དེ་ལྟར་མི་བཞུགས་ན་དོམ་དམ་ཡང་མེད་པར་ཧ་ཅང་ཐལ་བས་གནོད་ཚུལ།

གལ་ཏེ་བདེ་གཤེགས་སྙིང་པོ་མེད་ན་དོན་དམ་པ་ཡང་མེད་པར་འགྱུར་ཏེ་དེ་དང་དེ་དོན་གཅིག་པའི་ཕྱིར་རོ། །འདོད་པར་མི་ནུས་ཏེ། དཀོན་མཆོག་སྤྲིན་གྱི་མདོར། རིགས་ཀྱི་བུ་[སྟོང་གཞི་]དོན་དམ་པ[འི་དབྱིངས་རིག་དབྱེར་མེད་]ནི་[ཀུན་རྫོབ་ཀྱི་]དེ་བཞིན་གཤེགས་པ་རྣམས་སྐྱེས་ཀྱང་རུང་མ་སྐྱེས་ཀྱང་རུང་[ནམ་ཡང་]མི་འཇིག་པ[ར་རྟག་ཏུ་བཞུགས་པ་]སྟེ། རིགས་ཀྱི་བུ་དེའི་ཕྱིར་བྱང་ཆུབ་སེམས་དཔའ་རྣམས་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ༌། །རབ་ཏུ་བྱུང་ནས་ཀྱང་[དོན་དམ་པའི་]ཆོས་[དབྱིངས་རིག་དབྱེར་མེད་]འདྀ་ཁོ་ན་ཐོབ་པར་བྱ་བའི་ཕྱིར། མགོ་འམ་གོས་ལ་མེ་འབར་བ་བཞིན་དུ་བརྩོན་འགྲུས་བརྩམས་ཤིང་གནས་སོ། །རིགས་ཀྱི་བུ་གལ་ཏེ་དོན་དམ་པ་མེད་[དབྱིངས་རིག་དབྱེར་མེད་]དུ་ཟིན་ན་ཚངས་པར་སྤྱོད་པ་དོན་མེད་པར་འགྱུར་རོ། །དེ་བཞིན་གཤེགས་པ་རྣམས་འབྱུང་བ་ཡང་དོན་མེད་པར་འགྱུར་རོ། །གང་གི་ཕྱིར་དོན་དམ་པ་[དབྱིངས་རིག་དབྱེར་མེད་]ཡོད་པས་ན་དེའི་ཕྱིར་བྱང་ཆུབ་སེམས་དཔའ་རྣམས་དོན་དམ་པ་ལ་མཁས་པ་ཞེས་བྱ[འི་སོ་སོ་སྐྱེ་བོ་མཁས་ཀྱང་ཀུན་རྫོབ་ལ་མཁས་པ་ཡིན་གྱི། དོན་དམ་ལ་མཁས་པ་མ་ཡིན་ཞེས་བྱ]འོ། །ཞེས་གསུངས་པའི་ཕྱིར་རོ། །[ཟབ་མོ་མཐར་ཐུག་གསལ་བར་སྟོན་པས་མདོ་འདི་ཡང་ངེས་པར་བལྟ་དགོས་སོ།།]དེ་བཞིན་དུ་སོར་ཕྲེང་གི་མདོར་ཡང༌། གཞན་ཡང་འཇམ་དཔལ། བའི་འོ་མ་ལ་མར་ཡོད་པར་རྟོགས་པས་[མར་འདོད་པའི་]མི་རྣམས་སྲུབ་ལ། ཅིའི་ཕྱིར་ཆུ་ལ་མི་རྣམས་མི་སྲུབ་ཅེ་ན། [མར་གྱི་]རྫས་མེད་པའི་ཕྱིར་ཏེ། དེ་བཞིན་དུ་འཇམ་དཔལ་དེ་བཞིན་གཤེགས་པའི་སྙིང་པོ་[དབྱིངས་རིག་དབྱེར་མེད་]ཡོད་པའི་ཕྱིར་མི་རྣམས་ཚུལ་ཁྲིམས་སྲུང་ཞིང་ཚངས་པར་སྤྱད་པ་སྤྱོད་དོ། །གཞན་ཡང་འཇམ་དཔལ་མི་གསེར་འདོད་པ་རྟོག་པ་དང་ལྡན་པ་[གསེར་ཡོད་པའི་]བྲག་ལ་བརྐོ་ལ། ཅིའི་ཕྱིར་ཤིང་ལ་མི་བརྐོ། རྡོ་བ་གསེར་གྱི་ཁམས་ཡོད་པ་ལ་ནི་བརྐོ་ཡི། ཤིང་གསེར་མེད་པ་ལ་ནི་མི་བརྐོའོ། །དེ་བཞིན་དུ་འཇམ་དཔལ་[དོན་དམ་གྱི་]དབྱིངས་ཡོད་པ་ལ་རྟོག་པའི་མི་རྣམས་བདག་སངས་རྒྱས་སུ་འགྱུར་རོ་སྙམ་སྟེ་ཚུལ་ཁྲིམས་སྲུང་ཞིང་ཚངས་པར་སྤྱོད་དོ། །གཞན་ཡང་འཇམ་དཔལ་དབྱིངས་མེད་ན་ནི་[ཆོས་སྐུ་མེད་པར་འགྱུར་ཞིང་དེ་མེད་ན་གཟུགས་སྐུ་ཡང་མེད་པར་འགྱུར་བས་]ཚངས་པར་སྤྱོད་པ་དོན་མེད་པར་འགྱུར་རོ། །ལོ་བྱེ་བར་ཆུ་ལ་བསྲུབས་ཀྱང་སྣུམ་མི་འབྱུང་བ་དེ་བཞྀན་དུ། གལ་ཏེ་[དོན་དམ་གྱི་]བདག་གི་དབྱིངས་མེད་ན་[དོན་དམ་གྱི་]བདག་ལ་ཆགས་པ[སྟེ་འདོད་ཅིང་དོན་དུ་གཉེར་བ]ས་ཚངས་པ་དང་ཚུལ་ཁྲིམས་སྤྱོད་པ་རྣམས་དོན་མེད་པར་འགྱུར་རོ། །ཞེས་སོགས་དང༌། འཕགས་པ་ཀླུ་སྒྲུབ་ཀྱི་ཞལ་སྔ་ནས་ཀྱང༌། [རྡོ་བ་ལ་གསེར་གྱི་]ཁམས་ཡོད་ན་ནི་ལས་བྱས་པས། །ས་ལེ་སྦྲམ་དག་མཐོང་བར་འགྱུར། །ཁམས་མེད་པར་ནི་ལས་བྱས་ཀྱང༌། །ཉོན་མོངས་[ཏེ་སྡུག་བསྔལ་]འབའ་ཞིག་སྐྱེད་པར་ཟད། །ཅེས་དང༌། རྒྱལ་བ་བྱམས་པའི་ཞལ་སྔ་ནས་ཀྱང༌། གལ་ཏེ་སངས་རྒྱས་[ཀྱི་]ཁམས་[ཏེ་དབྱིངས་]མེད་ན། །སྡུག་[བསྔལ་]ལ་སྐྱོ་བར་མི་འགྱུར་ཞིང༌། །མྱ་ངན་འདས་ལ་འདོད་པ་དང༌། །དོན་གཉེར་སྨོན་པའང་མེད་པར་འགྱུར། །སྲིད་དང་མྱ་ངན་འདས་ལ་དེའི། །སྡུག་[བསྔལ་དང་]བདེ[བ]འི་སྐྱོན་ཡོན་[རིམ་པ་ལྟར་]མཐོང་བ་དེ། །[རང་བཞིན་གྱི་]རིགས་ཡོད་[པའི་བྱེད་]ལས་ཡིན་[ཏེ་]གང་ཕྱིར་[སྡུག་བདེའི་སྐྱོན་ཡོན་མཐོང་བ་]དེ། །རིགས་མེད་དག་ལ་མེད་ཕྱིར་རོ། །ཞེས་དང༌། འཕགས་པ་དཔལ་ཕྲེང་གི་མདོར་ཡང༌། བཅོམ་ལྡན་འདས་གལ་ཏེ་དེ་བཞིན་གཤེགས་པའི་སྙིང་པོ་མ་མཆིས་ན་ནི། སྡུག་བསྔལ་ལ་སྐྱོ་བར་ཡང་མི་འགྱུར་ལ། མྱ་ངན་ལས་འདས་པ་ལ་འདོད་པ་དང་དོན་དུ་གཉེར་བ་དང་སྨོན་པ་ཡང་མེད་པར་འགྱུར་རོ། །ཞེས་པ་ལ་སོགས་པས་དོན་དམ་བདེ་གཤེགས་སྙིང་པོ་མེད་པར་འདོད་པ་ལ་སྐྱོན་མང་པོ་དང༌། ཡོད་པར་རྟོགས་པ་ལ་ཡོན་ཏན་མང་པོ་གསུངས་ཏེ། རྒྱས་པར་མྱང་འདས་ཆེན་པོ་དང༌། རྔ་བོ་ཆེ་ཆེན་པོ་དང༌། སོར་ཕྲེང་གི་མདོ་ལ་སོགས་པ་འཁོར་ལོ་ཐ་མའི་མདོ་མཆོག་ཤིན་ཏུ་ཟབ་པ་རྣམས་དང་རྒྱུད་སྡེ་ཟབ་མོ་རྣམས་བལྟས་ཤིང་མཉན་ནས་ངེས་པར་བདེ་གཤེགས་སྙིང་པོ་ལ་ཡིད་ཆེས་པར་བྱ་དགོས་སོ། །