ཞལ་ཟས་རྒྱ་མཚོ།
ཞལ་ཟས་ཀྱི་གཏོར་མ་ཇི་ལྟར་བྱུང་བ་དང་། དར་ཚུལ་གྱི་བརྒྱུད་རིམ་སོགས། གཏོར་མའི་རྣམ་བཤད་སྐབས་སུ་བཤད་ཟིན་ལ། འདིར་སྐབས་སུ་བབ་པ་མཆོད་པའི་བྱེ་བྲག་ཞལ་ཟས་རྒྱ་མཚོ་བཟོ་སྲོལ་ཇི་ལྟར་བྱུང་ཚུལ་བརྗོད་ན། རྗེ་བདག་ཉིད་ཆེན་པོ་དགུང་ལོ་ང་གསུམ་གྱི་ཚེ། ཆོ་འཕྲུལ་སྨོན་ལམ་ཆེན་མོའི་དུས་མཆོད་བཙུགས་སྐབས། ཇོ་བོ་རྣམ་གཉིས་གཙོས་སངས་རྒྱས་བྱང་སེམས་རྣམས་ལ་རྒྱན་དང་ན་བཟའ་ཕུལ། མཆོད་ཚོགས་རྒྱ་མཚོའི་སྤྲིན་ལྟར་ཕུལ་དུས། ཞལ་ཟས་རྒྱ་མཚོ་འདི་གསར་དུ་བཞེངས་པ་སྟེ། རྗེའི་རྣམ་ཐར་དད་པའི་འཇུག་ངོགས་ལས། ཞལ་ཟས་མདའ་ཚད་ཙམ་ལྷག་ཙམ་ལ་མར་གྱི་རྒྱལ་སྲིད་རིན་པོ་ཆེ་སྣ་བདུན་ལ་སོགས་པའི་རྒྱན་ཡིད་འཕྲོག་པས་བརྒྱན་པ་བརྒྱ་རྩ་བརྒྱད་རེ་ཉིན་རེར་ཞིང་གསར་བ་ཕུལ་ཞིང་། ཀོང་བུ་ཆེན་པོའི་གཡས་གཡོན་དུ་ས་སྟེགས་ལ། རྩམ་པ་ཁལ་བཞི་བརྒྱ་རེ་ལས་བྱས་པའི་ལྷ་བཤོས་རྒྱན་བཟང་བོ་དཔག་ཏུ་མེད་པས་སྤྲས་པ། འཕྱར་དར་བཙུགས་པ་དང་། བཅས་པ་མངོན་པར་བཤམས་པའི་ཞལ་ཟས་རྙིང་བ་རྣམས་ནི་བདག་གིར་བྱེད་པ་མེད་པར་སྐྱེ་བོ་ཕོངས་པ་སྤྲང་བོའི་ཚོགས་ལ་ལྟོས་པ་མེད་པར་བྱིན་པས། ཕོངས་པ་དག་ཀྱང་བཀྲེན་པའི་འདུ་ཤེས་ཀྱི་འཆང་བ་ལས་གྲོལ་ནས་བཟའ་བཏུང་གིས་ཚིམ་པ་ལྷག་པར་འཐོབ་པས། སླར་བཟའ་བ་ཡིད་ལ་མི་བྱེད་པ་ལྟ་བུར་གྱུར་ཏོ། །ཞེས་པ་ལྟར། སྐབས་དེར་རྨང་གཞི་རྩམ་གཏོར་ཆེན་པོའི་སྟེང་དུ། མར་ཚོན་ལས་བཞེངས་པའི་རྒྱལ་སྲིད་སྣ་བདུན། བཀྲ་ཤིས་རྟགས་བརྒྱད། རྫས་བརྒྱད་སོགས་བཟོ་བཀོད་ཕུན་སུམ་ཚོགས་པ་བཤམས་པ་ལས། ཕྱིས་སུ་སྤྱི་ལོ ༡༥༨༣ ལོར་རྒྱལ་དབང་སྐུ་ཕྲེང་གསུམ་པ་སྐུ་འབུམ་དུ་གདན་དྲངས་སྐབས། སྐུ་འབུམ་དགོན་པའི་མཁན་པོ་བརྩོན་འགྲུས་བཟང་བོས་ལྷ་ལྡན་སྨོན་ལམ་ཆེན་མོ་ཇི་བཞིན་སྨོན་ལམ་སྐབས་སུ་མར་རྒྱན་གྱི་མེ་ཏོག་མཆོད་པ་སྣ་ཚོགས་བཤམས་པ། ད་ལྟའི་མིང་དུ་གྲགས་པའི་སྐུ་འབུམ་དགོན་པའི་མེ་ཏོག་མཆོད་པ་འདི་དར་བས། སྔོན་ཆད་ཀྱི་བཟོ་ཚུལ་ལ་འགྱུར་བ་ཆེན་པོ་ཐེབས་ཡོད། དེ་ནི་རྨང་གཞི་རྩམ་གཏོར་བཏང་སྟེ། མར་ཚོན་གྱི་ཕྱག་རྩལ་འབུར་དུ་ཐོན་པར་བྱས་ནས། མར་བཟོས་རྒྱན་མཆོད་དང་འབྲེལ། ལོ་རེ་བཞིན་རྒྱལ་ལོ་ཚེས་བཅོ་ལྔ་ཉིན་མཆོད་ཚོགས་དང་བཅས་པའི་དུས་མཆོད་ཅིག་ཡིན། དེ་ལ་རྟེན་གཙོ་འཇམ་དབྱངས་ཀུན་གཟིགས། སྟོན་པ་ཤཱཀྱ་ཐུབ་པའི་འཁྲུངས་རབས་ཁག་གཅིག ཆོས་རྒྱལ་སྲོང་བཙན་གྱིས་རྒྱ་བཟའ་ཀོང་ཇོ་བོད་དུ་གདན་དྲངས་ཚུལ་གྱི་བརྒྱུད་རིམ་མདོར་བསྡུས། དེ་མིན་མེ་ཏོག་དང་ཁང་བཟང་། སྲོག་ཆགས་མང་བོའི་མར་བཟོས་སྣང་བརྙན་སོགས་བཞེངས་ཏེ། སྐུ་འབུམ་མར་བཟོས་རྒྱན་མཆོད་ཅེས་ཡོངས་སུ་གྲགས་པ་དང་།
གཞན་ཡང་། མདོ་དབུས་ཁམས་གསུམ་གྱི་དགོན་སྡེ་མང་བོས་ལོ་རེར་བཞིན། ཞལ་ཟས་རྒྱ་མཚོའི་མཆོད་གཏོར་ལ་སྲོག་ཆགས་དང་། མེ་ཏོག་སྣ་ཚོགས་ཀྱི་མར་རྒྱན་སྣ་མང་བཟོས་ཏེ། གཙུག་ལག་ཁང་དུ་འབུལ་སྲོལ་དར་བ་ལས་གཞན། སེམས་བསྐྱེད་མཆོད་པ་སོགས་ཀྱི་མཆོད་སྤྲིན་རྒྱ་མཚོ་སྤྲོ་སྐབས། ཞལ་ཟས་རྒྱ་མཚོ་ཇི་སྙེད་ཅིག་བཞེངས་པའི་སྲོལ་རྒྱ་ཆེར་དར་ཡོད་དོ། །