དེ་ལྟར་བཞུགས་པ་དེ་ཉིད་དོན་དམ་ཆོས་ཉིད་ཀྱི་དཀོན་མཆོག་གསུམ་ག་ཡིན་ཚུལ།

འདིར་དོན་དམ་གྱི་རྒྱལ་སྲས་ལ་སོགས་པ་དགེ་འདུན་དཀོན་མཆོག་ཏུ་སྣང་བ་རྣམས་ཀྱང་སངས་རྒྱས་དངོས་ཡིན་ཞིང་དོན་དམ་གྱི་དཀོན་མཆོག་གསུམ་ག་ངོ་བོ་གཅིག་པ་ཉིད་དུ་རྟོགས་དགོས་སོ། །འདི་དག་ལ་དགོངས་ནས་ལྷག་པའི་བསམ་པ་བསྟན་པའི་ལེའུར། ཀུན་དགའ་བོ་[མཐར་ཐུག་དོན་དམ་གྱི་]དེ་བཞིན་གཤེགས་པ་ནི་བསྟན་དུ་མེད་པ་སྟེ། དེ་ནི་མིག་གིས་བལྟ་བར་མི་ནུས་སོ། །ཀུན་དགའ་བོ་[མཐར་ཐུག་དོན་དམ་གྱི་]ཆོས་ནི་བརྗོད་དུ་མེད་པ་སྟེ། དེ་ནི་རྣ་བས་མཉན་པར་མི་ནུས་སོ། །ཀུན་དགའ་བོ་[མཐར་ཐུག་དོན་དམ་གྱི་]དགེ་འདུན་ནི་འདུས་མ་བྱས་པ་སྟེ། དེ་ནི་ལུས་དང་ངག་དང་སེམས་ཀྱིས་བསྙེན་བཀུར་བྱ་བར་མི་ནུས་སོ། །ཞེས་དང༌། རྡོ་རྗེ་ཕྲེང་བའི་རྒྱུད་དུ་ཡང༌། [གདོད་ནས་]དྲི་མེད་[འོད་གསལ་བའི་]སེམས་ནི་[དོན་དམ་གྱི་]སངས་རྒྱས་ཏེ། །[དོན་དམ་གྱི་]ཆོས་[དཀོན་མཆོག་]ནི་[རང་བཞིན་འོད་གསལ་གྱི་]ངག་ཏུ་ཡང་དག་གསུངས། །[རང་བཞིན་འོད་གསལ་གྱི་]སྐུ་ནི་[དོན་དམ་གྱི་]དགེ་འདུན་ཞེས་བྱ་སྟེ། །བྱང་ཆུབ་སེམས་དཔའི་ཚོགས་ཀྱི་གནས་[སོ་རྐང་པ་འདི་ནི་བདེན་གཉིས་གང་དུའང་བཤད་དུ་རུང་ངོ་]། །[དོན་དམ་གྱི་]སངས་རྒྱས་[ནི་དོན་དམ་གྱི་]ཡྀ་གེ་ཧཱུཾ་དུ་བཤད། །[དོན་དམ་གྱི་]གསུང་[དམ་ཆོས་]ནི་[དོན་དམ་གྱི་]ཡི་གེ་ཨཱཿརུ་བརྗོད། །[དོན་དམ་གྱི་]དགེ་འདུན་ཞེས་བྱ་བ་[དོན་དམ་གྱི་]ཡི་གེ་ཨོཾ[ཡིན་ཏེ]། །[དེ་ཡང་]ཀུན་ནས་[འོད་]འཕྲོ་བའི་བདག་ཉིད་དོ། །[དོན་དམ་གྱི་]སངས་རྒྱས་[ནི་དོན་དམ་གྱི་]ཨ་བ་དྷཱུ་ཏཱིར་འགྱུར། །[དོན་དམ་གྱི་]ཆོས་ཀྱང་[དོན་དམ་གྱི་]ལ་ལ་ནཱ་རུ་བརྗོད། །[དོན་དམ་གྱི་]དགེ་འདུན་[ནི་དོན་དམ་གྱི་]ར་ས་ནཱ་རུ་བརྗོད། །འདི་ནི་[དོན་དམ་གྱྀ་རྩ་གསུམ་དང་དཀོན་མཆོག་]གསུམ་པོའི་མཚན་ཉིད་དོ། །[དོན་དམ་གྱི་]གཟུགས་མེད་ཁམས་ནི་[དོན་དམ་གྱི་]སངས་རྒྱས་སོ། །[དོན་དམ་གྱི་]གཟུགས་ཀྱི་ཁམས་ནི་[དོན་དམ་གྱི