དབྱིངས་རིག་དབྱེར་མེད་ཀྱི་ལྷ་ཐམས་ཅད་བརྟན་གཡོ་ཀུན་ལ་ཁྱབ་པར་བཞུགས་ཚུལ་ལ་གཉིས་ལས། རྒྱུའི་མཚན་ཉིད་ཕ་རོལ་ཏུ་ཕྱིན་པ་ལས་གསུངས་ཚུལ།

དེ་ཡང་ཐེག་པ་ཆེན་པོ་རྒྱུད་བླ་མའི་འགྲེལ་པར་མདོ་དྲངས་ནས་བཤད་པ། ཐོག་མ་མེད་དུས་ཅན་གྱི་དབྱིངས། །ཆོས་རྣམས་ཀུན་གྱི་གནས་ཡིན་ཏེ། །དེ་ཡོད་པས་ན་འགྲོ་ཀུན་དང༌། །མྱ་ངན་འདས་པའང་ཐོབ་པ་ཡིན། །ཞེས་གསུངས་སོ། །དེ་ལ་ཇི་ལྟར་ན་ཐོག་མ་མེད་པའི་དུས་ཅན་ཡིན་ཞེ་ན། དེ་བཞིན་གཤེགས་པའི་སྙིང་པོ་ཉིད་ཀྱི་དབང་དུ་མཛད་ནས་སྔོན་གྱི་མཐའ་མི་དམིགས་སོ་ཞེས་བསྟན་ཅིང་རབ་ཏུ་གཞག་པ་གང་ཡིན་པའོ། །དབྱིངས་ཞེས་བྱ་བ་ནི། ཇི་སྐད་དུ། [དཔལ་ཕྲེང་གི་མདོར།]བཅོམ་ལྡན་འདས་དེ་བཞིན་གཤེགས་པའི་སྙིང་པོ་གང་ལགས་པ་འདི་ནི་[རང་བཞིན་གྱིས་]འཇིག་རྟེན་ལས་འདས་པའི་ཆོས་ཀྱི་སྙིང་པོ་རང་བཞིན་གྱིས་ཡོངས་སུ་དག་པའི་ཆོས་ཀྱི་སྙིང་པོ་ཞེས་གསུངས་པའོ། །ཆོས་རྣམས་ཀུན་གྱི་གནས་ཡིན་ཏེ། །ཞེས་བྱ་བ་ནི། ཇི་སྐད་དུ། བཅོམ་ལྡན་འདས་དེའི་སླད་དུ་དེ་བཞིན་གཤེགས་པའི་སྙིང་པོ་ནི་[བདག་གཅིག་ཏུ་]འབྲེལ་བ་[ངོ་བོ་ཐ་དད་དུ་]རྣམ་པར་དབྱེ་བ་མེད་པ་བྲལ་མི་ཤེས་པ་[སྟེ་འབྲལ་དུ་མི་རུང་བ་]འདུས་མ་བྱས་པ[དོན་དམ་པ]འི་ཆོས་[གང་གཱའི་ཀླུང་གི་བྱེ་མ་སྙེད་ལས་ཀྱང་འདས་པ་]རྣམས་ཀྱི་གནས་དང་གཞི་དང་རྟེན་ལགས་ལ། བཅོམ་ལྡན་འདས་དེ་བཞིན་གཤེགས་པའི་སྙིང་པོ་ནི་[བདག་གཅིག་དེ་བྱུང་གང་དུ་ཡང་]མ་འབྲེལ་བ་རྣམ་པར་དབྱེ་བ་དང་བཅས་པའི་ཆོས་བྲལ་ཤེས་པ[སྟེ་འབྲལ་དུ་རུང་བ]། འདུས་བྱས་ཀྱི་ཆོས་རྣམས་ཀྱི་ཡང་གཞི་དང་གནས་དང་རྟེན་ལགས་སོ་ཞེས་གསུངས་པ[དེ་ལ་དང་པོ་ནི་རྟེན་