སྨྱུང་གནས།

༡ སྨྱུང་གནས་ཀྱི་བརྒྱུད་རིམ། སྔོན་འཇིག་རྟེན་གྱི་ཁམས་རིན་པོ་ཆེའི་བརྒྱན་པ་ཞེས་བྱ་བ་ཞིག་ན། སངས་རྒྱས་ལེགས་མཐོང་ཞེས་བྱ་བའི་ཆོས་འཁོར་བསྐོར་ཞིང་། ཐམས་ཅད་གསོ་སྦྱོང་ཡན་ལག་བརྒྱད་པའི་ཁྲིམས་ལ་གནས་བཅུག་ནས། གནས་སྐབས་དང་མཐར་ཐུག་གི་བདེ་བར་བཀོད་ཚེ། འཁོར་སྒྱུར་གསོ་སྦྱོང་འཕགས་ཞེས་བྱ་བས་ཀྱང་དེ་བཞིན་གཤེགས་པ་དེ་ལས། གསོ་སྦྱོང་ཡང་དག་པར་བླངས་ཏེ། ནམ་མཁར་འཕགས་ནས། སྐྱེ་བོ་མང་བོ་སྨྱུང་གནས་ཡན་ལག་བརྒྱད་པ་ལ་བཀོད་ནས། མི་དང་ལྷ་གནས་སུ་སྐྱེས་སོ། །

ཡང་། སྔོན་བསྐལ་བ་དཔག་ཏུ་མེད་པའི་སྔ་རོལ་ཏུ་སངས་རྒྱས་གཟི་བརྗིད་སྟོབས་ཞེས་པ་འཇིག་རྟེན་དུ་བྱོན་ནས་སེམས་ཅན་མང་བོ་སྨྱུང་གནས་ལ་བཀོད་དེ། ལ་ལ་དག་བྱང་ཆུབ་སེམས་དཔའ་དང་། ཐ་མ་རྣམས་ཀྱང་ལྷ་མིའི་གོ་འཕང་འཐོབ་བོ། །

དེ་ནས་སངས་རྒྱས་འོད་སྲུངས་མྱ་ངན་ལས་འདས་ནས་དམ་ཆོས་འཇིག་ལ་ཉེ་བ་ན། བྲམ་ཟེ་གཉིས་ཀྱིས་གསོ་སྦྱོང་ཡན་ལག་བརྒྱད་པ་བླངས་པས། གཅིག་གིས་ཚུལ་ཁྲིམས་རྣམ་དག་བསྲུངས་པས་རྒྱལ་བོར་སྐྱེས་པ་དང་། ཅིག་ཤོས་ཀྱིས་ཕྱི་དྲོའི་ཁ་ཟས་ཟོས་པས་ཀླུར་སྐྱེས་པས། ཀླུར་སྐྱེས་པ་དེས་རྒྱལ་བོའི་ར་བ་སྲུང་མཁན་བརྒྱུད་དེ། ཉིན་ཞག་གཅིག་གི་ཁྲིམས་ཀྱི་ཆོ་ག་བདག་ལ་བསྩལ་ཏུ་གསོལ། མ་གནང་ན་རྒྱལ་བོའི་ཡུལ་ཡང་རྒྱ་མཚོར་བསྒྱུར་རོ་ཞེས་འཕྲིན་སྤྲིངས་པས། རྒྱལ་བོ་ཤིན་ཏུ་མི་དགའ་ནས། བློན་པོ་མཆོག་གཅིག་མཆིས་པ་དེ་ལ་ཁྱོད་ཀྱིས་དཔེ་ཆ་དེ་མ་རྙེད་ན་གསོད་དོ། །ཞེས་བཀའ་ཕབ། བློན་པོ་ཨུ་ཐུག་ཏེ་ཕ་རྒན་ལ་སྨྲས་པས། ཕ་རྒན་གྱིས། རང་ཅག་གི་ཁྱིམ་ན་ཀ་བ་ཞིག་ལ་རྟག་ཏུ་འོད་འབྱུང་སྟེ། དེའི་ནང་ན་ཅི་ཡོད་ལྟོས་ཤིག་ཅེས་བསྒོས་པ་ལྟར། ཀ་བ་གཤགས་ཏེ་བལྟས་པས། རྟེན་འབྲེལ་བཅུ་གཉིས་ཀྱི་མདོ་དང་ཉིན་ཞག་གཅིག་པའི་ཁྲིམས་བརྒྱད་ཀྱི་དཔེ་བྱུང་བ་རྒྱལ་བོར་ཕུལ་བས། ཀླུ་དང་མིའི་ཡུལ་དུ་གསོ་སྦྱོང་ཡན་ལག་བརྒྱད་པ་དར་བར་མཛད་པ། མཛངས་བླུན་མདོ་ལས་ཀུན་ཏུ་རྒྱུས་ཚུལ་ཁྲིམས་བསྲུངས་པའི་ལེའུར་གསུངས་པ﹙བཤད་ཚུལ་འདི་དང་ཅུང་ཟད་མི་མཐུན་པ་བྲག་དཀར་སྤྲུལ་སྐུ་དང་བློ་བཟང་ལུང་རིགས་རྒྱ་མཚོའི་སྨྱུང་གནས་ཀྱི་ཆོ་གའི་ཟུར་བརྒྱན་ལས་གསུངས་པའི་ཁུངས་འཚོལ། ﹚དང་།

འོ་ན། ད་ལྟའི་སྨྱུང་གནས་ཀྱི་རྣལ་འབྱོར་ལ་བརྩོན་པ་འདི་གང་ལས་བརྒྱུད་ཅེ་ན། རྣམ་འདྲེན་བཞི་བ་སྟོན་པ་ཤཱཀྱ་ཐུབ་པས། ཐུགས་རྗེ་ཆེན་པོའི་རྒྱུད་རྣམས་འཕགས་པ་སྤྱན་རས་གཟིགས་དང་། འཇམ་དཔལ་དབྱངས། ཕྱག་ན་རྡོ་རྗེ་སོགས་ལ་གནང་། དེ་ལས་མགོན་པོ་ཀླུ་སྒྲུབ་ཡབ་སྲས་དང་། སློབ་དཔོན་ཛེ་ཏ་རི་དང་། རྡོ་རྗེ་གདན་པ་ཡབ་སྲས་བརྒྱུད་ཚུལ་དང་། ཡང་དགེ་སློང་མ་དཔལ་མོས་ཀྱང་གྲུབ་ཆེན་ཕག་ཚད་པ་སོགས་མཁས་གྲུབ་མང་དུ་བསྟེན་པ་སོགས་བརྒྱུད་རིམ་མང་དུ་སྣང་ཡང་། དེང་སང་ཡོངས་གྲགས་ལ་ཐུགས་རྗེ་ཆེན་པོ་ནས་དགེ་སློང་མ་དཔལ་མོར་བརྒྱུད་པ་འདི་གཙིགས་ཆེ། དེ་ཡང་དགེ་སློང་མ་དཔལ་མོས་ཐུགས་རྗེ་ཆེན་པོ་ཞལ་གཟིགས་ཤིང་། དབང་དང་གདམས་པ་ཐམས་ཅད་བུམ་པ་གང་བྱོའི་ཚུལ་དུ་གནང་བ་འདི། བྱིན་རླབས་ཉེ་བརྒྱུད་ཀྱི་དབང་དུ་བྱས་པ་ཡིན། དགེ་སློང་མ་དཔལ་མོ་ནས་རང་གི་དྲིན་ཆེན་རྩ་བའི་བླ་མའི་བར། རྡོ་ལག་རྒྱུན་དང་ཆུ་བུམ་རྒྱུན་གྱི་དཔེ་བཞིན་བརྒྱུད་པ་ནི། དགེ་སློང་མ་དཔལ་མོ་ནས་རིམ་བཞིན་པཎྚྀ་ཏ་ཟླ་བ་གཞོན་ནུ། མཁས་པ་ཡེ་ཤེས་བཟང་བོ། བལ་བོ་བེ་ཉ་བ། བྱང་སེམས་ཟླ་བ་ རྒྱལ་མཚན། ཉི་ཕུག་པ་ཆོས ་ཀྱི་གྲགས་པ། སྤྲུ་བ་རྡོ་རྗེ་རྒྱལ་བོ། ཞང་སྟོན་དགྲ་འཇིགས། རྩེ་འདུལ་ཐུགས་རྗེ་བྱང་ཆུབ། མཁན་ཆེན་བདེ་བ་ཅན་པ། ཆུ་བཟང་བྱང་ཆུབ་འབར། རིན་པོ་ཆེ་ཤེས་རབ་འབུམ། རྒྱལ་སྲས་ཐོགས་མེད་བཟང་བོ། ཀུན་མཁྱེན་ཤེས་རབ་དཔལ། ཞལ་སྔ་ནས་ཚུལ་ཁྲིམས་རྒྱལ་མཚན། རྗེ་ཡོན་ཏན་རིན་ཆེན། རྗེ་སངས་རྒྱས་རྒྱ་མཚོ། སྐྱབས་མཆོག་དཔལ་བཟང་། རྒྱལ་བ་བློ་བཟང་དོན་འགྲུབ། མཁས་གྲུབ་སངས་རྒྱས་ཡེ་ཤེས། པཎ་ཆེན་བློ་བཟང་ཆོས་ཀྱི་རྒྱལ་མཚན། དྲུང་བ་རྟ་ ཕུག་པ་དམ་ཆོས་རྒྱལ ་མཚན། སྒྲུབ་ཁང་དགེ་ལེགས་རྒྱ་མཚོ། ཕུར་ལྕོག་ངག་དབང་བྱམས་པ། ཡོངས་འཛིན་ཡེ་ཤེས་རྒྱལ་མཚན། གྲུབ་དབང་བསྐལ་བཟང་བསྟན་འཛིན་སོགས་བརྒྱུད་པ་ཡིན་ལ། སྨྱུང་གནས་བླ་མ་བརྒྱུད་པའི་རྣམ་ཐར་ཅུང་ཟད་རེ་བྲག་དཀར་སྤྲུལ་སྐུའི་སྨྱུང་གནས་བླ་མ་བརྒྱུད་པའི་རྣམ་ཐར་དང་ཕན་ཡོན་ན་གསལ་བས། དེར་གཟིགས་པར་བྱ་ལ།

