ལེའུ་བཅུ་དགུ་བ། མི་སྣ་ངོ་སྤྲོད།
བོད་ཀྱི་སྤྲུལ་སྐུའི་ལམ་ལུགས།
༡ བོད་དུ་སྤྲུལ་སྐུའི་ལམ་ལུགས་བྱུང་ཚུལ། བླ་མའི་ཡང་སྲིད་ངོས་འཛིན་ལུགས་འདི། བོད་ཀྱི་སྒེར་ཆོས་ལྟ་བུར་ཆགས་ཡོད་པས། མི་རིགས་གཞན་གྱིས་བོད་ཀྱི་ཆོས་ལུགས་འདི། སངས་རྒྱས་ཆོས་ལུགས་ངོ་མ་མ་རེད་ཞེས་འཕྱ་སྨོད་བྱས་པའང་ཡོད། ལམ་ལུགས་འདི་དུས་རབས་བཅུ་གསུམ་པའི་དུས་མཇུག་དུ་བྱུང་བ་ལས། སྲོང་བཙན་ཀྱི་རིང་ནང་བསྟན་དར་བ་ནས་རབ་བྱུང་བཅོ་ལྔ་བའི་མེ་ཕག་སྤྱི་ལོ ༡༢༨༧ བར་ལམ་ལུགས་དེ་མེད། བར་སྐབས་འདིར་ཐོན་མི་དང་། མཁན་སློབ་ཆོས་གསུམ། རྗེ་འབངས་ཉེར་ལྔ། སྐ་ཅོག་ཞང་གསུམ། གཡུ་ཐོག་ཡོན་ཏན་མགོན་པོ། ལོ་ཙཱ་བ་རིན་ཆེན་བཟང་བོ། ཇོ་འབྲོམ་ཡབ་སྲས། མར་མི་དྭགས་གསུམ། འགོས་ལོ་ཙཱ་བ། རྭ་ལོ། ས་སྐྱ་གོང་མ་རྣམ་ལྔ། མ་ཅིག་ལབ་སྒྲོན་སོགས་མཁས་གྲུབ་གཉིས་ལྡན་ཇི་སྙེད་ཅིག་བྱོན་ཀྱང་ཡང་སྲིད་ངོས་འཛིན་བྱུང་མེད་པར་མ་ཟད། བླ་བྲང་ཤུལ་བཞག་དང་། མཛོད་བདག་གཉེར་བ་སོགས་ལྷག་པར་དུ་བྱུང་མེད། འོན་ཀྱང་། རྒྱལ་བློན་དང་སྐྱེས་བུ་དམ་པའི་མཛད་རྗེས་ཆེན་པོ་བཞག་ཟིན་ནས། མེས་དབོན་རྣམ་གསུམ་རིགས་གསུམ་མགོན་པོའི་རྣམ་སྤྲུལ་དང་། ཐོན་མི་འཇམ་པའི་དབྱངས་ཀྱི་རྣམ་སྤྲུལ་རེད་ཅེས་བརྗོད་སྲོལ་ཙམ་ལས། སྔ་མའི་མཛད་རྗེས་ལ་འཕྲོ་མཐུད་ནས་ལོ་གཅིག་ལོ་གཉིས་ཀྱི་བྱིས་པ་བསམ་མེད་ཅིག་ཡང་སྲིད་ཡིན་ཞེས། བཞུགས་གདན་འཇགས་ཤིང་གཙུག་ཏུ་བཀུར་ཏེ། མངའ་རིས་ཀྱི་བདག་པོར་དབང་བསྐུར་བ་འདི་འདྲ་ཁྱོན་ནས་བྱུང་མེད་ལ། གཞན་ཡང་། མ་ཎི་བཀའ་འབུམ་དང་། བཀའ་ཐང་སྡེ་ལྔ། ཇོ་བོ་བོད་དུ་བཞུགས་སྐབས་གསུངས་པའི་ཞུ་ལན་ནོར་ཕྲེང་དང་བཀའ་གདམས་བུ་ཆོས་སོགས་བོད་གཞུང་སྔ་མ་དག་ཏུའང་སྤྱན་རས་གཟིགས་ཀྱི་སྐྱེ་རབས་ཀྱི་ཕྲེང་བ་སྟོན་པ་ཙམ་ལས། ཡང་སྤྲུལ་ཁྲི་ས་བཀོད་པའི་ལམ་ལུགས་བྱུང་མེད།
འོ་ན། ལམ་ལུགས་དེ་ཇི་ལྟར་དར་ཞེ་ན། སྐྱེས་བུ་དམ་པ་རྣམས་འགྲོ་དོན་ཀྱི་ཆེད་དུ་སྙིང་རྗེའི་དབང་གིས་འཁོར་བར་ཡང་སྲིད་ལེན་པ་ཞེས་པའི་ལུང་ལ་བརྟེན་ནས་དར་བ་ཞིག་ཡིན་ཞིང་། དེ་ཡང་། སྐྱེ་བ་སྔ་ཕྱི་བསྒྲུབས་པ་ལ་རིགས་འདྲ་སྔོན་སོང་དང་། ཉེར་ལེན་སྔོན་སོང་། གོམས་པ་དང་མྱོང་བ་སྔོན་སོང་གི་རིགས་པས་གཞལ་ལ། སྤྱིར་ན། སྤྲུལ་སྐུ་དབྱེ་ན་གསུམ་ཡོད་དེ། ཡུལ་དུས་ཁྱད་པར་བར་སྐྱེ་བ་མངོན་པར་སྐྱེ་བ་སོགས་མཛད་པ་བཅུ་གཉིས་སྟོན་མཁན་གྱི་མཆོག་གི་སྤྲུལ་སྐུ་བདག་ཅག་གི་སྟོན་པ་ཐུགས་རྗེ་ཅན་ལྟ་བུ་དང་། བཟོ་ཡི་གནས་ཀྱིས་འགྲོ་དོན་མཛད་པ་བཟོ་བོ་སྤྲུལ་སྐུ་དང་། ལྷ་མི་དུད་འགྲོ་དང་། ཆུ་དང་ཟམ་པ་སྨན་དང་ལྗོན་ཤིང་སོགས་ཅི་རིགས་པར་སྤྲུལ་ཏེ་འགྲོ་དོན་མཛད་པ་སྐྱེས་པ་སྤྲུལ་སྐུ་སྟེ་གསུམ་དུ་མཆིས་པ་ལས། བོད་ཀྱི་སྤྲུལ་སྐུའི་ལམ་ལུགས་འདི་ཉིད་སྐྱེ་བ་སྤྲུལ་སྐུའི་ཁོངས་སུ་འདུ་ལ། བོད་དུ་སྐུ་སྐྱེའི་ལམ་ལུགས་ཐོག་མ་ནི། ཀརྨ་བ་ནས་དར་བས། དེའི་སྐོར་ཅུང་ཟད་བརྗོད་ན།
ཀརྨ་དུས་གསུམ་མཁྱེན་པ་ནི། རབ་བྱུང་གཉིས་པའི་ལྕགས་སྟག་སྤྱི་ལོ ༡༡༡༠ ལོར་མདོ་སྨད་ཀྲེ་ཤོད་དུ་སྐུ་འཁྲུངས། སྤྱི་ལོ ༡༡༨༩ ལོར་སྟོད་ལུང་དུ་མཚུར་ཕུའི་དགོན་པ་བཏབ་སྟེ། གནས་གཞི་བཟུང་ནས་བཀའ་བརྒྱུད་པའི་གྲུབ་མཐའི་བྱེ་བྲག་ཀརྨ་བཀའ་བརྒྱུད་པ་བྱུང་། དགུང་ལོ་གྱ་བཞི་བར་མྱ་ངན་ལས་འདས།
ཀརྨ་པཀྵ་འམ་ཆོས་ཀྱི་བླ་མ་ནི། སྤྱི་ལོ ༡༢༠༤ ལོར་མདོ་ཁམས་དམ་པ་ཆོས་ཕྱུག་གི་ཡུལ་དུ་འཁྲུངས། ཡོན་རྒྱལ་རབས་ཀྱི་གོང་མ་མོང་གོལ་ཧན་གྱི་མཆོད་གནས་སུ་བཞུགས། ཕྱིས་སུ་རྒྱལ་སྲས་ཧུ་པེ་ལི་ཁྲིར་བཞུགས་སྐབས། སྔ་སོར་ཀརྨ་བས་རྒྱལ་སྲས་མང་བོར་ཆོས་གསུངས་སྐབས་ཧུ་པེ་ལི་དབང་གྲལ་ལས་ཕུད་པ་སོགས་བྱས་པའི་རྐྱེན། རྒྱལ་སྲས་ཀྱིས་ཁོང་ལ་གནོད་འཚེ་མང་དུ་བཏང་བས། སྐུ་ཚེ་སྨད་དུ་མཚུར་ཕུར་བཞུགས། དགུང་ལོ་དོན་བཞི་བར་འདས། ཀརྨ་སྐུ་ཕྲེང་གཉིས་པ་འདི་ལུང་རྟོགས་ཀྱི་ཡོན་ཏན་མངའ་བརྙེས་ནས་བླ་མར་གྲགས་པ་ཡིན་གྱི། བྱིས་པ་བསམ་མེད་ཀྱི་དུས་ནས་སྤྲུལ་སྐུར་དབང་བསྐུར་བ་ཞིག་མིན།
ཀརྨ་སྐུ་ཕྲེང་གསུམ་པ་རང་བྱུང་རྡོ་རྗེ་ནི། ཀརྨ་ཆོས་ཀྱི་སློབ་དཔོན་སྐུ་གཤེགས་ཁར་གདན་ས་གྲུབ་ཐོབ་ཨུ་རྒྱན་པར་གཏད་དེ། ཉི་མ་ལ་སྟོད་ཕྱོགས་ནས་ཞྭ་ནག་པོའི་རྒྱུད་པ་འཛིན་པ་ཞིག་འོང་། དེའི་བར་དུ་རྒྱལ་ཚབ་མཛོད་གསུངས་ནས། ཁོང་ལ་ཧོར་རྒྱལ་བོའི་ལས་ཞྭའི་ཞྭ་ནག་པོ་ཞིག་གནང་བ﹙འདི་ནས་བཟུང་ཀརྨ་སྐུ་ཕྲེང་ལ་ཞྭ་ནག་ཅན་དུ་གྲགས﹚ཨུ་རྒྱན་པའི་དབུ་ལ་བསྐུར་ནས་མྱ་ངན་ལས་འདས། དེའི་ཕྱི་ལོ ༡༢༨༤ལོར་ཀརྨ་སྐུ་ཕྲེང་གསུམ་པ་རང་བྱུང་རྡོ་རྗེ་སྐུ་འཁྲུངས། དགུང་ལོ་གསུམ་དུ་ཕེབས་སྐབས་ཡབ་ཡུམ་སོགས་ལ་ང་ཀརྨ་བ་ཡིན་དང་། གྲུབ་ཆེན་ཨུ་རྒྱན་པར་མཇལ་སྐབས་སྔོན་གནས་རྗེས་དྲན་གྱི་གསུང་མང་དུ་གནང་བས། གྲུབ་ཆེན་ཨུ་རྒྱན་པས་ཀརྨ་པཀྵའི་སྤྲུལ་སྐུར་ངོས་འཛིན་བྱས། དེ་ནས་བཟུང་བོད་དུ་སྤྲུལ་སྐུའི་ལམ་ལུགས་གསར་དུ་མགོ་ཚུགས་པ་རེད། ཀརྨ་དུས་གསུམ་མཁྱེན་པ་འཁྲུངས་ནས་ལོ་ངོ ༢༨༦ རྗེས་སུ། སྐུད་སྣེ་ཁབ་ཀྱིས་ཁྲིད། ཆར་སྣེ་རླུང་གིས་ཁྲིད་དེ་སྐུ་སྐྱེ་ལམ་ལུགས་འདི་དར་བ་སྟེ།
རྒྱལ་བ་ཐམས་ཅད་མཁྱེན་པའི་ཡང་སྲིད་ནི། སྤྱི་ལོ ༡༤༧༥ ལོར་རྗེ་དགེ་འདུན་གྲུབ་འདས་པའི་ཕྱི་ལོ་དེར། རྒྱལ་བ་དགེ་འདུན་རྒྱ་མཚོ་སྐུ་འཁྲུངས། ཁོང་ཡབ་ཀྱི་པང་ཐོག་ན་ཡོད་པའི་སྐབས་ཞིག འབྲུག་སྒྲ་གྲག་པ་གསན་ནས་ཡབ་ལ། ཕ་བློ་བཟང་གྲགས་པའི་ཆོས་གསུངས་པ་འདྲ་བའི་སྒྲ་ཞིག་གོ་གསུངས་པར། ཡབ་ཀྱི་ཕ་བློ་བཟང་གྲགས་པས་ཆོས་ཇི་ལྟར་གསུངས་ཞེས་དྲིས་པར། བཤེས་གཉེན་དུལ་བ་ཞི་བ་ཉེར་ཞི་བ། །ཞེས་སོགས་ཤོ་ལོ་ཀ་གཅིག་ཤར་མར་གསུངས་ཏེ། འདི་ལྟར་གསུངས་པ་རེད་ཞེས་སྔོན་གནས་རྗེས་སུ་དྲན་པ་དང་། ཡང་དགུང་ལོ་གསུམ་གྱི་ཚེ་ཡུམ་གྱིས་སྡིགས་མོ་བྱས་པར། ཁྱེད་ང་ལ་མ་འཐབ་གསོལ་བ་ཐོབས་གསུངས། ཇི་ལྟར་འདེབས་ཞུས་པར། དགོས་འདོད་ཀུན་འབྱུང་ནོར་བུ་བསམ་འཕེལ་ཁྱོད། །སོགས་ཤོ་ལོ་ཀ་གཅིག་སྔོན་ཀྱི་བག་ཆགས་ཀྱི་སྟོབས་ཀྱིས་ཤར་མར་བརྩམས་པ་སོགས་རྟགས་དང་མཚན་མ་ཁྱད་པར་ཅན་ལ་བརྟེན་ནས། རྒྱལ་བ་དགེ་འདུན་གྲུབ་ཀྱི་ཡང་སྲིད་དུ་ངོས་བཟུང་བ་ནི། དགེ་ལུགས་པའི་སྤྲུལ་སྐུ་འཚོལ་བའི་ཐོག་མ་ཡིན།
པཎ་ཆེན་རིན་པོ་ཆེའི་ཡང་སྲིད་ནི། མཁས་གྲུབ་དགེ་ལེགས་དཔལ་བཟང་དང་། པཎ་ཆེན་བསོད་ནམས་ཕྱོགས་ཀྱི་གླང་བོ། དབེན་ས་བློ་བཟང་དོན་འགྲུབ་སོགས་བརྒྱུད་དེ། པཎ་ཆེན་སྐུ་ཕྲེང་བཞི་བ་པཎ་ཆེན་བློ་བཟང་ཆོས་རྒྱན་བྱུང་ལ། ཁོང་རྒྱལ་བ་དབེན་ས་བའི་སྐྱེ་སྤྲུལ་དུ་ངོས་བཟུང་སྟེ། དེ་ནས་བཟུང་པཎ་ཆེན་རིམ་བྱོན་གྱི་སྐུ་སྐྱེ་དངོས་སུ་འཚོལ་བའི་མགོ་བརྩམས། འོན་ཀྱང་། ཀརྨ་དུས་གསུམ་མཁྱེན་པའི་རྗེས་ནས་ཀྱང་། ཀུན་མཁྱེན་ཀློང་ཆེན་པ་དང་། བུ་སྟོན་ཐམས་ཅད་མཁྱེན་པ། རྗེ་རྒྱལ་བ་ཙོང་ཁ་བ་སོགས་གྲུབ་མཐའ་རིས་མེད་ཀྱི་མཁས་གྲུབ་གཉིས་ལྡན་ཀྱི་དམ་པ་སྐོར་ཞིག་ལ་ཡང་སྲིད་ངོས་འཛིན་ཞུས་མེད།
ཕྱིས་སུ་སྐུ་སྐྱེའི་བརྟག་པ་བྱེད་ཐབས་ལ། རྒྱལ་དབང་ལྔ་བ་ཟན་རིལ་བསྒྲིལ་བའི་ཐབས་ལམ་སྤྱད་དེ་ཐུགས་ཐག་བཅད་པ་དང་། པཎ་ཆེན་བསྟན་པའི་ཉི་མ་གསེར་བུམ་དུ་མིང་བྱང་བཅུག་ནས་བརྟག་པ་བྱས་པ་དང་། གཞན་ཡང་། ཆོས་སྐྱོང་ཁོག་ཞུགས་ཀྱི་པྲ་རྟེན་གྱིས་གཅོད་པ། ལྷ་མོའི་བླ་མཚོ་ལ་བརྟེན་ནས་ཐུགས་ཐག་བཅད་པ་སོགས། གྲུབ་མཐའ་སོ་སོར་མར་མེ་གཅིག་ལས་གཉིས་ཆད་ཀྱི་ཚུལ་དུ་སྐུ་སྐྱེ་ལམ་ལུགས་འདི་ས་དར་རྡོ་དར་དུ་ཁྱབ་ལ། ཐ་ན་བླ་རྒན་དང་སྔགས་རྒན་རེ་གཤེགས་ཤུལ་དུའང་འདི་ནི་དེ་དང་དེའི་སྐུ་སྐྱེའོ་ཞེས་མང་མང་ཞིག་གིས་མགོན་སྐྱབས་ལ་རེ་བའི་སྲོལ་དར་བ་ནི་ཀུན་གྱིས་མཁྱེན་གསལ་ལོ། །
གཡུང་དྲུང་བོན་ལའང། གདུང་བརྒྱུད་ཀྱི་བླ་མ་དང་། སྒྲུབ་བརྒྱུད་ཀྱི་བླ་མ་གཉིས་སུ་ཡོད་ལ། གདུང་བརྒྱུད་ཀྱི་བླ་མ་ནི། དམུ་རིགས་གཤེན་དང་། རྒྱལ་རིགས་འབྲུ། དབང་ལྡན་གཞུ། རྒྱལ་སྲས་སྤ། མཁས་པ་རྨེའུ། དམ་པ་ཁྱུང་། ཞིག་པོ་བཅོ་བརྒྱད་ཀྱི་གདུང་བརྒྱུད་སོགས་དང་། སྒྲུབ་བརྒྱུད་ནི། གདུང་བརྒྱུད་ཡོད་མེད་ལ་མ་བལྟས་པར་མཁས་གྲུབ་གཉིས་ལྡན་གྱི་ཉམས་རྟོགས་མངོན་དུ་གྱུར་བ་ཚོར་ཡང་སྤྲུལ་བཙལ་བ་དེ་ཡིན་ལ། ཁོ་བོ་ཅག་གདུང་བརྒྱུད་ཀྱི་སྐུ་སྐྱེ་གཙིགས་སུ་འཛིན་ལ། སྤྲུལ་སྐུ་མཚན་ཉིད་དང་ལྡན་པ་ཡིན་ན་ཁྱད་པར་མེད་པར་བཤད་དོ། །
༢ སྐུ་སྐྱེའི་ལམ་ལུགས་ཀྱི་དགེ་སྐྱོན། སྤྱིར་ན། ལུས་རྟེན་སྔ་མ་དོར་ཏེ་ཕྱི་མར་ཉིང་མཚམས་སྦྱོར་བ་ལ། ལས་ཉོན་གྱིས་སྐྱེས་པ་ལེན་པ་དང་། སྙིང་རྗེ་དང་སྨོན་ལམ་གྱིས་སྐྱེས་པ་ལེན་ཚུལ་གཉིས་སུ་འདུ། དང་བོ་ནི། མ་རིག་གི་དབང་གིས་དགེ་སྡིག་གི་ལས་བསགས་པ་རྣམ་ཤེས་ཀྱི་སྟེང་དུ་བསྒོས་ཏེ། འཆི་ཁར་སྲེད་ལེན་གྱིས་གསོས་བཏབ་ནས་ཟོ་ཆུན་འཁྱུད་མོ་བཞིན་ངན་འགྲོ་དང་བདེ་འགྲོ་ཅི་རིགས་སུ་སྐྱེ་བ་ལེན་པ་དང་། གཉིས་པ་ནི། འཕགས་ལམ་འཐོབ་པའི་བྱང་སེམས་རྣམས་ལས་ཉོན་གྱི་སླར་མི་སྐྱེ་ཡང་། སྙིང་རྗེ་ཆེན་པོས་སེམས་ཅན་ལ་དམིགས་ཏེ་སྨོན་ལམ་གྱིས་དབང་གིས་ཡུལ་དུས་ཕ་མ་སོགས་རང་དབང་གིས་གདམས་ནས་སྐྱེ་བ་ལེན་པ་ཡིན་ལ། འདིར་བཤད་པ་ནི་ཕྱི་མའོ། །དེ་ལྟར། ཐུགས་རྗེ་ཆེན་པོས་གཞན་དབང་དུ་གྱུར་ཏེ་བསམ་བཞིན་དུ་གདུལ་བྱ་གྲངས་མེད་ཀྱི་སྐྱབས་དང་། དཔུང་གཉེན་དུ་བྱོན་པའི་སྐུ་སྐྱེ་དེ། ལུང་རྟོགས་ཀྱི་ཡོན་ཏན་ལ་མངའ་བརྙེས་ཤིང་། བྱ་དཀའ་བའི་མཛད་པ་མཐའ་དག་བདག་གིར་བཞེས་ཏེ་གཞན་དོན་རྐྱང་རྐྱང་གི་འཚོ་ཞིང་བཞུགས་པ་ནི། སྐལ་ལྡན་དང་བ་འདྲེན་པའི་མིག་རྐྱེན། འབྱོར་ལྡན་བསོད་ནམས་བསགས་པའི་ཞིང་སར་གྱུར་བ་སྟེ། དེ་ནི་ཕྱག་བྱ་ཐལ་མོ་སྦྱོར་བ་ཉག་གཅིག་ཏུ་འཁུམས་ལ། རྒྱུ་མཚན་ནི། དེ་དག་ནི་ལྟོ་གོས་གཏམ་གསུམ་ལ་གྱོང་བསྐུར། ལུས་ལ་བབ་བསྐུར། མི་མེད་ཀྱི་རི་ཁྲོད་དུ། ཤ་རུས་རྡོ་ཐུག་གི་རྣལ་འབྱོར་ལ་བརྟེན་ཏེ་ཉམས་རྟོགས་ཁྱད་པར་ཅན་འཁྲུངས་པའམ། ཡང་ན། གྲྭ་ས་ཆེན་པོར་འགྲིམས་ཏེ་ཆུ་རྐྱང་རྩམ་རྐྱང་གི་འཚོ་བ་ལ་བརྟེན་ཏེ། མདོ་རྒྱུད་གཞུང་ལུགས་ལ་ཐོས་བསམ་སྒོམ་སྒྲུབ་གནང་ཏེ། འགྲོ་འཆག་ཉལ་འདུག་ཐམས་ཅད་གཞན་དོན་རྐྱང་རྐྱང་གིས་འཚོ་བས་སོ། །ཚུལ་འདི་དག་ལ་དགོངས་ནས། གཡུ་ཐོག་ཡོན་ཏན་མགོན་པོས། བོད་ཀྱི་ཨེམ་རྗེ་དང་མཁས་པ་ཚང་མ་སྤྲང་བོ་ཡོང་བ་ཤོག་ཅིག ཅེས་ཐུགས་སྨོན་གནང་བའང་རྒྱུ་མཚན་ཅན་དུ་འདུག་གོ །
