ལེའུ་བཅུ་བ། མདོས་གླུད་གཏོ་གསུམ་གྱི་སྐོར།
མདོས།
མདོས་ཀྱི་ཁུངས་ནི། སྲིད་མདོས་ལས། བཙན་རྗེ་ནི་ཅི་ལ་དགྱེས། ཟ་བ་ནི་ཤ་ལ་རྔམ། འཐུང་བ་ནི་ཁྲག་ལ་ཧབ། ལེན་པ་ནི་སྲོག་དབུགས་ལེན། སྡོངས་པ་ནི་བགེགས་དང་སྡོངས། འགྲོགས་པ་ནི་གཉན་དང་འགྲོགས། མགོན་པ་ནི་བཙན་བོན་མགོན། འཚེ་བ་ནི་གསས་ལ་འཚེ། ཞེས་པ་ལྟར། གདོད་མའི་བཙན་བོན་སོགས་ཀྱིས་དམར་མཆོད་བྱེད་པ་དེ་གཤིན་རབ་མི་བོ་ཆེས་ཐུགས་ལ་མ་བབས་པར། དཀར་མཆོད་དུ་བསྒྱུར་བ་ཡིན་ཏེ། སྲིད་པ་སྤྱི་མདོས་ལས། བདུད་བོན་གྱི་དམར་ཐབས་ལ། །གཤེན་རབ་ནི་ཅི་དགྱེས་ཏེ། །ཁྱབ་པ་ནི་ཆམ་ལ་ཕབ། །འབྲུ་དཀར་ནི་གཏོར་མས་མཆོད། །དམར་ཐབས་ནི་འདྲེས་བྱུང་ན། །གཤེན་རབ་ནི་ཅི་དགྱེས་ཏེ། །གདོན་འདྲེ་ནི་ཆམ་ལ་ཕབ། །འབྲུ་དཀར་གྱི་ཡུ་རིས་མཆོད། །ཤེ་ཚུ་ཡི་འདྲེས་བྱུང་ན། །གཤེན་ལྷ་ལ་ནོངས་པ་མཐོལ། །ཞེས་པ་ལྟར། གཤེན་རབ་མི་བོ་ཆེ་དམར་མཆོད་ལ་ཐུགས་མ་དགྱེས་པས་དཀར་མཆོད་དུ་བསྒྱུར་བར་བཤད་ཡོད་ལ། ཁྱད་པར་དུ། ཞང་བོད་ཏི་སེའི་འོད་ཅེས་པར། དེ་དག་གིས་དམར་མཆོད་བྱེད་སྲོལ་ཡོད་པ་ལ། གཤིན་རབ་མི་བོ་ཆེ་མ་དགྱེས་ནས། བདུད་བོན་དང་གདོན་བོན་རྣམས་ཆམ་ལ་ཕབ། དེ་དག་གི་སྤྱོད་ཚུལ་དུ་སེམས་ཅན་གྱི་རིགས་གང་ཞིག་བསད་ནས་ཤ་རུས་ཀྱི་མཆོད་པ་བྱེད་སྲོལ་ཡོད་པ་དེ་དག་གི་ཚབ་ཏུ། འབྲུ་དཀར་གྱི་གཏོར་མས་འཐུས་པར་བྱས་པ་དང་། ཤེ་ཚུ་སྟེ་ཁྲག་གི་སྐྱེམས་འབུལ་སྲོལ་ཡོད་པ་དེའི་ཚབ་ཏུ་ཡུ་ཏི་སྟེ་འབྲུ་ཆང་གིས་འཐུས་པར་བྱས་པའི་མདོས་ཆོག་གི་སྲོལ་གསར་དུ་བཏོད། ཅེས་གསུངས་པ་ལྟར་རོ། །
བོན་ཤེས་པ་ཅན་མི་བཅུ་གཉིས་ཀྱི་ནང་གསེས་ལྡིང་ཤེས་ཤྭ་བ་བྱ་བ་ཡང་། ཤྭ་བ་རུས་རྒྱས་ཀྱི་མདོས་ཆོག་ལ་མཁས་པ་ཞིག་སྟེ། དེ་ཡང་། ས་ཡི་སྙིང་བོ་ལ་རིན་ཆེན་བདར་ཏེ། ཤྭ་བའི་གཟུགས་བརྙན་བཟོས། གཞོགས་གཡས་སྟོད་དུ་དཀར་བོ། སྨད་དམར་བོ། གཞོགས་གཡོན་སྟོད་དུ་སྔོན་པོ། སྨད་སེར་བོ། མཇུག་མ་ནག་པོ། འཕོངས་དཀར་བོ། སྒབ་སེར་བོའི་ཚོན་གྱིས་བསྒྱུར། རྭ་གཡས་པ་ཕོ་ཤིང་། གཡོན་པ་མོ་ཤིང་། བྱ་ངན་སྣ་ཚོགས་ཀྱིས་སྒྲོ་སྤུ་བཙུགས། སྐུད་པ་ནག་པོའི་རྒྱུད་ཁ་དར་ལ་བཏགས་པའི་རྟེན་ཞིག་བཟོ་དགོས་ལ། བོན་གཤིན་རྣམས་ཀྱིས་སྒྲུབ་རྟགས་ཐོན་ཚེ། ཤྭ་བ་དེ་མདོས་གཞིའི་སྟེང་དུ་ལྡིང་ཐུབ་པའི་ནུས་མཐུ་ཡོད་པས་ལྡིང་ཤེས་ཤྭ་བ་ཟེར་རོ། །
བོད་ཀྱི་ལོ་རྒྱུས་འགར། རྒྱལ་བོ་པུ་དེ་གུང་རྒྱལ་གྱི་དུས་སུ་འབྲས་བུའི་བོན་རིགས་ལྔ་དང་རྒྱུའི་བོན་རིགས་བཞི་དར་བའི་ནང་ནས། འཕྲུལ་གཤེན་བལ་ཚོན་ཅན་གྱིས་མི་ཕྱུགས་ཀྱི་སྲོག་ཚབ་ཏུ་བལ་སྐུད་ལྔ་ལས་སླེས་པའི་ཁང་བཟང་གི་ནང་དུ་བག་ཟན་ལས་བཟོས་པའི་གླུད་ལ་ཆས་གོས་གཡོགས་ཏེ། གདོན་བགེགས་ཀྱི་གནོད་པ་སེལ་ཐབས་སུ་སྲོལ་གཏོད་པར་བཤད་ཀྱང་། དེ་ནི་ཆོ་གའི་རྣམ་པ་ཇེ་རྒྱས་སུ་བཏང་བ་ལས་སྲོལ་ཕྱེས་པར་མི་སེམས་སོ། །ཕྱིས་སུ་རྣམ་པ་སོར་བཞག་གིས་ནང་དོན་གྱི་ཆ་ལ་སོ་སོའི་ཆོས་ལུགས་དང་མཐུན་པར་མདོས་ཆོག་བྱེད་སྲོལ་དར་བ་ཡིན་ནོ། །
རྣམ་པ་གཞན་དུ་ན། འགའ་ཞིག་རྟོག་གེའི་རིགས་པས་མདོས་ཀྱི་རྣམ་བཞག་ཅི་ཡང་མེད་པར་བརྒྱ་བཞི་དང་། ཁ་འབར་མའི་ཆོ་ག་སོགས་ལ་དཔེ་བླངས་པའི་རང་བཟོའི་ཆོག་བསྒྲིགས་བྱས་པས་སྙིང་བོ་ཅི་ཡང་མེད་པར་འདོད་ལ། ནང་བ་ཁ་ཅིག་མདོས་ཀྱི་མ་ཁུངས་སྟོན་པའི་མདོས་ཆེན་རྣམ་བཞི﹙ཤེར་སྙིང་བདུད་བཟློག བརྒྱ་བཞི། འབར་མ སྒྲོལ་མའི་གཡུལ་བཟློག་བཞིའོ། །﹚ལས་དར་སྤེལ་བྱུང་བར་ཡང་འདོད་ལ།
ཤེར་སྙིང་བདུད་བཟློག་ལྟ་བུར་མཚོན་ནའང་། སྟོན་པ་སངས་རྒྱས་ནས་བརྒྱུད་དེ། རྒྱ་གར་མཁས་གྲུབ་རྣམས་ཀྱི་ཐུགས་བཅུད། དཔལ་ལྡན་ཨ་ཏི་ཤའི་ཡི་དམ། ཁྱད་པར་དུ་གྱི་ལྗང་ལོ་ཙཱ་བའི་ཕྱག་ལེན་མཛད་པ་ཡིན། དེ་ཡང་། ཀུ་ལོར་ཞེས་པས་གཤིན་རྗེ་དམར་ནག་དང་མུན་པ་དམར་ནག་སོགས་ཀྱིས་མངོན་སྤྱོད་གནང་སྟེ་སེམས་ཅན་མང་བོ་མཐུས་སྒྲོལ་བ། ཀྱི་ལྗང་དབུ་དཀར་བས་མ་བཟོད་པར་ཉིན་གཅིག་ཀུ་ལོར་སྐྱེམས་དྲངས། གོས་སྐོན་ཏེ། ཁྱེད་ལ་མཐུ་མྱུར་བོ་ཞིག་བདོག་ཀྱང་། ཕྱི་མར་རྣམ་སྨིན་ལྕི་ཚུལ་སོགས་ཞུས་པས། ཀུ་ལོར་ཁྲོས་ཏེ། ཁྱེད་ཞག་བདུན་ཕན་དུ་མི་བཞག་ཅེས་མནའ་བོར་ཏེ་སོང་། དེ་ནས་དབུ་དཀར་བས་མདོས་འདི་བསྒྲུབས་པས། ཞག་བདུན་ན་ཀུ་ལོར་རང་ཐུ་རང་ལ་ཕོག་སྟེ་གྲོངས་པ་དང་། ཡང་། རྒྱ་ནག་གི་ཕ་འཚོ་བྱ་བ་ཞིག་ལ་རྒྱལ་བོས་གནོད་པས། རྩིས་མཁན་གྱི་ངག་བཀོད་བཞིན་བུ་ཆུང་གི་རོ་ལ་གཏོ་བྱས་ནས་ཇ་སིག་ཅིག་གི་ནང་བཅུག་ནས་དབུས་སུ་སྤྱུགས། ཇ་སིག་དེ་འཕན་ཡུལ་དུ་དགེ་སེར་གྱིས་ཉོས་པ་ལ། རྒྱལ་བོས་དགེ་སེར་ལ་གནོད་ནས་རྟ་བོང་ཐམས་ཅད་མེད་པར་བྱས་པར་མ་ཟད། རྒྱལ་བོ་དངོས་སུ་སྣང་རྒྱུ་ཡོད་པ་ཞིག་ཏུ་གྱུར། དགེ་སེར་གྱིས་ཁྱེད་ཅི་ལ་འཇིགས་ཞེས་དྲིས་པས། ང་ཀྱི་ལྗང་དབུ་དཀར་བར་འཇིགས་ཟེར། དགེ་སེར་གྱིས་དེ་ཡོད་སའི་ལམ་རྒྱུས་སོགས་ང་ལ་ཤོད་དང་དབུ་དཀར་བ་གསད་དེ་ཁྱེད་ལ་འཇིགས་པ་མེད་པ་བྱ་ཞེས་བསླུས་ནས། སྒྲུབ་ཐབས་དང་གདམས་པ་བླངས་ཏེ་བདུད་བཟློག་འདིས་རྒྱལ་བོ་བསྐྲད་ཚུལ་དང་། གནོད་པ་བཟློག་ཚུལ་སོགས་ཡོན་ཏན་རྒྱ་མཚོ་མཐའ་ཡས་སྡེའི་ཤེར་སྙིང་བདུད་བཟློག་སོགས་ན་བཤད་ཡོད་པ་དང་།
བཅས་ཐབས་ལ། གཞི་མ་དཀར་བོའི་དབུས་སུ་ཐུབ་དབང་གི་སྐུ་བྲིས་འབུར་གང་རུང་བཞུགས་སུ་གསོལ། མདུན་དུ་ཉེར་སྤྱོད་བཤམས། གཞི་དེའི་ཤར་དུ་ལྷའི་བདུད་མི་དཀར་རྟ་དཀར་ཅན། གཡས་མེ་ཏོག་དང་གཡོན་ཞགས་པ་བཟུང་བ་བདུན། ཁལ་མ། ཁྱི། ཆངས་བུ། ཤ་ཏིག མཐེབ་ཀྱུ་སོགས་ཀྱང་བདུན་རེ། དེ་བཞིན། ལྷོར་ཉོན་མོངས་པའི་བདུད་མི་སེར་རྟ་སེར་ཅན། གཡས་རལ་གྲི་དང་གཡོན་ཞགས་པ་འཛིན་པ་བདུན། ནུབ་ཏུ་ཕུང་བོའི་བདུད་མི་དམར་རྟ་དམར་ཅན། གཡས་མདུང་དང་གཡོན་ཞགས་པ་འཛིན་པ་བདུན། བྱང་དུ་འཆི་བདག་གི་བདུད་མི་ནག་རྟ་ནག་ཅན། གཡས་ཁྲམ་ཤིང་དང་གཡོན་ཞགས་པ་འཛིན་པ་བདུན་བཀོད་དོ། །གཞན་ཁལ་མ་སོགས་གོང་དང་འདྲ་ལ། དེ་རྣམས་མལ་གཞི་ནག་པོ་བཏང་ལ་དར་བཞག ཡང་སྣོད་སོ་སོར་ཞལ་ཟས་གཅིག གཏོར་མ་མེ་ཏོག་དབྱིབས་ཅན་དམར་བོ་གཅིག དཀར་གཏོར་གཅིག དམར་གཏོར་གཅིག་དང་བཞི་བཤམས། ངར་མི་རྒྱན་ཅན་ཞིག་ཁ་ཕར་ལ་བསྟན། ཐུབ་དབང་གི་སྐུ་སོགས་ཞལ་རང་ལ་སྟོན་དགོས་ལ། །སྒྲུབ་ཐབས་སོགས་ཆོ་ག་ན་གསལ་ལོ། །
མདོས་རྫས་བསྐྱལ་ཕྱོགས་ཀྱང་། ནད་པའི་ཆེད་ཡིན་ན་དུར་ཆེན་ནམ་རི་ཐོག མཐུ་བྱེད་ན་དགྲ་ཕྱོགས། སྤར་ཁ་བཅོས་པ་ཡིན་ན་གཞི། གཤེད་དང་བདུན་ཟུར་དགྲ་ཐོག་གམ་གནོད་ཕྱོགས། རིམས་ནད་བཟློག་ན་ལམ་མདོ། རྒྱལ་བོའི་གནོད་པ་ཡིན་ན། ལྷ་ཁང་ངམ་མཆོད་རྟེན་རྩར། འདྲེས་གནོད་ན་གྲོང་མདོ་འམ་ལུང་གསུམ་མདོ། ཆར་འབོད་དམ་ཀླུས་གནོད་ན་ཆུ་མིག་དང་། མདོར་ན་གང་དང་གང་གིས་གནོད་ན་དེ་དང་དེར་བསྐྱལ་དགོས་སོ། །