འདིར་དགེ་སློང་མ་དཔལ་མོའི་རྣམ་ཐར་མདོར་བསྡུས་ཤིག་བཀོད་ན། རྒྱལ་སྲས་ཐོགས་མེད་བཟང་བོ་དཔལ་གྱིས། ཨིནྡྲ་བྷུ་ཏིས་ལུང་བསྟན་འཕགས་པ་བསྒྲུབས། །ཤིང་འཕེལ་གནས་སུ་མཆོག་གི་དངོས་གྲུབ་འཐོབ། །ཁ་སར་བ་ཎིར་ཆོ་འཕྲུལ་ཆེན་པོ་བསྟན། །དཔལ་ལྡན་དཔལ་མོའི་ཞབས་ལ་གསོལ་བ་འདེབས། །ཞེས་དང་། རྒྱལ་མཆོག་སྐལ་བཟང་རྒྱ་མཚོས། རྣམ་གྲོལ་མཆོག་གི་སར་གཤེགས་དཔལ་མོའི་ཞབས། །ཞེས་བསྔགས་པའི་དགེ་སློང་མ་དཔལ་མོ་ནི། རྒྱལ་བོ་ཨིནྡྲ་བྷུ་ཏིའི་སྲས་མོར་འཁྲུངས། སྐྱེད་བསྲིངས་ནས་རྒྱ་གར་ཉི་འོག་གི་རྒྱལ་བོ་སྡིག་སྤྱོད་ལ་དགའ་བ་ཞིག་ལ་ཆུང་མར་བརྫངས་ཀྱང་། དེར་མ་སླེབས་ཙམ་དུ་འཁོར་བ་ལ་ཞེན་ལོག་འཁྲུངས་ཏེ། སྨྱོ་རྫུ་གནང་ནས། དགེ་སློང་མའི་སྡོམ་པ་བླངས་ཤིང་། གྲུབ་ཆེན་ཕག་ཚད་པ་སོགས་མཁས་གྲུབ་མང་དུ་བསྟེན་ནས་རིག་པའི་གནས་ལྔ་དང་། ཁྱད་པར་དུ་གསང་སྔགས་ཀྱི་ཉམས་ལེན་ལ་བརྩོན་པ་མཛད། ནམ་ཞིག་གི་ཚེ། དགེ་སྦྱོར་གནད་དུ་སྨིན་ཏེ་སྒྲུབ་པ་ལ་སྐུལ་བའི་ཆེད་དུ། སྐུ་ལུས་ལ་མཛེ་ནད་བཞེས་ཏེ་སྣག་ཁྲག་བྱུང་ནས་ཟུག་གཟེར་གཟོད་དཀའ་བ་བྱུང་སྟེ། ཕྱག་གཡས་པའི་མཁྲིག་མ་ནས་ཆད་པས། བཟའ་བཏུང་ཡང་སྤྱོད་དཀའ་བ་བྱུང་སྟེ། དུད་འགྲོ་ལྟར་ཁ་སྦུབ་ཏུ་ཟ་དགོས་པ་བྱུང་བས། འཁོར་རྣམས་ཀྱིས་རྩའི་སྤྱིལ་བུ་ཞིག་ཏུ་བསྐྱལ། དེར་ཐུགས་ཧ་ཅང་སྐྱོ་བས་བཤུམ་གྱིན་བཞུགས་པའི་ཚེ། མཚན་ལམ་དུ་ཡབ་རྒྱལ་བོ་ཨིནྡྲ་བྷུ་ཏི་བྱོན་ནས། ཁྱོད་ལི་ཁ་ར་ཤིང་འཕེལ་དུ་བྱོན་ལ་ཐུགས་རྗེ་ཆེན་པོ་སྒྲུབས་ཤིག་ཅེས་ལུང་བསྟན་པ་བཞིན། དེར་ཕེབས་ཏེ་བཅུ་གཅིག་ཞལ་གྱི་དྲུང་དུ་བཞུགས་ནས། མཆོག་གི་དངོས་གྲུབ་མ་འཐོབ་བར་དུ་གཞན་དུ་མི་འགྲོ་བའི་དབུ་མནའ་བཞེས་ཏེ། ཐུགས་དམ་ལ་དམར་བས། ནད་ཐམས་ཅད་སྦྲུལ་ཤུན་ལྟར་ཕུད་ཅིང་། ཕྱག་གཡས་པ་ཡང་སོར་ཆུད་པས། སྐུ་ལུས་སྔར་བས་ཀྱང་ཡིད་འོང་དུ་གྱུར་ཏེ། ས་ལམ་གྱི་རྟོགས་པ་ཁྱད་པར་ཅན་ཐུགས་རྒྱུད་ལ་འཁྲུངས་ཤིང་། ལྷ་ཀླུ་བཙན་གསུམ་བྲན་ཏུ་འཁོལ་བར་མ་ཟད། རྗེ་བཙུན་སྒྲོལ་མ་དང་། དོན་ཞགས་ལྷ་ལྔ་སོགས་ཞལ་གཟིགས་ཤིང་། ཁྱད་པར་དུ་ས་ག་ཟླ་བའི་ཚེས་བཅོ་ལྔའི་ཉིན་ཐུགས་རྗེ་ཆེན་པོ་དངོས་སུ་ཞལ་གཟིགས་ཏེ། དབང་དང་གདམས་པ་བུམ་པ་གང་བྱོའི་ཚུལ་དུ་གསན། དེ་ནས་སེམས་ཅན་གྱི་དོན་དུ་སྨྱུང་གནས་ཟླ་གསུམ་དུ་སྲུང་མཐར། ཡུལ་དབུས་སུ་བྱོན་པས་ཐམས་ཅད་ཀྱི་སྐུ་ལུས་ཉ་ཟླ་ལྟར་དྭངས་པ་མཐོང་བས། དགེ་སློང་མ་འདིས་བསླབ་སྡོམ་ལ་ཅུང་ཟད་གཡེལ་ལམ་ཞེས་ཟེར་བས། གཞན་མ་དད་པ་ལྡོག་པའི་ཕྱིར། ཁ་སར་བ་ཎིའི་དུས་མཆོད་ཀྱི་ཁྲོམ་གསེབ་ཏུ་བྱོན་ཏེ་རང་གི་དབུ་བཅད་ནས། མཁར་གསིལ་གྱི་རྩེ་མོར་བཏགས་ཏེ། གར་བྱེད་པ་སོགས་ཆོ་འཕྲུལ་མང་དུ་བསྟན་ནས། ཁོ་ལ་ཕམ་པ་བྱུང་ན་མགོ་བོ་འབྱར་དུ་མི་བཏུབ། མ་བྱུང་ན་སླར་འབྱར་བའི་བདེན་སྟོབས་བརྗོད་པས། སླར་འབྱར་ཏེ་ཐམས་ཅད་ཀྱི་ལོག་ལྟ་ཞི་ཞིང་དད་པའི་ས་ལ་བཀོད་དེ། དབང་དང་བྱིན་རླབས་གནང་བས་གྲུབ་པ་འཐོབ་པའི་བུ་སློབ་མང་དུ་བྱུང་ངོ་། །

༢ བསྙེན་གནས་དང་ཐེག་ཆེན་གསོ་སྦྱོང་གི་མི་འདྲ་བའི་ཁྱད་པར། བསྙེན་གནས་དང་ཐེག་ཆེན་གསོ་སྦྱོང་གཉིས་སྤང་བྱ་བརྒྱད་སྤོང་བ་ཙམ་དུ་མཚུངས་ཀྱང་། མི་འདྲ་ས་གཞན་མང་སྟེ། ༡ གང་ནས་གསུངས་པའི་ཁུངས་མི་འདྲ་བ་ནི། བསྙེན་གནས་ཀྱི་ཆོ་ག་བྲམ་ཟེ་གནས་འཇོག་གི་མདོ་དང་། ཐེག་ཆེན་གསོ་སྦྱོང་ནི་དོན་ཞགས་ཞིབ་མོའི་རྒྱུད་ལས་གསུངས་པ་ཡིན། ༢ སྡོམ་པ་ལེན་པའི་རྟེན་མི་འདྲ་བ་ནི། བསྙེན་གནས་ནི་རབ་བྱུང་གིས་ལེན་དུ་མི་རུང་ལ། གསོ་སྦྱོང་ནི་དགེ་སློང་རྡོ་རྗེ་འཛིན་པས་ཀྱང་བླངས་ཆོག་པ་ཡིན། ༣ ལེན་པའི་ཀུན་སློང་མི་འདྲ་བ་ནི། བསྙེན་གནས་ནི་རང་དོན་ཁོ་ནར་མྱང་འདས་འཐོབ་འདོད་ཀྱི་བསམ་པ་ཙམ་ལ་བརྟེན་ནས་སྐྱེས་ལ། ཐེག་ཆེན་གསོ་སྦྱོང་ནི་གཞན་དོན་དུ་སངས་རྒྱས་འཐོབ་འདོད་དགོས་པ་ཡིན་ནོ། །༤ ཆོ་ག་མི་འདྲ་བ་ནི། བསྙེན་གནས་ནི་དགོངས་གསོལ་སྐྱབས་འགྲོ་སྔོན་དུ་བཏང་སྟེ་ལེན་དགོས་ལ། གསོ་སྦྱོང་ནི་ཕྱོགས་བཅུའི་སངས་རྒྱས་དང་བྱང་སེམས་ལ་དགོངས་གསོལ་སྔོན་དུ་བཏང་ནས། སྔོན་བྱོན་གྱི་རྒྱལ་བ་རྣམས་དང་ཚུལ་མཚུངས་པར་ཁས་ལེན་ལན་གསུམ་དུ་བྱས་ཏེ་ལེན་དགོས། ༥ འཐོབ་བྱའི་འབྲས་བུ་མི་འདྲ་བ་ནི། བསྙེན་གནས་ལ་སེམས་བསྐྱེད་པ་ལྟར་ཐེག་པ་ཆེ་ཆུང་གི་མྱང་འདས་གཉིས་ཀ་འབྱུང་ལ། གསོ་སྦྱོང་ལ་ནི་མ་ཉམས་ན་རྫོགས་པའི་བྱང་ཆུབ་ཀྱི་འབྲས་བུ་འབྱུང་བའི་ཕྱིར་རོ། །དེ་ལྟར་མི་འདྲ་བའི་ཁྱད་པར་མང་དུ་ཡོད་ཀྱང་། སྔོན་བྱོན་དམ་པ་རྣམས་ཀྱི་ལྔར་བསྡུས་ཏེ་གསུངས་པ་ལྟར། འདིར་ཡང་དེ་ལྟར་བཀོད་དོ། །

༣ ཐེག་ཆེན་གསོ་སྦྱོང་གི་སྡོམ་པ་ལེན་པའི་ཚུལ། སྡོམ་པ་མ་བླངས་པའི་སྔོན་འགྲོ་ལ་ཐ་མ་ཁ་དང་ཆང་། སྒོག་ཙོང་། ཟྭ་ཚོད་སོགས་ཉིན་འགའི་སྔོན་ལ་འཛེམ་དགོས་སྟེ། རནྟའི་ལུང་བསྟན་ལས། རྟེན་གྱི་སྐུ་ལ་དུ་བ་ཕོག་པ་ཡིས། །ལྷན་ཅིག་སྐྱེས་པའི་ལྷ་ནི་བྲོས་པ་དང་། །འཐུང་བའི་མོད་ལ་བྱང་ཆུབ་སེམས་རྩ་སྐེམ། །སྲོག་རྩར་གདོན་ཞུགས་ཚེ་ཐུང་དབུགས་ཀྱང་འཚང་། །བཞི་བརྒྱ་རྩ་བཞིའི་ནད་རྣམས་སྣ་འདྲེན་བྱེད། །ཅེས་དང་། འཐུང་བའི་མི་རྣམས་ཡི་དམ་ལྷ་བསྒྲུབ་ཀྱང་། །ལྷ་ཞལ་མི་སྟོན་ཚུར་ལ་གདོན་ཞལ་མཐོང་། །བསྐལ་བར་བསྒྲུབས་ཀྱང་མི་འགྲུབ་བར་ཆད་འབྱུང་། །ཞེས་དང་། ཆང་ལའང་འདུལ་བ་ལུང་ལས། ཆང་འཐུང་དམྱལ་བ་ངུ་འབོད་སྐྱེ། །སྦྱིན་མཁན་དེ་ཡི་འཁོར་དུ་སྐྱེ། །ཞེས་དང་། ཙོང་སྒོག་སོགས། འདུལ་བ་མདོ་རྩར། སྒོག་སྐྱ་ཞག་བདུན། ཀུན་དོང་ནི་ཞག་གསུམ། ཀེའུ་ནི་ཞག་གཅིག་མ་ལོན་པར་གཙུག་ལག་ཁང་དུ་འཇུག་པར་མི་བྱའོ། །ཞེས་སོ། །

སྡོམ་པ་ལེན་པའི་རྟེན་ལ། ཡོད་ན་རྟེན་དང་གང་ཟག མེད་ན་རྟེན་གསུམ་ལས་ཀྱང་ལེན་རུང་ལ། རབ་དགེ་སློང་ཁྲིམས་ལྡན་དང་། མིན་ན། ཁྱིམ་པ་གསོ་སྦྱོང་ལ་གནས་པ་ལས་ཀྱང་ངོ་། །སྡོམ་པ་ལེན་པ་དེ་ཡང་། སྐྱབས་གསུམ་སྔོན་དུ་བཏང་སྟེ། སྡོམ་པ་ཞུ་བའི་དོན་དུ་མཎྜལ་དབུལ། དེ་ནས་བྱང་ཆུབ་སེམས་ཀྱི་ཀུན་སློང་གསལ་བཏབ་ནས། ཕྱོགས་བཅུ་ན་བཞུགས་པའི་ཞེས་སོགས་དགོངས་གསོལ་སྔོན་དུ་བཏང་སྟེ། དངོས་གཞི་ལ། ཇི་ལྟར་སྔོན་གྱི་དེ་བཞིན་གཤེགས་པ་ཞེས་པ་ནས། གསོ་སྦྱོང་ཡང་དག་པར་བླང་བར་བགྱིའོ། །ཞེས་པའི་བར་བླ་མ་ལ་ཐུགས་རྗེ་ཆེན་པོའི་འདུ་ཤེས་བཞག་ནས། རྗེས་ཟློས་ལན་གསུམ་རྫོགས་པ་དང་ལྷན་དུ་སྡོམ་པ་མནོས་པའི་ཐོབ་བློ་བྱས་ཏེ། དགའ་བ་སྒོམ་པ་གལ་ཆེ། ཐབས་ལགས་ཀྱང་བྱ། དེ་ནས་ཚུལ་ཁྲིམས་སྔར་ཉམས་པ་སོས་ཤིང་། སླར་རྣམ་དག་འབྱུང་ཕྱིར་ཚུལ་ཁྲིམས་རྣམ་དག་གི་གཟུངས་ཉེར་གཅིག་བཟླ་ལ། ཁྲིམས་ཀྱི་ཚུལ་ཁྲིམས་སྐྱོན་མེད་ཅིང་། །སོགས་བཏོན་ཏེ་ཚུལ་ཁྲིམས་རྣམ་དག་གིས་མཐར་བརྒྱན་པར་བྱའོ། །

