བཅོ་བརྒྱད་པ། ལྷ་ཀླུ་གདོན་བགེགས་ཀྱི་སྐོར།
དང་བོ། གཙང་རིས་ཀྱི་མགོན་པོ་བདུན་ཅུ་རྩ་ལྔ།
ལྷ།
ཀློང་རྡོལ་བླ་མས། ལྷ་ཐམས་ཅད་གཙང་རིས་ཀྱི་མགོན་པོ་བདུན་ཅུ་རྩ་ལྔའི་ཁོངས་སུ་འདུ་བར་གསུངས་པ་ལྟར། དེ་དག་ནི་རྒྱལ་བོ་ཆེན་པོ་བཞི། ཕྱོགས་སྐྱོང་བ་བཅུ། ལྷ་ཆེན་པོ་བརྒྱད། ཀླུ་ཆེན་པོ་བརྒྱད། གཟའ་ཆེན་པོ་བརྒྱད། རྒྱུ་སྐར་ཉི་ཤུ་རྩ་བརྒྱད། འཇིགས་བྱེད་ཆེན་པོ་དགུ་སྟེ། བདུན་ཅུ་རྩ་ལྔའོ། །
ཆོས་འབྱུང་མཁས་པའི་དགའ་སྟོན་ལས་དཔལ་མགོན་བདུན་ཅུ་རྩ་གཉིས་ཞེས་འབྱུང་བ་བརྟག་དགོས། སྤྱིར་རྒྱལ་བོ་ཆེན་པོ་བཞི་དང་། ཕྱོགས་སྐྱོང་བ་བཅུ་འམ་བཅོ་ལྔ། ལྷ་ཆེན་པོ་བརྒྱད། ཀླུ་ཆེན་པོ་བརྒྱད། གཟའ་ཆེན་པོ་བརྒྱད། རྒྱུ་སྐར་ཉི་ཤུ་རྩ་བརྒྱད། འཇིགས་བྱེད་ཆེན་པོ་དགུ་སྟེ་བརྒྱད་ཅུ་བོ། ཇོ་བོ་རྗེ་ཨ་ཏི་ཤ་སོགས་ཀྱིས་དཀར་བོ་བརྒྱད་ཅུ་ཞེས་འདྲེན་ཡང་། ཀུན་རིག་གི་དཀྱིལ་འཁོར་དང་ཤངས་པ་བཀའ་བརྒྱུད་རྣམས་ཀྱིས་ཕྱོགས་སྐྱོང་བཅོ་ལྔ་ལས་ལྔ་ཕྲི་ནས་གཙང་རིས་ཀྱི་དཔལ་མགོན་བདུན་ཅུ་དོན་ལྔར་བཤད་དོ། །དེ་དག་ལས།
༡ རྒྱལ་བོ་ཆེན་པོ་བཞི་ནི།
༡ ཤར་ཕྱོགས་སྐྱོང་བ་ཡུལ་འཁོར་སྲུང་། ༢ ལྷོ་ཕྱོགས་སྐྱོང་བ་འཕགས་སྐྱེས་བོ། ༣ ནུབ་ཕྱོགས་སྐྱོང་བ་སྤྱན་མི་བཟང་། ༤ བྱང་ཕྱོགས་སྐྱོང་བ་རྣམ་ཐོས་སྲས་སོ། །འདི་དག་ནི་གཙུག་ལག་ཁང་གི་སྒོ་འཕྱོར་གྱི་ལྡེབས་རིས་སོགས་སུ་ས་ཁྱབ་རྡོ་ཁྱབ་ཏུ་སོང་ཡོད་པས། རྣམ་པ་དང་ཕྱག་མཚན་བཞུགས་སྟངས་སོགས་དེར་བལྟ་བར་བྱའོ། །
༢ ཕྱོགས་སྐྱོང་བཅུ་འམ་བཅོ་ལྔ་ནི།
དབང་བོ། གཤིན་རྗེ། ཆུ་ལྷ། གནོད་སྦྱིན། མེ་ལྷ། སྲིན་པོ། རླུང་ལྷ། འབྱུང་བོ། ཚངས་པ། སའི་ལྷ་མོ་བསྟན་མ་བཅས་བཅུ་དང་། དེའི་སྟེང་ཉེ་དབང་། ཚོགས་བདག ཉི་མ། ཟླ་བ། ཐགས་བཟང་རིས་བསྣན་པའི་བཅོ་ལྔར་བཞེད་དོ། །དེ་དག་གི་ཆ་བྱད་ནི། ༡ དབང་བོ་སེར་བོ། གཡས་རྡོ་རྗེ་དང་གཡོན་དཀུར་བརྟེན་པ། མཆེ་བ་དྲུག་ལྡན་གྱི་གླང་ཆེན་ལ་རོལ་སྟབས་ཀྱིས་བཞུགས་པ། ཆུང་མ་ཤ་ཙི་དང་ཨུ་པ་ལི་གཉིས་དང་བཅས་པའི་འཁོར་གྱིས་བསྐོར་བ། བརྒྱ་བྱིན་ལ་སུམ་རྩེན་གྱི་བདག་པོ་དང་། ཤེར་མདོའི་ལྒིང་གཞིའི་དེ་དང་། སངས་རྒྱས་ཀྱི་སྐབས་སྨིན་གྲོལ་དུ་བཀོད་པའི་བརྒྱ་བྱིན་སོགས་ཡོད་ཀྱང་། འདིར་བསྟན་ཚངས་པ་ནི་སུམ་ཅུ་རྩ་གསུམ་དབང་བསྒྱུར་བའི་བརྒྱ་བྱིན་ནོ། །༢ གཤིན་རྗེ་སྔོན་པོ་མ་ཧེ་ལ་ཞོན་པ། གཡས་བེ་ཅོན་དང་གཡོན་དཀུར་བརྟེན་པ། ནག་མོ་དང་འཆི་བདག་མའི་ཆུང་མ་དང་བཅས་པ། ༣ འཆི་བདག་དཀར་དམར་སྦྲུལ་གྱི་གདེངས་ཀ་ཅན། ཆུ་སྲིན་དམར་བོའི་གདན་ལ་བཞུགས་པ། གཡས་ཞགས་པ་དང་། གཡོན་རིན་པོ་ཆེ་འཛིན་པ། ཆུང་མ་དང་བཅས་པའི་འཁོར་གྱིས་བསྐོར་བ། ༤ གནོད་སྦྱིན་རྒྱལ་བོ་སེར་བོ་རྟ་དཀར་ལ་ཞོན་པ། གཡས་རིན་པོ་ཆེའི་སྙེ་མ་དང་། གཡོན་ནེའུ་ལེ་འཛིན་པ་ཡུམ་དང་བཅས་པའོ། །༥ མེ་ལྷ་དམར་བོ་ལོ་བརྒྱ་ལོན་པའི་ན་ཚོད་ཅན། ར་སྐྱེས་དམར་བོ་ལ་ཞོན་པ། གཡས་རིལ་བ་སྤྱི་བླུགས་དང་། གཡོན་དབྱུག་པ་འཛིན་པ། ཡུམ་དང་འཁོར་དུ་མས་བསྐོར་བ། ༦ སྲིན་པོ་དམར་ནག་ཡུམ་དང་བཅས་པ་ཡི་དྭགས་ལ་ཞོན་པ། གཡས་རལ་གྲི་དང་། གཡོན་དཀུར་བརྟེན་པ། ༧ རླུང་ལྷ་སྔོན་པོ་ཡུམ་དང་བཅས་པ་ཤ་བ་ལ་ཞོན་པ། གཡས་བ་དན་དང་གཡོན་རྒྱལ་མཚན་འཛིན་པ། ༨ འབྱུང་བོ་ཐལ་སྐྱ་ཕྱག་བཞི་བ་ཡུམ་དང་བཅས་པ་ཁྱུ་མཆོག་ལ་ཞོན་པ། གཡས་པ་གཉིས་ན་རྩེ་གསུམ་དང་ཨ་སྨྲ། གཡོན་པ་གཉིས་ན་རིལ་བ་སྤྱི་བླུགས་དང་རཀྵའི་ཕྲེང་བ་འཛིན་པ། ༩ སའི་ལྷ་མོ་སེར་མོ་པདྨ་ལ་བཞུགས་པ། ཕྱག་གཉིས་ཀྱིས་པདྨ་བཟུང་ནས་འདུད་ཚུལ་བསྟན་ཏེ་འཁོར་དུ་མས་བསྐོར་བ། ༡༠ ལྷ་མ་ཡིན་དམར་ནག་གོ་ཆ་གྱོན་ཏེ་འབོལ་སྟན་དུ་བཞུགས་པ། ཕྱག་གཡས་སུ་རལ་གྲི་འཛིན་པ། ༡༡ ཀླུ་དཀར་བོ་སྦྲུལ་གྱི་གདེངས་ཀ་ཅན། ལག་གཉིས་གྱིས་རིན་པོ་ཆེའི་སྣོད་ཐོགས་པ། བསྟན་མ་དང་། ལྷ་མ་ཡིན་དམར་ནག ཀླུ་གསུམ་ནི་ཕྱོགས་སྐྱོང་བཅུར་འབྱེད་སྐབས་འོག་ཕྱོགས་སྐྱོང་བའི་སྡེ་ཚན་ཞེས་གཅིག་ཏུ་འདྲེན་ནོ། །
༡༢ ཚངས་པ་སེར་བོ་ཕྱག་བཞི་བ་དུར་བའི་གདན་ལ་བཞུགས་པ། གཡས་གཉིས་ལྒིགས་བམ་དང་ཕྲེང་བ། གཡོན་གཉིས་མཆོག་སྦྱིན་དང་རིལ་བ་སྤྱི་བླུགས་འཛིན་པ། མང་ཐོས་ཀླུ་སྒྲུབ་རྒྱ་མཚོས་ཚངས་པ་ལ། གནས་ཀྱི་སྒོ་ནས་གསུམ་དང་། རིགས་ཀྱི་སྒོ་ནས་གསུམ་སོགས་ཕྱེས་ཡོད་ཀྱང་། འདི་ནི་གཙང་རིས་ཀྱི་ཚངས་པའོ། །༡༣ ཉི་མ་དམར་བོ་ཕྱག་གཡས་རྡོ་རྗེ་དང་གཡོན་པདྨའི་སྟེང་ན་ཉི་མའི་དཀྱིལ་འཁོར་འཛིན་པ། རྟ་བདུན་གྱི་དྲངས་པའི་ཤིང་རྟ་ལ་སྡོད་པའོ། །༡༤ ཟླ་བ་དཀར་བོ་ལག་གཉིས་པདྨ་ལ་ཟླ་བའི་དཀྱིལ་འཁོར་བཟུང་སྟེ་ངང་བ་ལ་ཞོན་པའོ། །ཚངས་པ་དང་། ཉི་མ། ཟླ་བ་གསུམ་ཡང་སྟེང་ཕྱོགས་སྐྱོང་བའི་སྡེ་ཚན་ཞེས་གཅིག་ཏུ་འདྲེན་ནོ། །འདིར་ཕྱོགས་སྐྱོང་དང་ལྷ་ཆེན་འགའ་ཞིག་བཟླས་པ་ལྟར་སྣང་བ་ནི། སྨྲི་ཏིའི་ཀུན་རིག་སྒྲུབ་ཐབས་ལས། དཀྱིལ་འཁོར་སོ་སོར་གནས་པས་མི་འགལ་བར་གསུངས་སོ། །
༣ ལྷ་ཆེན་བརྒྱད།
༡ བརྒྱ་བྱིན་དཀར་སེར་གཡས་རྡོ་རྗེ་དང་གཡོན་རང་འདྲའི་ཆུང་མར་འཁྱུད་པ། ༢ ཚངས་པ་སེར་བོ་གཡས་རིན་པོ་ཆེ་དང་གཡོན་རང་འདྲའི་ཆུང་མར་འཁྱུད་པ། ༣ དབང་ཕྱུག་ནག་པོ་ཞབས་གཉིས་སྐྱིལ་ཀྲུང་གིས་བཞུགས་ཏེ་མདུང་རྩེ་གསུམ་འཛིན་པ། ༤ ཁྱབ་འཇུག་ནག་པོ་གཡས་འཁོར་ལོ་དང་གཡོན་རང་འདྲའི་ཆུང་མར་འཁྱུད་པ། ༥ གདོང་དྲུག་དམར་བོ་བྱིས་པའི་མདོག་ཅན་ཞལ་དྲུག་པ། གཡས་ཤཱཀ་ཏི་འམ་གྲི་གུག་དང་གཡོན་རང་འདྲའི་ཆུང་མར་འཁྱུད་པ། ༦ དབང་ཕྱུག་དམར་བོ་གཡས་མདའ་གཞུ་དང་གཡོན་པས་རང་འདྲའི་ཆུང་མར་འཁྱུད་པ། ༧ ཚོགས་བདག་དཀར་བོ་གླང་གདོང་ཅན། གཡས་དགྲ་སྟ་དང་། གཡོན་རང་འདྲའི་ཆུང་མར་འཁྱུད་པ། ༨ བྷྲིང་གི་རི་ཏི་རུས་པའི་མདོག་ཅན། གཡས་རིན་པོ་ཆེའི་སྒྲོམ་དང་གཡོན་པས་རང་འདྲའི་ཆུང་མར་འཁྱུད་པའོ། །འདི་དག་ལ་གྲངས་འདྲེན་གཞན་ཡང་ཡོད་དོ། །
༤ ཀླུ་ཆེན་བརྒྱད།
༡ ཤར་དུ་ནོར་རྒྱས་དཀར་བོ་ཨུཏྤལ་སྔོན་པོས་མཚན་པ། ༢ ལྷོར་པདྨ་དཀར་བོ་དབུ་ལ་ཐིག་ལེ་གསུམ་གྱིས་མཚན་པ། ༣ ནུབ་ཏུ་སྟོབས་རྒྱུ་སྔོན་པོ་མགྲིན་པར་རི་མོ་གསུམ་གྱིས་མཚན་པ། ༤ བྱང་དུ་འཇོག་པོ་དམར་བོ་དཔལ་བེའུ་ཀྱིས་མཚན་པ། ༥ ཤར་ལྷོར་དུང་སྐྱོང་སེར་བོ་ཐིག་ལེས་མཚན་པ། ༦ ལྷོ་ནུབ་ཏུ་རིགས་ལྡན་དཀར་བོ་ཟླ་ཕྱེད་ཀྱིས་མཚན་པ། ༧ ནུབ་བྱང་དུ་མཐའ་ཡས་སྣ་ཚོགས་མདོག་སྟེ་རྨ་བྱའི་མགྲིན་པ་བཞིན་པདྨས་མཚན་པ། ༨ བྱང་ཤར་དུ་པདྨ་ཆེན་པོ་དཀར་བོ་རྩེ་གསུམ་གྱིས་མཚན་པའོ། །གཞན་དུ་ཀླུ་ཆེན་བརྒྱད་ཀྱི་བཞུགས་གནས་དང་སྐུ་མདོག་ཆ་བྱད་སོགས་གསུངས་ཚུལ་གཞན་ཡང་ཡོད་དོ། །དེ་དག་ནི་སྟོད་མི་ལ་སྨད་སྦྲུལ་མཇུག་ཏུ་ཡོད་པ་སྦྲུལ་མགོའི་གདེངས་ཀ་ཅན། ཚེ་ཚད་བསྐལ་བ་མ་སྟོངས་བར་དུ་གནས་པའང་ཡོད་དོ། །
༥ གཟའ་ཆེན་པོ་བརྒྱད།
༡ ཉི་མ་དམར་བོ་རྟ་བདུན་གྱི་ཤིང་རྟ་ལ་བཞུགས་པ། ལག་གཉིས་ཀྱིས་པདྨ་ལ་ཉི་མའི་དཀྱིལ་འཁོར་གསལ་བ་འཛིན་པ། རྒྱལ་བོའི་བླ་གཟའ་རྒྱལ་རིགས་ལ་གཏོགས་པ། ཐུགས་ཞི་བ་མེ་ཁམས་ལ་གནས་པའོ། །༢ ཟླ་བ་དཀར་བོ་ངང་བ་ལ་བཅིབ་པ། ལག་གཉིས་ཀྱིས་པདྨ་ལ་ཟླ་བའི་དཀྱིལ་འཁོར་ཤར་བ་འཛིན་པ། བུད་མེད་ཀྱི་བླ་གཟའ་རྗེ་རིགས་ལ་གཏོགས་པ། ཐུགས་ཞི་བ་ཆུ་ཁམས་ལ་གནས་པའོ། །༣ མིག་དམར་དམར་བོ་ར་སྐྱེས་ལ་ཞོན་པ་གཡས་ཆུ་གྲི་དང་གཡོན་མི་མགོ་ཟ་བ། དམག་དཔོན་གྱི་བླ་གཟའ་རྒྱལ་རིགས་ལ་གཏོགས་པ། ཐུགས་དྲག་པོ་མེ་ཁམས་ལ་གནས་པའོ། །༤ ལྷག་པ་སེར་བོ་པད་གདན་ལ་བཞུགས་པ། ལག་གཉིས་ཀྱིས་མདའ་གཞུ་འཛིན་པ། རྒྱལ་བུའི་བླ་གཟའ་དམངས་རིགས་ལ་གཏོགས་པ། ཐུགས་ཞི་བ་ཆུ་ཁམས་ལ་གནས་པའོ། །༥ ཕུར་བུ་དཀར་བོ་པད་གདན་ལ་བཞུགས་པ། གཡས་ཕྲེང་བ་དང་གཡོན་རིལ་བ་སྤྱི་བླུགས་འཛིན་པ། བཙུན་པའི་བླ་གཟའ་བྲམ་ཟེའི་རིགས་སུ་གཏོགས་པ། ཐུགས་ཞི་མ་ཁྲོ་རླུང་ཁམས་ལ་གནས་པ། ༦ པ་སངས་དཀར་བོ་བུམ་པ་ལ་བརྟེན་པ། གཡས་ཕྲེང་བ་དང་གཡོན་སྤྱི་བླུགས་འཛིན་པ། བུད་མེད་ཀྱི་བླ་གཟའ་བྲམ་ཟེའི་རིགས་སུ་གཏོགས་པ། ཐུགས་ཁྲོ་བོ་ས་ཁམས་ལ་གནས་པ། ༧ སྤེན་པ་ནག་པོ་རུས་སྦལ་གྱི་གདན་ལ་བཞུགས་པ། ལག་གཡས་པས་དབྱུག་པ་འཛིན་པ། བྱིས་པའི་བླ་གཟའ་གདོལ་རིགས་སུ་གཏོགས་པ། ཐུགས་ཁྲོ་བོ་ས་ཁམས་ལ་གནས་པ། ༨ སྒྲ་གཅན་ནག་པོ་གཡས་ཟླ་བ་དང་གཡོན་ཉི་མ་འཛིན་པའོ། །
༦ རྒྱུ་སྐར་ཉི་ཤུ་རྩ་བརྒྱད་ནི།
རྒྱུ་སྐར་དེ་དག་ནི། ལྷ་མོ་ཉེར་བརྒྱད་དུ་བཤད་པ་ཡང་ཡོད་དེ། ཐུའུ་བཀྭན་ཆོས་ཀྱི་ཉི་མས། ༡ ཐ་སྐར་དཀར་བོ་བུད་མེད་ཀྱི་གཟུགས་ཅན་སྟོད་གཡོགས་གཡོ་བ་དང་བཅས་པ། ལག་པ་གཉིས་ཐལ་མོ་སྦྱར་བའོ། །དེ་དག་ཐམས་ཅད་ཀྱང་གོས་སྟོད་གཡོགས་གཡོ་བ་བུད་མེད་གཟུགས་ཅན་ཕྱག་ཐལ་མོ་སྦྱར་བ་ནི་འདྲ་ཞིང་། ཁ་དོག་ནི། ༢ བྲ་ཉེ་ལྗང་། ༣ སྨིན་དྲུག་ལྗང་སེར། ༤ སྣར་མ་དམར་སྐྱ། ༥ མགོ་ནག ༦ ལག་དཀར། ༧ ནབས་སོ་ཡང་དཀར། ༨ རྒྱལ་ལྗང་། ༩ སྐག་དཀར། ༡༠ མཆུ་དམར﹙འདིར་རྡོ་རྗེ་ཕྲེང་བར་སེར་བོར་བཤད﹚། ༡༡ གྲེ་ལྗང་སེར། ༡༢ དབོ་ལྗང་། ༡༣ མེ་བཞི་དཀར། ༡༤ ནག་པ་ལྗང་། ༡༥ ས་རི་དཀར﹙འདི་ཡང་རྡོ་རྗེ་ཕྲེང་བར་སེར་བོ་བཤད﹚། ༡༦ ས་ག་ནག ༡༧ ལྷ་མཚམས་ལྗང་། ༡༨ སྣྲོན་དང་༡༩ སྣུབས་གཉིས་དཀར། ༢༠ ཆུ་སྟོད་ནག ༢༡ ཆུ་སྨད་དམར་སྐྱ﹙འདི་སྔོན་པོ་ཟེར་སྲོལ་ཡང་ཡོད﹚། ༢༢ གྲོ་བཞིན་ཡང་དམར་སྐྱ། ༢༣ བྱི་བཞིན་ལྗང་། ༢༤ མོན་གྲུ་ནག ༢༥ མོན་གྲེ་སེར། ༢༦ ཁྲུམས་སྟོད་ལྗང་། ༢༧ ཁྲུམས་སྨད་སེར། ༢༨ ནམ་གྲུ་སེར་སྐྱ་སྟེ། ཐམས་ཅད་ཀྱང་ཁ་དོག་མ་གཏོགས་པ་ཐ་སྐར་དང་འདྲའོ། །ཞེས་གསུངས་ཡོད་པ་དེ་ཡང་ཆོས་དབྱིངས་གསུང་དབང་དཀྱིལ་མཆོག་ལས་འབྱུང་ངོ་། །
རྩིས་གཞུང་དག་ལས་གསུངས་ཚུལ་ནི། ཤར་དུ། ༡ སྨིན་དྲུག་དྲུག་སྟེ་ཤིང་རྟའི་དབྱིབས། ༢ སྣར་མ་ལྔ་སྟེ་ཤིང་རྟའི་འཕང་ལོ་འདྲ། ༣ མགོ་ལ་གསུམ་སྟེ་རི་དྭགས་མགོ་བོ་འདྲ། ༤ ལག་ལ་གཅིག་སྟེ་ཐིག་ལེ་ལྟ་བུ། ༥ ནབས་སོ་གཉིས་ཏེ་རྐང་བ་འདྲ། ༦ རྒྱལ་ལ་གསུམ་སྟེ་རིལ་བའི་དབྱིབས། ༧ སྐག་ནི་གཅིག་ཡིན་ཐིག་ལེ་འདྲ﹙འདི་ལ་དྲུག་ཟེར་བའང་ཡོད﹚། ལྷོར། ༨ མཆུ་ལ་ལྔ་ཡོད་ཆུ་བོའི་མགུར། ༩ གྲེ་ནི་གཉིས་ཡིན་རྐང་བ་འདྲ། ༡༠ དབོ་ལ་གྲངས་གཉིས་ཁྲིའི་དབྱིབས། ༡༡ མེ་བཞིའི་གྲངས་ལྔ་ལག་པ་འདྲ། ༡༢ ནག་པ་གཅིག་ཉིད་ཡིན་པས་སྙིང་དང་འདྲ། ༡༣ ས་རི་གཅིག་ཡིན་ཐིག་ལེ་འདྲ། ༡༤ ས་ག་བཞི་སྟེ་རྭའི་རྟེན་གྱི་མགོ་འདྲ། ནུབ་ཏུ། ༡༥ ལྷ་མཚམས་བཞི་སྟེ་གླང་ཆེན་མགོ་དང་རྣ་བ་གཉིས། ༡༦ སྣྲོན་ནི་གྲངས་གསུམ་ཐེམ་སྐས་འདྲ། ༡༧ སྣྲུབས་ནི་གྲངས་དགུ་སྡིག་པའི་གཟུགས། ༡༨ ཆུ་སྟོད་བཞི་སྟེ་བ་མཇུག་སྒྲེང་བ་འདྲ། ༡༩ ཆུ་སྨད་བཞི་སྟེ་གླང་ཆེན་མཆོང་བ་འདྲ། ༢༠ གྲོ་བཞིན་གསུམ་སྟེ་རྔའི་དབྱིབས། ༢༡ བྱི་བཞིན་གསུམ་སྟེ་བ་ལང་མགོ་བོ་འདྲ། བྱང་དུ། ༢༢ མོན་གྲེ་ལ་བཞི་བྱ་ཡི་དབྱིབས། ༢༣ མོན་གྲུ་གཅིག་ཡིན་ཐིག་ལེ་འདྲ﹙བཞི་ཡོད་ཀྱང་ཟེར﹚། ༢༤ ཁྲིམས་སྟོད་གཉིས་ཡིན་རྟ་བ་འདྲ། ༢༥ ཁྲིམས་སྨད་གཉིས་ཡིན་རྐང་བའི་དབྱིབས། ༢༦ ནམ་གྲུ་སོ་གཉིས་སྐར་མའི་ཚོགས། ༢༧ ཐ་སྐར་གསུམ་སྟེ་བྱ་མཆུ་འདྲ། ༢༨ བྲ་ཉེ་གསུམ་ནི་མོ་རྟགས་འདྲ། ཞེས་སྐར་གྲངས་དང་དབྱིབས། ཕྱོགས་གར་ཡོད་བཅས་བསྟན་ཡོད་དོ། །བཀྲ་བརྩེགས་ཀྱི་མདོ་ལས་ཀྱང་རྒྱུ་སྐར་དེ་དག་ཤར་ལྷོ་ནུབ་བྱང་དུ་བདུན་བདུན་གནས་ཡོད་པ་དང་། ཕྱོགས་སྐྱོང་དང་ལྷན་དུ་སྐྱོང་ཚུལ་བསྟན་ཡོད་དོ། །
༧ འཇིགས་བྱེད་དགུ།
༡ འཇིགས་བྱེད་ཀྱི་བདག་པོ་ཆེན་པོ་ནག་པོ་སྤྱན་གསུམ་པ། མཆེ་བ་གཙིགས་པ། འཇིགས་པའི་ཆ་བྱད་ཅན། ལག་གཡས་པས་ཁ་ཊཱཾ་ཀ་འཛིན་ཅིང་གཡོན་པས་ཨུ་མར་འཁྱུད་པ། ༢ འཇིགས་བྱེད་པྲ་མི་ཏ་དཀར་བོ་ལག་གཡས་པས་རིན་ཆེན་འབར་བ་འཛིན་ཅིང་། གཡོན་པས་ཚངས་མར་འཁྱུད་པ། ༣ འཇིགས་བྱེད་བྷཻ་ར་ཝ་སྔོ་ནག་ལག་གཡས་པས་རྡོ་རྗེ་རྩེ་གསུམ་འཛིན་ཅིང་། གཡོན་པས་བདེ་སོགས་མར་འཁྱུད་པ། ༤ འཇིགས་བྱེད་བྷཻ་ཤནྟྲ་དམར་ནག་ལག་གཡས་པས་མདའ་གཞུ་འཛིན་ཅིང་གཡོན་པས་ཁྱབ་འཇུག་མར་འཁྱུད་པ། ༥ འཇིགས་བྱེད་ཀུ་བེ་ར་དམར་ནག་ལག་གཡས་པས་ཐོད་དབྱུག་འཛིན་ཅིང་གཡོན་པས་རེའུ་དྲི་མར་འཁྱུད་པ། ༦ འཇིགས་བྱེད་ཡེ་ཤེས་བྷཻ་ར་ལྗང་ནག་ལག་གཡས་འཁོར་ལོ་འཛིན་ཅིང་གོ་རི་མར་འཁྱུད་པ། ༧ འཇིགས་བྱེད་བི་ཏི་སྔོ་ནག་ལག་གཡས་པས་དགྲ་སྟ་འཛིན་ཅིང་གཡོན་པས་ཝ་ར་ཧིར་འཁྱུད་པ། ༨ འཇིགས་བྱེད་ཀཱ་ལ་བྷཻ་ར་དུད་ཁ་ལག་གཡས་པས་རལ་གྲི་འཛིན་ཅིང་མ་ནུ་ཧ་ར་ལར་འཁྱུད་པ། ﹙འདིའི་ཁ་དོག་ས་སྐྱ་བས་སེར་བོ་དང་། རྒྱན་གཡེར་ལུགས་དམར་སྐྱ་དང་། རྗེ་ཡབ་སྲས་ཀྱིས་དུད་ཁར་བཞེད། ﹚༩ འཇིགས་བྱེད་ག་ན་བ་ཏི་སྔོ་ནག་ལག་གཡས་པས་རྡོ་རྗེ་འབར་བ་འཛིན་ཅིང་གཡོན་པས་ཙ་མུ་ཎྚྀར་འཁྱུད་པ། ཐམས་ཅད་ཀྱང་རབ་ཏུ་ཁྲོས་པའི་ཞལ་དང་ལྡན་པ། རང་མཚུངས་ཀྱི་བུད་མེད་ལ་ལག་པ་གཡོན་པས་འཁྱུད་པ་དང་ལྷན་གཅིག་པ། ས་སྐྱ་བ་ཐམས་ཅད་གཡས་བརྐྱངས་ཡིན་པར་བཞེད་ཀྱང་རྗེ་ཡབ་སྲས་ཀྱིས་གཡོན་བརྐྱངས་ཡིན་ཞེས་རྟ་མགྲིན་ཆོས་སྐོར་ལས་གསུངས་སོ། །
འདི་དག་ནི་རྒྱུད་ཀྱི་ཟིན་སོ་ཆེ་ཞིང་། འཇིག་རྟེན་དང་འཇིག་རྟེན་ལས་འདས་པའི་ཆ་གཉིས་རེ་དང་། དཀར་ཕྱོགས་དང་། ནག་ཕྱོགས་ཀྱི་ཆ་གཉིས་རེ་ཡོད། དཔེར་ན། སྔོན་འགྲོའི་གཏོར་མ་གཏོང་ཡུལ་ནི་འཇིག་རྟེན་པ་ཡིན་ཡང་། དཀར་ཕྱོགས་སྐྱོང་བའི་སྲུང་མ་ཡིན། ཕུར་བུ་འདེབས་ཡུལ་གྱི་ཕྱོགས་སྐྱོང་ནི་ནག་ཕྱོགས་ཀྱི་འཇིག་རྟེན་པ་ཡིན་པ་ལྟར། འདིར་དཀྱིལ་འཁོར་གྱི་དུར་ཁྲོད་ན་ཡོད་པ་ནི། གཙོ་བོའི་ཡེ་ཤེས་གྱི་སྣང་ཆ་ཡིན། གཞན་ཡང་། མདུད་ལྷ་སུམ་བརྒྱ་དྲུག་ཅུ། སྤོར་ཐང་བརྒྱད་ཅུའི་ལྷ། གབ་ཙེ་དགུའི་ལྷ། ལྷན་ཅིག་སྐྱེས་པའི་ལྷའི་རིགས་ལས་འགོ་བའི་ལྷ་ལྔ་སོགས་ཀྱི་ཆ་བྱད་དང་། གྲོགས་བྱེད་ཚུལ་སོགས་ནི། རྒྱས་པར་ཐུའུ་བཀྭན་ཆོས་ཉིའི་རྟ་མགྲིན་གསང་སྒྲུབ་ཀྱི་བསང་སྐོར་ལས་རྟོགས་པར་བྱའོ། །
གཉིས་པ། གདོན་བགེགས་ཀླུ་སོགས།
ལྷ་སྲིན་སྡེ་བརྒྱད།
གནམ་ས་བར་སྣང་ཀུན་ལ་དབང་བྱེད་པའི་སྣང་སྲིད་ཀྱི་ལྷ་སྲིན་སྡེ་བརྒྱད་ནི། རྒྱུད་སྡེ་ལས་གསུངས་པ་ལྟར་ན། ལྷ། ཀླུ། གནོད་སྦྱིན། ལྟོ་འཕྱེ། མཁའ་ལྡིང་། ལྷ་མིན། གྲུལ་བུམ། མི་འམ་ཅི་བཅས་བརྒྱད་དང་། ཡང་། དཀར་བོ་ལྷའི་སྡེ། ནག་པོ་བདུད་ཀྱི་སྡེ། དམར་བོ་བཙན་གྱི་སྡེ། སྨུག་པོ་དམུའི་སྡེ། ཁྲ་བོ་གཟའ་ཡི་སྡེ། ཤ་ཟ་སྲིན་པོའི་སྡེ། དཀོར་བདག་རྒྱལ་བོའི་སྡེ། ནད་བདག་མ་མོའི་སྡེ། ཞེས་ཀྱང་འདྲེན་ལ། དེ་རྣམས་ཀྱི་བྱེད་ལས་ཀྱི་དབང་དུ་བཏང་ན། ཞི་བའི་འཕྲིན་ལས་སྒྲུབ་པ་དཀར་བོ་ལྷའི་སྡེ་གཏོགས། དབང་གི་འཕྲིན་ལས་སྒྲུབ་པ་དམར་བོ་བཙན་གྱི་སྡེར་གཏོགས། དྲག་པོའི་འཕྲིན་ལས་སྒྲུབ་པ་ནག་པོ་བདུད་ཀྱི་སྡེ་གཏོགས། གང་འདོད་དངོས་གྲུབ་སྩོལ་བ་ཕྱུག་པོ་ཀླུ་ཡི་སྡེར་གཏོགས། སྣ་ཚོགས་འཕྲིན་ལས་སྒྲུབ་པ་ཁྲ་བོ་གཟའ་ཡི་སྡེར་གཏོགས། དགྲ་ཤ་ཟས་སུ་ཟ་བ་རཀྵ་སྲིན་པོའི་སྡེར་གཏོགས། དགྲ་ལ་སྨྱོ་འབོག་གཏོང་བ་དཀོར་བདག་རྒྱལ་བོའི་སྡེར་གཏོགས། དགྲ་ཁྲག་སྐོམ་སུ་འཐུང་བ་དལ་ཡམས་མ་མོའི་སྡེར་གཏོགས། ཞེས་གསུངས་པ་དང་།
གཞན་དུ་ན། གནུབས་ཆེན་སངས་རྒྱས་ཡེ་ཤེས་ཀྱིས། ཕྱི་ནང་གསང་གསུམ་དང་། མཆོག་དང་སྤྲུལ་བའི་སྡེ་བརྒྱད་ཅེས་ཀྱང་གསུངས་ཏེ། ཕྱིའི་སྡེ་བརྒྱད་ནི། ལྷའི་དབང་བོ་བརྒྱ་བྱིན། ཀླུའི་རྒྱལ་བོ་དགའ་བོ། ལྷ་མིན་དབང་བོ་ཐགས་བཟང་རིས། མི་འམ་ཅི་ལྗོན་པ་རྟ་མགོ དྲི་ཟ་ཟུར་ཕུད་ལྔ་བ་དང་། ནང་གི་སྡེ་བརྒྱད་ནི། ཡབ་གཅིག་བདུད་རྗེ་ནག་པོ། བཙན་རྒྱལ་ཡམ་ཤུད་དམར་བོ། ཡུལ་ལྷ་ཕྭ་སངས་ཀླུ་སྲས། སྲོག་བདག་རྒྱལ་བོ་སྙིང་འབྱིན། ཆོས་སྐྱོང་གནོད་སྦྱིན་དམར་བོ། ལྷ་མོ་འཇིགས་པའི་གློག་འབྱིན། དགེ་བསྙེན་རྡོ་རྗེ་ལེགས་པ། དཀར་མོ་ཉི་ཟླའི་ཐོད་ཕྲེང་དང་། གསང་བའི་སྡེ་བརྒྱད་ནི། བདུད་པོ་ཁ་ཐུན་རཀྵ། གཤིན་རྗེ་གཤེད་པོ་དམར་བོ། ཀླུ་བདུད﹙དུང་དཀར་ཚིག་མཛོད་ལས་འདི་ནི་ཀླུ་བདུད་ནག་པོར་གསུངས་ཏེ་བདུད་ཀྱི་རིགས་ཡིན་པས་ཀླུ་དང་། ནག་པོ་ཞེས་པ་མདོག་གི་མིང་དུ་གསུངས་སོ། །﹚ནཱ་ག་རཱ་ཛ། གནོད་སྦྱིན་བཤན་པ་གྲི་ཐོགས། མ་མོ་སྲིན་པོ་ཁྲམ་འདེབས། བཙན་པོ་ཡམ་ཤུད་སྲོག་ལེན། བདུད་པོ་རེ་ལྡེ་འགོང་ཡག སྲོག་བདག་དུང་གི་ཐོར་ཚུགས་དང་། མཆོག་གི་སྡེ་བརྒྱད་ནི། གཟའ་མཆོག་ཆེན་མོ་ར་ཧུ་ལ། སྐར་མཆེད་ཁྲམ་ཤིང་ཁ་འཐོར། བདུད་མཆོག་མ་ནུ་ཡཀྵ། བཙན་མཆོག་གྲི་བཙན་ཐུམ་པོ། མ་མཆོག་ཅེ་སྤྱང་དུང་འཛིན། ཀླུ་མཆོག་ཀླུ་རྒྱལ་དུང་རྒྱལ། མཆོག་མཆོག་ནག་པོ་ལྟེ་དཀར། རྒྱལ་མཆོག་ལི་བྱིན་ཀ་ར་དང་། སྤྲུལ་བའི་སྡེ་བརྒྱད་ནི། དགྲ་ལྷ། མ་མོ། བདུད། སྲིན་པོ། དམུ། གཤིན་རྗེ། ཀླུ་བཙན། གཟའ་བདུད་བཅས་སོ། །དེའི་སྟེང་དུ་ཆོས་དབྱིངས་སྟོབས་ལྡན་རྡོ་རྗེས། ས་བདག་ཧལ་ཁྱི་ནག་པོ་དང་། །ཀླུ་བདུད་སྒོ་ར་ནག་པོ་དང་། །ས་ཡི་ལྷ་མོ་བསྟན་མ་དང་། །ཕྱོགས་སྐྱོང་རྒྱལ་ཆེན་སྡེ་བཞི་དང་། །མགོན་པོ་བདུན་ཅུ་རྩ་ལྔ་དང་། །ཡུལ་འདིའི་གཞི་བདག་ཐམས་ཅད་དང་། །ཕོ་ལྷ་དགྲ་ལྷ་སྲོག་ལྷ་དང་། །མོ་ལྷ་མོ་སྨན་ལ་སོགས་པའི། །སྣང་སྲིད་སྡེ་བརྒྱད་འཁོར་བཅས་ལ། །ཞེས་གསུངས་སོ། །རྒྱས་པར་ཐུའུ་བཀྭན་ཆོས་ཉིའི་རྟ་མགྲིན་ཆོས་སྐོར་ན་གསལ་ལོ། །སྡེ་བརྒྱད་འདི་དག་འཁྲུགས་ཚེ་ནད་ཡམས་གཏོང་བ་དང་། སེར་དྲག་སོགས་ཕབ་སྟེ་གནོད་འཚེ་གཏོང་བས། དེ་དག་ཐུགས་དགྱེས་བྱེད་དུ་སྡེ་བརྒྱད་མཆོད་པ་སོགས་ཀྱི་ཆོ་གའང་ཡོད་དོ། །
ཀླུ།
