ཡང་དེ་ཉིད་རྒྱུད་སྡེར་གསུངས་པའི་རིགས་ཀྱི་དབྱེ་བསྡུ་དང་དོན་གཅིག་ཏུ་བསྟན་པ།

རིགས་དེ་ཡང་རིགས་གསུམ་དང་ལྔ་ལ་སོགས་པའི་བདག་ཉིད་ནམ་ཡང་རྒྱུན་ཆད་མེད་པ་རང་བཞིན་ཆོས་ཉིད་ཀྱི་རྒྱུད་དུ་གསུངས་ཏེ། དཔལ་འདུས་པར། [དབྱེ་བསྡུ་མང་པོ་ཅན་རང་བཞིན་གྱི་]རིགས་ནི་[རྒྱུན་མ་ཆད་པ་དོན་དམ་གྱི་]རྒྱུད་ཅེས་བྱ་བར་བཤད། །རྒྱུད་[དེ་]ནི་ཐོག་མ[འི་སངས་རྒྱས་སམ་དང་པོའི་སངས་རྒྱས་]ཞེས་བརྗོད་དེ། །[འདུས་མ་བྱས་ཡིན་པས་]མི་འཇིག་[ཅིང་]སྐྱེ་བ་མེད་[པ་]གང་ཡིན[པའི]། །མགོན་པོ་[རྡོ་རྗེ་འཆང་]དེ་ནི་ཡིན་པར་བཤད། །ཅེས་དང༌། [ཟབ་མོ་སྔགས་ཀྱི་]རྒྱུད་[དོན་དམ་]ནི་[རྒྱུན་ཆད་པ་མི་སྲིད་ཅིང་]རྒྱུན་ཆགས་སུ་བརྗོད་དོ། །ཞེས་དང༌། [རང་བཞིན་གྱི་]རིགས་ནི་[དོན་གྱི་རྒྱལ་བ་]ལྔ་དང་[རྡོ་རྗེ་]གསུམ་དག་དང༌། །ངོ་བོ་ཉིད་ཀྱིས་[གྲུབ་པའི་]རིགས་བརྒྱ་[ལ་སོགས་པ་དབྱེ་བསྡུ་མང་པོ་རུང་བ་]འོ། །ཞེས་སོགས་དང༌། དཔལ་ཀྱེའི་རྡོ་རྗེའི་རྒྱུད་དུ་ཡང༌། [རང་བཞིན་གྱི་]རིགས་ནི་[དོན་དམ་གྱི་རྒྱལ་བ་]རྣམ་པ་དྲུག་[ཏུ་]བརྗོད་ཅིང༌། །[དེ་ཡང་]མདོར་བསྡུས་པས་ནི་[རྒྱལ་བ་]རྣམ་པ་ལྔ། །སྐུ་གསུང་ཐུགས་ཀྱི་དབྱེ་བ་ཡིས། །ཕྱི་ནས་[དེ་ཡང་བསྡུ་ན་རྡོ་རྗེ་]རྣམ་པ་གསུམ་དུ་འགྱུར། །[དོན་དམ་གྱི་]རིགས་དང་[དོན་དམ་གྱི་]འབྱུང་བ་ལྔ་རྣམས་[ཡུམ་ལྔ་]དང༌། །[དོན་དམ་གྱི་]ཕུང་པོ་ལྔ་[ཡབ་ལྔ་]ཡི་རང་བཞིན་གྱི། །རིགས་[སུ་བྱེད་པ་]དང་[དབྱེ་བསྡུ་དུ་མར་]བགྲང་བྱ་འདི་ཡིས་ནི། །རིགས་ཞེས་མངོན་པར་བརྗོད་པར་བྱ། །ཞེས་དང༌། སེམས་ནི་ཆེན་པོ་[དོན་དམ་གྱི་སེམས་]གཅིག་ཉིད་ལ། །[རིགས་]ལྔ་ཡི་གཟུགས་ཀྱིས་རྣམ་པར་མཚོན། །རིགས་ནི་ལྔ་པོ་དེ་ཉིད་ལས། །[དོན་དམ་གྱི་ལྷའི་ཚོགས་]སྟོང་ཕྲག་དུ་མ་སྐྱེས་པ་ཉིད[དེ་སྐྱེས་པ་གཞན་འགལ་འདུས་སྐྱོན་མེད་ཀྱི་སྐྱེས་པའོ]། །དེ་ཕྱིར་[དོན་དམ་གྱི་ལྷ་མང་ཉུང་