རྟེན་གྱི་དྲུང་དུ་ལེན་ཚེ། རྟེན་ལ་ཐུགས་རྗེ་ཆེན་པོ་དངོས་ཀྱི་འདུ་ཤེས་བཞག དགོངས་གསོལ་དང་། ཐབས་ལགས་འདོར་བ་མ་གཏོགས། གཞན་རྣམས་སྔར་ཇི་ལྟ་བ་བཞིན་ནོ། །

༤ ཐེག་ཆེན་གསོ་སྦྱོང་གི་བསྲུང་བྱ་ཡན་ལག་བརྒྱད། བཤེས་སྤྲིངས་ལས། འཚེ་དང་ཆོམ་རྐུན་འཁྲིག་པ་རྫུན་དང་ནི། །ཆང་དང་དུས་མིན་ཟས་ལ་ཆགས་པ་དང་། །མལ་སྟན་མཐོ་ལ་དགའ་དང་གླུ་དག་དང་། །གར་དང་ཕྲེང་བའི་ཁྱད་པར་རྣམ་སྤོང་ཞིང་། །ཞེས་དང་། ཐེག་ཆེན་གསོ་སྦྱོང་གི་ཆོ་ག་ལས། དེང་ནས་སྲོག་གཅོད་མི་བྱ་ཞིང་། །གཞན་གྱི་ནོར་ནི་བླང་མི་བྱ། །འཁྲིག་པའི་ཆོས་ཀྱང་མི་སྤྱད་ཀྱང་། །རྫུན་གྱི་ཚིག་ཀྱང་མི་སྨྲའོ། །སྐྱོན་ནི་མང་བོ་ཉེར་བསྟེན་པའི། །ཆང་ནི་ཡོངས་སུ་སྤང་བར་བྱ། །ཁྲི་སྟན་ཆེ་མཐོ་མི་བྱ་ཞིང་། །དེ་བཞིན་དུས་མ་ཡིན་པའི་ཟས། །དྲི་དང་ཕྲེང་བ་དང་ནི་རྒྱན། །གར་དང་གླུ་སོགས་སྤང་བར་བྱ། །ཞེས་སོ། །

དེ་ཡང་སྡོམ་པ་འཐོབ་པ་ཙམ་གྱི་མི་ཆོག་པར་ཚུལ་བཞིན་སྲུང་བ་འདི་ཤིན་ཏུ་ནས་ཀྱང་གལ་ཆེ་སྟེ། བྱམས་པའི་ལུང་བསྟན་པའི་མདོ་ལས། ཤཱཀྱ་སེང་གེ་བསྟན་པ་ལ། །བསླབ་གཞི་ཡང་དག་བླངས་ནས་སུ། །ཇི་ལྟར་སྲུང་བཞིན་བསྒྲུབས་པ་ནི། །ང་ཡི་བསྟན་ལ་ལྷགས་པ་ཡིན། །ཞེས་སོ། །སྐབས་འདིར་བསླབ་གཞི་གང་ཞེ་ན། རྩ་བ་བཞི་དང་ཡན་ལག་བཞི་སྤོང་བ་སྟེ། མངོན་པ་མཛོད་ལས། ཚུལ་ཁྲིམས་ཡན་ལག་བག་ཡོད་པའི། །ཡན་ལག་བརྟུལ་ཞུགས་ཡན་ལག་སྟེ། །བཞི་གཅིག་གསུམ་རིམ་གོ་རིམ་བཞིན། །ཞེས་པ་ལྟར། དང་བོ་བཞི་ཚུལ་ཁྲིམས་ཀྱི་ཡན་ལག་དང་། ཆང་སྤོང་བ་བག་ཡོད་ཀྱི་ཡན་ལག ལྷག་མ་གསུམ་བརྟུལ་ཞུགས་ཀྱི་ཡན་ལག་ཏུ་འདུའོ། །ཇོ་བོ་རྗེས་དེའི་སྟེང་གུང་ཚིགས་དཀར་གསུམ་ཁོ་ནར་སྤྱོད་པ་དང་། བག་ཡོད་ཀྱི་སླད་དུ་ཆབ་ལེན་པ་གཉིས་བསྣན་པའོ། །སྲུང་དུས་ཀྱང་། ལུས་དཀའ་ཐུབ། ངག་སྨྲ་བཅད། ཡིད་རྣམ་རྟོག་གིས་མ་བསླད་པར། གཙང་སྦྲ་དང་ལྡན་པའི་སྒོ་ནས་དགེ་སྦྱོར་ལ་བརྩོན་པར་བྱ་ལ། ཐ་ན་གཉིད་དང་གླལ་བ། འོག་རླུང་སོགས་ཀྱང་བསྡམས་ཞིང་། གལ་ཏེ་ཤོར་ན་གཟུངས་ཆུས་བཀྲུ་བར་བྱའོ། །ནངས་སྔ་མོའི་ཐོ་ཐུག་ཀྱང་ལུས་ལ་གནས་པའི་སྲིན་འབུ་རྣམས་གསོ་ཆེད་ཡིན་པས། འབག་ཐང་ཙམ་གྱིས་འཐུས་པར་བྱའོ། །

༥ སྨྱུང་གནས་སྲུང་བའི་དུས། སྨྱུང་གནས་སྲུང་བའི་དུས་ནི། ལྷའི་དབང་བོས་ཞུས་པའི་མདོ་ལས། ཚེས་བརྒྱད་དག་དང་བཅོ་ལྔ་དང་། །ཆོ་འཕྲུལ་ཆེན་པོའི་ཟླ་བ་ལ། །བསྙེན་གནས་ཡན་ལག་བརྒྱད་སྲུང་བས། །དེ་ནི་སངས་རྒྱས་ཉིད་དུ་འགྱུར། །ཞེས་དང་། བྱམས་པའི་ལུང་བསྟན་པའི་མདོ་ལས། ཟླ་ཕྱེད་ཀྱི་ནི་བཅུ་བཞི་དང་། །བཅོ་ལྔ་དེ་བཞིན་ཚེས་བརྒྱད་དང་། །ཆོ་འཕྲུལ་གྱི་ནི་ཟླ་ཕྱེད་ལ། །ཡན་ལག་བརྒྱད་ལ་ལེགས་གནས་པའི། །བསྙེན་གནས་གསོ་སྦྱོང་བྱས་པས་ནི། །ང་ཡི་བསྟན་ལ་ལྷགས་སོ་གསུངས། །ཞེས་དང་། ཞབས་དཀར་ཚོགས་དྲུག་རང་གྲོལ་གྱིས། ཚེས་གྲངས་བརྒྱད་ལ་བསྙེན་གནས་ཀྱི། །སྡོམ་པ་ཚུལ་བཞིན་བསྲུངས་གྱུར་ན། །གཅོད་གཏུབ་དམྱལ་བ་ལས་ཐར་ནས། །བསྐལ་བ་སུམ་ཅུའི་སྒྲིབ་པ་བྱང་། །བཅོ་ལྔའི་ཉིན་པར་བསྙེན་གནས་ཀྱི། །སྡོམ་པ་ཚུལ་བཞིན་བསྲུང་གྱུར་ན། །གྲང་བའི་དམྱལ་བ་ལས་ཐར་ནས། །བསྐལ་བ་སུམ་ཅུའི་སྡིག་པ་བྱང་། །གནམ་སྟོང་ཉིན་པར་བསྙེན་གནས་ཀྱི། །སྡོམ་པ་ཚུལ་བཞིན་སྲུང་གྱུར་ན། །ཚ་བའི་དམྱལ་བ་ལས་ཐར་ནས། །བསྐལ་བ་བརྒྱ་ཡི་སྡིག་པ་བྱང་། །དེ་ཕྱིར་ཁྱིམ་པ་དད་ལྡན་ཚོ། །བསྙེན་གནས་སྡོམ་པ་ཅི་ཐུབ་སྲུང་། །ཞེས་སོ། །འདི་དག་ནི་དུས་འགྱུར་གྱི་དགེ་རྩར་དམིགས་ནས་གསུངས་པ་ཡིན་ལ། གཞན་དུ་ཆོས་སེམས་འཁྲུངས་ཤིང་མཐུན་རྐྱེན་འཛོམས་ན་དེ་ཉིད་དུ་རུང་སྟེ། ཚེ་ལ་ངེས་པ་མེད་པའི་ཕྱིར་རོ། །རྒྱལ་བུ་སྙིང་རྗེ་ཆེར་སེམས་ཀྱིས་ཇི་སྲིད་འཚོའི་བར་དུ་སྡོམ་པ་བླངས་པ་དཀོན་བརྩེགས་ལས་གསུངས་པ་ལྟར་རོ། །