བརྒྱ་བཞིའི་ཆོ་ག་འདི་ཡང་། སྟོན་པ་སངས་རྒྱས་ནས་བརྒྱུད་པར་བཤད་དེ། འགྱུར་མེད་རྡོ་རྗེའི་བརྒྱ་བཞིའི་ཆོ་ག་འདོད་དོན་ལྷུན་གྲུབ་ལས། སྔོན་ལྷའི་དབང་བོ་བརྒྱ་བྱིན་བསྙུན་གྱིས་ཟིན་པ་ན། སྟོན་པ་བཅོམ་ལྡན་འདས་ལ་གསོལ་བ་བཏབ་པས་བཅོམ་ལྡན་འདས་ཀྱིས་བདུད་བཞིས་ཟིན་པར་མཁྱེན་ནས། བརྒྱ་བཞི་ཆོ་ག་འདི་མཛད་པས། བརྒྱ་བྱིན་བསྙུན་ལས་ཐར་ནས་བདེ་བ་ལ་བཀོད། དེ་ལྟར་ཕན་ཡོན་ཆེན་པོ་དང་ལྡན་པའི་ཆོ་གའི་རྫས་ལས་བརྒྱ་བཞི་མཚན་དུ་གྲགས་པ་དེ་ཉིད། འཕགས་པ་ཀླུ་སྒྲུབ་ཀྱི་ཕྱག་ཏུ་བབས་པས། རྡོ་རྗེ་གདན་གྱི་ཀ་གདན་སྤྲེའུ་འདྲ་བ་ལ་གཏེར་དུ་སྦས་པ་པཎྚིཏ་ལྔ་བརྒྱས་བཏོན་ནས་གནུབས་སངས་རྒྱས་ཡེ་ཤེས་རིན་པོ་ཆེ་ལ་བསྩལ། དེས་བོད་དུ་བསྣམས་ནས་གཞན་ཕན་འཕྲིན་ལས་རྒྱ་ཆེན་པོ་མཛད་པའོ། །ཆོ་ག་དེ་ལའང་། མདོ་ལུགས་དང་སྔགས་ལུགས་ཞེས་ཐ་དད་དུ་ཡོད་པ་ལས། འདི་ཉིད་མདོ་ལྟར་དུ་གྲགས་པའི་ལུགས་སོ། །གཞན་སྔགས་ལུགས་གཤིན་རྗེ་ནག་པོའི་རྒྱུད་ལས་བཏུས་པ། རྡོ་རྗེ་གདན་ནས་བཏོན་ཏེ་ཨོ་རྒྱན་ཆེན་པོ་སོགས་བརྒྱུད་པར་གྲགས་པའི་ཡི་གེ་ཟུར་བའི་བླ་མ་གོང་མ་རྣམས་ཀྱིས་ཕྱག་ལེན་དུ་མཛད་པ་ཞིག་སྣང་བ་ནི། ཡི་གེ་རྙིང་བ་ན་གསལ་བར་འདུག་པ་ལས་ཤེས་སོ། །བརྒྱ་བཞི་ཉམས་སུ་བླངས་པའི་ཐབས་ལ། ས་ཕྱོགས་གཙང་མར་མཎྜལ་པདྨ་འདབ་བརྒྱད་ཀྱི་ལྟེ་བར་མཆོད་སྦྱིན་གྱི་ཕྱག་གཡས་འབྲི། དེ་ཡང་མཆོད་རྟེན་ལྟར་བྱེད་ན། ཕྱོགས་བཞིར་ས་ཙྪ་ཉེར་ལྔ་བང་རིམ་སོགས་ལ་བཀོད། དབུས་སུ་མཉྫུའི་སྟེང་དུ་ཐུབ་དབང་གི་སྐུ། སྦྱིན་བདག་གི་གླུད་ཆེ་བ་མཉྫུའི་འོག་ཏུ་ཆུང་ཙམ་གཅིག་ལ་གོས་རས་གླུད་དང་རྫས་དང་ཁྲམ་ཤིང་གཟུགས། མཆོད་པ་རྣམ་ལྔ་དང་གཏོར་ཚོགས། འབྲིང་རྒྱས། རིན་ཆེན་ཕྱེ་མ་སོགས་བཤམས། ཕུང་བོའི་བདུད་སེལ་བ་ལ་སྐུ་གདུང་གི་མཆོད་རྟེན་བརྒྱ། ཉོན་མོངས་པའི་བདུད་སེལ་བ་ལ་མར་མེ་བརྒྱ། ལྷའི་བུའི་བདུད་སེལ་བ་ལ་ལྷ་བཤོས་བརྒྱ། འཆི་བདག་གི་བདུད་སེལ་བ་ལ་ངར་གླུད་བརྒྱ། མར་མེ་བརྒྱ་ནི། མཐོང་ལམ་རྙེད་པ་ལ་བརྟེན་ནས་བྱམས་པའི་སྦྱིན་པ། ས་ཙྪ་བརྒྱ་ནི། ཚོགས་ལམ་རྙེད་པ་ལ་བརྟེན་ནས་སྐྱབས་སྦྱིན་པ། གཏོར་མ་བརྒྱ་ནི། སྦྱོར་ལམ་རྙེད་པ་ལ་བརྟེན་ནས་ཟང་ཟིང་གི་སྦྱིན་པ། ངར་གླུད་བརྒྱ་ནི། སྒོམ་ལམ་རྙེད་པ་ལ་བརྟེན་ནས་སྲོག་གི་ལན་ཆགས་སྦྱོང་བས་ཆོས་ཀྱི་སྦྱིན་པའོ། །
དེ་ལྟ་བུའི་ཆོ་ག་འདི་ཡར་གྱི་ལྷ་རྒན་མཆོད་ཅིང། མར་གྱི་འདྲེ་སྲི་བཀར་བ། བར་གྱི་ཁྱིམ་ཐབ་འདོན་པ་གནད་དུ་བཟུང་བ་ལས་གཞན། དགེ་འདུན་གྱི་མདོ་སྒྲུབ་པ། འཕྲིན་ལས་རྣམ་བཞི་སྒྲུབ་པ། སྐྱེ་བོའི་ཡམ་ག་དར་བ་དང་། རྦོད་གཏོང་གནོད་པ། མི་ཁ་བྱ་བ། བན་བོན་གྱི་ཕུར་ཁ་ཟུག་པ་དང་། གཏད་ཆུད་པ་དང་། དགྲ་རྐུན་མང་བ་དང་། སྐྱེ་བོའི་ཡ་ག་ངན་པ་དང་། མིའི་ཤི་ཁ་བྱེད་པ་དང་། ཕྱུགས་ནད་གོད་ཁ་བྱུང་བ། ཡུལ་དུ་ནད་རིགས་དར་བ་དང་། ཁྱད་པར་རྒྱལ་འགོང་དང་ཡི་དྭགས་ཞུགས་པ་དང་། གཟའ་སྐར་ངན་པ་ལ་ཤི་བ་དང་། ལུས་སྲོག་དབང་ཐང་རྒུད་པ་དང་། རླུང་རྟ་ལ་དགྲ་དར་བ་དང་། ཀེག་ཆགས་ཆེ་བ། སྲིའུ་དང་ནད་པ་ཅིས་ཀྱང་མ་གསོས་པ་སོགས། མདོར་ན་མི་མཐུན་པའི་འགལ་རྐྱེན་སེལ་བ་སོགས་ཕན་ཡོན་བསམ་གྱིས་མི་ཁྱབ་པ་དང་ལྡན་པ་ཡིན་ནོ། །ཞེས་གསུངས་ལ།
གང་ལྟར་བན་བོན་གཉིས་འདྲེས་ཀྱི་མདོས་ཆོག་འདིའི་རིགས་ཆུ་ལ་ཆུ་བཞག་གི་ཚུལ་དུ་སིམ་ཡོད་ལ། རྙིང་མ་བར་མཚོན་ནའང་། སློབ་དཔོན་གྱིས་ཆོས་རྒྱལ་ཁྲི་སྲོང་ལྡེ་བཙན་ལ་གནང་སྟེ་འབུམ་ཐང་དུ་གཏེར་དུ་སྦས་པ་གཏེར་སྟོན་རྒྱལ་མཚན་པས་བཏོན་པའི་མདོས་ཆོག་འཕྲུལ་མིག་གསུམ་པ་སོགས་མདོ་ཁམས་ཕྱོགས་སུ་དར་རྒྱས་ཆེ་ཞིང། མདོས་མང་བོ་ཞིག་གཏེར་ཆོས་སུ་སོང་གཤིས་དཀྲུགས་སྡེབ་ཏུ་གྱུར་བ་དང་། གྲོང་སྔགས་བླུན་པོ་འགའ་ཞིག་གིས་རང་བཟོ་བསྡེབས་པ་དང་། ཡིག་རྒྱུན་མ་དག་པ། ཆད་ལྷག་དང་སླད་སྐྱོན་བྱུང་བ་སོགས་ཀྱང་མང་དུ་སྣང་ངོ་། །
ཁ་འབར་མ་ཡང་། སྤྱིར་ན་ཁ་འབར་མ་འདི། དཔལ་ལྡན་ལྷ་མོའི་རྒྱུད་རྣམས་ལས། ནག་མོ་ཆེན་མོ་ཁ་འབར་མ། །ཞེས་ངོ་བོ་དཔལ་ལྡན་ལྷ་མོ་དང་དབྱེར་མེད་པར་བཤད་ཀྱང་། རྣམ་པ་ཡི་དྭགས་ཀྱི་ཚུལ་བཟུང་ནས་བགེགས་རིགས་ཐམས་ཅད་ལ་དབང་བསྒྱུར་བའི་རྒྱལ་མོ་རྡོ་རྗེ་གདན་གྱི་ཆོས་སྐྱོང་དྲག་རྩལ་ཅན་ཡིན་པས། སྟོན་པའི་ཞལ་ནས། ང་ལ་སྟོན་པར་ཁས་ལེན་ན། འཕྲོག་མ་བུ་ལ་ཆངས་བུ་བྱིན། ཞེས་གསུངས་པ་ལྟར། ཁ་འབར་མར་གཏོར་མ་བཏང་ནས་ཚོགས་བསགས་པ་དང་། འཆི་བ་ཟློག་པ། བྱད་དང་དགྲ་ཟློག་པ། ལན་ཆགས་སྦྱོང་བ་སོགས་ཡོད་ལ། བཅའ་ཐབས་ཡང་། ལྕགས་གཟེར་མེད་པའི་གཞོང་བའི་ནང་དུ། ཁྲོ་ཞལ་ཁ་གདངས་པ། ཁ་སྣ་གཉིས་ལས་དུ་བ་འཐུལ་བ། ནུ་མ་རྐྱལ་བ་འདྲ་བ། ལྟོ་བ་ཆེ་ཞིང་གཉེར་མའི་གང་བ། རྐང་ལག་ཕྲ་ཞིང་མོ་མཚན་རྒྱས་པ། སོ་གཅིག་པ། ལག་གཡས་ཀྱིས་ཆངས་བུ་ལེན་པ། གཡོན་དུ་མར་མེ་ཐོགས་པ། རྐང་བ་ཕྱེད་སྐྱིལ་དང་། དེའི་མདུན་དུ་ཡོན་བདག་གི་གཟུགས་གླུད་དང་བཅས་པ། ཕྲག་གཡས་སུ་ཡོན་བདག་གི་ལོ་གྲངས་རི་མོ་བྲིས་ལ་གཟུགས། དྲི་གླུད་ཀྱིས་བསྐོར་བ། རྒྱབ་ཏུ་ས་གཞོང་གཙང་མ་ལ་ཆངས་བུ་དང་འབྲས་ཆན་ཆུ་དཀར་གྱིས་གང་བ་བཤམས་པ་སོགས་ཁ་འབར་མའི་གཏོར་མ་གཏོང་ཚུལ་རྒྱས་པར། ཀརྨ་ཆགས་མེད་ཀྱི་ཁ་འབར་མའི་ཟིན་བྲིས་སོགས་ལས་ཤེས་པར་བྱའོ། །དེ་ལས་གཞན། ཁ་འབར་མའི་གཏོར་མ་གཏོང་ཚུལ་དང་བཅའ་ཐབས་སོགས་མང་དུ་ཡོད་དེ། སྔོན་དབུས་གཙང་དུ་ཁ་འབར་མའི་དཔེ་རིགས་མི་འདྲ་བ་བསྡུ་སྒྲིག་བྱས་པ་སྒྲོམ་གང་ཡོད་པའི་ལོ་རྒྱུས་ཡང་འདུག་གོ །
སྒྲོལ་མའི་གཡུལ་བཟློག་ཡང་། རྒྱལ་བས་ལུང་བསྟན་ཅིང་སྒྲོལ་མའི་རྒྱུད་ལ་བརྟེན་ནས་གྲུབ་པ་འཐོབ་པ་ཀླུ་སྒྲུབ་ཀྱིས་མཛད་ནས། སྐལ་ལྡན་རྣམས་ལ་གནང་བ་བརྒྱུད་དེ་ཨ་ཏི་ཤས་བོད་དུ་བསྣམས་ནས་ཕེབས། ཇོ་བོ་མྱ་ངན་ལས་འདའ་ཁར་ན་བཟའི་གསེབ་ལས་བཏོན་ཏེ་འབྲོམ་སྟོན་ལ་གནང་ནས་དར་སྤེལ་བྱུང་བ་ཡིན།
དེ་ཡང་། སྔོན་རྒྱ་གར་ཤར་ཕྱོགས་ཀྱི་རྒྱལ་བོ་ཞིག་གིས། མུ་སྟེགས་སྐད་ཆེན་གྱི་བུ་བསད་པས། མུ་སྟེགས་པས་རྒྱལ་བོ་འཁོར་བཅས་ཀླུ་ལ་གཏད། སང་ནུབ་ཕོ་བྲང་དུ་ཀླུ་སྦྲུལ་ཆེན་པོ་ཧ་ཧ་ཟེར་བ་བྱུང་བས། རྒྱལ་འབངས་འཁོར་བཅས་བརྒྱལ་ཞིང་འཆི་ལ་ཐུག་པའི་ཚེ། པཎྚིཏ་ཞིག་གིས་མདོས་ཆོག་འདི་བསྒྲུབས་པས། མུ་སྟེགས་པའི་སྤྱི་བོ་མཆུས་གཞིབ་སྟེ་ཤི་བ་དང་། ཡང་། ཟ་ཧོར་གྱི་རྒྱལ་བོ་ཞིག་གིས་སྡེ་བརྒྱད་དྲག་ཤུལ་ཅན་ཐམས་ཅད་ཁྱད་དུ་གསད། མི་དགེ་བའི་སྤྱོད་པ་སྣ་ཚོགས་བྱས་པས། ལྷ་འདྲེ་ཐམས་ཅད་ཁྲོས་ཏེ། ཐབས་གང་གིས་ཀྱང་མ་ཕན་པས། མདོས་ཆོག་འདི་བྱས་པས་མི་ནོར་སོགས་རྒྱས་པའི་ལོ་རྒྱུས་ཀྱང་ཡོད།
