སྲོག་བླུ་ཚེ་ཐར།
༡ སྲོག་བླུ་བྱ་དགོས་པའི་རྒྱུ་མཚན། འཛམ་བུ་གླིང་གི་སྒང་འདིར་ཆོས་ལུགས་འདྲ་མིན་ཡོད་པ་ལས། ལ་ལས་ཤ་ཁྲག་གིས་དམར་མཆོད་བྱེད་པ་ཆོས་ལུགས་སུ་བརྩི། འགའ་ཞིག་གིས་ལས་འབྲས་ཁས་མི་ལེན་པའམ། ཡང་ན་སྣང་ཆུང་དུ་བཞག་སྟེ། དུད་འགྲོ་རྣམས་མཐོང་ཆུང་བྱས་ཏེ་དམར་གསོད་བྱེད་པ་ནི། ཤིན་ཏུ་ནས་ཀྱང་མི་རིགས་ཏེ། ཕར་ཕྱིན་ཐེག་པའི་མདོ་ལས། སྲོག་ཅེས་བྱ་བ་ནི། ཐ་ན་གྲོག་སྦུར་ཚུན་ཆད་ལའང་སྡུག་ཅིང་ཕངས་ལ་ཡིད་དུ་འོང་བ་ཡིན་ཏེ། བདག་ལའང་སྲོག་འདི་སྡུག་ཅིང་ཕངས་ལ་དགའ་ཞིང་ཡིད་དུ་འོང་བ་ཡིན་གྱི། སུ་ཡང་བདག་གསོད་པའམ། གསོད་དུ་འཇུག་པའམ། བསད་པ་ལ་རྗེས་སུ་ཡི་རང་བར་མ་གྱུར་ཅིག བདག་གིས་ཀྱང་སུ་ལའང་གསད་པར་མི་བྱ། གསོད་དུ་ཞུགས་པར་མི་བྱ། གསོད་པ་ལ་རྗེས་སུ་ཡི་རང་བར་མི་བྱའོ། །ཞེས་དང་། བཤེས་སྤྲིངས་ལས། རྒྱལ་བོ་ཁྱོད་ནི་སྲོག་གཅོད་མ་མཛད་ཅིག །སྐྱེ་བོ་ཀུན་ལ་སྲོག་ནི་རབ་ཏུ་ཕངས། །དེ་བས་ཡུན་རིང་ཚེ་བསྲིངས་སུ་འདོད་པས། །ཡིད་ཀྱི་དགུ་ལ་འང་སྲོག་གཅོད་མི་བྱའོ། །ཞེས་དང་། ཚོམས་ལས། ཐམས་ཅད་ལའང་སྲོག་ནི་སྡུག །ཐམས་ཅད་ཆད་པས་འཇིགས་པས་ན། །རང་གི་ཉམས་ལ་དཔག་གྱིས་ཏེ། །བརྡེག་པར་མི་བྱ་བསད་མི་བྱ། །ཞེས་པ་ལྟར། སྲོག་ཆགས་ཡོད་དོ་ཅོག་ལ་སྲོག་ལས་གཅེས་ཤིང་ཕངས་པ་མེད་པས། འཚེ་བ་མེད་པ་དང་སྲོག་གཅོད་སྤང་བ་ནི། ནང་བསྟན་གྱི་སྲོག་ཤིང་ལྟ་བུར་གསུངས་ཡོད། འོན་ཀྱང་། རང་ཅག་དེ་ལས་ལྡོག་ཏེ། གནམ་ལ་འཕུར་བ་དང་། ས་ལ་རྒྱུ་བ། ཆུ་ལ་གནས་པའི་སྲོག་ཆགས་ཇི་སྙེད་ཅིག་ལ། ཤ་ཟིང་སྤུ་ཟིང་གི་འཚེར་སྣང་བསྐྱེད་པ་དང་། སྲོག་གཅོད་པ་ནི་ཐབས་རྡུགས་ཀྱི་གནས་སུ་ཆེ་སྟེ། ཁ་དཔེར། ལུས་ལ་ཆེ་ཆུང་ཡོད་ཀྱང་། །སྲོག་ལ་སྦོམ་ཕྲ་མེད། །ཟེར་ལ། ཉམ་ཐག་དེ་དག་བྲོས་པས་ནི་མི་ཐར། འཛིང་བས་ནི་མི་ཐུབ། སྐྱབས་དང་དཔུང་གཉེན་བཅོལ་ས་མེད་པའི་ངང་ཚུལ་འདི་ལ་དགོངས་ནས། རང་གི་ལུས་ལ་དཔེར་ལོངས་ལ། །གཞན་ལ་གནོད་པ་མ་བྱེད་ཅིག། ཅེས་པ་ལྟར། རང