༦ ཚུལ་ཁྲིམས་རལ་བའི་ཉེས་དམིགས་བཤད་པ། འདུལ་བ་ལུང་ལས། འདི་ན་ལ་ལས་རྒྱལ་བོའི་ཚིག་ཆེན་ལས། །ལན་འགར་འདས་ཀྱང་ཆད་པ་འཐོབ་མི་འགྱུར། །ཐུབ་པའི་བཀའ་ལུང་ཚུལ་མིན་འདའ་བྱེད་ན། །དུད་འགྲོ་འགྲོ་འགྱུར་ཨེ་ལའི་འདབ་ཀླུ་བཞིན། །ཞེས་པ་ལྟར། ཀླུ་ཨེ་ལའི་འདབ་ཅེས་པ་སངས་རྒྱས་འོད་སྲུང་གི་བསྟན་པ་ལ། བཅས་པ་ཁྱད་དུ་བསད་དེ། ཤིང་ཨེ་ལའི་འདབ་མ་ཞིག་ཞེ་སྡང་གིས་བཅད་པས། དེའི་རྣམ་སྨིན་གྱིས། ད་ལྟ་ཡང་ཀླུ་ཨེ་ལའི་འདབ་ཞེས་བྱ་བ་མགོ་བོ་བདུན་ཡོད་པ། མགོ་བོ་རེ་རེ་ལ་ཨེ་ལའི་སྡོང་བོ་སྐྱེས་པ། སྲིན་འབུའི་རིགས་བརྒྱ་ཕྲག་དུ་མས་གང་བ། སྦྲང་བུའི་ཚོགས་དུ་མ་ལྡིང་ཞིང་སྣག་ཁྲག་འཛག་ཅིང་དྲི་ང་བ་ཞིག་ཏུ་སྐྱེས་པ་དང་།

ཡང་། སྨྱུང་གནས་ཀྱི་སྐབས། ཡན་ལག་རེ་རེ་མ་བསྲུངས་པའི་ཉེས་དམིགས་ནི། ༡ སྲོག་བཅད་ན། བསད་པས་ཚེ་ཐུང་ཞེས་པ་ལས་གཞན། དམྱལ་བ་ལས་སྐྱེས་ཏེ་སྡུག་བསྔལ་བཟོད་གླགས་མེད་པར་མྱངས་དགོས་པར་མ་ཟད། སྲོག་རེ་རེ་བཅད་པས། སྲོག་ལན་དགུ་བརྒྱ་གོ་དགུ་ནས་སུམ་བརྒྱའི་བར་མཆོག་དམན་ལ་ལྟོས་ནས་འཇལ་དགོས་པ་དང་། ༢ མ་བྱིན་པར་བླངས་པས། དམྱལ་བ་ངུ་འབོད་དུ་སྐྱེས་ལ། མིར་སྐྱེས་ཀྱང་ལོངས་སྤྱོད་དབུལ་ཞིང་གཞན་གྱིས་སྡང་བ། ༣ འཁྲིག་ཆོས་བརྟེན་པས། ངུ་འབོད་ཆེན་པོར་སྐྱེས་ལ། སྐྱེ་བ་ལྔ་བརྒྱར་མཛེ་མོ་དང་དབང་བོ་མི་ཚང་བ་སོགས་སུ་སྐྱེ། ༤ རྫུན་གྱིས་ནི། ཐིག་ནག་ཏུ་སྐྱེས་ལ། མིར་སྐྱེས་ཀྱང་ངག་ལྐུགས་པ་དང་། ཕྲག་དོག་ཆེ་བ། ཆོས་སྐད་མི་གོ་བར་སྐྱེ། ༥ ཆང་འཐུང་བས། ཟངས་ཞུན་ཁོལ་མ་འཐུང་བའི་ཚ་དམྱལ་དུ་སྐྱེས་ལ། མིར་སྐྱེས་ནའང་། གཏི་མུག་དང་བརྗེད་ངས་ཆེ་བ། ཁྲེལ་དང་ངོ་ཚ་མེད་པ། གནོད་སྦྱིན་དང་ཁྱི་དང་སྨྱོན་པ་རྣམས་ཀྱི་སྐྱེ་བ་ལྔ་བརྒྱ་རེ་ལེན་པ་དང་། ༦ ཁྲི་སྟན་ཆེ་མཐོ་ལ་བསྡད་པས། མལ་སྟན་མི་འབྱོར་ཞིང་། གཞན་གྱིས་གུས་བཀུར་མི་འཐོབ་པ་དང་། ཁྲི་སྟན་ཆེ་མཐོ་བསྡད་དེ་ཚུལ་ཁྲིམས་ཉམས་པས་ལན་ཆགས་ཤ་འཁོན་གཉེར་བའི་ལོ་རྒྱུས་ཤིག་ལ། སྔོན་རྒྱ་ནག་གི་ཡུལ་དུ་ཧྭ་ཤང་གི་སློབ་དཔོན་ཊི་ཥ་ན་བྱ་བ་འདུལ་ཁྲིམས་མིག་འབྲས་བཞིན་བསྲུང་བ་ཞིག་གིས། རྒྱལ་བོས་གནང་བའི་ཨ་ཀ་རུ་ནག་པོའི་ཁྲི་རིན་པོ་ཆེས་སྤྲས་པ་ཞིག་ལ་རྒྱལ་བོའི་བཀའ་ནན་ཆེ་བས་དབང་མེད་དུ་ལན་འགའི་བར་ལོངས་སྤྱད། མི་རིང་བར་པུས་མོའི་ལྷ་ང་ལ་ཕོལ་མིག་ཕོར་ཚད་ཙམ་མིག་གཉིས། སྨིན་མ་ཁ་སྣ་ཐམས་ཅད་ཚང་བ། ཁར་ཟས་བཅུག་ན་ཟ་བ། ན་ཚ་ཟུག་ཟེར་བཟོད་གླགས་མེད་པ་ཞིག་བྱུང་ནས་ཤིན་ཏུ་གདུངས་པ་ན། སྤྱན་རས་གཟིགས་ཀྱི་རྣམ་འཕྲུལ་ཧྭ་ཤང་ཞིག་དང་མཇལ་བས་དེས་ཆུ་མིག་ཞིག་གི་འགྲམ་དུ་ཁྲིད་ནས། ཕོལ་མིག་ཆུས་འཁྲུ་ཞིང་རྔ་ཡབ་ཀྱིས་བྱབས་བཞིན། དགེ་བཤེས་ཁྱོད་སྔོན་ཧཱན་གུར་གྱི་རྒྱལ་བོ་གིང་དྷིའི་ནང་བློན་ཡུའང་ཨང་དང་། ཕོལ་མིག་ཁྱོད་བློན་པོ་བཞོའུ་ཚོར་གྱུར་བ་ཨེ་དྲན། ཡུའང་ཨང་གིས་རྒྱལ་བོ་ལ་ཕྲ་མ་བཅུག་ནས་བཞོའུ་ཚོར་བསད་པ་ཨེ་དྲན། དེ་ནས་ཡུའང་ཨང་འགྱོད་པ་སྐྱེས་ནས་རབ་ཏུ་བྱུང་། ཡང་སྲིད་ཕྱི་མ་ནས་ད་ལྟའི་བར་མཐར་ཆགས་སུ་ཚུལ་ཁྲིམས་སྲོག་ལྟར་བསྲུངས་པས། བཞོའུ་ཚོ་ཁྱོད་ཀྱིས་ཤ་འཁོན་གཉེར་ནས་ཁོའི་སྐྱེ་བ་བཅུའི་བར་དུ་འབྲངས་ཀྱང་། ཚུལ་ཁྲིམས་བསྲུང་བའི་སྟོབས་ཀྱིས་གླགས་མ་རྙེད་པ་ཨེ་དྲན། ཞེས་གསུངས་པ་རྣམས་ལ་ཕོལ་མིག་གིས་ཀྱང་། ཨང་ཞེས་ལན་རེ་བཏབ། ཡུའང་ཨང་གི་སྐྱེ་བ་འདིར་དེ་ཉིན་ཁྲི་རིན་ཐང་ཅན་ལ་ལོངས་སྦྱད་པས་བཅས་འགལ་བྱུང་སྟེ། ཁྱོད་ཀྱིས་གླགས་རྙེད་ནས་གནོད་པ་བྱེད་ཐུབ་འདུག་ཀྱང་། ཁྱོད་ལའང་སླར་ལས་འདིའི་རྣམ་སྨིན་འབྱུང་བར་ངེས་པས། ད་རེས་ངེད་ཀྱིས་ཁྱེད་གཉིས་འདུམ་པར་བྱ་ཡི་ཐོངས་ཤིག་ཅེས་གསུངས་པས། ཕོལ་མིག་དེ་འབག་དོར་བ་བཞིན་དུ་ལྷུང་ཞེས་རྒྱ་ནག་ཆོས་འབྱུང་ལས་གསུངས་སོ། །༧ དུས་མིན་གྱི་ཟས་ཟོས་པས། སྔོན་སངས་རྒྱས་འོད་སྲུང་གི་བསྟན་པ་ལ། བྲམ་ཟེ་གཉིས་ཀྱིས་ཐེག་ཆེན་གསོ་སྦྱོང་གི་སྡོམ་པ་བླངས། གཅིག་གིས་ཕྱི་དྲོའི་ཁ་ཟས་ཟོས་པས། ཀླུར་སྐྱེས་པ་མཛངས་བླུན་མདོ་ན་གསུངས་པ་དང་།

