲགས་དང་དབང་ཐང་། སྟོབས་དང་བརྩོན་འགྲུས། རྫུ་འཕྲུལ་འཐོབ་པ། མའི་ལྟོར་བདེ་ཞིང་བུ་ཕྲུག་བདེ་བར་བཙའ་བ་སོགས་ཕན་ཡོན་མང་དུ་གསུངས་པ་དང་།

སྔོན་བྱུང་དང་སྦྱར་ནའང་། ཁྱིམ་བདག་དཔལ་སྐྱེས་སྔོན་གྱི་ཚེ་ཕག་གི་སྐྱེས་པ་བླངས་པའི་དུས། ཁྱིས་བདས་ཏེ་ལྟས་དབང་གིས་་མཆོད་རྟེན་ལ་བསྐོར་བ་བྱས་པས། རྒྱུད་ལ་དགེ་བའི་ས་བོན་ཐེབས་པ་བཅོམ་ལྡན་འདས་ཀྱིས་གཟིགས་ཏེ། རབ་ཏུ་བྱུང་བར་གནང་བ་དང་། གཞན་ཡང་། ལུང་གཞི་སོགས་མདོ་ཚད་མ་དང་། རྒྱལ་བོའི་བཀའ་འབུམ་སོགས་སྒྲུབ་ཐབས་ཚད་མ་ལས་ཀྱང་མང་དུ་གསུངས་པ་ལས་གཞན། ཅོ་ནེ་གྲགས་པ་བཤད་སྒྲུབ་ཀྱི་ཕྱག་མཆོད་བསྐོར་བའི་ཕན་ཡོན་ལས་ཀྱང་གསུངས་སོ། །

ཕྱག་འཚལ་བ།

༡ ཕྱག་འཚལ་སྟངས། སྤྱིར་ཕྱག་ནི། ལུས་ཀྱི་རྣམ་འགྱུར་ལ་སོགས་པའི་ཆ་ནས་བཞག་པའི་ཕུང་བོ་ལྔ་བ་ཅན་ཞིག་ལ་ཕྱག་ཟེར། ལུས་ངག་ཡིད་གསུམ་གྱི་ཕྱག་ཡོད་ཀྱང་། འདིར་སྐབས་སུ་བབ་པ་ལུས་ཀྱི་ཕྱག་ལ། སྡོང་བཀོད་ལས། ལུས་ཐམས་ཅད་ས་ལ་ཕབ་པའི་བརྐྱངས་ཕྱག་དང་། སྡོང་བོ་འགྱེལ་བ་ལྟ་བུའི་ལུས་ཐམས་ཅད་ས་ལ་ཕབ་པའི་ཕྱག་འདིས། སྡིག་པ་ལ་འགྱོད་པ་དྲག་པོ་ཡོད་པའི་རྣམ་འགྱུར་དང་། ང་རྒྱལ་གྱི་རི་བོ་ས་ལ་བསྙིལ་བ་ལྟ་བུ་མཚོན་པར་ཡང་བཤད་དོ། །

མདོ་རྩར། ཡན་ལག་ལྔ་ཕྱག་སྟེ། མགོ་དང་། ལག་མཐིལ་གཉིས། པུས་མོའི་སླ་ང་གཉིས་བཅས། ལུས་ཀྱི་མ་ལྔ་ས་ལ་གཏུགས་ཏེ་ཕྱག་འཚལ་བས་ཉོན་མོངས་དུག་ལྔའི་སྒྲིབ་པ་འདག་པ་དང་། སྐུ་གསུང་ཐུགས་ཡོན་ཏན་འཕྲིན་ལས་ལྔའི་བྱིན་རླབས་ཞུགས་པའི་དགོས་པ་ཡོད་པར་བཤད་པ་ལས་གཞན། ལུས་ཀྱི་མ་ལྔ་ས་ལ་གཏུགས་པའི་བསྐུམ་ཕྱག་གི་དགོས་པ། ཕུང་བོ་གསུམ་པའི་མདོ་ལས། བྱང་ཆུབ་སེམས་དཔའ་འདས་པ་དང་། མ་འོངས་པ་དང་། ད་ལྟར་བྱུང་བའི་ཆོས་མཉམ་པ་ཉིད་ལ་འཇུག་ཅིང་ཡན་ལག་ལྔ་ས་ལ་གཏུགས་པར་བྱ་སྟེ། པུས་མོ་གཡས་པ་ས་ལ་འཛུགས་པའི་ཚེ། སེམས་ཅན་ཐམས་ཅད་གཡས་ཕྱོགས་ཀྱི་ལམ་ལ་འཇུག་པར་གྱུར་ཅིག་ཅེས་བརྗོད་དོ། །གཡོན་པ་འཛུགས་པའི་ཚེ། སེམས་ཅན་སུ་དག་གཡོན་ཕྱོགས་ཀྱི་ལམ་ལ་གནས་པ་དེ་ཐམས་ཅད་འཕགས་པའི་ལམ་ལ་གནས་ཤིང་ཡང་དག་པའི་ལམ་ལ་གནས་པར་གྱུར་ཅིག ཅེས་སོ། །ལག་པ་གཡས་པ་ས་ལ་འཛུགས་པའི་ཚེ། ཇི་ལྟར་སངས་རྒྱས་བྱང་ཆུབ་ཀྱི་སྙིང་བོ་མཆོག་དམ་པར་བཞུགས་པ་དགེ་བའི་ཆོས་ཐམས་ཅད་དང་ལྡན་པས་དབུ་དང་སྐུ་སྐྱིལ་མོ་ཀྲུང་ལ་བཞུགས་ཏེ། ཕྱག་གཡས་པ་ས་ལ་བསྣུན་ནས་བདུད་དཔུང་དང་བཅས་པ་བཏུལ་ཞིང་། བྱང་ཆུབ་བརྙེས་པ་ལྟར་སེམས་ཅན་འདི་དག་གིས་ཀྱང་བདུད་ཕྱིར་རྒོལ་བ་ཆོམས་པར་གྱུར་ཅིག བྱང་ཆུབ་སྙིང་བོ་ལ་འདུག་ཅིང་ས་ལ་བསྣུན་ཏེ་སངས་རྒྱས་ཀྱི་ཡེ་ཤེས་ཐོབ་པར་གྱུར་ཅིག ལག་གཡོན་ས་ལ་འཛུགས་པའི་ཚེ། སེམས་ཅན་སུ་དག་བྱིས་པའི་ཆོས་ལ་གནས་ཏེ་གཡོན་ཕྱོགས་སུ་འཛིན་པ། གདུལ་དཀའ་བ་དེ་ཐམས་ཅད་བསྡུ་བའི་དངོས་བོ་བཞིས་ཤིན་ཏུ་སྡུད་པར་གྱུར་ཅིག གདོང་བ་དང་དཔྲལ་བ་ས་ལ་གཏུགས་པའི་ཚེ། སེམས་ཅན་ཐམས་ཅད་ང་རྒྱལ་མ་མཆིས་པས་བླ་མ་རྣམས་ལ་རིམ་འགྲོ་བགྱིད་ཅིང་སྤྱི་གཙུག་ལྟར་མི་མཐོང་བ་དང་། དགེ་བའི་ཆོས་ཐམས་ཅད་ཀྱིས་འཕགས་པར་གྱུར་ཅིག དེ་ལྟར་བདག་གིས་ཡན་ལག་ལྔས་ཕྱག་འཚལ་བ་འདིས། སེམས་ཅན་ཐམས་ཅད་ཀྱི་སྒྲིབ་པ་ལྔ་སེལ་བར་གྱུར་ཅིག དབང་བོ་ལྔ་ཡོངས་སུ་རྫོགས་པར་གྱུར་ཅིག མིག་ལྔ་ཡོངས་སུ་དག་པར་གྱུར་ཅིག ཅེས་པས་ཤེས་སོ། །

གཞན་ཡང་། སྒྱིད་པ་འཁྱུད་པའི་ཕྱག་དང་། དམ་ཆོས་པད་དཀར་ལས། ཐལ་མོ་ཡ་གཅིག་གི་ཕྱག་དང་། ལུས་དུད་པ་ཙམ་ཀྱི་ཕྱག་ཀྱང་གསུངས་ལ། གང་ལྟར་ཡིད་དང་བའི་སྒོ་ནས་གུས་པའི་ཉམས་འགྱུར་ཐམས་ཅད་ལ་ཕྱག་ཟེར། དེ་ཡང་། ཞིང་རྡུལ་མཉམ་པའི་སྒོ་གསུམ་རབ་བཏུད་ནས། །བླ་མ་རྒྱལ་བ་སྲས་བཅས་ལ་ཕྱག་འཚལ། །གསུངས་པ་ལྟར་ཕྱག་འཚལ་བ་སྟེ། ཐར་བ་ཆེན་པོའི་མདོ་ལས་ཀྱང་། པདྨ་ཁ་འབུས་ཕྱེ་འདྲ་བ། །ལག་གཉིས་སྤྱི་བོར་ཐལ་སྦྱར་ཏེ། །ལུས་དཔག་མེད་པའི་སྤྲིན་ཚོགས་ཀྱིས། །ཕྱོགས་བཅུའི་སངས་རྒྱས་ལ་ཕྱག་འཚལ། །ཞེས་སོ། །

ཐལ་མོ་སྦྱོར་སྟངས་ཡང་། མུ་སྟེགས་པའི་ཐལ་མོ་བཅར་ལེབ་དང་། ནང་བའི་ཐལ་མོ་ཁོང་སྟོང་མཐེ་བོང་ནང་དུ་བཅུག་ནས། ནོར་བུའི་དབྱིབས་ལྟ་བུ་སྟེ། བདག་གིས་སྟོང་བའི་མཚོན་བྱེད་ཡིན། མཐེ་བོང་གཉིས་ཅུང་ཟད་ནང་དུ་འོང་བར་བྱས་ཏེ། ནོར་བུ་འཛིན་པའི་ཕྱག་རྒྱས་ལག་གཉིས་ཀྱིས་ནོར་བུ་ཐོགས་པར་མོས། ནོར་བུ་དེ་ལས་ཀུན་ཏུ་བཟང་བོའི་མཆོད་སྤྲིན་ནམ་མཁའི་ཁམས་སྤྲོས་ཏེ། མཆོད་པ་འབུལ་བར་བསམ་པའང་ཡོད། ཡང་ན། ཐལ་མོ་སྦྱོར་བའི་གཟུགས་ཀྱིས་གཟུགས་སྐུ། ཡ་གཉིས་ཀྱིས་ཐབས་ཤེས་ཟུང་འབྲེལ་བྱས་པས། ལམ་མ་སྐྱེས་པ་སྐྱེས་པ། སྐྱེས་པ་གནས་པ། གནས་པ་གོང་འཕེལ་ལ་འགྲོ་བའི་རྟེན་འབྲེལ་སྒྲིག་པ་དང་། ཐལ་མོ་སྤྱི་བོར་སྦྱར་བས་སྙིང་གའི་རྩ་མདུད་གྲོལ། ཁྱད་པར་དུ་སངས་རྒྱས་ཀྱི་གཙུག་ཏོར་འགྲུབ། སྨིན་མཚམས་སུ་སྦྱར་བས་མཛོད་སྤུ། མགྲིན་པར་སྦྱར་པས་མགྲིན་པའི་རྩ་མདུད་གྲོལ། ཁྱད་པར་དུ་གསུང་དབྱངས་ཡན་ལག་དྲུག་ཅུ་འགྲུབ། སྙིང་གར་སྦྱར་པས། སྙིང་གའི་རྩ་མདུད་གྲོལ། ཁྱད་པར་དུ་ཐུགས་རྣམ་པ་ཐམས་ཅད་མཁྱེན་པ་འགྲུབ་པའི་ནུས་པ་འཇོག་ཅིང་། འདིས་བསགས་སྦྱངས་གཉིས་ཀ་འབྱུང་བས་ལུས་ངག་ཡིད་གསུམ་གྱི་སྡིག་སྒྲིབ་འདག ལུས་ས་ལ་ཕབ་པ་དང་ལྡང་བའི་སྐབས། སོར་མོ་རྣམས་གཤིབ་སྟེ་ས་ལ་བཀྲམས་པས། ཕྱག་ཞབས་ཀྱི་སོར་མོ་དྲ་བས་འབྲེལ་བ་འགྲུབ་ལ། ལག་པ་དང་དཔྲལ་བ་སར་གཏུགས་ཏེ་མར་ལྡང་སྐབས། འཁོར་བ་ལས་མྱུར་དུ་ལྡང་བའི་རྟེན་འབྲེལ་ཡོད།

ཡང་ཕྱག་ལ་དབྱེ་ན་བརྒྱད་དུ་ཕྱེ་ཚུལ་ཡང་ཡོད་དེ། རྟོགས་པ་ཆོས་ཉིད་ཀྱི་ཕྱག དགུ་ཕྲུགས། གཟིགས་ཕྱག བྱེ་གཤོག བཞེངས་ཕྱག རྒྱལ་ཕྱག དཔྲལ་སྡེབས། སྒུམ་མཐུན་ནོ། །༡ རྟོགས་པ་ཆོས་ཉིད་ཀྱི་ཕྱག་ནི། ཕྱག་འཚལ་བའི་ཡུལ། འཚལ་བ་བོ། ཚུལ་བའི་ཚུལ་ཐམས་ཅད་རང་སེམས་སྐད་ཅིག་མའི་བྱེད་ལས་ཀྱིས་སྒྲོ་བཏགས་པ་ལས། དོན་ལ་ཕྱག་འཚལ་ཡུལ་དང་འཚལ་བྱ་གཉིས་སུ་མ་གྲུབ་པའི་ཡེ་ཤེས་ལ་ངེས་པ་རྙེད་པ་སྟེ། རིམ་པ་ལྔ་བ་ལས། ཇི་ལྟར་ཆུ་ལ་ཆུ་བཞག་ལྟར། །ཇི་ལྟར་མར་ལ་མར་བཞིན་དུ། །རང་གིས་རང་གི་ཡེ་ཤེས་ནི། །ལེགས་མཐོང་གང་ཡིན་འདིར་ཕྱག་ཡིན། །གསུངས་པ་ལྟར་རོ། །༢ དགུ་ཕྲུགས་ནི། དབང་བསྐུར་བ། རྒྱུད་བཤད་པ། མན་ངག་གནང་བའི་བཀའ་དྲིན་སུམ་ལྡན་གྱི་བླ་མ་ལ་ཕྱག་དགུ་ཕྲུགས་འཚལ་བའོ། །༣ གཟིགས་ཕྱག་ནི། བཀུར་འོས་རྣམས་མཐོང་ནས་གཟིགས་ཕྱག་གནང་སྟེ་ཞེ་ས་འབུལ་བ་འོ། །༤ བྱེ་གཤོག་ནི། བཙད་པོ་རབ་བྱུང་སྔགས་པ་གསུམ་འཛོམས་ན་བྱའོ། །༥ བཞེངས་ཕྱག་ནི། ཕྱག་ཡུལ་རྣམས་མཐོང་ན་ཡར་བཞེངས་ཤིང་ཐལ་མོ་སྦྱོར་བའོ། །༦ རྒྱལ་ཕྱག་ནི། རྒྱལ་བོའི་ཕྱག་ལ་གསུམ། འདུན་ཚུགས། སུམ་ཁུགས། རྒྱལ་ཕྱག་ཉི་ཤུ་རྩ་གཅིག་པའོ། །༧ དཔྲལ་སྡེབས་ནི། ཉན་ཐོས་རབ་བྱུང་གི་ཕྱག་གོ། ༨ མོས་ཕྱག་ནི། དཀོན་མཆོག་གི་རྟེན་མཐོང་བའི་ཕྱག་སྟེ། ལན་གསུམ་འཚལ་བའོ། །

༢ ཕྱག་འཚལ་བའི་དམིགས་པ། སྐྱབས་ཡུལ་དམ་པ་ལ་སྙིང་ཁོང་རུས་པའི་གཏིང་ནས་གུས་ཏེ། བདག་གི་སྒོ་གསུམ་གྱི་དབང་ཆ་ཡོངས་རྫོགས་ཁྱེད་རང་གི་ཕྱག་ཏུ་བཞག་ན། འཕྲལ་ཕུགས་ཀྱི་སྐྱིད་སྡུག་ལེགས་ཉེས་ཐམས་ཅད་ཁྱེད་མཁྱེན་སྙམ་པའམ། ཡང་ན། ཕྱག་ཅེས་པ་བྱང་བ་དང་། འཚལ་ཞེས་པ་ཡོན་ཏན་འདོད་པའི་དོན་དུ་གོ་བ་བླངས་ན། སྒོ་གསུམ་གྱི་སྡིག་སྒྲིབ་བྱང་ཞིང་དག་པ་དང་། བསླབ་གསུམ་གྱི་ཡོན་ཏན་སྐྱེས་ཤིང་འཕེལ་བར་བྱིན་གྱིས་བརླབ་ཏུ་གསོལ་ཞེས་བསམ་ཞིང་སྨོན་པ་དང་། ཡང་ལམ་རིམ་ཆེན་མོར། འཇིག་རྟེན་གྱི་ཁམས་ཕྱོགས་རེ་བ་དང་དུས་རེ་རེའི་སངས་རྒྱས་མ་ཡིན་གྱི། ཕྱོགས་བཅུ་ཁ་ན་བཞུགས་པ་དང་སྔར་བྱོན་ཟིན་པ་དང་མ་འོངས་པ་ན་འབྱོན་པར་འགྱུར་བ་དང་། ད་ལྟར་བྱུང་བའི་རྒྱལ་བ་ཐམས་ཅད་ལ་དམིགས་ནས་གཞན་གྱི་གཡམ་ལ་རྒྱུགས་ལྟ་བུ་མིན་པར་བསམ་པ་ཐག་པ་ནས་སྒོ་གསུམ་གུས་པའི་ཕྱག་འཚལ་བའོ། །དེ་ཡང་སངས་རྒྱས་གཅིག་ལ་ཕྱག་འཚལ་ནའང་བསོད་ནམས་དཔག་ཏུ་མེད་པ་ལ་སངས་རྒྱས་དེ་ཙམ་ལ་དམིགས་ནས་ཕྱག་འཚལ་ན་ལྟ་ཅི་སྨོས་ཞེས་སློབ་དཔོན་ཡེ་ཤེས་སྡེས་བཤད་པར་གསུངས་སོ། །ཡང་སྒོ་གསུམ་སོ་སོའི་ཕྱག་འཚལ་སྐབས་དམིགས་རྣམ་ནི། སློབ་དཔོན་ཡེ་ཤེས་སྡེས་འདི་ལྟར་གསུངས་ཏེ། ལུས་ཀྱི་ཕྱག་ནི། རྒྱལ་བ་ཕྱོགས་དང་དུས་ཀྱིས་བསྡུས་པ་ཐམས་ཅད་ཡིད་ཀྱི་ཡུལ་དུ་མངོན་སུམ་པ་ལྟར་དམིགས་ལ་རང་གི་ལུས་ཞིང་རྣམས་ཀྱི་རྡུལ་ཕྲ་རབ་དང་གྲངས་མཉམ་པར་སྤྲུལ་ལ་ཕྱག་བྱའོ། །དེ་ཡང་ཡུལ་རྣམས་ཀྱིས་བཟང་བོ་སྤྱོད་པ་ལ་རབ་ཏུ་དད་པའི་སྟོབས་བསྐྱེད་དེ་དེས་ཀུན་ནས་བསླངས་ཏེའོ། །ལུས་གཅིག་གིས་ཕྱག་བྱས་པའང་བསོད་ནམས་ཆེ་ན་ལུས་དེ་ཙམ་གྱིས་ཕྱག་བྱས་པ་ནི་བསོད་ནམས་ཤིན་ཏུ་ཆེའོ། །ཡིད་ཀྱི་ཕྱག་ནི། རྡུལ་ཕྲ་རབ་རེ་རེའི་སྟེང་ནའང་རྡུལ་ཐམས་ཅད་ཀྱི་གྲངས་དང་མཉམ་པའི་སངས་རྒྱས་འཁོར་བྱང་སེམས་ཀྱིས་བསྐོར་བའི་དབུས་ན་བཞུགས་པ་ལ་དེ་དག་གི་ཡོན་ཏན་རྗེས་སུ་དྲན་པའི་མོས་པ་བསྐྱེད་པའོ། །ངག་གི་ཕྱག་ནི། ཡུལ་རྣམས་ཀྱི་ཡོན་ཏན་བསྔགས་པ་ཟད་མི་ཤེས་པ་རྣམས་ལུས་རེ་རེ་ལ་མགོ་བོ་དཔག་ཏུ་མེད་པ་དང་། མགོ་བོ་རེ་རེ་ལ་ལྕེ་དཔག་ཏུ་མེད་པར་གསུངས་པ་ལྟར་བྱས་ནས་སྙན་པའི་དབྱངས་ཀྱིས་བརྗོད་པའོ། །

