བདེ་གཤེགས་སྙིང་པོ་ས་བོན་ལ་གསུངས་པའི་དགོས་པ་བསྟན་པ།

གལ་ཏེ་བདེ་གཤེགས་སྙིང་པོ་ཆོས་སྐུའི་ཡོན་ཏན་མཐའ་ཡས་པ་དང་ལྡན་པ་ཡིན་ན་ས་བོན་ལ་གསུངས་པ་རྣམས་དང་འགལ་བར་འགྱུར་ཏེ། [ཆོས་ཀྱི་དབྱིངས་ལ་བསྟོད་པར།]ས་བོན་གྱུར་པ་[ཆོས་ཉིད་ཀྱི་]ཁམས་[ཏེ་དབྱིངས་]དེ་ཉིད། །ཆོས་རྣམས་ཀུན་གྱི་རྟེན་དུ་འདོད། །རིམ་གྱིས་[གློ་བུར་དྲྀ་མ་]སྦྱངས་པར་གྱུར་པ་ལས། །སངས་རྒྱས་བྱང་ཆུབ་ཐོབ་པར་འགྱུར། །ཞེས་སོགས་གསུངས་པའི་ཕྱིར་རོ། །སྙམ་དུ་འགའ་ཞིག་སེམས་པར་གྱུར་ན། དེའི་ཕྱིར་བརྗོད་པར་བྱའོ། །འདིར་ས་བོན་ཞེས་པ་ཐར་པའི་ས་བོན་བཏབ་པ་ལྟ་བུ་འདུས་བྱས་ཀྱི་ས་བོན་ནི་མ་ཡིན་ཏེ། ཆོས་ཀྱི་དབྱིངས་ཉིད་འདིར་ས་བོན་ཡིན་པར་གསུངས་པའི་ཕྱིར་དང༌། བདེ་གཤེགས་སྙིང་པོ་ཉིད་ས་བོན་ཡིན་པར་གསུངས་པའི་ཕྱིར་རོ། །དེ་ཡང་ཕྱག་རྒྱ་ཆེན་པོ་ཐིག་ལེའི་རྒྱུད་དུ། གཞན་ཡང་ཆོས་ཀྱི་དབྱིངས་གྲགས་པ། །དེ་ཉིད་ཉོན་ཅིག་བདག་གིས་བཤད[པར་བྱའོ]། །ནམ་མཁའ་[གཞན་དོན་དམ་གྱི་ནམ་མཁའ་]ཆོས་ཀྱི་དབྱིངས་ཡིན་ཏེ། །[ཆོས་ཉིད་ཀྱི་]དབྱིངས་ནི་ས་བོན་ཞེས་སུ་དྲན། །[ཀུན་རྫོབ་ཀྱི་]ཆོས་རྣམས་ཀུན་གྱི་ནང་ན་[བུམ་ནང་མར་མེ་བཞིན་དུ་]ཡོད། །མཆོག་གི་གནས་[ཀྱང་ཡིན་]ལ་[དྲི་མ་སྦྱང་]རྒྱུ་[ཡང་]ཡིན་ནོ། །[ཟེར།]ཇི་ལྟར་ཏིལ་ནང་[ན་]མར་ཡོད་བཞིན། །ཇི་ལྟར་ཤིང་རྣམས་[ལ་]མེ་ཡོད་པ། །དེ་བཞིན་ཆོས་རྣམས་ཀུན་ལ་[དོན་དམ་དབྱིངས་ཀྱི་ས་བོན་]ཡོད། །[ཆོས་ཀྱི་དབྱིངས་ཀྱིས་ཁྱབ་པར་ནི། །ཞེས་པ་ལ་ལ་ན་ཡོད།]དེ་ལྟར་ཆོས་རྣམས་ཐམས་ཅད་ལ། །[ས་བོན་གྱི་མིང་ཅན་ཆོས་ཀྱི་དབྱིངས།།]ཡོད་ན་ཡང་ནི་[རྣམ་ཤེས་ཀྱིས་]མཐོང་མི་འགྱུར།།ཞེས་པ་ལ་འདིར་ནམ་མཁའ་ཆོས་ཀྱི་དབྱིངས་སུ་བཤད་པ་ནི་དོན་དམ་པའི་ནམ་མཁའ་ལ་རིག་པར་བྱ་སྟེ། མཁའ་ཁམས་དང༌། ཆོས་འབྱུང་དང༌། ཆུ་སྐྱེས་ལ་སོགས་པ་[དོན་དམ་]ཆོས་ཉིད་ཀྱི་རྣམ་གྲངས་སུ་གསུངས་པ་ཉིད་ལས་སོ། །དབྱིངས་ནི་ས་བོན་ཞེས་སུ་དྲན། །ཞེས་པ་ས་བོན་གཞན་དོན་དམ་པའི་ས་བོན་ཏེ་འཇིག་རྟེན་དཔེ་ལས་འདས་པ་འགལ་འདུས་སྐྱོན་མེད་ཀྱི་ས་བོན་[རྣམ་ཤེས་དང་རྟོག་གེ་ལས་འདས་པ་ཡིན་]ནོ། །ཆོས་རྣམས