དག་པའི་བདག་སོགས་དོན་ལ་མེད་ན་ཧ་ཅང་ཐལ་བའི་ཤེས་བྱེད་དགོད་པ།
གལ་ཏེ་བདག་གི་དབྱིངས་དང་བདག་ཆེན་པོ་དང་དག་པའི་བདག་ལ་སོགས་པ་རང་གཏན་ནས་མི་སྲིད་དེ། བདག་གང་ཡང་མི་སྲིད་པའི་ཕྱིར་རོ་ཞེ་ན། དེ་ལྟ་ན་ནི་དེ་བཞིན་ཉིད་བདག་དག་པའི་བདག་ཀྱང་མི་སྲིད་པར་འགྱུར་ཞིང༌། དེ་བཞིན་དུ། རྡོ་རྗེ་ལས་སྐྱེས་རྡོ་རྗེའི་བདག་དང༌། །གཅིག་པུ་སྲ་མཁྲེགས་རྡོ་རྗེའི་བདག་དང༌། ཤེས་དང་ཤེས་བྱའི་བདག་པོ་མཆོག་དང༌། མི་གཡོ་རབ་ཏུ་དང་བའི་བདག་དང༌། སངས་རྒྱས་ཀུན་བདག་དངོས་པོ་མཆོག་དང༌། སྐྱེས་མ་ཐག་པ་འགྲོ་བའི་བདག་དང༌། ནམ་མཁའི་བདག་པོ་སྣ་ཚོགས་སྟོན་དང༌། འཇིག་རྟེན་དབང་ཕྱུག་ཀུན་གྱི་བདག་དང༌། ཁྱབ་བདག་རིན་ཆེན་ཀུན་གྱི་མཆོག་དང༌། ཁྱབ་བདག་དམ་ཤེས་དམ་ཚིག་ལྡན་དང༌། ཁྱབ་བདག་ཆེན་པོ་རིན་ཆེན་གདུགས་དང༌། རྒྱུད་ཀུན་གྱི་ནི་བདག་པོ་མཆོག་དང༌། ཤིན་ཏུ་སད་པ་སད་པའི་བདག་དང༌། ཉོན་མོངས་ཁམས་རྣམས་དག་པའི་བདག་ཀྱང་མི་སྲིད་པར་འགྱུར་[ཏེ་བདག་གང་ཡང་མི་སྲིད་པའི་ཕྱིར་]རོ། །དེ་བཞིན་དུ། དཔལ་[གསང་བ་]འདུས་པར་ཡང༌། [དོན་དམ་པའི་]སངས་རྒྱས་སྐལ་[བ་]མཆོག་[ལྡན་གདོད་ནས་]དག་པའི་བདག །ཅེས་དང༌། རྣམ་ཤེས་མིན་[པའི་]བདག་[གི་]ཆོས་རྣམས་ནི། །དོན་དམ་[བདེན་པ་]མི་འགྱུར་[བའི་]བདག་[ཏུ་]གྱུར་[པ་]ཉིད། །ཅེས་དང༌། གཟུགས་རྡོ་རྗེ་ལ་སོགས་པ་དྲུག །རྡོ་རྗེའི་བདག་པོ་ཞེས་བཤད་དོ། །ཞེས་དང༌། བསམ་གཏན་རྡོ་རྗེ་[འམ་རྡོ་རྗེའི་བསམ་གཏན་]རབ་སྒོམ་པ། །འདི་ཡིས་སངས་རྒྱས་ཆེ་བའི་བདག [གང་ཡིན་པ།]།འཇིག་རྟེན་ཐམས་ཅད་[དུ་]དབང་བྱེད་པ[དེ་ཡང་]། །ཚེ་འདི་ཉིད་ཀྱིས་ཐོབ་པར་འགྱུར། །ཞེས་དང༌། དཔལ་རྙོག་པ་མེད་པའི་རྒྱུད་དུ་ཡང༌། སངས་རྒྱས་ཐམས་ཅད་འདུས་པའི་བདག །མྱུར་བར་བྱིན་གྱིས་རློབ་པར་འགྱུར། །སངས་རྒྱས་ཐམས་ཅད་འདུས་པའི་བདག །སངས་རྒྱས་ཀུན་གྱི་སྡོམ་པའི་བདག །ཅེས་པ་ལ་སོགས་པའི་དོན་ཡང་མི་སྲིད་པར་འགྱུར་ཏེ། དེ་དག་ལས་དོན་གཞན་དུ་གྱུར་པའི་བདག་[གཤིས་ལ་གནས་པ་]ནི་ཐམས་ཅད་མཁྱེན་པས་མ་གསུངས་ཤིང༌། ཁོ་བོ་ཅག་ཀྱང་མི་འདོད་ལ། མིང་གཞན་ནི་ཤིན་ཏུ་མང་བར་གསུངས་པའི་ཕྱིར། མིང་ཙམ་ལས་འཁྲུལ་བར་མི་བྱ་སྟེ། དོན་ལ་རྟོན་པ་ཉིད་ལས་སོ། །དེའི་ཕྱིར་བདག་གཉིས་ཀྱིས་སྟོང་བའི་གཞི་དོན་དམ་རང་བྱུང་ཡེ་ཤེས་ཀྱི་བདག་ཉིད་ནམ་ཡང་མ་ཆད་པ་ལ་དགོངས་ནས། དབུ་མ་པ་ཆེན་པོ་འཕགས་པ་ཐོགས་མེད་ཞབས་ཀྱི་ཞལ་སྔ་ནས་ཀྱང༌། དེ་ལྟར་[གང་ཟག་དང་ཆོས་ཀྱི་]བདག་ནི་མེད་ཀྱི་བདག་[དེ་གཉིས་]མེད་པ[འི་གཞི་དོན་དམ་པའི་བདག་ཉིད་]ནི་[མ་ཆད་པར་ནམ་ཡང་]ཡོད་པར་[རྟོགས་ནས་བདེན་གཉིས་ཀྱི་]སྟོང་པ་ཉིད་[གཉི་ག་]ཁོང་དུ་ཆུད་པར་བྱའོ། །[སྟོང་ཙམ་དང་སྟོང་བའི་གཞི་]འདི་ལ་དགོངས་ནས། བཅོམ་ལྡན་འདས་ཀྱིས་[སྟོང་གཞི་དོན་དམ་]ཡོད་པ་ཡང་ཡོད་པར། [སྟོང་ཙམ་ཀུན་རྫོབ་]མེད་པ་ཡང་མེད་པར་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །ཞེས་གསུངས་པའི་ལུང་དྲངས་སོ། །གཞན་ཡང་དོན་དམ་པའི་སངས་རྒྱས་ནི་བདག་གི་ཕ་རོལ་ཏུ་ཕྱིན་ཡང་འཇིག་རྟེན་པའི་བདག་དང་མི་མཚུངས་ཏེ། ཇི་སྐད་དུ། རྔ་བོ་ཆེ་ཆེན་པོའི་མདོར། འཇིག་རྟེན་པ་རྣམས་ཀྱི་བདག་ཅེས་བྱ་བ་དེ་དག་གཞིག་པའི་ཕྱིར་བདག་མེད་པ་བསྟན་ཏོ། །གལ་ཏེ་དེ་ལྟར་སྟོན་པའི་བསྟན་པ་ལས་[བདག་མེད་པ་]མ་གསུངས་ན་ཇི་ལྟར་གྲོང་པ་ཡིན་པར་མི་འགྱུར་[ཏེ་གྲོང་བ་དང་ཁྱད་མེད་དུ་འགྱུར་རོ། །དེའི་གཉེན་པོར་བདག་མེད་གསུངས་པས་]སངས་རྒྱས་བཅོམ་ལྡན་འདས་ནི་བདག་མེད་པར་གསུང་བར་གྲག་གོ །ཞེས་ཡ་མཚན་སྐྱེས་པར་གྱུར་པ་དང༌། དེའི་འོག་ཏུ་རྒྱུ་དང་གཏན་ཚིགས་བརྒྱ་སྟོང་གིས་[བདག་གཉིས་མེད་པའི་]བསྟན་པ་ལ་འཛུད་དོ། །དེ་ལྟར་བཙུད་པ་ལས་གང་གི་ཚེ་ཡང་[བདག་ཡོད་ཀྱི་བསྟན་པ་ལས་]གོང་མ་[བདག་མེད་པའི་བསྟན་པ་ལ་]དད་པ་སྐྱེས་ཤིང་ཞུགས་པ་ན་སྟོང་པ་ཉིད་ཀྱི་ཆོས་རྣམས་ལ་སློབ་པར་བྱེད། བརྩོན་པར་བྱེད་[དོ་]འབད་པར་བྱེད[དོ]། དེ་ནས་དེའི་འོག་ཏུ་དེ་དག་ལ་ཐར་པ་[མཐར་ཐུག་]ནི་[གདོད་ནས་]ཞི་བ་རྟག་པ་གཟུགས་དང་བཅས་པའོ། །ཞེས་[དག་པའི་བདག་]སྟོན་[ཏེ་དེ་ལྟར་བདག་མེད་པ་དང་ཡོད་པ་རིམ་གྱིས་སྟོན་]ཏོ། །གཞན་ཡང་འཇིག་རྟེན་པ་ཁ་ཅིག་[འདུས་བྱས་ཀྱི་]ཐར་པ་[བདེན་པ་ཡང་དག་པ་]ཡོད་དོ་ཟེར་ཏེ་ངས་དེ་དག་གཞིག་པའི་ཕྱིར་ཐར་པ་ནི་ཅུང་ཟད་མེད་དོ་ཞེས་བྱ་བ་འདི་གསུངས་སོ། །གལ་ཏེ་དེ་ལྟར་སྟོན་པས་[འདུས་བྱས་ཀྱི་ཐར་པ་ཡོད་པར་]ལྟ་བ་[དེ་]ཆུད་གཟོན་པར་བྱེད་པ་དང་འདྲ་བར་མ་བསྟན་ན་ཇི་ལྟར་སྟོན་པའི་བསྟན་པ་[གཤིས་ལ་འདུས་བྱས་ཀྱི་ཐར་པ་མེད་པ་]ལ་ཡིད་ཆེས་པར་འགྱུར། དེ་ལྟ་བས་ན་རྒྱུ་དང་གཏན་ཚིགས་བརྒྱ་སྟོང་གིས་[འདུས་བྱས་ཀྱི་]ཐར་པ་ཆུད་གཟོན་པ་ཉིད་ཀྱི་[ཐབས་]བདག་མེད་པ་གསུངས་སོ། །དེ་ནས་དེའི་འོག་ཏུ་[ཐར་པ་གང་ཡང་མེད་པས་དོན་དམ་གྱི་ཐར་པ་ཡང་མེད་ཅེས་གནས་ལུགས་ཟབ་མོའི་]ཐར་པ་ཆུད་གཟོན་པའི་ལྟ་བ་མཐོང་ན་མི་བླུན་པོ་རྣམས་ཉམས་པར་འགྱུར་བས། དེའི་འོག་ཏུ་ངས་ཡང་རྒྱུ་དང་གཏན་ཚིགས་བརྒྱ་སྟོང་གིས་[དོན་དམ་གྱི་]ཐར་པ་ཡོད་པ་ཉིད་དུ་གསུངས་སོ། །ཞེས་དང༌། ངས་ཀྱང་གལ་ཏེ་ཐོག་མ་ཁོ་ནར་བདག་ཡོད་དོ་ཞེས་བསྟན་ན་སུ་ཞིག་དད་པར་འགྱུར། གལ་ཏེ་དེ་[དང་པོར་བདག་