]འདི་དག་རང་བཞིན་གཅིག[ཡིན་ཏེ]། །[རང་བཞིན་ལྷན་སྐྱེས་ཀྱི་]བདེ་ཆེན་མཆོག་ཏུ་ཕན་པ་ཉིད[དོ]། །[དེ་ཉིད་ལ་དོན་དམ་པའི་]འདོད་ཆགས་ལ་སོགས་སེམས་ལྔ་ཡི། །དབྱེ་བས་[ཡབ་སམ་ཡུམ་]ལྔ་རུ་འགྲོ་བར་འགྱུར། །གང་གཱའི་ཀླུང་ནི་བཅུ་ཡི་བྱེ་སྙེད་ཉིད[དུ་འགྱུར་ཞིང་]། །[རང་བཞིན་གྱི་]རིགས་གཅིག་ལ་ནི་[དོན་དམ་གྱི་]དེ་བཞིན་གཤེགས་པའི་ཚོགས། །རིགས་ཀྱི་ཚོགས་[གང་གཱའི་ཀླུང་བཅུའི་བྱེ་སྙེད་དེ་]ལ་[ཡང་]རིགས་ནི་དུ་མ་རྣམས[སུ་འགྱུར་ཞིང་]། །དེ་རྣམས་རིགས་[ཏེ་རིགས་དེ་རྣམས་]ལ་[ཡང་]རིགས་ནི་རྣམ་པ་བརྒྱ[བརྒྱར་འགྱུར་ལ]། །དེ་རྣམས་[རེ་རེ་]ལ་ཡང་འབུམ་ཕྲག་རིགས་ཆེན་རྣམས[སུ་འགྱུར་ཞིང་དེ་རེ་རེ་ལ་ཡང་]། །བྱེ་བའི་རིགས་[སུ་འགྱུར་བས་རིགས་དེ་]ལ་[རྣམ་པའི་དབྱེ་བ་]གྲངས་ནི་མེད་པར་འགྱུར། །[དེ་ལྟར་གནས་པ་]དེ་ལ་རིགས་[རང་བཞིན་གཅིག་པ་]ལ་[རྣམ་]གྲངས་མེད་རིགས་རྣམས་ཉིད[ཏེ]། །[དེ་ཐམས་ཅད་ནི་རང་བཞིན་ལྷན་སྐྱེས་]མཆོག་ཏུ་དགའ་བ[འགྱུར་མེད་ཡོངས་སུ་གྲུབ་པ]འི་རིགས་ལས་བྱུང་བ་རྣམས[ཡིན་པས་དེ་བཞིན་ཉིད་རྣམ་པ་དུ་མ་ཅན་ངོ་བོ་རོ་གཅིག་པ་གསལ་བར་བསྟན་ཏོ]། །ཞེས་དང༌། དོན་དམ་པའི་མཚན་[མང་པོ་]ཡང་དག་པར་བརྗོད་པ[འི་རྒྱུད་]ལས་ཀྱང༌། གསང་སྔགས་རིགས་ཆེན་ཐམས་ཅད་དང༌། །གསང་སྔགས་རིག་པ་འཆང་བའི་རིགས། །རིགས་གསུམ་ལ་ནི་རྣམ་པར་གཟིགས། །འཇིག་རྟེན་འཇིག་རྟེན་འདས་པའི་རིགས། །འཇིག་རྟེན་སྣང་བྱེད་རིགས་ཆེན་དང༌། །ཕྱག་རྒྱ་ཆེན་པོའི་རིགས་མཆོག་དང༌། །གཙུག་ཏོར་ཆེན་པོ་རིགས་ཆེན་ནོ། །ཞེས་གསུངས་པའི་དོན། དཔལ་དུས་ཀྱི་འཁོར་ལོར། གཙུག་ཏོར་[ཆེན་པོའི་རིགས་ཆེན་ནི་]སྟོང་པ་[ཆེན་པོ་འགྱུར་མེད་]ལྔ་སྟེ་རིགས་གསུམ་[ལ་ནི་རྣམ་པར་གཟིགས་]དག་ཀྱང་དེ་བཞིན་སྐུ་[རྡོ་རྗེ་ཨོཾ་]དང་གསུང་[རྡོ་རྗེ་ཨཱཿ]དང་ཐུགས་ཀྱི་རྡོ་རྗེ[ཧཱུཾ]འོ། །ཨ་སོགས་[ཞེས་པ་ཨ་ཨི་རྀ་ཨུ་ལྀ་]ཕྱག་