དེ་ལྟར་ཨེ་ཡོད་ནང་གི་དེ་ཡོད། སྒོང་ངའི་ནང་གི་སེར་ཐིག་ལྟ་བུ་དེ་ཚོ་ལ། སྐུ་སྐྱེ་མིང་བྱང་འཐོབ་ཀྱང་རུང་། མ་ཐོབ་ཀྱང་རུང་། བསྟན་འཛིན་གྱི་དྭངས་མ་ཡིན་ནའང་། གནའ་དེང་གི་གདུལ་བྱའི་ཁམས་དང་བསམ་པར་ཤིན་ཏུ་ནས་ཀྱང་འཕྲོད་དཀའ་བར་མ་ཟད། ད་དུང་འཛེམ་དོགས་བྱེད་སའི་གནས་སུ་ཆེ་སྟེ། དཔེར་ན། མི་ལ་གྲུབ་པ་འཐོབ་སྟེ་བྲག་དཀར་རྟ་སོ་ན། ཁོང་གི་ཨ་ཁུའི་མིང་བོ་ཕ་བུ་གཉིས་ཀྱིས་ནམ་མཁར་འཕུར་བ་མཐོང་བས། བུས་ཞིང་རྨོ་མཚམས་བཞག་ནས། ཕ་ཡ་གིར་ལྟོས་དང་མི་འཕུར་བ་བྱུང་ཟེར་བས། ཕ་ན་རེ། ཡ་མཚན་རྒྱུ་ཅི་ཡོད། མྱང་ཚ་དཀར་རྒྱན་ཟེར་བའི་བུད་མེད་ཁྲམ་མ་ཞིག་གི་བུ། གཡོ་ཅན་མི་ལ་ཟེར་བའི་གོག་པ་ལྟོ་མ་ཕྱིད་པ་ཞིག་ཡོད་པ་དེ་ཡིན་པར་འདུག གྲིབ་མ་དང་འགོམ་ཡུག་མ་ཕོག་པ་གྱིས་ལ་རྨོས་སྣ་ཁྲིད་ཟེར། ཕ་རང་གྲིབ་མ་ཕོག་གིས་དོགས་མགོ་ལུས་ཡོ་བ་བྱུང་བ་དང་། ཡང་མི་ལ་དིང་རིར་སླེབས་ཏེ་ལམ་ཁར་ཉལ་སྡོད་སྐབས། དཀའ་ཐུབ་ཀྱི་རིད་པའི་ལུས་པོ། བུ་མོ་འཕྱོར་མོ་འགས་མཐོང་ནས། ཨ་ཙི། འདི་འདྲ་བའི་ལུས་སུ་ནམ་ཡང་སྐྱེ་བར་མ་གྱུར་ཅིག་ཅེས་སྨོན་ལམ་བཏབ་པ་དང་། ཀློང་རྡོལ་བླ་མ་ཡང་དཀའ་སྤྱད་ཀྱིས་སྐུ་ལུས་རིད་པས་གོང་མཚུངས་ལྟར་སྨོན་ལམ་བཏབ་པའི་ལོ་རྒྱུས་ཡོད། ཚུལ་འདི་ལྟ་བུ་ལ་དགོངས་ནས་མི་ལ་རང་གི་གསུང་མགུར་དུ་འང་། དུས་ངན་བསྐལ་བ་སྙིགས་མ་ལ། །ཁྲམ་པ་ཡི་དམ་ལྷ་བཞིན་མཆོད། །ཟོག་པོ་རིན་ཆེན་གསེར་ལས་བྲིན། །ཆོས་པ་ལམ་ཁའི་རྡོ་བཞིན་བསྐྱུར། །ཞེས་པའི་ཨུ་ཐུག་གི་མགུར་འདི་བཞེས་པ་ཡིན་ལ། ཡབ་རྗེ་བླ་མས། བྱང་ཆུབ་སེམས་དཔའ་གང་ན་བཞུགས་མི་ཤེས། །མཐོང་མཐོང་ཀུན་ལ་མ་སྨོད་རི་ཁྲོད་པ། །གསུངས་པ་བཞིན། བདག་ཅག་གི་སྟོན་པ་སློབ་པ་ལམ་གྱི་གནས་སྐབས་ན། དུད་འགྲོ་ཁྱི་ཕག་ཚུད་ཆད་ཀྱི་ལུས་རྟེན་བླངས་ཏེ་རྒྱལ་སྲས་བྱང་ཆུབ་སེམས་དཔའི་སྤྱོད་པ་སྤྱད་པ་སྐྱེ་རབས་དང་མདོ་རྒྱུད་མང་བོ་ལས་ལུང་དུ་བསྟན་ཡོད་ན། དེ་དག་ལ་ཅིའི་ཕྱིར་མཆོད་བཀུར་མི་བྱེད། རང་ཅག་གི་མིག་ལམ་དུ་བྱང་ཆུབ་སེམས་དཔའ་བྱ་བ་དེ། གོས་རྒྱ་སྨུག་གིས་བཏུམས་ཏེ་གསེར་གྱི་ཁྲི་སྟེང་ན་བཞུགས་པ་ཞིག་ལ་ངོས་འཛིན་ཀྱང་། ས་ལམ་སོགས་གཞུང་ལུགས་ཁག་ན། བྱང་སེམས་ཕལ་མོ་ཆེ་རྒྱལ་བོ་དང་བློན་པོ་སོགས་ཀྱི་སྐྱེས་པ་བཞེས་པར། གཉིས་མེད་གསུངས་པ་སངས་རྒྱས་ཀྱི་དགོངས་པ་ཡིན། དེ་བས་བདེན་དོར་རྫུན་སྐྱོར་གྱི་སྤྱི་ཚོགས་ཁྲོད། འབྱུང་བཞི་ལ་ཁ་ལོར་སྒྱུར་ནུས་ཞིང་བསྟན་པའི་སྲོག་ཤིང་དུ་གྱུར་བའི་སྐྱེས་བུ་ནི་བུམ་ནང་གི་མར་མེ་བཞིན་བག་ལ་ཞ་ཞིང་། བསྟན་པའི་ཡང་མཐའ་འདིར་རྒྱ་ལམ་དུ་དགོངས་ནས། ཡོངས་འཛིན་བློ་བཟང་དཔལ་ལྡན་གྱིས། སྤྲུལ་མཛད་འབྲུག་སྒྲ་སྙིང་བོ་ཆགས་པའི་སྤྲིན། །མང་ཞིག་ཕན་བདེ་མྱུ་གུ་གཅོད་པའི་མཚོན། །ངན་སྤྱོད་མེ་ཆར་འབེབས་ལས་ལེགས་པའི་སྲོལ། །གྲུ་ཆར་དལ་གྱིས་འཇོ་བ་ཉིན་སྐར་ཙམ། །གསུངས་པ་བཞིན། ཞང་ཞུང་བོན་གྱི་མཁས་དབང་ཤར་རྫ་བཀྲ་ཤིས་རྒྱལ་མཚན་གྱིས་ཀྱང་། ལར་དིང་སང་གི་བླ་མ་ཁ་ཅིག་དཀོར་སྡུད་པ་ལ་ཁེབས་ཆེ། ནོར་བསགས་པ་ལ་ཐབས་མཁས། དཀོར་ནག་གི་རྒྱུ་རྫས་ཀྱིས་དཀོར་མཛོད་ཁེངས་ཀྱང་། དཀོན་མཆོག་གི་ཞིང་ས་གཏོང་ཕོད་ནི་ཆུང་། མིང་བླ་མར་འདོགས་ཀྱང་དོན་དུ་ཁྱིམ་པ་ལས་ཀྱང་སྡུག་པ། སྡོམ་པ་དང་དམ་ཚིག་མི་བསྲུང་བ། ང་བླ་མ་ཡིན། ང་སྔགས་པ་ཡིན། ང་གདུང་རྒྱུད་པ་ཡིན། ངས་ཐམས་ཅད་ཆོག ད་དུང་ངའི་བརྒྱུད་པ་ཐམས་ཅད་ཀྱང་སེམས་ཅན་ལ་ཕན་ཐོགས་པ་ཤ་སྟག་འབྱུང་། ང་ལ་གཞན་གྱིས་འགྲན་ཟླ་མེད་སྙམ་སྟེ། དགོས་པའི་ཚུལ་ཁྲིམས་དང་ཏིང་འཛིན་སོགས་བསླབ་པ་གསུམ་ཕྱི་ལ་དོར། མི་དགོས་པའི་འཇིག་རྟེན་པའི་ཆེ་ཐབས་དང་དུ་ལེན་ཏེ། ཟས་ནོར་ལོངས་སྤྱོད་ལ་ཞེན་པ་འཁོར་བ་པ་ལས་ཀྱང་ཆེ་བ། ཀོ་ལོང་དང་གདུག་རྩུབ་སེམས་ཅན་ཐ་མལ་ལས་ཀྱང་ཐུ་བ། བསགས་པ་ནོར་ལ་མཛད། ཐུགས་དམ་དཀོར་ནག་ལ་འཆང་། རང་དོན་དུ་ལོ་ཟླ་ཁ་ལངས་པར་བསྙེན་སྒྲུབ་ལ་བཞུགས་མི་ནུས་ཀྱང་། ནོར་ཕྱིར་སྐུ་ཚེ་དཀོར་ནག་ལ་སྐྱེལ་ནུས་པ་ཡང་ཡོད་པར་འདུག གསུངས་ལ། དེ་བས་སྤྲུལ་སྐུ་ཡང་དག་ཅིག་ཡིན་ན་མཚན་ཉིད་ལྔ་ཚང་དགོས་པ་སྟེ། ཞི་བའི་ལམ་སྟོན་པ། གདུལ་བྱ་སྨིན་པར་བྱེད་པ། ལུང་སྟོན་པར་བྱེད་པ། འཕྲིན་ལས་སྣ་ཚོགས་པའི་རྒྱུན་གང་འདུལ་བའི་གཟུགས་སྟོན་པ། གཞན་གྱི་རྣམ་རིག་ལ་སྣང་བའོ། །དེ་བས་འཇིག་རྟེན་པའི་ཁ་དཔེ་ལ། ལྕགས་ཀྱི་རིལ་བུ་ཟ་ན། རྣོ་ཡི་འགྲམ་སོ་དགོས། ཟེར་བ་བཞིན་གང་ཡིན་ཡིན་གྱིས་སྤྲུལ་སྐུར་མི་བཏུབ་བོ། །
གཞན་བླང་དོར་གོ་ལྡོག་དང་། དོན་དམ་ལས་ཟོག་རྫུན་ལ་རླུང་རྟ་འཕུར་བའི་སྤྱི་ཚོགས་འདིར། སུམ་པ་ཡེ་ཤེས་དཔལ་འབྱོར་གྱི་རང་རྣམ་ལས། ཕལ་ཆེར་ནི་སྔར་འདས་དེ་ལ་ཆ་རྒྱུས་ཡོད་པའི་ཕ་མ་སོགས་ཀྱིས། སྔ་མ་གང་དེ་མ་གཤེགས་གོང་གི་ཟླ་ཤོས་ནས་སྐྱེས་ནའང་ཟླ་ལྷག་སྦེད་ནས་ཟླ་གྲངས་འགྲིག་པར་བྱས་ཏེ། རྫུན་པོ་ཆེ་ལ་གཏན་ཚིགས་མང་། ཞེས་པ་ལྟར། དེའི་སྐྱེ་བ་ཡིན་པའི་རྫུན་ཚིག་མང་བོ་བསྒྲགས་པ་དང་། ཡང་། མང་བོ་ཞིག་གིས་དེ་འདས་ནས་ཟླ་དགུ་སོགས་སོང་མཚམས་སུ་བུ་ཞིག་སྐྱེས་ན་རྨི་ལམ་དང་ལྟས་དེ་དང་དེ་ལྟ་བུ་བྱུང་ཞེས་བསྒྲགས་ཏེ་གཡོ་སྒྱུས་བསླུས་པ་ན། སྔ་མ་དེའི་དཔོན་པོ་ཉེ་དུ་སོགས་འཁྲུལ་ཏེ་བྲག་ཆའི་རྗེས་སུ་བསྙེགས་པའི་སྤུན་དུ་གྱུར་ཀྱང་། དེ་མ་ཤེས་པར་བུ་དེ་སྔ་མ་དེའི་གོ་སར་འཇོག ཡང་ལ་ལས། སྐུ་སྐྱེ་གཞོན་དུས་འདས་པ་ན། དེ་དང་ལོ་མཉམ་རེ་ཡང་དེའི་གོ་སར་བཞག་སོགས་གང་དྲན་དྲན་དར་ལ། ཡང་ཁྲེལ་བོར་ཧམ་ཅན་བློ་རྒོད་ཁ་ཅིག་གིས། མངལ་དུ་སེམས་ཅན་ཆགས་ཙམ་ནས་སྔར་འདས་གང་དེའི་སྐྱེ་བ་ཡིན་ཚུལ་རྫུན་སྟོང་སྔར་སྨོས་ལྟར། ཕྱོགས་ཀུན་དུ་རླུང་ལྟར་གྲགས་པ་ན། བདག་པོ་དག་གིས་ཀྱང་དེར་ཐག་བཅད་ཀྱང་ཕྱིས་སུ་བུ་མོ་སྐྱེས་པ་འགའ་ཞིག་བྱུང་སྐད། དེ་ལས་འགའ་ཞིག་མ་ངེས་ཀྱང་། ཕལ་ཆེར་གྱིས་བསྟན་འགྲོར་སྨན་པའི་རེ་ལྟོས་འཆའ་བ་མིན་པར་དེ་ལ་བརྟེན་ནས་སྲིད་པའི་ཕུན་ཚོགས་ལ་རློམ་སེམས་དུག་སྦྲུལ་ཁ་རླངས་ནང་རྔུབ་ཀྱིས། ཟང་ཟིང་ནོར་རྫས་ཀྱི་བྱིའུ་ཙི་ཙི་སོགས་འགུག་འདོད་རེ་བ་ཤས་ཆེ་བའི་རྟོག་པ་འོག་འགྱུའི་འཁོར་ལོ་བསྐོར་བའོ། །ཞེས་པ་ལྟར། དོན་དུ་ན། མ་ཁ་བདེ་ན། བུ་སྐུ་སྐྱེ་འཁྲུངས། ཞེས་པ་ལྟར། གཡོ་སྒྱུ་ཁྲམ་གསུམ་གྱིས་རོ་ལངས་སྙིང་ལ་ཞུགས་ཏེ། ཕ་མས་བུ་ཕྲུག་གི་ལྟས་བཟང་སྒྲོགས་ནས། སྐྱེས་བུ་དམ་པར་ཁས་འཆེས་པ་ག་གེ་མོའི་ཞབས་ལ་གཏུགས་ཁུལ་གྱིས། སྐུ་ལོ་འམ་སྤྲུལ་སྐུ་ཞེས་མིང་བྱང་རྫིག་པོ་ཆེས། ཟང་ཟིང་མཛོད་དུ་བསྡུས་ཏེ། འཁོར་ཆུང་གིས་སྙིང་མ་ཚིམ་པར་འཁོར་ཆེན་སྐྱོང་བ་ནི། སྟོན་པ་རང་ཉིད་ཀྱིས་ཟླ་སྙིང་གི་མདོ་སོགས་ལས། ངའི་བསྟན་པ་འདི་ང་མིན། ང་འདྲ་བ་ཞིག་གིས་འཇིག་འོང་། གསུངས་པའི་ལུང་བསྟན་རྣག་ཐོག་གཙག་ཁེལ་གྱི་ཚུལ་དུ་བབ་པར་འདུག་ལ། ད་དུང་ཁྭ་ཏའི་མིག་ལམ་དུ་སྐྱག་པ་གསེར་དུ་སོང་བའི་གྲས་སུ་བཞུགས་ཏེ་ཆེ་བ་བརྗོད་དགོས་བྱུང་ན། ཇོ་ནང་ཏཱ་ར་ན་ཐས། རྨོངས་པའི་རྣམ་ཐར་བརྗོད་ཚེ་མཁས་རྣམས་ཁྲེལ། །དམ་པའི་ངང་ཚུལ་བརྗོད་ལ་བརྗོད་རྒྱུ་མེད། །དེ་ཕྱིར་བསམ་གྱིན་སྐལ་བཟང་སློབ་མ་ལ། །འདོམས་རྒྱུའི་དངོས་བོ་བདག་གིས་གང་ནས་བཙལ། །ཞེས་པ་ལས་གཉིས་སུ་མ་མཆིས་ལ།
འདིར་བསམ་རིགས་པ་ཞིག་ནི། སློབ་དཔོན་དབྱིག་གཉེན་གྱིས། སྟོན་པ་འཇིག་རྟེན་མིག་ནི་ཟུམ་གྱུར་ཅིང་། །དཔང་གྱུར་སྐྱེ་བོ་ཕལ་ཆེར་ཟད་པ་ན། །དེ་ཉིད་མ་མཐོང་རང་དགར་གྱུར་བ་ཡི། །ངན་རྟོག་རྣམས་ཀྱིས་བསྟན་པ་འདི་དཀྲུགས་སོ། །ཞེས་ཐུགས་སྐྱོ་བའི་གདུང་དབྱངས་འཐེན་པ་བཞིན། སྐུ་ལོའི་མིང་བྱང་གི་རླུང་རྟ་དར་དྲགས་ཏེ། རྟ་མདོ་བའི་གོང་ཚོད་ཇེ་དམའ་དང་། བོང་སྐྱ་ལིའི་བསྟན་པ་ཇེ་དར་དུ་སོང་ན། ཨ་མའི་བུ་ལ་སྙིང་རུས་ཡོད་ན། དགའ་ལྡན་གསེར་ཁྲིར་བདག་པོ་མེད། ཟེར་བའི་འཛམ་བུ་གླིང་དུ་ངོམ་རི་བའི་སྐད་ཆ་འདི་ལའང་སྣོན་ཤུགས་སྤྲད་དེ། ངེས་པ་དོན་གྱི་མཁས་དབང་འཁྲུངས་པའི་བཀག་རྡོ་རུ་འགྱུར་ལ། བྱུས་ངན་འདི་དག་ལ་བསམ་ནས། རས་ཆུང་བས་མི་ལ་རས་པར། རྗེ་བཙུན་རྡོ་རྗེ་འཆང་ངམ། བྱང་སེམས་གང་གི་སྤྲུལ་བ་ལགས་ཞུས་པའི་ལན་དུ། སྤྲུལ་བ་ཡིན་སྙམ་པ་དེ་ཁྱེད་རང་རྣམས་ཀྱིས་ང་ལ་དག་སྣང་ཡིན། ཆོས་ལ་ལོག་ལྟ་དེ་བས་ཆེ་བ་མི་འོང་། ཆོས་རྣམ་དག་བྱེད་པའི་ཆེ་བ་མ་མཐོང་བས་ལན། གསང་སྔགས་ཀྱི་ཉེ་ལམ་ལ་ཡིད་མ་ཆེས་པའི་རྟགས་ཡིན། ངས་ལྟོ་གོས་གཏམ་གསུམ་ལ་གྱོང་བཏང་། སེམས་ལ་དཔའ་བསྐྱེད། ལུས་ལ་བབ་བསྐུར། སྡུག་བསྔལ་ཁྱད་དུ་བསད་ནས་མི་མེད་ཀྱི་རི་ལ་བསྒོམས་པས་ཉམས་རྟོགས་ཀྱི་ཡོན་ཏན་སྐྱེས་པ་ཡིན། ཞེས་ཡིན་ལུགས་ཀྱི་གཏམ་བྱུང་བ་འདིར་བསམ་ཤེས་པ་ཞིག་གིས་བསམ་ན་གོ་རྒྱུ་ཆེན་པོ་ཡོད་པ་དང་། རྒྱལ་དབང་ལྔ་བས་ཀྱང་། ཚེ་འདིར་སྦྱངས་ཤིང་ཤེས་ལ་ཐ་མལ་ཟེར། །ཐོས་བྲལ་མ་བསླབས་སྐྱེས་བུ་དམ་པར་བལྟ། །གསེར་དང་སྣག་ཚ་བསྲེས་པའི་རྒྱལ་ཁམས་འདི། །ཡུལ་དབུས་ཟེར་ཡང་ཀླ་ཀློའི་གྲོང་ཁྱེར་འདྲ། །ཞེས་གསུངས་སོ། །