ཡོད་ལ་]དད་པར་གྱུར་ན་འཇིག་ཚོགས་ལ་ལྟ་བའི་བདག་ཏུ་འཛིན་པ་[ཅན་དུ་འགྱུར་ཞིང་དེ་]ནི་འཇིག་རྟེན་གྱི་སྤྱི་ཐུན་[ཡིན་]པས་ངའི་[བསྟན་པ་དེ་]ཡང་[འཇིག་རྟེན་པའི་བདག་འཛིན་ཅན་]དེར་འགྱུར་རོ། །ངས་ཀྱང་ཡུལ་ཙམ་པ་ཀ་ན་གནས་པའི་མི་[ཐབས་ལ་མཁས་པས་སྔ་ཕྱི་འགལ་བ་ལྟ་བུའི་ཚིག་གིས་ཕན་པའི་དོན་བཟང་པོ་བསྟན་ཚུལ་མདོར་གསུངས་པ་དེ་]བཞིན་དུ་ཐོག་མར་[གང་ཟག་དང་ཆོས་ཀྱི་]བདག་མེད་པ་བསྟན་ནས། དེའི་འོག་ཏུ་[སྟོང་གཞི་དོན་དམ་གྱི་]བདག་ཡོད་པ་ཉིད་སྟོན་པར་འགྱུར་ཏེ་[དག་པའི་བདག་]དེ་ཉིད་དང་བདག་གི་དེ་ཁོ་ན་ཉིད་ཀྱང་བཤད་དོ། །[དེ་ལྟར་སྔོན་དུ་བདག་མེད་གསུངས་པ་ནི་གཤིས་ལུགས་ལ་ཀུན་བརྟགས་དང་གཞན་དབང་མེད་པར་དགོངས་ཤིང་ཕྱི་ནས་བདག་ཡོད་གསུངས་པ་ནི་སྟོང་གཞི་ཆོས་ཉིད་ཡོངས་གྲུབ་ནམ་ཡང་གང་ནའང་བཞུགས་པ་ལ་དགོངས་ཏེ། དེ་ནི་རྒྱུད་སྡེར་དེ་ཁོ་ན་ཉིད་བཞི་གསུངས་པ་ལས་བདག་གི་དེ་ཁོ་ན་ཉིད་དོ།།]འོད་སྲུང་དེ་ལྟ་བས་ན་[བདག་མེད་པ་དང་ཡོད་པ་རིམ་གྱིས་སྟོན་པའི་]ཐབས་ལ་མཁས་པར་བྱའོ། །འོད་སྲུང་གཞན་ཡང་དཔེར་ན་མི་ཞིག་ལམ་པོ་ཆེ་ཞིག་ནས་འབྲོག་དགོན་པར་སོང་བ་ལས་བྱ་རབ་གནོད་ཅེས་བྱ་བས་སྒྲ་ཕྱུང་བ་དང༌། དེ་ནས་མི་དེས་ལམ་དུ་ཞུགས་ཏེ་འགྲོ་བ་ལས་བྱའི་སྐད་དེ་ཐོས་ནས་བསམས་པ། ཅི་ཆོམ་རྐུན་མ་བྱུང་ངམ་ཞེས་[ལོག་རྟོག་སྐྱེས་པའི་མི་]དེ་ཆོམ་རྐུན་པས་འཇིགས་སྐྲག་སྟེ་[ལམ་གཞན་དུ་]བྱོལ་བ་ལས་[འབྲོག་]དགོན་པ་གང་ན་སྟག་ཡོད་པ་དེར་ཆུད་ནས་ཚུལ་མ་ཡིན་པས་སྡུག་བསྔལ་བར་གྱུར་ཏོ། །འོད་སྲུང་དེ་བཞིན་དུ་མ་འོངས་པའི་དུས་ན་དགེ་སློང་དང་དགེ་སློང་མ་དང་དགེ་བསྙེན་དང་དགེ་བསྙེན་མ་རྣམས་བདག་དང་བདག་གི་ཞེས་བྱ་བའི་སྒྲ་ཙམ་གྱིས་