་ཅག་བོད་འདིར་རྒྱལ་བློན་བྱང་ཆུབ་སེམས་དཔའ་རྣམས་དང་། སྐྱེས་ཆེན་དམ་པ་རྣམས་ཀྱིས་འདུས་བྱས་ཀྱི་དགེ་རྩ་ཐམས་ཅད་ལས། སེམས་ཅན་གྱི་སྲོག་སྐྱོབ་པ་ཕན་ཡོན་ཆེ་བར་དམིགས་ནས། ལྷག་པར་དུས་བཟང་དུ་ཚེ་ཐར་དང་སྲོག་བླུ་བྱས་ན། དགེ་རྩ་བརྒྱ་འགྱུར་སོགས་སུ་གསུངས་ནས། དུས་རྒྱུན་གྱི་འཚོ་བའི་ཁྲོད་སྲོག་ཆགས་གྲོག་སྦུར་ཚུན་ཆད་ལ་ཐུགས་བརྩེས་ཁྱབ་སྟེ། སྲོག་སྲུང་བ་དང་། སྐྱབས་འགྲོ་དང་མཚན་སྔགས་སོགས་རྣ་ལམ་དུ་བསྒྲགས་ནས། སྲོག་བླུ་ཚེ་ཐར་གྱི་སྲོལ་བཟང་དར་སྤེལ་བཏང་སྟེ། ཉམ་ཆུང་དུད་འགྲོ་རྣམས་བག་ཕེབས་སོས་དལ་དང་། འཚེ་མེད་བདེ་བ་ལ་འགོད་པའི་དགེ་སྲོལ་འདི་ཚུགས་པ་ཡིན་ནོ། །
༢ སྲོག་བླུའི་ཁུངས། སྔོན་རྒྱ་གར་དུ་མུ་སྟེགས་པའི་རྒྱལ་བོ་འཕྲི་ཅན་བྱ་བ་དེས། ཁ་ཟས་ཤ་ཁྲག་གི་ཆེད་དུ་སེམས་ཅན་ཁྲི་ཕྲག་བསད་པའི་རྣམ་སྨིན་གྱིས་རྡོ་རྗེ་དམྱལ་བར་སྐྱེས་ཏེ། སྡུག་བསྔལ་ཚད་མེད་མྱོང་བ་ཀུན་དགའ་བོས་སངས་རྒྱས་ལ་ཞུས་པས། བཅོམ་ལྡན་འདས་ཀྱིས་དེ་ཤ་ཁྲག་ལ་དགའ་ཞིང་སྲོག་བཅད་པའི་རྣམ་སྨིན་དུ་གསུངས་སོ། །དེ་ནས་ཀུན་དགའ་བོས་ཆོས་ཀྱི་རྒྱལ་བོ་གཤིན་རྗེ་ལ་དེ་ཐར་ཐབས་ཞུས་པས། ཆོས་རྒྱལ་གྱིས་འཇིག་རྟེན་གྱི་ཁམས་སུ་ཚེ་ཐར་བྱའོ་གསུངས་པ་ལྟར། ཀུན་དགའ་བོས་དེའི་དོན་དུ་ཚེ་ཐར་བྱས་པས། རྡོ་རྗེ་དམྱལ་བ་ལས་ཐར་བ་དེ་ཡིན་ནོ། །
༣ སྲོག་བླུ་ལག་ལེན་དུ་བསྟར་ཚུལ། སྲོག་བླུ་ནི། སེམས་ཅན་གང་ཞིག་ཤན་པ་སོགས་ཀྱིས་གསོད་དུ་ཉེ་བ་ན། རྒྱུ་ནོར་སྤྲད་ནས་སྲོག་ཉོ་བའམ། ཡང་ན། མི་འཇིགས་པའི་སྐྱབས་སྦྱིན་ཏེ་ཚེ་ཐར་དུ་བཅུག་པ་ལ་ཟེར། དེ་ཡང་། འབྲི་གཡག་ར་ལུག་དང་། ཉ་སྦྲུལ་སྦལ་ལྕོང་གི་ཚེ་སྲོག་བླུ་བ་སོགས་འདྲ་མིན་ཡོད། སྲོག་བླུ་བྱེད་པའི་དམིགས་ཡུལ་ཡང་། འགའ་ཞིག་བསྟན་འཛིན་གྱི་སྐྱེས་བུ་ཞབས་པད་བརྟན་ཆེད་དང་། ལ་ལས། བསད་པའི་ཚེ་ཐུང་། བརྡུང་བས་ནད་མང་། ཞེས་པར་དགོངས་ནས། ནད་མེད་ཚེ་རིང་ཡོང་ཆེད་དང། འགའ་ཞིག་བལ་རྩིད་བྲེག་པ་དང་འོ་ཞོ་འཐུང་བ། ཁལ་འགེལ་དང་ས་ཞིང་རྨོས་པ་སོགས་ཀྱི་དྲིན་བཟོའི་ཆེད་དང་། ཁ་ཅིག