་]ཆོས་དང་ནི། །[དོན་དམ་གྱི་]འདོད་ཁམས་དེ་བཞིན་[དོན་དམ་གྱི་]དགེ་འདུན་ནོ། །དེ་ལྟར་ཁམས་གསུམ་མཚན་ཉིད་མཆོག[གམ་གཞན་ནམ་ཕ་རོལ་ཏེ]། །[བདེ་གཤེགས་]སྙིང་པོར་གྱུར་པ་[ནམ་ཡང་མི་འཆད་པས་]རང་སྲོག་[ཆེན་པོ་]ལས། །ཁམས་གསུམ་ན་ནི་གཞན་མེད་དེ[ཆོས་ཀྱི་དབྱིངས་ལས་གཞན་པའི་ཆོས་འགའ་ཡང་གཤིས་ལ་མེད་པའི་ཕྱིར་རོ]། །སྒྱུ་མ་རླུང་གི་ཁམས་གསུམ་པ། །རྨི་ལམ་རྨི་ལམ་བཞིན་དུ་མཐོང་[རྐང་པ་འདི་གཉིས་ནི་བདེན་གཉིས་གང་དུ་ཡང་བཤད་དུ་རུང་ངོ་]།།[དོན་དམ་གྱི་]ཁམས་གསུམ་བདག་ཉིད་[ནི་]དེ་བཞིན་ཉིད་[ཡིན་ལ]། །[ཆོས་གཞན་མེད་པས་]གཅིག་པུ་[སྟེ་ཡེ་ཤེས་སྐྱེས་ན་དེ་]མྱུར་བར་མཐོང་བ་ཉིད། །[བདག་]བྱིན་གྱིས་བརླབས་ནས་དེ་བཞིན་ཉིད། །[ཁམས་གསུམ་གྱི་རྣམ་པ་ཅན་མཆོག་གི་]དངོས་གྲུབ་མྱུར་དུ་ཐོབ་པར་འགྱུར། །[དོན་དམ་གྱི་]སངས་རྒྱས་[ནི་དོན་དམ་གྱི་]ལོངས་སྤྱོད་རྫོགས་པའི་སྐུ། །[དོན་]དམ་པའི་ཆོས་ནི་ཆོས་ཀྱི་སྐུ། །[དོན་དམ་གྱི་]དགེ་འདུན་[ནི་དོན་དམ་གྱི་]སྤྲུལ་པའི་སྐུར་ནི་འགྱུར། །དེ་ནི་[དོན་དམ་གྱི་]སྐུ་གསུམ་བདག་ཉིད་ཅན[ནོ]། །[དོན་དམ་གྱི་སྣང་མཆེད་ཐོབ་གསུམ་ལས་]སྣང་བ་[དོན་དམ་གྱི་]སངས་རྒྱས་ཀྱི་ནི་གཟུགས། །[དོན་དམ་གྱི་]ཆོས་ནི་སྣང་བ་ཐོབ་པ་འོ། །[དོན་དམ་གྱི་]དགེ་འདུན་[ནི་]སྣང་བ་མཆེད་པར་འགྱུར། །དེ་ནི་[དོན་དམ་གྱི་]སྣང་བ་གསུམ་མཚན་ཉིད། །ཅེས་དང༌། དཔལ་སྡོམ་པ་འབྱུང་བའི་རྒྱུད་དུ་ཡང༌། [དོན་དམ་གྱི་]སངས་རྒྱས་དེ་བཞིན་ཆོས་དགེ་འདུན། །གཅིག་ཀྱང་གསུམ་དུ་བཏགས་པའོ། །[དོན་དམ་གྱི་]སྐྱབས་གསུམ་དང་ནི་[དོན་དམ་གྱི་]དེ་ཉིད་གསུམ། །[དོན་དམ་གྱི་]སྐུ་གསུམ་[དོན་དམ་གྱི་]རྣམ་པར་ཐར་པ་གསུམ[ཡིན]། །[དོན་དམ་གྱི་]ཞལ་གསུམ་[དོན་དམ་གྱི་]ཡིག་[གེ་]གསུམ་[དོན་དམ་གྱི་]ལྷ་[ཚངས་པ་ཁྱབ་འཇུག་དབང་ཕྱུག་]གསུམ་དང༌། །[དོན་དམ་གྱི་]ཁམས་གསུམ་པ་ཡི་རང་བཞིན་འགྱུར། །[དོན་དམ་པའི་སྐུ་གསུང་ཐུགས་ཀྱི་]དཀྱིལ་འཁོར་གསུམ་དང་[རྡོ་རྗེ་གསུམ་གྱི་]རྣལ་འབྱོར་གསུམ། །[དོན་དམ་གྱི་ཐེག་པ་གསུམ་གྱི་]ལམ་གསུམ་དུ་ནི་བསྟན་པ་ཡིན། །[རྡོ་རྗེ་གསུམ་གྱི་]དམ་ཚིག་གསུམ་དང་[ཐོག་མཐའ་བར་དུ་]དགེ་བ་[འམ་སྐུ་གསུམ་གྱི་དགེ་བ་]གསུམ། །[རྡོ་རྗེའི་]སྐུ་དང་གསུང་དང་ཐུགས་ཉིད་ཀྱང་[ཡིན]། །[རྡོ་རྗེའི་]ཤེས་རབ་དང་ནི་ཐབས་ཀྱང་སྟེ། །[ཐབས་ཤེས་]དེ་ཡི་སྦྱོར་བ་གསུམ་པ་འོ། །[སྐུ་གསུང་ཐུགས་ཀྱི་]གསང་[བ་]གསུམ་ཇི་ལྟར་མཐོང་བ་དང༌། །ཆོས་ཀྱི་འབྱུང་གནས་[གྲུ་གསུམ་གྱི་]རང་བཞིན་ལས། །འཁོར་གསུམ་མི་དམིགས་རྣལ་འབྱོར་གྱིས། །[རྡོ་རྗེ་གསུམ་གྱི་]སྔགས་གསུམ་གྱི་ནི་རང་བཞིན་དང༌། ། [རྡོ་རྗེའི་ལུས་ཀྱི་]རྩ་གསུམ་གྱི་ནི་རང་བཞིན[ཏེ་དོན་དམ་ཉིད་དེ་རྣམས་ཐམས་ཅད་ཡིན་]ནོ། །ཞེས་པ་ལ་སོགས་པས་དོན་དམ་བདེ་གཤེགས་སྙིང་པོ་ཉིད་[རང་བཞིན་གཉུག་མའི་]སྐྱབས་གསུམ་དང་དེ་ཉིད་གསུམ་དང་སྐུ་གསུམ་དང་རྣམ་ཐར་གསུམ་དང་ཞལ་གསུམ་དང་ལྷ་གསུམ་དང་ཆོས་ཉིད་ཀྱི་ཁམས་གསུམ་དང༌། དཀྱིལ་འཁོར་གསུམ་[དང་རྩ་གསུམ་]ལ་སོགས་པར་བསྟན་པའི་ཕྱིར་མཐར་ཐུག་གི་དཀོན་མཆོག་གསུམ་གཅིག་པ་ཡིན་ཏེ། དོན་དམ་པའི་དཀོན་མཆོག་གསུམ་ནི་[སྟོང་གཞི་]ཆོས་ཀྱི་དབྱིངས་ཉིད་ཡིན་པའི་ཕྱིར་རོ[ཀུན་རྫོབ་ཀྱི་དཀོན་མཆོག་གསུམ་ནི་རབ་ཏུ་གྲགས་ཏེ]། །དེ་ལྟར་དཀོན་མཆོག་གསུམ་[དང༌། ཡི་གེ་གསུམ་དང༌། ཁམས་གསུམ་དང༌། ལྷ་གསུམ་ལ་སོགས་པ་མང་པོ་]ལ་ཡང་བདེན་གཉིས་རྣམ་དབྱེ་ཤེས་ན་ཐུབ་པའི་བཀའ་ལ་མི་རྨོངས་པར་འགྱུར་རོ། །དེ་བཞིན་དུ་མྱང་འདས་ཆེན་པོར། སངས་རྒྱས་ཀྱི་རང་བཞིན་[ནམ་རང་བཞིན་གྱི་སངས་རྒྱས་དེ་བཞིན་ཉིད་]ནི་འདུས་མ་བྱས་པས་ན་རྟག་པ་ཞེས་བྱའོ། །ནམ་མཁའ་[གཞན་ཆོས་ཉིད་ཀྱི་ནམ་མཁའ་]ཞེས་བྱ་བ་ནི་སངས་རྒྱས་ཀྱི་རང་བཞིན་ནོ། །སངས་རྒྱས་ཀྱི་རང་བཞིན་ནི་དེ་བཞིན་གཤེགས་པ[ཆོས་སྐུ་]འོ། །དེ་བཞིན་གཤེགས་པ་[དེ་]ནི་འདུས་མ་བྱས་པའོ། །འདུས་མ་བྱས་པ[འི་སངས་རྒྱས་དེ་]ནི་རྟག་པའོ། །རྟག་པ[འི་སངས་རྒྱས་དེ་]ནི་ཆོས་སོ། །ཆོས་[དེ་]ནི་དགེ་འདུན་ནོ། །དགེ་འདུན་[དེ་]ནི་འདུས་མ་བྱས་པའོ། །འདུས་མ་བྱས་པ་ནི་རྟག་པའོ། །ཞེས་དང༌། རིགས་ཀྱི་བུ་གཞན་ཡང༌། [དོན་དམ་པའི་]སངས་རྒྱས་དང་ཆོས་དང་དགེ་འདུན་ལ་རྟག་ཏུ་དྲན་ཞིང་ནན་ཏན་བྱའོ། །[དོན་དམ་པའི་]ཆོས་རྣམ་པ་གསུམ་པོ་འདི་ནི་ཐ་དད་པ་མ་ཡིན་པའི་མཚན་ཉིད། མི་རྟག་པ་མ་ཡིན་པའི་མཚན་ཉིད། མི་འཕོ་བའི་མཚན་ཉིད་དོ། །གང་ཞིག་[དོན་དམ་གྱི་དཀོན་མཆོག་གསུམ་གྱི་]ཆོས་རྣམ་པ་གསུམ་པོ་འདི་ལ་ཐ་དད་པར་འདུ་ཤེས་ན་སྐྱེ་བོ་དེ་ནི་སྐྱབས་སུ་འགྲོ་བ་གསུམ་ལ་མི་གནས་པ། ཚུལ་ཁྲིམས་དང་མི་ལྡན་པ་ཞེས་བྱ་སྟེ། ཉན་ཐོས་དང་རང་སངས་རྒྱས་ཀྱི་བྱང་ཆུབ་ཀྱང་ཐོབ་པར་མི་ནུས་སོ། །གང་བསམ་གྱིས་མི་ཁྱབ་པ[འི་དབྱིངས་དོན་དམ་གྱི་དཀོན་མཆོག་]དེ་ལ་རྟག་པའི་འདུ་ཤེས་ཀྱིས་ནན་ཏན་བྱེད་ན། དེ་ནི་སྐྱབས་སུ་འགྲོ་བའི་གནས་ཡིན་ནོ། །རིགས་ཀྱི་བུ་དཔེར་ན་ཤིང་ཡོད་པའི་རྐྱེན་གྱིས་[ཚད་པ་ལས་སྐྱོབ་པའི་]གྲིབ་མ་ཡོད་དོ། །དེ་བཞིན་གཤེགས་པའང་དེ་དང་འདྲ་སྟེ། རྟག་པའི་ཆོས་ཡོད་པས་སྐྱབས་སུ་འགྲོ་བའི་གནས་ཡོད་ཀྱི། མི་རྟག་པ་ནི་[གཏན་གྱི་སྐྱབས་མཆོག་]མ་ཡིན་ནོ། །གང་གིས་དེ་བཞིན་གཤེགས་པ་ལ་མི་རྟག་པའོ། །ཞེས་སྨྲ་ན་དེ་བཞིན་གཤེགས་པ་ཡང་ལྷ་དང་འཇིག་རྟེན་དུ་བཅས་པའི་སྐྱབས་སུ་འགྲོ་བའི་གནས་མ་ཡིན་ནོ། །ཞེས་དང༌། དེ་བས་ན་[གདོད་ནས་]རབ་ཏུ་ཞི་བ་ཞེས་བྱ་བ་ནི་ཡང་དག་པར་རྣམ་པར་གྲོལ་བའོ། །[གདོད་ནས་]ཡང་དག་པར་རྣམ་པར་གྲོལ་བ་[དེ་]ནི་དེ་བཞིན་གཤེགས་པའོ། །[དོན་དམ་གྱི་]དེ་བཞིན་གཤེགས་པ་ཞེས་བྱ་བ་ནི་[དོན་དམ་གྱི་]ཆོས་སོ། །ཞེས་དང༌། གང་གིས་དེ་བཞིན་གཤེགས་པ་ནི་ཆོས་དང་དགེ་འདུན་ཐ་དད་དོ། །ཞེས་སྨྲ་ན་དེ་ནི་སྐྱབས་སུ་འགྲོ་བའི་གནས་གསུམ་པོར་མི་འགྱུར་རོ། །ཞེས་སོགས་དང༌། རྒྱུད་བླ་མར་ཡང༌། དམ་པའི་དོན་དུ་འགྲོ་བ་ཡི། །སྐྱབས་ནི་སངས་རྒྱས་ཉག་གཅིག་ཉིད། །ཐུབ་པ་ཆོས་ཀྱི་སྐུ་ཅན་ཕྱིར། །ཚོགས་ཀྱང་དེ་ཡི་མཐར་ཐུག་ཕྱིར། །ཞེས་གསུངས་པ་ཡང་སྔར་བསྟན་པ་དང་དོན་གཅིག་གོ །