ལུང་ལ་མི་མཁས་པས་བརྟགས་པའི་ལྟ་ངན་སྤང་བར་གདམས་པ་ལ་བཅུ་གཅིག །དགོས་པ་བསྟན་པས་དྲང་དོན་དུ་འཁྲུལ་བའི་སྡིག་ལྟ་སྤངས་པ་ལ་གཉིས། རྒྱུད་བླ་མར་དགོས་པ་བསྟན་པ་ལས་དྲང་དོན་དུ་འཁྲུལ་བའི་སྡིག་ལྟ་སྤང་བ།
གལ་ཏེ་རྒྱུད་བླ་མར། སྤྲིན་དང་རྨི་ལམ་རྒྱུ་བཞིན་[འཁོར་ལོ་བར་པ་]དེ་དང་དེར། །ཤེས་བྱ་ཐམས་ཅད་རྣམ་ཀུན་སྟོང་པ་ཞེས། །གསུངས་ནས་ཡང་[འཁོར་ལོ་ཐ་མ་]འདིར་རྒྱལ་[བ་]རྣམས་སེམས་ཅན་ལ། །སངས་རྒྱས་སྙིང་པོ་ཡོད་ཅེས་ཅི་སྟེ་གསུང་[སྙམ་ན]། །སེམས་ཞུམ་སེམས་ཅན་དམན་ལ་བརྙས་པ་དང༌། །ཡང་དག་མི་འཛིན་ཡང་དག་ཆོས་ལ་སྐུར། །བདག་ཆགས་ལྷག་པའི་སྐྱོན་ལྔ་གང་དག་ལ། །ཡོད་པ་དེ་དག་དེ་སྤང་དོན་དུ་གསུངས། །ཞེས་བདེ་གཤེགས་སྙིང་པོ་དྲང་དོན་དུ་གསུངས་པ་མ་ཡིན་ནམ་ཞེ་ན། མ་ཡིན་ཏེ། གཞུང་དེ་ལ་དྲང་དོན་དུ་སྟོན་པའི་ཚིག་ནི་འགའ་ཡང་མེད་དོ། །གལ་ཏེ་དེ་སྤང་དོན་དུ་གསུངས། ཞེས་པ་འདིས་དྲང་དོན་དུ་གྲུབ་བོ་ཞེ་ན། དེ་ནི་དགོས་པ་བསྟན་པ་ཡིན་ཏེ། འདི་ཉིད་ཀྱི་སྔ་འགྲེལ་དུ། [གཤིས་ཀྱི་གནས་ལུགས་]ཁམས་[ཏེ་དབྱིངས་]འདི་བལྟ་བར་དཀའ་བ་དེས་ན་བྱིས་པ་སོ་སོའི་སྐྱེ་བོ་ལ་བརྩམས་ཏེ་བསྟན་པ་འདིས་ཅི་ཞིག་བྱ་ཞེ་ན།
[གཤིས་ལ་གནས་པ་གསལ་བར་]བསྟན་པའི་དགོས་པ་བསྡུས་པ་ཚིགས་སུ་བཅད་པ་གཉིས་ཏེ། གཅིག་གིས་དྲིས་ལ་གཉིས་པས་ནི་ལན་བསྟན་པའོ། །ཞེས་གསུངས་པའི་ཕྱིར་རོ། །དགོས་པ་བསྟན་པས་དྲང་དོན་དུ་འགྱུར་ན་ནི། [དགོས་པ་བསྟན་པའི་]ངེས་དོན་རྣམས་ལ་ཡང་[དྲང་དོན་གྱིས་ཁྱབ་པར་]ཧ་ཅང་ཐལ་བར་འགྱུར་རོ། །དགོས་པ་དེ་དག་རྒྱས་པར་བཤད་པ་ནི། ཡང་དག་མཐའ་ནི་འདུས་བྱས་ཀྱི། །རྣམ་པ་ཐམས་ཅད་[ཀྱིས་]དབེན་པ་སྟེ[དེས་ན་གཞན་སྟོང་ངོ་]། །ཉོན་མོངས་ལས་དང་རྣམ་སྨིན་དོན། །སྤྲིན་ལ་སོགས་པ་བཞིན་དུ་[རང་སྟོང་དུ་]བརྗོད[ཏེ]། །ཉོན་མོངས་[ནི་]སྤྲིན་འདྲ་བྱ་བ་ཡི། །ལས་ནི་རྨི་ལམ་ལོངས་སྤྱོད་བཞིན