རྒྱ[ཆེན་པོ]འི་རིགས་[མཆོག་རྒྱལ་བ་ལྔ་ཡིན་]ཏེ་ཧ་ཡ་ར་ཝ་ལ་[ཀྵ་]དང་ལྡན་པའི་ཀ་སོགས་སྡེ་པ་[དྲུག་པོའི་གསལ་བྱེད་]མཐའ་དག་[གི་ལྷའམ་རྒྱུད་སུམ་བཅུ་རྩ་དྲུག་]རྣམས[ནི]། །འཇིག་རྟེན་སྣང་བྱེད་[རིགས་ཆེན་ནོ་]དབྱངས་[བཅུ་གཉིས་སྲོག་ཏུ་ཞུགས་པ་]དང་བཅས་པའི་ཧ་ཡ་ར་ཝ་ལར་ལྡན་[དྲུག་བཅུ་དང༌། གསལ་བྱེད་སུམ་ཅུ་ལ་དབྱངས་བཅུ་གཉིས་ཀྱིས་ཕྱེ་བ་དང༌། ཡོན་ཏན་དང་འཕེལ་བའི་ཕྱེ་བ་དང༌། ཡ་ཎར་བསྒྱུར་བས་ཕྱེ་བ་སྟོང་བརྒྱད་བཅུ་ནི་]འཇིག་རྟེན་འཇིག་རྟེན་འདས་པ[འི་རིགས་ཞེས་བྱ]འོ། །[གསང་སྔགས་རིག་པ་འཆང་བའི་རིགས། ཞེས་པ་]རིགས་སྔགས་འཆང་གི་དབང་པོར་འགྱུར་ཏེ་[དེ་གང་ཞེ་ན་]ཀ་སོགས་[སྡེ་པ་དྲུག་གི་ཡི་གེ་ལྔ་ལྔ་པོ་]མཐའ་དག་བརྩེགས་པར་གནས་པ[དང༌། ལཝརཡཧ་བརྩེགས་པ་དང༌། ལཝརཡཀྵ་བརྩེགས་པ]འི་སྡེ་པ་[སྟེ་དོན་དམ་གྱི་སྡེ་པ་]བརྒྱད་རྣམས་སོ། །ཞེས་གསུངས་ཤིང༌། དེ་བཞིན་དུ། [བརྗོད་དུ་མེད་པ་དོན་དམ་གྱི་]སྡེ་པ་ཀ་ལ་སོགས་པ་དྲུག་པོ་རིམ་པར་ཡོངས་སུ་བཀོད་པ་རྣམས་ཀྱི་རིགས་[དྲུག་]ནི་རིམ་པ་ཡིས[ཏེ]། །[ཀ་སྡེ་ནི་]རྡོ་རྗེ[འི་རིགས་ཙ་སྡེ་ནི་]རལ་གྲི་[ཊ་སྡེ་ནི་]རིན་ཆེན་[ཏ་སྡེ་ནི་]འཁོར་ལོ་[པ་སྡེ་ནི་]ཆུ་སྐྱེས་དེ་བཞིན་[ས་སྡེ་ནི་]གྲི་གུག་[གི་རིགས་]ཉིད་[དོ་དེས་ན་དེ་རྣམས་]ནི་རྒྱལ་བ་[དྲུག་པོ་]རྣམས་ཀྱི་[རིགས་]སྟེ། །སླར་ཡང་སྡེ་པ་རེ་རེ་ལ་ཡང་མཐའ་དག་རྒྱལ་བ་མཆོག་གི་དབྱེ་བ་[དོན་དམ་གྱི་ཡི་གེ་]ལྔ་རྣམས་དག་གིས་དབྱེ[སྟེ་དོན་དམ་གྱི་བརྗོད་བྱ་རྗོད་བྱེད་དབྱེར་མེད་པའི་ཕྱིར་ཡི་གེའི་དབྱེ་བ་ཉིད་ཀྱིས་ལྷའི་དབྱེ་བར་ཡང་འགྱུར]།།ཞེས་པ་ལ་སོགས་པས་རང་བཞིན་གྱིས་དག་པའི་རིགས་དེ་ཉིད་ལ་རིགས་ཀྱི་དབྱེ་བ་དུ་མ་གསུངས་སོ། །དེ་བཞིན་དུ། [དོན་དམ་གྱི་]རིགས་ལྔ་སྟོན་པ་ལ། གདོང་ལྔ་ཟུར་ཕུད་ལྔ་དང་ལྡན། །ཞེས་དང༌། [དོན་དམ་གྱི་]རིགས་དྲུག་སྟོན་པ་ལ། ཁྲོ་བོའི་རྒྱལ་པོ་གདོང་དྲུག་འཇིགས། །ཞེས་དང༌། [དོན་དམ་གྱི་]རིགས་བརྒྱ་སྟོན་པ་ལ། ཧ་ལཱ་ཧ་ལ་གདོང་བརྒྱ་པ། །ཞེས་པས་གསུངས་ཤིང༌། རྗེ་བཙུན་སྤྱན་རས་གཟིགས་ཀྱི་ཞལ་སྔ་ནས་ཀྱང༌། འདིར་[དོན་དམ་གྱི་]རིགས་གསུམ་གྱི་བདག་ཉིད་ཀྱི་རྒྱུད་ཀྱྀ་རྒྱལ་པོ་ལ་[དོན་དམ་གྱི་]སྐུ་དང་གསུང་དང་ཐུགས་ཀྱི་བདག་ཉིད་ཅན་ཞལ་གསུམ་པ་བརྗོད་པར་བྱ་བའོ། །[དོན་དམ་གྱི་]རིགས་བཞིའི་བདག་ཉིད་ལ་[དོན་དམ་གྱི་]སྐུ་དང་གསུང་དང་ཐུགས་དང་ཡེ་ཤེས་ཀྱི་བདག་ཉིད་ཅན་ཞལ་བཞི་པ་བརྗོད་པར་བྱ་བའོ། །[རིགས་གསུམ་ནི་]རང་བཞིན་གྱི་རིགས་གཅིག་དང་ལྷན་ཅིག་རིགས་བཞིའི་བདག་ཉིད་ཅན་གྱི་རྒྱུད་དང་བརྗོད་པར་བྱ་བར་འགྱུར་[ཏེ། བྱིས་པ་ལ་ལོ་བཅོ་ལྔའི་བར་དུ་གནས་སྐབས་གསུམ་དང༌། བཅུ་དྲུག་པ་ནས་བཞི་པའི་གནས་སྐབས་སྣོན་པ་ཇི་ལྟ་བར་]རོ། །དེ་བཞིན་དུ་རིགས་ལྔའི་བདག་ཉིད་[ནི་]རང་བཞིན་གྱི་གཅིག་དང་ལྷན་ཅིག་རིགས་དྲུག་གི་བདག་ཉིད་དུ་འགྱུར་[ཏེ། བྱིས་པ་ལ་ལོ་བཅོ་ལྔའི་བར་དུ་ཁམས་ལྔ་དང༌། བཅུ་དྲུག་པ་ནས་ཡེ་ཤེས་ཀྱི་ཁམས་སྣོན་པ་ཇི་ལྟ་བར་]རོ། །ཞེས་སོགས་དང༌། དཔལ་མཆོག་དང་པོའི་རྒྱུད་དུ་ཡང༌། རྡོ་རྗེ་[འགྱུར་མེད་བདེ་བ་]ཆེན་པོ་འཛིན་པ[དོན་དམ་པ]འི་རྒྱུད། །[གང་ཡིན་པ་]དེ་ཉིད་[རྣམ་སྣང་]དེ་བཞིན་གཤེགས་པའི་རིགས[ཀྱང་ཡིན་ལ]།།དེ་ཉིད་[མི་བསྐྱོད་པ་]རྡོ་རྗེའི་རིགས་ཆེན་པོ[འང་ཡིན་ཞིང་]། །དེ་ཉིད་[སྣང་བ་མཐའ་ཡས་]པད་མའི་རིགས་དག་པ[ཡང་ཡིན་ལ]། །དེ་ཉིད་[རིན་འབྱུང་]ནོར་བུའི་རིགས་ཆེན་[དུ་ཡང་]བཤད། །དེ་[རྣམས་]ཉིད་[དོན་དམ་གྱི་]འདོད་ཆགས་[ཀྱང་ཡིན་ཞིང་ཀུན་རྫོབ་ཀྱི་]ཆགས་བྲལ་ཉིད། །ཅེས་དང༌། རྡོ་རྗེ་ཕྲེང་བའི་རྒྱུད་དུ་ཡང༌། [དོན་དམ་པའི་]རིགས་ཀྱི་དབྱེ་བའི་དོན་བསྡུས་པ། །དེ་ཚེ་[རང་བྱུང་ཡེ་ཤེས་ཀྱི་]རིགས་ནི་རྣམ་པ་ལྔར། །རྩ་བའི་རྒྱུད་དུ་གསལ་བར་གསུངས། །ཞེས་སོགས་དང༌། མཆོག་གྀ་དང་པོའི་སངས་རྒྱས་སུ་ཡང༌།[སྟོང་གཞི་དོན་དམ་ཀྱི་]རིགས་གསུམ་དང་ནི་རིགས་ལྔ་ཉིད། །རང་བཞིན་གཅིག་དང་རིགས་བརྒྱའོ། །ཞེས་པ་ལ་སོགས་པས་རྒྱུད་སྡེ་ཟབ་མོ་རྣམས་སུ་རིགས་ཀྱི་དབྱེ་བསྡུ་ཇི་སྙེད་གསུངས་པ་ཐམས་ཅད་རང་བཞིན་གྱི་རིགས་ཀྱི་དབྱེ་བསྡུ་ཡིན་པར་ཁོང་དུ་ཆུད་པར་བྱའི། རྒྱས་པའི་རིགས་ཀྱི་ནི་མ་ཡིན་ནོ། །གལ་ཏེ། མངོན་པར་རྟོགས་པའི་རྒྱན་དུ་ཡང༌། ཆོས་ཀྱི་དབྱིངས་ལ་དབྱེར་མེད་ཕྱིར། །རིགས་ནི་ཐ་དད་རུང་མ་ཡིན། །ཞེས་རང་བཞིན་གྱི་རིགས་ལ་དབྱེ་བ་ཐ་དད་མི་རུང་བར་བཤད་པ་དང་འགལ་བ་མ་ཡིན་ནམ་ཞེ་ན་མ་ཡིན་ཏེ། དེར་ནི་ངོ་བོ་ཐ་དད་མེད་པ་ལ་དགོངས་ཤིང༌། རྒྱུད་སྡེ་ཟབ་མོ་རྣམས་སུ་ནི་ངོ་བོ་དབྱེར་མེད་ཀྱང༌། རྣམ་པ[ཐ་དད་པ]འི་སྒོ་ནས་རིགས་ཀྱི་དབྱེ་བ་གསུངས་པའི་ཕྱིར་རོ། །དེས་ན་འགལ་བ་ཅུང་ཟད་ཀྱང་མེད་དོ། །སློབ་དཔོན་ལེགས་ལྡན་འབྱེད་ཀྱིས་[དབུ་མ་རྩ་ཤེའི་འགྲེལ་པ་]ཤེས་རབ་སྒྲོན་མར། དཀོན་མཆོག་བརྩེགས་པའི་ལུང་དྲངས་པར་གང་ལ་ལས་མེད་པ་དང༌། ལས་ཀྱི་འབྲས་བུ་མེད་པ་དེ་ནི་འཕགས་པ་རྣམས་ཀྱི་རིགས་ཡིན་ལ། འཕགས་པ་རྣམས་ཀྱི་རིགས་གང་ཡིན་པའི་རིགས་དེ་ལ་ནི། ལུས་ཀྱི་ལས་མི་བྱེད། ངག་གི་ལས་མི་བྱེད། ཡིད་ཀྱི་ལས་མི་བྱེད་དོ། །ཞེས་པ་ཡང་ལས་འབྲས་མེད་པའི་གཞི་ཆོས་ཉིད་འདུས་མ་བྱས་ཀྱི་དབྱིངས་ལ་དགོངས་སོ། །དེ་ལྟར་རང་བཞིན་གྱི་རིགས་ཉིད་མདོ་རྒྱུད་ཟབ་མོ་རྣམས་སུ་གསུངས་པའི་དོན་ནི། དེ་བཞིན་ཉིད་རང་བཞིན་གྱིས་འོད་གསལ་བ་དེ་བཞིན་གཤེགས་པའི་སྙིང་པོ་ཆོས་དབྱིངས་ཡེ་ཤེས་ཉིད་དུ་གཅིག་ཀྱང་དེའི་རྣམ་པ་དང་ཡོན་ཏན་ལ་སོགས་པ་ཁྱད་པར་གྱི་ཆོས་ཤིན་ཏུ་མང་བ་རྣམས་ལ་རྨོངས་པ་དང་མ་རྨོངས་པའི་ཁྱད་པར་ནྀ་ཡོད་པར་གསུངས་པས་རྒྱུད་སྡེའི་དགོངས་པ་ཟབ་མོའི་གནམ་འཕང་བཅད་དེ་མཐོ་ས་ནས་ལྟ་བ་ཉིད་མན་ངག་གི་རྒྱལ་པོ་ཡིན་[པས་སྐབས་ཐམས་ཅད་དུ་དྲན་ན་ལེགས་པ་ཡིན་]ནོ། །