བཅས་ཐབས་ཀྱང་། གནས་ཁང་གི་གོང་དུ་པད་འདབ་ཀྱི་སྟེང་སྒྲོལ་མའི་སྐུ་བྱིན་ཅན་བཞུགས་སུ་གསོལ། ཉེར་སྤྱོད་འདོད་ཡོན་དང་བཅས་པའི་མཆོད་པ་གང་བཟང་དང་གཏོར་མ་གསུམ་བཤམས། སྒྲོལ་མའི་དབུ་ལ་དར་དཀར་གྱི་གུར་ཕིབ། རིན་ཆེན་བརྡར་བའི་འཇིམ་པ་ལ་སྤེའུ་ལྕགས་རི་དང་བཅས་པ་ཇི་ལྟར་འཚམ་པའི་ནང་། ངར་མི་མཐོ་གང་བ་གསེར་གཡུས་བརྒྱན་པ་རྟ་ལ་བསྐྱོན། གཡོན་དུ་ནམ་མཁའ་དང་རྒྱངས་བུ་གསུམ་གསུམ། ཕོ་གདོང་མོ་གདོང་། མདའ་ཁྲ་འཕང་ཁྲ་དང་བཅས་པའང་གསུམ་གསུམ་ལས་མི་ཉུང་བ་གཟུགས། རིན་ཆེན་བརྡར་བའི་ཟན་ལ་ངར་མི་སུམ་ཅུ། མཛོ་རྟ་གཡག་ལུག་རི་དྭགས་སོགས། ས་ལ་འཛུལ་དགུ། གནམ་ལ་འཕུར་དགུ བར་ལ་འགྲིམ་དགུའོ། །ས་ལ་འཛུལ་དགུ་ནི། ༡ ཤེས་བྱ་ཀུན་མཁས་སྐྱེ་འགྲོ་མི། ༢ ཤུགས་ཆེན་བཀྲ་ཤིས་རྫས་གྱུར་དུང་དཀར། ༣ དུས་འཁོར་ཆགས་ཚུལ་ལྡན་པའི་རུས་སྦལ། ༤ རྐང་ལག་ནང་སྦས་འགྲོ་ཤེས་སྦྲུལ་ནག ༥ དགུན་དུ་ཉལ་ཆོག་སྒོམ་ལྡན་འཕྱི་བ། ༦ མི་གཙང་གྲིབ་སེལ་ཚངས་ལྡན་གྲིམ་པ། ༧ རིག་རྣོ་གཞན་སེལ་ཤེས་པའི་སྲེ་མོང་། ༨ ཀུན་ཤེས་ཚོད་ལ་མཁས་པའི་ཅོ་ག ༩ ལུས་རྐེད་ཕྲ་ཡང་རྩལ་ཆེན་གྲོག་མའོ། །གནམ་ལ་འཕུར་དགུ ༡ ཀུན་ཟིལ་ནོན་པའི་བྱ་རྒྱལ་ཁྱུང་ཆེན། ༢ དབྱར་དགུན་མཚམས་འབྱེད་སྒྲ་བརྒྱའི་གཡུ་འབྲུག ༣ འཕུར་རྩལ་ནམ་འཕང་གཅོད་པའི་རྒོད་པོ། ༤ སྐད་སྙན་དུས་ཀྱི་ཚོད་འཛིན་ཁུ་བྱུག ༥ དུག་འཇོམས་སྒྲོ་མཛེས་རྨ་བྱ། ༦ དྲན་གསལ་མི་སྐད་སྨྲ་བའི་ནེ་ཙོ། ༧ ཉིན་ཞག་དུས་ཤེས་ཁྱིམ་བྱ། ༨ ལྷ་མིའི་འཕྲིན་སྐྱེལ་ལྕེ་བདེ་ཕ་ཝང་། ༩ ཐོགས་མེད་འཕུར་ཤེས་རྫི་བྱའོ། །དེ་ལས་གཞན། གཟུགས་དང་། འབྲུ་སྣ། ཟས་སྣ། རིན་པོ་ཆེ། ཇ་གོས་སོགས་ལྕགས་རིའི་ནང་བཀང་བར་བྱས། ལ་དགུ་ལུང་དགུའི་ས་སྣ་ཆུ་སྣ། ངར་མིའི་སྟེང་དུའང་དར་དཀར་གྱི་གུར་དང་། མདའ་དར་གཟུགས་སོ། །
ད་ལྟའི་མདོས་ཀྱི་རྣམ་པ་མང་ཆེ་ཤོས་ནི། དར་སྐུད་ཚོས་གཞི་སྣ་ཚོགས་ཀྱིས་ལྷས་བཏགས་བྱས་པའི་ཁང་བཟང་གི་ནང་དུ། རྒྱལ་གཟུགས་དང་མི་ཕྱུགས་ནད་པ་སོགས་ཀྱི་གཟུགས་བརྙན་དང་། མཐའ་བསྐོར་དུ་ཤིང་བྱང་སྣ་ཚོགས་ཀྱི་ངོས་སུ། གནམ་ལ་འཕུར་དགུ། ས་ལ་འཛུལ་དགུ། རི་དྭགས་འཕྱོ་དགུ གཅན་གཟན་སྡེར་དགུ་བཅས་ཀྱི་གཟུགས་བརྙན་བྲིས་པ་བཙུགས། དེ་ཡང་། དགུ་རྫས་འདི་མདོས་ཆོག་ཏུ་མང་དུ་འབྱུང་སྟེ། དཔེར་ན། ཀརྨ་ཆགས་མེད་ཀྱི་འདྲེ་མོ་རྫ་མདོས་ལས། རྫ་མ་ཁ་དགུ་ལུང་དགུ་བཞེས། །འབྲུ་སྣ་དགུ་ལ་གཤེད་དེ་གཤེགས། །ནམ་མཁའ་དགུ་ལ་གཟིགས་ཏེ་གཤེགས། །རྒྱངས་བུ་དགུ་ལ་བལྟས་ཏེ་གཤེགས། །མདའ་བཀྲ་དགུ་ལ་གསོར་ཏེ་གཤེགས། །འཕང་བཀྲ་དགུ་ལ་གཤེད་དེ་གཤེགས། །སྲེ་ལོང་དགུ་ལ་ཞོན་ཏེ་གཤེགས། །ལྟག་རུས་དགུ་ལ་བསྐོར་ཏེ་གཤེགས། །ཐོད་རུས་དགུ་ལ་བསྣམས་ཏེ་གཤེགས། །འགལ་བ་དགུ་ལ་བབ་སྟེ་གཤེགས། །འབྲང་རྒྱས་དགུ་ལ་གསོལ་ཏེ་གཤེགས། །མར་མེ་དགུ་ལ་བཤུས་ཏེ་གཤེགས། །ར་དགུ་ཁྱི་དགུ་ཕག་དགུ་དང་། །བ་དགུ་མཛོ་དགུ་རྟོལ་བུ་དགུ། །སྦྲུལ་དང་སྦལ་བ་ལྕོང་མོ་དང་། །དགུ་དགུ་འདུས་པའི་ཡས་སྟགས་རྣམས། །ཞེས་པ་ལྟ་བུ་དང་། དེའི་མཐའ་བསྐོར་དུ་ཟས་སྣ། གོས་སྣ། དར་སྣ། འབྲུ་སྣ། རིན་ཆེན་སྣ་ལྔ། བཤོས་བུ། ཏིང་ལོ། ཆིངས་བུ། མཐེབ་ཀྱུ། ཤ་མར་ཇ་ཆང་སོགས་བཟའ་བཏུང་གི་རིགས། གོས་དར། རས་སྣམ། པགས་རིགས། ལ་དགུ་ལུང་དགུའི་ས་སྣ་ཆུ་སྣ། མདའ་ཁྲ། འཕང་ཁྲ། ཕོ་གདོང་མོ་གདོང་སོགས་ལྷ་འདྲེ་མགུ་བའི་རྫས་རྫོང་སྣ་མང་ཡོད་པ་ཞིག་ཡིན། ཆེ་ཆུང་གི་ཚད་འབྱོར་འཁོས་དང་བསྟུན་ཏེ་འཐུས་ཚང་མི་ཚང་སྣ་ཚོགས་ཡོད་ལ། ཧ་ཅང་སྟབས་བདེ་བོའི་སྒོ་ནས་འཕེན་པའི་མདོས་ཀྱང་ཡོད་དོ། །
མདོས་ཆོག་གི་རྫས་ལ། ཡ་སྟགས་ཞེས་ཀྱང་བརྗོད་ལ། ཨ་ཀྱཱ་ཡོངས་འཛིན་གྱི་བརྡ་བཀྲོལ་དུ་དེ་ནི་བོན་ཆོག་ལ་དགོས་པའི་རྫས་ཀྱི་མིང་དུ་འགྲེལ་ཡོད། དེ་ཡང་། ཞིབ་ཆ་བཀར་ན། སྟེང་མ་ལྷ་སོགས་ཀྱི་མཆོད་རྫས་ལ་ཡས་སྟགས་དང་། འོག་མ་གདོན་བགེགས་འགོང་བོ་སོགས་ལ་སྦྱིན་པ་ལ་མས་སྟགས་ཟེར་རོ། །ཡས་སྟགས་ཀྱི་རྫས་ཡང་གང་བྱུང་དུ་མི་ཆོག་སྟེ། རིག་སྔགས་འཆང་བ་རྣམས་ཀྱིས་སྔགས་དང་། བསམ་པའི་ཁྱད་པར་གྱིས་གདོན་བགེགས་སོགས་ཚིམ་པའི་ཕྱིར་བྱིན་གྱིས་བརླབས་པའམ་ནུས་མཐུས་བསྒྱུར་པ། དེ་ཡང་མང་དུ་སྤེལ་བ་ནི། ལྷ་འདྲེ་དེ་དང་དེའི་མཐུན་རྫས་ཡིན་ནོ། །
མདོས་འབུལ་ཡུལ་ཡང། ཨ་པང་གཏེར་ཆེན་གྱི་ཤེར་སྙིང་བདུད་བཟློག་ལས། འདོད་པའི་ཡོན་ཏན་རྒྱ་ཆེ་རྒྱུན་རིང་བ། །འཛད་མེད་ནམ་མཁའ་མཛོད་ཀྱི་གཏེར་ཆེན་པོ། །སྣང་ཞིང་སྲིད་པའི་ལྷ་འདྲེ་ཡོངས་ལ་འབུལ། །ཁྱད་པར་བདུད་ཀྱི་རྒྱལ་བོ་མདོས་ལ་གཤེགས། །ལྷ་ཀླུ་གཟའ་བཙན་མ་མོ་མདོས་ལ་གཤེགས། །ཡུལ་ལྷ་གཞི་བདག་གཉན་པོ་མདོས་ལ་གཤེགས། །སྣང་སྲིད་ལྷ་འདྲེ་མ་ལུས་མདོས་ལ་གཤེགས། །ཞེ་སྡང་ལས་གྱུར་རྒྱལ་བོ་མདོས་ལ་གཤེགས། །འདོད་ཆགས་ལས་བྱུང་བསེན་མོ་མདོས་ལ་གཤེགས། །གཏི་མུག་ལས་བྱུང་ས་བདག་མདོས་ལ་གཤེགས། །སྔོན་གྱི་ལན་ཆགས་བདག་པོ་མདོས་ལ་གཤེགས། །འཕྲལ་གྱི་བུ་ལོན་བདག་པོ་མདོས་ལ་གཤེགས། །མ་འོངས་ཤ་འཁོན་བདག་པོ་མདོས་ལ་གཤེགས། །ཕྱི་ཡི་དགྲ་འདྲེ་རྐྱེན་གསུམ་མདོས་ལ་གཤེགས། །ནང་གི་ནད་གདོན་བར་ཆད་མདོས་ལ་གཤེགས། །གསང་བ་དུག་ལྔའི་ལྷ་འདྲེ་མདོས་ལ་གཤེགས། །མདོས་རྫས་དཀོར་ཆས་རྣམས་ཀྱིས་ཐུགས་དམ་བསྐང་། །ཞེས་དང་། ཀརྨ་ཆགས་མེད་ཀྱི་སྡོང་བོ་རྒྱན་མདོས་ལས་ཤ་གླུད་ས་ལ་གནས་པའི་ལྷ་འདྲེ་དང་། ཁྲག་གླུད་ཆུའི་ལྷ་འདྲེ་དང་། དྲོད་གླུད་མེ་ལ་གནས་པའི་ལྷ་འདྲེ་དང་། དབུགས་གླུད་རླུང་ལ་གནས་པའི་ལྷ་འདྲེ་དང་། རུས་གླུད་བྲག་ལ་གནས་པའི་ལྷ་འདྲེ་དང་། རྩ་རྒྱུས་གླུད་ཤིང་ལ་གནས་པའི་ལྷ་འདྲེ་དང་། པགས་གླུད་ཐང་ལ་གནས་པའི་ལྷ་འདྲེ་དང་། སེམས་ཉིད་ཀྱི་གླུད་མཁའ་ལ་གནས་པའི་ལྷ་འདྲེ་ལ་འབུལ་བར་བཤད་དོ། །
མདོས་ཀྱི་དབྱེ་བ་ལ། པདྨ་གར་དབང་བློ་གྲོས་མཐའ་ཡས་ཀྱི་གཏེར་གཞུང་ལས། དབྱེ་བ་ཞི་རྒྱས་དབང་དྲག་ལས། །ནད་དང་གནོད་པ་ཞི་བའི་མདོས། །ཚེ་དང་བསོད་ནམས་རྒྱས་པའི་མདོས། །སྣོད་བཅུད་དབང་དུ་བསྡུས་པའི་མདོས། །ཕྱི་ནང་བར་ཆད་བསྲུང་བའི་མདོས། །ཆག་ཆེ་ཉམ་ང་བཟློག་པའི་མདོས། །ཞིང་བཅུའི་དགྲ་བགེགས་བསད་པའི་མདོས། །བསྐང་བའི་མདོས་དང་བཤགས་པའི་མདོས། །སྤྱི་ཡི་མདོས་དང་སྒོས་ཀྱི་མདོས། །ཕོ་མོ་དང་ནི་མ་ནིང་མདོས། །དེ་ལ་བྱེ་བྲག་བསམ་མི་ཁྱབ། །ཅེས་སོ། །
ཡང་། ཐུའུ་བཀྭན་ཆོས་ཉིས་མདོས་གླུད་ནི། འཇིག་རྟེན་པ་ཁོ་ནས་མཆོད་པ་ཡིན་ཀྱང་། དེ་ལག་ལེན་དུ་བགྱིས་པ་སོགས་བྱས་ན་སྐྱབས་འགྲོའི་བསླབ་བྱ་དང་འགལ་བའི་ཉེན་ཡོད་མོད་ཀྱང་། འཇིག་རྟེན་པ་དེ་དག་ལ་དགའ་བའི་རྫས་སོགས་བྱིན་ནས་གནས་སྐབས་ཀྱི་གྲོགས་བཅོལ་བ་ཙམ་ཡིན་པས་བསླབ་བྱ་དང་མི་འགལ་བར་གསུངས་སོ། །
རྣམ་གྲངས་ལ། རྒྱལ་མདོས། ཀླུ་མདོས། བཙན་མདོས། སྤར་ཁའི་སྤྱི་མདོས། སྡོང་བོ་རྒྱན་མདོས། སྡེ་བརྒྱད་ཁང་མདོས། ཤེར་སྙིང་བཟློག་མདོས། ཁ་འབར་མའི་མདོས། ས་བདག་མདོས། གཤེད་མདོས། ས་སྒོ་དང་ནམ་སྒོ་གཅོད་པའི་མདོས། རི་སྒོ་དང་རླུང་སྒོ་གཅོད་པའི་མདོས། གླིང་བཞི་སྤྱི་མདོས། དྲི་ཟ་བཟློག་མདོས། གཤིན་རྗེ་གདོན་མདོས། མ་མོའི་ཁྲག་མདོས། དམ་སྲི་གླུད་མདོས། སྡེ་བརྒྱད་ཁེངས་མདོས། ཐེའུ་རང་དཀར་མདོས། འགོང་བོ་དཀར་མདོས། ཕྱུགས་གླུད་དཀར་མདོས། ཆོམ་རྐུན་བཟློག་མདོས། མི་ཁ་དགྲ་མདོས། མྱ་ངན་དགུ་མདོས། ཐན་ལྟས་བཟློག་མདོས། དུར་སྒོ་བཟློག་མདོས། ཤི་འདྲེ་གླུད་མདོས། བྱིས་པའི་ཆུང་སྲི་མདོས། རྨི་ལམ་འཁྲུགས་མདོས། རྟ་ནད་གཅོད་མདོས། ལུག་ནད་གཅོད་མདོས། གྲིབ་མདོས། ཁ་ཚེ་བཟློག་མདོས། མཚོ་སྨན་དགུ་མདོས། བདུད་བཞི་གཡུལ་མདོས། ཚེ་བདུད་བཟློག་མདོས། མདོས་གཞུང་བཀྲ་ཤིས་འཁྱིལ་བ། དམ་སྲིའི་གླུད་མདོས་སོགས་མང་དུ་ཡོད་དོ། །ཡང་གཟི་བརྗིད་སྣང་གཤེན་ཐེག་པའི་མདོ་ལས། མདོས་ལ་རྣམ་པ་གསུམ་ཡིན་ཏེ། །ཕྱི་མདོས་ནང་མདོས་གསང་མདོས་གསུམ། །ཕྱི་མདོས་སོག་ཁྲིག་ལག་ལེན་རྫས། །ནང་མདོས་གླུད་ཡས་གྱེར་དང་སྨང་། །གསང་མདོས་ཏིང་འཛིན་དགོངས་པའི་རྫས། །གསུམ་ཀ་ཟུང་འབྲེལ་འགྲོ་བ་སྐྱོབ། །དང་བོ་ཕྱི་མདོས་སོག་ཁྲིག་ལག་ལེན་ལ། །རྒྱས་འབྲིང་བསྡུས་གསུམ་སྐབས་དང་སྦྱར། །རྒྱས་པ་དག་ལ་ཁྲི་འགྱུར་འབུམ། །འབྲིང་བོ་དག་ལ་སྟོང་འགྱུར་བཅུ། །ཐ་མ་དག་ལ་བརྒྱ་འགྱུར་འབུམ། །ཡང་ཐ་དག་ལ་བཅུ་འགྱུར་བཅུ། །ཞེས་ཀྱང་བཤད་དོ། །
བྱེ་བྲག་ལྷ་འདྲེ་སོ་སོའི་མདོས་བསྐྱལ་ཕྱོགས་དང་ཕན་ཡོན་ནི། ཀརྨ་ཆགས་མེད་ཀྱིས་སྡེ་བརྒྱད་ཁེངས་མདོས་ལས། གཟའ་མདོས་དེ་ཕུལ་བ། ཕུག་པ་བྱང་གྱུ་འམ། དུར་ཁྲོད་དམ། རི་མཐོན་པོའི་རྩེ་ལ་བཞག དེས་གཟའ་ནད་མི་འབྱུང་། ཐོག་སེར་མི་འོང་བསམ་པ་འགྲུབ་བོ། །ཐེའུ་རང་མདོས་ནི། ས་ཕུག་སྟོང་བའམ་གད་པ་སྟོང་བར་བསྐྱལ་ལོ། །དེ་ལྟར་བྱས་པས་ཕོ་ནད་ཞི། ར་ལུག་འཕེལ་ལོ། །ལྷའི་མདོས་དེ་ས་མཐོ་སར་བཞག་གོ ། དེ་ལྟར་བྱས་པས་ནོར་གོད་ཆད། གནག་ཕྱུགས་འཕེལ་ལོ། །གཤིན་རྗེ་མདོས་དེ། ནགས་ཚལ་ལམ། ཤིང་གཅིག་སོགས་སུ་བཞག་གོ ། དེ་ལྟར་བྱས་པས་དུས་མིན་འཆི་བ་བཟློག་ཅིང་ཚེ་རིང་ངོ་། །མ་མོའི་མདོས་དེ། བྲག་གི་སྐར་ཁུང་ངམ། དེའི་ཐད་དུ་འབུལ། བྲག་གམ་རིའི་གནམ་སྒྲོན་གཤིན་རྗེའི་མཆེ་ཟུར་མཐོང་ས། དེ་མ་རྙེད་ན་རི་གཉིས་གཤིབ་པའི་བར་དུ་བཞག་གོ། དེས་རིམས་ནད་དང་ཡམས་ནད་ཆད་ཅིང་མི་འབྱུང་ངོ་། །ཐན་པ་དང་ལོ་ཉེས་མི་འབྱུང་ངོ་། །བདུད་ཀྱི་མདོས་དེ། བྲག་ནག་གམ། རི་ནག་ཕ་བོང་ནག་པོའམ། གད་པ་ནག་པོའི་རྩར་བཞག་གོ། དེས་མི་ལ་ཤི་ཆད་ཉུང་། དགྲ་མི་འབྱུང་ངོ་། །བཙན་མདོས་ནི། བྲག་དམར་བོ་ཡི་རྩ་བའམ། རིའམ་དེའུ་དམར་བོ། རྒྱ་ལམ་དམར་བོའམ། ལ་བཙས་སོགས་ཀྱི་དྲུང་དུ་བཞག་པར་བྱའོ། །དེས་རྟ་ནད་དང་རྟ་གོད་ཆད། འཐབ་རྩོད་དང་གྲི་འཁྲུག་ཞིའོ། །རྒྱལ་བོའི་མདོས་དེ། ཚྭ་ཁང་ངམ། མཆོད་རྟེན་ནམ། གྱང་རལ་ལམ། མ་ཎི་བརྒྱ་མཁར་སོགས་སུ་བཞག་གོ ། དེས་སངས་རྒྱས་ཀྱི་བསྟན་པ་དར། དགོན་གནས་ཡུལ་གྲོང་བརྟན། སྨྱོ་འབོག་ཞིའོ། །གནོད་སྦྱིན་མདོས་དེ། སྣང་གཡེར་ཆེ་སར་བཞག་གོ ། དེས་ལྷོག་པ་སོགས་ནོར་ནད་ཐམས་ཅད་ཆད་དོ། །འབྲུ་འཕེལ་ལོ། །ཀླུའི་མདོས་དེ། ཆུ་མིག་ཏུ་བསྐྱལ་ལོ། །དེས་མཐའ་དམག་དང་དུས་འཁྲུག་ཐོག་སེར་ཀླུ་ནད་ཞིའོ། །ཞེས་གསུངས་སོ། །
ཡང་། སྤར་སྨེའི་སོགས་གེགས་རྩུབ་ལ་བལྟས་ཏེ་མདོས་གང་གཏོང་ནི། སྡེ་བརྒྱད་ཁེངས་མདོས་ལས། ལི་ལ་བཙན་མདོས་ཁོན་ལ་མ་མོའི་མདོས། །དྭ་ནི་སྐྱེས་ཕྲན་ཐེའུ་རང་སྐྱེས་བུའི་མདོས། །ཁེན་ནི་གནམ་ལྷ་ཡིན་ཕྱིར་གཟའ་མདོས་བྱ། །ཁམ་ནི་མི་ནག་རལ་ཆེན་བདུད་ཀྱི་མདོས། །གིན་ལ་དཀོར་བདག་རྒྱལ་བོའི་མདོས་བྱའོ། །ཟིན་ནི་ལྗང་གུ་གནོད་སྦྱིན་མདོས་བྱའོ། །རི་རབ་ཡོད་ཕྱིར་རི་རབ་བརྩེགས་མདོས་ཚང་། །ཟོན་ནི་གཤེད་སྒོ་ཡིན་ཕྱིར་གཤིན་རྗེའི་མདོས། །སྨེ་བ་གཅིག་དཀར་དྲུག་དཀར་ལྷ་ཡི་མདོས། །གཉིས་ནག་བདུད་དང་གསུམ་མཐིང་དམུ་བདུད་དེ། །གཉིས་ཀ་ལ་ཡང་བདུད་ཀྱི་མདོས་བྱའོ། །ཀླུ་ནི་གཙོ་བོ་ཡིན་ཕྱིར་ས་བདག་དེ་ཡི་འཁོར། །བཞི་ལྗང་ཀླུ་ཡིན་ལྔ་སེར་ས་བདག་སྟེ། །གཉིས་ཀ་ལ་ཡང་ཀླུ་ཡི་མདོས་བྱའོ། །བདུན་དམར་དགུ་དམར་ལ་ཡང་བཙན་གྱི་མདོས། །བརྒྱད་དཀར་དགྲ་ལྷའི་རྒྱལ་བོ་བེ་དཀར་མདོས། །སྤར་ཁ་གང་དང་སྨེ་བ་གང་ལ་རྩུབ། །ལེགས་པར་རྩིས་ལ་དེ་ཡི་མདོས་བྱའོ། །དེ་བཞིན་གཟའ་ནད་ཅན་ལ་གཟའ་ཡི་མདོས། །ཕོ་ལྷོག་གླང་ཐབས་དུག་ཏུ་མཁྲིས་པའི་ནད། །དེ་ལ་ཐེའུ་རང་མདོས་ཀྱིས་ཕན་པའོ། །གཞི་བདག་ཕོག་ཐུག་ཤོར་ན་ལྷ་མདོས་བཅའ། །ཤི་ཆད་མང་ན་གཤིན་རྗེ་མདོས་ཀྱིས་ཕན། །རིམས་ནད་ནོར་ནད་གཅོད་ལ་མ་མོའི་མདོས། །ན་ཚ་རྒོད་དང་གང་བསམ་ལོག་པར་འགྲོ། །དེ་ལ་བདུད་མདོས་བྱས་ན་ཕན་པའོ། །ཁྲག་སྐྱུག་རྟ་གོད་རྨ་ངོ་བཙན་མདོས་བྱ། །རྒྱལ་འགོང་གནོད་པ་ཆེ་ན་རྒྱལ་མདོས་བྱ། །གོད་ཁ་ཆེ་ཞིང་ལྟོགས་འགོང་ཞུགས་པ་ན། །གཏེར་བདག་གནོད་སྦྱིན་མདོས་ཀྱིས་ཕན་པའོ། །སྤྱི་མདོས་བཅས་པ་དེ་དག་ཀུན་ལ་ཕན། །གསུངས་སོ། །
གླུད།
གླུད་ནི་འཐུས་སམ་ཚབ་ཀྱི་དོན་ཡིན་ལ། བོན་ལུགས་ལ་མིའི་སྲོག་ཚབ་ཏུ་གནག་ཕྱུགས་སོགས་སེམས་ཅན་མང་བོ་གསོད་པ་དེ། གཤེན་རབ་མི་བོ་ཆེས་རྒྱུན་བཅད་དེ། སྲོག་ཚབ་ཏུ་སེམས་ཅན་དེ་འདྲའི་འདྲ་གཟུགས་སྔགས་དང་སྨོན་ལམ་བཏབ་སྟེ་གཏོང་སྲོལ་ཡོད་པ་དེ་ཡིན།
ཡང་། ཕྱིས་སུ་བོན་གྱི་གོམས་གཤིས་དེ་དང་འདྲ་བར། ལོ་ངམ་རྟ་རྫིས་གྲི་གུམ་བཙན་པོ་གྲོངས་ཏེ་སྐུ་ཕུང་ཉང་ཆུའི་ནང་དབྱུགས་པ་ཀླུ་ཞིག་གིས་ཉར་འཛིན་བྱས་པར། བོད་ཁམས་སུ་ནད་རིམས་སྣ་ཚོགས་དང་། བཙའ་སད་སེར་བ་སོགས་ངན་ལྟས་མང་དུ་བྱུང་བས། ལྷ་སྲས་གཉིས་ཀྱིས་སྤུར་ཚུར་ལེན་ཐབས་བྱ་སྐབས། ཀླུ་སྲིན་དེས་འདོད་པ་ལྟར་བུ་མོ་བྱ་མིག་མ་ཞིག་སྟེ། མིག་ཡས་འགབ་ཏུ་ཡོད་པ་སོགས་བརྫངས་པ་རྒྱ་བོད་ཡིག་ཚང་མཁས་པ་དགའ་སྐྱེད་ལས་འབྱུང་བ་དང་། དེ་ཡང་། ཞིབ་ཏུ་སྤ་སྟོན་བསྟན་རྒྱལ་བཟང་བོས་བརྩམས་པའི་བསྟན་པའི་རྣམ་བཤད་དར་རྒྱས་གསལ་སྒྲོན་ལས། རེ་ཞིག་ན་ཉང་སྟོད་སྟག་ཚལ་དུ་རྩིས་མཁན་མཁས་པ་ཞིག་ལ་རྩིས་བྱས་པས། རྒྱལ་བོའི་སྤུར་ནི་ཀླུ་ལྕམ་ཁོད་དེ་རིང་མོ་བྱ་བས་བསྡམས་འདུག་པས། དེ་སླུ་བའི་ཐབས་ལ་ཁྱེའུ་ངར་ལ་ངར་སོ་བྱ་བ། ཤ་རྩ་དམར་ཞིང་སྐྲ་ཁམ་པ། ལོ་བྱ་ལོ་བ། མིག་བྱ་ལྟར་མས་ཡས་འགེབས་པ། ལག་པ་ཆུ་བྱ་ལྟར་འབྲེལ་བ་ཞིག་གླུད་དུ་བཏང་ན་རྙེད་ཟེར་ནས། རུ་ལས་སྐྱེས་དཔོན་གཡོག་གིས་ཕྱོགས་ཀུན་ཏུ་བཙལ་ཀྱང་མ་རྙེད་པར། ལོག་ནས་ཡུལ་ཡར་ལུང་སོག་ཁའི་གཡིའི་གང་བ་བྱ་བར་སླེབས། དེར་རུ་ལས་སྐྱེས་ཞབས་གཅིག་ན་གཟིམས་ནས་ཡོད་ཙམ་ན། ཞིང་ཞིག་གི་སྟེང་ན་བུད་མེད་འདྲ་ཡུར་མ་བྱེད་པའི་འགྲམ་ན། བུ་ཙ་ཞིག་ཙེར་ཙེར་ངུ་ཡིན་འདུག་པས། དེའི་མ་ན་རེ། མུག་ཕྲུག་ལྷ་འདྲེས་འཁྱེར་འཁྱེར་བ། ལྟས་ངན་གྱི་ཕྲུ་གུ་ལོ་ཡང་བྱ་ལོ་ལ་སྐྱེས། མིག་ཀྱང་བྱ་མིག་བཞིན་མས་ཡར་འགེབས་པ། ལག་པ་ཡང་ཆུ་བྱའི་སྡེར་མོ་བཞིན་འབྲེལ་བ། ཤི་རུ་ནི་མི་འདོད། གསོད་དུ་ནི་མི་ཕོད། བསྐྱུར་དུ་མིས་འཕྱ་ཞེས་ཟེར་རོ། །དེར་བུད་མེད་དེའི་གམ་དུ་བྱོན་ཏེ། ཁྱོད་ཅི་འདོད་བྱིན་གྱིས། བུ་འདི་ང་ལ་བྱིན་བྱས་པས་དེ་ལྟར་ན་སྣོམས་ཤིག་ཟེར་ཏེ་བུ་འཁྱེར་ནས་ཆུ་ཁར་བྱིན་པས་ཀླུ་ལྕམ་ཁོད་དེ་རིང་མོ། ཁྱེད་འདོད་པའི་ཁྱེའུ་ངར་ལ་ངར་སོ་ཡོད་དོ། །རྒྱལ་བོའི་སྤུར་ཐོངས་བྱས་ནས་ཁྱེའུ་ཆུ་ལ་འཕངས་པས། དེ་སྟེང་དུ་སླེབས་ཙམ་ན་སྤུར་ཆུ་ཁར་ཐོན་ནས་བྱུང་། དེར་ཡར་ལུང་གི་དྲང་མོ་དྲང་ཆུང་གི་གཡའ་ལ་བང་སོ་བཏབ། ཅེས་དང་།
དེ་བཞིན་སྲས་དོན་ཡོད་དོན་འགྲུབ་སོགས་རྣམ་ཐར་འགའ་རེའི་ནང་དུ་བུ་ཆུང་འབྲུག་ལོ་བ་དང་སྟག་ལོ་བ་སོགས་མཚོ་མཆོད་བྱེད་པ་སོགས་ཀྱང་གོང་གསལ་གཏམ་རྒྱུད་འདི་དག་ལ་ཁུངས་གཏུགས་ཏེ་བྱུང་བ་གོར་མ་ཆག་གོ །