༣ ཕྱག་གི་མཚོན་དོན། འདིར་ས་པཎ་གྱིས་ཕྱག་གི་མཚོན་དོན་དང་སྦྱར་ཏེ་ཕན་ཡོན་ཞིག་གསུངས་པ། གོ་བདེ་ཞིང་ཕན་སླེབས་ཆེ་བས་ཚེགས་སུ་མ་ལྟོས་པར། འདིར་ཆ་ཚང་དྲངས་ན། ན་མོ་གུ་རུ་བྷྱཿ ན་མོ་བུད་དྷ་ཡ། ན་མོ་དྷ་ཪྨ་ཡ། ན་མཿསང་གྷ་ཡ། བདག་གིས་མཆོག་གསུམ་དམ་པར་ཕྱག་འཚལ་ནས། །བདག་ཅག་འགྲོ་ཀུན་སྡིག་སྒྲིབ་འདག་པར་ཤོག། ལག་གཉིས་མཉམ་པར་ཐལ་མོ་སྦྱར་བ་ཡིས། །ཐབས་དང་ཤེས་རབ་ཟུང་འཇུག་འཐོབ་པར་ཤོག། ཐལ་མོ་སྤྱི་བོའི་གཙུག་ཏུ་སྦྱར་བ་ཡིས། །ཞིང་མཆོག་བདེ་བ་ཅན་དུ་སྐྱེ་བར་ཤོག། ཐལ་མོ་སྨིན་མཚམས་དཔྲལ་བར་སྦྱར་བ་ཡིས། །ལུས་ཀྱི་སྡིག་སྒྲིབ་ཐམས་ཅད་འདག་པར་ཤོག། ཐལ་མོ་མགྲིན་པའི་ཐད་དུ་སྦྱར་བ་ཡིས། །ངག་གི་སྡིག་སྒྲིབ་ཐམས་ཅད་འདག་པར་ཤོག། ཐལ་མོ་སྙིང་གི་ཐད་དུ་སྦྱར་བ་ཡིས། །ཡིད་ཀྱི་སྡིག་སྒྲིབ་ཐམས་ཅད་འདག་པར་ཤོག །ཐལ་མོ་སྦྱར་བ་སོ་སོར་ཕྱེས་པ་ཡིས། །གཟུགས་སྐུ་གཉིས་ཀྱིས་འགྲོ་དོན་བྱེད་པར་ཤོག །རྐང་གཉིས་པུས་མོ་ས་ལ་བཙུགས་པ་ཡིས། །འཁོར་བ་ངན་སོང་གནས་ལས་ཐར་བར་ཤོག །ལག་གཉིས་སོར་བཅུ་ས་ལ་བཙུགས་པ་ཡིས། །ས་བཅུ་ལམ་ལྔ་རིམ་གྱིས་བགྲོད་པར་ཤོག །མགོ་བོའི་དཔྲལ་བ་ས་ལ་བཙུགས་པ་ཡིས། །བཅུ་གཅིག་ཀུན་ཏུ་འོད་ཀྱི་ས་འཐོབ་ཤོག །ཡན་ལག་བཞི་བོ་བརྐྱངས་བསྐུམས་བྱས་པ་ཡིས། །འཕྲིན་ལས་རྣམ་བཞི་ལྷུན་གྱིས་འགྲུབ་པར་ཤོག །རྩ་རྒྱུས་ཐམས་ཅད་བརྐྱངས་བསྐུམས་བྱས་པ་ཡིས། །རྩ་མདུད་ཐམས་ཅད་མ་ལུས་དགྲོལ་བར་ཤོག །སྒལ་ཚིགས་དབུ་མ་དགྱེ་སྒུར་བྱས་པ་ཡིས། །རླུང་རྣམས་མ་ལུས་དབུ་མར་ཚུད་པར་ཤོག །ས་ལ་ཐུག་ནས་ཡར་ལ་ལྡང་བ་ཡིས། །འཁོར་བར་མི་གནས་ཐར་ལམ་བགྲོད་པར་ཤོག། བདག་གིས་བརྐྱངས་ཕྱག་ཕུལ་བའི་དགེ་བའི་མཐུས། །གནས་སྐབས་ཚེ་རིང་ནད་མེད་ཕུན་སུམ་ཚོགས། །འཆི་ཚེ་བདེ་བ་ཅན་དུ་སྐྱེས་ནས་ཀྱང་། །རྫོགས་པའི་སངས་རྒྱས་གོ་འཕང་འཐོབ་པར་ཤོག། དགེ་འདིས་དུས་གསུམ་ཕྱོགས་བཅུའི་སངས་རྒྱས་དང་། །བློ་ཆེན་རྒྱལ་སྲས་སེམས་དཔའ་ཐམས་ཅད་ཀྱིས། །མཛད་པ་སྨོན་ལམ་རླབས་ཆེན་ཇི་སྙེད་པ། །མཐའ་དག་བདག་ཉིད་གཅིག་པུས་འགྲུབ་གྱུར་ཅིག །ཅེས་སོ། །

༤ ཕྱག་འཚལ་ལུགས་ནོར་བའི་ཉེས་པ། ཉེས་དམིགས་ཇི་ལྟར་ཡོད་ཚུལ་ནི། ལུས་ས་ལ་ཕབ་པ་དང་ལྡང་བའི་སྐབས། མཛུབ་མོ་བསྐུམས་ན། དུད་འགྲོ་རྨིག་རྡུམ་དང་། ལུས་ས་ལ་ཕབ་ནས་ཧ་ཅང་འགྱངས་ཆེ་བས། ལྟོ་འཕྱེ་དང་སྦྲུལ་གྱི་རིགས་སུ་སྐྱེས་པ་དང་། ཕྱག་སྔ་ཕྱིའི་བར་ལུས་སྒུར་ཙམ་སྒུར་ཙམ་བྱས་པས། དུད་འགྲོ་ལྟ་བུ་སྒུར་བོ་དང་། དཔྲལ་བ་ས་ལ་མ་གཏུགས་པས། དམྱལ་བ་མགོ་འཕྱང་དང་། ཡང་ན་དམྱལ་བ་སྤྱིའུ་ཚུགས་སུ་སྐྱེས། ལག་པ་གཡུགས་པ་དང་། རྒྱབ་མདུན་བསྣོལ་བ་སོགས་ཀྱིས། དམྱལ་བར་སྐྱེས་པ་དང་། ཐར་ན་ཡང་ཉེས་པ་མེད་པར་གྱོད་ལ་སྦྱོར་བ་སོགས་འགྱུར་བས། ཕྱག་འཚལ་ལུགས་ལ་གཟབ་དགོས་པ་ཡིན་ནོ། །

༥ ཕྱག་འཚལ་བའི་ཕན་ཡོན། འཕགས་པ་ཐམས་ཅད་ཡོད་པར་སྨྲ་བའི་གཞུང་ལས། དགེ་སློང་དག དགེ་སློང་གིས་འདི་ལྟར། སྐྲ་དང་སེན་མོའི་མཆོད་རྟེན་ལ་ཡན་ལག་ཐམས་ཅད་ཀྱིས་ཕྱག་འཚལ་ཏེ། སེམས་དང་བར་བྱེད་པ་ལ་ལྟོས། བཙུན་པ་དེ་ལྟར་ལགས་སོ། །དགེ་སློང་དག་འདིས་ས་ཇི་ཙམ་མནོན་པའི་འོག་དཔག་ཚད་བརྒྱད་ཁྲི་བཞི་སྟོང་ན་གསེར་གྱི་འཁོར་ལོ་རྣམས་ལ་ཐུག་པའི་བར་ན། བྱེ་མ་ཇི་སྙེད་ཡོད་པ་དེ་སྙེད་དུ་དགེ་སློང་འདིས་འཁོར་ལོས་བསྒྱུར་བའི་རྒྱལ་སྲིད་སྟོང་འགྱུར་དུ་ལོངས་སྤྱོད་པར་འགྱུར་རོ། །ཞེས་དང་། མདོ་ལས་ཀྱང་། བཅོམ་ལྡན་འདས་ཀྱི་དབུའི་གཙུག་ཏོར་མི་མངོན་པ་ནི། བླ་མར་བྱ་བའི་སྐྱེ་བོ་ལ་གུས་པར་བཏུད་དེ་ཕྱག་འཚལ་བ་ལས་བྱུང་ངོ་། །ཞེས་དང་། དཀོན་མཆོག་ཏ་ལ་ལ་ལས། རྒྱལ་བ་རྣམས་དང་རྒྱལ་བའི་མཆོད་རྟེན་ལ། །ལུས་གཏུགས་ནས་ནི་ལུས་ནི་སྦྱང་བ་འཐོབ། །སེམས་ཅན་སྦྱོང་བའི་འོད་ཟེར་རབ་གཏོང་ཞིང་། །མྱོས་པ་ཐམས་ཅད་སེམས་དང་ལྡན་པར་འགྱུར། །ཞེས་དང་། དམ་ཆོས་པད་དཀར་ལས་ཀྱང་། མཆོད་རྟེན་དེ་ལ་གང་གིས་ཐལ་མོ་སྦྱར། །ཡོངས་སུ་ཚང་བའམ་ཐལ་མོ་ཡ་གཅིག་གམ། །ཡང་ན་མགོ་བོ་སྐད་ཅིག་བཏུད་པ་དང་། །གང་གི་རིང་བསྲེལ་གནས་པ་དེ་དག་ལ། །གཡེང་བའི་སེམས་ཀྱིས་ཕྱག་འཚལ་སངས་རྒྱས་ཞེས། །ཚིག་གཅིག་ལན་འགའ་བརྗོད་པར་བྱས་པ་ཡང་། །དེ་དག་ཀུན་གྱིས་བྱང་ཆུབ་མཆོག་འདི་འཐོབ། །ཞེས་སོགས་སྤྱན་རས་གཟིགས་ཀྱི་མདོ། སྨན་མདོ་བརྒྱད་བརྒྱ་བ་སོགས་ལས་ཀྱང་མང་དུ་གསུངས་སོ། །

སཙྪ་འདེབས་སྲོལ།

༡ སཙྪ་འདེབས་སྲོལ་གྱི་ཁུངས། རང་ཅག་བོད་འདིར་ཆོས་ལུགས་ཀྱི་སྒྲུབ་སྟངས་འདྲ་མིན་དར་བ་ལས། སཙྪ་འདེབས་སྟངས་འདི་ཡང་། དེའི་གྲས་ཀྱི་ཆོས་སྲོལ་ཅིག་ཡིན། སཙྪའི་སྐད་དོད་ལ་བོད་སྐད་དུ་འདྲ་གཟུགས་ཟེར། དེའི་ཁུངས་ནི་ཤེས་པ་ཐམས་ཅད་མཐར་ཕྱིན་པར་གྲུབ་པའི་མཆོད་རྟེན་གྱི་གཟུངས་ལས། འབྱུང་བ་ཆེན་པོ་གང་ལ་མཆོད་རྟེན་བཏབ་ཀྱང་། བསྐལ་བ་དཔག་ཏུ་མེད་པ་ཐམས་ཅད་ཀྱི་སྒྲིབ་པའི་དྲི་མ་དག་ནས། ཁྱིམ་བདག་གི་རིགས་སཱ་ལ་ཆེན་པོ་ལྟ་བུར་སྐྱེས་ཏེ། ཕྱིར་མི་ལྡོག་པའི་ས་འཐོབ་པར་འགྱུར་རོ། །ཞེས་དང་། ལས་ཐམས་ཅད་པའི་རྒྱུད་དང་སྒྱུ་འཕྲུལ་དྲྭ་བའི་དགོངས་པ་བཞིན་རོང་ཟོམ་ཆོས་བཟང་གིས་གསུངས་བར་གཞི་བྱས་ཏེ་འཇུ་མི་ཕམ་པས་ཀྱང་གསུངས་ཡོད་པ་དང་། དཔུང་བཟང་གིས་ཞུས་པའི་རྒྱུད་ལས། བདེ་གཤེགས་མཆོད་རྟེན་རྟེན་འབྲེལ་སྙིང་བོ་ཅན། །སྡིག་པ་དག་ཕྱིར་རྟག་ཏུ་གདབ་པར་བྱ། །ཞེས་དང་། གུང་ཐང་བསྟན་པའི་སྒྲོན་མེས། བསོད་ནམས་འབྲས་བུ་གཟུགས་སུ་ཤར་བ་བདེ་བར་གཤེགས་པའི་མཆོད་རྟེན་བརྒྱད། །བསོད་ནམས་ཞིང་སར་གཅིག་ཏུ་སྡུད་པའི་རྨད་བྱུང་ཐབས་མཁས་བླ་ན་མེད། །ཅེས་དང་། བསྒྲུབ་པར་སླ་ཞིང་ཤིན་ཏུ་དོན་ཆེ་བ། །སྔོན་རབས་དམ་པ་མང་བོའི་ཐུགས་དམ་མཐིལ། །སཙྪའི་གདམས་པ། ཞེས་པ་ལྟར། སཙྪ་ནི་ཚ་རྐོང་ལས་བྱུང་བའི་མཆོད་རྟེན་ཆུང་ངུའི་རིགས་ཏེ། འདི་ཐུགས་རྟེན་གྱི་ཁུངས་སུ་གཏོགས་མོད་ཀྱང་། མི་འཁྲུགས་པ་དང་། སྨན་བླ་སོགས་དང་། ལྟུང་བཤགས་ཀྱི་ལྷ་སོ་ལྔ། མདོ་སྡེ་བསྐལ་བཟང་ལས་བྱུང་བའི་སངས་རྒྱས་སྟོང་སོགས་ཀྱི་སྣང་བརྙན་གྱི་སཙྪ་ནི་སྐུ་རྟེན་དང་། ད་ལྟ་གཟུངས་སྔགས་སོགས་ཀྱི་ཚ་རྐོང་མ་བྱུང་ཡང་། དེ་ཡང་བྱུང་ན་ཤིན་ཏུ་ལེགས་པར་སྙམ་ལ། ཕྱིས་སུ་དེ་དག་བྱུང་ན་གསུང་གི་རྟེན་གྱི་ཁུངས་སུ་གཏོགས་སོ། །