༡ ཀླུའི་མཆེད་ཁུངས། ཀླུའི་སྐད་དོད་ལ་ནཱ་ག་ཟེར་ལ། དེ་ནི་ཀུན་མཁྱེན་མཚོ་སྣ་བས་དུད་འགྲོའི་ཁུངས་སུ་གཏོགས་པར་བཞེད། ཀླུ་ཆེན་བརྒྱད་ནི། ནོར་རྒྱས། པདྨ། སྟོབས་རྒྱུ། འཇོག་པོ། པདྨ་ཆེན་པོ། དུང་སྐྱོང་། རིགས་ལྡན། མཐའ་ཡས་སོ། །དེ་རྣམས་ལ་ཀླུ་ཕྲན་མང་བོས་བསྐོར་ལ། གཞན་ཀླུ་གཉན་དང་ཀླུ་བཙན་ཏེ། མི་ལ་མཛེ་ནད་གཏོང་བའི་རིགས་ཀྱང་ཡོད། དེ་དག་ནི་ཆུ་ལ་གནས་པའི་སྲོག་ཆགས་ཏེ། སྟོན་པ་གཤེན་རབ་ཀྱིས་མཛད་པའི་ཀླུ་འབུམ་དཀར་ནག་ཁྲ་གསུམ་ལས། ཀླུ་ཞེས་བྱ་བ་ཆུ་ལ་གནས། དང་བོ་ཆད་པའི་ཁུངས་ནི་ནམ་མཁའ་སྟོབས་ལྡན། གསལ་བ་འོད་ལྡན། མུན་པ་ཟེར་ལྡན། དེ་གསུམ་འདུས་པའི་གཞི་ལས་བྱུང་། ཞེས་གསུངས་སོ། །སྣང་རྒྱལ་སོགས་ལས་ཀླུ་ནི་ས་འོག་གི་རིན་ཆེན་གྱི་གཏེར་བདག་དང་། རྒྱལ་རིགས་དང་རྗེ་རིགས་སོགས་ཀྱི་དབྱེ་བའང་ཕྱེས་ཡོད།
༢ ཀླུ་གནས་ནི། ར་ག་ཨ་སེའི་ཀླུ་ཡི་བསང་ཡིག་ཕན་བདེ་རྒྱ་མཚོ་དངོས་གྲུབ་ཀྱི་རླབས་ཕྲེང་ལས། རི་རབ་སྟེང་ཤོད་རོལ་མཚོ་རྒྱ་མཚོ་ཆེ། །གླིང་བཞི་གླིང་ཕྲན་སྟོང་གསུམ་འཇིག་རྟེན་ཁམས། །འཛམ་གླིང་མཐའ་དབུས་ཁྱད་པར་གངས་རིའི་ལྗོངས། །ཆུ་བོ་ཆུ་ཕྲན་འབབ་ཆུ་ལྟེང་ཀ་དང་། །ལུ་མ་ཁྲོན་པ་ཆུ་མིག་ཆུ་ཡི་མཛོད། །རི་བོ་ལྗོན་ཤིང་བྲག་རི་སྐྱེད་མོས་ཚལ། །སྤང་ལྗོངས་ནགས་ཚལ་ནེའུ་གསེང་ལ་སོགས་པ། །གནས་པ་ས་བདག་ཀླུ་གཉན་མ་ལུས་ཀུན། །བདག་གིས་བསང་མཆོད་འབུལ་ཕྱིར་སྤྱན་འདྲེན་ནོ། །ཞེས་པས་རྟོགས་ནུས། ཀླུ་རིགས་རྣམས་ཀྱིས་ས་གཞིའི་བདག་པོ་ཁོ་བོ་ཅག་ཡིན་པར་རློམ་པ་དང་། ཁྱད་པར་དུ་ཀླུ་རིགས་ས་བདག་ལྟོ་འཕྱེ་བྱ་བ་དེས། ས་སེན་མོ་སློག་ནའང་རང་གི་ཤ་ལས་དྲས་པ་ལྟ་བུའི་སེར་སྣ་ཆེ་བས། ཡབ་རྗེ་བླ་མས་ཀྱང་། ས་བདག་ཀླུ་གཉན་རྣམས་བརྐོ་ལོང་ཕྲག་དོག་ཚ། །ས་བརྐོ་རྡོ་བསློག་མ་མང་རི་ཁྲོད་པ། །གསུངས་སོ། །
༣ ཀླུའི་རྣམ་པ་ནི། ཡོངས་གྲགས་སུ། ཁོག་སྟོད་མི་དང་སྨད་ཉ་སྦྲུལ་གྱི་རྣམ་པ་ཅན། མགོ་ལ་སྦྲུལ་གྱི་གདེངས་ཀ་དང་ནོར་བུའི་མཛེས་པ། རིན་ཆེན་གྱི་རྒྱན་དང་ལྡན་པ་ཞིག་ཏུ་འདོད་ཀྱང་། ཡང་། མི་ལུས་སྦྲུལ་མགོ་ཅན། མི་ལུས་རྟ་མགོ་ཅན། མི་ལུས་སེང་མགོ་ཅན། མི་ལུས་དོམ་མགོ་ཅན། མི་ལུས་སྟག་མགོ་ཅན་སོགས་ཀྱང་ཀླུ་འབུམ་དཀར་བོ་ལས་གསུངས་པ་དང་། ཀླུའི་སྤང་སྐོང་ལས་ཀྱང་། ཀླུའི་རྒྱལ་བོ་རི་དྭགས་མགོ་ཅན་དང་། གཅན་གཟན་མགོ་ཅན། སེང་གེའི་མགོ་ཅན། བ་ལང་གི་མགོ་ཅན། སྦྲུལ་མགོ་ཅན། བྱའི་མགོ་ཅན། ཉའི་མགོ་ཅན་སོགས་གསུངས་སོ། །
འདིར་དངོས་བྱུང་ཞུ་རྒྱུ་ཞིག་ནི། སྟོང་རི་མཚོ་ནག་གི་ཁར་ས་དེ་གའི་མི་ཞིག་ས་རུབ་ཁར་ཟོག་འཚོལ་ཏུ་སོང་དུས། གློ་བུར་དུ་མཚོ་དཀྱིལ་དུ་འོད་ཀྱི་གུར་ཁང་ཞིག་ཕིབ་སྟེ་ས་གཞི་ཐམས་ཅད་སྣང་བར་བྱས་པས། མི་དེ་སྡོང་རྩར་ཡིབ་སྟེ་བལྟས་པས། ཐོག་མར་འོད་གུར་ལས་ལག་ཏུ་རྩེ་གསུམ་འཛིན་པའི་གླང་མགོ་ཅན་ཞིག་ཐོན་ཏེ་ཡར་བལྟ་མར་བལྟ་མང་དུ་བྱས་ནས་མི་སྣང་བར་གྱུར་བའི་རྗེས་སུ། མགོ་བརྙན་སྣ་ཚོགས་ཀྱི་སེམས་ཅན་མང་བོ་གླུ་གར་སོགས་རྩེད་མོ་མང་བོ་བྱེད་སྐབས། སྟབས་མ་ལེགས་པར་ཀླུ་ཞིག་གདབ་འཆལ་དུ་འགྱེལ་བས། ཁོ་རང་ཧབ་བགད་ཆེན་པོ་ཞིག་བྱས་རྐྱེན། སྐད་ཅིག་དེ་ཉིད་དུ་དེ་དག་གར་སོང་ཆ་མེད་དུ་གྱུར། སང་ཉིན་ཁོ་མཚོ་འགྲམ་དུ་ཕྱིན་དུས་གླང་མགོ་དེ་བཅད་ནས་ཆུ་འགྲམ་དུ་འཕངས་ཡོད་སྐད། ཕལ་ཆེར་ཀླུ་དེས་སོ་ལྟའི་བྱས་ཉེས་ལ་ཆད་པ་བཅད་པ་འདྲ་ཞེས་བཤད་དོ། །དེ་ཡང་། ལྷ་འདྲེ་བཀའ་ཐང་ལས་ཀླུ་རྒྱལ་མལ་གྲོ་གཟི་ཅན་གྱི་འཁོར་དུ་ཁ་རྒྱལ་ཞ་མོ་འོད་ནི་སེར་བོ་གླང་མགོ་ཅན་ཞིག་ཡོད་པ་དང་། ལ་ལས་བྲོ་བརྡུང་ཞིང་། ལ་ལས་མཁའ་འགྲོའི་བརྡ་གླུ་ལེན་པར་གསུངས་པ་སོགས་དང་ཤིན་ཏུ་མཐུན་ནོ། །གསང་སྔགས་རྙིང་ལུགས་སུ་ཀླུ་རྒྱལ་མལ་གྲོ་གཟི་ཅན་བྱ་བ་དེར་འཁོར་མང་བོས་བསྐོར་ཡོད་པར་བསྟན་པའི་རྣམ་པ་ནི། ལྷ་འདྲེ་བཀའ་ཐང་ལས། ཀླུ་རིགས་གྱུར་བ་ཐམས་ཅད་རྗེ། །ཀླུ་ནི་མལ་གྲོ་གཟི་ཅན་ཡིན། །མི་ཡི་ལུས་ལ་སྦྲུལ་མགོ་བདུན། །ཀླུ་མདོག་ནག་པོ་སྨད་སྦྲུལ་འཁྱིལ། །གླང་བོ་ཆེ་ཡི་སྟེང་ན་བཞུགས། །མལ་གྲོ་གཟི་ཅན་གཡས་གཡོན་གཉིས། །བུད་མེད་སྔོན་པོ་གཡུ་ཡི་ཐོར་ཅོག་ཅན། །དེ་གཉིས་མལ་གྲོའི་བཙུན་མོ་ཡིན། །དེ་འོག་ཚོང་དཔོན་ནག་པོ་མི་ཡི་ལུས། །དཀར་བོ་སྦྲུལ་མགོ་ལྔ་བས་གཡས་རུ་འདྲེན། །དེ་འོག་ཁམས་ཀྱི་བྱ་ཐུལ་ནི། །མི་ལུས་སེར་བོ་སྦྲུལ་མགོ་གཉིས། །གཟི་ཅན་གཡོན་གྱི་རུ་འདྲེན་ནོ། །གངས་ཀྱི་གཅུང་བོ་སྦ་གྲོ་སྐྱེར་ཆུའི་ལྷ། །ཁ་རྒྱལ་ཞ་མོ་འོད་ནི་སེར་བོ་གླང་མགོ་ཅན། །གཟི་ཅན་སྔོན་གྱི་བཤུལ་སེལ་ཡིན། །དེ་ཡི་འཁོར་ན་གདུག་པ་ཅན་ནི་བཞི། །མཐོང་བའི་དུག་ཅན་མི་ལུས་སྦྲུལ་མགོ་ན། །མནམ་པའི་དུག་ཅན་མི་ལུས་རྟ་མགོ་ཅན། །བསམ་པའི་དུག་ཅན་མི་ལུས་ཁྱི་མགོ་ཅན། །རེག་པའི་དུག་ཅན་མི་ལུས་རྒྱ་མགོ་ཅན། །ཀླུ་གཉན་ས་བདག་མང་བོ་ཀླད་རྗེས་མྱུལ། །ཞེས་བཀོད་ཡོད་པ་དང་།
ཡང་། འཕགས་པ་ཟངས་མཆུ་དམར་བོ་ལས་ཀླུ་རྒྱལ་བྲམ་ཟེ་རིན་པོ་ཆེ་བ་སུ་ཏ་ཞེས་བྱ་བས། ཕྱག་ན་རྡོ་རྗེ་ཡང་དུག་རླངས་ཀྱིས་ཤུ་བ་ཐུག་ཐུག་ཏུ་བཏང་བ་དེའི་རྣམ་པ་ནི་འདི་ལྟར་གསུངས་ཏེ། ལུས་པོ་མེ་འདྲ་བ། མིག་ཤེལ་འདྲ་བ། སྐྲ་སྦྲུལ་དུ་འདུག་པ། སོ་ཆུ་སྲིན་དུ་འདུག་པ། ལྟེ་བ་ནས་ཉི་ཟླའི་འོད་འཕྲོ་བ། རྐང་ལག་ཙན་དན་གྱི་བེ་ཅོན་དུ་སྣང་བ། སྦྲུལ་སེར་ཁྲས་ཞགས་པ་བྱས་པ། ནག་ཁྲས་སྟོད་དཀྲིས་པ། སྔོ་ཁྲས་སྐ་རགས་ལྷས་པ། དཀར་ཁྲས་ཚིགས་བཞི་དཀྲིས་པ། སྨུག་ཁྲས་གདན་དུ་བྱས་པ། ས་བདག་ནག་པོས་གདན་དུ་བྱས་པ། ས་བདག་དཀར་བོས་ཞབས་ནས་འདེགས་པ། གཉན་སྡེ་བརྒྱད་ཇག་ལ་འཁོལ་བ། རྒྱ་མཚོ་ཁོལ་མ་ལ་ཉལ་བ། ལུས་པོ་དཔག་ཚད་ཕྱེད་དང་ལྔ་ཡོད་པ། མགོ་ལུས་ཐམས་ཅད་མིག་ཏུ་ཡོད་པ། འདི་ན་གནས་ཀྱི་ཡུལ་མེད་པ། བཟའ་བའི་ཟས་མེད་པ། འགྲན་པའི་ཟླ་མེད་པ། སྟེང་གི་ལྷ་ལ་གནོད་པ། འོག་གི་ཀླུ་ལ་འཕྲ་བ། བར་གྱི་བཙན་ལ་འོ་དོད་གཏོང་བ། ཞེས་གསུངས་སོ། །
ཡང་། ལོ་རྒྱུས་སྟེང་ཆེས་སྔ་བའི་ཀླུ་གན་རྐྱལ་གྱི་རྡོ་བརྙན་ཞིག་ཡོད་པར་བཤད་པ་ནི། བཙན་པོ་ནོ་མོ་ཧན་གྱིས་མཛད་པའི་འཛམ་གླིང་རྒྱས་བཤད་ལས། ནང་སྐྱིད་གྲོང་ནས་བལ་ཡུལ་དུ་འགྲོ་བའི་ལམ་བརྒྱུད་དང་ཉེ་བར་གྲོང་ནྱ་ཀོ་ཊ་དང་མི་རིང་བའི་རི་ཁུག་ཅིག་ཏུ་སྒོ་སཱན་སིན་ཟེར་བའི་གནས་ཡོད་པ་དེར། འཁྱིལ་ཆུ་མཚོ་དང་འདྲ་བ་ཞིག་གི་ནང་རྡོ་ལས་རང་བྱུང་དུ་གྲུབ་པའི་སྐུ་བརྙན་མིའི་རྣམ་པ་ཅན་མདོག་སྔོ་སྐྱ་ལ། གདོང་ལ་གཟན་ངུར་སྨྲིག་གིས་གཡོགས་པ་ལྟ་བུའི་སྦྲུལ་མགོའི་གདེངས་ཀ་དགུ་ཡོད་པ་དེ་ལ། རྒྱ་གར་གྱི་མུ་སྟེགས་ཆོས་ལུགས་འཛིན་པ་ཁག་གཅིག་གིས་ལྷ་དབང་ཕྱུག་གི་སྐུར་ངོས་བཟུང་ནས་དད་པ་ཆེན་པོ་བྱེད་ཀྱི་ཡོད་ཀྱང་། རྒྱ་གར་དང་བལ་ཡུལ་གྱི་ནང་བ་རྣམས་ཀྱིས་དད་པ་མི་བྱེད་ཅིང་། ལྷག་པར་བོད་རིགས་ནང་བའི་ཆོས་ལ་དད་པ་རྣམས་ཀྱིས་སྐུ་བརྙན་འདི་ལ་ཀླུ་གན་རྐྱལ་དང་ཀླུ་གདོལ་བ་ཞེས་ཧ་ཅང་གིས་མི་དད་པ་བྱེད་ཀྱི་ཡོད་པ་དང་། སྐུ་བརྙན་འདི་སྟོན་པ་སངས་རྒྱས་འཛམ་གླིང་དུ་མ་བྱོན་གོང་ནས་ཡོད་པ་དང་། སྐབས་དེར་འཇིག་རྟེན་ཐོག་མཐུ་རྩལ་ཆེ་ཤོས་དབང་ཕྱུག་ཡིན་པར་ཁས་ལེན་པའི་དབང་གིས་མུ་སྟེགས་པ་རྣམས་ལ་ལྷ་དབང་ཕྱུག་གི་སྐུ་བརྙན་དུ་གྲགས། རྒྱ་གར་རྣམས་ཀྱིས་སྐུ་འདིའི་མིང་ལ་ཀན་ཐ་ཟེར་བ་དེ་བལ་བོའི་སྐད་དུ་ཟུར་ཆགས་ནས་ལི་ལ་ཀན་ཆ་ཟེར་བ་ལྟ་བུ་ཞིག་ཡོད། བལ་བོའི་སྐད་དེ་བོད་སྐད་དུ་ཟུར་ཆག་ནས་ལི་ལ་ཀླུ་དང་། ཀན་ཆ་ལ་ཀན་རྐྱལ་དུ་གོ་བའི་རྒྱུ་མཚན་གྱིས་ཀླུ་གན་རྐྱལ་དུ་གྲགས། འགའ་ཞིག་གིས་སྐུ་བརྙན་འདི་ཀླུ་ཞིག་གཉིད་ཁུག་པའི་ཕུང་བོ་རྡོ་ལ་གྱུར་བ་ཞིག་ཡིན་པས་གཉིད་སད་ན་གསོན་པོར་ལངས་སྲིད﹙ཀླུ་སྒྲུབ་ཀྱི་དབུ་ལུས་རྡོ་རུ་གྱུར་ཏེ་སླར་མཚམས་སྦྱར་ནས་རྣམ་ཤེས་ཞུགས་ཚུལ་དང་འདྲ་བོ་ཡོད་པས་འདི་གཉིས་བསྡུར་ཏེ་དཔྱད་རྒྱུ་ཡོད་པར་སེམས་སོ། །﹚ཟེར་བ་ཡང་ཡོད་ཚུལ་གསང་སྔགས་ཀྱི་གཞུང་འགའ་ཞིག་ནང་གསལ། ཞེས་པ་འདི་ཡང་ཀླུའི་རྣམ་པ་ཇི་ལྟར་ཡིན་པ་དཔྱད་གཞི་གལ་ཆེན་ཞིག་ཡིན་པར་སེམས་སོ། །
ཡང་། འཇང་རིགས་གཏོ་བའི་ཆོས་ལུགས་ཀྱིས་ཀླུའི་གཟུགས་ནི་སྟོད་སྦལ་བ་དང་སྨད་སྦྲུལ་ལས་གྲུབ་པ་ཞིག་ལགས་ལ། ཁོང་ཚོའི་གནའ་བོའི་བྲོ་ཡང་སྦལ་ཆེན་གསེར་འོད་ཅན་གྱི་མཆོངས་སྟངས་ལ་དཔེ་བྱས་ནས་དར་བར་བཤད་ལ། ད་དུང་སྦལ་རིས་ནི་གཏོ་བའི་ཆོས་ལུགས་ཀྱི་མཚོན་རྟགས་ལྟ་བུར་གྱུར་ཡོད།
ཐང་ཟན་ཙང་གི་རྒྱ་གར་ཞིང་གི་བཀོད་པའི་དཀར་ཆག་ལས། ཀླུ་མ་རུངས་པ་མང་བོས་ཀླུ་ཕོ་འགའ་ཞིག་ནི་སྐྱེས་པར་སྤྲུལ། འགའ་ཞིག་ནི་རྟ་གསེབ་ཏུ་སྤྲུལ། བུད་མེད་རྣམས་ཀྱི་ཁྱོ་རུ་སླུ་བ་དང་རྟ་གསེབ་ཏུ་བསླུས་ནས་རྒོད་མ་དང་འཕྲད་པས་མི་དང་རྟ་ལ་ཀླུ་ཕྲུག་སྐྱེས་པ་མང་སྟེ། ལན་ཅིག་ཡུལ་དེའི་རྒྱལ་བོ་གསེར་གྱི་མེ་ཏོག་གི་རྟ་རྒོད་མ་ཞིག་ལ་ཀླུ་ཕྲུག་རྟེའུ་ལ་རྟའི་ཡོན་ཏན་ཚང་བ་ཞིག་བྱུང་བ་གཅེས་སྤྲས་ཀྱིས་བརྐྱངས་ཏེ། རྒྱུན་དུ་རང་གི་བཞོན་རྟར་བྱས་ཤིང་ལྕག་གིས་གཏན་ནས་མི་གཞུ། སྐབས་ཤིག་བརྗེད་ནས་ལྕག་གིས་རྣ་བར་རེག་ཙམ་བྱས་པས་ལུས་མི་མངོན་པར་གྱུར་ཏོ། །རྐྱེན་དེས་མི་རིང་བར་རྒྱལ་བོ་ཡང་འདས་སྐད་དོ། །ཞེས་འབྱུང་བར་གཞིགས་ན་ཀླུ་ནི་རྫུ་འཕྲུལ་ཆེ་ཞིང་། ཀླུ་མ་ཡིན་པའི་འགྲོ་བ་མང་བོ་ལ་བཤོས་པར་ཡང་བཤད་ལ། གནོད་པ་བྱས་ན་ཡ་ལན་སྤྲོད་པ་ནི་ཡོངས་གྲགས་ལྟར་རོ། །གཞན་ཡང་དཔེ་ཆ་དེར། ཀླུའི་རིགས་ལས་མཆེད་པའི་གཞོན་ནུ་རྣམས་མི་བསྲུན་ཞིང་རྟུལ་ཕོད་པ་ཤ་སྟག་བྱུང་བས། རྒྱལ་བོ་ཁྲོས་ཏེ་ཐམས་ཅད་བསད་པས། རྒྱལ་བོ་ཡང་མི་རིང་པར་འདས་པར་བཤད་དོ། །
གཞན་ཡང་དཀར་ཆག་དེར། འཕགས་སྐྱེས་པོས་ཤཱཀྱ་རྣམས་བཅོམ་དུས། ཤཱཀྱའི་གྱད་མི་བྲོས་ཏེ་ལྗོན་གྲིབ་ཅིག་ཏུ་ཉལ་བར། ཀླུ་མོ་ཞིག་ཆགས་ཏེ་མི་མོར་སྤྲུལ་ཏེ་བཤོས་པས། ཕྱིས་སུ་ཤཱཀྱ་བ་དེས་ཀླུ་མོ་ཡིན་པ་ཤེས་པས། གཏན་གྲོགས་བྱེད་པར་འདོད་ནས་བདག་གིས་དུས་གསུམ་དུ་བསགས་པའི་དགེ་རྩ་རྣམས་གཅིག་ཏུ་སྡོམ་པའི་མཐུ་ལ་བརྟེན་ནས་སྔར་ལྟར་མོ་མོར་སྤྲུལ་ཅིག་ཅེས་བདེན་པ་བརྗོད་དེ། མི་མོར་གྱུར་ནས་གཏན་གྲོགས་གནང་བར་ཡང་གསུངས་ཡོད་དོ། །
ཡང་། ཀླུ་ནད་སོགས་ཀྱི་ལྟས་ངན་གཏོང་བ་ལ། སྲོག་ཆགས་རྣམ་པ་སྣ་ཚོགས་ཀྱི་གཟུགས་ཡོད་པར། ལྷ་འདྲེ་བཀའ་ཐང་ལས། རྩངས་པ་སྦལ་བ་སྡིག་པ་རྟ་བླ་འོད། །སྡོམ་དང་སྦུར་གྲོག་བཤོལ་མོ་སྲིན་བུ་དང་། །མུག་མ་སད་མ་ཤིག་འཇུ་སྦྲང་བུ་དང་། །འབུ་དང་གྲོག་མ་བྱང་ཁྲ་དམར་ཡུལ་རིགས། །ཕོ་འུག་ཝ་སྤྲེལ་སྲེ་མོང་སྣ་ཚོགས་མང་། །ཞེས་སོ། །དེ་ལས་གཞན། ཐུའུ་བཀྭན་ཆོས་ཉིས་ཆར་འབེབས་ཀྱི་ཆོ་ག་ལས་ཀླུ་ནོར་ཉེར་གཅིག་ནི། སྦྲུལ། ཉ། ལྕོང་མོ། རྨིགས་བུ། རྩངས་པ། དུང་། ཆུ་སྲིན། རུས་སྦལ། སྡོམ། སྡིག་པ། རྟལ། འགྲོན་བུ། ཉ་ལྕིབས། ཆུ་རྟ། ཆུ་ལུག ཆུ་ར། ཆུ་བྱ། སྲམ། ཆུ་སྲེག ཆུ་བྱི་བཅས་འདྲེན་ནོ། །
དེ་དག་གི་ཕོ་བྲང་ཡང་། བོན་ཆོག་གཙང་མ་ཀླུ་འབུམ་ནག་པོ་བྱ་བར། ཀླུ་ཡི་ཕོ་བྲང་མཐོ་རིས་ངོས་ཡངས་ལ། །བ་དམར་གླང་དམར་དི་རི་རི། །ངང་ངུར་མང་བོ་ལྕོངས་སེ་ལྕོངས། །རྨ་བྱ་སྤུ་སྡུག་ལྷབས་སེ་ལྷབས། །རོལ་མོ་སིལ་སྙན་སི་ལི་ལི། །དེ་ལྟ་བུ་ཡི་ཕོ་བྲང་དུ། །བདག་ཅག་གིས་ནི་མ་རིག་པའི། །མཚོ་རྙོག་པ་དང་གཞོབ་བཏང་བ། །ཀླུ་མགོ་མང་བོ་གྱུ་རུ་རུ། །སྦྲུལ་མགོ་མང་བོ་རོངས་སེ་རོངས། །གསུངས་སོ། །
༤ ཀླུ་ནད་ནི། ཀླུ་ནད་འབྱུང་བའི་རྒྱུ་ནི། ཤིང་གཉན་བཅད་པ། ས་གཉན་བྲུས་པ། རྡོ་གཉན་བརྐོས་པ། བྲག་གཉན་བཤིག་པ། ཆུ་གཉན་རྙོག་པ་སོགས་ཏེ། རཱ་ག་ཨ་སེའི་ས་བདག་འཁྲུགས་བཅོས་ལས། ཤིང་གཉན་བཅད་དང་ས་གཉན་བསྐོས། །བྲག་གཉན་བཤིག་དང་རྡོ་གཉན་སློག །ཆུ་གཉན་ཡུར་དྲངས་ནེའུ་གསིང་བརྐོས། །ཞིང་མུ་སྲང་རྒོད་འཕྲུ་འདུལ་བྱས། །ཁང་ནག་བཤུ་འགེབས་མཁར་ལས་ཀྱིས། །ས་བདག་ཐུགས་དང་འགལ་བ་རྣམས། །ཞེས་པ་ལྟར། ཀླུ་གནས་དང་ཀླུ་ལ་གནོད་འཚེ་བཏང་བས། ཀླུ་རྣམས་ཀྱིས་མི་ལ་འཁོན་ལན་བསློག་སྟེ། ཆེ་ས་ནས་ཡུལ་ཕྱོགས་སྤྱི་ལ་ནད་ཡམས་མུ་གེ འཐབ་རྩོད་འཁྲུག་ལོང་། ཆར་ཆུ་དུས་སུ་མི་འབབ་པ། ལོ་ཕྱུགས་རྟག་ཏུ་མི་ལེགས་པ་དང་། ཆུང་ས་ནས་མི་ལ་ཤུ་བའི་ནད་དང་། འབྲས། སྲང་རྡོ། མཛེ། ཕོལ་མིག འབྲུམ་བུ། གཅོང་། དལ་རྒལ། གཞང་འབྲུམ། ཁོང་མཛེ། མེ་དབལ། གྱེན་པ། སེམས་རྒྱུ་བ། གྲུམ་བུ་སོགས་ནད་གཏོང་བར་ཀླུ་འབུམ་ནག་པོ་དང་། བཀྲ་བརྩེགས། གདུགས་དཀར་མཆོག་གྲུབ་མ་སོགས་ལས་གསུངས་ལ། ཁྱད་པར་དུ་ཀླུ་འབུམ་ལས། ཀླུའི་རྒྱལ་མོ་དྲ་མ་འབྲས་མ་བྱ་བ་ནི་ནད་ཐམས་ཅད་ཀྱི་བདག་མོའོ། །ཀླུའི་རྒྱལ་མོ་གླང་བོ་ཆེའི་མགོ་ཅན་ནི་སྐྲངས་ནད་གཏོང་བའི་བདག་མོའོ། །ཀླུའི་རྒྱལ་མོ་ཆུ་སྲིན་གྱི་མགོ་ཅན་ནི་འབྲུམ་ཆེན་གཏོང་བའི་བདག་མོའོ། །ཀླུའི་རྒྱལ་མོ་རུས་སྦལ་མགོ་ཅན་ནི་འབྲུམ་ཆུང་གཏོང་བའི་བདག་མོའོ། །ཀླུའི་རྒྱལ་མོ་ཆུ་གླང་མགོ་ཅན་ནི་གཉན་ནད་གཏོང་བའི་བདག་མོའོ། །ཞེས་དང་། འཕགས་པ་ཟངས་མཆུ་དམར་བོ་ལས། ཀླུའི་རྒྱལ་བོ་བ་སུ་ཏ་མེ་མ་མུར་ནག་པོའི་ཁ་རླངས་ཅན་བྱ་བ་ཡིན་ཏེ། ནད་དགུ་བརྒྱ་དགུ་བཅུ་ལ་དབང་བྱེད་པ་ཡིན་པས། འཇིག་རྟེན་འདི་ཕུང་བར་འགྱུར། ཞེས་དང་། ཁོའི་ངག་ནས་བ་སུ་ཏ་ནག་པོ་བྱ་བ་ནད་ཀྱི་བདག་པོ་ཡིན། རིམས་ནད་དང་། མཆིན་ནད་དང་། གློ་ནད་དང་། ཁྲག་ནད་ཐམས་ཅད་ང་ལ་ཡོད། ཅེས་དང་། འགྲེང་མི་ལ་གནོད་དེ་ནད་དུ་རོ་མྱགས་གཏོང་། སྒུར་ཕྱུགས་ལ་གནོད་དེ་བརླ་བཞི་འགེབས། སྲོག་ཆགས་ལ་ལྟས་ངན་པ་བརྒྱད་གཏོང་ངོ་། །ཞེས་སོ། །
དེ་ལས་གཞན། ཀླུ་ནི་དུག་གི་བདག་པོ་ལྟ་བུ་སྟེ། རང་ཅག་གི་མི་ཡུལ་དུ་སྣང་བའི་སྦྲུལ་ཕལ་མོ་ཆེར་དུག་མཆིས་པ་དང་། ཟངས་མཆུ་དམར་བོ་ལས། ང་ནི་ཀླུའི་རྒྱལ་བོ་བ་སུ་ཏ་ཞེས་བྱ་བ་ཡིན་ནོ། །ང་ལ་དུག་རྣམ་པ་ལྔ་ཡང་ཡོད་དོ། །ཞེས་པ་ལྟར། ལྷ་འདྲེ་བཀའ་ཐང་ལས་ཀྱང་། ཀླུ་མལ་གྲོ་གཟི་ཅན་གྱིས་གསོལ་བ། བདག་ཅག་རྣམས་ལ་དུག་རིགས་རྣམ་པ་བཞི་ཡོད། སློབ་དཔོན་ལ་གནོད་ཀྱིས་དོགས་པ་ཡིན། རྩ་ན་འདུག་པ་བསམ་པའི་དུག་ཅན་ཡིན། མ་བསམས་ན་མི་གནོད། མ་བསམས་ཙམ་དུ་སྡོད་པ་ཡིན། དེ་བས་རིང་བ་རེག་པའི་དུག་ཅན་ཡིན་ཏེ། མ་རེག་ན་མི་གནོད། མ་རེག་ཙམ་དུ་སྡོད་པ་ཡིན། དེ་བས་རིངས་པ་ཁ་རླངས་དུག་ཅན་ཡིན། ཁ་རླངས་སོང་གི་དོགས་པ་ན། ཁ་རླངས་མི་སླེབས་ཙམ་དུ་སྡོད་པ་ཡིན། ཁ་ཕྱིར་ལྟ་བ་ནི་མཐོང་བའི་དུག་ཅན་ཡིན། མཐོང་གི་དོགས་ནས་ཁ་ཕྱིར་ལྟ་བ་ཡིན། ཞེས་པ་ལྟར་ཀླུ་ནི་དུག་ནད་ཀྱི་བྱེད་པོ་འང་ཡིན་ནོ། །
ཀླུ་ནད་དེ་དག་སེལ་ཐབས་ལ། ཀླུའི་ཐེབས་ལྡོག་ལ་བལྟས་ཏེ་ཆོས་ཁུངས་བཙན་ཀྱི་ཀླུ་བསང་དང་ཀླུ་གཏོར་སོགས་འདོན་ཆོག་མང་དུ་གསུངས་ཡོད་པས། ཞིབ་ཏུ་དེ་དག་ཏུ་བལྟ་བར་བྱ་ལ། དུག་རིགས་ཞི་ཐབས་སུ། ལྷ་འདྲེ་བཀའ་ཐང་ལས། སློབ་དཔོན་གྱིས་གསུངས་པ། འོ་ན་དུག་རིགས་བཞི་བོ་ཅིས་ཐུབ་གསུངས་པས། མལ་གྲོས་གསོལ་བ། བསམ་པའི་དུག་ནི་ཏིང་ངེ་འཛིན་གྱིས་ཐུབ། ཁ་རླངས་ཀྱི་དུག་ནི་སྨན་དྲིས་ཐུབ། མཐོང་བའི་དུག་ནི་རྨ་བྱའི་མདོངས་ཀྱིས་སོ། །དེ་ལས་གཞན། ཐུའུ་བཀྭན་ཆོས་ཉིའི་རྟ་མགྲིན་གསང་སྒྲུབ་ཀྱི་སྒོ་ནས་གཟའ་ཀླུ་གཙོ་བོའི་སྡེ་བརྒྱད་ཀྱི་དུག་དབྱུང་བྱ་ཚུལ་འང་ཡོད་དོ། །
༥ ཀླུའི་གཉེན་པོ། ཀླུ་སྦྲུལ་གྱི་གཉེན་པོ་ནི་ཁྱུང་ཆེན་ཡིན་ཏེ། ཟངས་མཆུ་དམར་བོ་ལས་བྱ་ཁྱུང་རབ་བརྟན་གྱིས་ཀླུ་རྒྱལ་བ་སུ་ཏ་འདུལ་ལུགས་བསྡུས་ཏེ་བཀོད་ན། བྱ་ཁྱུང་རབ་བརྟན་བྱ་བ་དེས་ཀླུ་བ་སུ་ཏའི་སྤྱི་བོ་ནས་བཏེགས་པས་མ་ཐེག་སྟེ། བ་སུ་ཏས་ཁྱོད་སུ་ཡིན་ཞེས་དྲིས་པས། བྱ་ཁྱུང་རབ་བརྟན་གྱིས་ང་ནི་ཀླུ་རིགས་རྣམས་ཟ་བ་ཡིན། ང་ལ་ཟས་སུ་ཀླུ་ལས་མེད། ངའི་མིང་ནི་བྱ་ཁྱུང་ག་རུ་ཌ་བྱ་བ་ཡིན་བཤད་པས། འོ་ན། ཁྱོད་སྡོད་དང་མགྲོན་ཅིག་བྱ་ཟེར་ཏེ་ཆུ་སྲིན་གྱི་རོ་ཆེན་པོ་ཞིག་བྱིན་པས། བྱ་ཁྱུང་གིས་མྱོང་བ་རྩུག་ཡང་མི་བྱེད་པར་ཁྱུར་མིད་བཏང་སྟེ། བྱ་ཁྱུང་གིས་ད་འགྲོ་ཟེར་ཡང་མི་འགྲོ་བས། འོ་ན་ང་ནི་ཁྱོད་ཟའོ། །འཆའ་འོ། །མུར་རོ། །འཐོག་གོ །འཁྱེར་རོ། །འདྲུད་དོ། །ཞེས་མཆུ་བརྡར། གཤོག་པ་དཀྲུགས། སྡེར་མོ་བགྲད་དེ་འཇིགས་རྔམ་བསྟན་ནས་གཉན་སྡེ་བརྒྱད་དང་བཅས་པ་བཅོམ་ལྡན་འདས་ཀྱི་དྲུང་དུ་འཁྱེར་བར་བཀོད་ཡོད་པ་ལས་གཞན། བསམ་ཡས་བཞེངས་པའི་མཐུན་རྐྱེན་དུ་སློབ་དཔོན་པད་འབྱུང་གིས་ཀླུ་མ་དྲོས་པ་ཐབས་ཀྱིས་བཀུགས་ཏེ་ཁྲི་སྲོང་ལྡེ་བཙན་དང་ཤག་པོ་བྱེད་བཅུག་ནས། ཀླུ་རྒྱལ་ལ་ནང་རེར་བཞིན་གསེར་དཀར་ཡོལ་རེ་ཕུལ་བཅུག་ཀྱང་། ཀླུ་རྒྱལ་དེའི་ལུས་ངག་དམ་ལ་ཐོགས་ཀྱང་ད་དུང་སེམས་དམ་ལ་མ་ཐོགས་པ་སློབ་དཔོན་གྱིས་མཁྱེན་ནས། བསམ་ཡས་མཆིམས་ཕུར་སློབ་དཔོན་ཞག་བདུན་ཏུ་ཐུགས་དམ་ལ་བཞུགས་ཚེ། རྒྱལ་བོས་གཙུག་ལག་ཁང་གི་ཤིང་ཆ་དཀོན་པས་ཅི་དྲག་དགོངས་པས། ཀླུ་རྒྱལ་མི་དཀར་རྟ་དཀར་བཅུ་གསུམ་དུ་སྤྲུལ་ནས། ཆོས་རྒྱལ་ལགས་ཁྱེད་ཀྱིས་སློབ་དཔོན་གྱི་ཐུགས་དམ་ཀློད་ཆུག་དང་། ཤིང་ཆ་ངས་འབུལ་ཞུས་པས། རྒྱལ་བོ་མཆིམས་ཕུར་བྱོན་ཙ་ན། སློབ་དཔོན་མི་སྣང་བར་ཁྱུང་དམར་བོ་ཞིག་གིས་སྦྲུལ་ཆེན་གཉིས་ལ་སྦར་ཤེད་བྱས་ཏེ་སྦྲུལ་གཉིས་ཀྱིས་ངན་སྐད་ཙེར་ཙེར་འདོན་པས། རྒྱལ་བོས་སློབ་དཔོན་ལགས་ཐུགས་དམ་ཀློད་པར་ཞུ་དངོས་གྲུབ་ཅིག་གདའ་ཞུས་ཚེ། སྦྲུལ་དེ་གཉིས་བཏང་སྟེ། ཁྱུང་དམར་བོ་དེ་སློབ་དཔོན་དུ་གྱུར་བར་བཤད་པ་དང་།