ཡང་། གླང་ནག་ཐུར་སེལ་ཞེས་པའི་དཔེ་ཆའི་ནང་གླང་ཁམ་པ་ཞིག་ལ་ཡས་བཏགས་དང་ཕོ་གླད་མོ་གླད་བཀལ་ནས། དེའི་སྟེང་དུ་བུ་ཆུང་ལོ་བཅོ་ལྔ་ལོན་པ། དུང་སོ་འཁོར་ནས་སོ་བར་མེད་པ་ལག་པ་ཆུ་བྱ་ལྟར་དྲ་བས་སྦྲེལ་བ། མགོ་བར་པུའི་དབྱིབས་སུ་ཡོད་པ། སྐྲ་སུ་ལི་ཅན་གྱི་གལ་བུ་ཞིག་བསྐྱོན་ཏེ་བོན་རུས་མི་གཅིག་པ་བཅོ་བརྒྱད་བསྡུས་ནས་ཉི་མ་ལྷོ་ནུབ་མཚམས་སུ་གླུད་དུ་བརྫངས་པར་བཤད་ཡོད། གོང་གསལ་ལོ་རྒྱུས་འདི་གཉིས་ལ་མཚོན་ན་བུ་མོ་བྱ་མིག་མ་དང་ནལ་བུ་དེ་གཉིས་ནད་ཡམས་སོགས་འཁྱེར་ཡོང་བའི་སྣ་ནག་མར་ངོས་འཛིན་གནང་སྟེ་མཐར་སྤྱུགས་གནང་བ་མངོན་གསལ་དོད་པོར་ཐོན་ཡོད། ཡང་། དུས་རབས་བརྒྱད་པའི་ནང་བཻ་རོ་ཙ་ནས། རྒྱ་གར་དུ་ངན་སྔགས་བསྒྲུབས་པ་དང་། བློན་པོ་འགའ་ཞིག་གིས། ཁྲི་སྲོང་ལྡེ་བཙན་གྱི་བཙུན་མོ་གབ་མཐུན་ལ་སྙད་འདོགས་དང་། ཚེ་སྤོང་བཟས་ཛ་དྲག་གི་འཐབ་རྩོད་ཀྱིས་བཻ་རོ་ཙ་ན་གྲོངས་དགོས་པའི་ཁ་ཆད་བྱས་ཚེ། རྒྱལ་བོ་འཆལ་གཏམ་དེ་དག་ལ་ཡིད་མ་ཆེས་ནའང་། ཨུ་ཐུག་ཐབས་ཟད་ཀྱིས་བཻ་རོ་ཙ་ན་དང་ངོ་རིས་འདྲ་བ་ཞིག་གཙང་ཆུར་གཡུགས་ནས། ལོ་ཙཱ་བ་བསམ་ཡས་དགོན་པའི་གདུང་གསེབ་ཏུ་གསང་རྒྱ་བསྡམས་ཏེ་བཞུགས་པ་བཻ་རོའི་འདྲ་འབག་ལས་གསུངས་པ་དེ། མཁར་རྨེའུས་གླུད་ཚབ་ཏུ་བཏང་བ་འདྲ་ཞིག་བཤད་ཀྱང་། དེ་ནི་ཆབ་སྲིད་ཀྱི་གཡོ་ཇུས་ཡིན་པ་ལས། གླུད་ཀྱི་ཆོ་གའི་ཕྱོགས་གཏོགས་ཙམ་མ་ཡིན་ནོ། །
བོད་ཀྱི་ལོ་རྒྱུས་ཁྲོད་སྐུ་གླུད་དུ་བཏང་ཞེས་འབྱུང་བ་ནི། རྒྱལ་བོའི་སྐུ་ཚེ་དང་གོད་ཆག་བཟློག་ཆེད་ཡུལ་སྤྱུགས་བཏང་བར་ཟེར་ལ། བོན་དཔེ་ཞིག་ལས། མུ་ཁྲི་བཙན་པོ་ལ་སྐུ་བོན་འགའ་ཡོད་པའི་ཁྲོད་ན་སྐུ་གླུད་ཀྱི་ཆོ་ག་སྤེལ་མཁན་ཞིག་ཡོད་པར་གཞིགས་ན། རྒྱལ་བོའི་སྐུ་གླུད་ཀྱི་ཆོ་ག་སྤེལ་སྲོལ་གདོད་མ་ནས་ཡོད་པར་སེམས།
དཔེར་ན། ཆོས་བློན་རྣམས་ཀྱིས་གྲོས་མཛད་ནས་མ་ཞང་གྲོམ་པ་སྐྱེས་སྟོད་ལུང་དང་། སྟག་ར་ཀླུ་གོང་འཕན་པོར་རྒྱལ་བོ་ཁྲི་སྲོང་ལྡེ་བཙན་གྱི་སྐུ་གླུད་དུ་བརྫངས་པ་ལྟ་བུ་ཡིན།
དེ་ལས་གཞན། མི་གསོན་པོ་གླུད་དུ་བརྫངས་པའི་སྲོལ་དེ། བོད་ས་གནས་སྲིད་གཞུང་གིས་སྲིད་དབང་བཟུང་བའི་སྐབས་སུ། ཚོགས་མཆོད་གཏོར་རྒྱག་བྱེད་སྐབས། མི་མང་གི་འཐུས་ཚབ་ཏུ་གླུད་འགོང་རྒྱལ་བོ་ཟེར་བ་མི་གཉིས་གླས་ཏེ། གཏོར་སྒྲུབ་ཟོར་འཕེན་དང་བཅས་ནས། ཁ་ཕྱིར་བལྟས་ཙམ་ཡང་སློག་མི་ཆོག་པར། གཅིག་བསམ་ཡས་པེ་ཧར་ལྕོག་དང་། གཅིག་འཕན་པོ་རྒྱལ་ཁང་དུ་སྤྱུགས་སྲོལ་ཡོད། གསོན་གླུད་དེའི་རྣམ་པ་ནི། ཆས་གོས་འགོ་སྣམ་སྔོན་པའི་ཚལ་ཕྱུ་མ་དང་། དེའི་སྟེང་རྭ་པགས་དཀར་བོ་ཕྱི་ནང་སློག་པའི་མགོ་ཤུབས། སྨྱུག་མའི་ཞྭ་མོའི་རྩེ་ལ་དར་ལྕོག་ནག་པོ་ཡོད་པ་ཞིག་གྱོན། ངོ་གདོང་ཕྱེད་ཀ་དཀར་བོ་དང་ཕྱེད་ཀ་ནག་པོ་བཟོས། སྐེད་པར་ཤོག་བུས་བཟོས་པའི་འབོ་དང་། བྲེ། ཉག་ག ཤོ་བཅས་བཏགས། ལག་ཏུ་གཡག་གི་རྔ་ནག་ཐོགས་པ། རས་དཀར་གྱི་ཞྭ་ཙོག་རྩེ་རིང་ལ་རྔ་ནག་གི་ཏོག་དང་། རས་ནག་གི་ལྕོག་དར་ཅན། གླུད་འགོང་རྒྱལ་བོའི་གཟུགས་སུ་བྱས་པའོ། །
གླུད་འགོང་དེ་གཏོང་སྲོལ་ནི། གླུད་འགོང་དེ་གཉིས་ལྷ་ལྡན་གཙུག་ལག་ཁང་གི་ཁྱམས་རའི་སྒོ་འཕྱོར་འོག་ཏུ། ཆུ་ཤུལ་གྱི་རྙིང་དགོན་བྱང་ཆུབ་གླིང་གི་གྲྭ་བ་རྣམས་ཀྱིས་ཆོ་ག་བཏང་རྗེས། སློབ་དཔོན་གྱིས་ཞྭ་ནག་གི་ཆས﹙ཞྭ་ནག་གི་ཆས་ནི་ཕྱུ་བ་ཕུ་ཐུང་ཆེན་པོ་ཞིག་དང་ཞྭ་མཐའ་ལ་པགས་པ་དང་། སྟེང་ལ་རྨ་བྱའི་སྒྲོ་མདོངས། སྟེང་དུ་སྲོག་ཆགས་སྒང་གི་གཟུགས་བརྙན་སྒྲོ་གཟེངས་སེ་བ་ཞིག་བྲིས་པ་དེའོ། །﹚སྤྲས་ཏེ། གླུད་འགོང་གཉིས་ལ་ཤོ་རྒྱག་དགོས་པ་དང་། ཤོ་རྒྱག་སྐབས་ཏཱ་ལའི་བླ་མའི་ཆས་ལྟར་སྤྲས་པའི་གྲྭ་བ་ཞིག་གིས། ཁོང་གི་སྐུ་ཚབ་ཡིན་ཁུལ་གྱིས་དེར་ཡོང་དགོས། གླུད་འགོང་གཉིས﹙དུང་དཀར་བློ་འཕྲིན་གྱིས་གླུད་འགོང་དེ་གཉིས་ལྷ་ས་ཞོལ་གྱི་ཁྱིམ་ཚང་གཉིས་ནས་རེས་མོས་སུ་གཏོང་བར་གསུངས་པ་དང་། ཡང་ལ་ལས། འཕན་ཡུལ་དུ་གཏོང་བའི་གླུད་འགོང་ལྷ་ས་ཀུན་བདེ་གླིང་དགོན་ནས་གཏོང་དགོས་པར་བཤད་པ་དང་། ཏཱ་ལའི་སྐུ་ཕྲེང་བཅུ་གསུམ་པའི་རྣམ་ཐར་ལས་གླུད་འགོང་དེ་འབྲི་གུང་གི་ཁྱིམ་ཚང་ཞིག་ནས་གཏོང་དགོས་པར་བཤད་ཡོད﹚གཏོང་ཁར་སྡེ་བ་གཞུང་ནས་ཤ་མར་དང་། འབྲས། ཚྭ་བུལ་སོགས་ལམ་རྒྱགས་གྱ་ནོམ་པ་སྤྲད་རྗེས། བསམ་ཡས་ལ་འགྲོ་མཁན་དེ་ལྷ་ས་ནས་ཐོན་ཏེ་བསམ་ཡས་བེ་ཧར་ལྕོག་ཏུ་རྒྱལ་བོའི་དབུགས་ཁང་གི་སྒོ་འགྲམ་དུ་ཞག་གཅིག་ཉལ་དགོས་ཀྱི་ཡོད། རྒྱལ་བོའི་དབུགས་ཁང་ཟེར་བ་དེ་ལོ་ཧྲིལ་བོ་སྒོ་ཐེངས་རེ་ལས་ཕྱེ་སྲོལ་མེད་པ་དང་། ལོ་ལྟར་སྒེའུ་ཁུང་ལས་ཤ་གཙབ་བྱེད་ཀྱི་ཨན་རྡར་དང་གྲི་རེ་འཕེན་ལ། ལོ་འཁོར་གཅིག་གི་རྗེས་སུ་ཨན་རྡར་གྱི་ཞབས་བརྡོལ་བར་མ་ཟད། གྲི་ཡང་རྩེ་ཚང་མ་ཆག་པ་སོགས་མཐོང་རྒྱུ་ཡོད་ཟེར། གླུད་འགོང་དེ་ཞག་གཅིག་སྒོ་ཁ་དེར་ཉལ་རྗེས། རང་གི་འདྲ་གཟུགས་བཟོས་ནས་དབུགས་ཁང་དུ་བསྐྱལ་རྗེས། དྲུང་འཁོར་དཀྱུས་མའི་ཆས་སྤྲས་ཏེ་གླུད་རྫོང་གི་ཟས་གོས་སོགས་ལྷོ་ཁ་ཁུལ་དུ་བཙོང་ནས་ཚུར་ལོག་པར་བཤད་དོ། །གླུད་འགོང་རྒྱལ་བོའི་ཆོ་ག་གཏོང་སྲོལ་འདི་རྒྱལ་དབང་ལྔ་བའི་སྐུ་དུས་ནས་ཡོད་པར་འདོད་དེ། ལྔ་བ་ཆེན་པོའི་རང་རྣམ་ལས། སྤྱི་ལོ༡༦༨༠ ལོར་སྡེ་སྲིད་སངས་རྒྱས་རྒྱ་མཚོར་སྙུན་གཞི་ཕོག་ཅིང་། ཞོལ་དུ་སྔགས་འཆང་ཆུ་སྤེ་སྟེང་བས་སྒྲུབ་བཞག་དགུ་སྔོན་དུ་བཏང་སྟེ། རྒྱལ་བོ་རྩེ་མདོས་ཕྱིར་ཐོན་པ་དང་གློ་བུར་དུ་འཚུབས་ཤིང་འཆམས་དང་བཅས་འགོང་བོ་འགྲོལ་ཕྱོགས་སུ་རླུང་རྣམས་བརྒྱུགས་པའི་ལྷོངས་རྟགས་ཤིན་ཏུ་ཆེ་བ་ལྟར་སྡེ་བའི་ཁམས་ཀྱང་རིམ་བདེར་སོང་བའི་འཕྲོད་ངོ་ཆེ། ཞེས་པ་ལས་རྟོགས་ནུས་སོ། །
གླུད་འགོང་རྒྱལ་བོའི་ཆོ་ག་དེ་རིགས་ཉེ་ཆར་ཡང་། རྒྱལ་རོང་དང་སོག་ཡུལ་དུའང་སྤེལ་སྲོལ་ཡོད་པར་བཤད་དོ། །
ཡང་། གྲོང་ཚོ་འགའ་ཞིག་ཏུ། ལོ་མཇུག་གི་ཚེས་ཉེར་དགུའི་དགུ་ཐུག་གི་རྗེས་སུ། མི་གཅིག་གིས་གྲོང་ཚོའི་ནང་གི་ཐེམ་དུད་ཚང་མའི་ཚབ་བྱས་ཏེ། གྱོན་པ་ནག་པོ་གོན། གདོང་ལ་ཀྲེ་ནག་བྱུགས། མགོ་བོར་སྨྱུག་ཞྭ་རྩེ་ལ་དར་ལྕོག་ནག་པོ་བཙུགས་པ་ཞིག་གྱོན། མི་གཞན་ཞིག་གིས་དཔལ་འབར་འཁྱེར། ཡང་། གཞན་མི་ཞིག་དཔལ་འབར་གྱི་སྟེང་དུ་གམ་པ་བཏབ་སྟེ་མེ་འབར་ཤུགས་ཆེ་རུ་བཏང་ནས། གདོན་འདྲེའི་ཆས་སྤྲས་པའི་མི་དེའི་རྗེས་དེད་ནས། ལོ་གཅིག་ཟླ་བ་བཅུ་གཉིས་ཞག་མ་སུམ་བརྒྱ་དྲུག་ཅུའི་གེགས་བར་ཆད་ཐམས་ཅད་ཁྱོད་ཀྱིས་འཁྱེར་ཅིག ཅེས་གདོན་འདྲེ་བསྐྲད་ཐོག གླུད་དེ་ཐག་རིང་གི་སུམ་མདོ་འམ་བཞི་མདོ་སླེབས་ཚེ། གདོང་གཙང་བཀྲུ་དང་གླུད་ཆས་བརྗེས་སྤོར་གནང་སྟེ། ཕྱིར་བལྟས་ཙམ་ཡང་མ་སློག་པར་ཚུར་གྲོང་ཚོའི་ནང་དུ་སླེབས་ནས། གྲོང་ཚོའི་དུད་ཁྱིམ་ཚང་མས་ཁོ་ལ་ཇ་ཐུག་ལྡུད་པ་དང་། གསོལ་རས་སྤྲོད་སྲོལ་ཡོད།
དེ་བཞིན་དུ། རེབ་གོང་གཉན་ཐོག་ལ་མཚོན་ནའང་། གསོན་གླུད་དེ་དགུན་གྲང་ངར་གྱི་སྒང་ལ་ཤ་རྗེན་སྟེང་སྟག་རིས་བྲིས་ཏེ། ལག་ཏུ་དབྱུག་པ་རིང་བོ་ཞིག་ལ་འཁུར་བ་མང་བོ་རྒྱུན་ཏེ། ཁ་ནང་དུ་ཤ་དུམ་ཞིག་བཟུང་ནས། གྲོང་ཚོའི་དུད་ཁྱིམ་གྱི་སྟེང་འོག་ཀུན་ཏུ་རྒྱུགས་ཏེ་ཁ་ཟས་ཇི་ཡོད་ཟ་ཞོར་དང་འགྲོ་ཞོར་བྱས་ནས། རྗེས་སུ་ཆོ་ག་སྔགས་ཏེ་དེད་ནས། སྡེ་འདབས་ཀྱི་ཆུ་འགྲམ་དུ་ཕྱིན་རྗེས་གཙང་བཀྲུ་བྱེད་སྲོལ་ཡོད་པ་དང་།