དང་བརྟེན་པ་ཐ་མི་དད་ཡིན་ཞིང༌། གཉིས་པ་ནི་རྟེན་དང་བརྟེན་པ་ཐ་དད་ཡིན་ནོ]འོ། །དེ་ཡོད་པས་ན་འགྲོ་ཀུན་དང༌། །ཞེས་བྱ་བ་ནི། ཇི་སྐད་དུ། བཅོམ་ལྡན་འདས་དེ་བཞིན་གཤེགས་པའི་སྙིང་པོ་མཆིས་ན་[གློ་བུར་དྲི་མ་དང་ལྡན་པ་དེ་སྲིད་དུ་]དེ་ལ་འཁོར་བ་ཞེས་ཚིག་གིས་བཏགས་པ་ལགས་སོ་ཞེས་གསུངས་པའོ། །མྱ་ངན་འདས་པའང་ཐོབ་པར་འགྱུར་ཞེས་བྱ་བ་ནི་ཇི་སྐད་དུ། བཅོམ་ལྡན་འདས་གལ་ཏེ་དེ་བཞིན་གཤེགས་པའི་སྙིང་པོ་མ་མཆིས་ན་སྡུག་བསྔལ་ལ་ཡང་ཡིད་འབྱུང་བར་མི་འགྱུར་ཞིང༌། མྱ་ངན་ལས་འདས་པ་ལ་ཡང་འདོད་པ་དང་དོན་དུ་གཉེར་བ་དང་སྨོན་པར་ཡང་མི་འགྱུར་རོ། །ཞེས་རྒྱས་པར་གསུངས་པའོ། །ཞེས་དང༌། རྒྱུད་བླ་མར་ཡང༌། ཇི་ལྟར་འཇིག་རྟེན་ཐམས་ཅད་དུ[འདུས་བྱས་ཐམས་ཅད]། །ནམ་མཁའ་ལ་ནི་སྐྱེ་ཞིང་འཇིག །དེ་བཞིན་འདུས་མ་བྱས་[དོན་དམ་གྱི་]དབྱིངས་ལ། །[ཕུང་པོ་ཁམས་དང་]དབང་པོ་རྣམས་ནི་སྐྱེ་ཞིང་འཇིག །ཇི་ལྟར་ནམ་མཁའ་མེ་རྣམས་ཀྱིས། །སྔོན་ཆད་ནམ་ཡང་ཚིག་པ་མེད། །དེ་བཞིན་[དུ་དོན་དམ་བདེ་གཤེགས་སྙིང་པོ་]འདི་ནི་འཆི་བ་དང༌། །ན་དང་རྒ་བའི་མེས་མི་འཚིག །ས[འི་དཀྱིལ་འཁོར་]ནི་ཆུ[འི་དཀྱིལ་འཁོར་]ལ་[གནས་]ཆུ[འི་དཀྱིལ་འཁོར་ནི་]རླུང་[གི་དཀྱིལ་འཁོར་]ལ[འབྲེལ་ཏེ་གནས]། །རླུང་[གི་དཀྱིལ་འཁོར་]ནི་མཁའ་ལ་[མ་འབྲེལ་བར་]རབ་ཏུ་གནས། །མཁའ་ནི་རླུང་དང་ཆུ་དག་དང༌། །ས་ཡི་ཁམས་ལ་[འབྲེལ་ཏེ་]གནས་[པ་]མ་ཡིན། །དེ་བཞིན་ཕུང་པོ་ཁམས་དབང་རྣམས། །ལས་དང་ཉོན་མོངས་དག་ལ་[འབྲེལ་ཏེ་]གནས། །ལས་དང་ཉོན་མོངས་[ནི་]ཚུལ་བཞིན་མིན། །ཡིད་ལ་བྱེད་ལ་[འབྲེལ་ཏེ་]རྟག་ཏུ་གནས། །ཚུལ་བཞིན་མ་ཡིན་ཡིད་བྱེད་ནི