གཤིན་པོའི་དགེ་རྩར་དམིགས་ནས་བདེ་འགྲོ་འཐོབ་ཆེད་དང་། ཡང་། གསད་བྱ་དེ་མཐོང་པ་ན། སྙིང་བརྩེ་བས་སྲོག་བླུ་བྱེད་སྟངས་སོགས་ཡོད། གཞན་ཡང་། ཆོས་སྐྱོང་དང་གཞི་བདག་སོགས་ལ་མཆོད་པའི་ཚུལ་གྱིས་ཚེ་ཐར་གཏོང་བའང་ཡོད་དེ། དེ་ནི་ད་ལྟ་ལྷ་གཡག་དང་། ལྷ་རྟ། ལྷ་ལུག ལྷ་ར་ཞེས་པ་དེ་རྣམས་ཡིན། ཚེ་ཐར་གཏོང་ཚུལ་ཡང་། གཡག་ལུག་སོགས་ལ། རྣམ་འཇོམས་སོགས་ཀྱིས་བུམ་སྒྲུབ་བྱས་པའི་ཆུ་འམ། ཡང་ན། ཆུ་གཙང་ལ་གཟུངས་སྔགས་ཁྱད་པར་ཅན་གང་མང་བཟླས་ཏེ་ཁྲུས་ལེགས་པར་བྱས། རྣ་ཆ་དང་དཔུང་དར་སྣ་ཚོགས་བཏགས་ནས་རྭ་དང་རྨིག་པར་སྣུམ་བྱུགས། ཡང་། ཚེ་སྒྲུབ་འཆི་མེད་སྐུ་གསུམ་རིགས་འདུས་ལས། ཅི་འབྱོར་ཚེ་སྲོག་བླུས་པའི་དཔྲལ་བ་རུ། །ཉི་ཟླའི་རྟགས་གདབ་ཕྱིན་ཆད་སྲོག་མི་གཅོད། །སྲོག་མི་གཅོད་པའི་ཁས་བླངས་སྡོམ་པ་སྦྱིན། །ཞེས་ཚེ་ཉི་ཟླ་དང་མཉམ་པའི་རྟེན་འབྲེལ་དུ་དཔྲལ་བར་མར་གྱིས་ཉི་ཟླའི་གཟུགས་བྲི་བར་ཡང་བཤད་ལ། དེ་ནས་བསང་དུད་ཀྱིས་བདུག སྣ་ཐག་དཀར་བོ་བཏགས། ཀཾ་ཀ་ནི་དང་། དུ་རྒ་ཏེ། རྣམ་རྒྱལ་མ། སྤྱན་རས་གཟིགས་ཀྱི་གཟུངས་སོགས་བརྗོད་དེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་ཡང་དག་པར་རྫོགས་པའི་སངས་རྒྱས་ཚེ་དཔག་མེད་ལ་ཕྱག་འཚལ་ལོ། །སེམས་ཅན་འདིའི་དུས་མ་ཡིན་པའི་འཆི་བ་འཇོམས་པར་མཛད་དུ་གསོལ། ཚེ་རྣམ་པར་འཕེལ་བར་མཛད་དུ་གསོལ། ལས་ཀྱི་སྒྲིབ་པའི་རྒྱུན་རྣམ་པར་བཅད་དུ་གསོལ། ཐར་བའི་ལམ་ལ་ཡང་དག་པར་བཞག་ཏུ་གསོལ། གསུངས་པ་བཞིན། མེ་ཏོག་འཐོར་བཞིན་འདི་སྐད་དོ། རྟ་མཆོག་ལ། སྐྱེ་མཆེད་ཡུལ་དབང་རབ་ཚང་ཞིང་། །རྫུ་འཕྲུལ་ཤུགས་ལྡན་རྟ་མཆོག﹙རྭ་ལུག་གཡག་ཞོལ་ཡིན་ན་ཆོ་ག་ལྟར་ཁ་བསྒྱུར་དགོས﹚འདི། །བླ་མ་ཡི་དམ་ཚེ་ལྷ་དང་། །﹙དམིགས་ཀྱིས་ཆོས་སྐྱོང་ལ་སྤྱན་གཟིགས་འབུལ་ཚེ﹚ ཁྱད་པར་མྱུར་མཛད་མགོན་པོ﹙གང་དབུལ་རྒྱུའི་ཆོས་སྐྱོང་དང་གཞི་བདག་ལ་ཁ་བསྒྱུར་དགོས﹚དང་། །ཆོས་སྐྱོང་ནོར་ལྷ་ཡུལ་ལྷའི་ཚོགས། །སྐྱེས་ལྷ་ཞང་ལྷ་འགོ་བའི་ལྷ། །དགྲ་ལྷ་ཆེན་པོའི་ཚོགས་རྣམས་ལ། །འབུལ་ལོ་བསྔོའོ་དགྱེས་པར་མཛོད། །ཕྭ་དང་གཡང་གི་རྟེན་དུ་མཛོད། །མགོན་སྐྱབས་དཔུང་གཉེན་རྟེན་དུ་མཛོད། །དགྲ་ལས་རྒྱལ་བའི་རྟེན་དུ་མཛོད། །ཐར་རོ་ཐར་རོ་རྟེན་འདི་དག། དུས་མིན་འཆི་བའི་ནད་ལས་ཐར། །ལས་ངན་སྡུག་པའི་འཕྲང་ལས་ཐར། །མི་ཁོམ་སྐྱོན་གྱི་གནས་ལས་ཐར། །རྒྱལ་ལོ་རྒྱལ་ལོ་ལྷ་རྒྱལ་ལོ། །ཞེས་བརྗོད་དེ་མེ་ཏོག་འཐོར། དེ་ནས་མིང་བྱང་བྱ་ཚུལ་ནི། ཤིང་བྱང་ཆུང་ངུ་ལ། རྟ་ཡིན་ན་དགྲ་འདུལ་རླུང་ཤུགས་དང་། ཞོལ་ཕོ་ལ་སྟོབས་འཕྲོག་བརྗིད་ཞོལ། ཞོལ་མོ་ལ་བདུད་རྩི་ཁུར་ལྡན། ལུག་ལ་གཡང་མོ་འཁྱིལ། རྭ་ལ་ཚེ་ཚེ་སོགས་བརྐོས་ནས་བཏགས་ཏེ། མཇུག་ཏུ་དགེ་རྩ་སེམས་ཅན་ཐམས་ཅད་ཚེ་རིང་ནད་མེད་དང་། ཡང་ན། རྩ་བའི་བླ་མ་ཞབས་པད་བརྟན་པ་སོགས། སྐབས་བབ་གང་ལ་དམིགས་པར་བསྔོས་ཏེ། སྨོན་གནས་མི་འཕྱུགས་པར་བྱའོ། །འདི་ནི་ཉུང་བསྡུས་ཙམ་སྟེ། རྒྱས་པར་སྲོག་བླུའི་ཆོ་ག་དག་ལས་ཤེས་པར་བྱའོ། །
༤ བྱེ་བྲག་གཡག་ཚེ་བླུ་གཏོང་སྟངས། གཡག་ཚེ་ཐར་གཏོང་བ་ལ། གཞིས་རྩེ་ས་ཁུལ་དིང་རི་རྫོང་ཕུ་དགོན་པའི་གཡག་ཚེ་བླུ་གཏོང་སྲོལ་གཞི་བཞག་སྟེང་བཤད་རྒྱུ་ཡིན་ལ། རྒྱུ་མཚན་ནི། ས་ཆ་དེ་ནི་ལྷ་གཡག་གི་ཕ་ས་ལྟ་བུ་ཡིན་ཞེས་བརྗོད་ཆོག་པར་སྙམ་སྟེ། གཞིས་རྩེ་བྲེ་གཤོངས་གྲོང་ཚོའི་ནང་དུ། བྱེ་མའི་གསེབ་ལས་རྙེད་པའི་གཡག་མགོ་ཞིག་ལ། རྭ་བར་གྱི་ཞེང་ཚད་ལི་སྨིད ༩༥ དང་མགོ་རུས་ཀྱི་རིང་ཚད་ལི་སྨིད་༢༩ ཅན་ཞིག་རྙེད་ཡོད་པ། ད་ལྟ་ས་དེ་གར་ཉར་ཚགས་གནང་ཡོད་པ་ལས་ཀྱང་རྟོགས་ཐུབ།
དིང་རི་རྫོང་ཕུ་དགོན་པའི་གཡག་ཚེ་ཐར་གཏོང་བའི་དུས་ཚིགས་ནི། ས་ག་ཟླ་བའི་ཚེ་བཅུ་བདུན་ལ་གཡག་བཤད་དང་བཅས་ཚེ་ཐར་གཏོང་བ་ཡིན། དེ་ཡང་ཐོག་མར་གཡག་མང་བོ་འདེམས་སྒྲིག་གནང་ནས། དེའི་ནང་ལྷ་གཡག་བདུན་འདེམས་པ་སྟེ། གདོང་སུག་དཀར་བ་ལ་ཁད་པ། སྤུ་མདོག་ནག་ཅིང་གདོང་ཁྲ་ཅན་ལ་ཁྲ་བོ་སྦལ་བ། རོག་པོ། སྔོ་དཀར། མགོ་རོག