ཡང་ར་ག་ཨ་སེའི་སཙྪའི་ཕན་ཡོན་རིན་ཆེན་ཕུང་བོ་ལས་སཙྪ་ནི་ཆོས་ལོངས་སྤྲུལ་གསུམ་གྱི་སྐུ་ལས་ཆོས་སྐུའི་རྟེན་དང་། ཆོས་སྐུའི་རྟེན་དེ་ཡང་ལྷུང་བཟེད་ཁ་སྦུབ་པ་དང་། ཁང་བུ་ལྟར་དང་། རྒྱལ་མཚན་ལྟར་བརྩེགས་པ་གསུམ་ལས། སཙྪ་ནི་རྒྱལ་མཚན་ལྟར་གྲགས་པ་དེ་ཡིན་པར་བཤད་ཡོད་ལ། དེ་ལའང་བདེ་གཤེགས་མཆོད་རྟེན་བརྒྱད་ཚང་བར་གསུངས་ཏེ། པདྨའི་འདབ་མ་ཅན་ནི་པདྨ་ཅན་ཏེ་སྐུ་བལྟམས་པའི་མཆོད་རྟེན། བང་རིམ་བཞི་པ་ནི་རྡོ་རྗེ་གདན་དུ་བྱང་ཆུབ་པའི་མཆོད་རྟེན། བཀྲ་ཤིས་སྒོ་མང་གི་མཆོད་རྟེན་ནི་ཆོས་ཀྱི་འཁོར་ལོ་བསྐོར་བའི་མཆོད་རྟེན། ཕྱོགས་བཞིར་འབུར་ཡོད་པ་ནི་ཆོ་འཕྲུལ་ཆེན་པོ་བསྟན་ནས་མུ་སྟེགས་ཕམ་བྱེད་མཆོད་རྟེན། སྐས་ཡོད་པ་ནི་ལྷ་བབས་མཆོད་རྟེན། བང་རིམ་བཞིའི་ཟུར་བཅད་པ་ནི་དགེ་འདུན་དབྱེན་ཟླུམ་མཆོད་རྟེན། བང་རིམ་གསུམ་པོ་ཟླུམ་པ་ནི་སྐུ་ཚེ་བྱིན་གྱིས་བརླབས་པའི་མཆོད་རྟེན། མགུལ་ཆུ་མན་ཆད་བཞུགས་པ་ནི་མྱ་ངན་ལས་འདས་པའི་མཆོད་རྟེན་ཞེས་གསུངས་ནི་ཞིབ་ཆ་བཏོད་པ་ཙམ་ལས། སཙྪའི་སྐད་དོད་དུ་འདྲ་གཟུགས་སུ་གསུངས་པས་ན་མཆོད་རྟེན་དང་སྐུ་གཟུགས་གང་ཡིན་ཀྱི་འདྲ་ལ་གོ་དགོས་པར་སྙམ་མོ། །

གཡུང་དྲུང་བོན་གྱི་ལུགས་ལའང་གཟན་དཔར་ཆེ་ཆུང་སྣ་ཚོགས་ཡོད་ཅིང་། དེ་དག་གི་སྟེང་དུ་མཆོད་ལྷ་བརྒྱད་དང་། འདོད་ཡོན་ལྔ། སེང་གླང་རྟ་འབྲུག་ཁྱུང་། བཀྲ་ཤིས་རྟགས་བརྒྱད་དང་རྫས་བརྒྱད། གོ་ཁྲབ་མཚོན་གསུམ་སོགས་ཀྱི་རི་མོ་རྣམས་ཤིང་སྟེང་དུ་འབུར་བརྐོས་བྱས་པ་དེ་རྣམས་ཆོ་ག་དང་བསྟུན་ཏེ་དཔར་བརྒྱབ་ནས་བེད་སྤྱོད་གཏོང་སྲོལ་ཡོད་དོ། །གཟན་དཔར་དེ་དག་ནི་འདྲ་གཟུགས་ཞེས་མིང་བཏགས་ཆོག་ཀྱང་། མཆོད་རྟེན་གྱི་སཙྪའི་མིང་མི་ཐོགས་སོ། །

༢ སཙྪ་རྐོས་ཕོར་བོད་ལ་དར་བའི་དུས་རིམ། སཙྪ་བོད་དུ་དར་བའི་དུས་རིམ་ནི། བོད་ཀྱི་རྒྱལ་རབས་ཉེར་བདུན་པ་ལྷ་ཐོ་ཐོ་རི་སྙན་ཤལ་གྱི་དུས་སུ། པཎྜི་ཏ་བློ་སེམས་འཚོ་དང་། ལོ་ཙཱ་བ་ལི་ཐེ་སེ་ཟུང་གིས་མདོ་སྡེ་ཟ་མ་ཏོག་སོགས་རྒྱལ་བོར་ཕུལ་ཏེ། དམ་པ་ཆོས་ཀྱི་དབུ་བརྙེས་སྐབས། རིན་པོ་ཆེའི་བརྐོས་ཕོར་དྲུག་ཡོད་པར་གསུངས་པས་ན། དེ་དུས་ནས་དབུ་ཚུགས་པ་ཡིན་ཞེས་བཤད་ན་འགལ་བ་མེད་པར་སེམས། བསྟན་པ་ཕྱི་དར་གྱི་དུས་སུ། སྨྲི་ཏིའི་སྐྱེད་ཡུམ་གཙང་རྟ་ནག་གི་དུད་ཁྱིམ་ཞིག་གི་ཐབ་རྩར་འབུ་སྲིན་ཞིག་གི་སྐྱེས་པ་བླངས་ཡོད་པ་ཤེས་པས། ཁོང་གིས་ཚ་རྐོང་བསྣམས་ཏེ། ཁྱིམ་ཚང་དེའི་ཐབ་ས་བླངས་ནས་སཙྪ་བཏབ་པའི་ལོ་རྒྱུས་ཡོད་པ་དང་། གཞན་ཡང་། ཇོ་བོ་རྗེ་དང་མི་ལ། འཇམ་མགོན་རྒྱལ་བ་བློ་བཟང་གྲགས་པའི་དཔལ་སོགས་ཀྱིས་སཙྪ་བཏབ་པ་སོ་སོའི་རྣམ་ཐར་ན་གསལ་བ་ལྟར། དམ་པ་དེ་ཚོའི་ཕྱག་ལེན་རིམ་བརྒྱུད་ཀྱིས་སཙྪ་བཏབ་སྟེ་ད་ལྟ་ཡང་རང་ཅག་གིས་ལག་ལེན་དུ་འདེབས་པ་འདིའོ། །

༣ སཙྪའི་མཚོན་དོན་དང་རྒྱུ། སཙྪའི་མཚོན་དོན་ནི། ཐུགས་རྗེ་ཆེན་པོ་གསང་བ་འདུས་པའི་རྒྱུད་ལས། དེ་ནས་ཚོགས་ཆེན་བསག་པའི་ཕྱིར། །སཙྪའི་རིམ་པ་བཤད་པར་བྱ། །ས་བཟང་རིན་ཆེན་བརྡར་བ་ལ། །ཡིག་འབྲུ་བཟླ་ཞིང་འབི་འབི་བྱ། །རང་ཉིད་ཡི་དམ་ལྷར་གསལ་བས། །སྐུ་པར་སྟོང་བ་ཆོས་སྐུ་ལ། །འབི་འབི་ལོངས་སྤྱོད་རྫོགས་པའི་སྐུ། །སཙྪ་སྤྲུལ་སྐུ་འགྲོ་བའི་དོན། །ཐུགས་རྗེ་ཆེན་པོར་ལམ་ལམ་བྱོན། །ཞེས་སོ། །

སཙྪའི་རྒྱུ་ལ་ས་ཆུ་གཉིས་ཏེ། ཇོ་བོ་རྗེས་མཛད་པའི་ཚ་དགུ་མ་ལས། ས་ཆུ་སྲོག་ཆགས་མེད་པ་ལ། །ཞེས་དང་། འདུལ་བའི་མདོར། སྐྱེས་པ་ཕྲ་མོའི་གནས་དང་ལྡན་པ་སྤོངས་དགོས་པར་གསུངས་པས། འབུ་སྲིན་ཕྲ་མོ་ཡོད་མེད་ལ་བརྟགས་ཏེ་སྲོག་ཆགས་མེད་པའི་གཞི་ལས་བླངས་པའམ། ཡང་ན་སྲོག་ཆགས་ཕྲ་མོ་རྣམས་ས་ཚགས་དང་ཆུ་ཚགས་ཀྱིས་བསལ་དགོས་པ་དང་། ས་ཆུ་དེ་མཆོད་རྟེན་གྱི་རྒྱུ་ཆ་ཡིན་སྟབས་ལམ་འོག་དང་། གད་སྙིགས་འདོར་ཡུལ་སོགས་ནས་བླངས་པ་མ་ཡིན་པར་ས་ཆུ་གཙང་ས་ནས་ལེན་དགོས། སའི་རྒྱུ་རབ་ནི་ས་དམར་གྱི་རིགས་འབྱར་བག་ཅན་ཡིན་མོད། མ་འབྱོར་ན་སྤྱིར་བཏང་གི་ས་ཡིན་ཡང་ཆོག དེ་ཡང་རྩྭ་སྔོན་མི་སྐྱེས་པའི་སའམ། ཡང་སའི་ཁ་ཤུན་བཀོག་ནས། བྱེ་མ་སོགས་མི་འདྲེས་པའི་ས་གཙང་ལེན་དགོས།