ཁྱད་པར་དུ། རྒྱལ་དབང་ལྔ་བར་མཚོན་ནའང་། རང་གིས་ཤ་རུས་རྡོ་ཐུག་གི་སྦྱངས་བརྩོན་ལ་བརྟེན་ཏེ་མཁས་པའི་ཁྲི་འཕང་དུ་བསྙེགས་པ་ལས། རྒྱལ་དབང་བཞི་བའི་ཡང་སྤྲུལ་དང་བག་ཆགས་ཀུན་སད་ཞིག་གི་སྟེང་ནས་སྐྱེས་ཆེན་དམ་པར་གྱུར་བ་ཞལ་གྱིས་མི་འཆེས་ཏེ། ཁོང་གི་ཞལ་ལས། མི་ཚོས་ང་ཏཱ་ལའི་བླ་མ་བཞི་བའི་ཡང་སྲིད་ཡིན་པར་ཤོད་ཀྱི་ཡོད་པ་དང་། ཡིན་ལུགས་ཡིན་སྟངས་ཀྱི་རྒྱུ་མཚན་ནི། ང་སྐྱེས་པའི་སྐབས་སུ་ཁྱིམ་གྱི་ཀ་བའི་སྒང་ནས་འོ་མ་བབས་པ་རེད་ཟེར་བ། སྐུ་ཕྲེང་བཞི་བའི་སྐུ་ཆས་རྣམས་ངས་ངོས་འཛིན་བྱས་པ་རེད། ཟེར་བ་སོགས་བཤད་ཀྱི་ཡོད་ནའང་དེ་འདྲ་བྱས་པ་ང་རང་གིས་དྲན་གསོས་ཀྱི་མི་འདུག ངས་སྐྱེ་བ་སྔོན་མའི་མི་ངོ་ཤེས་རྒྱུ་དང་སྐྱེ་བ་སྔོན་མའི་ཅ་ལག་ངོ་ཤེས་རྒྱུ་ལྟ་ཅི། ལོ་བཅུ་དྲུག་ཙམ་ལ་མ་སླེབས་པར་ཡོན་ཏན་ཡང་དགེ་རྒན་གྱིས་ཉེས་རྡུང་དང་གཤེ་གཤེ་འོག་ཏུ་བསླབས་པར་བརྟེན། མ་བསླབ་པར་ཤེས་རྒྱུ་ཕར་བཞག བསླབས་པ་དེ་ཡང་ཡག་པོ་ཤེས་ཀྱི་མི་འདུག་པས་ཐམས་ཅད་མཁྱེན་པའི་ཡང་སྲིད་དེ་བས་ཀྱང་གང་ནས་ཡིན། སྐྱེ་བ་སྔོན་མའི་མི་དང་ཅ་ལག་ངོ་ཤེས་པ་ལ་བསླབས་པའི་ཡོན་ཏན་དེ་མ་ཤེས་པ་རྩ་བ་ནས་ཡོང་མི་སྲིད་ཅིང་། མ་བསླབས་པ་དེ་ཤེས་རྒྱུ་ཡོད་དུས་བསླབས་པ་དེ་དེ་བས་ཀྱང་ཤེས་པ་ཞིག་དགོས་ཀྱི་རེད། འོན་ཀྱང་བསླབས་པ་དེ་དཀའ་ལས་ག་ཚོད་བརྒྱབ་ནའང་ཤེས་ཀྱི་མི་འདུག་ལ། སང་ཉིན་དེ་ལྟར་ཤོད་ཨང་ཞེས་བསླབ་དགོས་ཀྱི་ཡོད། ཡིན་ནའང་ང་དགོས་པའི་དབང་གིས་ཁྲིའི་སྒང་དུ་བསྐྱལ་བ་རེད་ལ། ངས་ཀྱང་མ་ཡིན་ཡིན་མདོག་མ་བྱས་ཀ་མེད་རེད། ཅེས་དང་། ང་སྐྱེས་པའི་སྐབས་སུ་ཆར་བབས་པ་དང་། མེ་ཏོག་ཤར་བ། འཇའ་ཟུག་པ་སོགས་ཀྱི་ཤོད་ཚུལ་དེ་དག་རྒྱུ་མཚན་དུ་བྱས་ནས། རྒྱལ་བ་སྐུ་ཕྲེང་བཞི་བའི་ཡང་སྲིད་དུ་ངོས་འཛིན་བྱས་ཚེ་གཏན་ནས་འགྲིག་ཐབས་མེད། དེ་གང་ཡིན་ཞེ་ན། ང་དང་དུས་མཚུངས་སུ་སྐྱེས་པའི་འབུ་གྲོག་མ་དང་སྦྲང་བུ་དེ་ཚོ་ཡང་ཚང་མ་སངས་རྒྱས་དང་བྱང་ཆུབ་སེམས་དཔའ་ཞེད་པོ་དེ་འདྲས་ཀྱི་སྐུ་སྐྱེ་ཡིན་ཤོས་ཆེ་བའི་དེ་ལྟར་རྩ་བ་ནས་ཡོང་སྲིད་ཀྱི་མ་རེད། ཅེས་ཁོང་གི་རང་རྣམ་གྱི་མགོ་མཇུག་བར་གསུམ་དུ་དོན་དངོས་ལ་གཞོལ་བའི་དྲང་གཏམ་བརྗོད་པ་ལས་ཐམས་ཅད་མཁྱེན་པ་ཡིན་ཚུལ་དང་། སངས་རྒྱས་བྱང་སེམས་ཀྱི་ཡང་སྲིད་ཡིན་ཚུལ་གྱི་འུད་བསྟོད་གཏན་ནས་གནང་མེད། དེར་མ་ཟད་ད་དུང་ཁོང་གིས། དེང་སང་སོག་པོའི་དཔོན་པོ་རྒྱུ་ཆེ་བ་དང་བོད་ཀྱི་སྐུ་དྲག་རྒྱུ་ཆེ་བ་དེ་ཚོའི་ཕྲུ་གུ་མང་ཆེ་བ་བླ་མའི་ཡང་སྲིད་ཡིན་དགོས་པ་དེ་ཚོ་ཡ་མཚན་ཞིག་མ་ཡིན་ནམ། ཞེས་གསུངས་གནང་མཛད་པ་ལ་བསམ་བློ་གཏིང་ཟབ་གཏོང་རྒྱུ་ཡོད་དོ། །
ཁྱད་པར་དུ། དཀོར་གཟན་དག་ཧ་ཅང་བཀུར་ཆེ་ན། ཕྱི་གླིང་བའི་བསམ་བློ་བ་སྐོར་ཞིག་གིས། ངོ་མཚར་བ་ཞིག་ལ། ཤེས་བཞིན་དུ་བོད་འདིརམཁས་པ་བརྒྱ་ཡིས་བླུན་པོ་གཅིག་གི་ཁ་ལ་ཉན་དགོསཞེས་པ་དེའི་སྡོམ་ཚིག་དེ་ཇེ་དམ་དུ་བཏང་བ་ལས་འོས་མེད་དོ། །དེ་བས་ཇོ་བོ་རྗེས། བྱམས་པ་དང་སྙིང་རྗེ་སྦྱོང་མི་ཤེས་པའི་བྱང་ཆུབ་སེམས་དཔའ་བོད་ཀྱིས་ཤེས། ཞེས་ཟུར་ཟ་གནང་བའང་ཐུགས་ཁག་མི་འདུག་ལ། དོན་གྱི་དབང་འདི་གཟིགས་ནས་སྔོན་བྱོན་སྐྱེས་ཆེན་དམ་པ་མང་བོས་ཀྱང་། ལམ་ལུགས་འདི་ལ་དགག་རྒྱག་དང་ཐེར་འདོན་མང་དུ་གནང་ཡོད་དེ། རྒྱལ་དབང་ལྔ་བའི་རང་རྣམ་དུ་ཀུ་ལའི་གོས་བཟང་ལས། བོད་ཡུལ་འདིར་རྒྱ་གར་དང་མི་འདྲ་བའི་བླ་མའི་གདུང་རྒྱུད་ཀྱིས་འཛིན་པ་དང་། སྐྱེ་བས་འཛིན་པ་གཉིས་ཡོད་པ་ལས། དང་བོ་ནི། ས་སྐྱ་ཚང་གི་བདག་ཆེན་རིམ་བྱོན་ལྟར་ལུགས་གཉིས་ཀྱི་ཡོན་ཏན་རྣམས་ཕ་ཤུལ་བུ་འཇགས་ལྟ་བུས་བར་གསེང་མེད་ཅིང་བུ་སློབ་འཁོར་འབངས་རྣམས་བག་ཕེབས་པ་དང་། སྐྱེ་བས་འཛིན་པ་ནི། དེ་ལས་ལྡོག་སྟེ་བླ་མ་གྲོངས་པ་ན་སེམས་ངལ་ཆེ་ཞིང་ཡུལ་གྲུ་ཆེ་གེ་མོ་ན་བྱིས་པ་ལ་ཕ་མ་སོགས་ཀྱིས་གཡོ་སྒྱུས་བཟོས་པ་འདྲ་ལ་ཚམ་ཚོམ་མེད་པར་བདག་ཏུ་བཟུང་བའི་བཞུགས་གྲལ་ཚུད་ངེས་དང་། སྐྱེ་བོ་དུ་མ་རི་བོང་ཅལ་འདྲོགས་ཀྱི་དཔེ་ལ་བརྟེན་ཝ་སྐྱེས་སེང་གེར་བརྫུ་བའི་སྣང་ཚུལ་ཁོ་ནའོ། །ཞེས་དང་། ཡབ་རྗེ་སྐལ་ལྡན་རས་པས་ཀྱང་། བླ་མའི་གཟུགས་ཀྱིས་ཐུབ་བསྟན་ཉམས་བྱེད་པའི། །རྒྱུད་འཛིན་བླ་མ་ཕལ་ཆེར་ལྟས་ངན་ཡིན། །ཞེས་དང་། རྗེ་འཇིགས་མེད་རིགས་པའི་བློ་གྲོས་ཀྱི་རང་རྣམ་ལས་ཀྱང་། དུས་ཆེས་ཆེར་སྙིགས་པ་དང་བསྟུན་སྐུ་སྐྱེ་འཚོལ་བའི་སྲོལ་བཟང་བོ་རྣམས་རིམ་གྱིས་ཉམས་ནས་རང་འདོད་གང་བྱུང་གིས་བླ་རྒན་རེ་གྲོངས་པ་ན་སྤྲུལ་སྐུ་འམ་ཞབས་དྲུང་དང་། སྔགས་རྒན་རེ་གྲོངས་པ་ན་སྐུ་ལོ་འམ་སྐུ་འབའ་ཞེས་གཅེས་མིང་གིས་བཏགས་པ་ཞིག་བཙལ་ནས་འདོན་ཆོག་ཙམ་ལས་ཡོན་ཏན་ཅི་ཡང་མི་སློབ་པར་ཟང་ཟིང་སྡུད་པའི་ཚོང་རྟེན་བྱེད་ཅི་ཐུབ་དང་། བླང་དོར་ལ་རྨོངས་པའི་སྐྱེས་བུ་རྣམས་བསླུ་གང་ཐུབ་བྱེད་པ་ནི་ངེས་པར་བསྟན་པ་ལ་གཅེས་པར་འཛིན་པ་ཞིག་གིས་བལྟས་ན་ཤིན་ཏུ་ཡ་ང་བའི་གནས་སོ། །ཡང་། ཁོང་གིས་བསྟན་འགྲོར་ཕན་པའི་དགོས་གལ་ཆེ་ན། སྐུ་མདའ་ཁར་ཡང་སྤྲུལ་འབྱོན་པའི་སྙན་སྐུལ་གནད་དྲིལ་བ་རེ་ཞུ། དེ་འདྲའི་དགོས་པ་མེད་ན་ཀོར་གཟན་ཇེ་མང་དུ་བཏང་བ་ལས་དགོས་པ་སྤུ་ཙམ་མེད། ཅེས་གསུངས་ལ། ཐ་ན་སྒྲུང་དཔེ་ཚུན་ཆད་ནའང་དགག་རྒྱག་དང་ཐེར་འདོན་བྱས་ཡོད་དེ། བྷེ་གླིང་གཡུལ་འགྱེད་ལས། བླ་ངན་པ་ཞིང་འབྲོག་རུ་སྡེ་ཉུལ། །སེམས་ཆགས་སྡང་གཡོ་སྒྱུའི་འཁོར་ལོ་བསྐོར། །དད་ཟས་ཤི་ཟས་གཤིན་ཟས་ལ། །སྐོམ་པའི་ཆུ་བཞིན་འཐུང་ལ་རྔམ། །སྤང་རྟོགས་ཡོན་ཏན་ཐམས་ཅད་ཀུན། །ཉིན་མོའི་སྐར་མ་བཞིན་དུ་གྱུར། །གྲོགས་སློབ་མ་ན་ཆུང་བུ་མོས་བྱེད། །མིག་སྔར་མཛེས་ཆོས་སྣ་ཚོགས་མངོན། །ཆོས་བཤད་མི་ཤེས་ཤེས་མདོག་བྱེད། །ཆོས་ཤེས་ཀྱང་ཁ་ཁོག་མི་མཚུངས་པས། །འཁོར་འབྲེལ་ཚད་དམྱལ་བའི་གནས་སུ་འཕེན། །དེ་བླ་མ་ངན་པའི་ལོ་རྒྱུས་རེད། །ཅེས་བཤད་པ་ལྟར། ཁ་དཔེར། བ་རྔ་མ་རིང་ན་དཔྱིད་ཀར་སྡུག གྱོད་རྔ་མ་རིང་ན་བུ་ཚར་སྡུག ཅེས་པ་ལྟར། སྐུ་སྐྱེ་ཕལ་མོ་ཆེ་བུ་རབས་ཚ་བརྒྱུད་ལ་སྡུག་གི་ཁུར་བོ་ཞིག་བཀལ་བ་ལས། སོ་སྐྱེས་ས་ལས་འདས་པའི་ཕྱག་རྗེས་བ་སྤུའི་རྩེ་མོ་ཙམ་ཡང་མི་རྙེད་པས། ཤ་ཤི་ཤ་ལ། སྡེར་མ་གསེར་སྡེར་བཞག་པའི་དགོས་པ་མ་མཐོང་སྟེ། མི་ནག་པའི་ཁ་དཔེར། ལུག་མ་བཤའ་ཟེར་ནོ་བླ་མ་རེད། །ཤ་ཚོན་པོ་ཟ་ནོ་བླ་མ་རེད། །ཟེར་བ་ལའང་ཐུགས་ཁག་མེད་དོ། །
ཚུལ་འདི་ལྟ་བུ་ལ་ངེས་ཤེས་རྙེད་ནས། ཨ་རིག་དགེ་བཤེས་ཆེན་མོ་སྐུ་གཤེགས་ཁར། བུ་སློབ་རྣམས་ཀྱིས་སྐུ་སྐྱེ་འཁྲུལ་མེད་ཅིག་འབྱོན་པར་གསོལ་བ་བཏབ་པས། ཞལ་ཆེམས་དུ་ཁོ་ལ་རང་དབང་ཞིག་ཡོད་ན་ཡིད་དགའ་ཆོས་འཛིན་དུ་འགྲོ་བས་སྐུ་སྐྱེ་མེད། གལ་ཏེ་དགོས་ན་བྱིས་པའི་དུས་ནས་ལམ་སྔགས་གཉིས་བློ་ཐོག་ནས་ཤར་མར་འདོན་ཐུབ་པར་མ་ཟད། ཁྱི་གཏུམ་པོས་དེད་ཀྱང་ཁ་ནས་མི་ཆད་པ་ཞིག་རྙེད་ན་ཁོའི་སྐུ་སྐྱེ་ཡིན། ཞེས་དང་། བདག་ཅག་གི་བླ་མ་རྗེ་དགེ་འདུན་བསྟན་འཛིན་འདའ་ཁ་ཡང་། ཁོ་མིག་བཙུམ་རྗེས་སྐུ་གདུང་མཆོད་རྟེན་བཞེངས་པའམ། རྗེས་དྲན་དུས་དེབ་ཕུད་པ། ཁྱད་པར་དུ་སྐུ་སྐྱེ་འཚོལ་བ་སོགས་བྱས་ན་བླ་མ་འགལ་བའི་དམ་ཉམས་ཡིན་ཞེས་སོགས། སྐྱེས་བུ་དམ་པ་མང་བོས་ཀྱང་དེ་ལྟར་མང་དུ་གསུངས་པ་ནི། སྐུ་སྐྱེའི་མིང་བྱང་ལ་བརྟེན་ནས། སྐྱུག་བྲོ་བའི་བྱ་སྤྱོད་ཁོ་ན་འབྱམས་པར་ཡི་ག་གཏིང་ནས་ལོག་པ་མཐོང་ཐུབ་ལ།
དེར་མ་ཟད། སུམ་པ་ཡེ་ཤེས་དཔལ་འབྱོར་གྱི་རང་རྣམ་ལས་ཀྱང་། དེང་དུས་བོད་དང་ཧོར་སོག་གི་ལྗོངས་སུ་ཆོས་སྲིད་ཟུང་གི་ཁྲིམས་གུ་ཡངས་ཤིང་། བདེན་གཏམ་རྡོའི་རི་མོ་ལས་རྫུན་ཆེན་བྱེ་རིར་བྲིས་པའི་རི་མོ་བསྒྲིན་པའི་དུས་སྙིགས་བདོ་བའི་སྐབས་སུ། བོད་དབུས་གཙང་གི་རྒྱལ་བ་ཡབ་སྲས་སོགས་དང་མདོ་ཁམས་རྒྱ་སོག་གི་ལྗོངས་སུ་བཞུགས་པའི་སྐྱེས་བུ་དམ་པ་དངོས་ལས་གཞན་པའི་བླ་ཆེན་མངོན་ཤེས་ཅན་སྐད་རང་དེར་རློམ་བླ་གཟུགས་དྲེགས་པ་ཅན་དང་ཆོས་སྐྱོང་ཁོག་ཞུགས་ཟེར་བ་ལ་ལས་ངོས་ལའང་ལུང་རྫུན་སྒྱུ་མའི་རྡོའི་སྟག་སེང་དུ་བསྒྱུར་བ་མཆིས་པ་མང་ཞིག་རྣ་བའི་བུ་གུར་ཞུགས་ཙམ་ལ་བརྟེན་ནས་རང་ཉིད་ཟོག་པོར་གཏོང་བའི་རློམ་སེམས་ད་ལྟའི་ཁ་ཅིག་ལ་བལྟས་ན་བྱས་ཆོག་ཚོད་དུ་གདའ་ཡང་། ཚེ་ཕྱི་མ་ཡོད་ངེས་དང་ལས་འབྲས་མི་བསླུ་བའི་ངེས་ཤེས་འདྲོངས་པ་སྔ་མོ་ནས་ཡོངས་འཛིན་དག་གི་དྲིན་ལས་རྙེད་པས་དེ་འདྲ་རྨི་ལམ་དུའང་རྣམ་རྟོག་ཟའོ། །ཞེས་གསུངས་པ་ལས་སྐུ་སྐྱེའི་ལམ་ལུགས་དང། ཁོང་ཉིད་སུམ་པ་ཞབས་དྲུང་བློ་བཟང་བསྟན་པའི་རྒྱལ་མཚན་གྱི་སྐུ་སྐྱེ་ངོས་འཛིན་པ་པོ་དང་། རང་ཉིད་དེ་ཡིན་མིན་གྱི་ཤན་འབྱེད་གསལ་བོར་གནང་སྟེ། བརྗོད་འདོད་པའི་སྙིང་གི་ན་ཟུག་དེ་གསལ་རྗེན་དུ་བསྟན་ཡོད་དོ། །
དེ་དང་མཐུན་པར་པཎ་ཆེན་སྐུ་ཕྲེང་བཅུ་བས། མཆོད་ཁང་ཤར་བཀྲ་ཤིས་རྣམ་རྒྱལ་གསར་བཞེངས་ཀྱི་མཛད་སྒོར། གསུང་བཤད་སྒྲ་ཐག་ཏུ་ཕབ་པ་ལས། སྤྲུལ་སྐུ་ངོས་འཛིན་ཞུ་མཁན་མང་ཆེ་བས་སྤྲུལ་སྐུ་འཁྲུལ་བ་མེད་པ་ཞིག་ཡོང་བ་ཞེས་ཞུ་གི་ཡོད། དེ་ནི་སྐུ་ཐོག་གོང་མའི་རྣམ་ཤེས་ཞུགས་པའི་འཁྲུལ་བ་མེད་པ་ཞིག་ཟེར་བ་འདི་རེད། སྔོན་ཆད་སྐུ་འབུམ་ལ་སྤ་ཕྲུག་ཅེས་པ་ཞིག་གིས། པཎ་ཆེན་གོང་མར་སྤྲུལ་སྐུ་འཁྲུལ་བ་མེད་པ་ཞིག་ངོས་འཛིན་གནང་རོགས་ཞུས་པར། དེའི་ལན་དུ་སྤྲུལ་སྐུ་འཁྲུལ་བ་མེད་པ་ལས་བསྟན་པ་དང་དགོན་པར་ཕན་ཐོགས་པ་ཞིག་བྱུང་ན་དགའ་བ་མེད་དམ། ཞེས་བཀའ་གནང་བ་རེད། མི་དེས་ཕན་ཐོགས་རུང་མི་ཐོགས་རུང་སྤྲུལ་སྐུ་འཁྲུལ་བ་མེད་པ་ཞིག་དགོས་ཞེས་ཞུས་པས། འཁྲུལ་བ་མེད་པ་འདི་ཡིན་ཞེས་བསྟན་པ་དེ་ནི་གཟའ་རོ་ཞིག་ཡོད་འདུག གསུངས་པ་ལྟར་རོ། །