གང་ལྟར། དེང་སང་གྲོང་ཆོག་པ་ཀུན་གྱི་གཏོང་བའི་གླུད་ནི་ཡོན་བདག་གི་ནད་གདོན་སྡིག་སྒྲིབ་དང་། ཆག་ཆེན་ཉམས་ང་སེལ་བྱེད་དུ་སྲོག་ཚབ་ཏུ་ཟན་གླུད་གཏོང་བ་འདི་ཡིན་ཏེ། དེ་ཡང་། རྩམ་པའི་གླུད་ལྟ་བུ་ལ་ཤ་ཁྲག་དྲོད་དབུགས་བླ་དང་ནད་དང་བགེགས་སོགས་ཀྱིས་ཟིན་པ་མེད་ཀྱང་། རིག་སྔགས་འཆང་བ་རྣམས་ཀྱིས་སྔགས་དང་། བསམ་པའི་ཁྱད་པར་གྱིས་གདོན་བགེགས་སོགས་ཚིམ་པའི་ཕྱིར་བསྒྲུབ་བྱ་དེའི་འཐུས་ཚབ་ཏུ་བྱིན་གྱིས་བརླབས་པའམ་ནུས་མཐུས་བསྒྱུར་བས། ལྷ་འདྲེ་དེའི་སྣང་ངོར་དངོས་སུ་རིག་རྒྱུ་ཡོད་པར་བྱས་ནས་རྫོང་འདེབས་དང་བཅས། རྒྱ་མཚོའི་ཕར་འགྲམ་ལྟ་བུར་བསྐྲད་དེ་བསྒྲུབ་བྱ་དེ་གདོན་བགེགས་དང་ནད་སོགས་ཐར་བར་བྱས་པའོ། །གཟི་བརྗིད་ལས། ཆབ་ནག་སྲིད་པའི་བོན་པོ་ཡིས། །སེམས་ཅན་འགྲོ་ལ་ཕན་གདགས་ཕྱིར། །མཉམ་གཉིས་བརྗེ་ལ་གླུད་རེ་བཟང་། །ཞེས་དང་། བླ་ཆེན་དྲན་པ་ནམ་མཁས། རྣམ་སྨིན་ཐ་སྙད་མི་དགོས་པར། །ན་བ་ཐམས་ཅད་གླུད་ཀྱིས་གསོ། །ཞེས་པ་ལྟར། ཕོ་གླུད་དང་མོ་གླུད། བྱིས་གླུད་སོགས་ལ་རང་གཟུགས་ལྟར་བཅའ་བ་ནི། ཚེའི་གཡུང་དྲུང་ལས། ཕོ་གླུད་སྐྱེས་པ་སྟག་རིས་ཅན། །གོ་མཚོན་སྣ་དགུའི་རྒྱན་གྱིས་བརྒྱན། །མོ་གླུད་བཙུན་མོ་བག་ཆས་ཅན། །རིན་ཆེན་སྣ་ལྔའི་རྒྱན་གྱིས་བརྒྱན། །ཆུང་གླུད་བྱིས་པ་ལྟ་ན་མཛེས། །མཚར་སྡུག་དར་ཚོན་སྣ་ཚོགས་ལྷུབས། །ཞེས་དང་། དེ་ཡང་། མི་ལ་ཅི་ཚང་ཟན་གླུད་ལ་ཚང་བར་བསྔོ་བ་སྟེ། ཐུའུ་བཀྭན་རིན་པོ་ཆེའི་ནད་བདག་འཇོམས་བྱེད་ཀྱི་ཆོ་ག་འཁྱེར་བདེ་ལས། ངར་གྱི་གླུད་བཟང་རིན་ཆེན་འདི། །ལུས་ངག་ཡིད་གསུམ་འདི་ལ་ཚང་། །དབང་བོའི་སྒོ་ལྔ་འདི་ལ་ཚང་། །སྐྱེ་མཆེད་བཅུ་གཉིས་འདི་ལ་ཚང་། །ཕུང་བོ་རྣམ་ལྔ་འདི་ལ་ཚང་། །རྣམ་ཤེས་ཚོགས་བརྒྱད་འདི་ལ་ཚང་། །ཞེས་དང་། དེ་མ་ཟད་ཡོན་བདག་གི་ཤ་རུས་ཁྲག་སོགས་ཀྱང་། ཟན་གླུད་དུ་བསྟིམས་ནས་བསྔོ་བ་སྟེ། བླ་བླུའི་ཆོ་ག་རིན་ཆེན་སྲོག་གི་ཆད་མཐུད་ལས། རྒྱུ་འབྱོར་ཡོན་གྱི་བདག་པོ་ཡི། །རྣམ་ཤེས་གླུད་དང་རུས་པའི་གླུད། །ཤ་ཡི་གླུད་དང་ཁྲག་གི་གླུད། །དྲོད་ཀྱི་གླུད་དང་དབུགས་ཀྱི་གླུད། །གནོད་བྱེད་ལྷ་འདྲེ་ཡོངས་ལ་བསྔོ། །ཞེས་དང་། དེ་ཡང་། དབང་བོ་སོགས་རྫས་ཀྱི་འཐུས་ཚབ་བྱེད་པ་ནི། ཏུན་ཧོང་ལས་ཐོན་པའི་གླུད་དཔེ་ལས། ངར་ཟན་ངར་གླུད་འཕད་དུ་བགྱིས། །མི་རུ་བགྱིས་པ་ཞལ་རེ་ལེགས། །རྟ་རུ་བགྱིས་པ་བང་རེ་མགྱོགས། །ངར་གླུད་མགོ་ལ་སྐྲ་མེད་ན། །རྦབ་སེར་བྱ་སྤུ་མགོ་ཡི་སྐྲ། །ངར་གླུད་དཔྲལ་ན་མིག་མེད་ན། །སྤུ་གཟི་ཁྲ་བོ་བལྟ་བའི་མིག། འགྲོན་བུའི་འཐོང་བཤད་ཚེམས་སུ་བགྱིས། །ལེབ་རྒན་དམར་བོ་ལྗགས་སུ་བགྱིས། །ངར་གླུད་ནང་ན་དྲོད་མེད་ན། །སྣང་མ་སྒྲོན་ཤིང་དྲོད་དུ་བགྱིས། །སླས་མེ་དྲི་ཞིམ་སྙིང་དུ་བགྱིས། །སེ་མོ་ལོ་དྲོས་ཤ་རུ་བགྱིས། །མཚལ་ཆེན་ལྕོག་ལ་ཁྲག་ཏུ་བགྱིས། །རྨ་བྱའི་གདོངས་ཆེན་ཞལ་དུ་བགྱིས། །ཞེས་གསུངས་ལ། ཡང་། གླུད་ཀྱི་འཐུས་ཚབ་ཀྱི་རྫས་གང་དགོས་པ་བརྒྱ་བཞིའི་ཆོ་ག་འདོད་དོན་ལྷུན་གྲུབ་དང་། འཆི་བདག་དཔུང་བཟློག་ལས་འབྱུང་བ་ཞིབ་ཚགས་སུ་བརྗོད་ན། སེམས་ནམ་མཁའ། སྙིང་ཞོ་ཤ གློ་བ་གླ་གོར་ཞོ་ཤ མཆིན་པ་མཆིན་པ་ཞོ་ཤ ཚེར་བ་མཁལ་སྲིན་བྱིའུ། མཁལ་མ་མཁལ་མ་ཞོ་ཤ མཁྲིས་པ་ཏིག་ཏ། རྒྱུས་པ་བྱ་རྒོད་ཀྱི་རྒྱུས་པ། རུས་པ་དུང་དཀར། ཤ་བསེ་རུའི་ཤ ཁྲག་ཚོས་དམར་བོ། ལྤགས་པ་སྲོག་ཆགས་གྲུམ་པའི་ལྤགས་པ། སྤུ་པུ་ཤེལ་རྩི། དྲོད་མེ། དབུགས་རླུང་། ཆུའི་ཁམས་ཆུ། མགོ་ཀ་བད། སྐྲ་ཟེར་མོ། ཀླད་པ་མུ་ཏིག ཞལ་རྨ་བྱའི་མདོངས་སམ་རྩི་ཤིང་ཞིག སྣ་ཟངས་ཀྱི་ཊམ་ཀ མིག་ལུང་ཐང་། རྣ་ཤིང་སྟག་པའི་གྲོ་ག སོ་མགྲོན་བུ། ལྕེ་ལེབ་བརྒན། ལག་པ་དབང་བོའི་ལག་པ། རྐང་ལྕགས། གོས་དར﹙ཚབ་མཚོན་གྱི་རྫས་དེ་རིགས་ཀྱི་འགྲེལ་བཤད་དྲི་མེད་ཤེལ་ཕྲེང་དང་མཛེས་མཚར་མིག་རྒྱན་ལས་གསལ་ལོ། །﹚བཅས་ཀྱིས་མཚོན་པར་བྱེད་དོ། །
གླུད་རྫོང་ལ། སྲིད་པ་སྤྱི་མདོས་ལས། ཟས་གླུད་ལ་གཏོར་མས་བརྔན། །སྐྱེམས་གླུད་ལ་ཡུ་ཏིས་བརྔན། །གོས་གླུད་ལ་དར་སྣས་བརྔན། །ཞེས་པ་ལས་གཞན། ཕྱུགས་ཟོག་ལ་འབྱུང་བོས་གནོད་འཚེ་ཐེབས་ནའང་། ཕྱུགས་ཚབ་ཏུ་ཟན་གླུད་གཏོང་བ་ནི། ཐུའུ་བཀྭན་ཆོས་ཉིའི་ཕྱུགས་གླུད་གཏོང་ཐབས་འབྱུང་བོ་ཚིམ་བྱེད་ལས། ཁམ་ས་ལ་ནི་ཕྱུགས་ལྷས་ས། །བསྲེས་ཏེ་ར་བ་གྲུ་བཞི་བྱ། །ཁམ་ས་བཟང་བོ་རིན་ཆེན་བསྲེས། །དྲི་བཟང་ཆུས་སྤྲུས་འཇིམ་པ་ལ། །རྟ་དྲེལ་མཛོ་འབྲི་བ་གླང་དང་། །ར་ལུག་ལ་སོགས་གཟུགས་སྣ་ཚོགས། །རང་རང་སྤུས་བརྒྱན་ཁ་དོག་བསྒྱུར། །མཚེ་ཡི་རུས་པ་ཡུངས་མོའི་རྐང། །གླ་སྒང་ནང་ཁྲོལ་ལྡན་པར་བྱ། །དབང་བོ་ཚང་ཞིང་ཉམས་དོད་པ། །བཟོས་ལ་ར་བའི་ནང་དགང་བྱ། །ཞེས་ཟན་གླུད་བཅོས་ཐབས་བསྟན་པ་དང་།
ཕྱུགས་གླུད་འབུལ་ཚུལ་ནི། ཁམ་སའི་རྟ་ནི་བང་རེ་མགྱོགས། །ཁམ་སའི་འབྲུ་ནི་ཞོ་རེ་ཆེ། །ཁམ་སའི་ལུག་ནི་བལ་རེ་ཆེ། །ཁམ་སའི་མཛོ་ནི་ཐེག་རེ་ཆེ། །ཁམ་སའི་གླང་ནི་རྨོ་རེ་བཟང་། །ཁམ་སའི་ར་ནི་འོ་རེ་ཆེ། །ཁམ་སའི་མཁར་ནི་གནས་རེ་བཟང་། །ཕྱི་ནས་བལྟས་ན་ཁམ་ལགས་ཀྱང་། །ནང་ནི་རིན་ཆེན་སྣ་དགུ་ཉིད། །རང་རང་མཚན་པ་སྤུ་ཡི་གླུད། །ཤ་ལྷུ་བཅུ་གཉིས་ལུས་ཀྱི་གླུད། །མཚེ་མ་ཉག་གཅིག་རུས་ཀྱི་གླུད། །ཡུངས་མོ་རྐང་བཟང་དོན་སྙིང་གླུད། །མོན་ལུག་གླ་སྒང་ནང་ཁྲོལ་གླུད། །འདི་འདྲའི་ཕྱུགས་གླུད་ཡ་མཚན་ཅན། །ལྷ་བདུད་ཆེན་པོའི་ཕྱག་ཏུ་འབུལ། །ཞེས་ཟེར་ལ།
གླུད་ཀྱི་ལམ་བསྟན་པ་ཡང་། མདོས་ཆོག་རྣམས་སུ། ད་ནི་གླུད་ཀྱི་ལམ་བསྟན་ནོ། །རི་གསུམ་རྩེ་དང་ལུང་གསུམ་མདོ། །རྒྱ་གྲམ་ལམ་དང་འབབ་ཆུའི་གཞུང་། །ཉི་ཟླ་གྲིབ་སོ་གླུད་ཀྱི་ལམ། །འདྲེ་ལྔ་བདུད་གཅོད་གླུད་ཀྱི་ལམ། །ལམ་དེར་ཞུགས་ལ་ཕྱོགས་དེར་སོང་། །ལན་ཆགས་བུ་ལོན་ཁྱེར་གྱུར་ཅིག། ཅེས་གསུངས་ཡོད་དོ། །ཞེས་པ་སོགས་ལ་དབྱེ་ཞིབ་གནང་ན་གླུད་ཅེས་པ་མདོས་ཆོག་ལས་ཆེད་དམིགས་སྲོག་ཚབ་གཏོང་བ་གསལ་ལོ། །
ཕན་ནུས་ཡང་། ལྷ་སྲིན་སྡེ་བརྒྱད་ཐམས་ཅད་ལ། །ངར་གླུད་བརྒྱ་ཡི་གླུད་འབུལ་ལོ། །སྲིད་པའི་ལྷ་འདྲེ་ཀུན་མཉེས་ནས། །ནད་དང་གནོད་པ་ཀུན་ཞི་ནས། །ལྷ་འདྲེ་ཞལ་ཁ་བསྒྱུར་དུ་གསོལ། །ཞེས་སོ། །དེ་ལ་རྒྱལ་གླུད་དང་བླ་གླུད། ཐ་ན་རྟ་གླུད་དང་ཕྱུགས་གླུད་ཚུན་ཆད་ཡོད་དོ། །
གཏོ།