། །སེམས་ཀྱི་དག་པ་[སྟེ་དག་པའི་སེམས་རང་བཞིན་འོད་གསལ་]ལ་རབ་[ཏུ་]གནས། །སེམས་ཀྱི་རང་བཞིན་[འོད་གསལ་དོན་དམ་ཆོས་ཉིད་ནི་]ཆོས་[ཀུན་རྫོབ་པ་]རྣམས་ནི། །ཐམས་ཅད་ལ་ཡང་[འབྲེལ་བའི་ཚུལ་གྱིས་]གནས་པ་མེད། །ཅེས་པ་ལ་སོགས་པ་རྒྱས་པར་གསུངས་ཤིང༌། དེའི་འགྲེལ་པར་མདོ་དྲངས་པ་ཡང༌། ས་དང་ཆུ་ལ་སོགས་པ་ནམ་མཁའ་ལ་གནས་པ་དཔེར་མཛད་ནས་དེ་བཞིན་དུ་ཕུང་པོ་དང་ཁམས་དང་སྐྱེ་མཆེད་ནི་ལས་དང་ཉོན་མོངས་པ་ལ་རབ་ཏུ་གནས་པ། ལས་དང་ཉོན་མོངས་པ་ནི་ཚུལ་བཞིན་མ་ཡིན་པ་ཡིད་ལ་བྱེད་པ་ལ་རབ་ཏུ་གནས་པ་ཚུལ་བཞིན་མ་ཡིན་པ་ཡིད་ལ་བྱེད་པ་ནི་རང་བཞིན་གྱིས་ཡོངས་སུ་དག་པ་[འོད་གསལ་ཆོས་ཉིད་]ལ་[མ་འབྲེལ་ཡང་ཁྱབ་སྟེ་]རབ་ཏུ་གནས་པའོ། །དེས་ན་སེམས་ཀྱི་རང་བཞིན་ནི་[གདོད་ནས་དག་ཅིང་]འོད་གསལ་བ་སྟེ། གློ་བུར་གྱི་ཉེ་བའི་ཉོན་མོངས་པ[རྣམས་གནས་ཀྱང་དེ]ས་[རང་བཞྀན་འོད་གསལ་གྱི་ངོ་བོ་]ཉོན་མ་མོངས་པའོ་ཞེས་བརྗོད་དོ། །ཞེས་སོགས་དང༌། རྒྱན་སྟུག་པོའི་མདོར་ཡང༌། [དོན་དམ་པའི་]ས་རྣམས་སྣ་ཚོགས་[ཚང་བ་དེ་བཞིན་ཉིད་ནི་འཁོར་འདས་]ཀུན་[གྱི་]གཞི་[རང་བྱུང་ཡེ་ཤེས་]སྟེ། །བདེ་གཤེགས་སྙིང་པོ[འང་དེ་ཡིན་ལ་དོན་དམ་པའི་]དགེ་བའང་དེ[ཡིན་ཞིང་]། །[བདེ་གཤེགས་]སྙིང་པོ་དེ་ལ་ཀུན་གཞིའི་སྒྲས། །དེ་བཞིན་གཤེགས་རྣམས་སྟོན་པར་མཛད། །[བདེ་གཤེགས་]སྙིང་པོ་ཀུན་གཞིར་བསྒྲགས་པ་ཡང༌། །བློ་ཞན་རྣམས་ཀྱིས་མི་ཤེས་[ཏེ་ཀུན་གཞི་རྣམ་ཤེས་སམ་དེ་ལ་ཟག་མེད་ཀྱི་ས་བོན་ཡོད་པ་ལ་དགོངས་ཞེས་སོགས་འཁྲུལ་པ་མང་དུ་སྨྲ་བས་]སོ། །ཞེས་དང༌། ཀུན་གཞིའི་[ཡེ་ཤེས་གང་ཡིན་པ་བདེ་གཤེགས་]སྙིང་པོར་བསྒྲགས་པ་ནི། །