ཡང་བྲམ་ཟེ་སྤྲང་བོ་ཞིག་གིས་གསོ་སྦྱོང་བླངས་ཏེ་སོང་བས། རི་བྲག་ཅིག་ཏུ་སླེབས་པ་ན་མུན་རུབ་པས། གནས་ཚང་གཡར་ཏེ་ཁ་ཟས་མ་ཟོས་པས། གནས་བདག་གིས་ཁྱེད་ཀྱིས་མི་ཟ་ན། ངེད་ཀྱི་ཁྱིམ་དུ་མ་འདུག་ཅིག་ཅེས་སྤྲད་པས། ཁོ་སྐྲག་ཏེ་ཁ་ཟས་ཟོས་པས། ཚེ་འཕོས་ནས་རྒྱལ་ཆེན་རིགས་བཞི་ལས་ལྷའི་བུ་གསོ་སྦྱོང་རལ་ཞེས་མིང་ངན་ཐོགས་ཏེ། ལོངས་སྤྱོད་དང་གཟི་བརྗིད་ལྷ་གཞན་ལས་དམན་པ་ཞིག་ཏུ་སྐྱེས་པ་དང་། ཡང་རྒན་མོ་སྡིག་རྒན་མ་མི་བཅུ་བསད་པ་ཞིག་སྨྱུང་གནས་ཐེངས་གསུམ་བསྲུངས་པས། ཐེངས་གཅིག་ཁ་ཟས་ཅུང་ཙམ་ཟོས། ཐེངས་གཅིག་ཆུ་འཐུང་། ཐེངས་གཅིག་ལེགས་པར་བསྲུངས་ནས་ཚེ་འཕོས་པས། རྒྱལ་སྲས་ཤིག་ཏུ་འཁྲུངས་ཀྱང་། ཟས་ཟོས་པས་མདོག་ངན་པ་དང་། ཆུ་འཐུང་བས་སེམས་རྣལ་ཏུ་མི་གནས་པའི་སྨྱོན་པ་ཞིག་ཏུ་སྐྱེས་པ་ལྟ་བུའོ། །འོན་ཀྱང་ཞབས་དཀར་བས། ན་ན་བསྙེན་གནས་སྡོམ་པ་སྲུང་། །མ་ཐུབ་བཞག་ན་འཆོར་བ་མིན། །ན་བ་སོས་ནས་མ་བསྲུང་ན། །སྡོམ་པ་འཆོར་བའི་སྲུང་བར་གྱིས། །བརྗེད་ནས་རྩམ་པ་སོགས་ཟོས་ཀྱང་། །བཤགས་ཏེ་བསྲུངས་ན་ཉེས་པ་མེད། །ཚོགས་ཀྱི་འཁོར་ལོ་བསྐོར་བའི་ཚེ། །ཟོས་ན་སྡོམ་པ་འཆོར་བ་མིན། །ཟོས་རྗེས་སྔར་ལྟར་མ་བསྲུང་ན། །སྡོམ་པ་འཆོར་བས་སྲུང་བར་མཛོད། །ཅེས་ཀྱང་གསུངས་སོ། །༨ ཆགས་སེམས་ཀྱིས་དྲི་བྱུགས་པས། ཚེ་འཕོས་ནས་དྲི་ངན་བྲོ་བ་དང་། མཚན་བཟང་མི་ལྡན་པ། གླུ་གར་གྱི་རྩེད་འཇོར་རོལ་བས། ཚེ་རབས་ཀུན་ཏུ་ཤེས་རྒྱུད་རྒོད་པ་དང་། ངག་ལ་ཆོས་ཀྱི་སྒྲ་མི་འཁྱོངས་པའོ། །

༧ གསོ་སྦྱོང་ཡན་ལག་བརྒྱད་པའི་ཕན་ཡོན་བཤད་པ། དང་བོ། ཡན་ལག་བརྒྱད་པ་སྤྱིའི་ཕན་ཡོན། ༡ དུས་ཀྱི་སྒོ་ནས་ཕན་ཡོན་ཆེ་བ་ནི། ཏིང་འཛིན་རྒྱལ་བོའི་མདོ་ལས། བསྐལ་བ་བྱེ་བ་གང་གཱའི་བྱེ་སྙེད་ཀྱི། །དང་བའི་སེམས་ཀྱིས་ཟས་དང་སྐོམ་རྣམས་དང་། །གདུགས་དང་བ་དན་མར་མེ་ཕྲེང་བ་ཡིས། །སངས་རྒྱས་བྱེ་བ་ཁྲི་ཕྲག་རིམ་གྲོ་བྱས། །གང་གི་དམ་ཆོས་རབ་ཏུ་འཇིག་པ་དང་། །བདེ་གཤེགས་བསྟན་པ་འགག་པར་གྱུར་བའི་ཚེ། །ཉིན་མཚན་དུ་ནི་བསླབ་པ་གཅིག་སྤྱོད་པ། །བསོད་ནམས་འདི་ནི་དེ་བས་བྱེ་བྲག་འཕགས། །ཞེས་བསྐལ་བ་གྲངས་མེད་དུ། དང་བའི་སེམས་ཀྱིས་མཆོད་པའི་རྣམ་གྲངས་ཇི་སྙེད་ཅིག་གིས། སངས་རྒྱས་འབྱམས་ཀླས་པར་རིམ་གྲོ་བྱས་པ་ལས། བསྟན་པའི་དུས་མཐའ་འདིར་བསླབ་པ་སྣ་གཅིག་སྲུང་ན་ཕན་ཡོན་ཆེ་བར་བསྟན་པའི་ཤུགས་ལས། གསོ་སྦྱོང་གི་སྡོམ་པ་ལན་གཅིག་སྲུང་ན་ཕན་ཡོན་ཆེ་བ་གཏོགས་ཐུབ། བྱམས་པ་རང་གི་གསུངས་ལས་ཀྱང་། ཤཱཀྱ་ཐུབ་པའི་བསྟན་པ་ལ། །དད་པས་གང་གིས་ཆོས་ཉན་ཅིང་། །བསྙེན་གནས་ཡན་ལག་བརྒྱད་བསྲུངས་པ། །དེ་ཡི་འཁོར་དུ་སྐྱེ་བར་འགྱུར། །ཞེས་དང་། དབྱིག་གཉེན་གྱིས། གང་གི་དད་པའི་སེམས་ཀྱིས་ནི། །ལོ་བརྒྱར་སྦྱིན་པ་བྱིན་པ་བས། །གང་གི་ཉིན་གཅིག་ཚུལ་ཁྲིམས་ནི། །བསྲུངས་པའི་བསོད་ནམས་ཁྱད་པར་འཕགས། །ཞེས་སོ། །༢ ཡུལ་གྱི་སྒོ་ནས་ཕན་ཡོན་ཆེ་བ་ནི། དག་ཞིང་རྣམས་སུ་དགེ་བ་རྣམ་དག་བསྐལ་བར་བསྒྲུབས་པ་ལས། མ་དག་པའི་ཞིང་ཁམས་འདིར་དགེ་བ་སྣ་གཅིག་སེ་གོལ་གཏོགས་པའི་ཡུན་ཙམ་དུ་བསྒྲུབས་ན། བསོད་ནམས་ཁྱད་དུ་འཕགས་པར་གསུངས་སོ། །ཚུལ་འདི་ལ་དགོངས་ནས། ཡབ་རྗེ་བླ་མས་ཀྱང་། ལྷ་སྤྱན་རས་གཟིགས་ལས་མྱུར་བ་མེད། །ཆོས་ཡི་གེ་དྲུག་མས་ཟབ་པ་མེད། །སྡིག་སྦྱོང་ཐབས་བསྙུང་གནས་ལས་ལྷག་མེད། །འགག་ཉག་ག་མ་ནོར་རི་ཁྲོད་པ། །གསུངས་སོ། །༣ མི་མིན་གྱི་བར་ཆད་ཀྱིས་མི་ཚུགས་པ་ནི། ཚུལ་ཁྲིམས་ཡང་དག་པར་ལྡན་པའི་མདོ་ལས། ཇི་ལྟར་སྦྲུལ་གདུག་ཀླུ་ཆེན་ནག་པོ་ཡང་། །ཚུལ་ཁྲིམས་ལྡན་ལ་གནོད་མེད་གཞན་ཅི་སྨོས། །ཞེས་པ་ལྟར། སྔོན་རྒན་མོ་ཞིག་ཡན་ལག་བརྒྱད་པའི་གསོ་སྦྱོང་བླངས་ཏེ། ནམ་ཕྱེད་ཙམ་ན། རྒྱལ་བོ་གསལ་རྒྱལ་གྱིས། མི་ནག་ཆེན་ཞིག་ལ་ལྟོ་བསྐྱལ་བར་བང་ཆེན་དུ་མངགས་པས། ལམ་བར་དུ་མི་མ་ཡིན་ཁག་གསུམ་དང་འཕྲད་ཀྱང་། དེ་དག་གིས་གནོད་པའི་གླགས་མ་རྙེད་པའི་ལོ་རྒྱུས་འདུལ་བ་ལུང་ལས་གསུངས་པ་དང་། ༤ རྟེན་གྱི་སྒོ་ནས་ཕན་ཡོན་ཆེ་བ་ནི། དཔུང་བཟང་གིས་ཞུས་པའི་རྒྱུད་ལས། ཇི་ལྟར་ལོ་ཏོག་ཐམས་ཅད་ས་ལ་ནི། །བརྟེན་ནས་སྐྱོན་མེད་པར་ནི་སྐྱེས་པ་ལྟར། །དེ་བཞིན་ཚུལ་ཁྲིམས་བརྟེན་ནས་ཆོས་དཀར་མཆོག། སྙིང་རྗེའི་ཆུས་བརླན་པས་ནི་རྣམ་པར་སྐྱེ། །ཞེས་པ་ལྟར། ཚུལ་ཁྲིམས་ནི་ཡོན་ཏན་ཆེ་སྐྱེས་ཆུང་སྐྱེས་ཐམས་ཅད་ཀྱི་གཞི་རྟེན་ཡིན་པར་མ་ཟད། ཆོས་སྒྲུབ་པ་ལ་ས་ཆོད་གཞན་ལས་ཆེ་སྟེ། ཞབས་དཀར་བས། བསྙེན་གནས་མ་བསྲུངས་གནས་སྐབས་སུ། །མར་ཁུ་རྒྱ་མཚོ་ཙམ་ཞིག་ལ། །སྡོང་བུ་རི་རབ་ཙམ་པ་ཞིག །བཙུགས་ནས་མར་མེ་ཕུལ་བ་བས། །སྡོམ་པ་བསྲུངས་པའི་ཉི་མ་དེར། །མར་ཁུ་ཐིགས་པ་ཙམ་ཞིག་ལ། །སྡོང་བུ་ཁབ་རྩེ་ཙམ་པ་ཞིག །བཙུགས་ནས་མར་མེ་ཕུལ་བ་དེ། །ཕན་ཡོན་ཤིན་ཏུ་ཆེ་བ་ཡིན། །བསྙེན་གནས་བསྲུང་བའི་ཉི་མ་དེར། །ཚོགས་བསགས་རྒྱ་ཆེན་བྱས་གྱུར་ན། །ཕྱི་མ་འདོད་ཁམས་ལྷ་རུ་སྐྱེ། །ཚོགས་བསགས་འབྲིང་ཙམ་བྱས་གྱུར་ན། །རབ་ཏུ་བྱུང་བའི་མི་རུ་སྐྱེ། །ཚོགས་བསགས་ཅུང་ཟད་བྱས་ན་ཡང་། །ཕྱི་མ་མི་ལུས་གཙང་མ་འཐོབ། །དེ་ཕྱིར་སྡོམ་པ་སྲུང་བའི་ཉིན། །ཚོགས་བསགས་གྱིས་ཤིག་དད་ཅན་ཚོ། །ཞེས་སོ། །ཡིག་དྲུག་གི་ཕན་ཡོན་བརྗོད་པ་པད་དཀར་ཆུན་པོ་ལས་ཀྱང་། སྨྱུང་གནས་བྱས་པའི་ནངས་པར་སྔ་དྲོ་དེ་དག་ལ་བཤོས་དྲངས་ན། ས་བརྒྱད་པ་ལ་གནས་པའི་བྱང་ཆུབ་སེམས་དཔའ་དྲངས་པ་དང་བསོད་ནམས་མཉམ་པ་དང་། གསོ་སྦྱོང་བླངས་པ་ཙམ་ལ་དྲངས་ན་དགྲ་བཅོམ་པ་ལ་དྲངས་པ་དང་བསོད་ནམས་མཉམ་པར་གསུངས་སོ། །༥ སྨྱུང་བར་གནས་པའི་གཏམ་རྒྱུད་དང་སྦྱར་ཏེ་ཕན་ཡོན་འགའ་བཤད་ན། མི་གཅིག་གིས་ཕ་མ་ཤི་སྟེ་ཆོས་བྱེད་རྒྱུ་མེད་པས་སྡུག་བསྔལ་ཤིན་ཏུ་ཆེ་སྐབས། བླ་མ་རིན་པོ་ཆེ་ཐོགས་མེད་ཀྱིས་དགོངས་ནས། ཁྱེད་ཀྱིས་ཕ་མའི་དྲིན་ལན་བསབ་ན་སྨྱུང་གནས་གྱིས། གསུངས་པ་བཞིན། གདན་གཅིག་སོ་ལྔ་བྱས་པས། ཕ་མ་གཉིས་ཐར་བ་འཐོབ་ལ། ཁོ་ཡང་དགྲ་བཅོམ་འཐོབ་པར་གསུངས་སོ། །