༡ གཏོ་ཞེས་པའི་ཐ་སྙད་དང་བྱུང་ཚུལ། གཏོ་ནི། འཇུ་མི་ཕམ་གྱི་གཏོ་ཆོག་བཀྲ་ཤིས་འདོད་འཇོ་ལས། གཏོ་ཞེས་པ་ཉེས་པ་ལེགས་པར་འཆོས་པའི་ཐབས་རྣམས་ཀྱི་མིང་དུ་གསུངས་པ་བམ་བཤད་དུ་སོང་ལ། ཡིན་རྒྱུ་ནི། བོན་སྒོ་བཞིའི་ནང་ཚན་གཏོ་བཅོས་ཞེས་པ་དེ་ཡིན། དེ་ཡང་བོན་གཞུང་ལྟར་ན། གཏོ་ཞེས་པའི་ཐ་སྙད་དེའི་མ་ཁུངས་ནི་གཏོད་ཅེས་པའི་སེམས་ཅན་ཞིག་གི་སྒྲ་ཟུར་ཆགས་ནས་གཏོ་བཏགས་པར་གྲུབ་ལ། སེམས་ཅན་དེ་ནི་གཤིས་ཀ་མི་བརྟན་པར་དགའ་སྡུག་འགྱུར་སླ་བ། འཁོན་འཛིན་ཤིན་ཏུ་ཆེ་བ་ཞིག་ལ་ངོས་བཟུང་ཡོད་ལ། སུ་ཞིག་གིས་གཏོད་རིགས་ལ་ཕོག་ཐུག་བཟོས་ཚེ། བྱད་མ་འམ་དགྲ་རུ་བཟུང་ནས་བྱུར་གཏོང་བ་ཡིན། རང་ཅག་གི་ཆོ་ག་རྣམས་སུགཏད་འོག་ཏུ་བཅུགཟེར་བ་ཡང་། གཏད་རྫས་རྣམས་ཚགས་སུ་ཆུད་པར་བྱས་ནས། ཀླུ་དང་ས་བདག་གནས་སའི་གཉན་སར་སྦས་ཏེ། སེམས་ཅན་གཏད་རིགས་དེ་གཏོད་པ་ཡིན་ན། མི་སྒེར་དང་ཡུལ་སྡེ་དེ་ལ་གོད་ཆག་དང་བཀྲ་མི་ཤིས་པའི་མཚན་མ་སྣ་ཚོགས་འབྱུང་སྟབས། གཏད་རྫས་ཕྱིར་འདོན་དང་། གཏད་རུལ་གྱི་ཆོ་ག་ལ་བརྟེན་ནས་གཏད་ཁ་ལས་དགྲོལ་དགོས་པ་ཡིན་ནོ། །
དེ་བས། སེམས་ཅན་དེའི་གནོད་པ་འགོག་པའི་ཐབས་ལ་མཁས་པ་ལ་གཏོ་བའམ་གཏོ་བུ་བྱ་བ་ཟེར། ཕྱིས་སུ་སྟོན་པ་གཤེན་རབ་གྱིས་གཏོ་བཅོས་ཀྱི་ལུང་དང་ཆོ་ག་རྣམས་སྲས་ཆེ་བ་འབུམ་སངས་ལ་གནང་སྟེ་སྲས་འདི་གཏོ་བཅོས་ལ་མཁས་པས། གཏོ་བུ་འབུམ་སངས་ཟེར་ལ། དེས་གཏོ་བཅོས་ཀྱི་ཆོ་ག་ལ་བརྟེན་ནས་སེམས་ཅན་མང་བོ་སྡུག་བསྔལ་ལས་གྲོལ། ཡང་། མུ་ཁྲི་བཙན་པོས་སྤྱི་སྤུངས་བོན་གྱི་ཆོས་རྣམས་བསེ་སྒྲོམ་བུར་སྦས་ནས། མི་རབས་གསུམ་དུ་མ་སྤེལ་བར་རྒྱལ་བོ་ལ་དམུ་བདུད་བཙན་གསུམ་གྱིས་དལ་ཡམས་བཏང་སྟེ་སྐུ་མ་བདེ་བས། སྐུ་གཤེན་མཚེ་གཉིས་སོགས་ཀྱིས་གཏོ་བཏང་བས་རྗེའི་མངའ་ཐང་དགུང་དང་མཉམ་པར་བླ་ཆེན་དྲན་པ་ནམ་མཁས་བསྒྲགས་པ་རིན་ཆེན་གླིང་གྲགས་ལས་བཤད་ཡོད། ཡང་། ཞང་ཞུང་མལ་གྲོས་བྱ་བར་དེད་དཔོན་ཟླ་བ་བཟང་བོས་ས་རྐོ་རྡོ་སློག་དང་། གཏེར་རྔོག་ནགས་སྲེག་བྱས་པས། ཡུལ་མི་ཐམས་ཅད་ལ་ནད་ཡམས་བྱུང་། དེད་དཔོན་གྱིས་ཤེལ་དཀར་གྱི་ཟོ་བ་ཞོས་བཀང་སྟེ་སྟོན་པ་གཤེན་རབ་ལ་ཕུལ་ནས་བཅོས་ཐབས་ཞུས་པས། སྟོན་པའི་ཞལ་ནས། རྐྱེན་ངན་ཐམས་ཅད་ས་བདག་གཏོད་ཀྱི་ཆོ་འཕྲུལ་ཡིན་གསུངས་ཏེ། ནད་ཡམས་ཞི་བའི་གཟུངས་གནང་བ་ས་བདག་སྤང་སྐོང་ལས་གསུངས་སོ། །དེ་བས། གདོད་མའི་ཆོས་ལུགས་ཀྱི་བག་ཆགས་དབང་གིས་གཏོད་འདི་རྡོ་བྲག་རི་སོགས་ལ་གནས་པར་ཡང་འདོད་དེ། གཏོ་ཆོག་རྣམས་སུ། རྡོ་ལ་གནས་པའི་གཏོད་རིགས་རྣམས། །གཏོད་དང་འགྲས་པ་བཅོས་སླད་དུ། །མཆོད་པའི་གནས་འདིར་གཤེགས་སུ་གསོལ། །བྱམས་པའི་སེམས་ཀྱིས་གཤེགས་སུ་གསོལ། །གཏོད་ཀྱི་འཁྲུགས་པ་སེལ་བར་མཛོད། །གསུངས་སོ། །
ཡང་། ཀརྨ་ཆགས་མེད་ཀྱིས་གཏོ་འབོད་གསང་བ་ཀུན་འདུས་ལས། གཏོ་འདི་དང་བོ་སུས་མཛད་ན། །སྔོན་གྱི་བསྐལ་བ་དང་བོ་ལ། །འོག་མིན་ཆོས་ཀྱི་ཕོ་བྲང་ནས། །སྔོན་གྱི་བསྐལ་བ་དང་བོ་ལ། །འཕགས་པ་འཇམ་དཔལ་གཞོན་ནུས་མཛད། །བར་གྱི་བསྐལ་བ་དབུས་མ་ལ། །དགའ་ལྡན་ལྷ་ཡི་ཕོ་བྲང་ནས། །རྣམ་པར་རྒྱལ་བའི་ཁང་བཟང་དུ། །ལྷ་ཡི་རྒྱལ་བོ་ཚངས་པས་མཛད། །དེ་ནས་བསྐལ་བ་ཐ་མ་ལ། །རི་བོ་མཆོག་རབ་སྟེང་ཤོད་ནས། །ཀླུ་ཤིང་ཏ་ལའི་ལོ་མ་ལ། །ལྷ་མོ་རྣམ་རྒྱལ་མ་ཡིས་མཛད། །དེ་ནས་གཏོ་འདི་སུས་མཛད་ན། །རི་བོ་མཆོག་རབ་རྐེད་པ་ནས། །རྒྱལ་ཆེན་རིགས་བཞི་ལྷ་ཡིས་མཛད། །དེ་ནས་གཏོ་འདི་སུས་མཛད་ན། །རི་བོ་མཆོག་རབ་རྩ་བ་རུ། །ཀོང་ཙེ་འཕྲུལ་གྱི་རྒྱལ་བོས་མཛད། །དེ་ནས་གཏོ་འདི་སུས་མཛད་ན། །རྒྱ་མངོན་པར་ཤེས་པ་མི་བཞིས་མཛད། །ཅེས་དང་། ཡང་དེ་ཉིད་ཀྱིས་མི་ཁའི་གཏོ་ལས་རྒྱལ་བུ་དོན་གྲུབ་ལ་ལྷས་སྦྱིན་གྱིས་མི་ཁ་བྱུང་བས་འཇམ་དཔལ་གྱིས་ཡས་བསགས་ཏེ། གཏོ་བཅོས་བྱས་པས་མི་ཁ་ལས་ཐར་བ་སོགས་བཤད་པ་ནི་ནང་བསྟན་གྱི་ཞེན་ཁོག་ལས་གསུངས་པ་མ་གཏོགས། ད་ལྟའི་གཏོ་ཆོག་དང་བཅས་ཐབས་འདི་ལྟ་བུའི་མདོ་རྒྱུད་ཀྱི་ཁུངས་མ་མཐོང་ངོ་། །
༢ གཏོའི་རྣམ་གྲངས། འཇུ་མི་ཕམ་གྱི་གཏོ་ཆོག་བཀྲ་ཤིས་འདོད་འཇོ་ལས། གཏོ་དེ་ལ་དཀར་ནག་ཁྲ་གསུམ་དང་། གཏོ་ཐབས་སུམ་བརྒྱ་དྲུག་ཅུ་སོགས་རྣམ་གྲངས་མཐའ་ཡས་པ་ཡོད་ཅིང་། དོན་བསྡུས་ན། ཕན་བྱེད་ཀྱི་གཏོ་དང་གནོད་བྱེད་ཀྱི་གཏོ་གཉིས་སུ་འདུ་བར་བཤད། གཏོ་ཆོག་དེ་ལས་ལྷ་ཆེན་ཚངས་པ་སོགས་འཁོར་མང་བོས་འཕགས་པ་འཇམ་དཔལ་ལ་ཞུས་པའི་གཏོ་སྒྲོམ་འབུམ་ཏིག་ལས། ཕན་བྱེད་གཏོ་སྨན་གྱི་ནགས་ཚལ་ལྟ་བུའི་སྐོར་དང་། གནོད་བྱེད་ཀྱི་གཏོ་དུག་གི་སྡོང་བོའི་ལྟ་བུའི་སྐོར་ཚོ་གཉིས་བསྟན་པར་གསུངས་ཡོད་ལ། དེ་ལྟར་ན། བོན་ཆོས་ལ་རག་མ་ལས་བར་ནང་བསྟན་དུ་རང་རྐྱ་ཕེར་བའི་གཏོ་ཆོག་ཅིག་ཡོད་དམ། གང་ལྟར་མི་ཕམ་གྱིས། སྔ་མའི་སྐོར་ཚོ་དེ་ཁོལ་དུ་ཕྱུང་ནས་རྣམ་གྲངས་འདི་ལྟར་དགར་ཡོད་དེ། བསྒྱུར་ཐབས་རྣམ་པ་ལྔའི་གཏོ་ནི། རྒྱལ་མོ་ཁྲོམ་བསྒྱུར། གླང་ཆེན་སྣ་བསྒྱུར། གྲི་ཁ་མཚོན་བསྒྱུར། འབྱུང་བའི་དལ་བསྒྱུར། སྲིད་པ་ལྟེ་བསྒྱུར་ལྔ་སོ་སོའི་ནང་གསེས་དང་བཅས་པ་དང་། བསྒྲལ་ཐབས་རྣམ་པ་གསུམ་གྱི་གཏོ་ནི། ཤི་འདྲེ་ལྷས་སྒྲོལ། གཤིན་རྗེ་གྲུ་སྒྲོལ། ས་བདག་འཕྲང་སྒྲོལ་གསུམ་དང་། ཁ་ཆིངས་རྣམ་པ་ལྔའི་གཏོ་ནི། ཕུང་སྲི་ཁ་ཆིངས། ཆུང་སྲི་ཁ་ཆིངས། དམ་སྲི་ཁ་ཆིངས། རྒྱལ་འགོང་ཁ་ཆིངས། ས་བདག་ཁ་ཆིངས་སོ། །གདབ་ཐབས་རྣམ་པ་ལྔའི་གཏོ་ནི། བླ་ཕུར་དང་། སྲོག་ཕུར། སྲིད་ཕུར། ཚེ་ཕུར། དཔལ་ཕུར་གདབ་པ་ལྔ་དང་། དེའི་ཡན་ལག་གེགས་ཕུར་གདབ་པ་དང་བཅས་པའོ། །བཅད་ཐབས་གསུམ་གྱི་གཏོ་ནི། སྐྱེ་འཕྲོ་དང་། ཤི་རྒབ་དང། གོད་ཁ་གཅོད་པའོ། །དབྱེ་ཐབས་གསུམ་གྱི་གཏོ་ནི། ཕ་སྤུན་དབྱེ་བ། སྤུན་དང་ཕ་སྤད་དབྱེ་བ་དང་། བཟའ་མི་དབྱེ་བ་གསུམ། འདུན་གྲོས་ངན་པ་དབྱེ་བ་དང་བཅས་པའོ། །བསྐྱེད་ཐབས་རྣམ་པ་བཞི་ནི། སྲོག་ལུས་དབང་ཐང་བསྐྱེད་པའོ། །བཟློག་ཐབས་གསུམ་ནི། འབྱུང་བ་གཡུལ་བཟློག བྱིས་པ་ཀླུང་ལོག་བཟློག་པ། ཕྱོགས་ངན་བཟློག་པ་གསུམ་མོ། །ཡང་བཟློག་ཐབས་གསུམ་མམ་དྲིལ་ཐབས་རྣམ་པ་གསུམ་ནི། བྱད་ཁ་ཕུར་དྲིལ། མི་ཁ་རྡོག་དྲིལ། ཐུབ་ཆོད་ཀུན་དྲིལ་གསུམ། གེགས་བསྒྱུར་རྣམ་པ་བཞི་ནི། སྲོག་ལུས་དབང་རླུང་ལ་དགྲ་དར་བའི་གེགས་བཟློག་པའི་ཐབས་བཞིའོ། །ཆིངས་ཐབས་གསུམ་ནི། མི་རྒོད་ཇག་ཆིངས། རྟ་ཆིངས། ཆིངས་གསུམ་གནད་ཀྱི་གདམས་པ་གསུམ་མོ། །ཉེས་པ་གསུམ་བཅོས་པའི་གཏོ་ནི། བག་མ་བླངས་ཉེས་པ། ཁང་བ་བརྩིགས་ཉེས་པ། དུར་གདབ་ཉེས་པ་དང་གསུམ་མོ། །མི་རིགས་བདུན་གྱི་གཏོ་ནི། རྒྱལ་བོ། བན་ཏེ། བོན་པོ། ཞང་བློན། དམངས། བུད་མེད། བྱིས་པ་བདུན་གྱི་གཏོའོ། །གཞུག་ཐབས་གཉིས་ནི། ས་གཏེར་དང་བར་གཏེར་རོ། །ཞེས་སོགས་རྣམ་གྲངས་མང་དུ་གསུངས་ལ། ཞིབ་ཏུ་ཤེས་འདོད་པ་དག་གིས་གཏོ་ཆོག་བཀྲ་ཤིས་འདོད་འཇོ་ན་གསལ་ལོ། །
གཞན་ཡང་། གཏོའི་རྣམ་གྲངས་ལ་ཀརྨ་ཆགས་མེད་ཀྱི་འདི་ལྟར་གསུངས་ཏེ། གཏོ་བསྒྱུར་སུམ་བརྒྱ་དྲུག་ཅུ་ལ། །སུམ་བརྒྱ་སྣོད་ལ་ཞུག་ལ་བཞུས། །སླད་ནས་དྲུག་ཅུ་མཆིས་པ་ལ། །སྤྱི་བསར་སྒོ་བརྒྱག་རྒྱ་གར་གཏོ། །སུམ་བརྒྱ་ཐ་རམ་དྲུག་ཅུ་སྟག་གཟིག་གཏོ། །འགྲེང་བཙན་དགུ་བདུན་སོག་པོའི་གཏོ། །རྨང་བྱེད་ཁ་སྦྱོར་ཧོར་གྱི་གཏོ། །དམུ་བདུད་མདའ་འཕེན་གེ་སར་གཏོ། །ཟོར་ཤིང་ཚེ་ཕུར་མེ་ཉག་གཏོ། །དེ་ལ་མ་གཏོགས་གཏོ་རྣམས་ནི། །ར་ཐོམ་ཐུག་གཏོང་འོད་འབར་བོད་ཀྱི་གཏོ། །ཟོར་མདའ་ནག་པོ་གཏོང་བ་བོད་ཀྱི་གཏོ། །མཉམ་གཉིས་བརྗེ་བ་བོད་ཀྱི་གཏོ། །གླུད་ཟན་བསྔོ་བ་བོད་ཀྱི་གཏོ། །བྱེ་བྲལ་ལ་བརྒལ་བོད་ཀྱི་གཏོ། །གཉན་བཅོས་བྱ་གཏོང་བོད་ཀྱི་གཏོ། །ཤིང་བཙན་གཏོར་སྐུ་བཙུགས་པ་བོད་ཀྱི་གཏོ། །ས་བཅོས་རྡོ་བརྩིགས་བོད་ཀྱི་གཏོ། །ཤི་འགབ་རྡོ་བསམ་བོད་ཀྱི་གཏོ། །དེ་ལ་མ་གཏོགས་གཏོ་རྣམས་ནི། །ཀོང་ཙེ་ཁ་རྒྱང་གཏོ་འདི་ལ། །འགྲིང་བཙན་ཡེ་ཕུར་བསྒྱུར་བ་ཀོང་ཙེའི་གཏོ། །ལོ་ཤིང་ཚེ་ཕུར་འཇུག་པ་ཀོང་ཙེའི་གཏོ། །རྒྱ་ཆད་སྲུང་ལམ་ཀོང་ཙེའི་གཏོ། །ཟོར་ཤིང་ཐར་ཆ་ཀོང་ཙེའི་གཏོ། །གཏོ་བསྒྱུར་སྣ་ཚོགས་གཏོང་བ་ཀོང་ཙེའི་གཏོ། །ཞེས་ཀྱང་གསུངས་སོ། །