ཡང་། འབྲི་གུང་སྐྱོབ་པ་རིན་པོ་ཆེ་དྲུང་དུ་མཚན་མོར་ཀླུ་རྒྱལ་མལ་གྲོ་གཟི་ཅན་རང་གཟུགས་ཀྱིས་ཆོས་ཉན་དུ་འོང་བ་ཁོང་གིས་མཁྱེན་ནས། བུ་སློབ་རྫུ་འཕྲུལ་འཐོབ་པ་རྣམས་ཀླུ་རྒྱལ་ལ་ཕར་གནོད་དང་། མ་འཐོབ་པ་རྣམས་དུག་རླངས་ཕོག་གིས་དོགས་ནས། དོ་ནུབ་སྒྲ་ཆེན་པོ་ཇི་ལྟར་བྱུང་ཡང་སུས་ཀྱང་མ་ལྟ་ཞིག ཅེས་སོ་སོ་ལ་འཕྲིན་བསྐྱལ་ཡང་། གྲུབ་ཐོབ་མགར་དམ་པ་གསེར་ཁང་འོག་གི་བླ་གཡེལ་ཕུག་རིང་དུ་བཞུགས་པར་བརྟེན། གསན་མི་འོང་དགོངས་ནས་བཏང་སྙོམས་སུ་བཞག དེ་ནུབ་མགར་དམ་པས་སྒྲ་ཆེན་དེ་གསན་ནས་གཟིགས་པས། སྦྲུལ་སྔོ་ནག་འཇིགས་སུ་རུང་བ་ཞིག་གིས་གླིང་ལ་ལན་གསུམ་བསྐོར་ཏེ་མགོ་བོ་གཟིམ་ཆུང་གསེར་ཁང་གི་བར་སྣང་ན་ཐད་དུ་འདུག་པ་གཟིགས་པས། བླ་མ་ལ་གནོད་པར་བསམ་ནས་ཁྱུང་ཆེན་ཞིག་ཏུ་སྤྲུལ་ཏེ་དེད་པས་རོལ་བ་འཕྲང་གི་མར་ཟུར་ཕ་བོང་ཆེན་པོ་ཞིག་གི་སྟེང་སྡེར་རྗེས་བབས་པ་དེ། ད་ལྟ་ཡང་འཕན་པོ་རྨམ་པ་ཁུལ་དུ་ཡོད་པ་དང་།
ཡང་མཚོ་ལྷོའི་ཧོལ་ཁ་ས་ཁུལ་གྱི་མན་འགྲངས་ཁྱུང་རྫ་ཟེར་བར་ཡང་། སྔོན་གྱི་ཚེ་ཁྱུང་ཆེན་ཞིག་གིས་དུག་སྦྲུལ་ཞིག་འཁུར་ནས་རྫ་རི་དེའི་མགོར་བབས་པས། ད་ལྟ་རྫ་ཟོམ་གཞོགས་གཉིས་སུ་སྡེར་ཤུལ་ཆེན་པོ་གཉིས་སྟོན་རྒྱུ་ཡོད་པ་དེ། ཁྱུང་ཆེན་གྱི་ལྗིད་ཤུགས་ཀྱིས་མནན་པའི་རྗེས་ཡིན་པར་བཤད་སྲོལ་ཡོད། ཁྱུང་ཆེན་ཀླུ་གཉེན་དུ་འགྲོ་བ་ནང་ཆོས་ཀྱི་དབང་དུ་བཏང་ནའང་། ཁྱུང་ནག་གི་བསྐྱེད་རིམ་སྐབས་སུ། མཁའ་ལྡིང་དབང་བོའི་སྐུ་མདོག་ནག །སྦྲུལ་རྒྱལ་བཟུང་ནས་ཞལ་དུ་གསོལ། །ཞེས་དང་། སྡེ་སྲིད་སངས་རྒྱས་རྒྱ་མཚོས། དང་བོ་བཅོས་ཐབས་ཀུན་གྱི་རྒྱལ་བོ་ནི། །རྒྱུད་ལས་ཕྱག་རྡོར་སྙིང་བོ་བཟླས་གསུངས་ཀྱང་། །ཤིན་ཏུ་ཟབ་པ་ནཱ་ག་རཀྴ་དང་། །ཡེ་ཤེས་ཁྱུང་ཁྲའི་ལས་བསྙེན་འཐེམས་པར་བྱ། །ཞེས་གསུངས་སོ། །
གཞན་ཡང་། ཐང་ཟན་ཙང་གི་རྒྱ་གར་ཞིང་གི་བཀོད་པའི་དཀར་ཆག་ལས་ཀྱང་དགེ་ཚུལ་ཞིག་སྨོན་ལམ་ལོག་འདེབས་ཀྱིས་ཀླུ་མ་རུངས་པ་མཐུ་ཆེན་ཞིག་ཏུ་སྐྱེས་པས། ཡུལ་ཕྱོགས་མང་བོ་སེར་དང་རླུང་བཏང་སྟེ་ལན་བདུན་དུ་བཅོམ་པས། རྒྱལ་བོ་ཀ་ནི་ཀ་ཀླུ་རྒྱལ་དེ་གཞོམ་པར་ཆས་དུས། ཀླུ་ངན་དེས་ཐོག་སེར་དྲག་པོ་བཏང་སྟེ་དམག་མི་རྣམས་ཅི་བྱ་གཏོལ་མེད་གྱུར་ཚེ། ཀ་ནི་ཀས་བདེན་སྟོབས་བརྗོད་པས། ཀླུ་མ་རུངས་པ་དེས་མཐོང་སྣང་ལ། རྒྱལ་བོའི་ལག་པ་གཉིས་གཤོག་པ་གཉིས་སུ་གྱུར། ལུས་ཀྱང་འཇིགས་རུང་བྱ་ཁྱུང་མཆུ་སྡེར་ཡོངས་སུ་རྫོགས་པ་མེའི་རལ་བ་དང་མཇུག་མ་ཅན་དུ་གྱུར་ནས་ཀླུ་རྣམས་རྨེག་མེད་གཞོམ་པས། ཀླུ་རྒྱལ་དེས་ཀ་ནི་ཀའི་ཞབས་ལ་གཏུགས་ནས་ཞུ་བ་མཛད་པར་བཤད་ཡོད་དོ། །
ཀུན་མཁྱེན་འཇམ་དབྱངས་བཞད་པས། ཀླུ་དང་མཁའ་ལྡིང་ལ་སྐྱེ་གནས་བཞི་ཡོད་པར་ཐལ། མཁའ་ལྡིང་རྫུས་སྐྱེས་མཆོག་དང་། དྲོད་གཤེར་སྐྱེས་ཉེ་མཆོག་དང་། མངལ་སྐྱེས་བར་མ་དང་། སྒོང་སྐྱེས་ཐ་མ་ཡིན་ལ། དེ་རྫུས་སྐྱེས་ཀྱིས་ཀླུ་བཞི་ཀ་ཟ། དྲོད་གཤེར་སྐྱེས་ཀྱིས་གསུམ་ཟ། མངལ་སྐྱེས་ཀྱིས་གཉིས་ཟ། སྒོང་སྐྱེས་ཀྱིས་སྒོང་སྐྱེས་ཁོ་ན་ཟའོ། །གསུངས་སོ། །ཡང་ཀླུ་རྒྱལ་རིགས་དང་། རྗེ་རིགས། བྲམ་ཟེའི་རིགས། གདོལ་བའི་རིགས། ཁྱུང་གི་ཁ་དོག་ལ་གཞིགས་ཏེ་འདུལ་སྐལ་ཡོད་པར་དབྱེ་ཞིབ་གནང་ཡོད་པ་ནི། བོན་ཆོག་ཟིལ་མནོན་ཁྱུང་གི་སྒྲུབ་པ་ལས། ཤར་དུ་རྒྱལ་རིགས་འདུལ་མཛད་ཁྱུང་དཀར་བོ། །བྱང་དུ་རྗེ་རིགས་འདུལ་མཛད་ཁྱུང་ལྗང་ཁུ། །ནུབ་ཏུ་བྲམ་ཟེ་འདུལ་མཛད་ཁྱུང་དམར་བོ། །ལྷོ་རུ་གདོལ་བ་འདུལ་མཛད་ཁྱུང་སྔོན་པོ། །ཞེས་སོ། །དེ་ལས་གཞན། ཁྱུང་ཆེན་ཀླུ་སྦྲུལ་གྱི་དངོས་གཉེན་དུ་འགྲོ་ཚུལ་དམངས་གླུ་ཚུན་ནའང་ཡོད་དེ། ཁྱོད་དུག་སྦྲུལ་ནག་པོ་ས་ཡི་བུ། །ཁྱོད་འཁྱུག་ཚོད་ལྡིང་ཚོད་མ་ཟིན་ན། །བྱ་ཁྱུང་ཆེན་དགུང་ན་འཕུར་གི་ཡོད། །མགོ་སྤུ་གྲི་རླུང་ལ་བསྐྱོད་ཀི་ཡོད། །སྦྲུལ་ཁྱུར་མིད་བྱེད་པར་ལ་ཐང་མེད། །ཅེས་སོ། །དེ་ལས་གཞན། ཀླུ་འདུལ་གྱི་གཉེན་པོ་ནི། ཀརྨ་ཆགས་མེད་ཀྱི་ཀླུ་བསང་ལས། ཀླུ་སྒྲུབ་པད་འབྱུང་བྱ་ཡུལ་བ། །སྐྱེར་སྒོང་བ་དང་སངས་རྒྱས་དབོན། །པཀྵི་རང་བྱུང་རྡོ་རྗེ་སོགས། །ཀླུ་འདུལ་རིག་འཛིན་བླ་མ་བསང། །གཏུམ་ཆེན་གཏུམ་ཆུང་གོས་སྔོན་ཅན། །འཁོར་ཆེན་ནཱ་ག་རཀྵ་དང་། །རྟ་མགྲིན་ནག་པོ་ཀླུ་འདུལ་སོགས། །ཡི་དམ་ལྷ་ཚོགས་ཐམས་ཅད་བསང་། །ཞེས་ཀྱང་གསུངས་སོ། །
གཏོ་བའི་དཔེ་ཆ་བདམས་བསྒྱུར་ཞེས་པའི་ནང་། མི་དང་ཀླུ་གཉིས་ནི་ཕ་མ་གཅིག་ལས་མཆེད་པའི་གཅེན་གཅུང་ཡིན་ལ། ཕྱིས་ཕ་མེས་ཀྱི་རྒྱུ་ནོར་ལ་མ་འཆམ་པས། སྟོན་པ་གཤེན་རབ་བྱ་ཁྱུང་ལ་བཅིབས་ཏེ་མི་ཀླུ་གཉིས་འདུམ་འགྲིག་མཛད་ནས། རྡོ་དཀར་གྱི་ལུག་གོམ་པ་སྤོ་བ་དང་། རྡོ་ནག་གི་ཕག་པ་འགྲོ་ཤེས་པའི་བར་འཆམ་མཐུན་དགོས་པར་གཏན་འབེབས་གནང་ཞེས་ལྷ་སྒྲུང་ལྟ་བུ་ཞིག་ཀྱང་བཀོད་ཡོད་དོ། །
བོན་གཞུང་གསེར་འོད་ནོར་བུ་འོད་འབར་ལས། ཁྱོད་ཅག་ཀླུ་རིགས་ཐམས་ཅད་ཀྱིས། །འཇིག་རྟེན་མི་ལ་གདུག་རྩུབ་བྱས། །དེ་ཡི་རྣམ་སྨིན་ཉེས་སྐྱོན་གྱིས། །ཀླུ་བདུད་གདུག་རྩུབ་ཆོ་འཕྲུལ་བྱུང་། །ཀླུ་རྣམས་ཆབ་ལ་ཕབ་པ་ཡིན། །ཞེས་པ་ལྟར། ཀླུ་བདུད་དེ་ནི། བོན་གཞུང་དེ་ཉིད་ལས། ཀླུ་བདུད་གདུག་པ་མགོ་དགུ་ནི་ཀླུ་བདུད་འཁོར་འབུམ་དང་བཅས་ཏེ། རླུང་ནག་འཚུབ་མ་སྤྲིན་བཞིན་གཏིབས། །ཞལ་གདངས་མཆེ་གཙིགས་ཟ་ལ་རྔམས། །ཕྱག་ན་དུག་མཚོན་ཚ་ཚ་འཕྲོས། །ལྗགས་ལས་གློག་འོད་གྱ་མ་གྱུ། །ངར་སྐད་དྲག་པ་འབྲུག་ལྟར་སྒྲོག །སྟོང་གསུམ་འཇིག་རྟེན་སྐྱེ་འགྲོ་དང་། །ལྷ་ཀླུ་སྡེ་བརྒྱད་གང་གནས་ཀུན། །ཐམས་ཅད་ང་ཡི་ཟས་ཡིན་ཟེར། །དུག་མཚོན་ཐོག་སེར་ཆར་ལྟར་དབབ། །ཅེས་ཀླུ་གཙོ་བྱས་སྡེ་བརྒྱད་ཟས་སུ་ཟ་བ་ཞིག་ཡིན་པར་བཤད།
དེང་སང་ས་ཆ་མང་བོར་ཀླུ་བདུད་ནག་པོ་ཞེས་སྲོག་ཆགས་ཞིག་སྣང་རྒྱུ་ཡོད་པ་དེ་ནི། དབྱིབས་རུས་སྦལ་ལྟ་བུ། མགོ་བོ་ཁྱུང་མགོ་བཞིན་རྭ་གཉིས་རྒྱབ་ཏུ་ཕྱོགས་པ། ཚད་བྱ་རྒོད་ལས་ཆེ་བ། དེ་ཐོན་ཚེ་སྦལ་སྦྲུལ་སོགས་ཡོད་ཚད་དངངས་སྐྲག་སྐྱེས་ཏེ་བྱེར་འགྲོ་བ། མི་མང་བོས་དངོས་སུ་མཐོང་བ་དང་། ད་དུང་ངག་རྒྱུན་དུ། ཀླུ་བདུད་ནག་པོ་དེ། རྟ་གསེབ་ནག་པོའི་རྟི་ལིས་བརྒྱབ་ན་གསོད་ཐུབ་པ་དང་། དེ་བསད་ཚེ་ཀླུས་སྡོངས་གྲོགས་མཛད་ནས་ཕྱུག་པོར་འགྲོ་བར་བཤད་ལ། གཞན་ཡང་། ཀླུས་གནོད་པ་བྱུང་ཚེ་ཞི་བས་མ་ཐུབ་ན། ཀླུ་བདུད་སྡེར་མོ་ཆུ་མིག་སོགས་སུ་བསྟན་ཏེ་དྲག་ལས་ཀྱིས་ནད་སེལ་བ་དང་ཆར་འབེབས་པ་སོགས་བྱེད། རེབ་གོང་ཕྱོགས་སུ་རོང་བོ་དགོན་ཆེན་དང་རྫོང་དཀར་སོགས་སུ་ཀླུ་བདུད་ཀྱི་སྡེར་མོ་ཉར་ཚགས་བྱས་ཡོད་དོ། །དམངས་ཁྲོད་དུ་བཤད་པའི་ཀླུ་བདུད་ནག་པོ་ནི་ངག་རྒྱུན་ཙམ་མ་ཡིན་པར་གདོད་མའི་བོན་ཆོས་ཁག་ཏུ་འདི་ལྟར་བཤད་དེ། ཁོ་བོ་ཅགསྒྲ་བླ་ཁྱུང་ཆེན་བསེའུ་རུ་གཅིགཟེར་བ་དེ་ཡིན་ཞིང་། དེ་ནི་གདོད་མའི་མིའི་རིགས་ཀྱི་ཝེར་མར་བཀུར་ལ། དེ་བས། དེང་སྐབས་བོད་ཀྱི་ས་ཆ་ཁག་ནས་ཐོན་པའི་རིག་རྫས་ཐོག་ལྕགས་མང་བོར་ཡང་སྒྲ་བླ་ཁྱུང་ཆེན་བསེའུ་བཀོད་པ་འདི་ཡང་སྒྲ་བླ་ཁྱུང་ཆེན་བསེའུ་ལྷ་བཀུར་བའི་མཚོན་རྟགས་ཡིན་ལ། དེའི་རྣམ་པ་ཡང་། སྣང་གསལ་སྒྲོན་མེ་ལས། མཐུ་ཆུང་མཐུ་ཆེན་ཝེར་མའི་དམག་ཚོགས་ལ། །བྱེས་ཐུབ་མང་སྟེ་གཡུལ་ཐུབ་ཉུང་། །གཡུལ་ཐུབ་བསེའུ་རུ་གཅིག་ཡིན། །བསེའུ་པགས་པ་དམར་བ་ཡིན། །བསེ་ལ་གྲང་འབྲུམ་ཡོད་པ་དེ། །ཕ་དེ་གསེར་སྦལ་ཡིན་པར་ངེས། །བསེ་ལ་རི་མོ་ཡོད་པ་དང་། །རྭ་ལ་འོད་ཟེར་འཕྲོ་བ་དེ། །མ་ནི་མཚོ་སྨན་ཡིན་པའི་རྟགས། །ཁ་དྲག་བསེའུ་རུ་གཅིག་ལ། །དབང་ནི་ཀླུ་ཡི་རྒྱལ་བོ་བྱིན། །མཐུ་ནི་ས་བདག་རྒྱལ་བོས་བསྐྱེད། །འདི་སྟོད་ལ་ཁྱུང་གསུམ་རྩེ་སྤྲོད་ཡོད། །ཁྱུང་ཡིན་པའི་རྟགས་སུ་བྱ་གཤོག་ཡོད། །སྦལ་བ་ཡིན་པའི་རྟགས་སུ་ནི། །ལུས་ལ་ཆུ་རིས་ཆགས་པ་ཡིན། །ཞེས་སོ། །ཡང་། བོན་གྱི་སྒྲ་འགྲེལ་ལས། ཀླུ་བདུད་མིང་སྲིང་ལྔ་ཡང་བཤད་དེ། ཀླུ་བདུད་ནག་པོ། བ་ལང་རྟོལ་མགོ ཕག་ལུས་དོམ་མགོ མ་ཐེར་ཤེལ་ལྕགས། ཆུ་བདག་ནག་མོ་བཅས་སོ། །
༦ ཀླུ་ནད་སེལ་ཐབས། ཀླུ་ཤིང་ཤུག་པ་དང་། བ་ལུ། སྤེན་མ། བྲ་མ། སེ་བ། སྐྱེར་བ། སྟག་པ། ལྕང་མ། ཉ་ཁྲིག སྨྱུག་མ། སུར་དཀར། གཡེར་བ། ཚར་བུ། གླ་སྒང་། སྒྲོན་ཤིང་། འོམ་བུ་སོགས་སྲེག་སྟེ་བདུག་པ་དང་། དེ་ལས་གཞན། ཐང་ལོ་དང་། སྨྱུག་ལོ། རྨ་བྱའི་མདོངས། ཟི་ར་དཀར་ནག སྦྲུལ་གྱི་པགས་པ། དབང་བོའི་ལག་པ། ཆུ་སྲིན་སྡེར་མོ། ཛཱ་ཏི་ཕ་ལ། སྤང་སྤོས། རྒྱ་མཚོའི་ཝུ་བ། ཨུཏྤལ་སྔོན་པོ། རྒྱ་མཚལ་ལྕོག་ལ། དུང་ཕོར་མདོག་
བཟང་། གུ་གུལ་དཀར་བོ། སྙིང་ཞོ་ཤ གླ་གོར་ཞོ་ཤ མཁལ་མ་ཞོ་ཤ སྤུ་ཤེལ་རྩེ། ཆུ 
་དག རྡོ་རྒྱུས་བྱ་བལ་མ། བ་དམར་དང་ར་དཀར་གྱི་འོ་མ། ནཱ་ག་སྤུས་པ། ནཱ་ག་གེ་སར། ཏིལ་དཀར་ནག ག་བུར། གུར་གུམ། ཙན་དན་དཀར་བོ་དང་སྨུག་པོ། ཀ་ར། བུར་རམ། སྦྲང་རྩི་སོགས་ཀྱིས་ཀླུ་ནད་འཇོམས་པ་རཱ་ག་ཨ་སེའི་ཀླུ་བསང་དང་ཀླུའི་སྤང་སྐོང་སོགས་ལས་གསུངས་པ་བཞིན། གསོ་རིག་ལྟར་ནའང་། བྲ་ཤིང་ནི་རྩ་བ་རོ་མངར་བ། རང་བཞིན་བསིལ་བ། ནུས་པས་ཤ་ཚད་དང་རྩ་ཚད་འཇོམས་པ་དང་། སྐྱེར་བའི་མེ་ཏོག་དང་འབྲས་བུ་ཡང་རོ་སྐྱུར་ལ་ཁ་བ་དང་། རང་བཞིན་བསིལ་བ། ནུས་པས་འཁྲུ་བ་གཅོད་པ། སྐྱེར་ཤིང་གི་བར་ཤུན་རོ་ཁ་བས་དུག་ནད་སྡུད་ཐུབ་པ་དང་ཆུ་སེར་སྐེམ་པ། མཁྲིས་ནད་སོགས་སེལ་བའི་ཁྱད་ནུས་ལྡན་པ་ལྟ་བུའོ། །
གསོ་རིག་ལས་ཀྱང་། ཀླུ་ནད་འཇོམས་པ་ལ་ཀླུ་བདུད་རྡོ་རྗེའི་སྨན་རྩྭ་འདི་གཉེན་པོར་གསུངས་སྟེ། དེ་ནི། ནག་པོའི་འཁྲུངས་དཔེར། སྐྱེས་བུ་ཀླུ་བདུད་རྡོ་རྗེ་འདི། །ཉིན་ན་མི་སྐྱེ་སྲིབ་ན་སྐྱེ། །སྲིབ་ཀྱི་ཤིང་ཕྲན་གསེབ་ལས་སྐྱེ། །ལོ་མ་དངུལ་གྱི་མདེའུ་ཞིབ་འདྲ། །སྡོང་བུ་སྨུག་རིང་ལྕགས་སྐུད་འདྲ། །མེ་ཏོག་ཐལ་ཀར་གླང་ཆེན་མདོག །དྲིལ་བུ་འདྲ་བ་ཐུར་དུ་བུབ། །ཟེའུ་འབྲུ་རྡོ་རྗེའི་ར་རྩེ་འདྲ། །ནང་མདོག་ཀླད་པའི་རྩ་རིས་ཅན། །སྣོམ་ན་གླང་ཆེན་དྲི་མ་བྲོ། །བཅད་ན་འོ་མའི་ཁུ་བ་འབབ། །རོ་ནི་ཁ་ཚ་བསྐ་ལ་བསིལ། །ནུས་པས་ཀླུ་ནད་ས་གདོན་འཇོམས། །ཞེས་སོ། །
དེ་ལས་གཞན། རཱ་ག་ཨ་སེའི་གནམ་ཆོས་ས་བདག་འཁྲུག་བཅོས་ལས། རྒྱ་མཚོ་ལྦུ་བས་ཀླད་ཉམས་གསོས། །ཕྱག་ཚང་ཀུ་བས་མགོ་ཉམས་གསོས། །ཨུཏྤལ་འཕེལ་བས་མིག་ཉམས་གསོས། །གླ་གོར་ཞོ་ཤས་རྣ་བ་གསོས། །ཉ་ཕྱིས་སྣ་དང་འགྲམ་པ་སོས། །མཚལ་དང་ལི་ཁྲིས་ཤ་ཁྲག་སོས། །མཁལ་མ་ཞོ་ཤས་མཁལ་མ་སོས། །ཤུ་དག་དཀར་བོས་རུས་ཉམས་སོས། །དབང་ལག་ལག་པ་ཉམས་པ་སོས། །ཆུ་སྲིན་སྡེར་མོས་རྐང་ཉམས་སོས། །རྡོ་རྒྱུས་ཆུ་རྒྱུས་ཉམས་པ་སོས། །མགྲོན་བུས་སོ་ཉམས་ཐམས་ཅད་སོས། །ལེ་བརྒན་དར་གྱིས་ལྗགས་ཉམས་སོས། །ཨ་རུ་ར་སོགས་བཟང་དྲུག་གིས། །ནང་ཁྲོལ་ཉམས་པ་ཐམས་ཅད་སོས། །ཤིང་ལོ་དར་ཟབ་པགས་ཉམས་སོས། །ཞེས་གསུངས་སོ། །
གཉན།
གཉན་གྱི་སྒྲ་བཤད་ལ་ཐམས་ཅད་ཡོངས་སུ་གཉན་པས་ན་གཉན་ཞེས་བརྗོད་ལ། སྒྲ་འགྲེལ་ལས། གཉན་ནི་ཡུལ་ལྷའི་རིགས་ལས་དགར་བ་ཞིག་ཏུ་འདོད་ལ། གཉན་རིགས་ཀུན་གྱི་བདག་པོ་ནི་གནམ་སའི་བར་ན་སྡོད་པའི་ལྷ་རབས་གཉན་རབས་རྗེ་ཞེས་པ་དེ་ཡིན་པར་བཤད།
གཞན་དུ། གཉན་ཐམས་ཅད་ཀྱི་གཙོ་བོ་ནི་སྦར་བ་དུང་མགོ་གཡུའི་ཐོར་ཚུགས་ཅན་བྱ་བ། སྤྲུལ་བ་བསམ་གྱིས་མི་ཁྱབ་པ། ཉི་མའི་འོད་ཟེར་ཕྱོགས་བཞི་མཚམས་བརྒྱད་དུ་སྤྲོ་བ་དེ་ཡིན་པར་བཤད། ཡང་། གཉན་གྱི་རྣམ་གྲངས་ལ། ཀླུ་འབུམ་ལས། གཉན་དཀར་བོ་བྱ་བ་དང་། ཉི་གཉན་དང་། ཟླ་གཉན་དང་། སྐར་གཉན་དང་། གཟའ་གཉན་དང་། གཞའ་གཉན་དང་། སྤྲིན་གཉན་དང་། རྫ་གཉན་དང་། རླུང་གཉན་ལ་སོགས་པ་བསམ་གྱིས་མི་ཁྱབ་པ་ཞིག་ནམ་མཁའ་དང་མཚུངས་པར་བར་སྣང་ལ་གནས་ཡོད་དོ། །ཞེས་དང་། གནམ་ས་སྣང་བརྒྱད་ལས། གཉན་གཡུ་འབྲུག་སྔོན་མོ་གསེར་གྱི་ཟེ་བ་ཅན་དང་། ས་གཉན་གསེར་གྱི་སྦལ་བ་ལ་གཡུའི་བྲང་འབྲུམ་ཅན་དང་། གངས་གཉན་སེང་གེ་དཀར་མོ་ལ་གཡུའི་རལ་བ་ཅན་དང་། མཚོ་གཉན་འཕྱོང་གི་ལྕོང་མོ་ལ་དུང་གི་འདབ་མ་ཅན་དང་། བྲག་གཉན་གསེར་གྱི་སྤྲེའུ་ལ་དུང་གི་ཐོར་ཚུགས་ཅན་དང་། གསེར་གཉན་དྲ་མ་དང་། ས་གཉན་དང་། ཆུ་གཉན་དང་། རྡོ་གཉན་དང་། གཉན་ཆེན་པོ་སྡེ་བཞི་སོགས་སུ་གསུངས་སོ། །
གངས་རི་དང་། གཡའ་བྲག་དང་། རྩི་ཤིང་དང་། ནགས་ཚལ་དང་། ས་གཞི་དང་ཆུ་ལ་གནས་པའི་གཉན་ཁམས་བསམ་གྱིས་མི་ཁྱབ་པ་ཞིག་ཡོད་དོ། །བོད་དུའང་གཉན་ཆེན་པོ་ཐང་ལྷ་ཡར་བཞུར་སོགས་གཉན་ཐུ་བོ་ཆེ་དང་། རྫ་བྲག་དང་མཚོ་རྫིང་སོགས་གཉན་གནས་འགངས་ཆེན་མང་ངོ་། །གཞན་ཡང་། རྒྱལ་རོང་དམུ་རྡོའི་དབང་ཕྱུག་གི་འཁོར་དུ་གཉན་ཆེན་སྡེ་བཞིའི་བསྐོར་ཡོད་པར་བཤད་པ་སྟེ། ཤོ་ཝོ་གཉན་ཆེན། ས་ཝོ་གཉན་ཆེན། གཡུ་འབྲུག་གཉན་ཆེན། ཐོ་ཝོ་གཉན་ཆེན་ནོ། །
མཚམས་རེར་གཉན་གྱི་གཟུགས་ནི་བྱ་རྒོད་དང་། འབྲོང་གཡག གླང་དང་། བྱི་བ་དང་། སྦྲུལ་སོགས་སྣང་དུ་ཡོད་པར་བཤད་དེ། བོན་གྱི་བཤད་སྲོལ་ལ་གཉན་གེ་ཁོད་ཅེས་པ་དེ་ཡང་། དང་ཐོག་གཡག་རྒོད་དཀར་བོ་ཞིག་གིས་རྣམ་པས་གངས་རི་ཏི་སེ་ལ་ཐིམ་པར་བཤད་པ་དང་། གཉན་ཆེན་ཐང་ལྷ་གཟུགས་བོང་ཆེ་ཞིང་གཏུམ་དྲག་ལྡན་པའི་བྱ་རྒོད་ཀྱི་རྣམ་པས་རི་དེར་གནས་པར་འདོད་པ་དང་། ཡང་། སློབ་དཔོན་པད་འབྱུང་གིས་ཐང་ལྷ་སྦྲུལ་ཆེ་གེ་མོ་ཞིག་ཏུ་མཐོང་བ་ལྷ་འདྲེ་བཀའ་ཐང་ལས་གསུངས་པ་དང་། ལྔ་བ་ཆེན་པོས་ལྷ་དེ་རྟ་དཀར་བཅིབ་པའི་མི་འདྲ་བ་ཞིག་ཏུ་གཟིགས་པ་དང་། གཉན་གྱི་སྤང་སྐོང་ལས། གླང་དང་བྱི་བ་བསད་དུ་མི་རུང་། གཉན་གྱི་བུ་དང་བུ་མོའི་སྤྲུལ་བ་ཡིན། གསུངས་པ་དང་། ཡང་། གཉན་ནི་གཞི་བདག་ལས་མཆེད་པར་བཤད་པ་ལྟར། ཡར་ལྷ་ཤམ་པོ་ཡང་གཟུགས་སྟོབས་རི་ལྟར་ཆེ་བའི་གཡག་ཅིག་གི་ངོས་ནས་སློབ་དཔོན་པད་འབྱུང་གི་ཕེབས་ལམ་བཀག་པར་ལྷ་འདྲེ་བཀའ་ཐང་ལས་གསུངས་པ་དང་། བོད་རྒྱལ་གྲི་གུམ་གྱི་བཙུན་མོ་རི་ལས་གཉིད་པའི་རྨི་ལམ་དུ་མཛངས་བློན་རུ་ལས་སྐྱེས་མངལ་དུ་འཁོར་ཚེ་ཡང་། གཉིད་ལས་སད་ཚེ་མོའི་གམ་དུ་གཡག་དཀར་བོ་ཞིག་ཉལ་སྡོད་པ་གཟིགས་སོ། །དེ་ལས་གཞན། ཀླུའི་སྤང་སྐོང་ལས་གཉན་མི་ལུས་ཤྭ་མགོ་ཅན་དང་། མི་ལུས་དྲེད་མགོ་ཅན། མི་ལུས་རྟ་མགོ་ཅན་ཡང་བཤད་དོ། །
གཉན་ཅེས་པའི་ཐ་སྙད་ཀྱི་སྟེང་ནས་གོ་བ་བླངས་ནའང་། གཉན་པོ་དུག་གི་སྡོང་བོ་ཞེས། ཕར་གནོད་པ་བག་ཙམ་བྱས་ནའང་སླར་འཁོན་ལན་འཆོར་མེད་དུ་སློག་པ་ཞིག་ཏུ་ངོས་འཛིན་པ་དང་། ཡུལ་སྡེ་སྤྱི་ལ་ནད་ཡམས་འཐབ་རྩོད་འཁྲུག་ལོང་དང་། མུ་གེ་བཙའ་ཐན་སད་སེར་སོགས་འབྱུང་བ་དང་། གསོ་རིག་ལས་ཀྱང་གཉན་ལ་ཕོག་ཐུག་བཟོས་ཚེ། གཉན་ནད་བཅོ་བརྒྱད་ཀྱིས་ཐེབས་པར་བཤད་དེ། ཀླད་གཟེར་དང་། གགས་པ། གཟེར་ཐུང་། གཅན་གླང་། མེ་དཔལ། གཡན་པ། གཉན་རྨེན་བུ། ཉྭ་ལོག ལྷོག་པ། གཉན་འབྲས། འཛུམ་ལྟག་དགྱེ། མཁྲིས་པ་རྩར་རྒྱུག ནང་ལྷོག གཉན་ཁ་མེད། གཉན་འཁྱམ་པོ། གཉན་འབུར། རྣ་རྩ་ཕུས་འདེབས། གཉན་ངམ་རུ་བཅས་ལས་གང་རུང་དང། གཙོ་བོ་རྩ་རྒྱུས་བཀུམ་ནས་འཇའ་བར་བྱེད་པའི་ནད་སོགས་གཏོང་བར་གསུངས་སོ། །
གཞན་དུ་ན། གཉན་ཞེས་པ་རུས་རྒྱུད་ཚོ་བ་དང་འབྲེལ་བ་ཡོད་པའི་མིའི་འགྲོ་བ་ཞིག་ཏུའང་སྣང་སྟེ། བོན་གཞུང་རྙིང་བ་རྣམས་སུ་མི་དང་གཉན། བདུད་གསུམ་གྱི་བར་དུ་དམག་འཁྲུག་ལངས་པ་སོགས་མཐོང་རྒྱུ་ཡོད། དཔེར་ན། དབུ་ནག་མིའི་འདྲ་ཆགས་ལས། ཨ་མྱེས་གཉན་རྒན་དེ་བ་དེས། །ཁོས་ངའི་བུ་མོ་བསད་དགོངས་ནས། །གཉན་གྱི་གཟེར་མདའ་ནག་པོ་ཕངས། །ཨ་མྱེས་ཁྲི་ཐོ་ཆེན་པོ་བསད། །གདོང་དྲུག་བོད་ཀྱི་ཨ་བོ་གཉན་གྱིས་བསད། །ཅེས་གསུངས་ལ། ཁྱད་པར་དུ་ལོ་རྒྱུས་ཁག་ནས་མ་སངས་ཀྱིས་བོད་ཁམས་དབང་བསྒྱུར་ཞེས་པའི་མ་སངས་དང་གཉན་ཡང་མིང་གི་རྣམ་གྲངས་སུ་འདོད་པ་ཡོད་ལ། དེ་ཡང་བདེན་མཆི་སྟེ། ཏུན་ཧོང་ཡིག་རྙིང་ལས། ཀུ་བྱི་སེར་བཞི་ཞེས་པའི་ལྷ་དེ་ནི་གཉའ་ཁྲི་བཙན་པོའི་མེས་པོ་གསུམ་གྱི་གྲས་སུ་བཤད་ལ། ལྷ་དེ་ནི་མ་སངས་ཀུན་ཀྱི་བདག་པོ་ཡིན་ཚུལ་བཀོད་ཡོད།
དེ་བཞིན་དུ། གླིང་སྒྲུང་ནང་གེ་སར་ནི་མ་སངས་ཀྱི་གདུང་རྒྱུད་དུ་ངོས་འཛིན་བྱས་པ་ཡང་། གེ་སར་གྱི་ཕ་ནི་གཉན་གེར་མཛོ་ཞེས་པ་ཁམས་ཤར་ཁུལ་གྱི་གེ་མཛོ་རི་བོའི་གཞི་བདག་དེ་ཡིན་པར་བཤད་ཡོད། གང་ལྟར་གཉན་ཞེས་པ་འདི་གདོད་མའི་རུས་རྒྱུད་ཀྱི་མིང་དུ་བེད་སྤྱོད་བཏང་བ་ཞིག་ཡིན་ལ། རུས་རྒྱུད་དེ་ལས་མི་སྣ་རླབས་ཆེན་འདས་རྗེས་སུ་ལྷ་ལ་བཀུར་ཏེ་གསོལ་མཆོད་བྱས་པའི་སྲོལ་ཆགས་པར་འདོད། དེ་ལ་ད་ལྟའི་སྐད་ཆའི་ཁྲོད་དུ་དཔེ་གསོན་པོ་ཞིག་མཆིས་ཏེ། དཔེར་ན། ཨ་མྱེས་གཉན་ཆེན་དང་། ཨ་མྱེས་རྨ་ཆེན། ཇོ་བོ་སྒྱོགས་ཆེན་གདོང་ར། ཨ་ཕྱི་གཡུ་སྒྲོན། ཨ་ནེ་གོང་སྨན་རྒྱལ་མོ། གཞན་ཇོ་ཇོ་དང་། ཇོ་མོ་སོགས་ཀྱི་ཐ་སྙད་དྲོད་མ་ཡལ་བར་ཡོད་པས་ཤེས་སོ། །ཁྱད་པར་དུ་གཉན་ཞེས་པའི་ཐ་སྙད་ཀྱི་སྟེང་ནས་གཞིགས་ནའང་། གཉན་རུས་ལས་འཁྲུངས་པའི་མི་སྣ་དང་། འདས་རྗེས་ཀྱི་གཉན་རིགས་སུ་སྐྱེས་པ་དེ་དག་ལ་གནོད་པ་སྐྱེལ་ན་སླར་ལེ་ལན་གཏིང་ཐག་ཆོད་པ་ལེན་ངེས་པས། འགྲོ་བ་མི་རྣམས་ཧ་ཅང་འཚེར་ཆེ་ལ། བོད་ཀྱི་སྐད་ཆའི་ཁྲོད་དུ་འང་། སྐུ་བླ་གཉན་པོ་དང་། གཉན་པོ་དུག་གི་སྡོང་བོ། ལུང་གཉན་པོ་དང་། བཀའ་གཉན་པོ། ལྷ་གཉན་དང་ཀླུ་གཉན། ལྷ་རི་གཉན་པོ་དང་། ད་དུང་ལྷ་ཐོ་ཐོ་རི་སྙན་བཙན་གྱི་སྐབས་ལྷ་རྟེན་ཆོས་གསུམ་སྐོར་ཞིག་གནམ་ལས་བབས་པར་གྲགས་པའང་གཉན་པོ་གསང་བ་ཞེས་མིང་འདོགས་གནང་བ་ཡིན་ནོ། །
མི་འམ་ཅི།
མི་འམ་ཅི་ནི། དུད་འགྲོའི་ཁོངས་གཏོགས་ཏེ། འདུལ་བ་མདོ་རྩའི་མཆན་དུ། དུད་འགྲོ་མིའི་རྣམ་པ་ཅན་གཟུགས་ཤིན་ཏུ་བཟང་བ་རྣམས་དང་། ཞེས་གསུངས་ལ། ཡང་ཁ་ཅིག མིའི་ལུས་ལ་རྟའི་གདོང་བ་ཅན་ཞིག་ཏུའང་འདོད་དོ། །
ལྟོ་འཕྱེ།