སྐྲག་ནས་འཇིག་རྟེན་པའི་འཇིག་ཚོགས་ལ་ལྟ་བ་ནི་བདག་[གང་ཡང་]མེད་པ་སེམས་ཤིང་སྟོང་པ་ཉིད་ཆེན་པོ་[སྟེ་ཐམས་ཅད་རང་སྟོང་ཡིན་ཞེས་]ཆད་པའི་ལྟ་བ་སྨྲ་བའི་བདག་ཉིད་དུ་འགྱུར་བས། [དོན་དམ་གྱི་]དེ་བཞིན་གཤེགས་པ་རྟག་པ་[དོན་དམ་གྱི་]སངས་རྒྱས་རྟག་པའི་བདག་ཉིད་དང་ལྡན་པའི་མདོ་སྡེ་[ཟབ་མོ་ཁྱད་འཕགས་]འདི་ལྟ་བུ་འདི་དག་ལ་དད་པར་མི་འགྱུར་རོ། །ཞེས་དང༌། གང་མདོ་སྡེ་[ཟབ་མོ་ཁྱད་འཕགས་]འདི་ལྟ་བུ་དག་འཆད་པར་མི་འགྱུར་བ་དེར་ཕན་པ་སྟོན་[པར་འདོད་]པ་དག་འདི་ལྟ་སྟེ། སྟོང་པ་ཉིད་ཀྱི་ལེའུ་དང་ལྡན་པ་[སྟེ་ཐམས་ཅད་རང་སྟོང་ཡིན་ཞེས་]ཕལ་པ་གཞན་དག་སྟོན་ཅིང་འཆད་པར་འགྱུར་རོ། །དེའི་ཚེ་[སེམས་ཅན་]དེ་དག་གིས་[རང་སྟོང་སྟོན་པའི་]མདོ་སྡེ་དེ་ལྟ་བུ་མང་པོ་དག་མཐོང་[ཞིང་]ཐོས་ནས་སེམས་ཅན་དེ་དག་སློབ་ཅིང༌། དེ་དག་གིས་ལོབས་ནས་གང་གི་ཚེ་དེ་བཞིན་གཤེགས་པའི་སྙིང་པོ་དེ་བཞིན་གཤེགས་པ་རྟག་པའི་བདག་ཉིད་དང་ལྡན་པའི་མདོ་སྡེ་[ཟབ་མོ་ཁྱད་འཕགས་]འདི་ལྟ་བུ་འདི་དག་ཐོས་ན་[རང་སྟོང་ཙམ་གོ་བའི་གང་ཟག་]དེ་དག་ཡིད་གཉིས་དང་ཐེ་ཚོམ་འཐོབ་ཅིང་[རང་སྟོང་ལས་ལྷག་པའི་སྟོང་ཉིད་མེད་ཅེས་དང༌། རང་སྟོང་གང་ཡིན་དོན་དམ་དང༌། ཆོས་སྐུ་དང༌། ཕྱག་རྒྱ་ཆེན་པོ་དང༌། རང་བྱུང་ཡེ་ཤེས་ཡིན་པས་ངོ་ཤེས་པས་ཆོག །རང་བཞིན་ངོ་ཤེས་པས་གྲོལ་ཞེས་སོགས་]བློ་ཕྱིན་ཅི་ལོག་[དཔག་མེད་]ཏུ་འགྱུར་རོ། །ཞེས་དང༌། འོད་སྲུང་ངས་སེམས་ཅན་མོས་པ་སྣ་ཚོགས་རྣམས་[སྟོང་མི་སྟོང་དང་བདག་མེད་པ་དང་ཡོད་པ་ལ་སོགས་པ་]ལ་དགོངས་པ་སྣ་ཚོགས་ཀྱི་མདོ་རྣམས་བསྟན་པ་ན་དེ་ལ་སྙོམ་ལས་ཅན་ཚུལ་ཁྲིམས་འཆལ་བ་ལུས་དང་ངག་དང་ཡིད་མ་བསྡམས་པ་རྣམས་དེ་བཞིན་གཤེགས་པའི་སྙིང་པོ་སངས་རྒྱས་རྟག་པ་ཉིད་ཀྱི་མདོ་[ཟབ་མོ་ཁྱད་འཕགས་]འདི་ལྟ་བུ་འདི་དག་བོར་ནས། [རང་སྟོང་ཙམ་སྟོན་པ་]སྟོང་པ་ཉིད་ཀྱི་ལེའུའི་མདོ་དག་ལ་སློབ་པར་བྱེད་ཅིང༌། དེ་ལ་ཁ་ཅིག་ནི་[དགོངས་པའི་དོན་མ་ཡིན་པ་ལ་]ཚིག་དང་ཡི་གེ་འདྲེན་པར་བྱེད། ཁ་ཅིག་ནི་ཕན་ཚུན་ཚིག་དང་ཡི་གེ་དག་[ཕྱིས་ནས་སྤོང་བའམ་ངེས་དོན་ཡིན་ཡང་དྲང་དོན་ཡིན་ཞེས་སོགས་ཀྱི་]སྤོང་བར་བྱེད་དོ། །དེ་ཅིའི་ཕྱིར་ཞེ་ན། སངས་རྒྱས་ཀྱི་གསུང་ཐམས་ཅད་ལས་ནི་སྟོང་པ་ཉིད་དང་བདག་མེད་པ་སྟོན་ཏོ[ཞེས་དེ་ཙམ་རྒྱུ་མཚན་དུ་བྱས་ནས་སྟོང་གཞི་དོན་དམ་གཞན་སྟོང་བདེ་གཤེགས་སྙིང་པོ་སྤོང་བར་བྱེད་དེ]། །[དོན་དམ་དེ་བཞིན་ཉིད་དང་དོན་གཅིག་པའི་]སྟོང་པ་ཉིད་དང་བདག་མེད་པའི་དོན་[ནི་ཀུན་རྫོབ་ཀྱིས་སྟོང་བའི་གཞི་དང་བདག་གཉིས་ཀྱིས་སྟོང་བའི་གཞི་དང༌། རང་བཞིན་འོད་གསལ་ཡིན་པ་ལ་དེ་]མ་ཤེས་པའི་མི་བླུན་པོ་རྣམས་ནི་[ཆད་ལྟར་ལྷུང་ཞིང་དོན་དམ་གྱི་དཀོན་མཆོག་ཐམས་ཅད་ལ་སྐུར་བ་བཏབ་སྟེ་ལམ་ལས་]ཉམས་པར་འགྱུར་རོ། །ཞེས་པ་དང༌། མྱང་འདས་ཆེན་པོར་ཡང༌། མུ་སྟེགས་ཅན་གདུལ་བའི་ཕྱིར་འདི་སྐད་དུ་བདག་མེད་དོ། །གང་ཟག་མེད། སེམས་ཅན་མེད། འཚོ་བ་[འམ་སྲོག་]མེད། ཤེད་ཅན་མེད། ཤེད་བདག་མེད། ཤེས་པ་[པོ་]དང༌། མཐོང་བ་[པོ་]དང༌། བྱ་བ་དང༌། བྱེད་པ་པོ་མེད་དོ། །ཞེས་བརྗོད་པ་གསུངས་སོ། །དགེ་སློང་དག་མུ་སྟེགས་ཅན་གྱིས་བདག་ཅེས་བརྗོད་པ་ནི་སྲིན་བུའི་རྗེས་ལ་ཡི་གེར་གྱུར་པ་དང་འདྲ་སྟེ[ཆོས་ཉིད་ཡོངས་གྲུབ་ཀྱི་བདག་ལེགས་པར་རྟོགས་ནས་སྨྲ་བ་ནི་མ་ཡིན་ནོ]། །དེ་བས་ན་དེ་བཞིན་གཤེགས་པས་ནི་[བདག་གཉིས་པོ་མེད་པ་ལ་དགོངས་ནས་]སངས་རྒྱས་ཀྱི་ཆོས་ལ་བདག་མེད་དོ། །ཞེས་གསུངས་ཏེ། དེ་ནི་སེམས་ཅན་གདུལ་བའི་ཕྱིར། དུས་མཁྱེན་པའི་ཕྱིར། དེ་ལྟར་བདག་མེད་ཅེས་[སྔར་]གསུངས་པ་ཡང༌། [གདུལ་བྱ་ལ་ཕན་པའི་]རྒྱུ་ཡོད། རྐྱེན་ཡོད་པས་ན། [ཕྱིས་དེ་བཞིན་ཉིད་བདག་དག་པའི་]བདག་ཡོད་ཅེས་གསུངས་པ་ནི[སྔ་ཕྱི་འགལ་བ་ལྟར་སྣང་ཡང་དགོངས་པའི་དོན་མི་འགལ་ཞིང༌། དོན་ཆེ་སྟེ]། ཇི་ལྟར་སྨན་པ་མཁས་པས་འོ་མ་ལ་སྨན་དུ་རུང་བ་དང་མི་རུང་བ་ཤེས་[ནས་སྔ་ཕྱི་འགལ་བ་ལྟ་བུའི་ཚིག་གིས་བསྟན་]པ་དང་འདྲ་སྟེ་བྱིས་པ་མ་རབས་ཀྱིས་བདག་ཏུ་འཛིན་པ་ལྟ་བུ་ནི་མ་ཡིན་ནོ། །བྱིས་པ་མ་རབས་ཀྱིས་བདག་ཏུ་འཛིན་པ་ནི་[གང་ཟག་གི་བདག་]མཐེ་བོ་ཙམ་ཞེའམ། ཡུངས་དཀར་ཙམ་ཞེའམ། རྡུལ་ཕྲ་མོ་ཙམ་[ཞེས་སོགས་མང་པོ་དག་]དུ་འཛིན་ཏོ། །དེ་བཞིན་གཤེགས་པས་[སྟོང་གཞི་དོན་དམ་གྱི་]བདག་ཅེས་བརྗོད་པ་ནི། [མུ་སྟེགས་བྱེད་ཀྱིས་བརྟགས་པ་]དེ་ལྟ་བུ་མ་ཡིན་པས་ཆོས་ཐམས་ཅད་ལ་བདག་མེད་དོ། །ཞེས་གསུངས་ཀྱང་ཡང་དག་པར་ན་[སྟོང་གཞི་དོན་དམ་གྱི་]བདག་མེད་པ་མ་ཡིན་ཏེ། [སྟོང་གཞི་དོན་དམ་གྱི་]བདག་ཅེས་བྱ་བ་ནི་ཆོས་གང་བདེན་པ། ཡང་དག་པ། རྟག་པ། གནས་པ། བདག་པོར་གྱུར་པ། མི་འགྱུར་མི་འཕོ་བ་དེ་ནི་[སྟོང་གཞི་དོན་དམ་གྱི་]བདག་ཅེས་བྱ་སྟེ། ཇི་ལྟར་སྨན་པ་ཆེན་པོ་དེ་སྨན་འོ་མ་ལ་མཁས་པ་བཞིན་ནོ། །ཞེས་དང༌། བདག་མེད་པ་ནི་འཁོར་བ་[སྟེ་འཁོར་བའི་བདག་ཉིད་གཤིས་ལ་རི་བོང་གི་རྭ་བཞིན་དུ་གཏན་མ་གྲུབ་པའི་ཕྱིར་]ཞེས་བྱའོ། །[སྟོང་གཞི་དོན་དམ་གྱི་]བདག་ཅེས་བྱ་བ་ནི་དེ་བཞིན་གཤེགས་པའོ། །ཞེས་དང༌། [སྟོང་གཞི་དོན་དམ་གྱི་]བདག་ཅེས་བྱ་བ་ནི་སངས་རྒྱས་ཞེས་བྱ་བའི་དོན་ཏོ། །ཞེས་པ་ལ་སོགས་པས་དག་པའི་བདག་ལ་རྣམ་པ་དུ་མར་བསྔགས་པ་མཛད་དོ། །