གཏོ་གཞུང་ལ་མཚོན་ནའང་། བོན་གཞུང་དུ་གཏོ་འབུམ་ནག་པོ་དང་། གཏོ་ཐབས་སུམ་བརྒྱ་དྲུག་ཅུ་སོགས་ཡོད། གཞན་ཡང་། ར་ག་ཨ་སེ་མཛད་པའི་གཏོ་འབུམ་སོགས་ཀྱང་ཡོད། བྱེ་བྲག་ཏུ། སྤར་ཁ་བྲལ་བའི་གཏོ་བཅོས། རོ་བྱུང་ནག་པོའི་གཏོ། དུ་ཧ་ར་ལུགས་ཀྱི་གྱེར་གཏོ། དུར་མིག་ནས་བཏོན་པའི་གཏོ། གསོན་གཤིན་ལག་སྦྲེལ་བྲལ་བའི་གཏོ་བཅོས། མི་ཁའི་གཏོ། ཆུང་གླུད་བཅུ་གསུམ་གྱི་གཏོ་བཅོས། གཏོ་ནག་མགོ་གསུམ་གྱི་ཆོ་ག མཐུན་གསུམ་གྱི་གཏོ་བཅོས། བསྐྱེད་པ་བཞི་ལྡན་གྱི་གཏོ་ཆོག དབང་ཐང་བསྐྱེད་པའི་གཏོ། རླུང་རྟ་བསྐྱེད་གཏོ། དྲུག་ཅུའི་ལོ་བསྒྱུར་གྱི་གཏོ། ལོ་ཟླ་ཟ་མ་དུས་ཚོད་ངན་པ་སོགས་བསྒྱུར་བའི་གཏོ་སོགས་ཡོད་དོ། །
༣ གཏོ་གཏོང་ཡུལ་ནི། འགྲོ་བ་དམའ་རིམ་དུ་གཏོགས་པས། ཀརྨ་ཆགས་མེད་ཀྱིས་གཏོ་དབྱིབས་ཀྱང་ཀོང་ཙེའི་སྒོག་གཏོ་འདི་ལ་འབག་དང་འདྲ་བའི་ཁ་མིག་བཏོད་དེ་གླུད་ཀྱི་ནང་དུ་བཞག་ནས་ལམ་མདོར་འཕེན་པ་ནི་སྙིགས་མའི་རང་མཚང་དང་ན་ཚ་སོགས་རྒོད་པའི་རྐྱེན་དུ་འགྱུར་བར་བཤད་དོ། །
༤ གཏོའི་རྣམ་པ་དང་ཡས་སྟགས། གཏོའི་རྣམ་པ་དང་ཡས་བསགས་ཚུལ་འགའ་མདོར་བསྡུས་ཤིག་བརྗོད་ན། འདྲེ་དགུ་སྐྱས་འདེབས་ལས། མི་ལ་ལ། དང་བོ་ཀེང་རུས་ཀྱི་མི། ཁྱི་གུ། ཕེ་གུ རེའུ་ཚེ། ལུ་གུ བྱིའུ་ཆུང་། སྐྱ་ཀ སྦལ་བ། རྨོང་ཙི། སྲེ་མོང་དང་དགུའི་གཟུགས་བྱ། རྫོང་ལ་བྱི་ལ། སྲེ་མོང་། ཁྱི། དབྲེ་སྐྱེ་མ་སྨིན་ཟས་གླུད་རྫོང་། བསེ་རག་བཀར་བ་ནི། མི་ལུས་ལག་ན་ཁྱི་སྤྱང་བཟུང་བ་གཅིག ཁྱིམ་བྱ་འཇོལ་མོ་ལ་བསྐྱོན། སྐྱ་ཀ་རོལ་དུ་ཁྲིད་པར་བྱ། ཡས་ནི་འབུ་སྐོགས། བྱ་ཐོད་རུས་བསྐྲེན་རྣམས་བསགས། འགོང་བོའི་ཡས་ནི། མི་ལུས་རི་བོང་ལ་ཞོན་པ་གཅིག་བྱ། གླ་བ་རོལ་ཏུ་ཁྲིད་པ་གཅིག་བྱ། ཡས་ནི་གླ་བའི་རིལ་མ། རྒྱལ་རོང་། ཟོམ་སྟོང་། འགོང་ཡས་བསགས། གྲི་བོ་བཀར་བ་ནི། གྲི་བོ་བཀར་བ་ཤ་ཕོ་རུ་བཅུ་ལ་ཞོན་པ། ཕག་ནག་རོལ་ཏུ་ཁྲིད་པ། གྲི་བྱ་ཕོ་རོག་ཀླད་ན་ལྡིང་བ། གྲི་ཁྱི་སྤྱང་ཀི་རོལ་དུ་ཁྲིད་པ། ཡས་ནི་ཕག ཕོ་རོག ཤ་རུ། མདའ་ཆག གཞུ་ཆག ཕུབ་རྣམས་རྫོང་བར་བྱ། གོད་འདྲེ་བཀར་ན། གཅན་གཟན་འཕར་སྤྱང་ཝའི་མགོ་ཅན། ཕག་ནག་ལ་ཞོན་པ། ཕོ་ཁའི་སུ་ལུ་ཞྭ། གོད་ཀོ་ཡི་གསོ། རྒྱུ་མའི་སྐེ་རགས། གཡས་བཤའ་གྲི གཡོན་གོད་སྒྱེ་བསྣམས་པ་གཅིག་བྱ། ཡས་ནི་རྡང་དུམ། ཁེབས་ཐག སྣ་གཅུ། ཤ་ཁྲག་རུས་གསུམ། བཙོག་ཆངས་རྫོང་། ནད་འདྲེ་བཀར་བ་ལ། མི་གཟུགས་འུག་པ་ཞོན་པ། གཟེ་མོ་རྐང་རིང་རོལ་དུ་ཁྲིད་པ་བྱ། ཡས་ལ་ངར་གླུད། ཞྭ་གོས་ལྷམ་གསུམ། ཤ་ཁྲག་རུས་གསུམ་རྫོང་། མུག་འདྲེ་བཀར་བ་ནི། མི་ལུས་མཛོ་དྲེལ་གླ་བའི་མགོ་ཅན། སྲིན་བྱ་ཁུ་བྱུག་ལ་བསྐྱོན། ར་ཡུ་ལུག་ཡུ་རོལ་དུ་ཁྲིད་པ་གཅིག་བྱ། ཡས་ནི། སྤྲེལ། གྲུམ་པ། བྱ་མ་བྱིའུ། ངར་གླུད་རྣམས་རྫོང་། ཐེའུ་རང་བཀར་བ་ནི། སྐྱེས་བུ་མིག་གཅིག ལག་པ་གཅིག རལ་བ་གཅིག ནུ་མ་གཅིག ར་རྒན་རུ་གཅིག་ལ་ཞོན་པ། ཡས་ནི་རའི་ཤ་ཁྲག་རུས་གསུམ། ཆོ་ལོ་དུང་ཤོ དར་ཟབ་སྣ་ཚོགས་རྫོང་། མི་ཁ་བཀར་བ་ནི། མི་ཁ་བ་རུ་བྲ་བ་ལ་ཞོན་པ། སྲེ་མོང་རོལ་དུ་ཁྲིད་པ། ལྕམ་པ་གཡེར་མ་ཚྭ་སྒོག་རམ་རུག་ཐུམ་པོ་ཁུར་དུ་བཅུག ཤང་ཤང་བྲ་མཆུ། མི་ཁའི་ཡས་དང་བྲ་བ་རྫོང་བའོ། །
དེ་བས། འགྲོ་བ་དམའ་རིམ་དེ་དག་གི་གཏོ་རྫས་ལ་སླ་ངའི་ནག་དྲེག་དང་། ཐལ་སྐྱ། རུས་གོག སྣོད་སྟོང་དབྲད་པའི་ཟས། ཟས་ལྷག་འཐུང་ལྷག ཤ་ཆང་སྒོག་ཙོང། ལ་ཕུག ཚ་སྒོག་གཡེར་གསུམ། ནས་སྙིགས་དང་སྦང་རམ། ཞོ་ལད་ཆང་ལད། ཤ་རོ་ཚུན་ཆད་ཀྱང་དགོས་པ་ལས་གཞན། ཤེར་སྙིང་བདུད་བཟློག་ལས་རྒྱ་ནག་གི་ཕ་ཇོ་ཞིག་ལ་རྒྱལ་བོས་གནོད་པ་ལ། རྩིས་མཁན་གྱིས་རྩིས་བྱས་པས། བུ་ཆུང་གི་རོ་ལ་གཏོ་བྱས་ཏེ་ཇ་སིག་གཅིག་གི་ནང་དུ་བཅུག་ནས་དབུས་སུ་བསྐུར་ཚུལ་ཡང་བཤད་ཡོད་དོ། །
༥ གདོན་བགེགས་འདུལ་ཐབས། དེ་ཡང་གདོན་བགེགས་འབྱུང་བོའི་ཚོགས་ལ་གདོས་གླུད་གཏོ་གསུམ་རྫོང་འདེབས་དང་བཅས་ཏེ་བསྒྲུབ་བྱ་ལ་ཕན་གང་ཐོགས་བྱེད་པ་ནི། ཐོག་མར་ཞི་བའི་སྒོ་ནས་ལས་བྱེད་པ་ཡིན་ཏེ། ལག་ན་རྡོ་རྗེའི་དབང་བསྐུར་བའི་རྒྱུད་ལས། ཉེས་པ་ཅུང་ཟད་ཙམ་གྱི་ཕྱིར། །བགེགས་རྣམས་ལ་ཡང་གནོད་མི་བྱ། །ཞེས་གསུངས་པའི་དགོངས་པ་དང་བསྟུན་ལ། གལ་ཏེ་ཞི་བའི་མི་ཐུལ་ན་སྙིང་རྗེ་དང་ཐབས་ཀྱི་རྒྱུ་ལས་ངོ་བོ་ཡེ་ཤེས་ཁྲོས་པའི་དྲག་པོ་མངོན་སྤྱོད་ཀྱིས་འདུལ་བར་བྱ་སྟེ། རྒྱུད་དེ་ཉིད་ལས། བདེན་པའི་བཀའ་ལ་མི་ཉན་ཞིང་། །རྒྱུ་འབྲས་ཚུལ་ལ་མི་སེམས་པའི། །མི་སྲུན་བགེགས་ཀྱི་ད་དུང་ཡང་། །བདག་ཅག་གཏོང་བར་མི་བྱེད་ན། །ཕྱོགས་བཅུའི་སངས་རྒྱས་བྱང་སེམས་དང་། །འཇིག་རྟེན་སྐྱོང་བ་ཐུ་བོ་ཆེ། །མངོན་ཤེས་དྲང་མཁན་གྱུར་བ་རྣམས། །བདག་གིས་མ་ནོངས་དཔང་བྱས་ཏེ། །བདག་གིས་བགེགས་འདིར་ཆད་པའི་ལས། །སྣ་ཚོགས་རྣམ་པར་སྦྱར་བར་བྱ། །སྲོག་ལ་འཁོར་ལོ་བསྐོར་བ་དང་། །སྔགས་ཀྱི་མེ་ཡིས་བསྲེག་པ་དང་། །དུག་གསུམ་ཁུང་བུར་མནན་པ་སོགས། །སྡུག་བསྔལ་སྣ་ཚོགས་མྱོང་བར་བྱ། །ཞེས་གསུངས་སོ། །
༦ གཏོ་བཅོས་ཀྱི་ཕན་ནུས་ནི། ཕྭ་གཤེན་ཐེག་པའི་མདོ་ལས། ན་བར་གྱུར་བ་གཏོ་ཡིས་གསོ། །ཞེས་དང་། བར་དུ་གསོ་རྐྱེན་གཏོ་ཡིས་བྱེད། །ཅེས་པ་ལྟར། ནམ་མཁའ་ནོར་བུས། བོན་གནའ་ལུགས་སུ་གྲགས་པའི་གཏོ་ནི་གསོན་པོ་བདེ་བ་དང་ནད་པ་གསོ་བ། འགལ་རྐྱེན་བཟློག་པ། འཆི་བ་བསླུ་བ་ལ་སོགས་པའི་དགོས་དོན་དུ་མ་ལ་བརྟེན་པའི་དཔྱད་ཀྱི་བྱེ་བྲག་ཅིག་ཡིན་གསུངས་པ་དང་མཐུན་ནོ། །
གཞན་ཡང་། གཏོ་བ་རྣམས་ཀྱིས་གཙུག་ལག་གཏོ་ཡིས་གསོ་མི་ཐུབ་པ་གཅིག་ཀྱང་མེད་པར་སེམས་པ་སྟེ། ཀརྨ་ཆགས་མེད་ཀྱི་གཏོ་གཞུང་ལས། ཀོང་ཙེའི་གཏོ་ཡིས་མི་འགྱུར་གཅིག་ཀྱང་མེད། །འབྱུང་བ་ལྔ་ལ་མི་བརྟེན་གང་ཡང་མེད། །ལྷ་འདྲེ་དམ་ལ་མི་གནས་གང་ཡང་མེད། །ཟོར་མོ་མདའ་ཡིས་མི་ཕུག་གང་ཡང་མེད། །རྣོ་བའི་མཚོན་ཆས་མི་འཇིགས་གང་ཡང་མེད། །སྲིད་པའི་ཆུ་ལ་མི་འཐུང་གང་ཡང་མེད། །གཙུག་ལག་གཏོ་ཡིས་མི་འགྱུར་གང་ཡང་མེད། །ཅེས་སོ། །ཁྱད་པར་དུ་གཏོ་རྩིས་གཉིས་གཅིག་ལ་གཅིག་བརྟེན་གྱི་ཚུལ་དུ་གནས་པ་སྟེ། ཀ་རྨ་ཆགས་མེད་ཀྱིས། ལར་ནི་གཏོ་ཕུག་རྩིས་ཡིན་རྩིས་ཕུག་གཏོ། །རྩིས་མ་བྱས་པར་གཏོ་ནི་བཅའ་དགོས་མེད། །གཏོ་དེ་མ་དར་རྩིས་དེ་དགོས་པ་མེད། །ཐུབ་པས་གསུངས་པའི་ཆོས་ཚོ་རྩིས་ལ་འོང་། །ཀོང་ཙེས་མཛད་པའི་གཏོ་ཚོ་རྩིས་ལ་འོང་། །རྩིས་འདི་དགེ་སྐུལ་ཆེན་པོ་འོང་བ་ཡིན། །ཞེས་གསུངས་སོ། །