འདི་ཡང་དུད་འགྲོའི་ཁོངས་སུ་གཏོགས་ཞིང་། མདོ་རྩའི་མཆན་དུ་ལྟོ་འཕྱེ་ཆེན་པོ་ནི་ལྟོར་འཕྱེ་ཞིང་འགྲོ་བའི་སྦྲུལ་ཆེན་པོ་དགའ་བོ་དང་ཉེ་དགའ་སོགས་ཡིན་པར་བཤད་ལ། བྱེ་བྲག་ཏུ་ས་བདག་ལྟོ་འཕྱེ་ཆེན་པོ་ནི། སྟོད་མི་ལ་སྨད་སྦྲུལ་མཇུག་ཅན། སྐུ་མདོག་དཀར་བོ་གཡས་ནོར་བུ་དཀུར་བརྟེན་ཅིང་། གཡོན་རྣ་བར་བཀབ་པ། ཉལ་སྟབས་སུ་བཞུགས་པ། རྣ་བར་པདྨ་དཀར་བོ་དང་། མགྲིན་པར་འཇོག་པོ་དམར་བོ་དང་། སྙིང་གར་ནོར་རྒྱས་ལྗང་གུ། མཇུག་རྩེར་རིགས་ལྡན་སྔོན་པོ་རྣམས་སྟོད་མི་ལ་སྨད་སྦྲུལ་མཇུག་ཅན། ཕྱག་གཉིས་ཐལ་མོ་སྦྱར་ཞིང་སྦྲུལ་གྱི་གདེངས་ཀ་ཅན་ཞིག་དང་། ཉི་མ་སུམ་བརྒྱ་དྲུག་ཅུ་ལ་ལུས་པོ་འཁོར་ཐེངས་གཅིག་བྱེད་ཅིང་། སའི་བདག་པོ་ཁོ་རང་དུ་རློམ་པས། ས་རྐོ་རྡོ་སློག་བྱས་ན་ཁོའི་ཤ་ལས་དྲས་པ་ལྟ་བུའི་ཚོར་བ་འབྱུང་བའི་སེར་སྣ་ཆེ་བ་ཞིག་གོ །
གནོད་སྦྱིན།
མཆིམས་མཛོད་ལས། གནོད་སྦྱིན་ཕལ་མོ་ཆེ་ལྷའི་སྡེ་གཏོགས་དང་། ཀླུ་དང་ཡི་དྭགས་ཀྱི་རིགས་སུ་གཏོགས་པའང་ཡོད་པར་བཤད། མདོ་རྩའི་མཆན་དུ། གནོད་སྦྱིན་ནི་རྣམ་ཐོས་ལ་སོགས་པའི་ལྷའི་གནས་སུ་མཆོད་པར་བྱ་བ་གཏོར་མ་ལེན་པ་རྣམས་སོ། །ཞེས་པ་ལྟར། གནོད་སྦྱིན་གྱི་སྡེ་དཔོན་ཆེན་པོ་ནི་རྣམ་སྲས་ཡིན་ལ། དེ་ལ་གཙོ་འཁོར་བརྒྱད་དེ། ཛམ་བྷ་ལ། གང་བ་བཟང་བོ། ནོར་བུ་བཟང་བོ། ཡང་དག་ཤེས། འབྲོག་གནས་ནག་པོ། ལྔ་རྩེན་སེར་སྐྱ། ཙི་པི། ཀུན་དྷ་ལི་བཅས་སོ། །དེ་དག་ནི་ལོངས་སྤྱོད་ཧ་ཅང་ཆེ་བ། སྐུ་ཤ་རྒྱས་ཤིང་གསུས་ཁྱིམ་ཆེ་བ། ཕྱག་ན་དཔག་བསམ་ཤིང་དང་། རིན་པོ་ཆེ། གཏེར་བུམ། ནེའུ་ལེ་འཛིན་པ་དག་གོ །
ཡང་། རིགས་སྔགས་ཀྱི་རྒྱལ་མོ་རྨ་བྱ་ཆེན་མོ་ལས་འབྱུང་བ་ལྟར་ན། ཤར་དུ་རིང་བོ་དང་། མིག་བཟང་དང་། གང་བོ་དང་། སེང་སྐྱ་སྟེ་བཞི། ལྷོར་སེང་གེ་དང་། ཉེ་བའི་སེང་གེ་དང་། དུང་ཅན་དང་། དགའ་བོ་སྟེ་བཞི། ནུབ་ཏུ་སེང་གེ་དང་། སེང་གེ་རལ་བ་ཅན་དང་། བླ་མ་དང་། སེར་སྐྱ་སྟེ་བཞི། བྱང་དུ་འཛིན་པ་དང་། འཛིན་དགའ་དང་། བརྩོན་སྐྱོང་དང་། ཁྱབ་འཇུག་སྟེ་བཞི། ཕྱོགས་མཚམས་སུ་ལྔ་སྤྱོད་དང་། ཚིགས་ལྔ་སེར་བོ་དང་། རི་མཉམ་དང་། གསེར་ཅན་ཏེ་བཞི། ས་ལ་པ་བ་དང་། ཤིན་ཏུ་སངས་དང་། ནག་པོ་དང་། ཉེ་ནག་སྟེ་བཞི། བར་སྣང་ལ་ཉི་མ་དང་། ཟླ་བ་དང་། མེ་དང་། རླུང་སྟེ་བཞི་བཅས་ཁྱོན་བསྡོམས་གནོད་སྦྱིན་ཉེར་བརྒྱད་དོ། །
འདུལ་གཞུང་ལས། ཀུན་དགའ་བོ་ཁྱོད་ཀྱིས་རྣམ་ཐོས་བུའི་ཆོས་ཀྱི་སྤུན་གང་ཡིན་པ་དག་སེམས་ཅན་རྣམས་སྲུང་ཞིང་སྐྱོང་བར་བྱེད་པ། འཇིག་རྟེན་ན་ཡམས་ཀྱི་ནད་དང་གནོད་པ་དང་འཁྲུགས་པ་མེད་པར་བྱེད་པ། འཇིག་རྟེན་ན་ཕན་པར་བྱེད་པ་རྣམས་ཀྱི་མིང་ཟུངས་ཤིག འདི་ལྟ་སྟེ། དབང་བོ་དང་། ཟླ་བ་དང་། ཆུ་ལྷ་དང་། སྐྱེ་དགུའི་བདག་པོ་དང་། བྷ་ར་དྷྭ་ཛ་དང་། དབང་ལྡན་དང་། ཙན་དན་དང་། འདོད་པའི་གཙོ་བོ་དང་། མགྲིན་ངན་དང་། པ་ཊི་དང་། ནོར་བུ་དང་། ནོར་བུ་སྤྱོད་དང་། སྒྲ་རབ་དང་། ཉེ་ལྔ་བོ་དང་། རི་མཉམ་དང་། གསེར་ཅན་དང་། གང་བོ་དང་། སེང་ལྡེང་དང་། གཡོན་ཅན་དང་། བ་ལང་སྐྱོང་དང་། འབྲོག་གནས་དང་། མི་ཡི་རྒྱལ་བོ་དང་། རྒྱལ་བའི་ཁྱུ་མཆོག་དང་། ལྕགས་མདུང་རིང་བོ་དང་ལྡན་པ་སྟེ། གནོད་སྦྱིན་ཆེན་པོ་རྣམས་སོ། །
འོན་ཀྱང་། ལོ་རྒྱུས་ཆེན་མོའི་སྐབས་སུ། དང་བོ་གནོད་སྦྱིན་ནག་པོས་དབང་བྱས་ཏེ། །ཞེས་དང་། སྤྲིན་གྱི་ཕོ་ཉ་ལས། གནོད་སྦྱིན་རྒྱལ་བོའི་མཛོད་གཉེར་ཞིག རྒྱལ་བོར་འགལ་ཏེ་ཆད་པ་བཅད་པ་དེ་དང་། སྐབས་འདིར་བཤད་ཀྱི་གནོད་སྦྱིན་གཅིག་ཏུ་འགབ་པར་མི་བྱའོ། །
དྲི་ཟ།
དྲི་ཟའི་སྐད་དོད་ལ་གྷནྡྷ་རྦ་ཟེར་ལ། འདུལ་ཊྭཱྃཀ་ཉི་མའི་འོད་ཟེར་ལས། དྲི་ཟ་ནི་ལྷའི་བྱེ་བྲག་ཏུ་གསུངས་ལ། ཟས་སུ་དྲི་ཟ་བའི་ཆ་ནས་དྲི་ཟ་ཟེར། གནས་ནི་འཇིག་རྟེན་འདི་ཉིད་ཀྱི་ཤར་ཕྱོགས་དྲི་ཟའི་གླིང་ན་ཡོད་ཅིང་། དེ་རྣམས་ལུས་ཀྱི་མཛེས་སྡུག་མི་ལས་ལྷག་ཅིང་། ལྷ་ལས་དམན་པ་ཡིན་ལ། གླུ་གར་རྩེད་འཇོ་ལ་ཧ་ཅང་མཁས་པས། ཅོ་ནེ་གྲགས་པ་བཤད་སྒྲུབ་ཀྱིས་ཀྱང་། དྲི་ཟ་ནི་རྒྱལ་བོ་ཡུལ་འཁོར་སྲུང་གི་འཁོར་ན་ཡོད་ཅིང་ལྷའི་པི་ཝང་མཁན། ཟས་སུ་དྲི་ཟ་བ་ཞིག་གོ །གསུངས། ཡོངས་གྲགས་སུ་དྲི་ཟའི་རྒྱལ་བོ་ཏམྦུ་ར་དང་། ལྗོན་པ་རྟ་མགོ དེའི་སྲས་མོ་ཡིད་འཕྲོག་མ་སོགས་དང་། བོན་གྱི་སྒྲ་འགྲེལ་ལས། དྲི་ཟ་ཕོ་མོ་དྲུག་ཀྱང་གསུངས་ཏེ། རྩིབས་ཀྱི་འཕྲེད་ལ་འཕྱོ་ཞིང་དྲི་ཟ་ཕོ་མོ་གཉིས། དྲི་ལ་ཉེ་བར་འཁོར་གྱིན་དྲི་ཟ་ཕོ་མོ་གཉིས། མཁའ་ལ་ལྡིང་ཞིང་དྲི་ཟ་ཕོ་མོ་གཉིས། ཞེས་བཤད་དོ། །
ཤ་ཟ།
ཤ་ཟའི་སྐད་དོད་དུ་ལེགས་སྦྱར་དུ་པི་ཤ་ཙཿཟེར་ལ། ལྒིང་འབུམ་རྣམ་བཤད་ལས། ཤ་ཟ་ནི་ཡི་དྭགས་ཀྱི་བྱེ་བྲག་སྟེ། ཤ་ཁྲག་ཟ་བ་ནག་པོ་ལ་སོགས་པ་དང་། ཤེས་རབ་བྱེད་པ་ལས། ཤ་ཟ་ནི་མི་ལ་ཀྱལ་ཀ་བྱེད་པ་དེན་པོ་འམ་ཐེའུ་རང་ལྟ་བུའོ། །ཞེས་དང་།
དབྱིབས་ནི་ཡི་དྭགས་བཞིན་ལུས་ཕྲ་བ་ཞིག་ཡིན་པར་བཤད་དེ། ཅོ་ནེ་གྲགས་པ་བཤད་སྒྲུབ་ཀྱི་གདུགས་དཀར་འགྲེལ་བ་ལས། ཤ་ཟ་ནི་ལུས་ཤིན་ཏུ་ཕྲ་ཞིང་མི་ཤ་ཟ་བ་ལ་དགའ་བའོ། །གསུངས་ལ། རྡུལ་ཁྲོད་ཀྱི་ཤ་ཟ་ནི། ཕྱགས་དར་ཁྲོད་ཀྱི་འདྲེ་འམ་ཚུབ་མའི་འདྲེའོ། །ཞེས་རྣམ་འབྱེད་འགྲེལ་བ་ལས་གསུངས་སོ། །
ཁ་ཟས་ནི། གཏོར་མ་ཆ་གསུམ་ལས། གང་ཞིག་མཚན་མོ་རྒྱུ་བ་ཡི། །འབྱུང་བོ་རྣམས་དང་ཤ་ཟ་དང་། །སྲིན་པོ་ཤ་རྗེན་ཟ་བ་དང་། །སེམས་ཅན་རྣམ་པ་སྣ་ཚོགས་དང་། །ལྗོན་ཤིང་གེལ་བ་སོགས་གནས་པ། །དེ་དང་དེ་ལ་གཏོར་མ་ནི། །བཟའ་བ་ཤ་ཆང་ལ་ཕུག་བཅས། །འབྲས་ཆན་འབྲས་བུ་མང་བོ་དང་། །མཆོད་པ་འདི་ཡིས་མགུ་བྱོས་ལ། །ཞེས་གསུངས་སོ། །
ལུས་སྲུལ་བོ།
ལུས་སྲུལ་བོ་ནི། མཚོ་སྣ་བས་ཡི་དྭགས་ཀྱི་རིགས་ཡིན་པར་བཤད་ལ། ལུས་ཐུང་ཞིང་དྲི་ང་བ། སེག་དང་རེ་ལྡེ་སོགས་གོས་ཧྲུལ་གྱོན་པ་ཞིག་ཏུ་བཤད། ཆ་གསུམ་གྱི་འགྲེལ་བར་ཡང་། ལུས་སྲུལ་བོ་ནི། ལུས་དྲི་ང་བ་སོགས་དང་། རེ་ལྡེ་གོན་པའི་ཡི་དྭགས་ཀྱི་བྱེ་བྲག་གོ་གསུངས་སོ། །
གྲུལ་བུམ།
གྲུལ་བུམ་ཡང་ཡི་དྭགས་ཀྱི་ཁོངས་སུ་མཚོ་སྣ་བས་གསུངས་པ་དང་། བོད་རྒྱ་ཚིག་མཛོད་ཆེན་མོ་ལས། རྒྱ་མཚོའི་ནང་དུ་གནས་པའི་གནོད་སྦྱིན་མིའི་དབྱིབས་དང་འདྲ་ལ། མགོ་བོ་སྲོག་ཆགས་སྣ་ཚོགས་ཀྱི་མགོ་ཅན། རྐང་ལག་གི་གྲུ་མོ་དང་རྣ་བའི་སྟེང་དུ་ཤའི་རལ་བ་ཡོད་པ་ཞིག ཅེས་དང་། ཡང་། བཀྲ་ཤིས་བརྩེགས་མདོ་ལས། དེ་དག་བདག་པོ་རྒྱལ་བོ་ནི། །འཕགས་སྐྱེས་བོ་ཞེས་བྱ་བར་བརྗོད། །དེ་ནི་གྲུལ་བུམ་ཀུན་གྱི་བདག །ཅེས་འཕགས་སྐྱེས་བོ་ནི་གྲུལ་བུམ་ཀུན་གྱི་བདག་པོའང་བཤད་དོ། །
གྲུལ་བུམ་གྱི་གདོན་གྱིས་བཏབ་པའི་ནད་རྟགས་ནི་ངོ་ཇེ་ནག་ཏུ་སོང་སྟེ། དལ་བར་འགྲོ་ཞིང་རླིག་པ་སྐྲངས་པ་ཞིག གསུངས་སོ། །འདིར་དངོས་བྱུང་ཞིག་ལ། ལོ་རབས་བརྒྱད་ཅུ་བའི་དུས་མགོའི་ཚགས་པར་ཞིག་ཏུ། ཀྲུང་གོའི་རྡོ་སྣུམ་རྩད་ཞིབ་རུ་ཁག་ཅིག་ལྷོ་ཕྱོགས་རྒྱ་མཚོའི་གླིང་ནས་ལོག་ཁར་མི་ལུས་ཉ་མགོ་ཅན་གྱི་སྟོབས་པོ་ཆེ་གཉིས་གྲུ་སྟེང་དུ་འགོས་ཡོང་བར། གྲུ་ཐོག་འཁྱག་ཁང་གི་སྒོ་ཕྱེ་སྟེ་འཛུལ་བྱུང་བས། ཁོང་ཚོས་ཞེད་སྣང་གིས་སྒོ་ཟྭ་དམ་པོར་བརྒྱབ་སྟེ། སྐམ་སར་ཐོན་དུས་སྒོ་ཕྱེས་པས་དེ་གཉིས་འཁྱག་ཤི་ཐེབས་ཟེར། ཚགས་པར་དེའི་སྟེང་སེམས་ཅན་དེ་གཉིས་ཀྱི་བྱད་གཟུགས་དང་བོངས་ཚད་སོགས་གསལ་བར་འཁོད་ཡོད། བོད་ཀྱི་མཁས་པས་བརྟག་དཔྱད་གནང་བ་ལྟར་ན། དེ་ནི་གྲུམ་བུམ་གྱི་རིགས་ཡིན་པར་བཞེད། ཆོས་འདུལ་བ་ལས། མེའི་ཁང་བར་གྲུལ་བུམ་མེ་སྦར་བ་འབྲི་བར་བཤད་པ་དང་། ཁ་ཟས་སུ་སྐྱུགས་པ་ཟ་བར་གདུགས་དཀར་འགྲེལ་བ་ལས་བཤད་དོ། །གཞན་དྲན་མེད་དུ་སྨྱོ་བར་བྱེད་པའི་སྨྱོ་བྱེད། དྲན་པ་ཉམས་ཞིང་བརྒྱལ་བར་བྱེད་པའི་བརྗེད་བྱེད་སོགས་ཀྱང་ཡི་དྭགས་ཀྱི་ཁོངས་སུ་ཐེ་བར་མཆིམས་མཛོད་ལས་གསུངས་སོ། །
མ་མོ།
མ་མོ་ཞེས་པའི་ཐ་སྙད་འདི། ནམ་མཁའི་ནོར་བུས་བོན་ལས་དབྱལ་མ་མོ་ཞེས་པ་སྟེ། དབྱལ་ནི་ལྕམ་གྱི་བརྡ་རྙིང་དུ་བཤད་ཅིང་། མ་མོ་ཞེས་པ་ནི་དབྱལ་གྱི་ནང་ནས་ཀྱང་ཆེས་སྔ་བའི་མ་ཆེན་མོ་ལྟ་བུ་ཞིག་ཡིན་ཡང་ཟེར།
མ་མོ་བརྒྱད་ནི། འཇིག་རྟེན་པའི་ལྷ་ཆེན་པོ་བརྒྱད་ཀྱི་བཙུན་མོ་སྟེ། བདེ་ཆེན་བློ་བཟང་ཆོས་འཕེལ་རྒྱ་མཚོའི་གདུགས་འགྲེལ་ལས། དབང་མོ་ཚངས་མ། ཁྱབ་འཇུག་མ། དྲག་མོ། གཞོན་ནུ་མ། ཕག་མོ། དཔལ་མོ། རྒན་བྱེད་མ་སྟེ་མ་མོ་བརྒྱད་དང་། ཀློང་རྡོལ་བླ་མས། ཚངས་མ། དྲག་མོ། ཁྱབ་འཇུག་མ། གཞོན་ནུ་མ། དབང་མོ། ཕག་མོ། གཤིན་རྗེ་མོ། ལུས་ངན་མོ་བཅས་འདྲེན་པ་དང་། གཞན་ཡང་། མ་མོ་བདུན་འདྲེན་ཚེ། ཚངས་མ་དབང་མོ་གཞོན་ནུ་མ། །ལྷ་ཆེན་མ་དང་རྟོག་འདོད་མ། །རྒན་ཆེན་མ་དང་སྣ་ཆེན་མ། །ཞེས་སོ། །
ཡང་། ཐུའུ་བཀྭན་ཆོས་ཉིའི་རྟ་མགྲིན་གསང་སྒྲུབ་ཀྱི་ནད་བདག་སྟོབས་འཇོམས་ཀྱི་ཆོ་ག་འཁྱེར་བདེ་ལས། ནད་བདག་མོ་བུད་མེད་ནག་མོ་འཇིགས་པའི་གཟུགས་ཅན་ཁྲག་གི་རལ་བ་བསྙིལ་བ་ཐལ་མོ་བརྡེབ་པའི་ཚུལ་ལངས་སྟབས་སུ་ཡོད་པ་ཆེ་བ་གཅིག་དང་། ཕྱོགས་བཞིར་རང་འདྲ་དེ་ལས་ཆུང་བ་བཞི། ཞེས་གསུངས་ལ། ནད་བདག་མ་མོ་དེའི་འབྱུང་ཁུངས་དང་ནད་གཏོང་ཚུལ་ཡང་དེ་ཉིད་ལས། སྲིད་ལ་ལས་ཀྱི་ནད་བདག་མོ། །བདུད་མོ་ཁྲག་མིག་རལ་བ་ཅན། །གཉན་མོ་ཁ་འབར་ཞེས་བྱ་བ། །ནད་ཀྱི་བདག་མོ་ཆེན་མོ་ཞིག །རྒྱ་མཚོའི་གཏིང་ནས་སྐུ་བསྐྱོད་དེ། །རི་རབ་ཟོམ་ལ་བརྟེན་བྱས་ནས། །ཐལ་མོ་བར་སྣང་ཁམས་སུ་བརྡེབ། །ང་རོ་ནམ་མཁའི་མཐོངས་སུ་འབོད། །ནམ་མཁའ་ནད་ཀྱི་རླངས་པས་སྒྲིབ། །ས་ནད་མེ་ལྟར་འབར་བ་དང་། །གཉན་ནད་ནག་པོ་རྒྱུག་འགྱེལ་དང་། །རྩ་ནད་ཧ་ལ་ལྕོག་འགྱེལ་དང་། །བདུད་ནད་ཐོམ་པོ་མགོ་ཡོར་དང་། །བལ་ནད་ནག་པོ་སུམ་སྒྲིལ་དང་། །འདྲེ་ནད་འཛུམ་པ་ལྟག་སྒྱེད་དང་། །འབྲུམ་ནད་ཧས་གཉན་ག་བ་དང་། །སྐྱ་འབྲུམ་ཆུ་སྦུར་ལུག་མིག་དང་། །མཛེ་ནད་ཤུ་བ་ཕོལ་མིག་འབྲས། །དམུ་ཆུ་རྦབ་མཇིང་འཆུ་ས་དང་། །རྩ་རྒྱུག་མིག་སེར་ཤ་ཡ་དང་། །སད་དང་སེར་བ་བཙའ་དང་འབུ། །དུས་ཀྱི་འཁྲུགས་པ་གློ་བུར་གཏོང་། །སྡེ་བ་ནང་འཐབ་བྱེད་པ་དང་། །བཙུན་པ་གྲི་རུ་གསོད་པ་དང་། །བཙུན་མ་ལུས་རྒྱས་ནལ་བུ་གསོད། །ཁྱོད་ཉིད་ཁྲོས་པའི་སྔ་ལྟས་ཡིན། །ཞེས་པས་ཤེས་ནུས་སོ། །
ཡང་། ཤེར་སྙིང་བདུད་བཟློག་གི་ཆོ་ག་ཞིག་ལས། མ་མོ་མ་ཅིག་ཡམ་བདག་ཅེས་པ། ལག་པ་གཡས་པ་ན་བདུད་ཀྱི་ཁྲམ་བམ་དང་གཡོན་པ་ན་བཙན་གྱི་ཤྭ་རྡེལ་དཀར་ནག མཆན་ཁུང་གཡས་ན་གཤིན་རྗེ་ཁྲམ་ཤིང་དམར་བོ་དང་གཡོན་ན་ནད་ཀྱི་རྐྱལ་བ་ནག་པོ་ལ་སྦྲུལ་ནག་ལྔ་བརྒྱའི་ཁ་ཆིངས་ཅན་ཡོད་པར་ཡང་གསུངས་སོ། །
མ་མོའི་རྫོང་འདེབས་ལའང་། བསྒྲུབ་བྱའི་ཁྲུས་ཆུས་སྤྲུས་པའི་ཟན་ལ་ལུས་ཀྱི་དྲི་མ་བསྲེས་ཤིང་མི་ཕྱུགས་མང་བོའི་ཁ་སྣའི་དབུགས་ཀྱིས་བདུག་པས་གླུད་སྐེ་མཆེད་དོད་པ། གོས་དུམ་དང་། དར་ཟབ་ཡུངས་དཀར་གྱིས་བརྒྱན་པ་དང་། མཐའ་བསྐོར་དུ་བཤོས་བུ་ནག་པོ་ཟུར་གསུམ། ནལ་བུའི་ཤ་ཁྲག ལུག་ནག་རྨ་བྱ་སོགས། མདའ་འཕང་ནག་པོ། ཆངས་བུ། མཐེབ་ཀྱུ། ངར་མི། ཤ་སྣ། ཁྲག་སྣ། རུས་པ། ལོ་མ། སྦང་མ། སྒོག་པ། ལ་ཕུག ནས་འབྲས་གྲོ་སྲན། བཙོས་པའི་མཆན། སྣམ་ཐེར་གོས་དར་གྱི་དུམ་བུ། རིན་པོ་ཆེའི་རིགས། ས་སྣ་སོགས་རེ་རེ་གྲངས་བརྒྱ་རེ་ཚང་བའམ། མ་འབྱོར་ན་གང་འཇོམས་སོ། །རྫོང་འདེབས་རན་དུས་གུ་གུལ་གྱིས་བདུག ཡུངས་དཀར་གྱིས་བྲབས། རོལ་མོ་ཚམ་རྔམས་དང་བཅས་གླུད་ཡས་རྣམས་ཀོ་གྲུ་ལྟ་བུར་བཅུག་སྟེ་ཆུ་བོར་བསྐུར་བའམ། ཡང་ན། ཐེབས་ཀྱི་ཕྱོགས་སུ་སྐྱེལ་ནས། སྐྱེལ་མིས་ཕྱིར་མིག་ཙམ་ཡང་མི་བལྟ་བར་སྐྱེལ་དགོས་སོ། །
མ་མོ་འདི་དག་གིས་གནོད་པ་བྱུང་ཚེ། མ་མོ་འཁྲུགས་བསྐང་དང་། འཁྲུགས་མདོས་སོགས་ཀྱི་ཆོ་གའང་ཡོད་དོ། །
འབྱུང་བོ།
གཏོར་མ་ཆ་གསུམ་ལས། འབྱུང་བོ་གང་དག་རི་རབ་སྟེང་གནས་དང་། །དགའ་བའི་ཚལ་དང་ལྷ་ཡི་གནས་རྣམས་དང་། །ཤར་ནུབ་རི་དང་ཉི་ཟླའི་ཁྱིམ་རྣམས་དང་། །རི་བོ་ཀུན་ལ་དེ་དག་གནས་པ་དང་། །རིན་ཆེན་གླིང་ན་ལྷག་པར་གང་གནས་དང་། །ཆུ་བོ་ཀུན་དང་ཆུ་བོའི་མདོ་རྣམས་དང་། །མཚོ་དང་རྫིང་བུ་ལྟེང་ཀ་ཆུ་ངོགས་དང་། །གཡའ་ཆུ་བསིལ་མ་ཅན་ན་གང་གནས་དང་། །གྲོང་དང་ཕྱུགས་ལྷས་གྲོང་ཁྱེར་སྟོང་བ་དང་། །ཁང་སྟོང་དག་དང་ལྷ་ཡི་ཁང་བ་དང་། །གཙུག་ལག་ཁང་དང་མཆོད་རྟེན་གནས་རྣམས་དང་། །དཀའ་ཐུབ་གནས་དང་གླང་ཆེན་བྲེས་རྣམས་དང་། །རྒྱལ་བོའི་དཀོར་ཁང་དག་ན་གང་གནས་དང་། །ལམ་སྲང་སུམ་མདོ་དང་ནི་བཞི་མདོ་དང་། །གང་དག་ལམ་པོ་ཆེ་དང་ཤིང་གཅིག་དྲུང་། །དུར་ཁྲོད་ཆེན་པོ་ནགས་ཚལ་ཆེན་པོ་དང་། །སེང་གེ་དྲེད་དང་གཅན་གཟན་གནས་རྣམས་དང་། །འབྲོག་ཆེན་འཇིགས་སུ་རུང་བར་གང་གནས་དང་། །གང་དག་གླིང་མཆོག་དག་ན་གནས་པ་དང་། །ལྷུན་པོ་དུར་ཁྲོད་དག་ན་གནས་པ་རྣམས། །ཞེས་སོགས་གནས་ཡུལ་མང་དུ་གསུངས་ཡོད་པ་དང་།
ཁ་ཟས་ལ་ཡང་ཆ་གསུམ་ལས། ཕྲེང་བ་མེ་ཏོག་དྲི་དང་བདུག་པར་བཅས། །བསྟོད་དང་གཏོར་མ་མར་མེ་གུས་འབུལ་ན། །འདི་དག་བཏུང་ཤིང་ལེགས་པར་གསོལ་ནས་ཀྱང་། །ཞེས་དང་། བཟའ་བ་ཤ་ཆང་ལ་ཕུག་བཅས། །འབྲས་ཆན་འབྲས་བུ་མང་བོ་དག །མཆོད་པ་འདི་ཡིས་མགུ་བྱས་ལ། །གསུངས་པ་དང་། འབྱུང་བོའི་བདག་པོ་ནི་ཐལ་མདོག་ཕྱག་བཞི་བ། ཁྱུ་མཆོག་ལ་བཅིབ་པ། ཕྱག་གཡས་པ་གཉིས་ན་རྩེ་གསུམ་དང་ཨ་སྨྲ། གཡོན་པ་གཉིས་ན་རིལ་བ་སྤྱི་བླུགས་དང་། རཀྵའི་ཕྲེང་བ་འཛིན་པ་ཡུམ་དང་བཅས་པའོ། །ཡང་། དགེ་སློང་མའི་འདུལ་བ་རྣམ་འབྱེད་ལས། འབྱུང་བོ་ཞེས་བྱ་བ་ནི་སྦྲུལ་དང་། སྡིག་སྦྲུལ་དང་། ཏྲེ་མ་བུ་ག་དང་། ཏྲེ་ལ་ཏ་དང་། སྲིན་འབུ་དང་། ཕྱེ་མ་ལེབ་དང་། ཏིལ་གྱི་ཕུབ་མ་ཟ་བ་སྟེ། དེ་དག་གི་ཤིང་གང་ཡིན་པས་ནི་འབྱུང་བོའི་གནས་ཞེས་བྱའོ། །ཞེས་སོ། །གསོ་རིག་ལས་འབྱུང་བོའི་གདོན་བཅོས་ཐབས་ལ། མན་ངག་རིན་ཆེན་འབྱུང་གནས་ལས། ཤ་ཟ་སྲིན་པོ་ལ་སོགས་པ། །འབྱུང་བོའི་གདོན་གྱིས་ཟིན་པ་ལ། །ག་བུར་དུད་པས་བདུགས་ན་ཕན། །དེ་ཝ་པི་བལ་ཞེས་བྱའི་ཤིང་། །ལོ་སྡོང་གང་བྱས་སྐྱེར་བ་འདྲ། །མེ་ཏོག་ཀུ་ཤུའི་མེ་ཏོག་འདྲ། །འབྲས་བུ་ཀུ་ཤུ་འདྲ་ལ་ཆུང་། །ཤིང་དེའི་ལོ་མ་ཁ་འཕེལ་དུས། །བཏུས་ལ་གྲིབ་སྐམ་ཉར་ཚགས་བྱ། །ཚང་སྲིན་ལ་སོགས་གདོན་གྱི་རིགས། །གང་གིས་ཟིན་པར་གྱུར་ན་ཡང་། །ཤིང་དེའི་ལོ་མ་རྣ་བ་རུ། །བཅུག་ན་གདོན་དེ་ཚིག་གྱུར་ནས། །དཔག་ཚད་བརྒྱ་རུ་འབྲོ་བར་འགྱུར། །སྤེན་ཐོག་པ་ཡི་དུད་པ་ནི། །བཏང་ན་གདོན་རིགས་གང་ཡིན་པ། །སྐད་ངན་འཆོར་ཞིང་བྱེར་བར་འགྱུར། །ཞེས་གསུངས་ཡོད་དོ། །
རོ་ལངས།
རོ་ལངས་ནི། གདོན་ཆེན་གྱི་ནང་གསེས་ཤིག་སྟེ། གཉིད་ལ་དགའ་བ་དང་། རྒྱན་འདོགས་པ། ལུས་འདར་བར་བྱེད་པ་ནི་རོ་ལངས་ཀྱི་ནད་རྟགས་ཡིན་པར་གསུངས།
གཞན་ཡང་། མི་ཤི་བའི་བེམ་པོ་རོ་ལངས་རྒྱག་ཚུལ་ཡང་ཡོད་དེ། སྔོན་གྱི་ཚེ་ཤཱ་རིའི་བུའི་སྐུ་སྐེད་ནས་སྔགས་ཕུར་བཏོན་ནས་རོ་ལངས་བཏུལ་བའི་ལོ་རྒྱུས་ཡོད་པ་དང་། རྒྱལ་བ་ཚངས་དབྱངས་པས་ཀྱང་། རྒྱ་གར་དུ་གནས་བསྐོར་དུ་འགྲོ་བའི་ལམ་བར་ནས་རོ་ལངས་བཏུལ་བའི་ལོ་རྒྱུས་ཡོད་དེ། ཚངས་དབྱངས་རྒྱ་མཚོའི་གསང་རྣམ་ལས། རོ་ལངས་ཀྱི་ཆོས་ཉིད་ནི་མིའི་མགོ་ལ་ལག་པ་བཞག་ཚད་འཆི་བས། ཁོས་ལས་དབང་གིས་མི་ཐུབ་པ་སོགས་ལ་འགྲམ་ལྕག་གཏོང་བ་ཡིན། ཞེས་དང་། རོ་ལངས་དེ་གཉིས་གཅིག་ནི་རུས་གོང་རྒྱུས་པའི་འབྲེལ་བ་ཞིག་དང་། གཅིག་ནི་ཤ་པགས་སྐྲ་དང་བཅས་པ་འཇིགས་སུ་རུང་བ་སྲིན་པོ་འདྲ་བ་གཉིས་འདུག ཤ་པགས་མེད་པའི་རུས་གོང་སྐམ་པོ་དེ་འདུལ་དཀའ་ཞེས་སྔར་དམ་པ་རྒན་རབས་རྣམས་ཀྱི་ཞལ་ལས་ཐོས་པ། ཐུགས་ཤིན་ཏུ་མད་པར་འདུག ཅེས་དང་། མཚན་མོ་ས་རུབ་པའི་ཚོད་ཙམ་ལ་ལྷ་ཁང་འདྲ་བ་དེའི་སྒོ་ནང་ནས་མནན་འདུག་པ་གློ་བུར་དུ་ཧར་གྱིས་ཕྱེས་ཏེ་རོ་ལངས་ཕོ་མོ་གཉིས་གར་འཁྲབས་ཏེ་མཆོང་ཞིང་རྒྱུགས་ནས་ཐལ་གྱིས་སླེབས་བྱུང་བར། གཞན་ཟླ་བོ་རྣམས་ཕྱོགས་ཕྱོགས་སུ་བྲོས་ནས་རྒྱུགས་པའི་སྐབས་སུ། རོ་ལངས་ཕོ་མོ་གཉིས་ཀྱིས་བྱིའུ་ཁྱུ་ལ་ཁྲ་འཛུལ་བ་ལྟར་ཕྱོགས་ཕྱོགས་སུ་དེད་ནས་རང་དབང་མེད་པར་སླེབས་ཏེ། ང་རང་མ་གཏོགས་པ་མི་རེ་ལ་འགྲམ་ལྕག་མེ་འབར་བ་འདྲ་བ་རེ་བཏང་ནས་ཧ་སྒྲ་སྒྲོགས་ཤིང་། རྣམ་འགྱུར་ཡ་མ་བརྒྱད་དུ་བསྒྱུར་ནས་རྒྱུག་པའི་རྗེས་ལ། ངས་དེད་ནས་རེ་ཞིག་ནས་སླེབས་ཏེ་རོ་ལངས་གཉིས་ཀྱི་སྐྲ་ལ་འཇུས་ཏེ་ས་ལ་བརྡབས་ནས་གཉིས་བརྩེགས་སུ་མནན་ཏེ། སྐེད་པའི་ལྕགས་ཀྱི་གཏེར་ཕུར་བཏོན་ནས་བརྡབས་པས་རོ་ལངས་གཉིས་དྲན་མེད་དུ་བརྒྱལ་སོང་། ཟླ་བོ་ཚོ་ལ་རྡོ་བ་འཁྱེར་ཤོག་ཅེས་ལབ་ཀྱང་འཇིགས་སྐྲག་སྐྱེས་དྲགས་ནས། ངག་ལ་མི་ཉན་པར་རྒྱང་རིང་བོར་སོང་། ང་རང་གཅིག་པུས་རྡོ་བས་བརྡུངས་ནས་ཐལ་བའི་རྡུལ་དུ་བརླག ཅེས་དང་། སྔར་ང་ཚོའི་ཕ་མ་གཉིས་ཤི་ནས་རོ་ལངས་སུ་གྱུར་ཏེ་གྲོང་བ་ཐམས་ཅད་སྟོངས་པར་བྱས་ནས་ང་ཚོ་འདི་རུ་བྲོས་འོང་བ་ཡིན། ཞེས་སླད་མ་ཞུགས་པའི་ལུང་འདི་བཞི་བོས་སྐབས་དེའི་རོ་ལངས་ཀྱི་རྣམ་པ་དམར་རྗེན་དུ་མཐོང་ཐུབ་ལ། བོད་མཁས་པས། སྐྲ་བརྫེས་ཕུབ་ལྟར་རབ་གདངས་ཁ་ཡི་སྒོར། །རང་གི་ནང་ཁྲོལ་ཕྱིར་ཕྱུང་སླར་ཟ་བའི། །རོ་ལངས་ཚོགས་རྣམས་སེར་སྐྱའི་ཀླད་པ་དག །ལུག་ཀྱང་འཁྱམས་ཤིང་འཁྱམས་ཤིང་གར་བསྒྱུར་ཏོ། །ཞེས་སྐྱུག་བྲོ་བ་མི་སྡུག་པའི་ཉམས་ཀྱི་རྣམ་པ་གསལ་རྗེན་དུ་ཐོན་པ་དང་།
