ཡང་དེ་ཉིད་རང་བཞིན་དུ་གནས་པའི་རིགས་དང་དོན་གཅིག་ཏུ་བསྟན་པ།

དབུ་མ་ཆེན་པོ་རྒྱུད་བླ་མའི་འགྲེལ་པར་ཡང༌། [རང་བཞིན་གྱིས་]ཡོངས་སུ་དག་པའི་རིགས་[གང་ཡིན་པ་]དེ་བཞིན་གཤེགས་པའི་ཁམས་[ཏེ་དབྱིངས་]འདི་ཉིད་ལ་དགོངས་ནས། ཇི་ལྟར་[གསེར་ཡོད་པའི་]རྡོ་ཡི་ཕྱེ་མ་ལ། །ས་ལེ་སྦྲམ་ནི་མི་མཐོང་བ། །ཡོངས་སུ་སྦྱངས་པས་དེ་མཐོང་བཞིན། །འཇིག་རྟེན་ལ་ནི་[དོན་དམ་གྱི་]དེ་བཞིན་གཤེགས[པ་བཞུགས་ཀྱང་གློ་བུར་དྲི་མ་མ་སྦྱངས་བར་ལ་མི་མཐོང་ཞིང༌། སྦྱངས་ན་མཐོང་]ཞེས་དང༌། ཡང༌། རང་བཞིན་གྱིས་རྣམ་པར་དག་པའི་རིགས་[ཀུན་ལ་]ཡོད་པའི་ཕྱིར་འགའ་ཡང་[གློ་བུར་དྲི་མས་]གཏན་རྣམ་པར་དག་པར་མི་འགྱུར་བ་[སྟེ་དག་པར་མི་རུང་བ་]ནི་འོས་པ་མ་ཡིན་ཏེ། གང་གི་ཕྱིར་བཅོམ་ལྡན་འདས་ཀྱིས་ཁྱད་པར་མེད་པར་སེམས་ཅན་ཐམས་ཅད་ལ་[གློ་བུར་དྲི་མས་]རྣམ་པར་དག་པ་[ཐོབ་ཏུ་]རུང་བ་ཉིད་ཡོད་པ་ལ་དགོངས་ནས། [གློ་བུར་དྲི་མ་ལ་]ཐོག་[མ་]མེད་[པར་]གྱུར་ཀྱང་[ལམ་མཆོག་བསྒོམས་པ་ལ་]ཐ་མ་དང་ལྡན་པ། །རང་བཞིན་གྱིས་དག་[ཅིང་འོད་གསལ་བ་]རྟག་པའི་ཆོས་ཅན་[བདེ་གཤེགས་སྙིང་པོ་]ནི། །ཐོག་མེད་[གློ་བུར་དྲི་མའི་]སྦུབས་ཀྱིས་བསྒྲིབས་ཕྱིར་མི་མཐོང་སྟེ། །ཇི་ལྟར་གསེར་གྱི་གཟུགས་ནི་བསྒྲིབས་པ་བཞིན། །ཞེས་གསུངས་པ་བཞིན་ནོ། །ཞེས་དེ་བཞིན་གཤེགས་པའི་སྙིང་པོ་གང་ཡིན་པ་དེ་རང་བཞིན་གྱིས་ཡོངས་སུ་དག་པའི་རིགས་ཡིན་པར་གསུངས་ལ།