གདོང་བོ། ཁམ་པ་བཅས་སོ། །དེ་དག་ལས་ཆོས་སྐྱོང་བཞིའི་བསྐངས་རྫས་ལ། མགོན་པོ་ཞལ་བཞི་བར་གཡག་རོག་པོ། དུར་ཁྲོད་ལྷ་མོ་ལ་གཡག་ཁམ་པ། ཟུར་ར་ལ་གཡག་གདོང་བོ། བཀྲ་ཤིས་ཚེ་རིང་མར་གཡག་དཀར་བོ་གདམས་ཏེ། གཟུངས་སྔགས་ཀྱི་ནང་དོན་ལྟར་མདོག་མི་འདྲ་བའི་ཚེ་དར་བཏགས་ནས། གཡག་བཤད་བཞིན་ལྷ་གཡག་རྣམས་ཀྱི་ལུས་པོ་ལ་མཚལ་བྱུགས་པ་དང་། མར་རྒྱན་བསྐུས་ཏེ། དགྲ་ལྷ་གསོལ་བ་དང་། ལྷ་སོ་སོར་འཕྲིན་བཅོལ་གནང་ནས་བསང་གསོལ་ཁྲུས་འབུལ་དང་། གཡག་ལ་རྩམ་པ་དང་ཆང་སོགས་བླུད་དེ། ཀི་སྭོ་དང་བཅས་ཚེ་ཐར་དུ་གཏོང་བ་ཡིན་ནོ། །གཡག་བཤད་འདི་ནི། རོང་ཕུ་དགོན་པའི་བླ་མ་རྫ་སྤྲུལ་ངག་དབང་བསྟན་འཛིན་ནོར་བུས་དུས་རབས་བཅོ་ལྔ་བར་སྲོལ་གཏོད་ལ། གཡག་བཤད་འདི་ཡང་ལོ་རྒྱུས་ཀྱི་གོད་ཆག་དང་ཉག་ཕྲ་བའི་ལམ་འཕྲང་ཀྱག་ཀྱོག་བརྒྱུད་དེ། མར་མེ་གཅིག་ལས་གཉིས་ཆད་ཀྱི་དཔེ་བཞིན། ངག་ཐོག་ནས་ངག་ཐོག་བརྒྱུད་དེ། ད་གཟོད་གསོན་ཐུབ་པ་བྱུང་བས། དཀའ་ཚེགས་ལ་མ་འཛེམ་པར་འདིར་ཆ་ཚང་བཀོད་ན་འདི་ལྟར།
བསྭོ་བསྭོ་དེ་རིང་གནམ་ལ་སྐར་མ་བཟང་། །ས་ལ་ཉི་མ་དྲོ། དུས་ཚོད་ཀྱི་ཚེས་གྲངས་འཛོམས་པའི་སྐབས་འདིར། ཡེ་ཤེས་མགོན་པོའི་གཟུགས་པོ་རོག་པོ་འདི་ལ་རྒྱན་འབུལ་ལོ། །རྒྱན་བཞེས་སུ་གསོལ། བརྒྱ་ཁྱུ་ནས་བཙལ། སྟོང་ཁྱུ་ནས་བཀུག དེའང་མགོ་ལ་རྭ་ཚང་། གདོང་ལ་མིག་ཚང་། ཞལ་བ་སོ་ཚང་། རྒྱབ་ལ་སྤུ་ཚང་། མདུན་ལ་ཞོད་ཚང་། ཁུག་ཡེ། ཁུག་ཡེ། ཕྭ་རི་བོ་བཞིན་དུ་ཡོད་ལེ་ཁུག གཡང་རྒྱ་མཚོ་བཞིན་དུ་མེར་ལེ་ཁུག གྱི་ལིང་རྟ་རྣམས་ཀྱི་རྟ་ཁུག གཡང་དཀར་ལུག་རྣམས་ཀྱི་ལུག་ཁུག ཚེར་ཚེར་ར་རྣམས་ཀྱི་ར་ཁུག སེར་ལེ་འབྲི་རྣམས་ཀྱི་འབྲི་ཁུག རྒྱ་གར་ནས་གསེར་ཁུག ཁམས་ནས་དངུལ་ཁུག ལྷོ་ནས་འབྲུ་ཁུག བྱང་ནས་ཚྭ་ཁུག ཁུག་ཡེ། ཁུག་ཡེ། རྩི་ཤིང་རྒྱས་པ་བཞིན་དུ་ཕྭ་གཡང་ཁུག བརྡབ་བོ། བརྡབ་བོ། དཔལ་གྱི་དུང་རྭ་གཡས་པ། སྡང་བར་བྱེད་པའི་དགྲ གནོད་པར་བྱེད་པའི་བགེགས། མཐོ་ན་དགའ་བ་མི་བྱེད། དམའ་ན་དགའ་བར་མི་བྱེད། ཁ་འོ་མ་ལས་འཇམ་པ། སྙིང་ཚེར་མ་ལས་རྣོ་བ་རྣམས་བརྡབ་བོ། །ཁྱད་པར་དུ་རྦད་འདྲེ་རྦོད་གཏོང་། བྱད་ཁ། ཟེར་ཁ། ཕུར་ཁ་ཐམས་ཅད་བརྡབ་བོ། །དཔལ་གྱི་དུང་རྭ་གཡོན་པ་མི་བརྡབ་བོ། །གནག་གདང་གང་བ་མི་བརྡབ་བོ། །ལུག་ལྷས་གང་བ་མི་བརྡབ་བོ། །མི་ཡི་ཚེ་ལ་མི་བརྡབ་བོ། །ཟས་ཀྱི་བཅུད་ལ་མི་བརྡབ་བོ། །གོས་ཀྱི་གདང་ལ་མི་བརྡབ་བོ། །ཡུལ་མི་ཁྱིམ་མཚེས་དགའ་བ་མི་བརྡབ་བོ། །སྤྱིར་སངས་རྒྱས་ཀྱི་བསྟན་པ་མི་བརྡབ་བོ། །དཀོན་མཆོག་གི་དབུ་འཕང་ལ་མི་གདབ་བོ། །དགེ་འདུན་གྱི་སྡེ་ལ་མི་བརྡབ་བོ། །ལག་གཡས་གོང་མ་མི་ཡི་བང་མཛོད་ཡིན། བང་མཛོད་སྟེང་ནས་ཤ་ར་ར། བར་མ་ནོར་གྱི་བང་མཛོད་ཡིན། བང་མཛོད་སྟེང་ནས་ཤ་ར་ར། འོག་མ་ཕྱུགས་ཀྱི་བང་མཛོད་ཡིན། བང་མཛོད་སྟེང་ནས་ཤ་ར་ར། བང་མཛོད་གསུམ་གྱི་སྒོ་ནས་སྐྱོར་རོ། །མི་ཡི་ཚེ་ལ་སྐྱོབས་རོགས། ཟས་ཀྱི་བཅུད་ལ་སྐྱོབས་རོགས། གོས་ཀྱི་རྡང་ལ་སྐྱོབས་རོགས། གསེར་དངུལ་ཟངས་གསུམ་གྱི་སྒོ་ནས་སྐྱོབས་རོགས། གཡུ། བྱུ་རུ། མུ་ཏིག སྤོས་ཤེལ་གྱིས་སྐྱོབས་རོགས། གདོང་ལ་བརྟན་ནོ། །བཀྲ་ཤིས་ལ་བརྟན་ནོ། །དོན་འགྲུབ་པ་ལ་བརྟན་ནོ། །གཡང་ཆགས་པ་ལ་བརྟན་ནོ། །དུང་རྭ་གཡས་པ་ལ་བརྟན་ནོ། །སྡང་བའི་དགྲ་ཐུལ་བ་ལ་བརྟན་ནོ། །རྭ་དཀྱིལ་མི་ཆག་པ་ལ་བརྟན་ནོ། །རྭ་རྩེ་ལེགས་པ་ལ་བརྟན་ནོ། །བྱམས་པའི་གཉེན་སྐྱོང་བ་ལ་བརྟན་ནོ། །ཞལ་ལ་བརྟན་ནོ། །ཞལ་དྲོ་བ་ལ་བརྟན་ནོ། །ཤ་ལ་བརྟན་ནོ། །ཤ་དྲི་ཞིམ་པ་ལ་བརྟན་ནོ། །སྤྱན་ལ་བརྟན་ནོ། །སྤྱན་གྱི་དབང་བོ་གསལ་བ་ལ་བརྟན་ནོ། །སྙན་ལ་བརྟན་ནོ། །སྙན་གསལ་བ་ལ་བརྟན་ནོ། །ལྟག་ཚང་ལ་བརྟན་ནོ། །ལྟག་ཚང་ཕ་སྤུན་བཟང་བ་ལ་བརྟན་ནོ། །གཉའ་ལ་བརྟན་ནོ། །གཉའ་དགྲ་ལག་ཏུ་མི་ཤོར་བ་ལ་བརྟན་ནོ། །ཟེ་བ་ལ་བརྟན་ནོ། །ཟེ་བ་ལྷ་རྒྱལ་འཐེན་པ་ལ་བརྟན་ནོ། །རྒྱབ་ལ་བརྟན་ནོ། །རྒྱབ་རྒྱུད་ཆུ་ལས་རིང་བ་ལ་བརྟན་ནོ། །རྔ་ལ་བརྟན་ནོ། །སྔར་དང་གོང་