༤ སཙྪ་ལག་ལེན་ལ་འདེབས་སྟངས། སཙྪ་འདེབས་པའི་རིམ་པ་ལ། ཐོག་མར་ས་སྦྱིན་པོ་ཡོད་ཅིང་གདོན་དྲག་པོ་མེད་པའི་སར། ས་ཆོག་རྒྱས་པར་བྱས་ནས་བསླངས་ན་རབ། འབྲིང་ཡིན་ན་ས་བདག་ལ་གཏོར་མ་བཏང་ནས་སློང་། མ་མཐའ་འང་ཁྱིམ་ནས་གནས་དེའི་ས་བདག་ལ་གཏོར་མ་བཏང་ནས་སློང་ངོ་། །དེ་མ་བྱུང་ན་སའི་ལྷ་མོ་བརྟན་མ་དང་ལྟོ་འཕྱེ། ཡང་ན། ས་བདག་བྱེ་བྲག་པ་རེ་ཡོད་པས། མ་བྱིན་ལེན་གྱི་ཉེས་པ་འབྱུང་བར་གསུངས་སོ། །ས་རྐོ་བའི་དུས་ནི། ར་ག་ཨ་སེའི་སཙྪ་སྤྱི་འགྲོས་ཕྱག་ལེན་ལས། དེ་ནས་སྐག་ལེ་ཐོགས་ཏེ་ས་རྐོ་བ། །དཔྱིད་ཟླ་གསུམ་ལ་བྱང་དུ་ཁ་གྱུ﹙འཇོར་གྱི་ཁ་འཁོར་ཕྱོགས﹚རྐོ། །དབྱར་ཟླ་གསུམ་ལ་ཤར་དུ་ཁ་གྱུ་རྐོ། །སྟོན་ཟླ་གསུམ་ལ་ལྷོ་རུ་ཁ་གྱུ་རྐོ། །དགུན་ཟླ་གསུམ་ལ་ནུབ་ཏུ་ཁ་གྱུ་རྐོ། །དེ་ལྟར་ལྟོ་འཕྱེ་མ་བརྩིས་ཉེས་སྐྱོན་འབྱུང་། །ཚེས་པ་བཅུ་གཉིས་ནམ་ཡང་ས་མི་རྐོ། །གྲུ་རེ་བརྐོས་ན་མི་རེ་འཆི་བར་བཤད། །དེ་ནི་ས་བདག་ཐེ་སེ་སྤྲེལ་ཁོག་ཟེར། །ཞེས་གསུངས་ལ། དེ་ལྟར་ཁ་གྱུ་ཕྱོགས་མ་ནོར་བར་བརྐོས་ན། ལྟོ་འཕྱེའི་ལྟོ་ཚིལ་ལོན་པར་མ་ཟད། ས་དེ་རིན་ཆེན་སྣ་ལྔའི་གཏེར་ཁ་སྟེ་ས་གཡང་དངོས་གྲུབ་འཐོབ་པར་བཤད་དོ། །ས་སློང་གི་ཚིག་ཀྱང་། ས་བདག་ལྟོ་འཕྱེ་ཆེན་པོ་དང་། །ས་ཡི་ལྷ་མོ་བརྟན་མ་དང་། །སྲས་པོ་ས་འཛིན་ལག་པ་ཆེ། །ཡུལ་རིས་འདི་ལ་གནས་པ་དང་། །ཁྱད་པར་ས་སྦྱིན་ལེན་པ་དང་། །གནས་པའི་ས་བདག་ཐམས་ཅད་ཀུན། །བདུད་རྩི་གཏོར་མ་འདི་བཞེས་ལ། །བདེ་གཤེགས་མཆོད་རྟེན་བཞེངས་པའི་ཕྱིར། །ས་འདི་བདག་ལ་གནང་བར་མཛོད། །ཅེས་དང་། སཙྪའི་ཆོ་ག་བསོད་ནམས་རི་བོ་ལས། བདག་གིས་མཆོད་རྟེན་མང་བཞེངས་པའི། །དགེ་བའི་ཆ་ཤས་ཁྱེད་ལ་བྱིན། །དེ་ཕྱིར་དགེ་ཞིང་བྱང་སེམས་ཀྱིས། །ས་འདི་བཀྲ་ཤིས་མཛད་དུ་གསོལ། །བརྗོད་པས་བརྟན་མ་ལ་སོགས་དགྱེས། །ས་འདི་གནང་བས་འགྲོ་དོན་སྤྱོད། །གསུངས་ནས་བརྟན་མ་ས་ལ་ཐིམ། །ས་བདག་གཞན་རྣམས་བྱེར་བར་གྱུར། །ཞེས་པ་བརྗོད་དེ་ས་དེ་ས་བདག་གིས་བྱིན་གྱིས་བརླབས་པའི་དངོས་གྲུབ་ཆེན་པོར་སྒོམ་ལ་ཁྱིམ་དུ་འཁྱེར་ཏེ་རིན་ཆེན་བརྡར་ཞིང་སྤོས་ཆུས་བྲན་པར་བྱ། དེ་ནས་འབྲུ་གཙང་མ་ལ་རྟེན་འབྲེལ་སྙིང་བོ་དང་གཟུངས་སྔགས་བཟླས་པའི་གཟུངས་གཞུག་སོགས་སྟ་གོན་བྱ། གཙང་སྦྲ་དང་ལྡན་པའི་ངང་ནས་མི་འཁྲུགས་པའི་གཟུངས་དང་། ངན་སོང་སྦྱོང་རྒྱུད་ཀྱི་གཟུངས་བསྔོ་སྨོན་རྣམ་དག་སོགས་སྔོན་དུ་བཏང་ནས། སཙྪ་འདེབས་པའི་སྔགས་འདི་རྣམས་སོ་སོར་བརྗོད་དགོས་ཏེ། འཇིམ་པ་བླངས་པའི་སྔགས། ཨོཾ་ན་མཿས་མནྟ་བུདྡྷ་ནན་ཨོཾ་བཛྲ་ཨཱ་ཡུ་ཥེ་སྭཱ་ཧཱ། བཟླས་ཏེ། འཇིམ་གཙང་བླངས་ནས། ཚེ་འདས་ཡིན་ན་སྐྲ་དང་། རུས་པ་ཕྱེ་མར་བཏང་སྟེ་འཇིམ་པར་བསྲེས་དགོས་སོ། །དེ་ཡང་སཙྪའི་ཆོ་ག་བསོད་ནམས་རི་བོ་ལས། སྡིག་ཅན་མིན་ཞིང་ཉེ་དུ་མིན་པས་ནི། །རུས་པ་ཞིབ་པར་བརྡུང་ལ་ཆུ་ལ་སྦྱང་། །སེ་གཅིག་མེད་ཅིང་ཆུ་མདོག་འགྱུར་ཙམ་བྱ། །དེ་ཡི་ས་ཡིས་སྦྲུ་བར་བྱ་བ་སྟེ། །གསོན་པོའི་སོ་དང་སྐྲ་སེན་དེ་དང་མཚུངས། །གསུངས་སོ། །འབི་འབི་བྱ་བའི་སྔགས། ཨོཾ་བཛྲོ་དྡྷ་ཝྭཱ་ཡེ་སྭཱ་ཧཱ། སྣུམ་བྱུགས་པའི་སྔགས། ཨོཾ་ཨ་ར་ཛེ་བི་ར་ཛེ་སྭཱ་ཧཱ། སྐུ་སྤར་དུ་འཇུག་པའི་སྔགས། ཨོཾ་ངྷ་ཪྨཱ་དྷཱ་ཏུ་གརྦྷེསྭཱ་ཧཱ། གཟུངས་གཞུག་པའི་སྔགས། ཨོཾ་བཛྲ་དྷཱ་ཏུ་གརྦྷེ་སྭཱ་ཧཱ། བརྐོས་པོར་ལས་མ་བཏོན་གོང་དུ་འབྲུའི་གཟུངས་གཞུག་ན་སྟབས་བདེའོ། །ར་ག་ཨ་སེས་སྡིག་སྒྲིབ་དག་པར་ཨོ་ཨཿཧཱུཾ་དང་། ཡིག་བརྒྱ། རྟེན་འབྲེལ་སྙིང་བོའི་སྔགས་ནང་གཞུག་བྱེད་པར་ཡང་གསུངས་སོ། །འཇིམ་པ་བཅད་པའི་སྔགས། ཨོཾ་བྷ་ཡུ་ཏེ་སྭཱ་ཧཱ། བརྡུང་བའི་སྔགས། ཨོཾ་བཛྲ་མུངྒ་ར་ཨཱ་ཀོ་ཊྚ་ཡ་ཨཱ་ཀོ་ཊྚ་ཡ་ཧཱུཾ། བརྐོས་ཕོར་ལས་བཏོན་ཏེ་ཉི་མ་བསྐམ་པའམ། རབ་ཡིན་ན་སོར་བཏང་ན་ལེགས་པར་གསུངས་སོ། །རྟེན་འབྲེལ་སྙིང་བོའི་གཟུངས་སྔགས་ནི། ཡེ་དྷ་རྨ་སོགས་དང་། ས་དཀར་གསོལ་བའི་སྔགས་ནི། ཨོཾ་བཛྲ་ཨ་ར་ཛེ་བི་ར་ཛེ་སྭཱ་ཧཱ། མཐར་རབ་གནས་རྒྱས་བསྡུས་གང་རུང་བྱས་ཏེ། བསྔོ་སྨོན་སོགས་ཀྱིས་རྒྱས་འདེབས་པར་བྱའོ། །

ཡང་ན། སཙྪ་གདབ་སྐབས། ཚེ་འདས་ཀྱི་དོན་དུ་ཡིན་ན་རྩ་རིག་དང་ཀམ་ཀ་ནིའམ་མ་ཎི་བཟླ་ལ། སྒྲིབ་པ་དག་པར་འདོད་ན་ཡིག་བརྒྱ་དང་། ཚེ་རིང་བ་ལ་ཚེ་གཟུངས། ནད་ཞི་བ་ལ་སྨན་བླའི་སྔགས། སྲི་བཟློག་ལ་སོ་འབྲང་མ། ལོངས་སྤྱོད་རྒྱས་པར་ཛམ་ལྷའི་སྔགས་སོགས་བཟླའོ། །ཡང་དགེ་སློང་མ་དཔལ་མོའི་ལུགས་ཀྱི་ཐུགས་རྗེ་ཆེན་པོ་དམར་ཁྲིད་ལས། ས་བརྐོ་བ། ས་བྱིན་གྱིས་བརླབས་པ། འབི་འབིའི་སྔགས། འདེབས་པའི་སྔགས། ཕྱུང་བའི་སྔགས། བཞུགས་གསོལ་སྔགས། ཡེ་ཤེས་པ་བསྟིམ་སྔགས། རབ་གནས་སྔགས་སོགས་མ་ཎི་བཏོན་པའི་ཆོག་པར་གསུངས་པ་ནི། ཐུགས་རྗེ་ཆེན་པོ་ཡང་སྙིང་བསྡུས་པ་དང་། ཐུགས་རྗེ་ཆེན་པོ་གསང་འདུས་རྒྱུད་གཞུང་ལས། ཨོཾ་མ་ཎི་པདྨེ་ཧཱུཾ་ཧྲཱྀཿབཟླ་ཞིང་བཏབ་པས་ཆོག སྔགས་གཞན་མི་དགོས་པར་གསུངས་པའི་དགོངས་པའོ། །