ཁྱད་པར་དུ། སྙིགས་དུས་ཀྱི་རང་མཚང་ཀློང་དུ་བརྡོལ་བའི་སྐབས་འདིར། རྒྱལ་དབང་ལྔ་བས། འཇིག་རྟེན་སུ་མཁས་བསྟན་འཛིན་སྐྱེས་བུར་འཇོག །ཅེས་པ་ལྟར་སྣང་ཡང་། དོན་དུ་ན། རང་གི་ལམ་མགོ་གྲོག་པོ་ཕུ་རྡུགས་ལས་ཐུ་ཞིང་། དུང་ཕྱུར་བཅོ་བརྒྱད་ཀྱི་ཤི་སྣ་འདྲེན་པར་རློམ་ཞིང་། བླུན་རྨོངས་ཁྲི་མ་འབུམ་གྱི་འཁོར་ཚོགས་བསྡུས་ཏེ་ཁྱིམ་པ་ཕོ་མོ་ལ་འཕྲོད་པའི་སྨྲ་ལྕེ་བདེ་ལ། ཆོས་གཞུང་རྣལ་མ་འཆད་པ་ལ་སྨྲ་བ་དམ་གྱིས་བརྒྱབ་པའི་སྐུ་སྐྱེ་མང་ཞིག་ཐུབ་བསྟན་གྱི་གཤེད་དུ་བབ་པར་སྣང་སྟེ། རྒྱལ་དབང་ལྔ་བས། མི་ཤེས་གདོལ་བའི་ཕྲུ་གུ་དར་ཟབ་གྱིས། །ཕང་ཕུང་མཛེས་པར་བྱས་ཏེ་མཐོན་པོའི་ཁྲིར། །བླུན་པོའི་འཁོར་ཚོགས་དབུས་ན་འགྱིང་བ་ཡི། །བ་མོས་ཐུབ་བསྟན་པད་ཚལ་བཅོམ་གྱིས་དོགས། །ཆོས་སྤྱོད་བཅུ་ཡི་སྒྲུབ་པ་རྒྱབ་བོར་ནས། །ཁ་དྲག་དཔུང་དང་རྒྱུ་ནོར་གཡོ་ཁྲམ་གྱིས། །འགྲོ་བའི་ཕན་བདེ་སྒྲུབ་པར་རློམ་བྱེད་ན། །ཀུན་མཁྱེན་ཤཱཀྱའི་གཙོ་དེ་འཁྲུལ་བར་ངེས། །ཞེས་དང་། ཡབ་རྗེ་བླ་མས། གཏམ་ཧ་ཅང་མང་བའི་མཆེད་གྲོགས་དང་། །རྒྱུད་ཆགས་སྡང་སྐྱེད་པའི་འཁོར་གཡོག་དང་། །ལམ་ལོག་པར་སྟོན་པའི་བླ་མ་གསུམ། །འདི་ཐར་བའི་སྲོག་འཕྲོག་བདུད་པོ་ཡིན། །ཞེས་ལན་གྲངས་དུ་མར་ངན་གཡོ་དམར་རྗེན་དུ་བཏོན་ཏེ། སུན་འབྱིན་གནང་ཡོད་པར་མ་ཟད། ཁོང་བྱ་བཏང་རི་ཁྲོད་དུ་ཕེབས་པའང་བླ་ཆེན་ཁུར་བཞེས་ལ་མི་སྤྲོ་བ་ནི། གསུང་མགུར་ལས། ཨ་ལ་ལ་རྒྱལ་ཁམས་འགྲིམས་པའི་བན་རྒན་ང་ནི། །བླ་ཆེན་ཁུར་དེ་དུས་ལ་བབ་ཀྱང་། །ཁུར་དེ་མ་བཟུང་བྱ་བཏང་ཚུགས་བཟུང་། །རང་ཚུགས་འདི་ཡང་ཆོས་དང་མཐུན་བྱུང་། །ཞེས་སོ། །
གཞན་ཡང་། ཟོག་རྫོབ་ཆེ་བའི་སྐུ་སྐྱེ་དེ་རྣམས། སྐྱེས་བུ་དམ་པ་ཚོས་སྙིང་རྗེའི་ཡུལ་དུ་བཞག་ཡོད་དེ། ལྕང་སྐྱ་རོལ་བའི་རྡོ་རྗེས། བྱིས་པའི་དུས་ནས་ཐོས་བསམ་ལོང་མེད་པར། །དར་གོས་ཀྱིས་བཀླུབས་ཚོང་ཟོང་བཞིན་དུ་འགྲིམས། །དད་གཤིན་དཀོར་གྱི་ཟས་ལ་བག་མེད་སྤྱོད། །གནས་བརྟན་དགེ་འདུན་ཕྱག་དང་བསྙེན་བཀུར་ལེན། །ལྔ་བདོའི་སྐུ་སྐྱེ་རྣམས་ལ་ཐུགས་རྗེས་གཟིགས། །ཞེས་སོགས་མང་དུ་གསུངས་ཡོད་ལ། སྐུ་སྐྱེའི་གང་ཡིན་ཡང་ཐོག་མའི་མ་ཁུངས་དེ་ངེས་པ་དོན་གྱི་མཁས་གྲུབ་གཉིས་ལྡན་ཞིག་ཡིན་ནའང་། ཕུར་ལྕོག་བྱམས་པས་དུས་ངན་གྱི་སྐུ་སྐྱེ་ཚོ་སྐྱེས་པ་རེ་བླངས་ཀྱིན་ཇེ་ངན་ཇེ་ངན་དུ་འགྲོ་ཞེས་འཁོར་རྣམས་ལ་བཀའ་བཀྱོན་གནང་བ་དང་། དཔལ་སྒང་ལོ་ཙཱ་བས། ཞག་རེ་སོང་གིན་ནང་སྐྱོན་ཕྱི་ནས་རིག །ཅེས་པ་ལྟར། དེ་ནི་ཟས་མི་ལག་བརྒྱུད་ན་ཇེ་ཆུང་ཞེས་པའི་ཁ་དཔེ་ལས་མ་འདས་སོ། །
གཞན་ཡང་། སྐུ་སྐྱེ་ཕལ་མོ་ཆེས་སློབ་གཉེར་དང་གྲྭ་ས་ལིངས་ཀྱིས་བོར། ནག་ཆང་དུ་གསུམ་མདུན་དུ་བསུས། ཆུང་དུས་ནས་གཞན་སེམས་བསླུ་བའི་རིག་པ་སྦྱངས་ཏེ། ཕྱག་ཏུ་འཛིན་རྒྱུའི་དཔེ་ཆ་མི་འཛིན་པར། མི་འཛིན་རྒྱུའི་ཕྲེང་གོག་དང་མོ་རྡེའུ་བཟུང་ནས། ད་དུང་། ཕྱག་མོ་དང་ལུང་བསྟན་གཙིགས་པ་ཞེས་མིང་བྱང་གི་རླུང་རྟ་མངོན་ལྐོག་གང་རུང་དུ་སྤུར་ཏེ། བླུན་རྨོངས་མང་བོ་བཀུག་ནས་ཡ་གིའི་ལྷ་དེ་འཁྲུགས་རབས་དང་། བར་གྱི་བཙན་དེས་ཐེབས་རབས། མ་གིའི་གདོན་དེས་གནོད་རབས་སོགས་རྣམ་རྟོག་གི་དྲ་རྒྱ་བསླེས་སྟེ། ཡོད་ཚད་རྫས་སུ་ཕུད། རིག་ཚད་ནོམ་དུ་འཁྱེར་ཏེ། བྱིས་པའི་མདུན་ལམ། ནད་པའི་བདེ་སྡུག དཔལ་འབྱོར་གྱི་ཡོང་འབབ། མདོར་ན་འབྱུང་འགྱུར་གྱི་ལེགས་ཉེས་ཐམས་ཅད་མོ་ཁ་ནས་ཤན་འབྱེད་གནང་བ་ནི། ཡབ་རྗེ་བླ་མས། མིག་ཟུམ་ཟུམ་གིས་མི་མགོ་བསྐོར་མཁན་མང་། །ཞེས་པ་ལས་མ་འདས་ལ། གལ་ཏེ་ཁྱི་རྒན་ལྡོམ་ནས་འགྲོ་བ་དང། རྩམ་ལོག་ཐུར་དུ་སྒྲིལ་བ་ལྟ་བུ་རེ་གཉིས་སྲིད་ནའང། ས་སྐྱ་ལེགས་བཤད་ལས། མ་དཔྱད་པ་ལས་དོན་འགྲུབ་པ། །བྱུང་ཡང་མཛངས་པར་སུ་ཞིག་བརྩི། །སྲིན་འབུ་དག་གིས་ཟོས་པའི་རྗེས། །ཡི་གེར་བྱུང་ཡང་ཡིག་མཁན་མིན། །ཞེས་པའི་ངང་ཚུལ་ལོ། །
སྟོན་པ་ཞལ་བཞུགས་ཚེ་སུ་དང་གང་གིས་བདེ་སྡུག་ཞུས་ན། ལས་འབྲས་ཀྱི་སྟེང་ནས་རྩིས་སྤྲོད་གནང་སྟེ་སྡིག་སྤོང་དགེ་སྒྲིབ་ལ་གདམས་པ་ལས། ཕྲེང་གོག་གཅོད་པ་དང་མོ་རྡེའུ་འཕངས་ཏེ་ལུང་བསྟན་འབེབས་པ་མདོ་རྒྱུད་གང་དུའང་ཚིག་ཟུར་ཙམ་ཡང་མི་སྣང་ངོ་། །རྗེས་འཇུག་བུ་སློབ་རྣམས་ལ་མཚོན་ནའང་། རྒྱ་གར་དུ་གྲུབ་ཆེན་བརྒྱད་ཅུ་དང་རྒྱན་དྲུག་མཆོག་གཉིས། བོད་དུ་ས་དགེ་ཀར་སྙིང་གསུམ་གྱི་མཁས་པ་སྔ་མ་དག་གི་རྣམ་ཐར་ལ་མཇོལ་དང་། ཕྲེང་གོག་དང་མོ་རྡེའུ་འཕངས་ཏེ་འགྲོ་དོན་བསྐྱངས་མ་བསྐྱངས་གསལ་བར་འགྱུར་རོ། །ཁྱད་པར་ཆོས་ཀྱི་འབྱུང་ཁུངས་སངས་རྒྱས་ནས་རྒྱ་བལ་བོད་གསུམ་དུ་ཀརྨ་བའི་ཡན་ཆད་དུ་སངས་རྒྱས་བྱང་སེམས་ཀྱི་སྐུའི་ཕྲེང་བ་ཇི་སྙེད་ཅིག་གིས་འགྲོ་དོན་རླབས་པོ་ཆེ་མང་དུ་བསྐྱངས་ཀྱང་། སྐུ་སྐྱེ་ཞབས་དྲུང་གི་མིང་བྱང་འདིའི་སྟེང་ནས་རྒྱལ་བསྟན་རྒྱས་པར་མ་མཛད་པ་སུམ་པས་རང་རྣམ་ལས་གསུངས་ཡོད་པས་དེ་བལྟ་བར་བྱའོ། །ཚུལ་འདི་ལ་དགོངས་ནས་རང་རྣམ་དེ་ལས། སྐུ་ནར་སོན་པ་ནས་ཚེ་ཧྲིལ་བོར་སྒྲུབ་པ་སྙིང་བོར་བྱས་པའི་སྤོང་བ་བ་རྗེ་བཙུན་མི་ལ་གཉིས་པར་གྱུར་འདྲའི་སྐུ་ཆས་སྲབ་པ་ཕལ་ཆེར་ལ་སྐུ་སྐྱེས་བྱོན་པ་དཀོན་པར་སྣང་། ཞེས་གསུངས་ཡོད་དོ། །
ཕལ་བའི་ཡིད་སྨོན་ཅན་གྱི་སྐུ་སྐྱེ་དེ་ཚོ། ར་ཡི་རིལ་མ་ལ། ལུག་གིས་ངོ་སོ་བསྟོད་པའི་དཔེ་བཞིན། ཕལ་བས་སྨོན་ཡུལ་དུ་གྱུར་ན་མ་གཏོགས། མཁས་པ་མགུ་བའི་ལས་སུ་མི་འགྱུར་སྟེ། ཡོངས་འཛིན་བློ་བཟང་དཔལ་ལྡན་གྱིས། གཞན་དུ་མི་རྟག་སྲིད་འབྱོར་སྒྱུ་མའི་རྫས། །སྡུད་སླད་ཆིབས་ཀྱི་གོམ་འགྲོས་རླུང་ལས་ཀྱང་། །མགྱོགས་པའི་རྣམ་ཐར་ཕལ་གྱིས་ཡིད་སྨོན་ཅན། །བསྐྱངས་པས་བསྟན་འགྲོར་སྨན་པ་མཆིས་སོ་ལོ། །ཞེས་དང་། མི་ལ་བཞད་པའི་རྡོ་རྗེ་ཡང་སྐྱིད་ཕུག་ཉི་མ་རྫོང་དུ་བཞུགས་སྐབས། པེ་ཏས་རྗེས་གཅོད་ཅིང་ཕྱིན་པའི་ལམ་བར་དུ། དིང་རི་ན་བླ་མ་བ་རི་ལོ་ཙཱ་བ་ཁྲི་བརྩིགས། གདུགས་ཕུབ། དར་ཟབ་ཀྱི་ན་བཟའ་གསོལ། དུང་ཁ་སྦྱོར་དུ་བུས། གྲྭ་བུ་སློབ་མང་བོས་བསྐོར། འབུལ་མི་བསམ་གྱིས་མི་ཁྱབ་པ་འོང་། ཇ་ཆང་བཟང་བོ་འདྲེན་པ་པེ་ཏས་མཐོང་སྟེ། མི་ལར་ཁྱེད་རང་བླ་མ་དེ་གའི་ཕྱག་ཕྱིའི་གྲྭ་བ་ཞན་ཤོས་ཤིག་འཐོབ་རུང་སྐྱིད་པོ་འོང་ལུགས་ཞུས་པས། མི་ལའི་ཞལ་ལས། བསྒྲུབས་ན་བ་རི་ལོ་ཙཱ་བ་ལྟ་བུ་ཁོ་རང་ཡང་འོང་ཡང་། ཚེ་འདིར་སངས་རྒྱས་ཐོབ་པར་འདོད་ནས་སྒྲུབ་པ་ལ་ནན་ཏན་དང་བརྩོན་འགྲུས་བྱས་པ་ཡིན། ཞེས་པའི་ཚིག་དུམ་འདིས་བསྟན་པ་ལ་ཤ་ཞེན་ཆེ་བའི་སྐྱེས་བུ་དམ་པ་ཞིག་གི་བསམ་བློ་མཐོང་ཐུབ་ལ། གུང་ཐང་བསྟན་པའི་སྒྲོན་མེས་ཀྱང་། གཡོ་སྒྱུ་ཁྲམ་གསུམ་ལྡན་པའི་སྐུ་སྐྱེ་དེ་ཚོ་ལྷ་བཟོ་ཀུན་དགའི་ངན་ཇུས་དང་སྦྱར་ཏེ། ནམ་ཞིག་གི་ཚེ་ཤིང་བཟོ་ཀུན་དགའི་སྤྱང་གྲུང་ལྡན་པའི་བློ་རིག་གིས་ལྷ་བཟོ་ཀུན་དགའི་རྫུན་རྐུབ་བརྟོལ་བའི་དཔེ་དང་སྦྱར་ཏེ། ད་ལྟའི་སྐུ་སྐྱེ་ཚོ་དགག་རྒྱག་དང་ཐེར་འདོན་བྱས་ཡོད་དོ། །
དེར་མ་ཟད། སུམ་པའི་རང་རྣམ་ལས། ལ་ལའི་གྲྭ་སློབ་སོགས་ཀྱིས་སྔོན་བྱོན་རྒྱ་བོད་ཀྱི་མཁས་གྲུབ་ས་ལམ་མཐོན་པོར་སོན་པ་འགའ་ཞིག་ལུ་གུ་རྒྱུད་དུ་བྱོན་པའི་སྐུ་ཚེའི་ཕྲེང་བ་བསྒྲིགས་ནས་དེ་ལ་སྦྱོར་ཞིང་། ཞབས་དྲུང་དེས་ཀྱང་དེ་དང་དེ་ཡིན་པར་རློམ་སྟེ་ཞལ་བཞེས་གནང་ནའང་། གསུངས་པ་ལྟར། བླ་བརྒྱུད་གསོལ་འདེབས་སངས་རྒྱས་ཀྱི་གཡས་གཡོན་ལ་གཏུགས་པ་ནི། གལ་སྲིད་ཡིན་ན་ནི་ཤིན་ཏུ་ལེགས་མོད་ཀྱང་། ཉེས་ན་ནི་ཚུལ་ཁྲིམས་སྡོམ་ལྡན་ཞིག་ཡིན་ན་ནི་ཉམས་རྒྱུར་འགྱུར་ཉེན་དང་། མི་ཆོས་བླ་མའི་རྫུན་སོགས་ཀྱི་ཉེས་པ་བརྒྱ་ཕྲག་གི་རྫོང་འདེབས་དང་བཅས་དམྱལ་བའི་གཏིང་རྡོ་འཕེན་པའི་ལས་ཁོ་ནའོ། །གསུངས་ལ།
དེ་ལས་གཞན། རྗེ་འཇིགས་མེད་རིགས་པའི་བློ་གྲོས་ཀྱིས། སློབ་རྒྱུའི་ཡོན་ཏན་མི་སློབ་པར། མི་སློབ་རྒྱུའི་ངན་གཡོ་བསླབས་ནས་སྐྱེ་བོ་ཐ་མལ་བ་སླུ་ཐུབ་པ་ན་བུ་སྐྱེས་སོང་སྙམ་པ་ནི་བདུད་ཀྱི་ཆོ་འཕྲུལ་ཡིན་ནོ། །ཞེས་པ་ལྟར། སྙིགས་མའི་རང་མཚང་ཀློང་དུ་བརྡོལ་བའི་དུས་ཀྱི་མར་གཤམ་འདིར། ལུང་རྟོགས་ཀྱི་བསྟན་པ་རྒྱབ་ཏུ་བོར་ནས། སྐུ་སྐྱེའི་མིང་བྱང་རྫིག་པོ་ཆེ་དེ་རུམ་དུ་བསྲེལ་ཏེ། ལས་སུ་ཆོས་བྱས་ཀྱང་། སངས་རྒྱས་དགྲར་ལངས་པ་དེ་དག་གིས། མངོན་ལྐོག་གང་རུང་དུ་ཟང་ཟིང་སྡུད་པའི་ཐབས་སུ་རང་གི་ཆེ་བ་བརྗོད་པ་ནི། ཇི་སྐད་དུ། གནས་ངེས་པ་རྒྱ་ནང་སོགས་གང་ན་སྟོབས་འབྱོར་ཆེ་སར་བཞུགས་པ། སྐུ་ངེས་པ་ལུས་མཚག་རྒྱས་ཤིང་རྒྱགས་པ་ཤ་སྟག་ཏུ་ཆགས་པ། འཁོར་ངེས་པ་རྒྱ་དང་རྒྱ་མོས་བསྐོར་བ། ཆོས་ངེས་པ་བླུན་རྨོངས་འབྱོར་ལྡན་གྱི་རྣ་བར་གང་འཕྲོད་དུ་གསུངས་པར་མཁས་པ། དུས་ངེས་པ་སྔ་མའི་རྣམ་སྨིན་གྱི་འཕེན་པ་མ་རྫོགས་བར་དུ་བཞུགས་པ། ཞེས་པའི་ཆོ་ལོ་འདི་མི་འདོད་བཞིན་དུ་ཞལ་གྱིས་བཞེས་དགོས་པ་ཆོས་ཉིད་དུ་གྲུབ་པར་མ་ཟད། བྱི་ལ་དགེ་བསྙེན་གྱི་གཏམ་རྒྱུད་བསྐྱངས་ཏེ། ཙི་གུའི་དཔོན་པོ་ཇེ་ཚོ། ཙི་གུའི་འཁོར་ཚོགས་ཇེ་ཉུང་གིས་བསྟན་པ་བསྐྱངས་པ་དེ་ཡང་། ད་དུང་ཕོ་རྒོད་དུ་རློམ་ན། གུང་ཐང་གིས། ཆོས་སྲིད་ཇི་འདྲ་ཞིག་བྱེད་ཀྱང་། །ངོ་ཚ་ཁྲེལ་ཡོད་འདི་གལ་ཆེ། །ཁྲེལ་མེད་ཕོ་རྒོད་དུ་རློམ་ན། །ནམ་ཕུགས་རྒྱལ་ཁམས་ལ་བསྟན་ཡོང་། །ཞེས་པ་ལྟར། ད་དུང་མིག་བཙུམ་མ་ཐག་ཏུ་རྣམ་སྨིན་ཇི་ལྟར་འབྱུང་བ་འདིར་དཔེ་མཚོན་འགའ་དྲངས་ན། ལམ་རིམ་རྣམ་གྲོལ་ལག་བཅངས་ལས།
འགྲོ་མགོན་གླིང་རྗེ་རས་པས་ཡར་འབྲོག་གི་མཚོ་ནང་དུ་གཟིགས་ནས་བཤུམས་ཏེ། ཨ་ཁ་ཁ། དཀོར་མ་ཟ། དཀོར་མ་ཟ་གསུངས། ཅི་ལགས་ཞུས་པས། མཚོ་ནང་འདིར་བླ་མ་བླ་དཀོར་ཟན་པ་ཞིག་ཉ་ཤིན་ཏུ་ཆེ་བ་ཡར་འབྲོག་མཚོ་ལ་ཕྱེད་ཙམ་འཁོར་བ་སྲོག་ཆགས་མང་བོས་ཟ་བ་ཞིག་ཏུ་སྐྱེས་འདུག་གསུངས། འོ་ན་དེ་སྟོན་པར་ཞུས་པས། རྫུ་འཕྲུལ་གྱིས་སྐད་ཅིག་ལ་མཚོ་དེ་བསྐམས་ཙ་ན། འདི་ནི་ངག་ནུས་བྱིན་རླབས་ཤིན་ཏུ་ཆེ་ཞིང་། འདྲེ་གདོན་ལ་ལྟ་སྟངས་ཙམ་གྱིས་བསྐྲོད་པ། ཕཊ་ཤར་རེ་བརྒྱབ་ནའང་རྟ་ཟོག་མང་བོ་བླངས་འགྲོ་བ། དབུས་གཙང་རུ་བཞིའི་མཆོད་གནས་སུ་གྱུར་བ། གཙང་བླ་རྟ་ནག་ཅན་གྱི་སྐྱེ་བ་ཡིན་གསུངས་པ་ལྟ་བུ་དང་།
ཡང་། གྲུབ་ཆེན་ཐང་སྟོང་རྒྱལ་བོས་ཕ་བོང་ཞིག་གི་སྟེང་དུ་རྩ་རླུང་འཕྲུལ་འཁོར་མཛད་པས། ཕ་བོང་དེ་ཕྱེད་ཚལ་དུ་གས་པའི་ནང་ནས་སྦལ་བ་ཆེན་པོ་ཞིག་གི་ལུས་ལ་སྲོག་ཆགས་གྲངས་མེད་འབྱར་ནས་ཤ་ཟ་ཁྲག་འཐུང་བྱས་པས། སྦལ་བ་དེ་ཁ་ནག་དེང་དེང་འདུག་པ་ཅི་ལགས་ཞུས་པས། འདི་དམར་ཆོག་བྱེད་པའི་བླ་མ་ཞིག་གི་སྐྱེ་བ་ཡིན་གསུངས་པ་དང་།
ཡང་། སྡེ་དགེའི་བླ་མ་ཞིག་གིས་ཉེ་གནས་ལ་དེ་རིང་ཆུས་འཁྱེར་བ་ཅི་བྱུང་ཡང་ཚུར་བཏོན་ལ་འཁྱེར་ཤོག་གསུངས་པ། ཤིང་སྡོང་ཞིག་བྱུང་སྟེ་ཁོག་པ་གཤགས་པ་ན། དེའི་ནང་དུ་སྦལ་བ་ཆེ་བ་ཞིག་ལ་ཆུང་བ་མང་བོས་ཟ་བ་ཞིག་ཐོན་པ། སྔ་མ་འདི་གཉིས་དཀོར་ཟན་གྱི་བླ་མ་ཞིག་དང་། སྡེ་དགེ་གཉེར་ཆེན་ཞིག་གི་སྐྱེ་བ་ཡིན་པར་གསུངས་ཡོད།
ཡང་། སྔོན་དྭགས་པོར་བླ་མ་ཞིག་ལ་རྒྱུན་དུ་སྦྱིན་བདག་མི་ཚང་གཅིག་གིས་མར་དང་། མི་ཚང་གཅིག་གིས་ཤ་ཕུལ། བླ་མས་དཀོར་སྦྱོང་མ་བྱས་པར་ཤི་སྟེ། མར་ཕུལ་བའི་ཁྱིམ་དེར་འོ་མ་ཤིན་ཏུ་མང་བའི་འབྲི་ཞིག་ཏུ་སྐྱེས། རྗེས་སུ་གཡང་དུ་ལྷུང་བ་ཆུས་འཁྱེར་ནས་ཤ་ཕུལ་བའི་མི་ཚང་དེས་རྙེད། ཤ་རྣམས་ཟོས་ཟིན་པ་ན། རྩིབས་མའི་རུས་པའི་ལྡེབས་སུ་མི་ཚང་ཆེ་གེ་མོའི་ཤ་དང་། མི་ཚང་ཆེ་གེ་མོའི་མར་གྱི་སྐྱིན་པ་འཕྲོད་སོང་ཟེར་བའི་ཡི་གེ་བྱུང་། དེས་ན་ལས་འབྲས་ཀྱི་རྒྱ་ཁ་ན་དམིགས་གསལ་གཏོང་རབས་མེད་པས། བླ་མའི་དཀོར་འཇུ། རྨ་བྱའི་དུག་འཇུ་ཟེར་རྐྱང་ཡིན་མིན་བསམ་པར་རིགས་སོ། །
མཁའ་འགྲོ་མ།
སྤྱིར་མཁའ་འགྲོ་མ་ཞེས་པ་ལ་རིགས་གཉིས་ཏེ། གཅིག་ནི་རིགས་བཟང་མཁའ་འགྲོ་མ་དང་། ཅིག་ཤོས་ནི་རིགས་ངན་མཁའ་འགྲོ་མའོ། །
༡ རིགས་བཟང་མཁའ་འགྲོ་མ། རིགས་བཟང་མཁའ་འགྲོ་མ་ནི། གསང་སྔགས་ཀྱི་གཞུང་ལས་གསུང་ཚུལ་ལ། སངས་རྒྱས་ཟིན་པའི་མཁའ་འགྲོ་མ་ལ། ལྷན་སྐྱེས་ཀྱི་མཁའ་འགྲོ་མ་དང་། གསང་སྔགས་ཀྱི་ལམ་ལ་ཞུགས་ནས་ཉམས་རྟོགས་མཐོ་རུ་ཕྱིན་པའི་མཁའ་འགྲོ་མ་སྟེ་སྔགས་སྐྱེས་ཀྱི་མཁའ་འགྲོ་མ་གཉིས་ཡོད། ཡང་མཁའ་འགྲོ་སྡེ་བརྒྱད་དེ། རྡོ་རྗེ་མཁའ་འགྲོ། རིན་ཆེན་མཁའ་འགྲོ། པདྨ་མཁའ་འགྲོ། ལས་ཀྱི་མཁའ་འགྲོ། དམ་ཚིག་མཁའ་འགྲོ། སྣ་ཚོགས་མཁའ་འགྲོ། ཐམས་ཅད་མཁའ་འགྲོ། འཇིག་རྟེན་མཁའ་འགྲོའོ། །གཞན་ཡང་། གསང་སྔགས་མ་རྒྱུད་ཀྱི་གཞུང་ལས། མཁའ་འགྲོ་མ་ལ་ཉི་ཤུ་རྩ་བཞི་ཞེས་འབྱུང་སྟེ། སྐུ་ཡི་གནས་བརྒྱད་ན་བཞུགས་པའི་འཁོར་ལོའི་ཤུགས་ཅན་སོགས་སྐུའི་རིགས་ཀྱི་མཁའ་འགྲོ་མ་བརྒྱད། གསུང་གི་གནས་བརྒྱད་ན་བཞུགས་པའི་མཁའ་འགྲོ་མ་ས་སྲུང་མ་ལ་སོགས་པ་གསུང་གི་རིགས་ཀྱི་མཁའ་འགྲོ་མ་བརྒྱད། ཐུགས་ཀྱི་གནས་བརྒྱད་ན་བཞུགས་པའི་རབ་གཏུམ་མ་ལ་སོགས་པ་ཐུགས་ཀྱི་རིགས་ཀྱི་མཁའ་འགྲོ་མ་བརྒྱད་བཅས་ཉི་ཤུ་རྩ་བཞིའང་གསུངས་སོ། །
ཡང་། ཐུའུ་བཀྭན་ཆོས་ཉིའི་བསང་ཆོག་ལས། ལྷ་བསང་གི་མགྲོན་གྱི་ཁྱད་པར་བཤད་པའི་སྐབས་སུ། དཔའ་བོའམ་དཔའ་མོའམ་མཁའ་འགྲོ་དང་མཁའ་འགྲོ་མ་ཞེས་པ་མདོ་ལུགས་ལ་མེད་ཅིང་། གསང་སྔགས་ཀྱི་སྐབས་སུ་ཡང་རྒྱུད་སྡེ་འོག་མ་རྣམས་སུ་ཐ་སྙད་དངོས་སུ་སྦྱར་བ་མེད་པས། འདི་ནི་རྣལ་འབྱོར་བླ་མེད་ཀྱི་ལུགས་དང་དེ་ལས་ཀྱང་བདེ་དགྱེས་སོགས་མ་རྒྱུད་ཀྱི་སྐོར་རྣམས་སུ་རྒྱ་ཆེར་འབྱུང་བ་སྟེ། དེ་ལ་ཡང་ཡེ་ཤེས་པ་དང་འཇིག་རྟེན་པ་དང་། ཡེ་ཤེས་པ་ལའང་རྟོགས་པ་མཐོ་དམན་གྱི་སྒོ་ནས་ཞིང་སྐྱེས་སྔགས་སྐྱེས་ལྷན་སྐྱེས་ཀྱི་རིགས་སྣ་ཚོགས་ཡོད་པར་མ་ཟད། ཧེ་རུ་ཀ་དཔལ་དཔའ་པོ་ཆེ། ཞེས་དང་། དཔལ་ལྡན་རྡོ་རྗེ་མཁའ་འགྲོ་མ། ཞེས་སོགས་དཀྱིལ་འཁོར་གྱི་གཙོ་བོ་ལའང་དཔའ་བོ་དང་མཁའ་འགྲོའི་ཐ་སྙད་གསུངས་པ་མེད་པས་རྣམ་དབྱེ་ཞིབ་ཏུ་ཤེས་པར་འདོད་ན་བདེ་དགྱེས་ཀྱི་རྒྱུད་འགྲེལ་མན་ངག་ཉན་པར་བྱའོ། །འདིར་མཚན་གཞི་ཙམ་སྨོས་ན། དུར་ཁྲོད་བརྒྱད་དང་། ཡུལ་སོ་གཉིས་དང་། གནས་ཉེར་བཞི་སོགས་ན་བཞུགས་པའི་དཔའ་བོ་དང་མཁའ་འགྲོ་བསྐྱེད་རྫོགས་ཀྱི་རྟོགས་པ་མངོན་དུ་གྱུར་པ་རྣམས་ཏེ། དཔའ་བོ་ཐོད་པའི་དུམ་བུ་དང་། དཔའ་མོར་རབ་གཏུམ་མ་ལ་སོགས་པ་ལྟ་བུའོ། །གསུངས་སོ། །
ཡང་། མཁའ་འགྲོ་མའི་སྒྲ་བཤད་འཇུག་ལ་མུ་བཞི་ཡང་བརྩི་སྟེ། ཐེ་སེ་ཧལ་ཁྱི་སོགས་དང་། ཉི་ཟླ་གཟའ་སྐར་སོགས་དང་། ཡི་དྭགས་མཁའ་ལ་རྒྱུ་བ་རྣམས་ལ་སྒྲ་བཤད་ཡོད་ཀྱང་འཇུག་ཏུ་མེད། མཚན་ལྡན་གྱི་རིག་མ་རྫུ་འཕྲུལ་མ་ཐོབ་པ་རྣམས་ལ་སྒྲ་འཇུག་ཡོད་ཀྱང་བཤད་དུ་མེད་པའོ། །རིགས་སུ་གྱུར་བའི་མཁའ་འགྲོ་སྡེ་ལྔ་དང་། རིགས་བདག་གྱུར་བའི་མཁའ་འགྲོ་སྡེ་ལྔ་རྣམས་ནི་སྒྲ་བཤད་འཇུག་གཉིས་ཀ་ཡོད་པའོ། །ལམ་ལ་མ་ཞུགས་པ་དང་། ཞུགས་ཀྱང་ནུས་པ་མ་ཐོབ་པའི་གང་ཟག་ཡོད་དོ་ཅོག་ནི་བཤད་འཇུག་གཉིས་ཀ་མེད་པར་གསུངས་ལ། འདིར་བཤད་པ་ནི་རིགས་བདག་གྱུར་བའི་མཁའ་འགྲོ་སྡེ་ལྔ་ཡིན། དེ་ལ་ངོ་བོའི་སྒོ་ནས་གཉིས་ཏེ། གསང་སྔགས་ཀྱི་ལམ་ལ་གནས་ཤིང་རྫུ་འཕྲུལ་གྱིས་མཁའ་ལ་འགྲོ་བ། སྤྲུལ་སྒྱུར་སྟོན་པའི་རིག་འཛིན་རྣལ་འབྱོར་ཕོ་མོ་དང་། འབྲས་བུ་སངས་རྒྱས་ཀྱི་ས་ལ་གནས་པའོ། །རིགས་ཀྱི་སྒོ་ནས་དབྱེ་ན་ལྔ་སྟེ། གཙོ་ཆེར་ལས་སྒྲུབ་ཚུལ་གྱི་དབང་དུ་བཏང་ན། ཞི་བའི་ལས་སྒྲུབ་པའི་སངས་རྒྱས་མཁའ་འགྲོ། དྲག་པོའི་ལས་སྒྲུབ་པའི་རྡོ་རྗེ་མཁའ་འགྲོ། རྒྱས་པའི་ལས་སྒྲུབ་པའི་རིན་ཆེན་མཁའ་འགྲོ། དབང་གི་ལས་སྒྲུབ་པའི་པདྨ་མཁའ་འགྲོ། ལས་ཀུན་སྒྲུབ་པའི་སྣ་ཚོགས་མཁའ་འགྲོའོ། །དེ་དག་ཀྱང་སློབ་པ་ལམ་ཞུགས་ཡིན་ན་རིགས་སུ་གྱུར་བའི་མཁའ་འགྲོ་དང་། མི་སློབ་པ་འབྲས་གནས་ཡིན་ན་རིགས་བདག་ཏུ་གྱུར་བའི་མཁའ་འགྲོ་སྟེ། རྣམ་སྣང་མི་བསྐྱོད་པ་སོགས་དང་ངོ་བོ་གཅིག་གོ །རིགས་དང་རིགས་བདག་ཏུ་གྱུར་ཚུལ་ཡང་། རྒྱུད་ལས། རྣལ་འབྱོར་བ་གང་ནག་པོ་ཉིད། །དེ་ཡི་ལྷ་ནི་མི་བསྐྱོད་པ། །ཞེས་པས་རིགས་པས་གྲུབ་བོ། །གནས་ཀྱི་སྒོ་ནས་གསུམ་སྟེ། ནམ་མཁའ་དང་། ས་འོག་དང་། ས་སྟེང་ལ་སྤྱོད་པའོ། །དེ་ཡང་ཞིབ་ཏུ་ཕྱེས་ན་ཡུལ་ཉི་ཤུ་རྩ་བཞི་འམ་སོ་གཉིས་སུ་རྒྱུད་ལས་གསུངས་སོ། །རྒྱུའི་སྒོ་ནས་བཞི་སྟེ། གནས་ལས་སྐྱེས་པ། རིགས་ལས་སྐྱེས་པ། སྔགས་ལས་སྐྱེས་པ། ལས་ལས་སྐྱེས་པའོ། །
སྤྱིར་བཏང་བུད་མེད་ཕལ་བའི་ཁྲོད་ཀྱི་མཚན་རྟགས་དང་ལྡན་པའི་མཁའ་འགྲོ་མ་ནི་ཞིང་སྐྱེས་ཀྱི་མཁའ་འགྲོ་མ་ཡིན་པར་གསུངས་ལ། འདིར་རེ་གཉིས་ཀྱི་ལོ་རྒྱུས་བརྗོད་ན། ཀླུ་ལས་སྐྱེས་པའི་རྣལ་འབྱོར་མའམ་མཁའ་འགྲོ་མ་ནི། གསང་སྔགས་བརྒྱུད་རིམ་ལོ་རྒྱུས་ཐོག་གསུངས་སྲོལ་ལ། གསང་སྔགས་ཀྱི་ལམ་ལ་བརྟེན་ནས། ཨོ་རྒྱན་རྒྱལ་བོ་ཨིནྡྲ་བྷུ་ཏི་སོགས་ཡུལ་མི་ཡོངས་རྫོགས་གྲུབ་པ་འཐོབ་སྟེ། ཨོ་རྒྱན་ཡུལ་དེ་མཚོ་ཆེན་པོ་ཀླུས་བཀང་བ་ཞིག་ཏུ་གྱུར་པ་ལ། གསང་བདག་ཕྱག་ན་རྡོ་རྗེས་ཀླུ་རྣམས་སྨིན་པར་མཛད་པ་ལས། རིམ་གྱིས་མིར་གྱུར་ཏེ། མཚོ་འགྲམ་དུ་གྲོང་ཁྱེར་ཆགས་ཤིང་། གསང་སྔགས་ཀྱི་ཆོས་ཉམས་སུ་བླངས་པ་ལ་བརྟེན་ནས། གྲུབ་པ་འཐོབ་པའི་ནང་ཚན་ཡུལ་དེའི་རྒྱལ་བོ་མཐོང་བ་ན། དགའ་བའི་བུ་མོ་རོལ་བ་མོ་ཞེས་བརྗོད་པ་ཡིན། དེ་ཡང་། མཚན་གཞན་ཀླུ་ལས་གྱུར་བའི་རྣལ་འབྱོར་མ་དང་། ཀླུ་ཡི་མཁའ་འགྲོ་མ་ཞེས་བརྗོད་པ་ཡང་། ཀླུ་ནས་རིམ་བཞིན་མིར་གྱུར་ཏེ་རྟེན་དེ་ལ་གསང་སྔགས་ཉམས་སུ་བླངས་པ་ལ་བརྟེན་ནས་མཆོག་གི་དངོས་གྲུབ་འཐོབ་པ་ཞིག་ཡིན་པ་ལས། ཀླུའི་རྟེན་དེ་རང་ལ་གསང་སྔགས་ཀྱི་ཆོས་ཉམས་ལེན་བྱས་པ་དང་། གྲུབ་པ་འཐོབ་པ་དེ་འདྲ་མིན་ནོ། །
མཁའ་འགྲོ་མ་གསང་བ་ཡེ་ཤེས་ནི། གསང་སྔགས་སྔ་འགྱུར་གྱི་ལོ་རྒྱུས་དང་། བཀའ་གདམས་བུ་ཆོས། རྒྱལ་བོ་དད་པ་བརྟན་པ། རྒྱལ་བོ་དཀོན་མཆོག་འབངས་བཅས་ཀྱི་ལོ་རྒྱུས་ལས་འབྱུང་བས། ཞིབ་ཏུ་དེར་གཟིགས་པར་བྱ་ལ། དེ་ནི་ཨོ་རྒྱན་གྱི་མཁའ་འགྲོ་མ་ཐམས་ཅད་ཀྱི་གཙོ་མོ་ཡིན་པར་བཤད།
མཁའ་འགྲོ་མ་སུ་ཁ་སུ་དྷི་ནི། ཁ་ཆེའི་ཡུལ་གྱི་གྲོང་ཁྱེར་ཁྲི་བརྟན་དུ། བཟའ་མི་བདུན་ལ་འབྲས་བུམ་པ་གང་ལས་མེད་པ་ཞིག་གི་ཁྱིམ་བདག་མ་ཡིན། ཚེ་ཞིག་དགེ་སློང་བསོད་སྙོམས་པ་ཞིག་འོང་བ་ལ། འབྲས་བུམ་པ་གང་བོ་དེར་ཕུལ་བས། སྐབས་དེར་རྒན་མོ་ལོ་ང་དགུ་ལོན་ཡང་། ཁྱིམ་མི་ཀུན་གྱིས་སྒོར་ཕུད། དེ་ནས་རྒན་མོ་ཨུ་རྒྱན་ཡུལ་དུ་འཁྱམས་ནས་འབྲས་བསླངས་ཏེ། འབྲས་ཁལ་གཅིག་བྱུང་བས། དེས་ཆང་བཙག་ནས་ལོ་གཅིག་རིང་ཆང་འཚོང་མ་བྱས། སྐབས་དེར་གྲུབ་ཆེན་བིར་ཝ་བ་གསང་བའི་སྤྱོད་པ་ལ་བཞུགས་པ་དེར། དམ་རྫས་སུ་རིན་མ་བླངས་པར་ནམ་དགོས་སུ་འབྲས་ཆང་ཕུལ་བས། ཉིན་གཅིག་གྲུབ་ཆེན་གྱི་ཡུམ་དུ་དབང་བསྐུར་ཞིང་། མན་ངག་གནང་བས། མཁའ་འགྲོ་མ་གཞོན་ནུ་ལང་ཚོ་དང་ལྡན་པ་ཞིག་ཏུ་གྱུར་བའི་ལོ་རྒྱུས་ཡོད། རྒྱས་པར་ཤངས་པ་བཀའ་བརྒྱུད་གསེར་ཕྲེང་ལེ་ཚན[ཀ་བ]མཁས་གྲུབ་ཁྱུང་བོ་རྣལ་འབྱོར་གྱི་རྣམ་ཐར་དབུ་མེད་བྲིས་མ་ཤོག་གྲངས ༡༧ ནས་༡༨ བར་གསལ། ཡང་རིགས་བཟང་མཁའ་འགྲོ་མ་འགྲོ་བ་བཟང་མོ་སོགས་ཀྱི་བྱུང་བ་དེ་དག་གི་རྣམ་ཐར་ལས་ཤེས་པར་བྱའོ། །
ཡང་། ཕ་དམ་པ་སངས་རྒྱས་བོད་དུ་ཕེབས་དུས་ཁོང་གི་ཕྱི་བཞིན་དུ་བྱ་བཞིན་འཕུར་ནས་འོང་བ་ལ། ཕྱིས་མཁའ་འགྲོ་ཆོ་འཕྲུལ་བྱ་ནག་བཞིར་གྲགས་པ་སྟེ། ༡ གཡེའི་ལབ་སྒྲོན། ༢ གཉལ་སྟོད་ཀྱི་མ་ཇོ་བྱང་ཆུབ། ༣ གཙང་གི་ཞང་མོ་རྒྱལ་ཐང་། ༤ ལྷ་སའི་སྨྱོན་མ་བཅས་ཤེས་བྱ་ཀུན་ཁྱབ་ལས་བཤད་ཡོད་དོ། །
༢ རིགས་ངན་ཤ་ཟ་མཁའ་འགྲོ་མ། རིགས་ངན་ཤ་ཟ་མཁའ་འགྲོ་མ་ནི། ཡོངས་གྲགས་སུ་ཕྲ་མིན་མ་ཟེར་བ་དེ་ཡིན། རོ་ཆེན་ཟ་བའི་མཁའ་འགྲོ་མ་ལ་བརྒྱད་བརྩི་ཚུལ་ཡོད་དེ། ཤར་དུ་ལོ་ཙཱ་བ། ལྷོར་མེ་ལྕེ་གདོང་། ནུབ་ཏུ་ཊ་ཀྱི་མ། བྱང་དུ་རྒན་བྱེད་མ། ཤར་ལྷོར་རྡོ་རྗེ་མ། ལྷོ་ནུབ་ཏུ་ཧུ་ལུ་མ། ནུབ་བྱང་དུ་དྲེག་པ་མ། བྱང་ཤར་དུ་སྣ་ཚོགས་མ་སྟེ། ཐམས་ཅད་ཀྱང་ཞིང་ལྤགས་མནབ་ཞིང་རུས་རྒྱན་ཅན། མཚོན་ཆ་སྣ་ཚོགས་ཐོགས་ནས་རོ་ལ་རྔམ་པར་བཤད་ལ།
དགེ་ཆོས་ཀྱི་གཏམ་རྒྱུད་གསེར་ཐང་ལས། བུད་མེད་མཁའ་འགྲོ་མ་མང་བའི་གཏམ་རྒྱུད་ནི་གྲོང་ཀུན་ཏུ་གྲགས་པ་ཆེ། ལྷག་པར་མ་ཎི་ཀཎྡ་ན་བྱ་བའི་གྲོང་དེར་མཁའ་འགྲོ་མ་མང་ཟེར་ནས་འགྲོ་བ་ཡང་འཇིགས་པར་བལྟ། མཁའ་འགྲོ་མ་ནི་རང་རེའི་སེམས་ལ་འཆར་ཚུལ་དང་ཡེ་མི་འདྲ། བུད་མེད་ངན་སྔགས་ཤེས་ཤིང་མི་ཤ་ཟ་བ་སོགས་བྱེད་པའི་མ་རུངས་མཐར་ཐུག་ཅིག་ལ་འདོད། སྔོན་གྱི་ལོ་ཙཱ་བ་རྣམས་ཌཱ་ཀི་ནི་བྱ་བའི་ཚིག་དེ་ཕྲ་མིན་མར་བསྒྱུར། གསུངས་པ་ལྟར། ཕྲ་མིན་མ་ནི་ཕྱིའི་རྣམ་པ་སྤྱིར་བཏང་མི་ཡིན་ལ་མཚན་མོའི་དུས་སུ་གདོན་འདྲེ་རིགས་སུ་གྱུར་ནས་མི་ཡི་བླ་སྲོག་ལ་གནོད་འཚེ་བྱེད་མཁན་ཞིག་དང་། ཡང་ན་ཉིན་མོའི་དུས་སུ་གཟུགས་མི་འདྲ་བ་སྣ་ཚོགས་སྤྲུལ་བསྒྱུར་ཐུབ་པའི་མི་མ་འདྲེ་བཅས་རིགས་གཉིས་ཡོད་པར་བཤད་ལ། དེ་བས་ལམ་རིམ་ཆེན་མོའི་བཤེས་གཉེན་མ་བསྟེན་པའི་ཉེས་དམིགས་སྐབས་སུ། རྒྱལ་བོ་མེ་དང་སྦྲུལ་གདུག་དང་། །ཆུ་དང་མཁའ་འགྲོ་རྐུན་པོ་དང་། །གདོན་དང་ལོག་འདྲེན་རྣམས་ཀྱིས་ཀྱང་། །བསད་ནས་སེམས་ཅན་དམྱལ་བར་འགྲོ། །ཞེས་ལྔ་བཅུ་བའི་ལུང་དེ་དང་། སྤྱོད་འཇུག་ལས། མཁའ་འགྲོ་སྲིན་པོ་ལ་སོགས་པ། །སྙིང་རྗེའི་སེམས་དང་ལྡན་གྱུར་ཅིག །ཅེས་པའི་སྐབས་ཀྱི་མཁའ་འགྲོ་ཞེས་པ་དེ་ཡང་ཕྲ་མིན་མ་ཡིན། འདིར་རིགས་ངན་མཁའ་འགྲོ་མའི་ལོ་རྒྱུས་རེ་ཟུང་བཀོད་ན།