དུ་འཕེལ་བ་ལ་བརྟན་ནོ། །ཚང་ལ་བརྟན་ནོ། །ཚང་ནས་ལུག་འཕེལ་བ་ལ་བརྟན་ནོ། །སོག་ལ་བརྟན་ནོ། །སོག་པ་ནོར་བསོགས་པ་ལ་བརྟན་ནོ། །དཔུང་བ་བརྟན་ནོ། །མི་ནོར་དཔུང་ཚོགས་ཐུབ་པ་ལ་བརྟན་ནོ། །ཐུགས་ཁ་ལ་བརྟན་ནོ། །ཐུགས་བདེ་བ་ལ་བརྟན་ནོ། །ལྟེ་བ་ལ་བརྟན་ནོ། །ལྟེ་བ་མི་འགྱུར་བ་ལ་བརྟན་ནོ། །མཚེ་རྟིང་ལ་བརྟན་ནོ། །ས་བདག་ཀླུ་གཉན། ལྷ་ཚོགས་རྣམས་ཀྱི་ས་གཞི་ས་འོག་འདུས་པར་བྱེད་པ་ལ་བརྟན་ནོ། །རྨིག་པ་ཁག་བཞིའི་འོག་ཏུ་དགྲ་བཞི་ཐུབ་པ་བརྟན་ནོ། །བརྒྱ་ཁྱུ་ནས་བཙལ། སྟོང་ཁྱུ་ནས་བཀུག ཚང་བ་ལྔ་དང་ལྡན་པའི་ཕྱུགས་གཟུངས་འདི། ཆིབས་ན་ཆིབས་ཁ་འདི་ལས་མགྱོགས་པ་མེད། བཞུགས་ན་བཞུགས་ཁ་འདི་ལས་བཙན་ས་མེད། མི་འཆི་བའི་དོན་ལ་གཟུངས་བཅོས། གཟུངས་འོག་ཏུ་མི་འཆི་རུ་མ་འཇུག་ཅིག མདའ་མ་ཆག་པའི་དོན་ལ་ འབེན 
་བཙུགས། 
འབེན ་འོག་ཏུ་མདའ་ཆག་ཏུ་མ་མཛོད་ཅིག སྤྱན་མིག་གཡས་པའི་འོག་ཏུ་སྡང་བའི་དགྲ་ཐུལ། སྤྱན་མིག་གཡོན་པའི་འོག་ཏུ་བྱམས་པའི་གཉེན་སྐྱོངས། རྒྱལ་བོའི་གདུང་རབས་གྲ་རྒྱས་པ་བཞིན་དུ་བསྭོ་བསྭོ། ཞེས་པ་ལྟར། གཡག་བཤད་འདིའི་ནང་དུ་ལྷ་གཡག་ཚེ་ཐར་དུ་གཏོང་བའི་སྣང་བརྙན་གསོན་པོ་ཞིག་བཞེངས་བསྐྲུན་བྱས་ཡོད་པས། སྲོག་བླུ་ཚེ་ཐར་ཇི་ལྟར་གཏོང་བར་ལེགས་ཆ་ལེན་རྒྱུ་མང་དུ་ཡོད་པར་མ་ཟད། དམ་པའི་ཆོས་དང་འབྲེལ་བའི་བརྗོད་བྱ་ཡང་འདུས་ཡོད་དོ། །
༥ སྲོག་བླུ་བྱས་པའི་ཕན་ཡོན། མི་སྒེར་གྱིས་བདག་ཏུ་བཟུང་བའི་དུད་འགྲོ་རྣམས་སྲོག་ཉེན་ལས་བསྐྱབས་ཏེ། བྱམས་པས་ཚེ་རིང་བ་དང་། བདག་ཏུ་མ་བཟུང་བའི་སྲོག་ཆགས་གསོད་ཉེ་ཚེ་སྲོག་ལས་བསྐྱབས་ཤིང། གང་བདེར་གཏོང་བའི་སྲོག་བླུ་ཞེས་པར་རང་ངམ་གཞན་སྐུལ་བ་དམ་པ་གོང་མ་རྣམས་ཕྱག་བཞེས་མཛད་གནང་ལྟར། དབང་ཡོད་ཚོས་རི་རྒྱ་དང་ལུང་རྒྱ། མཚོ་རྒྱ་སོགས་བསྡམས་ནས་ཁོར་ཡུག་སྲུང་བ། ཡང་ན། འཚེ་བ་ཆོས་སུ་སྨྲ་བའི་སྡིག་རྒྱུན་གཅོད་པ་སོགས་མི་འཇིགས་སྐྱབས་ཀྱི་སྦྱིན་པ་རྣམས་སེམས་ཅན་དོན་བྱེད་ཀྱི་ཚུལ་ཁྲིམས