་ཀུན་གྱི་ནང་ན་ཡོད། །ཅེས་པ་ལ་སོགས་པས་གློ་བུར་དྲི་མའི་ཆོས་ཤུན་པ་དང་འདྲ་བ་རྣམས་ཀྱི་ནང་ན་བདེ་གཤེགས་སྙིང་པོ་ས་བོན་དང་འདྲ་བར་བཞུགས་ཀྱང་མི་མཐོང་བ་དཔེ་དང་བཅས་ཏེ་བསྟན་པ་དང༌། མྱང་འདས་ཆེན་པོར། བདག་ལ་སངས་རྒྱས་སུ་འགྱུར་བའི་ས་བོན་དེ་བཞིན་གཤེགས་པའི་སྙིང་པོ་ཞེས་བྱ་བ་ཡོད་དོ། །ཞེས་བདེ་གཤེགས་སྙིང་པོ་ཉིད་ས་བོན་ཡང་ཡིན་པར་གསུངས་པ་དང་དོན་གཅིག་པ་ཡིན་ཏེ། དེའི་ཕྱིར་བདེ་གཤེགས་སྙིང་པོ་ཆོས་ཀྱི་དབྱིངས་ཀྱང་ཡིན་ལ། ས་བོན་ཡང་ཡིན་པ་ནི་ཀུན་རྫོབ་འདུས་བྱས་གང་ལ་ཡང་མི་སྲིད་པས་འདི་ནི་ས་བོན་གཞན་ནམ་མཆོག་གམ་ཕ་རོལ་[འགལ་འདུས་སྐྱོན་མེད་]ལ་དགོངས་པ་ཡིན་ནོ། །དེ་བཞིན་དུ། མྱང་འདས་ཆེན་པོར། རིགས་ཀྱི་བུ་སངས་རྒྱས་ཀྱི་རང་བཞིན་ཞེས་བྱ་བ་[དོན་དམ་པའི་དབྱིངས་རིག་དབྱེར་མེད་]འདི་ནི་སངས་རྒྱས་ཐམས་ཅད་ཀྱི་བླ་ན་མེད་པ་དགྲ་བཅོམ་པ་ཡང་དག་པར་རྫོགས་པའི་བྱང་ཆུབ་ཀྱི་ལམ་དབུ་མའི་ས་བོན་ནོ། །ཞེས་དང༌། ལྷའི་ཟླ་བས་བསྒྱུར་བའི་མྱང་འདས་ཆེན་པོར་ཡང༌། ཤེས་རབ་ཅན་རྣམས་ཀྱིས་ནི་ངའི་ལུས་ལ་ཆོས་ཀྱི་སྐུའི་ས་བོན་[དོན་དམ་བདེན་པ་]དེ་ལྟ་བུ་ཡོད་དོ་སྙམ་དུ་ཤེས་པས་[དེ་མངོན་དུ་བྱེད་པའི་ཐབས་སུ་ཆོས་]ཐམས་ཅད་[དེ་གང་ཡང་]འཛིན་པར་མི་བྱེད་དོ། །ཞེས་པ་ལ་སོགས་པ་འདི་འདྲ་བའི་གསུང་རབ་གཞན་རྣམས་ཀྱི་དགོངས་པ་ཡང་དེ་ལྟར་རྟོགས་དགོས་ཏེ། གཞན་དུ་ན། [དོན་དམ་ཉིད་]ཕྲ་མོ་[ཡང་ཡིན་ཞིང་]ས་བོན་[ཡང་ཡིན་ལ་]ཟག་པ་མེད། །ཅེས་[དོན་དམ་པའི་མཚན་བརྗོད་དུ་གསུངས་པ་]དང༌། [དོན་དམ་གྱི་]ཆོས་ཀྱི་ཕུང་པོ་མཐའ་ཡས་པ། །[སངས་རྒྱས་]བདག་གི་ཆོས་ཀྱི་སྐུར་རབ་བསྒྲགས། །ཞེས་སོགས་[འཇམ་དཔལ་གྱི་རང་གི་ལྟ་བའི་འདོད་པ་མདོར་བསྟན་པར་གསུངས་པ་]དང༌། ཆོས་ཀྱི་དབྱིངས་ཉིད་སྟོབས་དང་མི་འཇིགས་པ་ལ་སོགས་པ་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་གི་བདག་ཉིད་ཕྱག་རྒྱ་ཆེན་མོ་ཆོས་འབྱུང་དུ་[རྗེ་བཙུན་སྤྱན་རས་གཟིགས་ཀྱིས་]གསུངས་པ་དང༌། གཞན་ཡང་སྔར་བསྟན་པའི་གསུང་རབ་རྣམས་དང་ཕན་ཚུན་ནང་འགལ་བར་འགྱུར་བ་ལས་དེ་ལྟ་བུའི་གནས་མེད་པའི་ཕྱིར་རོ། །