ཡང་དེ་ཉིད་དེ་བཞིན་ཉིད་ལ་སོགས་པའི་གནས་སྐབས་གསུམ་དུ་བཞུགས་ཚུལ།

འབུམ་པ་རྒྱ་ཆེར་བཤད་པར་ཡང༌། སེམས་ཅན་ཐམས་ཅད་དེ་བཞིན་གཤེགས་པའི་སྙིང་པོ་ཅན་ཡིན་ནོ། །ཞེས་གཞུང་[མཆོག་ཁྱད་འཕགས་རྣམས་]ལས་འབྱུང་བས། སེམས་ཅན་ཐམས་ཅད་ནི་དེ་བཞིན་ཉིད་ཀྱི་རང་བཞིན་ཅན་ཡིན་ནོ། །དེ་བཞིན་ཉིད་དེ་ལ་ཡང་གནས་སྐབས་གསུམ་ཡོད་དེ། མ་དག་པའི་གནས་སྐབས་དང༌། [དྲི་མ་ལ་ལས་]དག་པ་དང་[ལ་ལས་]མ་དག་པའི་གནས་སྐབས་དང་ཤིན་ཏུ་ཡོངས་སུ་དག་པའི་གནས་སྐབས་སོ། །དེ་ལ་མ་དག་པའི་གནས་སྐབས་ནི་སོ་སོའི་སྐྱེ་བོ་ཐམས་ཅད་ཡིན་ཏེ། དེ་དག་ལ་བྱང་ཆུབ་ཀྱི་གནས་སྐབས་[ཐོབ་པ་]ནི་མེད་ཀྱི། སེམས་དཔ[འ་སཏྭ་ཞེས་པ་སེམས་ཅན་པ]འི་གནས་སྐབས་འབའ་ཞིག་ཏུ་ཟད་པས་དེ་བཞིན་ཉིད་དེ་ལ་སེམས་དཔའ་[སཏྭ་ཞེས་པ་སེམས་ཅན་པ་]ཞེས་བྱ་བའི་མིང་དུ་བརྗོད་དོ། །[དྲི་མ་ལ་ལས་]དག་པ་དང་མ་དག་པའི་གནས་སྐབས་ནི། [བྱང་སེམས་]འཕགས་པ་རྣམས་ཡིན་ཏེ། དེ་དག་ལ་བྱང་ཆུབ་ཀྱི་གནས་སྐབས་[ཅི་རིགས་མངོན་དུ་གྱུར་པ་]དང༌། སེམས་དཔའི་གནས་སྐབས་[རྣམ་ཤེས་ཀྱི་ལྷག་མའང་ཡོད་པའི་ཕྱིར་དེ་]གཉི་ག་ཡོད་པས་དག་པ་དང་མ་དག་པའི་དེ་བཞིན་ཉིད་དེ་ལ་བྱང་ཆུབ་སེམས་དཔའ་ཞེས་བྱ་བའི་མིང་དུ་བརྗོད་དོ། །[ཤིན་ཏུ་]ཡོངས་སུ་དག་པའི་གནས་སྐབས་ན་ནི་བྱང་ཆུབ་ཀྱི་གནས་སྐབས་འབའ་ཞིག་ཏུ་ཟད་པས་དེ་བཞིན་ཉིད་དེ་ལ་དེ་བཞིན་གཤེགས་པ་[ཐོབ་པ་]ཞེས་བྱ་བའི་མིང་དུ་བརྗོད་དེ། ཇི་སྐད་དུ། རབ་འབྱོར་[སྟོང་གཞི་དོན་དམ་གྱི་]དེ་བཞིན་གཤེགས་པ་ཞེས་བྱ་བ་དེ་ནི་ཡང་དག་པ་དེ་བཞིན་ཉིད་ཀྱི་ཚིག་བླ་དྭགས་སོ། །ཞེས་གསུངས་པ་ལྟ་བུའོ། །ཞེས་དང༌། ཡུམ་རྒྱས་པ་དང༌། ཉི་ཁྲི་ལྔ་སྟོང་པ་དང༌། ཁྲི་བརྒྱད་སྟོང་པ་རྣམས་ཀྱི་འགྲེལ་པ[གནོད་འཇོམས་མཁས་མཆོག་དབྱིག་གཉེན་གྱིས་མཛད་པ]ར་ཡང༌། དེ་བཞིན་གཤེགས་པའི་སྙིང་པོ་ཞེས་བྱ་བའི་དེ་བཞིན་ཉིད་དེ་ལ་ཡང་གནས་སྐབས་གསུམ་སྟེ། སོ་སོའི་སྐྱེ་བོའི་ས་ལ་མ་དག་པའི་གནས་སྐབས་དང༌། བྱང་ཆུབ་སེམས་