་ཡིན་ཏེ། མདོ་དྲན་པ་ཉེར་བཞག་ལས། ཚུལ་ཁྲིམས་ཀྱི་ནང་ན་མཐོ་རིས་སུ་སྐྱེས་པའི་མཆོག་ནི་འདི་ཡིན་ཏེ། སྲོག་སྦྱིན་པའི་ཚུལ་ཁྲིམས་སོ། །ཞེས་པ་ལྟར། སའི་སྙིང་བོ་འཁོར་ལོ་བཅུ་བའི་མདོ་ལས། གལ་ཏེ་སྲོག་གཅོད་ཡོངས་སྤངས་ན། །ཀུན་གྱིས་བཀུར་ཞིང་བླ་མར་བྱེད། །རྟག་ཏུ་ནད་མེད་ཚེ་ཡང་རིང་། །བདེ་ཞིང་སྐྱིད་ལ་གནོད་པ་མེད། །སྐྱེ་བའི་གནས་ནི་ཐམས་ཅད་དུ། །སངས་རྒྱས་སྤྱོད་ཡུལ་ལམ་ལ་མོས། །སངས་རྒྱས་ཆོས་དང་དགེ་འདུན་མཐོང་། །མྱུར་དུ་བླ་མེད་བྱང་ཆུབ་འཐོབ། །ཅེས་དང་།
ཡང་། སློབ་དཔོན་དབྱིག་གཉེན་གྱིས། གསོད་སར་ཁྲིད་པ་ལེགས་བཏང་ན། །དེ་བཞིན་སྲོག་གི་ཕན་བཏགས་ཤིང་། །སྲོག་ཆགས་འཚེ་བ་ཡོངས་སྤངས་པར། །ཚེ་རིང་བ་ནི་འཐོབ་པར་འགྱུར། །ཞེས་དང་། སློབ་དཔོན་ངག་གི་དབང་ཕྱུག་གྲགས་པས། བྱ་ཉ་རི་དྭགས་རྐུན་མ་དང་། །སྦྲུལ་སོགས་གསད་བྱའི་ཕྱོགས་གྱུར་རྣམས། །སྲོག་བསྐྱབས་པ་ཡིས་འཕྲལ་དུ་ནི། །ཚེ་ཐུང་བ་ཡང་ཚེ་རིང་འགྱུར། །ཞེས་པ་ལྟར། ཚེ་རིང་བར་མ་ཟད། བྱམས་དང་སྙིང་རྗེ། བྱང་ཆུབ་ཀྱི་སེམས་ངང་གིས་སྐྱེས་པ་དང་། སྲོག་ཆགས་ཐམས་ཅད་ཀྱི་གཉེན་དུ་བརྩི་བ། དཀར་ཕྱོགས་པ་དགའ་བ། ཚེ་རབས་ཀུན་ཏུ་སངས་རྒྱས་ཀྱི་བསྟན་པ་དང་འཇལ་ཏེ། མཐར་ཐུག་བླ་མེད་རྫོགས་བྱང་འཐོབ་པར་གསུངས་སོ། །གཞན་ཡང། ཤུག་ཆུང་མཁའ་འགྲོ་མ་འབའ་མོས། ཡང་དག་པའི་ཞིང་ཁམས་ལ་འགྲོ་བའི་མི་རྣམས་ནི། ལ་ལས་། ཚེ་ཐར་གྱིས་བསྐྱལ། ཞེས་དང་། ཚེ་ཐར་དང་སྲོག་བླུ་བྱས་པའི་ཕན་ཡོན་ནི། ཚེ་ཐར་དང་སྲོག་བླུ་རེ་རེས་སྤུ་ཉག་མ་རེ་རེ་ནས་ཚེ་ཐར་དང་། སྲོག་བླུས་སེམས་ཅན་གྲངས་མེད་པ་འཕྲོས་ཏེ། དེ་དག་རེ་རེས་སེམས་ཅན་གྲངས་མེད་པ་ཁུར་ནས། བྱའི་རྒྱལ་བོ་ངང་བ་ནམ་མཁའ་ལ་འཕུར་བ་བཞིན། ནམ་མཁའ་རྟེན་མེད་ཀྱི་དབྱིངས་སུ་ཐོགས་མེད་དུ་འཕུར་ཏེ། ཐར་ལམ་ལ་འགྲོའོ། །ཡང་། ཚེ་ཐར་བཏང་ན་ཚེ་བསྲིངས། ནད་ཉུང། འབྱོར་བ་རྒྱས། ངན་སོང་མེད། ཐར་ལམ་འཐོབ་པ་སོགས་ཕན་ཡོན་མཐའ་ཡས་སོ། །ཞེས་གསུངས་སོ། །