ཡང་། ཐུན་མོང་བའི་དངོས་གྲུབ་བརྒྱད་ཀྱི་ནང་ཚན་རལ་གྲིའི་དངོས་གྲུབ་དེ་ཡང་རོ་ལངས་ཀྱི་སྟེང་ནས་སྒྲུབ་དགོས་པ་ཡིན་ཏེ། དེ་སྒྲུབ་ན་རོ་ལངས་ཀྱི་ལྕེ་རལ་གྲི་དང་ལུས་གསེར་ཏུ་འགྱུར་བར་བཤད་ཡོད། ཨོ་ཏན་ཏ་པུ་རིའི་གཙུག་ལག་ཁང་ཡང་། རོ་ལངས་གསེར་ཏུ་བསྒྱུར་བའི་ཡོན་སྦྱར་ཏེ་བཞེངས་པར་བཤད་སྐབས་འདི་ལྟར་འབྱུང་སྟེ། རྣལ་འབྱོར་བ་ན་ར་ད་བྱ་བས་ནང་བའི་དགེ་ཚུལ་ཞིག་གྲོགས་སུ་སྦྲན་ཏེ། རོ་ལངས་སྒྲུབ་སྐབས། ཐོག་མར་རོ་ལ་ཁ་རླངས་ཐོན། བར་དུ་རོ་འགུལ། ཐ་མར་ལངས་ཏེ་གར་བྱེད་ཅིང་ལྕེ་གཡུགས་པ་ལན་གསུམ་བྱུང་བས། དང་བོ་ལྕེ་ཆོད་ན་རབ། བར་དུ་ཆོད་ན་འབྲིང། ཐ་མར་ཆོད་ན་རལ་གྲི་ཐ་མའི་དངོས་གྲུབ་ཐོབ་ལ། མ་ཆོད་ན་རང་གཞན་ཐམས་ཅད་ཕོངས་ལ་སྦྱོར་བར་བཤད་ལ། དགེ་ཚུལ་གྱིས་གཡུགས་ཐེངས་གཞུག་མར་སོ་བཏབ་ནས་བཅད་པས། ཐ་མའི་དངོས་གྲུབ་ལས་མ་འཐོབ་ཀྱང་། དགེ་ཚུལ་གྱིས་ལྕེའི་རལ་གྲིའི་དངོས་གྲུབ་ལ་བརྟེན་ཏེ། རི་རབ་ཀྱི་རྩེ་དང་གླིང་བཞི་གླིང་ཕྲན་དང་བཅས་པ་ལྟད་མོར་ཕྱིན་ཏེ་སླར་རྣལ་འབྱོར་བར་སྤྲད་པས། རྣལ་འབྱོར་བས་རོ་ལངས་ཀྱི་ལུས་གསེར་དུ་གྱུར་བ། དེ་རིང་བཅད་ཤུལ་དུ་དོ་ནུབ་ཁེངས་ནས་ཟད་མི་ཚར་དེ་དགེ་ཚུལ་ལ་བྱིན་པ་དེས་ཡོན་སྦྱར་ནས། ཨོ་ཏན་ཏ་པུ་རིའི་གཙུག་ལག་ཁང་བཞེངས་པ་སྦ་བཞེད་དང་དཔེ་ཆོས་རིན་སྤུངས་ཀྱི་གཏམ་རྒྱུད་ལས་འབྱུང་བ་དང་།
དེ་བཞིན་དུ། རོ་སྒྲུང་ཞེས་པ་ཡང་རོ་ལངས་གསེར་དུ་བསྒྱུར་བའི་དངོས་གྲུབ་འདི་ལ་འབྲེལ་བ་ཡོད་དེ། དེ་ལ་བཤད་ཚུལ་མང་བོ་ཡོད། རྒྱལ་བོ་རྣམ་གནོན་ཟེར་བས་རབ་བྱུང་བ་ཞིག་གི་དྲིན་ལན་བསབ་ཕྱིར་མཚན་མོ་དུར་ཁྲོད་དུ་སོང་ནས་མི་རོ་ཞིག་མཆོད་སྦྱིན་གྱི་སྟེགས་བུའི་སྟེང་འཁྱེར་འོང་རྒྱུའི་ཁས་བླངས་པ་དང་། ཡང་། ཀླུ་སྒྲུབ་ཀྱིས་སྤྲང་བོའི་བུ་ཞིག་གི་སྙིང་རུས་བརྟག་ཆེད་རོ་དངོས་གྲུབ་རྒྱ་མཚོ་ལེན་པར་མངགས་པ་དང་། ཡང་། དོན་གྲུབ་ཟེར་བ་ཞིག་གིས་སྒྱུ་མ་མཁན་བདུན་བསད་པའི་སྡིག་བཤགས་སུ། སློབ་དཔོན་ཀླུ་སྒྲུབ་ཀྱིས་འཛམ་བུ་གླིང་གི་དབུལ་ཕྱུག་སྙོམས་ཕྱིར་དུར་ཁྲོད་བསིལ་བ་ཚལ་དུ་རོ་དངོས་གྲུབ་ཅན་ལེན་དུ་མངགས་པ་སོགས། བཤད་ཚུལ་དང་ལེའུ་གྲངས་མི་གཅིག་པ་མང་བོ་ཡོད། ཞིབ་ཏུ་རོ་སྒྲུང་ཏུ་གཟིགས། །
འགོང་བོ།
རང་གི་དྲིན་ཅན་རྩ་བའི་བླ་མ་ལ་ངོ་རྒོལ་བྱས་པའི་དམ་ཉམས་ཤི་རྗེས་གདོན་འདྲེ་སྐྱེས་པ་ལ་འགོང་བོ་ཟེར་ཏེ། དཔེར་ན། འགོང་བོ་སྤུན་དགུ་ནི། དབུས་སུ་ཤེལ་གིང་དཀར་བོ། ཤར་དུ་དཀར་བོ་མི་གཅིག ཤར་ལྷོར་གཟའ་ཐེའུ་དམར་བོ། ལྷོའི་བྱེ་བ་རྐང་རིང་། ལྷོ་ནུབ་ཀྱི་གནམ་ཐེའུ་དཀར་བོ། ནུབ་ཀྱི་ཡམ་ཤུད་དམར་བོ། ནུབ་བྱང་གི་ས་ཐེའུ་ནག་པོ། བྱང་གི་ཁུ་ལེ་ལག་དགུ། བྱང་ཤར་གྱི་བར་ཐེའུ་ཁྲ་བོ་སྟེ་དགུའོ། །འགོང་བོ་སྤུན་དགུའི་ཕ་མ་ནི། བོན་ཆོག་འགོང་བོ་སྤུན་དགུའི་དཀར་ཡས་ལས། ཕ་ནི་འགོང་བོ་ཐེལ་ཆེན་ཡིན། །མ་ནི་ལོ་ཚབ་སྒྱུ་མ་ཡིན། །བུ་ནི་འགོང་བོ་སྤུན་དགུ་ཡིན། །ཞེས་སོ། །ཐུའུ་བཀྭན་ཆོས་ཉིའི་གླུད་ཆོག་མཆོག་སྦྱིན་རྒྱ་མཚོ་ལས། རྡོ་རྗེ་ལེགས་པ་མན་ཆད་ནས། །འགོང་བོ་ཕྲ་མོ་ཡན་ཆོད་ཀྱི། །འགོང་བོའི་རིགས་གྱུར་ཐམས་ཅད་ལ། །ཞེས་གསུངས་སོ། །
འགོང་བོའི་གཟུགས་ནི། ལོ་གླུད་འགོང་བོ་དཀར་ཡས་ལན་ཆགས་ཚིམ་བྱེད་ལས། གནམ་ས་བར་གྱི་འགོང་བོ་ནི། །ཀུན་ཀྱང་མི་ལུས་གཅེར་བུ་ལ། །བྱ་ལུས་བྱི་བའི་མགོ་བོ་ཅན། །ལག་ན་རལ་གྲི་ནད་རྐྱལ་ཐོགས། །ཞེས་དང་།
དེ་དག་གི་ཁ་ཟས་ཀྱང་། འགོང་གླུད་དེ་ལས། ད་ནི་འགོང་བོའི་གནས་སྤོ་འཚལ། །དེ་རིང་བྱི་བའི་རྫོང་འདེབས་སོ། །ཆངས་རྗེས་དྲི་གླུད་ཤ་དུམ་དང་། །དར་ཟབ་འབྲུ་སྣ་རྫོངས་སུ་འདེབས། །ལོ་གླུད་སྦང་རམ་སྒོག་ཙོང་སྤོད། །ཤེལ་ཚིག་ཡུག་པོ་རྫོངས་སུ་འདེབས། །ཞེས་དང་། འཇུ་མི་ཕམ་གྱི་མདོས་སྨྲེང་བཀྲ་ཤིས་སྒོ་མང་ལས། འགོང་བོ་ལ་ནི་བཤོས་ཟླུམ་དང་། །ཟན་ཆངས་ཏིང་ལོ་ཟན་ཧྲུལ་རིགས། །རུས་ཀོག་སྐྱེམས་ལད་བཅས་པ་བཤམས། །ཞེས་སོ། །
བཙན།
བོན་ལུགས་ལ་བཙན་ནི། བཙན་གྱི་རྒྱལ་བོ་བྲག་བཙན་ཨ་བསེ་རྒྱལ་ལས་བྱུང་བར་འདོད་སྟེ། ཡབ་ནི་ཨ་བསེ་རྒྱལ་བ་དང་། །ཡུམ་ནི་ས་སྲིན་མ་མོ་གཉིས། །སྲ་བརྟན་བྲག་གི་ཐེམ་པ་རུ། །ཐབས་ཀྱིས་རྫུ་འཕྲུལ་སྡེབ་པ་ལས། །ཟངས་ཀྱི་སྒོ་ང་གཅིག་ཏུ་བྱུང་། །བཅག་ཅིང་བརྡོལ་བའི་སྙིང་བོ་ལ། །མི་དམར་མདུང་ཐུང་ཙམ་ཞིག་བྱུང་། །ཞེས་གསུངས་ཡོད་ལ།
དེ་ནི་མི་མ་ཡིན་གདུག་རྩུབ་ཅན། གཏུམ་དྲག་ཆེ་ཞིང་མཐུ་ནུས་མྱུར་བ་ཞིག་སྟེ། འབྲེལ་ཡོད་ཡིག་རྙིང་ལས་འཁོད་པ་ལྟར་ན། བར་གདོན་བཙན་དང་རྒྱལ་བོ་ཞེས། དབང་གི་འཕྲིན་ལས་མཛད་པ་དམར་བོ་བཙན་གྱི་སྡེར་གཏོགས། ཞེས་ཟེར་རོ། །ཡང་། བཙན་གྱི་འབྱུང་ཁུངས་ཡང་། ཐུའུ་བཀྭན་ཆོས་ཉིའི་བཙན་མདོས་གཏོང་ཚུལ་དྲེགས་པ་མིག་བསྒྱུར་གྱི་ལྟད་མོ་ལས། སྲིད་པ་དང་བོ་ཆགས་པ་ནས། །འབྱུང་བ་ལྔ་ལས་བཙན་ལྔ་བྱུང་། །དེ་ལས་བཙན་ཁྲོམ་སིལ་མ་བྱུང་། །བཙན་གྱིས་འཇིག་རྟེན་ཡུལ་ཁམས་ཁྱབ། །ཅེས་སོ། །
སྤྱིར་བཙན་ལ་དབྱེ་བ་མང་དུ་མཆིས་ཏེ། ལྷ་འདྲེ་བཀའ་ཐང་ལས། ལྷ་བཙན་རིགས་བྱེད་མང་བོ་དང་། །ཀླུ་བཙན་རིགས་བྱེད་མང་བོ་དང་། །བདུད་བཙན་རིགས་བྱེད་མང་བོ་དང་། །གཟའ་བཙན་རིགས་བྱེད་མང་བོ་དང་། །ཞེས་དང་། ས་ལོ་ཀུན་དགའ་བསོད་ནམས་ཀྱིས། ཡུལ་ཕྱོགས་འདིའི་བཙན། ཤར་ཕྱོགས་དྲི་ཟའི་བཙན། ལྷོ་ཕྱོགས་གཤིན་རྗེའི་བཙན། ནུབ་ཕྱོགས་ཀླུའི་བཙན། བྱང་ཕྱོགས་གནོད་སྦྱིན་བཙན། ཤར་ལྷོ་མེ་ལྷའི་བཙན། ལྷོ་ནུབ་སྲིན་པོའི་བཙན། ནུབ་བྱང་རླུང་ལྷའི་བཙན། བྱང་ཤར་དབང་ལྡན་གྱི་བཙན། སྟེང་ཕྱོགས་ལྷའི་བཙན། འོག་ཕྱོགས་ཀླུའི་བཙན། བར་མི་བཟད་ལྷ་མ་ཡིན་གྱི་བཙན། གོང་གསུམ་འགྲིམས་པའི་བཙན། ལུང་གསུམ་རྒྱུ་བའི་བཙན། བྲག་གུ་ཟུར་གྱི་བཙན། གོང་གསུམ་གཡེལ་གྱི་བཙན། ལུ་མ་གཞུང་གི་བཙན། གདགས་དང་སྲིབ་ཀྱི་བཙན། ཆུ་བོ་སྦུབས་ཀྱི་བཙན། ཤུག་པ་སྦམ་གྱི་བཙན། ཕ་མེས་དུར་གྱི་བཙན། ཞེས་ཕྱོགས་བཞི་མཚམས་བརྒྱད། ལ་ལུང་ཆུ་བོ་གདགས་སྲིབ་ཀུན་ལ་བཙན་རིགས་ཁྱབ་པར་བཤད་དོ། །
༡ བཙན་རྒོད་འབར་བ་ནག་པོ། བཙན་རྒོད་དེ་ནི་མི་ནག་རྟ་ནག་ཕྱག་ཏུ་བཙན་མདུང་དང་། བཙན་ཞགས་ཐོགས་པ། བསེའི་ཁྲབ་རྨོག་གྱོན་པ། བཙན་དམག་བྱེ་བ་དུང་ཕྱུར་འཁྲིད་པ། ཞེས་དང་།
དེ་ཡང་བཙན་ལྷ་ཕལ་མོ་ཆེའི་ཕྱག་མཚན་ཞགས་པ་ཡིན། སྤྱིར་ན་ཞགས་པ་ལ། འཆི་བདག་གི་ཞགས་པ། བདུད་ཞགས་ནག་པོ། འཕྲུལ་ཞགས། གློག་ཞགས། རླུང་ཞགས། ཆུ་ཞགས། ཉི་མའི་ཞགས་པ། རིན་ཆེན་ཞགས་པ། རྒྱུ་མའི་ཞགས་པ་སོགས་རིགས་དང་དབྱེ་བ་མང་ཡང་། འདིར་བརྗོད་པ་ནི། བཙན་ཞགས་དམར་བོ་དེ་ཡིན། དེ་ནི་མཐུ་མྱུར་ཞིང་གནད་དུ་ཁེལ་བ་ཞིག་སྟེ། འབྲེལ་ཡོད་འདོན་ཆོག་རྣམས་སུ། བཙན་གྱིས་ཞགས་པ་འདེབས་པ་བཟློག །ཞེས་དང་། བཙན་གྱི་ཞགས་པ་མ་འདེབས་ཤིག །ཞེས་པ་ལྟར། བཙན་ཞགས་འདི་ཡི་མཐུ་ནུས་ནི་བསམ་གྱིས་མི་ཁྱབ་པ་ཞིག་ཡིན་པར། ཁམས་རྡོ་གྲུབ་འཇིགས་མེད་བསྟན་པའི་ཉི་མས་འདི་ལྟར་བརྗོད་དེ། བཙན་གྱི་ཞགས་པ་དམར་བོ་མེ་སྟག་འབར་བའི་འོད་ཅན། རྡོ་རྗེ་ལུ་གུ་རྒྱུད་ལྟར་བརླིང་ཞིང་སྲ་བ། སྦྲུལ་ལྟར་འཁྱུག་ཅིང་མཉེན་ལ་འཁྱིལ་བ། དགྲ་ལྷའི་ཕྱག་ན་གློག་ལྟར་འཁྱིལ་ཞིང་དམིགས་པའི་གནས་སུ་སྐར་མདའ་ལྟར་འགྲོ་བ། གཞོང་གི་ཕྱོགས་རྣམས་མར་རླུང་འཚུབ་པ། འཕངས་པ་དང་ཐེབས་པ་དུས་མཉམ་ཡིན་པ། སྤྱི་དགྲ་ལ་རིམས་ནད་ལྟར་འདེབས་པ། སྒོས་དགྲ་ངོ་ཤེས་པ་ལྟར་དམ་པ། བརྣག་པའི་དགྲ་བོ་བཤས་ལུག་ལྟར་འཛིན་པ། ཉེས་བྱེད་སྐེ་ནས་ཤ་བཙོག་ལྟར་ཁྲིད་པ། འདྲ་བའི་ནང་ནས་མི་ནོར་བ། མང་བོའི་གསེབ་ནས་མི་འཆོར་བ། བཟུང་ནས་མི་འཁྲོལ་བ། བཅིངས་ནས་མི་ཐར་བ། ཕས་རྒོལ་གྱི་ལྟག་ན་གཉའ་ཤིང་ལྟར་ལྕི་བ། བསྟན་དགྲའི་རི་དྭགས་ཁྱི་སྤྱང་ལྟར་འདེད་པ། གང་ཐོགས་མེད་རླུང་གི་ཤུགས་ཅན། བཙན་དམར་འབུམ་སྡེའི་ཤ་སྟོན་སྡུད་པ། ལས་མཛད་ཕྱག་གི་མངག་གཞུག་ཆེན་པོ་དགྲ་འདུལ་དཔའ་བོའི་ཟླ་གྲོགས། དབང་བསྒྱུར་དྲག་པོའི་མཚོན་ཆ། དོན་ཡོད་འཕྲུལ་གྱི་ཞགས་པ་ཡིད་བཞིན་གྱི་ཨ་ལོང་ཅན། སྒྲུབ་མཆོག་རྣལ་འབྱོར་བའི་གར་བསྐུལ་ཕོ་ཉ་ལྟར་འཇུག་པ་སོགས་གསུངས་ཡོད་པས། བཙན་ཞགས་ཀྱི་ཁྱད་ནུས་ཕྲ་ཞིབ་རྟོགས་ནུས་སོ། །
༢ བཙན་རོལ་བ་སྐྱ་བདུན། བཙན་མཆོད་ཀྱི་ཆོ་ག་ལས། ཕྱོགས་ཕྱོགས་དག་ནི་ཕ་གི་ན། །ཉི་མ་ནུབ་ཕྱོགས་ཕ་གི་ན། །བཙན་ཡུལ་ཟངས་ཐང་དམར་བོ་ན། །པདྨ་དབང་གི་བཀའ་མཉན་པ། །མཆེད་བཙན་རོལ་བ་སྐྱ་བདུན་གྱི། །གསུངས་པ་ལྟར། ཀློང་རྡོལ་བླ་མས། བཙན་རྒོད་འབར་བ་སྤུན་བདུན་ནི། གནོད་སྦྱིན་ཙིའུ་དམར་བོ། སྐྱིད་ཤོད་རྫོང་བཙན། སུམ་རིང་གྲི་བཙན། ཀང་ཀ་ནག་པོ་ཀླུ་བཙན། ཙ་ལ་ཐོག་རྒྱུགས་གིང་བཙན། ཧོར་བོད་ཀྱི་རྗེ་བཙན། སྐུ་ལ་ཞལ་གྱི་བཙན། ཅེས་དང་། བཙན་སྐྱ་རོལ་བ་སྤུན་བདུན་གྱི་གསང་ཡུམ་ནི། ཁྱི་མགོ་ཅན་རྐྱང་སྟེ། ལ་ལ་ཁྱི་མོ་མིག་དམར་ཁ་ནས་དུག་རླངས་གཏོང་བ་ནི་ལྷ་བཙན་དང་ཀླུ་བཙན་གྱི་རིགས། མིའི་ཀླད་ཞོ་འགེམས་པ་ནི་བྲག་བཙན་དམར་མོ་དང་། ཁྱི་མོ་མིག་སྔོན་ཅན་ལག་ཏུ་ནད་ཀྱི་རྐྱལ་བ་འཛིན་པ་དང་མིའི་སྐེ་རྩར་སོ་བཏབ་སྟེ་དབུགས་བསྒགས་པའི་ཚུལ་འཛིན་པ་སོགས་སོ། །
དབུས་གཙང་ཕྱོགས་ལ་ཆ་མཚོན་ན། གནོད་སྦྱིན་ཙིའུ་དམར་ནི་བཙན་གྱི་རྒྱལ་བོར་འདོད་ཅིང་། སྲིད་གཞུང་གི་ཆབ་སྲིད་དང་དམག་དོན་ལེགས་ཉེས་ཀྱི་བྱ་བཞག་གང་ལའང་། བསམ་ཡས་ཙིའུ་དམར་འདིར། ལུང་བསྟན་ཞུས་ཏེ་གྲོས་ཐག་བཅད་པ་སོགས་བྱེད། བཙན་རྒོད་འདི་གནས་ས་ནི། རི་བྲག་དམར་བོ་མཁའ་དབྱིངས་སུ་བསྙེགས་པ། བྱ་གླག་དམར་བོ་ལྡིང་སྐོར་རྒྱག་པ། བཙན་ལྷ་རྣམས་ཁ་ཕྱིས་མེད་རྒྱུ་བ། འཁོར་དུ་བཙན་ཞགས་སྦྲུལ་ནག་འཁྱུག་པ། རི་བྲག་དམར་བོའི་དཀྱིལ་དབུས་སུ་ཁྲག་མཚོ་ཁོལ་བའི་ནང་ཤེད་དུ་ཟངས་དམར་གྱི་ཕོ་བྲང་ཡོད་པ་དེར་བཞུགས་པར་བཤད་ལ། ཕྱིས་སུ་བསམ་ཡས་དགོན་པའི་བསྟན་སྲུང་དུ་བཀོད་པ་ནས་བཟུང་། བོད་ཡུལ་དུ་བཙན་ཁང་ཇི་སྙེད་ཅིག་བྱུང་ལ། བསམ་ཡས་ཙིའུ་དམར་གྱི་སྐོར་ཕྲ་ཞིབ་ནེ་པའེ་སི་ཀེས་བརྩམས་པའི་བོད་ཀྱི་ལྷ་འདྲེ་གདོན་བགེགས་ཞེས་པར་བཀོད་ཡོད་པས་དེར་གཟིགས་དགོས་སོ། །
༣ བཙན་རྒྱལ་དགེ་བསྙེན་བྲག་དམར་དང་ཕྱོགས་བཞིའི་བཙན། ཡང་། བཙན་མཆོད་ཞིག་ལས། ཉི་མ་ལྷོ་ནུབ་ཕྱོགས་ཀྱི་བཙན་ཡུལ་ཟངས་ཐང་དམར་བོ་ན། བྲག་དམར་ཟིང་ངེ། སྨུག་རྒོད་ལངས་ལེ། རྩ་ན་དུག་ཆུ་སིལ་ལེ། ཁྲག་མཚོ་མེར་རེ། བཙན་མཁར་དམར་བོའི་ནང་ཤེད་ན། སྐུ་མདོག་དམར་བོ་ལ་རལ་བ་དམར་ནག་མེ་དཔུང་འཁྲིགས་པ། ཞལ་ལས་ཁྲག་གི་སེར་བ་འབབ་པ། སྐུ་ལ་དར་དམར་བང་ཆེན་གསོལ་ཞིང་དར་དམར་གྱི་འགྱིང་ཐོད་ཅན། ཆིབས་སུ་མགར་ནག་སྔོ་ནག་ལ་བཅིབ་པ། གཡས་པས་སྦྲུལ་ཞགས་དང་། གཡོན་པས་གསེར་མདུང་འཛིན་པ། དམིགས་པའི་དགྲ་བོ་ལུག་ལྟར་འཛིན་པ། དགེ་བསྙེན་བྲག་དམར་དམར་བོ་ཞེས་བཙན་གྱི་རྒྱལ་བོ་དང་།
ཤར་ཕྱོགས་སུ། རྨ་བྱ་ལྷ་མདའི་ལྷ་བཙན་ཞེས་པ། སྐུ་མདོག་དཀར་ལ་ཟ་འོག་སྔོ་ཁྲ་གསོལ་བ། གཡས་སུ་སྟག་རལ་དང་གཡོན་དུ་གཟིག་ཤུབས། ཆིབས་སྨུག་པའི་སྟེང་དུ་གསེར་གྱི་མདའ་གཞུ་འཛིན་པའོ། །ལྷོ་ཕྱོགས་སུ། ར་སྐྱེས་གདོང་གི་སྟོད་བཙན་ཙེར་ནི་སྐུ་མདོག་སེར་བོ། སྐུ་ལ་ལྕགས་ཁྲབ་གསོལ་བ། གཡས་སྟག་རལ་དང་གཡོན་གཟིག་ཤུབས་བསྣམས་པའོ། །ནུབ་ཕྱོགས་སུ། ཀང་ཀ་གཡུ་གཡའ་ནི། སྐུ་མདོག་དམར་ནག་ལ་ཆུ་དར་གྱི་རལ་ཁ་གསོལ་བ། དུག་སྦྲུལ་གྱི་སྐེ་རགས་བཅིངས་ལ། ཆིབས་སུ་སྟག་ཁྲ་བཅིབས་ཏེ། གཡས་སྟག་རལ་དང་གཡོན་གཟིག་ཤུབས་བསྣམས་ཤིང་། གཡས་པས་ལྕགས་མདུང་དང་། གཡོན་པས་གྲི་ཞགས་འདེབས་པའོ། །བྱང་ཕྱོགས་སུ། སྡོང་བུ་ཀླུ་བཙན་ནི། སྐུ་མདོག་ལྗང་ནག དར་ནག་གི་འགྱིང་ཐོད་བཅིངས་པ། ཆིབས་སུ་རག་པ་གཞུར་ནག་དང་། གཡས་སུ་སྟག་རལ་དང་། གཡོན་དུ་གཟིག་ཤུབས་མཛེས་པ། ཕྱག་གཡས་དར་ནག་དང་གཡོན་གྱིས་ཞགས་པ་དགྲ་ལ་འདེབས་པའོ། །དེ་རྣམས་ཀྱི་འཁོར་དུ་ཡང་། ལ་བཙན་ལུང་བཙན། བྲག་བཙན་ཆུ་བཙན། གངས་བཙན་གཡའ་བཙན། རླུང་བཙན་ཤིང་བཙན་སོགས་ཀྱིས་བསྐོར་བའོ། །
གོང་གསལ་འདི་དག་ལ་གཞིགས་ན། བཙན་གྱི་སྐུ་མདོག་དམར་བོ་རྐྱང་ཡིན་པའི་ངེས་པ་མེད་ལ། བཙན་རྒོད་འབར་བ་ནག་པོ་དེ་ཡང་བཙན་དམར་དང་མི་མཚུངས་པར། མི་ནག་རྟ་ནག་ལག་ཏུ་བཙན་མདུང་དང་ཞགས་པ་བཙན་ཞགས་འཛིན་པ། བསེ་ཁྲབ་དང་བསེ་རྨོག་གྱོན་པ། མཆེ་བ་གཙིགས་ཤིང་སྡང་མིག་བགྲད་པ། བཙན་དམག་བྱེ་བ་དུང་ཕྱུར་གྱིས་བསྐོར་བ་ཞིག་གོ །
༤ བོན་ལུགས་ཀྱི་བྲག་བཙན་ཨ་བསེ་རྒྱལ། བྲག་བཙན་ཨ་བསེ་རྒྱལ་འདིའི་ཡུམ་དང་སྐུ་བྱད། མཐུ་ནུས་དང་ཕྱག་མཚན། སྟོན་པ་གཤེན་རབ་ཀྱིས་དམ་ལ་བཏགས་ཏེ་བོན་སྐྱོང་སྲུང་མར་བརྐོས་ཚུལ་སོགས། བོན་གྱི་གཏོར་ཆོག་ཨ་བསེ་གཏོར་བསྐང་ལས་འདི་ལྟར་འབྱུང་སྟེ། ཡབ་ནི་ཨ་བསེ་རྒྱལ་བ་དང་། །ཡུམ་ནི་ས་སྲིན་མ་མོ་གཉིས། །སྲ་བརྟན་བྲག་གི་ཐེམ་པ་རུ། །ཐབས་ཀྱི་རྫུ་འཕྲུལ་སྡེབས་པ་ལས། །ཟངས་ཀྱི་སྒོ་ང་གཅིག་ཏུ་བྱུང་། །བཅག་ཅིང་བརྡོལ་བའི་སྙིང་བོ་ལ། །མི་དམར་མདུང་ཙམ་ཞིག་ཏུ་བྱུང་། །རལ་བ་མེ་རི་འོད་དུ་འཁྱིལ། །དབུ་ལ་བསེ་ཡི་རྨོག་ཞུ་གསོལ། །བཙན་གྱི་ལྡེམ་འཕྲུ་དམར་བོ་བཙུགས། །སྨིན་དམར་ལྕགས་ཀྱུ་བཀུགས་པ་འདྲ། །རྫི་དམར་གློག་ཞགས་འོད་དུ་འཕྲོ། །སྤྱན་མིག་དམར་བོ་དགྲ་ལ་བལྟ། །དུང་གི་མཆེ་བ་བསྣོལ་མར་གཏམས། །སྟག་གི་ཨག་ཚོམ་མེ་ལྟར་འབར། །སྐུ་ལ་དར་དམར་བེར་ཆེན་གསོལ། །རིན་ཆེན་ལྕགས་ཀྱི་གོང་ལག་བཏགས། །གཅན་གཟན་སྟག་གི་ཆ་ག་ཅན། །སྦྲུལ་ནག་བསྡམས་པའི་སྐ་རགས་བཅིངས། །སྟག་རལ་གཡས་ལ་འོད་ཀྱང་འཁྱུག །གཟིག་ཤུབ་གཡོན་ལ་ཟེར་ཀྱང་འཕྲོ། །རལ་གྲི་ངར་ཆེན་གློག་དམར་འཁྱུག །གཡས་པས་སྦྲུལ་ཞགས་དམར་པོ་འདེབས། །གཡོན་པས་བྲག་བྱ་འུག་པ་འཛིན། །ཞབས་ལ་བསེ་ལྷམ་ལྕགས་མཐིལ་མནབས། །སྦྲུལ་དམར་ཆུན་པོ་སྐུ་ལ་བརྒྱན། །བྲ་ནག་རྟིང་དཀར་ཆིབས་སུ་བཅིབས། །མི་མགོའི་སྒ་ལ་སྟག་གི་སྟན། །གསེར་སྲབ་གཡུ་མཐུར་ལྕགས་ཀྱི་ཆས། །མི་མགོའི་ཐོང་ལྡེམ་ཕྱང་ངེ་ཕྱང་། །ཟངས་ཀྱི་ཡོབ་ཆེན་སི་ལི་ལི། །བཙན་གྱི་དམར་ཚོགས་འབུམ་གྱིས་བསྐོར། །སྤྱང་ཀི་སྔོན་པོ་སྔུན་ན་རྒྱུག །།ཟངས་ཀྱི་ཝ་མོ་རྗེས་སུ་འབྲང་། །བཙན་གླག་འུག་པ་ཀླད་ན་ལྡིང་། །སྟོང་ཁམས་ཉུལ་ཞིང་གླིང་བཞི་བསྐོར། །སྐྱེས་པ་དར་མའི་ཚེ་སྲོག་གཅོད། །བུད་མེད་རྣམས་ཀྱི་སྲིད་ཀྱང་བརྐུ། །བོན་པོ་རྣམས་ཀྱི་ཉམས་ཀྱང་ལེན། །བནྟེ་རྣམས་ཀྱི་སྲོག་ཀྱང་གཅོད། །བྱིས་པ་རྣམས་ཀྱི་སྲི་རུ་བྱེད། །དྲག་བྱེད་བདུད་བཙན་སྲོག་གི་བདག །སྔོན་གྱི་བསྐལ་བ་དང་པོ་ལ། །སྟོན་པ་གཤེན་རབ་མི་བོ་དེ། །རི་རབ་རི་ཡི་རྩེ་མོར་བྱོན། །ལྷ་སྲིན་སྡེ་བརྒྱད་དམ་ལ་བཏགས། །སྣང་སྲིད་སྡེ་བརྒྱད་དབང་དུ་བསྡུས། །དེ་དུས་བྲག་བཙན་རྒྱལ་པོ་ཡང་། །དམ་ལ་བཏགས་ཤིང་ལས་ལ་རྦད། །གཡུང་དྲུང་བོན་གྱི་སྲུང་མར་བསྐོས། །ཞེས་པས་རྟོགས་ནུས་སོ། །
ཡང་། བཙན་གྱི་རྣམ་པ་མི་འདྲ་བ་ཞིག་ལ། འཇུ་མི་ཕམ་གྱི་མདོས་སྨྲེང་བཀྲ་ཤིས་སྒོ་མང་ལས། སྤྱི་བཙན་ཆེན་པོ་གཡག་གི་མགོ་བོ་ཅན། །མགོ་ལ་ཁ་བཞི་བསེ་རྟ་རྨིག་བརྒྱད་མགྱོགས། །ཞེས་ཀྱང་གསུངས་སོ། །
དེ་ལས་གཞན། ཞོགས་པ་ཉི་ཟེར་དང་ཉི་ནུབ་ཀྱི་དུས་སུ་བཙན་རྒྱུ་བའི་དུས་ཚོད་ཡིན་ལ། རླུང་ཁ་དོག་དམར་བོ་ལྟ་བུའི་བཙན་གྱི་རྒྱུ་ལམ་ལ་གདོང་ཐུག་བྱུང་ཚེ། དེ་མ་ཐག་བརྒྱལ་འགྲོ་བའམ། བཙན་ཁ་ཕོག་སྟེ་ཁ་ཡོ་བ་དང་རྐང་ལག་འཇས་པ། སྐེ་འཁྱོག་པ། ཀླད་གཉན་གཟེར་བ་སོགས་ཀྱི་བཙན་གྱི་གནོད་པ་འབྱུང་། བཙན་ཀྱི་གནོད་པ་བཟློག་ཐབས་ལ། བཙན་མདོས་དང་བཙན་མཆོད། དམངས་ཁྲོད་ཀྱི་ལག་ལེན་ལ་རྡོའི་ཐོ་བསླངས་པ། ཁ་དཔེར། ཀྱལ་རྟ་དམར་བོ་ཡོད་ས་ན། །བུ་རྟ་བཙན་གྱིས་འཁྱེར་རབས་མེད། །ཟེར་བ་ལྟར། མི་ཕྱུགས་སོགས་ཀྱི་སྐེར་ཀྱལ་རྟའི་ཤིང་ཕྲན་རེ་འདོགས་སྲོལ་ཡོད་ལ། ལྷག་པར་དུ། ཁེ་ཁ་སོགས་བཙན་གྱི་རྒྱུ་ལམ་བཀག་ཚེ། བཙན་མདས་ཕོག་པས། གནས་དེར་བཙན་མདོས་དང་། བཙན་མཆོད་བྱེད་སྲོལ་ཡོད། ལྷ་འདྲེའི་བཀའ་ཐང་ལས། བཙན་ཚོགས་ཀྱི་རྗེ་བོ་ནི་རྫོང་བཙན་ཀི་རྟི་བྱ་བ་དེ་ཡིན་པར་ཡང་གསུངས་སོ། །
བདུད།
བོན་གཞུང་སྲིད་པའི་མཛོད་ཕུག་སོགས་སུ། བདུད་ནི་སྲིད་པའི་སྒོ་ང་ནག་པོ་ལས་བྱུང་ཞིང་། སྐྱེ་འགྲོའི་བླ་ཚེ་སྲོག་གསུམ་དང་བདེ་སྐྱིད་དབང་ཐང་ལ་གནོད་པའི་མ་རུངས་པའི་འགྲོ་བ་ཞིག་ཏུ་བརྩི་ཞིང་། གཞན་འདི་ལ་རིགས་ཀྱི་སྒོ་ནས་བདུན་ཙམ་འདུག་ལ། མི་བདུད་དང་བཅས་པ་ཞེས་བཤད་ཡོད་དོ། །
ཡང་། སྟོན་པ་གཤེན་རབ་ཀྱི་མདོ་འདུས་རིན་པོ་ཆེའི་རྒྱུད་ལས། བདུད་ལ་རྣམ་པ་ལྔ་ཡོད་དེ། །ཀུན་ནས་ཉོན་མོངས་པ་ཡི་བདུད། །ཕུང་བོ་ཉེར་བར་ལེན་པའི་བདུད། །འཆི་བདག་ལས་བཙན་དག་གི་བདུད། །སྒྱུ་མ་འཁྲུལ་བ་གཟུགས་བརྙན་བདུད། །ལྷ་ཡི་བུ་ཡི་བདུད་དང་ལྔ། །དེ་ཡང་ཉོན་མོངས་བདུད་ལ་ལྔ། །འདོད་ཆགས་ཆུ་བོའི་བདུད། །ཞེ་སྡང་མེ་འབར་བདུད། །གཏི་མུག་མུན་འཐིབས་བདུད། །ང་རྒྱལ་བྲག་རིའི་བདུད། །ཕྲག་དོག་རླུང་འཚུབ་བདུད་དག་གོ །ཉོན་མོངས་བདུད་ཀྱིས་བཞེན་བཏབ་པས། །ཕུང་བོ་ལྔ་ནི་ཉེ་བར་བླངས། །ཟག་བཅས་ཕུང་བོ་རྣམ་ལྔ་ལ། །མངོན་པར་ཞེན་པ་ཕུང་བོའི་བདུད། །སྔ་མའི་ལས་དང་ཕྱི་མའི་ལས། །སྲོག་ནི་རྐྱེན་གྱིས་འགག་པ་ལ། །འཆི་བདག་ལས་བཙན་བདུད་ཅེས་བྱ། །འདོད་པའི་ཡོན་ཏན་ལྔ་རྣམས་ནི། །སྒྱུ་མ་ཡིན་ཏེ་དེ་ལ་ཞེན། །སྒྱུ་མ་གཟུགས་བརྙན་བདུད་དག་གོ །ཁྱབ་པ་སྒྱུ་མ་གཟུགས་བརྙན་བདུད། །ཅེས་སོ། །
མཆིམས་མཛོད་ལས། བདུད་ཕལ་མོ་ཆེ་ལྷ་དང་། དེ་ལས་ཉུང་ཤས་ཀླུ་དང་ཡི་དྭགས་ཀྱི་རིགས་སུ་གནས་པའང་ཡོད་གསུངས། བདུད་ཀྱི་སྐད་དོད་དུ་མ་རཱ་ཛ་ཟེར་ཞིང་། དེ་ཡང་། རྣམ་དཀར་དགེ་བའི་ཆོས་ལ་བར་དུ་གཅོད་པ་ཞིག་ཡིན་ལ། དེ་ལ་གཟུགས་ཅན་གཟུགས་མེད་གཉིས་ཡོད། ཡོངས་གྲགས་ལ་བདུད་བཞི་སྟེ། ཉོན་མོངས་པའི་བདུད། ཕུང་བོའི་བདུད། འཆི་བདག་གི་བདུད། ལྷའི་བུའི་བདུད་དོ། །ཡང་། བདུད་བཞི་བོ་འདི་ལྷ་ཆེན་བཞི་དང་ཁ་དོག་གི་ཆ་ནས་ངོས་འཛིན་བྱེད་སྟངས་ཤིག་ལ། ཉོན་མོངས་པའི་བདུད་དབང་ཕྱུག་དཀར་བོ། ཕུང་བོའི་བདུད་ཚངས་པ་སེར་བོ། ལྷའི་བུའི་བདུད་ལྷ་ཁམས་སེར་བོ། འཆི་བདག་གི་བདུད་ཁྱབ་འཇུག་ནག་པོའོ། །གཞན་ཡང་། ཐོགས་བཅས་ཀྱི་བདུད། ཐོགས་མེད་ཀྱི་བདུད། དགའ་བྲོད་ཀྱི་བདུད། སྙེམས་བྱེད་ཀྱི་བདུད། ཅེས་ཀྱང་དབྱེའོ། །ཡང་། བླ་མེད་ཀྱི་ལུགས་ལ་རྣམ་རྟོག་འཕྲོག་པའི་བདུད། བཏང་སྙོམས་ལེ་ལོའི་བདུད། ལོངས་སྤྱོད་འདུ་འཛིའི་བདུད། ཚིག་རྩུབ་མཚོན་ཆའི་བདུད། ཁྲོ་གཏུམ་ངང་ཐུང་གི་བདུད་བཅས་ལྔར་ཡང་གསུངས་སོ། །
དེ་མིན། བོད་ཀྱི་སྔ་རབས་ལོ་རྒྱུས་རྣམས་སུ། གཉིས་པ་རེ་ཏེ་མགོ་གཡོག་བདུད་ཀྱིས་བྱས། །གསུངས་པ་ནི། ས་ཆ་དང་མིའི་རིགས་ཤིག་ཡིན་ཏེ། ཡང་། མཁར་རྨེའུ་བསམ་གཏན་གྱིས་བདུད་ཅེས་པ། མི་ཉག་དང་ནམ་པ་ལྡོང་ཞེས་པ་ནས་ཡོང་བར་བཤད་ལ། དེ་ཡང་རྒྱུ་མཚན་འདུག་སྟེ། བདུད་རིགས་ནི་ཡུལ་ལུང་ཚོ་ཤོག་དེ་དག་གི་དཔའ་མཛངས་བརྟུལ་ཕོད་ཅན་གྱི་ཕ་མེས་རྣམས་གྲོངས་རྗེས། གཟུགས་མེད་ཀྱི་སྟོབས་ཤུགས་བསྐྱེད་ནུས་པ་ཞིག་ཏུ་བཞེངས་བསྐྲུན་བྱས་ཏེ། ད་དུང་གསོལ་མཆོད་བྱེད་སྲོལ་ཡོད་པའང་གེ་སར་སྒྲུང་ལས་རེ་འགའ་མཐོང་སྟེ། བྷེ་གླིང་གཡུལ་འགྱེད་ལས། དར་མའི་དམུ་བདུད་བཅོ་བརྒྱད་པོ། །གསོལ་ལོ་མཆོད་དོ་གྲོགས་ལ་བྱོན། །ཞེས་དང་། མོན་གླིང་གཡུལ་འགྱེད་ལས། གླུ་ཡར་མཆོད་ནམ་མཁའི་དབྱིངས་རིམ་ནས། །ལྷ་བདུད་སྟོང་དང་རྩ་གཉིས་མཆོད། །བར་མཆོད་བར་སྣང་ཡངས་པ་ནས། །གཉན་བདུད་སུམ་བརྒྱ་དྲུག་ཅུ་མཆོད། །མར་མཆོད་ས་གཞི་འགྱུར་མེད་ནས། །ཀླུ་བདུད་བརྒྱ་དང་རྩ་གཉིས་མཆོད། །ཅེས་སོགས་ཀྱི་དཔག་ནུས་སོ། །
སྲིན་པོ།
སྲིན་པོའི་སྐད་དོད་ལ་རཀྵཿཟེར་ལ། མཆིམས་མཛོད་ལས། མིའི་བྱེ་བྲག་ཅིག་ཏུ་བཤད་པ་ལྟར། མིའི་འགྲོ་བ་ཞིག་ཡིན་པ་ལས། མགོ་དགུ་ཅན་ཞིག་བཤད་པ་ནི་འཇིགས་རུང་གི་སྒྲོ་བཏགས་ཡིན། གང་ལྟར་ཤ་ལ་ཟ་ཞིང་ཁྲག་ལ་རོལ་བ། མི་ལྤགས་རློན་པ་གོས་སུ་གྱོན་ཞིང་མི་མགོ་ཕྲེང་བ་འདོགས་པ་ཞིག་ཡིན། གནས་ནི་ལྷོ་ནུབ་རྔ་ཡབ་གླིང་སྟེ། གནའ་དུས་ཞིས་ལན་ནམ་སིང་ག་ལ། དེ་སང་ཧིན་དྷི་ཉི་ཞི་ཡའི་མཚོ་གླིང་དེ་ཡིན། གཞན་གདོད་མའི་དུས་སུ་བོད་ཀྱི་ས་ཆར་སྲིན་པོ་གླིང་དགུ་ཞེས་གྲགས་པ་དང་། སྲིན་པོ་གཉའ་རེངས་ཁྲག་མིག་གིས་དབང་བསྒྱུར་བ་སོགས་བཤད་པའང་། ཤ་ལ་ཟ་ཞིང་ཁྲག་ལ་རོལ་བའི་མི་ལ་དེ་སྐད་ཅེས་བྱའོ། །ཡང་། རྒྱུད་ཀྱིས་ཟིན་སོ་ཆེ་བའི་གཙང་རིས་ཀྱི་དཔལ་མགོན་བདུན་ཅུ་རྩ་ལྔའི་ནང་གསེས་ཀྱི་སྲིན་པོ་ནི། ཕྱག་གཡས་རལ་གྲི་འཕྱར་ཞིང་། གཡོན་དཀུར་བརྟེན་པའི་སྲིན་པོ་དམར་ནག་ཡི་དྭགས་ཀྱི་གདན་ལ་འདུག་པ་ཡུམ་དང་བཅས་པ་དེའོ། །
གདོན།
གདོན་གྱི་སྒྲ་བཤད་ལ། གཡུ་ཐོག་དགོངས་རྒྱན་ལས། གདོན་ནི། རང་ངོ་མ་ཤེས་པ་འཕྲུལ་བའི་རྣམ་རྟོག་གིས་ཕན་གནོད་སྒྲོ་བཏགས་བྱས་པ་ལས་བྱུང་བའི་མི་མིན་གྱི་གནོད་པ་གཏོང་བའི་ནུས་མཐུའི་མིང་ངོ་། །དེ་ལ་ཅིའི་ཕྱིར་གདོན་ཞེས་བརྗོད་ན། རྣམ་རྟོག་ལས་བྱུང་བའི་འདྲེ་བོ་ཆེ་དེས་ལུས་ཅན་གྱི་བླ་ཚེ་སྲོག་གསུམ་གདོན་ཞིང་འཕྲོག་པར་བྱ་བའི་ཕྱིར་གདོན་ཞེས་བྱ། གཞན་ཡང་། གདོན་གྱི་སྐད་དོད་ལ་གྲ་ཧཱ་སྟེ། ཉེ་བར་ལེན་པའམ་འཛིན་པ་ལ་འཇུག ཀློང་རྡོལ་བླ་མས། ནག་ཕྱོགས་བདུད་རིགས་ནི། གནས་གདོན། ལུས་གདོན། ལས་གདོན་གསུམ་ལ་དྲུག་དྲུག་ཏུ་ཕྱེ་བ་ལས། གཙོ་བོའི་གདོན་བཅོ་བརྒྱད་དོ། །དེ་དག་ལོ་གཅིག་གི་ཞག་རེ་ནས་དེ་གསུམ་གསུམ་གྱིས་བར་ཆད་བརྩམས་པའི་ཆ་ནས་གདོན་རིགས་སུམ་བརྒྱ་དྲུག་ཅུའོ། །ཞེས་མ་ཅིག་གི་གཅོད་གཞུང་ལས་གསུངས་པར་བཤད་དོ། །དུང་དཀར་ཚིག་མཛོད་ལས། གདོན་རིགས་བཅོ་བརྒྱད་ནི། ལྷ། ལྷ་མིན། དྲི་ཟ། ཀླུ། གནོད་སྦྱིན། ཚངས་པ། སྲིན་པོ། ཤ་ཟ། ཡི་དྭགས། གྲུལ་བུམ། བྱད་སྟེམས། གཡེང་བྱེད། རོ་ལངས། མཚུན་ལྷ། བླ་མ། དྲང་སྲོང་། རྒན་པོ། གྲུབ་པ་བཅས་གསུངས་སོ། །
ཡང་། མ་ཅིག་གི་གཅོད་གཞུང་ལས། གཙོ་བོའི་གདོན་ཆེན་བཅོ་བརྒྱད་འདི་ལྟར་ངོས་བཟུང་ཡོད་དེ། རྣམ་རྟོག་ཅན་ལྷ་འདྲེའི་གདོན། རླུང་ཆེ་ཅན་རྩ་རླུང་གི་གདོན། བསམ་རྒྱ་ཅན་ཁ་ཕྱིར་ལྟོས་ཀྱི་གདོན། ཉལ་སྣང་ཅན་ཞེན་ཆགས་ཀྱི་གདོན། གཏི་མུག་ཅན་བྱིང་རྒོད་ཀྱི་གདོན། གཉིད་བོ་ཆེ་ལང་འཚེར་གྱི་གདོན། སྙིང་རུས་མེད་པ་འཚེར་སྣང་གི་གདོན། གྲོད་པོ་ཆེ་ལྟོ་གདུང་གི་གདོན། ཟས་སྲེད་ཅན་ཞིམ་མངར་གྱི་གདོན། མཐུན་འཇུག་ཅན་རྣམ་གཡེང་གི་གདོན། ཞེན་ལོག་ཅན་བློ་རྒོད་ཀྱི་གདོན། བཟང་འདོད་ཅན་ཟོག་པོའི་གདོན། སེམས་ཞུམ་ཅན་དགེ་སྦྱོར་རྒྱང་བསྐྱུར་གྱི་གདོན། ཕྱི་བཤོལ་ཅན་ལེ་ལོའི་གདོན། ཕྱི་ཚིས་ཅན་གསོག་འཇོག་གི་གདོན། ལས་ངན་ཅན་ནད་གདོན་སློང་ཚད་ཀྱི་གདོན། རློམ་སེམས་ཅན་ཁྱད་གསོད་ཀྱི་གདོན། རེ་དོགས་ཅན་ཁུ་འཁྲིག་བར་ཆད་ཀྱི་གདོན་ཏེ་བཅོ་བརྒྱད་དོ། །ཡང་འཇམ་དཔལ་རྩ་རྒྱུད་ལས་ཚངས་བའི་ཆུང་མ་སོགས་མོ་གདོན་བཅུ་དགུ་ཡང་གསུངས་སོ། །
ཡང་བྱིས་པ་ལོ་བཅོ་ལྔ་མན་ཆད་ལ་གནོད་པའི་གདོན་ཆེན་བཅོ་ལྔ་ཡོད་དེ། ༡ འཇམ་པ་པོ་ནི་བ་ལང་གཟུགས། །དེས་ཟིན་མིག་ནི་རབ་ཏུ་འགྱུར། །༢ རི་དྭགས་རྒྱལ་བོ་རི་དྭགས་འདྲ། །དེས་ཟིན་སྐྱུགས་པ་མི་ཟད་སྐྱུགས། །༣ སྐེམ་བྱེད་པ་ནི་གཞོན་ནུའི་གཟུགས། །དེས་ཟིན་བྱིས་པ་འགུལ་བར་བྱེད། །༤ བརྗེད་བྱེད་པ་ནི་ཝ་འདྲའོ། །དེས་ཟིན་འགྲེ་ཞིང་སྒྲ་ཡང་འབྱིན། །༥ ཁུ་ཚུར་ཅན་ནི་བྱ་རོག་གཟུགས། །དེས་ཟིན་ཁུ་ཚུར་བཅིངས་ཤིང་དགའ། །༦ མ་མོ་དེ་ནི་མི་ཡི་གཟུགས། །དེས་ཟིན་རྒོད་ཅིང་སྒྲ་ཡང་འབྱིན། །༧ ཛ་མི་ཀ་ནི་རྟ་ཡི་གཟུགས། །དེས་ཟིན་ནུ་ཞོ་མངོན་མི་དགའ། །༨ འདོད་པ་ཅན་ནི་རྡོ་རྗེའི་གཟུགས། །དེས་ཟིན་གཉིད་ལོག་ངུ་བར་བྱེད། །༩ ནམ་གྲུ་ཁྱི་ཡི་གཟུགས་ཀྱིས་ཏེ། །དེས་ཟིན་ལྕེ་ལ་སོས་ནི་འཆའ། །༡༠ སྲུལ་བོ་ཕག་གི་གཟུགས་ཀྱིས་སོ། །དེས་ཟིན་ཀུ་ཅོའི་སྒྲ་ཡང་འབྱིན། །༡༡ མ་དགའ་བྱེད་པ་བྱི་ལའི་གཟུགས། །དེས་ཟིན་སྣ་ཚོགས་གཟུགས་སུ་འགྱུར། །༡༢ བྱ་ནི་འདབ་ཆགས་གཟུགས་ཀྱིས་སོ། །དེས་ཟིན་མནམ་པའི་དྲི་རྣམས་འབྱུང་། །༡༣ གཉའ་ལག་ཅན་ནི་བྱ་གག་གཟུགས། །དེས་ཟིན་འགུལ་བ་རབ་ཏུ་འགགས། །༡༤ བཞིན་རྒྱས་འུག་པའི་གཟུགས་ཀྱིས་ཏེ། །དེས་ཟིན་རིམས་བཏབ་འཁྲུ་བར་བྱེད། །༡༥ མིག་འཕྱང་བ་ནི་ཕ་ཝང་གཟུགས། །དེས་ཟིན་སྤྱི་བུང་ལྡན་པར་འགྱུར། །ཞེས་དང་།
དེ་དག་གི་བྱེད་ལས་ཀྱང་། རཱ་ག་ཨ་སེའི་བྱིས་གླུད་ཟིན་བྲིས་ལས། བྱིས་པའི་གདོན་ཆེན་བཅོ་ལྔ་བོ། །རྟག་ཏུ་ཁྲག་ལ་འཐུང་རྣམས་ཀྱིས། །གང་ལ་བུ་ནི་མི་ཆགས་དང་། །གང་གི་མངལ་དུ་མི་གནས་དང་། །སྐྱེས་པ་བུད་མེད་འདུ་བ་དང་། །དབང་བོ་རྣམས་ཀྱང་མྱོས་པར་བགྱི། །མེར་མེར་བོ་དང་ནུར་ནུར་བོ། །བུ་ཡིས་ས་བོན་མ་རུངས་བགྱིད། །གང་ཡང་མངལ་ནི་མཐུར་དུ་གྲུབ། །ཤ་མ་མི་འབྱུང་གདོན་བགྱིད་པ། །འདི་དག་བྱིས་པ་སྐྲག་པར་བགྱི། །འདི་དག་བུ་འཕྲོག་མ་རུངས་པ། །བྱིས་པ་རྣམས་ལ་འཇིགས་བགྱིད་པ། །ཞེས་སོ། །
ཡང་། གཏོར་མ་ཆ་གསུམ་ལས་ཕྱོགས་སྐྱོང་བཅུའི་འཁོར་ཕལ་ཆེར་དང་། སྡེ་བརྒྱད་ཕལ་ཆེར་དང་འབྱུང་བོ་དང་བགེགས་རྣམས་ཀྱང་གདོན་གྱི་རིགས་སུ་བཤད་དོ། །
གཞན་ཡང་། སྟེང་གདོན་གཟའ་དང་ཁྱབ་འཇུག བར་གདོན་བཙན་དང་རྒྱལ་བོ། འོག་གདོན་ཀླུ་དང་ས་བདག་ཏུའང་གསུངས་ལ། གླུད་ཀྱི་ཆོ་ག་རྐྱེན་ངན་ཀུན་སེལ་ལས། སྟེང་གདོན་ལྷ་སྲིན་དྲེགས་པ་ཅན། །འོག་གདོན་ཀླུ་སྲིན་ཀླུ་གཉན་དང་། །བར་གདོན་བདུད་དང་རྒྱལ་བོ་བཙན། །ཞེས་དང་། གསོ་རིག་གི་གཞུང་ལྟར་ན། སྟེང་གདོན་གཟའ་དང་རྒྱུ་སྐར་ཏེ། རླུང་གི་རང་བཞིན་ཅན་དང་། བར་གདོན་ནི་བཙན་དང་རྒྱལ་བོ་སྟེ་མཁྲིས་པའི་རང་བཞིན་ཅན་དང་། འོག་གདོན་ནི་ཀླུ་དང་ས་བདག་སྟེ་བད་ཀན་གྱི་རང་བཞིན་ཅན་ཞེས་གསུངས་སོ། །
ཡང་། གདོན་སེལ་མན་ངག་སྨན་སྦྱོར་ཞིག་ལ། རིག་པ་མཆོག་གི་རྒྱུད་ལས། ཡུངས་དཀར་ཤུ་དག་ཤིང་ཀུན་པི་པི་ལིང་། །ན་ལེ་ཤམ་དང་ཆ་མཉམ་འབྲས་བུ་གསུམ། །གི་རི་ཀར་ཎི་དཀར་བོ་དག་དང་ནི། །རུ་རྟ་པྲི་ཡང་ཀུ་དང་བཅའ་སྒ་དང་། །ཐང་ཤིང་པུ་ཤིལ་ཙེ་དང་བཅས་པ་དང་། །ནག་ཏ་མ་ལའི་འབྲས་བུར་བཅས་པ་རྣམས། །བ་གཅིན་དག་གིས་བཏགས་ཏེ་མར་དུ་བཙོ། །བ་གཅིན་བཞི་འགྱུར་བླུགས་པའི་སྨན་མར་དེ། །མིག་བསྐུ་སྣར་བླུགས་ལུས་བྱུགས་གདོན་ཀུན་གྲོལ། །གདོན་རྣམས་ཀུན་གྱི་སྨན་མཆོག་དམ་པར་བཤད། །ཅེས་སོ། །
གཟའ།
དྲང་སྲོང་ཆེན་པོ་གཟའ་བདུད་ར་ཧུ་ལ་ནི། ཕྱག་ན་རྡོ་རྗེའི་སྤྲུལ་བར་གྲགས་ལ། སྤྱིར་རྡོ་རྗེ་ཐེག་པ་དང་། ཁྱད་པར་དུ་སྔ་འགྱུར་ཐེག་པ་སོགས་སྒྲུབ་ཡིག་མང་བོར་འབྱུང་ཞིང་། སྒོས་རྒྱུད་བདུད་བྱ་རོག་མགོ་བརྩེགས་གསང་བ་སྒྲོལ་བྱེད་ཀྱི་རྒྱལ་བོ་ཀི་ཀང་རོག་ཏིའི་མདོ་སྙིང་གཟེར་ནག་པོའི་རྒྱུད་ལས་བསྟན།
གཟའ་ནི་ཀླུ་དང་སྲིན་པོ་གཉིས་ཀའི་ཆ་འཛིན་པ་ཞིག་ཡིན་པས། ཆ་བྱད་ནི་སྟོད་མི་ལ་སྨད་སྦྲུལ་མཇུག་ཁྲག་མཚོའི་ཀློང་དུ་བཞུགས་པ། སྐུ་སྟོད་མེ་འབར་ལ་སྐུ་སྨད་སྦྲུལ་གྱིས་སྟོང་ཉིད་སྙིང་རྗེ་འམ་ཐབས་ཤེས་ཟུང་འཇུག་གི་དོན་མཚོན་པ། མགོ་དགུ་བོའི་རྩེ་མོར་བྱ་རོག་གི་མགོ་ཅན་ཡོད་པ། ཕྱག་བཞིའི་གཡས་པ་ན་རྒྱལ་མཚན་དང་མདའ། གཡོན་པ་ན་སྦྲུལ་ཞགས་དང་གཞུ་འཛིན་པ། དབུ་སྐྲ་ཁམ་སེར་གྱེན་དུ་བརྫེས་པ། ཞིང་ཆེན་གྱི་སྟོད་གཡོགས་དང་། སྟག་ཤམ་གསོལ་བ། ཐོད་སྐམ་ལྔའི་དབུ་རྒྱན་དང་། རློན་པ་ལྔ་བཅུའི་དོ་ཤལ་ཅན། ལུས་ཐམས་ཅད་ཁ་མིག་གི་བཀང་བའོ། །ཁ་ཟས་སུ་ཚིལ་ཟ་ལ། འཁོར་དུ། གཡས་སུ་ཡབ་རྡོ་རྗེ་སྲིན་པོ། གཡོན་དུ་ཡུམ་རྡོ་རྗེ་གློག་འགྱུ་མ། ཕྱོགས་མཚམས་སུ་གཟའ་བརྒྱད་གདོང་མོ་བཞི་དང་རྒྱུ་སྐར་ཉེར་བརྒྱད་ལ་སོགས་དྲེགས་པ་སྡེ་བརྒྱད་ཀྱི་དམག་ཚོགས་སྤྲིན་ལྟར་གཏིབས་པའོ། །ཁ་དཔེར། དམར་ནག་གཟའ་ལ་ཁ་དུག་ཆེ། །སྲོག་གཅོད་ཤན་པ་ལུས་སྡིག་ཆེ། །ཟེར་བ་བཞིན་གཟའ་ཁ་གཏད་དུ་ཐུག་ན་ཁ་རླངས་ཕོག་སྟེ་ཀླད་རྩ་བརྡོལ་ནས། ལྐུགས་ཤིང་མིག་སླེ་བ། གཞོགས་བཤལ་བ། ཚོར་བ་ཉམས་པ། དྲི་ཆེན་དང་དྲི་ཆུང་དབང་མེད་དུ་འཆོར་བ། བརྒྱལ་བ་སོགས་འབྱུང་ངོ་། །
གཟའ་ནད་བཅོས་ཐབས་ལ། འབྲེལ་ཡོད་འདོན་ཆོག་ཅིག་ཏུ། བླ་མ་རིན་པོ་ཆེ་གཡའ་བཟང་དེ་ཉིད་རོང་ཁམས་ཕྱོགས་ཀྱི་སྒྲུབ་ཁང་ཞིག་ནས་མཚམས་དམ་པོར་མཛད་ཀྱིན་བཞུགས་ཡོད་པ་ལ། གནམ་ནས་མི་དཀར་བོ་ཤེལ་གྱི་འཁར་བ་ཐོགས་པ་ཞིག་ཕར་འགྲོ་ཚུར་འོང་བྱེད་པར་གཟིགས་པ་དེ་ལ། ཁྱེད་སུ་ཡིན་ཞེས་དྲིས་པས། དྲང་སྲོང་ར་ཧུ་ལ་ཡིན་ཟེར། དེར་བླ་མས་ཁྱེད་ཀྱིས་སེམས་ཅན་རྣམས་ལ་ནད་བཏང་བ་མ་ཡིན་ཏེ། སྔོན་གྱི་སྨོན་ལམ་གྱིས་དེའི་གྲིབ་མ་ཕོག་པ་རྣམས་ལ་ནད་བྱུང་བ་ཡང་མ་ཡིན། ད་ནད་མ་བྱུང་བ་རྣམས་ལ་མི་འབྱུང་བ་དང་། བྱུང་ཟིན་པ་རྣམས་ལ་ནད་སེལ་བའི་གདམས་པ་འདི་འབུལ་ལོ་གསུངས་ནས་གདམས་པ་འདི་ཕུལ་བ་ཡིན་ནོ། །ཞེས་གསུངས་པ་ལྟར། བླ་མ་རིན་ཆེན་གཡའ་བཟང་ནས་བརྒྱུད་པའི་གཟའ་ནད་བཅོས་པའི་གདམས་པ་ཡོད་པ་དང་།
གསོ་རིག་རྒྱུན་མཁོ་གལ་ཆེ་བ་བདམས་བསྒྲིགས་ལས། སྨན་ཁྲག་སྦྱོར་ཉེར་ལྔ། རྫས་ཆེན་བཅོ་བརྒྱད་པ་སོགས་ཟབ། གྲིབ་ཕོག་དུས་ཐོག་མར་སྤོས་དཀར་གྱི་ཐང་བཏང་ན་བཅོས་སླ། སྲིན་བྱའི་ཀླད་པ། ཡུགས་སའི་མངལ་ཁྲག དཔའ་བོའི་གྲི་གུག་གསུམ་བུ་རམ་དང་བསྲེས་ནས་བྱིན་པས་ཐེབས་མཆོག་ཏུ་བཤད་གསུངས་ལ། དེ་ལས་གཞན། མན་ངག་ལྷན་ཐབས་སོགས་སུའང་གཟའ་བཅོས་མང་དུ་བཤད་དོ། །
དེ་མ་ཟད་ར་ཧུ་ལ་འདི་སེར་བའི་གདོང་འདྲེན་ཏེ། ཀ་རྨ་ཆགས་མེད་ཀྱི་སེར་སྲུང་མེའི་བྱ་ཁྱུང་འབར་བ་ལས། བསྟན་སྲུང་སད་སེར་བདག་པོ་རཱ་ཧུ་ལ། །གཟའ་བརྒྱད་གདོང་མོ་གཟའ་སྲིན་བྱེ་བ་འབུམ། །སྡོང་ཟླ་ལྷ་སྲིན་སྡེ་བརྒྱད་ཡུལ་ལྷའི་ཚོགས། །སད་སེར་བདག་པོ་མ་ལུས་འཁོར་བཅས་ལ། །ཞེས་དང་། དེ་ལས་གཞན། སེར་སྲུང་དེ་ལས། ཁོག་སྟོད་སྲིན་པོ་ཕ་ཡི་ལུས། །ཁོག་སྨད་དུག་སྦྲུལ་མ་ཡི་ལུས། །སྤྱན་སྟོང་འགྲོ་དྲུག་ལེགས་ཉེས་ལྟ། །ལྷོ་ནུབ་སྲིན་པོའི་ཡུལ་ནས་བཞེངས། །ཟླ་བའི་རྗེས་གཅོད་ཤར་དུ་རྒྱུགས། །ཉི་མའི་རྗེས་གཅོད་ནུབ་ཏུ་རྒྱུགས། །འབྱུང་བ་ལྔ་ཡི་བདུད་པོ་སྟེ། །མིང་བརྒྱ་བོ་ལ་མཚན་སྟོང་བོ། །དུས་ཚོད་ཚེས་གྲངས་ཀུན་གྱི་བདག །ཉིན་མོ་རྒྱུགས་པས་ཕྱོགས་བཞི་འཇོམས། །མཚན་མོ་རྒྱུགས་པས་མཚམས་བཞི་འདུལ། །ནམ་མཁའི་དབྱིངས་སུ་བསྐྱོད་ཙ་ན། །སྟེང་གི་ལྷ་རྣམས་སྐྲག་ཅིང་སྔངས། །ཐོག་དང་སེར་བ་གནམ་རྡོ་བཏང་། །རྒྱ་མཚོའི་སྟེང་དུ་རྒྱུགས་ཙ་ན། །འོག་གི་ཀླུ་རྣམས་ཆོ་ངེ་འདེབས། །ས་གཡོས་འཁྱུག་དང་ཡམས་ནད་བཏང་། །བར་སྣང་ཁམས་སུ་རྒྱུགས་ཙ་ན། །མེ་འབར་སྐར་མདའ་དུ་འཁྱུག་བཏང་། །ཞེས་སོ། །
ཡང་། ཀརྨ་ཆགས་མེད་ཀྱི་གཤེད་གཏོ་ལས་སྲིན་པོ་རཀྵ་མགོ་དགུ་དང་ཀླུ་མོ་ཕྲག་དོག་ཟ་བྱེད་གཉིས་ལ་གཟའ་གཤེད་ངན་པ་མཆེད་བཞི་སྐྱེས་པ་སྟེ། མི་ལུས་གླང་གི་མགོ་ཅན། ལག་ན་ཞགས་པ་དང་ཞལ་ནས་ཐོག་གི་བུ་ཡུག་འཚུབ་པ་ཞིག་དང་། ཡང་མི་ལུས་འབྲུག་མགོ་ཅན། ཞལ་ནས་འབྲུག་སྒྲ་སྒྲོག་ཞིང་མེ་ཡི་ལྕེ་ཞགས་ལས་ཚྭ་ཚྭ་འཕྲོ་བ་ཞིག་དང་། ཡང་མི་ལུས་ལུག་མགོ་ཅན། གཅན་གཟན་གྱི་གདོང་བ་ལྡན་པ་ཞིག་དང་། ཡང་དྲེད་མོང་གི་ལུས་ལ་ཁྱི་མགོ་ཅན། ཆུ་སྲིན་སྣ་ལ་སྟག་གི་རི་མོ་ཡོད་པ། དུག་གི་ཁ་རླངས་ནག་པོ་ལ་འཇའ་ཚོན་བཀྲ་བ་ཞིག་དང་། བཞི་གའང་རུས་སྦལ་གྱི་རྐང་བ་ཅན་དུ་བཤད་དོ། །གཞན་དུ་ན། གཟའ་ལྔ་དང་། གཟའ་དགུ། གཟའ་བཅུ་སོགས་རྩིས་གཞུང་ལས་ཤེས་པར་བྱའོ། །
གཤིན་རྗེ།
གཤིན་རྗེ་ཆོས་ཀྱི་རྒྱལ་བོ་ནི། འཇམ་དཔལ་གཤིན་རྗེ་གཤེད་ཀྱི་བཀའ་སྡོད་ཡིན། ལས་འབྲས་ཀྱི་ཤན་འབྱེད་ཡིན་པས། ལམ་རིམ་ལས་བསྟན་པའི་སྐྱེས་བུ་ཆུང་ངུའི་སྲུང་མ་ཡིན། འདི་ལ་ཕྱི་ནང་གསང་བ་ཡང་གསང་བཅས་མང་། བྱེད་ལས་ནི། གཤིན་རྗེ་ཁྲམ་ལ་བཏབ་ཅེས། གསོན་པོ་ལ་འཆི་བའི་བརྡ་གཏོང་བ་དང་། ཚེ་སྲོག་འཕྲོག་པ། གཤིན་ཡུལ་དུ་སླེབས་ཚེ་དགེ་སྡིག་ཤན་འབྱེད་ཀྱིས་འགྲོ་བ་གཉིས་སུ་འཕེན་པ་དེའོ། །ཡང་། རྒྱུད་ཀྱིས་ཟིན་སོ་ཆེ་བའི་གཙང་རིས་ཀྱི་དཔལ་མགོན་བདུན་ཅུ་རྩ་ལྔའི་ནང་གསེས་གཤིན་རྗེ་ནི། ཕྱག་གཡས་བེ་ཅོན་ཐོགས་པ་དང་། གཡོན་དཀུར་བརྟེན་པ། མ་ཧེ་ལ་བཅིབས་པ། ཆུང་མ་ནག་མོ་དང་འཆི་བདག་མ་དང་བཅས་པའོ། །
ཐེའུ་རང་།
ཐེའུ་རང་ནི། འབྱུང་བོའི་རིགས་ཤིག་སྟེ། དེའི་རིགས་ལས་སྟོབས་དང་རྫུ་འཕྲུལ་ཆེ་བ། དམ་ཅན་རྡོ་རྗེ་ལེགས་པ་ཡིན་ལ། དེ་ནི་རྒྱལ་བསྟན་སྲུང་ཕྱིར་འཇིག་རྟེན་དྲེགས་པ་རང་རྒྱུད་པ་ལྟར། ཕྱག་ན་རྡོ་རྗེས་དབང་བསྐུར་ཞིང་བཀའ་བསྒོས་གཉེར་གཏད་དང་། སློབ་དཔོན་པད་འབྱུང་གིས་སྲུང་མར་མངའ་གསོལ་བ་ཞིག་ཡིན། ཁྱད་པར་དུ་བན་བོན་ཡོངས་ཀྱི་སྲུང་མ། རྒྱ་བོད་ཀུན་གྱི་གཏེར་བདག གནམ་ས་ཕྱོད་ཀྱི་བདག་པོ། མ་ངེས་པའི་རྫུ་འཕྲུལ་ཅི་ཡང་སྟོན་པ་ཞིག་ཡིན། དེའི་འཁོར་དུ་དམ་ཅན་མགར་བ་ནག་པོ། མོན་པ་སེར་སྐྱ། མཆེད་འཁོར་སུམ་བརྒྱ་དྲུག་ཅུ་སོགས་འཁོར་ཕལ་ཆེར་ཐེའུ་རང་གི་རིགས་ཡིན་པར་བཤད། གཞན་ཡང་། ཐེའུ་རང་སྤུན་དགུ་ཟེར་བ། རྒྱལ་ཐེའུ་ཁྲ་བོ། དྲི་ཤ་ཁ། རྐན་འཐོར་གསུམ་གྱིས་རྒྱལ་བོ་ལ་གནོད། ལས་ཐེའུ་སྨུག་པོ། ལེགས་ཐེའུ་ཁྲ་བོ། ས་ཐེའུ་ནག་པོ་གསུམ་གྱིས་དམངས་ལ་གནོད། བྲག་སྲིན། ཤིང་སྲིན། ཆུ་སྲིན་གསུམ་གྱིས་ཕྱོགས་སྐྱོང་ལ་གནོད། དགུ་ཀའི་རྐང་བས་བཅག་པར་བཤད་པ་དང་། ཨོ་རྒྱན་སངས་རྒྱས་ཀྱིས་མཛད་པའི་མདོས་གླུད་ཞེ་དགུ་མ་ལས། གནམ་ཐེའུ་ས་ཐེའུ་བར་ཐེའུ་དང་། །མོན་ཕོ་མོན་མོ་སྲས་དང་བཅས། །ཐེའུ་རང་སྤུན་དགུ་འཁོར་དང་བཅས། །ཞེས་ཀྱང་གསུངས་ལ།
དེ་དག་གི་བྱེད་ལས་ཀྱང་། བོན་གྱི་སྒྲ་འགྲེལ་ལས། གནམ་ཐེའུ་དཀར་བོ་གསུམ་ནི། གནམ་ཁྱི་དང་སྡོངས་ནས་ལྷ་སྡང་བདུད་དུ་འབབ། བར་ཐེའུ་ཁྲ་བོ་གསུམ་གྱིས་འདྲེ་རྒུ་སྣ་འདྲེན་བྱེད། ས་ཐེའུ་ནག་པོ་གསུམ་གྱིས་མོ་རྒྱུད་མངལ་དུ་སྐེམས་པར་བཤད་དོ། །གཞན་ཡང་། ཧོར་གྱིས་སེང་ལྕམ་འབྲུག་མོ་འཕྲོག་དུས་ཐེའུ་རང་དཀར་ནག་ཁྲ་གསུམ་གྱིས་གནོད་པ་བཏང་ཚུལ། ཧོར་གླིང་གཡུལ་འགྱེད་ལས། ཧོར་དམག་གླིང་གི་ཤར་རྫོང་ཇ་མཁར་རིང་མོར་བླུགས་ནས་འབྲུག་མོ་བཙན་འཕྲོག་བྱེད་སྐབས། འབྲུག་མོ་ལ་བྱ་ཐབས་མ་རྙེད་པར་ངེས་པར་འཕུར་སྙམ་དུ། དར་མདུང་གིས་གཤོག་པ་བྱས་ནས། འཕར་འཕར་ཐེབས་ཐེབས་ཅི་བྱས་ཀྱང་སྔོན་ལས་མཐུ་བཙན་པ་དང་། ཐེའུ་རང་དཀར་ནག་ཁྲ་གསུམ་གྱིས་གཉའ་བ་མནན་ནས་འཕུར་མི་ཐུབ་པར་གདའོ། །ཞེས་སོ། །
དེ་དག་གི་ཁ་ཟས་ཀྱང་། ལྷ་འདྲེ་བཀའ་ཐང་ལས་ཀྱང་། པད་འབྱུང་གཡའ་རི་གོང་དུ་བྱོན་དུས་ཐེའུ་བྲང་འགོང་བོ་མང་བོས་བསུ་བ་བྱས་ཏེ་ཁ་ཟས་མང་དུ་ཕུལ་བ་འདི་ལྟར་འབྱུང་སྟེ། དེ་ནས་གཡའ་རི་གོང་དུ་བྱོན། །ཐེའུ་བྲང་ཐེལ་འགོང་མང་བོས་བསུ་བ་བྱས། །འཛམ་བུ་གླིང་གི་ཆང་རིགས་ཐམས་ཅད་བསྡུས། །འབྲུ་ཆན་རིགས་བྱེད་མ་ལུས་པ། །ཤིང་ཏོག་རིགས་བྱེད་མ་ལུས་དང་། །ཤ་མོ་སྨུག་ཤ་དཀར་ཤ་སེར་ཤའི་རིགས། །ལ་ཉུང་གང་སྲུབས་ཙོང་སྒོག་བྲག་སྒོག་རིགས། །སྒོག་རྩེ་ཤ་བ་རྩེ་དང་ཙོང་རིགས་སྒོག །སྒོ་ང་ཉ་དང་ཤ་རིགས་རི་ཀླུང་མེད། །ནོར་གྱི་རིགས་བྱེད་མ་ལུས་སྣ་ཚང་བ། །ཐེའུ་བྲང་སྡེ་བརྒྱད་དཔག་ཚད་རྒྱང་གྲགས་སྤུངས། །ཞེས་དང་། འཇུ་མི་ཕམ་གྱི་མདོས་སྨྲེང་བཀྲ་ཤིས་སྒོ་མང་ལས། ཐེའུ་རང་གི་རྫོང་འདེབས་ལ། ཐེའུ་རང་མདོས་ལ་བཤོས་བུ་དང་། །རྟ་ཐོད་ལ་སོགས་ཐོད་སྣ་ཚོགས། །ར་སོགས་གཟུགས་བརྙན་ར་ཚིལ་དུད། །ཡོས་ཁྲ་ལ་སོགས་རྫས་སུ་བཤམས། །ཞེས་དང་། གླིང་སྒྲུང་ལས་ཀྱང་རྩལ་ཆེན་ནམ་མཁའ་སྦར་ཟིན་གྱིས་གླིང་ལ་སྒྱོགས་འཕེན་སྐབས། ཐེའུ་རང་དཀར་ནག་ཁྲ་གསུམ་ལ་ར་ཤའི་གསུར་དང་ཡོས་ཁྲ་དུང་ཤོ་གསུམ་གྱིས་མཆོད་པར་བཤད་ཡོད་དོ། །
གཞན་དུ། ཕལ་མོ་ཆེས་མིག་གིས་མི་སྣང་བའི་རྐང་བ་ཡ་གཅིག་ཅན་གྱི་གནོད་བྱེད་ཞིག་ལའང་ངོས་འཛིན་ཏེ། མོན་གླིང་གཡུལ་འགྱེད་ལས། ཐོག་མར་ཐེའུ་རང་འཕྲུལ་གྱི་བླ་མ་རྐང་གཅིག་བཏུལ། ཞེས་དང་། ངང་ཡག་ཐེའུ་མོ་སྤུན་དགུ་དང་། མགར་བའི་ཐེལ་མོ་རྐང་གཅིག་ཅེས་འབྱུང་ལ། དམངས་གཞས་ལས་ཀྱང་། ཁྱོད་ནི་ཐེའུ་རང་རྐང་གཅིག །ས་འོག་བརྒྱུད་གི་མ་འདུག །ཅེས་གསུངས་ལ། དམངས་ཁྲོད་དུའང་རྐང་བ་ཡ་གཅིག་གི་རྗེས་མཐོང་རྒྱུ་ཡོད་པ་དེ་ཡང་ཐེའུ་རང་རྐང་གཅིག་གི་རྗེས་ཡིན་པར་བཤད་དོ། །དེ་ཡང་བདེན་མཆི་སྟེ། ཀརྨ་ཆགས་མེད་ཀྱི་འདྲེ་དགུ་སྐྱས་འདེབས་ལས། ཐེའུ་རང་ཕ་ནི་སྟག་མཚུར་སྐྱེས་གཅིག་པོ། །མ་ནི་སྒང་མ་སྒང་ཆུང་སྣ་རུ་མ། །དེ་གཉིས་སྡེབ་ངན་འཚོགས་པ་ལ། །བུ་ནི་ཐེའུ་རང་སྤུན་དགུ་བྱུང་། །སྐྱེས་བཟང་དེ་ནི་ལུས་གཅིག་པོ། །དཔྲལ་བའི་དབྱིངས་སུ་མིག་གཅིག་པོ། །བྲང་གི་མདོ་ན་ནུ་གཅིག་པོ། །ཁ་ཡི་ནང་ན་སོ་གཅིག་པོ། །སྙོབ་པར་བྱེད་པའི་ལག་གཅིག་གོ །།མགོ་ན་རལ་བ་སྐྲ་གཅིག་པོ། །འགྲོ་བར་བྱེད་པའི་རྐང་གཅིག་པོ། །སྤྲུལ་བ་སྣ་ཚོགས་དུ་མ་འགྱེད། །ནངས་སྔ་ཕར་ལ་འགྲོ་བའི་ཚེ། །སྟག་ཆས་ཁྲ་དང་སི་ལི་ལི། །ནུབ་མོ་ཚུར་ལ་འོང་བའི་དུས། །བསེ་དྲི་དེ་ནི་ཐུ་ལུ་ལུ། །ཕོ་ཡི་ལུས་ལ་གནོད་པའི་དུས། །ན་ཆུང་མཛེས་སྡུག་ཅན་དུ་སྤྲུལ། །ཐིག་ལེ་བརྐུ་ཞིང་ལུས་མདངས་འཆོར། །ཚེ་སྲོག་གཅོད་ཅིང་ཁ་དབུགས་ལེན། །མོ་ཡི་ལུས་ལ་གནོད་པའི་དུས། །རག་ཤ་སྐྱེས་བཟང་གཅིག་ཏུ་སྤྲུལ། །དུས་མིན་མངལ་ཁྲག་འབབ་ཏུ་འཇུག །སྟོང་སྦྲུམ་བྱེད་ཅིང་ཚེ་སྲོག་གཅོད། །ཟླ་དགུ་ཁྲག་ཏུ་བསྒྱུར་བ་དང་། །ཕོ་ལུས་མོ་རུ་བསྒྱུར་བ་དང་། །གནོད་བྱེད་ཐེའུ་རང་སྤུན་དགུ་དེ། །མི་སྤྲུལ་དེ་ནི་དགུ་རུ་སྤྲུལ། །ར་རྒན་རུ་རིང་རྟ་རུ་ཞོན། །ར་སླག་ཁྲ་མོ་གོས་སུ་གྱོན། །ཞེས་གསུངས་སོ། །
དེ་དག་གི་འདུག་གནས་ནི། ཐེའུ་གཏོ་རྣམས་སུ། ད་ནི་ཐེའུ་རང་ལམ་སྟོན་ནོ། །གནས་འདིར་མ་འདུག་གཞན་དུ་སོང་། །བྲག་ཕུག་ཐང་ཡངས་ཚེར་མའི་རྩེར། །གྲོང་ཁྱེར་ལ་སོགས་གནས་དེ་རུ། །ཁྱེད་ཀྱིས་དབྱར་དཔྱིད་སྟོན་དགུན་བར། །འདུག་པའི་གནས་ཡིན་དེ་རུ་སོང་། །ཞེས་དང་། ཡང་། ས་དཔྱད་རྣམས་སུ། ཐེའུ་རང་གི་གནོད་པ་འགོག་པ་ལ། སྒོའི་ཡ་ཐེམ་དུ་རི་བོང་དང་། རྔ་གསེབ། རིལ་མ། གཤེད་སྲུང་སྤྲེའུ་སོགས་བཞག་ན། དགྲ་ལྷ་གཉན་པོ་འཁོར་ཞིང་། གནོད་འདྲེ་ཐེའུ་རང་སོགས་ཕལ་ཆེར་ཁོགས་ལ། མཆིག་སོགས་སྒོ་ཐེམ་དུ་འཇོག་པར་མི་བྱའོ། །ཞེས་ཀྱང་གསུངས་ལ། ཡང་ངག་རྒྱུན་དུ། སྤྲེའུ་ནི་རང་བཞིན་གྱིས་ཐེའུ་རང་གི་དགྲར་གྱུར་བས། ཁྱིམ་དེར་སྤྲེའུ་སྤུ་སྲེག་ནའང་ཐེའུ་རང་འགོག་ཐུབ་པ་དང་། ཐེའུ་རང་ནི་འོད་ལ་སྐྲག་པས་པས། སྒོའི་ཡ་ཐེམ་དུ་མེ་ལོང་བཀལ་ནའང་འགོག་ཐུབ་པ་དང་། ཐེའུ་རང་འཁོར་བའི་མི་དེའི་རྗེས་སུ་ཐལ་བ་བཏབ་ནའང་ཐེའུ་རང་སྤྲོད་ཐུབ་པར་བཤད་དོ། །
ཡང་། ཐེའུ་རང་བྱ་བ་སྐབས་བསྟུན་གྱི་གོ་བ་ལེན་ཚུལ་གཞན་ཡང་མཆི་སྟེ། ཐེའུ་རང་གི་རིགས་སུ་འཁྲུངས་པའི་གཉའ་ཁྲི་བཙན་པོ་སོགས་ཐེའུ་བྲང་སྤུན་དགུ་དང་། བསྟན་འབྱུང་རིག་པའི་ཤན་འབྱེད་ནོར་བུ་ཀེ་ཏ་ཀའི་དོ་ཤལ་ལས་གསུངས་པའི་གྲི་གུམ་བཙན་པོ་ཐེའུ་རང་མང་སྙ་ཝེར་རོའི་སྤྲུལ་པར་བཤད་པ་དང་། གླིང་སྒྲུང་ལས་གེ་སར་མ་སངས་ཀྱི་རྒྱུད་ལས་མཆེད་པ་ལ་འཁྲུལ་བར་མི་བྱའོ། །དེ་ནི་གནའ་བོའི་བོད་ཀྱི་རུས་རྒྱུད་ཅིག་ཏུ་གོ་བ་ཡིན་ཏེ། བོན་ཆོས་འགར། ཡ་ཐོག་གི་མིའི་རིགས་ནི། གཉེན་དང་མ་སངས་ལས་ཆད་པར་བཤད་ཅིང་། ཐེའུ་རང་ནི་མ་སངས་ཀྱི་བྱེ་བྲག་ཞིག་ཡིན་ལ། ད་དུང་། ཡ་ཐོག་བསྐལ་བའི་དུས་སུ་མི་ལས་ཀྱང་ལྷག་པའི་ཤེས་རིག་རྣོ་ཞིང་། བཟོ་འཕྲུལ་དང་དཔའ་རྩལ་ཆེས་མཐོ་བ་ཞིག་ཏུ་ངོས་འཛིན་ཡང་གནང་ཡོད་དོ། །
བསེ་རག
རཱ་ག་ཨ་སེའི་གཏོར་འབུམ་ལས། བསེ་རག་རི་ཞོན་སྤུན་དགུའི་ཚོགས། །ཞེས་དང་། མདོས་གླུད་ཞེ་དགུ་མ་ལས། བསེ་རག་མི་ཡི་རྒྱལ་བོ་ནི། །གཞོན་ནུ་དཔལ་སོགས་སྤུན་དགུ་བས། །ཟས་ནོར་རྣམས་ལ་གནོད་འཚེ་བྱེད། །བསེ་རག་འགོང་བོ་མང་བོའི་ཚོགས། །ཞེས་པ་དང་མཐུན་ལ། བསེ་རག་གི་གཟུགས་ནི། ལོ་གླུད་འགོང་བོ་དཀར་ཡས་ལན་ཆགས་ཚིམ་བྱེད་ལས། བསེ་རག་གི་རྒྱལ་བོ་ནི། མི་ལ་རྒྱལ་བོ་གཞོན་དཔལ་ཞེས་བྱ་བ་དེ། བུ་ཆུང་མཛེས་པ་གཡུ་རྣ་ཅན། མགོ་ལ་དངུལ་གྱི་ལྕོག་ཞུ་དང་། དར་འཕྲུ་བྱ་ཕོད་ལྡེམས་སེ་ཡོད་པ། ཤེལ་ཁྲབ་ལུས་ལ་གསོལ་ཞིང་། སྦ་དམར་གྱི་ཕུབ་ཆུང་རྒྱབ་ཏུ་འཁུར་བ། འཁོར་གསུམ་སྐེད་ལ་བསྐོར་ཞིང་། ལག་ན་བདུད་མོའི་རླུང་རྐྱལ་འཛིན་པ། རི་བོང་སྔོན་མོ་ལ་བཅིབ་ཅིང་། ཕུ་བོ་ཆེ་འབྲིང་ཆུང་གསུམ་སོགས་བསེ་རག་སྤུན་དགུས་བསྐོར་བ། བྱ་སྲེག་པ་བདུན་ནི་ཀླད་ན་ལྡིང་བའོ། །རང་ཅག་གིས་མི་ལ་ཙེ་ཙེ་ཟེར་བའང་འདི་ཡིན་ནོ། །
བྱེད་ལས་ནི། གཏོ་ཆོག་དེ་ལས། ཁྱད་པར་འབྲས་བུ་ལོ་ཏོག་ལ། །བར་དུ་གཅོད་ཅིང་གནོད་བྱེད་པའི། །བསེ་རག་ལྟོགས་འདོད་རྣམས་ལ་བསྔོ། །ཞེས་པ་ལས་ཤེས་སོ། །
ཡང་། ཀརྨ་ཆགས་མེད་ཀྱི་འདྲེ་དགུ་སྐྱས་འདེབས་ལས་མི་ལའི་རྣམ་པ་འདི་འདྲ་ཞིག་གསུངས་ཏེ། ཕ་ཙ་ཀ་བྱི་ལ་མགོ་དང་མ་ཅུ་ཏྲ་ཅི་ར་མ་གཉིས་ཀྱི་བུར་འདྲེ་ལ་སྔ་བ་མི་ལ་ཙ་ཏྲ་བྱུང་། དེའི་ལུས་པོ་ཆུ་རུས་ཀེང་རུས་ཅན་ལ། ནུ་མ་བསྣུན་པས་བརྣངས་ནས་ཤི རོ་དེ་རྒྱལ་བུ་མཐིང་གེའི་མཁར་རྩར་སྦས་པར་བཤད་ལ། མི་ལ་དེ་ཁྱི་དང་བསྡེབས་པ་ལས་མི་ལ་ཁྱི་གུ། ཕག་དང་བསྡེབས་པ་ལས་ཕག་གུ དེ་ལྟར་མི་ལ་རེའུ་ཚེ། མི་ལ་ལུ་གུ མི་ལ་བྱིའུ་ཆུང་། ཉེལ་ཆུང་། སྐྱ་ཀ སྦལ་བ། རྨོང་ཚེ། སྲེ་མོང་སོགས་བྱུང་བར་བཤད་དོ། །
ཡང་། གོང་གསལ་གྱི་རྣམ་པ་དང་མི་མཐུན་པ་ཞིག་ལ། བསེ་རག་རྫོང་ཐོབ་བསྡུས་པ་ཞིག་ལས། དབུལ་སྲི་བསེ་རག་ལྟོགས་འགོང་ནི། །མི་རྒན་ཉམ་ཐག་སྣོད་སྟོང་ཁུར། །བསེ་རག་འབུམ་གྱིས﹙བྱིས་པ་གཅེར་བུ་དུ་མས་བསྐོར་བ﹚འཁོར་གྱིས་བསྐོར། །ཡོད་ལ་མི་དགའ་མེད་ལ་དགའ། །གང་ལ་མི་དགའ་སྟོང་ལ་དགའ། །ནོར་སྒྲུབ་བྱེད་ལ་འགབ་འདྲེར་སྡང་། །སྣོད་བཅུད་མངའ་ཐང་ཉམས་པར་བྱེད། །བློ་ཉེས་ཚོང་ཉེས་མི་ཁ་གཏོང་། །བཟའ་བཏུང་གོས་རྒྱན་སྲིས་ལ་བརྐུ། །ཁྱད་པར་ལན་ཆགས་རྗེས་སུ་སྙེགས། །ཞེས་གསུངས་པ་དང་།
བསེ་རག་ཞུགས་པའི་རྟགས་སུ། ཀརྨ་ཆགས་མེད་ཀྱི་བསེ་རག་བཀར་ཐབས་ལས། བསོད་ནམས་ཆུང་བའི་སེར་སྐྱ་འགའ་ཞིག་ལ། །ཁྱིམ་དུ་ལྟོགས་འགོང་དབུལ་སྲི་བསེ་རག་ཞུགས། །ཁྱིམ་ལ་ཚ་འུབ་དྲོད་མེད་ཤིན་ཏུ་གྲང་། །དོན་མེད་འགྲིམ་པ་ཕྱིན་ན་ལྟོགས་སྣང་སྐྱེ། །བཟའ་བཏུང་བྱིན་ཀྱང་མི་མགུ་དགའ་སྣང་མེད། །གོས་དང་ལུས་མདོག་སྐྱ་ཞིང་བཀྲག་མདངས་མེད། །ཕུག་སྲིས་ཟད་མགྱོགས་གློ་བུར་འུད་འུད་ཟད། །བཟའ་མི་མི་མཐུན་ནང་འཐབ་ནུབ་འཐབ་བྱེད། །བློ་ཉེས་ཚོང་ཉེས་གོད་ཁ་རྒྱུན་མི་ཆད། །ལོ་ཐོག་མི་སྐྱེ་སད་སེར་གོད་ཁ་ལྡང་། །ཞོ་ལད་ཆང་ལད་འོ་རུལ་མར་མི་ཐོན། །ནས་འབབ་མེད་ཅིང་ནོར་ལ་སྐམ་འགོང་ཞུགས། །མི་མང་ཟས་ནོར་ལ་སོགས་བགོ་བའི་ཚེ། །ཀུན་ལས་ཆུང་ཞིང་ངན་པ་རང་གིས་འཐོབ། །གཡོ་བསྐོར་གཟབ་ཅིང་བྱས་ཀྱང་ངན་ཞིང་ལད། །རྒྱན་དང་ཤོ་སྐུགས་གང་བཞག་མི་ལ་ཤོར། །ཅི་བསམ་བྱ་བ་ཐམས་ཅད་ལོག་པར་འགྲོ། །བཟའ་བཏུང་མང་དུ་བྱས་ཀྱང་རྒྱག་རྒྱུ་མེད། །དེ་དག་བསེ་རག་ལྟོགས་འགོང་ཞུགས་རྟགས་ཡིན། །ཞེས་སོ། །
རྫོང་འདེབས་ལ་མར་མེ། འོ་རུལ། ཞོ་ལད། ཆང་སྐྱུར། སྦང་མ། སྤྲ་བ། རུས་པ། ཚྭ་སྒོག་གཡེར་གསུམ། ཡོས་སྙིགས། མི་ཕྱུགས་ཀྱི་དྲི་གླུད་ཆངས་བུ་ཟན་རིལ་བརྒྱ་རྩ་བརྒྱད་ལ། འོ་ཆབ་ཀྱིས་བྲན་ཏེ། ཡོན་བདག་ཕོ་མོ་ངོ་གནག་ཅིང་། གྲི་བཏོན་ནས་ཧ་ཧ་བརྗོད་ཅིང་། གཞན་གྱིས་སྐམ་ཡུས་སླ་ང་བརྡུང་ཤིང་རྗེས་ནས་དེད། སྔགས་པས་བདུད་རྩི་འཁྱིལ་བའི་སྔགས་བརྗོད་དེ་གུ་གུལ་དང་རྡོ་ཐུན་གྱིས་བྲབ་ནས་དེད། ཁང་ཁྱིམ་མི་མཐོང་བའི་སར་རྒྱ་ལམ་ཞིག་ཏུ་འཕང་ནས་རང་དང་བསེ་རག་གི་བར་མེ་ཆུ་རླུང་གསུམ་གྱིས་ཆོད་པར་སྒོམ་ནས་ཕྱི་མིག་མི་ལྟ་བར་འོང་དགོས་སོ། །
སྲི།
ཀི་ལ་ཡའི་སྲི་ཆུང་གི་ལོ་རྒྱུས་སུ། རྒྱལ་བོའི་ཕུང་སྲི། བློན་པོའི་ཕུང་སྲི། རྣལ་འབྱོར་བའི་དམ་སྲི། གོད་སྲི། སྒོ་སྲི། ཆུང་སྲི། དུར་སྲི། གཡལ་མོའི་གོད་སྲི། སྡང་བོའི་སྲི། ལྟས་ངན་ཆོ་འཕྲུལ་གྱི་སྲི། དེ་རྣམས་ཕ་ཕ་བདུད་དང་། མ་མ་བདུད་དེ་བཅུ་གསུམ་མོ། །གསུངས་ལ། ཡང་སྲི་རིགས་བཅུ་གསུམ་གྱི་ངོས་འཛིན་ཚུལ་ལ། ༡ དམ་སྲི་ནི། དམ་པའི་ཆོས་ལ་ལོག་པར་ལྟ་བ་དང་དམ་ཚིག་དང་སྡོམ་པ་ཉམས་པའི་དབང་གིས་མི་མ་ཡིན་གདུག་པ་ཅན་དུ་སྐྱེས་པ་སྟེ། སྔོན་གྱི་བག་ཆགས་དང་ད་ལྟའི་ལུས་དང་སེམས་རྟེན་གྱི་དབང་གིས་སྤྱིར་ཆོས་བྱེད་ལ་ཤིན་ཏུ་འཚེ་བར་བྱེད་ཅིང་། ཁྱད་པར་དུ་བླ་མ་སློབ་དཔོན་དང་དགེ་འདུན་བར་སེལ་འཇུག་བྱེད་པ་སོགས་གནོད་པ་སྒོ་དུ་མ་ནས་སྐྱེལ་བའི་ཤིན་ཏུ་མ་རུངས་པ་ཡིན་ལ། དེ་ལས་འགའ་ཞིག ཁོ་རང་ཡང་ཆོས་ལ་རྒྱུས་མངའ་ཆེ་བས། རྣལ་འབྱོར་བ་ཕལ་བས་འདུལ་དཀའ་བར་བཤད། ཡི་དམ་དང་ཆོས་སྐྱོང་འགའ་ཞིག་ལ་གབ་འདྲེའམ་སྒྲུབ་སྲི་ཡོད་པར་བཤད་པ་ཡང་ཕལ་ཆེར་དམ་སྲི་དང་དོན་གཅིག་ཡིན་ཏེ། ལྷ་དེ་དག་གི་ཐུགས་བསྐྱེད་སྐབས། འདྲེ་དེས་ཀྱང་སྨོན་ལམ་ལོག་པ་བཏབ་པའི་དབང་གིས། ད་ལྟ་ལྷ་སྒྲུབ་པ་ལ་བར་གཅོད་སྒོ་དུ་མ་ནས་བྱེད་པ་ཡིན་ཏེ། དེང་སང་ལྟ་བ་སྙིགས་མའི་མཐའ་ལ་ཐུག་པའི་དབང་གིས་དང་། དམ་སྡོམ་ཉམས་པ་ཆེས་མང་བའི་དབང་གིས་དམ་སྲི་ཤིན་ཏུ་འཕེལ་ཏེ་སྐྱེ་བོ་ཡོངས་ལ་སྒོ་སྣ་ཚོགས་ནས་གནོད་འཚེ་བྱེད་ཅིང་། ལྷག་པར་ཡི་དམ་ཆོས་སྐྱོང་སོགས་བསྙེན་ཅིང་བསྒྲུབ་པ་ལ་སྒྲུབ་སྲིའམ་གབ་འདྲེས་བར་ཆད་ཅི་རིགས་རྩོམ་པར་བྱེད་པས། འདི་མནན་པ་ཤིན་ཏུ་གལ་ཆེ་ཡིན་གསུངས། ༢ གོད་སྲི་ནི། ནོར་ཕྱུགས་ལ་གོད་ཁ་རྒྱུན་ཆད་མེད་པར་གཏོང་བ་དང་། སྒབ་མི་འཕེལ་བར་བྱེད་པ་དང་། ༣ དགྲ་སྲི་ནི། དོན་མེད་དུ་དགྲ་ལ་སྡང་བ་དང་། ཁ་མཆུ་དང་མི་ཁ་ངན་པ་སོགས་སློང་བར་བྱེད་པ་དེའོ། །༤ སྒོ་སྲི་ནི། ཕ་ཁུ་སྲི་ཅན་དུ་ངོས་འཛིན་པར་སྣང་། ༥ ཆུང་སྲི་ནི་བྱིས་པ་ཆུང་ངུའི་རིགས་ཀྱི་ཚེ་ལ་བར་དུ་གཅོད་པ་དང་། ༦ རྒན་སྲི་ཡང་དེ་ལུགས་སོ། །༧ དུར་སྲི་ནི། སྔ་མ་ཤི་བའི་རོ་འདོན་པ་སོགས་ཀྱི་གཟའ་སྐར་ཚེས་གྲངས་དང་དུར་འཇོག་པའི་ས་དཔྱད་ངན་པ་སོགས་ཅི་རིགས་ལ་བརྟེན་ནས་ལྡང་བའི་སྲི། ༨ གྲི་སྲི་ནི། མེ་དང་མཚོན་ཆ་གཡང་ས་ཆུ་སོགས་ལ་འཆི་བ་དང་། ༩ སྐྱེས་པའི་བྱེས་སྲི་ནི། བྱེས་སུ་སོང་ནས་འཆི་བའམ་བྱེས་སུ་བསམ་དོན་མི་འགྲུབ་པ་དང་། ནམ་བྱེས་སུ་སོང་རེས་ཀྱི་སྡུག་བསྔལ་བ་ལྟ་བུའམ། ཡང་ན། བཟའ་ཚང་ཡང་ཡང་བྱེས་བྲལ་དུ་སོང་བ། ༡༠ མ་བུའི་བྱུར་ཡུགས་ཀྱི་སྲི་ནི། བུད་མེད་གཅིག་ལྟ་བུ་ཡང་ཡང་ཡུགས་སར་བུད་པའམ་ཁྱིམ་གཅིག་གི་བུད་མེད་གཞན་དུ་བཏང་ཚུལ་ཡུགས་སར་བུད་པའམ། སྐྱེས་པ་གཅིག་གི་བུད་མེད་བླང་ཚུལ་མི་རིང་བར་འཆི་བ་ལྟ་བུ། ༡༡ དེ་བཞིན་བདུད་སྲི་དང་། བཙན་སྲི། རྒྱལ་སྲི། ཀླུ་སྲི་རྣམས་ནི། དེ་དག་གི་གནོད་པ་ལས་བྱུང་བའི་སྲི་དང་། ༡༢ རྒྱལ་བློན་སྲི་ནི། དེ་གསུམ་གནོད་པའི་སྲིའོ། །༡༣ གཡལ་མོའི་གོད་སྲི་དང་སྡང་བའི་གཡལ་སྲི་གཉིས་ནི། གོད་སྲི་ལྟ་བུ་ཞིག་ཡིན་ནམ་དཔྱད་དོ། །ཞེས་བསོད་ནམས་དབང་ལྡན་གྱིས་བསྒྲིགས་ཏེ་འགྲེལ་བའི་ས་དཔྱད་ཕྱོགས་བསྒྲིགས་སུ་གསལ་ལོ། །
ཡང་། སྐྱེ་བ་སྔོན་མར་རང་གི་བླ་སློབ་བར་དུ་དམ་ཚིག་ཉམས་ནས། ཚེ་འདིར་མི་འམ་འདྲེ་སོགས་སུ་སྐྱེས་པ་ལ་དམ་སྲི་ཟེར། ཞེས་པ་ལྟར། གསང་བདག་དྲེགས་པ་འདུལ་བྱེད་ལས་ཚོགས་དམ་སྲིའི་གླུད་མདོས་ལས། དམ་སྲི་བཙུན་གཟུགས་ལག་ན་རྐང་གླིང་ཐོགས་པ། གཡས་སུ་སྔགས་པ་ནག་པོ་བསྲེ་ཞྭ་ཐུན་ཕོར་ཐོགས་པ། གཡོན་དུ་བུད་མེད་ནག་མོ་རང་གི་སྐྲ་ནས་བཟུང་བ། ཞེས་དང་། ཡང་། དེ་ཉིད་ལས་དམ་སྲིའི་བྱེད་ལས་དང་གནོད་འཚེ་གཏོང་ཚུལ་ནི། དུས་ངན་སྙིགས་མ་ལྔ་བདོའི་དུས། །བོད་འདིར་དམ་སྲི་འབྱུང་བོ་དང་། །གསོན་འདྲེ་དངོས་སུ་རྒྱུག་པ་འབྱུང་། །ཉིན་མོ་དུར་ཁྲོད་ཀུན་ཏུ་རྒྱུག །མཚན་མོ་འགྲོ་བའི་སྲོག་དབུགས་རྒོལ། །གཟུགས་ནི་སྔགས་བཙུན་བུད་མེད་གཟུགས། །སྐད་ནི་བྱོལ་སོང་གཅན་གཟན་སྐད། །དེ་ཡི་ནད་གདོན་ཞུགས་པའི་རྟགས། །ངོས་བཟུང་མེད་པའི་གཉན་ནད་དང་། །གློ་བུར་སྨྱོ་འབོག་བརྒྱལ་ནས་འོང་། །ཁ་ཅིག་དྲང་སྲོང་གཟའ་ནད་འདྲ། །ཁ་ཅིག་ཇི་མ་སྙམ་གྱིས་འཆི། །ཁ་ཅིག་ཁ་ལྐུགས་ལུས་འདར་ཞིང་། །རྣམ་པ་སྣ་ཚོགས་འབྱུང་བར་འགྱུར། །ཞེས་སོ། །
ཡང་། བརྡ་གསར་རྙིང་བྱེ་བྲག་རྟོགས་བྱེད་ལས། སྲི་ཞེས་བྱ་བ་མཐར་བྱེད་ཀྱིས། །ཟ་བའི་ལམ་སྲོལ་བྱ་བའི་མིང་། ཞེས་ཀྱང་གསུངས་ལ། ནམ་མཁའ་ནོར་བུས། མས་ཀྱི་ཤིད་སྡང་བ་ལས་བྱུང་བའི་ཕོ་སྲི་རལ་ཆེན་བདུད་རྗེ། མོ་སྲི་དར་གཞོན་བདུད་རྗེ་གཉིས་ཕོ་མོ་སྟངས་དཔྱལ་གཉིས་འཚོས་པ་ལས་བྱུང་བའི་ཆེ་སྲི། ཆུང་སྲི། ཐབ་སྲི་ངོ་ནག རྒན་སྲི། གཞོན་སྲི། དར་སྲི། བྱེར་སྲི། བྱུར་སྲི་བཅས་སྲི་ཕ་མ་བུ་བཅུའི་དམག་ཚོགས་དང་བཅས་པ་རྣམས་སྲིད་པ་ཡིན་གསུངས།
ཡང་། སྲི་བཟློག་ཙཀྲ་བཅུ་གསུམ་ལས། ནད་སྲི། འཆི་སྲི། གོད་སྲི། རྟ་སྲི། ཡེར་བའི་སྲི། ལོ་སྲི། ཟླ་སྲི། ཞག་དུས་ཀྱི་སྲི། ཁ་སྨྲས་ཀྱི་སྲི། ཟ་མའི་སྲི་སོགས་ཡོད་པར་བཤད་དོ། །
གཞན་ཡང་། རྟ་མགྲིན་ཆོས་སྐོར་སོགས་ལས། སྲིའི་དབྱིབས་དང་། མདོག ལྡང་ཡུལ་བཅས་བསྟན་པ་ནི། ཕོ་སྲི་གངས་དཀར་ལྡོང་ནས་ལྡང་། །བརྫུ་བ་གཡག་དང་གངས་སུ་བརྫུ། །དབྱིབས་དང་ཁ་དོག་དཀར་ལ་འཚེར། །མོ་སྲི་རྒྱ་མཚོའི་གཏིང་ནས་ལྡང་། །བརྫུ་བ་ཁྱི་མོ་ནག་མོར་བརྫུ། །དབྱིབས་དང་ཁ་དོག་མཐིང་ལ་ནག །དགྲ་སྲི་ལབ་ཙེའི་འོག་ནས་ལྡང་། །བརྫུ་བ་ལྕགས་སྤྱང་སྔོན་མོར་བརྫུ། །དབྱིབས་དང་ཁ་དོག་སྔོ་ལ་སྐྱ། །དུར་སྲི་དུར་གྱི་སྒབ་ནས་ལྡང་། །བརྫུ་བ་ཝ་མོ་དར་མར་བརྫུ། །དབྱིབས་དང་ཁ་དོག་དམར་ལ་སྐྱ། །ཕུང་སྲི་གྲོགས་པོའི་ནང་ནས་ལྡང་། །བརྫུ་བ་རྔ་མོང་གྲྭ་བར་བརྫུ། །གོད་སྲི་ཁང་བའི་ཕུག་ནས་ལྡང་། །བརྫུ་བ་འཕར་སྤྱང་གཉིས་སུ་བརྫུ། །ཆུང་སྲི་མལ་གྱི་འོག་ནས་ལྡང་། །བརྫུ་བ་ཁྱི་གུ་ཕག་གུར་བརྫུ། །རེས་འགའ་རེའུ་ལུ་གུར་བརྫུ། །དབྱིབས་དང་ཁ་དོག་གང་ཡང་སྟོན། །ཞེས་སོ། །
སྲི་གདོན་གྱི་རྫོང་འདེབས་ལ། འབྲུ་ནག ལ་བཅའ། ཆངས་བུ་ཅི་མང་། ཕྱུགས་ཤི་ཚད་ཀྱི་སྤུ་དང་རྭ་རྨིག ཤ་དུམ། ཚྭ། རམ་པ། སྒོག་པ་སོགས་སོ། །
གཞན་ཡང་། གྲྭ་སྲི་དང་བྱིས་སྲི་སོགས་ཞུགས་ན། དེ་ལ་སྲི་བཟློག་གི་འདོན་ཆོག་དང་། སྲུང་འཁོར་སོགས་ཡོད་པ་དང་། བྱིས་པ་བཙས་ཚད་ཤི་བ་སོགས་བྱུང་ན། སྲི་གཅོད་ལ་གནས་ཁམས་ཆེན་དུ་མཇལ་ཕྱག་ལ་འགྲོ་བའམ། ཨ་མདོ་མཚོན་ན་མིང་ལའང་ཁྱི་ཕྲུག་ཐར་དང་། བོང་ཕྲུག་ཐར་དང་། ལྷ་སར་མཚོན་ན་མཚམས་གོད་དང་། ཤི་ལོག་སྒྲོལ་མ་སོགས་ཀྱིས་མིང་འདོགས་སྲོལ་ཡོད་དོ། །
འདྲེ།
འདྲེ་ནི། མི་མ་ཡིན་གྱི་བྱེ་བྲག་ཅིག་སྟེ། འབྲོམ་སྟོན་པས། ཤར་ཕྱོགས་ན་རྨ་རྒྱལ་སྦོམ་ར་ལྷར་འཛིན་ཏེ། དེ་ཡང་འདྲེ་ཡིན། ལྷོ་ཕྱོགས་ན་ཡར་ལུང་ཤམ་པོ་ལྷར་འཛིན་ཏེ། དེ་ཡང་འདྲེ་ཡིན། བྱང་ཕྱོགས་ན་གཉན་ཆེན་ཐང་ལྷ་ལྷར་འཛིན་ཏེ། དེ་ཡང་འདྲེ་ཡིན་གསུངས་པ་ལྟར། ཡུལ་ལྷ་གཞི་བདག་ཐམས་ཅད་འདྲེར་གཏོགས་པ་དང་། དེང་སང་འཇིག་རྟེན་རྨོངས་པའི་གྲགས་ཚོད་ལ། ཡུལ་ལུང་རེ་ན་གནས་བདག་རེ་ལྷར་བཟུང་སྟེ། ལྷ་བསང་ཞེས་རྒྱགས་བརྔན་གྲོན་པ་དེ་དག་ནི་དོན་དུ་ན་འདྲེ་མཆོད་ཡིན་ལ། དེ་དག་ལ་བློ་སྙིང་གཏིང་ནས་གཏོད་པ་ནི་སྐྱབས་འགྲོའི་བསླབ་བྱའང་འགལ་བ་ཡིན་ནོ། །ཁྱད་པར་དུ་སྲིད་པ་ཆགས་པའི་ལྷ་དགུ་སོགས་ཀྱི་ཡབ་ཏུ་གྱུར་བ་ནི། འོ་དེ་གུང་རྒྱལ་ཡིན་ཏེ། བོད་ཀྱི་ལོ་རྒྱུས་ཅན་ལྔ་ཞེས་གྲགས་པའི་ནང་གསེས། དང་པོ་ཡོ་ག་ལྷ་གྱེས་ཅན་བྱ་བར། འོ་དེ་གུང་རྒྱལ་བྱ་བ་དེ་ནམ་མཁའ་འཕྲུལ་ཙམ་དུ་བཞུགས་པའི་ཚེ། གནམ་གྱི་ཐང་ང་དགུ་དང་བཤོས་པའི་སྲས་དགུ་བརྒྱ་རྩ་གཅིག་འཁྲུངས་སོ། །ཆར་བབས་པའི་གྲངས་ལས་མང་བའི་ལྷ་བྲན་ཀུན་གྱི་ཡབ་མཛད་དོ། །བར་སྣང་ལ་བཞུགས་པའི་ཚེ། བར་གྱི་ཐང་ང་དགུ་དང་བཤོས་ནས་སྲས་རི་རབ་ཀྱི་རྡུལ་ཕྲན་བས་མང་བའི་ལྷ་བྲན་གྱི་ཡབ་མཛད། ས་དོག་ལ་གཤེགས་པའི་ཚེ་ས་སྡེ་བརྒྱད་ཀྱི་ཚིས་མཛད། མི་མངས་ཀྱི་ལྷར་གཤེགས། ལྷ་དགུའི་ཡབ་ལགས་སོ། །དེ་མཚུངས་སུ་དེང་དུས་ཡུལ་བདག་གནས་བདག་གི་ཁ་དར་བ་དེ་ཚོ་ཡང་། དོན་དུ་ན་འདྲེ་ཡིན་ནོ། །
གཞན་ཡང་། འདྲེ་གཟུགས་ནི། མཚན་མོར་ཐང་སྟོང་སོགས་སུ་ཚོང་ཆེན་གྱི་སྒར་བཏབ་པ་ལྟ་བུ། ཡུད་ཙམ་ལ་མི་སྣང་བར་གྱུར་བའི་ཆོ་འཕྲུལ་ཅན་དང་། ཡང་ཚུར་འཁོར་ན་མིའི་གཟུགས་དང་། ཕར་འཁོར་ཚེ་རུས་གོག་སྐམ་པོ་དང་། འགྲམ་ཡས་མེད་པ་སོགས་མིག་ལ་སྣ་ཚོགས་སྣང་རྒྱུ་ཡོད་པར་བཤད། ཡང་། གསོན་འདྲེ་ཞེས་པ་དེ་ཡང་དངོས་སུ་མིའི་རྣམ་ཅན་ལ་ལྐོག་ཏུ་རྫུ་འཕྲུལ་དང་ཆ་ལུགས་སྣ་ཚོགས་ཀྱིས་གནོད་འཚེ་གཏོང་བར་དམངས་ཁྲོད་དུ་བཤད་རྒྱུན་ཡོད་པ་དེ་ཡང་བདེན་མཆི་སྟེ། འཇུ་མི་ཕམ་གྱིས། གདོན་བགེགས་འབྱུང་བོ་སྤྱི་དང་ཁྱད་པར་དུ། །ནོར་ཕྱུགས་དཀར་ལ་རློམ་པ་མོ་འདྲེ་ནི། །མི་ལ་དངོས་སུ་བརྫུ་ཞིང་མཚན་ལ་རྒྱུ། །གསུངས་པ་དང་མཐུན་ནོ། །
