ཡང་དེ་ཉིད་གཞི་འབྲས་དབྱེར་མེད་ཀྱི་མྱང་འདས་དང་ཆོས་སྐུ་ལ་སོགས་པར་བཞུགས་ཚུལ།

མྱང་འདས་ཆེན་པོར་ཡང༌། [སྟོང་གཞི་དོན་དམ་གྱི་]གཞི་འབྲས་ངོ་བོ་དབྱེར་མེད་གསུངས་པ་ཡོད་དེ། ཇི་སྐད་དུ། མོའུ་འགལ་མྱ་ངན་ལས་འདས་པ་ཞེས་བྱ་བ་ནི་[སྟོང་གཞི་དོན་དམ་གྱི་]ཚིག་གི་ཐ་སྙད་དོ། །[སྟོང་གཞི་དོན་དམ་གྱི་]རྐང་པའི་རྗེས་སོ། །མཐར་ཕྱིན་པའི་གནས་[ཏེ་ཡང་དག་མཐའ་ལ་རྣམ་པར་གནས་]སོ། །འཇིགས་པ་མེད་པའོ། །[སྟོང་གཞི་དོན་དམ་གྱི་]སྟོན་པ་ཆེན་པོའོ། །[བྲལ་བའི་]འབྲས་བུ་ཆེན་པོའོ། །མཐར་ཕྱིན་པའི་ཡེ་ཤེས་སོ། །[སྟོང་གཞི་དོན་དམ་གྱི་]བཟོད་པ་ཆེན་པོའོ། །ཐོགས་པ་མེད་པའི་ཏིང་ངེ་འཛིན་ནོ། །ཆོས་ཀྱི་དབྱིངས་ཆེན་པོའོ། །[སྟོང་གཞི་དོན་དམ་གྱི་]ཟིལ་དངར་གྱི་རོའོ། །[རྣམ་ཤེས་ཀྱིས་]མཐོང་དཀའ་བ་ཡིན་ནོ། །ཞེས་ཀུན་གྱི་གཞིར་གྱུར་པའི་ཆོས་ཀྱི་དབྱིངས་དེ་ཉིད་འབྲས་བུ་ཆེན་པོ་དང་མཐར་ཕྱིན་པའི་ཡེ་ཤེས་དང་སྟོན་པ་ཆེན་པོ་ལ་སོགས་པ་ཡང་ཡིན་པར་གསུངས་པའི་ཕྱིར་རོ། །དེ་བཞིན་དུ་གསེར་འོད་དམ་པའི་མདོར་ཡང༌། ཆོས་ཀྱི་སྐུ་དེ་ཉིད་རྒྱུ་དང་གནས་དང་འབྲས་བུ་དང་གཞི་དང་ཐེག་པ་ཆེན་པོ་དང་དེ་བཞིན་གཤེགས་པའི་ངོ་བོ་ཉིད་དང་དེ་བཞིན་གཤེགས་པའི་སྙིང་པོ་ལ་སོགས་པར་གསུངས་ཏེ། ཇི་སྐད་དུ། ཆོས་ཀྱི་སྐུ་དེ་ནི་དེ་བཞིན་གཤེགས་པའི་མཛད་པ་སྣ་ཚོགས་མངོན་དུ་གྱུར་པའོ། །རིགས་ཀྱི་བུ་[ཆོས་]སྐུ་འདི་ནི་[དྲི་མ་བྲལ་]རྒྱུ་དང་[རང་རིག་ཡེ་ཤེས་ཀྱི་]སྤྱོད་ཡུལ་དང་[འགྱུར་མེད་བདེ་བའི་]གནས་དང་[དྲི་མ་བྲལ་བའི་]འབྲས་བུ་དང་གཞི་[ཆོས་]ཉིད་ལ་བརྟེན་པ་བསམ་གྱིས་མི་ཁྱབ་པ་སྟེ། དོན་དེ་མངོན་པར་ཤེས་ན་[ཆོས་]སྐུ་དེ་ཉིད་ཐེག་པ་ཆེན་པོའོ། །དེ་ཉིད་དེ་བཞིན་གཤེགས་པའི་ངོ་བོ་ཉིད་དོ། །[དེ་ཉིད་]དེ་བཞིན་གཤེགས་པའི་སྙིང་པོ་སྟེ་སྐུ་དེ་ལ་བརྟེན་ནས་སེམས་དང་པོ་བསྐྱེད་པ་དང༌། ས་[རྣམས་]ཡོངས་སུ་སྦྱོང་བའི་སེམས་མངོན་པར་འབྱུང་སྟེ། [སངས་རྒྱས་ཀྱི་]ས་ལས་[ཕྱིར་]མི་ལྡོག་པའི་སེམས་ཀྱང་མངོན་དུ་འགྱུར་པ་དང༌། [སངས་རྒྱས་ཐོབ་པ་ལ་]སྐྱེ་བ་གཅྀག་གིས་ཐོགས་པ་ལ་གནས་པའི་སེམས་དང༌། རྡོ་རྗེ་ལྟ་བུའི་ཏིང་ངེ་འཛིན་དང༌། དེ་བཞིན་གཤེགས་པའི་དགོངས་པ་ཡང་མངོན་པར་འབྱུང༌། དེ་བཞིན་གཤེགས་པའི་དམ་པའི་ཆོས་ཚད་མེད་གྲངས་མེད་པ་ཐམས་ཅད་ཀྱང་མངོན་དུ་འགྱུར་རོ། །ཆོས་ཀྱི་སྐུ་[རང་བཞིན་འོད་གསལ་]དེ་ལ་བརྟེན་ནས་བསམ་གྱིས་མི་ཁྱབ་པའི་ཏིང་ངེ་འཛིན་ཆེན་པོ་ཡང་མངོན་དུ་འབྱུང་བར་འགྱུར་རོ། །ཆོས་ཀྱི་སྐུ་[རང་བཞིན་འོད་གསལ་]འདི་ལ་བརྟེན་ནས་ཡེ་ཤེས་ཆེན་པོ་ཐམས་ཅད་ཀྱང་སྣང་བར་འགྱུར་རོ། །དེ་ལྟ་བས་ན་[གཟུགས་]སྐུ་གཉིས་ནི་ཏིང་ངེ་འཛིན་དང༌། ཡེ་ཤེས་ལ་བརྟེན་ནས་འབྱུང་བར་འགྱུར་རོ། །ཆོས་ཀྱི་སྐུ་[འདུས་མ་བྱས་]འདི་རང་གི་ངོ་བོ་ཉིད་[མི་འགྱུར་བ་]ལ་བརྟེན་པས་རྟག་པ་ཞེས་བྱའོ། །[དག་པའི་]བདག་ཅེས་བྱའོ། །ཏིང་ངེ་འཛིན་ཆེན་པོ་ལ་བརྟེན་པས་ན་[དོན་དམ་གྱི་]བདེ་བ་ཞེས་བྱའོ། །ཡེ་ཤེས་ཆེན་པོ་[རང་བཞིན་འོད་གསལ་]ལ་བརྟེན་པས་ན་རྣམ་པར་དག་པ་ཞེས་བྱ་སྟེ་དེའི་ཕྱིར་དེ་བཞིན་གཤེགས་པ་རྟག་པར་བདེ་བ་དང་རྣམ་པར་དག་པ་ལ་མངའ་བརྙེས་ཤིང་བཞུགས་པའོ་ཞེས་སོ། །