བཀའ་གདམས་གསུངས་གཅེས་བཏུས་ནོར་བུའི་བང་མཛོད་ལས། ཕྲ་མིན་མ་བྱ་བ་བོད་ན་མེད། མངའ་རིས་གར་ཞ་ན་ཡོད། ཕྲ་མིན་མའི་བུ་ཞིག་རི་ལ་ཕྱིན་པ་ན། ཕ་གི་ན་དིར་དིར་བ་ཞིག་འདུག་ནས་ཁོས་ཉན་པས། བུད་མེད་མང་བོ་འདུས་ནས། སང་ཁྱེད་ཚོའི་རེས་མོས་ཁྱོད་ལ་འོང་ཟེར་བ་ལ། མ་དེ་ན་རེ། གཞན་ངས་མི་རྙེད་ང་རང་གི་བུ་གསོད་པ་འོང་ཟེར། ཁྱོས་ཇི་ལྟར་གསོད་ཟེར་བ་ན། ངའི་བུ་ཕྱུགས་འཚོ་བ་ལ། ང་འབྲིར་བརྫུས་ནས་གསོད་ཟེར་བ་ཁོས་ཐོས་ནས། སང་མདའ་དོང་དུ་བཅུག་ནས་བསྡད་ཙ་ན། དེ་ལྟར་བྱུང་བ་ལ་མདའ་འཕངས་པ་མགོ་ལ་ཕོག་ནས་ལོག་སོང་། དེ་ནས་མཆོང་གྱིན་ཕྱིན་ཙ་ན། མ་དེ་མགོ་དཀྲིས་ནས་འདུག་པས། ཁོ་ལ་མ་ཡིན་སྙམ་པའམ་ཁྱིམ་ཡིན་སྙམ་པ་སྐད་ཅིག་ཀྱང་མ་བྱུང་བ་ཡིན། ཞེས་དང་།
ཡང་དཔེ་ཆོས་ལས། ཕྲ་མིན་མ་ཞིག་བོང་བུར་བཏང་བའི་ལོ་རྒྱུས་ནི། སྔོན་མི་ཞིག་ཕྲ་མིན་མའི་ཡུལ་དུ་ལམ་ནོར་ཏེ་ཕྱིན་པས། བུད་མེད་ཅིག་དང་འཕྲད་དེ། ནང་དུ་བོས་ནས་སྟན་ལ་བཞག ཁ་ཟས་གཡོས་ཏེ། མོ་རང་གི་ཟན་བརྫིས་ནས་གཞོང་ལ་བཞག གཅིག་ལ་འཇག་མ་ཞིག་བཙུགས་ཏེ་བཞག་ནས། མོ་ར་སྐོར་དུ་སོང་བ་ལ། མི་དེའི་བསམ་པར་འདི་རྣམས་ཟན་བྱིན་ནས་མི་བོང་བུར་བསྒྱུར་ཟེར་ན། ད་ཡང་འདིས་བསྒྱུར་བའི་ཉེན་ཡོད་སྙམ་ནས། གཞོང་བའི་ཟས་ཀྱི་རྟགས་མཚན་སྤོས་ནས་བཞག དེར་མངོན་དུ་བྱུང་ནས་ཁོ་ལ་བཟའ་བཏུང་བྱིན། མོ་རང་གིས་ཟོས་ཚར་བ་དང་། ཟས་ཞུ་བའི་ཚོད་ལ་དབྱུག་པ་ཞིག་འཁྱེར་འོང་ནས། ཚག་ཁྱུ་བ་ཟེར་ནས་བརྡེག་ཏུ་བྱུང་བ་ན། ཁོས་ཀྱང་འཁར་བ་ཞིག་ཡོད་པ་བཟུང་ནས་ཕར་ལ་དེ་སྐད་ཇི་ལྟ་བ་བཞིན་བྱས་པས། མོ་རང་བོང་བུར་སོང་། དེར་ཁོས་བོང་མོ་དེད་ཡོང་བའི་ལམ་དུ་མོ་རང་གི་ཁྱོ་དང་འཕྲད་པས། ཁྱོ་ལ་བལྟས་ཏེ་བོང་སྐད་འདོན་གྱིན་ངུས་པས། ཁྱོ་གས་ཆུང་མ་ཡིན་པར་ཤེས་ཏེ། དེ་ལ་ནོར་བྱིན་ནས་བསླུས་ཞེས་འབྱུང་བ་དང་།
ཡང་། རེབ་གོང་གི་ས་ཆ་ཞིག་ཏུ་བུད་མེད་ཅིག་ཡུན་རིང་བོར་འཆི་རྒྱུ་དང་རྒས་རྒྱུ་མེད་པ་ཞིག་བྱུང་བས། ཐམས་ཅད་ངོ་མཚར་ཏེ་མིང་ལ་ཨ་ཡེ་འཆི་མེད་རྒས་མེད་ཟེར་བ་དང་། དོན་དུ་ན་མཚན་མོ་ལུས་བསྒྱུར་བྱས་ཏེ་བཟའ་མི་ཀུན་གྱི་མགོ་ལ་རྐང་བས་འགོམ་ཡུག་ཅིག་བྱས་ནས། གཉིད་སད་དུ་མེད་པ་བྱས་རྗེས། མིའི་ཤ་ཁྲག་མང་བོར་རོལ་མཐར། སྐུ་ཕྱོགས་གསེར་ཁང་ཚང་གི་སློབ་མ་གླིང་རྒྱའི་སྒོམ་པ་བཀྲ་ལོས་བཏུལ་བའི་ལོ་རྒྱུས་རེབ་གོང་ན་རླུང་ལྟར་གྲགས་པ་དང་།
གཞན་ཡང་། རྭ་ལོ་ཙཱ་བས་ཕྲ་མིན་མ་ཞིག་བཏུལ་བའི་ལོ་རྒྱུས་ནི། འདིར་ཁོང་གི་རྣམ་ཐར་ལས་འབྱུང་བ་ཆ་ཚང་བཀོད་ན། འཕན་པོ་སྙུག་རུམ་ནང་ན་ཕ་སྔ་མོ་ནས་ཤི་བའི་མ་བུ་གཉིས་ཡོད་པ་ལ། མ་དེ་ཕྲ་མིན་མ་ཡིན་པས་ཚོགས་འདུ་ལ་རྟག་ཏུ་འགྲོ་བ་བུ་དེས་ཤེས་པས་གཉིད་རྫུ་བྱས་ནས་གར་འགྲོ་བལྟས་པ་དང་། ས་སྲོས་ཙམ་ན་བུད་མེད་དམར་ནག་ཆེན་མོ་གཉིས་འོང་ནས། ཨ་མ་འབྱོན་པར་ཞུ་ཟེར་བ་དང་། དེར་མ་དེ་སྒམ་ལ་ཞོན་ནས་བུད་མེད་གཅིག་གིས་ཁྲིད། གཅིག་གིས་དེད་ནས་ཐོགས་མེད་དུ་ཕྱིར་འགྲོ་བ་མཐོང་ངོ་། །དེ་ནས་ཁོ་གཉིད་ཅིག་ལ་སོང་བ་སད་ཙམ་ན། སླར་ཚུར་སླེབས་ནས་འདུག་སྐད། དེའི་ཕྱི་ནུབ་བུ་དེས་སྒམ་ནང་དུ་འཛུལ་ཏེ་བསྡད་པ་དང་། ཡང་བུད་མེད་དེ་གཉིས་འོང་སྟེ་སྔར་ལྟར་གཏམ་བྱས་མཐར། མ་དེ་སྒམ་ལ་ཞོན་ནས་སོང་བ་ལ། སྒམ་དེ་ཙེར་སྒྲ་འབྱིན་ཞིང་ས་ལ་རེག་ལ་ཁད་བྱས་ནས། མོ་ན་རེ། དོ་ནུབ་རྟ་འདི་ཡང་མི་འགྲོ་བར་འདུག་ཟེར་རོ། །དེ་ནས་དུར་ཁྲོད་གཅིག་ཏུ་སླེབས་པ་དང་། བུད་མེད་མང་བོ་གྲལ་བྱས་ནས་འདུག་པའི་དབུས་སུ་མ་དེ་སྒམ་ལ་ཁྲི་བྱས་ནས་བསྡད། སྐྱེས་པ་དར་མ་གཅིག་གི་རོ་ལ་ཚོགས་འཁོར་བྱས། མགོ་ཀླད་དེ་གཙོ་མོ་ལ་ཕུལ་སོང་བ་དང་། དེ་ན་རེ། ངའི་ཐུར་མ་ཁྱིམ་དུ་ལུས་འདུག་ཟེར་བ་ལ། བུད་མེད་གཅིག་གིས་ཨ་མ་ལགས་ཀྱི་ཕྱག་རིང་རྐྱོང་བ་ཞུ་ཟེར་ཙ་ན། མ་དེས་ཁྲི་ལ་སྡོད་བཞིན་དུ་ལག་པ་རིང་མོ་ཞིག་བརྐྱངས་ཏེ། ཁྱིམ་ནས་ཐུར་མ་བླངས་སོང་བ་མཐོང་ངོ་། །དེ་ནས་ཐོ་རངས་ཁར་སོང་བ་དང་། བུད་མེད་དེ་རྣམས་ཀྱང་སོ་སོར་གྱེས་ཤིང་། མ་ཡང་སྒམ་ལ་ཞོན་ནས་ཚུར་ལོག་སྟེ་མལ་དུ་ཉལ་ལོ། །དེར་བུས་ཀྱང་སྒམ་ནས་ཐོན་ཏེ་མ་ཚོར་བ་ལྟར་བྱས་ནས་མལ་དུ་ཉལ་ལོ། །དེ་ནས་ཡུན་རིང་སོང་ནས་ཉིན་གཅིག་ཙ་ན། མས་ཁྱིམ་གྱི་ཐོག་ནས་བལ་རྒྱང་བཏང་བས་ཆད་ནས་མཐིལ་དུ་ལྷུང་བ་ལ། བུ་མཐིལ་ན་ཡོད་པ་ལ་ངའི་བལ་འཕང་འཁྱེར་ཤོག་བྱས་པ་དང་། བུས་ཁ་མ་ཚུགས་ཏེ་ཨ་མ་ལགས་རང་ཕྱག་རིང་རྐྱོང་བར་ཞུ་བྱས་པས། མ་ཁྲོས་ཏེ་འདིས་ང་ཕྲ་མིན་མ་ཡིན་པར་ཤེས་འདུག་པས། ད་གཞན་ལ་འང་ཟེར་དུ་འོང་སྙམ་ནས། དབུ་སྐྲ་ནས་བཟུང་སྟེ་སྤྲུགས་པས་དེ་ཉིད་ཁྱིའི་ལུས་སུ་བསྒྱུར་རོ། །དེར་སྡུག་བསྔལ་ཆེར་བྱུང་ནས་ཆུ་ལ་ལྕེབས་སྙམ་ཏེ་ཕྱིན་པ་དང་། ལམ་དུ་མི་མང་བོ་གླང་ཐང་བའི་ཡོན་ཏན་བརྗོད་པ་ཐོས་ནས། དེའི་རྩར་ཕྱིན་ན་ལུས་འདི་ལས་ཐར་ཨེ་སྲིད་སྙམ་ཏེ་ཕྱིན་པར། བླ་མ་མཆོད་རྟེན་ལ་བསྐོར་བ་མཛད་པ་དང་མཇལ་བས། གླང་ཐང་བའི་ཞལ་ནས། མི་ལུས་ཐོབ་ཀྱང་སླར་དུད་འགྲོར་གྱུར་བ་སྙིང་རེ་རྗེ་གསུངས་པས་དད་པ་ཆེར་བསྐྱེད། ཡིད་ཀྱིས་དེ་ལས་གྲོལ་བའི་ཐབས་ཞུས་པས། གླང་ཐང་བའི་ཞལ་ལས། ངས་འདི་ལས་ཐར་བར་བྱ་མི་ནུས་པས། ལྷ་ས་ན་བླ་མ་རྭ་ལོ་ཆེན་པོ་ཞེས་བྱ་བ་བསད་གསོད་དང་སྤྲུལ་བསྒྱུར་གྱི་ནུས་པ་མངའ་བ་ཞིག་བཞུགས་པས་དེའི་དྲུང་དུ་སོང་དང་། ཁྱོད་རང་ལུས་འདི་ལས་ཐར་བར་འགྱུར་རོ། །དེའི་ཚེ་གསེར་འདི་བླ་མ་ལ་ཕུལ་ཅིག་གསུངས་ནས། གསེར་སིལ་མ་སྲང་གང་ལ་ཐུམ་ཆུང་ངེ་བ་མང་བོ་བྱས་ཏེ་སྤུ་ལ་བཙེམས་ནས་ལྟོ་འབྲང་བགྲངས་བར་བྱིན་ནས་བཏང་ངོ་། །དེའི་ཚེ་ཁྱི་དེས་སྒོ་ལ་ཕྱིན་པ་དང་། ཕན་པོའི་མི་མང་བོ་རྭ་ཆེན་མཇལ་ཟེར་བས་འགྲོ་བ་དང་འཕྲད་དེ། དེ་རྣམས་ཀྱིས་གཏམ་ལ་ཉན་ཞིང་ཕྱིན་པས་ལྷ་སར་སླེབས་སོ། །དེའི་ཚེ་བླ་མ་རྭ་ལོས་ཀྱང་ཁོ་ཡོང་བར་མཁྱེན་ནས། ཉེ་གནས་ལ་དྲུག་ཅུ་བ་བཟོས་ལ་དེར་ཞོག་གསུངས། དེ་ལྟར་བྱས་ནས་ཉི་མ་ཕྱི་དྲོར་སོང་བ་ན། ད་སུ་ཡོང་གི་འདུག་ལྟོས་གསུངས། བལྟས་པས་གཞན་ནི་སུ་ཡང་མི་འདུག ཁྱི་གཅིག་ཐལ་འཚུབ་ལང་ལོང་དུ་ཡོང་གིན་འདུག་ནས། བླ་མ་ལ་དེ་ལྟར་ཞུས་པས། འོ་ན་ཕྱིར་དེངས་གསུངས་ནས་དབུ་ཞྭ་བཞེས། གཏོར་མ་ཕྱག་ཏུ་བསྣམས་ཏེ། ཕྱིར་བྱོན་པ་དང་། ཁྱི་སྒོ་དྲུང་དུ་སླེབས་པ་དང་དུས་མཉམ་དུ་བྱུང་ནས། བླ་མས་གཏོར་མ་དེ་ཁྱིའི་སྟེང་དུ་བརྒྱབ་པས་སྐད་ཅིག་ལ་མིའི་ལུས་སུ་བསྒྱུར་ཏེ། དེར་ཁོ་ཤིན་ཏུ་དད་ནས་གསེར་གང་ཡོད་བླ་མ་ལ་ཕུལ་ཏེ་བླ་མ་རྭ་ལོའི་ཕྱག་ཕྱིར་བསྡད་དོ། །བླ་མས་ཀྱང་ཁོ་རབ་ཏུ་བྱུང་། བསྙེན་པར་རྫོགས་ནས་ད་དུང་ཁྱོད་ལ་ཆགས་ཆེར་ཡོད་པས་བྱ་བ་ཅི་བྱེད་ཀྱང་། ང་ལ་མ་ཞུས་པར་མ་བྱེད་ཅིག་གསུངས། དེའི་ལོ་རྒྱུས་མ་དེས་ཐོས་ནས། བར་ཆད་བྱེད་པར་འདོད་དེ། ཤིང་གི་སྒྲོམ་བུ་གཅིག་ལ་ཕྲ་མིན་མའི་རིགས་སྔགས་ཀྱིས་བཏབ་ནས། འཕན་ཡུལ་ནས་རྭ་ཆེན་མཇལ་དུ་འགྲོ་བ་ཚན་གཅིག་ལ་བསྐུར་ཏེ། ངའི་བུ་དེ་བླ་མ་རྭ་ལོའི་སྤྱན་སྔར་ཆོས་ལ་ཡོད་པས། དེ་ལ་ཁྱོད་རང་གི་འཚོ་བའི་ཆ་རྐྱེན་ཡིན་གྱིས་ལ་སྤྲོད་ཅིག་ཟེར་སྐད། དེར་མི་དེ་རྣམས་ཀྱིས་བླ་མའི་མཇལ་ཁར་ཕྱིན་ནས་ཞོར་ལ་སྒྲོམ་བུ་དེ་ཡང་ཁོང་ལ་གཏད་དེ་མོའི་འཕྲིན་རྣམས་ཀྱང་སྨྲས་པ་དང་། ཁོང་གིས་སྒྲོམ་བུ་དེ་ལག་ཏུ་བླངས་པ་ན། བརྗིད་ཀྱིས་ལག་པ་ས་ལ་རེག་པ་འདུག་ནས། འདིའི་ནང་དུ་ཅི་ཡོད་དམ་སྙམ་ནས་ཁ་ཕྱེ་ལ་ཁད་ལ་བླ་མའི་གསུང་དྲན་ནས་སླར་རྭ་ཆེན་ལ་ཞུས་པས། བླ་མས་སྐུ་ཆོས་ཕུད་དེ་ཁོ་ལ་གནང་ནས། ཁྱོད་རང་འདི་གོན་ལ་སྒྲོམ་ཁ་ཕྱེ་ཞིག་གསུངས། དེ་ལྟར་བྱས་པས་སྒྲོམ་བུའི་ནང་ནས་ཐོག་སྨད་དགུ་བྱུང་སྟེ་སྤྱིལ་བུ་དང་ཡོ་བྱད་ཐལ་བར་བརླགས། འོན་ཀྱང་། ཁོ་རང་གི་ལུས་ལ་བླ་མའི་སྐུ་ཆོས་ཡོད་པས་མ་ཚུགས་ཏེ། ཆོས་གོས་ཀྱི་སྟེང་ན་ཁྲོ་ཆུ་རྣམས་མར་ཁུ་ལྟར་འཁྱིལ་ནས་འདུག་སྐད། དེ་ནས་བླ་མའི་ཞལ་ནས། ད་ཁྱོད་རང་བར་ཆད་ལས་གྲོལ་བ་ཡིན་པས་སྒོམས་ཤིག་གསུངས་ནས་དབང་ཁྲིད་གནང་བས་གྲུབ་པ་ཐོབ་སྟེ། སྔར་གྱི་ཕྲ་མིན་མ་དེ་ལ་སོགས་པའི་ཕྲ་མིན་མ་བརྒྱ་ཙམ་བཏུལ། ཕྱིས་འགྲོ་བའི་དོན་རྒྱ་ཆེར་མཛད་ནས་མཁའ་སྤྱོད་དུ་གཤེགས་ཏེ་མཚན་ལ་ཡོན་ཏན་གྲགས་ཞེས་བྱའོ། །ཞེས་སོ། །
གྲྭ་བ་རྡོབ་རྡོབ།
བོད་ཀྱི་སེར་འབྲས་དགེ་གསུམ་སོགས་གྲྭ་ས་ཆེ་ཁག་ཏུ། རབ་ཏུ་བྱུང་སྟེ། ཚོགས་གྲལ་དུ་ཞུགས་པ་ནས་བཟུང་། འགྲིག་ཀུན་སྤྱོད་དང་། སློབ་གཉེར་འགྲུས་མ་འགྲུས་ཀྱི་དབང་གིས། གྲྭ་བ་རབ་འབྲིང་ཐ་གསུམ་དུ་གྱེས་འགྲོ་བ་ཕལ་ཆེར་ཆོས་ཉིད་ལྟ་བུ་ཡིན། རབ་རྣམས་ཁ་བཏོན་དགེ་སྦྱོར་དང་། བཀའ་པོད་ལྔ་འམ། གཞུང་ཆེན་བཅུ་གསུམ། ཡང་ན། བཀའ་བསྟན་ལ་བྱང་ཆུབ་ཏེ། འཇམ་མགོན་རྒྱལ་བའི་གདུང་ཚབ་དགའ་ལྡན་ཁྲི་བར་མངའ་གསོལ་ནས། རྒྱལ་བསྟན་ཉི་མ་ལྟར་འཆར་བར་མཛད་པ་དང་། འབྲིང་རྣམས་འདོན་རྟ་དབྱངས་གསུམ་དང་། ཐིག་ས་ཆོག་གཏོར་བཟོ་སོགས། རྒྱུད་སྡེ་རྒྱ་མཚོའི་ཆོ་ག་ཕྱག་ལེན་ལ་ནང་བྱན་ཆུད་ཅིང་། ཞི་རྒྱས་དབང་དྲག་གི་ལས་རབ་འབྱམས་པར་དབང་འབྱོར་ཏེ། རྒྱལ་བསྟན་འཛིན་པ་ཡིན། ཐ་མར་གོང་གསལ་དེ་དག་གཅིག་ཀྱང་མེད་པའི་ཁར། ཆ་ལུགས་ཡ་མ་ཟུང་མང་དུ་བསྟན་ནས། ཁྱིམ་པའི་བྱ་སྤྱོད་ཕོ་རྩལ་སྣ་དགུ་སོགས་ལ་སྦྱོང་བརྡར་བྱས་ཏེ། གྲྭ་སའི་ལ་རྒྱ་རྩོད་པ་དང་། ཆོ་འཕྲུལ་སྨོན་ལམ་སོགས་ཀྱི་སྐབས་སུ་དགེ་གཡོག་བྱས་ཏེ། སེར་སྐྱ་ཁྲི་སྟོང་མང་བོར་སྒྲིག་ཁྲིམས་མནོན་པ་དང་། དགོན་པའི་ཞལ་ཏ་བ་སོགས་བྱེད་ཀྱིན་ཡོད་པ་དེ་ལ་གྲྭ་བ་རྡོབ་རྡོབ་ཟེར།
གྲྭ་བ་རྡོབ་རྡོབ་ཀྱི་བྱེད་ལས་ནི། དཔེར་ན། འབྲས་སྤུངས་ལྟ་བུར་མཚོན་ན། ལོ་རེར་སྨོན་ཚོགས་གཉིས་ལ། གདན་ས་གསུམ་དང་། མི་སྐྱ་ཁྲི་ཕྲག་མང་བོ་སྒྲིག་ལམ་བཟོ་བ་ལ། འབྲས་སྤུངས་ཚོགས་ཆེན་ཞལ་ངོ་ནས། དཔའ་ཆས་ལུས་ལ་རྫོགས་པའི་གྲྭ་བ་རྡོབ་རྡོབ་འབྲོང་གཞོན་འདྲ་བ་བཅུ་དགུ་བསྐོ་བཞག་གནང་ཏེ། ཞལ་ངོའི་དཔུང་རོགས་སུ་འགྲིག་བདག་ཏུ་བསྐོ་བ་དང་། གཞན་གྲྭ་ས་གང་ལ་གྲྭ་བ་རྡོབ་རྡོབ་མང་བ་དེ་ཙམ་དུ། འཇིག་རྟེན་ཕྱོགས་ཀྱི་ངོ་སོ་དང་དབང་ཐང་ཆེ་བར་མ་ཟད། ཡང་། གདན་ས་སྲུང་སྐྱོབ་བྱེད་པའི་མེད་མི་རུང་གི་ལག་ཆ་ལྟ་བུར་ཡང་གྱུར་ཡོད། དེ་མིན། གྲུབ་མཐའ་ཁག་དང་འགལ་བ་བྱུང་སྐབས་གྲྭ་རྡོབ་བེད་སྤྱོད་གནང་ཡོད་པ་དཔེར་ན། རབ་བྱུང་བརྒྱད་པའི་སྐབས། ཀརྨ་སྐུ་ཕྲེང་བདུན་པ་ཆོས་གྲགས་རྒྱ་མཚོས། ཇོ་བོ་ཉེ་འགྲམ་ས་ནག་ཅེས་པར་ཐུབ་བསྟན་ཆོས་འཁོར་གླིང﹙དེང་སང་ཀརྨ་དགོན་གསར་ཞེས་པའི་ས་ཆ﹚ཕྱག་བཏབ་པས། འདི་སེར་འབྲས་ཀྱི་ཁ་གནོན་དུ་དོགས་པའི་དབང་གིས། ཀརྨ་བ་ཇོ་བོ་མཇལ་ཏེ། ཕེབས་རྗེས་སུ་སེ་འབྲས་གཉིས་ནས་གྲྭ་རྡོབ་ལྔ་བཅུ་ཁྲབ་རྨོག་འཁོར་གསུམ་སོགས་དྲག་ཆས་སྤྲོས་ཏེ། ཁྱམས་རར་དམར་འཛིང་བྱས་པའི་ཤོད་རྒྱུན་ཡོད་པ་དང་།
གཞན་ཡང་། གྲྭ་ས་ཁག་ལ་རྡོབ་རྡོབ་ཀྱི་ལྟོ་ཚང་ཡོད་ལ། ཁྱད་པར་དུ། སེར་འབྲས་གཉིས་རྡོབ་རྡོབ་ལུས་རྩལ་ཚོགས་པ་དེ་གླིང་ཁག་རྡོབ་རྡོབ་ཀྱི་ལྟོ་ཚང་ཟེར། རྡོབ་རྡོབ་རྣམས་ལ་མཆོངས་དང་རྡོ་རྩལ་གྱི་འགྲན་བསྡུར་ཡང་ཡོད་པ་རེད། འགྲན་བསྡུར་གྱི་རྒྱལ་ཕམ་དེ་གྲྭ་སའི་ངོ་སོ་དང་སྟོབས་ཤུགས་ལ་འབྲེལ་བ་ཡོད་ཙང་། རྒྱུན་ལྡན་སྐམ་སྦྱོང་བྱེད་པ་ཕུད་ནའང་། རློན་སྦྱོང་ལའང་གཟའ་འཁོར་ཁ་ཤས་འདང་བའི་གྲོ་ག་འཁྱེར་ཏེ་མཆོང་རར་ཕྱིན་ནས། རྩལ་ཁྲིད་དགེ་རྒན་གྱི་སློབ་སྟོན་ལ་ཉན་ནས་ཉིན་མང་བོའི་རིང་དཀའ་བ་ཁྱད་གསད་ཀྱིས་སྦྱོང་བརྡར་བྱེད་པ་ཡིན། དེ་ལྟར། གྲྭ་རྡོབ་རྩལ་སྣ་ཁག་ལ་སྦྱངས་འབྲས་འབུར་ཐོན་རྣམས། རི་ཁུག་ལྷ་ལུང་ཞེས་པའི་ས་ཆ་དེར་ཁ་གཏད་དུ་ཚོགས་ནས། འབྲས་སྤུངས་ཆབ་རིལ་ཞིག་གིས་རྡོ་ལ་དབྱུག་པས་ཉག་ཁ་བཏོད་ས་དེར། ཞལ་ངོ་དང་ནང་ཆབ་ལྷན་འཛོམས་ཀྱིས། མཆོངས་ར་གང་དུ་འཚོགས་རྒྱུ་ཤོ་བརྒྱབ་ཏེ་ཐག་གཅོད་དགོས། སེ་རར་འཐོབ་ན་མཆོངས་ར་འབྲོམ་སྟོད་དང་འཕན་པོ། སྟག་རྩེ་དང་ཆུ་མདའ་སོགས་ལ་འགྲོ་དགོས། ཁྱད་པར་དུ། མཁར་རྡོའི་བན་རྩེད་གྲོག་མོ་སེར་བྱེས་རྡོབ་རྡོབ་ཀྱི་མཆོང་ར་ཡིན་ཏེ། བན་རྩེད་གྲོག་མོ་གཡུ་ཡི་གཞོང་བ་འདྲ། །མཁར་རྡོའི་རི་དེ་རྒྱ་སེ་དཀར་བོ་འདྲ། །རྡོབ་རྡོབ་ང་ཚོ་སེང་གེ་གནམ་མཆོངས་འདྲ། །ཞེས་པའི་བརྗོད་སྲོལ་ཡང་ཡོད། གལ་ཏེ་འབྲས་སྤུངས་ལ་འཐོབ་ན། སྟོད་ལུང་དང་སླེ་ཐང་། ཡབ་མདའ། ཆུ་ཤུར་སྙེ་ཐང་སོགས་ལ་འགྲོ་དགོས། དེ་ནས་སྲིད་གཞུང་སོགས་ལ་སྙན་ཞུ་ཕུལ་ཏེ། ཆོག་མཆན་ཕབ་རྗེས་རྩོད་ལྒིང་བྱེད་མི་ཆོག་པའི་གན་རྒྱ་བཞག་ཏེ། བཀོད་སྒྲིག་པར་སྐྱ་སེར་དཔོན་རིགས་དང་། སྦྱིན་བདག་ཆེ་ཁག་ཕྱགས་ཕེབས་ཏེ། ཤན་འབྱེད་གནང་དགོས། དེ་ནས་དཔོན་རིགས་དང་ཞལ་ངོ་། སྦྱིན་བདག་ཁག་ལ་དབུ་གུར་ཕིབ་སྟེ། འགྲན་ཞུགས་ཀྱི་མཆོངས་རྩལ་བ་རྣམས་ཀྱི་མགོ་རྩོམ་པ་ཡིན། རྡོབ་རྡོབ་ཚོའི་མཆོངས་རྩལ་ལུས་རྩལ་གྱི་སྲོལ་གཏོད་མཁན་གཙང་སྨྱོན་ཧེ་རུ་ཀ་དང་དབུས་སྨྱོན་ཆོས་གྲགས་ཡིན་ཞེས་བརྗོད་པ་བདེན་ན། མ་མཐའ་ཡང་ལོ་ལྔ་བརྒྱ་ཙམ་གྱི་ལོ་རྒྱུས་ཡོད།
མཆོངས་ར་ནི། མཆོངས་རའི་འོབས་དོང་ཟབས་སུ་ཀུང་ཁྲེ་གཉིས་ཙམ་དང་། རིང་ཐུང་རྨིས་བཅུ་བཞི། རྒྱུགས་ལམ་རྨིས་བཞི་བཅུ་ཙམ། རྒྱང་རིང་ནས་མཆོངས་རའི་ཁ་བཀྱག་བར་སིག་འགྲོས་ཀྱིས་གྱེན་དུ་འགྲོ་དགོས་པ་བཅས་སོ། །
འགྲན་བསྡུར་གྱི་རྣམ་གྲངས་ལ། འཕུར་མཆོངས། བསྐོར་མཆོངས། འདྲིལ་མཆོངས། མདུན་མཆོངས། རྒྱབ་མཆོངས། མཆོངས་ཐག་རིང་ཤས་དང་། ཁུག་ཁུག་དང་། ལ་རྩེ་ཟེར་བ་དང་། གཞན་རྡོ་རྩལ་གྱི་སྐོར་ལ། རྐྱང་རྡོ། རྐུབ་རྡོ། རྒྱབ་རྡོ། འདྲིལ་རྡོ་སོགས་མི་འདྲ་བ་བཅུ་གསུམ་ཙམ་ཡོད་པར་བཤད། འགྲན་བསྡུར་རྒྱལ་ཁ་འཐོབ་ན། སྲིད་གཞུང་གྲྭ་ཚང་སོ་སོ་ནས་གཟེངས་རྟགས་འབུལ་སྲོལ་དང་། ཤོར་མཁན་ལ་གྲྭ་ཚང་སོ་སོས་ཉེས་ཆད་གཅོད་སྲོལ་ཡོད། ཁྱད་པར་དུ་འགྲན་རྩལ་རྣམ་གྲངས་ཚང་མ་ཤོར་མཁན་ཡིན་ན། ཤ་ལྤགས་གཡོག་ཏེ་ངོ་ཚ་དང་བཅས་མཆོངས་ར་ནས་ལོག་དགོས་པ་ཡིན། སྔ་དུས་ཡེར་བའི་མདར། བློ་གསལ་གླིང་བ་དང་བྱེས་པ་ཕྱོགས་རྒྱག་སྐབས་བཅུ་གཉིས་དང་ཀླད་ཀོར་གྱི་བསྡུར་ཚད་ཐོག་ནས་བློ་གླིང་བས། སེ་ར་རྡོབ་རྡོབ་ལ་ཤྭ་ལྤགས་གཡོགས་པས། འགྲོ་མི་དགོས་ཡེར་བའི་བྲག་ཕུག་ལ་ཕྱིན། །གོན་མི་དགོས་ཤྭ་ལྤགས་ཀྱི་ཕྱུ་པ་གོན། །ཞེས་པའི་གཏམ་ཡང་བྱུང་།
གྲྭ་བ་རྡོབ་རྡོབ་ཀྱི་ཆ་ལུགས་ནི། ཤམ་ཐབས་ལ་སྣུམ་དྲེག་ཆགས་པ། མདུན་རྒྱབ་ཏུ་སིལ་མང་བསྒྲིགས་པ། སྐྲ་རིང་བོར་འཇོག་པ། གདོང་དང་དཔྲལ་བ། མིག་གི་ཐན་ཀོར་བཅས་ལ་དྲེག་ནག་བྱུགས་པ། དཔུང་སྟེང་དུ་དར་ཚོན་སྣ་ལྔའི་སྡོམ་འཛར་དཔྱངས་པ། གདོང་ལ་རྫིག་ཉམས་ཆེ་ཞིང་ཇ་ཞགས་བྱུགས་པ་སོགས་སོ། །
རྡོབ་རྡོབ་ཀྱི་ལག་ཆ་ནི། ལྡེ་ལྕགས་ལག་མཐིལ་ཙམ་ཐོགས་པ། གྲི་སྣ་ཚོགས་འདོགས་པ། ཐོད་ཕྲེང་ཆེན་པོ་འདོགས་པ། བྱུ་རུའི་ཕྲ་རྒྱན་སོགས་སྤྲས་པ་བཅས་དྲག་ལ་རྫིག་ཉམས་ལྡན་པར་ཡོད།
རྣམ་པ་གཞན་དུ་ན། བཅོམ་ལྡན་འདས་ཀྱིས། ང་དང་ང་འདྲ་བའི་གང་ཟག་གི་ཚོད་ཟིན་གྱི། གཞན་དང་གཞན་གྱིས་མི་བྱའོ། །གསུངས་པ་ལྟར། གྲྭ་བ་རྡོབ་རྡོབ་ཀྱི་ནང་ནའང་། རང་ཅག་གིས་བསམ་ཡུལ་ལས་འདས་པའི་སྐྱེས་ཆེན་དམ་པ་མང་། དཔེར་ན། རྒྱལ་བ་སྐུ་ཕྲེང་གང་རུང་ཞིག་གིས། རྡོབ་རྡོབ་ལ་བརྟག་དཔྱོད་ཆེད་གྲྭ་རྐྱང་དཀྱུས་མའི་ལུགས་སུ། སེར་འབྲས་དགའ་གསུམ་ལ་གསང་ཉུལ་ཏུ་ཕྱིན་ཏེ། རྡོབ་རྡོབ་ཞིག་ལ་གནས་ཚང་གཡར་བས། ཉིན་མོར་རྡོབ་རྡོབ་ཀྱི་བརྟུལ་ཞུགས་ལྷུར་བཞེས་ཏེ་མ་རབས་ཐ་ཤལ་གྱི་ལས་བྱེད་པ་དང་། ནམ་གུང་ཡོལ་ནས་རབ་བྱུང་གི་གོས་ཚགས་ལེགས་པར་བགྱིས་ནས་དགེ་སྒྲུབ་ལ་འགྲུས་པས། རྒྱལ་དབང་ཁོང་ཧ་ལས་ཏེ་ལྔ་བཅུ་མ་ཞིག་ཡོད་པའི་ཕྱེད་ཀ་ལྐོག་ཏུ་རྩམ་སྒམ་ནང་བཞག་པས། རྡོབ་རྡོབ་དེས་ཕྱི་ཉིན་ཕྱེད་ཀ་དེ་རྒྱལ་དབང་ཚང་ལ་ཕུལ་བས། རིན་པོ་ཆེའི་ཞལ་ལས། ཕྱེད་ཀ་ཅིག་ཤོས་བླངས་ཏེ། ཁྱེད་ཀྱི་ལྔ་བཅུ་མ་དེ། འདིའི་ཕྱེད་ཀ་ཡིན་པ་འདྲ་གསུངས་ཏེ། ཕན་ཚུན་ངོ་ཤེས་ནས་ཐུགས་དགྱེས་དགྱེས་གནང་བའི་ལོ་རྒྱུས་ཡོད་པ་དང་།
ཡང་། ཨ་རིག་དགེ་བཤེས་ཆེན་མོ་གྲྭ་སར་བཞུགས་དུས། ཚེ་ཞིག་ཁོང་གི་བསམ་བློ་ལ། རང་ཕ་ཡུལ་དུ་སླེབས་ཏེ་དགོན་པ་ཞིག་བཏབ་ན། དགེ་འདུན་ཆིག་ཁྲི་ཙམ་བསྡུ་ཐུབ་ཚོད་འདུག་དགོངས་དུས། ཐོལ་བྱུང་དུ་རྡོབ་རྡོབ་ཞིག་གིས་ཁོའི་ཕྲག་སྟེང་དུ་ཐལ་ལྕག་ཅིག་བཞུས་ཏེ་ཁྱེད་ལ་ཧམ་པ་ཚ་བོ་འདུག སུམ་བརྒྱ་བཞི་བརྒྱ་ཙམ་འདུས་ན་འགྲིག་གི་རེད། ཅེས་ལུང་བསྟན་གནང་བས། ཕྱིས་དེ་ལྟར་གྱུར་བའི་ལོ་རྒྱུས་ཡོད་པ་དང་། དགའ་ལྡན་ཁྲི་ཐོག་གོ་དྲུག་པ་ཐུབ་བསྟན་ཀུན་དགའ་ལགས་ཀྱང་། གྲྭ་སར་ཞུགས་སྐབས་ཐམས་ཅད་ཀྱི་ཧར་གདོང་རྗེ་དྲུང་ཞེས་འབོད་ལ། སློབ་གཉེར་ཡེ་མི་མཛད་པར་རྡོབ་རྡོབ་ཀྱི་གྲས་སུ་ཞུགས་ཏེ་མཆོང་རྩལ་ལུས་རྩལ་སྣ་ཚོགས་གནང་སྐབས། ཚེ་ཞིག དགེ་བཤེས་མངའ་ལགས་ཀྱིས་ཁྱེད་ཀྱིས་སློབ་གཉེར་ལེགས་པོ་ཞིག་གནང་ཐུབ་ན། བདག་གིས་སེ་ར་ཚོགས་ཆེན་ཐོག་ཁང་དགུ་བརྩེགས་ཅན་ཞིག་བཞེངས་ཀྱང་ཆོག་ཞེས་འཕྱས་པའི་རྐྱེན་བྱས། སློབ་གཉེར་ལ་དམར་ནས་ཕྱིས་དགའ་ལྡན་ཁྲི་བར་བཞུགས་པ་ལྟ་བུ་ཡིན།
འདིར་གྲྭ་བ་རྡོབ་རྡོབ་གྲགས་ཅན་ཀླུ་འབུམ་མི་རྒོད་ཀྱི་ལོ་རྒྱུས་ཕྲན་ཙམ་ཞུས་ན། ཀླུ་འབུམ་མི་རྒོད་ནི་མདོ་སྨད་སྐུ་འབུམ་ཚོ་དྲུག་གི་ཡ་གྱལ་ཀླུ་འབུམ་ཚོ་བ﹙རོང་བོ་དགོན་ཆེན་གྱི་གདན་རབས་ལས། ཞོ་ཕོང་ཀླུ་འབུམ་མི་རྒོད། བསམ་བློ་མི་ཐུང་། འདི་གཉིས་ཀྱི་ལོ་རྒྱུས་གཞན་དུ་གསལ་བ་ལྟར་དབུས་སུའང་ཀླུ་འབུམ་ཁམས་ཚན་དང་། བསམ་བློ་ཁམས་ཚན་ཞེས་མཚན་གྱི་རོལ་མོ་ཀུན་ལ་གྲགས་པ་ལྟར་རོ་གསུངས། ﹚ནས་འཁྲུངས། སྡེ་འདབས་ན་ཆུ་མིག་མང་བོ་ཡོད་པའི་ཆ་ནས། ཀླུ་འབུམ་ཞེས་མིང་ཐོགས། སྡེ་སྲིད་སངས་རྒྱས་རྒྱ་མཚོ་དང་དུས་མཉམ་ཡིན། ཀླུ་འབུམ་མི་རྒོད་དང་བསམ་བློ་མི་ཐུང་གཉིས་དབུས་བཞུད་ཀྱི་ལམ་བར་དུ། ཨ་མདོ་རྡོ་འབུམ་སྔོ་རིས་ལ་མཇལ་ཏེ། ཀླུ་འབུམ་གྱིས་སྐྱེ་བོ་མི་བསྲུན་པ་ཟིལ་གྱིས་མནོན་ཆེད། གྲྭ་བ་རྡོབ་རྡོབ་ཞིག་ཏུ་འགྱུར་རྒྱུའི་སྨོན་ལམ་དང་། བསམ་བློ་མི་ཐུང་གིས་དགེ་བཤེས་ཆེན་མོ་ཞིག་ཏུ་འགྱུར་རྒྱུའི་སྨོན་ལམ་བཏབ། ཕྱིས་སུ་ཁོ་འབྲས་སྤུངས་དགོན་པར་ཞུགས་ཏེ་སྟོབས་རྩལ་དཔའ་གསུམ་ལ་བརྟེན་ནས་གཉོམ་ཆུང་ལ་རོགས་རམ་དང་། བཙན་པོའི་མགོ་མནོན་བྱས་པས། སྙན་གྲགས་འབར། ཚེ་ཞིག་ཁོས་ཀླུ་འབུམ་ཁམས་ཚན་ནས་བཞུགས་གདན་རེག་པར་དམིགས་ནས། འབྲས་སྤུངས་ཚོགས་ལ་འཚོགས་སྐབས་དང་བསྟུན་ནས། འདུ་ཁང་གི་སྒོ་གསུམ་པོ་ཕ་བོང་གཡག་རོ་འདྲ་བ་གསུམ་གྱིས་བཅད་དེ་ཚོགས་གྲོལ་ཏུ་མ་བཅུག་པས། ཞལ་ངོས་ཨུ་ཚུགས་མཐར་སྐྱེལ་གྱིས་ཞུ་བ་ཕུལ་ཀྱང་། ཁོས་མ་ཉན་པའི་ཁར། དགེ་བཤེས་ཡོད་ན་འཕུར་ལ་ཤོག །རྡོབ་རྡོབ་ཡོད་ན་བསློག་ལ་ཤོག །ཟེར་བས། བསམ་བློ་མི་ཐུང་སྒེའུ་ཁུང་ལས་འཕུར་ཡོང་བ་མ་གཏོགས། གཞན་ཐམས་ཅད་ལུས་པས། བཞུགས་གདན་འཇགས་རྒྱུ་ཁས་བླངས་ཏེ། ཕ་བོང་གསུམ་པོ་བསྐོར་ལམ་དུ་བསྐྱལ་བར་གྲགས། ཡང་། སྡེ་བ་གཞུང་གི་ཁོའི་མཛད་རྗེས་ལ་རྡོའི་རྒྱལ་མཚན་ཞིག་བསླངས་པས། དམངས་གཞས་སུ། ཀླུ་འབུམ་མི་རྒོད་མི་རེད། །རྡོ་ཡི་རྒྱལ་མཚན་རྡོ་རེད། །མགོ་ལ་རྒྱལ་མཚན་བཙུགས་པ། །སྐྱེས་པ་སྔོན་གྱི་ལས་རེད། །ཞེས་དང་། ཀླུ་འབུམ་མི་རྒོད་མི་རེད། །སེམས་པ་ལྕགས་ཀྱི་སྲ་རེད། །ལྕགས་ལ་གས་ཀ་ཤོར་ན། །སྐྱེས་པ་སྔོན་གྱི་ལས་རེད། །ཅེས་གཏོང་སྲོལ་ཡོད། གཞན་ཡང་། ཆོ་འཕྲུལ་སྨོན་ལམ་སྐབས་སུ། མ་རུང་འདྲེ་སྲིན་ཞིག་གིས་ཚོགས་མང་ལ་གནོད་པ་གཏོང་བ་གཟིགས་པས། ཁོང་གིས་མཐེབ་མཛུབ་དང་སྲིན་མཛུབ་བར་ལས། རྡོ་མ་མོའི་མཆིན་པ་ཙམ་འཕངས་ཏེ། བདུད་བཏུལ་བའི་ཡར་རྡོ་ར་ས་འཕྲུལ་སྣང་གཙུག་ལག་ཁང་གི་ཀ་གསེང་ལ་བརྡབས་པ། ད་ལྟ་ཡང་དངོས་སུ་མཐོང་རྒྱུ་ཡོད་པ་དང་། ཡང་སྔགས་ཕྲུག་ཞིག་དང་མ་འཆམ་པར། ལག་པ་གཡུགས་ཐེངས་གཅིག་གིས་རལ་བ་བཅད་པས། ཀུན་གྱིས་ཀླུ་འབུམ་མི་རྒོད་ཀྱི་ཁུ་ཚུར་སྟེང་དུ་གྲི་ཡོད་ཅེས་ལྒིང་བ་སོགས་ངོ་མཚར་བའི་བཤད་རྒྱུན་མང་དུ་ཡོད་དོ། །
