རྟོག་མེད་སྤྲོས་བྲལ་གྱི་སྒོམ་པ་རྣམ་དག་བསྟན་པ།
དེའི་ངང་ལ་མཉམ་པར་འཇོག་པ་ཡང་བླ་མ་དམ་པའི་མན་ངག་ལས་རིག་པར་བྱ་ཞིང༌། ཤེས་བྱེད་ཀྱི་ལུང་ཡང་རྒྱལ་བའི་ཡུམ་ལ་སོགས་པ་རྣམས་ན་རབ་ཏུ་རྒྱས་པར་བཞུགས་སོ། །དེ་ཡང་ཤཱ་རིའི་བུ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་རྣལ་འབྱོར་དམ་པ་ཡིན་ཏེ། འདི་ལྟ་སྟེ་[དངོས་པོ་མེད་པའི་ངོ་བོ་ཉིད་དང་གཞན་གྱི་དངོས་པོ་]སྟོང་པ་ཉིད་ཀྱི་རྣལ་འབྱོར་རོ། །ཞེས་དང༌། ཤཱ་རིའི་བུ་དེ་ལྟར་སློབ་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་ཆོས་གང་ལ་ཡང་སློབ་པ[འི་རྟོག་པ་]མེད་དོ། །ཞེས་དང༌། དྲན་པ་མེད་ཅིང་ཡིད་ལ་བྱ་བ་མེད་པ་[ལ་མཉམ་པར་འཇོག་པའི་ཏིང་ངེ་འཛིན་མཆོག་]ནི་སངས་རྒྱས་རྗེས་སུ་དྲན་པའོ། །ཞེས་དང༌། [མཉམ་བཞག་ཏུ་]ཆོས་[ཀྱི་རྣམ་རྟོག་]ཀྱང་སྤང་བར་བྱ་ན་ཆོས་མ་ཡིན་པ[འི་རྣམ་རྟོག་]སྤོང་བ་ལྟ་ཅི་སྨོས། ཞེས་སོགས་དང༌། འདུ་ཤེས་[ནི་]ཚུ་རོལ་[འཁོར་བ་]ཡིན་ཞེས་འདྲེན་པས་ཡོངས་སུ་བསྒྲགས། །འདུ་ཤེས་རྣམ་པར་བཤིག་ནས་སྤོང་བ་ཕ་རོལ་འགྲོ། །ཞེས་སོགས་དང༌། སྐྱེ་བ་མེད་དང་སྐྱེ་བ་གཉི་གར་མི་རྟོག་པ། །འདི་ནི་ཤེས་རབ་ཕ་རོལ་ཕྱིན་མཆོག་སྤྱོད་པ་ཡིན། །ཞེས་དང༌། ཕུང་འདི་སྟོང་ཞེས་རྟོག་ནའང་བྱང་ཆུབ་སེམས་དཔའ་ནི། །མཚན་མ་ལ་སྤྱོད་[པ་ཡིན་གྱི་]སྐྱེ་མེད་གནས་[ཆོས་ཉིད་]ལ་དད་མ་ཡིན། །ཞེས་དང༌། སྣ་ཚོགས་འདུ་ཤེས་བྲལ་ཞིང་ཉེ་བར་ཞི་སྤྱོད་པ། །འདི་ནི་ཤེས་རབ་ཕ་རོལ་ཕྱིན་མཆོག་སྤྱོད་པ་ཡིན། །ཞེས་སོགས་དང༌། དེ་བཞིན་དུ་གཟུགས་ལ་སོགས་པ་ཆོས་གང་ལ་ཡང་མི་རྟོག་རྣམ་པར་མི་རྟོག་པ་དང༌། དེ་དག་གི་མཚན་མ་དང་རང་བཞིན་དུ་མི་རྟོག་རྣམ་པར་མི་རྟོག་ཅེས་སོགས་དང༌། ཆོས་དང་ཆོས་མ་ཡིན་པ་དང་དུས་གསུམ་དང་ཁམས་གསུམ་དང་ཕ་རོལ་ཏུ་ཕྱིན་པ་རྣམས་ནས་རྣམ་མཁྱེན་གྱི་བར་དུ་ཡང་དག་པར་རྗེས་སུ་མི་མཐོང་བ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོམ་པ་ཡོངས་སུ་རྫོགས་པར་འགྱུར་རོ། །ཞེས་སོགས་དང༌། དེ་བཞིན་དུ་ཅི་ནས་ཀྱང་སེམས་དང་སེམས་ལས་བྱུང་བའི་ཆོས་རྣམས་མི་རྒྱུ་བ་དེ་ལྟར་བསྒོམ་པར་བྱའོ། །ཞེས་དང༌། ཆོས་གང་ལ་ཡང་བདེ་སྡུག་དང༌། རྟག་མི་རྟག་དང༌། བདག་ཡོད་མེད་དང༌། ཞི་མ་ཞི་དང༌། སྟོང་མི་སྟོང་དང༌། མཚན་མ་ཡོད་མེད་དང༌། སྨོན་པ་ཡོད་མེད་དང༌། འདུས་བྱས་མ་བྱས་དང༌། སྐྱེ་མི་སྐྱེ་དང༌། འགག་མི་འགག་དང༌། དབེན་མི་དབེན་དང༌། དགེ་མི་དགེ་དང༌། ཁ་ན་མ་ཐོ་བ་ཡོད་མེད་དང༌། ཟག་པ་ཡོད་མེད་དང༌། ཉོན་མོངས་པ་ཡོད་མེད་དང༌། འཇིག་རྟེན་ལས་འདས་མ་འདས་དང༌། ཉོན་མོངས་རྣམ་བྱང་དང༌། བརྩོན་མི་བརྩོན་ལ་སོགས་པ་གང་དུ་ཡང་མི་མཐོང་ཞིང་མི་དམིགས་ལ་མི་འཛིན་པ་དང༌། མི་སེམས་པ་དང༌། མི་སྒོམ་པ་དང༌། མི་གནས་པ་དང༌། མི་འདྲེ་བ་དང༌། མི་ཆགས་པ་དང༌། མི་ཞེན་པ་དང༌། ཡིད་ལ་མི་བྱེད་པ་དང༌། མི་སྦྱོར་མི་འབྱེད་པ་ལ་སོགས་པ་རྣམ་པ་མང་པོས་རབ་ཏུ་རྒྱས་པར་བཀའ་སྩལ་པ་རྣམས་རབ་ཏུ་གྲགས་མོད་ཀྱི། [དེ་རྣམས་ཀྱི་དགོངས་པ་ཇི་ལྟ་བ་བཞིན་རྟོག་པ་ལ་]དཔལ་ལྡན་ས་བཅུ་པ་རྣམས་ཀྱི་མན་ངག་དང་ལྡན་པར་བྱས་ཏེ་བལྟ་བར་བྱའོ། །དེས་ན་འདིར་རྒྱ་ཆེར་མ་བྲིས་སོ། །