ཡང་། གནོད་སྦྱིན་ཤ་ཟ་ལྔས་རྒྱལ་བོ་བྱམས་པའི་སྟོབས་ལ་ཤ་ཁྲག་དྲོན་མོ་བསླངས་པས། རྒྱལ་བོས་སྐུ་ཤ་བཅད་དེ་བྱིན་པས། དེ་དག་གིས་ཁ་ཟས་ཀྱི་ཆེད་དུ་སྐུ་ཉིད་ལ་གནོད་པ་བྱས་པ་གཟོད་པར་འཚལ་ཞུས་པས། རྒྱལ་བོས་དེ་དག་གསོ་སྦྱོང་ཡན་ལག་བརྒྱད་པར་བཀོད་པས། དེའི་ཕན་ཡོན་གྱིས། བཅོམ་ལྡན་འདས་ཀྱི་སྤྱད་པ་སྤྱོད་པའི་ཚེ་འཁོར་ཤ་སྟག་ཏུ་སྐྱེས་ཤིང་། མཐར་སངས་རྒྱས་པའི་ཚེ་ཡང་འཁོར་གྱི་ཐོག་མ་ལྔ་སྡེར་འཁྲུངས་ཏེ་དགྲ་བཅོམ་འཐོབ་པ་ཡིན།

ཡང་། གྲུབ་ཆེན་ཉི་མ་སྦས་པའི་ཞལ་ལས། བུད་མེད་ཅིག་བུ་གཅིག་དང་། དུད་འགྲོ་ཡང་མང་བོ་ལག་ཉེས་ལ་སོང་བ་ཞིག ཕྱིས་སུ་བླ་མ་བཟང་བོ་ཞིག་དང་འཕྲད་པས། སྔར་བྱས་ལ་འགྱོད་པ་དྲག་པོ་འཁྲུངས་ཏེ་སྨྱུང་གནས་བརྒྱ་དང་བརྒྱད་བསྲུངས་པས། ཚེ་འཕོས་ནས་ལྷོ་ཕྱོགས་དཔལ་གྱི་རི་ལ་འགྲོ་དོན་བྱེད་ནུས་པའི་བླ་མ་བསོད་ནམས་འབྱུང་གནས་ཞེས་པར་འཁྲུངས།

ཡང་། མ་ཇོ་ཆོས་སྐྱིད་བྱ་བས་སྨྱུང་གནས་མང་དུ་བསྲུངས་པས། མོ་ཤི་བའི་དུས་སུ་རུས་པ་དུར་ཁྲོད་དུ་བསྐྱལ་བ་བྱ་རོག་གིས་རུས་པའི་དུམ་བུ་འཁྱེར་བ་རིང་བསྲེལ་དུ་སོང་བ་དང་།

དེ་མིན། སྨྱུང་གནས་གཅིག་སྲུང་ཡང་བསྐལ་བ་བཞི་ཁྲིའི་འཁོར་བ་ཕྱིར་བསྙིལ་བར་འགྱུར། བརྒྱ་རྩ་བརྒྱད་བསྲུང་ན། མི་དེ་རི་མགོར་སོང་ན་དེ་ཕྱོགས་ཀྱི་རླུང་ཕོག་ཚད་ཀྱི་སེམས་ཅན་ལ་ངན་འགྲོ་མེད་གསུངས། ཆུ་ལ་བརྒལ་ན། ཆུ་དེ་འཐུང་ཚད་ཀྱི་སེམས་ཅན་ལ་ངན་འགྲོ་མེད། མཐོང་ཐོས་དྲན་རེག་ལུས་ཀྱི་གྲིབ་མ་ཕོག་ཚད་ཡན་ཆད་ལ་ངན་འགྲོ་མེད་ཅེས་རྒྱུད་ནས་གསུངས་སོ། །དེ་ལས་གཞན་སྨྱུང་གནས་སྲུང་བའི་ཕན་ཡོན་གཏམ་རྒྱུད་མང་བོ་སྨྱུང་གནས་ཀྱི་ཆོ་ག་ཐར་བའི་ཐེམ་སྐས་ལས་གསལ་བས་དེར་གཟིགས་པར་བྱའོ། །

གཉིས་པ། གསོ་སྦྱོང་ཡན་ལག་བརྒྱད་པོ་སོ་སོའི་ཕན་ཡོན། ༡ སྲོག་གཅོད་སྤངས་པས་ཚེ་རིང་ནད་མེད་དང་། གཟི་བརྗིད་ཆེ་བ། ༢ མ་བྱིན་ལེན་སྤངས་པས། ཚེ་རབས་ཀུན་ཏུ་ལོངས་སྤྱོད་ཆེ་ཞིང་། རང་གི་ལོངས་སྤྱོད་ལ་གཞན་གྱིས་གནོད་པ་མེད་པར་རང་དབང་དུ་འདུ་བ། ༣ འཁྲིག་སྤྱོད་སྤངས་པས། གཟུགས་མཛེས་ཤིང་ཤ་མཚག་ལེགས་ལ། དབང་བོ་ཡོངས་སུ་ཚང་བ། ༤ རྫུན་སྤངས་པས། གཞན་གྱི་བསླུ་བྲིད་ཀྱིས་མི་ཐུབ་ཅིང་། ངག་ལ་བརྩི་མཐོང་ཆེ་བ། ༥ ཆང་སྤངས་པས། ཚེ་རབས་ཀུན་ཏུ་དྲན་ཤེས་བརྟན་ཞིང་ཤེས་རབ་ཕུན་སུམ་ཚོགས་པ། ༦ ཁྲི་སྟན་ཆེ་མཐོ་སྤངས་པས། གཞན་གྱིས་བསྟོད་བཀུར་འཐོབ་ཅིང་། མལ་སྟན་བཟང་ཞིང་བཞོན་པ་མང་བར་འགྱུར་རོ། །༧ དུས་མིན་གྱི་ཟས་སྤངས་པས། བཟའ་བ་དང་ལོ་ལེགས་ཀྱིས་ཕྱུག་པ། ༨ དྲི་དང་ཕྲེང་བ་སྤངས་པས། ཚེ་རབས་ཀུན་ཏུ་ལུས་དྲི་ཞིམ་པོ་དང་། མདོག་དབྱིབས་མཛེས་ལ་མཚན་བཟང་དུ་མ་དང་ལྡན་པ། གླུ་གར་སོགས་སྤངས་པས། ཚེ་རབས་ཀུན་ཏུ་ལུས་དང་ཤེས་རྒྱུད་དུལ་བ་དང་། ངག་ལས་ཆོས་ཀྱི་སྒྲ་དབྱངས་མི་ཆད་པར་སྒྲོགས་པ་བཅས་སོ། །

མདོར་ན། གུང་ཐང་བསྟན་པའི་སྒྲོན་མེས། མི་སྡིག་ཅན་བཙན་ཐབས་འཚང་རྒྱའི་ཆོས། །དཀོར་བག་ཆགས་ངན་པ་སྦྱོང་བ་ལ། །ཆེས་ཟབ་པའི་མཐར་ཐུག་སྨྱུང་གནས་ཡིན། །འདིའི་ཕན་ཡོན་ནམ་མཁའི་མཐའ་དང་མཉམ། །དུས་དེང་སང་ངན་པ་མགོ་མཐོ་ཡང་། །ལམ་བར་དོའི་འཕྲང་རིང་བརྒལ་བའི་ཉིན། །དགྲ་གཤིན་རྗེ་དམག་གིས་བསྐོར་བའི་ཚེ། །ཆོས་ཚུལ་བཞིན་བྱས་པའི་མི་དེ་སྐྱིད། །འཕྲང་ཡ་ངའི་འཇིགས་པ་སེལ་འདོད་ཅིང་། །མར་ངན་སོང་སྐྱེ་སྒོ་གཅོད་འདོད་ན། །ལྷ་ཐུགས་རྗེ་ཆེན་པའི་ཞབས་ལ་འཇུས། །ཞེས་གསུངས་སོ། །

སྨྱུང་གནས་ཀྱི་ཕན་ཡོན་རྒྱས་པར་བཀའ་འགྱུར་བ་བློ་བཟང་ཚུལ་ཁྲིམས་ཀྱི་དགེ་སློང་མ་དཔལ་མོའི་ལུགས་སྨྱུང་གནས་ཀྱི་ཕན་ཡོན་དང་། བཀྲ་ཐང་བློ་བཟང་ཆོས་ཀྱི་ཉི་མའི་སྨྱུང་གནས་ཕན་ཡོན་དགེ་སྐུལ་སྙན་པའི་གླུ་དབྱངས་སོགས་སུ་གཟིགས་པར་འཚལ་ལོ། །