དཔའི་ས་ལ་དག་པ་དང་མ་དག་པའི་གནས་སྐབས་དང༌། དེ་བཞིན་གཤེགས་པའི་ས་ལ་དག་པའི་གནས་སྐབས་སོ། །དེ་ལ་མ་དག་པའི་དེ་བཞིན་ཉིད་ལ་ནི་སེམས་ཅན་ཞེས་བྱ་སྟེ། དེ་ཡང༌། [དེ་བཞིན་ཉིད་ཀྱི་ངོ་བོ་ལ་]ཀུན་ནས་ཉོན་མོངས་པའི་སྐྱོན་མེད་པ་ཉིད་ཅེས་བྱའོ། །དག་པ་དང་མ་དག་པའི་གནས་སྐབས་ལ་ནི་བྱང་ཆུབ་སེམས་དཔའ་ཞེས་བྱ་སྟེ། བྱང་ཆུབ་ཀྱི་གནས་སྐབས་དག་པ་དང༌། སེམས་ཅན་གྱི་གནས་སྐབས་མ་དག་པའི་ཕྱིར་རོ། །དེ་ཉིད་ལ་བྱང་ཆུབ་སེམས་དཔའི་སྐྱོན་མེད་པ་ཉིད་ཅེས་བྱའོ། །དག་པའི་གནས་སྐབས་ལ་ནི་དེ་བཞིན་གཤེགས་པ་ཞེས་བྱ་སྟེ། རབ་འབྱོར་དེ་བཞྀན་གཤེགས་པ་ཞེས་བྱ་བ་ནི་ཡང་དག་པ་དེ་བཞིན་ཉིད་ཀྱི་ཚིག་བླ་དྭགས་སོ། །ཞེས་འབྱུང་བའི་ཕྱིར་རོ། །དེ་ཉིད་ལ་ཆོས་སྐྱོན་མེད་པ་ཉིད་ཅེས་བྱའོ། །ཞེས་དང༌། ཆོས་ཐམས་ཅད་ཀྱི་དེ་བཞིན་ཉིད་ནི་དུས་ཐམས་ཅད་དུ་[ཡུལ་གང་ནའང་]ཡོད་པའི་ཕྱིར་རོ། །དེ་བཞིན་གཤེགས་པའི་དེ་བཞིན་ཉིད་ཀྱང་དེ་ལས་གཞན་མ་ཡིན་པའི་ཕྱིར་དུས་ཐམས་ཅད་དུ་[ཡུལ་གང་ནའང་]ཡོད་དོ། །ཞེས་དང༌། སངས་རྒྱས་ཀྱི་རིགས་སུ་སྐྱེ་བར་འདོད་པས། ཞེས་བྱ་བ་ལ། དེ་བཞིན་གཤེགས་པའི་རིགས་[རང་བཞིན་པ་]ནི་འདིར་ཡོངས་སུ་གྲུབ་པའི་དེ་བཞིན་ཉིད་ལ་བྱ་སྟེ། ཞེས་དང༌། འཇིག་རྟེན་ཆོས་ཀྱི་དབྱིངས་ཀྱིས་ཀླས་པ་ཞེས་བྱ་བ་ནི་སེམས་ཅན་གྱི་འཇིག་རྟེན་ལ་བྱ་སྟེ། སེམས་ཅན་གྱི་འཇིག་རྟེན་ལ་ཡང་མཐའ་མེད་པའི་ཕྱིར། དེ་བཞིན་གཤེགས་པའི་སྙིང་པོས་ཀླས་ཞེས་བྱའོ། །ཞེས་དང༌། སེམས་ཅན་གྱི་ཞིང་ཡོངས་སུ་དག་པའི་ཕྱིར་ཞེས་བྱ་བ་ནི་སེམས་ཅན་ཐམས་ཅད་དེ་བཞིན་གཤེགས་པའི་སྙིང་པོ་ཅན་ཉིད་ཡིན་པས། སེམས་ཅན་གྱི་ཞིང་ཡོངས་སུ་དག་པའོ། །ཞེས་སོགས་རྒྱ་ཆེར་གསུངས་པ་དང༌། ཡོན་ཏན་རིན་ཆེན་སྡུད་པར་ཡང༌། འདས་པའི་དེ་བཞིན་ཉིད་གང་[ཡིན་པ་དེ་]མ་བྱོན་[པའི་]དེ་བཞིན་ཉིད[ཡིན་ལ]། །ད་ལྟར་[བའི་དངོས་པོ་ཀུན་གྱི་]དེ་བཞིན་ཉིད་གང་[ཡིན་པ་དེ་]དགྲ་བཅོམ་[པའི་]དེ་བཞིན་ཉིད[ཡིན་ཞིང་]།།[དུས་གསུམ་གྱི་]ཆོས་ཀུན་[གྱི་]དེ་བཞིན་ཉིད་གང་[ཡིན་པ་དེ་]རྒྱལ་བའི་དེ་བཞིན་ཉིད[ཡིན་པས]། །ཆོས་[ཐམས་ཅད་]ཀྱི་དེ་བཞིན་ཉིད་འདི་ཐམས་ཅད་བྱེ་བྲག་[ཐ་དད་]མེད། །ཅེས་དང༌། འཇིག་རྟེན་[པའི་]དེ་བཞིན་ཉིད་དང་དགྲ་བཅོམ་[པའི་]དེ་བཞིན་ཉིད[དང་]།།རང་རྒྱལ་[བའི་]དེ་བཞིན་ཉིད་དང་རྒྱལ་སྲས་[ཀྱི་]དེ་བཞིན་ཉིད[རྣམས]། །གཅིག་པ་ཉིད་དེ་དངོས་[པོ་ཀུན་དང་]བྲལ་[བའི་གཞི་ཆོས་ཉིད་དེ་ཁོ་ནར་ངེས་ཀྱི་]གཞན་[དུ་འགྱུར་བ་]མིན་[པ་]དེ་བཞིན་ཉིད[གང་ཡིན་པ་དབྱིངས་རིག་དབྱེར་མེད་དེ]། །ཤེས་རབ་ཕ་རོལ་ཕྱིན་པ་[ཡིན་ལ་]དེ་བཞིན་གཤེགས་པས་[མངོན་སུམ་དུ་]མཁྱེན། །མཁས་པ་[སངས་རྒྱས་གཟུགས་སྐུ་]འཇིག་རྟེན་[དུ་]གནས་སམ་མྱ་ངན་འདས་[ཏེ་གྲོངས་]ཀྱང་རུང༌། །ཆོས་ཉིད་སྐྱོན་[གདོད་ནས་]མེད་[པ་]ཆོས་རྣམས་[ཀྱི་]སྟོང་པ[འི་གཞི་བདེ་གཤེགས་སྙིང་པོ་]འདི་[ནམ་ཡང་གང་ནའང་]གནས་ཏེ། །བྱང་ཆུབ་སེམས་དཔས་དེ་བཞིན་ཉིད་[བདེ་གཤེགས་སྙིང་པོ་]འདི་རྗེས་སུ་རྟོགས། །དེ་ཕྱིར་[དེ་བཞིན་ཉིད་མངོན་གསུམ་གྱིས་རྫོགས་པར་རྟོགས་པ་ལ་]དེ་བཞིན་གཤེགས་ཞེས་སངས་རྒྱས་མཚན་གསོལ་[ཏེ་གཤེགས་པ་རྟོགས་པའི་དོན་གྱི་ཕྱིར་ཞེས་པའི་དོན་]ཏོ། །ཞེས་དང༌། [དོན་དམ་གྱི་དབྱིངས་རིག་དབྱེར་མེད་ཤེར་ཕྱིན་]འདི་ནི་[དོན་དམ་གྱི་]ཆོས་[བགྲང་ཡས་ཀྱི་]གཏེར་[ཆེན་]མཆོག་དང་[དོན་དམ་གྱི་]ཆོས་[བགྲང་ཡས་ཀྱི་]མཛོད་དམ་པ་ཡིན[ཞིང་]། །སངས་རྒྱས་[ཀྱི་]རིགས་[རང་བཞིན་པ་]ཡིན་[ལ་]འགྲོ་བའི་བདེ་དང་སྐྱིད་པའི་མཛོད[ཀྱང་ཡིན]། །འདས་དང་མ་བྱོན་ཕྱོགས་བཅུའི་འཇིག་རྟེན་མགོན་པོ་རྣམས། །དེ་དག་[དོན་དམ་གྱི་དབྱིངས་རིག་དབྱེར་མེད་ཤེར་ཕྱིན་]འདི་ལས་འཁྲུངས་ཀྱང་ཆོས་དབྱིངས་[རང་རིག་ཤེར་ཕྱིན་དེ་]ཟད[པར་]མི་འགྱུར། །ཤིང་དང་འབྲས་བུ་མེ་ཏོག་ནགས་ཚལ་ཇི་སྙེད་པ། །དེ་དག་ཐམས་ཅད་ས་ལས་ཡང་དག་འབྱུང་ཞིང་འཐོན། །འོན་ཀྱང་ས་ལ་ཟད་པ་མེད་ཅིང་འཕེལ་བ་མེད། །ཡོངས་སུ་མི་ཉམས་རྣམ་པར་མི་རྟོག་སྐྱོ་བ་