ཨ་རིག་ལྒིན་པ།
ཨ་རིག་ནི་མདོ་སྨད་ཕྱོགས་ཀྱི་ཡུལ་ལུང་ཞིག་ཡིན་ལ། སྔོན་གྱི་ཚེ་ས་དེའི་མི་རྣམས་གཞུང་རྒྱུད་ཧ་ཅང་དྲང་ན་ཡང་། བླུན་ཞད་ཆེ་བས་དགོད་བྲོ་བའི་གཏམ་རྒྱུད་མང་བོ། རོ་ས་འོག་ཏུ་སོང་རུང་། གཏམ་ས་སྟེང་ལ་བཞག་ཡོད། དེའི་ནང་ཁ་ཅིག་ནི་ཨུ་ཚུགས་མཐར་སྐྱེལ་གྱི་བླུན་རྟགས་ཁོ་ན་དང་། ཡང་ལ་ལ་ཞིག་ནི། དེས་ན་བླུན་པོ་དད་པ་བརྟན། །དེ་ལ་སྦྱོར་བའི་དངོས་གྲུབ་ཉེ། །ཞེས་པ་ལྟར། ཆོས་མགོ་ཐོན་པ་སོགས་ཀྱི་དོན་སྙིང་ལྡན། འདིར་གཏམ་རྒྱུད་རེ་གཉིས་བརྗོད་ན།
ཨ་རིག་ལྒིན་པ་བདུན་ལྷ་སར་འགྲོ་བའི་གྲོས་འཆམ་སྟེ། ལམ་ལ་ཆས་སྐབས། སྐྱེལ་མི་ཀུན་གྱིས་ཁྱེད་ཚོར་མི་བདུན་ཡོད་པས། ཁྱེད་ཚོ་ཁ་འཐོར་མི་རུང་། ཡུལ་གང་དུ་སླེབས་ཚེ་ཚང་རྩིས་བྱ་དགོས་པར་གདམས། ཁོ་ཚོ་ལྷ་སའི་གཙང་བོ་བརྒལ་ཏེ། ཉི་མ་ལྷ་སར་འབྱོར་རྗེས། གཅིག་གིས་ཚང་རྩིས་བྱས་པས། ཇི་ལྟར་རྩིས་ཀྱང་མི་དྲུག་མ་གཏོགས་མ་རྙེད་པས། ཁོས་སྐད་ཆེན་པོས་འུ་ཅག་ཁྲོད་ཀྱི་གཅིག་ཆུས་འཁུར་སོང་ཞེས་སྐད་འབོད་བཏང་བས། ཐམས་ཅད་འུར་ལོང་ངེར་གྱུར་ཏེ་སོ་སོས་ཚང་རྩིས་བྱས་ཀྱང་། གཅིག་མི་ཚང་བ་ཁ་འཆམ། ཐམས་ཅད་ཅི་བྱ་གཏོལ་མེད་དུ་གྱུར་ཏེ། མོ་བ་ཞིག་གདན་དྲངས་ནས་མོ་རྒྱག་པའི་རེ་བ་ཞུས་པས། མོ་བས། འོ་ན་ཁྱེད་ཅག་གི་ཅ་ནེ་ཐང་ལ་བཞག་སྟེ་རྩིས་ཤིག་ཅེས་གདམས་པས། ཅ་ནེ་ཚང་ཡང་ཁོང་ཚོའི་ཅ་ནེ་ལག་ཏུ་བླངས་ནས་རྩིས་ན་དྲུག་ལས་མི་འདུག་ཟེར་ཏེ། ཁོང་ཚོ་རྣམ་རྟོག་ཆེན་པོ་ལངས་ནས། མི་གཅིག་ཆུས་འཁུར་བར་མ་ཟད། ད་དུང་འདྲེ་རུ་སྐྱེས་ཡོད་པ་ཁོ་ཐག་བཅད། སླར་ཡང་མོ་བ་ན་རེ། འདྲེ་རུ་སྐྱེས་ཚེ་ཚོར་ཤེས་དང་ཐོགས་རེག་མེད་པས། གྲལ་གོར་གོར་བྱས་ནས། འགྲམ་ལྕག་ཚ་བེར་བ་རེ་བཞུས་ཏེ་ཚང་བརྩི་བྱས་པས། ད་གཟོད་བརྩི་མཁན་རང་ཉིད་བརྗེད་པ་ཧ་གོ་བ་བྱུང་།
ཡང་། ཨ་རིག་ལྒིན་པ་ཞིག་ལྷ་སར་ཡང་ཡང་མཇལ་དུས། སྐུ་འདྲ་ཞིག་གིས་ལྷམ་གསོལ་མེད་པ་རྟོགས། རྗེས་སོར་ཡང་ཁོ་ལྷ་སར་ཕེབས་ཏེ་མཆོད་མཇལ་གནང་སྐབས། སྐུ་དེ་ལ་འཕྲད་པས། ང་རང་ལོ་མང་རབས་ལ་ཁྱེད་དང་མཇལ་རེས་ཀྱིས་སྐུ་ཉིད་ཞབས་རྗེན་ལགས་པས། རྗེས་མ་བདག་གིས་ཁྱེད་ལ་ལྷམ་ཞིག་བཟོས་ཏེ་འཁྱེར་ཡོང་། ཁྱེད་ཀྱི་རྐང་བ་ཚུར་སྲིངས་དང་། ཆེ་ཆུང་འཇལ་དགོས་ཞུས་པས། སྐུ་འདྲས་ཞབས་ཚུར་བསྲིངས་པའི་ལོ་རྒྱུས་ཡོད།
ཡང་། ཨ་རིག་ལྒིན་པ་སྐོར་ཞིག ལྷ་སར་མཆོད་མཇལ་དུ་སོང་སྟེ། ལམ་བར་དུ་གནས་ཚང་གཡར་ནས་ཞག་སྡོད་བྱས། གནས་མོས། དད་པ་རྩེ་གཅིག་གིས་དཀའ་སྤྱད་མང་བོ་བརྒྱབ་ནས། སྟོད་ཉི་མ་ལྷ་སར་མཆོད་མཇལ་དུ་ཕེབས་པའི་ཨ་མདོའི་སྐུ་མགྲོན་ལ་སྣེ་ལེན་བཟང་བོ་ཞིག་བྱེད་བསམ་སྟེ། འབྲས་བཙོས་ནས་ཕུལ་བས། ཨ་རིག་རྒད་པོ་རྣམས་གྲུང་ཉམས་དང་བཅས། ང་ཨ་རིག་ལྒིན་པ་བརྒྱ་ཡིན་ཀྱང་། །གྲོག་མའི་ཕྲུ་གུ་མི་ཟ་རྒྱུ་ལེ་ཤེས། །ཞེས་བཤད་དོ། །
ཡང་། ཨ་རིག་རྒད་པོ་ཞིག་ལྷ་སར་ཕེབས་ཏེ། སྐུ་དྲག་ཕྱུག་པོ་ཞིག་གི་ཁྱིམ་དུ་གནས་ཚང་གཡར་བས། སྐུ་དྲག་གི་གཟིམ་ཤག་ཏུ་སྣེ་ལེན་བྱས་པས། ཨ་རིག་གི་རྒད་པོ་དེས་སྔར་ས་གདན་མཐོང་མ་མྱོང་བས། ཨ་རིག་ལྒིན་པ་བརྒྱ་ཡིན་རུང་། །དཀྱིལ་འཁོར་ཐོག་ཏུ་མི་ཙོག་རྒྱུ་ལེ་ཤེས། །ཞེས་བཤད་དོ། །
ཡང་། ཨ་རིག་ལྒིན་པ་ཞིག་གིས་དངུལ་སྒོར་ཀོ་ཁུག་གང་འཁུར་ཏེ། ལྷ་སར་ཇོ་མཇལ་དུ་སོང་ནས། མཇལ་རྟེན་དུ་སྐུ་འདྲ་རེའི་མདུན་དུ། དངུལ་སྒོར་རེ་རེ། སི་ལིང་ལིང་། སི་ལིང་ལིང་། འཕངས་ཏེ། ད་ཨེ་ཆོག ད་ཨེ་ཆོག ཞེས་སྨྲས་པས། དངུལ་སྒོར་ཚར་ལ་ཉེ་རུང་། ད་དུང་ཇོ་བོས་ཆོག་གོ་མ་གསུངས་པས། རྒད་པོས། ཨེ། ད་ཚར་རྒྱུ་རེད་སྙམ་ནས། ད་ཨེ་ཆོག ད་རུང་ཇོ་བོ་ར་མ་རྒྱལ་མོ་ཡང་ཡོད་ནི་རེད་བཤད་པས། ཇོ་བོས་ད་ཆོག་གི་ཞེས་གསུང་འབྱོན་པར་བཤད་དོ། །
ཡང་། ཨ་རིག་ལྒིན་པ་ཞིག སེ་རར་མཆོད་མཇལ་དུ་སོང་བས། ཁོའི་ལག་རྟེན་ཐུགས་རྗེ་ཆེན་པོ་ལ་བཅོལ་ནས། ཁོ་རང་ཕྱི་ལོགས་སུ་སོང་ཤུལ་དུ། དཀོར་གཉེར་ཐོན་ཏེ། མི་གཙང་བའི་ལག་རྟེན་འདི་ནི་ལྷ་སྐུ་ལ་སྙེས་པར་མི་རུང་བསམ་ནས། སྒོར་འཕེན་རྩིས་བྱེད་སྐབས། ཐུགས་རྗེ་ཆེན་པོས། ལག་རྟེན་དེ་སྒོ་ལ་མ་འཕེན་རོགས། ང་ལ་ཨ་རིག་རྒན་པོས་བཅོལ་བ་ཡིན་ཞེས་གསུང་འབྱོན་པར་བཤད་ལ། ད་ལྟ་ཡང་སེ་ར་དགོན་པའི་ཐུགས་རྗེ་ཆེན་པོའི་ཐུགས་ཀར་སྦ་དབྱུག་གི་ལག་རྟེན་བཏགས་ནས་འཇལ་ཁ་གཏོང་སྲོལ་ཡོད་ཅེས་ཀྱང་གྲགས་སོ། །
ཡང་། ཨ་རིག་ལྒིན་པ་སྐོར་ཞིག ཁ་བ་ལྷབ་ལྷུབ་ཏུ་འབབ་པའི་མཚན་ལྗོངས་ཞིག་ལ། ལྷ་སར་ཇོ་མཇལ་དུ་བྲོས་པས། ཉིན་ལམ་མང་བོར་སོང་སོང་མཐར། ཉིན་ཞིག་རི་བོ་ཞིག་གདོང་ཁ་ནས་མར་བལྟས་ཚེ། གསེར་ཏོག་སེར་ལྷམ་མེར་ཡོད་པའི་གཙུག་ལག་ཁང་མང་བོ་མཐོང་བས། ཨོ། དེ་རིང་སྟོད་ཉི་མ་ལྷ་སར་ཐོན་པ་མིན་ན་ཅི་ཡིན་སྙམ་སྟེ། མགྱོགས་པོར་དགོན་མདུན་དུ་རྒྱུགས་ཚེ། ཕྱིར་ཨ་རིག་དགོན་པར་སླེབས་འདུག་པ་ཚོར་རོ། །
ཡང་། ཨ་རིག་རྒད་པོ་ཞིག་གིས་ཇོ་མཇལ་གནང་སྐབས། སྟབས་མ་ལེགས་པར་མགོ་བོ་དྲ་ཚིགས་བར་དུ་ཤོར་བས། ཕྱིར་ལེན་མ་ཐུབ་པར་ཤི་ལ་ཐུག་ཚེ། ཁོས་ཡུལ་མི་ལ་སྐད་འདི་ལྟར་བཏང་སྟེ། རྒན་པོ་ང་རང་། ཤི་ས་བཟང་གི ཇོ་བོའི་མདུན་རེད། ཤི་སྲོལ་བཙོག་གི དྲ་ཚིགས་བར་རེད། ཅེས་ཨུ་ཐུག་ཐབས་ཟད་སྐབས། གཞན་ཞིག་ཡོང་སྟེ། ཁྱེད་ཀྱིས་དེ་འདྲ་རང་མ་ལབ་དང་། ཁྱོད་རང་གིས་སྔོན་ལ་མགོ་བོ་ཇི་ལྟར་ཚུད་ན། དེ་ལྟར་སླར་ཕྱུངས་དང་ཞེས་གདམས་པས། ཨ་རིག་ལྒིན་པས་དེ་ལྟར་བྱས་ནས། མགོ་བོ་བདེ་བླག་ངང་བླངས་སོ། །
ཡང་། ཨ་རིག་རྒད་པོ་ཞིག་ལྷ་ཁང་རེ་རེ་བཞིན་མཇལ་བསྐོར་དུ་ཕྱིན། སྐབས་ཞིག་ལྷ་ཁང་ཆུང་ཆུང་ཞིག་ལ་མཆོད་མཇལ་དུ་ཕྱིན་ཚེ། ལག་རྟེན་སྐག་ལ་གསེབ་པ་སྒོ་ཤིང་ལ་ཐོགས་ཏེ་སྒོར་འབུད་མ་ཐུབ་པས། རྒད་པོས། ཨ་རོ། ད་ང་ཐོངས། ད་ང་ཐོངས་ལན་འགར་སྨྲས་ཀྱང་མ་བཏང་བས། ཁོས་དབྱུག་པ་ཕྱུངས་ཏེ་ལྷ་སྐུ་ལ་རྡེག་པས། ལྷ་སྐུའི་ལག་པ་མགོ་ལ་བཀབ་སྟེ། ཨ་ལ་ལ་ཞེས་གསུང་འབྱོན་པས། ཕྱིས་ལྷ་སྐུ་དེ་ལ་ལག་པ་མགོ་བཀབ་མར་གྲགས་སོ། །
ཡང་། ཨ་རིག་རྒད་པོ་ཞིག་ལྷ་སར་ལན་མང་བོར་ཇོ་མཇལ་དུ་སོང་བས། རྒད་པོས་ཇོ་སྐུ་ཞིག་ལ་ལྷམ་མེད་པར་རིག་ནས། ན་ནིང་ང་རང་འོང་ཀྱང་ཁྱེད་ལ་ལྷམ་མེད། ད་ལོར་ཡང་ལྷམ་མེད། སང་ལོར་ངས་ཁྱེད་ལ་ལྷམ་ཞིག་འཁྱེར་ཡོང་ཞེས་སྨྲས་ཏེ་ཕྱིར་ལོག སང་ལོར་རྒད་པོས་ལྷམ་ཞིག་འཁྱེར་ཡོང་སྟེ་བསྐོན་ཀྱང་ལྷམ་ཆུང་དྲགས་པས། རྒད་པོས་ཨ་ཧ་ཧ་ཆེས་རྐང་རྒན་ཞིག་རེད། ཡང་སང་ལོར་ངས་ལྷམ་ཆེན་པོ་ཞིག་འཁྱེར་ཡོང་ཞེས་སྨྲས་ཏེ། ད་ང་རང་མཆོད་མཇལ་དུ་འགྲོ་དགོས། ལྷམ་འདི་ཁྱེད་རང་ལ་བཅོལ་བ་ཡིན་ཟེར་ཏེ། ཇོ་བོའི་ཕྲག་པར་བཀལ་བས། དཀོར་གཉེར་རྣམ་རྟོག་ཟོས་ནས་སྒོར་གཡུགས་རྩིས་བྱེད་སྐབས། ཇོ་བོས། མ་འཕེན། མ་འཕེན། ང་ཨ་རིག་རྒད་པོས་བཅོལ་བ་ཡིན་ཞེས་གསུང་འབྱོན་ནོ། །
ཡང་། ཨ་རིག་གི་ཁྱིམ་ཚང་ཞིག་གིས་རུ་སྤོར་སྐབས། ས་ཆ་ཡག་ཤོས་ཅིག་བཙལ་ནས་མུན་རུབ་ལ་ཉེ་རག་བར་དུ་སོང་སྟེ། ཁལ་མ་དང་མི་རྟ་མང་བོ་ཨ་ཐང་ཆད་དེ། མཐར་མཚེར་ཤུལ་ཞིག་མཐོང་སྟེ། ཨ་ཙི། ཨ་ཕས་ཉལ་ས་བཅོས་བཅོས། །ཨ་མས་ཐབ་ཀ་ལས་ལས། །ཞེས་དུད་ཁྱིམ་གང་བོར་ཡ་མཚར་ནས། ནམ་སྟོད་དུ་རུ་བ་དེ་རུ་བབས་ཏེ་ཚགས་སུ་ཚུད་པ་བྱས་རྗེས། ངལ་ཞིང་དུབ་ནས་ནམ་སྨད་དུ་གཉིད་དུ་ཡུར་བས། ནངས་སྔའི་ཞོགས་པར་ཐམས་ཅད་སྒོར་བུད་ནས་བལྟས་ཚེ། རུ་བ་སྔོན་གྱི་འཚེར་སར་བབས་པ་རྟོགས་སོ། །
ཡང་། ཨ་རིག་ལྒིན་པ་ཞིག་གི་ཕ་རྒན་ཚེ་ལས་འདས་པས། ཁོའི་ཕ་རྒན་གྱི་སྔས་མགོ་ནས། ངས་ཡིན་གཅིག་མིན་གཉིས་ཇོ་བོ་རིན་པོ་ཆེ་འུ་ཚང་ལ་སྤྱན་དྲངས་ཏེ་ཆོས་གསུང་དུ་འཇུག་རྒྱུ་ཁས་ལེན་བྱས། ཁོས་དཀའ་བ་ཁྱད་གསད་ཀྱིས་ལྷ་སར་འབྱོར་ཏེ། ཇོ་ཁང་ནས་པུས་མོ་ས་ལ་བཙུགས་ཏེ་ལོ་དགུར་ཇོ་བོ་འབྱོན་པར་གསོལ་བ་བཏབ་པས། མཐར་ཇོ་བོས་ཞལ་ལས། ང་མི་འགྲོ་ཞེས་གསུང་འབྱོན་པས། དེ་ནས་བཟུང་ཇོ་བོ་དེ་ལ་ཇོ་བོ་མི་འགྲོ་གསུང་འབྱོན་དུ་གྲགས།
ཡང་། ཨ་རིག་གི་རྒན་པོ་རྒོད་པོ་སྐོར་ཞིག་གིས། རྒྱལ་དབང་ཐམས་ཅད་མཁྱེན་པ་ལ་འཕྲིན་ཡིག་ཞིག་ཕུལ་དགོས་པར། ཁུངས་བཙན་གྱི་ཆོས་གཞུང་གང་ལ་གཏུགས་དགོས་པའི་གྲོས་བརྡར་བྱེད་སྐབས། རྒན་པོ་ཞིག་གིས་འཕགས་པ་བརྒྱད་སྟོང་བར་གཏུགས་ན་བཟང་རབས་བཤད། སྐབས་དེར་ཡང་རྒན་པོ་ཞིག་ཐོལ་གྱིས་ལངས་ནས། བརྒྱད་སྟོང་བ་རོ་ཆེ་བ་མ་གཏོགས། ཡིན་རྒྱུ་ནི་རྡོ་རྗེ་གཅོད་པ་གན་འདྲེ་ལུ་ཞིག་ཡིན་ཞེས་བཤད་པས། ཐམས་ཅད་དེར་ཁ་འཆམ་སྟེ། རྡོ་རྗེ་གཅོད་པ་ནང་བཞིན། ཨ་རིག་རྒད་པོ་རྣམས་ཀྱིས་རྒྱལ་བ་རིན་པོ་ཆེ་ལ་བཀའ་བསྩལ་བ། ཞེས་པ་ལྟར་བྲིས་ཏེ་མཚམས་ཤིག་ལ་སྣག་ལུག་ཤོར་བས། འདི་ཐམས་ཅད་མཁྱེན་པས་ཧ་གོ་བར་མི་འདུག ད་ཅི་བྱ་ཞེས་ཡང་ཡང་བགྲོས་པའི་མཐར། ཁོ་ཚོའི་གྲོས་གཞི་ལྟར། མཚམས་འདིར་ནག་ནར་འདོང་འདོང་ཞིག་ཡོད་པ། ན་ཡིག་ཅིག་ལགས་ཞེས་གཤམ་དུ་མཆན་བཏབ་ཏེ་བསྐུར་བས། རྒྱལ་དབང་ཚང་ཧ་ཅང་ཐུགས་དགྱེས་བོ་བྱུང་། རྗེས་སོར་ཁོང་ཚོའི་ཁྲོད་ནས་ཡང་མཁས་པ་ཞིག་འཁྲུངས་ཏེ་འཕྲིན་ཡིག་ཆེ་བརྗོད་དང་སྙན་ངག་ལ་དྲངས་ཏེ་བསྐུར་བས། རིན་པོ་ཆེ་ཞལ་ནག་རོག་གེར་བཞུགས་པས། གམ་བཅར་བ་ཧ་ལས་ཏེ། དེ་ཅི་ལགས་དྲིས་པས། ཁོང་གི་ཞལ་ལས། དེང་སང་ཨ་རིག་ཡང་འདྲེ་རིག་ཏུ་གྱུར་ཡོད་ཅེས་གསུངས་པའི་ཁ་དཔེ་ད་ལྟའི་བར་དུ་ཡོད་པ་དེའོ། །