རྟོག་པའི་སེམས་ཀྱི་ཡུལ་མ་ཡིན། །རང་བཞིན་[གཉུག་མ་རྟོག་གེ་ལས་འདས་པ་ནི་]རྣམ་པར་བརྟགས་པ་ན། །བརྟག་པར་ནུས་པ་མ་ཡིན་དང༌། །[འགྱུར་མེད་]ཡོངས་སུ་གྲུབ་པའི་རང་བཞིན་ཡང་[ཡིན་པས]། །རྣལ་འབྱོར་[བཟང་པོ་ཅན་དང་རླུང་སེམས་]ཐུབ་[པ་]ཅན་[རླུང་སེམས་འགགས་པས་]རྟག་ཏུ་མཐོང༌། །ཞེས་གསུངས་ཏེ[ཟབ་མོ་མཐར་ཐུག་གསལ་བར་སྟོན་པའི་མདོ་འདི་ངེས་པར་བལྟ་དགོས་སོ]། འདིར་དོན་དམ་པའི་ས་རྣམས་ཚང་བའི་ཆོས་ཀྱི་དབྱིངས་ཉིད་ཀུན་གཞི་དང་བདེ་གཤེགས་སྙིང་པོ་དང་དོན་དམ་པའི་དགེ་བ་ཡང་ཡིན་པར་བསྟན་ལ་དོན་དམ་པའི་ས་རྣམས་ནི་རྡོ་རྗེའི་སྙིང་པོ་རྒྱན་གྱི་རྒྱུད་དང་མཆོག་ཏུ་མི་འགྱུར་བའི་ཡེ་ཤེས་གྲུབ་པ་དང་ནཱ་རོ་འགྲེལ་ཆེན་རྣམས་ནས་རྒྱས་པར་སྟོན་ཅིང༌། དོན་དམ་པའི་མཚན་ཡང་དག་པར་བརྗོད་པ་ལ་སོགས་པར་[དག་པ་རྣམ་པ་བཅུ་གཉིས་འཆང༌། །བདེན་དོན་རྣམ་པ་བཅུ་གཉིས་ལྡན། །ཞེས་སོགས་སུ་]ཉེ་བར་བསྡུས་ནས་གསུངས་ཏེ། དམ་པའི་མན་ངག་ཐུན་མོང་མ་ཡིན་པ་ལས་[དེ་དག་གི་དོན་དེ་ལྟར་ཡིན་པར་]ཁོང་དུ་ཆུད་པར་བྱ་བ་[ཡིན་གྱི་དེ་ལས་གཞན་གྱི་ནི་སྤྱོད་ཡུལ་མ་ཡིན་པ་]ཁོ་ནའོ། །[ཀུན་གཞི་ཡེ་ཤེས་དེ་]དོན་དམ་པའི་དགེ་བ་ཡིན་པར་ནི། ལང་ཀར་གཤེགས་པ་ཞེས་བྱ་བ་དབུ་མ་ཆེན་པོའི་མདོར། དེ་བཞིན་གཤེགས་པའི་སྙིང་པོ་དགེ །རྟོག་གེ་ཅན་གྱི་སྤྱོད་ཡུལ་མིན། །ཞེས་དང༌། [དོན་དམ་པའྀ་]སེམས་ནི་རང་བཞིན་འོད་གསལ་ཏེ།།དེ་བཞིན་གཤེགས་པའི་སྙིང་པོ་དགེ[ཞེས་དང༌། མཚན་བརྗོད་དུ་ཡང༌། གྲགས་པ་བཀྲ་ཤིས་སྙན་གྲགས་དགེ །ཞེས་དང༌། རྒྱུད་བླ་མར་ཡང༌། མ་རིག་སོགས་འབྲས་ཀྱི། །ལྤགས་སྦུབས་ནང་ཆུད་ཆོས་ཁམས་དགེ་བ་ཡང་]། །ཞེས་པ་ལ་སོགས་པས་[དེ་བཞིན་ཉིད་དགེ་བར་]གསུངས་ཤིང༌། དབུ་མ་པ་ཆེན་པོ་འཕགས་པ་ཐོགས་མེད་ཞབས་ཀྱི་ཞལ་སྔ་ནས་ཀྱང༌། དོན་དམ་པའི་དགེ་བ་གང་ཞེ་ན་དེ་བཞིན་ཉིད་དོ། །ཞེས་[ཆོས་མངོན་པར་]གསུངས་ལ། ཡོངས་སུ་མྱ་ངན་ལས་འདས་པ་ཆེན་པོར་ཡང་བདེ་གཤེགས་སྙིང་པོ་སངས་རྒྱས་ཀྱི་རང་བཞིན་དགེ་བ་ཡིན་པར་གསུངས་ཏེ། རིགས་ཀྱི་བུ་ངས་འདི་སྐད་དུ་རྩ་བ་བཞི་ཉམས་པ་དང་ལོག་སྲེད་ཅན་དང༌། ཤིན་ཏུ་རྒྱས་པའི་མདོ་ལ་སྐུར་བ་དང་མཚམས་མེད་པའི་སྡིག་པ་བྱས་པ་ལ་ཡང་[དེ་བཞིན་ཉིད་ཡོད་པས་]སངས་རྒྱས་ཀྱི་རང་བཞིན་ཡོད་དེ་སེམས་ཅན་དེ་དག་ལ་[བྱས་པའི་]དགེ་བའི་ཆོས་ཡོང་མེད་མོད་ཀྱི་སངས་རྒྱས་ཀྱི་རང་བཞིན་ནི་[མ་བྱས་པའི་]དགེ་བའོ། །ཞེས་སོགས་དང༌། རིགས་ཀྱི་བུ་ངས་མདོ་སྡེ་འདི་ལས་སངས་རྒྱས་ཀྱི་རང་བཞིན་ནི་[འདུས་མ་བྱས་ཀྱི་]དངོས་པོ་དྲུག་དང་ལྡན་ཏེ། [སྐད་ཅིག་ལས་འདས་པས་]རྟག་པ་དང༌། ཡང་དག་པ[འི་མཐའ་]དང༌། [དོན་དམ་དུ་]བདེན་པ་དང༌། [མ་བྱས་པ་དང་ཡོད་པའི་]དགེ་བ་དང༌། [གདོད་ནས་རང་བཞིན་གྱིས་]རྣམ་པར་དག་པ་དང༌། [མཉམ་གཞག་རིགས་པའི་ཤེས་པས་]མཐོང་བའོ། །ཞེས་པ་ལ་སོགས་པ་རབ་ཏུ་རྒྱས་སོ། །རྒྱལ་བའི་ཡུམ་ལས་ཀྱང༌། [ཀུན་རྫོབ་ཀྱི་]དེ་བཞིན་གཤེགས་པ་རྣམས་[འཇིག་རྟེན་དུ་]བྱུང་ཡང་རུང༌། [ཀུན་རྫོབ་ཀྱི་]དེ་བཞིན་གཤེགས་པ་རྣམས་[འཇིག་རྟེན་དུ་]མ་བྱུང་ཡང་རུང༌། ཆོས་རྣམས་ཀྱི་ཆོས་ཉིད་དང་ཆོས་ཀྱི་དབྱིངས་དང༌། ཆོས་ཀྱི་གནས་ཉིད་དང་ཆོས་སྐྱོན་མེད་པ་དེ་ནི་[སྔ་ཕྱི་ཁྱད་པར་མེད་པར་རྟག་ཏུ་]དེ་བཞིན་དུ་[མི་འགྱུར་བར་]གནས་པ་ཡིན་ཏེ། དེ་ནི་དེ་བཞིན་གཤེགས་པས་མངོན་པར་རྫོགས་པར་སངས