མེད། །[དེ་བཞིན་དུ་ཀུན་རྫོབ་ཀྱི་]སངས་རྒྱས་[དང་དེའི་]སྲས་དང་ཉན་ཐོས་[དང་]རང་རྒྱལ་[དང་]ལྷ་རྣམས་དང༌། །[མི་ལ་སོགས་པ་]འགྲོ་བ་ཀུན་གྱི་བདེ་སྐྱིད་ཆོས་རྣམས་ཇི་སྙེད་པ། །དེ་ཀུན་ཤེས་རབ་ཕ་རོལ་ཕྱིན་པ་མཆོག་ལས་བྱུང༌། །ཤེས་རབ་ནམ་ཡང་ཟད་པ་མེད་ཅིང་འཕེལ་བ་མེད། །[ཡོངས་སུ་མི་ཉམས་རྣམ་པར་མི་རྟོག་སྐྱོ་བ་མེད་]ཅེས་གནས་སྐབས་གསུམ་པོ་ཀུན་ཏུ་འགྲོ་བའྀ་ཆོས་སྐུ་བདེ་གཤེགས་སྙིང་པོ་ཆོས་དབྱིངས་དེ་བཞིན་ཉིད་[རང་བྱུང་ཡེ་ཤེས། འགྱུར་མེད་ཡོངས་གྲུབ། ཕྱག་རྒྱ་ཆེན་པོ། ལྷན་ཅིག་སྐྱེས་སྦྱོར། སངས་རྒྱས་མཉམ་སྦྱོར། དབུ་མ་ཆེན་པོ་]གང་ཡིན་པ་གཞི་འབྲས་ངོ་བོ་དབྱེར་མེད་ཀྱི་ཤེར་ཕྱིན་དེ་ཉིད་སངས་རྒྱས་ཀྱི་རིགས་དང༌། ཆོས་ཐམས་ཅད་ཀྱི་གཞིར་དུས་ཐམས་ཅད་དུ་[གང་ནའང་]ཡོད་པར་གསུངས་ལ། དེ་ཉིད་ཧེ་རུ་ཀ་བཞི་ལ་སོགས་པ་དོན་དམ་པའི་ལྷ་དང་སྔགས་དང་རྒྱུད་དང་དཀྱིལ་འཁོར་[དང་ཕྱག་རྒྱ་དང་དངོས་གྲུབ་]ལ་སོགས་པ་ཡང་ཡིན་པའི་ཕྱིར་[མདོ་སྔགས་ཀྱི་]གསུང་རབ་ཟབ་མོ་འདི་དག་གི་དགོངས་པ་མི་འགལ་ཞིང་དོན་གཅིག་པ་ཉིད་དུ་ཡིད་ཆེས་པར་བྱ་སྟེ། [དེ་ཡང་རིགས་གསུམ་མགོན་པོ་དང༌། མ་ཕམ་པ་ལ་སོགས་པ་]དཔལ་ལྡན་ས་བཅུ་པ་རྣམས་ཀྱི་མན་ངག་མཆོག་ལ་བརྟེན་ནས་སོ། །འདི་དང་འདི་འདྲ་བ་དག་ལ་ཉེ་བར་དགོངས་ནས། མགོན་པོ་སྤྱན་རས་གཟིགས་དབང་ཕྱུག་གིས། [གནས་ལུགས་ཟབ་མོའི་སྐབས་]འདིར་[དོན་]གཅིག་ལ་ཡང་[ཡོན་ཏན་གྱི་]དངོས་པོ་[སྟེ་ངོ་བོ་ཡོད་པ་]དང་[སྐྱོན་གྱི་]དངོས་པོ་མེད་པའི་[ཆ་ནས་སྨོས་པའི་]མིང་སྣ་ཚོགས་[མང་པོ་གསུངས་]ཏེ། དེའི་ཕྱིར་དངོས་པོ་གཅིག་ལ་ཡང་མིང་སྣ་ཚོགས་ཀྱིས་བསྟན་པ་ལ་རྣལ་འབྱོར་པ་རྣམས་ཀྱིས་མིང་[ཐ་དད་ལས་དོན་ཐ་དད་དུ་འཛིན་པ་དག་]གི་རྣམ་པར་རྟོག་པ་མི་བྱ་སྟེ། བླ་མ་དམ་པ[ས་བཅུ་པ]འི་མན་ངག་གིས་[བསྲེགས་བཅད་བརྡར་བས་]གསེར་[བརྟག་པ་]བཞིན་དུ་ལེགས་པར་ཡོངས་སུ་བརྟགས་ཏེ་དོན་ལ་རྟོན་པ་ལ་བརྟེན་པ་ཉིད་ལས་སོ་ཞེས་གསུངས་པ་ཡིན་ནོ། །