ཡང་སྲིད་པའི་འདྲེ་དགུ་ཞེས་པ་ནི། ༡ མཐོ་རུ་མི་སྟེར་དམའ་བའི་འདྲེ། ༢ ཡོད་དུ་མི་སྟེར་མེད་པའི་འདྲེ། ༣ ཕྱུག་ཏུ་མི་སྟེར་དབུལ་བོའི་འདྲེ། ༤ ཕན་དུ་མི་སྟེར་སྟོང་བའི་འདྲེ། ༥ གང་དུ་མི་སྟེར་སྟོང་བའི་འདྲེ། ༦ ཆགས་སུ་མི་སྟེར་འཇིག་པའི་འདྲེ། ༧ ཡག་ཏུ་མི་སྟེར་ཉེས་པའི་འདྲེ། ༨ སྐྱིད་དུ་མི་སྟེར་འཇིགས་པའི་འདྲེ། ༩ འཕེལ་དུ་མི་སྟེར་འགྲིབ་པའི་འདྲེ་བཅས་དགུའོ། །
ཡང་། སྲིད་པའི་འདྲེ་དགུ་ནི། ནང་རིག་པའི་ཚིག་མཛོད་ལས། ༡ ལི་བག་མའི་འདྲེ། ༢ ཁོན་མཁར་ལེན་གྱི་འདྲེ། ༣ ད་ཧོམ་དང་སྦྱིན་སྲེག་ཞུགས་ཁང་རྣམས་ཀྱི་འདྲེ། ༤ ཁེན་ཐོག་ཕུག་པའི་འདྲེ། ༥ ཁམས་ཆུ་ལས་སུ་འདྲེ། ༦ སྔགས་པ་ཚོགས་པའི་འདྲེ། ༧ འཛིན་ཤིང་ལས་ཀྱི་འདྲེ། ༨ ཟོན་དམག་གི་འདྲེ། ༩ སྟོན་མའི་འདྲེ་བཅས་སོ། །
དེ་ལས་གཞན། རྙིང་མའི་འདྲེ་འདེད་ཀྱི་འདོན་ཆོག་གུར་དྲག་བཀའ་བསྒོ་ལས། བསྲུང་བྱ་འདི་ལ་གནོད་ཅིང་འཚེ་བར་བྱེད་པའི་འབྱུང་བོ་ཕོ་གདོན་རྒྱལ་བོ། མོ་གདོན་བསེན་མོ། གནའ་འདྲེ་རྙིང་བ། ད་འདྲེ་གསར་བ། ཡུལ་འདྲེ་འཁྱམ་པོ། ཟ་འདྲེ་ཤི་གཤེད། དམ་སྲི་ཐེའུ་རང་། ཆེ་སྲི་ཆུང་སྲི། ཉེ་བའི་ཉེ་འདྲེ། ཕུ་ནུའི་རུས་འདྲེ། ཤག་རོགས་ཀྱི་མཛའ་འདྲེ། ཁྱིམ་མཚེས་ཀྱི་འགོས་འདྲེ། བན་བོན་གྱི་རྦད་འདྲེ། ལྷ་སྲུང་གི་རྒབ་འདྲེ། གདོན་བྱ་ནག་བཞིན་དུ་ཀླད་ལ་ལྡིང་བ། སྦྲུལ་ནག་བཞིན་དུ་ལུས་ལ་འཁྱུད་པ། ཤ་ཁྱི་བཞིན་དུ་རྗེས་སུ་འབྲང་བར་བྱེད་པའི་གདོན་བགེགས་ལོག་པར་འདྲེན་པ་ཐམས་ཅད་ཀྱིས་བཟུང་ཡོད་ན་ཐོངས། བཅིངས་པ་ཡོད་ན་ཁྲོལ། བསྡམས་ཡོད་ན་གློད། མནན་པ་ཡོད་ན་ཁྱོགས། ཕྱོགས་འདིར་མ་འདུག་པར་སོ་སོར་རང་རང་གི་གནས་སུ་དེངས་ཤིག ཞེས་འདྲེའི་རིགས་ལ་མང་དུ་གསུངས་ཡོད་དོ། །
ཡང་། ཀརྨ་ཆགས་མེད་ཀྱི་འདྲེ་མོ་རྫ་མདོས་ལས། ལྟེ་ཕུར་མ། དམར་རྒྱན་མ། ཕོ་ཡོང་བཟའ། འབྲོག་བཟའ་ལྷ་ལྕམ། རྩང་བཟའ་ཁྱི་ཐར། ཐེའུ་མོ་ར་ཞོན། གློག་བསེན་མ། རླུང་བསེན་མ། གངས་བསེན་མ། གཡའ་བསེན་མ། སྤང་བསེན་མ། བྲག་བསེན་མ། ནགས་བསེན་མ། ཆུ་བསེན་མ། ས་བསེན། མཁར་བསེན་མ། ཤི་འདྲེ་མ། གསོན་འདྲེ་མ། སྒབ་འདྲེ་མ། ཡུལ་འདྲེ། རྙ་འདྲེ་མ། ལྕེབ་འདྲེ་མ། ཆུ་འདྲེ། དམ་སྲི་མ་སོགས་ཀྱང་འདྲེ་ཞེས་པའི་ཐ་སྙད་བཏགས་ཡོད་ལ། ཁྱད་པར་དུ་དམར་རྒྱན་མ་སོགས་འདྲེ་མོའི་མིང་སྦྱར་བ་ནི། དམར་རྒྱན་མས་བཻ་རོ་ཙ་ནར་གཤེ་སྐུར་བཏབ་པ་དང་། ལྷ་སྲས་མུ་ནེ་ཀུམ་པ་སོགས་ཉེས་པ་ཚབས་ཆེན་བསགས་པ། སྨོན་ལམ་ལོག་པས་བོད་ཁམས་ཕུང་ལ་སྦྱོར་བའི་འདྲེ་སྲིན་ཏུ་སྐྱེས་པས་མིང་དེ་ལྟར་བཏགས་པ་མདོས་ཆོག་དེ་གསལ་ལ། དེ་དག་གི་རྣམ་པ་ཡང་། བྱ་དང་གཅན་གཟན་སོགས་ཀྱི་མགོ་བརྙན་སྣ་ཚོགས་དང་། ཞོན་པ་ཡང་སྤྱང་དང་དྲེལ། དྲེད་མོང་། བོང་བུ། ཁྱི། ཁྱིམ་བྱ། རྔ་མོང་། ཝ་མོ་སོགས་ལ་བཅིབ་པར་བཤད་ལ། འདྲེ་མོ་དེ་རྣམས་ཀྱི་བྱེད་ལས་ཀྱང་། ཕོའི་སྟོང་དང་། མོའི་མངལ། ཕུག་གི་སྲི། སྒོའི་ནོར། བུ་ཆུང་གི་སྲོག མཆིག་ཐོག་གི་ཕྱེ། གཞོན་ནུ་མའི་ནུ་མ། ཕོའི་བརླ། རྟ་ཡི་བང་། རྐྱལ་བའི་མར། ཡོའི་ཆང་སོགས་ལ་གནོད་པར་བཤད་དོ། །
བོན་གྱི་བཤད་ཚུལ་ལ། མི་རེ་རེ་ལ་ལུས་སྲུང་གི་ལྷ་རེ་དང་། གནོད་འཚེ་བྱེད་ཅིང་ཚེ་སྲོག་གཅོད་པའི་འདྲེ་རེ་ཡོད་ཟེར་ལ། ཤི་མཁན་དེ་ཡི་བླ་སྲོག་ལ་རྔམས་ནས་སྡོད་མཁན་གྱི་གདོན་འདྲེ་ཞིག་ཡིན་པས་མི་དེ་ཤི་རྗེས་དེ་མེད་པར་མ་བཟོས་ན་དེས་ཁྱིམ་ཚང་དང་། མི་རྒྱུད་རྗེས་མ་ལ་གནོད་པ་སྐྱེལ་གྱི་ཡོད་ཟེར།
ཡང་། བོན་གཞུང་དང་འདྲེ་སྒྲུང་སོགས་སུ། ལྷ་འདྲེ་དང་མི་མཉམ་དུ་འདུས་ནས་བྱུང་བའི་ཕྲུ་གུ་ཡང་ཡོད་པར་བཤད་དེ། དཔེར་ན། མ་སངས་སྤུན་དགུ་ལྟ་བུ་སྟེ་། གཉན་གཡའ་སྤང་སྐྱེས། གར་ཏིང་ནམ་ཚ། ལྒི་ངན་ལམ་ཙང་སྐྱེས། རུ་ཐོ་གར་སྐྱེས། ཤེ་དོ་ཀེར་ཏིང་ནམ། མེ་པདྨ་སྐྱེས། གསང་གེ་འཕྲུལ་བོ་ཆེ། དྲང་བ་དྲངས་མ་མགུར། བཀོད་སྟོང་ནམ་བཅས་སོ། །འབྲོམ་སྟོན་པས་ཡུལ་ལྷ་གཞི་བདག་ཐམས་ཅད་འདྲེ་ཡིན་པར་གསུངས་པ་བཞིན། རྒྱལ་བ་ཚངས་དབྱངས་པ་རྒྱལ་རོང་དུ་སྒྲུབ་པ་མཛད་དུས་རྒས་པོ་ཀ་ཆུ་སྐྱབས་ཞེས་པའི་ཡོན་བདག་བྱས་པ་ཡང་ས་དེའི་གནས་བདག་གི་བུ་ཡིན་པར་བཤད་པ་དང་། དེ་ལས་གཞན། གཉན་ཚེ་ལྷ་ཞེས་པ་ཡུལ་ལྷ་གཉན་པོ་གཡུ་རྩེ་དང་མི་མོ་ཞིག་བཤོས་པ་ལས་འཁྲུངས་པ་དང་། མྱང་ཆོས་འབྱུང་ལས། མཛངས་མི་དང་བོ་རུ་ལས་སྐྱེས་ཀྱི་ལོ་རྒྱུས་འཆད་སྐབས་འདི་ལྟར་འབྱུང་སྟེ། དེར་བཙུན་མོ་ནས་མྱ་ངན་བྱས་ཏེ་གཉིད་དུ་སོང་བའི་རྨི་ལམ་ནང་མི་དཀར་བོ་ཞིག་བྱུང་བས་འདོད་པ་བསྟེན་པ་རྨིས་སོ། །དེ་ནས་ཟླ་བ་བཅུ་ན་བུ་གཅིག་བཙས་ཏེ་རྐང་ལག་མེད་པ་དང་ཁ་གཅིག་འདུག དེ་བསད་དུ་ནི་བུ་ཡིན། གསོ་རུ་ནི་ཡན་ལག་མི་འདུག་པས་གཡག་རུའི་ནང་དུ་བཅུག་ནས་ཁར་མར་འོ་མ་གཏོར་བས་ཆེར་སོང་བ་དང་ཡན་ལག་སྐྱེས་ནས་ལྷམ་གྱི་ཡུ་བའི་གོས་བྱས་ཏེ་གསོས་པས་མིང་ནི་འདྲེའི་བུ་ཕོ་རུ་ལྷམ་སྐྱེས་བཏགས་སོ། །ཞེས་པ་ཡང་གོང་གསལ་དང་མཐུན་པར་སྣང་ངོ་། །
གཞན་ཡང་། རླངས་ཀྱི་གདུང་རྒྱུད་ནི་རྒྱལ་བུ་མང་ལྡོམ་སྟག་བཙན། ལྷའི་བུ་མོ་སྨན་བཙུན་མ་དང་འགྲོགས་པ་ལས་བྱུང་བ་དང་། བླ་ཆེན་པོ་དགོངས་པ་རབ་གསལ་ཡང་དམུ་རིགས་ལས་འཁྲུངས་པ་དང་། དག་ཡིག་ལེགས་བཤད་ཚིག་གཏེར་ལས། རྒྱ་ནག་པ་ཀུན་ཀླུ་ལས་ཆད་པར་བཤད་པ་སོགས་རིགས་འདྲེས་མ་ལས་བྱུང་བ་མང་ངོ་། །
ཡང་། རྒྱལ་བ་དགེ་འདུན་གྲུབ་ཀྱིས། མི་རྣམས་ལ་ལྷན་སྐྱེས་ཀྱི་ལྷ་འདྲེ་གཉིས་ཡོད་ཅིང་། གང་ཟག་བསོད་ནམས་ཅན་ལ་ལྷན་ཅིག་སྐྱེས་པའི་ལྷ་མང་། འདྲེ་ཉུང་། བསོད་ནམས་ཆུང་བ་དེ་ལས་གོ་ལྡོག་པའོ། །ཞེས་དང་། བཀའ་གདམས་ཕ་ཆོས་ལས་ཀྱང་། ཉོན་དང་དེ་ལ་འདི་ལྟ་སྟེ། །སྐྱེས་པའི་དུས་ན་གཞིབས་ཏེ་སྐྱེས། །ལྷན་ཅིག་སྐྱེས་པའི་ལྷ་འདྲེ་གཉིས། །རང་ལ་རང་གི་བླ་གཉིས་སོ། །ལྷ་དེས་མཐུན་རྐྱེན་ཐམས་ཅད་བསྒྲུབ། །འགལ་རྐྱེན་ཐམས་ཅད་སྤོང་བར་བྱེད། །དགེ་བ་ཀུན་ལ་སྐུལ་མ་འདེབས། །དགེ་བ་གང་བྱས་ཡི་གེར་འགོད། །སྡིག་གམ་སྡུག་ན་མྱ་ངན་བྱེད། །དགེ་བའམ་སྐྱིད་ན་དགའ་བ་བསྒོམ། །འདྲེས་ནི་དེ་ལས་ལྡོག་པར་བྱེད། །ཅེས་པ་ལྟར། ལྷན་ཅིག་སྐྱེས་པའི་ལྷ་དང་། གཉེན་པོར་འོང་བའི་བདུད་གཉིས་ཀྱི་དགེ་སྡིག་གི་ཤན་འབྱེད་པར་ཡང་བརྗོད་ཡོད་དོ། །
མི་མ་ཡིན།
མི་མ་ཡིན་ཞེས་པ་ལ་བཤད་ཚུལ་མང་སྟེ། གདོན་འདྲེའི་རིགས་མཐའ་དག་གི་སྤྱི་མིང་དང་། ཡང་ཉིན་མོ་མི་ལ་མཚན་མོ་འདྲེ་རུ་གྱུར་བའི་གདོན་འདྲེ་མིར་བརྫུས་པ་དང་། སྐབས་ལན་རེར་བསྐལ་བ་ཡ་ཐོག་གི་མི་རྣམས་དེང་དུས་ཀྱི་མི་དང་འདྲ་བར་ཤ་ཟ་སྲིན་པོ་དང་ཆ་འདྲ་བས་ཆ་ནས་མི་མ་ཡིན་ཞེས་བཏགས་པའང་ཡོད་དོ། །
དམུ།
དམུ་ནི་གདོན་བགེགས་རིགས་མི་འདྲ་བ་ཕན་ཚུན་འདུས་ནས་བྱུང་བ་ཞིག་ཏུ་བཤད་ལ། བྱེ་བྲག་རྟོགས་བྱེད་ལས། དམུ་ཞེས་བྱ་བ་འབྱུང་བོ་ཡི། །བྱེ་བྲག་ཅིག་ལ་གྲགས་པ་ཡོད། །ཅེས་དང་། འཇུ་མི་ཕམ་གྱི་དམུ་བཅོས་ལས། དམུ་རྗེ་ཁྱོད་ཀྱི་ཆ་ལུགས་ནི། །སྐུ་མདོག་ནག་པོ་ཆར་སྤྲིན་མདོག །དར་ནག་བེར་ཆེན་སྐུ་ལ་གསོལ། །གཡས་པ་ཤང་ལང་གཡོན་མདའ་གཞུ། །ཆིབས་སུ་དམུ་རྟ་མཆོང་རྒོད་ཆིབས། །འཁོར་དུ་དམུ་ཡི་སྡེ་ཚོགས་བསྐོར། །ཞེས་དང་།
བོན་གྱི་སྒྲ་འགྲེལ་ལས། དམུ་བདུད་མིང་སྲིང་བཅུ་དྲུག་གསུངས་ཏེ། ཞ་བོ་དམུ་ཞྭ། ལོང་བ་དམུ་ལོང་། འཐིབས་པ་དམུ་འཐིབས། གྲུམ་པོ་དམུ་གྲུམ། ནག་པོ་བཀྲག་མེད། སྐྱ་བོ་དབུགས་མེད། དཀར་བོ་ཚིལ་མེད། སྐྱེས་བཟང་ལྡང་ཡག འགྲན་དེ་ཡ་བོ། ཤུ་བོ་ལག་རིང་། དམུ་རྫི་ཟ་སྨད་བཅས་སོ། །
བྱེད་ལས་ནི། ལོ་ཆེན་ཤེར་རིན་པས། ནད་བདག་དམུ་ཡིས་གཏོང་བ་ཡི། །དོན་སྣོད་ཕྱི་ནང་ཀུན་ཁྱབ་པའི། །གདུག་པ་ཅན་གྱི་ཆུ་ནད་ལ། །དམུ་ཆུ་ཞེས་སུ་གྲགས་པ་ཡིན། །ཞེས་དང་། གཏོ་ཆོག་གཞན་དུ། དམུ་གབ་དང་འོན་འཐིབས། དགྲ་ལ་དིག་ལྐུགས་དམུ་རྫིང་མྱོས་འཐིབས་སོགས་གཏོང་བར་བཤད་དོ། །
རྫོང་འདེབས་ལ། འཇུ་མི་ཕམ་གྱི་སྲིད་པ་དམུ་བཅོས་ལས་རིན་ཆེན་སྣོད་དུ་བཤོས་བུ་སྨུག་པོ་དང་། དཀར་དམར་ཤ་ཁྲག་དར་ཕན། དམུ་བྱ་ཕུག་རོན་སོགས་དང་། སྐྱེམས་ཕུད་དགོས་པར་བཤད་ཡོད་དོ། །
ཡང་། དམུ་ཞེས་པ་འདི་མཐའ་གཅིག་ཏུ་དམུ་བདུད་བཙན་གསུམ་གྱི་དམུ་ལ་འགབ་པར་མི་རིགས་ཏེ། དེ་ཡང་ཕྭ་དམུ་གཙུག་གསུམ་གྱི་དམུ་ནི། སྲིད་པ་ཡེ་སྨོན་རྒྱལ་བོ་དང་ཆུ་རླུང་རྫུ་འཕྲུལ་མོ་བསྡེབས་པ་ལས་ཕྭ་དམུ་གཙུག་གསུམ་བྱུང་བར་གྲགས་པའི་བར་བ་དམུ་རྗེ་བཙན་པོ་དང་། ལྷ་མོ་འོད་གསལ་མ་བཤོས་པ་ལས་བྱུང་བའི་དམུ་རིགས་ལ་གོ་བ་དང་། དམུ་རིགས་གཤིན་གྱི་དམུ་ནི། གདུང་རྒྱུད་རྒྱལ་བོ་དྲུག་གི་ནང་ཚན་གྱི་དམུ་གཤེན་རབ་མི་བོ་ཆེའི་གདུང་རྒྱུད་ལ་གོ་བ་སྟེ། སྟོན་པ་གཤེན་རབ་ཀྱི་མདོ་འདུས་རིན་པོ་ཆེའི་རྒྱུད་ལས། ཚེ་ལོ་དྲུག་ཁྲི་ཐུབ་དུས་སུ། །དམུ་རྗེ་རྒྱལ་བོས་མངའ་མཛད་དེ། །འབྲས་ནི་ས་ལུ་ལྗང་བ་ཟ། །ཤིང་ནི་ལོ་བཟང་གོས་སུ་གོན། །ཡུལ་ནི་སྲིད་པ་དམུ་ཡི་ཡུལ། །ཞེས་པ་དེའོ། །དམུ་ཚ་སྒ་ཡི་དམུ་ནི། མིའུ་གདུང་དྲུག་གི་ནང་གསེས་དམུ་ཡི་ཚ་བོ་སྒ་ཡི་རུས་རྒྱུད་ལ་གོའོ། །
བགེགས།
རྒྱུད་ལས། ལྷ་ཀླུ་གནོད་སྦྱིན་སྲིན་པོ་དང་། །མཁའ་ལྡིང་ལྟོ་འཕྱེ་མི་འམ་ཅི། །དྲི་ཟ་སྲིན་པོ་ཤ་ཟ་དང་། །འབྱུང་བོ་སྲུལ་བོ་ལུས་སྲུལ་བོ། །སྐེམ་བྱེད་སྨྱོ་བྱེད་བརྗེད་བྱེད་དང་། །གཤིན་རྗེ་མ་མོ་ལ་སོགས་པའི། །སྟོང་ཕྲག་བརྒྱད་ཅུའི་བགེགས་ཚོགས་དང་། །ཞེས་དང་། བགེགས་དེ་རྣམས་ཀྱང་དུག་ལྔ་ཉོན་མོངས་གསུམ་དུ་འདུ་བའི་ནད་རྐྱེན་ལས་གསུངས་པ་སྟེ། ཕྲག་དོག་གི་རྩ་བ་འདོད་ཆགས་ལས་མོ་གདོན་ཞུགས་ནས་ཆུ་སེར་ཁྲག་རླུང་། ང་རྒྱལ་གྱི་འབྲས་བུ་ཞེ་སྡང་ལས་ཕོ་གདོན་ཞུགས་ནས་སྲིན་མཁྲིས་པ། གཏི་མུག་ལས་མ་ནིང་ངམ་ཀླུ་ས་བདག་གི་གདོན་ཞུགས་ནས་བད་ཀན་རྒྱས་པར་བྱེད། གདོན་དེ་རེ་རེ་ལའང་ལྷན་སྐྱེས་སམ་ལས་འདྲེ་སྡེ་དཔོན་གཅིག་བཅས་པའི་སྟོབས་ཆེན་སྟོབས་ཆུང་བཅུ་དགུ་རེ་ཀུན་བཏགས་སམ། འཕྲལ་རྐྱེན་གྱིའང་འདྲེ་སྡེ་དཔོན་གཅིག་བཅས་པའི་དེ་འདྲ་རེ་སྟེ། སུམ་བརྒྱ་དྲུག་ཅུ་ལ་ཕོ་མོ་མ་ནིང་གསུམ་དུ་དབྱེ་ན་སྟོང་ཕྲག་བརྒྱད་བཅུའོ། །དེ་ཡང་འགོས་ལོ་ཙཱ་བས། བགེགས་ཀྱི་རིགས་རེ་ཞིག་སྟོང་ཕྲག་བརྒྱད་ཅུ་འཇོག་པ་ཡིན་ཞིང་། གཞན་དུ་ན་བསམ་གྱིས་མི་ཁྱབ་པར་ལྟའོ། །གསུངས་སོ། །
ཡང་ན། ལྷ། ཀླུ། གནོད་སྦྱིན། དྲང་སྲོང་། ས་བདག མ་མོ། གཤིན་རྗེ། རྒྱལ་བོ། བཙན། བདུད། སྲིན་མོ། ཐེའུ་རང་། བསེན་མོ། གཟའ། གཉན། སྨན་མོ། དྲི་ཟ། དམུ། གྲུལ་བུམ། མི་འམ་ཅི། ལྟོ་འཕྱེ་ཆེན་པོ་སྟེ་གདོན་རིགས་རྩ་བའི་ཉེར་གཅིག་ལས་སྐྱེས་པའི་སྤྲུལ་བ་ཡང་སྤྲུལ་ཕོ་ཉ་སོགས་རེ་རེར་ལྔ་བཅུ་རེ་འཕྲོས་པས་སྟོང་དང་ལྔ་བཅུ། ཕོ་མོ་མ་ནིང་རེ་རེར་དངོས་ཉམས་རྨི་ལམ་གསུམ་སྦྱར་བས་དགུ། དེའི་སྟེང་རྩ་བའི་ཉེར་གཅིག་བསྣན་པའོ། །
ཡང་དཔུང་བཟང་གི་རྒྱུད་ལས། བགེགས་ཀྱི་རིགས་ནི་རྣམ་པ་བཞི་ཡོད་དེ། །ས་སྟེང་འདི་ན་འཁོད་པའི་བགེགས་རྣམས་ནི། །རྣམ་པར་འཇིགས་དང་ཝ་དང་ནེའུ་ལེ་དང་། །དེ་བཞིན་སོ་གཅིག་པ་དང་རིགས་རྣམ་བཞི། །དེ་དང་དེ་ལས་འཕྲོས་པ་མཐའ་ཡས་སོ། །ཞེས་བགེགས་ཀྱི་རིགས་རྣམས་རྣམ་པར་འཇིགས་དང་། ཝ་དང་། ནེའུ་ལེ་དང་། སོ་གཅིག་པ་ཞེས་པའི་སྡེ་ཚན་བཞིར་བསྡུས་ཏེ། དང་བོའི་སྡེ་དཔོན་མྱ་ངན་མེད། གཡོག་འཁོར་བྱེ་བ་ཕྲག་བདུན། གཉིས་པའི་སྡེ་དཔོན་གླང་ཆེན་གདོང་། གཡོག་འཁོར་བྱེ་བ་ཕྲག་བཅོ་བརྒྱད། གསུམ་པའི་སྡེ་དཔོན་གཙུག་ནས་ཕྱུངས། གཡོག་འཁོར་ཤིན་ཏུ་རྒྱ་ཆེ་བ་ཁྲི་ཕྲག་བྱེ་བ་ཐེར་འབུམ་སྟོང་གི་གྲངས། བཞི་བའི་སྡེ་དཔོན་གཙུག་འཕྱང་། གཡོག་འཁོར་བྱེ་བ་ཕྲག་དྲུག་ཅུ་ཡོད་པར་གསུངས་ཤིང་། དེ་ཐམས་ཅད་ཀྱང་། འཇིག་རྟེན་སྐྱོང་བ་བཞིའི་འཁོར་དུ་གཏོགས་པར་གསུངས་པས། མཚམས་བཅད་སོགས་ཀྱི་དུས་རྒྱལ་ཆེན་བཞིའི་མཐོ་འཛུགས་པའང་འདིའི་གནད་ཡིན་ནོ། །
ཡང་། ས་ལོ་ཀུན་དགའ་བསོད་ནམས་ཀྱིས་མཛད་པའི་ས་ལུགས་གསེར་སྐྱེམས་ལས། དོན་དམ་པར་བགེགས་ཞེས་བྱ་བའི་མིང་ཡང་མེད་དེ། འཇིག་རྟེན་ཀུན་རྫོབ་ཏུ་བགེགས་ཞེས་བྱ་བ་ཞིག་ཡོད་ཅིང་། ཕྱི་ལས་སྐྱེས་པའི་བགེགས་དང་། ནང་རྟོག་པ་འཁྲུལ་བ་ལས་སྐྱེས་པའི་དུག་འཕྲོགས་སོ། །དེ་ལ་བགེགས་ཀྱི་རྒྱལ་བོ་བཞི་སྟེ། ཤར་ཕྱོགས་ན་བགེགས་ཀྱི་རྒྱལ་བོ་བི་ན་ཡ་ཀ་དང་། ལྷོ་ཕྱོགས་ན་བགེགས་ཀྱི་རྒྱལ་བོ་ཁམས་གསུམ་གྱི་བདག་པོ། ནུབ་ཕྱོགས་ན་བགེགས་ཀྱི་རྒྱལ་བོ་རྡོ་རྗེ་མཆུ། བྱང་ཕྱོགས་ན་བགེགས་ཀྱི་རྒྱལ་བོ་རྒྱལ་བའི་སྲས། བགེགས་རིགས་སྟོང་ཕྲག་བརྒྱད་ཅུ། བགེགས་ཕལ་བ་བཅུ་བཞི། ཞེས་ཀྱང་གསུངས་སོ། །
མི་འམ་ཅི།
ཅོ་ནེ་གྲགས་པ་བཤད་སྒྲུབ་ཀྱི་གདུགས་དཀར་འགྲེལ་བ་ལས། མི་འམ་ཅི་ནི་དུད་འགྲོའི་རིགས་མི་དང་བྱད་དབྱིབས་འདྲ་བ་ཞིག་སྟེ། ཁ་ཅིག་འདི་ནི་ལུས་མི་ལ་རྟའི་གདོང་བ་ཅན་དུ་ཡོད་པར་བཤད། ཅེས་སོ། །མི་འམ་ཅིའི་ཁ་ཟས་ལ་ངར་སྣབས་ཟ་བའི་མི་འམ་ཅི་ཞེས་གདུགས་འགྲེལ་ལས་བཤད་དོ། །དུང་དཀར་ཚིག་མཛོད་ལས། རི་རབ་ལྷུན་པོའི་ཆུ་མཚམས་ཀྱི་ཁོང་གསེང་ན། གཟུགས་མི་ལས་མཛེས་ཤིང་སྐད་ཤིན་ཏུ་སྙན་པ་ཞིག་ཡིན། ཞེས་དང་། སྟོན་པ་གཤེན་རབ་ཀྱི་མདོ་འདུས་རིན་ཆེན་མཛོད་ལས་ཀྱང་། རི་རབ་དག་གི་ཁོང་གསེང་ན། །མི་འམ་ཅི་ཡི་རྒྱལ་བོ་ལྗོན་པ་སྐྱེས། །མེ་ཏོག་འབྲས་ཟ་རྒྱ་མཚོའི་ཁ་ཞག་འཐུང་། །སྐྱེས་དྲུག་དབྱར་སྐྱེ་དགུན་ན་འཆི། །དིང་གཙུག་མཚོན་ཐོགས་སྲིན་དང་འཐབ། །མགོ་བརྙན་གླིང་དང་གླིང་བར་རྫུ་འཕྲུལ་འགྲོ། །ཞེས་དང་། མཁས་གྲུབ་ལུང་རྟོགས་རྒྱ་མཚོའི་བསྟན་འབྱུང་རིག་པའི་ཤན་འབྱེད་ནོར་བུ་ཀེ་ཏ་ཀའི་དོ་ཤལ་ལས། གླིང་ཕྲན་ལ་གནས་པའི་མིའམ་ཅི་བཞི་ནི། ལྗོན་པ་ཅན་ཞེས་ཤིང་གི་འབྲས་བུ་ཟ། རྒྱ་མཚོའི་ཁ་ཞགས་འཐུང་བ་དང་། སྐྱེས་དྲུག་ཅན་ནི་བྱིས་པ་དབྱར་ལྡང་ལ་སྟོན་ན་འཆི་བ་དང་། རྟིང་ཙུག་ཅན་ནི་སྲིན་དང་འཐབ་ཅིང་སྲོག་ཟ་བ་དང་། མགོ་བརྙན་ཅན་ནི་མི་ལུས་ལ་དུད་འགྲོ་སྣ་ཚོགས་ཀྱི་མགོ་བོ་ཅན་དང་བཞིའོ། །
དེ་དག་གནས་ཀྱིས་བསྡུས་ན་བརྒྱད་དེ། མཛོད་ལས། རྐོ་རིང་དག་གི་གླིང་ཆུང་ན། །རྔ་མོང་མགོ་ཅན་ཤིང་ཏོག་ཟ། །རྐོ་ཐུང་དག་གི་གླིང་ཆུང་ན། །སྒྱུ་མ་མཁན་དང་བགེགས་ཀྱི་ཚོགས། །གྱག་ཏི་དག་གི་གླིང་ཆུང་ན། །ར་མགོ་མིག་གསུམ་རྩི་ཐོག་ཟ། །གྱོག་ཏི་དག་གི་གླིང་ཆུང་ན། །སྦལ་དང་མི་རུ་རྫུས་ཤིང་སྤྱོད། །མར་ཞི་དག་གི་གླིང་ཆུང་ན། །གླང་བོའི་མགོ་ཅན་མཐུ་སྟོབས་ཆེ། །ཏིང་ཞི་དག་གི་གླིང་ཆུང་ན། །ཁ་ལ་རག་ཤ་སྲིན་པོའི་ཚོགས། །ཁ་སློན་དག་གི་གླིང་ཆུང་ན། །སྤྲེའུའི་མགོ་ཅན་གཡོ་འགུལ་ཆེ། །སྤྲེལ་ལྒམ་དག་གི་གླིང་ཆུང་ན། །བྱིས་པ་དབྱར་ལྡང་སྟོན་ན་འཆི། །ཞེས་སོ། །
ཡང་། གདུགས་དཀར་འགྲེལ་བ་ལས་མིའི་བྱད་དབྱིབས་ཅན་ཞིག་ཡིན་པ་བདེན་ཤོས་ཆེ་སྟེ། འདུལ་བའི་ལྒིང་འབུམ་ལས། དགེ་སློང་ཞིག་ནགས་སྟུག་པོ་ན་འདུག་པ་དང་། དེ་མི་འམ་ཅི་མོས་ཁྲིད་ནས་བྲག་ཕུག་ཏུ་བཅུག་ཅིང་འདུ་ཤེས་བསྒྱུར་ནས་སྤྱོད་ཡུལ་དུ་སོང་བ་དང་། ཞེས་གསུངས་སོ། །
གཤེད།
གཤེད་ཅེས་པའི་ངེས་ཚིག་ནི། ཀ་རྨ་ཆགས་མེད་ཀྱིས། ཚེ་འདས་རྣམས་ཀྱི་གཟུགས་བཟུང་ནས། །གསོན་པོ་རྣམས་ཀྱི་གཤེད་མ་བྱེད། །དེ་ཕྱིར་གཤེད་ཅེས་བྱ་བ་ཡིན། །གསུངས་ལ། ཚེ་འཕོས་པ་ཇི་ལྟར་འགྱུར་བའི་མདོ་ལས་གནོད་སྦྱིན་འཆི་ཁ་མར་ཉེར་འཇུག་དང་། དྲི་ཟ་ཁྱབ་བྱེད། པི་ཤ་པ་ན། སྨྲ་འདོད། ཀུན་ཏུ་རྟོག་འདོད། གནོད་སྦྱིན་ཝ་ར་ཧི་ཏ་སོགས་འཆི་ཁར་དབུགས་གཏིང་ཟ་ཞིང་ཕུང་བོ་བདག་ཏུ་འཛིན་པའི་ཟ་འདྲེ་རྣམས་དང་། ཡང་། གཏོ་ཆོག་ཞིག་ལས། དབང་ཆེན་རུས་སྦལ་རི་རབ་འབྱུང་བཞིའི་སྟེང་། །གཤེད་པོ་ཐེ་སེ་བདུན་ཟུར་རྟ་ལ་ཞོན། །སྤར་བརྒྱད་སྨེ་དགུ་ལོ་སྐོར་བཅུ་གཉིས་བསྐོར། །ལོ་ཟླ་ཞག་དུས་གཟའ་སྐར་འབྱུང་བ་བཞི། །ཟ་འདྲེ་ཤི་གཤེད་བདུད་བཞི། ཞེས་ཀྱང་གསུངས་སོ། །
ཀརྨ་ཆགས་མེད་ཀྱི་གཤེད་གཏོ་ལས་གཤེད་པོ་ཐེ་སེ་ནག་པོ་གནམ་ལོ་བདུན་ཟུར་ལ་བཅིབ་པ་དང་། གཤིན་རྗེ་ནག་པོ་ཁྲག་གྲོད་འཁུར་བ་དང་། ཤར་ལྷོ་ནུབ་བྱང་ལ་གནས་པའི་གཤེད་པོ་འབྲུག་ལུག་ཁྱི་དང་གླང་གི་མགོ་བཞི་སེར། ལུས་དང་རྟ་ནི་དཀར་སེར་དམར་ལྗང་ནག དྲུག་ཀའི་ཕྲག་གཡས་སུ་ཁྲམ་ཤིང་དང་། གཡོན་དུ་གཤའ་གྲི་དམར་བོ་བཙུགས་པར་བཤད།
དེ་དག་གི་བྱེད་ལས་ནི་གཤེད་གཏོ་དེ་ལས། ཤི་བ་རྣམས་ཀྱི་ཉེ་དུར་སྤྲུལ། །ཁྱོད་ཀྱི་ཕ་མ་ང་ཡིན་ཟེར། །ཁྱོད་ཀྱི་ཉེ་དུ་ང་ཡིན་ཟེར། །འོ་དོད་ལྷང་ལྷང་འབོད་བྱེད་ཅིང་། །ཆགས་འཛིན་གདུང་སེམས་སྐྱེད་བྱེད་པ། །ཐར་བ་འཐོབ་ཏུ་མི་འཇུག་པ། །ལྕགས་དང་སྡོས་སུ་བྱེད་པའི་ཕྱིར། །ཤི་གཤེད་གཤིན་ལྕགས་ཞེས་བྱ་བ། །བྱེ་བ་དུང་ཕྱུར་གྲངས་མེད་ཚོགས། །ཞེས་དང་། ཡང་། གཤེད་གཏོ་དེར། བདག་ཅག་ཡོན་མཆོད་མི་ནོར་འཁོར་དང་བཅས་པ་ལ་གནོད་ཅིང་འཚེ་བར་བྱེད་པའི་ལོ་བདུད་ལོ་གཤེད། ཟླ་བདུད་ཟླ་གཤེད། ཞག་བདུད་ཞག་གཤེད། གཤིན་པོ་རྣམས་ཐར་བ་འཐོབ་ཏུ་མི་འཇུག་པ་ལྕགས་དང་སྡོས་སུ་བྱེད་པ། གསོན་པོ་རྣམས་ཀྱི་ཚེ་སྲོག་གི་བདུད་བྱེད་པ། ཟ་བའི་འདྲེ། ཤི་བའི་གཤེད། ཉེ་དུ་ཉེ་འབྲེལ་གྱི་གཤེད་ཁ། ཟ་རེ་འཐུང་སྐོམ་བྱེད་པ། དོན་མེད་ཀྱི་འདྲེ་ལྟོགས་གཤེད་འཁྱམས། དོང་སྟོང་བཞིན་དུ་བླ་ལ་བཏགས་པ། ཐག་ནག་བཞིན་དུ་རྒྱུད་ལ་འཁྲིལ་བ། ཤ་ཁྱི་བཞིན་དུ་རྗེས་སུ་འབྲངས་པ། ཡས་དང་གླུད་ལ་རེ་ཆེ་བ། སྒབ་འདྲེ། ཡུལ་འདྲེ། ལམ་འདྲེ། གྲི་བོ་གྲི་མོ་གནོད་ཅིང་འཚེ་བར་བྱེད་པ་གང་ཡིན་པ། ཞེས་གསུངས་སོ། །