ཡང་དེ་ཉིད་ནམ་མཁའ་ལྟར་གཞི་འབྲས་ངོ་བོ་དབྱེར་མེད་ཀྱི་རྒྱུད་དུ་བཞུགས་ཚུལ།

དེ་བཞིན་དུ་གཞིའམ་རིགས་ཀྱི་ངོ་བོ་དེ་བཞིན་ཉིད་ཆོས་ཀྱི་སྐུ་གང་ཡིན་པ་དེ་ཉིད་ནམ་མཁའ་ལྟར་ཆོས་ཐམས་ཅད་ལ་ཡང་ཁྱབ་པར་གསུངས་ཏེ། ཇི་སྐད་དུ། མཁའ་འགྲོ་མ་རྡོ་རྗེ་གུར་ལས། ནམ་མཁའི་ཁམས་ནི་ཇི་སྙེད་དང༌། །འཇིག་རྟེན་ཁམས་ནི་སྟོང་ཕྲག་ན། །[རང་བཞིན་འགྱུར་མེད་ཀྱི་]བདེ་ཆེན་ཕུན་ཚོགས་ཕྱག་རྒྱ་ཆེ[གང་ཡིན་པ]། །[དོན་དམ་གྱི་]སངས་རྒྱས་ནམ་མཁའ་འདྲ་བར་[བརྟན་གཡོ་ཀུན་ལ་ཁྱབ་པར་ནམ་ཡང་]བཞུགས། །ཞེས་པ་ལ་སོགས་པས་རྡོ་རྗེའི་རིགས་སམ། རང་བཞིན་གྱིས་ཡོངས་སུ་དག་པའི་རིགས་དེ་ཉིད་[སྟོང་གཞི་དོན་དམ་གྱི་]གཞི་འབྲས་ངོ་བོ་དབྱེར་མེད་ཀྱི་སངས་རྒྱས་དང་ཕྱག་རྒྱ་ཆེན་པོ་དང་བདེ་ཆེན་ཕུན་ཚོགས་ཡིན་པ་དང༌། དེ་ཡང་ནམ་མཁའ་ལྟར་ཀུན་ལ་ཁྱབ་ཅིང་ཀུན་གྱི་གཞིར་བསྟན་ལ། མྱ་ངན་ལས་འདས་པ་ཆེན་པོར་ཡང༌། སེམས་ཅན་གྱི་སངས་རྒྱས་ཀྱི་རང་བཞིན་ནི་ནམ་མཁའ་དང་འདྲ་སྟེ། ནམ་མཁའ་ནི་འདས་པ་མ་ཡིན། མ་འོངས་པ་མ་ཡིན། ད་ལྟར་མ་ཡིན། ནང་མ་ཡིན། ཕྱི་རོལ་མ་ཡིན་ཏེ། གཟུགས་སྒྲ་དྲི་རོ་རེག་བྱས་མ་བསྡུས་པ་ལྟར་སངས་རྒྱས་ཀྱི་རང་བཞིན་ཡང་དེ་དང་འདྲའོ། །ཞེས་སོགས་དང༌། རིགས་ཀྱི་བུ་དཔེར་ན། ནམ་མཁའ་ནི་སེམས་ཅན་ཐམས་ཅད་ཀྱི་ནང་ཡང་མ་ཡིན། ཕྱི་རོལ་ཡང་མ་ཡིན། ཕྱི་ནང་གཉི་ག་ཡང་མ་ཡིན་པའི་ཕྱིར་ཐོགས་པ་མེད་དེ། སེམས་ཅན་གྱི་སངས་རྒྱས་ཀྱི་རང་བཞིན་ཡང་དེ་དང་འདྲའོ། །ཞེས་དང༌། [སྟོང་གཞི་དོན་དམ་གྱི་]དེ་བཞིན་གཤེགས་པ་ནི་སྐྱེ་བ་མེད་པ། [འདུས་བྱས་ཀྱི་]རིགས་མེད་པ་སྟེ་སྐྱེ་བ་དང༌། [འདུས་བྱས་ཀྱི་]རིགས་མེད་པས་ན་རྟག་པའོ། །རྟག་པའི་ཆོས་[དེ་བཞིན་ཉིད་]ནི་ཐམས་ཅད་ཀུན་ཏུ་ཁྱབ་སྟེ། ཇི་ལྟར་ནམ་མཁའ་ཀུན་ཏུ་ཁྱབ་པ་བཞིན་ནོ། །ཞེས་དང༌། བློ་གྲོས་མི་ཟད་པས་བསྟན་པར་ཡང༌། གནས་གང་ན་ཆོས་ཀྱི་དབྱིངས་འདུག་པའི་གནས་དེ་ན་སེམས་ཅན་གྱི་ཁམས་[ཏེ་དབྱིངས་]ཀྱང་འདུག་གོ །སེམས་ཅན་གྱི་ཁམས་[ཏེ་དབྱིངས་]གནས་གང་ན་འདུག་པ་དེ་ན་ནམ་མཁའི་ཁམས་ཀྱང་འདུག་སྟེ། དེ་བས་ན་ཆོས་ཐམས་ཅད་ནམ་མཁའ་དང་མཚུངས་པ་ཞེས་བྱའོ། །ཞེས་སངས་རྒྱས་ཀྱི་རང་བཞིན་དང་དེ་བཞིན་གཤེགས་པ་ཆོས་ཀྱི་སྐུ་དང་ཆོས་ཀྱི་དབྱིངས་ནམ་མཁའ་ལྟར་ཀུན་ལ་ཁྱབ་པར་བཞུགས་ཤིང་ཆོས་ཐམས་ཅད་ཀྱི་གཞི་དང་གནས་སུ་ཡང་གསུངས་སོ། །དེ་བཞིན་དུ། རྒྱུད་བླའི་འགྲེལ་པར་ཡང༌། གང་ཞིག་དེ་བཞིན་གཤེགས་པའི་ཆོས་ཀྱི་སྐུ་ལས་ཕྱི་རོལ་ཏུ་གྱུར་པའི་སེམས་ཅན་ནི་འགའ་ཡང་སེམས་ཅན་གྱི་ཁམས་ན་མེད་དེ། ནམ་མཁའི་ཁམས་ཀྱི་[ཁོངས་ན་མེད་པའི་]གཟུགས་[མི་སྲིད་པ་]བཞིན་ནོ། །ཞེས་དང༌། རྡོར་སྙིང་འགྲེལ་པར་ཡང༌། ཇི་ལྟར་བུམ་པ་ཞིག་གྱུར་ཀྱང༌། །ནམ་མཁའ་ལ་ནི་འཇིག་པ་མེད། །དེ་བཞིན་ལུས་ནི་ཞིག་གྱུར་ཀྱང༌། །[དེ་ལ་ཁྱབ་པར་བཞུགས་པའི་རང་བྱུང་]ཡེ་ཤེས་ལ་ནི་འཇིག་པ་མེད། །ཅེས་དང༌། དཔལ་ལྡན་རྒྱུད་དུ་ཡང༌། བུམ་པའི་ནང་དུ་ཆུ་ནི་ལེན་པར་བྱེད་པ་ན་[བུམ་པ་འགྲོ་བ་]ཡང་ནམ་མཁའ་འགྲོ་བ་མིན་པ་ཇི་ལྟ་བར། །མཁའ་ཁྱབ་[ཏུ་ནམ་ཡང་བཞུགས་པ་]མཁའ་ཡི་རྡོ་རྗེ་ཅན་[རྡོ་རྗེ་འཆང་]ནི་ཡུལ་དང་རྣམ་པར་བྲལ་བ[འི་ཡུལ་ཏེ་འགལ་འདུས་སྐྱོན་མེད་གཟུང་འཛིན་དང་བྲལ་བའི་དབྱིངས་]ལུས་ཀྱི་དབུས་སུ་[བཞུགས་པ་ཡང་འགྲོ་འོང་མེད་པ་]དེ་བཞིན་ནོ། །ཞེས་དང༌། མདོ་སྡེའི་རྒྱན་དུ་ཡང༌། ཇི་ལྟར་ནམ་མཁའ་རྟག་ཏུ་ཀུན་སོང་འདོད། །དེ་བཞིན་[དུ་ཆོས་ཉིད་ངོ་བོ་ཉིད་སྐུ་]དེ་ཡང་རྟག་ཏུ་ཀུན་སོང་འདོད། །ཇི་ལྟར་ནམ་མཁའ་གཟུགས་གྱུར་ཀུན་ཏུ་སོང༌། །དེ་བཞིན་[དུ་ཆོས་ཉིད་ངོ་བོ་ཉིད་སྐུ་]དེ་ཡང་སེམས་ཅན་ཚོགས་ཀུན་[ལ་]སོང༌། །ཞེས་[ཕྱིར་ཀུན་ལ་ཁྱབ་པ་དང་ཁྱད་པར་སེམས་ཅན་ལ་ཁྱབ་པར་བསྟན་པ་]དང༌། དེ་བཞིན་གཤེགས་པའི་གསང་བ་བསམ་གྱིས་མི་ཁྱབ་པའི་མདོར་ཡང༌། ཞི་བའི་བློ་གྲོས་འདི་ལྟ་སྟེ་དཔེར་ན། ནམ་མཁའ་ནི་གཟུགས་སུ་སྣང་བ་ཐམས་ཅད་དུ་ཞུགས་པའོ། །ཞི་བའི་བློ་གྲོས་དེ་བཞིན་དུ། དེ་བཞིན་གཤེགས་པའི་[ཆོས་ཀྱི་]སྐུ་ཡང༌། སེམས་ཅན་དུ་སྣང་བ་ཐམས་ཅད་དུ་ཞུགས་པའོ། །ཞྀ་བའི་བློ་གྲོས་འདི་ལྟ་སྟེ། དཔེར་ན་ནམ་མཁའི་ནང་དུ་ནི་གཟུགས་སུ་སྣང་བ་ཐམས་ཅད་འདུས་སོ། །ཞི་བའི་བློ་གྲོས་དེ་བཞིན་དུ། དེ་བཞིན་གཤེགས་པའི་[ཆོས་ཀྱི་]སྐུའི་ནང་དུ་ཡང་སེམས་ཅན་དུ་སྣང་བ་ཐམས་ཅད་འདུས་སོ། །ཞེས་དང༌། རྒྱུད་བླ་མར་ཡང༌། ཇི་ལྟར་རྟོག་མེད་བདག་ཉིད་ཅན། །ནམ་མཁའ་ཀུན་ཏུ་རྗེས་སོང་ལྟར། །སེམས་ཀྱི་རང་བཞིན་[འོད་གསལ་]དྲི་མེད་དབྱིངས།།དེ་བཞིན་ཀུན་ཏུ་འགྲོ་བ་ཉིད། །དེ་སྤྱི[ལ་ཁྱབ་པ]འི་མཚན་ཉིད་[ཡིན་པས་]ཉེས་པ་[ཅན་སེམས་ཅན་]དང༌། །ཡོན་ཏན་[ཅན་རྒྱལ་སྲས་དང་ཡོན་ཏན་གྱི་]མཐར་ཐུག་[པ་སངས་རྒྱས་ལ་]ཁྱབ་[པར་རྟག་ཏུ་བཞུགས་]པ་སྟེ། །གཟུགས་ཀྱི་རྣམ་པ་དམན་པ་དང༌། །བར་མ་[དང་]མཆོག་ལ་ནམ་མཁའ་[ཁྱབ་པར་ནམ་ཡང་ཡོད་པ་]བཞིན། །ཞེས་དང༌། ཇི་ལྟར་[འདུས་མ་བྱས་]ནམ་མཁའ་ཀུན་[ཏུ་]སོང་བ། །ཕྲ་ཕྱིར་[དངོས་པོ་གང་ལ་ཡང་]ཉེ་བར་གོས་པ་མེད། །དེ་བཞིན་སེམས་ཅན་ཐམས་ཅད་ལ། །[འཁོར་འདས་ཀུན་གྱི་]གནས་[སམ་གཞིར་གྱུར་པ་དེ་བཞིན་ཉིད་]འདི་ཉེ་བར་གོས་པ་མེད[དེ་མ་འདྲེས་པར་བཞུགས་སོ]། །ཇི་ལྟར་འཇིག་རྟེན་ཐམས་ཅད་དུ། །ནམ་མཁའ་ལ་ནི་སྐྱེ་ཞིང་འཇིག །དེ་བཞིན་འདུས་མ་བྱས་[དོན་དམ་གྱི་]དབྱིངས་ལ། །[ཀུན་རྫོབ་ཀྱི་]དབང་པོ་རྣམས་ནི་སྐྱེ་ཞིང་འཇིག །ཅེས་སོགས་དང༌། སེམས་ཀྱི་རང་བཞིན[འོད་གསལ་ནི་]ནམ་མཁའ་ཡི། །ཁམས་ལྟར་རྒྱུ་མེད་རྐྱེན་མེད་དེ། །[འདུས་བྱས་གང་ཡང་]ཚོགས་པ་མེད་ཅིང་སྐྱེ་བ་དང༌། །འཇིག་དང་གནས་པའང་ཡོད་མ་ཡིན། །སེམས་ཀྱི་རང་བཞིན་འོད་གསལ་གང་ཡིན་པ། །དེ་ནི་ནམ་མཁའ་བཞིན་དུ་འགྱུར་མེད་དེ། །ཡང་དག་མིན་རྟོག་ལས་བྱུང་འདོད་ཆགས་སོགས། །གློ་བུར་དྲི་མས་[རང་བཞིན་འོད་གསལ་]དེ[འི་ངོ་བོ་]ཉོན་མོངས་[པར་]མི་འགྱུར། །ཞེས་སོགས་ཀྱིས་དེ་བཞིན་ཉིད་ནམ་མཁའ་དང་འདྲ་བར་གསུངས་ལ།