། །ཉོན་མོངས་ལས་ཀྱི་[འབྲས་བུ་]རྣམ་པར་སྨིན[པ]། །ཕུང་པོ་[རྣམས་ནི་]སྒྱུ་མ་[སྣ་ཚོགས་]སྤྲུལ་པ་བཞིན[དུ་དོན་ལ་མེད་ཅིང་སྟོང་ངོ་ཞེས]། །སྔར་ནི་དེ་ལྟར་རྣམ་གཞག་ནས། །སླར་ཡང་བླ་མའི་རྒྱུད་[དམ་ཕྱི་མའི་གཞུང་]འདིར་ནི། །ཉེས་པ་ལྔ་དག་སྤང་བྱའི་ཕྱིར། །[གཤིས་ཀྱི་གནས་ལུགས་ལ་ཆོས་རྣམས་མེད་ཀྱང་ཆོས་ཀྱི་]ཁམས་[ཏེ་དབྱིངས་ཡང་དག་མཐའ་ནི་]ཡོད་ཉིད་ཅེས་[གསལ་བར་]བསྟན་པ་ཡིན། །[དེ་མ་བསྟན་ན་ཉེས་པ་ལྔ་མི་སྤོང་ཞིང༌། བསྟན་ན་སྤོང་བའི་རྒྱུ་མཚན་]འདི་ལྟར་[བདེ་གཤེགས་སྙིང་པོ་]དེ་ནི་མ་ཐོས་པས། ། [བདག་ཉིད་ཀྱིས་]བདག་[རང་]ལ་བརྙས་པའི་ཉེས་པ་ཡིས། །སེམས་ནི་ཞུམ་པ་འགའ་ཞིག་ལ། །བྱང་ཆུབ་སེམས་ནི་སྐྱེ་མི་འགྱུར། །གང་[འགའ་ཞིག་]ལ་བྱང་ཆུབ་སེམས་སྐྱེས་པས། །བདག་ནི་མཆོག་ཅེས་རློམ་པ་ན། །བྱང་ཆུབ་སེམས་མ་སྐྱེས་པ་ལ། །དམན་པའི་འདུ་ཤེས་རབ་ཏུ་འཇུག[ཅིང་བརྙས་པར་འགྱུར]། །དེ་ལྟར་སེམས་དཔའ་དེ་ལ་ནི། །[དོན་བཞིན་རྟོགས་པའི་]ཡང་དག་ཤེས་པ་མི་སྐྱེ་བ། །དེས་ན་ཡང་དག་མིན་[པ་ཆོས་རྣམས་རང་སྟོང་ལ་དོན་དམ་དུ་]འཛིན་ཅིང༌། །ཡང་དག་[པའི་]དོན་[སྟོང་གཞི་དོན་དམ་གཞན་སྟོང་ལ་]ནི་རིག་མི་འགྱུར། །བཅོས་མ་གློ་བུར་བ་ཉིད་ཕྱིར། །སེམས་ཅན་[གྱི་]སྐྱོན་[དུ་གྱུར་པའི་ཕུང་པོ་ཁམས་དང་སྐྱེ་མཆེད་]དེ་ཡང་དག་མིན། །ཡང་དག་[མཐའ་ནི་སེམས་ཅན་གྱི་]ཉེས་[པ་]དེ་[རྣམས་ཀྱི་]བདག་[ཉིད་དུ་]མེད་པ[དང་]། །[རང་བཞིན་གཉུག་མའི་]ཡོན་ཏན་[བགྲང་ཡས་ཚང་ཞིང་]རང་བཞིན་[གྱིས་གདོད་ནས་]དག་པ་[འོད་གསལ་བ་]ཡིན[པ་ལ་འགའ་ཞིག་དེ་ལས་བཟློག་ནས]། །ཡང་དག་མིན་པའི་ཉེས་[པ་ཆོས་རྣམས་རང་སྟོང་ལ་དོན་དམ་དུ་]འཛིན་ཅིང༌། །ཡང་དག་[པའི་]ཡོན་ཏན་[མང་པོ་ཅན་དོན་དམ་གཞན་སྟོང་ལ་]སྐུར་[བ་]འདེབས་པས། །བློ་ལྡན་བདག་དང་སེམས་ཅན་[ཐམས་ཅད་]ནི། །[བདེ་གཤེགས་སྙིང་པོ་ཅན་དུ་མཚུངས་པ་དང་དེ་དྲི་མ་མ་བསལ་ན་མི་འཐོབ་ཅིང་བསལ་བ་ཙམ་གྱིས་ཐོབ་པར་]མཚུངས་[པར་]མཐོང་[བའི་]བྱམས་པ་འཐོབ་མི་འགྱུར། །[འཁོར་ལོ་ཐ་མའི་གཞུང་]འདི་ལས་[དོན་དམ་བདེ་གཤེགས་སྙིང་པོ་]དེ་ནི་ཐོས་པ་ལས།།[རང་ཉིད་ལམ་བསྒོམ་པ་ལ་]སྤྲོ་[བ་ཆེན་པོ་]དང་[སེམ་ཅན་ཐམས་ཅད་ལ་]སྟོན་པ་བཞིན་གུས་[པ་]དང༌། །[ཡང་དག་མིན་པ་རང་སྟོང་ལ་དོན་དམ་དུ་འཛིན་པ་སྤངས་པའི་]ཤེས་རབ་[དང་སྟོང་གཞི་དོན་དམ་གཞན་སྟོང་མངོན་སུམ་དུ་བྱེད་པའི་]ཡེ་ཤེས་[དང་རང་གཞན་ཐམས་ཅད་བདེ་གཤེགས་སྙིང་པོ་ཅན་དུ་མཚུངས་པར་མཐོང་བའི་]བྱམས་ཆེན་སྐྱེ། །[དེ་ལྟར་]ཆོས་ལྔ་སྐྱེ་ཕྱིར་དེ་ལས་ནི། །[ཞུམ་ནས་ལམ་ལ་བརྩོལ་བ་དོར་བའི་]ཁ་ན་མ་ཐོ་[པ་]མེད་[པ་དང་གཞན་ལ་མི་བརྙས་པར་སངས་རྒྱས་དང་]མཚུངས་[པ་ཙམ་དུ་]ལྟ[བ་དང་]། །[རང་སྟོང་ལ་དོན་དམ་དུ་འཛིན་པའི་]སྐྱོན་མེད་[པ་དང་དོན་དམ་མངོན་དུ་གྱུར་པའི་]ཡོན་ཏན་ལྡན་པ་དང༌། །བདག་དང་སེམས་ཅན་[ཐམས་ཅད་བདེ་གཤེགས་སྙིང་པོ་ཅན་དུ་]མཚུངས་[པར་མཐོང་བའི་བྱམས་ཆེན་འཕེལ་བར་]བྱས་ཏེ། །སངས་རྒྱས་ཉིད་ནི་མྱུར་དུ་ཐོབ། ། ཅེས་ཉེས་པ་ཆེན་པོ་ལྔ་སྤངས་ཤིང་ཡོན་ཏན་ཆེན་པོ་ལྔ་ཐོབ་ནས་སངས་རྒྱས་མྱུར་དུ་ཐོབ་པ་ནི་འཁོར་ལོ་ཐ་མར་བདེ་གཤེགས་སྙིང་པོ་གསལ་བར་བསྟན་པའི་དགོས་པ་ཡིན་པར་གསུངས་སོ། །དེའི་ཕྱིར་དགོས་པ་སྟོན་པའི་གཞུང་འདིས་དྲང་དོན་དུ་བསྟན་པར་སྨྲ་བ་ནི་[སྟོང་ཉིད་ལ་བདེན་གཉིས་རྣམ་དབྱེ་མ་ཤེས་པའི་]མུ་ཅོར་རོ། །གཞུང་འདི་ཉིད་དུ་ཡང༌། དེ་ལྟར་རྒྱལ་བའི་སྙིང་པོ་ནི། །[ངོ་བོ་རྒྱུ་འབྲས་ལས་ལྡན་འཇུག་པ་ལ་སོགས་]རྣམ་གཞག་རྣམ་པ་བཅུ་ཞེས་བརྗོད། །ཅེས་པ་ལ་སོགས་པས་རྣམ་གཞག་བཅུ་དང༌། [སངས་རྒྱས་པད་ངན་ཞེས་སོགས་]དཔེ་དགུས་བདེ་གཤེགས་སྙིང་པོ་དྲི་བཅས་དེ་བཞིན་ཉིད་རྣམ་པ་མང་པོ་ནས་རྒྱ་ཆེར་གཏན་ལ་ཕབ་ཅིང་གལ་པོ་ཆེའི་དོན་དུ་ཡང་དང་ཡང་དུ་གཏན་ལ་ཕབ་པའི་ཕྱིར་རོ། །གལ་ཏེ་སྔར་བསྟན་པ་དེ་རྣམས་ཉིད་འདིར་དྲང་དོན་དུ་བསྟན་པ་ཡིན་ནོ་ཞེ་ན། དེ་ལྟ་མ་ཡིན་ཏེ། འདིའི་རྗེས་ནས། དྲི་མེད་དེ་བཞིན་ཉིད་ཀྱི་སྐབས་སུ་ཡང༌། །ཐུབ་པའི་ཁྱུ་མཆོག་[དང་]སྦྲང་རྩི་[དང་འབྲས་བུའི་]སྙིང་པོ་དང༌། །རིན་ཆེན་གསེར་[གྱི་གོང་བུ་]དང་[གསེར་དང་རིན་ཆེན་གཏེར། ཞེས་པར་ཡོད་དམ་རྒྱ་དཔེ་བལྟ་དགོས་]གཏེར་དང་ལྗོན་པ་བཞིན། །དྲི་མེད་རིན་ཆེན་[ལས་བྱས་པའི་]བདེ་གཤེགས་སྐུ་དང་ནི། །ས་བདག་[འཁོར་ལོས་བསྒྱུར་རྒྱལ་དང་]གསེར་[གར་ལུགས་]གྱི་གཟུགས་འདྲ་རྒྱལ་བ་ཉིད། །ཅེས་སྔར་དྲི་བཅས་དེ་བཞིན་ཉིད་ཀྱི་སྐབས་སུ་བདེ་གཤེགས་སྙིང་པོའི་དཔེ་དགུ་གསུངས་པ་དེ་ཉིད་འབྲས་བུའི་སྐབས་འདིར་ཡང་གསུངས་པ་ནི། གློ་བུར་དྲི་མ་ཡོད་མེད་ལས་གཞི་དང་འབྲས་བུར་བཞག་པ་མ་གཏོགས་པ་ངོ་བོ་སྔ་ཕྱི་ཁྱད་པར་མེད་པ་ལ་དགོངས་པ་ཡིན་པས། གཞིའི་ངོ་བོ་བདེ་གཤེགས་སྙིང་པོ་དྲང་དོན་ཡིན་ན། འབྲས་བུའི་ངོ་བོ་ཆོས་ཀྱི་སྐུ་ཡང་དྲང་དོན་ཡིན་པར་འགྱུར་ཏེ། ཇི་ལྟར་སྔར་བཞིན་ཕྱིས་དེ་བཞིན། །འགྱུར་བ་མེད་པའི་ཆོས་ཉིད་དོ། །ཞེས་[རྒྱུད་བླ་མར་]གསུངས་པའི་ཕྱིར་དང༌། གཞི་འབྲས་ཀྱི་དེ་བཞིན་ཉིད་ལ་ངོ་བོ་ཁྱད་པར་མེད་པའི་ཕྱིར་རོ། །གཞན་ཡང་འཕྲིན་ལས་ཀྱི་སྐབས་སུ། ཡོན་ཏན་[གྱི་]རིན་ཆེན་མཆོག་ཚོགས་དང་ལྡན་ཡེ་ཤེས་ཆུ་མཚོ་བསོད་ནམས་ཡེ་ཤེས་ཉི་འོད་ཅན[གྱི]། །ཐེག་པ་མ་ལུས་ངེས་པར་བསྒྲུབས་ཏེ་[སངས་རྒྱས་ཐོབ་ནས་གཞན་དོན་མཛད་པ་ན་ཆོས་དབྱིངས་]མཐའ་དང་དབུས་མེད་རྒྱ་ཆེ་ནམ་མཁའ་ལྟར་[ཀུན་ལ་]ཁྱབ་པ[གང་ཡིན་པ]། །[དོན་དམ་གྱི་]སངས་རྒྱས་ཉིད་ནི་[དོན་དམ་གྱི་]ཡོན་ཏན་དྲི་མ་མེད་[པ་མང་པོའི་]གཏེར་[གང་ཡིན་པ་དེ་]སེམས་ཅན་ཀུན་ལ་ཁྱད་མེད་[དུ་བཞུགས་པ་]རྣམ་[པར་]གཟིགས་ནས། །ཉོན་མོངས་ཤེས་བྱའི་[སྒྲིབ་པའི་]སྤྲིན་གྱི་དྲ་བ་སངས་རྒྱས་རྣམས་ཀྱི་ཐུགས་རྗེའི་རླུང་གིས་རྣམ་པར་གཏོར[བས་ནམ་མཁའ་སྤྲིན་ཡོད་ལས་སྤྲིན་མེད་དུ་གྱུར་པ་ལྟར། ངོ་བོ་མི་འགྱུར་བའི་གནས་གྱུར་ཐོབ་པར་མཛད་ཅིང༌། དེས་ཀྱང་གཞན་དག་དེ་ལྟར་མཛད་དོ]། །ཞེས་ཆོས་སྐུའི་ཡོན་ཏན་མཐའ་ཡས་པ་ཚང་བའི་སངས་རྒྱས་སེམས་ཅན་ཀུན་ལ་ཁྱད་མེད་དུ་གནས་པ་གཟིགས་པར་གསུངས་པ་དང༌། མཐར་ཡང༌། དཀོན་མཆོག་[གསུམ་དང་གདོད་ནས་རང་བཞིན་གྱིས་]རྣམ་པར་བྱང་[བའི་]ཁམས་[ཏེ་དབྱིངས་བདེ་གཤེགས་སྙིང་པོ་དང་]དྲི་མེད་བྱང་ཆུབ་[དག་པ་གཉིས་ལྡན་གྱི་སངས་རྒྱས་དང་སངས་རྒྱས་ཀྱི་]ཡོན་ཏན་[དང་སངས་རྒྱས་ཀྱི་]འཕྲིན་ལས་ཏེ། །དོན་གནས་རྣམ་བདུན་ཚུལ་བཞིན་བཤད་ལས་བདག་གིས་དགེ་བ་གང་ཐོབ་པ། །དེས་ནི་འགྲོ་འདི་མཐའ་ཡས་འོད་མངའ་དྲང་སྲོང་ཚེ་དཔག་མེད་མཐོང་ཞིང༌། །མཐོང་ནས་ཀྱང་ནི་ཆོས་མིག་དྲི་མེད་སྐྱེས་ཏེ་བྱང་ཆུབ་མཆོག་ཐོབ་ཤོག །ཅེས་དོན་གྱི་གནས་བདུན་པོ་དོན་ལ་གནས་པར་[དོན་གྱིས་]གསུངས་པས། དྲི་བཅས་དེ་བཞིན་ཉིད་ཀྱང་དོན་ལ་གནས་པར་གྲུབ་པ་ཡིན་ནོ། །གཞན་ཡང༌། བདེ་གཤེགས་སྙིང་པོ་དྲང་དོན་ཡིན་ན། ཆོས་དབྱིངས་དེ་བཞྀན་ཉིད་ཀྱང་དྲང་དོན་ཡིན་པར་འགྱུར་[ཏེ་དེ་དང་དེ་རྣམ་གྲངས་ཡིན་པའི་ཕྱིར་ཞེས་པས་གནོད་]ལ། དེ་འདོད་ན་དོན་དམ་འདུས་མ་བྱས་ཀྱི་སངས་རྒྱས་ཆོས་ཀྱི་སྐུ་ཡང་དྲང་དོན་ཡིན་པར་འགྱུར་[ཏེ་དེ་དང་དེ་རྣམ་གྲངས་ཡིན་པའི་ཕྱིར་ཞེས་པས་གནོད་]ཞིང༌། དེ་ཡང་འདོད་ན། བདེ་དགྱེས་དུས་འཁོར་གསང་འདུས་ལ་སོགས་པ་དོན་དམ་གྱི་ལྷ་དང་སྔགས་དང་རྒྱུད་དང་ཕྱག་རྒྱ་དང་དཀྱིལ་འཁོར་ལ་སོགས་པ་ཆ་མེད་ཀུན་འགྲོ་ཀུན་ཁྱབ་ཏུ་ནམ་ཡང་བཞུགས་པ་ཐམས་ཅད་དྲང་དོན་ཡིན་པར་ཧ་ཅང་ཐལ་བར་འགྱུར་ཏེ་དེ་ལྟ་ཡང་མ་ཡིན་ནོ། །གཞན་ཡང་གཞུང་གཅིག་ཉིད་དུ་སྔ་ཕྱི་ནང་འགལ་བ་ནི་རྒྱལ་པ་བྱམས་པ་ལ་མི་སྲིད་ཅིང༌། བདེ་གཤེགས་སྙིང་པོ་དོན་ལ་མེད་ན་མདོ་རྒྱུད་ཟབ་མོ་རྣམས་དང་འགལ་ལ། སེམས་འགྲེལ་ཁྱད་པར་དུ་འཕགས་པ་རྣམས་དང་ཡང་འགལ་བ་ཡིན་ནོ། །