མདོག་གི་ཁྱད་པར་ཡང་། སཙྪ་ཆོ་ག་བསོད་ནམས་རི་བོ་ལས། ཡིག་དྲུག་ནང་གཞུག་ཅན་རྣམས་སེར་བོ་བྱ། །མགོན་པོ་སྔགས་ཅན་ཉི་ཤུ་སྔོན་པོ་བྱ། །འབྲུ་གསུམ་ནང་གཞུག་ཅན་རྣམས་སེར་བོ་བྱ། །གཞན་པ་ཀུན་ལ་དཀར་རྩི་གསོལ་ན་ལེགས། །གསུངས་སོ། །

དེ་ལྟར་སཙྪ་གྲུབ་ཟིན་པ་དེ་ཇི་ལྟར་བྱ་ཞེ་ན། ར་ག་ཨ་སེའི་སཙྪ་སྤྱི་འགྲོས་ཕྱག་ལེན་ལས། ས་གཙང་སཙྪ་བཞི་མདོ་ཡི། །བསྐོར་བ་འཕེལ་བར་ཚ་ཁང་བྱ། །རུས་ཚ་བྲག་ཕུག་དབེན་པར་བཞུགས། །ཞེས་དང་། ལས་ཀྱི་སྒྲིབ་པ་རྣམས་སྦྱོང་བའི་གཟུངས་ལས། མཆོད་རྟེན་འབུམ་ལས་བྱས་ལ། གདུགས་དང་། རྒྱལ་མཚན་དང་། བ་དན་ལ་སོགས་པས་ལེགས་པར་མཆོད་ནས་རྒྱ་མཚོ་ཆེན་པོའམ། ཡང་ན། ཆུ་ཀླུང་དུ་བཤགས་ན། དེས་སེམས་ཅན་དམྱལ་བ་སོགས་ལས་ཐར་བར་འགྱུར་རོ། །ཞེས་དང་། བུ་སྟོན་རིན་པོ་ཆེས་ཀྱང་། གཤིན་པོ་རྗེས་འཛིན་གྱི་ཆེད་དུ་ཡང་སཙྪ་བྱས་རྗེས་ཆུ་ཀླུང་དུ་གཏོང་བའམ། ཡང་ན། ལམ་གྱི་བཞི་མདོར་མཆོད་རྟེན་བྱ་བ་གཉིས་སུ་གསུངས་པ་དང་།

ཡང་བསམ་དགོས་པ་ཞིག་ལ། པོ་ཏོ་བའི་གསུང་སྒྲོས་སུ། སཙྪ་ཆུ་ནང་དུ་བསྐྱུར་བའམ། ཡང་ན་ཆུ་འགྲམ་དུ་འཇོག་པ་ནི་མཆོད་རྟེན་འཇིག་པ་ཡིན་པས། ཉེ་བའི་མཚམས་མེད་དུ་འགྱུར་ཞེས་གསུངས་ཀྱང་། དེའི་དགོངས་པ་ནི། རང་གི་གནས་སོགས་སུ་འཇོག་མི་བདེ་བར་བསམ་ནས་ཆུ་ནང་དུ་བསྐྱུར་བ་སོགས་ལ་དགོངས་པ་ཡིན། ཞེས་གུང་ཐང་བསྟན་སྒྲོན་གྱིས་ཞིབ་ཆ་གཏོད་ཡོད་དོ། །

འོན་ཀྱང་། སྒྲིབ་པ་རྣམ་སྦྱོང་གི་གཟུངས་ལས། དེའི་མིང་བྲིས་པ་གཟུངས་སྔགས་བཟླས་བརྗོད་བྱེད་ཅིང་མཆོད་རྟེན་འབུམ་བྱས་པར་གདུགས་དང་། རྒྱལ་མཚན་དང་། བ་དན་ལ་སོགས་པས་ལེགས་པར་མཆོད་ནས་རྒྱ་མཚོ་ཆེན་པོའམ། ཡང་ན། ཆུ་ཀླུང་དུ་བཏང་ན། དེས་ནི་སེམས་ཅན་དམྱལ་བ་ལ་སོགས་པ་ལས་ཐར་བར་འགྱུར་རོ། །ཞེས་གསུངས་པ་ནི། ཚེ་འདས་ཀྱི་མིང་བྱང་བཅུག་པའམ་རུས་སྐྲ་སོགས་འདྲེས་ཏེ་མི་འཁྲུགས་པའི་རུས་ཆོག་བྱས་པ་ནི་ཆུར་གཤེགས་པར་བཤད་པ་ལས། སཙྪ་གཞན་རྣམས་ཆུར་དོར་མི་རུང་ཞེས་ཆོས་ཀྱི་དབང་ཕྱུག་དང་། དཀོན་མཆོག་འབངས། སྟག་ཚང་ལོ་ཙཱ་བ་སོགས་ཀྱིས་གསུངས་ལ། ར་ག་ཨ་སེས། སཙྪའི་ནང་མིང་བཅུག་པའམ། རུས་པ་སྐྲ་སོགས་འདྲེས་པ་ནི། བསྐོར་བ་མི་ཕོག་སར་བཞག་དགོས་ཀྱི། གལ་ཏེ་དེ་ལ་བསོད་ནམས་དང་ཡོན་ཏན་ཆེ་བས་བསྐོར་ན། ཚེ་འདས་ལ་གནོད་པ་འོད་སྲུང་རྫོགས་བྱེད་ཀྱི་གཏམ་རྒྱུད་དུ་སྦྱོར་ཀྱང། དེ་ནི་སེམས་དཔའ་སོགས་མ་ཡིན་པའི་ཕལ་བའི་རུས་སྐྲ་དང་། རུས་ཆོག་བྱེད་པ་པོ་ཐ་མལ་བ་ལ་དགོངས་པར་སྙམ་མོ། །སཙྪ་ཆུ་ཀླུང་དུ་གཤེགས་སྐབས། པཎ་ཆེན་དཔལ་ལྡན་ཡེ་ཤེས་ཀྱི་གསུང་བཞིན་རྒྱལ་སྲས་ཀྱིས་མཛད་པའི་ཆུ་གཤེགས་ཀྱི་ཆོ་ག་ཡོད་དོ། །

དེ་ལས་གཞན་གནས་ཀྱི་ཁྱད་པར་ནི། སཙྪའི་ཆོ་ག་བསོད་ནམས་རི་བོ་ལས། གཤིན་པོའི་རུས་ཆོག་གསོན་པོའི་སྐྲ་ཚ་ནི། །བསྐོར་བ་མི་ཁྱག་བསོད་ནམས་ཉམས་འགྱུར་ཕྱིར། །གནས་བདག་གདུག་པ་ཅན་ནི་མི་གནས་ཤིང་། །ས་དཔལ་བཟང་ཞིང་ས་དགྲ་མེད་པའི་ས། །འོག་ཏུ་བརླན་མེད་ཆར་བ་ཁེབས་པ་ཡི། །བྲག་ཕུག་ས་ཕུག་སོགས་སུ་སྦས་བྱས་ཏེ། །གནས་བདག་དེ་ལ་དཀར་གཏོར་ཕུལ་བར་བྱ། །དགོན་པ་གྲོང་བ་རི་ཁྲོད་གང་རུང་གི ། ཤར་དུ་ཚ་ཁང་བྱས་ན་བཀྲ་མི་ཤིས། །ཤར་ལྷོ་མཚམས་སུ་བྱས་ན་ཟ་ཁ་འགགས། །ལྷོ་རུ་བྱས་ན་ནོར་དང་ལོངས་སྤྱོད་ཉམས། །ལྷོ་ནུབ་མཚམས་བྱས་བྱི་ཕག་ལོ་ལ་ངན། །ནུབ་ཏུ་བྱས་ན་ནད་ཉུང་རིམ་གྲོ་མཆོག །ནུབ་བྱང་མཚམས་སུ་བྱས་ན་སད་སེར་ཉུང་། །བྱང་དུ་བྱས་ན་དགྲ་དང་ཁ་མཆུ་ཉུང་། །བྱང་ཤར་མཚམས་བྱས་ཆུ་ཁམས་པ་ལ་ངན། །ལྟག་ཏུ་བྱས་ན་གཉའ་གནོན་མར་འགྲོ་ཆེ། །འོག་ཏུ་བྱས་ན་མལ་ས་ནོན་པ་ཡིན། །ཁྱིམ་གྱི་ནང་དུ་བླུགས་ཀྱང་ཕྱོགས་དེར་བརྩི། །ཁྱིམ་ནང་གང་དུ་ཚ་ཁང་བྱས་པ་ཡིས། །ས་རྒོད་གཉན་པོ་ཡིན་ཀྱང་ངེས་པར་ནོན། །སྐྲ་རྒན་གཡང་ཅན་རུས་ཚ་ཁྱིམ་བཞག་ན། །མི་གཡང་མི་ཉམས་བཀྲ་ཤིས་དགེ་བ་ཡིན། །འཆི་ལུགས་ངན་དང་གཞོན་ཤི་རུས་ཚ་ནི། །ཁྱིམ་དུ་མི་ཉལ་རི་ལ་བསྐྱལ་བ་ལེགས། །གསོན་པོའི་སྐྲ་སོའི་སཙྪ་ཁྱིམ་དུ་རུང་། །དེ་མིན་སཙྪ་གཙང་མ་ཚ་ཁང་གི། །གང་དུ་བྱ་སར་ས་འདེབས་རྒྱས་པར་བྱ། །དེ་མ་བྱས་ན་ལྷ་འདྲེའི་ཕོག་ཐུག་འོང་། །ཞེས་སོ། །