་རྒྱས་སོ། །མངོན་པར་ཐུགས་སུ་ཆུད་དོ། །མངོན་པར་རྫོགས་པར་སངས་རྒྱས་ཏེ་མངོན་པར་ཐུགས་སུ་ཆུད་ནས་ཀྱང་གསུང་ངོ་སྟོན་ཏོ་བརྗོད་དོ་འགྲེལ་ཏོ། །རྣམ་པར་འབྱེད་དོ་གསལ་བར་བྱེད་དོ་ཡང་དག་པར་སྟོན་ཏོ། །ཞེས་པ་ལ་སོགས་པ་རྒྱ་ཆེར་གསུངས་ཤིང༌། ལང་ཀར་གཤེགས་པར་ཡང༌། བློ་གྲོས་ཆེན་པོ་གང་[ཤཱཀྱ་ཐུབ་པ་]ང་དང་དེ་བཞིན་གཤེགས་པ་[གཞན་]དེ་དག་གིས་ཐུགས་སུ་ཆུད་པའི་ཆོས་ཉིད་དང༌། ཆོས་ཀྱི་གནས་ཉིད་དང༌། ཆོས་མི་འགྱུར་བ་ཉིད་དང༌། དེ་བཞིན་ཉིད་དང༌། ཡང་དག་པ་ཉིད་དང༌། བདེན་པ་ཉིད་དེ་ནི་[ནམ་ཡང་གང་ནའང་]འདུག་པ་སྟེ། ཞེས་པ་དང༌། དབུ་མ་ཆེན་པོའི་མདོ་གཞན་དང་གཞན་མང་པོར་ཡང་[དོན་དམ་པའི་དབྱིངས་རིག་དབྱེར་མེད་ཆོས་ཀྱི་སྐུ་ནམ་ཡང་གང་ནའང་བཞུགས་པའི་]ཚུལ་འདི་ཉིད་ཡང་དང་ཡང་དུ་གསུངས་ལ། དེ་བཞིན་གཤེགས་པའི་སྙིང་པོའི་མདོར་ཡང༌། རིགས་ཀྱི་བུ་དག་[བདེ་གཤེགས་སྙིང་པོ་]འདི་ནི་ཆོས་རྣམས་ཀྱི་ཆོས་ཉིད་དེ། དེ་བཞིན་གཤེགས་པ་[གཟུགས་སྐུ་]རྣམས་[འཇིག་རྟེན་དུ་]བྱུང་ཡང་རུང་མ་བྱུང་ཡང་རུང༌། སེམས་ཅན་འདི་དག་[ཐམས་ཅད་]ནི་རྟག་ཏུ་དེ་བཞིན་གཤེགས་པའི་སྙིང་པོ་ཅན་ཡིན་ནོ། །ཞེས་པ་ལ་སོགས་པས་ཆོས་ཀྱི་དབྱིངས་[དང་དེ་བཞིན་ཉིད་]ལ་སོགས་པའི་རྣམ་གྲངས་མང་པོ་ཅན་བདེ་གཤེགས་སྙིང་པོ་གང་ཡིན་པ་དེ་ཉིད་ཆོས་ཐམས་ཅད་ཀྱི་གཞི་དང༌། གནས་སུ་གསུངས་པའི་ཕྱིར་དྲི་མས་མ་དག་པའི་གནས་སྐབས་ན་དྲི་མ་གནས་པའི་གཞི་དང་མ་དག་པ་དང་དག་པའི་གནས་སྐབས་ན་དྲི་མ་སྦྱོང་བའི་གཞི་དང་ཤིན་ཏུ་རྣམ་དག་གི་གནས་སྐབས་ན་དྲི་མས་དག་པའི་གཞིར་བཞུགས་པས། ནམ་མཁའ་ལྟར་ཀུན་ཁྱབ་ཏུ་ནམ་ཡང་བཞུགས་པ་ཡིན་ནོ། །