༥ སཙྪའི་དབྱེ་བ། ཐུགས་རྗེ་ཆེན་པོ་ཡང་སྙིང་འདུས་པའི་རྒྱུད་ལས། དེ་ནས་སཙྪ་རྣལ་འབྱོར་བཤད། །ས་ཆུ་མེ་རླུང་འབྱུང་བཞི་ལ། །ཡང་སྙིང་བཟླ་ཞིང་བརྐོས་ཕོར་གདབ། །ཅེས་དང་། དེའི་འགྲེལ་བ་སློབ་དཔོན་པདྨས་མཛད་པ་ལས། འབྱུང་བ་མེ་ཆུ་རླུང་གསུམ་ལ་བརྐོས་ཕོར་བསྟན་ཞིང་ཡང་སྙིང་བརྗོད་ཅིང་བཏབ་པས་འཕགས་པའི་སྐུ་ཝལ་ཝལ་བསམ་སྟེ། འཇིག་རྟེན་སྐྱོང་ཞིང་འགྲོ་དོན་མཛད་པར་བསམ་མོ། །ཞེས་དང་། ཤེས་པ་ཐམས་ཅད་མཐར་ཕྱིན་པར་གྲུབ་པའི་མཆོད་རྟེན་གྱི་གཟུངས་ལས་འབྱུང་བ་ཆེན་པོ་བཞི་ལ་མཆོད་རྟེན་གདབ་པར་གསུངས་པ་བཞིན། སར་གདབ་ཚུལ་ནི་སྔར་བཤད་ཟིན་པ་དང་། ཆུར་གདབ་སྐབས་ཆུ་རྒྱུན་དྭངས་གཙང་ལ་བརྐོས་ཕོར་ཡང་དང་ཡང་དུ་ཆུར་གདབ་པ་དང་། མེར་གདབ་ལ་དྲི་བཟང་གི་ཤིང་གི་མེ་ལྕེའི་སྟེང་དུ་གདབ་དགོས་པ་དང་། རླུང་ལ་ཡང་ཤར་ནས་ནུབ་ཏུ་རྒྱུ་བའི་རྫི་ཕྱོགས་སུ་གདབ་དགོས་པ་ཡིན། གཞན་ཡང་འབྱོར་ན་གསེར་དངུལ་དུ་གདབ་པའང་མཐོང་རྒྱུ་ཡོད།

ཡང་འཇུ་མི་ཕམ་གྱི་འཇམ་དཔལ་གྱི་སཙྪའི་ལས་ཚོགས་ལས་ས་ཆུ་མེ་རླུང་ནམ་མཁའ་ཆོས་ཉིད་ལ་གདབ་པ་དྲུག་གི་སྒོ་ནས་གདབ་པར་གསུངས་ཏེ། དེ་ཡང་། ཆོས་ཉིད་ལ་གདབ་པ་ནི། ཆོས་ཐམས་ཅད་སེམས་ཀྱི་སྣང་བ་ཙམ་ཡིན་ལ། སེམས་ནི་ངོ་བོ་ཉིད་ཀྱིས་སྟོང་བས་ཆོས་ཀྱི་དབྱིངས་ཡིན་ནོ། །ཆོས་དབྱིངས་དེའི་ངང་ལས་སྣང་བའི་ཆོས་ཐམས་ཅད་ཡེ་ཤེས་ཀྱི་རྣམ་པར་འཕྲུལ་བའི་ཆོས་ཀྱི་སྐུའི་མཆོད་རྟེན་དུ་མ་གྱུར་བ་གཅིག་ཀྱང་མེད་པར་བསམ་པས་གདབ་བོ། །ནམ་མཁའ་ལ་གདབ་པ་ནི། ནམ་མཁའ་ཐམས་ཅད་དུ་མཆོད་རྟེན་བཏབ་པར་བསྒོམས་ནས་རྐོས་ཕོར་ལག་ཏུ་ཐོགས་ཏེ། ལག་པའི་འདུ་བྱེད་ཀྱིས་བཏབ་པའི་ཚུལ་བྱའོ། །རླུང་འབྱུང་བ་ན་དེ་ལ་བཏབ་སྟེ་དེ་བཞིན་བསྒོམ། མེ་འབར་བ་ལ་བཏབ་པ་དང་། ཆུ་འགྲམ་དུ་ཆུ་ལ་བཏབ་སྟེ་ཆུ་ཡི་རྒྱུན་ཐམས་ཅད་མཆོད་རྟེན་ནམ་ཆུའི་རྡུལ་ཕྲན་རེ་རེ་མཆོད་རྟེན་དུ་གྱུར་བར་བསམ་པ་ནི་ཀུན་དང་འདྲའོ། །ཚུལ་འདི་ལ་དགོངས་ནས། ར་ག་ཨ་སེའི་སཙྪ་སྤྱི་འགྲོས་ཕྱག་ལེན་ལས། དེ་བཞིན་མེ་ཆུ་རླུང་ལ་ཡང་། །སྔགས་བཟླས་བརྐོས་ཕོར་གཡུག་པ་དང་། །དམིགས་པ་བསྒོམ་ན་ས་དང་འདྲ། །གསུངས་སོ། །

ས་ལ་ནི་རིན་པོ་ཆེའམ་གཞན་དངོས་བོ་གང་རུང་ལས་སྐུ་འམ་མཆོད་རྟེན་བྱ་བའམ། ཡང་ན་འཇིམ་པ་བཟང་བོ་ལ་བཏབ་པར་བྱ་སྟེ། དངོས་བོ་གང་ལའང་བཏབ་པས་ཆོག་གོ ། ཞེས་དང་། སྤྲོས་མེད་སྙིང་བོའི་ཚུལ་དུ་འདེབས་ན་ནམ་མཁའ་སོགས་ལ་བརྐོས་ཕོར་བཏབ་སྟེ་ཨོ་ཨཱ་ཿཧཱུཾ་འབའ་ཞིག་བརྗོད་པས་སངས་རྒྱས་ཐམས་ཅད་ཀྱི་ཡེ་ཤེས་ཆོས་སྐུའི་གཟུགས་བརྙན་གསང་གསུམ་མི་ཟད་པའི་བྱིན་རླབས་དང་ལྡན་པ་རེ་རེ་ལམ་ལམ་བྱུང་སྟེ། འཁོར་བ་སྲིད་དུ་གནས་པ་དང་། དེའི་ཚུལ་ནམ་མཁའ་སོགས་འབྱུང་བ་དེས་གར་ཁྱབ་དེ་ལྟར་གྱུར་བར་བསམས་པར་གསུངས་སོ། །སཙྪ་གདབ་པའི་དམིགས་ཡུལ་གྱི་དབང་དུ་བཏང་ན་ཇོ་བོ་རྗེས་རྣམ་པ་དགུ་གསུངས་ཏེ། དགེ་བའི་བཤེས་གཉེན་གྱི་ཐུགས་དགོངས་རྫོགས་པའི་དོན་དུ་གདབ་པ། ཕ་མའི་དོན་དུ་གདབ་པ། བསླབ་བྱ་དང་འགལ་བ་བཤགས་པའི་དོན་དུ་གདབ་པ། སྡིག་པ་ལྕི་བ་བྱང་བའི་དོན་དུ་གདབ་པ། ལོག་པའི་བཤེས་གཉེན་དང་སྡིག་གྲོགས་ཀྱི་དབང་དུ་མི་འགྲོ་བའི་དོན་དུ་གདབ་པ། འགྲོ་བ་མཐའ་དག་གི་དོན་དུ་གདབ་པ། འཆི་ཁ་མའི་སེམས་ཅན་ཐམས་ཅད་ཀྱི་དོན་དུ་གདབ་པ། བར་དོའི་སེམས་ཅན་ཐམས་ཅད་ཀྱི་དོན་དུ་གདབ་པ། སེམས་ཅན་ཐམས་ཅད་ཀྱི་དོན་དུ་གདབ་པ་བཅས་སོ། །

ཡང་། དོན་དམ་ནང་དང་གསང་བའི་སཙྪ་ནི། སཙྪའི་ཕན་ཡོན་རིན་ཆེན་ཕུང་བོ་ལས། དོན་དམ་ནང་དང་གསང་བའི་སཙྪ་ནི། །ཡང་སྙིང་འདུས་པའི་རྒྱུད་ལས་འདི་སྐད་གསུངས། །རང་ལུས་གཞལ་ཡས་མཆོད་རྟེན་ཁང་། །རྟོག་ཚོགས་ལྷར་གསལ་སཙྪ་དེ། །ཆོས་དབྱིངས་སྟོང་བའི་བརྐོས་ཕོར་དུ། །རིག་པ་ཡེ་ཤེས་མཆོད་རྟེན་གཞུག། མཆོད་རྟེན་མཆོག་ཏུ་བདག་འགྱུར་ངེས། །ཐབས་ཤེས་རྒྱུ་རྐྱེན་བརྐོས་ཕོར་དུ། །རང་ལུས་མཆོད་རྟེན་རང་སེམས་ནི། །ཐུགས་རྗེ་ཆེན་པོའི་ལྷ་ཚོགས་ཡིན། །ཆོས་དབྱིངས་སྟོང་བའི་བརྐོས་ཕོར་དུ། །སྣང་སྟོང་དབྱེར་མེད་མཆོད་རྟེན་ཏེ། །དེ་ལྟར་རྟོགས་པ་མཐར་ཕྱིན་ན། །རང་ཉིད་མཆོད་རྟེན་མཆོག་ཏུ་འགྱུར། །ནང་དང་གསང་བའི་སཙྪ་ཡིན། །ཞེས་གསུངས་སོ། །

༦ སཙྪ་བཏབ་པའི་ཕན་ཡོན། ཐུགས་རྗེ་ཆེན་པོ་གསང་འདུས་རྒྱུད་ལས། དེ་ནས་ཚོགས་ཆེན་གསག་པའི་ཕྱིར། །སཙྪའི་རིམ་པ་བཤད་པར་བྱ། །ས་བཟང་རིན་ཆེན་བརྡར་བ་ལ། །ཞེས་པ་ནས། ཡོན་ཏན་མཐའ་ཡས་བསམ་པ་འགྲུབ། །ཅེས་དང་། ཁྱད་པར་ཚེ་འདས་ཀྱི་ཆེད་དུ་སཙྪ་བཏབ་ན་ངན་སོང་ལས་སྦྱོང་བའི་གདམས་པ་ཟབ་མོ་སྟེ། འཇམ་དཔལ་ཆོ་ག་འདུས་པའི་རྒྱུད་ལས། གང་ཟག་ཚེ་ཡི་དུས་བྱས་པའི། །ངན་སོང་སྦྱོང་བའི་ཐབས་ཆེན་པོ། །རུས་པ་གོས་སམ་མིང་ལ་ནི། །ཡེ་ཤེས་སྐུ་ཡི་སྔགས་ཀྱིས་གདབ། །རྫས་རྣམས་ཀུན་དང་བསྲེས་ཏེ་འབྱུང་། །འཇིམ་པའི་ཕུང་བོ་རིན་ཆེན་ལྔ། །སྔགས་པ་རྣལ་འབྱོར་ལྡན་པ་ཡིས། །སཙྪ་ཕུང་བོ་དཔག་མེད་བྱ། །ནམ་མཁའི་ལྷ་རྣམས་སྤྱན་དྲངས་ལ། །གཉིས་སུ་མེད་པར་མཆོད་པས་མཆོད། །རབ་ཏུ་གནས་པ་ཚུལ་བཞིན་བྱ། །ཞེས་དང་། ངན་སོང་སྦྱོང་རྒྱུད་ལས། ཡང་ན་མེད་པར་གྱུར་ནའང་། །བཟླ་ཞིང་སྒོམ་པའི་ཚུལ་གྱིས་ནི། །མིང་ཙམ་ལེགས་པར་བྲིས་ནས་ཀྱང་། །མཆོད་རྟེན་ཕྲེང་བ་བྱ་བ་དང་། །ཡང་ན་གཟུགས་སུ་བྱས་ཀྱང་རུང་། །སྦྱིན་སྲེག་མངོན་པར་དབང་བསྐུར་ན། །གདོན་མི་ཟ་བར་བདེ་འགྲོར་སྐྱེ། །ཞེས་དང་། དེ་ཡི་མིང་གི་སྨོས་ནས་ནི། །གུར་གུམ་བཟང་བོས་སྔགས་བྲིས་ལ། །རིམ་གྱིས་འབུམ་གྱི་ཚད་ཙམ་དུ། །མཆོད་རྟེན་ལས་ནི་རབ་ཏུ་བྱ། །སྡིག་ཅན་སྡིག་ནི་ཟད་བྱའི་ཕྱིར། །བྱེ་བ་སྙེད་ནི་ཚང་བར་བྱ། །དེས་ནི་ངེས་པར་དམྱལ་གནས་ལ། །འདི་བྱས་པས་ནི་གྲོལ་བར་འགྱུར། །ཡི་དྭགས་བྱོལ་སོང་སྡུག་བསྔལ་ལས། །གྲོལ་ཏེ་ལྷ་ཡི་གནས་སུ་སྐྱེ། །ཞེས་དང་། འཆི་བླུའི་མན་ངག་ལས། བྱེ་མའི་མཆོད་རྟེན་བྱེད་པ་དང་། །དེ་བཞིན་སཙྪ་འདེབས་པ་དང་། །མཆོད་རྟེན་ལ་སོགས་ཕྱག་བྱས་པས། །ཚེ་ནི་ངེས་པར་འཕེལ་བར་འགྱུར། །ཞེས་དང་། སཙྪ་གདབ་པའི་ཆོ་ག་ལས། མཆོད་རྟེན་ལ་རྡུལ་ཕྲ་རབ་ཇི་སྙེད་ཅིག་ཡོད་པ་དེ་སྙེད་ཀྱིས་བྱེ་བ་བྱས་པར་འགྱུར་རོ། །རྡུལ་ཕྲ་རབ་ཀྱི་གྲངས་ཇི་སྙེད་ཀྱི་ལྷ་དང་མི་རྣམས་ཀྱི་སྐྱེ་བ་ཕུན་སུམ་ཚོགས་པ་ཐོབ་པར་འགྱུར་རོ། །གང་དང་གང་དུ་སྐྱེས་པ་ན་སྐྱེ་བ་དྲན་པར་འགྱུར་རོ། །མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བ་ཡིན་ནོ། །ཞེས་གསུངས་སོ། །

ཡང་། སྒྲིབ་པ་སྦྱངས་པ་ལའང་སཙྪ་འདེབས་པ་ཕན་ཡོན་ཆེ་སྟེ། སྔོན་ཇོ་བོ་རྗེས་མངའ་བདག་མེ་ཏྲི་བ་གནས་དབྱུང་བཏང་བའི་རྣམ་སྨིན་གྱིས། རི་རབ་ལ་བསྐོར་བ་གསུམ་ཕོག་པའི་སེམས་ཅན་ཆེན་པོ་ཞིག་གི་སྐྱེ་བ་བླངས་ཏེ། བྱ་སྣ་ཚོགས་ཀྱིས་ཟ་བའི་སྡུག་བསྔལ་མྱོང་བར་འགྱུར་རོ་ཞེས། རྗེ་བཙུན་སྒྲོལ་མས་ལུང་དུ་བསྟན་པས། ཇོ་བོས་དེའི་སྒྲིབ་པ་སྦྱོང་བར་ཞུས་པས། ཁ་བ་ཅན་དུ་སོང་ལ་སངས་རྒྱས་ཀྱི་བསྟན་པ་དར་བར་གྱིས། ཉིན་རེ་བཞིན་སཙྪ་བདུན་བདུན་ཕྱག་བཏབ་ཚུལ་བཀའ་གདམས་པའི་གཞུང་ལས་གསུངས་པ་དང་། དེ་དང་མཐུན་པར་ར་ག་ཨ་སེའི་སཙྪ་སྤྱི་འགྲོས་ཕྱག་ལེན་ལས། པད་ཉི་ཟླ་སྟེང་སཙྪ་རྣམས། །རིན་ཆེན་མཆོད་རྟེན་དཔག་མེད་ནང་། །རྩ་གསུམ་རྒྱལ་བ་སྲས་བཅས་བཞུགས། །འོད་འཕྲོས་བདག་གཞན་སྒྲིབ་པ་སྦྱངས། །འགྲོ་དོན་དཔག་མེད་མཛད་པར་གྱུར། །ཞེས་པ་དང་མཐུན་ལ། ཡང་མི་ལས་མ་ཡུམ་གྱི་རུས་པས་སཙྪ་བཏབ་པ་དང་། དེ་བཞིན་རྗེ་བདག་ཉིད་ཆེན་པོ་སོགས་ཀྱིས་སཙྪ་འདེབས་པ་འདི་ཐུགས་དམ་ཀྱི་དཀྱིལ་དུ་བཟུང་ཚུལ་གུང་ཐང་བསྟན་སྒྲོན་གྱིས་གསུངས་པ་དང་། མདོར་ན། བདེ་བར་གཤེགས་པའི་རྟེན་གསུམ་གང་བཞེངས་ཀྱི་ཕན་ཡོན་ཅི་ཡོད། སཙྪ་ཆུང་ངུ་ཞིག་ལ་འང་ཡོད་པས་ཚེགས་ཆུང་ལ་དོན་ཆེ་བའི་ཕན་ཡོན་བསམ་གྱིས་མི་ཁྱབ་པ་ཡོད་དོ། །

ཡང་། སྐྱེས་ཆེན་ཁག་གིས་དད་ལྡན་ཀྱི་རེ་བ་སྐོང་སླད་སཙྪའི་ངོས་ཕྱག་ཐེལ་བཏབ་པའི་ཕྱག་ཚ་ནི་མཚོན་སྲུང་གདོན་ལ་སོགས་སྲུང་བའི་བྱེད་ནུས་ཡོད་པར་བཤད་དོ། །

གཞན་ཡང་། ར་ག་ཨ་སེའི་སཙྪའི་ཕན་ཡོན་རིན་པོ་ཆེའི་ཕུང་བོ་ལས་མང་དུ་གསུངས་ལ། དེ་ལས་མདོར་དྲིལ་ཏེ་བཤད་ན། ཚེ་འདིར་མངོན་ཤེས་ལྔ་འཐོབ་ཅིང་སྐྱེ་བ་ཀུན་ཏུ་རྒྱལ་བོར་སྐྱེས་པ། སྐྱེ་བ་དྲན་ཞིང་ཐོས་པ་མང་བ། རིམ་གྲོའི་རྒྱབ་རྟེན་དུ་འགྱུར་ཞིང་དངོས་གྲུབ་འཐོབ་པ་མྱུར་བ། འཕྲིན་ལས་འགྲུབ་ཅིང་སྡིག་ལྟུང་སྦྱང་བ། བར་ཆད་ཞི་ཞིང་སེམས་ཆོས་ལ་འཁོར་བ། བར་དོའི་འཇིགས་སྐྲག་ཞི་ཞིང་ངན་སོང་གི་སྐྱེ་སྒོ་འགོག་པ་སོགས་མང་དུ་གསུངས་སོ། །

སཙྪའི་རིག་གནས་ཀྱི་སྐོར་རྒྱས་པར་ཤེས་འདོད་པ་དག་གིས། དགེ་ལུགས་པའི་ཆོ་གར་མཚོན་ནའང་། རྒྱལ་དབང་ལྔ་བའི་སཙྪ་འདེབས་པའི་གསལ་བྱེད་ལེགས་ཚོགས་ལྷུན་གྲུབ། ཐུའུ་བཀྭན་ཆོས་ཀྱི་ཉི་མའི་འབྱུང་བ་ཆུ་ལ་སཙྪ་གདབ་པའི་ཚུལ། འཇོག་རི་ངག་དབང་བསྟན་འཛིན་འཕྲིན་ལས་ཀྱི་ཚེ་འདིར་སཙྪ་སོགས་ཆབ་འདྲེན་གྱི་ཆོ་ག ཁྲི་རྒན་འཇམ་དབྱངས་ཐུབ་བསྟན་རྒྱ་མཚོའི་གྲུབ་དབང་གཉན་ཚེམ་བུ་བའི་ལུགས་ཀྱི་ཐུགས་རྗེ་ཆེན་པོའི་རྣལ་འབྱོར་དང་འབྲེལ་བར་སཙྪ་འདེབས་ཚུལ་ལེགས་ཚོགས་ལྷུན་གྲུབ་སོགས་ལ་གཟིགས་པར་ཞུ།

དེ་ལྟར་རྣམ་གྲོལ་རྒྱལ་བའི་ཁྲི་འཕང་དུ་བགྲོད་པའི་ཐེས་སྐས་དུ་གྱུར་བ་ནི། སྔོན་འགྲོ་ཁྲིད་ཆེན་བཅུ་སྟེ། རང་ལེགས་སུ་རེ་བ་དག་གིས་ཐེག་པ་ལ་མཐོ་བསྙེགས་མི་བྱེད་པར། གདམས་པའི་སྙིང་ནོར་དུ་གྱུར་བའི་སྔོན་འགྲོ་ཁྲིད་ཆེན་བཅུ་ཉམས་སུ་བསྟར་ན། སངས་རྒྱས་ཀྱི་གོ་འཕང་ཟན་དྲོན་མོ་ལག་པས་བཟོས་པ་ལྟ་བུ་ཡོང་ལ། དེ་མིན། མི་ཚེ་ཐོས་བསམ་ལ་གཞོལ་བའི་རྟོག་གེ་མགོ་མཁྲེགས་ལ་སྐྱབས་སུ་རེ་ནས། སྔོན་འགྲོའི་བསགས་རྒྱབ་ཀྱི་གདམས་པ་མ་བསྟེན་ན། དཔེར་ན། སྐོམ་གྱིས་གདུང་བ་ཆོས་ཀྱི་ཆུ་ཀླུང་དུ་འཁྱེར་ཏེ་སྐོམ་པ་སེལ་མི་ནུས་པ་ལྟར། འཁོར་བ་ལས་སོར་གང་འཕགས་མི་ཐུབ་པར་མ་ཟད། ད་དུང་ལམ་དམན་ནས་དམན་པར་འགྲོ་བ་མང་བས། གདམས་པའི་མཆོག་གྱུར་སྔོན་འགྲོ་ཁྲིད་ཆེན་བཅུ། རང་གཞན་ཀུན་གྱིས་ཉམས་སུ་ལེགས་པར་བསྟར་ན། ཀུན་མཁྱེན་རྒྱལ་བ་དགྱེས་པའི་ལམ་པོ་ཆེར་བགྲོད་པའི་རྐང་སྟེགས་ཉིད་དུ་འགྱུར་བ་ནི་གདོན་མི་ཟའོ། །